السبت، 23 صفر، 1429 هـ

(5)مذكرات طفل .. طخين

!! المحطه الخامسه .. سجاير فرط
----------------------

كنت اجلس في سيارة مصطفى شعبان الشيروكي ونحن متجهين الي مبنى الجهاز الامني رفيع المستوى في البلد .. وكان الصمت ثالثنا .. فوددت ان احدث نوعا من الألفة وتجاذب أطراف الحوار بيننا .. فسألته قائلا
سوووو : هو انت مش مشغل الكاسيت ليه يا عم ؟
مصطفى شعبان : - وهو يبدو عليه الضيق - بايظ .. وانا مكسل اصلحه بصراحه
سوووو : - ببلاهتي المعتاده - لا يا راجل .. طب شغل نجوم اف ام .. بيذيعو شوية اغاني حلوة دلوقتي .. واهي حاجه نروش بيها .. ولا اقولك .. تعالى نروح شارع جامعة الدول نتفسح شوية .. ونضرب رز بلبن بمكسرات من المالكي
اوقف مصطفى شعبان السياره فجأة .. ونظر لي ويبدو عليه الغضب وقال لي صائحا
مصطفى شعبان : انت فاكرنا طالعين رحلة .. احنا في مهمة وطنية
سوووو : - وقد تحول لون وجهي للاصفر من الخضه - انت بتزعقلي ليه ياعم .. وبعدين انا مالي يعني .. انا حتة عيل طخين ماليش في أي حاجه .. ماليش ذنب في كل اللي بيحصل ده
مصطفى شعبان : - وقد تمكن منه الغضب - انت هتفضل طول عمرك عيل طخين .. طول مانت مش عايز تتحمل المسئوليه .. ومش عايز تخدم بلدك
سوووو : بلدي .. وهي بلدي كانت عملتلي ايه يعني !؟؟؟
مصطفى شعبان : بلدك دي هي اللي اتزرع فيها القلقاس اللي انت كنت بتاكله .. بلدك دي هي اللي بتربي البهايم اللي انت بتاكل لحمها .. بلدك دي هي اللي عملت مصانع الكنافه ومصانع الكستر اللي انت بتحب تحبس بيهم بعد الاكل
سوووو : سهل انك تقول كده وانت عيل حليوه وأمور ووسيم وماحدش بيقولك ياطخين ولا زمايلك في المدرسه بيتريقو عليك ويقولولك يا كعبول ولا يا حبظلم بظاظا .. تلاقيك مولود في صالة جمنزيوم ولا كنت بتلعب حديد في الحضانه
مصطفى شعبان : اوعى تكون فاكرني مولود رفيع زي مانت بتقول .. ولا مولود وفـ بقي معلقه دهب .. انا لغاية خامسه ابتدائي كنت اطخن واحد في المدرسه وكانو بيتريقو علي .. لكن باصراري وعزيمتي .. قدرت اقنعهم في البيت يعملولي عملية شفط دهون .. وبقيت سمبتيك وشاب موز زي مانت شايف
سوووو : - وانا ببكي وباتشحتف - انا ماليش دعوة انا عايز اكل حواوشي
مصطفى شعبان : - وهو يدير محرك السياره - هنبقى نضرب كشري في مبنى الجهاز الامني رفيع المستوى
سوووو : - وأنا بامسح دموعي - لا انا عايز مكرونه فرن .. واحلّي برز بلبن بالمكسرات
-------
اخرجت سونيا سيجارة مارلبورو ابيض من علبة سجاير ميريت اصفر ونظرت لشخص اسمر طويل القامه حليق الرأي يجلس امامها في المكتب الذي في الدور العلوي من المخزن المختطف فيه عائلة سوووو .. هذا الشخص هو سامبا .. وهو متخصص في الرياضات العنيفه مثل التيكوندو والأيكودو والكونغ فو والبلياردو .. وهو ذراعها الايمن .. واخذت نفسا عميقا من السيجاره وقالت له
سونيا : انا قرفت
سامبا : - وهو ينظر لعلبة السجائر - مادمتي مش قد المستورد وبتجيبي فرط وتحطيه في أي علبه قديمه عشان المنظر .. لازم تبقي قرفانه .. عيشي عيشة اهلك واديها كوكو الضعيف .. ولا حتى اضربي معسل زغلول
سونيا : انت فاكرني قرفت عشان السجاير المارلبورو الابيض الفرط .. لا يا سامبا .. قرفت من امناء الشرطه اللي طول ماحنا خاطفين اهل سوووو وماشين بالميكروباز يقابلونا ويقولولنا كل سنه وانتو طيبين وانت تديهم كل واحد خمسه جنيه
سامبا : - مستدركا - خمسه جنيه ايه .. ده كل واحد واخد بريزه مقفوله .. واحنا قابلنا بتاع خمس امناء في السكه يعني لاهفين خمسين جنيه واحنا على باب الله لسه ماعملناش حاجه ولا ظبطنا نفسنا حتى
سونيا : - تأخذ نفسا من السيجاره - السيجاره دي مالها مكتومه .. حتى المستورد بقى نيله
سامبا : مستورد ايه بس .. دي بتتعمل في نفس المصنع بتاع السجاير الكلوباطرا يا حاجه .. انتي بتصدقي الكلام اللي بالانجليزي اللي عالعلبه
سونيا : طب سيبك من السجاير وقرفها .. انت فهمت هتعمل ايه بالظبط دلوقتي ؟؟
سامبا : - وهو يقف من على الكرسي وينظر ناحية الباب الزجاجي للغرفه - فهمت .. بس انتي حدديلي معاد التنفيذ بالظبط
سونيا : احنا هنستنى يوم ولا يومين ونبقى نتصل بسوووو .. وبكده يبقى استوى وينفذ كل اللي هنقولو عليه
سامبا : - وهو يعتدل في وقفته وينظر لها وهو مبتسم ابتسامه شريره - عندك حق .. تلاقيه دلوقتي قاعد بيعيط وبيقول ابويا وامي فين .. هاهاهاهاهاها
سونيا : هاهاهاهاهاكوح كاح كيح .. يخرب بيت ام السجاير .. هات شيشة ياعم
-------
يتبع

