الأربعاء، 18 ذو القعدة 1428 هـ

!!! خطروف .. بمليار دولار

.. وبينما اجلس منتظرا مبلط الرخام في الغرزة التي اتفقنا عليها في السيدة نفيسه وفي قلب الترب ..
حلوه قوي الدخله دي .. (وبينما) .. محسساني اني كنت خلاص على وشك يعني
ام هند .. وبينما اجلس منتظرا مبلط الرخام في الغرزة التي اتفقنا عليها في السيده نفيسه وفي قلب الترب .. جاتني خاطر او خطروف - من الخطرفه - بإني قال ايه .. لي عم في البرازيل ومات .. وسايبلي ثروة تقدر بمليارات الدولارات الاسترليني .. بشرط اني اصرف كل يوم ولمدة شهر .. مبلغ وقدره مائة الف جنيه مصري .. من غير ما اشتري بيهم اي عقار او حاجه تبقى باسمي
!!!!
خطروف خطروف يعني .. وقعدت اقدح زناد فكري .. وزناد شكري .. وزناد فخري
وقدحت كل الزنانيد اللي اعرفهم في حياتي
!!! مية الف جنيه مصري كل يوم ولمدة تلاتين يوم
!!! ومن غير ما اشتري شقه او عربيه او اي حاجه باسمي خالص
هممممم
طب فل .. انا معايا بتاع 30 الف جنيه في البنك .. اجيب بيهم عربية 128 لونها احمر .. واقضيها كل يوم حادثه واصرف عليها من المية الف جنية دول
وبمجرد ما اصلحها اروح خابط بيها في شجره .. تتصلح اخبط بيها في عامود .. تتصلح اخبط بيها في عربية كارو .. ومش هاخبط في ميكروبازات لانهم بيخبطو فيها من غير اي حاجه اصلا
واقضيها لبس وفسح بقى .. يوم في كريزي ووتر .. يوم في دريم لاند .. يوم في ساقية الصاوي .. واتفرج على اي حفله وكل حفله واي حاجه ادفع فيها اي مليم
وبعدين قلت ايه الهطل ده ؟؟
.. عربية 128 ايه وساقية الصاوي ايه
انا اقضيها ايجار عربيات من اللي هي .. أأجرلي عربية لامبرجيني ديابلو .. وعربية بنتلي .. وعربية جاجوار كوبيه .. وعلى فكره .. العربيات دي اغلى من الـ 128 بمراحل يعني .. وسعرها قريب من سعر الدوجان شاهين لو متظبطه ومتركبلها جنوط وسبويلر وقزاز فيميه .. حاجه فيخمه فيخمه يعني
وبدل ما اتفسح في ساقية الصاوي ولا اكل هارديز ولا بتاع .. اشد الرحال على فرنسا كل يوم بطياره خصوصي
اروح اتمشى في الشانزلزيه .. واكل ترمس فرنساوي عالكورنيش بتاع نهر النيل بتاع فرنسا .. واتعشى كباب وكفته فرنساوي في (ابو رامي) اللي في فم الخليج في فرنسا .. اللي عند مستشفى ام الفرنساوين .. اللي زي ام المصريين عندنا .. ماهو كل دولة فيها (ابو رامي) وقدامه مستشفى ام الدولة دي
.. وبعدين قلت لروحي ايه الهطل والهرتله دي .. اتعشى ايه واتفسح ايه
!! ده بدل ما اعمل اللي نفسي حد يعمله
.. اخد حتة ارض وابني عليها مجمع سكني يكون شكله كويس
.. ومش شرط اني اخد الارض شرا لو المفروض اني ما امتلكش عقار
.. أأجرها من صاحبها
وابني عليها مجموعة عمارات دورين بس .. واجيب صحابي واللي بيفهمو واقولهم احنا عايزين نعمل مجتمع سكني لنفسنا
نعمل دار ايتام نضيفه ونعامل الاطفال زي مايكونو ولادنا واخواتنا ... ونختار موظفين كويسين .. ونريحهم في مرتباتهم .. مش زي موظفين الحكومه اللي بيطفشو الايتام من دور الرعاية
نعمل مدرسة كويسه تعلم الاطفال باسلوب بسيط .. من غير كلكعة المناهج التعليمية اللي كلها حشو مالوش لازمه .. وبتعتمد على نظام تحفيظ الطالب كلمتين يخش يقولهم في الامتحان ويطلع ناسي اسمه
نعمل مستشفى كويسه ودكاتره كويسين واجهزة طبية كويسه .. نعالج حالات الناس اللي مش قادره تصرف على العلاج
نعمل مسجد وكنيسه .. ونجيب مشايخ ورهبان يوضحو للناس ان الدين احترام الاخر مهما كانت ديانته ايه
.. نعمل مجتمع نضيف خالي من اي احقاد مبنيه على حب السلطة والفلوس وبيحكمها الطمع والجشع
الحساب يا استاذ عشان انا هسلم وردية
؟؟؟؟؟؟؟
نعم؟؟
القهوجي : الحساب عشان انا هسلم وردية
سوووو : حساب ايه ولا مؤاخذه؟؟
القهوجي : حساب شاي منو فيه وقهوة مانو .. اتنين جنيه ونص يابيه
.. افتكرت اني كنت باحلم او باخطرف
.. وافتكرت اني على غرزة في السيده نفيسه
.. افتكرت اني قاعد في الترب
وسط الميتين


سوووو

الخميس، 12 ذو القعدة 1428 هـ

ساعات

ساعات بنحس احلامنا بتتحقق
ونعيش في الوهم ونصدق
.. نفوق في لحظه على الواقع
نفنجل عينينا ,, ونبرق
-----
ساعات اشوف الحب قدامي
في أوهامي وأحلامي
.. نفسي اعيشه كحقيقة
ويبقى الحب .. أيامي
-----
ساعات بانام وانا صاحي
والاقيني بانطعن ,, وبسلاحي
.. واقوم مفزوع القاني فل الفل
بس بلاقي دم .. على جراحي
-----
ساعات باضحك واضحك واكركر
وفي عز ضحكي الاقيني بافكر
.. بس بانسى الدنيا من فرحتي
ولهمومي تلاقوني .. باتنكر
-----
ساعات باقعد اكتب واشخبط
اكتب قصيده أو عصيده أو بالخبط
.. مش مهم لمين وليه
المهم اني افرح .. وازقطط
-----
ساعات بازهق من الأشعار
دمي خلاص منّي .. فار
.. لا حد فاهمني ولا شعري ليه لازمه
طب ليه ما اكونش انا الحمار
-----
ساعات باجري .. وباجري .. وما اقفش
كل اللي يشوفني يقول ده كليتش
.. بس الحكايه ومافيها اني مش خايف
و واخد حياتي كلها ... قفش فـ قفش
-----
ساعات بتاخدني الشهامه
واقف قصاد الاسد لنصرة يمامه
واحس اني (جاهين) أيامَه
وفي الآخر...بتركبني الملامه
-----
ساعات احس اني فنان
او بياع كلام بتاع زمان
.. سمسار أوهام وأحلام
وساعات باحس اني .. انسان
سوووو

