الثلاثاء، ٢٩ صفر ١٤٣٠ هـ

!! يا سلاااام

مره واحد مسيحي دخل مسجد وهو ماسك في ايده سكينه .. وراح باصص عالناس في المسجد وقال بنرفزة وعصبية
المسيحي : في حد هنا مسلم ؟؟؟
الناس كلها خافت .. لكن طلع من وسطهم واحد شجاع
المسلم الشجاع : انا مسلم
المسيحي : طب تعالى عايزك برا
طلعو برا المسجد .. قام المسيحي قال للمسلم
المسيحي : بص .. انا عندي ضيوف مسلمين .. وجايب لسه حالا خروف عايزك تدبحهولي عشان اعرف اعملهم اكل
المسلم الشجاع : - وهو بياخد منه السكينه - انا اعرف ادبح بس .. ممكن بعد ما ادبح تتشوف أي حد في الجامع بيعرف يسلخ
بعد ما المسلم الشجاع دبح الخروف .. قام المسيحي واخد السكينه وهي كلها دم وداخل المسجد تاني
المسيحي : حد هنا مسلم ؟؟؟
الناس كلهم شاورو على امام المسجد وهم خايفين ومرعوبين .. قام امام المسجد بصلهم وهو مستغرب
امام المسجد : ياسلاااام .. هو اكمني صليت بيكم ركعتين .. بقيت مسلم خلاص !!!؟؟؟

----

.. النكته دي بعتهالي عالميل هشام .. صاحب مدونة جعلوني مريض نفسيا
!! وبعد ما ضحكت شويه .. لقيتني بقول الله .. ماهو ده اللي حاصل بجد
أي حاجه تحصل يروحو ملبسينها في الاسلام .. أي انفجار يحصل يروحو ملبسينه في الاسلام
مع ان الاسلام مش كده خالص .. ومافيش واحد مسلم هيعمل كده اساسا
ولو حد عمل كده وهو فاكر انه بيخدم الاسلام .. يبقى اتعمللو غسيل مخ صح .. واللي عملوله الغسيل ده ممكن يكونو أي حاجه .. اسرائيلين .. صهاينه .. سيخ .. انشالله حتى يكونو من دولة ممبوزيا العليا
ايوه مش مسلم .. ولا مسيحي .. ولا مصري من الأساس .. اللي عملو كده ناس مالهاش مصلحه غير انهم يقرفو مصر والمصريين وبس
.. ادبح ياعم واسلخ .. مصر مسلمين ومسيحين هيفضلو مع بعض
عالحلوة .. والمُـرّه

سوووو

السبت، ٢٦ صفر ١٤٣٠ هـ

!! مُجرد .. تشبيه

!!! عارفين الفار لما يتحط جوا مكعب صغير قوي .. مكعب يا دوب اكبر من حجمه بحاجه صغنغنه
!!! عارفين لما أرضية المكعب ده .. تكون سخنه نار .. والفار مش عارف يقف على بعضه
!!! عارفين لما جدران المكعب تبقى متكهربة .. ولو الفار لمسها يتكهرب ويتلسع
.. أهو انا بقى .. في وسط الفلقطه والشقلطه والمرمطه اللي انا فيها حاليا
حاسس اني برغوت على ضهر الفار اللي اتكلمت عنه آنفاً

إيه آنفاً دي!!!؟؟

ملحوظة .. بس شقية

!! البت المشمشية حلوة بس شقية .. ضيّعت مدونتها اللي كانت لسه عاملاها مافيش كام يوم
وعملت مدونة تانية بنفس الاسم برضه .. ونقلت كل مواضيعها في المدونة الجديدة
.. ولأنها طول عمرها ناصحه نصاحة ما وردتش على حد .. قامت عملت مدونتين بنفس الاسم
.. والاتنين في نفس ذات البروفيل .. عشان لما الباسوورد تضيع منها تاني مره
!!! المدونتين يضيعو مره واحده .. ونخلص

