الاثنين، ١ ربيع الآخر ١٤٢٩ هـ

(11)مذكرات طفل .. طخين

المحطه الحداشر .. ويندوز مضروبه
-----------------------

قبل ان انهي اللعب عالجهاز في السيبر اللي كنت فيه انا ومنى زكي .. فوجئت بدخول اتنين مخبرين وامين شرطه وتلات عساكر .. وراحو محاوطين المنطقه وقلبو السيبر كللو .. وعندما توجه اليهم صاحب السيبر مستفهما عن العباره وضحو له انهم مصنفات وطلبو منه أي فلوس ولكن يبدو انه لم يكن معه مايكفي فضربوه على قفاه ضربة اوجعتني وآلمت قلبي .. لم ادر بنفسي واتجهت للمخبر ورحت ضاربه شالوط في قصبة رجلة قام واقع زي الطربش .. ثم اتلم العساكر ونزلو في ضرب واقتادوني الى المديريه
-------
بعد ان قامت سونيا بتوبيخ سامبا والحارس على فعلتهم وخصمتلهم كل واحد يومين من المرتب .. اتجهت الى الغرفه العلويه وامسكت كارت الشحن ابو عشره جنيه .. وخدشته وقامت بادخال الرقم في الموبيل لكي تجري مكالمة وتتصل بالبيج بوص .. ولكن الكارت لم يتم ادخاله او حسابه في الموبيل .. فحاولت مرة اخرى ونفس النتيجه .. فقامت بالاتصال برقم تُلتميه المجاني
صوت : عفوا .. لا يمكن اتمام مكالمتك الآن .. حاول الاتصال في وقت لاحق
--------
عسكري : انتباه يا مجرم منك ليه .. سيادة البيه امين اول شرطه وصل
كانت هذه هي الكلمة التي قالها لنا العسكري في التخشيبه .. والتي كان فيها مجموعة كبيره من اصحاب الانترنت كافيه والذين كلهم شغالين بنسخ ويندوز مضروبه .. وكنت انا معهم بدوري بعد ان ضربت المخبر وعملت فيها شملول .. واستغربت من عدم وجود منى زكي ولا مصطفى شعبان ولا أي حد من الجهاز .. وقبل ان افيق من دهشتي دخل علينا سيادة الامين .. وكان هو نفسه .. خالد صالح
--------
كادت سونيا ان تشد في شعرها من الغيظ وهي تحاول مرارا وتكرارا الاتصال برقم الخدمه المجاني الخاص بشركة ام نبيل بعد ان فشلت في شحن كارت العشره جنيه .. وعندما دخل عليها سامبا ووجد الحيره تبدو على وجهها سألها بدوره
سامبا : في ايه يا سونيا .. شايله طاجن ستك ليه ؟؟
سونيا : انت شكلك ما كنتش مسامح في العشره جنيه اللي اديتهملي اجيب بيهم الكارت
سامبا : - مندهشا - ليه بس ايه اللي حصل ؟؟
سونيا : مش قابل يتشحن وكل ما اتصل بيهم في رقم الخدمه بتاعهم تطلعلي الوليه بتقول لايمكن اجراء مكالمتك دلوقتي .. حاول بعدين لو عرفت
ساميا : عادي يابنتي .. تهيسة شبكه .. بتحصل معايا في حودافون عادي خالص
سونيا : طب والحل .. انا لازم اتصل بالبيج بوص اقوللو علي اللي حصل
سامبا : - وهو يعطيها الموبيل - اتصلي من عندي وما تدوشيناش
امسكت سونيا موبيل سامبا وطلبت رقم البيج بوص .. ولكنه لم يرد عليها .. فاتصلت مرة اخرى ولم يرد ايضا .. فاتصلت مرة اخرى فرد عليها وهو مغير صوته
صوت : - مغيرا صوته - الو ؟؟
سونيا : - يبدو عليها الدهشه من الصوت المختلف - ايوه
صوت : مين معايا؟؟
سونيا : انا سونيا .. مش ده موبيل البيج بوص برضك ؟؟
صوت : لا النمره غلط
واغلق الخط .. استغربت سونيا من الموقف .. ولكنها أرجعت ذلك لانه ممكن تكون الشبكه مهيسه فلم تندهش للدرجة الكبيره .. وفي هذه الاثناء رن موبيلها بنغمة .. انا باكره اسرائيل .. وهي نغمة البيج بوص .. فامسكت الموبيل وفتحت المكالمه
سونيا : انا لسه مكلماك رد علي واحد غريب
صوت : انتي يابنتي عبيطه ولا شكلك كده ؟؟
سونيا : ليه بس يا بوص؟؟
صوت : يعني عايزاني ارد عليكي من نمرة ماعرفش هي بتاعة مين .. مش يمكن موبيله يكون متراقب .. المهم .. عملتو ايه ؟؟
سونيا : تمام يا بوص .. اتصلت بسوووو وقلتله اننا خاطفين ابوه وامه ولازم نتفاهم
صوت : اتصلتي بيه منين ؟؟
سونيا : من نفس النمره اللي اتصلت عليك منها
صوت : بت انتي .. انتي مالكيش في شغل العصابات .. بقى بتتصلي بيه من نمرة ممكن تكون متراقبه .. وحتى لو مش متراقبه .. نمره معاكي على طول .. كنتي اشتريتي خط من أي محل واتصلتي بيه وترمي الخط بعدها
سونيا : ماهو يابوص الحاله الماديه مأشفره خالص معانا .. واحنا نازلين صرف في العمليه دي من أولها يجي بتاع ميه وعشيين جنيه .. كتير يعني
صوت : كل فلوس الدنيا تغور قصاد الحلم النبيل بتاعنا
سونيا : يا بوص ده كلام حلو قوي بس احنا بنكح تراب بصراحه
صوت : تصدقي كده عوق .. قال يعني انا اللي بكح اسمنت من ابو الطن بستمية جنيه