الاثنين، 9 ذو القعدة 1428 هـ

!! قرض بضمان الـ .. البتاع

زي اي انسان دخلت الحمام عشان ألبي نداء الطبيعه
.. وبمجرد ماقعدت على القعدة بتاعة الحمام وولعتلي سجاره
حاكم انا ماعرفش استمتع بالحمام غير وانا باشربلي سجاره
وبمجرد ماولعت السيجاره ولسه بقول يا ملين .. لقيت الموبيل بيرن
تررررررررررن
.. اكتشفت اني سايب الموبيل عالغساله في الحمام لحسن الحظ
.. وبين الغساله والقعدة بتاعة الحمام حوالي اتنين متر مثلا
,,,, قمت قايم وماشي كالبطريق عشان اشوف مين بيتصل بي
وياللهول
UNKNOWN NOMBER
؟؟؟؟؟؟؟؟
دارت في دماغي تساؤلات كتير
تررررررررررررررررررن
تكونش مباحث امن الدولة عرفت اني عملت مدونه وعايزه تلبسلي قضيه قلب نظام الحكم
تررررررررررررررررررن
ولا تكون مباحث مكافحة المخدرات قرت الموضوع بتاع
كدب الابل وعايزة تعرف احنا كنا بنجيب مخضروات منين
تررررررررررررررررررن
ولا يكون الواد الشنكوتي الكبير وهو بيكلمني عالماسنجر بلغ عني بعد ما قلتله اني ضد النساء .. والنساء هم اللي بيتصلو
تررررررررررررررررررن
هي مافيش غيرها قطة الصحراء لما عرفت اني بافكر اجيب برنتر الوان راحت مبلغه عنني مباحث المصنفات
تررررررررررررررررررن
اسئلة كثيرة لم يوقفها غير اني قررت ان ارد عالموبيل .. وقل لن صيبنا الا ماكتب الله لنا
سوووو : الو ؟!؟
الآخر : (صوت حريمي) الو
سوووو : الوو .. الووووووو قوي كمان
الآخر : مع حضرتك سماح أنور من بنك الهس البس الدبليو سي
: ملحوظه
هي قالت اسم بنك من اربع حروف بس انا ماركزتش فيه الحقيقه .. كل اللي كان هاممني صوتها بصراحه
سوووو : اهلا بيكي يافندم
الآخر : ممكن اعطل حضرتك خمس دقايق ؟
سوووو : ياسلام .. قوي قوي وانا في ديك الساعه لما فنانه عظيمه زيك تكلمني
وجريت اجري كما البطريق على قعدة الحمام عشان اكمل نداء الطبيعه ولا كنت هطين الطبيعه طينه مطينه بطين
الآخر: لأ يافندم انا مش سماح أنور الممثله .. انا بس حابه اكلم حضرتك عن الاوفر اللي البنك بيعمله للكلاينتس .. المودعين حسابهم هنا واللي من خلاله بيقدرو ياخدو خمس اضعاف القيمه المودعه كقرض
سوووو :(مقاطعا) الاول بس عايز اعرف حضرتك جبتي رقمي منين؟
الآخر : الحقيقه يافندم أحد الكلاينتس عندنا هو اللي ادانا رقم حضرتك وقال انك ممكن تكون مهتم بالعرض بتاعنا
سوووو : يعني في حد يعرفني من الزباين بتوعكم واداكم رقمي على اساس اني زبون ؟
الآخر : ايوة يافندم احد العملاء عندنا يعرفك ورشحك لينا عشان تستفيد بالعرض ده
: ملحوظه
.. نفسي اعرف مين من صحابي معاه فلوس وحاططها في بنك الهس البس الدبليو سي
.. وكمان بيرشحني اني ابقى زبون زيه
هي دي الدنيا .. غداره طول عمرها .. والطعنه ماتجيش غير من الضهر

