الأحد، 4 محرم، 1429 هـ

سينماتك



خلصت شغل يوم السبت بدري واتصلت بالراجل اللي باعمللو الشغل عشان عايز اقوللو شوية حاجات لقيته سافر

ولأني مخنوق بقالي فتره ونفسي اعمل حاجه جديده قررت اروح سينما واهو اسخن شوية لاني المفروض ابدأ كتابة سيناريو حاجه كده بس عندي حالة ملل وانا عارف نفسي باسخن لما باشوف تجارب الاخرين

كانت الساعه سته وعشر دقايق .. خدت بعضي وركبت تاكس من قلعة الكبش لوسط البلد
ورحت تجمع الشباب في سينما اوديون
لقيتهم عارضين تلات افلام .. الجزيرة والتزاكر خلصت
هي فوضى والناس حرقتلي قصته ومش طالبه اشوف حاجه تخنقني بزياده
وفيلم امريكاني موجود عالنت وسهل انزله بس انا مكسل

افتكرت ساعتها كلام اخويا اللي شاف فيلم الجزيرة وفيلم خارج عن القانون
وقالي لو عايز تشوفهم ابقى اتفرج على فيلم خارج عن القانون الاول .. لانهم بيتكلمو في نفس التيمه الدراميه بس بيتناولوها بشكل مختلف
رحت واخد بعضي ومتجه على سينما مترو وحجزت تزكرة وعملت الموبيل سايلنت ودخلت اتفرج عالفيلم



بوستر الفيلم غريب قوي .. عبارة عن صورة لكريم العبد العزيز وكأنه بيمثل مونودراما ومافيش حد بيمثل معاه
الحقيقه الصورة او البوستر حفزني اشوف الفيلم
لاني حسيت ان فيه حالة بارانويا سواءا من كريم او من بلال فضل او من احمد جلال
وكمان لان الفيلم ما اتحرقش من خلال الاعلانات ولا الحوارات الصحفيه

من اول بداية الفيلم ومع بداية التتر واللي كانت الموسيقى بتاعته اعلى واروع موسيقى في الفيلم كللو .. قلت انا هتفرج على محاولة كويسه .. وهي فعلا كانت محاوله من كل النواحي ماعدا الكتابه
واللي انا شايفها اجمل مافي الفيلم .. سواءا كمعالجه لعالم المخدرات وكواليسه ..
او سيناريو لاحداث متشابكه ومترابطه بشكل كويس
لو مسكت الفيلم من ناحية التمثيل هاقول ان كريم عبد العزيز عايز ينسلخ عن جلد الشاب الظريف ويتحول لممثل النظرات واللي بنظرة من عينيه يقول فيها كلام كتير ..
بس لسه فاضللك سنه صغيره يا كريم .. وكويس انك بتحاول تطور من نفسك ومن ادواتك كممثل
مايا نصري ماحستش بيها خالص .. ولا هي ولا اي حد تاني .. حتى العبقري حسن حسني .. واللي في بعض اللقطات مابينه وبين كريم عبد العزيز حسيت انه عايز يصرخ ويقول يا ناس هاتولي دور بمعنى كلمة دور
مش مجرد توظيف لسني في اي فيلم
احمد سعيد عبد الغني كان كويس .. بس في لحظات كنت باحس انه بيقلد ابوه سعيد عبد الغني او بيقلد اي ممثل تاني
وتقريبا نسي انه ممثل ولازم يكون ليه طابع خاص بيه هو
افضل ممثلين من وجهة نظري هم محمود الجندي واللي بيظهر في اروع مشاهد الفيلم .. في الاول خالص .. وبيعمل دور ابو كريم عبد العزيز وبيتقتل في عملية اقتحام البوليس لبيته
بعد ما بيرمي السلاح خوفا على ولاده وعلى مراته .. يعني بيتقتل غدر بعد ما سلم نفسه ..
وبيشوف المنظر ده الطفل فادي خفاجه تقريبا او مش فاكر اسمه .. واللي بيعمل دور كريم عبد العزيز وهو صغير
واللي بجد اقنعني انه طفل اكبر من سنه ..
ودي كانت بداية الفيلم واللي انا شايفها بداية موفقه جدا وتخلي المشاهد يتعاطف مع الشخصية الرئيسيه ويتوقع منه كل حاجه .. يتوقع منه انه يتحول لارهابي
او انه يحاول ينتقم لموت ابوه عن طريق انضمامه لعالم الاجرام والخروج عن القانون
او انه ممكن يتوب لما يعرف ان ابوه كان تاجر مخدرات
تقييمي للعمل ككل .. سبعه ونص من عشره
الديكور والاكسسوارات والملابس .. سته من عشره .. لانه كان مزنوق مابين موقعين تلاته وما اهتمش غير باول لوكيشن واللي هو بيت كريم عبد العزيز وهو صغير .. اما بيته لما كبر فمافيش غير زاوية واحده بس وهي زاوية الليفنج ووراه الامريكان كيتشن وكانت ممكن تطلع احلى من كده
التمثيل .. سبعه من عشره .. وكريم عبد العزيز سته ونص من عشره لوحده
الموسيقى التصويريه وشريط الصوت .. تسعه من عشره
السيناريو والقصه والمعالجه .. تمانية ونص من عشره .. اكتر حاجه عجبتني فيه هي التلاعب بمسمى كلمة الحقيقة .. واللي بتتقال في اخر الفيلم على لسان حسن حسني او سيد السويسي .. الحقيقه مافيش حد يعرفها
الاخراج .. سته من عشره .. واللي انا من وجهة نظري انه كان محتاج وقت اكتر في بعض الاجزاء من ناحية التوجية والتوظيف
خصوصا اني ماحستش بالتصوير ولا تم استغلال منطقة قرية او بلد مايا نصري بمافيها من طبيعه وبحر ولم يتم توظيف ده لمصلحة العمل .. وكمان لاني حسيت ان الاكشن اللي في الفيلم مش قوي بمافيه الكفايه .. اللهم الا اول الفيلم واللي بجد كان قمة في التصوير


