الجمعة، ١٦ محرم ١٤٢٩ هـ

!!! .. كريباً

.. كريباً
.. وحصريا
.. ومباشرة
.. من عمق الحدث
----
مذكرات طفل .. طخين
----
كريباً .. أفضل عمل أدبي عرفه الانسان .. والحيوان
----
مذكرات طفل .. طخين
----
كريباً .. أعظم رواية كتبت مآساتها الامبرياليه المهلبيه
----
مذكرات طفل .. طخين
----
.. الرواية التي قال عنها الأديب العالمي حسن زعبولا
انها بحق ..مذكرات طفل طخين .. طخين قوي بجد يعني
----
مذكرات طفل .. طخين
----
القصة التي قال عنها الناقد الكفيف زكي حلمبوحه
!! انا في حياتي .. ماشفتش كده
----
مذكرات طفل .. طخين
----
عمل حاز على اعجاب عم سيد البقال .. اللي باجيب منه سجاير فرط
----
مذكرات طفل .. طخين
----
القصه الحاصله على جائزة لجنة التحكيم الخاصه في مهرجان تفاهنه العسل
----
مذكرات طفل .. طخين
----
.. قصة من أروع قصص الرومانسيه
منى زكي : انا ماقدرش استغنى عنك
سوووو : طب وحلمي؟؟؟
منى زكي : حلمي اني اكون ملك ايديك
----
مذكرات طفل .. طخين
----
قصة من انبل قصص المخابرات المصريه
مصطفى شعبان : لازم تركز في التمرين .. وتعرف ازاي تفصل
سوووو : أفصل !! .. بس انا عمري ما ضربت مخضرات !!؟
----
.. عن عالم الرذيلة والجريمة نتحدث
خالد صالح : دول شوية عيال مجرمين .. وخلصو على بعض
سوووو : طب وجايبيني ليه ما دام خلصو على بعض؟؟
----
قصة رعب .. وخوف .. ويالهوي
دراكولا : انا لازم امص دمك
سوووو : البيه شغال في الحزب الوطني؟؟؟؟
--------
كريباً .. في مدونة عجوز وعندي تلاتين سنه
-
مذكرات طفل .. طخين
سوووو

الأحد، ١١ محرم ١٤٢٩ هـ

يعني ايه .. سوووو !!؟؟

هدى صاحبة مدونة (فبدال مانطق يا ولا .. لأ نضحك) .. واللي انا باعزها جدا جدا
.. يمكن باعزها لانها مقتبسه جمله من اجمل ما قال شاعرنا صلاح جاهين
واللي كل كلامه حكم بصراحه
.. ام هند .. هدى قالت في تعليقها على اخر موضوع .. انها مش فاهمه يعني ايه سوووو
.. وعشان نوصل مع بعض لمعنى الكلمه .. هنرجع مع بعض سبعتاشر سنه .. وتحديدا
لاول يوم لي في مصر .. بعد مارجعت من السعوديه
------
كنت طفل كلبوظ كده ولابس نضاره .. نفس شكلي دلوقتي مع اختلاف اني ساعتها كنت بشعر مش اقرع
ونتيجة لاني متربي طول عمري في السعوديه فمكنتش باعرف اتكلم مصري وكانت لهجتي سعوديه
اضافة الى كده ان المدرسين كلهم كانو فاكرين اني فعلا سعودي بعد ما حصل اني نزلت اولى اعدادي بعد ما قعدت في تانيه اعدادي لمدة اسبوع .. والمدرسين لما عرفو حكايتي واللي قلتها في الموضوع اللي فات .. تعاطفو معايا
وطلعو علي اسم .. احمد سعودي
فضل الاسم ده معايا لغاية الكليه .. وفضلو الناس بينادوني بيه لدرجة ان صحابي كانو فاكرينه اسمي فعليا
ولما كانو بيتصلو بي في البيت كانو بيسألو على احمد سعودي وش كده ..
ودي كانت بتعمللي مشاكل مع والدي ووالدتي الله يرحمها
لانهم اعتبرو اني باتبرأ من جنسيتي ومن اصلي المصري
------
.. لما اتخرجت من الكليه وجيت اتعامل مع التكنولوجيا واعمل ايميل
فضلت لمدة يومين باختار اسم يكون معبر عني مالقتش
خصوصا اني كنت عايز ابعد عن رمزية اسم سعودي دي عشان الناس ماتعتقدش خطأ اني سعودي الجنسيه ولا حاجه
.. الى ان وجدت ضالتي في اسم سوووو
