الخميس، 24 ذو الحجة، 1428 هـ

!!! جاد شويري .. ابو الفنانين


تحديث

دكتوري ضياء النجار بعتلي تعليق فيه لينكاية لموقع منشور فيه حوار مع جاد شويري وبيسألوه بخصوص الموضوع بتاع القناة الاباحيه اللي انتشرت الاخبار عنها
.. وكان الحوار كالتاتي

المحاور: لكنك لازلت معرضا للنقد؟
جاد شويري : لأن الناس تعودو على توجيه النقد لي مهما فعلت رغم أني مؤخرا قدمت اكثر من كليب مع عمرو مصطفى وايوان وماريا وجوانا ملاح ونيكول سابا ولم يجد الناس في اي منها شيئا لينتقدوه فحاولو اختراع مادة للنقد , وصدقني ان من يهوى النقد الدائم يبحث عن اشاعة لا اساس لها من الصحة ولو لم يجد ما يتنقده
المحاور: مثل شائعة افتتاحك لمحطة اباحية ؟
جاد شويري : اجل مثل هكذا اشاعه ولا ادري من اين اتت .. ويقولو لك انه لا وجود للدخان بدون نار , انا هنا أؤكد ان الدخان يتصاعد ولو لم توجد النار لان هذا يحصل معي
-------
لحد هنا وانتهى الحوار فيما يخص نقظه القناة الاباحيه .. لكن من جوايا تساؤل
هو ليه احنا لو حصلت حاجه زي كده هنسكت ومش هنتكلم .. وده بناء على رد معظم اللي علقو عالموضوع ده؟؟؟
وليه بقى عادي عندنا ان التلفزيون كجهاز .. اننا نلاقي على اي قناه اي حاجه ؟؟
وليه جاد شويري نفسه شايف ان الاشاعه دي دخان من غير نار؟؟
ولا هو مش معترف ان اللي بيعمله ده يعتبر فعلا نار .. وبتولع في الشباب؟؟؟


ملحوظة بقى عالسريع
يعني يا دكتور ضياء مابتعلقش عندي غير لما انزل موضوع غلط او من غير ما اكون متأكد منه ميه في الميه .. وباقي الحياه تبقى حارمني من زيارتك وتعليقاتك
طب حيث كده .. هديها اخبار امريكاني .. تفرقع .. لكن مالهاش لازمه
سوووو
------------------------------------------------
كنت احتسي جعتي المفضله .. وهي عصير الخروب .. واتمَزز بمَزتي المفضله .. وهي الفول السوداني ابو شيكولاته .. واستمتع بحالة السكر التي تنتابني .. واقلب في صفحات المواقع المختلفه عالنت .. اقرأ خبرا من هنا .. واشاهد صورة من هناك .. وفجأة
أن أن آآآآآآآآآآآآآآآآآآآآآآآآآآآآآآآن .. تش
قرأت خبرا .. خلاني عملت كده
وش واحد متنح على مذبهل وبيهز رقبته يمين وشمال عشان يفوق
سوووو : ايه ده بقىىىى .. هو الخروب ده مضروب خمره ولا ايييييييه ؟؟!!؟؟
الخبر بيقول
جاد شويري يعتزم اطلاق اول قناة اباحية
!!!!!!!!
.. شفتو .. نفس رد الفعل اللي حصللي بيحصل معاكم اهه
.. مش كده وبس .. تصريح جاد شويري بيقول ايه
جاد شويري : اعتقد انه حان الوقت للوطن العربي ككل ان يستمتع بمشاهدة الافلام البورنو بدلا من مشاهدة اخبار الحروب والدمار المحيطه بالوطن العربي
.. يابن الاييييييييه .. عملتها قضيه وطنيه خلاص
جاد شويري : كما اعتقد ان الالتفاف حول مثل هذه الافلام قد ينمي الثقافه الجنسيه لدى ابناء الوطن العربي
.. لا وحياة نينا .. هي ناميه خلقه .. ولو سألت عيل في الشارع هيقوللك التفاصيل حته حته
جاد شويري : ان مثل هذه القنوات وهذه الافلام تعتبر من منابر التنوير والعلوم في مختلف انحاء العالم .. ويجب علينا ان نتطلع لأن يكون لدينا منبرنا وفننا الخاص بدلا من مشاهدة كل ماهو خارج عن التقاليد والاعراف العربيه
!! حمره !! .. عربية ميه تمانيه وعشرين .. حمراء اللون
جاد شويري : وسوف يساعدني على انشاء هذه القناة مجموعة مستثمرين ورجال اعمال وفنانين ومخرجين وممثلين من الوطن العربي ككل .. ومن مصر والسعوديه على وجه الخصوص
لحد هنا ولقيتني بقول جاااااااااااااااااااااااااي
من مصر والسعوديه على وجه الخصوص؟؟؟؟؟!!!!!!؟؟؟؟؟
بقى بلد الحرمين الشريفين ومهد رسالة الاسلام .. وبلد الازهر الشريف منبر الاسلام على مر العصور .. يطلع منهم حد يساعد على انتشار الفحش والرذيله
؟؟؟؟؟
ومين اللي هيساعد ويمول المشروع ده لو كان حقيقه
؟؟؟؟؟؟؟
ويساعد ليه ويمول ليه اصلا والفضائيات مليانه قنوات اغاني مليانه بنات لابسين من غير هدوم
؟؟؟؟؟؟؟؟؟
ورجال الاعمال دول ازاي يقبلو ان بناتهم واهاليهم يشوفو حاجه زي دي .. وعادي خالص .. بيس يا مان احنا في رحله
؟؟؟؟؟؟؟؟؟؟؟؟؟
وهل بعد فتره نلاقي سينما بتعرض فيلم بورنو صريح اسمه (الوضع طائرا) .. بطولة الفنانه سونيا زغلله .. والنجم سعيد عجله
؟؟؟؟؟؟؟؟؟؟؟؟؟؟؟؟؟؟
وهو اللي بيحصل فينا من الحوارات دي من حوادث اغتصاب على حالات طلاق مش كفاية
؟؟؟؟؟؟؟؟؟؟؟؟؟؟؟؟؟؟؟؟
مش كفاية علينا هيفا ونانسي وروبي وامثالهم .. من اللي بيعرضو جسمهم قبل صوتهم
؟؟؟؟؟؟؟؟؟؟؟؟؟؟؟؟؟؟؟؟؟؟
مش كفايه علينا الوجوه اللي اكتشفهم جاد افندي من نانا ودانا وشوانا وهرانا
؟؟؟؟؟؟؟؟؟؟؟؟؟؟؟؟؟؟؟؟؟؟؟؟
مش كفاية علينا واحنا شعوب أصلا غلبانه
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
ولا مش مقدرين ان الشباب فعلا تعبانه
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
اه يا عيني يااااااانا
--------
ملحوظه
جاد شويري يلقبه البعض بانه ابو الفنانين .. انا بقى هلقبه .. ابو ام الفنانين ياعم
سوووو

