الجمعة، 9 محرم، 1429 هـ

حتى انت يا بلوج سبوت !!؟

بنت خيخه قوي واي كلام .. واللي شايفها من اكتر المدونين جدعنه ومش خيخه ولا اي كلام
.. علقت عندي في الموضوع اللي فات وكتبت في تعليقها
كل سنه وانت طيب يا سوووو
عشان دخلت عالبروفيل بتاعي لقت ان السن مكتوب جنبه واحد وتلاتين سنه
ولاني مواليد واحد اغطسطس كما اشرت في موضوع اغطسطس .. الفين وخمسه!!
ومولود في سنة سبعه وسبعين بعد الالف والتسعمائه .. يعني فعليا فعليا ماشي في الواحد والتلاتين لكن لسه ماقفلتهمش رسمي
ومش زي ما بلوج سبوت شايف اني قفلتهم وبقيت خلاص واحد وتلاتين سنه رسمي فهمي نظمي
يعني من الاخر بلوج سبوت بيستكردني وبيخمني عيني عينك وبيسرق مني سنه
!!!!!
.. لكن وقفت مع نفسي وخدت نفس سيجارة كولوباطرا بوكس وقلت يعني هي جات عليه هو لوحده
مانا ياما اتسرق مني سنين وانا قاعد باتفرج
اتسرقت مني سنة لما دخلت ابتدائي في السعوديه وانا عندي ست سنين ومش خمس سنين زي اخواتي اللي دخلو ابتدائي هنا في مصر ولا زي معظم صحابي ومعارفي .. حتى اللي كانو في السعوديه بس جابو مرسوم ملكي من اي امير يعرفوه .. وماكتر الله منهم هناك
ودي كانت اول سنه
واتسرقت مني سنة كمان لما جيت من السعوديه وانا واخد اولى اعدادي هناك لكن عدتها هنا تاني عشان اختلاف المناهج والمراحل التعليميه .. واللي كانت ممكن تتحل لو ابويا دخلني مدرسه خاصه لغات او حتى مدرسه خاصه عربي بدل ما ادخل مدرسه حكومي واحنا اصلا مالناش وسايط ولا كوسه في البلد
ودي كانت تاني سنه
واتسرق مني سنه كمان لما جبت في تالته ثانوي خمسه وسبعين وربع في الميه .. او تلتمية وواحد درجة من ربعمية واترميت في كلية تجارة بنها عشان فرقت معايا تجارة القاهرة على درجة واحده بس .. ورحت بنها قعدت فيها تمنتاشر دقيقة بس ورجعت وانا مصمم اعيد ثانويه عامه وادخل كلية فنون تطبيقيه
ودي كانت تالت سنه
واتسرقت مني سنه كمان لما وقفت قدام دكتور عندنا في الكليه وكان معترض اني باشتغل مسرح في الكليه ومش باحضر كل محاضراته .. مع العلم اني جبتله جواب من رئيس الجامعة اني باعمل نشاط جامعي ولازم الغياب ده يتشال .. لكن هو شافني فنان الشعب وراح مسقطني .. وسقط واحد تاني معايا في الدفعه لكن اللي سقط ده وبعد ما ظهرت نتيجة سقوطه واتعلقت النتيجه رسمي .. جاب واسطه وطلع السنه اللي بعدها عادي خالص
ودي كانت رابع سنه
يااااه
اربع سنين من عمري راحو حصيل فاضي
لأ
مش حصيل فاضي
لو ماكنتش دخلت المدرسه في السعوديه متأخر سنه ماكنتش هبقى اشطر واحد في المدرسه لان اخر دراسات علميه اثبتت ان دخول الطفل التعليم الابتدائي وهو عنده سن سنين بتخليه اكثر استيعابا من اقرانه اللي دخلو وهم عندهم خمس سنين
لو ماكنتش عدت اولى اعدادي في المدرسه هنا في مصر بعد ماجيت من السعوديه ماكانش المدرسين يبقو فاكرينني ويفضلو في الرايحه والجايه يقولولي انت ربنا هيكرمك والاقيهم بيتعاطفو معايا .. خصوصا مدرسة الرسم واللي حببتني في الرسم بزياده .. وخصوصا مدرس النشاط واللي فهمني يعني ايه مسرح ويعني ايه تمثيل
لو ماكنتش عدت ثانويه عامه وفضلت في كلية تجارة بنها او حولت لتجارة القاهرة ماكنتش هبقى مهندس ديكور وباشتغل في مجال انا باحبه من ايام ما كنت طفل بيرسم على اي ورق يبقى قدامه حتى لو كان ورق جرايد
لو ماكانش الدكتور ده سقطني وكنت نجحت بالكوسه ولا بالواسطه .. ماكنتش هقدر السنه اللي بعدها اثبت للدكتور اني طالب كويس وبيفهم لدرجة انه هو شخصيا بقى بيقوللي انت حسك الفني عالي جدا ولغاية دلوقتي لما بيشوفني هو بنفسه يقوللي ازيك يا فنان الشعب
فعلا .. انت تريد وانا اريد .. والله يفعل مايريد
وفعلا .. السن مش مجرد ايام وشهور .. السن ده لحظات بتعدي عالواحد
لحظات فرح وضحك .. ولحظات انكسار وألم
ملحوظتين بقى
اول ملحوظه .. بنات اخويا الصغيرين واللي لسه في رابعه ابتدائي وتانيه ابتدائي وكي جي تو .. بيدورولي على عروسه من المدرسات اللي بيدرسوهم وبيحبوهم في المدرسه .. لكن انا خايف اتجوز وابقى زي ابويا وازعق واتخانق مع وولادي لدرجة انهم يبقو بيتحاشوني زي مانا باتحاشاه دلوقتي
تاني ملحوظة بقى .. انا لسه برضه مسروق في السنه بتاعة البروفيل بتاعي
وديني مانا مسامحك يا بلوج يابن الحاج سبوت

