الثلاثاء، 15 جمادى الأولى، 1429 هـ

(17)مذكرات طفل .. طخين

!! المحطة السبعتاشر .. تنانين فـ الزنانيري
-----------------------------

بعد ما ابويا وامي وسونيا وسامبا والحارس - اللي ابويا اكتشف ان اسمه عيد - ما خلصو الاكل .. حبسو بكوباية شاي كشري سكر بره .. وابويا وامي راحو مريحين ونايمين عشان يهضمو .. وعيد خد بعضه وراح لاخته عشان لسه مخلفه بنت زي العسل اسمها عنبه .. وهو راح ينقطها .. خصوصا ان جوزها مسافر ليبيا بقالو اربع سنين ومانزلش مصر .. وماحدش يسأل ولا يقول هي خلفت ازاي وجوزها مسافر عشان دي إرادة ربنا .. وربنا قادر على كل شيء

اما سامبا وسونيا طلعو الاوضه اللي فوق عشان ياخدولهم حجرين معسل .. وبالمره يتشاورو في شوية حوارات بخصوص السبوبه اللي هم فيها .. لكن وهم طالعين وقفت سونيا قدام باب الاوضة التانيه المقفول من أول الليله .. وبمجرد ما بصت عالباب راح سامبا باصص لها وقالها
سامبا : معلش يا سونيا .. كلها يومين تلاته ونخلص من الموضوع ده وترتاحي
سونيا : مش عارفه ازاي هقدر اكمل المهمة دي بعد ما قعدت مع ام سوووو واتكلمت معاها
سامبا : قصدك ايه؟
سونيا : انا ام يا سامبا .. وعارفه شعور ام سوووو هيكون ايه بعد ما المهمة دي تخلص
سامبا : يعني عايزه تنسحبي
سونيا : استحاله .. استحاله انسحب بعد اللي عملو سوووو
-----
سوووو : مكتوب عليها .. الأمانة العامه للحزب الوطني
خالد صالح : - صمت
سوووو : الو
خالد صالح : - مستعبطا - الو .. مش سامعك يا سوووو
سوووو : مش سامعني ازاي ياعم .. اوعى تكون هتلعب الدنيئة يابو خللود؟؟
خالد صالح : الووو .. يادي النيله عالشبكه اللي بتهيس
سوووو : تصدق اني كنت عارف انك ندل وهتبيعني عند أول كمين
خالد صالح : طب بص ياسوووو .. بما اني مش سامعك فانت مع نفسك بقى .. يلا لا اله الا الله
لم أكن أتخيل ان خالد صالح هيبيعني في مثل هذا المحك .. والله يكرمكم ماحدش يقوللي يعني ايه محك عشان هي عاجباني وانا لقطتها من فيلم برازيلي كان بطولة رونالدينهو و نعيمة الصغير

إذاً .. ليس أمامي الآن إلا ان أدعو الله جاهدا .. ان يكون الخاتم ابو فص اللي معايا لاقط كل حرف وكل إشاره .. والا هبقى في الكاظوظه
-----
مصطفى شعبان : سمعتو الخبر ؟؟
كان الجهاز الأمني رفيع المستوى في حالة توتر بسبب حوار المحافظات اللي اتعملت جديد .. خصوصا إنهم ليهم قاعده عسكرية - متخفية - في منطقة نزلة السمان في أحد اسطبلات الخيل .. وكان يتولاها ظابط متخفي في هيئة سايس .. لكن بعد مابقت نزلة السمان تبع محافظة اكتوبر ..القاعده اللي كان يتولاها الظابط .. بقى يتولاها ويتولاه ربنا
منى زكي : - وهي مشغوله جدا.. وبتعمل مونيكير - خير يا درش في ايه؟؟
مصطفى شعبان : نزل قرار جمهوري ان المحكمة الدستوريه العليا اللي على كورنيش المعادي وتبع محافظة حلوان .. تبقى تبع محافظة القاهرة
توفيق عبدالحميد : هي المحكمة الدستوريه دي .. زي محكمة الزنانيري؟؟؟
مصطفى شعبان : لأ يا عمنا .. دي محكمة مخصوص عشان تعمل التعديلات الدستوريه
توفيق عبدالحميد : التعديلات الدستوريه بتاعة الزنانيري ؟؟
منى زكي : يووووه - وتنظر لمصطفى شعبان - سيبك منه .. طب وفيها ايه يعني لما ينقلوها من محافظة حلوان للقاهرة
مصطفى شعبان : فيها اننا ممكن نعتبر سوووو تبع حرم المحكمة .. وبالتالي يبقى تحت سيطرة الجهاز ومانتخلاش عنه في المهمة
توفيق عبدالحميد : فهمتك .. يعني سوووو بقى تبع المحكمة .. في الزنانيري؟؟
-----
بمجرد مادخلت العربية بتاعة الدقيق عالمخزن ونزلوني مع الشِوله وحطونا على جنب وسط مجموعة شِوله تانيه .. رحت قاطع الشوال وخرجت استكشف المنطقه .. وانا باستكشف المنطقه لقيت شوية كراتين على صناديق ويفط قماش مرسوم عليها هلال وجمل ومكتوب أسماء ناس ماعرفهمش ولا حد يعرفهم في الدنيا .. وتحت الكراكيب دي لقيت صندوق كبير .. شكلو قديم .. قديم قوي .. نفضت للصندوق ولكل الكراكيب اللي لقيتها وابتديت ادعبس على أي مخرج اخرج منه .. خصوصا وان الدنيا ابتدت تليّل وانا ماكلتش حاجه من ساعة البليلة وابتدى الجوع يقرصني .. لكن للأسف فضلت ادور ادور ادور .. مالقتش ولا مخرج .. والدنيا ضلمت خلاص .. يعني شكلي هبات هنا وأمري لله
قلت خلاص بقى .. أجيب كام حتة قماش من اللي مرسوم عليهم هلال وجمل وافرشهم انام عليهم .. لكن في وسط مانا باوضب فرشتي عشان أنام .. سمعت خروشة جاية من الصندوق الكبير .. قربت عشان اشوف ايه الحوار .. لقيت الصوت بيزيد .. كل ما اقرب ناحية الصندوق .. الخروشه اللي جواه تعلى .. لغاية مابقيت خلاص في وش الصندوق .. وفجأه لقيته اتفتح .. وخرج منه حاجه غريبه .. زي مايكون راجل لابس عباية سودا .. خرج من الصندوق طاير لفوق .. طاير بالراحه قوي .. لسه هاصوت واقول الحقوني .. لقيت الشخص ده نزل عالارض ووقف قدامي .. وبيبتسم .. مع ابتسامته لقيت حاجه غريبه قوي .. لقيت سنانه اللي على الجنب طوال .. زي ناب الديب ولا الكلب المسعور .. ايوه .. ايوه عرفت مين ده .. ده اللي اسمه .. دراكولا
دراكولا : انا لازم أمص دمك
سوووو : البيه شغال في الحزب الوطني ؟؟؟؟
رفع دراكولا حاجبه الشمال ومد بوزه وبدت عليه ملامح البلاهه والتناحه من سؤالي .. ونظر لي وهو يبدي الاستعجاب ممزوجا بالدهشة .. وبينما هو مندهش ..إذ بكرشي يخرج صوتا غريبا يبدو أنه من قلة الأكل .. فنظر لي دراكولا وابتدت علامات الخوف تظهر عليه .. فتراجع خطوة للخلف وقال
دراكولا : وكتاب الله ماعرف الحزن الهطلي ده ولا شفته
أدركت انه خاف مني بعد أن سمع صوت كرشي .. وعنها ورحت مطلق لكرشي العنان في البوح برغبته في أي حاجه في رغيف .. كرشي يبوح من هنا .. وهو يخاف ويرجع خطوه من هنا .. كرشي يبوح .. وده يخاف .. لغاية مازنقته في الحيطه .. راح مقرفص عالارض وحاطط ايديه على وشو وقاللي
دراكولا : أبوس ايدك .. ماتطلعش التنانين اللي جوه .. انا هعملك أي حاجه بس بلاش تنانين
اكتشفت انه دراكولا زبون قوي .. فاكرني مربي تنانين في كرشي .. مايعرفش ان ده الطبيعي عندي وده صوت الحياه
سوووو : تنانين .. لا ماتقلقش .. التنانين دي بتطلع لما بتحول لسلعوة بس
ورحت قاعد جنبه عالارض ومنزل ايديه من على وشه ومطمنه وقلتله
سوووو : انت ايه حكايتك .. وبتعمل ايه هنا ؟؟؟
دراكولا : - بعد ان اطمأن من نبرة صوتي - حكايتي .. انا حكايتي بادئه من زمان قوي .. من أيام غزو الهكسوس على مصر .. تحب تسمعها ؟؟؟
سوووو : ياريييييييييييت
-----
يتبع