هناك 48 تعليقًا:

Nani يقول...

السلام عليكم
سووو يا ضنايا مش يمكن هاي اشاعة مغرضة من اللي بكرهو جاد شويري
على فكرة انا بكره ام الي جابوه ونفسي اخمعوه كفين على شلوتين واقله شد حيلك ياغير نوعك
وبعدين على راي سلطان في مسرحية العيال كبرو
مش احنا في عصر الانفتاح ولا ايههه

ابن حـجـر الـعـسـقـلانـى يقول...

ا"ويجب علينا ان نتطلع لأن يكون لدينا منبرنا وفننا الخاص بدلا من مشاهدة كل ماهو خارج عن التقاليد والاعراف العربيه"ا

العبارة دى عبقرية ما تطلعش غير من واحد عبقرى

معنى هذه العبارة إن يكون عندنا أفلام إباحية خاضعة للتقاليد و الأعراف العربية ... إزاااااااااى ؟؟؟ ماعرفش

فكرتنى بنكتة

مرة واحد شبه جاد شويرى كدة .. حب يعتزل الفن و يتوب .. راح اتحجب

لولا إنى الواحد بيحافظ على مشاعر الناس .. أنا كنت بعبعت بكلام كتير

إنت قلت لى فانلة الأهلى لونها إيه ؟؟؟

ابن حـجـر الـعـسـقـلانـى يقول...

معلش .. عندى إضافة

أعتقد إن لقب "أم الفنانين" يبقى أقرب لجاد شويرى من لقب "أبو الفنانين".. لأن لقب "أبو" هنا يقتضى قدرا و لو قليلا من الذكورة

MerMaid يقول...

انا جاية ..هاقرا البوست بتاعك و جاية

انا بس كنت بحجز مكان في المقاعد الامامية

:))

MerMaid يقول...

بعد ما قريت البوست لاقيته بتاريخ النهاردة

يعني الخبر ده لسة واصلك؟؟
انا عارفة من زمان انه هيطلق قناة اباحية
طيب...ماشي انا عارفة وانت اديك اهو عرفت
و غيري هيعرفوا عن طريقك او باي طريق تاني
هنعمـــــــــــل ايـــــــــه؟؟
ولا حاجة
لاننا ببساطة مش هنعمل حاجة
و مفيش حاجة نعلها...لان احنا ناس كسولة
و جاد شويري و اعوانه ناس نشيطة
اذن من ينتصر؟؟
جاد شويري
اذن من ينشر فكره؟
جاد شويري
اذن من يكسب اموالا طائلة؟
جاد شويري
اذن من ينحرف شبابه و يضيع؟
الناس الغلابة
اذن من يرتكب في حقه جرائم الاغتصاب؟
الناس الغلابة
اذن من يدافع عن الغلابة؟؟
محـــــــــــــــــدش

:::::::::::::::::::

مدونتك رائعة ...اول زيارة لي هنا
تشرفني زيارتك لية و مدوامتك عليها
شوية كلام-حالة سعادة مؤقتة

MerMaid

Desert cat يقول...

منبر ايه وفن مين ومين اللى بيدعم الراجل ده
هو احنا ناقصين
ده البينت بتبقى ماشية فى الشارع لابسه نقاب وتسمع كلمة من اذر الكلمات فى القاموس العربى فما بلك لما القنوات دى تنتشر
هو الراجل ده اتجنن فى مخه ولا ايه

ghalia يقول...