.. واللى لو مكتوب بالانجليزي هتلاقو ان في اربع دوائر اللي هي بتمثل علامة عربيات أودي الالمانيه
رحت ضايف قبل الاربع دواير دول حرف (اس) .. فبقى شكلها كده
Soooo
واللي لو اتنطق طبقا لرمزية الاربع دواير هيتنطق سعودي أو
Saudi
لكن اللي حصل ان كل اللي يشوفه مايفهمش قصدي ويفتكره سوووو
------
.. ومن حوالي خمس سنين تقريبا كنت قاعد مع جماعة صحابي من النوبه .. وبنغني وبنهزر ومقضينها مراجيح
.. وزي ماتقولو كده كنت انا في اليوم ده مبسوط شويه وبهزر بزياده والناس كانت مبسوطه منني
لغاية ما واحد منهم قاللي ده انت سوووو بجد يا سوووو
!!! لقيت الكل بيضحك .. وانا الوحيد اللي مش فاهم حاجه
اتاري بقى كلمة سوووو في اللهجه النوبيه يعني مصيبه او كارثه .. مش كده وبس
دول فسرولي كمان اغنية سوووو يا سوووو .. حبيبي حبسوه
وانها فلكلور نوبي ومعناه يا مصيبتي يا مصيبتي .. حبيبي حبسوه
وان كوثر مصطفى مؤلفة الاغنيه خدت الجمله الاساسيه دي وركبت عليها بعض الكلمات ذات الاسقاط السياسي
.. وهشرحلكم ازاي
بس ثانيه اروح الحمام عشان انا من الصبح مادخلتش الحمام خالص
وعمال اشرب في شاي وقهوة ونيسكافيه وحاسس اني هنفجر
-------
ورجعنالكم تاني في برنامجكم .. كلمات ومعاني .. في اصل الاغاني
كلام اغنية سوووو يا سوووو بيقول كالتاتي
احم احم .. باتنحنح مش باخبط على حد في الحمام
.. احم احم
سوووو يا سوووو
حبيبي حبسوه
يعني .. يامصيبتي يا كارثتي
حبيبي حبسوه
***
حبيبي عايزلو سكر .. ومنين اجيبله سكر
باب الحكومه مسكر حبسوني وحبسوه
يعني .. الناس او الشعب واللي بيترمز ليه على انه الحبيب .. الشعب عايز سكر .. يعني عايز تموين من سكر وخلافه
والحكومه قفلت باب التموين ده .. وحبسو اللي بيغني .. وحبسو الشعب
***
حبيبي عايزلو ترتر .. ومنين اجيبله ترتر
ده الواد بياع الترتر حبسوني وحبسوه
يعني .. الشعب عايز يفرح ويلبس هدوم بترتر ويرقص .. بس الحكومه حبست اللي بيغني .. وحبست الشعب اللي عايز يرقص ويفرح
***
حبيبي عايزلو مرايه .. ومنين اجيبلو مرايه
دول عرفو بالحكايه .. وحبسوني وحبسوه
يعني .. الشعب عايز يشوف نفسه حلو ويبص لنفسه في المرايه .. لكن الحكومه لما عرفت ان الشعب عايز يبقى نضيف وبيطالب بالنضافه .. حبسو اللي بيغني .. وحبسو الشعب عشان عايز يشوف نفسه
***
حبيبي عايز ياسمينا .. ومنين اجيب ياسمينا
دول علّو السور علينا .. وحبسوني وحبسوه
يعني .. الشعب عايز يشم شوية هوا نضيف ويشوف خضره قدامه .. لكن الحكومه علّت سور الجناين .. ومنعت الزراعه والاستصلاح الزراعي .. وحبسو اللي بيغني .. وحبسو الناس في بيوت ومصانع وسجون
***
حبيبي عايزلو لولي .. ومنين اجيبلو لولي
دول سرقو اللولي يالولي .. وحبسوني وحبسوه
يعني .. الشعب عايز فلوس .. والحكومه سرقت الفلوس .. وحبست اللي بيغني .. وحبست الشعب اللي بيطالب بالحق
--------
دي مجرد اغنيه من اغاني منير .. مش مجرد اغنيه يترقص عليها وقت الافراح وخلاص
لأ
اغنيه فيها كلام كتير كتير كتيييير
ومش ممكن مقص الرقيب ياخد باله منه
اغنية محتاجه مننا اننا نقرا اللي مابين السطور
.. ولو انا فعلا عايز اعمل حاجه واقول حاجه .. حتى ولو مابين السطور
يبقى لازم ابقى سوووو
سوووو

