الاثنين، ١٧ شوال ١٤٢٨ هـ

حته نيولوك

بينما كنت احتسي قدحا من الـ .. قدحا ايه بس .. ماجاً .. احتسي ماجاً من النيسكافيه البلاك
وادخن لفافة تبغ كولوباطرا بوكس .. واشاهد المدونات المختلفه على الشبكه العنكبوتيه
.. فوجئت بصوت نواعمي .. يقول لي
خبر ايه يا سوووو .. ماتحس على دمك بقى يا اخي
استغربت للغاية .. وبلغت درجة الاستغراب بي ان ظننت ان لفافة التبغ التي ادخنها لفافة من نوع تبغ آخر .. غير الكولوباطرا البوكس
.. ثم سمعت الصوت مرة أخرى
ياعم سوووو .. انا المدوَنة بتاعتك ياعم
بسم الله الرحمن الرحيم .. سلام قولا من رب رحيم .. هذا ماقلته لنفسي
فأجابتني مدونتي وقالت
ياعم حرام عليك بهدلتني معاك .. يعني كل المدونين مظبطين مدوناتهم وعاملين فيها شغل ومدلعينها .. وانت ولا معبرني يا اخي
منهم لله جدي جووجل وابويا بلوج سبوت اللي رخصوني ورخصو اخواتي وخلونا مع كل من هب ودب
حاولت ان اتهرب من كلامها .. فقلت لها
.. انا عارف اني مبهدلك معايا .. بس هنعمل ايه .. وبعدين يامدونتي يا حياتي ياروحي .. الشكل مش كل حاجه
كفاية المواضيع اللي باتكلم فيها واللي الحمدلله ابتدت تعجب الناس
.. فأجابتني ودموعها تهمر من الشاشة عالكيبورد
وهو انا طلبت منك تعمللي عملية تجميل زي نانسي عجرم ولا هيفاء وهبل .. انا كل اللي عايزاه منك انك تهتم بي شويه .. تدلعيني بحتة مزيكا تشتغل توماتيكي توماتيكي لما حد يتفرج علي .. تظبطني بعداد زيارات كده عشان اتنطط على اخواتي واقولهم ده انا جالي قد كده بني آدمين .. انشالله حتى تحط صورة كده في جنبي الشمال اداري بيها شكلي وتسترني في الشتا واتغطى بيها واهو الشتا داخل علينا .. اي حاجه يا سوووو بس حسسني اني منك وانت منني .. استر علي يستر عليك ربنا ياشيخ
والحق اقول .. واقول الحق .. لقد تأثرت بكلماتها الرقيقه
فقررت ان ادلع مدونتي .. ولكن كيف السبيل وانا طور الله في برسيمه فيما يتعلق بحوارات النت
وهنا .. قرر سوووو أن يقتحم مجالا جديدا .. يضاف الى باقي المجالات التي اقتحمها
وابتدى سوووو في الدعبسه .. وكما هو معلوم عند الجميع .. الدعبسه بداية كل طريق للنجاح
كانت البداية بسؤالي للأخ الشنكوتي الكبير .. وكان نعم العون
.. كان خيرا من الكثير والكثير من المدونين الذين استنجدت بهم ولكنهم حلقولي بمكنه تلمه
ولقد حلقو لي عالزيرو
.. ولم يكتف الشنكوتي بتوجيهاته لي فيما يتعلق باضافة عداد زوار او صور عالجنب ولينكات وحوارات
بل اعطاني ما وجدته كنز ثمين
كنز ذو قيمة لا يعلمها الا من هور طور زي حالاتي
اعطاني لينكاية لموضوع عاملاه الاخت الكبيره بنت مصريه .. وهو الموضوع ده
.. واستكشفت اسرار التدليع والتظبيط .. وبعد ان دلعت مدونتي
.. قالت لي بصوت فيه حنان ورجاء
سوووو .. وحياتي عندك ياروح قلبي .. ممكن تغير صورة نجيب سرور وتحط حاجه تانيه يكون دمها خفيف ؟؟؟؟
لااااااااااااااا .. مش انا يا اختي .. مش شوية حنيه ودلع اللي هيخلوني اريل على روحي وانسى مبادئي
مش نجيب سرور اللي اتخلى عنه مهما كان
.. فقطاعتني مدونتي قائلة
يا روح قلبي انا ماقلتش ترمي صورته ولا تتخلى عن رمزيته .. بالعكس .. انا اذا كان علي عايزاك تعمللو مواضيع عندي هنا مش مجرد صورة .. بس ياسوووو انا لاحظت ان في ناس بيدخلو وبيشوفوها مابيبقوش عارفين ده مين .. وفاكرينك شبه الصورة .. وانت ولا مؤاخذه يعني من غير احراج .. اقرع وبنضاره وبكرش ووشك مكلبظ .. يعني مش شبهه خالص .. وكمان حاجه تانيه بصراحه انا ماكنتش ناويه اقولها يعني
قاطعتها متنرفزا ومتشقلطا ومستغربا
حاجة ايه .. انطقي .. في حاجه مابينك وبين نجيب سرور يا فاجره؟؟؟؟
ايه .. تهون عليك العشره وتتهمني في اعز ما املك .. مش انا اللي تبيعك عشان شاعر عظيم زيه .. انا قصدي انت فين .. انت حاطط صورته وناسي نفسك وناسي فكرك .. لازم يبقى ليك شخصيه مستقله
هممم .. كلام معقول بصراحه .. بس لا مؤاخذه يعني .. احط صورة رمزيه ازاي .. ولمين .. وليه
قالت المدونه .. فكر وشوف انت مواضيعك عامله ازاي .. وبتتكلم ازاي .. بتحب ايه .. اربط كل ده بشخصيتك وشوف ايه اللي يتحط
استرجع سوووو كل ما يختزنه من معلومات عن نفسه وعن احب الشخصيات الى قلبه في شتى المجالات
وفي وسط كل ده .. تذكرت افيه او قفشه كوميديه .. اعتبرها بحق .. اعلى قفشه كوميديه على مر العصور
كانت في فيلم تلاتين يوم في السجن .. عندما كان محمد رضا وثلاثي اضواء المسرح في السجن .. وبعد ان قام جورج سيدهم بوضع الشبّه في طعام المساجين .. فأكلو وبوقهم لزق .. وبعد ان فك التلزيق قال محمد رضا وهو ممسكا بالضيف احمد
انت منطهدني!!؟؟
فأجابه الضيف احمد .. لأ .. انا من طنطا
فوجدت في شخص الضيف احمد كوميديانا قريب الى قلبي والى عقلي ايضا
بل وجدته اكثر قربا مما كنت اتصور .. نظرا لما قرأته عن سيرته الذاتيه والتي تكاد تكون قريبه من حياتي في عالم التمثيل الجامعي .. قبل ان اترك هذا المجال .. واتجه الى عالم الرقص الايقاعي والباليه لما اتميز به من رشاقه تفوق الوصف .. متمثلة في كرشي اللاوذعي
.. وعندها ... قررت ان اضع صورة رمزيه له
على امل ان ابقى كويس سيكا في الفوتوشوب واعمل صورة لنفسي تكون معبره عنني بجد
وسألت مدونتي .. ايه النظام؟؟؟
فنظرت لي بدلال تجيب بالايجاب .. ثم قالت وهي تلبس حلتها الجديده
الليله ياعمده
!!!
سوووو

