الأحد، 22 ربيع الأول، 1429 هـ

(10)مذكرات طفل .. طخين

المحطه العاشره .. تلاعبني يا كابتن ؟؟


اتجهت مع منى زكي ومصطفى شعبان على حجره تبدو وكأنها سنترال او مركز اتصالات حديثه .. اجهزة كومبيوتر وامام كل جهاز كومبيوتر .. شخص يلبس سماعه على اذنيه .. استغربت من المنظر .. ولكن لم يسعني الاستفهام عن ماهية هذا المكان لان الشخص الذي تحدث مع مصطفى عندما كنا نشيش والذي احسست انني قد رأيته من قبل .. اخذنا امام جهاز كومبيوتر ووضع سماعة الهيدفون على اذني واجلسني ثم ضغط على زرار في الكيبورد .. وبدأت المكالمه
سونيا : الو
سوووو : ايوه - مستعبطا كأني ماعرفش حاجه - مين معايا؟
سونيا : مش مهم تعرف انا مين .. المهم انك تعرف ان اهلك عندنا
سوووو : - وكأني منصعق من هول الصدمه - عندكم فين .. وانتو مين اساسا ؟؟
سونيا : هبقى اتصل بيك بعدين عشان اقولك تعمل ايه .. وخلي بالك .. لو اتصلت بالبوليس هنقتل اهلك .. شالوم
سوووو : شالومين وحته ياختي
نظرت حولي فوجدت الاستياء على وجه مصطفى ومنى والشخص التالت .. ثم وجدت مصطفى يسأله
مصطفى شعبان : مالحقتش طبعا تحدد بيتكلمو منين ؟
الشخص التالت : للأسف لا يافندم
عندها تذكرت هذا الصوت .. ولكنه عندما تحدث معي كان متلعثما ومتهتها .. هذا الشخص كان هو نفسه .. بائع البليله .. اندهشت اكثر من دهشتي الاساسيه ونظرت له وقلت
سوووو : ايه ده .. مش انت بتاع البليله اللي كان بيتهته في الكلام ؟؟؟
بتاع البليله : - بعد ان وضع يده على كتفي وهو مبتسم - ماتزعلش مني ياصاحبي
نظرت الى منى زكي ومصطفى شعبان بدهشه شديده وقلت لهم
سوووو : هو انتو البلد كلها معاكم ولا ايه؟؟؟؟
-------
كان ابي قديما لاعب كوتشينه محترف .. وكان من أفضل خمسه في العالم يلعبون (واحد وتلاتين) بل ووصلت به الحرفنه انه كان يحفظ عن ظهر قلب .. ترتيب اوراق الكوتشينه من مجرد تفنيطتين فقط .. ولذلك عندما كان محبوسا في الغرفه وسمع الحارس وسامبا وهم يلعبون الكوتشينه وسمع صياحهم وتهليلهم .. فكر في حيلة كي يلعب معهم .. ومش مشكله حوار الخطف ولا الحبسه ولا انهم مكممين بُقو وبُق امي ومربطينهم .. واهو الراجل يسلي نفسه شويه , فقام باحداث جلبة وتخبيط وترزيع بقدميه وبجسمه على الكرسي الموثوق رباطه عليه .. وعندما دخل عليه الحارس وسامبا .. نظر والدي للكوتشينه وقال لهم وهو مكمم الفم
ابويا : هم ممم مممهم همممههمهممممم
سامبا : - محدثا الحارس - شيل ياعم البتاعه المكممه وشه دي احسن يكون عايز يعمل حمام ويبهدلنا الدنيا
قام الحارس بفك الكمامه من على فم والدي .. فنظر والدي لـ سامبا وقال له
ابويا : تلاعبني يا كابتن ؟
نظر له سامبا مستغربا .. ثم ابتسم وقال له
سامبا : طب لو خسرت .. هاخد منك ايه ؟؟
ابويا : هممم .. لو خسرت خاصموني وماتكلمونيش تاني
سامبا : هههههههه - ثم بنظره ساخره - ومالو .. الاعبك .. بس على شرط
ابويا : شرط ايه ؟؟؟
سامبا : لو انا كسبت .. تشحنلي الموبيل بكارت فئة التلتمية جنيه
ابويا : همممم .. طب لو انا اللي كسبت ؟؟
سامبا : هتاخد كل اللي في جيبي
ابويا : - بعد هنيهة تفكير - بس فك ايدي .. وانا اللي افنط الكوتشينه
سامبا : شغال - ينظر للحارس - فك ايديه
-------
منى زكي : مش وقته يا سوووو
قالت لي منى هذه الكلمه عندما وجدتني بالعب نيد فور سبيد على جهاز الكومبيوتر الذي تلقيت عليه المكالمة من سونيا .. فنظرت لها وقلت
سوووو : استني بس .. ده اخر ليفل .. بعد كده هقدر اظبط العربيه واركب سبويلر وجنوط
منى زكي : يا سوووو افهم .. احنا اصلا واخدين ساعه واحده بس عالجهاز
سوووو : ساعه واحده عالجهاز .. هو احنا مش في مركز الاتصالات بتاعكم ؟؟؟
منى زكي : لأ طبعا .. احنا المركز بتاع الاتصالات بتاعنا مافيهوش غير جهازين بس .. والاتنين قدام فحت .. وبعدين احنا ماعندناش نت هناك
سوووو : يابنتي خدو وصله من أي سايبر فاتح نواحيكم .. مصر كلها شغاله وصلات اصلا
منى زكي : المشكله مش في الوصله .. احنا كنا مقضينها على طول وصلات .. سواءا دش او نت
سوووو : امال المشكله في ايه؟؟
منى زكي : المشكله ان الموظفين كانو بيقضوها شات وداونلوود افلام .. قام توفيق بيه رئيس الجهاز عرف وقطع النت .. وباع الاجهزة وماخلاش غير جهازين بس
سوووو : طب وتوفيق بيه عرف ازاي ؟؟
منى زكي : كان داخل النت ولقاه بطيء
سوووو : همممم .. وكان داخل ليه اصلا ؟؟
منى زكي : كان بينزل ترجمة فيلم نزله من عالنت في الشغل من كام يوم
------