الجمعة، ٩ محرم ١٤٢٩ هـ

حتى انت يا بلوج سبوت !!؟

بنت خيخه قوي واي كلام .. واللي شايفها من اكتر المدونين جدعنه ومش خيخه ولا اي كلام
.. علقت عندي في الموضوع اللي فات وكتبت في تعليقها
كل سنه وانت طيب يا سوووو
عشان دخلت عالبروفيل بتاعي لقت ان السن مكتوب جنبه واحد وتلاتين سنه
ولاني مواليد واحد اغطسطس كما اشرت في موضوع اغطسطس .. الفين وخمسه!!
ومولود في سنة سبعه وسبعين بعد الالف والتسعمائه .. يعني فعليا فعليا ماشي في الواحد والتلاتين لكن لسه ماقفلتهمش رسمي
ومش زي ما بلوج سبوت شايف اني قفلتهم وبقيت خلاص واحد وتلاتين سنه رسمي فهمي نظمي
يعني من الاخر بلوج سبوت بيستكردني وبيخمني عيني عينك وبيسرق مني سنه
!!!!!
.. لكن وقفت مع نفسي وخدت نفس سيجارة كولوباطرا بوكس وقلت يعني هي جات عليه هو لوحده
مانا ياما اتسرق مني سنين وانا قاعد باتفرج
اتسرقت مني سنة لما دخلت ابتدائي في السعوديه وانا عندي ست سنين ومش خمس سنين زي اخواتي اللي دخلو ابتدائي هنا في مصر ولا زي معظم صحابي ومعارفي .. حتى اللي كانو في السعوديه بس جابو مرسوم ملكي من اي امير يعرفوه .. وماكتر الله منهم هناك
ودي كانت اول سنه
واتسرقت مني سنة كمان لما جيت من السعوديه وانا واخد اولى اعدادي هناك لكن عدتها هنا تاني عشان اختلاف المناهج والمراحل التعليميه .. واللي كانت ممكن تتحل لو ابويا دخلني مدرسه خاصه لغات او حتى مدرسه خاصه عربي بدل ما ادخل مدرسه حكومي واحنا اصلا مالناش وسايط ولا كوسه في البلد
ودي كانت تاني سنه
واتسرق مني سنه كمان لما جبت في تالته ثانوي خمسه وسبعين وربع في الميه .. او تلتمية وواحد درجة من ربعمية واترميت في كلية تجارة بنها عشان فرقت معايا تجارة القاهرة على درجة واحده بس .. ورحت بنها قعدت فيها تمنتاشر دقيقة بس ورجعت وانا مصمم اعيد ثانويه عامه وادخل كلية فنون تطبيقيه
ودي كانت تالت سنه
واتسرقت مني سنه كمان لما وقفت قدام دكتور عندنا في الكليه وكان معترض اني باشتغل مسرح في الكليه ومش باحضر كل محاضراته .. مع العلم اني جبتله جواب من رئيس الجامعة اني باعمل نشاط جامعي ولازم الغياب ده يتشال .. لكن هو شافني فنان الشعب وراح مسقطني .. وسقط واحد تاني معايا في الدفعه لكن اللي سقط ده وبعد ما ظهرت نتيجة سقوطه واتعلقت النتيجه رسمي .. جاب واسطه وطلع السنه اللي بعدها عادي خالص
ودي كانت رابع سنه
يااااه
اربع سنين من عمري راحو حصيل فاضي
لأ
مش حصيل فاضي
لو ماكنتش دخلت المدرسه في السعوديه متأخر سنه ماكنتش هبقى اشطر واحد في المدرسه لان اخر دراسات علميه اثبتت ان دخول الطفل التعليم الابتدائي وهو عنده سن سنين بتخليه اكثر استيعابا من اقرانه اللي دخلو وهم عندهم خمس سنين
لو ماكنتش عدت اولى اعدادي في المدرسه هنا في مصر بعد ماجيت من السعوديه ماكانش المدرسين يبقو فاكرينني ويفضلو في الرايحه والجايه يقولولي انت ربنا هيكرمك والاقيهم بيتعاطفو معايا .. خصوصا مدرسة الرسم واللي حببتني في الرسم بزياده .. وخصوصا مدرس النشاط واللي فهمني يعني ايه مسرح ويعني ايه تمثيل
لو ماكنتش عدت ثانويه عامه وفضلت في كلية تجارة بنها او حولت لتجارة القاهرة ماكنتش هبقى مهندس ديكور وباشتغل في مجال انا باحبه من ايام ما كنت طفل بيرسم على اي ورق يبقى قدامه حتى لو كان ورق جرايد
لو ماكانش الدكتور ده سقطني وكنت نجحت بالكوسه ولا بالواسطه .. ماكنتش هقدر السنه اللي بعدها اثبت للدكتور اني طالب كويس وبيفهم لدرجة انه هو شخصيا بقى بيقوللي انت حسك الفني عالي جدا ولغاية دلوقتي لما بيشوفني هو بنفسه يقوللي ازيك يا فنان الشعب
فعلا .. انت تريد وانا اريد .. والله يفعل مايريد
وفعلا .. السن مش مجرد ايام وشهور .. السن ده لحظات بتعدي عالواحد
لحظات فرح وضحك .. ولحظات انكسار وألم
ملحوظتين بقى
اول ملحوظه .. بنات اخويا الصغيرين واللي لسه في رابعه ابتدائي وتانيه ابتدائي وكي جي تو .. بيدورولي على عروسه من المدرسات اللي بيدرسوهم وبيحبوهم في المدرسه .. لكن انا خايف اتجوز وابقى زي ابويا وازعق واتخانق مع وولادي لدرجة انهم يبقو بيتحاشوني زي مانا باتحاشاه دلوقتي
تاني ملحوظة بقى .. انا لسه برضه مسروق في السنه بتاعة البروفيل بتاعي
وديني مانا مسامحك يا بلوج يابن الحاج سبوت

سوووو

الأحد، ٤ محرم ١٤٢٩ هـ

سينماتك



خلصت شغل يوم السبت بدري واتصلت بالراجل اللي باعمللو الشغل عشان عايز اقوللو شوية حاجات لقيته سافر

ولأني مخنوق بقالي فتره ونفسي اعمل حاجه جديده قررت اروح سينما واهو اسخن شوية لاني المفروض ابدأ كتابة سيناريو حاجه كده بس عندي حالة ملل وانا عارف نفسي باسخن لما باشوف تجارب الاخرين

كانت الساعه سته وعشر دقايق .. خدت بعضي وركبت تاكس من قلعة الكبش لوسط البلد
ورحت تجمع الشباب في سينما اوديون
لقيتهم عارضين تلات افلام .. الجزيرة والتزاكر خلصت
هي فوضى والناس حرقتلي قصته ومش طالبه اشوف حاجه تخنقني بزياده
وفيلم امريكاني موجود عالنت وسهل انزله بس انا مكسل

افتكرت ساعتها كلام اخويا اللي شاف فيلم الجزيرة وفيلم خارج عن القانون
وقالي لو عايز تشوفهم ابقى اتفرج على فيلم خارج عن القانون الاول .. لانهم بيتكلمو في نفس التيمه الدراميه بس بيتناولوها بشكل مختلف
رحت واخد بعضي ومتجه على سينما مترو وحجزت تزكرة وعملت الموبيل سايلنت ودخلت اتفرج عالفيلم



بوستر الفيلم غريب قوي .. عبارة عن صورة لكريم العبد العزيز وكأنه بيمثل مونودراما ومافيش حد بيمثل معاه
الحقيقه الصورة او البوستر حفزني اشوف الفيلم
لاني حسيت ان فيه حالة بارانويا سواءا من كريم او من بلال فضل او من احمد جلال
وكمان لان الفيلم ما اتحرقش من خلال الاعلانات ولا الحوارات الصحفيه