سوووو

هناك 57 تعليقًا:

s يقول...

هيه هيه اول تعليق اول تعليق
لولولولولولولوليييييييي
متزعلش علي السنين اللي اتسرقت منك , اديك قلت اهوه انوا لولا السنين اللي ضاعت دي مكنتش هتبقي مهندس داكووور اد الدنيا.
وبعدين يا سيدي العمر مش بيتقاس بالسنين , بيتقاس باللحظات الحلوه اللي عشناها, سيبك انت :))
خلي انت بس بنات اخوك يشدوا حيلهم في موضوع العروسه ده, عايزين يا سيدي نفرح فيك ممممم قصدي نفرح بيك :))

fanan fa2eer يقول...

الله الله الله ده انت طلعت فنان متعدد المواهب بقي ياسو

رسم وتمثيل ونقد فني في البوستن اللي فات

ياللا اللي ناقص الموسيقي بقي وكمان الغنا

تعرف ؟ أنا باحس ان أي حاجة بتحصل للانسان بتحصل لسبب ما لا يعلمه غير الخالق

زي مانت شرحت كدة بالظبط فايدة السنين اللي اتسرقوا من عمرك أو احنا شايفينهم كدة بس رجعت وقولت الدليل علي ان ربنا عوضك عنهم بحاجات تانية

وسيبك من بلوج سبوت ده قاللي انه عامل فيك كدة مخصوص عشان يضايقك وأنا فضلت أقوله عيب ده سوووو غلبان لكن هو مارضيش أبدا

السن ده ماهو الا قانون احنا عاملينه عشان نقول لبعضينا انت كبرت قوي وانتي كبرتي قوي

خللي قلبك دايما في العشرينات وسيبك من السن خالص وعلي فكرة انت مش كبير خالص هو بس النقلة من العشرينات للتلاتينات بتبقي مأثرة ع الانسان شوية
وخلي بنات أخوك يشدوا حيلهم شوية بقي كفاية كدة

:))

Desert cat يقول...

معلشى بقى يا سووو سامح يا راجل خليك انت الكبير برضه
بلوج سبوت ده معروف اصلا انه حرامى على كبير
على راى الاستاذ الفنان عمرو دياب
هنعمل ايه يا قلبى فى ناس
بلوج سبوت ده معندوش احساس

لماضة يقول...

لاااااااااااااااااااا
مش ممكن
انت مواليد واحد اغسطس
انا كمان
يا محاسن السيد بنت عم محاسن الصدف

Rehab Mostafa يقول...

لو علمتم الغيب لأخترتم الواقع
ربنا مابيعملش حاجه وحشه
أما بالنسبه بقى للحاج أبو سوووو و أولاد سوووو المستقبليين ... احنا بنتربى غلط علشان نتعلم الصح :) يعني انت كده هتتفادى الحاجات اللي والدك كان بيتعامل بيها معاك علشان أولادك يحبوك ومايكونوش بعيد عنك زي مانت بعيد عن والدك
أهم حاجه بقى يا باشمهندس
انا ليه عندك تاج لازم تجاوب الأسئله بتاعته :)
ياللا كفايه كلام بقى .. بس بجد البوست جميل جداً :) سلام

بيقولوا سايكو يقول...

كل دى سنين ضاعت ؟ لأ لأ .. أحلى حاجة إنك لما حسبتها لقيت إنها ما ضاعتش .. أصل مفيش حاجة بتضيع لو فكرنا فيها كويس .. أكيد هنلاقينا استفدنا بحاجات حتى لو ماحسيناش فمابالك لو حسينا

عارف أحلى حاجة عاجبانى إنك مش دمان .. و انك اخترت كليتك صح .. ربنا يوفقك .. و يارب تلاقى العروسة و بيتهيئلى مادمت خايف كده يبقى إن شاء الله تبقى أب هايل

على فكرة البوست اللى قبل كده عجبنى جدا بس جيت متأخرة و مارديتش :)

koko يقول...