سونيا : وياريت لاقينه .. طب ده بنت عمة ابن خالة سلفتي .. عايزه تبلط حته في الحمام بتاعها .. المبلط قالها هاتو انتو الاسمنت وانا اجي اشتغل .. عشان مش هعرف اجيبه .. ولما دورو عند اي موّان ومالقوش .. فكرو يجيبو مخدرات لقوها اسهل
صوت : - مقاطعا بنرفزه - انتي هتحكيلي فيلم الخطايا بتاع عبحليم وشادية لطفي .. آخر شغلانه هشتغلها معاكي .. عماله تتلككي وكل شوية فلوس فلوس .. دي أزمة عالميه ياناس مش عندنا وبس .. هو احنا بنسرق لا سمح الله .. هو مال حرام يعني .. يا ناس اتقو الله
-------
يتبع

سوووو

هناك ٧٤ تعليقًا:

ojg يقول...

اتقي الله انت فيا وبطل تفطسني من الضحك
ههههههههههههههههههههههههههه

ايه ده
ايه ده
انت داخل بتقلك بقى
اسمنت وشبكه وهودانيل وحودافون وسوفت وير مضروب وكمان خالد صالح؟؟

بس هو سؤال صحيح،، هي فوضى؟؟

SKOBL- Little Lazy Me يقول...

أحجز تاني كومنننت و آجي

SKOBL- Little Lazy Me يقول...

بص يا سوووو ..أولا بصراحة أنا مبسوووط جدا لأني لحقت تاني تعليق عندك .. ياااه ده كان زي حلم .. ثانيا أنا مش معقول كل ما اجي هنا فشتي تعوم .. أنا كده على آخر عدد حأنزلها أولومبياد بكين .. بصراحة جامدة أوي وكل مرة فكرة جديدة و قشطة أوي .. بس ايه الشجاعة دي يا سووو ، وخالد صالح كمان دخل الموضوع .. بس بجد عاجبني أوي وضع سونيا المادي الجديد .. بيني و بينك ياما عقدتني ..كل يوم جزيرة و ناس بيحرسوها ، اهه جه اليوم يا سونيا اللي أشوفك فيه بتشحتي الكارت أبو عشرة..
بجد يا سووو تسلم ايدك و منتظر العدد الجديد .. على أحر من الجمر
و لك كل التحيات

DayDreaming يقول...

ههههههههههههه يعني مش كفايه منى زكي واحمد السقا كمان خالد صالح
بس الاخراج ميه ميه:)

في انتظار الحلقه القادمه

Empress appy يقول...
أزال المؤلف هذا التعليق.
Doba يقول...

كثيرا ما اقرأ موضوعك وارحل لعدم مقدرتى على التعليق على نقطة معينة ولكنى اليوم شعرت بأنك تثير اكتر من مشكلة بالمجتمع بشكل ساخر وواضح خلال حياتنا اليومية

دمت ساخر وعلى فكرة عجبتنى بتاعت السكوت اللى فى البوست اللى فات

تحياتى يا سوووو

هبة

كاميليا بهاء الدين يقول...

سونيا : وياريت لاقينه .. طب ده بنت عمة ابن خالة سلفتي .. عايزه تبلط حته في الحمام بتاعها .. المبلط قالها هاتو انتو الاسمنت وانا اجي اشتغل .. عشان مش هعرف اجيبه .. ولما دورو عند اي موّان ومالقوش .. فكرو يجيبو مخدرات لقوها اسهل
..........

كنت باضحك طول الحلقة
بس جيت عند الجملة دى
وإتجمدت .. حسيت ان فعلاً المخدات بقى الحصول عليها أسهل كتير من أبسط السلع دلوقت.

