الأربعاء، 27 صفر، 1429 هـ

(6)مذكرات طفل .. طخين

المحطة السادسه .. انا عايز بيبس
--------------


رئيس الجهاز الامني رفيع المستوى : - وهو يعرض مجموعة صور لشخصيات على شاشة اللاب توب - الشهيد محمد محمد محمد .. الشهيد احمد احمد احمد .. الشهيد جرجس جرجس جرجس .. الشهيد فوزي فوزي فوزي .. كل دول شهداء دفعو حياتهم تمن لتراب الوطن
سوووو : - وانا بأكل المكرونه الفرن - الله يرحمهم .. بس دول ماتو ازاي ؟؟
مصطفى شعبان : - وهو يأكل الكشري - ماتو في حرب تلاته وسبعين .. بس كانو صحاب توفيق بيه عبد الحميد .. وهو بيفرج صورهم لكل الناس اللي بيجو هنا
سوووو : لا يا شيخ .. بس توفيق بيه مين ولامؤاخذه ؟
رئيس الجهاز : محسوبك - وينظر لي مستفهما - انت عايز كيس الشطه اللي معاك ؟
سوووو : لا مش محتاجه .. مش فاهم ليه بيحطو شطه مع المكرونه اصلا !!!؟
مصطفى شعبان : تلاقي الراجل غلط ولا حاجه - ينظر لي ولتوفيق بيه - حد عايز بيبس ؟
رئيس الجهاز : انا هاتلي سبرايت
سوووو : آه انا عايز بيبس
وفجأه .. تدخل علينا منى زكي .. وياللهول .. عالحقيقه حلوه قوي ورقيقه قوي وقصيره قوي .. عسوله بنت الايه .. ياختي كميله ياختي
توفيق عبد الحميد : - وهو ينظر لمنى زكي - الدكتورة منى زكي .. هتبقى معاك في المهمه .. وهي المسئول الاول عن كل ما يتعلق بالحوارات النفسيه والعصبيه والكلام الفاضي الاهبل ده
سوووو : بسم الله معانا
منى زكي : - بعد أن جلست في مواجهتي - ميرسي .. لسه ضاربه ساندوتش بتنجان بالطعميه
مصطفى شعبان : - بعد ان فرغ من الاكل - الحمدلله .. اللهم ديمها نعمة واحفظها من الزوال - ينظر لمنى زكي - اجبلك بيبس ولا سبرايت ؟
منى زكي : لا انا بقول نشرح لسوووو طبيعة المهمة الاول .. وبعدين ننزل نشرب في الكشك تحت .. ونوفر النص جنيه اللي بياخده الاوفس بوي
توفيق عبد الحميد : - وهو يقف - خلاص فل .. اشرحو انتو لسوووو المهمة .. وانا هقوم اروَّح عشان مطبق ورديتين من امبارح وجسمي كللو مكسر
يقف الجميع بمافيهم انا .. ثم ينظر رئيس الجهاز لمصطفى ومنى ويخاطبهم بلهجة الآمر
توفيق عبد الحميد : مش عايز أي مشاكل .. حبو بعض يا ولاد
مصطفى شعبان : ماتقلقش يابرنس
منى زكي : كللو ألسطه بعون الله

