الثلاثاء، 23 ربيع الآخر، 1429 هـ

(14)مذكرات طفل .. طخين

!! المحطة الاربعتاشر .. أكله خفيفه
------------------------------

بعد ما قعدنا انا والامين خالد صالح في اوضته واتكلمنا شويه وقاللي انه عايزني اساعده في القضاء على الحراميه الكبار .. وساعتها استغربت من المنطق اللي هو بيتكلم بيه
رحنا انا وهو مشوار صغير .. اتمشينا بالبوكس وعدينا على كام فرن عيش بلدي .. وكنت باشوف الطوابير وابقى مستغرب الناس دي كلها واقفه ليه .. ده حتى العيش نفسه بيبقى ملدن وماينفعش يتعمل شندوشتات .. لكن مش مهم استغرابي ولا اندهاشي من ان العيش ملدن ومايتاكلش .. المهم الناس دي كلها بقت بتقف طوابير ازاي على غفله .. انا فاكر اننا من سنه ولا سنتين ماكانش في الطوابير دي خالص .. كان في طوابير اه .. بس مش كتير كده ومش بالشكل ده .. ومش طول اليوم .. كان الطابور بيبقى وقت الغدا ولا وقت الفطار الصبح .. مش طول اليوم زي دلوقتي .. وكمان العيش كان بيطلع احسن من الشكل الغريب اللي بيطلع بيه دلوقتي .. شكلا وطعما .. وفي وسط مانا بافكر مع نفسي وباتكلم معاها .. لقيت خالد صالح بيقولي
خالد صالح : آخر تحرياتنا بتقول ان اكتر من الف وخمسمية فرنه بتبيع الدقيق المدعم اللي بيجيلها في السوق السوده
سوووو : طب ومابتقبضوش عليهم ليه مادامت تحرياتكم بتقول كده
خالد صالح : في القضايا اللي زي دي مش مهم اننا نقبض على صاحب فرنه ولا اتنين .. المهم اننا نعرف مين ورا السرقه دي كلها
سوووو : والله يابو خللود انا مش فاهمكم .. منين مش مهم تقبضو على صاحب الفرن .. ومنين هتعرفو اللي ورا السرقه دي كلها
خالد صالح : - وهو ينظر لي بابتسامه - هنا يجي دورك يا سوووو .. هنا بيظهر معدن ولادك يا مصر
---------
دخل الحارس على ابويا وامي عشان يحطلهم الاكل .. وفك الكمامه اللي على بؤ ابويا واللي على بؤ امي .. وحط الاكل قدامهم في صينيه متغطيه بورق جرايد .. ولسه هيقعد يأكلهم بنفسه قام ابويا قاللو
ابويا : بقولك ايه .. ماتفك ايدنا واحنا هناكل بنفسنا
الحارس : لا والنبي .. عشان الاقيكم بعد كده تروحو هربانين والبس انا اسود
امي : - باندهاش - يابني من آمنك لم تخونو ولو كنت خاين
الحارس : - بعد لحظة تفكير - يعني لو فكيت ايديكم مش هتعملو حاجه كده ولا كده ؟؟
ابويا : يابني احنا ناس محترمين .. مش بتوع خناقات ولا مشاكل
بعد ان اقتنع الحارس بمنطق امي وابويا قام بفك وثاق ايديهم .. على ان يعود لربطهم بعد ان ينتهو من الاكل .. واكتفى بربط رجليهم في رجل الكراسي اللي قاعدين عليها .. وبعد ان قام بذلك .. قرب صينية الأكل لهم ووضعها على ترابيزه صغيره .. ولكن ما ان رفع ابويا ورق الجرايد اللي مغطيين بيه الاكل حتى اندهش ونظر للحارس وقال
ابويا : يابني انتو بقالكم يومين بتجيبولنا أي اكل والسلام
الحارس : احمدو ربنا اننا بنعبركم وبنجيبلكم اكل اصلا
امي : يابني ده اللي بيسقي كلب بيدخل الجنه .. مابالك باللي بيأكل اتنين مخطوفين عند شوية كلاب
الحارس : - بعد لحظة تفكير تانيه - طب وانتو بقى عايزين تاكلو ايه ؟؟
ابويا : يعني .. أي أكله خفيفه
الحارس : زي ايه مثلا ؟
امي : فتة موزه
أبويا : طاجن باميه باللحمه الضاني
امي : برام رز معمر باللحمه البتلو
ابويا : رقاق باللحمه المفرومه ومتسقي في شوربة بط
الحارس : - منزعجا - حيلكم حيلكم .. انتو فاكرين (بلبع) بتاع اسكندريه هو اللي خاطفكم ؟؟
امي : ومش هنوصيك عالسلاطات
-------
بعد ان حكى توفيق عبد الحميد لمصطفى شعبان ومنى زكي ماقد حدث معي وما قاله الامين خالد صالح لي .. استغرب مصطفى شعبان كما استغربت انا من قبل من التغير المفاجيء في سلوك خالد صالح ورغبته في مساعدتي له في القبض على المجرمين الكبار .. لكن توفيق عبدالحميد قال
توفيق عبد الحميد : ومين قالكم انه عايز سوووو يساعده فعلا؟؟
مصطفى شعبان : مش ده الكلام اللي هو قالو ؟
منى زكي : وحضرتك يا توفيق بيه اللي قلت انه قال لسوووو انه عايزه يعمل حاجه لمصر
توفيق عبد الحميد : الامين خالد صالح من اكتر امناء الشرطه الاذكياء .. بيعرف عن طريق علاقاته امتى معاد الظبطيه اللي بتعملها الادارة على المجرم .. وبيبعت مجرمين يعرفهم عشان يخلصو عالمجرمين قبل ما يتقبض عليهم
مصطفى شعبان : طب وهو ايه مصلحته في كده ؟
توفيق عبد الحميد : مصلحته انه ياخد جزء كبير من الممنوعات اللي بيتاجر فيها المجرمين دول ويصرفها بمعرفته .. ويسيب جزء عشان يبقى فعلا المجرمين دول في نظر القانون بيتاجرو في الممنوعات
منى زكي : وياترى هو شايف ان سوووو ممكن يساعده في الموضوع ده ازاي ؟؟
مصطفى شعبان : بالظبط .. سوووو مالوش في أي حاجه اصلا .. ده حتى ماعرفش يجيبلنا طبق البليله اللي طلبناه منه
توفيق عبد الحميد : ماهو عشان كده .. يبقى لازم نبقى قريبين من سوووو عشان الامين خالد صالح مايئذيهوش
منى زكي : مظبوط .. بس ازاي؟؟
يقف مصطفى شعبان كمن وجد طريقه لتنفيذ ما قاله رئيس الجهاز
مصطفى شعبان : - وهو مبتسم - انا هقولكم ازاي
--------
بعد ما شفنا منظر افران العيش واستغربت من كلام الامين خالد صالح ورغبته في اني اساعدهم في القبض على اصحاب الافران اللي بيبعو الدقيق المدعم والناس اللي وراهم واللي بيشترو منهم الدقيق .. جه موبيل لخالد صالح وزي مايكون حد بيبلغه ان في حاجه مهمة حصلت .. قام متحرك بالبوكس ورحنا على مكان غريب قوي .. مخزن في منطقة مش عارف هي فين .. الجو كان هادي .. دخلنا جوه لقيت في كراتين مترميه يمين وشمال .. زي مايكون المكان موقع لمعركة حربيه .. بابص يميني لقيت ناس زي مايكونو مقتولين .. استغربت وخفت قوي لكن مسكت نفسي وعملت نفسي مولود في اقاصي الصعيد ومتعود على رؤية الجثث وباقتل كل يوم عالصبح سبعه تسعه ستاشر واحد .. لما الامين خالد صالح بصلي ولمح في الارتباك قاللي بصوت هادي
خالد صالح : دول شوية عيال مجرمين .. وخلصو على بعض
سوووو : طب وجايبيني ليه مادام خلصو على بعض ؟؟
خالد صالح : - مبتسم بمكر وعينيه بتلمع - عشان تبقى عارف ان ممكن يحصلك كده لو مانفذتش كل اللي هقولك عليه بالحرف الواحد
-------
يتبع