ابويا : نياهاهاهاهههه .. خسرت تاني يا حلو
بعد ان تفوق ابي في لعبة (واحد وتلاتين) مع سامبا والحارس .. تحول المنظر في الغرفة المحبوس بها ابي وامي الى ان سامبا والحارس عرايا كما ولدتهم امهاتهم .. ماعدا البتاع او الاندر .. لان والدي صعيدي ويعرف الاصول ومارضيش يخليهم يقلعوه
الحارس : - موجها كلامه لـ سامبا - ده قلعنا كل حاجه ياعم .. وديتنا في داهيه
سامبا : - موجها كلامه للحارس ويبدو عليه الغضب - اخرس انت - ينظر لوالدي ويكاد ان يبكي - خصيمك النبي يا حاج تدينا هدومنا
وقبل ان يتشرط عليهم والدي ويقايض ملابسهم التي فاز بها من اللعب بحريته هو وامي .. دخلت سونيا فجأة على الغرفه .. ونظرت لـ سامبا والحارس وقالت وهي مندهشه
سونيا : انتو قالعين ليه .. وفاكين ايدين الحاج ومعاه كوتشينه ازاي؟؟
سامبا : - بعد ان وقف مرتبكا - اصلنا قلنا نلعب دورين كوتشينه ونسلي نفسنا .. قام طلع حريف وكسبنا زي مانتي شايفه
اخرجت سونيا مسدسا من جانبها ووجهته ناحية والدي وقالت له وهي تهدده
سونيا : اديهم هدومهم بسرعه
قام والدي برمي الملابس لهم وهو خائف .. فأخذ الحارس وسامبا الملابس واتجهت سونيا لوالدي كي تربط يديه وتكممه مرة اخرى .. ونظرت بجوارها فوجدت ان والدتي كماهي مكممه ومربوطة يديها .. فبانت عليها الدهشه ونزعت الكمامه من على فم امي وسألتها
سونيا : هو جوزك مافكش الكمامه اللي على بقك ولا فك ايديكي ليه يا حاجه ؟؟
امي : اصلهم كانو بيلعبو قمار يابنتي .. وحدّ الله مابيني وبين الحرام
------
يتبع

سوووو

هناك 112 تعليقًا:

مهندس مصري يقول...

هههههههههههههههه

حد الله ما بينا و بين الحرام

الله ينور عليك يا سووو
أما نشوف آخرة الحكاية اللذيذة دي ايه
:)

Soooo يقول...

ايه ياهندزه
ده انا لسه منزل البوست وباشوف شكله عامل ايه
اقوم الاقيك معلق


سيبك انت .. نورتني والله




سلاموووووووووووووز

nigro يقول...

شوفت يا عم
بتاع البليلة طلع شغال معاهم
ده مش بعيد كمان الواد اللي كان شايل قفص العيش هو واللي اتلموا عليه يكونوا معاهم
ولا العيل المسلوع اللي كان نايم على الدكة كمان يكون معاهم
الله ينور على الدماغ الجامدة دي
شالوم يابرنس

صوت من مصر يقول...

سووووووووووو
حبيبى بجد اكيد بتاع البليله كان بنظاره وكان لذيذ صح بس ممكن سؤال هو انتم هتروحوا اسوان امتى ولا هتبقى حلايب وشلاتين

fatima يقول...

صباحك فل يا سوووو
الحكاية عمالة بتحلو خالص خالص
و نت إيه اللى واخدينه ساعة بس دا؟؟
يا رااااجل شلفطت جهاز المخنبرات بتاعنا خالص و خليت شكلنا عيضة
و الا حكاية الكوتشينة دى كمان ؟؟؟
مكانش حد غلب يا أبنى ....
كنت جيبلى أبو سووو دا قبل ما اخسر كل القضايا بتاعتى و أنا كنت اديله عنييا ...
يللا
الجوازة الجاية بقى ...
متهيألى انت زهقت خلاص من كدا
بس هقوله برضو
مبدع و دمك خفيف موت
و اضحك الله سنك
أختك مامت يوسف الشقاوة

غير معرف يقول...

أخى سووووو
يسعدنى قرأة مذكرات طفل طخين،فكرتنى بالفنان إسماعيل يس الله يرحمه عندما نزع ملابس استفان روستى و فريد شوقى فى
فيلم جزر..أسعدك الله .
أبو خالد

مشمش يقول...

حدا الله بيني وبين الحرااام
مش ممكن والله العظيم الكلمة الاخيرة دي مش ممكن هموت من الضحك
ربنا يرحم والدتك وكل اموات المسلمين اقرالها الفاتحة
بس بجد تحفة اوي

appy يقول...

آآآآآآآآآه
انت جيت فى منطقتى ليه بقى
يعنى تلقيح الكلام اللى على الموظفين ده ينفع ما انا قولت من بدرى احنا بطاله مقنعه
بطل الحقد الحقود ده بقى

بس والله يا سوووو فيه ناس وقت الشغل شغل ولما بتكون فاضيه عادى يعنى اهى بتشيت هههههههههههههههه
ماشى مردوده لك فى الافراح يا ابو الحميد هههههههههههههه


عموما لفته فى الجون يا قمر بس ايه ابى دى مكتبتهاش بابا ليه يعنى ولا لازم سمى بقى هههههههههه بطلوا الحركات القرعه دى احم احم

رئيس جمهوريه نفسى يقول...

عاجبنى فى القصه دى اضافه الى ما سبق يا غالى تشريحك للشارع المصرى الى كله ماشى بالوصلات سواء دش او نت والبطاله المقنعه بتاعت الدون لود والترجمه
تيجى نلعب واحد ولاثين

Soooo يقول...

nigro

عاجباني قوي صحصحتك معايا وتركيزك في الحدوته
احساسك حلو حقيقي


بس برضه مش هحرق المذكرات وهقولك تابونا تجدو مايسركم

نورتني يا ريس



سلامووووووووووووز

Soooo يقول...

صوت من مصر

لا خالص
بتاع اليليه ده كان ببليله
اما بالنوسبه لنقطة هنروح اسوان ولا حلايب .. فانت زي ما شايف .. دول مأجرين ساعه عالنت .. وكانو بياكلو كشري وبيوفرو نص جنيه فرق البيبس اللي كان هياخده الاوفيس بوي .. ياترى انت من وجهة نظرك .. معتقد انهم هيروحو فين؟؟؟

نورتني ومبسوط من متابعتك للمذكرات



سلاموووووووووووز

Soooo يقول...

fatima

انا جبت سيرة مخابرات خالص؟؟
انا بقول جهاز رفيع المستوى .. يعني ممكن يكون جهاز تنظيم الاسره
انتي عايزه توديني في ابو نكله ولا ايه يا فاتيما
ده انا لسه شباب .. واقرع

نورتيني والف شكر على تعليقك وعلى متابعتك
ويارب تكوني انتي وكل المتابعين مبسوطين يارب



سلامووووووووووووز

Soooo يقول...

أبو خالد

والله العظيم بافرح لما الاقي تعليقك
والف شكر على تشبيهك لي بالمبدع الراحل اسماعيل ياسين ولزمته في الفيلم الشهير جزر
بس انا مش باكل جزر .. باكل لحمه من ام الكيلو بعشرتاشر جنيه



سلامووووووووووز

Soooo يقول...