يخرج رئيس الجهاز ونجلس جميعا في اماكننا كما كنا قبل قيامه .. وتنظر منى زكي لي باستغراب لاني لسه ماخلصتش المكرونه .. فيبتسم مصطفى شعبان ويزغدني في رجلي من تحت الترابيزه .. وعندما نظرت له اشار لي بحركه مغزاها انه خلاص على كده عايزين نخش في المهم
فأخذت اخر معلقتين خطف في بقي وحطيت العلبه الفاضيه في الكيس ونظرت لهم مشيرا بيلا بقى عايزين نخش في الجد
منى زكي : - وهي تنظر لي - طبعا انت يا سوووو عرفت مين هي سونيا جراهام .. وعرفت انها قاتله مأجورة ومجرمة خطيره وياما غلبت ادهم صبري في رجل المستحيل
مصطفى شعبان : وعرفت كمان انها اتجوزته في السر في الحلقه السبعتلاف ربعميه تسعه وعشرين .. وخلفت منه تامر زي ماقلنالك
سوووو : بس اللي مش قادر افهمه .. انا ايه علاقتي بالموضوع ده كللو .. وليه سونيا خطفت اهلي .. وازاي انقذ اهلي قبل يوم الجمعة اللي جاي ؟؟
ينظر مصطفى شعبان ومنى زكي لبعضهم ويبدو عليهم التعجب .. ثم ينظران لي مرة ثانيه ويسألني درش
مصطفى شعبان : اشمعنا يعني يوم الجمعه يا سوووو ؟؟
سوووو : عشان انا عندي رحلة يوم الجمعه في المدرسه .. وامي وعدتني انها هتعمللي صينية مكرونه باشاميل وسرفيس بوفتيك وطبق كفته على كبيبه .. وامي نفسها حلو في الاكل بصراحه .. ومش طالبه معايا اطلع الرحله دي وابرشط عالعيال خصوصا انهم مش بيرضو يدوني اكل كتير عشان ممكن اخلصلهم الاكل
ينظر مصطفى شعبان لمنى زكي ويبدو عليهم التعجب والدهشه .. فتسألني منى زكي
منى زكي : الرحلة دي .. المدرسه اللي عاملاها ؟؟
سوووو : ايوه
مصطفى شعبان : الرحلة دي رايحه فين ؟؟
سوووو : القناطر الخيريه .. اشمعنا ؟
ينظر مصطفى لمنى ويبدو عليهم الاهتمام ويقفان مرة واحده ناظرين الي وقائلين
منى ومصطفى : يبقى لازم نبدأ التمارين بسرعه
سوووو : - قمت وانا مخضوض قوي - مصيبه .. كارثه
مصطفى شعبان : مصيبة ايه ؟؟؟
منى زكي : كارثة ايه يا سوووو ؟؟؟؟
سوووو : نسينا نجيب الرز بلبن بالمكسرات
--------
تدخل سونيا على الغرفة المحبوس بداخلاها والد ووالدة سوووو .. وتشير للحارس ان يفك الكمامه التي على افواههم كي يستطيعو أن يأكلو الاكل الذي احضره سامبا لهم .. وبمجرد ما ان ينزع الحارس الكمامه من على فم والد سوووو .. صرخ بهم وقال لهم بلهجة المحذر
ابويا : انتو اتجننتو .. مش عارفين انا مين واقدر اعمل فيكم ايه ؟؟؟
سونيا : - وهي تنظر له بهدوء - عارفين .. انت ابو سوووو .. ودي امه .. ولو اتكلمت ولا زعقت مره تانيه هنحط الكمامه دي على بقك ومش هتاكل ولا هتشرب لغاية ما ابنك سوووو ينفذ كل اللي هنطلبه منه
في اثناء حوار سونيا لابويا كان الحارس قد نزع الكمامه من على فم امي .. فنظرت امي لسونيا وقالت لها بصوت هادئ
امي : طب يابنتي هو انتو عايزين من سوووو ايه بس .. ده عيل غلبان ومالوش في أي حاجه
سونيا : - وهي تنظر لامي - يا حاجه ابنك مش هيحصللو حاجه .. ابنك بس هيعملنا خدمه صغيره .. وقصاد الخدمه دي هنبقى نسيبكم تروحو
ابويا : - موجها خطابه لامي - شايفه ياهانم ابنك اللي دلعتيه .. طلع يعرف مجرمين على اخر الزمن .. كللو من دلعك ليه
سونيا : - تقاطعه وهي مبتسمه - لأ لأ لأ يا حاج عييييب .. احنا مش مجرمين .. احنا ناس بتبص للحياه بشكل تاني .. اللي انتو ممكن تشوفوه صح .. احنا ممكن نشوفه غلط .. واللي انتو بتشوفوه يمين .. بنشوفه شمال
امي : - مندهشه - انتي حولا يابنتي ؟؟؟
سونيا : مش قصدي يا حاجه .. قصدي اننا غيركم وخلاص
تنظر سونيا للحارس وتقول له
سونيا : ابقى أكّل الحاجه الاول .. وبعد ما تخلص أكّل الحاج .. ولو قال ربع كلمه كمم بقو ومايدوقش الاكل خالص .. مفهوم ؟؟
الحارس : مفهوم
تخرج سونيا وسامبا من الغرفه .. ويذهبان للدور العلوي .. ويمران من امام الغرفه الاولى ذات الباب الزجاجي الملاصقه للغرفة الرئيسيه الخاصه بهم .. وتكاد سونيا ان تطرق على الباب ولكن سامبا ينظر لها محذرا .. فينصرفان ويدخلان الغرفه المجاورة
--------
يتبع