سوووو يا سوووو
ازيك
اخبارك ايه والله لك وحشة
انت دايما كدة تحرجنى
أنا عارفة انى مقصرة أوى >>>> وش أحمر
بس والله علطول باجى ومتابعة كل أجزاء المهمة الصعيدية كمان
المهم كل سنة وانت طيب

وبالنسبة للبوست فأنا كنت سمعت خبر مشابه قبل كدة بيخص اللى اسمو نجيب ساويرس صاحب موبينيل .. مضمون الخبر كان بيقول ان نجيب ساويرس مستاء جدا من حال الشارع المصرى اللى بقى اشبه بالشارع الايرانى من كترة المحجبات وقال انو ناوى يطلق قناة متخصصة بعرض الأفلام السينمائية اللى بيكون فيها مشاهد إباحية دون التعرض لمقص الرقيب بهدف مواجهة "الجرعة العالية من البرامج الدينية والمتحفظة في القنوات الأخرى "

ايه رأيك بقى .

ra7eel يقول...

سووووووووووو

وحشتنى مدونتك جدا
بس للظروف الفتره اللى فاتت مكنتش بدخل كتير غير ان النت كان موجب اساسا معايا

المهم مش عارفه اقول ايه غير بجد الله يفحمهم ويحرقهم ايه اللى ناس دى بتعمله
هما بجد عايزين ايه؟
ومنبر ايه وثقافه ايه؟
وبعدين يعنى هى المشكله فى اخبار الحروب والدمار ياعينى
لاء بجد حساس الراجل ده قصده مصلحتنا برده واحنا اكيد مش واخدين بالنا
يعنى هو شايف ان الناس اكيد اتخنقت بقى من الاخبار دى واعصابها بتتعب وبتفضل بقى تعيط وتتنكد عشان الناس اللى بتموت
مش واخد باله اساسا ان الناس مبقاش فارق معاها


الصبر من عندك يارب حاسه انى هيجرالى حاجه من البجاحه دى بجد
انا امشى احسن
سلااااااااااموز ياسوووو

فرنسا هانم يقول...

زعلااااااااااان انت ياسو صح؟؟؟؟؟؟
بجد زعلان؟؟؟؟؟؟؟؟؟؟؟؟؟؟؟؟
امال ايه الاخبار اللى جات لى دى؟
انت عارف انى عندى جواسيس فى كل المدونات
ومركبه اتارى فى العجله
ومعلوماتى بتقول
ان سووووو بقالوا كام يوم عماله يستلف فلوس علشان يشترى تليفزيون ودش
انكر المعلمومات دى يا سووو
حاول تنكر كده

فرنسا هانم يقول...

سوووووووووووو
مين اللى ما يتسمى جاد شويرى ده ؟؟؟

MKSARAT SAYED SAAD يقول...

يعني خلاص ملقتشي غير جاد شويري تكلمنا عنه
اولا انا بتخنق منه موووووووووووووووت
وثانيا مي قالك انه فنان دة كبير ينفع حلاق
انا شفتله مرة لقاء من فترة وخنقنى اكتر وباللي انت بتقوله دة خلاص مبقتش بجد طايقة
اللي بيعمل فن سليم فنه هو اللي بيتكلم عنه ودة راح جابلى كل اللي صوتهم مش عايز اقول زي اية بالظبط علشان احنا على الهوي واخرجلهم اغانى
والجميل عفوا المزعج لما بشوفة بيغني يا ساتر يارب
بقي يا سوووووووو انا بستنى البوست بتاع اخر الاسبوع علشان اتبسط تقوم تخنقنى بجاد ابن الشويري دة
يلا حصل خير ام انت عامل اية يا رب تكون كويس وبخير
اتمنالك ويك اند زي الفل
تحياتي لسو حبيبي
صاحب المكسرات

ToOoKa يقول...

السلام عليكم ورحمة الله وبركاته
لا تعليق


المشكله انو الناس بتسهل الحرام وتصعب الحلال
العيب مش فيهم العيب اللى بيتفرج وحيتفرج على القنوات دى
يعنى القنوات دى لو مش حتكسبهم فلوس حيشغلوها ليــــه

ربنا يطلعنا من الزمن دا على خير ):

s يقول...

سلامو عليكو يا سووووو
انا عارفه الموضوع ده من اكتر من 3 شهور والكلام اللي هقوله مش معناه اني بدافع عن جاد شويري
قناه مزيكا عملت انترفيو معاه و المذيعه سألته عن الموضوع ده و كان رده ان دي اشاعه و ان الكلام ده مش صحيح انا مش فاكره طبعا بقيت الكلام لأن الكلام ده كان يوم سبت و السبت ده يا سيدي يوم التنضيف العالمي في حياه العائله وطبعا مكنتش مركزه :))

زُمُرده يقول...

السلام عليكم
بص متتعبش نفسك
طول ما احنا عايشين هنشوف العجب
1-نيوتن قالك ايه؟: كل فعل له رد فعل مساو له في القوه ومضاد له في الاتجاه
يعني
كل ما تيار الاباحيه بيزيد تيار التدين والتحجب والتقرب من الله
2- اللي بيتفرجوا في الضلمه هما نفسهم اللي هيتفرجوا على القنوات دي

3- الخوف على جيل هيطلع مش شايف غير الغلط شيء عادي ومش غلط
4- احزني مصر والسعوديه اوي اوي

shayma يقول...