خلصت الفيلم وقلت اروح بيتنا لقيتني جعان وانا باحب اكل من عند الراجل اللي قدام سينما اوديون بتاع الكبده والسجق .. رحت هناك وكلت وشربت بيبس وانا معدي لقيت فيلم الجزيرة بيناديني رحت قاطع تزكرة .. ودخلت الفيلم




.. دايما كانت السينما بتتعامل مع الجو الصعيدي بشيء من الاستخفاف
وكانت بتتحاشى التعامل معاه وبتكتفي بالمسلسلات وبس
لما سمعت ان شريف عرفه هيعمل فيلم الجزيرة زمان وانه بيتكلم عن الصعيد تخيلت ان الفيلم هيبقى فيه من جو فيلم المومياء لشادي عبدالسلام .. وكان توقعي في محله الى حد ما
.. شريف عرفه اهتم بجماليات الصورة والابهار البصري اكتر من اهتمامه بتركيبة الشخصية الصعيديه نفسها
.. اكتفى بان الصعيدي بياخد حكمته من جدوده والاجيال القديمه
وكأن الطبيعه الصلبه والجافه اللي حواليه مالهاش تأثير
يرجع مرجوعنا للفيلم
البوستر او الافيش كان ثار عليه بعض النقاد واتهموه بانه مسروق من فيلم تاني .. وانا شايف انه عبط ولا مؤاخذه .. مش دفاعا عن الفيلم ولا حاجه .. لان شريف عرفه مش جوز عمتي مثلا ولا لان احمد السقا صاحبي ولا حاجه
بس لاني شايف ان البوستر كان اوقع من بوستر فيلم خارج عن القانون .. كفاية انه مركز الضوء على الشخصيات التانيه في الفيلم ومش مهمش دورهم زي ما في افيش خارج عن القانون اللي تحس انه بوستر او افيش لمطرب او لشريط كاسيت
مع بداية تتر الفيلم لقيت اني قصاد فيلم لشريف عرفه .. مش كمنتج ومخرج وصاحب فكرة الفيلم وبس .. لأ
لقيت اني قصاد فيلم لشريف عرفه واللي انا باعتبره صاحب مرحلتين سينمائيتين في كلاسيكيات السينما المصريه
واللي اقصده بانه صاحب مرحلتين .. اننا زمان كنا مقسمين الافلام الاكشن لمرحلة مابعد وماقبل سلام ياصاحبي
وبعدها مرحلة مابعد وماقبل الارهاب والكباب
وبعدها مرحلة مابعد وماقبل مافيا
.. واللي حسيته ان شريف عرفه عايز يعمل فيلم الجزيرة محطه تانيه
لكن ماطلعتش محطه قويه بمافيه الكفايه
.. الفيلم برضه بيتكلم عن جو عالم المخدرات في الصعيد
.. وبيبدأ تقريبا نفس بداية فيلم خارج عن القانون على هيئة فلاش باك
وانا باعترض جزئيا وكليا على الفلاش باك وكتابة قبل عشر سنوات و بعد عشرين سنه والحوارات دي على شريط السينما .. وشايف انها تعتبر عجز درامي من المؤلف والمخرج
الفيلم ككل افضل من فيلم خارج عن القانون في جزئيتين .. التمثيل والديكور
.. التمثيل كنت حاسس ان في بعض المشاهد تعتبر مبارايات تمثيليه في الاداء القوي
.. زي مشاهد محمود ياسين كلها واللي بجد السينما كانت محتاجه لحاجه كده في الوقت الحالي
.. وزي مشاهد محمود عبد المغني واللي انا باعتبره بيمثل من منطقه جميله جدا وصعبه جدا جدا
وهي السهل الممتنع
لكن طبعا بطل الاسلوب ده او السهل الممتنع هو الحوت خالد الصاوي واللي بجد كان افضل مافي الفيلم من عناصر التمثيل الواقعي
هند صبري وزينه بيحاولو ولو ان الدراما مش خادماهم بمافيه الكفاية .. مع ان لكل واحده منهم مجموعة مشاهد ماستر كان لازم يهتمو بيها ويؤدوها بشكل افضل من كده
باسم السمره اقنعني بانه صعيدي فعلا في مشهد هايل جدا ممكن يكون معظم اللي اتفرجو عالفيلم ماخدوش بالهم منه .. وهو المشهد اللي بيقوللو السقا او منصور فيه .. ان ده جهاز تشويش عشان يشوش على اجهزة التصنت اللي زرعتها الشرطه في بيت السقا