الأحد، ٩ شوال ١٤٢٨ هـ

المحكمه

.. ساعات باحلم مع نفسي
اني في محكمه
واني محامي بادافع عنّي
.. واحلم اني في قفص الاتهام
باعيط وباقول إنّي بريئ
.. والاقيني وكيل النيابه
وبيتهمني بابشع التهم
.. ولما بيجي الدور علي اني أكون قاضي
.. الاقيني صحيت مـ الحلم
.. واقول لروحي بعد لحظة صمت
خير .. ان شاء الله خير
سوووو

الجمعة، ٣٠ رمضان ١٤٢٨ هـ

!!! سعد نبيهه

كل سنه والامه الاسلاميه بخير
.. وان شاء الله في زي الايام المباركه دي
.. نكون عايشين في امان وسلام
وكل واحد يكون حقق اللي بيحلم بيه في الخير
ان شاء الله
-
.. النهارده كان اول يوم عيد
.. وبعد ماخلصت الصلاه وخلصت الخطبه
.. قلت اروح اشوف الناس صحابي عالقهوة واشرب معاهم كوبا من التي سكر بره
لقيت القهوة مشغله التلفزيون وبيذيعو اغاني العيد
.. العيد فرحه
.. وأجمل فرحه
.. سعدنا بيها
.. بيخليها
----
.. وهنا افتكر سوووو ايام الطفوله المشرده
.. ايام ماكنت باسمع الاغنيه دي وابقى فاكر الابله صفاء بتقول
.. العيد فرحه
.. وأجمل فرحه
سعد نبيهه
!!!!
وابقى مستغرب قوي .. مين سعد نبيهه ده يا جدعان؟؟؟
وازاي واحد يبقى اسمه سعد وابوه اسمه .. نبيهه ؟؟؟
يكونش ابن المنتج مثلا ؟؟
مش الاغنية دي بس .. اغاني كتيييير قوي
.. على سبيل المثال
معظم اغاني ام كلثوم كنت بافسرها تفسير مخالف لأي قوانين سمعيه وبصريه وميتافيزيقيه
زي مثلا مثلا اغنية .. هل رأى الحب سكارى
كنت باسمعها هل رأى الحب سوكارو
!!!
سوكارو ؟؟
مين ده ؟؟
وازاي بتسأل الحب عن سوكارو ؟؟؟
يكونش سوكارو ده هو نفسه سوكارلوس ؟؟
ومين سوكارلوس ده اصلا ؟؟؟
-
برضه ام كلثوم بتغني اغنيه تانيه بتقول ايه
.. بعيد عنك حياتي عذاب
دي بقى انا كنت باسمعها وانا تقريبا مغيب عن الوعي
كنت فاكرها بتقول فيما معناه يعني
بعيد عنك وعن السامعين ياخويا .. حياتي عذاب
أي والله عذاب
!!!!
وابقى هشد في شعري
.. واسأل نفسي هو ينفع انها تدخل جمله اعتراضيه
في وسط الاغنيه ؟؟؟
تقريبا كان باسمع الاغاني دي وانا نايم على ودني اللي باسمع بيها
او تقريبا وقعت على ودني اصنجيت مثلا
-
لكن لما كبرت شويه فهمت طبعا ايه الكلام وكده
وفهمت كمان نقطه مهمة جدا
فهمت اقرا مابين السطور
.. فهمت ان لكل شيء في الدنيا حاله نفسيه
حاله مرتبطه باللي بيعمل هذا الشيء
-
يعني في حالة الاغاني مثلا
المؤلف بيبقى في حاله نفسيه معينه وهو بيألف
الملحن بيبقى في حاله نفسيه معينه وهو بيلحن
المغني بيبقى في حالة نفسيه معينه وهو بيسمع اللحن
وبيغنيه وهو في حاله نفسيه معينه عالمسرح او في الاستوديو
.. يعني لكل شيء حالات نفسيه
.. ولو الحالات النفسيه دي كلها كانت متقاربه
.. بتخللي العمل الفني او اي عمل في الحياه عموما
بيبقى تحفه
-
نفس الحوار هنا معايا
.. لما بافكر في فكره عشان اتكلم عنها
بابقى في حالة نفسيه معينه
لما باكتبها بابقى في حاله نفسيه تانيه
.. لما حد بيدخل عشان يقرالي حاجه
.. بيبقى حاطط في دماغه انطباع معين عن نوعية المواضيع اللي باتكلم عنها
وبيبقى حاطط انطباع عن شكل البلوج بتاعي
وبعد مايقراها بتمتزج بقى كل الحالات النفسيه دي
.. يا اما تمتزج وتبقى حاجه تحفه
يا اما تبقى ليلتنا مطينه بطين
-
وفي وسط الليله دي بنهمل حاجه مهمه
ايه اللي مابين السطور؟؟
ايه اللي اقصده انا او غيري من اللي بيكتبو سواءا في مدونات او في اي مجال تاني
؟؟؟
المعنى الحقيقى للحدوته ايه ؟؟؟
-
لكن احنا معذورين برضه
احنا ماتعلمناش ده في المدارس ولا الجامعات
كانو بيخلونا نحفظ وبس
نحفظ مانفهمش
مانقراش اللي مابين السطور
انا مش باتكلم عن حاجه مكتوبه بحبر سري
انا باتكلم عن روح الكتابه نفسها
عن الغرض من ان اي حد يكتب
انه يوصل افكاره للناس
-
-
الحقيقه من اول مابتديت اكتب وفيه ديشيليار واحد وواحده مش قاريين اللي مابين السطور
..
.. عايزين المعلومه سهله وخلاص
ديشيليار واحد شايفين ان سوووو شخص تافه وهايف
وبيهرتل في اي هسس وخلاص
عايزين يقرو واحد زائد واحد يساوي اتنين
وده ماينفعش
ينفع لو في حالة اننا داخلين امتحان رياضيات او حساب او فيزيا
.. والمصحح قدامه اجابه نموذجيه
هيشوفها ويدي درجة بناءا على المكتوب في ورقة الامتحان
لكن هنا .. او مش هنا
في اي مدونه تانيه .. وفي اي جرنان وفي اي مجله
انشالله حتى تبقى ميكي او فلاش
لازم نقرا اللي مابين السطور
-
انا متأكد مليون في الميه ان في ناس هتقول اني باعيش في دور الفيلسوف
وهيقولو انت عايز تقول ايه .. انت بتتهمنا اننا مابنفهمش؟؟
كلا وكلا .. انا باعترض
.. اعترض ياعم او اعترضي ياستي
والله الاعتراض حلو
بس لما يكون منطقي
لما يكون في عضم الموضوع مش في شوية قشور زي مثلا اني لساني طويل وباشتم وباقبح وبقول على فضايحي
.. افهم ايه اللي اقصده وبعد كده قول براحتك
وانا برضه اقول
-
.. والا وكتاب الله
هاجيب سعد نبيهه ونقفل عالم البلوجرز ده ونشمع الليله كلها بشمع ازرق ممحمح
-
-
وكل سنه وانتو طيبين
سوووو