سوووو

هناك 35 تعليقًا:

غير معرف يقول...

رئيس الجهاز : محسوبك - وينظر لي مستفهما - انت عايز كيس الشطه اللي معاك ؟
سوووو : لا مش محتاجه .. مش فاهم ليه بيحطو شطه مع المكرونه اصلا !!!؟

بجد مسخرررررررررررررة
هما صحيح بيحطوا شطة مع المكرونة ليه؟؟ :))

يقف الجميع بمافيهم انا .. ثم ينظر رئيس الجهاز لمصطفى ومنى ويخاطبهم بلهجة الآمر
توفيق عبد الحميد : مش عايز أي مشاكل .. حبو بعض يا ولاد

يالهوووووووووووووووي إيه يابني انت بتجيب الكلام ده منين

سوووو : - قمت وانا مخضوض قوي - مصيبه .. كارثه
مصطفى شعبان : مصيبة ايه ؟؟؟
منى زكي : كارثة ايه يا سوووو ؟؟؟؟
سوووو : نسينا نجيب الرز بلبن بالمكسرات

أنا كنت هعيط من الضحك،، وبعدين أنا مش فاهمة ليه شايف انها مصيبة انك مش طلبت مع المكرونة رز باللبن،، إحمد ربنا وهاتها من عند المالكي تحففففففففففففففففة :))

تفوقت على نفسك يا سوووو
بجد حلقة تحفة ،، خاصة العنوان أثار إهتمامي أوووووووي ;)

بس وحياة كل الغاليين عندك يا سوووو قوللي بقى هما عايزين ايه من سوووو
في الحلقة الجاية هعرف صح ؟؟ صح؟؟

مستنية على صفيح ساخن :))

ojg

محمود يقول...

حلوه بجد
مستنى الباقى بتاع الاجزاء اتحاد سوو وادهم صبرى وفيلم مافيا بس بطريقه روعه

SKOBL- Little Lazy Me يقول...

عارف لو ما نزلتش الجزء الجاي بسرعة .. حاتصل بسونيا و أخليها تخطفك و ما تسيبكش غير لما تكتبلي كام ألف عدد .. بجد تحفة .. أنا بضحك اوي رغم ان الهم مغرقني .. روح ربنا يبسطك

MKSARAT SAYED SAAD يقول...

sooooooooooo
عمنا معلشي اتأخرت عليك فترة بس الشغل غصب عنى والله اوعى تزعل منى
حوار جميل فية بعض الشخرية من اشياء اصبحت قدرية واشياء اخري وهمية يمكن ان تواجه اي واحد منا
لكن المزج عجبنى موهوب بجد يا احمد اسلوبك حلو في الكتابة
الحاجة اللي عايزك تخلي بالك منها متتغزليشي فمنى زكي اوي كدة طيب احمد حبيبنا وحبوب بس افرض عملت كدة مع واحدة جوزها والعياز بالله اتوبيس
اكيد هيدوسك ويدسنا معاك
وابقي اعمل حسابي في الببس بعد كدة اوعى تنسي
تحياتي يا سووووووو الجميل
وياريت اشوفك السبت
سيد سعد