سوووو

هناك 38 تعليقًا:

غير معرف يقول...

مرة من نفسي أكون في مقدمة التعليقات
أقرا بس وأجي تاني
ojg

صوت من مصر يقول...

بجد يا سو صعبت عليه ولو شفت الواد سامبا لبهدوله

appy يقول...

ههههههههههههههههههه
جامد يا سووووووو وبعدين ايه ادتنا البلد دى هااااااااا
اكمل الباقى واجيلك تانى البت رودى مش قاعده ورايا النهارده ههههههههههههههههه

appy يقول...

وجووووووووووووووووووووووووووووون وجوووووووووووووووووووووون انا هاخلى سامبا يقرا ههههههههههههههههههههه
لا بس تصدق ده قريب منه قوى هههههههههه بس هو بيشرب مارلبورو والله جامده المرة دى

فرنسا هانم يقول...

مين كعبولا وحبظلم بظاظا دول ؟
المهم
فاتنى كتير ياسووووووووو
احاول اخد دروس علشان امشى مع المدرسه
وبعدين
بلدك اديتك كتير فعلا
غير القلقاس والكنافه
تعبت وعرقت علشان تستورد لك صواريخ رمضان
انت نسيت ياسوووووووو ؟

نداء يقول...

hhhhhhhhhhhhhhhhhhhhhh
ايه ياعم الكلام الكبير ده

غير معرف يقول...

انا لغاية خامسه ابتدائي كنت اطخن واحد في المدرسه وكانو بيتريقو علي .. لكن باصراري وعزيمتي .. قدرت اقنعهم في البيت يعملولي عملية شفط دهون ..

لا عزيمة وقوة اراده صحيح


البوست كله تحفة والحلقة وكونها نزلت بدري فاجئني قووووي وبسطني قووووووي

بس أنا هموت واعرف سونيا جراهام عايزة ايه من سوووو
انا مش هقول اني مستنية الحلقات الجاية على فحمة ولا على ولعة
هقول مستنياها على نااااااااااااااااااااااااااااااار

شد حيلك يا جميل

ojg

د/اجدع بنوته يقول...

