السبت، 28 ذو القعدة، 1428 هـ

وهي امبابه مافيهاش بطيخ !!؟؟

افتكرت الكلمه دي لما كنت في المترو
.. وتحديدا اكتر .. بعد ماسمعت الحوار ده بين اتنين طلبة في كلية حقوق جامعة حلوان
والاتنين دول اصلا اصلا .. من اسيوط
فلان : ياخي ده بيجولك الجطر اللي فنزويلا بيمشي بسرعه 400 كيلو متر في الساعه
علان : ولا الجطر بتاع اليابان .. سرعته بتعدي الـ 800 كيلو
فلان : يابوووووي .. ده على كده يوصلنا بلدنا في بتاع ساعه الا شويه
علان : بالك لو عملو الجطر ده هنا .. هاركبه مهما كانت تزكرته جد ايه
----
.. الحقيقه حوارهم شدني اني ادخل معاهم .. يمكن لاني بطبعي صعيدي والدم بيحن
ويمكن لاني استغربت وحبيت افهم شوية حاجات
------
سوووو : انتو من الصعيد؟
فلان : ايوه
علان : من اسيوط
سوووو : لا يا راجل .. انا من سوهاج .. مركز طما
فلان وعلان سويا : اجدع ناس
سوووو : الله يكرمكم .. وانتو من اسيوط نفسها ولا من مركز تابع ليها؟
علان : لا احنا من المحافظه نفسيها
سوووو : همم .. وبتدرسو هنا ؟
فلان : ايوه .. كلية حجوج جامعة حلوان
سوووو : (مستغربا) انتساب ولا انتظام؟
علان : انتظام طبعا
سوووو : (مستغربا قوي) وهي حقوق حلوان اقل من حقوق اسيوط؟؟؟؟
فلان : لا طبعا .. اكبر من حجوج اسيوط
سوووو : الله .. طب وانتو اصلا اصلا ايه اللي جابكم على القاهره في عز الزحمه والزيطه بالرغم من ان الاسهل ليكم انكم تبقو في بلدكم وكليتكم ماتبعدش عنكم .. ولا سفر ولا شحططه ولا ايجار شقه بمصاريفها او اقامة في بيوت الطلبه ؟؟؟؟؟
علان : لا انت مش فاهم .. هنا فرص الشغل اكتر من هناك
فلان : وكمان جامعة حلوان معترف بيها عن جامعة اسيوط
!!!!!: سوووو
------
لغاية هنا وانا ما كملتش حواري معاهم .. بس افتكرت الافية بتاع (وهي امبابة مافيهاش بطيخ ؟؟) واللي قالة هنيدي في فيلم حلق حوش لما قرر هو وعلاء ولي الدين - الله يرحمه - انهم يبقو نشالين .. وهنيدي قال الكلمه دي لواحد في الاتوبيس عشان تبدأ الخناقه ويقدرو ينشلوه في وسط الزحمه
ولقيت نفسي مستغرب قوي .. يعني هي القاهره فرص العمل فيها اكتر من اسيوط؟؟
ويعني ايه جامعة حلوان معترف بيها عن جامعة اسيوط ؟؟
ومين اللي معترف بجامعة حلوان ومش معترف بجامعة اسيوط ؟؟
وهل جامعات مصر والتعليم في مصر اصلا ليه لازمه او معترف بيه ؟؟؟
وليه انا نفسي قاعد هنا في القاهره ومستحمل زحمتها وخنقتها ومافكرتش اروح سوهاج اعمل فيها مكتب ديكور .. واكيد في ناس هناك عايزه تعمل شغل ديكورات ؟؟
محطة المعادي جات .. ولازم الحق اخرج من المحطه بسرعه .. عشان الحق مكان في الميكروباص اللي بيحمل .. عشان الحق اروح بيتنا
بس هاروح بيتنا ليه؟؟؟؟


سوووو

هناك 73 تعليقًا:

بنوته مصرية يقول...

شوفت حظي حلو لي تاني مرا واول وحده

ازيك الاول

فعلا انا شايفة اني اي صاحب عمل بيبص علي جامعه ايه يعني مثلا اتنين في وظيفة وحده واحد من جامعه القاهرة وواحد من جامعه عين شمس هيختاره عين شمس مش عارفة ايه السبب

بس كلامك ده فكرني بموقف طريف صديقتي بنتها جت تعيط لي مامتها وتقولها اني صديقتها قالت لها يا بتاعت مدرسة كذا وهي التانية تقولها انتي بيئه انا مدرستي كذا ملحوظة الاطفال دول في 3 ابتدائي وبيعيرو بعض بلمدارس انا كنت بضحك اني دلوقتي الناس بتبص علي المدرسة بلمستوي المادي مش بلعلم والمعرفه

موقفك ده فكرني بلموقف ده مش عارفة ليه

تحياتي ليك يا سووو ياريت انت بقي تقولنا ايه التفرقه دي بجد مهي كلها زي بعض هل في حلوان بيدرسو شئ مختلف عن اي كلية تانية اصلي الصراحه انا مكنتش حقوق D:

Rehab Mostafa يقول...

فعلاً أغلب الناس بتعمل كده
من كاااااااااااام سنه الفكره دي مش راضيه تتغير ... أنا عايزه افهم هي فين الفرص دي ؟؟؟!!!!!! بجد من كتر ما الناس بتقول الكلمه دي الفرص خلصت
على فكره ممكن فعلاً يكونوا هناك محتاجين ديكورات اتكل على الله :D:D:D

زُمُرده يقول...

السلام عليكم
كيف الصحه؟؟الحمدلله .....طيب تمام
اولا :بلدنا مفهاش تعليم...فيها صّم وغش وفهلوه ووسايط
إلا من رحم ربي........بمعنى
غير الغاوي يتعلم ويبقى مفيد ويستفيد
ثانيا:للاسف بقت بتتقاس بجامعه القاهره ولا حلون ولا اسيوط ولا غيره
لدرجه ان في ناس نبييه ...بمعنى ذكيه حبتين
يقولك ادخل جامعة في اي محافظه متطرفه
عن العاصمه وما يليها
علشان يقدر يتفوق ع الطلبه اللي مخهم ع ادهم ويبقى معيد وبعدين دكتور وكده
ثالثا: فرص العمل بقت للي عنده واسطه ولا سلطه ولا فلوس
وإلا مكنتش تلاقي شباب ترمي نفسها ع شواطيء ايطاليا وغيرها ع امل فرصة عمل

ربنا يرحم البلد دي
ولا القيامه تقوم ونرتاح

لماضة يقول...