مشمش

اضحك يا صاحبي على قد ماتقدر
وصدقيني مافيش حد بيموت من الضحك
احنا بنموت من الهم والغم والنكد

والف شكر على دعائك لامي بالرحمه هي وسائر المسلمين احياء واموات



سلامووووووووووووز

Soooo يقول...

appy

انا جيت جنبك يابنت انتي
اللي على راسه بطحه بقى
وبعدين مانتي بتحتاجي النت برضك في الشغل
مش الشاتنج ده والداون لوود والبلوجينج دول شغل برضك
يبقى انتي مش من النوع ده


ملحوظه
بقى بذمتك عايزاني اقول على ابويا بابا
بابا
استغفر الله العظيم





سلاموووووووووووووز

Soooo يقول...

رئيس جمهورية نفسي

ساعات مش بنستوعب عيوبنا بطريقه مباشره
لازم نشوفها من خلال شكل معين عشان ندركها
اي نعم الصراحه راحه .. بس ساعات ناس بتترجم الصراحه دي على انها تمرد وتعالي على الشعب


ملحوظه
تلاعبني على كارت فئة التلمية جنيه؟؟؟؟





سلامووووووووووووز

خمسة فضفضة يقول...

السلام عليكم ورحمة الله وبركاته

هههههههههههه

حلوه طبعال زي كل مره ، هاقول ايه يعني

يلا الحقنا بالحلقة الجديده

Soooo يقول...

خمسةفضفضة

وعليكم السلام ورحمة الله وبركات
ربنا يحليلك ايامك يارب
وربنا يكرمك دنيا وآخره

وبعدين انتي لحقتي تخلصي ضحكك لما تستعجلي على الحلقه الجديده
اضحي الاول وبعد ماتخلصي ضحك .. هنزل الحلقه الجديده




سلاموووووووووووووز

سمية يقول...

بصراحة مش عارفة اعلق على ايه وللا ايه..

الزتونة بتاعت الموضوع مش فى احداث القصة..لكن تلاقيها بين السطور..

الله عليك..

واكتر حاجه عجبتنى اللى باع اجهزة الكمبيوتر عشان الموظفين ميشيتوش..وطظ فى الشغل اللى بيخلصوه عالكمبيوتر..قال يعنى هوا اللى بيستخدمه عشان يجاهد فى سبيل الله..
وتلاقيه اما صدق انه يبعها..اتباعا لسياسة الشئ لزوم الشئ

اهو ده الزتون وللا بلاش..

دعنى اخلع القبعة وانحنى لفلسفتك فى نتاول تلك الكوارث..

تحياتى لك..

ايوية يقول...

والله الست والدتك ست كويسة مش المفروض تاثر على والدك وميلعبشى قمار
برضة مشفتليش واسطة فى الجهاز ماشى ياعم الى على على

انين الحزن يقول...

سوووووووووو

واحشني ياااارجل .. عامل ايه

هو فيه كارت من ابو 300 والله دنا طلعت غلبانه اوي وبحلم بكارت 25

فتحت عنيا كدا علي الكلام الكبير

تلسم ايدك ياسوووووووو بجد جامد موووووووز

سلامووووووووووز
وزة

SKOBL- Little Lazy Me يقول...

ايه الحلاوة دي كلها .. بصراحة انت مفتري .. مش معقول يا راجل ..
-اهلك .. شالوم
سوووو : شالومين وحته ياختي
ههه .. حلوة دي و الأحلى
-سوووو : ايه ده .. مش انت بتاع البليله اللي كان بيتهته في الكلام ؟؟؟
بتاع البليله : - بعد ان وضع يده على كتفي وهو مبتسم - ماتزعلش مني ياصاحبي
بس اللي عجبتني أوي أما لعبوا و قلعهم هدومهم .. و مراته في الأخر ,,, حد الله ما بيني و بين الحرام .. لسه من يومين باقول لمامتي ان دي الجملة التاريخية لنور الشريف .. هههه .. بجد يا ابني انت لازم تكمل المذكرات دي .. مالهاش حل ..
كل التحيات

Desert cat يقول...

هما مشغلين مصر كلها معاهم حتى بتاع البليلة
انا من الاول بقول ادهم صبرى ده عفريت
قصدى احمد السقا
يوه اهو فيلم افريكانوا وخلاص

brokenheart يقول...

يخرب بيت شيطانك يا شيخ .... دة انت طلعت فقرى بصحيح ... بالمناسبة صحيح ... انا لسة ما اتجوزستش ... وبالمناسبة كمان على الرغم من انى كذا مرة ادخل عندك واشوف اللى انت بتكتبه وبتتحفنا بيه ... الا انى اول مرة اخد بالى من اسم البلوجاية بتاعتك ... عجوز وعندى 30 سنة ... عجوز مين يا عم اذا كنت انا نفسي ماشي فى ال 34 ومش حاسس انى عجوز خالص ... لا دة انا كل سنة باحس انى باصغر عن الاول ... مش عارف ليه يا جدع ... على كل يمكن النظرية اللى بتقول ان الرجالة كل ما تكبر فى السن يحسوا بالهبل صحيحة ... على كل جميلة جدا الحكاية اللى بتحكيها دى وعلى راى الحاجة ... حد الله ما بيني وما بين الحرام ... ها .. واخدلى بالك يا بتاع منى زكى ...

مروة الزارع يقول...

كل الحقات تحفة

يالا هات اللى بعدة بسرعه

:)

Soooo يقول...

سمية

وجون وجون وجووووووووون
الحمدلله انك فهمتي الليله وفهمتي قصدي من المذكرات
احسن في تعليق جالي بايخ وحذفته بيقول اني باهيس وباقول اي حاجه لمجرد الضحك وخلاص
لكن الحمدلله .. ان في ناس لسه بتقرا مابين السطور

ملحوظه
انتي مش ناويه تجوزيني فتكات بنتك ولا ايه؟؟؟؟



سلاموووووووووووووز

Soooo يقول...

ايوية

الست والدتي الله يرحمها اصيله اصيله يعني
ومن بعد وفاتها وابويا استغفر الله العظيم .. اتعرف على شلة بايظه وبيخلوه يشرب عرق سوس كل يوم
وشكلهم هيعرفوه الخروب وتبقى مصيبه
استغفر الله العظيم


نورتيني ونورتي مدونتي بتعليقك
واوعدك هكلم مصطفى شعبان يشوفلك شغلانه في الجهاز .. بس ابعتيلي السي في بتاعك




سلامووووووووووووووز

Soooo يقول...

انين الحزن

انا برضه زيك كده يا وزة اتخضيت لما عرفت ان في كروت بالحاجات دي
تقريبا بدعه .. وكل بدعه ضلاله

والله يسلمك من كل شر يارب
والف شكر على زيارتك وعلى تعليقك
ويارب تكون الحلقه عجبتك




سلاموووووووووووز

Soooo يقول...