سوووو

هناك 86 تعليقًا:

رئيس جمهوريه نفسى يقول...

اول كومنت

رئيس جمهوريه نفسى يقول...

انا حجزت اول كومنت اروح المحكمه وارجع ااقرى القصه تانى علشان اعلق بتفانين
سلااااااااموز يا ابو عمو

فاتيما يقول...

يا سووووو
القصة إبتدت تحلو قوى قوى قوى
و لطيفة قوى حكاية دراكولا دى
يعنى الحن الوطنى مكرتن مصاصين الدماء لحين الحاجة إليهم ؟؟
و لا يكونش مخزنهم عشان راحت عليهم و بقى فيه اللى أنقح منهم و مصاص الدماء يبقى جنبهم يمامة بيضا
أنا دراكولا دا صعبان عليا من دلوقتى و من قبل ما أسمع حكايته ...
اوعى حكايته تبقى شبه حكاية الدتور عطية كدا ؟؟
ربنا يستر
أتا تعاطفت مقدماً معاه
أصل آخرة الغز علقة
و دا يا كبدى آخرتها كرتونة
تحياتى يا مبدع و جميل و غالى
يا اخويا العزيز
أشوفك بكرة بقى على خير

اهو ده عيبه يقول...

ازيك يا عم سوووو

اولا موضوع عنبه ده نكتم عليه علشان كده دخلنا فى الاعراض، وانت عارف ان العرض هارد

مكنتش اعرف ان خالد هيطلع خيخه كده اول ما يسمع الاسم ويخاف ، بس الاكاده توفيق يستحق منصبه الراجل واضح انه ميعرفش غير زنانيرى الظاهر كان عليه حكم نفقه هناك

كله الا عم دراكولا ده اللى قاعد مستنى الفرج من ايام الهكسوس ، ميعرفش ان هما اللى ماسكين الحزن دلوقتى

سلام يا صاحبى

رئيس جمهوريه نفسى يقول...

عدنا من المحكمه بتاعت بلدنا مش الدستوريه ياعم
سونيا : استحاله .. استحاله انسحب بعد اللي عملو سوووو
يا ترى انت عمل ايه يا سوووو
-------------
مصطفى شعبان : لأ يا عمنا .. دي محكمة مخصوص عشان تعمل التعديلات الدستوريه
هو تصحيح يا غالى صغنن بس المحكمه الدستوريه بيكون دورها الرقابه على توافق القوانين مع الدستور المصرى لكن هى لا بتعدل ولا بتشرع
واعتقد انك عارف كده بس بتوضح جهل رجال القانون بالقانون
-------------
خالد صالح : الووو .. يادي النيله عالشبكه اللي بتهيس
سوووو : تصدق اني كنت عارف انك ندل وهتبيعني عند أول كمين
خالد صالح : طب بص ياسوووو .. بما اني مش سامعك فانت مع نفسك بقى .. يلا لا اله الا الله


فعلا يا سوووو
اخر من يحضر لمكان الجريمه الشرطه متلقيش ابدا الحكومه تاجى تمنع جريمه لا بتيجى تحقق جريمه والفرق كبير قوى بينهم

--------------
دراكولا : انا لازم أمص دمك
سوووو : البيه شغال في الحزب الوطني ؟؟؟؟

يا سو يا غالى الحزب الوطنى هو الى علم دراكولا ازاى يمص الدم فمش محتاجين دراكولا كمبتداء معاهم يعنى ماهم محترفين
------------------
التقائيل بقى والى فطسونى على نفسى من الضحك

حبسو بكوباية شاي كشري سكر بره

وانا اقول كل ما نقعد على القهوه تطلب الشاى سكر بره وراثه يعنى

وماحدش يسأل ولا يقول هي خلفت ازاي وجوزها مسافر عشان دي إرادة ربنا .. وربنا قادر على كل شيء


سبحانه قادر على كل شى
-----------------------------
أكن أتخيل ان خالد صالح هيبيعني في مثل هذا المحك .. والله يكرمكم ماحدش يقوللي يعني ايه محك عشان هي عاجباني وانا لقطتها من فيلم برازيلي كان بطولة رونالدينهو و نعيمة الصغير

دى انا وقعت على نفسى من الضحك فيها بجد

تحياتى يا غالى

dodda يقول...

اول حلقه من المذكرات اقراها حلوه اوى

انا حرجع الى الخلف اقرا من الاول
وربنا يكرمك فى مهمتك
بس هى منى كانت بتحط منكير لونه ايه؟؟؟

اسلوبك حلو وخيالك جامد..استمررر

Dr-hema يقول...