مش عارفه يا سووو ... بس بيتهيالى ان الموضوع ميوصلش للدرجادى اكييييد اشاعه او على الاقل ده الى بتمناه انه يكون اشاعه

يا نهاره اسود من قرن الخروب الى انت بتشربه..معقوله فى كده..لالالالالااااااااا
هيا اشاعه اكيد اشاعه.. اصل يعنى محدش هيسكت لو ده حصل اقله احنا مش هنسكت
ولا الناس دى مبيهمهاش ..لالالا هيا اشاعه

يخربيوتهم.. والبيوت الى جمب بيوتهم
قادر يا كريم

بيقولوا سايكو يقول...

لأ ل مش قادرة أصدق .. صحيح شويرى سافل و كل عبر الدنيا فيه .. بس للدرجة دى ؟! .. أكيد فى حاجة غلط

إنـســـانـة يقول...

ههههههههههههههههههه

طب جدع اهوه عايز يعمل حاجة .. يارب تنام ماتقوم ياعم جاد انت وكل اللى زيك

ماهو حاجة من الاتنين ياربنا يايهديهم يا ياخدهم

حسبى الله ونعم الوكيييييييل

Rosa يقول...

مش عارفه اقول ايه والله يا سوو
عماله اكتب في تعليقات و امسحها تاني
جايلي بجد حاله غريبه زي ما وصفت كدا
طب يعني هوا بجد بجد؟؟
عادي يعني؟؟
بس خلاص كل حاجه مابقتش مستبعده في الزمنالي احنا فيه
تسرب الحاجات الغريبه دي في حياتنا لحد ماتبقى عادي جدا و مافيهاش مشكله و مانقفش عندها كتير
ماهو منظر طبيعي بنشوفه على طول
----
كان ليا استفسار يعني ... هل الساده الافاضل الي هايسعدوا في اطلاق القناة دي , هايسعدوا بالمجهود الشخصي؟؟ و لا بإثرئنا بسلسلة الافلام الموجوده في مكتبة حضارتهم و لا ايه النظام
عشان نبقى فاهمين برده الوضع
------------
و لا حول و لا قوة الا بالله
لا حول و لا قوة الا بالله
لا حول ولا قوة الا بالله

3ala asm masr يقول...

حرام والله حرام
يعنى ستار اكاديمى وقلنا ماشى
سمعنا صوتك وسكتنا احنا وصوتهم هو اللى طلع
هزى يا نواعم
والدنيا كلها هزت
كمان افلام اباحيه ليه هو احنا ناقصين
ده كل حاجه دلوقتى بقت اباحيه

aya يقول...

قناة اباحية.......
اهلا...
اهى بدت تندع

عجبنى اوى موضوع الافلام الخاضعة للاعرافو التقاليد

ايه يا جماعة
يعنى الراجل هيعمل اكتر من كده ايه
مقدر مشاعر العرب والمسلمين وعادتنا وتقاليدنا

وقالك هيعمل قناة اباحية وكل حاجة بس هتبقى تبعة للاعراف

ااااااااااااه يا ضغطى يانا

صدقنى معنديش غير اغنية ايهاب توفيق ارد بيها على ال((شيئ)) -اللى هو جاد يعنى- ده:

هيا نقصاك انت كمان؟؟؟

وصوتى وغطينى ياما على مستقبل ولادك يا مصر

appy يقول...

سوووووووووو يا سووووووو وحبيبى هيحبسوووووووة
ميطلقش ليه هو حر فى مراته قصدى قناته
والراجل بيرهف عننا عادى يعنى ما افلام الكارتون والقنوات الاسلاميه موضه قديمه
وآآآآآه امال مش بيبنى قثافه عندنا وتبقى باميا
آآآآآآآه عارفه الممبار اللى بيتكلم عنه ده ماما بتعمله لنا فى البيت والله

آآآآآآآصه الوحده العربية بين رمص والعسودية انا عارفه الدول دى بسسس فين مش فاكرة
حلوة زغللة من النور العالى
حرام عليك جبت ليه حول فى الكلام وهلاوس انا ناقصه يا سووووووو ردا بس على مروة والنبى ما تحرمنى اخبطها قله فى دماغها اللى بيتصدى للحاجات دى الرقابه واحنا نشيلها من قنواتنا حتى على المستوى المحلى زى ما انا عامله كده مع الاخت اوووووه اتفو قصدى اوه تى فى ببرامجها النيله اللى طالع واحد غريب يقولك يبقى انت اكيد فى مصر هى مصر مبقاش فيها غير الاماكن الوحشه بس مصر حلوة وفيها طيبه وجدعنه فى شعبها مش عند حد يكفى شهادة جميع الدول بس احنا اللى كرهين نفسنا
شكرررررررا يا سووووووو وهاجى اسيب لك خروف هنا على البوست الجامد وللعربية 128 الحمرا ابقى ابعته للاخ جاد بتاع الفول والطعميه ههههههههه

rainbow يقول...