SKOBL- Little Lazy Me

منورني والله يابرنس
والحمدلله ان الحلقه عجبتك ويارب اكون قدرت بفضل من ربنا اني ارسم ابتسامه على وشك وعلى وشوش كل اللي قرو الحلقه


ويارب تفضل متابعها .. ويارب تعجبك




سلامووووووووووووز

Soooo يقول...

Desert cat

ايه ياقطه
فوقي شويه وركزي
انتي قصدك على السقا لما كان لابس شورت وفانله وكاب وراح الجزيره واتعرف على شلة المافيا وعاش معاهم قصة عن العشق والهوى .. بس ربنا يستر لما يشوف الديلر في الصيف الجاي


سلاموووووووووووز

Soooo يقول...

brokenheart

هاني حليب قلبي
ازيك يابرنس وازي احوالك
بقى يا جدع انت بتقرى المذكرات وما كلفتش نفسك تعلق ولو مره واحده
طب ايه رأيك بقى اني كنت هشوفلك عروسه .. لكن نتيجة لفعلتك دي .. هشوفلك مليون عروسه وانت تنقي منهم ياعم

نورتني بجد والله يابرنس .. وفكرتني بايام زمان
ايام مصر اليوم




سلاموووووووووووووز

Soooo يقول...

مروة الزارع

ربنا يكرمك يا مروة يابنت عمي دنيا واخره يارب
ويارب تكون الحلقات كلها عجبتك ويارب تفضلي تعلقي هنا دايما


ملحوظه
بقى عايزاني انزل الحلقه الجايه بسرعه .. طب مش لما يهدى الضحك اللي بتضحكيه على الحلقه دي الاول




سلاموووووووووووووز

somaa mahaba يقول...

هههههههه سو انا قلت احجز التعليق 33 وبعدين اروح اقرا فى تقدم باهر
سومه_87

somaa mahaba يقول...

ونقول عودنا تانى
هههههه بقى بابا ساب ماما متكممه وقعد يلعب كوشتينه
بس جامده
استمر متابعه انا حاسه انى فى فيلم مافيا
تحياتى ليك سومه_87

Soooo يقول...

somaa mahaba

يابنتي والله العظيم مابيفرق معايا ترتيب التعليق
كفاية انك كلفتي نفسك وتعبتي وكتبتيلي تعليق
والله العظيم دي عندي كبيره قوي قوي قوي

والحمدلله ان الحلقه عجبتك
ويارب تفضلي متابعه من غير ما تزهقي





سلاموووووووووووووز

رئيس جمهوريه نفسى يقول...

للاسف يا سو يا حبيى كان نفسى الاعبك بس انا موبيلى بيزنس حعمل ايه بالكارت :D لما اجى القاهره نلعب دومينو على المشاريب فى البورصه موافق

المنسى يقول...

السلام عليكم
هههههههههههههههه
دمه خفيف كالعادة
بس عايز أسألك سؤال ياسووووو
إنت ماحاولتش تعرض تألأيفك ده على حد ممكن فعلا يتنفذ زى حلقات شباب أون لاين كده ويكون فيه الأبطال الحقيقين فعلا
بس جامد فعلا

بس بابا وماما هيرجعوا إمتى

http://www.elmancy2000.blogspot.com/

عبدالرحمن فارس يقول...

يبدو أنني أحتاج إلى قدح اخر من القهوه

بص يباشا الاحسن عشان توفر عليا التعب دا كله حضرتك تتفق معايا على يوم نتقابل فيه تحكيلي فيه الحكايه من اولها

عشان ابدأ كومنتات معاك على أبيض

سعيد بوجودي هنا

طاب مساؤك



محبتي

سمية يقول...

أوعدك اول ما تبطل تلبس بامبرس .. واول ما تبطل تقعد على الكبورد وانا بكتب .. هفاتحها فى الموضوع ده..

احنا هنلاقى احسن من كده فين ..

مفقوعة مرارتي من حماتــــــــــــي يقول...

ههههههههههههههههههههههههههههه
مافيش أكل النهاردة ليه ؟
النهاردة قمار وجايمز بس ؟

Soooo يقول...

رئيس جمهوريه نفسى

ياعم انت تعالى بس ومالكش دعوة
والمشاريب كده كده علي ان شاء الله
هو انا عندي كام ريس يعني


ملحوظه
خلاص .. نلعب على العده



سلاموووووووووووووز

Soooo يقول...

المنسى

وعليكم السلام
ازيك يابو منص
الحمدلله ان الحلقه عجبتك وانك نتابع معايا

بالنوسبه لنقطة انا ليه ما كتبتش الكلام ده ووديته لحد يعملو كمسلسل وكده .. اللي انا باكتبه ده لا يصلح للرأي العام .. ولا صحافه ولا كتاب ولا يتم تحويله لعمل درامي .. وهو لمجرد القراءه الشخصيه على المدونه او على النت وشكرا

اما بالنوسبا لاني اعرض تأليفاتي .. الحقيقه انا موزع تلات سيناريوهات افلام انا كاتبها لمنتجين ومشترينهم مني بس لسه ما ابتدوش فيهم وماعرفش ليه
وكنت باجهز لمسلسل سيت كوميك مع احد المدونين لكن نتيجة لعدم اهتمام المدون بهذا العمل تم الغاؤه وحاليا في اتفاق تاني مع القائمين على العمل على اني اعمل حاجه اسمها القلقانين .. وربنا يسهل يابو منص


سعيد بزيارتك وبتشريفك والله ياهندزه
واتمنى انك تفضل منورني بتعليقاتك وبكلامك الجميل ده



سلامووووووووووز

Soooo يقول...

عبدالرحمن فارس

منورني ياريس والله
واشرب قهوة زي مانت عايز ولا يهمك
بس اني احكيلك عالقهوة دي ماينفعش
لاني بالرغم من اني ممكن اكون باعرف اكتب الى حد ما .. لكن بليد جدا في الحكي
ودي اللي قالهالي الدكاتره بتوع معهد سينما لما جيت اقدم ولفتو انتباهي للنقطه دي

لكن على اي حال .. الحدوته كلها باختصار ان سوووو الطفل الطخين اللي حصلت معاه مفارقات في اول يوم ليه في المدرسه .. بيعيش مغامره ومهمة وطنيه .. هل ياترى هينجح في اجتياز هذه المهم؟؟؟
هل سيستطيع ان يتغلب على الاعداء ؟؟
هل سيستطيع ان ينقذ ابوه وامه؟؟
هل سيستطيع ان يعمل لنفسه شندوشت بولبيف بالبيض؟؟
كل هذا سوف تقرءوه في .. مذكرات طفل .. طخين




سلاموووووووووووز

Soooo يقول...