!!! وبيرد عليه بمنتهى البساطه والتلقائيه باسم السمره ويقولو .. انا مافاهمش يعني ايه جهاز فشفيش
وهو ده فعلا مدخل الشخصيه اللي بيؤديها باسم السمره
شخصية الصعيدي الغير متعلم واللي بيتسرع وبيحكم على الحاجه بعصبيه
حاول احمد السقا انه يرسم الابتسامه ونجح في ده في بعض مشاهد الفيلم .. وبالرغم من انه بيطارد خيال الراحل احمد زكي في معظم مشاهد الفيلم .. خصوصا في فيلم الهروب .. بداية من اللبس الاسود والهاي كول الصوف ورسمة الشخصيه نفسها والشنب الصعيدي
لكن انا شايف ان السقا بيحاول يتخلص من استمراره لتقليد احمد زكي بعد ما اتوجهله نقد عن ده في فيلم تيتو واللي كان بيحاكي فيه احمد زكي في فيلم الامبراطور
واللي كان لنفس المخرج طارق العريان برضه
محمد دياب او سيناريست الفيلم كان دايما بيحاول يخلق خيوط تانيه في الفيلم بدل الخيط الرئيسي لكن كنت باحس ان شريف عرفه واقف وراه بالعصايه وبيقولو ماتفتحش علينا فواتح يا دياب .. خلينا في الجزيره وماتطلعش براها
تقيمي للفيلم ككل .. تمانيه ونص من عشره
الديكور .. تمانيه ونص من عشره في حدود بيت الكبير او احمد السقا وبعض المشاهد التانيه زي المستشفى وزي وزارة الداخليه والمديريه
لكن كانت فيه مناطق تانيه قويه ممكن يطلع منها بشغل عالي .. خصوصا بيوت الصعايده الريفيه اللي في الجزيره
الموسيقى وشريط الصوت .. سته من عشره .. لدرجة اني كنت حاسس انها تحوير لشريط الموسيقا بتاع فيلم مافيا اكتر من ماهي المفروض كانت تبقى مستمده من الصعيد
اللهم الا في مشاهد المزمار خصوصا انه ماكانش ينفع يجيب الدي جي امجد شاكر
.. التصوير كان بادي حلو قوي خصوصا في مشهد تعرف الظابط طارق او محمود عبد المغني بالجزيره
لكن رجع تاني واتزنق من نفس عصاية شريف عرفه اللي ماسكها لمحمد دياب السيناريست
التمثيل ككل .. تسعه من عشره .. واللي انا شايف انه كان افضل مافي الفيلم .. وافضل من مشاهد الاكشن اللي كانت ممكن تتعمل بحرفيه اكتر افضل من شغل الجرافيكس .. خصوصا اننا في مصر لسه مش متقدمين في المجال ده
الاخراج .. شريف عرفه .. فعلا شريف عرفه بما فيه من خبرة واحتكاك وتوجيه للممثل وقدرة على السيطره على ادواته .. لكن الحلو مايكملش .. وفيه بعض الحاجات الصغيره برضه يا استاذ شريف
ملحوظه
الحقيقه هي مش ملحوظه واحده .. وانا عارف اني رغيت كتير في الكلام الاهبل اللي قلته .. بس انا عندي شوية ملاحيظ قبل ما اسيب البوست
اول ملحوظه .. يعني الواحد قبل مابيقطع تزكرة السينما بيشوف المكان اللي هيقعد فيه .. ايه لازمة انه لما يدخل السينما يستعبط ويقعد في مكان تاني ولما يجي العامل يقوللو ده مش مكانك يقوللو ببجاحه
مانا مش هشوف لو قعدت في المكان ده
!!!!!!
تاني ملحوظه .. ليه لبس الشباب دلوقتي بقى مقطع والبنطلونات طالعه مكرمشه وتحس انها طالعه من بق كلب .. وليه كل الشيرتات سواءا ولادي او شبابي بقى فيها ترتر وبتلمع وتحس انها بتاعة عالم خوجات؟؟؟؟
تالت ملحوظه .. كان قاعد جنبي واحد تقريبا في تخنتي .. وكان لابس سويت شيرت محزق وملزق وشكله وحش قوي قوي .. ومسقط البنطلون والبتاع الاندر اللي لابسه ولونه مشجر وغريب .. واللامؤاخه باينه
لزومه ايه الاغراء والقرف ده؟؟؟