سوووو

هناك 105 تعليقات:

wanna b a physician يقول...

هما عايزين يقبضوا عالشعب اصلا عشان نخلص بقا بلا عيش بلا خيش

حلوة اوى جملة
يابني احنا ناس محترمين .. مش بتوع خناقات ولا مشاكل

زى ما يكون ابن الجيران جاى يشتم ويحدف طوب على بيتهم
هههههههههههههههههههههههههه
تحياتى

wanna b a physician يقول...

اه نسيت اول انى الاوووووووووووووووووووووووووووووووووول والتااااااااااااااااااااااااانى اهو

wanna b a physician يقول...

طيب عشان بس مش ازعل التالت كمان

wanna b a physician يقول...

لا بقا كدا انجاز الرابع كمان لا لالالا كفاية كدا يا دكتور بقا كفاية

مجداوية يقول...

ربنا يرحمها ويكرم مثواها وتكون جنة الفردوس مقامها ان شاء الله ,,,عطر ذكرى أغلى الناس ملأ الأجواء ,,ربنا يرحمهم جميعا ويجعل لقاءنا معهم فى الجنة ان شاء الله
تعيش وتفتكر أخى الكريم

رندا يقول...

لحظة تفكير تانيه - طب وانتو بقى عايزين تاكلو ايه ؟؟
ابويا : يعني .. أي أكله خفيفه
الحارس : زي ايه مثلا ؟
امي : فتة موزه
أبويا : طاجن باميه باللحمه الضاني
امي : برام رز معمر باللحمه البتلو
ابويا : رقاق باللحمه المفرومه ومتسقي في شوربة بط
الحارس : - منزعجا - حيلكم حيلكم .. انتو فاكرين (بلبع) بتاع اسكندريه هو اللي خاطفكم ؟؟
,,,,,,,,,,,,,,,
اتصدق انا جوعت ههههههه
خلتنى اعيش فى القصة جامد قوى
وقلت مالها ريحة المدونة حلوة كدة
وكلة بقى الا بلبع دة ياخبر على جمال الطواجن لا وكلة كوم والى بعزف على العود عندة دة كوم تانى هههههه
هبقى احكيلك قصتة بس بعدين
بقولك اية مفيش سمك كمان ولا اية ههههه

حلوة جامدة القصة قوى
انت كمان بتتخيلها بالاشخاص والممثلين
تعالى بقى ننتجها مع بعض
بس نشوف منتج جامد كدة نغدية من بلبع وهو ينهار وينتج على طول

دمت صديقى

رندا

فاتيما يقول...

يا سووو
إيه الأب و الأم الرايقين دول
هما طالعين رحلة يوم فى قرية سياحية و بيطلبوا غدا على مزاجهم و لا إيه؟؟؟
بصراحة أنا عرفت الواد إبنهم دا جايب الذكاء و الألمعيه دى من أنهى مطرح
و بعدين أنا لن أشكك فى شجاعته أبداً
ميتين ميتين و هوه يهمه
يالله لما نشوف اللى يحصل المرة الجاية
و إنت طبعا موش مستنى رأيى ؟؟؟
إيه دا مستنى ؟؟!!
يا جرع مانت عارف من غير ماأقولك
مبدع و دمك خفيف موووووت

سبهللة عالآخر يقول...

هايلة
تحياتى وبالتوفيق ان شاء الله

كاميليا يقول...

امي : يابني ده اللي بيسقي كلب بيدخل الجنه .. مابالك باللي بيأكل اتنين مخطوفين عند شوية كلاب
...............

هههههههههههههه



آمي : فتة موزه
أبويا : طاجن باميه باللحمه الضاني
امي : برام رز معمر باللحمه البتلو
ابويا : رقاق باللحمه المفرومه ومتسقي في شوربة بط
..............

عشان كده مش عرفت تجيب طبق البليلة
ايه بليلة دى جنب قائمة الطعام المفتخر عاليه

ههههههه

تحياتى

خمسة فضفضة يقول...

السلام عليكم ورحمة الله وبركاته

حلوه بلبع دي يا سووو ،طيب ما تنساش تبقي تجيب لزوار المدونه طلب مع ابو وام سوو ،ولا احنا مالناش نفس
بس ماتعملش حسابي في لحوم انا عاوزه حاجه سي فوود من عند قدوره

ههههههههههههه


يلا بقي الحقنا بللي بعده

رئيس جمهوريه نفسى يقول...

مبدئيا يا عجوز عايز اقولك حاجه فى المدونات شفت شرح وشفت تشريح الشرح بيبسط المشكله ويشرحها التشريح بيشرح المشكله ويقول اسبابها وده الى انت بتعمله
زى موضوع الافران وازمه رغيف العيش الناس بطلت تسال العيش يتاكل ولا لا العيش دلوقتى عيش والسلام واقلب مش مهم صالح للاستعمال الادمى ولا لا
وبما انى حضرتك جبت سيره الاكل يا برنس وبما انى فى احتمالات انى ان شاء الله فى القاهره الاسبوع بعد الجاى اعمل حسابك على عشاء لما اجيلك على البورصه طبعا بعد ما نلعب على العدد بتاعت الموبيل يا برنس

اهو ده عيبه يقول...

اولا احب اقولك رحم الله امك وامى واموات المسلمين جميعا
---------------------------------
ثانيا بقى ايه الحلقه السمينة دى
وانا اقول انت طالع اكيل وذواقه لمين اتارى للوالد والوالده ، لا وطلباتهم سمينه قوى ومتكلفه

اتاريك مستغرب شكل العيش مهو انت مش بتاكل النوع ده
طب تصدق بالله ان عندنا فرن بيطلع الرغيف على شكل مثلث مش مدور وكل انتاجه كده مش غلطه واحد ولا اتنين

عموما ربنا يستر عليك من خالد صالح شكله هيستغلك اسوأ استغلال يابنى

Zika يقول...