سوووو : طب ايه بقى العرض بتاعكم ؟
الآخر : حضرتك ممكن تاخد قرض بخمس اضعاف قيمة المبلغ اللي حضرتك مودعه عندنا في البنك بضمان الشغل بتاع حضرتك .. او اي ضمان عقاري او مادي
سوووو : طب ولو انا مش مودع عندكم حاجه او مش حاطط فلوس في البنك عندكم ايه الحل؟
الآخر : حضرتك ممكن تجيبلنا مفردات مرتب من الشغل الخاص بيك وتاخد القرض
سوووو : طب انا مش شغال اصلا .. ايه الحل؟
الآخر : ممكن لو في اي ضمان عقاري باسمك تاخد بيه القرض
!! سوووو : يعني واحد مش شغال اصلا .. هيكون معاه عقار خاص بيه .. وباسمه كمان
الآخر : طب مافيش اي حاجه باسمك خالص يافندم؟
سوووو :(بعد هنيهة تفكير) لا تصدقي في وانا كنت ناسي
الآخر : طب كويس .. ايه يافندم؟
سوووو :انا كنت اشتريت الموبيل بتاعي من سنتين ومعايا الفاتورة لسه .. اي نعم سعره نزل .. بس بيتباع في شارع عبعزيز دلوقتي ببتاع ربعميه وخمسين .. قولي ربعمية جنيه
الآخر : لا الحقيقة يافندم الموبيل ماينفعش
سوووو : طب بصي .. انا جبت هارد يو اس بي .. ميه وعشرين جيجا .. سعره حاليا في السخاوي بتاع خمسمية جنيه .. يعني هو والموبيل ببتاع تسعمية جنيه .. لو على كلامك يبقى اخد خمس اضعاف قيمتهم يعني بتاع اربع تلاف وخمسمية جنيه
الآخر : لا يافندم ماينفعش
سوووو : طب نخليهم سبعميه واتنين واربعين جنيه وعلى بركة الله .. ومرضيه بعون الله
الآخر : يافندم ماينفعش اصلا الكلام ده .. لازم تكون حاجه ليها قيمة فعليا
سوووو : همممم .. تصدقي اني حمار وكنت ناسي حاجه مهمه مووووت
الآخر : ياريت يافندم قول
سوووو : هو ينفع اخد قرض بضمان البتاع بتاعي ده؟؟
الآخر : افندم!!!!!!!!!؟؟؟؟؟؟؟؟
سوووو : (مستدركا) لأ انتي فهمتي البتاع ده غلط .. انا قصدي البلوج بتاعي .. او المدونه .. حاجه كده عالنت باتكلم وانزل مواضيع واقول رأيي فيها بصراحه وباتعرف على ناس .. وليه قيمه فعليا يعني
....: الآخر
.. سوووو : الو ... الو
.......: الآخر
سوووو : سماح .. ردي علي يا سماح .. سماح يا انور
end call
---------
.. الحقيقه تصرف غير حضاري منها انها تقفل السكه في وشي
بس مش ده اللي شغلني وخلاني مستغرب
: السؤال اللي بيختلج خلجات صدري هو
ليه سماح انور .. قفلت السكه في وشي ؟؟
اولا .. هل لانها خافت اتريق على اعمالها الفنيه زي ماحصل في موضوع قضية رأي خاص
ثانيا .. هل لأن الموبيل والهارد اليو اس بي .. الميه وعشرين جيجا مالهمش قيمه ماديه
ثالثا .. هل لأنها اكتشفت اني شخص عاطل وتافه وهايف .. وعندي بلوج أو مدونه وبقول فيها اي هسس
رابعا .. كل ماسبق قوله في التلات اربع سطور اللي فاتو دول
سوووو