سوووو

هناك 63 تعليقًا:

fanan fa2eer يقول...

بصراحة حسيت اني قريت مقال لناقد فني يعني مش مشاهد

أنا شوفت فيلم الجزيرة وبجد عجبني جدا

هو كان أحمد السقال فعلا تحس انه واخد أحمد ذكي في ركن الفيلم وكل شوية يبص عليه بس أنا شفت انه كان بيحاول برده

بالنسبة لزينة وهند صبري فأنا شايفة ان أدوارهم كانت ضعيفة جدا ومافيهاش المساحة الكافية اللي تخليهم يظهروا كنجوم

بس الفيلم في مجمله عجبني القصة كانت كويسة والتمثيل كمان كان كويس

بالنسبة بقا لعادات الشعب المصري داخل السينما

فأنا في حاجة دايما بتستوقفني
يبقي قاعد يتفرج وتلاقيه سرح ولا نامله شوية وبعدين يفوق ويقلك هو ايه اللي حصل

يقوم اللي جمبه يضطر يحكيله ونتوه احنا بقي في الحكاوي ومانتفرجش علي الفيلم

بس

fanan fa2eer يقول...

وبالنسبة بقا لأني كنت أول تعليق فخدت التعليق التاني هدية

:))

MKSARAT SAYED SAAD يقول...

معاك في خارج عن القانون ومش معاك في الجزيرة
الاختلاف في الرأي لا يفسد للود قضية
عامل اية يا سو وحشتنى والله ووحشتنى كومديا الموقف اللي في كتباتك
تحياتي ومودتى

Desert cat يقول...

انا اللى عجبنى اكتر من الفيلم طريقة النقد ... هايلة جدا يا سووو
انا بقى اكتر حاجه بتضايقنى انى اشوف ولد لابس ترتر
بيبقى هاين عليا اروح اقوله
كابتشن كابتشن
شكلك متلخبط ولابس تيرشت اختك

Rehab Mostafa يقول...

