الأحد، ٣٠ شعبان ١٤٢٩ هـ

تاني رمضان

.. تاني رمضان بيعدّي علي من بعد وفاتك يا أمي .. ربنا يرحمك برحمته
ويجمعني بيكي في جنة الفردوس وفي صحبة سيدنا محمد عليه الصلاة والسلام
اللهم آمين
سوووو

الثلاثاء، ٢٥ شعبان ١٤٢٩ هـ

(24)مذكرات طفل .. طخين

!!! المحطة الابّعه وعششين .. الدفع قبل الرفع
----------------------------------

دخلت سونيا على الاوضه اللي فيها العيل الطخين واللي سامبا وعيد بيوصلوله الاكل لغاية عنده .. واللي من كتر الاكل بقى حاجه كده ولا الدرفيل .. وبمجرد مادخلت عنده ولقته نايم .. قربت منه بالراحه قوي .. وقعدت جنبه على طرف السرير .. وراحت بايساه في شعره وعينيها بتنزل دمعتين .. وقربت من ودنه وبصوت واطي همست وقالت
سونيا : كلها بكره وترجعلك ضحكتك .. هانت .. هانت يا تامر يا حبيبي
-----
اول ماقعد التوربيني وحط رجل على رجل .. رحت قاعد انا كمان على كنبة بتاعة ميكروباص كانت محطوطه كأنها أنتريه .. لمحت نظرة استغراب منه .. وعنده حق .. انا نفسي مش عارف جبت الجرأه دي منين اني اقعد من غير ما استأذنه ولا حتى احط في دماغي اني قاعد مع مجرم وقتال قتله .. بس يمكن اللي باعملو نوع من أنواع غريزة البقاء .. بما اننا في غابه يبقى لازم اعيش بنفس اسلوب الحيوانات المفترسه .. قبل مايهجمو على بعض .. بيقعدو يبصو على بعض الاول .. بيشوفو ايه هي النقطة الضعف المناسبه اللي ممكن يهجمو عليها .. وبمجرد مالمحت في عينين التوربيني نظرة الاستغراب دي رحت قايل
سوووو : الحكايه بمنتهى البساطه مصلحه .. ونفعني واستنفع
التوربيني : - وهو بيبصلي من فوق لتحت ومستغرب - مصلحة ايه؟
سوووو : - بصوت هادي - طبعا انت عارف ان تجار السوق السودا بيهربو دقيق التموين دلوقتي وبيبيعوه لصحاب الافران الافرنجي .. يتعمل جاتوه وعيش فينو وبسكويت وكده
التوربيني : - وهو بيؤكد على كلامي - تمام
سوووو : انا بقى عارف طريق مخزن فيه بتاع عشره طن دقيق من بتوع التموين
التوربيني : - ابتدى يهتم بكلامي - مخزن من مخازن التومين يعني؟؟
سوووو : لأ .. مخزن بتاع ناس سارقينه من بتوع التموين
التوربيني : وانت جايلي عشان اسرقه؟
سوووو : لأ .. عشان تنقلو لمخزن تاني
رمى السيجاره اللي كان بيشربها بعد ماخِلصت .. وراح دايس عليها برجله .. وقام من عالكرسي اللي كان قاعد عليه .. راح ناحية زير ميه موجود جنب باب العشه من جوا الاوضه .. وراح شايل الكوز البلاستيك بايده الشمال .. وشال الغطا اللي عالزير بايده اليمين .. غطـّس الكوز في الزير وملاه ميه وطلعه من الزير .. حط الغطا عالزير تاني بايده التانيه .. شرب بؤ ميه وبعدها راح دالق شوية من الكوز على ايده وراح غاسل وشه .. ومدّلي ايدو بالكوز .. قمت من عالكنبه وخدت الكوز من ايده وشربت بؤ انا كمان .. الميه طعمها غريب .. مالحه وريحتها وحشه .. لما لمح في عيني نظرة القرف من الميه .. مد ايدو عشان ياخد مني الكوز .. لكن لمحت في عينيه نظرة ابتسامه وسخريه مني لما قرفت من طعم الميه .. قمت رافع الكوز على بؤي تاني وشارب كل الميه اللي فيه .. وبعدها رحت ماددلو ايدي بالكوز .. وبكم القميص في ايدي التانيه بامسح بؤي .. شافني كده .. استغرب واتمسحت الابتسامه من على وشه .. وبان عليه الاهتمام بي
التوربيني : طب انت ايه مصلحتك في ان الدقيق يتسرق من المخزن اللي هو فيه ويطلع على مخزن تاني !!؟
سوووو : مصلحتي ان اللي هياخد منك الدقيق من ناحيتي
التوربيني : هممم .. بس الدفع قبل الرفع
سوووو : دفع ايه ورفع ايه ؟؟
!!! التوربيني : دفع حقي في النقل .. ورفع البضاعه وتوصيلها للمخزن التاني
سوووو : لا من الناحيه دي ماتقلقش .. انت مش هتاخد ولا مليم
التوربيني : - وهو مفنجل عينيه وبيطق شرار - نعم يا اخويا .. شايفني مؤسسة خيريه ولا تبع هيئة النقل العام .. ولا تكونش فاكرني هنقلهملك بـ توك توك !!؟؟
سوووو : لو سمعتني لغاية الاخر هتفهمني
التوربيني : قول ياسيدي وسمّعني
سوووو : هتاخد اللي أهمّ من الفلوس
التوربيني : مافيش أهمّ من الفلوس
سوووو : لأ في
التوربيني : ايه بقى ان شاء الله ؟؟؟
سوووو : الخوف مش هيعرف طريقه ليك .. تعمل كل اللي انت عايزه كأنك ماضي عقد مع ابليس
هرش التوربيني في قفاه وبان عليه انه بيفكر .. طلع سجاره تانيه ملفوفه من علبة السجاير اللي في جيبه وولعها بعود كبريت .. ونفخ في عود الكبريت وهو بيقولي
التوربيني : ومين قالك اني مش ابليس نفسه !؟
سوووو : ابليس مايقعدش في عشه وهو محاوط نفسه بناس يحموه .. ابليس مايخافش من أي حد مهما كان هو مين .. لكن انت خايف مني وانا حتة عيل طخين
ضحك التوربيني قوي وهو بينفخ الدخان .. قعد عالكرسي اللي كان قاعد عليه في اول مابتدينا كلام وبَصّـلي وهو بيبتسم
التوربيني : وايه اللي يخليك متأكد اني مش هسرق الدقيق وانصب عليك .. ولا حتى اقتلك واتاوي جتتك !!؟
سوووو : - وانا بابتسم - عشان حاجتين
التوربيني : اول حاجه
سوووو : مش هتعرف تبيع الدقيق ولا هتعرف تحطه في مكان متداري .. ولو جبته هنا ممكن الناس اللي معاك يلعب الشيطان بيهم ويفكرو يبيعوه لحسابهم .. وحتى لو الناس بتوعك ماعملوهاش .. الناس اللي حواليك لو شمّو خبر وعرفو ان في دقيق هنا .. هتلاقيهم اتلمو عليكم عشان ياخدو الدقيق .. خصوصا انهم جعانين .. والجعان مش بيخاف على عمره
التوربيني : - وهو بياخد نفس من السيجاره بالراحه قوي - وتاني حاجه
سوووو : انك هتعرف تبرطع براحتك .. وانت متطمن ان عين الحكومه مش هتعمللك حاجه
التوربيني : - باين عليه الاستغراب - ازاي؟؟؟؟
سوووو : اللي هياخد الدقيق منك .. ناس كبيره قوي في البلد .. ناس مسنودين وبيحبو يخدمو رجالتهم .. واللي انت هتعملو ده عربون محبه .. جـِميل هايشيلوهولك .. وواحده بواحده .. وانت مافيش أكتر من واحداتك
سند التوربيني ضهره عالكرسي وعينيه بتلمع بالشر .. خد نفس من السيجاره وهو بيسمع كلامي لكن عقله ماكانش معايا .. قربت منه ووقفت في ضهر الكرسي اللي هو قاعد عليه .. وابتديت اتكلم بصوت هادي وواطي
سوووو : متخيل يعني ايه انك تقدر تبيع مخدرات من غير خوف وقلق .. اللي مايعجبكش تتاوي جتته وانت متطمن ان القضيه هتتقيد ضد مجهول .. تبلطج عالناس وانت مرتاح .. تسرق ده وتنهب ده .. شغلانه ورا شغلانه هتلاقي نفسك قـَبّيت لفوق .. فوق في العلالي
التوربيني : - وكأنه بيكلم نفسه - ساعتها هبقى الملك على كل الناس .. وماحدش يقدر يقولي تلت التلاته كام
لما حسيت انه استوى وصدق كلامي رحت مطلع الموبيل واتصلت بـ خالد صالح
سوووو : خالد باشا معايا ؟؟؟
خالد صالح : - وهو مرتبك - هو في حد جنبك ولا ايه يا سوووو !!؟
سوووو : ايوه ياباشا .. انا معايا اللي هينقل الدقيق من المخزن اللي هو فيه ويوديه للمخزن اللي قلتلك عليه .. وعايز يسلم عليك
-----
ندى : هو شمهورش وسوووو اتأخرو ولا انا بيستهيألي؟
بشله : لا ياختي بيستهيألك .. وبعدين انتي خايفه على مين فيهم .. سوووو ولا شمهورش !!؟
ميمون : - وهو باصص لـ بشله وبيغمزله - شمهورش مين اللي هتخاف عليه .. ماهو متلطّم معانا في الشوارع بقاله كام سنه وهي مش طايقاه اصلا .. اكيد طبعا خايفه على سوووو
بشله : - وهو بيغمزلها - سيدي ياسيدي
ندى : - وهي وشها محمر من الكسوف - لا بقولكو ايه .. الحكايه ومافيها اني صعبان علي سوووو وقلقانه عليه مش اكتر من كده
ميمون : لا والنبي - وراح مقلد صوت ندى وحركاتها - خد بالك من نفسك يا سوووو
بشله : - وهو بيقلدني وعامل نفسه طخين - انا مش عشاني .. انا عشان طلخا
وقعدو يضحكو ميمون وبشله .. وندى وشها مكسوف وعماله تضربهم وتجري وراهم .. وفجأة .. طلع دراكولا وهو قالع ويادوب لابس عباية دراكولا اللي بيلبسها عادي .. بس لابسها على اللحم .. وحاطط فرده كاوتش على بطنه كأنها عوامه
دراكولا : - وهو مبتسم - هااا .. ايه رأيكم ياعيال؟؟
ميمون وبشله وندى : ههههههههههههههههههههههههههههه
دراكولا : - وهو متنح - بتضحكو على ايه يا عيال !!؟
ميمون : ايه اللي انت عامله في نفسك ده؟؟
دراكولا : انتو مش بتقولو سوووو هياخدني ونروح نصيّف !!!؟
بشله : تقوم تعمل في نفسك كده !!؟
دراكولا : لا اصل انا مابعرفش اعوم .. وقلت بدال ما اغرق منه ولا حاجه ومايعرفش ينقذني .. البس العوامه دي
ندى : مابتعرفش تعوم .. يالهوي يالهوي .. مش عيب عليك تبقى دراكولا كده ملو هدومك ومابتعرفش تعوم
بشله : - وهو بيقاطعها - قصدك ملو عوّامته
الكل ماعدا دراكولا : هههههههههههههههههه
دراكولا : بتتريقو علي عشان مابعرفش اعوم .. طب وانا ذنبي ايه .. ماهو على ايامنا ماكنش فيه بحر ولا بلاجات .. وكنا مركزين في شغلنا ومابنروحش نتفسح زيكم دلوقتي
ميمون : يا دراكولا ياحبيبي .. مانت عايش بقالك كتير بعد مابقيت دراكولا .. ماتعلمتش ليه العوم طول المده دي؟؟
دراكولا : ماكنتش لاقي اللي يفسحني ولا اللي يبقى صاحبي .. ماحدش فكّر في مره انه ياخدني معاه ونطلع نتفسح ونضحك ونلعب .. الكل كان بيخاف مني .. وعشان كده بعدت عن الناس كلها وجيت اعيش في المخزن ده .. عشان ابقى لوحدي .. ولما اتعرفت عليكم وبقيتو صحابي .. لقيتكم مافكرتوش تفسحوني ولا حتى تقولولي تعالى نخرج نلعب استغمايه .. عارفين لما قولتولي ان سوووو عازمني نروح نصيف ونبلبط في الميه .. فرحت قوي .. فرحت اني بقالي صحاب عايزين يلعبو معايا .. لكن اديكم اهو بتضحكو علي وبتتريقو علي عشان مش باعرف اعوم