طيب يا سيدى ما تزعلش .. كل سنة و انت طيب بمناسبة انك كملت ثلاثين و نص .. و شكر خاص لبلوح سبوت علشان انا شفت فى البوست ده شويه عقل حلوين و شوية مشاعر طيبين .. و طبعا انا عارفه من الاول ان فيه خمسة مطرقعين على شوية شربات فى الدم ماشيين .. ايه الحلاوه دى .. مافيش جبنة

rainbow يقول...

تعرف يا عحمد

كلامك خلانى افكر كتير جدا فى نظرية لما اكون رايقة كده اقعد امزمز فيها .. نظرية واقعية قدرية بحتة

ان ما فيش حاجة اسمها صدفة وان كل شىء بيحصل بيكون نتيجة شىء وبيمهد لنتيجة جديدة .. ان القدر سلسلة لا تنتهى من الترابط والتشابك ولو كل حاجة فكرنا فيها كده لن نندم على شىء

هنقول دايما لعله خير

اربع سنين ما ضاعوش يا سوووو
دول عمرك الحقيقى من علامات رسمت سنك المعروف

بجد فنان الشعب احلى كتير من سووووو لانى مش عارفة يعنى ايه سوووو او اختصار لايه !!0

خالص تحياتى ودعائى الى فنان الشعب

هدى

هناء يقول...

انت اتسرق منك سنين و رضيت جات على ابن سبوت و مش راضي تسامح

دمك عسل، تحياتي

الشنكوتي الكبير يقول...

كل يوم يا احمد بتثبت انك مش بس فنان كوميديا وضحك لأ كمان انك انسان قوي ومن جواك حاجات جميله قوي
انا فعلا سعيد اني اقول وبفخر ان احمد سووووو يبقى صديقي العزيز واخويا كمان
اما عن الحاجات اللي بنحسبها اتسرقت مننا وبعدين نكتشف ان ربنا عوضنا بحاجات احسن كتير وان كده مصيرنا اتغير للأحسن قوي
عندي في بالي دلوقتي مليون حاجه مش عارف اقول منهم ايه
بس كفايه اني اقولك حاجه منهم وهي اهمهم ان الأنسانه اللي بحبها وهاتجوزها انشاء الله عرفتها برضه بسبب اني خسرت وظيفه كويسه وقبلت بوظيفه بسيطه قوي
ومن خلالها عرفتها واتقابلنا وبعد كده الحمد لله ربنا عوضني كمان بوظيفه احسن من اللي كنت عايزها
بجد شكرا علشان فكرتني اقول الحمد لله قوي
سلااااااااااااااااااااام

appy يقول...

انت عاوز تخذى العين لا برضه انا مصدقه الاستاذ/ بلوج انك كبير وعجوز

بس اقولك على حاجه متزعلش على سنين اتسرقت ومتندمش وخلاص عرفنا انك فنان يا فنان

awdhal- يقول...

bravo soooo
موضوع ممتع و كالعادة حرك عقلي و جابلي حالة مقارنة و تأمل في حاجات مرتبطة بالوجود و بحكمة ربنا من القضاء و القدر..
على فكرة أنا عربية بس مش مصرية

مروة الزارع يقول...

اولا كل سنة وانت طيب

ثانيا : ما احنا كلنا بتتسرق منا سنين وساكتين وراضين

عقبال 10000000000000 سنة يا عجوز

:)

appy يقول...

بقولك لك تدبيسه على الخفيف عندى فى المونه ورينى شطارتك علشان تنضم لنا فى سجن مارين ههههههههههههه تاج مستنيك

ToOoKa يقول...

السلام عليكم ورحمة الله وبركاته
من توكا الى الراجل العجوز واللى طلعلو لقب جديد وهو فنان الشعب

بما ان امتحان النهرده كان زى ال.... ومنيل خالص ولكن الحمد لله على كل شىء فانا لازم اقر عليك ومش حبطل غير لما اخلص الامتحانات

اما بالنسبه للسنين فكل سنه بتعدى بحلوها ومرها بتسيب بصمه فى حياتنا وبتغير من تفكرنا واستوعبا للاشياء
سعات فى حاجات بتحصل للواحد بيفكرها شر ولكن بعد فتره بنلاقيه انو كان الخير كلو

لو حسبت الحاجات اللى كسبتها من السنين دى حتلاقى نفسك كسبت كتير اوى لا ولسه فى المستقبل حتكتشف حاجات تانيه كمان

المهم انو الواحد ما يضيعش عمرو على الفاضى وياريت كل واحد يشوف هو عمل ايه وحيعمل ايه فى حياتو

اما بقه بالنسبه لاولاد اخوك فانا بصراحه بشجعهم ياعم عاوزين نفرح بيك وتجيبلنا سوو وسووة (مفروض مؤنث سوو) صغيرين كده
بعدين الواحد لو بص على السلبيات وبس مش حيتقدم حاول تكون اسره جديده وتتفادى فيها سلبيات اسرتك

وعلى العموم كل يوم فى عمرك وانت طيب هو يعنى لازم يكون فى مناسبه

وشكر خاص للانسه بنت خيخه واى كلام اللى خليتك تقعد مع نفسك وتفكر التفكير الايجابى دا

وفى الاخر حااااااااااااااضر حقوم اذاكر
ToOoKa

كاميليا يقول...