:D:D:D:D:D:d
بقولك ايه انا مش مطمن من الجدع اللي اسمه خالد صالح ده
:D
حاسس كده انه هيخليك تعمل مصيبه
عموما لا خللي بالك وخد حذرك منه علي قد ما تقدر
والحاجات دي لازم تنزل في كتاب
اوعي تقول خالد صالح اني قلتلك كده
;)

Dr-hema يقول...

العيش العيش رغيف العيش غناله شعبان عبد الرحيم
وانت بتقوله فى روايتك نوع من التفاعل
^_^
بس انت كده بنكشف احكومة ياباشا
ربنا يستر
حاميها حراميها

انين الحزن يقول...

سوووووووووو

ازيك اخبارك ايه ليك واحشه بجد

انا طبعا فاتني حاجات كتير بس طبعا طالما منك تبقي جامده اصلن ولا ايه

سلاموووووووووز
وزة

جيهان علي يقول...

السلام عليكم ورحمة الله وبركاته

الطوابير زادت عن الحد لأن كل حاجة غلت الأرز والمكرونة وكل حاجة فبقى الأرخص عند الناس هو العيش حتى لو غير صالح للإستهلاك الأدمي لكن اهو ارحم من الحاجات التانية اللي اسعارها ارتفعت اضعاف واضعاف

ما علينا


وبجد الأكلة الخفيفة
خفيفة بجد
لازم يطلبوا حاجات كدة تغذي

-----------------------------

رحم الله والدتك وغفر لها وجمعك معها في الفردوس الأعلى


تحياتي

أبو خالد يقول...

حبيبى سوووو
أنا اعتقد أن أصحاب الأفران كبش فداء
لناس تقال ..
و بما أنك ذكرت بلبع ..
أذن أنت عامل تغطية على مطاعم مصر
المحروسة
دمت إنسان جميل
كان نفسى تفتح باب التعليق فى البوست
اللى فات ..

همس الاحباب يقول...

اولا تعيش وتفتكر
وربنا يرحمها ويدخلها فسيح جناته
بجد انت مشكلة يا سووووو
بتجيب المشكلة المهمة باسلوب بسيط ولذيذ وبتقربه كانا عايشين جوه المشهد بجد
وعجبنى الجزء الخاص بالوالد والوالدة وعايزين اكلة خفيفة هى فعلا كل الاكلات اللى بيقوله عليها خفيفة جدا بالنسبة لينا كصعايدة يعنى بس بجد رائع قوى يا سووووووووو
وكل يوم بتقتل سبعة تسعةستاشر يا راجل عيب ده احنا دفنينه سوى ههههههههه
سلامووووووز يا عسل

رئـــــيسـة حزب الأحلام يقول...

انت مستغرب من طابور العيش تخيل كذا مرة اجيب عيش ويطلع مابيتعملشى سندوتشات نروح نغمس بية وتحياتى لك ياباشا

حسبي الله ونعم الوكيل يقول...

أزمة العيش أتحلت وفصلو المخبز والخباز عن منافذ البيع والأشية بأت معدن والحمد لله ويجعله عامر

Eldebug يقول...

ايه يا سووو ده ... فى الحلقة ال14 ياراجل ولسه ماجتش المحلة عندنا ... تعالى بس وهات خالد صالح معاك واحنا نظبطهولك ... هنشغله الخرارة

ومتخافش انت فى الحفظ والصون وقبل ما القوات تقتحم البلد هنهربك من النفق السرى اللى يطلعك على سمنود طوالى....

سبهللة عالآخر يقول...

اول مرة اخد بالى انك خريج فنون تطبيقية
وانا كمان
انا دفعة 99 تصميم داخلى وأثاث
وانت دفعة كام وقسم ايه ؟
يمكن نطلع نعرف بعض ولا حاجة

Human يقول...

ههههههههه....جامده جدا ياسوووو
عجبتني قوي الربط اللي مابينه وبين الأفلام ...مستني اللي بعد كده

shayma يقول...

لالالالالالالا
الكلام ده مينفعش عالاخر
عيش ايه وكلام فاضى ايه يا اكسيلانس
مسمعتش المثل الشعبى القديم الى بيقولك ياكلو بيتى فور ياكلو جاتوه ياكلو كل الى يحبوه

يلاااااااااا بخاطرها ام صاحب الفرن

ولما تروح اسكندريه تانى تجيبلى معاك من بلبع اى حاجه الى يجى على زوقك
:))))))))))

سلاخووووووووووووخ يا سوووووووووووووووووووووووووو

Soooo يقول...

wanna b a physician

يادكتره حكومه من غير شعب ولا حاجه
يعني بذمتك .. مش لازم الحكومه كل يوم والتاني تطلع في التلفزيون تقول ان البلد هتبقى فل الفل ومافيش اي مشاكل
طب تخيل بقى ان مافيش شعب من اساسه عشان الحكومه تقوللو الكلام ده .. بذمتك هيبقى ليها لازمه

وبعدين خبر ايه ياعم
انت استفردت بالمدونه كده مثنى وثلاث ورباع
لا بقى
ده انا مدونتي طاهره
وهتفضل طول عمرها طاهره
ويا ام المطاهره رشي الملح سفن تايمز

نورتني وربنا مايحرمنيش من دخلتك الحلوة دي علي
بس يعني ولا جايب سماعه ولا ميكروكروم ولا شوية قطن ننجد بيهم الكنب حتى
ايه ده ياجرع




سلاموووووووووووز

Soooo يقول...

مجداوية

ربنا يرحم امي ويرحم كل امواتنا واحياءنا مسلمين ومسلمات
ويجمعنا بهم في جنة الفردوس الاعلى بصحبة سيدنا ونبينا محمد عليه افضل صلاة واتم تسليم

متشكر جدا لنبل مشاعرك .. وربنا يجعله في ميزان حسناتك ان شاء الله




سلاموووووووووز

Soooo يقول...

رندا

لا تقلقي
السمك لسه جااااااي
ده في حلقة بحالها عن السمك

وبعدين ايه حكاية ابو عود ده
انا باروح على طول بلبع وماشفتش حد بيعزف عود ولا حاجه
ولا انتي قصدك بلبع تاني غير بلبعي؟؟

ملحوظه
بقى احنا يا مدونين يافقرانين اللي هنعزم المنتج على بلبع .. انا اخري اعزمة على اتنين كبده وسجق وواحد سكلانس من زيزو نتانه اللي في بوابة النصر




سلامووووووووووووز

Soooo يقول...

فاتيما

والله هو من ناحية الروقان والشجاعه فانجازاتي العزيمه هي التي تتحدث عن نفسياتها

وعلى فكره بقى
اول الغيث قطره
ده في بلاوي هتحصل في الحلقات الجايه ان شاء الله
تابعونا وستجدو مايسركم


سلامي لوالدتك العزيزه




سلاموووووووووز

Soooo يقول...