الأحد، ٢٥ رمضان ١٤٢٨ هـ

!!! كداب كدب الإبل

!!!!!
يعني ايه ؟؟
.. ومين قال ان الابل بتكدب اصلا
.. ولو كدبت فعلا
مين عرف كدبت قالت ايه
.. على فكره المصطلح ده من زمان
مش من ايام فيلم بوحه لما قالها محمد سعد
-
.. انا في اعتقادي الشخصي المتواضع
.. ان المقصود بكدب الابل
هو الكدب المبالغ فيه كمقارنه بين حجم الابل وحجم الفراخ البيضا مثلا .. كما ان الابل بيتبهدل كتير ومتمرس على البهدله .. وده معناه ان الكداب كدب الابل بيبقى بيكدب كتير ومتمرس على الكدب
هذا والله اعلم
-
.. اما بقى الكدابين في حياة سوووو فهم كتير
وده تقريبا لاني بطبعي باحب اضرب صحوبيه مع كل الناس بمختلف فئات الشعب الكادح المتنيل بنيله
لكن في حياتي كلها ماشفتش كدب زي كدب واحد صاحبي كان معايا في ايام ثانوي
كان اسمه علاء .. علاء اسرائيلي
سوري يابو علاء .. بس انا استحملت نعرك وكدب الابل بتاعك اربع سنين ثانوي فأرجووووووك .. سيبني اخرج الشحنه اللي جوايا
.. علاء اسرائيلي ده كان حكايه
.. كان دايما بيقول ان ابوه ظابط مخابرات في اسرائيل
مش كده وبس .. لأ
.. ده كان في مسلسل بيتعرض زمان كان اسمه الثعلب
بتاع نور الشريف تقريبا .. كان بيتعرض في رمضان
.. صاحبنا علاء ده كان بيفهمنا ان ابوه هو نفسه الشخصيه اللي في المسلسل .. وان المسلسل معمول كقصة حياته
.. وان نور الشريف راحلو البيت بتاع عشرتاشر مره .. عشان يسأله عن شوية تفاصيل في الشخصية
وبالرغم من ان المسلسل بيتكلم تقريبا عن هوجة عرابي وحرب اليمن وحرب سبعه وستين والفتره اللي ماقبل نصر اكتوبر المجيد
وكان باين ان البطل عنده بتاع 40 سنه يعني لو كان فضل عايش لوقتنا الحالي ساعة عرض المسلسل .. كان هيبقى في التمانينات مثلا
لكن ابو علاء كان بالكتير قوي عنده بتاع حاجه وخمسين سنه
.. صاحبنا علاء اسرائيلي ده كان دايما بقى يحكيلنا عن مغامراته لما بيروح مع ابوه اسرائيل
وانه ياما قاد انتفاضات وياما قاد ثورات وانضرب بالنار بتاع سبعتلاف مره
..وكان كل مره بيعمل ريستارت
ويجيب الجيم من الأول
-
وفي مره غاب عن المدرسه قد اسبوع مثلا .. واحنا قلقنا .. قلنا احسن يكون راح اسرائيل ومات في احدى هجماته العنتريه..
او مثلا فجر نفسه بمطوه قرن غزال ولا حاجه
.. لقيناه راجع بعد الاسبوع ده وداخل علينا القهوة
..مش قهوة المهويه اللي بقعد عليها حاليا .. لأ
دي قهوة تانيه اسمها قهوة كلش .. ودي كنا بنكُت من المدرسه ونروح نقعد عليها في الايام اللي مش بيبقى معانا فلوس..
وفي الايام اللي بيقى معانا فلوس .. كنا بنروح نلعب بلياردو في صاله معفنه جمبنا بيخلينا نلعب الساعه بخمسه جنيه عشان ده وقت ميت بالنسبه ليه..
وكانت ساعة البياردو وقتها بعشره جنيه
المهم .. لقينا علاء اسرائيلي داخل علينا القهوة وايده متجبسه .. قلناله مالك والف سلامه والحاجات دي .. قالنا معلش بقى .. ابويا اتزنق في عملية في اليونان فكنت رايح معاه
!!!!!!!!!!!!!!!!!
.. خساره ان الفجر بيأذن علي اول ما ابدأ اكتب البوست
.. والا كنت قلتلكم على اللي نفسي اقولهوله من زمان
.. بس دي تعتبر شتيمه قبيحه
.. وساعتها ممكن افطر واحنا في اواخر ايام رمضان
والواحد لازم يبرشط عالحسنات على قد مايقدر
المهم .. احنا سمعنا كلمته دي قمنا تنحنا .. واللي كانو بيلعبو دومينو عالمشاريب رمو الدومينو .. واللي كان بيشيش رمي لَيّ الشيشه .. وكللو حب يسمع ويعرف ايه التيته
.. قالنا وهو بيحط السيجاره في بقه
نفس اللقطه بتاعة احمد زكي لما كان في فيلم الهروب وهو بيحط السيجاره في بقه بعد ماقتل الوليه مرات عمته او جوز خاله مش فاكر بالظبط
.. عمنا علاء اسرائيلي حط السيجاره في بقه وقالها بمنتهى هدوء الاعصاب
مافيش .. عمليه زي غيرها من العمليات اللي ساعدت ابويا فيها
.. بجد حسسني اني بكلم علاء ادهم صبري مثلا
.. او علاء رجل المستحيل .. او علاء الخُط
او حتى كأني بكلم ابن كهربائي سيلسيون بيروح مع ابوه الشغل في الاجازات
طب ايه الحوار يا عم علاء .. وايه اللي كسر ايدك كده ؟؟
.. لأ .. ده مش كسر
دي طلقة مسدس عيار تسعه ملي رشاش نصف آلي بازوكا
واحنا طبعا بهايم ولا فاهمين ايه السلاح اللي بيتكلم عنه واخرنا في الاسلحه ساعتها الأسلحه البيضاء زي المطاوي والسنج والامواس..
ولما اتقدمنا عرفنا الاليكتريك شوك .. وكنا فاكرينه مكنة حلاقه ليزر
.. المهم .. طبعا كلنا تنحنا وقلناله لأ ياحلو .. احكيلنا الموضوع من اوله
.. قالنا ماقدرش