الخميس، 5 ذو القعدة 1428 هـ

!! اغطسطس .. الفين وخمسه

طول عمري باكتئب لما بيهل علي شهر اغطسطس .. يمكن عشان ده الشهر اللي اتولدت فيه واللي لما بيجي بافتكر اني كبرت سنه من غير ما احس بقيمة حاجه عملتها ولا بتاع
ويمكن برضه لانه من اكثر شهور الصيف سخونه وانا بطبعي تخين وبكرش وباكره اني اروح البحر عشان انزل الميه لاني ساعتها هاقلع هدومي ويبان العار
بس المره دي انا فعليا تأكدت ان شهر اغطسطس مش ماشي معايا ولا ماشي مع هوايا خاااالص
------
يوم الاربع بافتح الجهاز بتاعي عادي خالص عشان اخش عالنت اعمل شوية حاجات لقيت في رساله طالعالي من شركة لينك اللي انا مشترك فيها بتقولي ان علي مبلغ 370 جنيه ونتيجة لعدم دفعي المبلغ ده فصلو الخدمه عني
كان ده رد فعلي لاني بادفع دايما اي فلوس متأخره علي .. قلت لأ بقى
انا هتصل ببتوع خدمة العملا واقولهم عالحوار
اتصلت واتلطعت لمدة تلاته واربعين دقيقه على ماحد فضيلي ولما بقولو كزا كزا كزا .. قاللي هو الواضح عندي ان حضرتك فعلا عليك المبلغ ده والخدمه مفصوله عنك
زي مايكون بسم الله ماشاء الله انصح اخواته
طب مانا عارف ياعم ان الخدمه مفصوله بس عايز اعرف المبلغ ده جه منين؟؟؟
لأ حضرتك تروح للشركه وتستفسر عن الموضوع ده
طبق رد الفعل اللي حصل ساعة ماشوفت المبلغ
---------
توكلت على الله واتجهت للشركة وبما اني اعرف واحد صاحبي اسمه هاني امام - اخو انتيمي احمد امام - شغال هناك قلت يبقى ان شاء الله هخلص بدري بدري والحق كام مشوار شغل عندي
دخلت من باب الشركة القزاز السيكوريت - والباب ده ليه دور حيوي في القصه - ورحت رايح اخد رقم وانا بهزر مع الشاب اللي بيدي الارقام وبيقولي اي خدمه .. قلتله وانا مبتسم الحقيقه انا جاي اتخانق وعايز رقم اتخانق بيه
رد علي بابتسامه برضه وراح مديني رقم
قعدت مع جملة الناس اللي قاعدين مستني دوري في الخناق .. والغريب ان المفروض يكون في اربع موظفين لخدمة العملاء لكنني لقيت اتنين بس منهم .. ومالقتش هاني صاحبي اللي انا رايح ومعتمد على الله ثم عليه في ان الحوار بتاعي يخلص بسرعه .. ولقيت موظف من الاتنين دول واحد محتاس يا عين امه في مشكله مع واحد ومش بيتكلم مع اي عملا تانين .. وبالتالي الضغط كللو كان على شاب كده شكله صغنطوط في السن .. وعنده بتاع واحد وعشرين سنه ولا اتنين وعشرين سنه .. وشكله كده جاي الشغلانه دي بواسطه .. ولانه ماتبهدلش في حياته ولا نزل الشارع قبل مايتخرج من محهد كومبيوتر .. فتحسو انه بيغرق في شبر ميه مع كل عميل بيكلمه
المهم .. قلت اسلي نفسي واتفرج على التلفزيون في الشاشه الال سي دي المحطوطه واللي كانت عماله تعرض سباق عربيات .. وانا باموت في العربيات اصلا ومستني اتفاقية الجات تتطبق صح عشان اجبلي عربيه نوعها اوعى وشك موديل الفحت الفحت الفحت .. لكن شكل الاتفاقيه دي ولا هتتطبق ولا هتتنيل طول ماحنا في العصر المبارك اللي احنا فيه
اخيرا جه الدور علي بعد اربع ساعات قعدة وفرجه عالعربيات والمواتير لدرجة اني بقيت ميكانيكي درجة اولى
رحت للاخ اللي قلتلكم عليه في الاول واللي الضغط كللو عليه ياعين امه .. قاللي خير .. قلتله والله في عندي مشكله كزا كزا وده رقم تليفوني
قعدت يخبط شويه عالكيبورد ويكتب في حاجات وسايبني واقف قدامه بتاع نص ساعه مثلا وهو قاعد على كرسي بار ومريح رجليه وانا لاني تخين فرجلي بتشد علي من الوقفه .. مريض بقى
المهم .. قام بعدها وراح للبرنتر اللي جنبه وسحب منها ورقه كان بيطبعها .. ورجعلي ولقيته بيبص في الورقه وبيقولي لا حضرتك المبلغ اللي حضرتك هتدفعه مش تلتميه وسبعين جنيه .. قلت في عقل بالي الحمدلله ظهر الحق وزهق الباطل .. قاللي حضرتك المبلغ بالظبط بالظبط .. ربعميه خمسه واربعين جنيه وتلاتين قرش
رد الفعل ده ملازمني طول اليوم بطريقه غريبه ,, قلتله ازاي بقى الكلام ده .. راح حاطط الورقه قدامي وقالي ركز معايا .. وعايز الكل يركز في الحته اللي جايه
حضرتك في شهر اغطسطس سنة الفين وخمسه مادفعتوش .. اضافة الى اننا كنا عملنا اوفر عشان الناس المشتركه في خدمة النت من سنة الفين واتنين ورخصنالهم ايجار الراوتر وعملنا كده غلط مع حضرتك .. ولما عرفنا انك مشترك في الخدمه من سنة الفين وخمسه شيلنا الاوفر ده من حسابك .. وبالتالي حضرتك لازم تدفع الفرق في الايجار اللي احنا غلطنا وحسبناه لحضرتك .. وفي حضرتك شهر اغطسطس سنة الفين وسبعه وحضرتك مادفعتوش برضه .. وبالتالي يبقى الاجمالي اللي حضرتك لازم تدفعه ربعمية خمسه واربعين جنيه .. وتلاتين قرش
!!! عروستي
!!! لأ بجد عروستي
يعني ايه شهر اغطسطس الفين وخمسه مادفعتوش وانا ساعتها كنت باتعامل مع شركة فيرست اللي انتو مكلفينها انها تحصل الفلوس واللي عمرها في يوم ما اتأخرت علي
؟؟؟؟؟
ويعني ايه شهر في سنة الفين وخمسه ما اتدفعش وانتو نسيتو خالص لمدة سنتين وجاين تتكلمو عنه دلوقتي
؟؟؟؟؟؟
ويعني ايه غلطتو وخصمتو من ايجار الراوتر بتاعي وبتطالبوني اني انا اللي اصلح غلطتكم
؟؟؟؟؟؟؟
وازاي ماحدش اتكلم من بتوع التحصيل لما جيت ودفعت آخر مره وقاللي اني مادفعتش شهر اغطسطس
؟؟؟؟؟؟
لقيته تنح ومش عارف يتكلم يا ضنايا .. رحت سايبه وانا متنرفز وعلى آخري ومتجه على باب الخروج .. مش عشان امشي قد مانا متجه للباب اللي جنب باب خدمة العملاء .. واللي فيه الاداره بتاعة الشركه
وبمجرد ما فتحت باب الشركة القزاز السيكوريت .. ومشيت خطوه في التانيه في التالته سمعت صوت تشششششش
ابص ورايا.. الاقي ضلفه من الباب تحولت لحبيبات تلج
الري أكشن ده انا شكلي هصاحبه وهعملو في كل حياتي بجد