أنا مش عارفه ازاي بقرأ الكلام الكتير ده بجد :D
بس مش بزهق من الكلام بتاعك وسبحان الله بكمل قرأه ... انت ناقد فني جامد على فكره :) ايه النقد والكلام ده كله :)

بالنسبه للملاحيظ :) أنا معاك تماماً فيها بس مش لاقيه رد على ليه !!! هما ليه صحيح بيعملوا كده وبيعملوا في نفسهم والناس كده
والملحوظه الأولى: لما هو عارف نفسه انه مش هيشوف من المكان اللي اختاره كان اختاره ليه أصلاً
وكمان بقرف أوي وباشمئذ من منظر البنطلون الساقط ده سواء ولد او بنت بجد منظر مقذذ
وموضوع الهدوم اللي طالعه من بق كلب دي :):):) بيعتبروها موضه على فكره

من القلب يقول...

انا لسه ماشوفتش لا ده ولا ده
بس نقدك بصراحة شجعنى انى اشوفهم


تصدق انا كرهت اروح السينما من مناظر الناس اللى فيها
ده غير تعليقتهم السخيفة و التافهة طول الفيلم


تحياتى

لماضة يقول...

ياعم يا عم
انت ناقد ولا فيه منه اليومين دول
طيب الله يخليك يا سو
عاوزه بقى تغطيه مشابهه ليها بالظبط
فى كاس الامم الافريقيه
انا لسه مشوفتش الفيلمين بس نفسى ادخل الجزيره من الكلام اللى سمعته عنه وان شاء الله يحصل قريب
وبالنسبه للعيال اللى شوفتهم فى السنيما خد من ده كتير حتى فى الميكروباص
عندك حق فعلا حاجه تقرف

appy يقول...

انت دارس سينما ولا ايه هو احنا زومل فى الموضوع ده انا درست اخراج يعنى على خفيف كده المهم ما علينا بقى انا لسه مشوفتش خارج عن القانون بس الجزيرة مرتين وواحد منهم طلعت سنما الاطفال غصب عنى يعنى الاهل كانوا رايحين وواخدين الاطفال مع انها سينما جديدة فى القاهرة الجديدة عندنا فى مول المهم بقى على فكرة فيه سقطه صغيرة هشوفها واقولك عليها بتاعت الجندى لما رمى سلاحه دى سقطات من المخرجين لان تجار المخدرات معندهومش الحته الانسانيه دى وخاصه بتوع الصعيد وده الواقع بجد فدايما بيتجاهلوها فى السنما معرفش ليه ويحاولوا يطلعوة انسان حنين بس ده مش صح
المهم بقى يا بشمهندس البنطلون اللى طالع من بق الكلب ده اسمه كررراش او شرانكى وده بعيد عنك وعن السامعين موضه اما الترتر واللى بربرق بربرق ده فده منتشر بس بين شباب الاماكن الشعبيه او الاقاليم مش عارفه ليه يمكن بيعمل فرح مع نفسه تقريبا

Nani يقول...

السلام عليكم
بصراحة انا ما بشوف افلام مصري جديدة لانها نفس القصة
1- بحبه يا بابا والجوازة دي مش لازم تتم
2 - حتسبني يا ممدوح طيب واللي في بطني
3 - طخه عيارين يا هريدي وقبر يلمك يا بت
للاسف الشديد انحصرت الافلام في المحيط المصري ولم تخرج منه
رغم ان مصر هي الرائد الاول والوحيد في الافلام العربية لمنطقة بلاد الشام والخليج
اصبحت نمطية بشكل ممل
حتى خرج عن الركب كل من
السقا في فلم مافيا بمحاولة جيدة
هنيدي كسر قالب الكوميديا الغبي الذي كان متواجدا
محمد سعد اللمبي والذي بنظري وصل الى مستوى مسرحية العيال كبرت ومدرسة المشاغبين
فقد اصبح الجميع يقلده او يقتبس من افلامه مثل هاتين المسرحيتين
للآن لا يوجد شيء مثل ثلاثي الاضواء او اي نوع من انواع الافلام الموسيقية والتي كانت اروع انتاجات

Hannoda يقول...