ندى : خلاص ياعم .. خلاص بقى
ميمون : حقك علينا يا دراكولا .. ماتزعلش مننا
دراكولا : - وهو بيمسح دمعه نزلت من عينه - انا ماقدرش ازعل منكم - وهو بيبصلهم وبيبتسم - انا باحبكم قوي
وفي اللحظه دي دخلو اتنين - اللي كانو بيسرقو الدقيق وبيحطوه في المخزن - عليهم .. وفي جزء من الثانيه راح دراكولا حاضن العيال وطاير بيهم في سقف المخزن وبقى مشعلق رجليه في كمره حديد وحاضن العيال بايديه عشان ماحدش من بتوع المخزن يشوف ان في حد كان موجود .. دخلو الاتنين الحراس جوا وبصو عالدقيق
الأولاني : كويس ان الشِـوله ماحصلهاش حاجه
التاني : يحصلها حاجه ازاي .. هو في حد في البلد كلها يقدر يهوب ناحية هنا .. انت باين عليك مش عايش في مصر
الاولاني : اه والله عندك حق .. ده المكان ده آخر حاجه ممكن حد يفكر فيه ولا يشك ان صحابه ممكن يعملو حاجه غلط
التاني : معلوم .. طب ده حتى صحابات المخزن ده ناس ولاد عز من يومهم
الاولاني : لأ وايه .. وكبيرهم نضيف نضيف يعني
التاني : والاكبر منه .. ربنا مبارك في فلوسه .. نياهاهاهاهاع هاع هاع
وخرجو من المخزن وهم بيضحكو .. وبمجرد ماخرجو راح نازل دراكولا بالعيال عالارض بالراحه قوي
ميمون : طب والله اللي بيحصل فينا ده حرام
بشله : دي زي ماتكون عزبة ابوهم وبيقسموها على روحهم
ندى : طب واحنا ايه اللي نقدر نعملو ؟
دراكولا : انتو السبب
ميمون : السبب في ايه بقى ان شاء الله !!؟
دراكولا : ايوه انتو السبب .. لو كنتو وقفتو للي سرقوكم وخدتو حقكم بايديكم من أول مره .. ماكانوش يعملو اللي بيعملوه فيكم
بشله : نقفلهم ازاي بس .. دي البلد كلها معاهم
دراكولا : هم صحيح البلد كلها معاهم دلوقتي .. لكن بكره .. انتو اللي هتبقو البلد
-----
امي : بالك ياحاج
ابويا : مالو؟
امي : هو مين اللي مالو؟
ابويا : بالي
امي : لا مش قصدي بالك اللي هو بالك .. قصدي اني اقولك بالك يا حاج .. تقوم انت تقولي خير يا حاجه
ابويا : ياسلام .. ده في عُرف مين بقى الكلام ده؟؟؟
امي : في عُرف العوايد والتقاليد .. احنا اتربينا لما حد يقول لحاد .. بالك يا حاج .. يقوم الحد ده يقولو .. خير يا حاجه
ابويا : ماشي ياستي .. خير يا حاجه ؟؟
امي : بالك انا نفسي في ايه ؟؟؟
ابويا : في ايه !!!؟
امي : نفسي لما نرجع البيت .. نكلم سميحه اخت محروس ونيجي نزور سونيا .. واهو بالمره يشوفو بعض هي ومحروس
ابويا : انتي لسه حاطه الموضوع ده في دماغك؟
امي : اصلها اميره قوي يا حاج
وفي اللحظه دي بتدخل سونيا هي وسامبا وعيد .. وبمجرد مايدخلو يتجه سامبا عشان يربط ايدين ابويا ويكممه ويربط حتة قماش على عينيه
امي : - باندهاش واستغراب - خبر ايه يا سونيا .. مالك داخله علينا بالحنجل والمنجل ليه !!!؟؟؟
سونيا : بلا حنجل بلا منجل .. خلاص .. وقتكم خلص معانا
وتشير سونيا لـ عيد ان يقوم بربط ايدين امي ويكمم بؤها ويربط حتة قماش على عينيها
سونيا : - وهي بتبتسم ابتسامه شريره - غمي عينيهم .. خلي مستقبلهم غامض .. نياهاهاهاها .. نياهاهاهاها .. نياهاهاهاها .. نياهاهاهاها
سامبا : - وهو متنح وبيميّل على عيد - هي مالها قلبت كارتون ليه؟؟؟؟
-----
خرجت انا والتوربيني من العشه الصفيح ولقيت شمهورش واقف مع الناس اللي بيحطو ورق الشجر في قراطيس ورق وكأنه بيساعدهم .. مع انه عمال يسهيهم وياخد كل شويه كبشه من الورق الاخضر ويحطها في جيبه .. وبمجرد ما شافني انا والتوربيني خارجين قام مفزوع ومستغرب عشان كان متخيل اني مش هاخرج سليم .. التوربيني بص عاللي واقف على باب العشه وعلى اللي بيأمن العشه من ناحية الحاره وراح مشاورلهم .. قامو جايين وقاللهم
التوربيني : عايزكم تتصرفو وتشوفولنا عربية نقل .. وتشوفولنا قد اتنين تانين من رجالتنا .. عندنا مصلحه النهارده بالليل
سوووو : - وانا بقاطعه - لا النهارده مش هينفع .. خليها بكره الجمعه عالساعه خمسه ولا سته المغرب
التوربيني : ليه بس ؟؟
سوووو : عشان المخزن اللي هننقل فيه الحاجات يكون فضي من الحاجات اللي فيه
التوربيني : - وهو بيبص على رجالته - خلاص .. اتصرفو في اللي قلتلكم عليه النهارده .. وجهزو نفسكم لبكره
سوووو : وشمهورش هايجي بكره ياخدكم عالمخزن وتعملو الحوار
التوربيني : لا ياحلو .. لازم تبقى معانا
سوووو : ماتقلقش .. عندي مصلحه في مكان تاني .. هخلصها واجي اخلص عليكم
التوربيني : تيجي ايه ؟؟؟
سوووو : قصدي اخلص معاكم
-----
!! مصطفى شعبان : - وهو بيقلب في شوية ورق في ايده - غريبه قوي
منى زكي : - وهي بتنزل نسخة ويندوز اكس بي على جهاز توفيق بيه - هو ايه الغريب !!؟
مصطفى شعبان : انتي عارفه ان الدكتور رفعت اسماعيل كان ليه واحد صاحبه ساكن في فيلا قدام مدرسة سوووو في المعادي !!؟
منى زكي : طب وايه الغريب في كده ؟؟
مصطفى شعبان : الغريب ان الفيلا دي قبل مايسكن صاحب الدكتور رفعت فيها .. كانت طالعه اشاعات انها بيت مسكون بالاشباح وحاجات في السكه دي
منى زكي : وهو الدكتور رفعت اسماعيل مالو ومال الاشباح والبيوت المسكونه ؟؟
مصطفى شعبان : يا بنتي اصلا اصلا .. الدكتور رفعت اسماعيل عايش عالهسس ده
منى زكي : طب برضه ايه الغريب في كل اللي بتقوله !!؟؟
مصطفى شعبان : الغريب ان رفعت اسماعيل .. راح الفيلا دي واستضافو صاحبه بعد الحوار بتاع سوووو لما حصلت المشكله وجات قوات الامن وافتكرو انه ارهابي
منى زكي : - وهي بتعمل ريستارت للجهاز عشان نسخة الويندوز نزلت خلاص - عادي يا مصطفى .. ممكن يكون مجرد صدفه
مصطفى شعبان : طب وهو من الصدفه برضه .. ان بنت صاحب الفيلا .. تختفي في ظروف غامضه في نفس التوقيت ده .. وماتظهرش غير بعد ما الحوار بتاع سوووو في المدرسه خلص .. والناس بقو معتبرين سوووو شخص عادي
منى زكي : - وهي بتبص على توفيق عبد الحميد - هو الجهاز مش متعرّف ليه ؟؟؟
توفيق عبد الحميد : مش متعرّف على ايه ؟؟؟؟
منى زكي : ماهو كل جهاز لازم يبقى عارف ايه الحاجات اللي بتشغلّو
توفيق عبد الحميد : ايه ده .. هو الجهاز مش عارف اني انا اللي باشغلو .. طب ده انا حتى رئيس الجهاز !!؟؟
-----
شمهورش : وكتاب الله انا مافاهم حاجه
قال شمهورش الجمله دي واحنا مروحين من عند التوربيني وراجعين عالمخزن اللي فيه دراكولا والعيال .. وانا كنت مركز في حاجه تانيه خالص وماكانش عندي وقت ولا طولة بال اني اشرحلو الحوار كللو .. وقلت
سوووو : استنى بس لما نروح المخزن وانا افهمكم الليله كلها
شمهورش : انا خايف عليك يا صاحبي
سوووو : لو كل حاجه مشيت زي مانا حاطط في دماغي .. يبقى الحياه هتبقى فل
طلّع شمهورش شوية ورق شجر اخضر من جيبه .. وابتدى يلف سيجاره .. وبعد ماخلص لف راح مولعها
سوووو : هو ايه ده صحيح ؟؟؟؟
شمهورش : ده سانجو بلابل
سوووو : مين ياخويا ؟؟؟؟
شمهورش : سانجو بلابل .. يعني بانجو
سوووو : طب ماتقول بانجو ياعم .. قال سانجو بلابل قال
شمهورش : سانجو بلابل دي بالسُغه لمون
سوووو : لا ابوس ايدك بالراحه علي .. ايه السُغه لمون دي كمان؟؟
شمهورش : يعني بلغة السيم .. طريقة جديده في الكلام بنقول بيها كلام لبعضينا لما نبقى مش عايزين اللي حوالينا يفهمونا
سوووو : طب ودي ازاي بقى؟؟
شمهورش : بسيطه .. بنشيل اول حرف من الكلمه ونحط مكانه حرف السين .. والكلمه اللي بعد الكلمه دي .. بيبقى اول حرف فيها هو نفس الحرف اللي شيلناه
سوووو : لا ياراجل .. يعني لو عايز اقول (بوليس كبسه) .. هقول (سوليس بربر سبسه كركر) مثلا ؟؟
شمهورش : بالسبط ظاظا سده كركر
سوووو : يعني بالظبط كده !!!!؟
شمهورش : عفارم عليك
سوووو : قصدك سفارم عبده سليك عرعر
-----
انا باكره اسرائيل
انا باكره اسرائيل
وهييييييييييييييه
سونيا : الو
دكتور رفعت : ايوه يا سونيا .. ايه الاخبار عندكم ؟؟
سونيا : خلاص يابوص .. جهزنا كل حاجه
دكتور رفعت : ابوس ايدك ماتقوليش بوص دي تاني .. يابنتي خلاص الناس اللي بيقرو المذكرات عرفو انا مين خلاص .. قوليلي يا دكتور وقصري في الحوار
سونيا : حاضر يا دكتره
دكتور رفعت : لأ مش معنى اني اقولك بلاش بوص تقومي تاخدي علي وتقولي دكتره .. احترمي نفسك احسن اعمللك عمل على رجل تنين اسطوري واولع فيه بتلاته لتر بنزين خمسه وتسعين
سونيا : لا وعلى ايه تغرم نفسك وتجيب بنزين خمسه وتسعين .. خليها بنزين تمانين وخلاص
دكتور رفعت : هو حد لاقي البنزين التمانين دلوقتي .. تقوليش بقى مخدرات !!؟
سونيا : اه والله عندك حق .. ده انا جوز بنت خالتي شغال على تاكس وبيموّن ببنزين تسعين .. وشرط عليه انه قبل مايسلم التاكسي للي شغال بعديه .. لازم يفوّل العربيه
دكتور رفعت : ياااه .. ده خراب بيوت
سونيا : لأ ماهو ساعات بيجيب شوية ميه ولا زيت تموين .. ويروح دالقها في التانك
دكتور رفعت : طب والعربيه ماتبوظش على كده ياسونيا ؟؟
سونيا : احنا مالنا .. هي كانت عربية ابونا .. واصلا صاحب التاكس ده عنده تاكسيين تانين واربع تكاتك وميكروباظ مكيف .. يعني مقتدر ومش هيفرق معاه لما تاكس يحتاج يتصلح
دكتور رفعت : هممم .. حلو الواد جوز بنت خالتك ده .. ابقي هاتيه معانا في الشغلانه الجايه
سونيا : حاضر .. هقوللو يجيب السي في بتاعه .. ونعمللو انتر فيو
دكتور رفعت : المهم .. بكره انا وانتي هناخد بتارنا من سوووو ومن اللي عمله فينا
سونيا : وانا مش قادره استنى لبكره
!! دكتور رفعت : بسيطه .. اضربيلك قزازتين بيره على شريط صراصير .. هتلاقي نفسك بكره
-----
يتبع