لقيت الموظف اللي اداني الرقم بتاعي في اول الحدوته خالص طالع يجري ورايا وبيقولي لو سمحت يا استاذ اتفضل معايا لحظه .. قلتله وانا على اخري .. وهو انا هجري منك .. انا طالع على المدير ولا المسئول بتاعكم افهم ايه السرقه دي .. قالي خلاص يافندم حضرتك اتفضل معايا جوه وانا هبلغ المسئولين
بيني وبينكم .. انا فرحت قوي انه هيبلغ المسئولين .. لأني من زمان قوي نفسي اتعرف عالاستاذ لينك ذات نفسه واضرب معاه صحوبيه واهو يمكن يقوللي عايزك توضبلي شقتي في مرتفعات جولف اسيوط .. او حتى في دار السلام هايتس .. انشالله حتى لو كانت شقه في السيده زينب جاردنز .. باعتبار اني مهندس ديكور وسمعتي انضف من الاطباق البلاستيك بتاعة الكشري اللي بيجيب فيرس سي بتاع الشوارع
دخلت الاوضه ورحت متصل بهاني صاحبي بس لقيته مابيردش .. رحت متصل باخوه الكبير احمد .. لقيته نايم .. قلتله ابعتلي اخوك في الشركة بتاعة لينك عشان انا كسرتلهم الباب السيكوريت ابو الفين جنيه .. و شكلها كده هبات في الحجز بتهمة ازدراء اديان .. قاللي طب خد اخويا كلمه اهو .. وانا باتكلم مع اخوه لقيت شخص كده هيبه دخل علي الاوضه .. صاحبي بيقوللي انت فين دلوقتي .. قلتله انا في المكتب اللي عالشمال اول ماتدخل من باب الشركة .. قالي اه .. وفي حد معاك ولا انت لوحدك .. قلتله لأ في معايا استاذ .. ورحت باصص للراجل اللي دخل وقلتله معلش بس اسم حضرتك ايه .. قاللي كريم .. كريم سوكا - عايزكم تفتكرو الاسم ده كويس - رحت قايل لصاحبي انا في المكتب ومعايا استاذ كريم .. لقيت صاحبي بيقولي وهو خايف .. استاذ كريم !! كريم سوكا !!! قلتله اه
سكت هنيهة كده وقالي بصوت فيه نبره (لا حول ولا قوة الا بالله .. وانا لله وانا اليه لراجعون) طب يا سوووو .. انا جايلك حالا
مش قلتلكم رد الفعل ده بقى صديقي الصدوق
استاذ كريم زي ما سبق وقلت .. ليه هيبه كده وبيفكرني باحمد زكي في فيلم زوجة رجل مهم .. لقيته راح قاعد ومبتسم .. وكاد ان يخلع ساعته
ولكن الله سلم .. وقاللي وهو مبتسم .. ايه المشكله
قلتله حصل كزا كزا ولقيت الموظف بتاع الفرانت ديسك بيقوللي ان في شهر اغطسطس الفين وخمسه لسه مادفعتوش وبيقوللي ان حصل غلط في خصم ايجار راوتر والمفروض مايتخصمليش ومن الاخر كده انا حاسس اني باتحمل غلطات الاخرين مع اني لما باغلط في شغلي باتحمل نتيجة غلطتي وبادفع كامل المصاريف من جيبي الخاص وما اقولش للعميل اللي انا باعمللو الشغل اني غلطت عشان ابسط حاجه احافظ على شكلي قدامه اني قد كلمتي .. لكن اللي حصل معايا بيؤكدلي بما لا يدع مجال للشك ان في اخطاء كتير بتحصل هنا ومابيتمش محاسبة المخطئين وبيتم تحميل كل ده عالعميل
الراجل قاللي طب ثانيه واحده وقام
انا قلت بس .. هيجبلي بوليس الاداب ويلفوني في ملاية من عندهم ويلفقولي قضية فعل فاضح .. اضافة الى قضية ازدراء الاديان
رحت مكلم صاحبي وشريكي في الشغل .. حسن ناجي وقلتله تعالى عشان شكلي كده هروح في ابو نكله .. فوجدته هب لانقاذي - حلوه قوي كلمة هب دي .. محسساني اني مصاحب اسد مثلا
جالي حسن صاحبي في سرعة البرق وكان ساعتها استاذ كريم بيتكلم معايا والراجل بمنتهى الشياكه والجنتله قاللي يافندم احنا هنشيل المبلغ بتاع شهر اغطسطس الفين وخمسه .. وهنشيل المبلغ بتاع ايجار الراوتر اللي غلطنا فيه .. ومش هيفضل غير شهر اغطسطس الفين وسبعه .. وده لو حضرتك كنت دافعه شوفلنا الايصال .. ولو ماكنتش دافعه فممكن تدفعه دلوقتي ولو حضرتك لقيت الايصال يبقى يتحول المبلغ ده لشهر نوفمبر اللي احنا فيه دلوقتي
صراحه صراحه صراحه .. اذبهليت .. الراجل حل المشكله بعقل وهدوء وكياسه يحسد عليها الحقيقه
وقصاد شياكته في التعامل دي رحت قايللو وانا معاك في كل كلامك تمام .. وهبعت لحضرتك حد ياخد مقاسات الباب السيكوريت اللي اتكسر واركبه في اقرب وقت
لقيته بيقوللي .. باب ايه .. الباب وقع لوحده يافندم وحضرتك ماعملتش حاجه
مش بقوللكم رد الفع ده بقى انتيمي خلاص
-----------
انتهى الموضوع على كده .. وعلى اني اشوف الايصال بتاع شهر اغطسطس الفين وسبعه ولو مالقيتهوش يبقى ادفعه
وده مش مشكله .. مع اني بصيت في السايت بتاع الشركه ولقيت اني بالرغم من اني دافع كل الفواتير في كل الشهور من اول ما اتعاقدت معاهم لغاية دلوقتي .. في علي 60 جنيه .. وانا مش فاهم الستين جنيه دول بتوع ايه
بس شكلها لازملها روحه تانيه لهناك
بس ان شاء الله .. المره دي من غير تكسير حاجه
--------------
شكر خاص
شكر خاص لـ أحمد امام واخوه هاني امام اللي شغال في شركة لينك واللي قاللي انه جايلي لما سمع اني باتكلم مع الاستاذ كريم سوكا
!! شكر خاص لحسن صاحبي وشريكي وعشرة عمري .. واللي هب لنجدتي كما تهب الاسود لأكل الفريسه
شكر خاص جدا جدا جدا جدا لاستاذ كريم سوكا واللي باتمنى انه يقرا الموضوع ده .. ويسلملي على الاستاذ لينك ابن الحاج دي اس ال سلام حار جدا .. ويبوسهولي من هنا ومن هنا .. ويقوللو لو محتاج اي شغل تشطيبات وديكور.. في مهندس اسمه سوووو دماغه مطرقعه
وشكر خاص للسيد رئيس المجلس المحلي واللي ناوي انه يسفلت الشارع بتاعنا بقاله عشر سنين
وشكر خاص للسيد عم سيد البقال اللي بيديني السجاير البوكس بسعر اتنين جنيه ونص مش بتلاته جنيه الا ربع
--------------
سؤال يدور في ذهني .. ليه كل المصايب بتحصل في شهر اغطسطس .. بداية من مولدي .. لغاية الشهر اللي ماتحسبش وبيتم مطالبتي بدفعه .. سواءا في سنة الفين وخمسه .. او الفين وسبعه ؟؟؟
!!! ربنا يستر علي في شهر اغطسطس .. الفين وتمانيه
..: ملحوظه
شهر اغطسطس سنة الفين وسته .. تعرضت لعملية تثبيت في منطقة شق التعبان .. وتم ضربي بسنجة في ايدي عشان عملت فيها عبده بوند ومارضتش ادي اللي بيسبتوني اي حاجه .. وسيلي سرد التفاصيل في موضوع لااااااااحق