.. دي اسرار دوله
.. ولو اتكلمت هيصفوني جسديا
ومش بعيد يرفدو ابويا ويشردو اخواتي ويقتلو الكلب اللي مربية أيمن جارنا عشان انا بحب العب معاه قوي
-
.. حكاية تانيه من حكاوي علاء اسرائيلي
.. دارت بي الايام وبقيت باخد معاه درس خصوصي في بيتهم
واللي كان بيدنا الدرس هو نفسه ناظر المدرسه -اسمه فتحي سأسأ او فتحي سليمان - عشان حب يرفدنا من المدرسه بعد ما عدينا مرحلة الغياب..
واحنا اصلا اترفدنا مرتين قبل المره دي وكنا بنعمل مع نفسنا اعادة قيد ونأجرلنا اي حد شكله كبير في السن يعمل انه ولي امرنا وكده..
واهالينا كانو خايفين احسن نترفد ونعيد السنه من منازلهم .. قال ايه .. عشان بيبقى فيها ناس كبيره في السن كطلبه وبيجيبو ظباط امن دوله يراقبو علينا عشان ماحدش يغش..
.. مع اني عدت ثانوي من منازلهم وكانت عادي خالص
.. بس تقول ايه بقى لخوف الاهالي على ولادهم
وعدم رغبتهم في خوض اي تجارب علميه جديده
.. المهم .. ناظر المدرسه بتاعتنا كان أحول
.. من نوعية الناس اللي تلاقيها باصه ناحيتك .. لكن عينيه باصه على ما وراء الطبيعه
باصه على حاجه مالهاش وجود في زاويه غريبه ماينفعش ان حد يبص فيها اصلا
فأنا باعتبار اني كنت اكتر شاب جرئ وعبيط وباحب الهزار في الوقت ده .. رحت انتهزت فرصة انه مش باصص ناحيتي ورحت محوِّل بعيني .. العيال اللي بياخدو معانا الدرس شافوني وراحو ضاحكين بس كاتمين الضحكه .. بس برضه الناظر حس اني باتريق عليه..
.. راح باصصلي
.. او باصص في اي اتجاه عموما وقاللي
في حاجه يا سوووو ؟؟
قلتله لأ مافيش حاجه يابيه .. وعدت الحكايه
وفي وسط مانا باهزر والعيال عايزه تضحك وكده .. كنت باشوف علاء بيبص ناحيتي ويزغرلي بعينه ويشاورلي عالنجفه اللي فوقنا..
.. كل ما اهزر يعمل نفس الحوار
يبصلي ويزغرلي ويشاور بصباعه اشارة بسيطه عالنجفه
خلصنا اول حصه في الدرس .. ونازلين مع المدرس بقى وبتاع .. لقيت علاء نازل معانا .. قلت عادي يمكن خرمان وعايز يشرب سجاره
لكن اول مانزلنا وبعد ما المدرس مشي وكده .. لقيت علاء ده بيزعقلي في وسط الشارع ويقوللي انت مجنون .. انت فاهم انت عملت ايه؟؟؟
.. قلتله في ايه يا علاء .. ماهو الناظر او المدرس ماخدش باله من اني بهزر
.. قاللي - وهو متنرفز بطريقه رهيبه - مابتكلمش عن الناظر
.. انا عايز اقولك ماتهزرش ولا تتريق عليه
عشان في كاميرا في النجفه اللي فوقنا بتصور كل حركه وبتسجل كل همسه وكل اللي انت عملته راح لجهاز المخابرات المركزيه
!!! موسيقا تصويريه حزايني قوي قوي جدا !!!
.. ساعتها بجد .. حسيت ان الارض بتلف بي
.. ولقيت تاريخ حياتي بيمر قدامي في شريط سينما
.. ولقيت نفسي بافتكر ايام طفولتي وايام المراهقه
.. افتكرت اول سيجاره شربتها
.. اول بوب بانجو رليتو وشربته انا والواد بيسو
.. اول قزازة زبيبة ضربتها على بق واحد .. وحسيت ساعتها إن زوري اتخرم
.. واول شريط ابو صليبه طحنته .. واسنفيته او شميته بربع جنيه ورق جديد
.. قلت بس
جالك الموت ياتارك الصلاه
وبطلت اروح لعلاء البيت واعتذرت للناظر وقلتله انا هاخد الدرس في بيتنا وعملت مجموعة تانيه وخدت الدرس في البيت
ودي كانت اخر علاقتي بعلاء اسرائيلي كصديق انتيم
-
وطبعا بعدها اكتشفنا ان ولا كان في كاميرا ولا نيله والواد كان بيشتغلنا .. واكتشفنا انه لما غاب اسبوع وقالنا انه كان في مهمة سرية .. كان عشان ابوه شم بقه لقاه شارب سجاير قام ضربه .. وهو بيجري من ابوه قام متشنكل في سلك التليفون وقع على ايده .. ايده اتشرخت واتجبست
.. والغريب اننا لما لقيناه فك الجبس بسرعه ومالقيناش اي اثار لضرب نار ولا حاجه استغربنا
.. بس هو قالنا انه عمل عملية تجميل في المانيا الشرقيه
مع انه قبلها بيوم كان قاعد معايا عالقهوة .. وشرب سحلب بالفواكه .. وانا اللي حاسبتله عشان كنت ناصب على اهلي ومكمر فلوس درس مش باخده .. وباخد ورق الحصص من شوية عيال بياخدو الدرس .. واروح مصورة وباضرب على فلوس الدرس
-
.. خلاصة الحوار
.. ان فعلا في حاجه اسمها كدب الابل
السؤال دلوقتي
مين ابن اللذينه اللي اطلق هذا المسمى؟؟
.. والجايزه هي
رحلة لألمانيا الشرقيه لمدة قرن شامله النفقات والسفر واقامة فول بورد في فندق سفن ستارز..
-
-
ملحوظ هامه:
فيما بعد .. اكتشفنا ان ابو علاء اسرائيلي كان شغال منسق حفلات في نادي القوات المسلحه
.. علاء اسرائيلي حاليا يعمل في شركة شحن خرفان في الصومال
هذا والله اعلم
سوووو