سوووو

الخميس، ٢٠ شعبان ١٤٢٩ هـ

!!! أخبار سوووويه

أخبار محلية

أعلنت منظمة (الماس الكهربي الإرهابية) مسئوليتها التامة عن العمل التخريبي الذي أصاب مبنى مجلس الشورى .. وتجدر الإشارة إلى أن قوات المطافئ والإسعاف قد سارعت بالتحرك الفوري للإنقاذ بناءا على توجيهات السيد الرئيس والسيد الوزير والسيد البقال .. وكانت بالفعل في موقع الحادث في وقت قياسي .. في ساعة ونصف .. مع إن المكان في شارع القصر العيني .. ويوم الخميس كمان .. يعني أم الزحمة كلها

وأضاف المتحدث الرسمي لمنظمة (الماس الكهربي الإرهابية) .. بأن المنظمة مستمرة في عملياتها التخريبية طول ما النور شغال في المصالح الحكومية أربعة وعشرين ساعة في اليوم
!!! حتى لو كان أجازة رسمي
----
في تطور سريع عقب الإعلان عن اختبار المدرسين للحصول على الكادر الوظيفي .. أعلنت المراكز العلمية والسناتر - جمع سنتر - المخصصة للدروس المجمّعة والدروس الخصوصية .. أعلنت حالة الطوارئ القصوى للظروف الحالية .. خاصة بعدما صرح أكثر من مدرس بأن الأسئلة شديدة الصعوبة وليست في متناول الأستاذ المتوسط .. كما أنه لا يوجد مراجع وملخصات مثل التي يشتريها الطلبة
هذا وقد قالت الهيئة العامة لكتاب (سلاح التلميذ) بأنها إذا كانت ادت للتلميذ سلاح .. يبقى هتدي الأستاذ ترسانة أسلحة
!!! بس على الله يعرفو يدوسو عالزناد ومايعملوش برشام
----
أخبار فنية

نفى الفنان الشيعبي الشهير عبد الباسط حموده .. اتفاقه مع عامر جروب لإحياء إحدى حفلات الشتاء في جولف بورتو مارينا .. خاصة بعد انتهاء موسم الصيف بحفلة المطرب عمرو دياب

وقال عبد الباسط في تصريحة الذي نقلة مدير أعماله لمجموعة عامر جورب
عمرو دياب قال انا عايش ومش عايش .. وانا بصيت لروحي فجأه تعبت من المفاجأه :
يعني أنا مش أقل من عمرو دياب .. هو انا مش عارفني !!!؟
----
صرحت الممثلة المعتزلة صابرين والممثلة المعتزلة حلا شيحه والممثلة المعتزلة عبير جلال الشرقاوي والممثلة المعتزلة سهير رمزي والممثلة المعتزلة سهير البابلي .. بأنهم بصدد الاشتراك في عمل فني يجمعهم جميعا
وسوف يحمل اسم مؤقت (المعتزلون .. على باب مصر) .. بس على الله الناس تتفرج عليه
!!! وماتعتزلش التلفزيون
----
أخبار رياضية

عقب الفضيحة المدوية وخروج أبطال مصر من الدورة الأولمبية بدون أي ميداليات سوى ميدالية واحده فقط برونزية - حتى تاريخ صدور الكلام دهو - صرّح رئيس البعثة المصرية بأنهم لم يسافرو لكسب بطولات .. لأنهم أبطال من زمان .. وتاريخ الفراعنة يشهد بكده

هذا وقد أعلنت خطيبة البطل الاوليمبي (هشام مصباح) والحائز على الميدالية البرونزية في رياضة الجودو.. بأن الميدالية البرونزية سوف تكون شبكتها لإتمام العرس
!!! بس ياخوفي (هشام) يلعب الدنيئة ويهدي الميدالية للسيد الرئيس
----
عقب إطلاق قناة النادي الأهلي .. صرح مسئولو نادي الزمالك بأنهم سوف يطلقون هم أيضا قناة رياضية .. ومافيش حد احسن من حد
وليس من المستبعد بعد فترة أن نجد مجموعة قنوات رياضية تحمل اسم كل نوادي مصر .. بما فيها نادي الشرقية للدخان .. والتي سوف تحجز وزارة الصحة نصف شاشتها لوضع الصورة التحذيرية من أضرار التدخين
!!! زي ماهي موجوده عالسجاير
----
عقب نشر هذا البوست في مدونة عجوز وعندي تلاتين سنه .. صرّح (سوووو) كاتب هذه الأسطر بخوفه من سرقة هذا الموضوع ونشرها عالفيس بؤ وفي المنتديات المختلفه .. لذلك كلف أخوه والذي يعمل في السعودية بأن يعمل عُمرة في أواخر أيام رمضان
!!! ويدعي على كل واحد سرق وجار على حق أخوه

سوووو

الاثنين، ١٧ شعبان ١٤٢٩ هـ

العيّل البَاوّوّ !!؟

قاعد باستجم في الساحل الشمالي وعلى شط البحر وانا باشربلي سجاره كولوباطرا بوكس ولابس الشورت والفاللـه .. والاقي موبيلي بيرن .. لقيت اللي بيكلمني بيقولي انت اتشتمت يا سوووو
يووووه .. تاني !!؟
ماكدبتش خبر .. خدت بعضي وسألت اذا كان في أي انترنت كافيه هنا .. وفعلا رحت وقعدت على جهاز وفتحت البلوج بتاعي .. والاقي التعليق ده على موضوع
أكاديمية الشرطة

...غير معرف يقول

بطلو بقى كل شوية كلام عن الظباط وشتيمه فيهم
ماهم دول اللي مخلينكم تعرفو تنامو كل يوم وانتو مرتاحين
ولو حد فيهم وحش ماهو ده في كل الدنيا

وبعدين كل مواضيعك بتشتم في النظام مع ان النظام عمل حاجات كتير
روح العراق وانت تشوف بعد ما امريكا دخلت عملت ايه
العراق اللي ايام صدام ماكانش فيها موبيلات ولا دش وانت عايش عالدش والموبيلات
ده صدام واللي زيه هم اللي يعرفو يحكموكم ويشكموكم كويس
ولا انتو عايزين جنازة وتشبعو فيها لطم
وبعدين على فكرة انت دمك تقيل
وعامل فيها راجل وكل الناس داخله بتطبلك وتهيصلك
نصيحه روح هاجر ولا سيب البلد مادامت مش عاجباك
مصر هتنضف منك ومن اللي زيك
-------
بقولك ايه والنبي - ده انا بكلم الواد بتاع السايبر - مالاقيش عندك نيسكافيه بلاك .. قاللي لا والله .. في عندنا نيسكافيه تلاته في واحد .. قلتله ومالو .. هاتلي سلطانيه عشان الواحد يقرا ويفهم ايه الحوار
قريت التعليق مره في التانيه في التالته .. ولقيت ان اللي باعتلي التعليق ده فعلا فعلا .. عيّل بَاوّوّ

وهقولكم يعني ايه (بَاوّوّ) عشان ماتقولوش اني حارمكم من حاجه
الجاموسه لما تخلف عِجل صغير .. والعِجل ده نتيجة أي أزمة صحيه يموت ولا حاجه .. يقومو صحاب الجاموسه .. سالخين جلد العِجل الصغير ومخيّطينـُه ومالينـُه تبن وقش .. ويوقفوه على اربع عصيان ويحطوه جنب الجاموسه .. تقوم هي تشوفو قدامها وتشم ريحته .. تفضل تديهم لبن وماتقطعش .. يعني البَاوّوّ هو مجرد خيال مآته .. وياريت خيال مآته في مزرعه قمح ولا رز ولا ان شالله برسيم .. لأ .. ده خيال مآته عند الجاموس