سمية

طب تمام تمام
هتدفعولي مهر كام بالصلاتو عالنبي؟؟؟؟




سلامووووووووووز

Soooo يقول...

مفقوعة مرارتي من حماتــــــــــــي

اصلا انا حبيت اعمل زي افلام زمان
قلت احنا نقضيها اليوم خمر وقمار ونساء
وغدا .. نضرب فته

منوراني ويارب تفضلي منوراني دايما
وسلامي لحماتك




سلاموووووووووووووووز

سهر الليالى يقول...

يا جامد يا جامد
بموت فى دماغك دى
وبموت فى اللى بتكتبو والمعانى الكتير المستخبية ورا الكلام

وبعدين ومالو لما نسلى نفسنا فى وقت الفراغ فى الشغل المهم مش الشغل ماشى يبقى فل الفل
ههههههههههههههههه


هو انتو البلد كلها معاكم ولا ايه؟؟؟؟
هههههههههههههه
ضحكتنى موت

امي : اصلهم كانو بيلعبو قمار يابنتي .. وحدّ الله مابيني وبين الحرام
ههههههههههههه
يالهوى ع العسل

أبدع أبدع وخليلينا الحلقات خمستعبتاشر مليون حلقة كدة ومتعنا
ههههههه

سلامات وأستيك

خايف من الحقيقة يقول...

لا يا سوووووووووووو يا حبيبي
المخابرات بخير وصاحيا اوي
العب في مكان تاني
ولمعلوماتك
المخابرات عنده تلت اجهزه في مركز سري في البدرشين واصلين نت من فهوه حمزه اللي ع النا صية لزوم التمويه يعني
وبعدين خالي بالك هما عندهم كمان تليفون مباشر وبطلوا ياجروا خط الموبايل اللي عمك حسني سلفه ليهم
موق لحسن تروق

Doba يقول...

انا فاكرة انى علقت هنا امبارح
بس معقول انا الزهايمر جالى بدرى قوام كده

مش عارفة

طبعا مبدع كالعادة
بس تصدق عسل ماماتك لما بتقول انه ملهاش فى الحرام والقمار والكلام ده كله

وقال لازم هو اللى يفنطها
ماشية معاك يا اللى فى اخر مستوى ى نيد فور سبيد

سى يو لاتر
سلاموز
هبة

كاميليا يقول...

سوووو : - وكأني منصعق من هول الصدمه - عندكم فين .. وانتو مين اساسا ؟؟
سونيا : هبقى اتصل بيك بعدين عشان اقولك تعمل ايه .. وخلي بالك .. لو اتصلت بالبوليس هنقتل اهلك .. شالوم
سوووو : شالومين وحته ياختي

......

هههههههههه

شالومين وحتة؟؟

مش ماشية خالص
حستها شومتين وحتة
هههههه

بس برافو على الحاج انه محترف كوتشينة
كدة هلاقى حد ينافسنى

تحياتى

رئـــــيسـة حزب الأحلام يقول...

السلام عليكم
نورتنى على المدونة تبعى واية ياعم سووو الجمال دة

زُمُرده يقول...

ده انت جامد جدا

حلوه كتاباتك اوي

المهم الحاج عامل ايه بقى

طريقتك في التصوري جميله اوي
بحس اني عايشه معاها

-----------------
في تعليق في البوست اللي فات

اهو ده عيبه يقول...

ايه يا عم سووو الكلام الجامد ده

جهه امنيه عاليه المستوى وبتعمل اتصالاتها من سيبر هههههههههه، وكمان مقضينها افلام وترجمه

ناقص يكونوا بيدخلوا من التليفون كمان

وحكاية الكوتشينة دى فكرتنى باسماعيل ياسين فى فيلم المليونير لما لعب على الشيك وهدومهم ومشاهم مصيفين

وكله كوم وفيلم الحرام اللى فى الاخر ده كوم ، حبكت يعنى فى الزنقه دى

معلش مهو جدر البطاطا كان السبب يا ضنايا

بس انت ليه بطلت تشأر عليا لعل المانع خير

Babyblue يقول...

سووو

أشكرك على تعليقاتك اللطيفة المشجعة على البلوجين بتوعى
أنا أول مرة أدخل عندك الصراحة بس عجبنى جداً أسلوبك النقدى الساخر المتنكر جوة الأفلام دى ... هههه
تحياتى

Soooo يقول...

سهر الليالى

الحمدلله ان الحلقه عجبتك
بالرغم من اني حاسس انك من المستفيدين من نظام النت المفتوح في الشغل
لكن انا مالي ياعم
انا عن نفسي في شركتي ومؤسستي العظيمه اللي هعملها .. مش هدخل نت خالص

ملحوظه
ايه هو رقم خمستعبتاشر ؟؟؟
هو الحساب اتغير ولا ايه ياجرعاااان؟؟؟؟





سلاموووووووووووووز

Soooo يقول...

خايف من الحقيقة

خبر ايه ياعم خايف
انت عايز تودينا ورا الشمس ليه يا عمونا
انا جبت سيرة مخابرات خالص؟؟؟
انا قلت جهاز امني رفيع المستوى
قصدي على جهاز نوكيا ميت فل وعشره الجديد
افهمونا بقى يا بشر




سلامووووووووووووز

Soooo يقول...

Doba

اهلا بام يوسف افندي
انتي فينك وفين تعليقاتك ياستي

وبطلو قر بقى في نيد فور سبيد .. اديني اتمسكت والبوليس خد كل الفلوس اللي كسبتها في الكام سباق اللي فاتو وادوني عربيه زستافا
اعمل بيها ايه دي بقى؟؟؟؟


سلامي ليوسف افندي




سلاموووووووووووز

Soooo يقول...

كاميليا

الحمدلله انك ضحكتي ويارب يكون الضحك طالع من القلب
ولو على المنافسه في الكوتشينه
الحمدلله انا وارث الذكاء من ابويا .. يعني هتتقطعي لو لعبتي معايا كوتشينه
بس انا اللي افنطها




سلامووووووووووز

Soooo يقول...

رئـــــيسـة حزب الأحلام

ده انتي اللي نورتيني ياستي
والف شكر على تعليقك وعلى رأيك الجميل ده




سلامووووووووووووز

اهو ده عيبه يقول...

شرفت وانست يا عم سوووووو

وفى انتظار الشركة الهندسية العالمية العربية المتحدة اللى حتعملها وبعدين تتامم ان شاء الله

نسيت اقولك ان الشهر ده ذكرى ايقونه مدونتك عم الشباب والرياضة الضيف احمد رحمه الله

Soooo يقول...