ايه ياعم سو الفيلم الهندى ده
بس حلو اللى بيعجبنى فيك قدرتك على دمج الأمور والخيال

المهم
كنت عاي اقولك حاجة على ردك فى حلقة سندبيس
على فكرة انت غلطت هو دم يوسف ولا يعقوب
أكيد انت ناسى او بتهزر بس مينفعش الهزار فى المواضيع دى دى قصص فى القرآن


د/هيما

دكتور كسلان يقول...

ايه يا عم سووو الحلاوة دى كلها
دى تانى حلقة اتابعها
بس الاحدث بدات تسخن اوى

عجبانى اوى حكاية التناين دى
طب كنت قول من زمان
كنا عرفنا نظبط دراكولات الحزب الواطى
انا بعد كده مش هكلم اى حد من الحزب
الا اذا كنت جعان

سلااااااااااااااااااااااااااااااااااااااااااااااااام

همس الاحباب يقول...

ههههههههه
بجد رائع قوى يا سووو
وبقى دراكولا خاف من اصوات كرشك
هههههههه
نعديها يا عم وبلاش دراكولا
وبلاش المحك كمان
بس بجد رائع وبدات تشوقنا للقادم اكتر واكتر
تحياتى وتقديرى
سلامووووووووووز

همس الاحباب يقول...
أزال المؤلف هذا التعليق.
ojg يقول...

جامد جامد جامد
قولي يا واد يا سوووو يا عجوز بتجيب الكلام ده منييييييييييييييين؟؟
جامدة موز حكاية ليبيا دي ولا حكاية المحك والفيلم البرازيلي والجامد قوي يعني الأخ دراكولا ده اللي ظهر من حيث لا ندري
أنا مش هستغرب خلاص لو إذ فجأتن لقيتك جايب إسم المدير بتاعي في الشغل
وأهو كلهم مرعبين برضو
بس بس
ربنا يجعل كلامنا خفيف عليه وعلى اخوانا دراكولات الحزن الهطلي
ههههههههههههههههههههههههههه

سلام يا سوووو يا بتاع المحكمة الزنانيرية العليا

ojg يقول...

نسيت صحيح أشكرك على سؤالك على غيابي
بس ما خدتش تاكسي وجيت تسأل في المدونة بتاعتي ليه؟
طيب أنا ومخاصماها
إنت مخاصمها برضو؟
مش ناوي تفك الحصار وتبطل المقاطعه اللي انت عاملها عليا دي؟

خمسة فضفضة يقول...

السلام عليكم ورحمة الله وبركاته

الحكايه بدات تسخن وتحلو يا سوو
هو الحزب الوطني يا عمونا محتاج مصاصين دماء من بره يايني دا عنده اكتفاء ذاتي و ناس محترفه مش هاويه زي عم دراكولا ده اللي خاف ووقع في خلده من شوية اصوات

يلا خلينا ورا سووو لحد آخر الحكاية


سلام

Desert cat يقول...

ده الكرش طلع بينفع فى الازمات يا جدعان وشكلك وقتها كنت فى احلك لحظات جوعك علشان صوت التنانين اللى خلى دراكولا يسقط راكعا
صدقت الحكمة العظيمة اللى بتقول ما دراكولا الا بنى ادم

EmY يقول...

سووووووووو

ايه يا عم السسبنس ده كلو

انا ليا عندك كيلو كباب اوعي تنسي

و مش هاوصيك علي البيبسي بقي

هو الحزب الوطني بيربي وحوش كمان ولا ايه

هما دول الي بيطلعوا ايام النتخابات و لا ايه

بس خالد وقف معاك موقف رجاله فعلآ من مواقف الحكومه المصريه المشرفه

البوست يجنن و البلوج كلو عسل

تحياتي يا سوووووو

ان شاء الله اشوفك بكره

أبو خالد يقول...

حبيبى الغالى أحمد سوووو
علشان تقهر دراكولا ألبس عقد من الثوم
كما فى الأفلام..
أما علشان تقهر الحزن الوطنى عايزلك
قنبلة ألف رطل و تلقى من طائرة
فوق مقر الحزن و الحزانى مجتمعين فيه
***
دمت أبن مبدع جميل
و معاك لأخر القصة

واحدة مفروسة يقول...

هههههههههه
هيه و بعدين

وينكى يقول...

مين بيعمل ايه؟؟؟؟؟؟؟؟

حماتــــــــــــي ملاااااااااااك يقول...

أيوة كدة ياراجل أدخل بقي علي الرعب
أنا باحب دراكولا أنا وهو حبايب الروح بالروح أبقي سلملي عليه وقوله مفقوعة بتقولك انت مابتجيش ليه ؟

Z_Diva يقول...

yalla, el5oza3blat 3mala tatasa3d ma3 ela7das, we sadiky elanti5 dracula da5l felgame, wekman kn m7bous fe crtona, hmmmmm

maza yougad 5alf elbab elmo3'lak ???

hal howa adham junior ???

am adhm zat nafsyto???

we ezay y3ny y5do elm7kma mn 7lwan????

mlhash nefs y3ny 7lwan yb2a feha 7ga mn re7t aghzt eldawla????

walla hya msh ad elm2am????

we leh 5ado elnazla melgiza???

wehal kda 3shan trou7 lazm tkoun r7la tanya 3'er re7lt zyarat elahramat???

wehya elyofat wel2a2msha ellmt5azina de ytra adima, walla 3shan eldawra elolmpya elgaya ???
-ya3am wanna mally ana a5er 3lakty
bel2omash hya t7weeloh ella fastin swareh :D-

"katl ma3 soooo wa 3a2ltoh lt3rf el7akika" -m3 ele3tzar le dr.nabiel farouk

shaklly ana elly ba2oul 5oza3blat 3la fekra :D

totaaaa يقول...

هااااى ياسوووووو
ازيك وايه اخبارك
بص يااستاذى العظيم سوووو انا الايام دى عايشة فى دور الخنقة الجامدة وماليش نفس اعمل حاجة خالص وفى وسط حالة الزهق والملل دى والدمعتين النازلين افتكرتك وافتكرت مدونتك قلت ادخل يمكن افك شوية
وبعد ماقريت كل المواضيع اللى فاتتنى من اول ليه دنيا وتحديث كاميليا الرقيق ودكتور عطية والمذكرات
بجد حسيت انى لازم اقولك شكرا بجد فرقت معايا مدونتك اوى النهاردة
انت بجد انسان جميل جدا ياسووو وربنا يكرمك ويوفقك يارب
كل احترامى وتقديرى ليك

رئـــــيسـة حزب الأحلام يقول...