والله برافو عليك انك
بصيت للسنوات الضائعة
نظرة ايجابية

بيعجبنى اوى تفاؤلك الجميل
وروحك المرحة اللى مدية البلوج بتاع مذاق خاص

انت جميل اوى ياسوووو
غير بقى الاسم وخليه سووو عنده واحد وتلاتين سنة وبلاش تلاكيك البلوج ابن الحاج اسبوت لاممكن يكدب ابدا
هههههههه

اعترف

تحياتى لاخف ظل فى عالم التدوين

كاميليا

بت خيخة وأى كلام يقول...

اولا هو شكل صفحة تعليقاتك اتغير ليه
حاسة انى بكتب برجلى مش بايدى حاسة ان فيه حاجة اتشقلبت
ثانيا
انا كمان زيك فى كام سنة من عمرى اتسرقوا منى
بس لما بقعد افكر بطريقتك كدة
بكتشف ان الكام سنة دول لو ماكنوش اتسرقوا ماكنتش خلفت شريف ابنى
المهم البوست معناه حلو اوى
ان السنين مش ايام وشهور وخلاص
لا السنين فعلا لحظات فرح على شوية لحظات الم
ربنا يكرمك يارب ياسوووو
ويارب نفرح بيك قريب
اختك خيخة

shahy يقول...

انت مجرم ياسووو
انا اول لما قريت البوست قلت بس الواد ابني داخل في مرحلة اكتئاب
وبعدين حمدت ربنا انك كويس و راضي بقضاء الله وشايف المميزات كمان

بخصوص موضوع باباك ماتخافش انت مش هاتطلع زية لان ببساطة اللي اتلسع من الشوربة بينفخ في الزبادي

يعني انا متأكدة من انك هاتعمل عكس اللي كان باباك بيعملة

ياسلام ياسوووووو لما تلاقي عروسة كويسة ابقى قولي علشان افرح فيك يووووة قصدي بيك

في حاجة كمان اخيرة احب اقولها

انا فرحت جدا جدا جدا لما عرفت ان اسمك احمد اصل الاسم دة عزيز عليا اوي وبفرح لما الاقي حد قريب الي نفسي واسمة احمد
كدة انا اعرف اربعة مدونين رائعين اسمهم احمد
الاول : عجوز وعندة 30 سنة
الثاني : عيل مصري بس جدعه جدا
الثالث : قضية عم احمد
الرابع : spyfun

بارك الله فيهم وفي كل اللي اسمة احمد

Rehab Mostafa يقول...

ايـــــــــــه ده يا سووو :) هو انت اسمك أحمد :) ميرسي يا شاهي :)
طيب يا راجل حد يخبي الاسم الجميل ده والله أحلى اسم في الاسماء كلها :)
كده كده كنت هعرف لما تجاوب على التاج :)
عاشت الاسامي يا أحمد

3ala asm masr يقول...

متزعلش على أى حاجه راحت منك
وأديك قلت لو مكنوش راحو مكنش حصل وحصل وحصل
خلينا فى اللى جى أحسن
وعلى رأيك العمر لحظات
وانا شايفه أنه مهما طال بردو لحظات

زُمُرده يقول...

مش مهم ضاع اد ايه
ولا ازاي ؟؟
المهم ضاع في ايه؟؟؟؟؟؟؟؟؟؟
خير ...شر
حب...كره
فرح...الم

والاهم استفادت منه ايه؟؟؟؟
في ناس تفضل تبحث عن اللي المفقود لحد ما تفقد الموجود

ولا تبقى استفادت او استمتعت باللي راح ولا باللي جاي

قضاء الله وقدره

على فكره انا اشاركك في حاجات كتيره في البوست ده
بس مش هقولها

وش مطلع لسانه

L.G. يقول...
أزال المؤلف هذا التعليق.
Rain man يقول...

لان اخر دراسات علميه اثبتت ان دخول الطفل التعليم الابتدائي وهو عنده سن سنين بتخليه اكثر استيعابا من اقرانه اللي دخلو وهم عندهم خمس سنين

ما يعنيني هو أنني مواطن صالح غبي ولا يهمني أيهما تسبب في الآخر !! P:

S H A H يقول...

اخوك بقى اكبر منك بشهر
بس انا اللي ضحكت على البلوج
كل سنة ميلادية ادخل اضبطها و اخليها 29 بس

انت زومول و فاهم يعني اي كلمة 30, فاضل البنات تقولنا انا بموت في الشعر الابيض
قال 30 قال
خد حقك و افرسهم و نزل سنتين, و في شهر 8 ضبطلك سنة كمان

و صامدون في ال29

تحياتي
اخوك العجوز

Doba يقول...