د/اجدع بنوته يقول...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

ياعينى عليك وع افلامك

المهم .. الحوار مع منى هيخلص ع ايه

ان لازم تمشى انت ف طريق

وهى تكمل مع المخابرات

ولا ف امل . يبقى ف صبيان وبنات

ع العموم

مستنيين لما نشوف هترسى ع ايه ههههههه

shayma يقول...

ههههههههههههههههه
لا جامده

منى زكي : كللو ألسطه بعون الله
بقى يا مفترى منى بقت بتقول السطه

والله جامده يا سوووو

ابويا : - موجها خطابه لامي - شايفه ياهانم ابنك اللي دلعتيه .. طلع يعرف مجرمين على اخر الزمن .. كللو من دلعك ليه
سونيا : - تقاطعه وهي مبتسمه - لأ لأ لأ يا حاج عييييب .. احنا مش مجرمين .. احنا ناس بتبص للحياه بشكل تاني .. اللي انتو ممكن تشوفوه صح .. احنا ممكن نشوفه غلط .. واللي انتو بتشوفوه يمين .. بنشوفه شمال
امي : - مندهشه - انتي حولا يابنتي ؟؟؟

عليك حوار يا سوووووو
تحفههههه

بجد تحفه ومستنيه الى بعده
:))

سلامى
:))

كاميليا يقول...

ياخسارة

الحلقة خلصت والرز بلبن لسة مجاش

منى زكي : - بعد أن جلست في مواجهتي - ميرسي .. لسه ضاربه ساندوتش بتنجان بالطعميه

ميرسى - ضاربة - تيجى ازاى دى؟

الحلقة روعة
انت فنان

وبعدين تعالى هنا
انا قرأت تعليق عند ولاء
ياغيوووووور
مين قال انى مش هكتب بوست عنك
بس الناس ال
VIP
اللى زيك لازم اذاكرهم كويس

تحياتى لأجمل أخ

كاميليا

RAMA يقول...

أوشوش الودع

اوشوش

تحب تشوف الودع يا أستاذ سووووو

طاب إرمي بياضك

ياه.. ما شاء الله يا أستاذ سو أسلوبك الساخر حلو أوي يا أخويا

ايه ده.. شايف يا أستاذ سوووو.. في دار نشر عاوزة تنزل كتاب اسمة مذاكرات طفل طخين

بس اسمها وإمتى مش واضح خالص عندي.. كل في علم الله يا خويا


صحيح يا أستاذ سووو .. في ناس يا أخويا معترضين على اقتباس الشخصيات من مجموعة قصيصية تانية خصوصا كلمة يتبع
مفروسين منها أوي .. بيقولوا مش كفاية واحدة بس علينا في البلد

أنا قايمة اشوف رزقي يا اخويا وحبقى أمر عليك تاني

وشكرا على البياض يا راجل يا كريم

العواف

محمد مارو يقول...

بس برده مش عرفت هما ليه بيحطوا شطه مع المكرونه ؟

alter يقول...

انت مسخرة يا حبيبى
ايه التفوق الى انت فيه ده
جااامد البوست كله والله
بس هية منى زكى بتقول كله السطة
و رئيس الجهاز بيقول طب فل
و مصطفى شعبان بيقول يا برنس و لمين لرئيس الجهاز
تحياتى على البوست المسخرة ده
مسسسسسسسسسسسسسسخرة

gannah يقول...

حلوة كتير مستنيه الباقى

fatima يقول...

يا سووو
حرام عليك يا واد
دانت شلفطت فيلم مافيا عل الآخر
و منى زكى البسكوتاية تضرب بتنجان برضو؟؟
بس والله برافو عليك
دى أظرف شلفطة قريتها
يا ترى العالم دى كلها عاوزة منك إيه ؟؟
ادينا مستنين..
تحياتى و إعجابى

صوت من مصر يقول...