تحياتى واحترامى

Soooo يقول...

ojg

الحمدلله انك ضحكتي ويارب تكون ضحكه من القلب
وبعدين انا ولا داخل بتقلي ولا حاجه .. انا بس عشان طخين فتلاقي وزني تقيل


ومبروك عالمدونه .. وربنا يجعلها اخر الاحزان



سلامووووووووووووز

Soooo يقول...

SKOBL- Little Lazy Me

تصدق بالله يا سكوبل - ماعرفش معناها ايه ولا ليه - انا بافرح لما بلاقي تعليقك عندي والله

وياسيدي اضحك ولا يهمك
الضحك ده علاج سحري .. مايعرفش قيمته غير اللي مش بيضحك


ملحوظه
سونيا جار عليها الزمن خلاص ياعمنا .. دوام الحال من المحال .. وعقبال اللي في بالي



سلاموووووووووووووز

Soooo يقول...

DayDreaming

الحمدلله على الضحكه ويارب تكون ضحكه طالعه من القلب
ولا مش كفايه منى زكي واحمد السقا وخالد صالح .. طفل وبيهيس .. حد ليه عنده حاجه؟؟؟؟


يارب تتابعي المذكرات ويارب تستمتعي بيها



سلاموووووووووووز

Soooo يقول...

appy

هو لو الامين ده شاف شغله وقفل السيبر من غير مايهين اللي فاتح السيبر ويضربه على قفاه .. فيها حاجه؟؟؟
ولو على مرتباتهم ضعيفه ولازم يسرقو .. ايه اللي خلاه قدم في معهد امناء الشرطه .. ماكان اتعلم صنعه واشتغل صنايعي .. ده صنايعي الرخام يوميته تسعين جنيه

وحودافون وام نبيل وسلطات .. كلهم مهيسين في بلد مهيسه وشعب مهيس

ولو اتحبست ابقي هاتيلي حلاوة وابعتي حد يقف في طابور العيش من دلوقتي .. لانك لو رحتي تجيبيلي عيش وانا محبوس .. يبقى هاطلع قبل ما العيش يجيلي



سلاموووووووووووز

Soooo يقول...

Doba

ياااه يا ام يوسف
اخيرا ظهرتي ونورتي مدونتي
والف شكر على تعليقك الجميل ده .. ويارب اقدر اقول اللي جوايا باسلوب يعجب الناس ويعجب متابعين وقراء المدونه

ملحوظه
ساعات السكوت بيكون اهم من الكلام .. خصوصا لو كان الكلام هيخليني اخسر ناس انا حبيتهم واحترمتهم .. وكلت معاهم كبده وسجق




سلامووووووووووووووز

Soooo يقول...

كاميليا

انتي فاكراني باهزر
اقسملك بالله العظيم اني وانا مروح كل يوم في المدبح مكان شغلي باشوف شباب مالين الشوارع بيبعو مخدرات بجد مش هزار

ولما اتصلت بموّان عشان اجيب شكارتين اسمنت قاللي والله ماعندي بس لو عرفت اجبلك قبل آخر الاسبوع هابعتلك

يعني لو هابني بمخدرات .. هيبقى اسهل


منوراني .. وياريت تفضلي منوراني على طول




سلاموووووووووووووز

اهو ده عيبه يقول...

بجد بجد انا الكلى اتحركت عندى من كتر الضحك

مصنفات وحجز والموضوع داخل فيه خالد صالح كمان تبقى ولعت

وكله كوم والعصابة الفقرية دى اللى مقضياها مسدات

وليك على يا سيدى احولك خمسة جنيه رصيد بحالهم على الحلقه دى

فاتيما يقول...

سووو يا غالى
الأسمنت دا أمره سهل يا بنى
الدور و الباقى على العيش ...
انا نزلت اشتريته أنا و ماما بعد عناء و بقيت مكلبشة فى الكيس و لا كأنى طالعة من البنك بميت الف جنيه و لا حاجة
و بعدين لما سيادتك تتعكش موش هنجيب عيش و حلاوة
هنجيب معلقة و حلاوة ...
أبقى كل الحلاوة بالمعلقة و خلاص
و خالد صالح
أن أن أه
دا كدا الحكاية أحلوت قوى ..
انا بحب الراجل دا قوى
و النبى يا سسو ما تصدمنى فيه يا رب يخليك يا رب
و كعادتك ساخر و جدع
و فى الواقع .. اجدع ميت مرة

صوت من مصر يقول...

سووووووووو
يارايق جدا جدا
بجد متسالش فينا كل ده ياعم طب عبرنا ولو بكلمه
المهم برضه جامد ؟

المنسى يقول...

السلام عليكم
إزيك ياسوووووووووووووووووووو
ياريت ماطولش علينا كده ياعم
حلقة جامدة كالعادة
بس خلى بالك من المصاريف 120جنيه كتير برضه
إعمل حساب إن الفيلم ممكن يسقط مش عشان وحش
لا
عشان البلد إتسقرت
ومفيهاش بيبى
مفيهاش بيبى
مفيهاش بيبى
ههههههههههههههه
تحياتى

Rain man يقول...