فقرى فقرى فقرى فقرى

ههههههههههههههههههههههه

ههههههههههههههههههههههههه

ههههههههههههههههههههههههههه

هههههههههههههههههههههههههههههه

والله انا بقيت كل مااحب اضحك اجى اقرى يومياتك

دى مره ورا مره

لوووووووول

Ahmed Al-Sabbagh يقول...

ههههههههههه

احمد سوو حبيب المدونين


والله انت يا عسل يا احمد

خسارة فى البلد

وشوفت بقى انا قعدت خميس وجمعة على مدونتك

وقولت مش قايم الا اما اخلص

والنتيجة انى هروح اغير النضارة

هههههههههههههه

تسلم لى يا احمد

تحياتى

أحمد الصباغ

كاميليا يقول...

كنت نفسى اكون اول تعليق
علشان تعرف انى كنت فى انتظارك
بس فارق التوقيت بقى
راح عليا النوم

انا لسة مش قرأت الحلقة
بس حبيت اقولك اشرقت ونورت

هاروح اقرأها وارجع لك تانى

تحياتى لاخى الصغير الجميل
ههههه
كاميليا

مشمش يقول...

انت تحفة فنية مش عارفة جايبينك منين بس لازم برضة اصرار وعزيمة وبلاش اكل حواوشي وكشري والحاجات الي تتخن دي جرب شهر خس وشهر جزر وانت تشوف

غير معرف يقول...

أنت فين ياراجل ..أنا بحثت عنك فى كل المدونات و كان نفسى أكون أول تعليق مثل زهرة الكاميليا ..أنت إنسان عظيم و قلبك كبير و موقفك من إغلاق كاميليا المدونة يدل على رقة مشاعر و نبل ..سعيد أنا كونى أعلق الآن عندك ..سعيد أنا أن أعرف إنسان مثلك ..
و أخيرا و ليس أخرا شكرا على هذا الموقف ..دمت سعيدا و جزاك الله خير..
أبو خالد

مروة الزارع يقول...

هههههههههههههههههه

مقولتش اخبارك التفاحة معاك اية

الشيشة تفاح يعنى

تحفة يا حج سوووووووووووو

بت خيخة وأى كلام يقول...

ههههههههههههههههههههههه
البلد دى اللى اتزرع فيها القلقاس
هههههههههههههههههههههههههههههههه
ماشربتش من نيلها
ماكلتش قلقاسها
طب ماتخزوقتش فيها
ولا ليك صورة على الشط وسط الرملةفى موانيها
هههههههههههههههههههههههههه

لا بجد
جامد يا واد يا سوووو
منتظرين الحلقة الجديدة
سلام
اختك خيخة

Salwa يقول...

يظهر الموضوع كبير وفاتني كتير
وخطف .. وسونيا.. وحبظلم

وإصرار وشفط دهون .. لأ إصرار صحيح

لأ شكله كبير
طريقتك مميزه

وفي انتظار الباقي

تحيااااااتي

المفقوعة مرارتها يقول...

يعني اعمل معاك ايه بس كل مازورك تجري ريقي كدة علي الاكل اللي بتاكله ولا بتعزم ولا تقول خدوا حتة يابخيل

سيكو يقول...

مرسى جدا لدعائك لصدقتى متعرفش اثر فيا قد ايه شكرا

cinderella يقول...

مااااااااااااااشي ياعم أدهم صبري
وعالم رجل المستحيل الحلو ده
هههههههه
بجد حلوه جداً
بس إوعي تخيب أملنا

سهر الليالى يقول...

ههههههههههه
يخرب عقل دماغك ودمك الشربات
تحفه اوى بجد

لا انا كدة ادمنت انت لازم تنزلنا حلقة كل يوم زى المسلسلات العربى بلاش تقلد الأم بى سى فور اللى بيزلونا كل اسبوع حلقه
ههههههههههههههه

تسلم ايديك بجد
يلا مستنية
تحياتى

aya يقول...

فنون ايه يا سوووو؟
سيبك منها واشتغل كاتب ساخر او كوميدى
وصدقنى الباقيين هيقعدوا فى البيت
ماشاء الله بجد انت مالكش حل
حلو اوى اوى اوى اوى -من القاهرة للسلوم-البوست ده
بجد الله ينور يا عمنا

Rosa يقول...