من اول بداية الفيلم ومع بداية التتر واللي كانت الموسيقى بتاعته اعلى واروع موسيقى في الفيلم كللو .. قلت انا هتفرج على محاولة كويسه .. وهي فعلا كانت محاوله من كل النواحي ماعدا الكتابه
واللي انا شايفها اجمل مافي الفيلم .. سواءا كمعالجه لعالم المخدرات وكواليسه ..
او سيناريو لاحداث متشابكه ومترابطه بشكل كويس
لو مسكت الفيلم من ناحية التمثيل هاقول ان كريم عبد العزيز عايز ينسلخ عن جلد الشاب الظريف ويتحول لممثل النظرات واللي بنظرة من عينيه يقول فيها كلام كتير ..
بس لسه فاضللك سنه صغيره يا كريم .. وكويس انك بتحاول تطور من نفسك ومن ادواتك كممثل
مايا نصري ماحستش بيها خالص .. ولا هي ولا اي حد تاني .. حتى العبقري حسن حسني .. واللي في بعض اللقطات مابينه وبين كريم عبد العزيز حسيت انه عايز يصرخ ويقول يا ناس هاتولي دور بمعنى كلمة دور
مش مجرد توظيف لسني في اي فيلم
احمد سعيد عبد الغني كان كويس .. بس في لحظات كنت باحس انه بيقلد ابوه سعيد عبد الغني او بيقلد اي ممثل تاني
وتقريبا نسي انه ممثل ولازم يكون ليه طابع خاص بيه هو
افضل ممثلين من وجهة نظري هم محمود الجندي واللي بيظهر في اروع مشاهد الفيلم .. في الاول خالص .. وبيعمل دور ابو كريم عبد العزيز وبيتقتل في عملية اقتحام البوليس لبيته
بعد ما بيرمي السلاح خوفا على ولاده وعلى مراته .. يعني بيتقتل غدر بعد ما سلم نفسه ..
وبيشوف المنظر ده الطفل فادي خفاجه تقريبا او مش فاكر اسمه .. واللي بيعمل دور كريم عبد العزيز وهو صغير
واللي بجد اقنعني انه طفل اكبر من سنه ..
ودي كانت بداية الفيلم واللي انا شايفها بداية موفقه جدا وتخلي المشاهد يتعاطف مع الشخصية الرئيسيه ويتوقع منه كل حاجه .. يتوقع منه انه يتحول لارهابي
او انه يحاول ينتقم لموت ابوه عن طريق انضمامه لعالم الاجرام والخروج عن القانون
او انه ممكن يتوب لما يعرف ان ابوه كان تاجر مخدرات
تقييمي للعمل ككل .. سبعه ونص من عشره
الديكور والاكسسوارات والملابس .. سته من عشره .. لانه كان مزنوق مابين موقعين تلاته وما اهتمش غير باول لوكيشن واللي هو بيت كريم عبد العزيز وهو صغير .. اما بيته لما كبر فمافيش غير زاوية واحده بس وهي زاوية الليفنج ووراه الامريكان كيتشن وكانت ممكن تطلع احلى من كده
التمثيل .. سبعه من عشره .. وكريم عبد العزيز سته ونص من عشره لوحده
الموسيقى التصويريه وشريط الصوت .. تسعه من عشره
السيناريو والقصه والمعالجه .. تمانية ونص من عشره .. اكتر حاجه عجبتني فيه هي التلاعب بمسمى كلمة الحقيقة .. واللي بتتقال في اخر الفيلم على لسان حسن حسني او سيد السويسي .. الحقيقه مافيش حد يعرفها
الاخراج .. سته من عشره .. واللي انا من وجهة نظري انه كان محتاج وقت اكتر في بعض الاجزاء من ناحية التوجية والتوظيف
خصوصا اني ماحستش بالتصوير ولا تم استغلال منطقة قرية او بلد مايا نصري بمافيها من طبيعه وبحر ولم يتم توظيف ده لمصلحة العمل .. وكمان لاني حسيت ان الاكشن اللي في الفيلم مش قوي بمافيه الكفايه .. اللهم الا اول الفيلم واللي بجد كان قمة في التصوير


خلصت الفيلم وقلت اروح بيتنا لقيتني جعان وانا باحب اكل من عند الراجل اللي قدام سينما اوديون بتاع الكبده والسجق .. رحت هناك وكلت وشربت بيبس وانا معدي لقيت فيلم الجزيرة بيناديني رحت قاطع تزكرة .. ودخلت الفيلم