زُمُرده

ربنا يكرمك يارب على المجامله الحلوة دي
والحمدلله والدي كويس دلوقتي وبقى بيشرب عرق سوس وخروب .. استغفر الله العظيم
----
قريت تعليقك على الموضوع اللي فات
واللي انا قصدته في تعليقي عندك ان الناس اللي بيبقو بطبعهم خدومين وبيحبو يخدمو غيرهم .. لما بيتألمو بيبقى صعب انهم يقولو مشاعرهم دي لغيرهم

وعموما يافندم ربنا يحبب فيكي خلقه



سلاموووووووووووز

Soooo يقول...

اهو ده عيبه

الله .. هي مش دي مذكرات طفل .. يبقى سيبوه يتكلم بطفولته بقى

----

سعيد جدا بتعليقك ويارب تكون الحلقه عجبتك ويارب تتابعي المذكرات لاخرها

----

وفعلا انا مقصر في حقك ومش في حقك انتي وبس .. ده في حق مدونين كتير بس لظروف خارجه عن ارادتي
والسماح ياهل السماح



سلاموووووووووووووز

Soooo يقول...

Babyblue

ده انا اللي باشكر الظروف انها خلتني ادخل على مدونتك بمحض الدفه ولقيت فيها مواضيعك واللي منهم موضوع الهند واللي شدني قوي وحسيت اني فعلا كنت معاكي
ويارب تتابعي مدونتي المتواضعه وتعتبريها زي مدونتك تمام وتشرفيني بزيارتك دايما



سلامووووووووووز

مجداوية يقول...

يا زُمُل احنا ولاد كار واحد ونفس الكسم عمارة داخلية يعنى وبصراحة أنا مستخسرة الموهبة الفذة دى فى الكتابة انك تكون صاحب مدونة وبس وكمان الموضوع رغم خفة دمه لكن أنا متأكدة انك ممكن تعمل موضوع يكسر الدنيا لأن فعلا عندك كل الامكانيات ,,امكانياتك فى مستوى يوسف معاطى وأخف دما كمان بس عايز فرصة وهوبااااااا حترجع شباب تلاتين سنة ونمضى بقى احنا الاتوجرافات بس ابقى افتكرنا
ربنا يوفقك وتحياتى وتقديرى

Rain man يقول...

جيت اسلم
و اقول اشتقتلك
و اسمحلي بقى انفرد بمذاكرتك كده و اشوف اللي فاتني
انا كمان شايف حاجة سينماتيك كمان
يعني العملية مزهزهة اهي

افتقدتك

د/اجدع بنوته يقول...

هههههههههههههههههههههه

مش انت بتاع البليله

بليله مين ياصاحبى

ههههههههههههههههههه

كمل ياسو كمل

shreen يقول...

عسللللللللل يا سوووو
انت سكر

وبعدين خلاص بقى السر اتكشف
ده كله فى dna
لامؤاخذه يعنى
وراثه

بباك عسل ولعيب ونسى الست الغلبانه وهو بيلعب كوتشينه

والست مامتك عسل وساكته وغلبانه وما خلتش جوزها يفكها علشان " حد الله بينها وبين الحرام "

يبقى طبعا الناتج الطبيعى
انك تطلع منقوع سكر وعسل
بس عسل اسود
علشان انا ما بحبش العسل الابيض

بس قولى ازاى يا سوووو
سونيا تقف قدام بباك بجمالها الرهيب ده
وهو ما يبصبصلهاش

وازاى مامتك طيبه كده
وما غارتش منها

انا لو مكان مامتك وسونيا واقفه قدام الحاج

كان زمانه فقد بصره فى حادث مؤسف
وبقت سنده وعكازة فى الدنيا

المهم ما يشوفش الست سونيا

حذر الحاجه

Lemonada يقول...

اي ده اي ده
انت خيالك واسع جدا
واسع لدرجة انه مش فاضل مكان لاي حد يتخيل ثاني
تحياتوووووووووووووووو يا سسسسسسسسسوووووو

koko يقول...

سوووو

ليك وحشه جامده اوى .. بقالى كتير مش عارفه اجيلك من طحنة الشغل .. بس انشاء الله مش هنقطع تانى . قول يا رب ..

بس قولى هو انت مش هتكتب حاجة غير المذكرات .. و حشتنى تدونياتك و افكاراتك و تعليقاتك ..

سلاموووز و تفاح

shahy يقول...

انا جيت اهو ولقيتك مشيش وعامل بلاوي
شيشة ياسووو شيشة ماكانش العشم

وبعدين مش تطول شوية في الكلام مع سونيا علشان بتاع البليلة يلحق يعرف المكان

شكلك هاتبوظ المهمة كلها

احنا وراك لما نشوف اخر الحكاية دي اية

يسلم لنا دماغك الفقرية

سلام ياولدي

زُمُرده يقول...

انا مش بجامل
ولا املك القدره دي

Soooo يقول...

مجداوية

تصدقي انا كنت حاسس اننا ولاد كار واحد
وماعرفش ليه .. بس تقريبا الدم بيحن للاسمنت والرخام والسيراميك والخشب والنقاشه
----
الف شكر بجد على تعليقك المشجع ده .. بس انا اجي ايه جنب يوسف معاكي ياستي
كده هتغر وانا لما اتغر بابقى مغرور يعني
- فسر الماء بعد الجهد بالماء-
وبالنوسبه لانك مستخسراني في التدوين فقط احب اوضحلك اني والحمدلله باكتب سيناريو وفي تلات افلام مكتوبين ومشتريهم تلات منتجين بس تقريبا لسه ماجاش وقتهم
وربنا يعمل اللي فيه الخير يعني

نورتيني يازُمل




سلامووووووووووووز

Soooo يقول...

Rain man

تصدق ياد انت انا عايز اعضك
انت اختفيت ليه كده على خوانه ياجدع انت؟؟؟
وايه السبب يعني في انك تقفل المدونه من الاساس؟؟؟
تعرف .. انت لو ماكنتش رجعت للتدوين تاني .. كنت هقول انك عيل اي كلام

بس الحمدلله
طلعت راجل وكدبت ظنوني
نورتني يا ميدو
ويارب تفضل منورني دايما يابرنس



سلامووووووووووووووووز

Soooo يقول...

د/اجدع بنوته

يارب تفضلي تضحكي على طول يارب
ويارب تفضلي منورة مدونتي بتعليقاتك اللي دمها خفيف



سلاموووووووووووز

Soooo يقول...

shreen

ربنا يعمر بيتك يارب
والله يكرمك على رفعك من روحك المعنويه بتعليقك الجميل ده
واوعدك اني ان شاء الله لما اموت واقابل والدتي الله يرحمها هبقى ابلغها بنصيحتك دي بخصوص سونيا وابويا

تصدقي بافكر اعمل حلقه ولا حاجه على مغامرات سونيا جراهام وابويا


شكرا على تعليقك ويارب تفضلي منوراني دايما




سلاموووووووووووز

Soooo يقول...