ولصاحب هذا التعليق اقولو اني هعمل فيك خدمه لايمكن تتخيلها
أي والله لايمكن تتخيلها يا باوّوّ ياخويا
ليه بقى .. لأني هخليك تشتهر وتقرا تعليقك عندي كموضوع .. ومش كده وبس .. لأ .. ده انت ساعتها هتروح لـ رؤساءك وتقولهم انك بتعمل شغل اهو .. بدليل ان كلامك اتنشر
لكن ماعتقدش ان رؤساءك هيفرحو لما هيشوفو ردي وتفصيصي على كل كلمة من كلامك

استعنا عالشقى بالله
--------
...غير معرف يقول
بطلو بقى كل شوية كلام عن الظباط وشتيمه فيهم
ماهم دول اللي مخلينكم تعرفو تنامو كل يوم وانتو مرتاحين
ولو حد فيهم وحش ماهو ده في كل الدنيا

----
دلوقتي يابهيمه ياجحش .. انت قريت الموضوع اللي انا كاتبه أصلا ؟؟؟
طب فهمت حاجه من اللي انا كاتبها اساسا ؟؟؟
يعني انت اصلا مش ضد ان واحده تتخطف جهارا نهارا ولا أي حاجه ؟؟؟
وكل اللي انت ضده .. اني اقول ان اللي خطفها كان راكب عربيه عليها ستيكر أكاديمية الشرطة ؟؟؟؟
ده انت فعلا مش متأمر واهبل وبس .. ده انت باوو .. ولطخ كمان
- سيلي شرح لفظ (لطخ) في مواضيع لاحقه ان شاء الله -
لكن عموما .. انا هقولك انا وغيري بنتكلم بسخط ليه على بعض ظباط الشرطه
لأن لما يكون في طبيب فاسد ولا مهندس فاسد ولا محامي فاسد .. لازم اللي يمسكهم يكون ظابط شرطه .. ولازم يكون كويس .. لانه لو كان فاسد هو كمان .. يبقى احنا رحنا في الكاظوظه
ولما يكون اخو طالب في أكاديمية شرطة بيعمل اللي بيعملو ده - مع العلم اني شاكك انه هو أصلا اللي في كلية شرطة - ويخطف بنت في الشارع هو وصحابه وأخوه لسه طالب ومابقاش ظابط رسمي .. امال لما يبقى ظابط هيعمل ايه .. هيقلع بنات الناس في الشارع بقى ولا ايه ؟؟؟؟؟
----
وبعدين كل مواضيعك بتشتم في النظام مع ان النظام عمل حاجات كتير
----
تصدق انك عملت في معروف بالكلمتين دول .. آه والله العظيم .. لأن في ناس كانت فاكراني مع الحكومه لاني باتكلم في حدود هامش الحريات اللي مسموحلنا بيه كشعب .. ومعتقدين اني مندس على عالم التدوين من الحكومه .. لكن انت لأنك عيل باوو .. عملت في معروف وانت مش عارف
وسوف يتم قريبا ان شاء الله .. عمل سلسلة مواضيع توضح .. عمل ايه النظام .. فينا
ولكن وعلى أي حال .. ارجع واقولك انه مش عيب ان الواحد كفرد في مجتمع .. يتكلم ويقول سلبيات النظام .. بشرط انه مايشتمش ولا يجرح ولا يقول لفظ خادش للحياء .. ولو انت أو اللي باعتينك أيا كانو هم مين .. قلّبو في المدونه وجابو عاليها واطيها .. مش هيلاقو لفظ واحد خادش للحياء في حق أي مسئول في النظام .. إلا بقى لو لفظ أوبجشكن في موضوع ياخي أوبجشكن .. اعتبرتوه لفظ خادش للحياء .. اذا كان عندكم حياء اصلا
----
روح العراق وانت تشوف بعد ما امريكا دخلت عملت ايه
العراق اللي ايام صدام ماكانش فيها موبيلات ولا دش وانت عايش عالدش والموبيلات

----
عراق ايه وأمريكا ايه ياهبل اخواتك انت واللي باعتينك؟؟؟
انتو فاكريننا بناخد بالكلام الاهبل اللي بتضحكو علينا بيه ده .. وكل ماحد يقول حاجه يتقال انه عميل وبياخد تمويل من أمريكا .. والمشايخ بتوع الحكومه يطلعو ويقولو انصر أخاك ظالما أو مظلوما .. ويذكرو آيات الموالاة واللي بيستنصرو بغير المسلمين
!! طب ماهو الحكومه بتاخد دعم من أمريكا اصلا
!! والمعونه الامريكاني اللي بتيجي سلاح للجيش
!! واتفاقية الكويز اللي أُجبرت الحكومه - من أمريكا - فيها على انها تشارك اسرائيل
!! والغاز المصري اللي بيتصدر لاسرائيل - بتراب الفلوس - بأمر من أمريكا
وإجبار ان التعاملات التجاريه الخارجيه تبقى بالدولار الأمريكي .. في الوقت اللي كل الناس بتتعامل بعملة بلدها او بتتعامل باليورو أو حتى بـ سلـّة العملات
دا غير الحاجات اللي من تحت لتحت
انتو فاكرينا مش شايفين ولا مش عارفين!!!؟؟؟؟

وبعدين خد هنا ياد انت .. دش ايه وموبيل ايه يا اهبل اخواتك !!؟؟؟
الناس مش لاقيه رغيف عيش حاف وانت تقولي دش وموبيل .. ده انا شفت بعيني واحده ست عجوزه وغلبانه بتشتري من محل فرارجي بنص جنيه مصارين فراخ .. ولما سألت الفرارجي وقلتله شكلها مابيدلش على انها عندها قطط ولا كلاب عشان تديهم المصارين دي .. الراجل بصلي وهو بيتحسر وبيقولي قطط وكلاب ايه يا باشمهندس .. دي بتسلقهم وتحط عليهم بصله وتأكلهم لعيالها

وبعدين معلش يعني .. هي الحاجت دي داخله ببلاش ولا الحكومه موزاعاها شفقه ورأفة منها بحالنا مثلا
ماهي الحكومه بايعه الهوا لشركة اتصالات عشان تعمل الشبكه التالته بعد ما اتأجلت مره في التانيه في العاشره .. وكل مره كانت بتتأجل كانت الحكومه بتاخد قد كده من موبينيل وفودافون

واصلا اصلا يا أذكى اخواتك.. الدش والموبيلات دول أمن عام .. يعني موجودين عشان يلهو الناس ويخدروهم .. النهارده جايبين فيلم مش عارف ايه على روتانا سينما .. بكره الحلقه الجديده من مسلسل نور .. ولو على الموبيلات .. خد عندك .. واحد بيحرم نفسه يركب مواصلات محترمه طول الشهر عشان يجيب كارت موبيل يقدر يتصل بيه بصحابه .. وواحد تاني بيدخل العدة بتاعته في عدة تانيه اقل منها وياخد الفرق عشان يقدر يشحن او يقدر يعمل أي حاجه بالفرق
وخللي الناس تتخدر وتعيش في الغيبوبه
-----
ده صدام واللي زيه هم اللي يعرفو يحكموكم ويشكموكم كويس
ولا انتو عايزين جنازة وتشبعو فيها لطم

-----

ماهو ده اللي انتو عمالين تزرعوه فينا عن طريق كل الوسائل المشروعه والغير مشروعه
ولكن للأسف .. يؤسفني أن أقول لك وللي باعتك .. اننا كنا فاكرين كده زمان
لكن لما ابتدينا نتشجع ونفكر ونكسر التابوه والتمثال اللي عملناه بنفسنا .. ولما ابتدينا نشوف ونسمع كويس .. لقينا ان المصري لما بيتحط في ظروف مناسبه بيطلع كل اللي عنده
بدليل انجازات المصريين بره مصر في الدول المتحضره والمتقدمه .. واللي بتؤكد بما لايدع مجالا للشك .. اننا لما بنلاقي مناخ نضيف بنقدر نبدع ونشغل عقلنا
واللي اقصده بمناخ نضيف .. انه يكون فعلا نضيف .. مش مناخ أحمد نضيف
-----
وبعدين على فكره انت دمك تقيل
-----
مش عارف ليه افتكرت المثل الشيعبي اللي بيقول .. مالقوش في الورد عيب .. قالوله ياحمر الخدين
وعلى فكره .. انا مش قصدي اني ورد ولا قصدي ان خدودي حمرا .. ولا أي حاجه تانيه حمرا برضه

----
وعامل فيها راجل وكل الناس داخله بتطبلك وتهيصلك
----
والله يا باوو .. انا ولا عملت فيها راجل ولا حاجه .. وقلت في الموضوع بتاع أكاديمية الشرطة إني ماعملتش حاجه غير الجري ورا العربيه وانا بقول حرامي .. ولولا فضل ربنا في وجود عربية التين ووجود كابينة التليفون .. كان زمان البنت دي في صفحة الحوادث .. والحاجه الوحيده اللي يمكن اكون عملتها في الحوار ده .. اني وضحت للناس - لما كانو هيفكو الواد من البنت اللي مكلبشه فيه وهي بتصوت وكلامها مش مفهوم - وقلتلهم ان العالم دول كانو خاطفينها .. ساعتها البنت اتشجعت وعرفت تتكلم بدل حالة الهيستيريا اللي كانت فيها والناس عملت الواجب
وبعدين اساسا اساسا .. انا الحمدلله راجل .. ولو مش مصدقني تعالالي وانا اوريك البطاقه اللي مطلعهالي الحكومه .. هتلاقي مكتوب جنب خانة النوع .. دكر
يعني راجل في نظر الحكومة .. لو انت بقى معترض .. يبقى اعترض على الحكومه
هااا .. هتقدر تعترض على رؤساءك .. ولا هتطبللهم وتهيصلهم .. ومش بعيد تتحزم وترقصلهم عشره بلدي .. وتبقى فعلا فعلا .. ونعم الرجال .. وهز يا وز
----
نصيحه روح هاجر ولا سيب البلد مادامت مش عاجباك
----
انا بس عايز افهم .. ليه كل مايجي حد ويقول للنظام لأ او اللي انتو بتعملوه غلط .. تقولوله هاجر وسيب البلد
لو عندك أي تفسير يا باوو للحته دي - غير ان النظام عايز البلد تفضى من الناس اللي عايزه مصلحة البلد مش مصلحة الكرسي ولا مصلحة الفرد الحاكم - يبقى قوللي وتكسب في ثواب .. وليك عندي ياسيدي إني مش هقولك يا باوو .. هقولك يالطخ بس
----
مصر هتنضف منك ومن اللي زيك
----
باوو يا ضينايا .. انت بجد صعبان علي .. لأن اللي هينضّفو مصر بجد .. هم الناس اللي عايزه مصلحة البلد .. وأول ناس هينضّرو من النضافه دي .. هو انت واللي زيك .. لأن اللي هينضفوها مش هيبقو محتاجين مساحين جوخ ولا حد يلحسلهم جزمهم
هيبقو محتاجين ناس بجد بجد بجد .. بتحب مصر وخايفه عليها
وانت للأسف .. ماتفهمش في أي حاجه غير انك تبوس الجدم وتبدي الندم
عيل باوو بصحيح
----
.. شكر خاص لكل من
فاتيما .. اختي واللي بجد كل يوم بتزيد مكانتها في قلبي .. ربنا يحميكي ويسعدك يارب
آآبي بتنجاني .. واللي سبق وقلت انها عدت مرحلة الجدعنه بمراحل .. ربنا يخليلك خرفانك
عيله مفتريه سابقا .. واللي خفت احسن تاكل الواد الباوو وتفتري عليه .. لكن طلعت فعلا دماغ
حنين القلب .. واللي بصراحه اتفاجأت انها ردت غيبتي .. خصوصا وانها ماتعرفنيش شخصيا
إبن منتقتي ابو الصبابيغ .. الف شكر ليك ياصباغ وان شاء الله نردهالك في الافراح .. أو في البورصه
----
توضيح مهم جدا
الناس اللي بتيجي تعلق عندي وترميلي إعلانات على هيئة تعليقات وتقولي تعالى زور مدوناتنا وشوف مواضيعنا .. الله يكرمكم .. علقو الاول على اللي انا كاتبه وقولو رأيكم قبل ماتطلبو مني اقول رأيي في مواضيعكم .. عيب بجد يعني