سبهللة عالآخر

اهلا بيكي في اول زياره ليكي لمدونتي المتواضعه وباتمنى انك تعتبريها مدونتك وتشرفيني دايما رآرائك وتعليقاتك

ويارب تتابعي المذكرات ويارب تعجبك

ملحوظه
انا خريج دفعة الفين واتنين قسم اثاثت وانشاءات معدنيه .. قسم حديد على حديد يفعل الله مايريد .. بس مدبلر سنه .. واعتقد ان من دفعتك عمرو سعد او عمرو سمير .. والاتنين كانو معايا في فريق المسرح .. وانتي لو شفتيني ممكن تعرفيني لاني كنت شرده قوي في الكليه




سلامووووووووووز

Soooo يقول...

كاميليا

والله يا كاميللو .. العبد لله بياكل اي حاجه مادامت النفس راضيه
مش هتفرق بقى بليله من حمص الشام من سيليزوو من شاتوه برياا من بيتزا من فطير مشلتت
اهم حاجه .. النفس

بس بيني وبينك .. انا اكلتي ضعفت قوي اليومين دول
يادوبك باكل نص فرخه وطبق رز على طاجن خضار باللحمه على طبق مكرونه على شوربة على شوية سلطه خضرا على طبق طحينه ورغيفين ولتر بيبس وقفلت على كده
شكلي اتحسدت




سلاموووووووووووووز

Soooo يقول...

خمسة فضفضة

وعليكم السلام ورحمة الله وبركاته

بس كده
ده المدونين يؤمروني وانا انفذ
وانتي ياستي مش هجبلك من قدورة .. لأ
ده انا هجبلك احلى سمكه بوري سنجاري واحلى رز بالجمبري وطاجن سبيا وشوربة جندوفلي على كام كابوريايا نتي .. بس من الكتعه
واي خدمه




سلاموووووووووووووز

Soooo يقول...

رئيس جمهوريه نفسى

طب والله العظيم انا باحبك كل يوم اكتر من الاول يا حودا
وياسيدي تعالى وليك احسن عزومه في اجدعها مكان فيكي يا قاهرة
هو انا عندي كام ابو حنفي يعني

وبالنوسبه للحوار اللعب عالموبيلات
اتمرن من دلوقتي يابو حنفي عشان انا واخد بطولة الجمهوريه في قرص الزهر .. وانا بالعب دومينو



سلاموووووووووووووز

Soooo يقول...

اهو ده عيبه

ربنا يرحم امي ويرحم موتانا وموتى المسلمين اجمعين ويجمعنا بهم في جنة الفردوس الاعلى بصحبة نبينا وسيدنا محمد عليه افضل صلاة واتم تسليم
-----
الحمدلله ان الحلقه عجبتك وانك استمتعتي بدسامتها

وتصدقي وتؤمني بالله .. النهارده بعت البواب يجبلي عيش من ابو شلن مخصوص عشان اشوف شكله تحول لايه لقيته عبارة عن عمل سريالي .. ولولا اني مش معايا كاميرا كنت صورته وحطيت صورته عشان اللي بيقولو ان ازمة العيش خلصت يعرفو ان الازمه مش ازمة عيش قد ماهي ازمة ضمير

نورتيني والله




سلامووووووووووووز

Soooo يقول...

Zika

لا تقلق يا ابو الزيييييييك
اخوك حريص وواخد باله .. والحلقات الجايه ستثبتلك ان مش سوووو اللي يتنصب عليه ويأكلوه رغيف متاكل قبل كده عشر مرات

وبالنسبه للكتاب .. فصدقني والله .. ان الحكايه مش هتفرق طول ما ربنا رازقني بناس باحبهم وبيحبوني بيقرولي وبيشجعوني زيكم

ربنا يديم المعروف يارب




سلامووووووووووووز

Soooo يقول...

Dr-hema

اكشف الحكومه
انت لسه شفت حاجه
ربنا يسترررررررررر

وسعيد بزيارتك والله وبتعليقك

ملحوظه
شعبان عبد الرحيم ده انسان وطني جدا .. وليه دور في احداث المذكرات .. تابعها وهتشوف




سلامووووووووووز

Soooo يقول...

انين الحزن

انتي فيييييييييييييين يابنتي
طب والله العظيم ماتتصوريش مدى سعادتي برجوعك وظهورك للتدوين مره تانيه وتقريبا ماكنتش مصدق نفسي

اياكي تختفي كده وتخلي اخوكي التؤام يقلق عليكي
اياكي

وياستي اقري اللي فاتك براحتك ويارب يعجبك



سلاموووووووووووووز

Soooo يقول...

جيهان علي

وعليكم السلام ورحمة الله وبركاته

واهلا بيكي ياستي في مدونتي المتواضعه ويارب تعتبريها زي مدونتك وتنوريني دايما بتعليقاتك وبآرائك

وفعلا سبب اقبال الناس بطريقه مهوله على العيش ان كل السلع التانيه من رز ومكرونه غليت وبالتالي مابقاش فاضل للناس الغلابه غير رغيف العيش اللي لا يسمن ولا يغني من جوع

ويارب تكون الأكلة او الحلقه الدسمه عجبتك ويارب تتابعيها

-------
ربنا يرحم امي ويرحم كل موتانا وموتى المسلمين ويجمعنا بيهم في جنة الفردوس الاعلى بصحبة سيدنا ونبينا محمد عليه افضل صلاة واتم تسليم يارب
والف شكر على مشاعرك النبيله




سلامووووووووووووووز

Soooo يقول...

أبو خالد

اهلا اهلا اهلا بيك يا استاذي الفاضل في اول زياره ليك عندي كمدون ويارب ماتحرمني من متابعتك وزياراتك وتشجيعك الدائم لشخصي المتواضع

وفعلا .. اصحاب الافران ضحايا لناس تقال في البلد وده اللي هحاول اوضحه في الحلقات الجايه وربنا يستر

وبعدين انا والحمدلله لفيت اشهر مطاعم المحروسه لسبب بسيط .. اني باعتبر الاكل فن بجد .. وانا باعز الفن بصراحه

-----
سبب غلقي للتعليقات عالموضوع السابق هو اني مش عايز الناس يتبارو في اظهار مساندتهم لي في العلن وانهم يدعو لامي الله يرحمها في سرهم عشان ثواب الدعاء يكون مضاعف ليهم ان شاء الله
وربنا يرحم امي ويرحم كل موتانا وموتى المسلمين ويجمعنا بيهم في جنة الفردوس الاعلى بصحبة سيدنا ونبينا محمد عليه افضل صلاة واتم تسليم




سلامووووووووووووز

Soooo يقول...