ههههههههههههههه
سيبك انت من دموع العين وقولى
انا عجبنى قوى الحوار ده
بس على فكره الحكايه اللى قالولك عليها دى حقيقى مش كل جامعات مصر معترف بيها بره مصر ولا جواها الحقيقه
بس ده كان زمان
دلوقتى كل جامعات مصر مش معترف بيها ولا حتى عند عم محمد بتاع السجاير
ديكورات ايه ياعم
اتكل ع لى الله واشتغل رقاصه

MKSARAT SAYED SAAD يقول...

انت عارف يا سو
ان مشكلتنا بجد الادارة بلدنا فيها حاجات كويسة كتيرة بس للأسف بتدار غلط
وهنفضل في البطيخ دة طول مهو مفيش ادارة

مشمش يقول...

تروح بيتكو عشان ترتاح قال يعني لما تروح هترتاح ماهو اكيد هتلاقي الي يقولك والنبي ياسووو انزل هاتلي حاجة من تحت ولا تعالي صلحلي الدش عايز استحمة ومستنيك مش كدة برضة ولا اية
تحياتي وبوست جميل اوي

كاميليا يقول...

وانا آقول انا بحب اجى المدونة دى كتير ليه؟؟

شوف يابلدياتى

آصلهم والله اعلم فاكرين ان
الشيخ البعيد سره باتع.

مع ان اسيوط فيها محاكم ومكاتب محاماه وفوق كله ده فيها قضايا كتير اوى، زيها زي اى محافظة من محافظات الصعيد.

بس مش عارفة صحيح جامعة اسيوط مش معترف بيها من مين بالظبط؟ من وزارة التعليم العالى ولا الطلبة انفسهم، ولا القوى العامله؟؟؟؟!!!!

تحياتى واحترامى

كاميليا

rainbow يقول...

ازيك يا عجووووووووز

اولا يا سيدى الموضوع الساخر دوره البوست اللى جاى عشان شكله مش هيتنشر فى الدستور انا بعته من زمان وصباح الطناش

ثانيا ودا الاهم العبدة لله عايزة تتأنزح عليك شوية اسمع : قريت كتاب مختصر للعبقرى جمال حمدان شخصية مصر وكان مرعب فعلا وفى كلام كبير جدا منه اللى انت عامل عليه البوست ده .. موضوع المركزية ... بمعنى لو راقبت الناس فى اى محافظة هتلاقيهم يقولولك رايح مصر بشتغل فى مصر اى حاجة مصر مش القاهرة
اعتبار ان المحافظة العاصمة هى البلد ككل شىء نفساوى مترسخ مالوش حل الا على المدى الطوييييييل جدا ان بقية المحافظات تاخد ولو بعض حقها من الرعاية فى كل شىء < قال يعنى القاهرة واخداه > على رأى كاميليا حبيبتى فاكرين الشيخ البعيد سره باتع ههههههههه

تحياتى لموضوعاتك الجميلة
لعحمد المشاغب

هدى

ToOoKa يقول...

السلام عليكم ورحمة الله وبركاته
البلد بتعتنا دى بجد غريبه اوى يعنى الجامعات اللى غير القاهره وعين شمس والاسكندريه مش معترف بيها امال بيعملوها وبيبنوها وبصرفو عليها اد كده ليه
ميــــــن اللى بيطلع الكلام دا مش عارفه
زى برضو ما الناس ما مقسمه الكليات لكليات قمه وكليات لا
ايه الهبل دا يعنى ايه كليات قمه
التعليم كلو رقى ولازم من اختلاف المجالات ولا يعنى مصر لو كل الناس اللى فيها بقو دمهندسين وسياسيين واطباء مصر حتكون متقدمه
ياريت نوسع تفكرنا شويه علشان البلد دى يتصلح حالها
والصراحه لازم الواحد مايعتمدش بس على المناهج ويوسع من مدارك تفكيرو لانو منهجنا اصلا عقيمة

الصراحه دى اول مره اعلق فى المدونه دى ويارب ما يكنش دمى تقيل

ToOoka

ghalia يقول...

ازيك يا سووو وازى احوالك
هقللك على حاجة
أنا اتخرجت السنة دى من جامعة الأزهر وللأسف جامعة الأزهر الآن تعتبر إلى حد ما من الجامعات اللى غير معترف بيها زى ما قال الأخ اللى حكيت عنو
ليا واحدة صاحبتى اتخرجت معايا تخصصها صحافة وإعلام قسم إذاعة وتليفزيون راحت قدمت فى قطاع النيل للقنوات المتخصصة ولما قالتلهم انها خريجة أزهر رفضوها وقالولها مش بناخد خريجين الأزهر
كمان عندى بنت خالى خريجة كلية دراسات اسلامية وعربية جامعة الأزهر تخصص لغة عربية راحت قدمت فى مسابقة كانت عاملاها وزارة التربية والتعليم لطلب مدرسين وكان تقديرها جيد جدا عالى وفعلا قبلوها بس لما راحت تقدم ورقها قالولها لأ معلش احنا مش بنفضل الأزهريين
تخيل الواحد يقعد يدرس سنين وفى الآخر ميعترفوش بدراستو
حاجة محبطة جدا وقمة التخلف والغباء

alexandrany يقول...

باشا
عمي وعم الشباب
اول زيارة ليا للبلوج بتاعك
سيبيك انت دراسه ايه وكليات ايه قال يعني الشغل مقطع بعضه
انا كل اللي هاممني انك نزلت محطه المعادي
ايه اخبارها وعامله ايه
لسه برده لما تنزل من المحطه لازم تعدي الناحيه التانيه الاول عشان تركب لمؤمن وللا للجزاير
اصلي معلش كنت شغال هناك لفترة
عشان فرص العمل عندكم اكتر

وعجبي
"ملحوظه انا فعلا كنت شغال في المعادي وكانوا ساعتها فعلا طالبين بالاسم جامعه عين شمس وسكندرية والقاهرة يعني من الاخر اكن مافيش جامعات في مصر تاني غير دولا قال يعني دولا اللي فيهم التعليم كله"
وعجبي تاني

إنـســـانـة يقول...

ههههههههههههههههه حلوة فرص الشغل هنا اكتر من هناك دى

بلا نيلة احنا نلاقيين اصلا .. البلد خلاص مبقاش فيها حاجة .. بقت جلد على عضم ياريس

مممممممم تصدق بقالى مدة بفكر بردو اقعدلى فى اىىىىى محافظة حتكون ارحم من وجع القلب اللى هنا ده والله

واقعدوا بالعافية .. فى مصر

!!!

shreen يقول...

سوووو
دايما بوستاتك ليها طعم مختلف
طابع مش موجود عند اى حد تانى
التلقائيه والبساطه فى الحديث
استخدام مواقف بعينها وسردها باسلوبك الممتع المليان خفه دم
لازم الواحد تلاقيه بيقراها ويتشد ليها
ولازم تلاقيه بيبتسم
تخيل انى حسيت انى معاك فى المترو
وسامعه الطلبه دول

بس هم كلامهم صح
يعنى لما اتنين بيتقدموا لشغلانه
والاتنين مثلا خرجين حقوق
ونفس التقدير
واحد القاهره
وواحد اسيوط
هتلاقلا اللى هياخد الشغلانه بتاع القاهره

موجة يقول...