آه .. ملحوظه قبل ما أمشي
لما جيت احاسب بتاع السايبر قاللي الحساب تسعه جنيه ونص .. ليه ياعم الحاج .. قالي ساعة النت بسته جنيه وانت قعدت خمسين دقيقه يعني خمسه جنيه .. طب وباقي التسعه جنيه ونص !!؟؟
!!! قاللي النيسكافيه التلاته في واحد - الباكو بخمخه وسبعين قرش - باربعه جنيه ونص
والسبب ايه .. اني في الساحل الشمالي .. و آدي إنجازات النظام

سوووو

السبت، ٨ شعبان ١٤٢٩ هـ

أكاديمية الشرطة

آخر تحديث في الليله

العربيه طلعت فعلا بتاعة طالب في اكاديمية الشرطه .. ويقال انو الاخ الاكبر للي كان سايق العربيه وهرب .. ولو اني شاكك انهم هم الاتنين شخص واحد .. خصوصا وان اللي هرب لسه هربان .. واخوه او صاحب العربيه واللي في كلية الشرطه .. مسافر .. يعني الاتنين مش موجودين
اللي كان جنب اللي سايق العربيه أو اللي رجله اتكسرت .. في المودرن اكاديمي في سنه تانيه .. ومتحفظ عليه في مستشفى خاص مخالفة لتعليمات وزارة الداخليه وانه يتم التحفظ عليه في مستشفى حكومي مع وضع حراسه عليه .. لكن هنقول ايه .. الواد غلبان ورجله اتكسرت كسر مضاعف وهيعمل عمليه وهيركبولو شريحه ومسامير .. يعني يا حبة عين امه مش هيقدر يمشي ولا يهرب
اللي كان قاعد من ورا طالب فاشل في ثانويه عامه وقدم السنه دي على المودرن أكاديمي .. وشكله هو اللي هيلبس القضيه لانه هو الوحيد اللي متحفظ عليه في القسم .. وكمان لمحت امه بتعيط وبتدعي على صحابه اللي بوظوه .. لكن في محامي ماعرفوش - تقريبا تبع الناس الهربانه - خدها وطلع بيها بره القسم وبعد كده رجع لوحده .. شكله اداها فلوس ولا عمل اي حاجه
ابو البنت طلع مستشار في وزارة الزراعه وليه علاقات ومش هيسيب حق بنته .. ولما قلتله اني مدون ولي علاقات بناس مدونين ومنهم ناس صحفيين .. قاللي لو الموضوع مامشيش قانوني هنحتاج لمساعدتك ومساعدتهم

نصيحه بقى .. كل البنات .. ياريت ياريت ياريت يكون معاهم اي حاجه يحمو نفسهم بيها .. سلاح كاتر مثلا .. قزازة مية نار ياخدو منها بؤ ويبخوه على اي حد هيخطفهم .. انشالله حته قشرة تين شوكي ويشرحو بيها اللي جاي يخطفهم
زي مانا ايدي باظت من قشر التين الشوكي وانا باساعد الواد وباشيل معاه التين من عالارض
!!!! تقريبا في حد كان باصصلي في الكام تينايه اللي كلتهم

تحديث

انا نازل رايح قسم البساتين عشان اشهد عالمحضر لأن المحضر اللي اتعمل في النقطه تم اعتباره اثبات حاله فقط

وعلى فكره .. انا ولا فكرت في اي حاجه من اللي بتقولو عليها لما جريت ورا العربيه .. طلعت اجري وبس وانا مش عارف ايه اللي هيحصل ولا هعمل ايه .. طلعت اجري وراه وخلاص .. اضافة الى اني ماعملتش حاجه خالص ولولا ستر ربنا ووجود عربية التين الشوكي اللي لخمت اللي سايق وارتبك وعمل الحادثه .. كان لا قدر الله الموضوع ده هيبقى في سكة تانيه .. خصوصا اني ولا لحقت احفظ نمر العربيه ولا لحقت احفظ شكل الواد اللي شفته .. يعني جريي وراهم زي عدمه

------

هيثم صاحبي الأنتيخ راجع الكويت بعد ما قضى معانا حوالي شهر أجازة .. ورحت عشان اسلم عليه لاني بقالي يومين مثلا ماشفتوش.. خلصت سلامات واحضان وحركات وراجع عالبيت تاني
----
الساعه تقريبا اتنين الضهر .. نزلت من الميكروباظ على اول شارعنا وقلت بدل مانا باروّح البيت من الطريق اللي بامشي منه على طول وكللو شمس ومافيهوش شجره واحده تِسُرّ القلب الاعور الحزين .. امشي من شارع تاني مليان شجر وضِلّ وحاجه طراوه
بمجرد مادخلت الشارع لمحت قدامي ببتاع خمسه سته متر .. واحده بنت - محجبه ولابسه تايير واسع وقميص واسع - ماشيه في الشارع وعلى جنبها الشمال ناحية الشارع .. عربيه قزازها كللو فيميه ماعدا القزاز القدماني .. ومحطوط ستيكر او شعار (أكاديمية الشرطة) على القزاز الوراني .. وفي جزء من الثانيه .. واحد نزل من الكرسي القداماني اللي جنب السواق ولقيت الباب الوراني بتاع العربيه اتفتح .. وواحد في الكنبه الورانيه قام ساحب البنت جوا العربيه غصب عنها وبيساعدو الأخ اللي نزل من الكرسي القداماني .. واللي بمجرد ما حس البنت ابتدت تزعق ولسه هتصوّت قام زاققها جوا العربيه وقافل الباب وهو باصص علي .. ونط في الكرسي بتاعه وراح صاحب العربيه مدور العربيه ومشي

انا شفت المنظر ده وبالرغم من اني باكره الجري كره العمى وطول عمري في المدرسه كنت باكره حصة الالعاب ومدرس الالعاب اللي بيخليني اجري طول الحصه وما العبش كوره ولما باجي العب بيوقفوني حارس مرمر .. لكن لقيت نفسي باجري ورا العربيه دي وانا باقول حرامي - وماحدش يقولي حرامي ايه اللي بقولها عشان هي اللي جات في بالي ودايما بنشوف في الافلام لما واحد يجري ويقول حرامي .. الناس بتظهر وبتجري وراه في اتجاه الحرامي - أي نعم ماكانش في ناس اصلا في الشارع ومنطقتنا من اكتر المناطق هدوءا في غير ايام الدراسه عشان الدنيا بتبقى زحمه على حس المودرن أكاديمي - المودُن أكاديمي زي مابيقولو بتوع الميكروباظات - لكن انا كنت باجري وانا بقول حرامي على أمل ان أي حد يظهر من أي حته .. وسبحان الله
الواد خلص الشارع ده وداخل شمال في اتجاه الشارع اللي يطلعه عالاوتوستراد ومنها على أي مكان وانسى ان حد يقدر يجيبه بعدها .. ولقى قدامه عربية تين شوكي واقفه .. قام خابط فيها على خفيف واتلخفن ماعرفش يعمل ايه وبيحاول يتفاداها قام راشق في كابينة ميناتل .. ستر ربنا ماحدش كان واقف جنب عربية التين الشوكي وتقريبا صاحب العربيه راح يوصـّل طلب في شقه من العماير اللي في المنطقه .. وستر ربنا ان مافيش حد كان بيتكلم في كابينة الميناتل

اخينا اللي سايق العربيه لما لمحني لسه باجري وراه ولقى الناس ابتدت تظهر - الناس ابتدت تظهر لما سمعت صوت الخبطه والفرمله مش على صوتي وانا بقول حرامي - قام ساب العربيه وطلع يجري .. اللي قاعد جنبه بقى واللي هو نفس الشخص اللي زق البنت اللي كانت ماشيه .. الباب بتاعه اتزنق ناحية كابينة الميناتل ومش عارف ينزل ولا قادر يتحرك لانه تقريبا في حاجه زانقه على رجله من تحت .. البنت نزلت من العربيه وهي عماله تشتمهم وبتستنجد بالناس عشان يودوهم في ستين داهيه

الظريف بقى ان اللي اتزنق قدام ده لقيته بيستنجد بي وبيقولي طلعني وباين عليه انه بيتوجع وبيتألم قوي .. طبعا الواد اللي كان في الكنبه الورانيه طلع سليم ولسه هايجري قامت البنت ماسكه فيه

الاظرف بقى ان الناس كانت متعاطفه معاهم وصعبان عليهم البنت عشان فاكرينها زعلانه على اللي حصل للي معاها في العربيه .. لكن لما انا شرحتلهم باختصار انهم خطفو البنت وكانو طالعين يجرو وخبطو في عربية التين وبعدها رشقو في الكابينه .. الناس تحولت لوحوش مفترسه وعايزين ياكلو الوادين دول بسنانهم

نسيت اوضح ان نقطة شرطة صقر قريش بينها وبين المكان اللي حصل فيه الحوار ده مافيش خمسين متر .. ومافيش قدامها غير عسكري شطرنج مش عارف هو فين اصلا - لو سألته فين شارع الشهيد ميكي ماوس هيقولك أخر الشارع الجاي - يعني تقريبا كأن النقطه دي مالهاش وجود
-----
اقتادت الناس الأخين الحلوين وطلعو بيهم عالنقطه .. والبنت اتصلت بأهلها - واللي ساكنين في نفس الشارع - وجه ابوها واخوها تقريبا وطلعو مع الناس على نقطة صقر قريش

السؤال اللي بيطرح نفسه بقى .. هل العربيه دي بتاعة حد فعليا في كلية شرطه ولا صاحب العربية لازق الاستيكر وخلاص ؟؟
والسؤال التاني .. هي النقطه دي محطوطه وجاهة اجتماعيه ولا الظباط مركزين في تطبيق قانون المرور وسايبين البلد تضرب تقلب ؟؟
----
لقيت نفسي محتار من كتر التفكير .. ولمحت الواد بتاع عربية التين رجع ومش فاهم ايه اللي قلب عربيته ووقع التين عالارض .. قمت رايحله وجايب بتلاته جنيه تين شوكي وحطيتهم في التلاجه