هههههههههههههههههههه
دراكولا خاف منك ياسووو لا دة دراكولا اي كلام الواحد حاسس انه فى فيلم رعب واكشن انا بحب الرعب اوى
رجاء براحة على دراكولا اصل باين عليه رقيق اوى
دمت بخير

aya يقول...

الهكسوس؟؟؟؟
يا قلبك الابيض
هههههههههه
بس مش مشكلة
هكسوس هكسوس
احنا معاك برضه

الله ينور يا سوووو
بجد جامدة

بس انا كنت عايزة اعرف ايه مشكلة الزنانيرى مع الاخ توفيق عبد الحميد؟

تسلم العبقرية يا سوووو

magnona يقول...

ممكن اعرف ايه اللى هيحصل بعد كده
دى حلوووووووووه قوى يا سوووووووو

maha miho يقول...

هههههههههههههههههههههههههههه استنى استنى هههههههههههه
يا نهارك مش فايت،، تعالى هنا!! خد هنا بقولك!! انت عارف انا عملت ايه؟ جبت المذكرات من نمرة واحد لحد 17 عشان ما كنتش قريتهم م الاول،، ورحت حطاهم على صفحة وورد وقعدت قريتهم يا سوووو.. ايه ده؟ ده انت طلعت خطير موت،، ده فيه شوية تعبيرات في القصة رهيبة ومالهاش حل هههههههههه يا نهار ابيض!! يا نهار ابيض!! لألألأ ياللا بسرعة خلص انا عايزة اعرف سوووو ده هيطلع ابنها ولا ايه؟ الاوضة دي فيها ايه؟ يا سوووو بسرعة
سوووو لقد ضحكتني من معاميق معاميق قلبي ،، آه وربنا

tamer.sala7 يقول...

يا لهووووووووووووووووي
انت لسة هتحكي من ايام الهكسوس
بس بصراحة خالد صالح عجبني اوي ماشي علي مبدأة ومبدأ الحكومة كلها وهو
الندالة مبدأ
وتوفيق عبد الحميد ده اللي مش فاهم اي حاجة ايه اللي خلاه يدخل زنانيري في حلوان
بس هو انت ازاي مخوفتش من دراكولا ؟؟
ولا دراكولا اللي طلعلك ده تيواني؟؟
وبعدين موضوع التنانين اللي في بطنك علي قد ما هو عاملك مشاكل بس بدأ يفيدك دلوقتي وخلا دراكولا ميمصش دمك يا ريت بقي التنانين تعمل حاجة وتخوف الحكومة والحزب والوطني ولا هي بتتشطر علي دراكولا الغلبان وبس ؟؟
استمر الي الامام يا سوووووووووو

shayma يقول...

هههههههههههههههه
خالد صالح : الووو .. يادي النيله عالشبكه اللي بتهيس
سوووو : تصدق اني كنت عارف انك ندل وهتبيعني عند أول كمين
خالد صالح : طب بص ياسوووو .. بما اني مش سامعك فانت مع نفسك بقى .. يلا لا اله الا الله

لا جامده
هو يعنى محدش قادر على الحزن ده
يبقى الغلبان ده هو الى هيقدر
هههههههههه

هموت واعرف بقى سى دراكولا ده بيعمل ايه فى الحزن
وازاى متمصش دمه هو شخصيا
ولا دول من رجاله الحزن

ههههههههه
جامده الحلقه يا سوووووووو


سلاخووووووووووووووووخ
:))

سمية يقول...

شكلها كده الحلقة الجاية هتبقى فيها زتونة الزتونة بتاعت المواضيع كلها

ربنا يستر .. الحكاية بينلها هاتكبر اوى

متتأخرش بقى فى تنزيل الحلقة اللى جاية لحسن انا مستنياها من دلوقتى


سلامووووز

الجدة فصيحة يقول...

السلام عليكم ورحمة الله وبركاته

الأحداث فعلا بتكبر وتحلو كل مرة عن المرة اللي قبلها ..

ياترى ياسونيا سوووو عملك ايه لدرجة انك تتغاضي عن جلوسك مع مامته والعيش والملح ؟؟؟

..

وطبعا سبحان الله العلي القدير قادر على كل شيء

..

والشبكة فعلا بتهييس خصوصا مع سيرة الحزب الوطني

..

دراكولا في الحزب الوطني ياقلبي لا تحزن

ومنتظرين حكاية دراكيولا

تحياتي

يوميات فنانه مفروسه جداا يقول...

يا عم كل ماالواحد يندمج في القصه تقووم قايل يتبع يتبع ماننجز بقي القصه حلوه اوي .
وبعدين يا نهار تنانييييين مش تنين واحد ولا اتنين وطول عمري اسمع ان دراكولا بيخوف الناس وربنا اول مره اسمع ان حد هوا اللي خوف دراكولا ههههه
ملعوبه صح والله حكاية دراكولا والتنين ديه هههههههههههه.
بالنسبه لحوار حلوان انا عرفت ان طفولتك قديتها في الكابيرتاج هههههههههههههههه افرح هيهدوووه وهيعملو مكانه المحافظه انت اتعديت من دكتور عطيه ولا ايه طيب استر يا رب

مستنيه تشرفني في البلوج بتاعي بقالك كتير مشرفتنيش .

يلا سلام

كاميليا يقول...

دراكولا : انا لازم أمص دمك
سوووو : البيه شغال في الحزب الوطني ؟؟؟؟
.........

ههههههههههههههههههههههههههههههههههه

هههههههههههههههههههههههههههههههههه

وكان يتولاها ظابط متخفي في هيئة سايس .. لكن بعد مابقت نزلة السمان تبع محافظة اكتوبر ..القاعده اللي كان يتولاها الظابط .. بقى يتولاها ويتولاه ربنا
....

هههههههههههههههههه

الحلقة رووووووووعة

جميلة جميلة جميلة

وحلوه قوى الحزب الهطلى دى
هههههه

تحياتى لإبداعك
مدونتك متعة حقيقى
كلها كلها
حتى عطية
ياتري اخباره ايه؟
على فكرة، بركاته حلت على مصرى برضو
وخلا سعر البنزين يولع، خلا الاسعار كلها تولع
ههههههههه


تحياتى واحترامى لابداعاتك الجميلة

زيزو الشقى يقول...

يا سووو

انا مدون جديد مدونتك حلوة اوى ودمها شربات كتبت موضوع من موضوعاتى

زورنى لتقول رأيق

تحياتى و كل احتراماتى

سلاااااااام يا سووو

wanna b a physician يقول...

كويس انك لسه تابع للقاهرة غيرك اتقلش وبعدين تنانين ده دراكولا قديم اوى
وبعدين خلى بالك مكن الاقمشة دى لتتحاكم انك ضيعتها انا باحزرك

Abo 7anf يقول...