السبت، ٢٤ رمضان ١٤٢٨ هـ

قد قامت الصلاة

قد قامت الصلاة قد قامت الصلاة
الله اكبر الله اكبر
لا اله الا الله

إستووا.. إعتدلوا.. إستقيموا يرحمكم الله
الله أكبر
الله اكبر .. بص يا سوووو .. انت لازم تركز الجمعة دي .. دي احتمال تكون الجمعه الاخيره في رمضان .. وكمام ماهو مش كل صلاة جمعة ماتركزش وتسرح وبتاع .. النهارده لازم تركز وانت بتصلي .. اتفقنا يابرنس .. اتفقنا .. هو الواد اللي قدامي جاب التي شيرت بتاعه منين .. ده شكله ستايل قوي .. وعلى فكره بقى مش لايق عليه .. ده عايز واحد كتافه عريضه زي كتافي .. يووووه .. ركز يا اخي وخليك في الصلاة .. تي شيرتات ايه وكتاف ايه بس .. ركز ياعم .. خلاص خلاص اديني هركز اهه .. بسم الله الرحمن الرحيم
الله أكبر
الله اكبر.. معلش مالحقتش تقرى الفاتحه .. ركز بقى في الركوع .. حاكم الركوع هو اساس أي ركعه .. يعني اعتبر نفسك مالحقتش التكبيرة الأولانيه وجيت يادوبك عالركوع .. صح برضه .. سبحان ربي الـ ...
سمع الله لمن حمده
ربنا ولك الحمد
.. يا اخي حرام عليك بجد .. ركز بقى وسيبك من أي حوارات .. حاضر ياعم ماتزقش
الله اكبر
الله اكبر.. الحصير بتاع المسجد ده قدم قوي .. بقى بيشوك وش الواحد .. هو ليه الناس بدل ماهي عماله تعمل موائد رحمن .. مايجيبوش حصير جديد .. واهو كللو لله .. يا اخي ركز حرام عليك
الله اكبر
الله اكبر.. الشمس حاميه قوي .. طب كانو يكبرو المظلة شويه .. ولا هو يعني الفلوس عجزت معاهم الكام متر دول .. سوووو .. وكتاب الله لو ماركزت في الصلاه هتندم .. خلاص والله اهه .. هركز اهه خلاص
الله اكبر
الله اكبر .. على فكره .. انت المفروض تنزل بدري للصلاه بدل مانت بتنزل عالاقامه .. عشان ابسط حاجه انك تلحلقلك مكان جوه في المسجد في التكييف والموكيت المعتبر .. ياعم انا في عرضك ركز .. انت بتصلي مش بتكتب مذكراتك
الله اكبر
الله اكبر .. لا بجد بجد التي شيرت بتاع الواد اللي قدامي ده لو عليه هيبقى حكايه .. هبقى شاب موز على رأي البت موني .. الا هي فين صحيح مختفيه ومش بتسأل خالص .. تخلص الصلاه ان شاء الله وهبقى اتصل بيها واقولها اننا لازم نتقابل في رمضان ونفطر في يوم مع بعض .. بس ايه الاماكن الحلوة اللي الواحد ممكن يفطر فيها دلوقتي .. سوووو .. ركز يابني في الصلاه .. الفطار والكلام ده خليه بعدين .. وبعدين هو انت ضامن تعيش خمس دقايق اصلا
الله اكبر
الله اكبر .. ايه الصوابع الغريبه دي .. الراجل اللي على يميني صوابعه مسخره .. تقريبا اخر مره قص ضوافره كانت ساعة هوجة عرابي .. بلا عرابي بلا بتاع .. ركز في الصلاه واخشع في الركوع يا سوووو
سمع الله لمن حمده
ربنا ولك الحمد
.. يارب .. خليني اركز في الصلاه بقى عشان تعبت
الله اكبر
الله اكبر
.. ايوه كده .. ادعي ربنا وركز وصلي بقلب خاشع عشان ربنا يوفقك .. ويوفق الاهلي في ماتش بعد بكره .. حاكم لو الاهلي ان شاء الله كسب .. يبقى فل قوي
الله اكبر
الله اكبر
.. ويبقى الاهلي كده فاضللو ماتش النهائي .. وان شاء الله يكسبه .. ويروح اليابان ياريس .. لاااا .. انا بجد تعبت معاك .. سوووو انت متخيل انك بتصلي ؟؟
الله اكبر
الله اكبر
.. ايوه والله عارف اني باصلي .. طب تحب اقوللك احنا في الركعه الكام دلوقتي .. لا ياعم ماتقولليش .. ركز انت بس
الله اكبر
الله اكبر
.. ياترى العيال صحابي هيعملو ايه في العيد .. انا عارف انهم هيقولو نروح الساحل الشمالي .. بس انا بصراحه عايز اروح شرم .. ده الحياه هناك فل مووووز .. وبالمره الواحد يظبطلو واحده طليانيه كده ولا يونانيه ويعيش معاها قصة الحب .. ولو كده يبقى تاخده من الجو الكئيب اللي احنا عايشين فيه .. ونعيش بقى العيشه على اصولها
السلام عليكم ورحمة الله .. السلام عليكم ورحمة الله
ايه ده .. هي الصلاه خلصت .. !!!
السلام عليكم ورحمة الله .. السلام عليكم ورحمة الله
-
امال انا مش فاهم .. الناس بتقول الصلاه تقيله على قلبهم ليه ؟؟
ده احنا في ايام مفترجه ومباركه ..
لو ماعرفناش ربنا دلوقتي ..
هنعرفه امتى
استغفر الله العظيم يارب
!!!!!!
-
-
سوووو .. انت بتتكلم بجد ولا بتهفلط ..؟؟
هي دي صلاه بجد ولا صلاة النبي احسن ؟؟
.. اللهم انك سلطت علينا عدوا يرانا هو وقبيله من حيث لا نراه
اللهم آيسه منّا كما آيسته من رحمتك
سوووو

الجمعة، ٢٣ رمضان ١٤٢٨ هـ

.. قالو عني

----
قالو عنني إنّي عجوز
وقالو مناخيري قد الكوز
-
بس انا عمري في يوم ما هنخ
لا لوزير ولا طائر الرُخ
-
وهفضل اشرشح اشرشح اشرشح
لكل واحد جايلي يأبح
-
واقوللو امش يلا انجر
وكفاية شتيمه ونق وقر
-
ومن الآخر دي منطقتي
واعمل أي شيئ بطريقتي
-
بس كفايه كده خلصنا
هقوم أأنتخ حبه في بيتنا
-
عايز حد بسرعه يرد
ووروني يلا يا ناس النقد
-
-
-
سوووو ينتقم من كل اللي دخلو واتكلمو في شوية هسس
وابتعدو عن الموضوعيه
سوووو