حد يحب ياكل معايا تين شوكي ؟؟؟

سوووو

الاثنين، ٣ شعبان ١٤٢٩ هـ

!! حكمة اليوم

.. مسير البورص يكبر ويبقى ديناصور
أو يتجاب من عالحيط بشبشب

سوووو

السبت، ١ شعبان ١٤٢٩ هـ

!! .. وقال تـُدَري


بالرغم من اني ماعرفش مين (تـُدّري) ده اللي كان واخد اللزمة بتاعته الفنان فؤاد المهندس في مسرحية حواء الساعة اتناشر .. وكان على طول بيقول وقال تـُدَري وقال تـُدَري وقال تـُدَري
وبالرغم من ان اسم الموضوع ده مالوش أي علاقه بالموضوع ده غير في وزن الجمله اللي عايز اقولها كعنوان للموضوع ده .. واللي هي جملة .. وكان يوما

لأنه فعلا .. وكان يوما
كان يوما يالهوووووووووي .. حلو قوي قوي قوي فحت جدا خالص موت .. ولو اني ماعرفش أيه علاقة موت كصيغة مبالغه بس هو كان يوم حلو موت من الاخر
-----
المقدمة

اتفاق مباشر وغير مباشر من كل المدونين على انهم يتجمعو لعمل أي حاجه لربنا وللبلد ولنفسهم .. وذلك عن طريق تلبية النداء الخيخي واللي مش خيخي خالص .. بل هو نداء انساني بمعنى الكلمه .. طالع من بنت مصريه جدعه جدعنه مستجدعه في الجداديع كلها .. واللي هي نوران الشهيره ببنت خيخه وأي كلام
اتفاق مباشر وغير مباشر على اننا نتجمع ونتعرف ببعض ونفرح ببعض ونضحك مع بعض .. من الاخر كلنا كنا بنتلكك عشان الفرحه بقى طعمها غالي قوي .. لكن طول ماحنا مع بعض وبنساعد بعض وبنحب بعض .. عمر الغم والهم والنكد ماهيعرفو طريقهم لينا .. وهنفضل فرحانين على طول ومتجمعين عالخير وفي الخير إن شاء الله

بعد الاتفاق ده ابتدى الكل في التشريد للحدث المهم ده .. وكل واحد ومقدرته عالتشريد والشِرده .. ومن أكتر التشريدات اللي اتعملت وكان ليها دور فعلي كانت تشريدة فاتيما روح قلب ماما وروح قلب المدونين كلهم .. واللي فعلا كان ليها دور كبير جدا .. وده إن دل على شيء بيدل على انها شخصية محبوبه من الكل .. وانا من اكتر الناس اللي باحبها وباعزها وباحترمها بطريقه يالهوووووووي

-----
بداية اليوم

نزلت من بيتنا الساعه تسعه وربع صباحا يوم الجمعة الموافق واحد اغطسطس لسنة الفين وتمانيه .. رايح على محطة مترو الدقي عشان اقابل مدون ماعرفوش معرفه شخصيه غير من خلال مدونته .. مدون بجد باعشق فيه انك تحسه أخوك .. مدون فرحت جدا لما عرفت انه هايكون موجود في اليوم ده .. مدون جاي من بلد الغزل والنسيج وانا كنت معشم نفسي انه يجبلي بدلة ولا منطلون أو انشالله برلس حمام .. مدون جاي من المحله .. حليب هارتي .. نيجرو

وانا في المترو لقيت موبيل جالي من اللي عدى مرحلة الاخويه ودخل في مرحلة الانتمه وبقيت كل ما اشوفه احس اني سايبه امبارح بالرغم من اني ممكن يكون بقالي بتاع اسبوعين ماشفتوش .. لكن خلاص بقى دخل جوا معاميع قلبي وبقينا واحد .. الموبيل اللي جالي كان من خالد همس الاحباب .. وكان بيقولي انه في محطة مترو الدقي منتظر مدونين بورسعيد بقيادة بابا ابو خالد أبو المدونين .. مدونين بورسعيد اللي شالونا على كفوف الراحه لما رحنالهم وماحسسوناش بأي فرق وزي مانكون نعرف بعض من بتاع يجي عشرميت سنه قاف ميم .. يعني قبل الميكروباظ او اختراع الميكروباظ

وصلت محطة مترو الدقي ولسه باتلفت لقيت خالد همس الاحباب قاعد عالدكة بتاعة العساكر اللي قدام شباك تذاكر المترو .. وحسيت ان القعده عجبته وناوي يقدم السي في بتاعه عشان يشتغل جندي مجند حماية مترو الدقي .. وعنده حق طبعا .. ماهي المحطة مكيفه والدقي كمنطقه سكنيه عامره بالمزز ومافيش احسن من دي وشوش الواحد يشوفها عالريق - هفكر بجديه اقدم السي في بتاعي مع خالد .. وعلى الله يوافقو يوظفونا ولو من غير تأمينات - جه بابا ابو خالد وجرينا نسلم عليه وناخده بالحضن ونسلم على مدونين بورسعيد اللي نورونا وشرفونا بالزياره الجميله دي
مدونين بورسعيد اللي شرفونا كانو كالتاتي
بابا ابو خالد .. واللي فعلا لو بايدي اختار اب لي ماكنتش هفكر ولا اتردد اني اختار بابا ابو خالد .. ربنا يخليك لينا يارب يابابا
شيمو عيلة مفتريه سابقا .. واللي اتضح انها ولا مفتريه ولا حاجه وأغلب من الغـُلب وأطيب من الطيبه كلها .. وجه معاها اخوها عوض واللي في الاول كان مش واخد عالجو الاسري بتاعنا وبيتكلم معانا على خفيف .. لكن على آخر اليوم اعتقد انه هينفض لشيمو ويجي هو بنفسه يزورنا
ايناس نهر الحب .. البنت دي فيها حماس بطريقه رهيبه .. ومتحمسه للشباب ولخدمة الناس بطريقه يالهووووي .. وياسلام بقى لما دماغها بتكون رايقه .. بتقول أحلى وأقوى إفيهات وقفشات ساخره .. وبجد سعيد جدا جدا اني اتعرفت عليها أكتر
نسمه اخت ايناس نهر الحب .. واللي هي اصلا مش مدونه وكانت فعلا نسمه وطول اليوم ساكته ورقيقه قوي .. لكن لما خدت على الجو وابتدت تتكلم معانا عرفت ان الجينات بتاعة العائلة .. فيها الجدعنه والدماغ العاليه وخفة الدم المصريه

لسه ماخلصناش السلامات والتحيات لقيت حد جاي كده وبيعرفني عليه خالد همس الاحباب وبيقوللي ده نيجرو .. قمت في جزء من الثانيه واخده في حضني لأني بجد باعزه قوي قوي .. وفرحت اني اخيرا شفت هذا الشخص اللي بيتعامل معايا عن طريق الشبكة العنكبوتيه فقط .. وطلع واد زي العسل ودمه خفيف فحت .. بس ياخساره .. ما افتكرنيش حتى بجوز شرابات ولا بشكير

اتجهنا على مستشفى المصل واللقاح في مجموعتين .. ولو اني كنت حابب ناخدها مشي ومتعود على مشاوير في السكه دي .. لكن الجو كان حر فزيع فزيع فزيع .. وقلنا مايصحش برضه نشحطط الناس اللي جايالنا من آخر الدنيا .. وقمنا قسمنا نفسنا مجموعتين وركبنا عدد اتنين تاكسي أجره قاهرة .. وابتدى الفرح
----
الليله عيد

دخلنا على المستشفى ومنها على مكان التجمع جوه المستشفى لاننا كنا جايين على الساعه حداشر والناس كلها دخلت على جوه .. أول حد شفته كانت فاتيما واللي عرفتني على صديقتها الباشمهندسه داليا واللي بجد كان نفسي اتعرف عليها اكتر - وأدّي فاتيما البرستيج بتاعها قدامها زي ماهي طلبت - لكن مالحقتش عشان اتلفت جنبي لقيت حماتي رودي بنوته مصريه وطبعا مايصحش تشوفني وانا باتكلم مع أي واحده والا هتمنعني من اتمام اعزم كصة حب بيني وبين نور بنتها حبيبة قلبي .. بس اتضايقت قوي من رودي عشان ماكانتش جايبه معاها عروستي .. لكن الجايات أكتر من الرايحات ان شاء الله
وقبل ما اخلص سؤالي لرودي عن نور عروستي .. لقيتها بتعرفني بـ شيماء فضفضه واللي فاكرها من يوم التبرع بالدم اللي فات .. وبالرغم من ان شيماء في اليوم اللي فات كانت تعبت من التبرع بالدم وكاد أن يغمن عليها .. لكنها جات المره دي وهي مش حاطه في دماغها حاجه .. والله العظيم انتي جدعه يا شيماء
لقيت مين قاعد مع رودي حماتي برضه .. داليا قوس قزح .. وداليا اشاسان اشاسان قارشه ملحتي من ساعة ماعرفت اني باحب نور بنت رودي وعماله تدق اسافين مابيني وبين رودي عشان عايزه تجوز نور بنت رودي لنور ابنها .. واشاسان ماينفعش ان اتنين نور يتجوزو .. وهيعملو قفله .. اضافة الى ان فاتورة النور هتيجي مولعه .. بس فيما عدا ان داليا عايزه تفقعني المهموز في الحوار ده .. هي انسانه جميله جدا جدا وجدعه قوي قوي ومن اكتر الشخصيات اللي انا فرحان اني اتعرفت عليها .. لكن ده مايمنعش برضه اني احنذرها واقولها نور بنت رودي عروستي .. واحنا عايشين كصة حب عزيمه عزيمه عزيمه يامصر يا أرض القلل