عمولتي تتشال على باب المدونة يا مشمشية .. ماشي يا حاجه ؟؟؟

سوووو

السبت، ١٩ صفر ١٤٣٠ هـ

!! سفّاح المعادي

يوم الاربع اللي فات .. اول حاجه عملتها اني مسكت جرنان الاهرام عشان افهم ايه اللي حصل في حوار ابو تريكه والدربكة اللي حصلت .. وإذ بي اتفاجأ ان في خبر بيقولو انهم مسكو سفاح المعادي
يااااه .. طب والله انا كنت نسيت ان المعادي فيها سفاح وعمل زيطه وزمبليطه
---
نبذة تاريخية عن السفّاح : ظهر سفّاح المعادي في صيف سنة الفين وسبعه في منطقة المعادي ودار السلام وصقر قريش وفايده كامل والبساتين .. وعرف الناس بوجوده عن طريق تعدد حوادث تشويه المؤخرات النسائيه .. وذلك لأنه كان يصحى الصبح - وعلى غيار الريق - ويسرح يعوّر ويعلّم على مؤخرات البنات بموس حلاقة أو بمطوة , وبالرغم من التواجد الأمني بكثرة في المناطق التي سبق ذكرها .. الا ان هذا لم يمنع السفّاح عن ممارسة هوايته في التعليم على الأظائيظ - نسبة للمعجم الخيخي - بل انه وحتى في وجود الأمن من أمناء شرطه وظباط متنكرين ومرشدين ومخبرين معروفين شكلا واسما .. استمر السفّاح في اللي بيعملو
لدرجة ان شباب المعادي - وانا واحد منهم - خفنا على أظائيظنا وقلنا هنلبس جلاليب واسعه وبلاها منطلونات .. احسن يكون السفاح أحول ولا حاجه وبدل ماتيجي الطوبه في المعطوبه .. تيجي المطوه في الأظئوظة

---
!!! الجميل انهم مسكو سفّاح المعادي .. في شبرا
هنا بقى لقيتني قلت يالهوي .. هو السفاح اكتشف انه مش عادي في المعادي .. قام ناقل على شبرا وبنات شبرا .. وكأنه بيطبق اغنية ريكو المعروفه .. عادي في المعادي !!؟
!! ده مش بعيد على كده يطلع على الزمالك كذلك .. أو يروح لبنات حلوان أشكال وألوان
ولا يكونش يا ولداه لقى الرزق شح في البلد والمنطقه .. قال انا اهاجر على منطقه تانيه .. ورب هنا رب هناك .. ومافيش حد بيبات من غير عشا .. او حتى من غير مايعوّر أظائيظ !!؟؟

.. فتحت صفحة الحوادث عشان استفهم ايه الحوار اكتر .. ولقيت العنواين دي في الخبر

.. بعد عامين من ارتكابه حوادث أثارت الذعر بضاحية المعادي
القبض على سفاح المعادي في أثناء ارتكابه حادثا بشبرا

.. المتهم يعمل حلاقا ومهتز نفسيا وعمره تلاته وعشرين عام
ويمثل أمام النيابة اليوم للإدلاء بتفاصيل حوادثه

.. الشرطة جندت خمسين فتاة بالمعادي حتى يتم ضبط المتهم
لكنه سقط في منطقة أخرى

!!!!!!!!!!!!!!!
وعند آخر حته لقيتني قلت ايه .. خمسين فتاه .. وجندتهم الشرطه .. طب ليه .. ده على اساس ان المعادي مافيهاش بنات مأظأظه .. طب دي المعادي طول عمرها مأظأظه
!!!!!!!!!!!!!!
وبعدين هو ايه ذنب شباب المعادي انهم يتحطو في المزنق ده .. ويبقو شايفين خمسين مزه - بالإضافة للمزز الموجوده اصلا - من أفخر انواع المزز ماشيين في شوارع المعادي .. وفي حماية المخبرين وأمناء الشرطة
!!!!!!!!!!!!!!
ايه ذنب شباب المعادي مايبقوش عارفين يميزو مين المزز القطاع العام من المزز القطاع الخاص
!!!!!!!!!!!!!!
.. لأ بقى .. انا باعترض .. وهقول زي ما قال السادات زمان
القدس دي أرض الأديان .. بلغ بيجين احتجاجي الرسمي على ضم القدس
.. بس انا هقولها كده لأي ظابط يقابلني
!! المعادي دي أرض الأظائيظ .. بلّغ العادلي احتجاجي الرسمي على قفش السفاح