!! مصر حته من أوروبا

ياللي رايحين مجلس الامن اسمعوني
فُضكم مـ الفقه والبحث القانوني
كلمتين حلوين .. قولوهم وافهموني
يمكن الحكام يرقوا .. ويفهموني
-
.. فهمومهم باللطافه والمحبه
ان مصر الحلوة حته .. من اوروبا
من زمان تضحك وتحيي .. حبه حبه
.. لما فاقت عن فيينا وبرشلونه
ياللي رايحين مجلس الأمن اسمعونا
-
الديانه قبل منكم ألغيناها
والشريعه عن نابليون مشيناها
.. والمصاحف في المتاحف حطيناها
منها ذكرى ومنها فرجه ومنها زينه
ياللي رايحين مجلس الامن اسمعونا
-
وانتهى عهد البراقع والملايه
والنسا للركبتين ماشيين عرايا
.. أمي واختي وزوجتي .. أهم رايحين معايا
عالبلاج .. والدنيا تتفرج علينا
ياللي رايحين مجلس الأمن اسمعونا
-
زيكم في كل شيء ياهل الحضاره
زيكم بايتين على البوكر سكارى
والحانات من كل نوع في كل حاره
عيب عليكم بعد كل ده تستعمرونا
ياللي رايحين مجلس الامن اسمعونا
-
نجيب سرور
-
...:ملحوظة
.. نجيب سرور مات سنه 1978
بس حاسس ان الكلام ده عن مصر دلوقتي

الخميس، ٢٢ رمضان ١٤٢٨ هـ

!! الشاكرمون طاخ في .. الترولولي

لغة عجيبه بس فريده من نوعها
.. الشاكرمون طاااخ في الترالولي
كنت باسمع الكلمه دي في فيلم الكيف واقول لنفسي هو السيناريست محمود ابو زيد جاب الكلام ده منين ؟؟
وهل يقصد من وراه حاجه ولا جايبه كده تهييس
.. وكان هذا هو السؤال
سؤال ألّح علي طيلة عشر سنوات
.. وياللهول
.. ففي لحظة لا ادري كيف اصفها
وجدت ان الشاكرمون قد طاخ فعلا في الترالولي
.. ليس هذا فحسب
بل وجدت ان الحياه قد فيّشت لي الهوامش
.. كل هذا قد حدث في غمضة عين
.. في لحظة نسيت فيها كوني انسان
.. عندما قابلت احد اصدقائي وقال لي بمنتهى العنجهيه
انت موبيلك .. ثري جي ؟؟؟؟
فهمت بس ساعتها ان الشاكرمون طاخ في الترلولي بجد
بقينا مغيبين عن الوعي ومستهلكين جدا
بقى مقياس الحياه عندنا الموبيل والعربية وطقم المزز اللي الشاب من دول عارفهم ومسيف ارقامهم في الموبيل
الله .. ماهو لازم يعمل كده عشان يبقى شاب كوووول يا مان
اللي يغيظ ان ده فعلا بقى مقياس ناس كتير قوي
ناس بابقى مستجدعهم وفاكر دماغهم حلوة قوي وبتاع
وفي لحظه واحده .. تكتشفهم .. ناس قشره
بتبص على شوية مناظر
بتبص عالشكل اكتر من مابتبص عالجوهر
ولما يبصو فعلا عالجوهر اللي جوا الواحد .. تسمع كلمة حلوة قوي
انت جميل قوي .. جميل قوي من جوه
.. ولسان حالهم عايز يقولك
بس انت زباله فحت .. وبيئة طحن من بره
.. وللناس دي سوووو بيقولهم
.. ياحلو بانت لبتك
.. أول ما دابت قشرتك
.. تحرم علي محبتك
وراح اتوه .. عن سكتك
فعلا .. الشاكرمون طاخ في الترلولي
.. عشان كده .. سوووو قرر انه يجيب موبيل ثري جي
وبحبك يا ساتاموني .. مهما الناس لاموني
سوووو