تعرف انك عندك حق
لكن دي حقيقة للاسف
الشغل في القاهرة و بس
او في شرم
او الغردقة
لكن في المحافظات الفرص ضئيلة
و رواتبها ضعيفة جدا
هي القاهرة مش احسن منها قوي في الرواتب و بتظل في اطار اقتصاد مصر الهابط
لكن الرزق يحب الخفية
يعني انا خريج اقتصاد القاهرة مش ممكن اشتغل في بلدي المنصورة
تحياتي

Nani يقول...

السلام عليكم
احنا معندناش جطر
واما يبجى يجي حجولك
بس انت مطرطق ودانك دايما هواية ولا شوغلانة؟
:)

doha يقول...

هههههههه
هى امبابة مفيهاش بطيخ
انا ايام الجامعه كنت بضايق اوى لما حد يقلى
انت من السويس
طب ايه اللى جايبك جامعة القاهرة هى
جامعة قناة السويس مفيهاش حقوق اقله اه
ولو فيها يعنى
انا كنت برضه هخش جامعة القاهرة لانها حلمى من زمان
لكن حتة عمل اللى بيقلوه ده
ميخشش عقل الصراحة
زمايلى فى القاهرة بيقلولى شوفلى شغل عندكم فى السويس
بس
خالص تحياتى ليك

Esmat يقول...

تحياتى الكبيرة سووو
إنت عارف من أيام الكلية والموضوع ده بيغظنى الجامعة مليانة طلبة من دمنهور
وطنطا ويجيوا إسكندرية واللى يتشحطط فى المواصلات و ركوب القطر فى حين إسكندرانية على درجة او إتنين مرمين برده هناك وكان لى واحدة صديقة سكندرية إضطرت تعيش عند أحد اقاربها لنفس الظروف
وكنت بشوش قلق أهلها وتعبهم من فراق بنتهم - شىء صعب اوى والله
منطق غريب إن درجة او إتنين تمنع ولاد البلد
يدخلوا جامعتهم
موضوع تفضيل جامعات بعينها للى بيجيبوا درجات عالية بيحرم كتير من ولاد وبنات المدن من جامعتهم
وأعتقد إن المفروض الواحد يفخر بجامعة محافظته وتكون من أولوياته دخولها
وعلى رأيك كله بيتساوى والنتيجة واحدة تعليم بايظ
أجمل تحية

رئيس جمهوريه نفسى يقول...

انا مقريتش البوست للاخر و قطعت من النص على فكره يا سو استخفاف الدم مش بقلب اللهجه والحروف لانى دى مش لهجه صعيده ولا دى طريقه كلامنا
بس حقول ايه حسبى الله ونعمه الوكيل الى مخليه نظره اهل القاهره كلهم فى لهجه الصعيده قلب الحروف للجيم
قشطات يا مان

Soooo يقول...

رئيس جمهورية نفسك

على فكره لو كنت قريت الموضوع للاخر كنت قريت اني بقول اني صعيدي ومن سوهاج .. وبقول في اخر البوست اني بافكر بجديه اقيم في الصعيد واعمللي مكتب خاص بي هناك بدل ما اهاجر ولا اسيب البلد زي ماكل الناس بتفكر


وياريت يعني ماتحكمش عالموضوع من اول سطر
وياريت ماتجمعش الصعايده في كلامك
الصعايده في منهم دكاترة الجامعات في اوروبا وامريكا ودول العالم
ولو قريت اول الكلام كنت لقيت ان فعلا في قطر في فنزويلا بيمشي بالسرعه دي
وفي فعلا قطر في اليابان بيمشي بالسرعه دي
انا ماستخفتش بيهم زي مانت فاكر ولا قللت منهم
انا بس استغربت من منطقهم في المقارنه مابين فرص العمل هنا في القاهره وهناك في الصعيد
مره تانيه بقولك ياريت ماتحكمش على اي موضوع من اول سطرين تلاته
وماتخليش الناس يقولو عليك صعيدي وبتحكم عالمواضيع غلط من قبل ماتفهم المغزى من اي موضوع




سلامووووووووووووووووووووز

Nadosha يقول...

والله يا سووو مش عارفة اقولك ايه هما بلاديتنا دول مش عارفين ان كله بيتسوي فى الاخر ليسانس الحقوق زي معهد الصرف الصحي قسم بلاعة و مين ده اللي مش معترف بالجامعة بتاعتهوم؟؟؟؟
طيب لما ليلاقوا مكان على القهوة يبقوا يقبلوني
كان نفسي تقوللهم ان القهاوي خلاص بقت كومبليت و ان ملهومش مكان فيها.
ولا تنسي ( البلد بتتحرك بينا) ههههههههه

cinderella يقول...

وهي سوهاج مافيهاش شغل؟
جاي القاهره تعمل ايه
ولا هو بطيخ امبابه غير بطيخ سوهاج
هههههههههههههههه
بجد بجد
اساسا التعليم لا في القاهره ولا اي بلد في مصر له فايده ولا هو تعليم من الاصل
تعرف ان فيه إحصائيه عالميه بتقول إن أطفال مصر أذكى أطفال في العالم لحد عمر 6 سنين
يعني من اول ما يدخلوا المدرسه تقريباً من هنا يبدئوا في الحصص اللي بتجيب لهم غباء محكم والتعليم اللي بيشربهم الغباء بمعلقه لحد ما يبئوا اغبى خلق الله بعد كده وفي الاخر يقولوا التعليم باظ هو أصلاً كان فيه تعليم عشان يبوظ
ده التعليم هو اللي بوظنا

Doba يقول...

كنك اتجنيت يا ولدى وله اييييييه
مكتب ديكور وفى سوهاج ولا فى اسيوط

تصدق والله معاك حق واهو بره يبقى بنطبق المبدأ اسعى يا عبد وانا اسعى معاك ونبتغى الرزق فى اماكن أخرى

يابنى هما بيتفسحو وبيغيروا جو
ثم هما معاهم حق - لو راحو مكان واتين مقدمين واحد معاه الشهادة من عين شمس وواحد من أسيوط بياخدو بتاع عين شمس لان الدراسة بتبقى اصعب من الاقاليم والمواد الدراسية اكتر

ممكن اجى اشتغل معاك وابقى تخصص ننى

سلام يا عجوز يابو......كمل انت بقى
سلام يا شقيق
هبة

Esmat يقول...