.. دايما كانت السينما بتتعامل مع الجو الصعيدي بشيء من الاستخفاف
وكانت بتتحاشى التعامل معاه وبتكتفي بالمسلسلات وبس
لما سمعت ان شريف عرفه هيعمل فيلم الجزيرة زمان وانه بيتكلم عن الصعيد تخيلت ان الفيلم هيبقى فيه من جو فيلم المومياء لشادي عبدالسلام .. وكان توقعي في محله الى حد ما
.. شريف عرفه اهتم بجماليات الصورة والابهار البصري اكتر من اهتمامه بتركيبة الشخصية الصعيديه نفسها
.. اكتفى بان الصعيدي بياخد حكمته من جدوده والاجيال القديمه
وكأن الطبيعه الصلبه والجافه اللي حواليه مالهاش تأثير
يرجع مرجوعنا للفيلم
البوستر او الافيش كان ثار عليه بعض النقاد واتهموه بانه مسروق من فيلم تاني .. وانا شايف انه عبط ولا مؤاخذه .. مش دفاعا عن الفيلم ولا حاجه .. لان شريف عرفه مش جوز عمتي مثلا ولا لان احمد السقا صاحبي ولا حاجه
بس لاني شايف ان البوستر كان اوقع من بوستر فيلم خارج عن القانون .. كفاية انه مركز الضوء على الشخصيات التانيه في الفيلم ومش مهمش دورهم زي ما في افيش خارج عن القانون اللي تحس انه بوستر او افيش لمطرب او لشريط كاسيت
مع بداية تتر الفيلم لقيت اني قصاد فيلم لشريف عرفه .. مش كمنتج ومخرج وصاحب فكرة الفيلم وبس .. لأ
لقيت اني قصاد فيلم لشريف عرفه واللي انا باعتبره صاحب مرحلتين سينمائيتين في كلاسيكيات السينما المصريه
واللي اقصده بانه صاحب مرحلتين .. اننا زمان كنا مقسمين الافلام الاكشن لمرحلة مابعد وماقبل سلام ياصاحبي
وبعدها مرحلة مابعد وماقبل الارهاب والكباب
وبعدها مرحلة مابعد وماقبل مافيا
.. واللي حسيته ان شريف عرفه عايز يعمل فيلم الجزيرة محطه تانيه
لكن ماطلعتش محطه قويه بمافيه الكفايه
.. الفيلم برضه بيتكلم عن جو عالم المخدرات في الصعيد
.. وبيبدأ تقريبا نفس بداية فيلم خارج عن القانون على هيئة فلاش باك
وانا باعترض جزئيا وكليا على الفلاش باك وكتابة قبل عشر سنوات و بعد عشرين سنه والحوارات دي على شريط السينما .. وشايف انها تعتبر عجز درامي من المؤلف والمخرج
الفيلم ككل افضل من فيلم خارج عن القانون في جزئيتين .. التمثيل والديكور
.. التمثيل كنت حاسس ان في بعض المشاهد تعتبر مبارايات تمثيليه في الاداء القوي
.. زي مشاهد محمود ياسين كلها واللي بجد السينما كانت محتاجه لحاجه كده في الوقت الحالي
.. وزي مشاهد محمود عبد المغني واللي انا باعتبره بيمثل من منطقه جميله جدا وصعبه جدا جدا
وهي السهل الممتنع
لكن طبعا بطل الاسلوب ده او السهل الممتنع هو الحوت خالد الصاوي واللي بجد كان افضل مافي الفيلم من عناصر التمثيل الواقعي
هند صبري وزينه بيحاولو ولو ان الدراما مش خادماهم بمافيه الكفاية .. مع ان لكل واحده منهم مجموعة مشاهد ماستر كان لازم يهتمو بيها ويؤدوها بشكل افضل من كده
باسم السمره اقنعني بانه صعيدي فعلا في مشهد هايل جدا ممكن يكون معظم اللي اتفرجو عالفيلم ماخدوش بالهم منه .. وهو المشهد اللي بيقوللو السقا او منصور فيه .. ان ده جهاز تشويش عشان يشوش على اجهزة التصنت اللي زرعتها الشرطه في بيت السقا
!!! وبيرد عليه بمنتهى البساطه والتلقائيه باسم السمره ويقولو .. انا مافاهمش يعني ايه جهاز فشفيش
وهو ده فعلا مدخل الشخصيه اللي بيؤديها باسم السمره
شخصية الصعيدي الغير متعلم واللي بيتسرع وبيحكم على الحاجه بعصبيه
حاول احمد السقا انه يرسم الابتسامه ونجح في ده في بعض مشاهد الفيلم .. وبالرغم من انه بيطارد خيال الراحل احمد زكي في معظم مشاهد الفيلم .. خصوصا في فيلم الهروب .. بداية من اللبس الاسود والهاي كول الصوف ورسمة الشخصيه نفسها والشنب الصعيدي
لكن انا شايف ان السقا بيحاول يتخلص من استمراره لتقليد احمد زكي بعد ما اتوجهله نقد عن ده في فيلم تيتو واللي كان بيحاكي فيه احمد زكي في فيلم الامبراطور
واللي كان لنفس المخرج طارق العريان برضه
محمد دياب او سيناريست الفيلم كان دايما بيحاول يخلق خيوط تانيه في الفيلم بدل الخيط الرئيسي لكن كنت باحس ان شريف عرفه واقف وراه بالعصايه وبيقولو ماتفتحش علينا فواتح يا دياب .. خلينا في الجزيره وماتطلعش براها
تقيمي للفيلم ككل .. تمانيه ونص من عشره
الديكور .. تمانيه ونص من عشره في حدود بيت الكبير او احمد السقا وبعض المشاهد التانيه زي المستشفى وزي وزارة الداخليه والمديريه
لكن كانت فيه مناطق تانيه قويه ممكن يطلع منها بشغل عالي .. خصوصا بيوت الصعايده الريفيه اللي في الجزيره
الموسيقى وشريط الصوت .. سته من عشره .. لدرجة اني كنت حاسس انها تحوير لشريط الموسيقا بتاع فيلم مافيا اكتر من ماهي المفروض كانت تبقى مستمده من الصعيد
اللهم الا في مشاهد المزمار خصوصا انه ماكانش ينفع يجيب الدي جي امجد شاكر
.. التصوير كان بادي حلو قوي خصوصا في مشهد تعرف الظابط طارق او محمود عبد المغني بالجزيره
لكن رجع تاني واتزنق من نفس عصاية شريف عرفه اللي ماسكها لمحمد دياب السيناريست
التمثيل ككل .. تسعه من عشره .. واللي انا شايف انه كان افضل مافي الفيلم .. وافضل من مشاهد الاكشن اللي كانت ممكن تتعمل بحرفيه اكتر افضل من شغل الجرافيكس .. خصوصا اننا في مصر لسه مش متقدمين في المجال ده
الاخراج .. شريف عرفه .. فعلا شريف عرفه بما فيه من خبرة واحتكاك وتوجيه للممثل وقدرة على السيطره على ادواته .. لكن الحلو مايكملش .. وفيه بعض الحاجات الصغيره برضه يا استاذ شريف
ملحوظه
الحقيقه هي مش ملحوظه واحده .. وانا عارف اني رغيت كتير في الكلام الاهبل اللي قلته .. بس انا عندي شوية ملاحيظ قبل ما اسيب البوست
اول ملحوظه .. يعني الواحد قبل مابيقطع تزكرة السينما بيشوف المكان اللي هيقعد فيه .. ايه لازمة انه لما يدخل السينما يستعبط ويقعد في مكان تاني ولما يجي العامل يقوللو ده مش مكانك يقوللو ببجاحه
مانا مش هشوف لو قعدت في المكان ده
!!!!!!
تاني ملحوظه .. ليه لبس الشباب دلوقتي بقى مقطع والبنطلونات طالعه مكرمشه وتحس انها طالعه من بق كلب .. وليه كل الشيرتات سواءا ولادي او شبابي بقى فيها ترتر وبتلمع وتحس انها بتاعة عالم خوجات؟؟؟؟
تالت ملحوظه .. كان قاعد جنبي واحد تقريبا في تخنتي .. وكان لابس سويت شيرت محزق وملزق وشكله وحش قوي قوي .. ومسقط البنطلون والبتاع الاندر اللي لابسه ولونه مشجر وغريب .. واللامؤاخه باينه
لزومه ايه الاغراء والقرف ده؟؟؟