الأربعاء، ٢١ رمضان ١٤٢٨ هـ

!! قضية رأي خاص

قال مسلسل قضية رأي عام قال .. ده عام فعلا .. بس عام على وش الميه
البتاع ده المفروض يبقى اسمه قضية رأي خاص وكتاب الله .. هو مؤلف البتاع ده ولا المخرج ولا الممثلين .. مصدقين نفسهم فعلا ؟؟؟
المفروض اني كشخص بينقد عمل فني ما اتكلمش عن العمل الفني غير لما يخلص .. وده فعلا .. المفروض اني مانتقدش البتاع ده غير لما يخلص .. بس ده لو هو اساسا احداثه منطقية بجد
يعني هل احنا كشعب فعلا بقينا سذج للدرجة دي ؟؟
هل يعقل في جمهورية زي جمهوريتنا ان يتحبس ابن وزير وأبوه لسه في الوزاره ويتعمل عليها قضية وتبقى رأي عام والناس كلها تعرفها ؟؟؟
اللي يغيظ ان الناس فعلا مصدقه ومقتنعه .. لكن ده بقى مش مشكله خاااااالص .. الناس تصدق اللي هي عايزاه انشالله حتى لو قالولهم ان العدرا بتطلع كل يوم اربع في صفط اللبن
المشكله ان في مشهدين تلاته اربعه عشره .. فيهم شوية هطل على استخفاف بعقلية المشاهد الغلبان اللي مابيعرفش انجليزي .. والا لو عرف كان اتفرج على الدراما الاجنبيه واللي بتفوق .. بتفوق ايه .. دي بتضرب الدراما بتاعتنا بالجزمه القديمه
اول مشهد خلاني وقعت على روحي من الضحك مثلا .. لما راحت قوة البوليس تقبض على ابن الوزير في النادي وهو بيلعب خيل .. مش هقول انه مابيعرفش يركب خيل ولا كان هيقع ولا انه ولا بان عليه اي ملامح فروسيه ولا هقول ان مافيش حد بيتفرج عليه في النادي وفي بطوله غير شوية بنات بس
(لكن هل يعقل ان البنات اللي بتتفرج عليه وبتشجعه تقوللو(الله عليك .. الله عليك
!!!!!!
الله عليك ايه ولا مؤاخذه ؟؟؟
هو لا مؤاخذه بيلعب بوكس في مركز شباب المنيل ؟؟؟
هو المؤلف مايعرفش نوعية الناس دي بتشجع ازاي وبتهتف ازاي ؟؟؟
المشهد التاني اللي وراه وش بقى .. اللي بيطب فيه البوليس ويقفشه ويقولو اتفضل معانا والواد بيفرفص منهم بيقوللهم انتو مش عارفين انا مين وابن مين .. انتو اتجننتو .. وعمال يتنطط يا ولداه ويتشقلط وحالته مرار ..
هو ده بيحصل مع ولاد الذوات يا اخ يا مؤلف ولا انت يا اخ يا مخرج ؟؟؟؟؟
انتو فاكريننا عايشين في جزر الانتيل على رأي الاستاذ حسن المستكاوي؟؟؟
ده ولاد الذوات بيبقى ليهم معامله تانيه وانا شفتها وغيري شافها بنفسه .. ده انا لي واحد صاحبي دكتور .. طبيب بشري .. يعني لو استخدم سلطته فعلا ممكن يموت الناس اللي بيعالجها .. اتخانق مع وكيل نيابه .. مش هقول ظابط .. وكيل نيابه .. وياريته وكيل كمان .. ده ماحصلش معاون ... وهو اللي غلطان مش صاحبي بشهادة الناس في الشارع .. لكن مجاملة لوكيل النيابه .. قسم الدقي كللو نزل شتيمه وتهزيء وبهدله في صاحبي .. والواد كان هاين عليه ينتحر عشان احنا في بلد ماينفعش تاخد حقك غير لما تكون قريب حد مسئول ..
تقومو انتو يا بتوع البتاع ده تجيبولنا ابن وزير .. وزييييييييييييير .. ابن وزير يتمسك كده في النادي والناس تشوفه؟؟؟؟
المشهد التالت .. مساعد الوزير او مدير مكتبه بيتصل بمكتب وزير الداخليه .. بيتصل بيه منين .. من الموبيل الشخصي بتاع الوزير .. وكأنه مثلا مامعهوش موبيل ولا الحراره مقطوعه من مكتب الوزير مثلا .. لأ وايه .. قام جه الوزير قال لمدير مكتبه لما في مكتب وزير الداخله قالوله ان الوزير في اجتماع مهم .. قاللو اتصللي بوزير الداخليه عالموبيل الخاص بتاعه ..
.. اضحك يعني ولا اشخر ولا اعمل ايه
يعني الوزير مش هو اللي بيتصل بوزير الداخليه بنفسه عالرقم الخاص بتاعه ومكلف مدير المكتب بتاعه هو اللي يتصل بوزير الداخليه شخصيا .. طب فرضنا ان وزير الداخليه رد عالموبيل .. مدير المكتب بتاع الوزير بتاعنا كان هيقوللو ثانيه خليك معايا .. وينادي على الوزير يقوللو اللي طالب شبين الكوم .. اللي طالب شبين الكوم ياخد المكالمة من كابينه اربعه مثلا ؟؟؟؟؟
بلاااااش ده كللو .. بلاها ناديه خلينا في سوسو .. مشهد تاني بيؤكدلي اننا فعلا هنفضل متخلفين درامايا وفكريا وتنفيذيا .. التخشيبه .. التخشيييييييبه .. اللي لا تزيد في اي مكان في الدنيا عن اتنين متر في اتنين متر وبيتحشر فيها عٌشرميت نفر .. يبقى فيها 8 بس في البتاع ده .. التلاته اللي اغتصبو ومن ضمنهم ابن الوزير .. وخمسه تانين .. وتبقى عشرة متر في تمانية متر ؟؟؟؟
ده انا دخلت التخشيبه تحري اقسم بالله العظيم كان فيها مش اقل من خمسين نفر .. في تخشيبه مفتخره .. تخشيبه قسم المعادي .. كانت اقل من مترين في متر ونص مثلا .. ولما اخويا جه ينادي علي من عالشباك بتاع الباب عمال انط وازعق وهمووووت من الشحتفه عشان اخويا يشوفني ولا يسمعني حتى .. ومافيش حد من الاخوه المساجين فكر انه يساعدني ولا يخليني اقرب من الباب عشان اخد من اخويا علبة سجاير
مشهد تاني بقى ده اللي حرق دمي وخلاني اقول انه قضية رأي خاص .. وخاص قوي .. ومن كتر ماهو خاص حسيت ان اللي كاتبه ظابط في امن الدوله .. المشهد اللي فيه ابن الظابط اللي ماسك القضيه - واللي طبعا بطبيعة الحال لازم يكون ظابط او طالب في كلية شرطه هو كمان- المشهد قمة في المسخره وكتاب الله .. الواد طلع اجازة يوم الخميس وطالع متضايق قوي ان زمايله في كلية الشرطه بيقولوله انت باباك وحش وبيعذب المجرمين اللي عنده !!!!!! والاغرب بقى ان ابوه واللي كان بيتكلم بمنتهى العقل والمنطق بيقوللو : يا حماده يابني لازم تفهم ان ابوك اشرف من انه يعمل كده .. ولازم تفهم ان دي فرقعة عاملينها الناس الوحشين عشان يضعفو موقفنا في القضيه .. واننا عمرنا في وزارة الداخليه مابنعمل حاجه في حد .. لاننا بشر ومن لحم ودم .. وعارفين ربنا
يقوم الواد يحضن ابوه ويقوللو معلش يابابا .. سامحني .. المفروض كنت ابقى عارف ان ابويا احسن اب في الدنيا
نعم؟؟؟
لأ بجد نعم ؟؟؟
خساره الفجر أدن والا والله العظيم كنت قلت كلمة قبيحه بجد
مشهد كمان .. وده لسه شايفه حالا بقى .. ومش ضحكني انا لوحدي .. لأ ده ضحك مصر كلها .. البنت التانيه اللي اغتصبوها بتتفرج على طابور العرض واللي فيه اتنين من اللي عملو الجريمه دي وفيهم ابن الوزير .. وجايبين ابن الوزير حاطط على شعره جيل وهدومه نضيفه ومكويه والاستايلست ناتفاله حواجبه وشغل ايييييييييه .. هو لا مؤاخذه كان في تخشيبه فعلا ولا كان في كوستا كافيه ؟؟؟؟؟
آخر حاجه بقى واللي خلتني اقع ضحك .. واحد صاحبي .. هو مش صاحبي قوي يعني .. بس اهو بنقول عليه مجازا انه صاحبي مع انه مالوش لازمه في الحياه .. المهم بقى .. ابو السلاطين اللي هو صاحبي ده قاللي ايه .. قاللي يا سوووو انت بتصدق .. هو في ابن وزير في الدنيا .. بيغتصب حد ؟؟؟؟
عنده حق فعلا .. ابن الوزير يغتصب ليه ولا مؤاخذه .. ماهو عنده مليون مكان يقدر يجيب منه اللي يظبطلو طموحاته
.. وفعلا فعلا .. ابن الوزير مايغتصبش
.. انما الوزير والكبير .. هم اللي يغتصبو
وبيغتصبو شعب بحاله
سوووو