سووو
العزيز
العجوز
ابو كرش
اللى ماشى فى الواحد وتلاتين ونص

كل يوم بيعدى بناخد خبرة فى حاجات حلوة وحاجات مرة ورخمة وبنتعلم واكيد بيعدى اليوم لان ربنا عاوزنا نتعلم

نيجى بقى لموضوع الجواز يا عجوز

آباءنا كانوا يفتقرو لنقطة الحوار والتفاهم الجيد فى معاملاتهم مع الآخرين وخاصة زوجاتهم لان بطبيعة تربيتهم أصبحوا رافضين انهم يعترفو بالخطأ ويقروا بأحقية حقوق الطرف الآخر وان عليك واجبات لازم تؤديها صح وبأمانة علشان ترعى أهل بيتك

الجواز زى مانت وكل واحد عارف ما هو إلا قرار بإتخاذ وتحمل المسئولية

لو عندك القدرة يبقى شيل المسئولية بس شيلها صح ومتخليش الأمور الإقتصادية وما إلى ذلك من حال البلد انها تخليك شايل الهم بالقوى يعنى

شيل كل يوم بيومه بالحلو اللى فيه والوحش تعامل معاه ولو المركب مالت لازم تتفقو تعدلوها سوا وتشيلوا المسؤلية سوا

أهم حاجة فى الجواز انك تكون عارف عليك ايه وليك ايه

وزى مزوجى العزيز بيقول أهم حاجة فى الجواز المرونة من الطرفين

ان الواد ميدقش للتانى عالواحدة
لان الجواز أعمق وأحلى من كده بكتير قوى

كن مرن التعامل والعشرة وهتلاقى انك عملت أحسن أسرة فى الوجود وكل لما تحس انك ماشى فى طريق غلط حاول تفرمل بدرى بدرى وصحح الاتجاهات وابدأ من جديد

أوصيك أن تختار زوجة تتمتع بعقل راجح حتى تتحمل معك صعوبة الحياة وكذلك أوصيك بعمل إستخارة قبل البدء فى أى خطوة

تحياتى وأمنياتى بكل الحب
والحياة السعيدة
يا عجوز يا ابو كرش

هبة

Soooo يقول...

S

الله يكرمك دنيا واخره يارب يا ستي
والحمدلله اني مهندس داكوور طبعا .. بس مش قد الدنيا

ومازال البحث جاريا من قبل بنات اخويا على المأسوف على شبابها


سلاموووووووووز

Soooo يقول...

fanan fa2eer

على فكره انا فعلا ممثل فاشل .. اضافة الى اني بارسم بصباع رجلي رسم لوذعي انا نفسي مش فاهمه
اما الكتابه فانا باكتب باحساس الهاوي اللي عايز يقول اللي بيحسه

مزيكا وغنا ورقص شرقي ورقص ايقاعي وباليه .. دول هيكونو في الخطه الخمسيه اللي جايه
نفسي اتعلم تانجو بجد .. وارقص بكرشي

ومازال البحث جاريا من قبل بنات اخويا على المأسوف على شبابها


سلامووووووز

Soooo يقول...

Desert cat

لا ممكن ابدا يا قطه
انا اللي يسرقني في سنه .. مش بعيد بعد كده يكمرني في البلوج بتاعي
انا هلجأ لقنوات الشرعيه .. ام بي سي تو والإل بي سي و قناة النيل للاسرة والطفل

وفعلا عمرو دياب ده يااااااه

وانتي عامله ايه وكده


سلامووووووووووز

Soooo يقول...

لماضة

شفتي بقى ان شهر اغطسطس ده شهر عظيم عظيم عظيم

وانا اقول باشبه عليكي ليه
فعلا .. الدم بيحن يا ولداه


سلاموووووووووز

Soooo يقول...

Rehab Mostafa

الحمدلله على كل شيئ

والله يا روبي انتي بتتكلمي بكلام نظري حلو جدا جدا .. لكن مش عارف هل هقدر اطبقه عملي صح لما اجي اتجوز ولا هفشل زي مانا بافشل في حاجات كتير

عموما سيبي الموضوع ده وخليها على ربنا

وبعدين تاج ايه ده؟؟
انا ماعرفكيش
انا مين؟؟
انا فين؟؟
انا فقدت الزاكره


سلامووووووووووز

Soooo يقول...