عحمد

مش لاقية اى تعليق يناسب اللون الاحمر الفاقع اللى ضرب فى عنيا وبدل الدنيا ماهى بمبى بقت حمراااااااااا !!0

الدم يا عحمد ضرب فى نافوخى ومش مركزة اساسا الشىء المسمى جاد ولد شويرى ده لا يمكن اشوفه اذا حصل يعنى وشفته الا واصابنى نوع من القرف الشديد .. ولا استبعد انه ينشر اى تصريحات ولو كاذبة لمحاولة جذب الاهتمام الاعلامى

بس التصريح دا ايه اكسرا بجد مش يلفت الاهتمام بس ده بيشوش على اى استقبال لانه المادة الخام للاستهبال

موضوع مستفز لكن تشكر عليه

تحياتى ومودتى الخالصة

هدى

Dalia يقول...

بصراحة مش عارفة ارد اقول ايه
انا سمعت الخبر ده من زمان
لكن الجديد انه بتمويل مصرى سعودى
طب مصرى وهبلعها لان الواحد بقى يصدق كل حاجة فى البلد دىويصدق انه ممكن يطلع منها اى حاجة منيلة بنيلة
لكن سعودى ليييييييييييييييييييييه؟
السعودية مش مجرد جنسية زى اى بلد تانية عربية السعودية اكبر من كده بكتير لانها رمز وكل اهلها مسئولين عن الرمز ده
بجد مش عارفة اقول ايه
انا قريت ردود الناس هنا وعجبنى الرد اللى قال هنعمل ايه؟
فعلا نفسى اعرف ممكن نعمل ايه؟
متهيالى ولا حاجة لان عشان واحد زى ده يتكلم بالبجاحة دى ويدخل فى موضوع كده معروف انه هيتحارب من طوب الارض اكيد مستعد ووراه ناس تقيلة اوى وبيتحضرله كويس اوى بدليل انه سمعنا عنه من فترة كبيرة ولسه ماطلعش لحد دلوقتى ومازال مجرد كلام وده ان دل على شئ فهو بيدل على انه ممكن يكون الرفض والعقبات قدامه كتير
ويارب يكتر منها ولا تقومله قومه ابدا
وممكن برضه يكون مجرد خبر وخلاص اشاعه هو بيطلعها لهدف فى نفس يعقوب
انا مابقيتش فاهمة حاجة ومش عايزة افهم بس بجد بجد حسبى الله ونعم الوكيل
واكيد اكيد
لكل فعل رد فعل مضاد له فى الاتجاه

commandor يقول...

ههههههههه
انا عاجبني الرد اللى بيقول اننا مش هنعمل حاجه لاننا ناس كسوله والناس اللى مع جاد ناس نشطيه ...فعلا ده حالنا والله...
وما اعتقدش ان حد هيقدر يقف قصاده غير ...ناس من التقيله;) وانتو عارفين يعني ايه كلمه تقيله بقي:d
حاجه تانيه ..فرضنا لو جاد عمل فعلا قناه ..طيب ما هو هيحتاج منافس ليه في السوق ولا ايه ؟؟
علي العموم ... لو حب يكون له منافس يا ريت حد يدينا باظ بس:p

****شويه جد بقي****
احنا لو موقفنا قدام جاد ومثاله من دلوقتي ..يبقي عمرنا ما هنعمل حاجه وهيطلع غيره كتير كتير كتير ..ومش عارف بعد كدا ايه اللى هيحصل ؟؟!!
ياربي!!!!!!!!
مصيبه والله!
ربنا ياخده هوه وامثاله والممولين له من بلاد الحرمين الشريفين ومن بلاد الازهر الشريف...ومن اي مكان:(

Ahmed Mubarak يقول...

احم ..بص يا حاج سووو يا حبيبي..
إلهي يارب يولع في جاد دة وأمثاله والذي منه آمين يارب..
بس ولا تعصب نفسك ولا حاجة..روح اعمل كوبايه شاي..وروق دماغك..يعني احنا عملنا ايه مع هيفا ونانسي ودانا وشونا والذي منه..طلعنا حبتين..وقامت الدنيا وكل واحد سكت..
انا نفسي بجد نعرف نتحرك..المشكله يا ضنايا ان في ناس هتنتظر دة بفارغ الصبر..وبالتالي هندعمهم..حسبنا الله ونعم الوكيل..
بس بجد عايزين نتأكد من المعلومة دية..أنا بجد مش متخيل ان حد عربي ممكن يكون كدة..اه الدنيا بايظة..مش للدرجادي..دا هيفا مش هتقول كدة
:D:D:D:D
بهزر.أحسن تخدها كدة..
ربنا يكون في عونا

سهر الليالى يقول...

لا حول ولا قوة إلا بالله
والله يا سوووو ربنا يرحمنا برحمته
لأننا بجد بقينا فى زمن صعب وأنا بصراحه مستبعدتش حاجة زى دى لأن الواحد بقى يشوف العجب واللى نقول انو لا يمكن يحصل بقو بيعملوة

بس أحنا مش ناقصين أصلا ما هما عاملين الواجب وزيادة زى ما انت قلت

بس اصلا جاد دة يعنى مش عارفة اقول عليه ايه بس

حسبنا الله ونعم الوكيل

ŞoŖśậŖấầ يقول...