دا اول تعليق ليا
بس مش اول زياره
يووه نسيت بردوا
السلام عليكم
اه الجمال دا حكايتك بجد رائعه
كلامك سهل قوى
مستنى الباقى بقى

ra7eel يقول...

ههههههههههه
بقى جوزها مسافر بقاله ارع سنين ومخلفه بنت زى العسل
ههههههههه
وكمان الموضوع ظهر فى دركولا طيب متتاخرش علينا فى الحلقه الجايه عايزه اعرف حكايته ايه
تحياتى لك

RAMA يقول...

مش عندي وقت اقرا ... بس أنا عارفة إنك متألق كعادتك ... أنا بس جاية أثبت وجود

تحياتي

حنين القلب يقول...

والله يا سوووو انت عسل
بقى دراكولا خاف منك انت
مع انك طيب وشكلك اليف يعنى ولا بتتحول لسلعوة ولا لغيره
بس بجد بوست دمه سكر
على فكرة انا من ساعه ما صحيت بدور عليك علشان ادخل اقرى البوست بتاعك اصلى كنت نايمه اسبوع والحمد لله اخيرا فوقت من الغيبوبه وصاحيه اقول سوووووووووووووووووووووووووووووووو
سوووووووووووووووووووووووووووووو
المهم ابقى نورنى ماشى
سلام

قوس قزح يقول...
أزال المؤلف هذا التعليق.
قوس قزح يقول...

بص بقى
بدام فيها دراكولا يبقى هعمل زى ما قلت لى و هقرا من الاول بس خاليك معايا كده علشان لو حاجة وقعت منى ندور عليها سوا

مفيش ملخص :(

طيب مفيش شيكولاتة للى يقرا كل ده :(

shayma يقول...

سوووووووووووووووو

ليك عندى تاج
تعالى خده وجاوبه واوعى تكسفنى وتقول لا
:))))))))

وبعدين نزل بوست احكيلنا عملتو ايه فى الحفله
عشان اتغاظ تانى
انا اتغظت عند ابى والصباغ
:))))))))))

سلاخوووووووووخ

Soooo يقول...

رئيس جمهوريه نفسى

يعني ياخي انت غريب قوي .. جيت حجزت اول وتاني ورحت جاي ومعلق خامس .. من العشره الاوائل برضه
هي سايبه ولا ايه .. وبعدين مافيش حجز عندنا ياعمنا
عايز تحجز سيب خمسه جنيه مقدم
----
بص يابو حنفي

هنتخيل اني قلت المحكمة الدستوريه زي مانت قايل كده .. تفتكر حد هيفهم حاجه ؟؟؟
ده انا نفسي مافهمتش حاجه ياعمنا

وبعدين الدستور لو الليله الكبيره عايزه تلغيه يتلغي وش
حد هيقول حاجه؟؟؟


نورتني يابو حنفي .. وبطل حكاية الحجوزات والحوارات دي

وربنا يوفقك ويكرمك ويسعدك دنيا وآخره يارب



سلاموووووووووووز

Soooo يقول...

فاتيما

يعنى الحزب الوطنى مكرتن مصاصين الدماء لحين الحاجة إليهم ؟؟
---
وكتاب الله انتو هتودونا في داهيه
انا قلت حاجه زي كده؟؟
طلعت من بؤي الكلمة دي؟؟
طب ده انا بلسم واتحط عالجرح يورم

وعلى فكره .. دراكولا ده اغلب من الغلب .. وهتشوفي حكايته وانتي اللي هتحكمي بنفسك

وربنا يكرمك ويسعدك ويوفقك ويبسطك دنيا وآخره يارب

سلامي لماما العزيزه




سلامووووووووووز

Soooo يقول...

اهو ده عيبه

والله يادوللي .. من ناحية ان العرض هارد فانا هاردي ضرب وجبت هارد جديد .. يعني تقدري تقولي العرض عرضين زي قماش الجلاليب الاسواني

ومين قال ان خالد صالح طلع خيخه عشان ما جاليش
ثم ان خيخه زي ماهي خيخه .. وماجاتش حفلة توقيع الكتاب
؟؟؟
طب تصدقي ممكن يطلعو الاتنين واحد فعلا

وتابعي المذكرات وانتي هتعرفي دراكولا ده حكايته ايه


وربنا يارب يوفقك ويكرمك ويسعدك ويبسطك دنيا وآخره يارب



سلامووووووووووز

Soooo يقول...

dodda

سعيد جدا بتشريفك لمدونتي المتواضعه واتمنى ان المذكرات تعجبك وياريت تعتبري مدونتي زي مدونتك تمام وتنوريني بزيارتك وبتعليقاتك دايما يارب

وربنا يكرمك ويسعدك ويبسطك دنيا وآخره يارب



سلاموووووووووز

Soooo يقول...

Dr-hema

ولا فيلم هندي ولا حاجه ياعمنا
ده فيلم مصري اصيل .. وتابع وانت هتشم تاريخ مصر في المذكرات
----
بالنسبة لجزئية الذئب وبرائته من دم ابن يعقوب او من دم يعقوب
هل مقولة (بريء براءة الذئب من دم ابن يعقوب) مذكورة باللفظ في القرآن الكريم أو في اي حديث شريف عن سيدنا محمد عليه الصلاة والسلام؟؟
الاجابه لأ .. دي مقولة مأثورة مش أكتر .. والغرض منها توضيح البراءه من التهمة الملقاه على الشخص .. فيقال بريء بريء براءة الذئب من دم ابن يعقوب .. يعني ماجاش ناحية ابن يعقوب .. يعني ما جاش ناحية يعقوب .. يعني ما جاش ناحيه ابراهيم او سيد او مخيمر او اي شخص

هيما .. دين الاسلام دين السماحه والوسطيه .. مش دين التعصب .. ومش ديت التساهل .. افهم الدين الاسلامي صح .. هتلاقي انه ابسط وأعمق من مجرد كلمة لغرض التبسم

اضربلك مثل
مره سيدنا محمد عليه الصلاه والسلام كان بياكل تمر هو وسيدنا علي ابن ابي طالب رضي الله عنه .. وكان سيدنا محمد بيتعمد يحط نوى التمر قدام سيدنا علي .. وبعد ماكلو وخلصو اكل .. قام سيدنا محمد عليه افضل الصلاة والسلام قال لسيدنا علي رضي الله عنه - وبطريقة المداعبه والهزار - وهو بيشاور ناحية نوى البلح اللي موجود قدام سيدنا علي .. أأكلت كل هذا ياعلي؟؟ .. قام سيدنا علي تبسم وقال لسيدنا محمد عليه الصلاه والسلام فيما معناه .. اني آكل التمر واحط النوى قدامي احسن من اني اكله وما اطلعش نوى .. وتبسمو هم الاتنين لبعض