مساء الفل سوووو
بعد إذنك رد لرئيسنا رئيس جمهورية نفسى
إيه يا ريس دا أنا جوزى مولود فى إسكندرية ووالده كمان لكن علشان جده من سوهاج
بيتلزق فى الصعايدة وكل اللى يكلمه والله يقوله أنا صعيدى ، وادى سووو علشان اصله من هناك ، فخور به
يعنى إحنا اللى بنتلزق في الصعايدة بجدعنتهم
واصالتهم وبلاش دلع وإفتح يا ريس المدونة
سوووو
كل سنة وانت طيب
لو دبحت اخويا على العيد إعمل حسابى فى الكبدة-و إبعتها لاختك
أنا حجزت ها ما تقوليش حد مكلمك عليها
و اسعد الله ايامك يا رب

سهر الليالى يقول...

والله عندك حق يا سووو
ماهو لو كل واحد اهتم ببلدة شوية الدنيا كلها هتبقى جنيه بس ارجه واقولك ماهو العيب على الحكومة برضو اللى بتميز حاجة عن حاجة
زى حكاية الجامعه دى يعنى ايه مش معترف بيها هى مش فاتحه وبتعلم الناس
يا أخى حاجة تجن
معلش اصلى مبقوقة بالذات من نقطة التعليم دى


معلش يلا ولا يهمك يمكن لما يجيبولنا قطر فنزويلا نتقدم
تحياتى

Desert cat يقول...

يعنى اللى جايين يتعلموا فى جامعه حلوان اصل جامعه اسيوط مش معترف بيها لما تروح لحد عندهم حيفهموا يعنى ايه ديكور
عجبى

رئيس جمهوريه نفسى يقول...

انا كلامى كان واضح الاستهان باللغه الى واقسم باله العظيم وانا عايش عمرى فى الصعيد مشفتش واحد بيتكلم بالطريقه دى

ra7eel يقول...

سووو
اان فعلا بستغرب لما بسمع موضوع الفرق ده بين الجامعات
اصل انا جامعة المنصوره ودايما سعيده انى منها برده مش عارفه ليه مع انى مش حاسه انها فارقه كتير
موضوع الشغل بقى
انا شايفه انه راجع للشخص نفسه هو اللى بيحقق النجاح فى اى مكان
ايه الكلام اللى بكتبه ده لا ء مش كده الظروف بتحكم من حواليك
يعنى كانى فاتى انا حققت حلمى فى بلدى
تهيس متخدش فى بالك
احلى سلامووووز

3ala asm masr يقول...

على رأيك؟
هى مصر اصلا التعليم فيها له لازمه ومعترف بيه؟
وأيه القاهره فيها فرص شغل أحسن؟
هى أسيوط مفيهاش قضايا يعنى؟
ما علينا الواحد عنده امتحانات ومش مركز
سلام يا باشا

Soooo يقول...

بنوته مصرية

ده انا اللي حظي حلو انك متابعه مدونتي باستمرار ومعتبراها زي مدونتك وبتعلقي فيها دايما

وانا معاكي فعلا اننا بقينا بنتعصب لحاجات تافهه جدا .. والاجيال اللي ورانا بتتعصب لحاجات اتفه زي موضوع المدرسة والمنطقه اللي ساكنين فيها

وبالنسبه لجامعة حلوان فأنا والحمدلله خريج كلية فنون تطبيقيه وساعتها كانت كليه وحيده في الشرق الاوسط وكان طبيعي يبقى معايا ناس من اقاليم مختلفه
وانا مش ضد ده لو في حالة ان الطلبه بتدرس في كليه منفرده زي كليتي او كلية هندسه بترول السويس او معهد سينما ومسرح
انما لما يبقى في مقابل للكليه اللي الطالب متغرب عشانها في البلد بتاعته ومعتقد انه كده صح .. فده اكبر غلط

ولا كان الاحسن انهم يلغو جامعات مصر كلها ويخلو القاهرة وعين شمس وحلوان


سلاموووووووووووز

Soooo يقول...

Rehab Mostafa

والله على رأيك .. من كتر الكلام عن الفرص والشغل في القاهرة الواحد حس ان القاهرة قفلت خلاص

وفعلا انا باسأل في الموضوع بتاع اني اسافر بلدي سوهاج واعمل مشروع هناك
وربنا يسهل كل امر عسير


سلاموووووووووز

Soooo يقول...

زُمُرده

ربنا يكرمنا جميعا يارب
وصدقيني
مهما الدنيا ضلمت .. هيطلع النهار

المشكله بقى .. لما الدنيا هتنور .. هنعمل ايه احنا في وسط النور بعد ماكنا في ضلمه وعتمه


سلاموووووووووز

Soooo يقول...

لماضة

والله يابنتي من كام يوم قابلت واحد متخرج من معهد حاسبات ومعلومات وشغال في شركة بترول كمحاسب .. لما قلتله وانت مالك ومال الحوار ده .. قاللي اصل امي نائب رئيس عام قطاع البترول .. ماقاليش انا متخرج من معهد ولا كليه

وبعدين البلد اتملت رقاصات خلاص
ده الرقاصات الروس ماسابوش حاجه لبنات امبابه

سلامووووووووز

Soooo يقول...

MKSARAT SAYED SAAD

الله ينور عليك يابو السيد
فعلا بلدنا مليانه حاجات زي الفل .. بس ناقصها الاداره
ولو حد مش مصدق الكلام ده .. يروح على جنينة الحيوانات ويشوف الجنينه خربانه ازاي
دي الحيوانا بتدور على عقد عمل في الخليج ياعم


سلامووووووووووووز

Soooo يقول...

مشمش

احب اقولك يا صاحبي ان مافيش حد معايا في البيت دلوقتي
وانا عايش لوحدي تماما
بس انتي معذورة .. هو اخر مره اتكلمنا مع بعض فيها كانت امتى؟؟؟


سلامووووووووووز

fanan fa2eer يقول...

أقولك أنا يعني ايه جامعة أسيوط مش معترف بيها

الناس دي عارفة ايه اللي بيحصل في البلد دي عشان كدة فكروا يدخلوا جامعة حلوان

يعني يا سوو لما حد يكون متخرج من جامعة زي حلوان ولا عين شمس ويروح يشتغل في أي حتة فيها فرصة شغل ويكون معاه متقدم ناس من جامعات اقليمية زي أسيوط مثلا

تلاقيهم يرحبوا وياخدوه بالحضن حتي لو كان تقديره مقبول ولا شايل مواد كمان وحتي لو التاني كان طلع من الأوائل وجايب امتياز مثلا

عرفت دول دخلوا جامعة حلوان ليه واستحملوا الشحططة؟

زي بالظبط ما حوالي أربعين واحد حولوا من كلية طب جامعة الزقازيق لجامعة عين شمس
عشان ماكانوش جايبين تقدير
وجامعة الزقازيق لو طالع بمرتبة الشرف ماحدش هيقبلك في شغل متقدم معاك فيه ناس بمقابيل من جامعة عين شمس ولا القصر العيني

ببساطة مش معترف بيه يعني مش معترف بيه عرفيا داخل البلد

وبالنسبة للتعليم في مصر عموما مش معترف بيه في العالم كله

عشان كدة أسلم حل ان الواحد يروح ياخد شهادته من جامعة دبي ويريح نفسه هي الجامعة الوحيدة اللي معترف بيها في العالم العربي

Soooo يقول...