بيقولوا سايكو

يا قهلا يا قهلا بالفنون الجميله وبناسها

عامله ايه يا سايكو .. على الله تكوني سلمتي مشاريعك وحليتي كويس وربنا يكون سترها عليكي

اما بالنسبة لجزئية الندم .. فانا ندمت كتير على السنين دي في الاول .. لكن لما جيت حسبتها بالعقل وبالاحداث اللي حصلت حوالي .. لقيتني انا الكسبان الحمدلله

وبالنسبة للبوست اللي فات وانك جيتي متأخره .. في حكمه بتقول
ان أأتي متأخرا .. خيرا من اني ماجيش من اساسو


سلاموووووووووووز

Soooo يقول...

koko

لا لا لا
انا ماستحملش الكلام ده كللو ياعم
انا كده هفتكر اني عاقل بجد وتاخدني الجلاله وتلاقيني اتغريت .. وانا لما باتغر بابقى إنف قوي وباتكلم من طراطيف مناخيري وباكتب من طراطيف صوابعي

وبعدين بتشكري بلوج سبوت وهو سارقني .. شكلك متواطئه معاه في الجريمه
هي فعلا الخيانه بتيجي من الضهر .. ومن البطن ومن الكتف ومن الفخد .. من كل حته يعني


سلامووووووووووز

Soooo يقول...

rainbow

قريتي اللي مابين سطور كلامي يا هدى
وعرفتي قصدي من اني انزل البوست بجد

وبالنسبه لاسم فنان الشعب .. فده لقب انا ما استحقوش بأي حال من الأحوال
لان مافيش غير فنان شعب واحد بس من وجهة نظري
وهو سيد درويش

انا بقى .. سوووو



سلاموووووووووووز

Soooo يقول...

هناء

على رأي الاخ المناضل اللمبي
اللي يفرط في سنه من عمره .. ممكن يفرط في ساعه رمليه


منوراني والله


سلامووووووووووز

Soooo يقول...

الشنكوتي الكبير

حبيب قلبي والله
والله يا هوبا انا من ساعة ما اتعرفت عليكي وشيء رباني كده خلاني استجدعك وارتاحلك وماتسألنيش ليه

والله العظيم الكلام ده مش مجامله ولا رد على تعليقك اللي انا شايفه مبالغ فيه شويه

وفعلا ده اللي بيحصل في الحياه .. في وسط ماحنا بنبقى متضايقين من حاجه حصلت .. نلاقي ربنا بيدينا حاجه تانيه احسن مليون مره من اللي ضاع مننا

ربنا كبير قوي يا ابو الشناكيت



سلامووووووووووز

Soooo يقول...

appy

اخذي العين ايه بس
هو اني اكبر وابقى عجوز دي حد هيحسدني عليها

وبعدين انا مش زعلان على سنين ضاعت .. انا زعلان اني باتسرق عيني عينك كده يا آآبي


وعلى فكره .. انا ابعد مايكون عن الفن

ويخصوص تاج مجلس الشعب اللي اخترعته فرنسا .. انا باعلن عن مساندتي لام دوبه
لان فرنسا تريد ان تقوم بثورة عارمه ضد نظام ام دوبه الحاكم في المنطقه

والمنطقه مش ناقصه ثورات
كفاية اللي اتسرق مني يا فرنسا .. وكفاية اللي اتسرق مننا كلنا
فوقي يافرنسا واعرفي ان ام دوبة ايدها طايله
ده انا سمعت انها على علاقة وطيده بجهاز العروسين وجهاز تنظيم الاسره



سلامووووووووووووز

Soooo يقول...

awdhal-

الحمدلله ان الموضوع عجبك وتفاعلتي معاه وفكرتي باللي قلته

ويافندم عربيه ولا حتى انجليزيه ولا اي جنسيه
كلنا بشر .. المهم طريقة تفكير البشر
مش لونه ولا جنسه


سلامووووووووووز

Soooo يقول...

مروة الزارع

وانتي طيبه ياستي
بس معنى انك تقوليلي كل سنه وانا طيب انك مصدقه كلام بلوج سبوت
ولا انتي قصدك كل سنه وانا طيب بمناسبة قروب دخول امشير؟؟؟؟


سلامووووووووووز

Soooo يقول...

ToOoKa

من الراجل العجوز وليس فنان الشعب الى توكا

وكتاب الله ماعرف اللي حاطط الامتحان ولا لي علاقة بي ولا اي حاجه يابيه

وبعدين انتي شكلك كده مقضياها لعب وفرجه على مدونات الناس وتيجي ساعة الامتحان تقولي كاني وماني

قومي زاكري وبعد ما تخلصي الامتحانات ياستي ليكي عندي عزومه

يلا قوووووووووووومي


سلاموووووووووووووز

Soooo يقول...

كاميليا

تصدقي وتؤمني بالله
انا فعلا كنت ناوي اقفل البلوج ده بعد ما اتم الواحد وتلاتين رسمي واعمل بلوج تاني اسميه عجوز وعندي واحد وتلاتين سنه

لكن تقريبا بلوج ابن سبوت عرف بالمخطط ده قام سارقني وكأنه بيجبرني وبيقولي وريني شطارتك يا عم الامور

لكنني لن اتزحزح .. ولن اتنحنح .. ولن اتكحكح .. ولن اترنح .. ولن اتمرجح


سلامووووووووووووز

Soooo يقول...