طبعا كان في مجموعة شوباب كتير وكنت لسه رايح اسلم عليهم لقيت خيخه في وشي وبتقولي كل سنه وانت طيب .. يا جدعان البنت دي انا بجد باحب فيها انك من أول مره تشوفها تحسها واحده من العائله .. اختك مثلا .. مرات اخوك إذ ربما ..أو بنت اخوك غالبا .. تركيبه جامعه كل الحاجات دي في حاجه واحده .. باحبك قوي وربنا يعلم بمقدار احترامي ليكي والله
رحت سلمت على شوباب المدونين وكانو كالتاتي
اول واحد شفته فيهم كان حليب هارتي ابو العساعيس .. والواد ده انا مش هتكلم عنه لأن اللي عارفينه بجد فاهمين
قصدي ايه .. واد فعلا تحسه على كل لون يابطسطه .. ساعة الجد يبقى جد الجد .. ولو عايز تسأله عن معلومه في الدين وفي الاخلاق تلاقيه بيقولك المعلومه بطريقه هاديه وبسيطه .. وساعات الهزار والفرفشه .. أحب سوسو
أحمد الصباغ دايما بيبقى موجود وعامل حاله غريبه .. منها ضحك ومنها جد .. بس اول ماشفته لقيتني باضحك كده ومشرئب .. طبعا ماهو ابن منتقتي ياجدعان
هيثم الدهشان وهمسات العشق .. والواد ده اللي يشوفه اول مره يقول استحاله انه يطلع منه الكلام اللي بيقوله والحاله الرومانسيه اللي عاملها في مدونته .. مش تقليلا فيه ولا حاجه .. بس هو بطبعه هادي قوي وساكت وحتى لما بيتكلم بيتكلم بصوت واطي ولازم الكل يسكت عشان يسمعه
لأني من ساعة ماركبت المترو ماكنتش شربت أي سجاير قمت شاقط هيثم وطلعنا بره القاعه نولعلنا لفافتين تبغ .. واحنا بنشرب لفافات التبغ لقيت طفل كده عسول قوي عنده بتاع تمان تسع عشر سنين - اعذروني انا ماعرفش ولا افهم في التسنين - طلع من القاعه وبيبص علينا .. لسه هقولو انت ابن مين في الناس لقيت خيخه طلعت وبتسألني على لماضه اذا كانت جات ولا ماجاتش .. قلتلها اكيد لو كانت جات كنتي هتلاقي الناس اتلمت عليها خصوصا انها صاحبة الليله والنهارده عيد ميلادها يعني والناس كلها بتحبها وبتعزها .. ولسه هسألها مين الطفل ده قالتلي ده الشنيور .. يالهوي .. الشنيور ابن ماما شاهي .. يعني اخويا الصغنغن وانا ماعرفش .. وسبحان الله .. قد يجمع الله الشتيتين بعدما يظنان كل الظن ألا تلاقيا .. واد عسول قوي وشكله شنيور بجد يعني .. وضربت انا وهو صحوبيه وقعدنا نتكلم وقعد يقولي انه مش عارف يدخل مدونتي وكل مايجي يدخل يقوم الحاج بلوج سبوت قافش ومايرضاش .. وقلتله مش عارف بقى ايه السبب .. قام بصلي وانا باشرب السجاير وقاللي بطل السجاير بقى وخاف على صحتك .. استغربت قوي وقلت لهيثم احنا ماكناش عيال .. شنيور شنيور يعني .. بسم الله ماشاء الله عليه وربنا يحميه يارب

خلصنا عمود النيكوتين ودخلنا جوا لقيت المنسي .. واللي ماكنتش متخيل انه هايجي وفرحت انه جه .. وفرحت اكتر انه ابتدى يندمج مع المدونين ويعرف مين فين ليه .. بجد فرحت يا محمد انك جيت
نوشا .. ومدونته انا مش معاهم .. لكن باللي عمله وبوجوده اثبت انه ممكن مايكونش معاهم .. هم مين بقى مالناش فيه .. بس هو كده وخلاص
محمد عبد العاطي بقى طبيعي ان الواحد يشوفه في أي تجمع مدونين محترم .. لانه هو اصلا انسان محترم .. هو تلاقوه قاعد ساكت كده وشايل شنطته .. لكن انا متأكد ان دماغه بتفكر اربعه وعشرين ساعه في الثانيه اللي بيبقى قاعد فيها معانا .. ياعمنا عايز اقعد اتكلم معاك بروقان

وانا باسلم عالناس لقيت خيخه بتعرفني على واحد وبتقولي ده الشنكوتي .. وعلى فكره .. الشنكوتي ده هو السبب في استمراري في التدوين بإنه قال لكل اللي يعرفهم عني وعن مدونتي والناس ابتدت تعرفني كمدون .. يعني لولا الله ثم الشنكوتي كان زماني مدون من منازلهم ومكتفي بالتدوين كحاجه ثانويه في الحياه .. باحبك يابو الشناكيت .. بس زعلت منك عشان ماجبتليش موبيل ثري جي
بمجرد ماخلصت التسليم على الشنكوتي لقيت خيخه بتقولي هاتتبرع ولا ايه النظام .. قلتلها ان شاء الله هتبرع .. واتجهت عشان املا بينات الاستمارات قمت لقيت مين .. لقيت ميرا امرأه بعقل رجل .. واللي كانت بتقول انها مش هتقدر تيجي عشان عندها زنقة شغل حتى في يوم الجمعه .. لكن هي نفضت لكل مشاغلها وبطلجت عالشغل عشان تيجي اليوم ده .. والله فيكي الخير يا ميرا .. وكل يوم باكتشف انك جدعه اكتر من اليوم اللي قبله
وانا باملا الاستماره لقيت خيخه بتنادي على اابي عشان الدور جه عليها في التبرع بالدم .. وفعلا دخلت اابي تتبربع بالدم .. وتخيلو اتضح ان اابي عندها دم الى جانب الخرفان والقلل وبطوط .. حاجه جميله جدا .. واحقاقا للحق .. اابي دي مش هلاقي كلام اوصفه بيها .. لو قلت جدعه يبقى باقلل منها .. لو قلت بنت بلد ودماغ يبقى برضه مش باديها حقها .. الحاجه الوحيده اللي ممكن تديها حقها .. اني اقول انا ألذ بنت مصريه مجنونه وعاقله - في نفس ذاط التوقيت المحلي - عرفتها في حياتي
في اثناء ماكنت باملا الاستماره كانت في واحده لسه مخلصه استمارتها وكان في جنبها الشنيور .. وقبل ما افكر اسألها انتي مين لقيت فاتيما و رودي و خيخه و داليا بيقولولي دي ماما شاهي صاحبة مدونة مافيش حاجه .. وعالحقيقه حاجه غير مانا كنت متخيل .. ده انا اكبر منها ياجرعان .. ده انا اللي ماما جنبها .. وماحدش يتصور انا فرحت قد ايه لما شفتها .. ماما شاهي من أوائل الناس اللي وقفو جنبي وشجعوني في التدوين وكانت ومازالت مهتمه بانها تسأل عني وتعرف اخباري من اللي بيتكلمو معايا وتطمن علي وكأني زي الشنيور ابنها بالظبط .. بس ياخساره .. كان نفسي ابو الدراويش يكون موجود معاها لأني بجد بجد عايز اتعرف عليه .. وانا بوجه نداء لـ أبو الدراويش .. انا عايز اتعرف عليك يا عمنا لاني بجد باحبك وباعزك بطريقه انت مش ممكن تخيلها
وانا باكتب الاستماره لقيت ياسمين فنانه مفروسه داخله وبتسلم عالناس .. بنت عسوله قوي .. وتلاقوها في مدونتها قالباها مراجيح وعامله حاجات ومحتاجات .. لكن في الحقيقه هاديه قوي وفنانه قوي قوي .. دي رسمت تاتو خروف على دراع اابي طلع تحفه .. بس تقريبا الفن اتغير لان شكل الخروف طلع لاقط على فراشه شويه .. عموما دي وجهات نظر في الخرفان

كتبت الاستماره ورحت عشان اقدمها لقيت شاب بياخدها مني .. افتكرته في الاول حد شغال في المركز مثلا .. لكن اكتشفت انه مش تبع المركز لما قلتله انا عايز اروح الحمام وقالي انه مش من هنا .. استغربت وقلتله انت مدون يعني .. قاللي ايوه .. طب اسمك ايه واسم مدونتك ايه .. قاللي انا كريم ومدونتي اسمها يوميات مطلق .. يالهوي .. انا صحيح ماعرفهوش ولا رحت مدونته .. بس ده واد زي العسل يا جدعان .. خفة دم واسلوب منمق في الكلام وذوق قوي .. يعني لما هو يطلق .. امال انا لو فكرت اتجوز على كده .. هتخلع وانضرب بالبلغه بقى ولا ايه !!؟؟

قعدت اهزر انا والشنكوتي ونيجرو وكنا هنقلبها مراجيح .. وكنا بنفكر نجيب بلاي استيشن ونلعب فيفا عالتلفزيون اللي محطوط في القاعه .. لكن خفنا احسن بتوع المركز يقفشونا وياخدو العده .. والشاب مننا من غير عدة بلاي استيشن ولا يسوى

خيخه ندهت على اسمي ودخلت عشان يعملولي التحاليل اللي هيشوفو من خلالها اذا كنت انفع ولا لأ .. والراجل الداكتور شكني وخد مني نقطة دم وحطها على جهاز كده صغنن جاب كل حاجه عني .. ايشي خيال يا ناس .. ده انا كنت خايف احسن الجهاز ده يقولي لون البوكسر ايه .. لكن الحمدلله ماعرفش .. شكله طلع صيني مضروب

بمجرد مادخلت عالاوضه اللي بيتبرعو فيها بالدم .. لقيت واحد قاعد عالشيزلونج اللي جنبي بيتبرع هو كمان بالدم .. لكن تقريبا ماكانش فاطر كويس او كان مرهق لانه كان هيغمى عليه لولا الدكاتره اللي بياخدو الدم عارفين هم بيعملو ايه .. وابتدو يفوقوه تدريجيا والحمدلله فاق وبقى كويس .. الشاب ده هو ضياء صاحب مدونه بيوتيفل مايند - واسف اني باكتبها بالعربي بس الانزليجي بيعلق معايا وبيطلع الكلام كللو متشنكل - وبرضه ماكنتش اعرفه وهو تقريبا ماكانش يعرفني .. بس لما اتعرفت عليه لقيته شخص محترم قوي وعِشَري جدا وبيحب الناس .. وانا عشان حبيته بقولو ياعم اتغذى شويه .. لو عايز نظام غذائي يخليك زي الفل انا في الخدمه

بعد ما اتبرعت وخدو مني بتاع تسعه رتل دم ومن على وش القفص كمان - جسم الانسان فيه تلاته لتر دم تقريبا - ادوني علبة عصير تفاح وعدد اتنين باكو باكساويت ابو عجوه .. فكرني بأيام الكانتين بتاع مدارس اعدادي .. نوع غريب وماحدش سمع عنه .. بس اهو شغال

طلعت من الاوضة بتاعة التبرع بالدم ولقيت اابي بتقولي تعالى نروح نادي الزراعين عشان في حاجات في العربيه ممكن الشمس تبوظها .. اتجهنا على هناك وكان معانا ياسمينا الفنانه المفروسه ورحنا عالنادي حطينا الحاجات اللي الشمس كانت هتبوظها وتسيحها في التلاجه بتاعة الكافتيريا .. وطلبنا شوية مشاريب كحوليه خاليه من الكحول .. وقعدنا مسنيين الباقي لما يخلص ويجيلنا

واحنا قاعدين جالي تليفون من خالد همس الاحباب بيقولي لماضه واقفه على ناصية الشارع وشكلها مش عارفه فين مين وازاي .. طلعت جبتها وكان معاها مدون اسمه احمد صلاح صاحب مدونة نيو فالكون .. وهو انسان طيب ومحترم وعلى خلق الحقيقه .. ودخلنا عالنادي وطلبو برضه مشاريب كحوليه خاليه من الكحول
في اثناء ماحنا بنشرب المشروبات الكحوليه الخاليه من الكحول .. جه تليفون لـ آبي عشان في ناس اتبرعو بالدم وأغمن عليها .. واتجهت المناضله اابي بصحبة الباسله بطوط لانقاذ الضحايا .. والحمدلله مرت العمليه الارهابيه بسلام ودون اراقة نقطة بيبس واحده