دا واخد رشوة

اكيد واخد رشوة امال ايه ياحضرة العمدة

ماهو لما العجل وقع فى البير واللى فى الكفر كوللاته مارضيش يطلعه عشان سرحان ولد المحروج جاب الدش ومشغله على قنوات هشتك بشتك

العجل اللى فى البير قالله طلعنى بس وانا هعملك قناة لوحدك مخصوص ويولع باقى الكفر بجاز



هو ايه اللى انا بقوله

معقوله يعنى الاخ المبجل اللى عاوز ينورنا وينفعنا فى زمن الجاهلية والظلام يطلع عايش فى كفر الدش دا

واللا كمان يبقى فى عجل يديلو رشوة ويعمله قناة لوحده
هو فى عجل بيتكلم
طيب مش لما يبقى بقرة كبيرة كدا وملو قرونها كان عمل ايه

ياجماعة انا مش بعيب فحد لا سمح الله

ربنا هو اللى شايف وهو اللى بيحاسب

دا بس رد فعل للكلام اللى قريته فبالتالى قلت كوكتيل التهييس الفريش دا

وشكرن لحسن الاستضافة وانشراح صدركم لصورصاراية مفروساية زيى

بت خيخة وأى كلام يقول...

سوووووووووو
يا سووووووووووو
رد عليااااااااااااااا
عندى رد ابيح عايزة ارد بيه على جاد ينفع ولا انت من النوع اللى بتشفر الردود
هو عموما هو رد مكون من تلات حروف الاول والتالت زى بعضهم
وعايزة اقول كمان
الحكمة اللى بتقول ودى من تأليفى وذلك حفاظا على حقوق النشر والطبع
اه يابلد مافكيش رجالة غير جاد شويرى
وسمعنى سلام تحية الوحدة العربية متجمعين عند سنية
وانا هامشى بقى علشان الالفاظ الابيحة كلها كبست على مراوحى
بس حلوة اوى العربية الحمرا دى
جت فى وقتها
تصور نفس العربية عدت قدامى فى نفس اللحظة
ياسلاااااااااام
على توارد الخواطر


سلام
اختك خيخة مبئؤئة وأى كلام

ايوية يقول...

ان لم تستح ففعل ما شئت

لا تعليق

shahy يقول...

سيبك انت من الكلام الفارغ بتاع البت جاد
انا بقى بعمل عصير خروب حكاية مش ممكن هاتكون شربت زية في حياتك ابداحتى اسأل ابو الدراويش وكل اصحابة اللي بيتعزموا عندنا
اصل انا مشهورة بعصير الخروب والدوم والمانجو واخيرا الكريم كراميل


انا فاتني مهمتين صعيديتين هابقى اقراهم بس بكرة لاني تعبت دلوقتي وهاقوم انام
تصبح على خير ياولدي

مروة الزارع يقول...

يا خراااااااااااااااااابى ياماااااا

يالهوتىىىىىىىىىىىىىىىىىىىىىىىى

على فكرة الواد (.....) اللى اسمة جاد شويرى دة انا مش بطيقةةةة

نفسى اولع فية بجاز وسخخخخخخخخخ

اية اللى بيحصل فى الدنيا يا عاااااااالمم

حد يفهمنىىىىىىىىى

يااااارب انت القادر على المفترىىىىىى

e7na يقول...

يا جماعه مالكم كده
موسيقار الاجيال جاد شويرى قدم للموسيقى العربيه اكثر من صوت عظيم وأتحفنا بالعديد من الكليبات التى جعلت معشر الشباب فى غنى عن اللف بالهاردات بتاعتهم
ده كفايه يا جماعه انه اكتشف الموهبه الفذه الفنانه العظيمه ماريا وهو اللى دربها على مخارج الالفاظ السليمه

كفايه كده علشان مخارج الفاظى عاوزه تطلع صوت رخيم

Dr. Diaa Elnaggar يقول...

عزيزي سوووو

إنها اشاعة لا يقوم عليها دليل، وقد بحثت على النت فلم اجد مصدر اعلامي محترم ذكر هذا الخبر، بل ان هذا الخبر تناقلته عن بعضها البعض "شوية" من المنتديات المفتوحة الباحثة عن الشهرة ليس إلا. وعلى العموم فقد كذّب جاد شويري هذه الأنباء ومن يريد قراءة المزيد فإليكم هذا الرابط

http://under20.maktoob.com/Article58952-%D8%AC%D8%A7%D8%AF_%D8%B4%D9%88%D9%8A%D8%B1%D9%8A_%D9%8A%D8%B1%D8%AF_%D8%B9%D9%84%D9%89_%D8%B4%D8%A7%D8%A6%D8%B9%D8%A9_%D8%A7%D9%81%D8%AA%D8%AA%D8%A7%D8%AD%D9%87_%D8%A7%D9%84%D9%82%D9%86%D8%A7%D8%A9_%D8%A7%D9%84%D8%A7%D8%A8%D8%A7%D8%AD%D9%8A%D8%A9.htm

يا سوووو، تفتكر جاد شويري بالغباء ده عشان يصرح بحاجة زي كده، ناهيك عن القيام بها من أساسه؟؟؟؟؟

تحياتي

ضياء

بحبك يامصر يقول...