سوووو

السبت، 29 شوال 1428 هـ

اللهم ارحمنا أحياءا وأموات

اول مادخلت عالم التدوين كنت عمال الف عالمدونين نفر نفر في المدونات بتاعتهم عشان اعلق عند كل واحد واسيب انطباع كويس عشان يدوس على اسمي ويجي المدونه بتاعتي
ولفت انتباهي ان في مدونه اسمها شيكو اون لاين صاحبتها بنت جميله اسمها شيكو - ربنا يرحمها يارب - وانا باتابع التعليقات في اخر موضوع ليها عرفت انها توفاها ربنا في رحمته ان شاء الله
سكت .. اكتفيت اني مصمصت في شفايفي وقلت في سري ربنا يرحمها ويرحمنا برحمته يارب
وكملت لفي عالمدونات التانيه وعمال اسيب تعليق هنا على تعليق هنا .. في من الناس اللي علقت عندهم اللي رد علي وجالي وتفاعل معايا في مدونتي .. وفي اللي ماردش
بس اكتر شخص حز في نفسي انه ماردش علي .. كانت واحده مدونه قريت في مواضيعها خفة دم وسخريه وطيبه مستخبيه مابين السطور
رديت على موضوع من مواضيعها وعلى موضوع من مواضيع جوزها كمان .. وهو بس اللي رد على موضوع واحد من مواضيعي وبعد كده اختفى .. وبرضه زعلت لانهم فعلا كانو اكتر ناس بجد بارتاح وانا باقرا مواضيعهم
الاتنين دول كانو .. بهلول .. وزوجته المغفور لها والمرحومه باذن الله .. بهلوله .. او هدى عبدالله
ولسه عارف بالموضوع ده النهارده من المدون احمد الصباغ
الصراحه تنحت .. وقفت مابيني وبين نفسي وقلت لاحول ولا قوة الا بالله
بقى انا متضايق اني ماكتسبتش صداقتهم وهم كانو في ظروف مايعلم بيها الا ربنا
.. افتكرت شيكو برضه
ورحت داخل عالمدونه بتاعتها .. ودخلت عالشات بوكس بتاعها قلت ادعيلها بالرحمه شويه
.. يمكن حد يفتكرني لما اموت بقراية الفاتحه على روحي
.. افتكرت برضه لما ربنا توفى امي في رحمته ان شاء الله وماتت
يااااه
قد ايه الفراق صعب بجد
.. افتكرت لما عملت ايميل وفيه دعاء لامي ولموتانا وموتى المسلمين بالرحمه
ووزعته على كل الليسته اللي عندي عالماسنجر
افتكرت لما بعتت الايميل ده لنواره نجم ولقيتها باعتالي ريبلاي عالايميل بتقولي انها دعت لامي بالرحمه وحلفتني ادعيلها بالرحمه كمان لما - بعد الشر يارب عليها وعلى والدها - ربنا يتوفاها وتموت
.. قلت طب ليه ماعملش كده
.. واديني اهه باقول دعاء وباهب ثوابه - وعايز كل اللي يقراه يهب ثوابه - رحمه على روح شيكو وبهلوله وامي
وكل موتانا اجمعين يارب
----------
اللهـم .. يا حنَّان يا منَّان .. يا واسع الغفران
اغفر لها وارحمها وعافها واعف عنها وأكرم نزلها ووسع مدخلها
واغسلها بالماء والثلج والبرد .. ونقِّها من الذنوب والخطايا كما ينقَّى الثوب الأبيض من الدنس
اللهـم .. أبدلها داراً خيراً من دارها .. وأهلاً خيراً من أهلها .. وزوجا خيراً من زوجها
وأدخلها الجنة وأعذها من عذاب القبر ومن عذاب النار
اللهـم .. إن كانت محسنة فزد في حسناتها وإن كان مسيئة فتجاوز عنها يارب العالمين
اللهـم .. آنسها في وحدتها .. وآنسها في وحشتها .. وآنسها في غربتها
اللهـم .. اجعل قبرها روضة من رياض الجنة ولا تجعله حفرة من حفر النار
اللهـم .. ارحمها تحت الأرض واسترها يوم العرض ولا تخزِهِا يوم يبعثون
اللهـم .. يمِّن كتابها ويسِّر حسابها وثقِّل بالحسناتِ ميزانها وثبِّت على الصراط أقدامها
وأسكِنها في أعلى الجنات في جوار نبيِّك ومصطفاك صلى الله عليه و سلم
اللهـم .. أمِّنها من فزع ومن هول يوم القيامة .. واجعل نفسها آمنةً مطمئنة .. ولقِّنها حجَّته
اللهـم .. اجعلها في بطن القبر مطمئنة .. عند قيام الأشهاد آمنه .. وبجود رضوانك واثقة .. وإلى أعلى درجاتك سابقة
اللهـم .. حل روحها محل الأبرار .. وتغمَّدها بالرحمة أثناء الليل والنهار
اللهم .. أجعل القرآن الكريم في قبرها جليسا وأنيسا .. ويوم القيامة شفيعا .. وإلى أعلى جناتك رفيقا
اللهم ثبتها يوم الدين .. وثقل موازينها ويمن كتابها ويسر حسابها .. واجعلها من ورثة جنة النعيم
اللهم أنزل على قبرها الضياء و الفسحة والسرور.. والروح والريحان .. والفسحة والرضوان
اللهم أكرمها و لا تهنها وراضها وإرض عنها
اللهم أرفع ذكرها ..وأرفع درجتها .. وأكرم مقامها يوم الدين .. واجزل ثوابها
اللهم أجمعها مع المتقين في جنات ونهر.. في مقعد صدق عند مليك مقتدر
اللهم صبر اهلها على فراقها و اجمعهم بها فى الفردوس الأعلى
اللهم اغفرلها و لجميع موتى المسلمين
اللهم اغفر لجميع موتى المسلمين الذين شهدوا بأنك الإله الحق
وأن محمداً عبدك ورسولك .. وماتوا على ذلك
اللهم ارحمها وارحمنا برحمتك يا أرحم الراحمين
اللهم آمين يارب العالمين
وإنا لله وإنا اليه لراجعون
ولا حول ولا قوة الا بالله العلي العظيم
----------
.. كلمة بقولها لبهلول لو شاف الموضوع ده
اذكرك بقول المصطفى صلى الله عليه وسلم
لله ما أخذ .. ولله ما أعطى
فاصبر واحتسب
-------
.. كلمة بقولها لكل اللي بيقرى كلامي ده
.. لو ربنا توفاني في رحمته - ان شاء الله - ومت في يوم من الايام
اقرولي الفاتحه وادعو ان ربنا يرحمني
صدقوني .. هكون في اشد الحاجه لدعاؤكم ده
سوووو