حزين يا احمد
لانك لم تعد تزورني
حزين حزن شديد قلة حدته نوعا لدى قرائتي للحلقة الجديدة من مذكرات طفلك التخين
هل تسخر منا يا رجل ؟
لا تكف عن ذلك

صديق مخلص

مهندس مصري بيحب مصر يقول...

هههههههههههههههههههههههه
مش عارف أقول ايه
مش حأقول غير رائع و معبر عن حاجات كتير
:)

فرنسا هانم يقول...

يابنى لو عايز اسمنت قولى
حفنه حفنتين انشاله نص شيكاره
احنا توصيل منازل
وبسعر التكلفه غير مصاريف الشحن
تحياتى للحديد والاسمنت

nigro يقول...

إيه يا زعيم؟
مالك خابط المشاكل وش كده؟
أم نبيل و و مباحث المصنفات و الأسمنت
لا لا لا
خد بالك
اللي مالوش خير في أم نبيل ملوش خير في مصر

Asmaa mahaba يقول...

حودافون هههههههههه
هايل يا سوو تسلم
تحياتى ليك سومه_87

Soooo يقول...

اهو ده عيبه

سلامة كليتك من اي حاجه يارب
ويارب تضحكي طول عمرك وتبقي مبسوطه

وبعدين انتي لسه شفتي حاجه
ده في حاجات ياما .. بس انتي تابعي المذكرات

اه صحيح .. نمرتي هتلاقيها في البروفيل .. خليهم خمسه وعشيين جنيه .. انا مش عشاني انا عشان هحولها لافراد العصابه الكحيتي



سلامووووووووووووز

Soooo يقول...

فاتيما

ليه بس تحرقي الاحداث وتستبقي الوقائع
حلوة تستبقي دي
استني بس وتابعي المذكرات
ده انا متكلم كلام عن العيش .. بس لاني كاتب المذكرات دي من فتره فتلاقي في بعض الحوارات متأخره شويه

تابعونا تجدو مايسركم باذن الله

ملحوظه
انا وشي احمر واصفر واخضر من كتر الكسوف على اخر كلمتين قلتيهم
والف شكر ليكي وربنا يهنيكي دنيا وآخره ويسعدك ياااااارب




سلامووووووووووووووز

Soooo يقول...

صوت من مصر

تصدق وتؤمن بالله
انا لو قعدت عالنت ربع ساعه على بعضها بيبقى فرح بالنسبه لي .. ده انا بارد على التعليقات اللي بتيجيلي بالعافيه
ربنا يعدي الفتره دي على خير

واسف على التقصير ياباشا ومعلش استحملني الشوية الجايين دول

نورتني بزيارتك وبتعليقك




سلامووووووووووووز

Soooo يقول...

المنسى

ازيك ياباشا وايه الحياه
وفعلا والله مبلغ ميه وعشيين جنيه كبير على ميزانية المذكرات
بس ربنا يستر والفضائيات تشتريها وتعوض خسارة المنتج

نورتني ياريس والله




سلاموووووووووووز

Soooo يقول...

Rain man

ميدو باشا
والله واحشني ونفسي اخش استمتع بمواضيعك وبكلامك وبدماغك
لكن والله العظيم طالع تربنتيني بمعنى الكلمه
بس اوعدك بمجرد ما افوق شويه هتلاقيني لابدلك في المدونه
اتجدعن انت بس وهاتلنا بطرمان فيسكافيه الحجم العائلي



سلاموووووووووووز

Soooo يقول...

مهندس مصري

ياهندسه انت تدخل وماتقولش حاجه
كفاية علينا طلتك الحلوة دي
ويارب تكون الحلقه عجبتك ويارب تتابع باقي المذكرات



سلامووووووووووز

Soooo يقول...

فرنسا هانم

لا ياشيييييييخه
حيث كده بقى
يبقى الواحد يخش على طمع
انا عايز تلاته كيلو اسمنت

عشان في عماره برج داخل عليها وانتي عارفه الواحد لازم يبقى عامل حسابه بزيادة


ملحوظه
تصدقي بالله .. انا باعزك قوي وبمجرد ما اشوف اسمك وشي يبتسم



سلاموووووووووووز

Soooo يقول...

nigro

يانيجرو ياخويا انا احترت والله
يعني لما باقول الحوارات من بين الحوارات .. في ناس بتفتكر اني باهيس وبس
ولما باقولها مكشوفه وعالبحري
يقولولي هتروح ورا الشمس
الغريب في الموضوع ان ماحدش فكر ولا سئل نفسه .. هو لسه في مكان ورا الشمس؟؟؟
ولا هم عملو شمس تانيه وبيأجرو وراها قانون جديد؟؟؟

نورتني ياعمنا .. وخلي بالك من الحلقه الجايه
وشوف مين اللي مالوش خير في مصر





سلاموووووووووووووز

Soooo يقول...

somaa mahaba

دي ضحكتك وتعليقك هم الهايلين
ويارب تتابعي باقي المذكرات ويارب تعجبك




سلاموووووووووووووووز

غير معرف يقول...