على راى المثل (سكتناله دخل بحماره)هو عمل الاغانى الخليعه ومحدش قاله حاجه يلا بقه بالمره هى جت على دى؟ اصلها ناقصاه

كاميليا يقول...

جاد شويرى ده شورته سودا

خلاص، مشاكل الوطن العربى محتاجة شويرى يشور فيها كمان؟
ولسة ، زمن العجائب فى جعبته الكثير

ربنا يرحمنا ياسوو

انت فين مش بتزورنى ليه؟
وحشنى كلامك

دمت بكل الود

بيسوو يقول...

حسبي الله ونعم الوكيل

ربنا على الظالم والمفتري وجاد شويري
طب اقول ايه هو الواحد ناقص حرقة دم ياربي..بس ارجع واقول يمكن اوشاعة ولو مش اوشاعة هنخليها احنا اوشاعة

fanan fa2eer يقول...

لا حول ولا قوة الا بالله

بقي هو الأخ جاد عايز مصلحة الوطن؟

تصدق يا سوووو كنت في ندوة ثقافية من كام يوم كانوا بيناقشوا فيها المشاريع القومية كمرآة للوطن

تصدق برده لو كنت أعرف الموضوع ده مسبقا كنت طرحته في الندوة علي انه مشروع قومي

منهم لله

وحسبنا الله ونعم الوكيل

ومن مصر والسعودية كمان؟؟؟؟؟

قال منبر قال الله يخربيت المنابر واللي بدعوها لجل خاطره المنيل علي عينه ده

Rehab Mostafa يقول...

هو بصراحه مش محتاج هو قايم بالواجب وزياده في الكليبات اللي بيغني فيها واللي بيخرجها .. راجل بصراحه متحرر من أي قيود - عفواً أنا مش عارفه أحدد نوعه بس الناس بتقول انه راجل -
قالك الوطن العربي المفروض يبقى فيه كل حاجه والناس تختار !!!!

Doba يقول...

انا وقعت على روحى من الضحك لما قلت حمرة

انت مجرم
وهيه فعلا حمرة

حمرة قوى

ده خايب سيبه
ربنا اقوى من الكل

متقلقش

الشباب كده كده بايظ وبيتفرج بره
فعادى لو بقى فيه جوه مصر كمان

يلا باى يا ابو المدونين
هههههههههههه
سلام يا سووووووو

د/اجدع بنوته يقول...

ههههههههههههههههههههههههههههههههههههههههههههههههههههههههههههههههههههههههههههه

اه يانا اه يانا .. اللى هيجننى هو بيلاقى الاشكال دى فين .. ودانا ونانا دول

لاحول ولا قوة الا بالله

بس عجبتنى اوى تنوير دى فاكر نفسه على مبارك بروح خالته

والله الخبر معملش فيا اى اذبهلال هو خلانى اضحك وبعنف

لانك مش اخد بالك اصلا ان ف قنوات اباحيه موجوده اوردى

وم مصر الحبيبه

نصيحه بعد الساعه 12 ابقى شوف او تى فى .. بتعرض ايه

ونصيحه اكتر ابقى اتفرج لوحدك .. مش طالبه احراج

تحياتى جدااااااااااا

عروس البحر يقول...

السلام عليكم
سعدت جدا بمروري علي المدونة دي
جاد شويري ابو المجانين
تحياتي

Hannoda يقول...

بصراحة أنا مش قادرة أتخل ان حوار زي ده ممكن يتقال أساسا
و بما إنه اتقال فأنا مش عارفة بجد أتخيل انه ممكن يتنفذ
عالم الفضائيات ده على قد ما طور من برامج و أفكار كتير تستاهل الاحترام
إلا انه للأسف سايب التافهين اللي غاويين استهبال انهم يستهبلوا على العالم

أساسا جاد ده بيثير اشمئزازي و بيعصبني جدا

بلاها دش يا سوووو

عاليا حليم يقول...

ما تستغربش ان بلد الازهر و الحرمين السريفين حيساعدوه الازهر بقى ماشى تبع ال........ طبعا انت فاهمنى انا اصلى ماليش فى السياسة لما يامروه حلل ده يحلله ، حرم ده يحرمه و يخلقوا نصوص كمان اما السعوديين البرنور مش غريب عليهم ليا عم فى السعودية مراته بتحكيلى على بلاوى الراجل ممكن يكون قاعد فى بيته و مراته بتخونه فى الاوضة التانية و هو لا على باله و بينزلوا مصر هنا يفجروا

الى بيحصل ده مش غريب مس الرسول قال ( سوف يأتى زمان على امتى الممتسك فيه على دينه كالقابض على الجمر ؟) حلاص أهه جه

تسمحلى باه بالمساحة الأعلانية دى ؟
طب يا سيدى ألف شكر :)))))

-------------------

صاحب البوابة http://elbawaba.blogspot.com/ يدعوكم لحضور حفل أفتتاح دار النشر الخاص به ، حلم شاب تحقق بأمكانيات بسيطة - تجربة تستحق التشجيع - فى انتظاركم غدا الحميس 10 \ 1 \ 2008 الساعة السادسة مساءا فى مكتبة البلد 31 ش محمد محمود أمام الجامعة الأمريكية

š-σ-я-š-α-я-α-α يقول...