هيما .. الاسلام دين سماحه ووسطيه ودين القلوب .. ربنا عارف باللي في قلبي وانا باقوللك الكلمه دي قصدي ايه .. وعارف اني قصدي ارسم ابتسامه على وشك

وحتى ياسيدي لو غلطت في دي او في غيرها .. استغفر الله العلي العظيم من كل ذنب عظيم .. ده ربنا خالقنا خطائين وتوابين عشان نغلط ونستغفر ربنا .. ولو كان عايز يخلقنا نسمع كلامه ومانعملش اي اخطاء كان خلقنا ملايكه .. لكن هو خلقنا كده عشان يتباهى بينا قدام الملايكه .. اننا لما بنغلط بنستغفر .. وهو يغفر لنا برحمته كل ذنوبنا

هيما .. لو كان كلامي مش عاجبك او مختلف معايا في وجهة نظري .. الله يكرمك الله يكرمك الله يكرمك .. ابقى قولي هات ايميلك وابعتهولك ونتكلم في المواضيع دي بعيد عن المدونه

وربنا يكرمك ويوفقك ويسعدك ويبسطك دنيا وآخره يارب



سلاموووووووووووز

Soooo يقول...

دكتور كسلان

انا بعد كده مش هكلم اى حد من الحزب
الا اذا كنت جعان
-----
قريت اللي مابين سطور كلامي يادكتره
والوحيد اللي فهم قصدي ايه من صوت كرشي هو انت
هي دي ثورة الجياع
لما هنجوع كلنا ونتكلم واحنا جعانين .. هيخاف مننا اي ظالم مهما كانت قوته ايه

ايوه كده يادكتره اظهر وبان
طب والله انا سعيد انك رجعت تتابعني وتعلق عندي

ربنا يسعدك ويكرمك ويبسطك دنيا وآخره يارب




سلاموووووووووووز

Soooo يقول...

همس الاحباب

حبيب قلبي يابو همس والله
ربنا يكرمك ويبسطك ويسعدك دنيا وآخره يارب

ولو اني باحقد عليك عشان انت اكتر واحد قعد مع ابو خالد لما جه ينورنا في حفلة توقيع الكتاب
ربنا يارب يوفقه ويكرمك ويبسطه ويسعده دنيا وآخره زي ماهو اسعدنا بزيارته وبكلامه وحنيته معانا


سلامي لهمس



سلامووووووووووز

Soooo يقول...

ojg

انتي عرفتي منين اني هاجيب اسم مديرك؟؟
انتي شكلك سرقتي المذكرات من الكومبيوتر بتاعي
اه مانتي بتاعة كومبوتر وسهل تعمليلي فايرس يجبلك كل الحياه عنني من طأطأ لبونجور
---
اياكي تخاصمي مدونتك
انا متابعك وباقرالك بس الحقيقه كل ماجي اعلق تحصل حاجه
مره التليفون يرن واقوم ارد يطلع حد من المعجبين
مره الباب يرن يطلع البواب وجايب معاه سجاير .. جايبهالي احد المعجبين برضك
يعني زي مانتي شايفه
معجبين وامضاءات وحاجه ايه
هنقول ايه
هو ده قدري


ملحوظه
هو انتي معجبه برضك .. طب فين السجاير؟؟؟



سلاموووووووووووز

سمية يقول...

وانا و انا و انا

Soooo يقول...

خمسة فضفضة

وعليكم السلام ورحمة الله وبركاته

وبالنسبه ان الحكايه سخنت .. احنا لسه بنقول يا هادي
التقيل جاي ورا

وربنا يستر ومالاقيش دراكولا جاي يعضني في قفايا .. او يضربني على قفايا

ملحوظه
المحترف بيشتغل عشان ياخد فلوس .. لكن لما الفلوس تخلص .. هيشتغل لحسابه الخاص .. حتى لو كان ضد اللي كان بيشتغل معاهم الاول .. فهمتي حاجه؟؟؟



سلاموووووووووز

Soooo يقول...

Desert cat

شفتي بقى فايدة الكرش ياقطه
بيعمل شغل والله
بس محتاج التوجيه والادارة السليمه

وفعلا .. مادراكولا الا بني آدم .. أو بني سويف


ربنا يسعدك ويكرمك ويوفقك دنيا وآخره يارب



سلاموووووووووووز

Soooo يقول...

EmY

ده انا زعلان منك زعل
يعني قلتي جايه حفلة التوقيع وكنت جايبلك الكباب والكفه والبيبس وكافة شيء
وفي الاخر ولا الهوا

عموما ربنا يجعل المانع خير يارب ومايكونش في حاجه وحشه هي اللي منعتك
وان شاء الله نتقابل في مرات قادمه

وربنا يسعدك ويكرمك ويبسطك دنيا وآخره يارب



سلاموووووووووز

Soooo يقول...

أبو خالد

والدي العزيز
بجد انت مش متخيل انا سعيد قد ايه اني اتعرفت عليك وخدتك بالحضن

لو حاولت اوصف مهما حاولت مش هقدر اوصل ربع اللي جوايا لما اتعرفت على حضرتك بصفة شخصيه زي ماحصل

ربنا يارب يسعدك ويكرمك ويبسطك ويوفقك دنيا وآخره يارب



سلاموووووووز

Soooo يقول...

واحدة مفروسة

محسساني انك قاعده على قهوة من بتوع زمان اللي كان بيبقى فيها راوي بربابه ويقعد يقول ياساده كان ياماكن .. ترارارا .. ياسعد يا إكرام .. ترارارا

الا صحيح .. مين سعد ومين إكرام؟؟
يكونوش ولاد صاحب القهوة؟؟؟


ربنا يسعدك ويكرمك ويبسطك دنيا وآخره يارب



سلامووووووووووز

Soooo يقول...

وينكى

اهلا بيكي يافندم في أول زياره لمدونتي المتواضعه وياريت تعتبري مدونتي زي مدونتك تمام وتشرفيني بزياراتك وبتعليقاتك

ولو عايزه تعرفي ايه الحدوته اقريها من أولها
لو مش عايزه براحتك



سلامووووووووووز

Soooo يقول...

حماتــــــــــــي ملاااااااااااك

ياستي ارسيلك على اسم واحد بقى
انتي هتروشينا معاكي
مره مفقوعه ومره حماتي ملاك ومره سوسو

يعني اقول يامين لما احب اخاطب الشعب المفقوع مرارته من حماته


ملحوظه
انا سعيد جدا جدا جدا اني اتعرفت بإنسانه جميله ومحترمه ودمها خفيف وبنت بلد زي حضرتك

وربنا يارب يسعدك ويكرمك ويبسطك ويوفقك دنيا وآخره يارب




سلاموووووووووز

Soooo يقول...