اديها سياسه .. موضه

لازم اتكلم في السياسه واشتم واتنرفز وابقى مش عارف ايه عشان البلوج او المدونه تاخد حقها والناس تقراها
!!!!
منطق غريب قوي ؟؟
وبعدين اصلا اصلا يعني ايه سياسه ؟؟
يعني اشتم الحكومه ؟؟
مش عارف بصراحه .. بس اللي اعرفه اني عايز اتكلم براحتي .. اشتم ماشتمش .. اعمل اللي في مزاجي وماحدش ليه عندي حاجه من الاخر
بس يبقى وجدتها .. انا هقول اللي انا عايز اقولو وبراحتي .. سياسه .. فن .. أدب .. انشالله حتى قلة أدب .. بس هقول اللي في مزاجي وبطريقتي
بمناسبة المزاج والقريفه .. انا سجايري خلصت .. هنزل اجيبلي علبة كوكو الضعيف بوكس .. وبالمره اجبلي كارت شحن ام نبيل عشان عايز اتصل بكام واحد .. بس المشكله ان كروت ام نبيل حتى بعد الاعلان الهابط اللي عملوه على رأي القرد بتاعهم .. لسه برضه بتتباع بسعر اكتر من سعرها .. ولما باسأل اي حد ليه يعني هم مش رخصوها .. يقوللي
معلش يابيه مانا بجبهم بسعر غالي
!!!!
يعني ايه انت بتجبهم بسعر غالي ؟؟
يعني ايه رخصوها وهي لسه غاليه ؟؟
يعني هي السرقه والاستغلال بقت عيني عينك كده ؟؟
يعني احنا فعلا بقينا شعب بينضحك عليه بمعنى الكلمه ؟؟
شكلها كده مش هتعرف تفلفص يا سوووو
.. لازم تديها سياسه
.. ولازم تشتم
----
نداء الى شركة ام نبيل
سوووو امتنع عن شراء كروت الشحن بتاعتكم
وبعد ماتشوفولكم حل .. ابقو اعملو اعلان كويس
.. مش الاعلان الهابط بتاعكم
سوووو

الثلاثاء، ٢٠ رمضان ١٤٢٨ هـ

انت مين ياعم ؟؟

انا مين ؟؟
الحقيقة السؤال ده باسأله لنفسي في اليوم الواحد قد بتاع عشرميت مره .. وكل مره اتنح قدام نفسي .. اه والله بجد .. اقف كده قدام نفسي متنح
من يجي حوالي بتاع قد مثلا تلاتين سنه اتولدت في الصعيد .. تحديدا في سوهاج .. وتحديدا اكتر بقى في مركز طما .. ابويا وامي قرايب .. ودلوقتي الطب الحديث بيقول ان جواز القرايب بيجيب عيال فيها نسبة تخلف .. يبقى انا متخلف
ادي اول خيط في تشريحي لنفسي .. نخش في الخيط اللي بعده .. لما اتولدت وانا صغير دراعي اليمين اتكسر .. وده فال وحش .. يبقى انا عيل وشه فقر .. وده الخيط التاني في اثبات انا مين
لما كبرت شويه وبقيت في مرحلة المراهقه كنت على طول باهزر واحب الضحك وكده .. ولاد االحلال من صحابي قالولي ماتمثل او تجرب حظك في التمثيل .. لما جيت امثل كنت مش فاهم يعني ايه تمثيل .. لكن شويه شويه لقيت ان التمثيل ده في دمنا كلنا .. وده يبقى الخيط رقم تلاته .. أنا بمثل
نسيت اقول اني وانا صغير في مرحلة الطفوله كنت بموت في الرسم .. مع اني مابعرفش ارسم بدليل اني دخلت كلية فنون تطبيقيه وكنت افشل طالب في الكليه .. يبقى كده الخيط الرابع واني باحب ارسم .. بس رسمي وحش
كل اللي فات كوم .. واللي جه في دماغي لما تميت التلاتين خريفا كوم تاني .. انا مواليد واحد اغطسطس الف وتسعميه سبعه وسبعين .. يعني عندي بالظبط بالظبط .. تلاتين سنه وشهرين ويومين على اعتبار اننا في تلاته اكتوبر الفين وسبعه
لما تميت التلاتين صيفا بقى .. فضلت مكتئب فتره طويله .. بتاع سبع دقايق وربع مثلا .. لأ فترة طويله طويله يعني .. اصل انا اعز النكد موووت .. كنت مكتئب لأني حسيت اني ولا حاجه .. ماعملتش حاجه اقدر اثبت بيها وجودي ولا انا باعمل ايه وليه .. تايه زي الاف او ملايين غيري تايهين .. وبالرغم من توهتي دي بس اكتشفت اني عملت حاجات واكتشفت حاجات واثرت في ناس واتأثرت من ناس .. يعني اكتشفت انه مش مهم 30 سنه ولا حتى سبعين سنه .. المهم اني عندي الرغبة في اني اعمل حاجه .. هي ايه بقى ولا هتيجي ازاي مش دي القضيه .. المهم .. اني موجود والحمدلله
-----
بس لسه جوايا سؤال .. انا مين ؟؟
لما جمعت الخيوط اللي قلتها لقيتها كده
أنا متخلف
أنا عيل وشه فقر +
أنا بمثل +
أنا بحب الرسم +
أنا ولا حاجه +
أنا عندي الرغبه في الحياه +
أنا موجود +
=
أنا زي مانا
سوووو

هركب الحنتور .. درجن

مش عارف ليه اول حاجه جات في بالي هي الاغنية دي
هركب الحنطور
درجن درجن
واتحنطر
درجن درجن
يمكن عشان حسيت اني بقيت شخص ليه مكان في عالم النت وبقى لي كيان موجود .. بدل ما كان كياني الوحيد ومكاني المحفوظ عالقهوة .. قهوة المهوية .. احنا سميناها المهوية انا وصحابي عشان دي القهوة الوحيده في المعادي .. معادي ايه .. القهوة الوحيده في العالم اللي مابيجيش فيها نسمة هوا .. ولا صيف ولا شتا .. في الشتا بتمطر على طول .. مافيش هوا خالص .. مش عارف ازاي وليه
المهم .. انا دلوقتي ركبت حنتور التكنولوجيا والنت .. وهتحنتر .. بس هتحنتر اقول ايه؟؟
هو انا المفروض اني عجزت وبقيت جدو خلاص وبقى عندي تلاتين سنه .. وفي جوايا حاجات كتير وكلام كتير عايز اقولو .. بس هقول ايه وليه؟؟
شكلها كده يا سوووو الحكاية جايه عليك بوجع دماغ ووجع قلب وتغيير كيبوردات اول بأول .. وانت اصلا اصلا الماوس بتاع الجهاز بايظ هو ومروحة البروسيسر وليلتك طين بصراحه
يلا مش مشكله .. كللو فداءا الحريه والوجود التكونولوجي والعالمي وخريطة النت الكونية
بمناسبة الكون والكواكب .. هو المريخ مثلا عندهم نت زي مابيقولو عندهم اكسجين ؟؟
وهل ياترى النت عندهم برضه بسرعات ونزلو فيه حوار النت المحدود برضه؟؟
وبعدين اساسا اساسا .. مين عايش في المريخ ؟؟؟
واشمعنا المريخ يعني ؟؟
ليه مش عطارد او الزهرة او زحل
.. حقه زحل ده يبقى لو في ناس بجد يبقى كوكب مسخره
يعني لو واحد في زحل عمل حاجه فريده من نوعها يتقال عليه
(أول انسان في زحل عمل كذا وكذا)
(او يتقال (الآن ولأول مره في زحل
شكلي كده باخطرف بجد
.. عموما
.. الحمدلله اني ركبت الحنطور خلاص
وربنا يستر واقدر اكمل مشوار الحنطره
درجن درجن
سوووو