اقلك الحكيكة

انا كنت شاكة انها اوشاعة لانه فى نفس ذلك الوقت اللى قبل كدا كان فى اعلان عن الاوشاعة دى فمنتدى تقريبا
بس ماقلش الاسم هو كان بيقول فنان عربى هايفتح قناة ... وبس:)

بس نو بروبروم طلعت بجد طلعت اوشاعات اهو كله محصل بعضه

قال يعنى اللى بيهببه دلوقت فى الكليبات دا اللى كله ادب واحتشام

بلا بتاع بقى بلاش الواحد يبعبع مالفرسة اللى هوا فيها

وكل عام وانتم بخير

شـــــهــــروزة يقول...

شوف

هو يطلق قناة اباحية مأطلقش مش فارقة

معملهاش هو
حيعملها غيره بعد ما اصبحت السماوات مفتوحة

ومحدش أجبر حد انه يقعد بتفرج عليها ولا ربطه فى الكرسى وفتح القناة بالعافية

ثم يعنى الشباب شغال الله ينور على القنوات الأوربية
ومش منتظر اى توجية او نقد
كمان محدش بينتقد القنوات دى ولا القائمين عليها
لأنهم خواجات يعنى؟؟؟؟؟؟؟

عموما
شارع الستالايت مفتوح للكل زى شارع الهرم بالضبط
عندك دة ودة ودة
وكل واحد واختياراته المسئول عنها

ثم يعنى على بلاطة كدة هاتلى اى حد ممن يمتلك كمبيوتر شخصى فى بيته
ومفيش عنده فايل واحد اباحى ومخبيه فى السر وبيتفرج عليه وقت الروقان لما يكون لوحده
ويطلع على الناس راسم الوش الجبس الوقور؟؟؟؟؟؟؟

أتحدى اى حد معندوش كمدة على جهازه
دة غير السى دى كمان

باقولك محدش بيجبر حد على اى حاجة
كله بالقبول والرضا يا ابنى

احنا بس اللى بنحب بنكش وخلاص

Doba يقول...

اقولك انا ليه
شوف يا سيدى

من زمان وزمان قووى

زى مهو موجود الحلو موجود الوحش
وزى مفيه اخلاق فيه معدومى الاخلاق
وزى مفيه شر فيه خير كتير قوى

طبيعة البشر فى كل فترة بتأثر بشكل او بآخر فى اتجاه الأمور وللأسف احنا كل مادا الأجيال بتطلع مخوخة قوى من جوه وللأسف اللى بنورثه لأولادنا مش ازاى نتمسك بديننا ونلتزم فى عبادتنا ونؤديها كما ينبغى ونتبارى فى العادات الايجابية وكيفية عبادة ربنا

لا

للأسف الأطفال ومن خلال طرق التربية من سبيس توون وميلودى وزووم وما الى ذلك مش بيتعلموا اى حاجة غير الهيافة والعدوانية وفراغ التفكير والخواء الدينى والعاطفى سواء لله والخوف من عقابه او حتى تآلف قلوبهم مع عائلاتهم وللأسف أكتر بياخدو جشع وغل وحقد وأنانية أقصد ان الشر بيزيد قوى قوى

الكل عارف ان موضوع جاد شويرى اشاعة وان محدش هيسمحله بيه بس حتى لو عمله مع احترامى ليك فيها ايه

مهو اى واحد عنده نت عنده البلو بيرد وممكن يدخل على اى قناة اباحية بمنتهى السهولة ويتفرج براحته او حتى يشترى او يأجر فيلم من اى مكان او حتى السى ديهات اللى مالية البلد

الموضوع متاح وبكثرة ولكن ان توصل للشباب الخوف من ربنا وعقابه وكيفية احترام عباداته ده اللى فى منتهى الصعوبة وآخر للأسف فى الموضوع ان كل الأهالى بيجرو دلوقتى ورا الفلوس اللى بتجيب المم وناسيين انهم بيربو اجيال لبكرة واكلها وواكله السوووووس

سلام
هبة

DR.HAMAS يقول...

يعترف الفنان اللبناني جاد شويري أنه مطرب "مثير جنسيا"، وذلك في رده على الاتهامات القائلة بأنه أول مطرب عربي يقدم إثارة جنسية في العالم العربي، وقال ان أكون كذلك فهذا شيء رائع .. فكيف لا أفرح بأن أكون أول شاب مثير أو أول نموذج جنسي في الوطن العربي.


وأردف جاد شويري بأن منعه من الغناء في جامعة بيروت جاء ردا على الهجوم عليه بسبب إباحيته في الغناء وقال: كنت سعيدا جدا بالهجوم فهو"مسلي" جدا أما المديح فهو يصيبني بالملل.




يكفى هذا

و لا تعليق


د.حمــــــاس

shayma يقول...

شوفت مش انا قلتلك انها اشاعه
:)))))))
عشان بس تبقوا تصدقونى
هههههههههههههههه
سلام