همس الاحباب

خالد باشا
منورني والله يابن عمي
وربنا يرحم امي ويرحم موتانا وموتى المسلمين ويجمعنا بيهم في جنة الفردوس الاعلى بصحبة سيدنا ونبينا محمد عليه افضل صلاة واتم تسليم
-----
وبعدين ياسيدي انا ولا مصيبه ولا حاجه .. دي شوية شخبطه باشخبطها وخلاص
وفعلا الاكل اللي قلت عليه حاجات خفيفة جنب كرم الصعايده
وبعدين خبر ايه ياعمنا
خبر ايه يابو همس
انت جاي تشردلي في المدونه وتقولي دافنينه سوا
ياعم سبني امعر شويه
مره من نفسي ياجرع


نورتني يابن عمي والله
وسلامي لهمس



سلاموووووووووووز

Soooo يقول...

رئـــــيسـة حزب الأحلام

وياريته حتى نافع في غموس
ده طعمه نفسه بقى حاجه اختراع لاوذعي كده وغريب
وتخيلي والله العظيم لو الاكل اتاكل بخمسين رغيف ولا بيشبع ولا بيقنع

ربنا يتسرها




سلاموووووووووووز

Soooo يقول...

حسبي الله ونعم الوكيل

الاول اهلا بيكي ومشرفاني ويارب تعتبري مدونتي المتواضعه زي مدونتك تمام وتنوريني بتعليقاتك وبآرائك دايما

ثانيا .. المشكله مش في ان مافيش طوابير دلوقتي
المشكله في العيش نفسه
وبعدين اساسا اساسا .. ايه اللي عمل مشكلة طوابير العيش؟؟
ومين اللي استفاد بكمية الدقيق اللي اتباعت سوق سودا
ومين اللي ورا الحوار ده كللو ؟؟؟

جاوبي وهتلاقي نفسك بتقولي .. حسبنا الله ونعم الوكيل



سلاموووووووووووووز

Soooo يقول...

Eldebug

لا ياعم انتو خطر
الواحد بقى زي مايكون هيروح غزة ولا حاجه .. وبعد مايرجع ممكن تلاقي امن الدولة والمخابرات بتراقبك
مع انك ممكن تكون مسافر عشان تجبلك كام كوفرتايه ولا كام فوطه

سيبك انت
منورني والله انت وابناء المحله الاحرار




سلامووووووووووووز

Soooo يقول...

Human

الحمدلله ان ربنا وفقني وقدرت ارسم ابتسامه على وشك في زمننا الاغبر ده
ويارب تتابعني ويارب تعجبك المذكرات



سلاموووووووووووز

Soooo يقول...

shayma

استغفر الله العظيم
جاتون؟؟
انتي عايزه تبوظي دماغ الناس اللي بيقرولي
ياكلو جاتون؟؟؟
استغفر الله العظيم
سامحها يارب
سامحها

عقلي الباطن بيقولي انك مشاركة حد في فرنه افرنجي

وبعدين ان شاء الله في اول زياره لي للحاج بلبع .. هبلغو سلامك



سلامووووووووووووز

Z_Diva يقول...

la la la la, ana lzm a3rf el7lkat elmtsalsla elsiryalya de htrou7 bina 3la feen
waiting for el7lka elkadima :D

Soooo يقول...

Z_Diva

الحلقات دي اخرها خير ان شاء الله
بس انتي تابعيها وربنا يسهل


ملحوظه
الاقيش معاكي طبق شوربة حلازين؟؟؟





سلاموووووووووووز

رندا يقول...

وبعدين ايه حكاية ابو عود ده
انا باروح على طول بلبع وماشفتش حد بيعزف عود ولا حاجه
ولا انتي قصدك بلبع تاني غير بلبعي؟؟

ملحوظه
ـــــ
بقى احنا يا مدونين يافقرانين اللي هنعزم المنتج على بلبع .. انا اخري اعزمة على اتنين كبده وسجق وواحد سكلانس من زيزو نتانه اللي في بوابة النصر
..............
ههههههههه
بلبعك بلبعنا بلبع بتاعنا كلنا
هو انت بتروح اى بلبع
فى الاسكندرية ياعمنا فى ابو عود هناك وبيغنى كمان
يبقى بيطلعلى انا بس بقى
ولا اية (وش خايف)

وبعدين بالشرح بتاعك
لعزومة المنتج دة اكيد
مش هتشوف ابو عود
انت بتشوف ابو عود قصب طيب ههههه
طيب اقولك تيجى نعزم المنتج على سوبيا الى بتتشرب ههههه
اهو من ريحة السمك برضة
تحياتى لااظرف كاتب

رندا

مفقوعة مرارتي من حماتــــــــــــي يقول...

خالد صالح هايطلع مش ولا بد ... ياتري مخبيلك أيه ياسووووووووووو

بس هو مافيش غير الحاج سوووووو إللي هايحل مشاكل البلد كلها ؟
الواد غلبان وبطنه بتصوصو كتير

واحدة مفروسة يقول...

سلام عليكم
انا متهيئلى سبت تعليق فى البوست ده قبل كده .....مش عارفه هوه اللى اتلغى و لا ما اتقبلش من اصله
ما علينا....نعيش و تفتكر..وربنا يصبرك ده اولا
ثانيا الاكل المطلوب ده يجرى الريق
ثالثا:ربنا يستر على سووووو من المهمه ديه

Desert cat يقول...

هما كانوا مخطوفين عند حاتى ولا ايه
ده انا جوعت على الاكل اللى نفسهم ياكلوه
الاقيش عندك فتة وموزة
طبعا انا عارفاك يا سو مش بتخاف من منظر الدم يعنى انت كل يوم ممكن تفطر بعلين وتتغدى ب 4 رجالة علشان كدا اكيد مش خوفت من المنظر اللى شوفته والبلطجية الل خلصوا على بعض
ابقى سلم لى على خالد صالح
قصدى خالد يوسف
هههههههههه

خايف من الحقيقة يقول...

يا سووووووووووووو
بطل تجيب سيره اي اكل في المدونه
والا في ناس بدل ما تقرا هتاكل

وبعدين انت زعلان اوي كده ليه

البلد بخييييييييييييير بس انتوا مش فاهمين

هو فيه بلد فقيره فيها حد طخين!!!!

بجد انت رائع

تحياتي

maiosha يقول...

دى أول زيارة ليا فى المدونة
بس بجد قصة ملهاش حل .. عايلة هايلة هايلة
كله كوم والأكلة الخفيفة دى كوم ..هههههه
ده كده اللى خطفينهم هيرجعوهم تانى يوم ويدفعوا عليهم فلوس
يالا مستنيين التكملة متتأخرش علينا

يوميات فنانه مفروسه جداا يقول...

soooooooباشا
احيك علي اسلوبك الفظيع في السرد ايه ده يا بني وانا بقرأ البوست تخيلت الفنانين وهما بيقولو الاحداث عيشتني في القصه غصب عني .
مممممممممممممممممم كل الاكل حلو اوي ماعدا الصنف الاخير ده في حد لسه بياكل رقاق متسقي في شوربة الكائن ده اللي اسمه بط استغفر الله العظيم موعتلي نفسي
والله.
الله انا فعلا نفسي اروح بلبع يلا كل المعلقيين اللي هنا sooooooعازمنا علي بلبع.ههههههههههههههههههه
احلي تدبيسه
وعلي فكره احنا زمايل انت فنون تطبيقيه وانا تربيه فنيه بصره
بوست هايل وتحياتي ليك

ابو على يقول...