الثلاثاء، 25 شوال 1428 هـ

مراتك .. ولا الوطن ؟؟

قاعد عالقهوة وباتفرج على ماتش اشبيليه وريال مدريد ولا بي ولا علي .. والاقي واحد صاحبي جه وراح قاعد جنبي وبيقوللي .. مراتك .. ولا الوطن؟؟
لقيت نفسي من غير ما افهم اي حاجه بقوللو .. الماتش ده حلو قوي على فكره
لقيته اتدور ناحيتي وبص في عيني نظره جاده وبيقوللي : بقولك .. مراتك ولا الوطن؟؟
قلتله ايه ياعم في ايه مالك ماتروق كده .. ايه الحوار اصلا
حكالي انه كان بيتفرج على برنامج الحقيقه بتاع وائل الابراشي .. وان الحلقه كانت بتتكلم عن دكتور مصري متجوز واحده فلسطينيه بقاله قد خمستاشر سنه .. وانه طلب من الحكومه انها تاخد الجنسيه المصريه باعتبارها ام لأولاد مصريين وبقالها في مصر اكتر من عشرين سنه .. لكن طلبه اترفض .. ونتيجة لده تم ترحيل مراته لاسرائيل او فلسطين المحتله .. ولما اشتاقلها وبعد ماغلب حماره هنا في مصر انه على الاقل يجددلها الاقامه بتاعتها .. قام سافر اسرائيل وقدم طلب على الجنسيه الاسرائيليه عشان يقدر يبقى معاها .. والطلب اتوافق عليه واتعين في مستشفى ووفروله سكن خاص محترم ومرتب محترم والحياه بقت فل معاه .. وحكالي صاحبي انهم في البرنامج كانو عاملين معاه اتصال تليفوني .. وكان الابراشي مستضيف اتنين نازلين فيه شتيمه وتهزيئ عشان خد الجنسيه الاسرائيليه .. وان امه زعلانه منه
وفي الاخر قالوله .. مراتك ولا الوطن ؟؟
.. بصراحه .. لقيت نفسي مش عارف اقول ايه
بس قلت بدل ما اغلب روحي اسأل اللي حوالي
كان معايا عالقهوة تلات شخصيات اعرفهم
عم فتحي .. القهوجي .. وده انا قلت اسأله اخر واحد
وحسن صاحبي وعشرة عمري .. وده متجوز بس على وش طلاق
وهشام .. وده خريج تجاره وشغال دلوقتي في نسخ السيديهات وبيعها بدل مايقعد عاطل
سألت حسن .. مراتك ولا الوطن .. قاللي هي فين مراتي ياعم .. دي خلاص عايزه تتطلق وانا غلبت معاها ومع اهلها .. لكن منها لله امها .. هي اللي خربت بيتي .. دي حتى منعاني اشوف عيالي ياعم .. وشكلي كده هاسيبلها البلد واهج على اي حته عشان ترتاح
!! سألت هشام .. مراتك ولا الوطن .. قاللي بعد لحظة تفكير وصمت .. بس انا مش متجوز
سألت عم فتحي القهوجي وهو بينزل الشيشه لصاحبي اللي حكالي الموضوع .. مراتك ولا الوطن ياعم فتحي ؟؟
بصلي كده وهو مبتسم على مستغرب .. وقاللي حكمه رهيبه
قاللي مراتي طبعا .. على الاقل استحملتني بقالها خمسه وعشرين سنه وواخده بالها منني ومن ولادي
وكفايه ان مراتي بتنام معايا كل يوم .. مش زي الوطن .. بينام معاه غيرنا
-------
جوووووووووووون
.. اشبيليه جابت جون في ريال مدريد
الكوره دي غير الكوره اللي عندنا .. في الوطن
سوووو

السبت، 22 شوال 1428 هـ

!! سوووو .. والتِسَع قطط

كانت امي - رحمة الله عليها إن شاء الله - تُطلق عليّ اسم أبو هريره , وذلك لأنني كنت كل يومين تلاته وانا راجع البيت .. أجيب معايا قطة من الشارع , وقد وصل بي الحال أنني في فترة من الفترات كنت أُربّي تِسَع قطط في البيت , وكان لهم معي ذكريات غريبة .. غريبة للغاية

هيام .. كانت أكبرهم سنا وأرجحهم عقلا , حيث كانت تشعر بقدومي كلما ركبت الاسانسير بتاع العماره وانا راجع .. بينما نسكن في الدور التاسع ! , وكانت تنتظرني على باب الشقه وتستقبلني
!! بالأحضان يابلادنا ياحلوة بالأحضان
كانت هيام أكثر القطط التي شاهدتها في حياتي .. اتزانا عاطفيا , حيث أنها لم تهرب من المنزل في فترة تزاوج القطط .. وفضّلت أن ترعى القطط الأصغر منها سنا
وكانت نهايتها مأساوية جدا .. حيث نَزلت هيام لأول - و آخر - مرّه للشارع .. وما أن وطأت الشارع بأقدامها .. حتى ظهرت عربية رُبع نقل طائشه .. فدهستها , وأمسكت بسائق العربيه
.. فوجدته ابن قُرني البواب الذي يحرس عمارة في أول شارعنا , ودببت معه خناقة لرب السما
!! وكدت أن أبطحه بطوبة قرن .. ولكن الناس حاشتني عن الفتك به

نيوتن .. وكان أغبى قط شفته على الإطلاق .. وكنت أراقب تصرفاته وأضحك ملء شدقي , واتذكر أن وصل به الغباء .. أن تسلل تحت البطانيه وانا نائم في أحد أيام الشتاء - أيام ما كان في شتاء فعلا - ونام على ذراعي اليمين .. وما أن نام وأنتخ .. حتى شعرت بماء دافئ ذو رائحة
! كريهة على يدي .. واتضح لي انه عملها على روحه .. وعلى إيدي
وكانت نهاية نيوتن تنُم عن غباء فطري .. حيث انه كان يمشي على سور البلكونه ونحن كما سبق وقلت آنفا .. نقطن في الدور التاسع , وكان - بسلامته - يمشي مختالا فخورا بظل قامته الذي يبدو له على الأرض , وفي أثناء مشيه مختالا فخورا .. ظهرت له ذبابه .. فأراد أن يصطادها .. قام ضارب برجليه القُداميّن والورانيّن - في توقيت واحد ! - وراح هوووووب .. وقع من الدور
!! التاسع

صافيناز .. وكانت أكثر القطط تناكةً وأنافةً وألاطةً ! , ولم تأكل في حياتها أو تمتد يدها - أو رجلها - مرّة واحدة إلى أرجُل الدجاج التي كانت أمي - الله يرحمها - تسلقها للقطط , بل كانت صافيناز
! بنت ذوات .. حيث كانت لا تأكل سوى لانشون حلواني .. وبالزيتون كمان
والحقيقة أن نهاية صافي كانت نهاية غريبة لا تتماشى مع ألاطتها .. حيث أنها تعرفت على قط من قطط الشوارع .. ويبدو انه عشّمها بالحلق فخرّمت آذانها .. وانساقت وراء رغبتها المحمومة ! , ويبدو أنه - القط ابن الحرام - أجّر لها صفيحة زبالة إيجار مفروش .. وبعد أن أخذ غرضه منها
!! تركها ؛ فاتجهت للانحراف بعد أن تعرفت على كام قطه من قطط شارع الهرم