ايوه .. افرجو عن السفاح .. ونزلوه المعادي تاني .. وكترو المزز يا حكومة .. كتروهم عشان تعرفو تقفشوه بالجرم المشهود .. مش تقفشوه وهو نايم في مدخل عماره
نزلوه المعادي تاني واقفشوه في المعادي .. دي تبقى عيبه في حقي وحق كل معداوي اصيل لما سفاحنا يتمسك في منطقة تانيه غير تابعه لسلطتنا ونفوذنا المعداوي

وبعدين خمسين مزه ايه .. انتو بتهرجو .. ده سفاح يا حكومه .. سفااااااااااااااح .. يعني حاجه كبيره
اقل واجب تغرقو المعادي ببتاع الفين وسبعمية مزه من النوع الفاخر المأظأظ

وياريت لو عملتو فينا معروف وتسيبوهم بعد ماتقفشو السفاح .. آه والنبي .. اصل ايه اللي هيحصل يعني لو سبتوهم .. ولا حاجه .. بالعكس كمان .. لو سبتوهم هيبقو هم دول اللي يقفشو أي سفاح جديد يظهر
آه طبعا .. أي نعم وجودهم هو اللي ممكن يعمل كبت في بعض العقول المريضه - من الشباب اللي مش لاقي شغل ولا عارف يتجوز وبيضرب مخضرات - بس ايه المشكله .. فرويد قال المجرم بيتولد مجرم بالفطره .. يعني كده كده هيبقى سفاح ويعور مؤخرات المزز .. وده كلام علمي واسألو أهل العلم

وحتى لو ماظهرش سفاح جديد .. سيبوهم يظبطو المعادي وشباب المعادي .. وتبقى خدمه جديدة تضاف الي الخدمات النظيفة اللي بتوفرها الحكومة المباركه

وبناءا على ما سبق قوله .. قررت انا ومن معي من جرعان المنطقه .. اننا هنعمل مظاهرة معداويه .. تبدأ من ميدان الحريه ولغاية ميدان صقر قريش .. مرورا ببوابة نادي المعادي وميدان سوارس .. وجراند مول وسينما فونتانا الصيفي .. وشارع الصفا واللاسلكي وميدان مؤمن .. وشارع شركة جابكو والهيئة العامة للبترول .. وشارع تلتمية واربعة والمودرن أكاديمي .. ونهايتنا هتكون في ميدان صقر قريش .. وتحديدا اكتر .. قدام البحث الجنائي ونقطة صقر قريش .. واخدين بالكو .. قدام النقطة مش جواها .. هم هيبقو ياخدونا جواها بعدين
.. وهنهتف بأعلى صوت ونقول
السفاح السفاح .. يا نخلّي عيشتكو جراح
!!!!!!!!!!!!!!!!!!!!!!!!!!!!!
------
.. ملحوظة بطعم الإجرام والسِفاحة

.. انا حطيت موضوع عن فيلم الوعد زي ما وعدت الناس اللي مهتمة بالسينما
وهتلاقوه هنا هو

سوووو

الثلاثاء، ٨ صفر ١٤٣٠ هـ

!! الهيئ و الميئ

أجبرتني الظروف اني انزل الصبح بدري عشان ابقى موجود في الغرفة التجارية اللي في باب اللوق .. وده عشان أقدم شوية ورق ومستندات واعمل سجل تجاري للمكتب بتاعي اللي مش ناوي يتفتح في سنته ده
دخلت الغرفة التجاريه لقيت طابووووور طووووويل .. وكل الناس دي زي حالاتي .. ولما لقيت الحوار مش هيخلص في يوم ولا يومين تلاته سبعه .. قمت واخد روحي وقلت يا واد يا سوووو انت بقالك فترة كده ما دلعتش نفسك ولا عملت رحلات مكوكية سينمائية من اللي بتعملها
وفعلا .. رحت طالع عالسينما وقطعت تذكرة .. وانا واقف كده وعمال اتفرج عالبوسترات بتاعة الافلام .. لقيت بنت كده قد تلتاشر اربعتاشر سنه بتقرب ناحيتي .. وبتقولي معلش بعد اذنك ممكن لو معاك موبيل اعمل مكالمة .. الحقيقة لقيتني انحرجت قوي .. خصوصا واني كنت لابس البيرية اللي كل ما يشوفني حد بيه يفتكرني رائد فضاء .. قلتلها ومالو .. اتفضلي .. خدت الموبيل وادتني ضهرها وراحت متصله بحد .. وبالرغم من اني ماكنتش رامي ودني ولا بتاع .. بس كنت واخد بالي احسن تطلع تجري بالموبيل .. وانا طلع عيني فيه ومش هعرف اجيب عدة تانية
لقيتها زي ماتكون بتتكلم مع واحد .. وتقريبا كده الواحد ده كان نايم .. وهي اول ماحست انه نايم راحت مزعقه معاه وقفلت السكه .. وادتني الموبيل وهي بتشكرني وباين عليها الغيظ على الخنقه .. ومشيت من قدام السينما