طب أقول إيه
ما هي المشكلة إن مش عارف اتكلم من كتر الضحك، و بعدين سي خالد اللي دخل في العملبة جديد ده كمان ..

و الله ما ناقص غر إننا نلاقي محمود الملجي و لا توفيق الدقن هو اللي يبقي البيج بوص ف الآخر

Desert cat يقول...

مصنفات وويندوز مضروب
يعنى انت لازم تقلب عليا المواجع يا سووو
مواجع المصنفات يعنى مش الويندوز احسن يكون فى حد مخبر ولا حاجه
وكمان خالد يوسف امين اول شرطة
طيب يوم ما امن الدولة اخدت زمايلى من سيبراتهم مكانش هناك الامين اول خالد يوسف ليه كان هناك امين معفن شوفته قدام المحكمة وهما رايحين يتعرضوا على النيابة
ولا هو خالد يوسف مش بيظهر غير مع سونيا بس
طيب انا اندد واشجب واستنكر انا عايزة سونيا فى بلدنا وبلاها ويندوز وبلاها شغل خلونا فى المصنفات

بنوته مصرية يقول...

ههههههههههههههه


انت بتعمل دعاية بقي لحودافون ههههههههههه


ام نبيل علطول نايمة

سونيا دي فقرية اووي المذكرات انت عارف رئي فيها بجد دمها خفيف جدااا

مستنية باقي الحلقات
تحياتي
رودي

غير معرف يقول...

أخى العزيز /أحمد سوووو
"لم ادر بنفسي واتجهت للمخبر ورحت ضاربه شالوط في قصبة رجلة قام واقع زي الطربش .. ثم اتلم العساكر ونزلو في ضرب واقتادوني الى المديريه"
كده يا أحمد تسلم نفسك للظلمة ؟!
لو حدث لك هذا مرة أخرى فلا تنسى الدعاء" اللهم أجعل كيدهم فى نحورهم"
تسلسل أحداث جميل سلام يا صحبى
أبو خالد

رئيس جمهوريه نفسى يقول...

على فكره يا سو توت شديده يا ابو دماغ عاليه دى ملحوسه على جنب عجبتنى قوى والله العظيم
لخبطت الدنيا فى بعض حودفون و عودنبيل والاسمنت الى مش موجود وبقى امر من المخدرات
لو احتجت محامى فى القسم انا فى الخدمه

مواطن مصرى نايم يقول...

ههههههههههههههه
تحياتى ليك
بوست روعة
انت بتموتنى من الضحك
سلامى ليك
اه صحيح
يعنى حاول تغلط مرة و تزور البلوج الخيبان بتاعى
يمكن ربما و جايز و قد يعجبك مثلا
eslam

مشمش يقول...

صحيح اتقي الله انت فينا صوت ضحكي جايب اخر الشارع
جميلة جداااا

Soooo يقول...

الدائخ

ليه كده بس تحرق المفاجأه وتقول ان رئيس العصابه توفيق الدقن
ليه
----
باهزر طبعا .. توفيق الدقن مات من زمان
رئيس العصابه هو استيفان روستي طبعا


الف شكر على تعليقك وعلى ضحكك ويارب يكون ضحك طالع من القلب

وبعدين ياعمنا دي مذكرات طفل .. يعني اي حاجه ممكنه




سلاموووووووووووووووز

Soooo يقول...

Desert cat

تصدقي بالله ياقطه .. اني وانا بانزل الحلقه دي اتخيلت تعليقك
اه والله .. لانك اكتر واحده اعرفها متضرره من حوار المصنفات

ملحوظه
انا جبت سيرة خالد يوسف فين دلوقتي .. بقول خالد صالح .. وبعدين هي الحكايه خلصت لسه .. مش يمكن لسه عايز اقول كتير في الحوار ده




سلامووووووووووووز

Soooo يقول...

بنوته مصرية

اهلا اهلا بحماتي المستقبليه
والله مدونتي ازدادت نور بتعليقك ده يا رودي
والحمدلله ان الحلقه عجبتك وانك ضحكتي ويارب تفضلي تضحكي على طول يارب

وماتبقيش تختفي كده كتير يابنتي


سلامي لعروستي نونو




سلامووووووووووووز

Soooo يقول...