بت خيخة وأى كلام

شفتي بقى انها مؤامره علي يا خيخه
يعني الاول يسرقني بلوج في سنه
وبعدين يروح مغيرلي شكل صفحة التعليقات

فاضل انه بعد كده ينزل المواضيع اللي تعجبه ويقرطسني


ربنا يكرمك يارب دنيا واخره قادر يا كريم
ويخليلك ابنك وجوزك ويبعد عنكم شياطين الانس والجن يارب


سلامووووووووووز

Soooo يقول...

shahy

ربنا يكرمك يا ماما شاهي يارب
ويخليني ليكي عشان كل شويه اخضك علي
ويخليكي لي عشان تدعيلي وتقفي جنبي وتسلفيني تمن كروت شحن الموبيل كل ما اتزنق

وبالنسبه للي اسمهم احمد
انا سمعت اشاعه اننا على الفين وعشره .. هنبقى اكتر من البني ادمين



سلاموووووووووووز

Soooo يقول...

3ala asm masr

انا الحقيقه زعلت في الاول
وده الطبيعي
الانسان لما بتحصللو حاجه بيبقىمستعجل وغضبان وقرفان وحزين .. لكن لما ربنا يكرمه ويعوضه عن اللي حصل معاه بحاجه كويسه .. يبقى ساعتها بيصدق ويؤمن فعلا .. ان الخيره فيما اختاره الله


منوراني يافندم حضرتك سيادتك



سلاموووووووووز

Soooo يقول...

زُمُرده

في ناس تفضل تبحث عن اللي المفقود لحد ما تفقد الموجود

وجون وجون وجووووووووووووووووون

اهو انتي لخصتي كل اللي مابين سطور البوست في الجمله الهايله دي

وبعدين انا تقريبا عارف ايه اللي انتي بتشاركيني فيه في الموضوع ده

وش واحد لابس نضاره شمس ومبتسم بعنطزه


سلاموووووووووز

Soooo يقول...

L.G

اولا انا مش فاهم التعليق حذفتيه ليه
ثانيا .. لو بصيتي جواكي وفكريت مع نفسك .. هتعرفي قيمة اللي انتي كسبته لما افتكرتي ان ضاع من عمرك كتير

وزي ما قالت زمرده
في ناس تفضل تبحث عن اللي المفقود لحد ما تفقد الموجود

سلام

Soooo يقول...

Rain man

اخر الدراسات اثبتت ان مافيش مواطن صالح غبي .. بيقول على نفسه انه مواطن وصالح وغبي
ممكن يكون حاجه واحده بس .. يا اما مواطن .. يا صالح .. يا غبي
اختار من متعدد



سلاموووووووووز

Soooo يقول...

S H A H

حمدلله عالسلامه ياعم

يعني انت جيت من ايران وانا كنت مستني انك تكون جبتلي معاك سجاده ايراني ولا قطه شيرازي من شيراز اللي مافيهاش قطط زي مانت قلت .. لكن انت جيت واختفيت

عموما انا هفكر في الاقتراح بتاعك ده
بس هل ده غش ولا عادي يعني بما ان تلات تربع الستات سنهم بيقف عن اربعه وتلاتين سنه لو متجوزين .. ولو مش متجوزين بيقف عند سته وعشرين
؟؟؟


سلاموووووووووووز

Soooo يقول...

Doba

عارفه يا ام يوسف .. امي الله يرحمها لما كنت اعمل حاجه غلط وتزعقلي كانت بتقولي اهو ولادك هيعملو فيك كده

تقريبا الكلمه دي لزقت في دماغي وخايف احسن تحصل

مش عارف بقى


عموما ربنا يعمل اللي فيه الخير ان شاء الله



سلامووووووووووووووز

Rosa يقول...

اولا اولا كدا و قبل اي كلام او سلام او حتى ابتسام
زعلانه جدا جدا من هنا لحد منابع النيل في بحيرة فيكتوريا
عشان حظرتكم معدتوش بتعبروا مدونة حظرتنا و دا شيء شنيع فظيع دميع (بيخلي العين تدمع يعني)
دا كان للعلم و الاحاطه بس
-----------
ثانيا , كل سنة و انت طيب , يعني انت عايز تفهمني انك تعرف عيد ميلادك اكتر من البلوج سبوت؟؟؟؟
انت انسان غريب فعلا , روح يا سيد راجع شهادة ميلادك و اسأل و الد حظرتكم هتلاقيك مواليد نيياير و انت ماتعرفش
قال بتشكك في البلاوج سبوت قال :D
:)
انا اخدت بالي برده و قلت يا ربي هوا مش كان بيقول في اغسطس
يلا خير
تعرف البوست دا بيأكدلي فعلا ان وعسى ان تكرهوا شيئا و يجعل الله فيه خير كثيرا
و اكيد كل الخير هو الي دايما بيحصلنا
و لسه مستنيه برده ترد على تاج التفائل عشان هتلاقي اجابه اكيد
و كل سنهو انت طيب
:D

سهر الليالى يقول...