Lemonada

دايما بنهرب من الواقع الغريب العجيب بشوية خيال
وانا بحاول اخدكم معايا لعالم خيالي
ممكن يعجبكم وتضحكو من قلبكم .. وممكن مايعجبكمش
ويارب يعجبك
ومنوراني بتعليقك ويارب ماتقطعيش الزياره وتفضلي منوراني دايما




سلامووووووووووووووووز

Soooo يقول...

koko

ياقهلا ياقهلا
طب تصدقي افتقد تعليقاتك وزياراتك لمدونتي
بجد والله
وبعدين انتي مش واخده بالك من نقطه مهمة
انا ياستي نويت ابطل تدوين اصلا
ومذكراتي دي اخر حاجه هكتبها
فقلت اخليها تاخد طابع نقدي ساخر لبعض الحاجات اللي بنعيشها بدل ماتبقى مجرد ذكرايت للطفوله المشرده وخلاص

وياستي .. اهو كللو تدوين

ماتقطعيش الزياره كده لاحسن ازعل منك




سلاموووووووووووووز

Soooo يقول...

shahy

شوفتي بقى
اديكي اختفيتي يومين تلاته رجعتي لقيتيني مشيش ومتعرف على شلة صحاب بلاوي
بالك بقى لو اختفيتي اكتر من كده .. كنتي ممكن ترجعي تلاقيني استغفر الله العظيم ضارب كشري

منوراني يا ماما شاهي
ويارب تفضلي منوراني بتعليقاتك وبتشجيعك دايما
سلامي لاخواتي




سلاموووووووووووز

Soooo يقول...

زُمُرده

طب يافندم ربنا يكرمك ويعمر بيتك
والف شكر على توضيحك للنقطه دي





سلامووووووووووووووز

دعاء مواجهات يقول...

كلامك جد تحفة والمدونةنفسها على بعضها كدة حالة جميلة جدا

لك تحياتى

Mona El-Shourbagy يقول...

و انا اللى كنت فكرة نفسى بكتب مذكرات يا عم سوووو انا هروح أقفلوووو المدونة بتعتوووو
و هاجى أبات هنوووو

wanna b a physician يقول...

لا حلوة حكاية واخدين وصلات دى
تحياتى

DayDreaming يقول...

ايه الفيلم ده شكله نازل جديد
مش فاهمه حاجه
هروح اقرا التسع حلقات اللي فاتوني عشان افهم

Nostor Azzuro يقول...

الله عليك يا كنج
يارب الحكاية ماتخلص بسرعة عايزين
نستمتع
neo

لـــى لــــىِ يقول...

سامبا : طب لو خسرت .. هاخد منك ايه ؟؟
ابويا : هممم .. لو خسرت خاصموني وماتكلمونيش تاني
سامبا : ههههههه

ههههههههه

اه خاصموه ، ومحدش يكلمه ولا يكممه

يلا بقى خلص المهمة
علشان عايزة العب كوتشينة واتحدى

هههههه

ياترى بتعرف انت كمان فى الكوتشينة ولا بتلعب فكاهة بس؟

خلاص ياعم انا نزلت لك حلقة تعالى خد الدرس من عم حسين

سلاماتى ياسووو

حمامة يقول...

ههههههههه

حد الله ما بينى وبين الحرام

هههههههه

حلوة بجد منتظرين الباقى

Soooo يقول...

دعاء مواجهات

الله يخليكي ويكرمك يارب
الف شكر على تعليقك الجميل ده
وبجد مدونتي نورت بتعليقك وبزيارتك
وياريت تعتبري مدونتي زي مدونتك تمام وتشرفيني دايما



سلاموووووووووووز

Soooo يقول...

Mona El-Shourbagy

اهلا بيكي يافندم ويارب تكون المدونه والمذكرات عجبتك
وعلى فكره
انا باعشق عبد الوهاب مطاوع الله يرحمه عشان والدتي الله يرحمها كانت بتحب تقراله بريد الجمعه
وهو فعلا كان يتميز باسلوب سلس وبسيط
وعلى فكره
انتي اسلوبك كده برضه في مذكراتك
صحيح ماقريتهاش كلها
بس عجبتني اول حلقتين

وهتابعها ان شاء الله

سعيد بزيارتك وبتعليقك واتمنى انك تعتبري مدونتي زي مدونتك تمام وتنوريني دايما





سلامووووووووووووووز

Soooo يقول...

wanna b a physician

والاحلى هو زيارتك وتعليقك


سلاموووووووووووز

Soooo يقول...

DayDreaming

يارب تكوني قريتي الحلقات اللي فاتت ويارب تكون عجبتك
والف شكر على الزياره والتعليق



سلاموووووووووووز

Soooo يقول...

Nostor Azzuro

الله يكرمك يا نيو
والف شكر بجد على تشجيعك وعلى تعليقك
وياريتك تعتبر مدونتي زي مدونتك تمام وتنورني بزياراتك وتعليقاتك دايما




سلاموووووووووووز

Soooo يقول...

لـــى لــــىِ


يااااااااااااااااااه يا لي لي
انتي فاكره اخر مره زورتيني هنا في المدونه كانت امتى؟؟

كانت لما قلتي فيما معناه اني حاطط نمرتي عشان اسأم او اتمنظر او اخلي الناس تعاكسني .. في الموضوع بتاع ان المدونين يتقابلو
فاكره؟؟؟

الحمدلله انك رجعتي لحكايتك ومابطلتيهاش




سلاموووووووووووووووز

Soooo يقول...

حمامة

الحمدلله ان ربنا قدرني وقدرت اخليك تضحك او على الاقل تترسم ابتسامه على وشك

وسعيد جدا بمتابعتك وبتعليقك
ويارب تفضل متابع المذكرات ويارب تعجبك





سلامووووووووووووز

مواطن مصرى نايم يقول...

هههههههههههههه
دا انت مشكلة
وصله و داونلود
انت عارف كان المدير ممكن يعمل حاجة احسن
ينزل برنامج net cut
و يقطع عليهم النت
و يعمل داونلود براحتة
بس فاتته الحتة دى
انا ابقى اكلمة فيها
تحياتى ليك يا سوووو

بت خيخة وأى كلام يقول...

ههههههههههههههه
يا مسهل
ما زالنا فى انتظار الباقى
وهو ايه النظاااااام؟

مجداوية يقول...