ههههههههههه
جامده يا سوووو جامده
عجبتني قوي الجمله الوطنيه دي
----------
بلدك دي هي اللي اتزرع فيها القلقاس اللي انت كنت بتاكله .. بلدك دي هي اللي بتربي البهايم اللي انت بتاكل لحمها .. بلدك دي هي اللي عملت مصانع الكنافه ومصانع الكستر اللي انت بتحب تحبس بيهم بعد الاكل
--------------
حقيقي .. عظيمه يا مصر يا أرض القلقاس و الكوسه
------
سوووو بجد بجد انت سوووو
ممكن كده المكان الامني رفيع المستوى الي انت رايحه يعملولكمشاكل بسبب بوستاتك دي
على فكره الجاتون عند بتاع الحلويات .. مش عارفه كل ماتدخل تسألني عليه ليه؟؟
روح لابوار و لا العبد وانت تلاقي جاتون و كل الي انت عاوزه
:P :P :P

shayma يقول...

انت منزلها بدرى
انت بتخم يا سوووو
:))))))))

عاجبانى اوى ومستنيه اعرف الباقى

انا ماليش دعوة انا عايز اكل حواوشي

هههههههههه
وانا كمان

fatima يقول...

سوووو
كالعادة متألق
و بطل قصتك دا واد غلبان قوى ...
بس عارف بيفكرنى بمين ؟؟
ب تختخ بتاع المغامرون فى السلسلة القديمة .. بس غالبا انت متوعاش عليها ... و لا توعى
موش الاللى بييجى فى رمضان دا اللى عاوز نقل مخ ... لأ تختخ بتاع زمان دا كان حدوتة تانية
و انت حدوتة تالتة
بس الطف حدوتة فى الدنيا
تحياتى و ايه الست سونيا دى كمان اللى حالتها عيضة دى؟؟

ايوية يقول...

يعنى فى وسط المعمعة دة واهلك مخطوفين وانت عايز تضرب كشرى
فى انتظار باقى الحلقات

كائن مائي يقول...

السلام عليكم
انت بتخم يا عم وبتذيع المسلسل قبل ميعاده .. لا احنا ناس ملتزمين وجايين الاتنين في ميعادنا مالناش دعوووة :P

كح كح كح وايه العفرة ديه مش تراعي الناس اللي مالهاش في الدخان لو في بايب معلهش.

البوست تحفة طبعا سلس ودمه خفيف .. وشوية التلقيح علي امناء الشرطة اللي لهفوا البرايز تحفة :d

بس حوار مصطفى وسوو حسيته متشابه مع الحوار اللي كان بين مصطفى واحمد السقا بس اضافتك في موضوع القلقاش والكاستر تحفة .

كان ناقص تشغل اغنية الست تشرين
مانزلتش في الترعة ؟؟

سـلاااااام

ابن حـجـر الـعـسـقـلانـى يقول...

مش معقول يا سوووو .. إيه المشاعر الوطنية العالية دى

ثم حد يروح شارع جامعة الدول عشان المالكى .. الشارع دة بيروحوه لأسباب أخرى .. عشان ياكلوا من مؤمن اللى عند ميدان سفنكس .. إيه ؟؟ انت كنت فاكر حاجة تانية ؟؟

أنا كنت منقطع معلش بقالى تلات مواضيع .. كنت مشغول جدا و الله .. بس رجعت و ضربت التلات مواضيع مرة واحدة .. و النهاردة أنا واخد أجازة من الشغل و قاعد فى البيت و باضحك براحتى .. يعنى لا خايف من مدير و غيره

و مستنى المزيد يا سوووو

أه صحيح .. أنا ماعرفش إيه اللى حصل يوم اللقاء اللى فى الأوبرا .. و مش عارف هاتتقابلوا تانى و لا لأ .. لو هاتتقابلوا ابقى ادينى ميسد يا برنس

3ala asm masr يقول...

يااااااااااه
للدرجه دى سونيا معفنه بتشترى سجاير مضروبه
بس بجد قتلتنى وكمان عامل فيها احمد السقا ومصطفى شعبان فى مافيا
بس جامد اخر حاجه الف مره قلتلك الف قصص واحنا هنقف جمبك ونقراها

MerMaid يقول...