بجد ربنا يزيدك رضا من عنده
حلو اوى يا سووو البوست والمعانى اللى وراه لان فعلا لو كل واحد تتبع حياته كدة هيلاقى أن فعلا لكل شىء ميعاد وأن إللى ربنا مقدرة هو أحسن حاجة

أنا كنت عارفة أنك لسه وأن دى أكيد غلطة لأننا ولاد شهر واحد بعتز بيه

وربنا يوفقك وتلاقى نصك التانى مش عروسة وبس

تحياتى يا سووو وعذرا على التأخير

wa7dania يقول...

ولا تزعل نفسك
مانا اتسرق مني سنين ياما برده
6 سنين و 9 شهور أول ابتدائي
و سادس ابتدائي (دبي)
و 2 إعدادي هندسة (أسيوط)
و.....إيه الفضايح دي
مالك بس يا سوووو
اتجوز ماتقلقش
بس حبها الأول
صدقني
منى

لـــى لــــىِ يقول...

المهم يعنى الاخر طلع عندك كام سنة؟؟

طب والسنة اللى اكلها الحاج بلوج الاسبوتى ده هاتعمل فيها ايه

بقولك ايه
تعالى زورنى وقولى
باعرف اكتب ولا لأ
عشان لو مش بعرف
اخدها من قصيرها وارجع
للخلف دوور

سلامووووووتى

لـــى لــــىِ يقول...

ههههههههه

استريحت؟

رجعت السنة اللي كان الحاج بلوج لطشها؟

والله براوا عليك

سووو عنده 31 سنه الا سبع شهور وبعد كام يوم هايبقوا ست شهور
مفيش فايدة ياجميل ها تم 31 في اغططس يعني اغططس

ههههههه
هابي بيرث اغسطس ياابو سعود

لي لي

د/اجدع بنوته يقول...

لا حول ولاقوة الا بالله

ايه المأسى دى .. ياأبيه

وضايع منك اربع سنين

وحاى تحمرق مع البلوج سبوت علشان اكلك ف كام شهر

هههههههههههههههههههههههه

العمر الطويل ليك ياااارب

عمرو النوبى يقول...

يخرااااابى كل دى سنين اتسرقت منك

لا ياعم انا اتسرق منى اقل من كده بشوية ههههههههههههههههه

على العموم ربنا يديك طولة العمر

وحافظ بقا على سنينك العمر مش بعزقة

تحياتى ليك ياباشا

رئيس جمهورية اسوان العربية

وياريت تشرفنى فى مدونتى

غير معرف يقول...

اولا هابى برثداىتو يو كل عام وانت الى الله اقرب وعلى طاعته ادوم والى قلوب عباده احب وعن معصيته ابعد واقصى والى ابيك ابر والى عروسك المنتظر فى احترام وود ومن اباء اخوانك اعظم واكبر قدوة ومن رسولنا متعلم ومعلم ومن نصرة قضايا مجتمعك اقدر ومن مجاهدتك للظلم اقوى ..
والعام القادم تكون انت وعروسك وولديكما تحتفلان بعيد المولد الذى يذكرك بانك عشت على هذة الارض ثلاثين عام
المهندس سوو ما اثر بى حقا كان كلامك عن الوالد وانا هنا ادعوك ان تطلب منه الغفران وتطلب له العفو
وارجو منك ان تلتمس لهم الاعزار انهم لم يكونوا يعلموا اساسيات التربية او حتى اولوياتها التى نعرفها الان فهو رباك كما رباه ابوه
والحمد لله فقد انشئك رجلا يعتمد علية ذو خلق وغيرها من الصفات التى انت اعرف منى بها فجزاه الله خيرا عما فعله
تعلم انا فتاة ابلع حوالى تسع عشر عام كان بى هكذا دائما ولكننى والحمد لله كنت الاقدر بين اخوانى واخواتى على تغيرة وغيرته والان هو اب حنون للغاية وطيب القلب ومتفهم لامور كثيرة لا اقول كل الامور لن عصرهمغير عصرنا
انا اسمى بلسم من المنصورة وهذه مدونتى
http://sibakmnhom.blogspot.com/
هى ليست مشهورة ولكنى احبها
تحياتى ليك واتمنى لك حياة هانئة بطاعة الله وحبه عامرة منيرة
جزاك الله خيرا

Soooo يقول...

Rosa

سهر الليالى

wa7dania

لـــى لــــىِ

د/اجدع بنوته

عمرو النوبى

غير معرف او بسمله

----

مافيش اي كلام اقدر ارد بيه على تعليقاتكم واللي عارف انها متأخره قوي
غير اني اقول .. الحمدلله ان ربنا اداني اخوات واصحاب بقيت باحبهم بطريقه بشعه جدا جدا جدا

ربنا يارب يسعدكم ويبسطك ويوفقكم ويكرمكم ويهيئلكم الخير من عنده ويرضيكم دنيا وآخره يارب




سلامووووووووووز