وحيد .. كان وحيدا وفريدا من نوعه .. حيث كان أكثر قط مشاغب في عالم القطط , والدليل على مشاغبته .. انه لم يسمح لأي قط أن يجلس بجانبه على الكنبه أو على الكرسي - تقريبا كان بيتنحس
.. لمّا حد يقعد جنبه ! -
وكانت تنتابه نوبات شجاعة مفرطة .. وينزل تلطيشا في كل القطط
! ماعدا هيام التي كانت تموء وهي تظغر له .. فيعرف ان الله حق
وبانتقال هيام الى الرفيق الأعلى .. فَلت عيار وحيد وانحرف بضمير .. وانضم لقطط الشوارع
! التي تضرب بقايا السلمون من الزباله .. وأصبح مسجل خطر سرقة عضم من قُدام الشقق
!! وهناك إشاعة تؤكد انه هو نفسه .. سفاح المعادي


رشا .. أكثر قطة صادفتها دلالا وميوعةً وإغراءًا , وكانت تغرر بكل القطط الذكور اللي عندنا
.. وتستدرج أحدهم لأي حته ضلمة في البيت , وتتركه - ياعين امه ! - بعد أن تأخذ غرضها منه
!! ثم تدور على غيره .. وكأنها تقول .. اللي بعده
والغريب أنها اختفت في ظروف غامضه .. وفي اعتقادي الشخصي انها اتجهت لعالم الفيديو كليب لما كانت تتمتع به من قوام رشيق .. جعلها تستحق عن جداره لقب هيفاء وهبي القطط , إضافة على قدرتها على التغرير بالقطط من مُجرد نظرة واحدة .. تفوق قدرة إليسا على الفتك بمشاعر
!! أجدعها شنب فينا .. نحن البشر
!! وهناك إشاعة تقول أن رشا انضمت لشبكة الدعارة التي أنشأتها القطه الهاربه .. صافيناز

المُكّعي .. وكان بحق .. مُكّعيا في حركته .. لكعاً في تصرفاته .. بطيئا في ردود أفعاله , وكانت له لحظات تأمل غريبة .. فقد كان يجلس على كرسي البلكونه وينظر للشمس وهو مُسَنتحا ومغمض
! العينين .. فاغرًا فاه للذباب يدخل ويخرج كما يشاء
واتذكر انه لم يكن يستطيع ان يأكل مع باقي القطط .. وذلك لأنهم كانوا يخطفون الاكل بسرعة .. وكان هو يقف مُذبهلا وكأنه يقول .. هو في ايه !؟
وكانت نهاية المُكّعي مُكّعية بشده .. وذلك لأنني في أحد أيام الصيف .. كنت قد ملأت البانيو لكي اهرب من قيظ الجو .. وخرجت من الحمّام لسبب لا أذكره .. وعندما عدت وجدته غارقًا في مياه البانيو ! ؛ فقلت لنفسي يبدو ان المُكّعي قد انزلقت رجله ووقع في الماء .. وترك نفسه للغرق
!! وهو يقول .. ماحنا كده كده هانموت ياعم الحاج

روتن .. أو تشيكوفسكي .. ونظرا لطول الاسم الثاني .. كنا نناديه بـ روتن , واتذكر انه كان ذو
! عين تختلف عن الاخرى لونا واتساعا .. واشك انه كان أعور .. وعامل عين عموله
و من مواقفه مع أمي - الله يرحمها - أنها كانت تقوم بخياطة أحد بنطلونات والدي بعد ان تفتق في منطقة حساسة , ويبدو أن روتن اعتقد أن أمي تلعب معه .. فأخذ يلعب بِبَكرة الخيط إلى أن تكعبلت حوله ولم نستطع أن نفكها .. فقمنا بقطعها , وبعد أن تحرر من قيود الخيط .. أمسك بالعلبة التي تحتوي على باقي بَكر الخيط .. وأخذ يضرب فيها بقدميه - أو يديه - وكأنه ينتقم منها ويقول
.. شفتوا قطّعت أختكم ازاي !؟
.. واختفى روتن بعد هذه الحادثه بأسبوع .. وأعتقد أن بَكر الخيط قد استفرد به في أحد الأيام
!! وقام بخنقه .. وتاوى جتته

لملوم .. كان لونه اسود فطيس , وكانت عنده قدره عجيبه على لملمة نفسه ودفن رأسه بداخل
! تجويف بطنه .. بما لا يدع مجالا للشك بأنه أي حاجه مكعبره وليس كائنًا حيًا على الإطلاق
وكنت دائما اتخض منه عندما أعود للبيت متأخرا .. فقد كنت أشاهد حاجه سوداء اللون .. مُكعبرة
! الشكل .. وبتقول (مياو) .. فاعتقدها فار بيشتغلني
هذا ولقد اختفى لملوم على حين غره , وفي اعتقادي الشخصي انه كان يلعب الاستغمايه مع باقي القطط .. ولملم نفسه داخل أكياس الزباله السوداء وهو يقول لنفسه .. ابقوا قابلوني لو عرفتوا تعتروا عليّ !!؟

وأخيرًا .. سوشي , وكان قطا شيرازيا أخذته من صديقي الذي رفض أهله الاحتفاظ به , وفهمت بعد ذلك سبب رفض أهله ؛ لأن سوشي باشا .. كان في الأصل حمار ! , حيث أنه ياما خربشني
.. وهو يلعب معي مُعتقدًا أنه بذلك دمه خفيف , بل وصل به الغباء والحُموريّه
! أن خربش كل بنات أخويا

وكانت هذه نهايتي مع عالم القطط .. حيث أن أمي - الله يرحمها - كانت تحب بنات اخويا أكتر
.. منّي , وكان أمامي اختيار من اثنين .. أن أترك البيت مع سوشي ونشوفلنا أي خرابه تحتوينا
.. أو أن أقوم بتسريبه , ولأني صاحب مبدأ طوال عمري .. سرّبت القط في ثانيه
!!! تطبيقا لأغنية نانسي عجرم .. أحبك آه .. اسيبك .. آه .. برضك
---
والآن .. أُصرّح انني افتقد مواء القطط .. وافتقد أيضا .. أن ألعب معهم
-
سوووو