Z_Diva

هههههههههههههههههههههههه
ههههههههههههههههههههههههههه
ههههههههههههههههههههههههههههه

انتي فظيييييييييييييييعه

بجد فظييييييييييعه

ربنا يسعدك ويكرمك ويبسطك ويوفقك دنيا وآخره يا ام زعبولا


ملحوظه
لو لاقدر الله المذكرات دي هتتعمل كتاب هابقى استعير كلامك في التعليق واعمله غلاف الكتاب



سلامووووووووز

Soooo يقول...

totaaaa

تصدقي وتؤمني بالله
انا جسمي قشعر وعيني دمعت من الفرحه لما قريت تعليقك .. ويمكن قريته بعد ماكتبتيه بخمس دقايق .. وهو السبب اني ماعرفتش ارد على كلامك وعلى كلام باقي الناس

اللهم لك الحمد ولك الشكر على انك خلتني اساهم في رسم ابتسامه على وشوش الناس

وربنا يارب يارب يارب .. يسعدك ويكرمك ويوفقك ويبسطك دنيا وآخره يارب


ملحوظه
ماتتصوريش انا كنت محتاج تعليقك وكلامك ده قد ايه .. ربنا يوفقك ويبعد عنك الحزن والغم يارب



سلامووووووووووز

Soooo يقول...

رئـــــيسـة حزب الأحلام

طب بذمتك وعيني في عينك
انتي لما شفتيني عالحقيقه مش اتخضيتي مني؟؟

يابنتي ده انا يالهووووي
شوفتيني وانا بافترس التورته
بشع بشع بشع

وبعدين دراكولا ايه اللي رقيق؟؟
هو انتي فاكره انه عضو معاكي في حزب الاحلام؟؟؟؟


ملحوظه
انتي فعلا لازم يبقى اسمك رئيسة حزب الاحلام من رقتك وهدوئك .. ربنا يارب يسعدك ويكرمك ويوفقك دنيا وآخره يارب




سلاموووووووووز

Soooo يقول...

aya

يابنتي هم الهكسوس دول بعيد
ده مافيش بتاع اربعتلاف سنه قاف ميم وتلاقيهم معانا

يعني ميكروباظ من ميكروباظات الزمن اللي في احمد حلمي وتلاقيهم هنا


وبعدين انتي مش واخده بالك من عقدة توفيق عبد الحميد من الزنانيري

اصلو كان بيحب واحده من زنانيري .. لكن هي كانت ماشيه مع واد من كرموز .. قام هو بقى عمل ايه .. هبقى احكيلك الحكايه بعدين


ربنا يسعدك ويبسطك ويكرمك دنيا وآخره يارب


سلامووووووووز

Soooo يقول...

magnona

ماتتصوريش انا سعيد قد ايه انك عملتي بروفيل مخصوص عشان تعلقي .. وكان سهل انك تعملي زي ناس كتير بيقرو ويمشو

ربنا يارب يارب يارب يكرمك ويسعدك ويبسطك ويوفقك دنيا وآخره يارب


ملحوظه
بتزاكري ولا منفضه ؟؟؟؟




سلاموووووووووز

Soooo يقول...

maha miho

ربنا يارب يارب يارب يسعدك زي مانتي اسعدتيني بكلامك الجميل ده

واخجلتم تواضعنا يا مهاميهو
وربنا يسعدك ويوفقك ويكرمك ويبسطك دنيا وآخره يارب

ملحوظه
تابعي المذكرات وانتي هتعرفي سوووو عمل ايه لسونيا

سلامووووووووز

Soooo يقول...

tamer.sala7

ياسيدي ولا يالهوي ولا ياخراشي
ده الحكايه لسه هيدخل فيها نيوتن واينشتين وزكي وح وح
ناس كبيره يعني

وبعدين علمك علمك علمك
دراكولا ده كان ياباني اصلي
بس الركنه هي اللي بوظته
بالك ده لو كان شغال صح وبيتعمللو عمره اول بأول
يالهوووي
كنت شفته بقى هيعمل ايه

ملحوظه
لو بطني وبطنك وبطون الناس كلها اتكلمت .. ولا مليون دراكولا هيقف قدامهم .. بس لسه الجوع ماقرصناش قوي



سلاموووووووووز

Soooo يقول...

shayma

ربنا يبسطك كمان وكمان يارب
والف شكر على التاج ياستي ولو اني شايف اني مفضوح قدامكم بطريقه فزيعه فزيعه فزيعه

لكن اوعدك اني ان شاء الله هجاوب على تاجك بس بعد ما اجاوب على تاجين مهمين وكنت راكنهم في المخازن

وربنا يسعدك ويكرمك ويبسطك دنيا وآخره يارب




سلاموووووووووز

Soooo يقول...

سمية

ده انتي مش مستنيه الحلقه الجديده وبس
ده انتي قاعده على باب المدونه

وبعدين ايه وانا وانا وانا .. هو انا بافرق عيش سياحي

طب ده حتى النيسكافيه خلص
شوفتي بقى
هاتيلي نيسكافيه وانا انزللك الحلقه الجديده قبل معادها


ربنا يكرمك ويوفقك ويسعدك ويبسطك دنيا وآخره يارب

سلامي لفتكات



سلاموووووووووز

Soooo يقول...

الجدة فصيحة

سعيد جدا بمتابعتك ياجدتي العزيزة لمدونتي المتواضعه

وربنا يقدرني واكتب حاجه تسعدك وتسعد كل اللي بيقرولي يارب


وربنا يكرمك ويسعدك ويبسطك دنيا وآخره يارب



سلامووووووووووز

Soooo يقول...

يوميات فنانه مفروسه جداا

ياستي ربنا يسعدك ويكرمك ويوفقك في امتحاناتك يارب وتنجحي منها على خير

وبعدين محافظة ايه اللي هيعملوها في الكبرتاج؟؟
دول بيهزرو اكيد

يعني الاطفال المتشردين لما يروحو يلعبو بعد كده يروحو يلعبو فين
في اوضة المحافظ مثلا؟؟؟


ملحوظه
انا عارف اني مقصر في حقك وفي متابعتك بس والله كان عندي فترة زنقه وأوعدك اني ان شاء الله بمجرد ما اظبط الحياه وبمجرد مانتي تخلصي امتحاناتك .. هبقى متابعك على طول



سلامووووووووووز

Soooo يقول...