هههههههه واللهى مش بوستك جميل جدا
مش هاقول اكتر من دمك زى الشربات
ربنا يديم عليك السكر وميغلاش تانى

Soooo يقول...

رندا

انتي هتقوليلي على بلبع
ده انا كرشي من طواجنه
بس بجد والله انا ماشفتش حد بيعزف على عود هناك
سواءا في بلبع بتاع اسكندريه او بتاع الميد تاون

يمكن الحوار ده جديد او حصل في الفتره اللي انا ماكنتش باروحله فيها وكنت مقضيها ابو رامي بتاع المدبح


وبالنوسبه للسوبيا اللي بتتشرب .. انا باقترح اننا نعزمه على سوبيا مزز من الرحماني بتاع السيده .. ويعقبها على طول عصير لب من الراجل بتاع جامعة الدول
هتلاقي المنتج بقى في البالوطه خالص


والف شكر على كلامك الجميل ده وربنا يارب يكرمك ويعطيكي مايحرمك





سلاموووووووووووز

Soooo يقول...

مفقوعة مرارتي من حماتــــــــــــي

والله ياسوسو .. ماعرفش بجد خالد صالح ناوي على ايه
بس ربنا يستر

اما بقى ان مافيش غيري عشان احل مشاكل البلد .. فأنا ياما حليت مشاكل دول
بس الواحد مش عايز يقول
يعني .. خليها صدقة مخفيه احسن





سلامووووووووووووز

Soooo يقول...

واحدة مفروسة

وكتاب الله ماعملت حاجه
هو انتي بس تلاقي الحاج بلوج سبوت لما شاف تعليقك عجبه قام مكمره على جنب عنده ومارضيش يوريهوني

وبجد الف شكر على مشاعرك النبيله وربنا يرحم موتانا وموتى المسلمين جميعا يارب

ويارب تتابعي باقي المذكرات ويارب تعجبك




سلامووووووووووووز

Soooo يقول...

Desert cat

هابقى اجبلك وانا جاي في الزياره القادمه ان شاء الله طاجن عكاوي بالبطاطس وطبق رز بالخلطه
عشان الفتة بالموزه خلصت واخر اوردر لسه طالع من شويه

وبعدين خبر ايه .. هو انتي وخالد هتسيحولي في المدونه وماسكين جزئية اني بلطجي دي وعمالين تقولو مش عارف ايه
لأ
علمك علمك علمك .. انا شرير بس بحاول اتعالج .. وتقريبا العلاج جاب فايده اهو بدليل انك وخالد عمالين تقولو اني طيب

ملحوظه
خالد يوسف مين اللي انتي معلقه عليه من اول الحدوته؟؟؟؟؟




سلاموووووووووووووز

Soooo يقول...

خايف من الحقيقة

مجرد ان الناس تتخيل الاكل وريقها يجري على الاكل ده في حد ذاته نجاح لي
ليه بقى
عشان الناس كلها تبقى طخان زي وماحدش يتريق علي
نياهاهاهعهعهعهاهع

وتصدق فعلا البلد في خير
بس على فكره .. انا تخنت لما كنت ف السعوديه

نياهاهاهاهاعهاهع


مش عارف ايه ضحكة الشريرين اللي ماسكاني دي؟؟؟




سلامووووووووووووووز

Soooo يقول...

maiosha

بجد سعيد جدا بزيارتك وبتعليقك الجميل ده ويارب تعتبري مدونتي المتواضعه في مقام مدونتك وتعلقي عندي براحتك وتشرفيني بزياراتك ومتابعتك

وتصدقي انه فعلا لو الخطف بالصعوبه دي ممكن شغل العصابات يبوظ .. خصوصا لو كل المخطوفين زي ابو وام سوووو





سلاموووووووووووز

Soooo يقول...

يوميات فنانه مفروسه جداا

اهلا بيكي ياستي ويارب تعتبري مدونتي زي مدونتك وتنوريني بزياراتك وبتعليقاتك دايما

وبعدين ماله الرقاق بقى؟؟
لا خلي بالك .. انا مدمن رقاق

وبعدين انتي جايه من اولها تغرميني مبلغ وقدره
بلبع ايه اللي اعزم المعلقين عليه
ده انا كده هاشحت يابنتي ويادوبك هقدر انزل لكم طقم السلاطات بتاعته

وياستي فنون تطبيقيه تربيه فنيه .. ولاد عبد الواحد كلهم واحد .. وكللو بيروح في الغسيل





سلامووووووووووووز

Soooo يقول...

ابو على

ده تعليقك وزيارتك دي هي اللي زي الشربات

ويارب تتابع المذكرات ويارب تعجبك

وياريت تعتبر مدونتي زي مدونتك تمام وتنورني دايما بتعليقاتك وبزياراتك





سلاموووووووووووز

امل يقول...

اول زيارة
بس ان شاء الله طبعا هرجع تاني عشان اكمل الاحداث
الفكرة ظريفة قوي وبيتهيأ لي جديدة
وكمان دمها خفيف
قعدت اضحك قوي على حوار الاب والام مع الحارس

Dr-hema يقول...

هههههههههههههههه
قشطةياباشا
مرةواحدة
دانتجايب الإستف كله بتاع الممثلين بقى

Miss. Sosa يقول...

السلام عليكم

:)

تصدق اكله خفيفة فعلا
واضح ان باباك ومامتك متربيين علي الغالي :)

الا هو مين بلبع بتاع اسكندرية ده

سلاااام

somaa mahaba يقول...

حيحبسوك يا صاحبى خد بالك من نفسك
تحياتى ليك سومه_87

حنين القلب يقول...

السلام عليكم
خلى بالك خالد صالح شكله بيدبر ليك مصيبه. وبعدين انت اصلا ايه اللى دخلك مع الناس دى يا سوووووووووو وبابا وماما كمان مخطوفين يا خسارة انا جيب فى الاخر بس هحاول اقرى من الاول علشان افهم الحكايه كلها على بعضها.
سلام

سهر الليالى يقول...

هو انت بقيت مع مين على مين
بس المرة دى فيها جدية كتير

عامه بلبع من اسكندرية بيسلم عليك
ههههههههههه

تحياتى

Soooo يقول...

امل

اهلا بيكي يافندم ويارب تعتبري مدونتي المتواضعه زي مدونتك تمام وتشرفيني بزيارتك وبتعليقاتك

ويارب تكون الحلقه عجبتك وان شاء الله تتابعيها لآخرها ويارب تعجبك



سلامووووووووووووز

Soooo يقول...