كاميليا

لا يا شيييييييييييييييخه
طب تصدقي كنت باشم رائحة عبق التاريخ الصعيدي وانا في المدونه بتاعتك وافتكر نفسي باخطرف
لكن الحمدلله .. مناخيري لسه شغاله كويس

وبالنسبه لكلامك بان الصعيد فيه شغل فهو فعلا فيه شغل
بس المشكله ان اللي هناك متخيلين ان القاهرة دي زي نيو يورك .. ايشي خيال يا ناااااس


سلاموووووووووووز

Soooo يقول...

rainbow

ومازلت منتظر البوست الساخر بتاعك
ويارب يتنشر في الدستور

وجمال حمدان شخصيه ماقدرش اقول عنها حاجه طبعا
بس المشكله مش في الناس قد ماهي في الكتاب الكبار
احنا اللي فاكرين ان البلد هتتغير بين يوم وليله

لا يغير الله مابقوم حتى يغيرو ما بانفسهم


سلامووووووووووز

Soooo يقول...

ToOoKa

يافندم انتي تعلقي براحتك طبعا
وياريت تعتبري مدونتي هي مدونتك تمام
واكيد سعيد بتشريفك وتعليقك على موضوعي المتواضع

وانا معاكي الحقيقه في كل كلامك قلبا وقالبا
خصوصا كليات القمه وكليات القاع


سلامووووووووووز

aya يقول...

الفرص كتيييييييييييير
والشغل كتييييييييييييير
والتعليم خطييييييييييييييير
والحياة بقى لونها بمبى بمبى بمبى بمبى

كان معاكم آية من القارة المفقودة عام 5555

بوست دماغ ياخيرة شباب العواجيز
والسلام ختام

فرنسا هانم يقول...

هتروح بيتكم ليه صح ؟؟؟؟؟
اوعى تكون ناوى تفلسع
مش كل مره بقى تركب مترو من غير تذكره
واروح اضمنك فى القسم
سووووووووووو
مش كده
كن شويه
فرنسا دلوقتى مكسوره ومش حمل اقسام
وانت عارفنى ايدى طويله وكل القسم بيخاف منى
روح يا سووووووو
ربنا يهديك
روح وهكلملك مهندس ديكور شاطر
يعملك مكتب ديكور محصلش
روح علشان متتاخرش
وعدى على امبابه خد لك بطيخه

شيرين يقول...

سوووووو مش قولتلك ميت مرة بلاش ترمي ودنك مع حد ومش تكلم حد متعرفوش الدنيا مبقتش امان مش يمكن دول يطلعو مباحث التموين

على فكرة انا خريجة جامعة حلوان واول مرة اسمع من حد ان جامعة حلوان معترف بيها .. مع اني واخدة اربع سنين جامعة مع مرتبة ومخدة ولحاف

تحياتي ايامنا الحلوة

Rosa يقول...

صحيح هتروح ليه يا سو؟؟
:D
بس في اوبشنز كتيره للاجابه عن سؤال هتروح ليه يا سوو
لكن الاجابه الي مالهاش اوبشنز و هي اجابه واحده
هل اي من جامعات مصر معترف بيها دوليا؟؟
الاجابه و بمنتهى البساطه هيا لااااااااااا كبيره كبيره كبيره كبيره
ومافيش ولا جامعه في دوله عربيه معترف بيها
:D
و حتى جوه مصر بيعترفوا بحجات و يسبوا حاجات , يعني انا منكام سنه فاتت قريت اعلان عن وظيفه في الجرنان وكان بالنص مكتوب فيها ( على الا يكون خريج جامعة الزقازيق ) فطست على نفسي من الضحك يعني هوا للدرجادي
و من هنا يتضح و بكل بساطه ان امبابه مافيهاش بطيخ ولا حتى طماطم
:D

Soooo يقول...

ghalia

ازيك يا غاليه .. طب والله مفتقد طلتك دي وتعليقك عندي

ام هند بقى .. المشكله مش في نظام التعليم وبس قد ماهي مشكله قائمة على نظام كامل متكامل
يعني تلاقي اللي حصل مع صاحبتك او اللي حصل مع قريبتك .. حصل ليه اصلا مادام دي جامعه منشأه فعليا؟؟
وهل القائمين في وزارة القوى العامله هم نفسهم عارفين بالكيل بمكيالين مابين خريجين الجامعات المختلفه .. ولو عارفين وساكتين تبقى المصيبه اكبر
الحل من وجهة نظري .. اننا نلغي التعليم من اصله
ونلغي الجامعات المصريه كلها
ونلغي الشغل
بقولك ايه .. ماتيجي نلغي عيشتنا وننتحر؟؟؟


سلاموووووووووز

Soooo يقول...

alexandrany

منورني ياباشا وياريت تعتبر مدونتي هي مدونتك تمام وتنورني بتعليقاتك عندي

ومحطة المعادي زي ماهي فعلا ولازم تعدي الناحيه التانيه عشان تركب ميكروباز تروح مؤمن ولا الجزاير .. بس بعيد عنك شالو الموقف ودوه في حته غريبه .. وبمجرد ما الناس اتعودت عليه وبقت بتطلع من المحطه وتروح هناك .. قام سواقين الميكروبازات رجعو لعادتهم القديمه
وعجبي

واللي انا باتكلم فيه ممكن يكون مختلف سيكا عن اللي انت بتتكلم فيه .. واللي قصدي فيه ان خريجين جامعات القاهرة وعين شمس وحلوان ماشي يشتغلو في اماكن في المحافظه التابعه ليهم ولكلياتهم
انما ليه منطق الشحططه والغربه في التعليم مادام الواحد بعد ما هيتخرج هيرجع بلدهم ويشتغل هناك
يعني مثلا الطلبه اللي انا قابلتهم دول ليه ماكملوش دراسه في جامعة اسيوط وبعد مايتخرجو يشتغلو في اسيوط
نفس الحكايه في باقي المحافظات
فاهمني ؟؟

سلاموووووووز

Soooo يقول...