كاميليا

كاميللو
بجد تعليقاتك ليها طابع خاص والله

ربنا يارب يسعدك ويوفقك ويكرمك ويبسطك دنيا وآخره يارب


ملحوظه
الدكتور عطيه بريييييييء .. بدليل ان منطقة السيده زينب لغاية دلوقتي ما ولعتش .. ربنا يستر



سلامووووووووز

Soooo يقول...

زيزو الشقى

ده انت شكلك شقي قوي قوي يازيزو
انا قريت موضعك بتاع النضاره وخفت منك
عشان انا كمان لابس نضاره ولو انت خبيتها مش هشوفك ولا هشوف اي حد خالص


سعيد بزيارتك وبتعليقك
وربنا يوفقك يارب



سلاموووووووووز

Soooo يقول...

wanna b a physician

عودا أحمد يادكتره

وياسيدي دراكولا ولا قديم ولا التنانين قديمه
ده التنانين لسه موجوده وبتمرح بحرية تامه

لو مش مصدقني .. روح شق التعبان هتلاقي التنانين ايييييه




سلامووووووووز

Soooo يقول...

Abo 7anf

وعليكم السلام ورحمة الله وبركاته
نورتني يابو حنف والله

ويارب تكون مدونتي عاجباك ويارب تتابعها وتعتبرها زي مدونتك تمام وتعلق عندي براحتك

وربنا يكرمك ويسعدك ويبسطك ويوفقك دنيا وآخره يارب



سلاموووووووووز

Soooo يقول...

ra7eel

اهو انتو كده .. فيها ايه يعني لما جوزها يكون مسافر بقالو اربع سنين وهي خلفت
ربك قادر على كل شيء ياشيخه

ربنا يكرمك ويسعدك ويبسطك دنيا وآخره يارب



سلامووووووووز

Soooo يقول...

RAMA

اقرى تعليقك اصدقك .. اشوف مواضيعك استعجب

منين بقى انتي مدمنة قراءة روايات وقصص ومنين مش متابعه المذكرات

لكن انا هعذرك عشان الظروف اللي بتمري بيها وأزمة الشغل

ربنا يوفقك ويسعدك ويكرمك ويبسطك دنيا وآخره يارب



سلاموووووووووووز

Soooo يقول...

حنين القلب

ربنا يكرمك يارب ويسعدك
وبعدين مين قال اني طيب
طب ده الشر بيبظ من عيني بظيظ

وياستي اهلا وسهلا بيكي وياريت ماتطوليش كده في النوم
اسبوع مره واحده .. طب خليها سبع تيام .. مش اسبوع بحالو




سلاموووووووووز

Soooo يقول...

قوس قزح

ياقهلا بيكي ياقهلا
وياستي اقري على ااقل من مهلك وانا موجود اهو لو احتاجتي اي مساعده

ملحوظه
سعيد جدا جدا جدا اني اتعرفت عليكي والله .. بس ايه لزوم انك تشرديلي في حكاية اني كنت باخد المصاصه بتاعة نور بنت رودي .. وبعدين دي خطيبتي .. يعني انا اخد مصاصتها .. هي تديهاني بنفسها .. عادي يعني



سلاموووووووووووز

يوميات فنانه مفروسه جداا يقول...

وربنا انا زعلانه جدا جدا جدا
كده تروحو حفل التوقيع ومحدش يقولي انا كنت هاجي عشان اشوفكو كلكو ونفسي فعلا اشفكو
يا خساره الله يسامحك يا سوو عشان مقولتش

اميره الصعيد يقول...

ازيك يا سوووووووو
ايه حكايتك يا عم سوو مش تنقذ بابا وماما الاول من اللي هما فيه وبعدين تطلع دراكولا ولا غيره ولا انت عجبك انهم بياكلوا كباب وكفته
كده سونيا هتبيع اللي وراها واللي قدامها علشان تصرف علي المهمه دي
وصلتكالامبولات ولا لسه انا بعتهم بريد سريع

Z_Diva يقول...

wallahy ana asln nfsy tgam3ha we tnazlha ktab ya ra2fat :D
we b3den ana lya elsharf in 7drtak tsta3eer 3baraty elmtwad3a -7lw elbo2en elfe5mien dol msh kda-
la bgd kma yakoul e5wanna fe mexico "mi casa es sou casa", aw etfadl elbet btk belbaldy y3ny :D

Z_Diva يقول...

ah we kman lagl elomana el3lmya y3ny, de moktabsa mn esloub eldaktor nabil farouk zay m7driyk akied 3ref -we 7ta monkin ts2al sonia lelta2keed- :D

Soooo يقول...

يوميات فنانه مفروسه جداا

طب خلصي انتي امتحاناتك على خير ان شاء الله
وانا هعمللك حفلة توقيع كتاب تانيه ونقول لكل الناس

يلا يابنتي قومي زاكري


ربنا يوفقك يارب وتنجحي واشوفك وكيل نيابه قد الدنيا




سلامووووووووز

Soooo يقول...

اميره الصعيد

مش لما اعرف انقذ نفسي ابقى انقذ غيري
وبعدين بيني وبينك .. مش كل يوم يعني الواحد هيقابل دراكولا ويعمل معاه حوار

ملحوظه
ولا وصل اي امبول ولا اي حاجه .. يكونوش اتكمرو في الجمارك؟؟؟



سلاموووووووووز

Soooo يقول...

Z_Diva

رأفت؟؟؟
ومثل مكسيكي؟؟
لااا
شيل الشيشه من قدامها يافوزي .. هي وصلت كده خلاص



ملحوظه
انتي مش ناويه تعلقي عندي بالعربي يابنتي .. والمثل بيقول .. يا داخل بين البصله وقشرتها .. ماينوبك غير تقطيع هدومك



سلاموووووووووز

وينكى يقول...

همممممممم
بصراحه جريت ريقى عليها
شكلى هاكرها من اولها
اما نشوف ايه الحكايه
سلام يا معلم

قوس قزح يقول...

هو انت معرفتش اخر الاخبار ؟؟
ما خلاص فسخنا الخطوبة دى
و اتخطبت لحد تانى P:

Soooo يقول...

وينكى


ياستي تشرفيني وتآنسيني واقريها براحتك وعلى اقل من مهلك
وربنا يستر وتعجبك




سلاموووووووووز

Soooo يقول...

قوس قزح

هو ايه فسختو الخطوبه
انتي هتضحكي على حماتي بالمصاصه اللي جبتيها لخطيبتي
لااا
علمك علمك علمك
انا ونور خطيبتي متفقين على المخطط ده .. وغمزتلها تاخد منك المصاصه وبعدين تبقى تديهاني في السكرته

اه من الحب وعمايلو




سلاموووووووووووز