أبو خالد

عزيزي وصديقي اللي بينورني دايما بتعليقه الهادي وبحكمته الجميله
سعيد والله بمتابعتك للمذكرات وسعيد اكتر باهتمامك اني لو حصلتلي حاجه وحشه اتجه بالدعاء لربنا وهو القادر على كل شيء

لكن زي مابيقول ربنا في كتابه الحكيم .. عسى ان تكرهوا شيئا وهو خير لكم
تابع المذكرات .. وهتشوف ايه الخير اللي حصللي



ملحوظه
انت مش ناوي تعمل مدونه بقى ياعمنا؟؟؟



سلامووووووووووووووز

Soooo يقول...

رئيس جمهوريه نفسى

الله يكرمك يا ابو حنفي يارب
والحمدلله ان تووت عجبتك .. بس دي تيجي ايه ياعمنا جنب حاجاتك

وفعلا هحتاج محامي قريب .. مش عشان الحوارات اللي باكتبها واللي ممكن توديني ورا الشمس .. ورا الشمس مافيش محامي ودفاع والحوارات دي .. ورا الشمس في عطوة بتاع فيلم الكرنك

لكن هحتاجك في اشتشاره قانونيه .. ومش هلاقي احسن منك يابلدياتي يا صعيدي يا مجدع




سلامووووووووووووووز

Soooo يقول...

مواطن مصرى نايم

يارب تفضل منورني بضحكتك وبتعليقك دايما يارب
ومعلش اعذرني مقصر في حقك وفي حق مدونتك ومش بابتابعها .. لكن والله ظروفي مقندله .. واوعدك اني بمجرد ما الاقي وقت اهرش .. هنفض للهرش واجي اهري مدونتك تعليقات يا عمنا
ده انا يكون لي الشرف اني اعلق في مدونتك ياباشا




سلامووووووووووووز

Soooo يقول...

مشمش

يا مشمش اضحك زي مانت عايز ياصاحبي
وخلي الشارع كللو يسمع ضحكتك
مش يمكن يضحك هو كمان
وساعتها نقدر نعمل ثورة .. قوتها الضحك وحب الحياه




سلاموووووووووووز

shahy يقول...

طيب اقول اية بتدخل مواضيع بنعاني منها في وسط كلامك الكوميدي الجميل


انت مصيبة دمها خفيف

وبعدين هي سونيا دي بتدلع كدة لية
دي الشبكة بتاعة ام نبيل زي الفل
هي بس تلاقيها مش عارفة تدخل الارقام كويس ااااااااااااااة

سلام ياولدي

همس الاحباب يقول...

تصدق انا كده زعلان
لانى من زمان عايز اجى امسى كل مرة اجى وامشى من غير تعليق .
بس انت عارف المواصلات وزحمتها والحمار بتاعى بيركن صف تانى وبياخد مخالفة
علشان كده سيبته وجيت مشى
بس الله ينور ياعم سوو
انا الف لفة فى المدونة وارجع تانى ممكن
تحياتى خالد

رئيس جمهوريه نفسى يقول...

سووووووووو الغالى
بصى يا غالى ايميلى بتاع الجى ميل فى البروفيل انا دورت على ايميلك مش لقيت ابعتلى ايميلك وحبعت ليك موبيلى لانى مينفعش اكتبه هنا دى اسرار عسكريه نيــــــــــــــــــــــــع
او ابعتلى عليه رقم موبيلك وانا اكلمك
سلاموز يا صحبى

walaa يقول...

احلى حاجه ضحكتنى شبكة ام نبيل
هههههههههه
هى ام نبيل عملت شبكه ؟؟
واللى بنت خال ابن جوز امها اللى مبلطتش الحمام
غعلا حال البلد لا يرثى اليه
ويقلك استحمل من اجل البلد مش كفايه راضين اللى احنا نعيشكوا فيها
هل هذا ما تقصد ولا انا فهمت غلط
تحياتى ولاء

Ehab يقول...

لا انت اصلك واد مصيبه
بقى سونيا انضحك عليها في كارت من المضروبين
يعني قصدك ام نبيل بتنصب حتى على اليهود ايش حال معانا احنا بقى

وبعدين ابو سوووو حريف زي جيمش بوند يا فقري في الواحد وتلاتين بقى
بس صحيح هو فين السيبر بتاعهم ده اروح اخطف لي جيمين نيد فور سبيد

مش انا قلتلك القصه دي فيها كل المقومات
التشويق والأثاره والمتعه والسسبنس اللي هو التشويق برده
وكمان سونيا اجدع مزه بس المره دي طالعه فقيره
انت بجد فنان فزيع يا سوووو
ربنا يوفقك عقبال يارب ما اشتري القصه واقرأها في كتاب بأسمك

سلااااااااااااااااام يا اجدع صاحب

simple girl.. ..simple dream يقول...

انا بجد كل مرة بقعد اضحك وبكون مش عارفة اقولك ايه
فقلت بئا خلاص انا هدوش نفسى ليه؟
انا مش هاقول حاجة
انا جاية بس ادحرج التماسى

dina seliman يقول...