ماشيلتش في نافوخي وقلت انا مالي ياعم .. شوية كده ولقيت نمرة غريبة بتتصل بي .. قلت يمكن صنايعي جايبلي شغلانه .. اصل انا على عكس مهندسين الديكور .. الصنايعية هم اللي بيجيبولي شغل .. مش انا اللي باجيبهم لما يكون معايا شغل
ام هند .. رديت على الموبيل .. لقيت واحد صوته زي مايكون كان نايم وقام من النوم
الصوت : الو
سوووو : ايوه مين معايا ؟؟
الصوت : معلش بس اصل في واحده كانت لسه مكلماني من الرقم ده
سوووو : اه .. فعلا في واحده استلفت مني الموبيل عشان تعمل مكالمة
الصوت : ايه ده .. انت مش كُشك !؟؟
سوووو : لأ والله كان نفسي بس مانفعش
الصوت : اه اه .. طب هي مشيت ولا لسه معاك؟؟
سوووو : معايا ايه بس .. دي واحده شافتني واستلفت الموبيل .. اتصلت بيك وبعدين مشيت
الصوت : تمام تمام .. طب هي حلوة؟
!!! سوووو : نعم
الصوت : بقولك هي حلوة !!؟
!! سوووو : مش فاهم
الصوت : طب معلش يعني .. انت عندك كام سنه !!؟؟
سوووو : هو في ايه .. انت عايز ايه ياعم عالصبح ؟؟؟
الصوت : ياباشا روّق شويه .. اصل بصراحه كده البت دي انا ماعرفهاش ولا شفتها قبل كده .. واتعرفت عليها عالانترنت
!!!!!! سوووو : انترنت
الصوت : آه .. في محادثة .. وبعدين خدت الايميل بتاعها واتكلمنا مع بعض مره ولا مرتين .. وهوبا الهيئ و الميئ .. ظبطت خروجه معاها نروح السينما أول ما تخلص الامتحانات .. ولو طلعت حلوه هاجي اقابلها .. طلعت مش قد كده انفض واكمل نوم
- سوووو : - صمت على اذبهلال على تناحه على حالة مرار
الصوت : عشان كده باسألك هي حلوة !!؟
سوووو : ظبطت ايه ونت ايه وهيئ و ميئ ايه - ورحت منفجر فيه - النت معمول عشان تعمل حاجه مفيده .. تنزل برنامج مهم ولا حتى فيلم ليه لازمة .. مش معمول عشان الهيئ و الميئ .. وبعدين ازاي يعني بنت متعرفكش ولا انت تعرفها .. تخرج معاك تروحو سينما لوحديكم !!؟؟؟
الصوت : هممم .. يعني مش حلوة !!؟
طبعا قفلت السكه على مراخيره مش في وشه وبس .. قال الهيئ والميئ قال

ملحوظة

لو حد عايز يعرف انا شفت فيلم ايه وايه رأيي فيه .. يدوس هنا

.. قبل ماحد يقول اني ظبطت البنت بعد اللي حصل ولا خدتها معايا السينما واهي تونسني شوية وبتاع
احب اقول انا مش بتاع الهيئ و الميئ .. انا بتاع الشيربيئ
!!! وبعدين هي ماكانتش حلوة قوي يعني

سوووو