ابتدو الناس يوصلو للنادي في مجموعات .. وكان في ناس جم بعد مانا وآآبي وياسمينا وبطوط مشينا واتجهنا عالنادي
ومن الناس اللي جم اقدر افتكر
مهاميهووووو .. صاحبة مدونة أحسن تستاهل واللي فرحت جدا جدا انها جات .. مهاميهوو من اكتر المدونات اللي فرحت اني اتعرفت عليهم جدا .. لأنها كانت بتتابع مدونتي من زمان قوي وبعدين اختفت في ظروف غامضه .. لكن رجعت تاني تنورني بمتابعتها لمدونتي ومش كده وبس .. دي دايره تعمللي اعلانات عند كل صحابها ومعارفها وتحكيلهم عن مدونتي وانا بجد مش عارف اشكرها ازاي ولا اقولها ايه
احمد كمال صاحب مدونة رحايا العمر .. وهو من الشخصيات المحترمه جدا جدا .. ومن كتر احترامه خفت اهزر معاه من اول مره .. لكن ان شاء الله في المرات الجايه هتعرف عليه بشكل اكبر واكيد انا المستفيد لصداقة انسان بهذا الاحترام
رئيسة حزب الاحلام .. وهي طبعا غنية عن التعريف .. بس انا فرحت قوي لاني حسيت انها ابتدت تاخد عالجو ده لانها في اول مره شفتها واتعرفت عليها كان يوم حفلة توقيع كتاب مدونات مصريه للجيب .. كنت حاسسها مرتبكه شويه او مقلقه .. لكن المره دي كانت بتتكلم وبتهزر عادي وكأنها تعرف كل الناس من بتاع عشرميت سنه قاف ميم .. قبل الميكروباظ يعني
دعوة أمل .. ودي الاخت التالته لـ مفقوعة مرارتي من حماتي - واللي ماجاتش عشان رايحه تزور حماتها وربنا يستر بقى - و رئيسة حزب الاحلام .. وهي انسانه هاديه قوي وتقريبا لسه مش واخده عالجو زي رئيسة حزب الاحلام في اول مره تشوفنا .. لكن ان شاء الله في المرات القادمه هتبقى اكثر جرأة في التحاور معانا

الحمدلله اتجمعنا كلنا قبل آدان ضهر الجمعه .. وبعدين رحنا متجهين كلنا - الرجاله يعني - عشان نصلي الجمعه في مسجد قالولنا انه يادوب خطوتين .. واكتشفنا ان الناس هناك اصولهم فرعونيه لان خطوتهم قد خطوتنا ببتاع ميت فرسخ تحت سطح البحر .. قعدنا نمشي ونمشي ونمشي .. واخيرا ابتدينا نسمع صوت قرآن الجمعه .. قلنا الحمدلله اخيرا وصلنا
دخلنا نتوضى وقلعنا جزمنا ولبسنا قباقيب وكنا ماشيين بنطرقع .. وكان نفسي اصور الكل وهم لابسين قباقيب لكن مالحقتش اصور غير نيجرو بس .. وصورت نفسي وانا لابس القبقاب زي مانتو شايفين
دي رجل نيجرو

ودي رجلي انا

احمد صلاح كان مستغرب قوي اني باصور رجل نيجرو ورجلي بالقبقاب .. لكن شكله اقتنع اننا عالم لاسعه ومارضيش حتى يسألنا احنا بنعمل كده ليه
-----

الحمدلله خلصنا الصلاه واتجهنا على النادي عشان نحتفل بعيد ميلاد اللماضه كلها .. واللي سابت اسكندريه وجات تحتفل بعيد ميلادها معانا .. وده ان دل على شيء بيدل على انها شايفانا اهلها واخواتها .. واحنا والله زيك تمام يا لماضه وشايفينك ألمض اخت لمضه في اللمضين كلهم


مش هقولكم بقى على الحاله اللي الكل كان فيها اثناء التقطيع والتوزيع والاكل .. حالة حلوه قوي قوي .. خيخه و رودي بيوزعو الجاتوه والساليزوه عالناس .. لماضه ياعيني ماسكه السكينه ومش عارفه تدبح التورته - وقال ايه دكتوره - وما انقذهاش غير داليا اللي دبحت التورته وقطعتها وسابت مهمة التوزيع على اابي و خيخه و رودي .. ياسمينا بتكتب للماضه حاجه في دفتر الروشتات اللي جايباه عشان الناس يقولولها أي حاجه بالمناسبه دي .. الصباغ ماسك الكاميرا وبيصور الليله .. شيمو ماسكه الموبيل وعماله تصور هي كمان .. قلت اشمعنا يعني مانا اصور انا كمان ومافيش حد احسن من حد .. وفعلا ابتديت اصور الناس وهي بتاكل ومش مدياني خوانه .. ومعايا صورهم وممكن انشرها ويالهوي عاللي هيحصل .. ومش هينقذهم مني غير انهم يتبرعولي بمبلغ رمزي بسيط في حدود سبعتلاف جنيه استرميني للشخص الواحد .. والله يكرمك يا فاتيما ماتبوصيلناش في اللقمه الحلال دي .. وهابقى اشوفك بلاب توب توشيبا العربي او توك توك وتشغليه عندك في البيت كأنه كيتشن ماشين

طبعا بعد حالة الفجعنه المتفشيه اللي حصلت وهجوم التتار على الاكل كنوع من أنواع تعويض الفاقد في الدم .. وكأننا متبرعين بتسعه رتل دم بجد .. ابتدى الناس في الهزار والضحك والكلام .. وفي ناس مشيت زي المنسي ونوشا واحمد كمال .. لكن اغرب حاجه بقى .. هي خيخه
متخيلين واحده هي السبب في تجميعة الناس دي كلها تروح ماشيه وفي هدوء .. للحظه كنت هازعل منها .. لكن قلت اكيد في عندها ظروف مانعاها .. وكمان اصلا اصلا ماينفعش ازعل منها .. دي وهي ماشيه لمحت في عينيها فرحه مستخبيه وهي بتقول في عقل بالها الحمدلله .. مشيت من سكات وهي في قمة التواضع
خيخه .. والله العظيم لو بايدي اعمللك تمثال من الدهب بالحجم الطبيعي .. هعملهولك وانا مبسوط وعارف انه مش هيوفيكي حقك .. ربنا يسعدك ويكرمك ويوفقك ويباركلك في مالك وحلالك وعيالك يارب
----
بعد الحاله الحلوة دي ابتدينا نقضي اليوم بتاعنا .. والحقيقه انا كان نفسي اليوم يبقى في هيئة هزار وضحك واننا نلعب مع بعض ان شالله حتى نلعب كوره او نلعب منديل وكهربا شد الكوبس واستغمايه والحوارات دي .. لكن كنتيجة طبيعيه لاننا كلنا والجو كان حر والكل تحول لحالة من الانتخه .. ماكانش قدامنا غير اننا نتكلم .. والعضمه كبرت خلاص

كان نفسي اننا نتكلم في قضيه مهمة جدا زي مانا نوهت في البيان الهام .. واللي هي قضية فوز الاهلي المتكركر على مركز شباب الزمالك .. لكن القعده خدتنا لحوار لا يقل اهمية عن هذا الموضوع .. وهي قضية اضراب الشباب عن الزواج .. وقعدنا نحاول نعرف ايه الاسباب الرئيسيه لده .. وفي بعض الناس قالو ان ده ممكن يكون نتيجة ارتفاع التكاليف وارهاق العريس بمطالب ماديه والتزامات ممكن تقطم ضهره .. وفي ناس قالت ان السبب في ده هو الغلاء وارتفاع اسعار السلع الاساسيه في الحياه والمعيشه .. وفي وفي وفي .. خلاصة الموضوع اننا كشباب لازم فعليا نتكلم في الموضوع ده ونحاول نحطلو حلول ولو تخيليه .. واحنا اه ممكن نكون شباب بسيط دلوقتي .. لكن مسيرنا في يوم هنكبر ونبقى اصحاب قرار .. ومسيرنا في يوم يطلع مننا الصحفي والوزير ويمكن الرئيس كمان .. يبقى ليه مانفكرش مع بعض ونتكلم .. ويا عالِم .. مش يمكن نعمل حاجه


في مجموعه من الناس ابتدت تيجي ولو حتى متأخر بس فيهم الخير انهم جم .. وناس تانيه فيها الخير انها اتصلت او بعتت رسايل .. ومن الناس اللي بعتو رسايل كانت ميرو او اميره سهر الليالي .. واللي بجد كان نفسي انها تنورنا في القاهره مع لماضه .. خصوصا انهم شالونا من عالارض شيل لما كنا ضيوف عندهم

طبعا ماينفعش ننسى محمود ابو حففي رئيس جمهورية نفسي واتصاله الرقيق وكل سنه وهو طيب وان شاء الله نحتفل بعيد ميلادك وانت معانا يابو خالو

وانا قاعد كده لمحت بنوته عسوله كده هلت علينا .. مين دي يا جدعان .. قالو دعاء مواجهات .. لا انتو أكيد بتهزرو .. دي رقيقه قوي وشكلها طيوبه ياخواننا .. معقول هي دي دعاء اللي بتعمل مواضيع في الجون واللي من قوة مواضيعها بادخل الاقي نفسي مش عارف اقول ايه

جالي موبيل من ميدو في الادغال وقاللي انه جاي وفعلا طلعت استقبلته عالباب وكان معاه ساسو صديقة وانتيمة ميرا .. واللي عمالين نقنع فيها تعمل مدونه خصوصا انهم هم الاتنين ميرا و ساسو .. بسم الله ماشاء الله عليهم دماغهم حلوه قوي .. لكن ساسو بطبعها بتحب الانتخه


شوية ملاحيظ بعد الرغي الكتير ده كللو

فرحت جدا لما لقيت دعاء مواجهات باعتالي سلام من عبد الله غنيم او واحد إنسان ونسان .. وكان نفسي اشوفه واتعرف عليه الحقيقه .. لكن ان شاء الله في المرات القادمه

لماضة اتسحبت وخرجت بره النادي ورجعت ومعاها واحد وبتقولي ده السيناريست عمرو الطاروطي .. والحقيقه انا ماسمعتش عنه قبل كده .. لكن لما بلغني سلام هدى عبد القادر فرحت جدا .. واستغربت هو ابوها ازاي ولا مؤاخذه؟؟؟؟

لما ابتديت اكتب الموضوع ده حصل موقف ضايقني والى حد ما اصابني بالاحباط .. لكن لما رجعت واتفرجت عالكليب اللي اتصور في اليوم ده واتفرجت عالصور وعشت وشفت الحاله الحلوه اللي كان الكل فيها .. لقيتني سخنت تاني وابتديت اكتب الموضوع
لأنه فعلا .. وكان يوما .. او زي ما قلت .. وقال تـُدَري
ألا هو مين تـُدَري ده صحيح؟؟؟؟

سوووو