سوووو

الجمعة، ٢ محرم ١٤٢٩ هـ

!! حدث في اتنين وسبعين .. بِـ شرطه

على غرار المشكلة اللي اتنشرت في بريد الجمعه واللي كانت باسم حدث في المترو .. وكان صاحب المشكله بيحكي عن موقف حصل قدامه في المترو لواحد مسلم متدين بيقرا من المصحف وهو في المترو .. وواحد تاني مسيحي او انا بافضل اقول عليه قبطي والجمع اقباط لان هي دي التمسيه الصحيحه لمسيحي مصر .. المهم اخينا المسيحي ده راح مطلع الموبيل ومشغل من عليه ترانيم كنائسيه .. والمسلم شاف كده راح معلّى صوته في القرايه .. قام القبطي علّى صوت الموبيل هو كمان .. وفضلو يعلو صوتهم قصاد بعض وكأنهم بيتخانقو .. وتطور الموضوع لخناقه فعليه بالبوكسات .. الى اخر المشكله
المهم .. كنت متجها الى الشغلانه اللي بعملها واللي هي عمل ديكورات فاخره في احد الترب او المقابر في السيده نفيسه
ولاني من سكان المعادي الجديده .. ومش معايا عربيه خاصه بي .. فالمشوار مقرف قوي خصوصا اني لو فضلت رايح جاي من هناك بالتاكسيات فهخلص السبوبه كلها ومش هيطلعلي اي مليم
ولاني من ساعة حوار (وهي امبابه مافيهاش بطيخ ؟!!؟) بطلت اركب المترو عشان مش ناقصه حوارات تفقع الواحد ولا ترفع الضغط وانا صاحب مرض خلقه والحمدلله
ولاني برضه طخين - بالطاء وليست تخين بالتاء كتفعيل اكثر قوه للفعل تخن - ومش باعرف اجري ورا اتوبيسات ولا اتمتع برشاقة موظفين الحكومه المصريه وقدراتهم الرهيبه على الجري المتواصل وراء اي اتوبيس او ميكروباص لمده خمس ست محطات متتاليه ثم القفز برشاقة الغزلان لركوب هذه المواصله .. وللاسف مابيستمتعش بالجلوس او الوقوف لمده كافيه لانه تقريبا قضى نص الطريق لبيتهم جري ورا الاتوبيس
فرحت متجه على موقف الاتوبيسات اللي في صقر قريش واللي مش بعيد عن منطقة سكني.. وركبت اتوبيس رقم 72 بشرطه والمتجه لمكان الشغلانه اللي باعملها
ولله الحمد والمنه اني لقيت كرسي فاضي او بمعنى ادق كنبه من اللي بتشيل نفرين فاضيه .. قمت قاعد ناحية الشباك واللي مارضيتش افتحه وقلت الدنيا برد والحياه مش طالبه تكتكه
وقبل ان يتحرك الاتوبيس لقيت شخص عملاق يرتدي جلبابا بنيا وعليه جاكته بني غامق ودقنه حاجه كده هيبه .. بتاع نص متر مثلا
وراح قايلي بصوت اجش .. السلام عليكم ورحمة الله وبركاته
ومع اول حرف من كلامه لقيت رائحه منفره ورائحة جثث محنطه بل ومتحلله من قبل جثث جدودنا الفراعين
رديت عليه السلام كاملا ورحت مدور وشي بعيد عنه عشان مش طالبه روايح عالصبح وخصوصا اني كنت فاطر فول بالبيض وطعميه وقرنبيط .. واي نسمه هوا ملوثه او غير سليمه هتخلي الاكل اللي كلته كللو يضيع علي ويطلع من بقي بس على هيئة عجينه ممتزجه ببعض العصاره الهضميه .. باختصار مش طالبه اني استنطق على رأي اخوانا الفلاحين
وبعد ان تحرك الاتوبيس وهو كومبليت وكل الناس قعدت عالكراسي خلاص راح اخينا اللي جنبي مطلع مصحف وقعد يقرا بصوت خافت .. وطبعا بقه مفتوح والروائح عماله تنتشر بزياده .. حاولت باستماته اني افتح الشباك اللي جنبي ماعرفتش لانه تقريبا متشمع بالشمع الاحمر عشان سكان الاتوبيس .. قصدي ركاب الاتوبيس .. مايتلجوش من البرد
طب وبعدين .. ده السكه طويله من صقر قريش للسيده نفيسه .. ولو فضلت الحياه بالريحه دي انا بجد هيطلع ترابنتيني
قلت يا واد خليك شاب شيك كده واعمل حركة ذوق من غير ماتحرج الراجل وتقوللو اقفل بقك اللي عامل زي مقابر الامام الشافعي .. ورحت مطلع من جيبي باكو اللبان الكلورتس الازرق واللي مش باعرف امشي من غيره .. وفاتح العلبه وخدت لبانه منها وعزمت عليه .. لقيته بصلي نظره جاده قوي وقاللي .. ماينفعش اتلّبن وانا باقرى كلام ربنا