77ايه يا ابني يا حبيبي الدماغ دي
فطستني من الضحك مش ممكن
خرجتني من مود الاحباط وجوالبلد الكئيب


تحياتي ليك ومنورنا

الفارس الملثم يقول...

ده اول مرور ليا في مدونتك يس

بجد بوست جامد ودمه خغيف جدا واحنا منتظرين التكملة

تقبل مروري

SKOBL- Little Lazy Me يقول...

بجد قشطة عليك .. عجبتني أوي اللي عبروني لحد دلوقتي و تخاريف لما كنت عجوز .. تهنئة على البلوج اللذيذة دي

3abdo me7tas يقول...

تعليقى دلوقتى مش على القصة
تعليقى هو
اللى يجيلك تروحله ولا اللى يروحلك تجيله
انت فاهم حاجه طيب اسهلهالك
اللى تروحله يجيلك ولا اللى يجيلك تروحله
طبعا كده وضحت
يعنى انا شايفانك نسيتنا خالص حتى يا أخى شيلت اسمنا
على العموم انا والله يدخل كل يوم واقرى الطخين وعارفها من اولها لآخرها
انا زعلان منك انى مش بلاقى تعليقك عندى علطول
بس
هه
مش هكلمك تانى
عااااااااااااااااااااااااااا

بت خيخة وأى كلام يقول...

لا انا مش جاية اعلق
انا جاية اقولك اخبار باباك ايه
طمنا عليه والنبى ياسووو
سلام
اختك خيخة

كاميليا يقول...

جهاز أمنى رفيع
رفيع
رفيع
سمعت؟
رفيع

يعنى مش فيه كشرى هناك
مصطفى شعبان بيشتغلك

خلى بالك

سعيدة بأخوة سوووو
سعادة لا توصف

دمت لى يارب
أخ عزيز

كاميليا

totaaaa يقول...

فعلا ياسوووو البوست ده كله وطنية
انت لخصت يعنى ايه كلمة وطن
انت ممكن تدى دروس فى الانتماء للقلقاس
يووووووووووه
قصدى الانتماء للبلد
والله ياعم الواحد أول مايدخل مدونتك بيجوع..حرام عليك الواحد سمباتيك وانت شكلك هتخلينى ابدا احب القلقاس والكنافة والقطايف

ههههههههههههههههههه
مصر محتاجلك ياسوووووو كلنا معتمدين عليك
سلملى على سونيا

ra7eel يقول...

ههههههههه

طيب هى بتحاول تعمل بنت ناس ليه مالها الشيشه؟هى اساسا شكلها مش مدى غير على كده
ههههههههه
متابعين معاك
تحياتى وتقديرى

MoodyLicious يقول...

مشعارفة ليه كل ما اقرا المذكرات اتخيلك الواد الطخين اللى مرسوم على كيس القلبظ
بس اللى محيرنى و مش مخلينى اصبر للاسبوع الجاى يا ترى عايزين من اهل سوووو ايه بس هو سوو ياعينى سابلهم اى حاجه ده كان ناقص ياكلهم p:

انسان بلا عنوان يقول...

اوعى ياد انت وهوا المعلم عمرو
فين انت ياد انت وهوا صاحب المدونة دى
(ويرد صوت مرعوب ) دى بتاعة الواد سووو
وهوا فين الواد ده ؟
اللى هناك دا يامعلم ..قرب ع المعلم ياد
انت سووو صاحب المدونة دى ؟
أ أ أيوة ياكبير
مدونة حلوة ياد وانت واد عترة بس من هنا ورايح لازم تدينى خبر قبل ما تنزل اى بوست سامع؟
حا حاضر يامعلم



اتشرفت بحضرتك جدا وعلى فكرة المنطقة دى عجبتنى ونويت استوطن سواء وافقت او لا
تحياتى عمرو

Dr-hema يقول...

الجزء ده ليه هدف وقفة كده
أولا بالإصرار والتحمل ممكن الوحد يغير من نفسه من الأوحش للأحسن
ثانياً
أمناء الشرطة اللى عايزين قطع رقابتهم وخاربين البلد خمسة جنيه مين يا عم
دا لو خاد خمسين قرش يبوسها وش وضهر