إنـســـانـة

ومين سمعك .. والله العظيم انا بقالي فتره بتلح علي فكرة اني اسافر البلد في الصعيد اقعد هناك واشتغل هناك واتجوز هناك واعيش حياتي كلها هناك

ولو مستغربه كلامي .. اقري الموضوع اللي هنزله بعد ردي عالتعليقات اللي في الموضوع ده

سلامووووووووز

Soooo يقول...

shreen

ربنا يكرمك دنيا وآخره يارب
والله كلامك ده كتير علي .. والحمدلله انك بتنبسطي لما بتقري موضوع من مواضيعي وربنا يقدرني اني ابسطك وابسط كل المدونين والمتابعين لمدونتي يارب

ام هند بقى .. انا مش قصدي ان جامعة القاهرة احسن من اسيوط ولا حاجه قد مانا قصدي مثلا الطلبه اللي من اسيوط دول واللي متشحططين ومتغربين وجايين هنا على اساس انهم يتمركزو هنا في القاهرة في المستقبل بمسمى ان الشغل هنا اكتر من هناك
وكمان بالمنطق كده .. فرضنا اني فتحت شركة ومحتاج شئون قانونيه .. وانا في القاهرة .. اكيد هفضل خريج جامعة القاهرة مش لحاجه غير انه من القاهرة وقاعد فيها وعارفها .. اما لو انا في اسيوط وفاتح شركة برضه اكيد هاخد خريج اسيوط لنفس السبب
ارجو انك تكوني فهمتي وجهة نظري

سلامووووووز

Soooo يقول...

موجة

اهو انت جيت في مربط الفرس
يعني اولا انا ماعرفش هل في كلية اقتصاد في جامعة المنصورة ولا لأ
ولو في فعلا في جامعة المنصورة .. ليه انت جيت درست في جامعة القاهرة؟؟
ولو بعد ماخلصت دراسه هنا في القاهرة وواحد زيك برضه متخرج من جامعة المنصورة كلية اقتصاد .. وانتو الاتنين اتقدمتو لوظيفه في المنصورة .. اللي هيشتغل مين وليه
هل لانه خريج القاهرة ولا خريج المنصورة؟
وايه المعايير دي في الحكم على اللي متقدم للوظيفه
الموضوع كبير قوي وكتاب الله
ارجو انك تكون فهمتني

سلاموووووووز

Soooo يقول...

Nani

يا ناني يعني المترو اصلا فيه مكان براح عشان كل واحد يتكلم مع اللي معاه بخصوصيه
ده بقى علبة سردين والناس فوق بعض وكل واحد بيتكلم في ودن التاني
هو انتي مش من هنا ولا ايه؟؟

شكلكم ماعندكمش جطر
وعلى فكره .. لو شغلانتي اني اطرطق وداني واسمع اللي حوالي وانقله لشخصيات معينه .. ماكنتش هعمل مدونه واتكلم وافضفض .. كنت هتفرج وانقل .. واقبض

سلاموووووووز

Soooo يقول...

doha

حبيب قلبي
اهو انت حليت المشكله واتكلمت من غير ماتاخد بالك
احساس الناس في المحافظات المختلفه ان القاهرة دي هي الدلع كللو ده غلط
طب بذمتك .. اديك جيت درست واتغربت واتشحططت .. هل استمتعت بالقاهرة زي ماكنت متخيل .. ولا لو كنت فضلت في السويس وخلصت كليتك واشتغلت هناك كان اريحلك
وجاوب بصراحه
بلا خوف
وليك عشره جنيه لو قلت الاجابة التانيه .. الله يكرمك ماتكسفنيش

سلامووووووز

Soooo يقول...

Esmat

منوراني والله
هتنزلي مصر امتى بقى .. وماتنسيش التلفزيون البلازما العشرتلاف بوصه

وفعلا والله عندك حق .. عارفه انا قبل ما اعيد ثانوية عامه وادخل كلية فنون كنت في كلية تجارة بنها وانا في القاهرة اصلا .. وفرق مابيني وبين تجارة القاهرة درجه ونص والله
لكن الحمدلله .. عدت ثانويه عامه وجبت مجموع دخلني الكليه اللي على مزاجي والقريبه من سكني .. بالرغم من ان مجموعي كان يدخلني هندسة مرتاح .. بس هندسه الزقازيق

ملحوظه
شكرا على ردك على رئيس جمهورية نفسي واللي انا متفق معاه في بعض اللي قالو بس هنزل موضوع دلوقتي او في اقرب فرصه عشان اوضحلو واوضح لغيره يعني ايه صعايده ويعني ايه صعيد
ولو دبحت ان شاء الله .. هبقى اشيلك الكبده والكلاوي ياستي .. ولا يهمك
وكل سنه وانتي طيبه وبألف خير وسعاده ويارب في زي الايام دي تكوني منورة مصر ومنورة اسكندريه كلها بوجودك واقامتك فيها

سلامووووووز

Soooo يقول...

Nadosha

حاااااااااااااااااااااااااااااسب
اياكي تغلطي في بلدياتنا .. انا بلدياتنا برضه عشان تبقي عارفه
وبعدين المشكله مش في القهاوي اصلا
القهاوي في مصر اكتر من المصريين .. وفي كل محافظات مصر
وعمر قعدة القهوة ماكانت عيب
العيب ان الواحد يقعد عالقهوة .. من غير مايطلب مشاريب

سلاموووووووووز

Soooo يقول...

cinderella

والله اجدع تعليق جالي من اجع سندريلا
هقولك ياستي .. اولا انا من سوهاج انتساب .. يعني وانا عندي شهر سافرت مع والدي ووالدتي الله يرحمها السعوديه .. وفضلت هناك لغاية ماجيت على اولى اعدادي .. ومن ساعتها واحنا هنا في القاهرة
صحيح في زيارات على فترات متفرقه .. لكن الموضوع مالوش دعوة باني اقعد هناك ولا اقعد هنا
الموضوع باختصار اني دخلت كليه للاسف مافيش منها في مصر كلها .. كانت ساعتها يعني .. ومش في مصر وبس .. لا .. في الشرق الاوسط كللو .. كانت ساعتها قبل ما اسرائيل تعمل كليه زيها
الا وهي كليه .. فنون تطبيقيه
واللي مالهاش اي لازمه اصلا


سلامووووووووووز

Soooo يقول...

Doba

ام يوسف .. ازيك كده وازي يوسف وازي والد يوسف .. يارب تكونو كويسين يارب

وعلى فكره .. فكرتي في اني اسافر هناك وافتح مكتب ديكور قائمه على عدة نقط منها على سبيل المثال وليس الحصر .. اني بما اني هتغرب هتغرب .. يبقى اتغرب في بلدي بدل ما اتغرب في بلاد غريبه عني
ومنها برضه .. ان اكيد هناك في ناس برضه عايز تعمل شغل ديكورات حتى ولو كانت بسيطه بس ممكن مايكونوش لاقين اللي يفكر لهم او اللي يقدر ينفذلهم اللي عايزينه

ملحوظه .. انا زي رئيس جمهورية نفسي بقوللك زي ماهو قال وانا هرد على اللي قالو .. مافيش حد بيتكلم بالطريقه دي غير بتوع المسلسلات .. مش قصدي على طريقتي .. قصدي على طريقتك لما قلتي
"كنك اتجنيت يا ولدى وله اييييييه"


سلامووووووووز

Soooo يقول...