ونظرلي نظرة صارمه .. كمن ينظر ليهود بني قينقاع
قلت بس على كده .. الحوار مش هيجيب اي فايده بل بالعكس النتيجه هتبقى عكسيه .. وفي نفس اللحظه اللي قررت ان التزم بالصمت واشغل تفكيري بأي حاجه وانا باكل اللبان واللي فعلا قلل من التأثير السلبي لرائحة مقبرة توت عنخ امون اللي اكتشفوها جنبي في الاتوبيس .. لقيت واحده ست شايله ابنها وملخومه بيه وجات وقفت جنبنا .. واخينا اللي بيقرا من المصحف ولا كأنه هنا خالص .. قلت ياد ابدأ بنفسك وخدلك ثواب عالصبح كده عشان ربنا يكرمك ويرزقك .. فقلتلها تعالي يا اختي اقعدي هنا .. وقمت من عالكرسي عشان اطلع لاني من الناحيه اللي جوه .. ولان اخينا اللي جنبي عملاق ومن نفس نوعية الناس اللي لو هم قاعدين في اخر كنبه في الاتوبيس وفاردين رجليهم لقدام .. ممكن صوابع رجله تخبط في ودان السواق .. فقلتله معلش بس ممكن تطلعني .. قام مزحزح رجلية للناحيه اللي بره شويه وما قامش .. وانا لاني طخين فرحت مخبط في رجليه واللي هي فعلا كانت لسه خابطه في الكنبه اللي قدامنا .. وبعد ماخرجت بعون الله وانا بازداد خنقه منه وبقول للست اتفضلي .. لقيته على نفس الوضعيه اللي هو فيها وعايزها تدخل جوه وتحكحك فيه
الست بصتله باستغراب وقالتله طب ادخل جوه بعد اذنك .. قام بصلها وهو بيقرا من المصحف وراح مشاور بايده وكأنه بيقوله خشي جوه من سكات .. ورجع يبص للمصحف عادي .. قمت انا قلتله ونبرة صوتي بقى فيها شيء من الخنقه على بعض من الغيظ على احساس بالقرف منه .. وقلتله ماتدخل جوه ياعم الشيخ عشان ماتلمسكش وهي بتدخل تقعد مكاني .. راح باصللي بنفس النظره السابقة الذكر وقافل المصحف ومخلي صباعه من جوا عشان الصفحه ماتضيعش منه .. وقاللي بصوت كللو تحدي
وهي ايه اللي مخرجها بره بيتها اصلا
!!!!!!!!!!!!!!
انا بطبعي صعيدي .. دمي حامي .. دماغي صرمه قديمه .. لساني بجح .. قليل ادب .. ومخنوق من الاشكال اللي زيه
فرحت ساحب شخره اهتزت لها اركان الاتوبيس بل وهيئة النقل العام بل والقاهرة الكبرى ككل
واعتقد اني في اثناء سحبي للشخره كدت ان اشفط العيل اللي الست شايلاه
وعقب هذه الشخره المدويه .. انفجرت في اخينا ده وقلتله بصوت عالي وكللو خنقه وغضب وقرف
ياعم اختلقلها العذر .. جوزها مسافر ولا عيان ولا لاقدر الله متوفي وماعندهاش اخوات ولاد وابوها راجل كبير في السن وابنها تعب ورايحه توديه المستشفى .. اذنبت في ايه يعني لما تنزل وتخرج من بيتها
وسبحان الله
تحول هذا الشخص من شخص عنيد دماغة مقفله معايا وكللو تحدي الى شخص اخر وديع .. لدرجة انه دخل جو جنب الشباك من سكات
وقعدت الست بابنها
بعدت عن المكان اللي انا فيه شوية ورحت سندت ضهري في القزاز اللي موجود ورا السواق واللي ملزوق عليه شوية اعلانات غريبه لمراكز تدريب تؤهل لدخول كلية شرطه على اعلان عن سماعة اذن خارقه تخلي الاطرش يسمع دبة النمله على اعلان عن شخص مفقود ويرتدي جلباب مقلم وشبشب بصباع
وفي اثناء ده بصيت ناحية الست اللي قعدت مكاني لقيتها استوعبت ان الاخ اللي جنبها مخزن حفريات في بقه وكل مابيفتح بقى عشان يقرا من المصحف .. الحفريات دي بتنادي باستماته وبتطلب المساعده من العالم الاخر
ابتسمت مابيني وبين نفسي واستغربت قوي من الشخصيه دي .. اه صحيح النهارده الخميس وممكن يكون صايم .. ورائحه فم الصائم احب الى الله من رائحة المسك .. لكن ايه اللي يمنع انه لما لقى الناس متضايقه من ريحة بقه وهو بيقرا القرآن انه يقفل بقه ويقرا بعينيه
محطة السيده نفيسه جات .. رحت للسواق وقلتله على جنب يا اسطى
نزلت .. وشقيت طريقي وسط الترب
عشان اعمل شغل الديكورات الفاخر .. لمقبرة احد أباطرة اللحوم في مصر
سوووو