Dr-hema

ولسه يادكتره
ده انا شايل شوية ممثلين على جنب مخليهم طوارئ لو حاجه كده ولا كده حصلت

منورني والله




سلامووووووووووز

Soooo يقول...

Miss. Sosa

احنا من ناحية الغالي فالحمدلله كنت باكل سيريلاك مستورد وانا صغير مش ريري زي باقي الناس
اه
يعني متربيين عالغالي بس الزمن جار علينا ياختي والله وعرفنا الكبده والسجق على كبر


ملحوظه
بلبع في اسكندريه زي هرم منقرع في الجيزة ... بس في الاكل


سلاموووووووووووز

Soooo يقول...

somaa mahaba

يحبسو مين؟؟؟
ده انا خالي الله يرحمه محامي ويوديهم في ستين داهيه

لا تقلقي ياصاحبي




سلامووووووووووز

Soooo يقول...

حنين القلب

وعليكم السلام ورحمة الله وبركاته
والله هو يستحسن انك تقري المذكرات من اولها عشان تفهمي الحدوته من اولها

وشرفتيني بزيارتك ويارب تعتبري مدونتي المتواضعه زي مدونتك تمام وتشرفيني بزياراتك وتعليقك دايما يارب



سلامووووووووووووز

Soooo يقول...

سهر الليالى

والله انا تهت ياسهر ومابقتش فاهم انا فين
بس ربنا يستر واعرف ايه العباره


ملحوظه
بلغي بلبع سلامي الحار وقوليله اني ان شاء الله جاي الاسبوع الجاي .. يبدأو يجهزو بقى في الذي منه



سلاموووووووووووز

صحفية روشة يقول...

رغم الكوميديا التى تنطوى عليها كلماتك
دمك زى السكر
وكمان بتتكلم ولا يجى فى ستين بلوه بتحصل
تحياتى

رندا يقول...

وبالنوسبه للسوبيا اللي بتتشرب .. انا باقترح اننا نعزمه على سوبيا مزز من الرحماني بتاع السيده .. ويعقبها على طول عصير لب من الراجل بتاع جامعة الدول
هتلاقي المنتج بقى في البالوطه خالص
,,,,,,,,,

طيب اتصدق بقى انا كدة توهت على الاخر هههه
وبسئل كل الى حواليا على الرحمانى
وفى عصير لب
ضحكوا عليا ياعم شوفت بقى هههههه
هو فى من لب دة ههههه
جديدة دى
دة المنتج هيبقى سوبر منتج على كدة
وهيبقى الفيلم ابيض يالب ههههههه

تحياتى وموتنى من الضحك

رندا

Salma Amer يقول...

على فكرة لو دورنا شوية حنلاقي ان طابور العيش دة من أيام الفرعانة وربنا ما يقطع لينا عادة

تحياتي لك

rain man يقول...

في القضايا اللي زي دي مش مهم اننا نقبض على صاحب فرن

المهم اننا نقبض منه

جميل معالجتك للاحداث الجارية عن طريق مذكرات طفلك التخين
اشياء مثل تلك تكون بمثابة رجييييم قاسي لعقول ليس لتخنها وصف او حدود

احييك

الشنكوتي الكبير يقول...

انت يا جميل توهتني خالص والقصه بقى فيها سبعميت اتجاه ومنظور جيت تحل ازمة البساطه في الأفلام العربيه رحت مخلص علينا خالص
انا بقيت مذبهل وتلحوس على الأخر وعمال اركز قوي علشان ابقى صاحي ومتابع الأحداث كويس قوي
بس سيبك انت الفنان فنان برده تسلم ايدك

حبيت اقولك برده ربنا يرحم والدتك ويسكنها فسيح جناته ويلهمك الصبر
تعيش وتفتكر
سلاااااااااااااااااام
اخوك ايهاب

واحد من البلد دى يقول...

قولى يا سوووو...
هو سوووو اللى فى القصة دى(أحمد السقا)
المهم بقى أنا مش كل بوست حقولك رائع رائع...
بص بقى
رائع رائع رائع رائع رائع رائع رائع رائع رائع رائع رائع...
كده يبقى أنا رديت لغاية الحلقة خمسة وعشرين ...ومتبقاش تتأخر علينا كده
تحياتى يا جميل

حمامة يقول...

فته وموزة

هما قاعدين ف مسمط :D

ايش حال كانوا مخطوفين دول يحمدوا

ربنا انهم بيأكلوهم

كمل بسرعة بقى :)

Soooo يقول...

صحفية روشة

ياااه
اخيرا جيتي
وفين صينية البطاطس اللي قلتلك عليها؟؟؟


الف شكر على تعليقك وعلى كلامك وربنا يكرمك ياستي




سلاموووووووووووووز

Soooo يقول...

رندا

لا
اهو انتي كده لخبطتي الاختراعات على بعضيها
الرحماني ده ياستي محل في السيده زينب بيعمل سوبيا مزز وسوبيا حلو .. الى جانب السوبيا اللي بنشربها عادي

عصير اللب ده اختراع تاني خالص .. وموجود في محلات عصير كتير
عصير لب سوبر .. وفي عصير دوم وبلح والحوارات العاديه دي

بس احسن واحد بيعمل عصير اللب ده محل في المهندسين في شارع متفرع من شارع جامعة الدول .. مش فاكر اسمه الحقيقه بس لو رحت هناك هعرفه على طول

اختراع اختراع يعني

ونورتيني ياستي ويارب تفضلي منوراني دايما بتعليقاتك وربنا يكرمك دنيا وآخره




سلامووووووووووز

Soooo يقول...

Salma Amer

في بحث عملو الفيلسوف القديم المعاصر زكي وح وح بيؤكد ان اول طابور عيش كان في طابونة عيش في بلاد طيبه .. وكان اسم صاحب الطابونه .. لقم أع .. وتحور اسمه بفعل عوامل التعريه لانه بقى لقمة .. وال أع اول حرف من كلمة عيش .. وبكده نقدر نقور .. لقمة عيش

عظيمة يا مصر
يا ارض اللوا




سلامووووووووووووز

Soooo يقول...

rain man

المشكله يا ميدو مش في ان الناس عقلها بقى تخين ولازم يتعمللو رجيم
المشكله ان الناس بقت بتتخيل عبثا ان ده هو الطبيعي .. وايش تعمل الماشطه في الوش العكر

المثل ده باحبه موووووت .. بيفكرني بالاحياء الشعبيه لما بيزورها مسئول مهم

نورتني يا برنس والله .. والف مبروك على الشيزوفرنيا





سلاموووووووووووووز

Soooo يقول...

الشنكوتي الكبير

انا ياعم ولا عملت حاجه خالص
ده اللي بيحصل بيحصل مع الطفل الطخين اللي جوايا
بيتحط في مواقف وحوارات
انا مالي بقى؟؟؟؟؟
----
الف شكر يا ايهاب على مشاعرك الجميله دي
وربنا يرحم موتانا وموتى المسلمين جميعا يارب





سلاموووووووووووووز

Soooo يقول...