سهر الليالى

الله ينور عليكيييييييييييي
اهو ده اللي انا بتكلم فيه
لو فعلا كل واحد اهتم بمحافظته وبلده او قريته او المنطقه اللي هو فيها هنبقى فل الفل
وبعدين الحكومه مالها ومال الموضوع ده
ماللي عايز يشتغل في محافظته يشتغل .. ورب هنا رب هناك
ولا هو كل حاجه نقول الحكومه عملت ونقعد نعيط
انا مش مع الحكومه على فكره
بس هي دي سلبيتنا ومشكلتنا .. اننا كسلنا نتحرك وكسلنا نسعى

ربنا يسهل الموضوع بتاع اني افتح مكتب في سوهاج .. واهو بدل ما الواحد يتغرب ويتشحطط

سلامووووووووز

Soooo يقول...

Desert cat

يعني انتي جايه تهبطيني وتكسري مجاديفي
خبر ايه ياقطه
ماتروقي كده وتسقفيلي وتشجعيني
مش يمكن ربنا يكرمني هناك ويرزقني رزق حلال بدل ما الحياه هنا مقفله


سلامووووووووز

Soooo يقول...

رئيس جمهوريه نفسى

امانة عليك ياشيخ تقرى الموضوع مره تانيه وتقوللي كلام ايه اللي مش بيقولوه في الصعيد وانت منين من الصعيد
ولا على ايه
انا معاك اهه واحده واحده
جطر= قطر .. ولا في الصعيد بيقولو أطر؟؟
يابووووي = يالهوووي .. وعلى فكره الكلمه دي انا عن نفسي بقولها وانا باتكلم صعيدي في البيت مع ابويا واخواتي عشان بس تبقى عارف .. وعندنا في سوهاج وفي اسيوط بيقولوها
تزكرته كد اييه = تزكرته قد ايه .. وماتقولليش انهم بيقولو قد بالهمزة .. عشان بيقولوها زي مانا كاتب

ياريت بقى توضحلي ايه تاني انا افورت او بالغت او استخفيت فيه
وياريت الله يكرمك .. الله يكرمك .. الله يكرمك .. تقرى الموضوع الجاي وتقراه كويس
وبعدها تحكم بعقلك .. انا رأي ايه في الصعيد وفي الصعايده
ولو لسه رأيك زي ماهو
فدي دماغك بقى .. وياريت ماتقللش من كلامي ولا من دماغي


سلامووووووووز

Soooo يقول...

ra7eel

اهلا .. انتي ضربتي مخضروات وجايه تهيسي هنا؟؟

والله فعلا عندك حق
الرك عالشخص والظروف اللي حواليه
وفيها ايه لما اكون متخرج من جامعة دمنهور وباشتغل في دمنهور
ولا هي القاهرة بيوزعو فيها فلوس في الشوارع ولا ايه العباره

سلامووووووووز

Soooo يقول...

3ala asm masr

قومي زاكري يابنتي
صدقيني المدونات مش هتنفعك
ولا المزاكره عشان تبقي عارفه
بس هو كاس ولازم يدور عالكل
وربنا يوفقك وتنجحي وتحققي كل اللي بتتمنيه يارب

سلامووووووووووووز

Soooo يقول...

fanan fa2eer

لا بقى اسمحيلي
في فرق
لو انا خريج تجارة اسيوط ومقدم على وظيفه في اسيوط ومقدم معايا واحد من اسيوط ومتخرج من تجارة القاهرة .. بيشوفو الاصلح للشغل بغض النظر عن التقدير .. وبرضه بيشوفو مين اللي معاه واسطه او كوسه اعلى
اما بالنسبه لعندكم في كلية طب الموضوع مختلف عشان حاجتين .. مستشفيات جامعة القاهرة اللي هي القصر العيني ومستشفى جامعة عين شمس اللي هي الدمرداش اقوى من معظم مستشفيات الجامعات في الجمهورية اللهم الا جامعة المنصورة
واعتقد انك معايا في الكلام ده
وبالتالي الطالب في امتياز عندكم بيبقى شاف وعاين وعالج حالات اكثر من اللي زيه في جامعة الزقازيق او شبين الكوم

انما لو في مجال تاني الموضوع هيختلف


سلامووووووووز

Soooo يقول...

aya

منوراني يا فندم ومنورني تعليقك
بس الله يكرمك .. الاقيش عندك عقد عمل في قاهرتكم دي؟؟؟

ملحوظه
متشكر جدا جدا جدا على اضافتي في المدونين المفضلين عندك
وارجو انك تعتبري مدونتي هي مدونتك تمام وتشرفيني بتعليقاتك عندي على قد ماتقدري


سلامووووووووز

Soooo يقول...

فرنسا هانم

طب والله واحشاني كتييييييييييييييييير وواحشني تعليقاتك
ايه اخبارك واخبار رجلك .. الف سلامه عليكي وربنا يقومك بالسلامه يارب

وبعدين هو مش من حقي اتدلع على خالتي شويه ولا ايه؟؟؟

منوراني ومبسوط كتير انك بتقري مواضيعي


سلامووووووووووز

Soooo يقول...

شيرين

ارمي ودني ايه بس يابنتي
ده لو واحد في اخر المترو بيكلم صاحبه .. اخر واحد في العربيه اللي بعديه بيقى سامع الحوار
انتي فاكر المترو ده فدان رايح وفدان جاي .. دي علبة سردين اصلا

وتصدقي من اول ما بصيت على مدونتك .. شميت ريحة جامعة حلوان
الحمدلله ان خريجين جامعة حلوان اللي زينا كترو
وان شاء الله على الفين وعشره هنبقى اكتر من البني ادمين


سلاموووووووووووز

Soooo يقول...

Rosa

انتي فعلا مشكله
انا فطست ضحك على تعليقك والله
وبعدين انتي مش واخده بالك .. اصل صاحب الاعلان بتاع الوظيفه اللي قريتيها في الجرنان عنده حساسيه من جامعة الزقازيق
تقريبا كده اترفد منها ولا حاجه زمان .. قام حلف يمين طلاق انه ماينفع الجامعه .. ولا اللي متخرجين منها



سلامووووووووووز

Rosa يقول...

تقريبا جدا ,هو داالتفسير المنطقي الوحيد
و بعدين انا ممررالك تاج
ممكن تبقى ترد عليه بما اني فطستك من الضحك؟
:D

3ala asm masr يقول...

هسمع كلامك يا باشا حاضر وهقوم ازاكر
أنا بزاكر والله بس قلت اجى أتهوى وأقرا احلى كلام
سلام يا باشا

fanan fa2eer يقول...