جميله اوى
انا متبعاها من زمان
بجد زى العسل

ومستنين الباقى

واحد من البلد دى يقول...

والله أنا ما كنت ناوى أعلق غير لما تزورنى..بس البوست خلانى أعلق غصب عنى..إيه يا ابنى الجمال ده...أنا حاتابع الحلقات بس مش عايز كسل ...أوك؟؟؟؟مستنى زيارتك يا جميييييييل

wanna b a physician يقول...

على كدا نلحق نستخبى من المصنفات كلنا
تحياتى

MoHaMeD HoSSaM يقول...

اي الحلاوة دي يا عم سو

سعيد جدا بمعرفتك يا معلم

وعايزين نبقي نشوفك

عايش... ولكن !!!! يقول...

ههههههه
ياااااااااه
منى زكى
واحمد السقا
وخالد صالح
يبقى انا الكوممنت بتاعى هيظهر ع القناه الاولى المصريه انهارده
ههههههه
تحياتى بلوج جميل
علاء

Unknown يقول...

سووووو

ايه اخبارك يارب تكون كويس

معلش بقالى فترة طويلة مش بزورك لانى والله كنت بمر بفترة شوية صعبة

انا قلت اجىء امسى عليك لغايت ما اقرا كل البوستس اللى فاتتنى واديك عليها كومنت

تحياتى

Unknown يقول...

لا باه المرة الى فاتت احمد السا و المرة دى منى زكى و خالد صالح فين النمر يا عم ؟

معلش انا و الله الفترة الى فاتت كنت مضغوطة فى الغشل و مضغوطة نفسيا

Soooo يقول...

shahy

ماما شاهي
طب والله المدونة نورت بزيارتك دي
وهي فعلا سونيا بتستعبط .. قال ام نبيل وحشه قال
دي اول شبكة محموم في مصر
دي ناس فاضيه ياشيخه ومش بيعجبها العجب ولا الصيام في فبراير
الو
الو
الوووو

(عفوا .. لقد نفذ رصيدك اللي لسه شاحنه حالا)



سلاموووووووووووووز

Soooo يقول...

همس الاحباب

في حكمة صينيه بتقول
كل تأخيره وفيها خيره ان شاء الله

وياسيدي نورتني وشرفتني بزيارتك وبتعليقك
ولو على الحمار ماتقلقش .. ممكن تحطه في البارك بتاعي بتاع الحمير والحصنه والتكاتك بتوعي

نورتني ويارت تفضل منورني على طول وياريت تعتبر مدونتي هي مدونتك تمام وتعلق عندي وقت ماتحب





سلامووووووووووووز

Soooo يقول...

رئيس جمهوريه نفسى

والله ياريس الحوار اللي قلتلك عليه شكلو مطول شويه
اصل بعيد عنك دي حوارات اشهار شركة انتاج اعلامي وفي مصنفات ومباحث أداب وليله زرقا
فالحوارات دي عايزه روقان وطولة بال
وانا حاليا مسحول في الشغلانه اللي باعملها واللي يارب تخلص على خير عشان ما اندبحش فيها
اصل باعمل شغل ديكور لراجل جزار بعيد عنك

بس اديني عرفت سكتك وبمجرد ما افضى هيتم التواصل لمعرفة ايه الترتيبات وكيفية المساعده في الحوار ده

والف شكر على وقفتك جنبي يا بلدياتي





سلاموووووووووووز

Soooo يقول...

walaa

اغرب حاجه في توقيت تعليقك .. اني كنت ساعتها عندك في المدونه بتاعتك وعمال اتفسح .. يقوم البتاع بتاع الهوت ميل اللي بيطلع من عالجنب اليمين راح باظظ وقاللي في ايميل جديد .. اروح ابص عالايمل الاقيه تعليقك عندي
انتي بتراقبيني ؟؟؟؟


وبعدين انا ولا قصدت حاجه ولا بتاع
البلد فيها كل حاجه
فيها اسمنت ورز وعيش والشوارع فاضيه ولا اي حاجه خالص
ده الطفل اللي جوايا اللي لسانه طويل حبتين .. ومايعجبوش حاجه خالص

نورتيني ونورني تعليقك




سلاموووووووووووووز

Soooo يقول...