بقولك ايه ايه يا سوووووووووووو
ممكن اعمل اى دور فى الحدوته
ممكن اطلع سندوتش حتى
بصراحه انا متابع جدا وياريت تكمل ومتقولش خلاص

ابن حـجـر الـعـسـقـلانـى يقول...

معلم .. معلم كبيييييير

فرنسا هانم يقول...

عاااااااااااااااااا
عاااااااااااااااا
عااااااااااااااااااا
البواب :- فى ايه يا فرنسا هانم ؟
انا :- عااااااااااااااااااا
البواب :- بتعيطى على اهل سووووو ؟
انا :- لا
عااااااااااااااااااااا
البواب :- بتعيطى على سوووو الغلبان؟
انا :- لا
عاااااااااااااااااااااا
البواب :- امال بتعيطى على ايه ؟
انا :- سوو اكل المكرونه ملها وانا جعاااااانه
عااااااااااااااااااااااااا

Doba يقول...

هههههههههههههه
انتى حولا يا بنتى
===========

انتى بجد مجرم
بتكتب بشكل ساخر جميل قوى
اينعم انت قلبت على مافيا

شكلك راسم انك تطلع احمد السقا فى الآخر
بس الفيلم مكنش فيه سونيا

مصيييييبة
كارثثثثثثة

نسيت تعزمنا معاك عالرز بلبن بالمكسرات
=========
اخر حاجة بقى قبل مروح
انت بتوصف الاكل بشكل بتخلى الواحد هيموت وياكل حالا

تحياتى يا سووووو
هبة

appy يقول...

اعمل فيك ايه طالعه من خناقه يا ويا قولت اجى عندك افك شويه منهم للهالناس الهبله التانيه
ادى انت ضحكتنى شويه
ربنا يخليك ليه يا سو وبطل تخم فى تنزيل الحلقات احسن لك رتب مواعيدك بقى

Salwa يقول...

إيه ياعم جو الرعب ده

أنا أتوجس خيفه
أحسن تكون العمليه اللي هيطلبوها منك
إنك تعرفهم سر الرز بلبن

عموما ربنا يستر

حلو جو التهكم اللي بين السطور ده

وجوه السطور برده علشان تبقى عارف

المهم

عايزه نهايه غير متوقعه
تعملها إزاي معرفش

دمت بكل خير soooooo
وفي انتظار البقيه إن شاء الله

المفقوعة مرارتها يقول...

بقي من زكي ضاربة بتنجان بالطعمية آه لو سمعتك ؟؟

اهو ده عيبه يقول...

انا عمرى ما شفت جهاز امنى رفيع المستوى ارديحى كده وحالته تصعب على الكافر، اتارى ياعينى الناس دى غلابة وعايشة ع الكشرى

ايوية يقول...

ياترى عايزين اية منك
منتظرة الحلقة الجاية
تحياتى

cinderella يقول...

ههههههههههههههههه
بجد تحفه
وبعدين إنت كده سبت أدهم صبري
ودخلت على جيمس بوند
بس داخله جااااااامده جـــــداً
وإذا إحتجت الدكتوره مريم في حاجه بعد كده قول ما تتكسفش وبرده لو حد إحتاج طارق زيدان في حاجه مش هتتأخر عنهم
بجد بجد 100/100

dina يقول...

مين فين ليه
هو انا فين هنا
وده كان سؤالى وانا بقرا البوست ده
وسعتها رد مصطفى شعبان
انتى لو كنتى قريتى من الاول كنتى فهمتى
وبسرعه منى زكى قالتلى يلا شوفى المذكرات من اولها احسن سوو يزعل

لالالالالالالالالا
بجد انا قريت كتير وكتير
لكن الاسلوب وطريقه وتناول ده
معداش عليا قبل كده
مستنيا باقى مغامرات ومتابعه

حمادة زيدان يقول...