هههههههههههههه الدم بيحن للأسمنت والخشب والنقاشة!!!! الله يسامحك
طيب شوفت بقى انى مكشوف عنى الحجاب وطلعت بايع سيناريوهات كمان ,,ما شاء الله أكيد ناس بتفهم ولا تقول يوسف معايا ولا يوسف معاك سوووووووووو بتاعنا كلنا ,, طيب طالما انت واصل كده والله عندى قصة واقعية تنفع فيلم كوميدى يكسر الدنيا كاتباها وناوية أنشرها حلقات لو عجبتك وصلها للى اشتروا منك السيناريو وفيفتى فيفتى ,,الضرب ليك والشتيمة ليا ,,ماشى يا زُمل

koko يقول...

هو مين الى هيبطل تدوين ده .. مش عايزين تهريج فى الهزار .. هو انا اتخطف فى جوانتنامو شوية ارجع الاقى الدنيا باظت .. ده لا يمكن يحصل ابدا على جثتى .. انا بقولك اهو و قد ازعر من انذر ..

Mona El-Shourbagy يقول...

الله يخليك يا سوووو
الله يرحمه أ/عبد الوهاب مطاوع كان كاتب رائع انا بحبه أوىىىىىىىىى
و لو فضل عليا كبير جدااا
شئ يشرفنى أن المذكرات عجبتك و إن شاء الله أتابع المذكرات بتعتك بجد أسلوبك حلو أوى
تحياتى

Soooo يقول...

مواطن مصرى نايم

اوعدك اني لما اقابل توفيق بيه هبقى اقترح عليه الحوار ده
بس المشكله .. هيعمللو داونلوود منين؟؟؟

نورتني والحمدلله اني قدرت ارسم بسمه على وشك ويارب تتابع باقي المذكرات ويارب تعجبك




سلاموووووووووووز

Soooo يقول...

بت خيخة وأى كلام

نورتيني يا ام شرفنطح والله
وربنا يسهل وانزل باقي الحلقات ويارب تتابعيها ويارب تعجبك

ملحوظه
لازم يعني كنتي تسيحيلي وتشردي في الحوار بتاع التبربع بالدم واني شربت سجاير .. ايه النظام؟؟؟


سلامي لشرفنطح



سلاموووووووووووز

Soooo يقول...

مجداوية

والله يا زُمل .. ولا حجاب ولا بايع سيناريوهات ولا بتاع
انا عملت تنازل مبدأي وعلى التعاقد .. والكلام ده من يجي بتاع سنتين .. ولغاية دلوقتي ولا عبروني بميسد كول حتى
بس اوعدك بمجرد ما امضي عقد واقبض .. هبقى اجبلك باستلة معجون استوك هديه .. او اجبلك شكارة اسمنت ابيض .. وادينا زمايل وواجب نشيل بعض




سلامووووووووووووووز

Soooo يقول...

koko

يابنتي افهمي
انا مش هبطل تدوين في العموم .. بس هبطل تدوين في المدونه هنا
لكن هعمل مدونة تانيه ماحدش يعرفها ولا يعرف شخصيتي الحقيقيه اللي اتقطعت فروتها هنا .. وهستمر في التدوين في المدونة الجديده
والمدونه دي هتفضل مفتوحه عادي

فخمتو؟؟؟
نورتيني ياستي وماتبقيش تسيبيهم يخطفوكي في جوانتنامو .. ماله معتقل وادي النطرون؟؟؟



سلاموووووووووووووز

Soooo يقول...

Mona El-Shourbagy

الله يرحمه برحمته ويرحم كل موتانا وموتى المسلمين يارب

والف شكر على زيارتك التانيه وعلى تعليقك التاني .. وانا كمان ان شاء الله هتابع مذكراتك وهقولك رأيي فيها بمجرد ما افضى شويه من التوتر اللي انا فيه





سلاموووووووووووز

3ala asm masr يقول...

ههههههههههههه
فعلا حد الله ما بينا وبين الحرام
انت تنفع مخرج ومؤلف وممثل وكل حاجه
اقولك حاجه هنعملك فيلم لوحدك

Mona El-Shourbagy يقول...

اللهم أمين
معلش يا soooo
هتعبك معايا انا بعتلك تاج و يشرفنى أنك تجاوب عليه

Nani يقول...

السلام عليكم
سوو يا حبيبي عيني عليك باردة
مع اني ما حضرت الفلم اللي بتحكي عنه
بس شكل مغامراتك احلى
على فكرة انت اكتسحت عالم التدوينننن
يا رب تشوفني بين كل هالتعليقات

Soooo يقول...

3ala asm masr

الحمدلله انك ضحكتي ويارب تكون ضحكه طالعه من القلب
وبخصوص اقتراحك اني اكون مؤلف ومخرج وممثل
ده شرف كبير لي .. بس الخوف اني اكون المتفرج الوحيد



سلاموووووووووووز

Soooo يقول...

Mona El-Shourbagy

والله يامنى انا مش عارف اشكرك ازاي على الشرف ده
بس الحقيقه انا مش متقبل مبدأ التاج لاني شايف اني باقول اللي انا عايز اقوله من نفسي من غير لا اسئلة ولا اجوبه
خصوصا ان الناس بتبقى عايزه تسمع اجابات منطقيه وعقلانيه

ارجو انك تكوني استوعبتي منطقي وارجو انك ماتزعليش مني




سلامووووووووووووز

Soooo يقول...

Nani

معقول انساكي برضه يا ناني
انتي زعلتيني والله
انساكي ازاي ياستي واحنا مواليد سنه واحده
دي حتى تبقى عيبه في حقنا
نورتيني بعد غياب
وماتبقيش تختفي كده تاني





سلامووووووووووووووز

بنت مصريه يقول...

انا متشكره قوى على كلامك ده غلى مدونتى انت فعلا سيناريست لو فعلا سينا ريست ده اميلى كلمنى عليه gana_love204@yahoo.com

بنت مصريه يقول...

بس بالامانه ماتخدش الكلام بتاعى الا لما تكلمنى الاول ماشى على فكره انا اسمى انجى

Soooo يقول...

بنت مصريه

انا سعيد بزيارتك وبتعليقك وبكلامك

وانا فعلا سيناريست بس من منازلهم .. يعني مافيش حاجه نزلت لي لسه وعايش بالامل

واكيد طبعا مش هاخد حاجه منك غير لما استأذنك .. بس انا لما قلتلك على اني اخد (هي باظت) فده عشان مسرحيه هواة وهيتقال كلامك على لسان احد الشخصيات في المسرحيه
يعني لو راسمه على فلوس .. اخوكي بيكح تراب .. بس اوعدك اني احفظلك حقك الادبي في كتابة اسمك مع اسماء باقي شعراء العمل ومؤلفين الاغاني .. وكمان هشوفك بدعوة لخمس افراد وشندوشت بلوبيف




سلاموووووووووووز

Dr-hema يقول...

نيد فورسيبد انهى نسخة؟؟؟