الخميس، ٢٤ ذو الحجة ١٤٢٨ هـ

!!! جاد شويري .. ابو الفنانين


تحديث

دكتوري ضياء النجار بعتلي تعليق فيه لينكاية لموقع منشور فيه حوار مع جاد شويري وبيسألوه بخصوص الموضوع بتاع القناة الاباحيه اللي انتشرت الاخبار عنها
.. وكان الحوار كالتاتي

المحاور: لكنك لازلت معرضا للنقد؟
جاد شويري : لأن الناس تعودو على توجيه النقد لي مهما فعلت رغم أني مؤخرا قدمت اكثر من كليب مع عمرو مصطفى وايوان وماريا وجوانا ملاح ونيكول سابا ولم يجد الناس في اي منها شيئا لينتقدوه فحاولو اختراع مادة للنقد , وصدقني ان من يهوى النقد الدائم يبحث عن اشاعة لا اساس لها من الصحة ولو لم يجد ما يتنقده
المحاور: مثل شائعة افتتاحك لمحطة اباحية ؟
جاد شويري : اجل مثل هكذا اشاعه ولا ادري من اين اتت .. ويقولو لك انه لا وجود للدخان بدون نار , انا هنا أؤكد ان الدخان يتصاعد ولو لم توجد النار لان هذا يحصل معي
-------
لحد هنا وانتهى الحوار فيما يخص نقظه القناة الاباحيه .. لكن من جوايا تساؤل
هو ليه احنا لو حصلت حاجه زي كده هنسكت ومش هنتكلم .. وده بناء على رد معظم اللي علقو عالموضوع ده؟؟؟
وليه بقى عادي عندنا ان التلفزيون كجهاز .. اننا نلاقي على اي قناه اي حاجه ؟؟
وليه جاد شويري نفسه شايف ان الاشاعه دي دخان من غير نار؟؟
ولا هو مش معترف ان اللي بيعمله ده يعتبر فعلا نار .. وبتولع في الشباب؟؟؟


ملحوظة بقى عالسريع
يعني يا دكتور ضياء مابتعلقش عندي غير لما انزل موضوع غلط او من غير ما اكون متأكد منه ميه في الميه .. وباقي الحياه تبقى حارمني من زيارتك وتعليقاتك
طب حيث كده .. هديها اخبار امريكاني .. تفرقع .. لكن مالهاش لازمه
سوووو
------------------------------------------------
كنت احتسي جعتي المفضله .. وهي عصير الخروب .. واتمَزز بمَزتي المفضله .. وهي الفول السوداني ابو شيكولاته .. واستمتع بحالة السكر التي تنتابني .. واقلب في صفحات المواقع المختلفه عالنت .. اقرأ خبرا من هنا .. واشاهد صورة من هناك .. وفجأة
أن أن آآآآآآآآآآآآآآآآآآآآآآآآآآآآآآآن .. تش
قرأت خبرا .. خلاني عملت كده
وش واحد متنح على مذبهل وبيهز رقبته يمين وشمال عشان يفوق
سوووو : ايه ده بقىىىى .. هو الخروب ده مضروب خمره ولا ايييييييه ؟؟!!؟؟
الخبر بيقول
جاد شويري يعتزم اطلاق اول قناة اباحية
!!!!!!!!
.. شفتو .. نفس رد الفعل اللي حصللي بيحصل معاكم اهه
.. مش كده وبس .. تصريح جاد شويري بيقول ايه
جاد شويري : اعتقد انه حان الوقت للوطن العربي ككل ان يستمتع بمشاهدة الافلام البورنو بدلا من مشاهدة اخبار الحروب والدمار المحيطه بالوطن العربي
.. يابن الاييييييييه .. عملتها قضيه وطنيه خلاص
جاد شويري : كما اعتقد ان الالتفاف حول مثل هذه الافلام قد ينمي الثقافه الجنسيه لدى ابناء الوطن العربي
.. لا وحياة نينا .. هي ناميه خلقه .. ولو سألت عيل في الشارع هيقوللك التفاصيل حته حته
جاد شويري : ان مثل هذه القنوات وهذه الافلام تعتبر من منابر التنوير والعلوم في مختلف انحاء العالم .. ويجب علينا ان نتطلع لأن يكون لدينا منبرنا وفننا الخاص بدلا من مشاهدة كل ماهو خارج عن التقاليد والاعراف العربيه
!! حمره !! .. عربية ميه تمانيه وعشرين .. حمراء اللون
جاد شويري : وسوف يساعدني على انشاء هذه القناة مجموعة مستثمرين ورجال اعمال وفنانين ومخرجين وممثلين من الوطن العربي ككل .. ومن مصر والسعوديه على وجه الخصوص
لحد هنا ولقيتني بقول جاااااااااااااااااااااااااي
من مصر والسعوديه على وجه الخصوص؟؟؟؟؟!!!!!!؟؟؟؟؟
بقى بلد الحرمين الشريفين ومهد رسالة الاسلام .. وبلد الازهر الشريف منبر الاسلام على مر العصور .. يطلع منهم حد يساعد على انتشار الفحش والرذيله
؟؟؟؟؟
ومين اللي هيساعد ويمول المشروع ده لو كان حقيقه
؟؟؟؟؟؟؟
ويساعد ليه ويمول ليه اصلا والفضائيات مليانه قنوات اغاني مليانه بنات لابسين من غير هدوم
؟؟؟؟؟؟؟؟؟
ورجال الاعمال دول ازاي يقبلو ان بناتهم واهاليهم يشوفو حاجه زي دي .. وعادي خالص .. بيس يا مان احنا في رحله
؟؟؟؟؟؟؟؟؟؟؟؟؟
وهل بعد فتره نلاقي سينما بتعرض فيلم بورنو صريح اسمه (الوضع طائرا) .. بطولة الفنانه سونيا زغلله .. والنجم سعيد عجله
؟؟؟؟؟؟؟؟؟؟؟؟؟؟؟؟؟؟
وهو اللي بيحصل فينا من الحوارات دي من حوادث اغتصاب على حالات طلاق مش كفاية
؟؟؟؟؟؟؟؟؟؟؟؟؟؟؟؟؟؟؟؟
مش كفاية علينا هيفا ونانسي وروبي وامثالهم .. من اللي بيعرضو جسمهم قبل صوتهم
؟؟؟؟؟؟؟؟؟؟؟؟؟؟؟؟؟؟؟؟؟؟
مش كفايه علينا الوجوه اللي اكتشفهم جاد افندي من نانا ودانا وشوانا وهرانا
؟؟؟؟؟؟؟؟؟؟؟؟؟؟؟؟؟؟؟؟؟؟؟؟
مش كفاية علينا واحنا شعوب أصلا غلبانه
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
ولا مش مقدرين ان الشباب فعلا تعبانه
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
اه يا عيني يااااااانا
--------
ملحوظه
جاد شويري يلقبه البعض بانه ابو الفنانين .. انا بقى هلقبه .. ابو ام الفنانين ياعم
سوووو