ده علي أساس ان طلبة امتياز طب بيتعلموا حاجة أساسا وحتي لو اتعلموا بيتعلموا ايه يا سوو مباديء الطب تفتكر ان سنة الامتياز تؤهل أي طبيب أيا كان متخرج منين انه يبقي دكتور بجد؟
وحتي لو كان بيتعلم في الجامعات الاقليمية وعدد الحالات قليل
هل ده ذنبه؟
هل ده بيديهم الحق انهم يحاكموه علي انه متخرج من جامعة اقليمية ؟

لو كان ده ذنبه يبقي أسلم حل يقفلوا الجامعات الاقليمية خالص ويريحوا نفسهم والمستشفيات الاقليمية بالمرة وياخدو الطب من 120 % عشان يبقي اللي يدخل يدخل عين شمس وبس يا اما القصر العيني يا اما المنصورة

لكن طالما نظام البلد بيقول ان في جامعات تانية غير عين شمس والقاهرة والمنصورة يبقي أنا من حقي أقدم في أي حتة في أنحاء الجمهورية ومن حقي برده ان طلب تقديمي ده ينظر فيه زيه زي أي طلب تاني متقدم معايا بغض النظر أنا متخرجة من القاهرة ولا من أسوان حتي

بص يا سوو طبيب الامتياز ده بيقولوا عليه
hopeless ,aimeless &sometimes dangerouse

وأظن ماقالوش طبيب امتياز أسيوط ولا طبيب امتياز القاهرة حتي


والتعليم اللي مش مظبوط مش مظبوط في كل حتة مش في الجامعات الاقليمية بس لكن بدرجات وبرده ده مابيبقاش ذنب الطلبة

والا زي ماقولتلك يريحونا ويقفلوا الجامعات الاقليمية بقا

آه وعلي فكرة أنا كلية طب جامعة الزقازيق ومش القاهرة
يعني ببساطة طبيبة أدني مستوي من طبيب القاهرة والقصر العيني والمنصورة
مش كدة ولا ايه؟ :))

تحياتي ياسوو

بت خيخة وأى كلام يقول...

لا مافيهاش بطيخ
فيها موز بس

اختك خيخة

Soooo يقول...

Rosa

اعتقد انك قلتلي اسبابي في حوار التاج ده
وكل سنه وانتي طيبه


سلامووووووووووز

Soooo يقول...

3ala asm masr

ربنا يكرمك يارب وينجحك ويوفقك في كل اللي بتتمنيه دنيا آخره
ولو فعلا عايزه تهوي نفسك وترتاحي وتقري احلى كلام
عليكي وعلى قراية القرآن الكريم
الا بذكر الله تطمئن القلوب

كل سنه وانتي طيبه


سلاموووووووووووووز

Soooo يقول...

fanan fa2eer

على فكره انا قريت ردك ده تقريبا بعد ما كتبتيه عندي ببتاع خمس دقايق .. لكن ماكنتش عارف ارد اقول ايه
يمكن لاني حسيت اني دخلت في منطقه انا مش فاهمها مليون في الميه .. وفعلا سألت مجموعه من اصدقاءي الخريجين من كليات الطب في كزا جامعة تانيه غير القاهرة وعين شمس وبس
وكلهم فعلا اكدو على جزء من كلامي وعلى جزء من كلامك
اكدو على النظرة اللي بيتبص ليها لخريجين كليات القاهرة وعين شمس ومختلف المحافظات لما بيتقدمو لشغل وظيفة دكتور في اي مستشفى عامله اعلان .. وانهم بيعتقدو ان جامعة القاهرة وعين شمس افضل من غيرهم عشان سنة الامتياز
زاكد اصدقائي برضه على نقطتك اللي بتقولي فيها ان فعلا طالب الامتياز مابيتعلمش شيء يذكر في سنة الامتياز وانه فعليا مافيش فروق بين مستشفيات جامعات مصر .. سواءا كانت القصر العيني او الدمرداش او المنصورة او الزقازيق او اسيوط او اسكندريه .. وانهم مابيبقاش فيه اختلاف مابينهم في العلم او الممارسه الطبيه زي مانا كنت فاكر

وبالتالي الاعتراف بالحق فضيله .. وانا باعتذر عن المعلومه المغلوطه اللي قلتها معتقدا ان رأيي صح مليون في الميه
وباعتذرلك وباعتذر لكل طلبة كليات طب في مختلف محافظات مصر عن سوء النظام في الحكم بين دكاترة واطباء جامعات مصر المختلفه

وهنا نرجع لنفس السؤال .. اللي هو
هي امبابه مافيهاش بطيخ؟؟

وكل سنه وانتي طيبه .. وارجو انك ماتزعليش منني لو بدر مني اي تقليل لكليتك او لاي كليه تانيه .. والمسامح كريم



سلامووووووووز

Soooo يقول...

بت خيخة وأى كلام

لا وانتي الصادقه
مافيهاش ولا بطيخ ولا موز .. فيها كوسه وقرع

وكل سنه وانتي طيبه
وياريت تنوريني كده كتير وماتبقاش زياره كل عشر سنين


سلامووووووووووز

وومن يقول...

ايد ده بقي
انا لسة كنت هنا من يومين وقريت كل المذكرات بتاع الطفل الطخين

ايه الحركات دي
ماعلينا يحضرني في هذا الموقف بقي موقف زميل ليا هنا في الشغل قعد في كلية تجارة 9 سنين علشان كانت تجارة بني سويف وهو كان عاوز يدخل القاهرة فمكنش بيروح الجامعة
بس الغريبة بقي انه اتخرج واشتغل الحمد لله واحنا هنا معظمنا تجارة ما بين عين شمس وحلوان والقاهرة والأقاليم ومش شايفة انها فارقة قوي الحمد لله كلنا ميح ومش فاكرين حاجة من اللي اتعلمناها لأن الحياة العملية حاجة تانية خالص
وعجبي

Soooo يقول...

وومن

تصدقي وتؤمني بالله
انتي عشره على عشره
مش عشان بتعلقي وبتقولي كلام حلو
لا
عشان انا باحترم اللي يقلب في اي مدونه ويشوف ايه المواضيع القديمه ومش بيكتفي بمجرد قراية اخر مواضيع وخلاص

ويارب تكون المذكرات عجبتك ويارب تكون المواضيع اللي كتبتها عجبتك يارب

وبخصوص الشغل والكليات .. وجهة نظرك في ناس كتير معاها وفي ناس ضدها
وانا معاكي في ان كل الكليات واحده .. وكل الناس بتتخرج مش فاكره اي حاجه في المناهج .. والشغل ده بتاع ربنا
بس هتقولي ايه بقى للامخاخ اللي شايفين ان القاهره ام الدنيا

وانتي ازيك وعامله ايه وفين وليه وبكام ؟؟

صباحو نجف




سلاموووووووووز