سوووووووووو
أنا سعيد جداً أني أخيراً وقعت في مدونتك ... وسعيد أكتر بيها ... وعلى فكرة أنا لسه ما شوفتش حاجة بس محتار أبتدي منين أنا ؤلت أدحرج التماسي وليا مش عودة واحدة ممكن تسميها عودات كتير "بالصعيدي بقي" وهارجعلك هارجعلك
حمادة زيدان

walaa يقول...

ههههههه
بجد انت اللى اسلوبك جميل
انا اول مره ادخل عندك بس انا ان شاء الله علطول عندك هههههه
علاسه بقه هههههه
وبعدين شكلك مدمن رز بلبن

مصطفى شعبان : - وهو يأكل الكشري - ماتو في حرب تلاته وسبعين .. بس كانو صحاب توفيق بيه عبد الحميد .. وهو بيفرج صورهم لكل الناس اللي بيجو هنا


فعلا البلد بقت كويسه
اللى ليه قاريب بس هو اللى يظهر واللى مالهوش له الله احسن من الكل
عجبنى قوى اسلوبك الساخر من الوضع الحالى
تحياتى ولاء

Rosa يقول...

حراام يا سوووو بجد
شوهت منى زكي يا عني مش بس ضاربه ساندوتش لا دا طعميه و مش طعميه بس ده طعميه بالبتنجان
شوهت البونيه ياابني حرام عليك
----
جامد يا سوووو بجد

مشمش يقول...

انا اتخضيت زيك بالظبط ازاي تنسو الرز بلبن
انا مبقتش عارفة اعلق لاني مش هلاقي كلام يساوي اعجابي وسووو دة ابداااا
بس المهم اني جيت
انت فظيع

الشنكوتي الكبير يقول...

بعد اذنك يا سوو انا حطيت اعلان عندي عن قصتك الفظيعه دي بجد تحفه يا ابني
وخصوصا لعشاق ادهم صبري وسونيا
الا هو انت مش ممكن تطلع قدري في الأخر مثلا
هههههههههههههه

بجد فكرتني بحاجات حلوه
والقصه نفسها اسلوبها جميل قوي
تسلم ايدك بجد
سلاااااااااااااااااام

بت خيخة وأى كلام يقول...

ربنا يخليك يارب يا سوووو ويعمر بيتك
انت فكرتنى بعلبة الرز بلبن اللى كنت جايباها من كام يوم من عند المالكى
رحت شئرت عليها واشوفها هى عفنت ولا لسة سليمة وطلعت الحمد الله سليمة وباكل فيها دلوقتى
شكرا لان البوست ده فكرنى بيها
ومستنية الحلقة الجديدة
اختك خيخة

عاليا حليم يقول...

كنت مغمومة عالصبح قلت لما ادخل عند سووو اكمل حكايات الولد الطخين يمكن اضحك

و قد كان
ههههههههههههههه

dina يقول...

هه فين باقى مذكرات سووووو
يلا مستنين ومتابعين

رئيس جمهوريه نفسى يقول...

انا معلق يا باشا باسم محمود وجيت اشوف الجزء السابع لقيته لسه منزلش قولت امرى السلام على السريع

مروة الزارع يقول...

عاااااااااااااااا

بالنسبة لى كان بؤس مأساوىىى

كشرى ومكرونة فرلان يا مفترى

عاااااااااااااااااااا


عاااااااااااااااا

زُمُرده يقول...
أزال المؤلف هذا التعليق.
Dr-hema يقول...

هو جرجس بقى شهيد
أممممممممممممم

بس مش عارف حتة منى زكى دى بتفكرنى بفيلم مع احمد السقا وهما فى النوبة
مش فاكر اسمه ايه بالظبط كان نفس الفكرة دى

برده الواد مش همه ابوه وامه همه الأكل اللى هياخده فى الرحلة ايع العيل الفطس ده
^_^