الشنكوتي الكبير

والله انا باعزك ياد يا ابو الشناكيت
بجد والله مش مجامله
وبعدين سونيا جار عليها الزمن خلاص ياعم
سيبك من طقم الجزر واسطول الطيران والسفن اللي كانو معاها
كللو راح في الوبا .. تقريبا وظفت فلوسها في شركات توظيف الاموال


ملحوظه
مذكراتي لا يمكن تتنشر في كتاب ياعمنا
دي اسرار حربيه ولو انا قلت هنشرها هيتم تصفيتي جسديا زي سعاد حسني الله يرحمها





سلاموووووووووووز

Soooo يقول...

simple girl.. ..simple dream

يا قهلا ياقهلا ياقهلا
ازيك يا عروسة المدونين .. وازي عريسك

وياستي انتي تآنسي وتنوري في اي وقت
دي مدونتك اصلا
ولو جيتي للحق .. انا مقصر في حقك وفي حق العريس ومش متابع مدوناتكم قوي
بس انتي عارفاني بتاع تهلييس
وانتو عالم مناضلين وبتوع مظاهرات وامن مركزي
وانا خايف على روحي


نورتيني والف شكر على زيارتك وعلى تعليقك وسلامي للجيزاوي المناضل لنصرة قضيه كفر البطيخ .. قوليله يجبلي بطيخه معاه




سلامووووووووووووز

Soooo يقول...

dina

يا اهلا وسهلا ياستي في اول زياره ليكي
مش دي اول زياره ولا ده اول تعليق؟؟

على اي حال .. الحمدلله انك متابعه المدونه ومتابعه المذكرات ويارب تعجبك وتفضلي تعلقي دايما وتنوريني بزيارتك وقت ماتحبي



سلامووووووووووووز

Soooo يقول...

واحد من البلد دى

ياسيدي الفاضل .. وهو انا اعرف مدونتك منين غير لما انت تنورني بزيارتك وتنورني بتعليقك الاول

وعلى فكره .. انت مدونتك دمها زي العسل والله مش بجاملك دي حقيقه .. وانا عن نفسي باحب شعر العاميه وشعراء العاميه اكتر من شعر الفصحى .. خصوصا لما يكون زي شعرك بيمس الوطن

بس عشان تنشرها وتشتهر بين المدونات لازم تعمل حملة مكوكيه كده وتعرف الناس بيك وتخليهم يتفاعلو معاك

سعيد بزيارتك وبتعليقك واتمنى انك تعتبر مدونتي زي مدونتك وتعلق عندي وقت ماتحب



سلامووووووووووووز

Soooo يقول...

wanna b a physician

هو البيه معانا في الميكروباظ؟؟؟
شكل الميكروباظ هيتملي لاخره وشكلنا هنروح ورا الشمس الجديده اللي عملوهالنا مؤخرا



سلاموووووووووووز

Soooo يقول...

MoHaMeD HoSSaM

حليب قلبي
نورتني والله يابو حوس
وانا اللي سعدت بمعرفتك وبالكلام معاك وسعدت اكتر بتعليقك وبزيارتك وياريت تعتبر مدونتي زي مدونتك تمام وتشرفني هنا دايما



سلامووووووووووووز

Soooo يقول...

عايش ولكن

اي نعم
تعليقك هيطلع عالقناة الاولى بعد اوتار الليل وقبل التلفزيون مايقول تششششششش
عشان وكالة الاهرام للدعايه اللي مشتريه حق الاعلانات في المذكرات منزله تعريفة دقيقة الاعلان بسعر غالي قوي .. بتاع اربعتاشر جنيه وتلاتين قرش
طعنه طعنه يعني


نورتني وسعيد بزيارتك وبتعليقك ويارت تفضل منورني دايما يابرنس




سلاموووووووووووووز

Soooo يقول...

نوراى

ياااااااااااااه
طب والله العظيم واحشاني بجد
خير يابنتي مالك وفترة ايه اللي صعبه دي
قولي لو في اي حاجه نقف جنبك يابنتي

انا سمعت انك جيتي مصر
الكلام ده حقيقه ولا اوشاعه؟؟
لو حقيقه ياريت تبلغيني عشان انا مستني الهدية بتاعتي
انتي مش قلتيلي هتجيبلي تلفزين تمانية وتسعين بوصه ال سي دي وبتاع عشرين موبيل وعربية ربع نقل مليانه تي شيرتات؟؟

فين الهدايا دي يابنتي



ماتختفيش كده تاني احسن ازعل





سلاموووووووووووووووز

Soooo يقول...

عاليا حليم

انتي لسه شفتي حاجه
ده في دراكولا وهاري بوتر وعادل امام
دي زيطه يابنتي

طفل بقى ومن حقي اهيس زي مانا عايز


وياستي انتي تعلقي وقت ماتحبي
وسلامتك من الشد النفسي والعصبي
ولو في حاجه ولا حد مضايقك قوليلي وشوفي هعمل ايه




سلاموووووووووووز

Rosa يقول...

سو .. مرسي لسؤالك
أنا بخير
لا تقلق
:)

د/اجدع بنوته يقول...

حرااااااااام عليك

انا كنت مفتقده مدونتك جداااا وانا بمتحن

ياربى ع ده ضحك مجرد بس مااقرى عنوان حكاياتك

ههههههههههههههههههههههه

هههههههههههههههههههههههههه

Dr. Ibrahim يقول...

لا مش حرام يا خويا حد قال حاجة
إحنا اللى حرامية