واحد من البلد دى

سوووو اللي في القصه دي هو الطفل اللي بيشوف اللي بيحصل حواليه وبيتكلم عنه بتلقائيه
ممكن يكون متأثر بالسينما لانه شايف ان الحياه بتتحل دايما في أخر لقطه في الفيلم بعكس الواقع
ممكن يكون شايف ان السقا او مصطفى شعبان او خالد صالحخ او منى زكي دول اشخاص هو وغيره اتأثرو بيهم
ممكن وممكن وممكن
بس المهم
هو رأي الناس

سعيد جدا جدا جدا بتعليقك
فتحتلي سكة اوضح نقطه ياريت الناس تقراها عشان تبقى فاهمه قصدي





سلاموووووووووووز

Soooo يقول...

حمامة

القانون يكفل للمخطوف انه ياكل بمزاجه
راجع قانون العقوبات صفحة المخطوفين والمخطوفات
ولا انا هتبللى عالحكومه مثلا؟؟؟


ملحوظه
الفته والموزه لا تباع في المسمط .. لحمة الراس والكرشه والفشه والعفشه هي التي تباع في المسمط
ده تاريخ واصول صنعه لا يجب الاستهانه بقى
ربنا هيحاسبنا ياعم على اللي بنقوله ولازم نراعي المصداقيه في الحوار





سلامووووووووووووز

ra7eel يقول...

سوووو

ايه هو مش موضوع الاكل ده مش من بره ولا ايه

يعنى مخطوفين وبيطلبوا مالذ وطاب
هههههههههههههه

ربنا يفك اسرهم على خير

تحياتى

احمد ابوالعلا يقول...

تضامنا مع حركة كفاية اقدم شعارات مصورة للنشر على المدونات لمن يرغب
http://7arfwaw.blogspot.com/

بنت مصريه يقول...

هههههههههههه
يخرب بيت عقلك يا سوووو
بس سبحان الله
الحج والست الوالده نفسهم مفتوحه قوى هههههه
ولا كأنهم مخطوفين
احييك يا سووو
بجد حلقه حلوه قوى

رئيس جمهوريه نفسى يقول...

سو
الف شكر يا غالى على ردك غيبتى

عاليا حليم يقول...

نفسى يوسف شاهين يقرا سيناريو هى فوضى المعدل على أيدك ده

على فكرة يا ولد يا سووو انت طلعت جدع اوى -طبعا انت فاهم قصدى

و انا حبيتك زيادة ... بس زى اخويا يعنى :)

القط البرى يقول...

بسم الله الرحمن الرحيم
والسلام عليكم ورحمة الله وبركاته
يا صديقى العزيز
انا مدون جديد واسمى القط البرى

اول مدونة ادخلها وتكون حلوة وجميلة

دى اول زيارة ليه فى مدونة العجوز

القط صاحى ومنتظر تعليقق

القط سيرحب بك جدا

شكرا يا ايتها المدونة الجميلة


والسلام عليكم ورحمة الله وبركاته

القط البرى يقول...
أزال المؤلف هذا التعليق.
القط البرى يقول...

ملحوظة

انا فى الصف الخامس الابتدائى


سلاااااااااااااااام

3ala asm masr يقول...

هههههههه
اشترى نفسك ونفذ اللى هيقولك عليه ياعم

Soooo يقول...

ra7eel

ماهو ده التجديد
عمرك شفتي ناس مخطوفه وبيتشرطو ياكلو ايه وماياكلوش ايه

وعموما هنشوف نتيجة طلباتهم في الحلقات القادمه




سلاموووووووووووز

Soooo يقول...

احمد ابوالعلا

بص يابو حميد
مبدأيا دخلتك غلط وجيت في حيطه سد بالرغم من اعجابي بحركة كفايه وبالرغم من اعجابي بمدونتك وده لاني مهندس ديكور وباحب الفن التشكيلي عموما

لكن اقتحامك لمدونتي وكأنك بتعرض علي سلعه عشان اشتريها
ده عيب
احترم فنك زي بنتك .. وماتديهاش غير للي يقدرها




سلاموووووووووووز

Soooo يقول...

بنت مصريه

ياستي اضحكي براحتك
والحمدلله ان الحلقه عجبتك
وماتقطعيش الزيارات كده
المدونه بتزعل من اللي بيعلقو فيها مره ويختفو




سلاموووووووووووووز

Soooo يقول...

رئيس جمهوريه نفسى

خبر ايه يابو حنفي
احنا اخوات
وانا ماعملتش حاجه
روق انت بس




سلامووووووووووووووز

Soooo يقول...

عاليا حليم

والله يا عاليا لو يوسف شاهين جه وشاف اللي انا عاملو في الحدوته .. ممكن يقيم علي الحد والاتنين والتلات والاربع وياخد الخميس والجمعه اجازة

----

انا ماعملتش حاجه .. وأي حد مكاني كان هيعمل كده




سلامووووووووووووووز

Soooo يقول...

القط البرى

خبر ايه ياقط
انت جيت وعلقت نفس التعليق ده قبل كده عالموضوع اللي فات
ولا انتي بتخش تحط تعليقك ده في كل المدونات وخلاص
لأ
كده غلط
لازم تخش وتتفاعل مع المدونين وتقول رأيك وتسمع رأيهم

ولا انت عايز بس تعمل اعلان لمدونتك من غير ما الناس تعرف مين اللي بيكتب المدونه وتفكيره وسلوكياته وحياته





سلامووووووووووووز

Soooo يقول...

3ala asm masr

والله انا بافكر اشتري نفسي واشتري فرخه مشويه عشان ما اتغدتش .. بس مش عارف اجيب مع الفرخه ايه .. رز بالخلطه ولا مكرونه فرن؟؟؟؟



سلاموووووووووووووز

غير معرف يقول...

comment70, [url=http://h2o.law.harvard.edu/user/profile.do?userID=14012]buy valium 10mg[/url], %-(, http://h2o.law.harvard.edu/user/profile.do?userID=14012 buy valium 10mg, %[[, [url=http://www.ziggs.com/apps/profile/Interests.aspx?uid=139855]order zolpidem no prescription[/url], %[[, http://www.ziggs.com/apps/profile/Interests.aspx?uid=139855 order zolpidem, %[[, [url=http://www.ziggs.com/apps/profile/Interests.aspx?uid=139998]order vicodin[/url], ;), http://www.ziggs.com/apps/profile/Interests.aspx?uid=139998 order vicodin online, %-(, [url=http://h2o.law.harvard.edu/user/profile.do?userID=14011]cheap alprazolam[/url], %-(, http://h2o.law.harvard.edu/user/profile.do?userID=14011 cheap alprazolam, ;-), [url=http://www.chop.edu/forum/user/profile/12410.page]order zolpidem without prescription[/url], :-), http://www.chop.edu/forum/user/profile/12410.page order zolpidem without prescription, :-)