بص أنا حاسة بإعجاب شديد جدا جدا
ورغ ان البوست طويل جدا إلا اني استمتعت ع الآخر بيه

واضح مدى إدراكك لتفاصيل السينيما و حبك ليها ووعيك لكل تفاصيلها و ده اللي إدّى للبوست متعة فظيعة

لإن الواحد لما يقرى نقد من حد عادي زيي زيه بيحس فيه ظلم كتير في الوصف إننا ما بنكون حاسين فيه حاجة غلط لكن مش عارفين فينها فساعات نحملها على حاجات تانية سليمة

عموما عندي دلوقت حالة إعجاب و إحترام شديييييييد جدا للي قريته هنا


تصدق أي أي مجال وأي كلام مهما كان عن شيء مش مهم قوي

لكن لما يتقال بوعي و صدق و تمكن بيكون بجد رائع

أما الشباب... فالكلام عنه يحزّن و حايبوظ فرحتي بالبوست بتاعك

:)

تصفيييييق شديييييد

ToOoKa يقول...

السلام عليكم
الصراحه انا ما شوفتش لسه اى فيلم منهم
بس البوست دا ادانى فكره انك بتفهم فى الافلام والاخراج والحاجات دى
انا لما بتفرج على فيلم اكتر حاجه بتأثر فيا او باخد بالى منها هى الموسيقى والتصوير وسعات الاخراج
بس غريبه انو حد ياخد بالو من كل حاجه
ما شاء الله انا ما بحسدش
انا عامتا مارحتش السينما غير 3 مرات ومره فيهم كانت مع ماما واتفرجنا على ايام السادات

انا مش من انصار انو البنت تروح السينما اصلا وخصوصا علشان الحاجات اللى قولت عليها دى

اما بالنسبه لللبس
فانا الصراحه ما بقتش عارفه اصنف نفسى تبع الولاد ولا البنات
حاجه تحزن والله

ToOoKa

ToOoKa يقول...

ناس بتتفرج على فيلمين وناس طالع عينها فى الكتب

يا مفترى فيلمين فى يوم واحد
حاجه تفرقع حاجه تغيظ

انا مابحسدش انا بقر بس

بت خيخة وأى كلام يقول...

زعلت من نفسى لما جيت متاخر برضه ولقيتك منزل بوستين
انا اسفة يا سوووووو
اولا عايزة اقولك كل سنة وانت طيب واضح ان عيد ميلادك كان قريب علشان
لما رحت عندك فى البروفيل لقيت ان خانة السن اتغيرت وزادت سنة بدل تلاتين بقت واحد وتلاتين
كل سنة وانت طيب يا سوووووو يا جميل
ثانيا
انا قريت البوست بتاع الاتوبيس
هههههههههههههههههههههههه
استجدعتك اوى لما شخرت للراجل ابو دقن
ماهو بصراحة ماكنش ينفع معاه غير كدة
وطبعا استجدعتك لما قعدت الست ولو انى حاسة انك اضطريت انك تقعدها هروبا من ريحة بق الراجل

ثالثا بقى البوست ده بتاع الفيلمين
بجد بجد يا سوووووو انت هايا
انت عملت نقد لفيلمين بشكل محترف جدا لدرجة انى شكيت انك اساسا ليك فى موضوع النقد الفنى ده
وبعدين لاحظت انك كاتب فى البوست انك بتحاول تكتب سيناريو لحاجة كدة
ياترى انت فعلا ليك فى الحاجات الفنية دى ولا دى مجرد موهبة
اصل بصراحة اسلوب كتابة البوست ده بيدل على حرفية شديدة
والله برافوا عليك

رابعا بقى انا جايبة سيرتك عندى فى اخر بوست ليا
روح يلا اقراه

خامسا
يا واد انت مش عارفة ليه حاسة انك قريب من عقلى اوى

بجد بفتقدك لما مش بتجيلى
وبجد بزعل من نفسى لما بتأخر عليك والاقيك كاتب حاجات جديدة

سادسا
بجد بجد انا مستجدعاك جدا

سابعا
ماتنساش تروح عندى النهاردة فى البلوج بتاعى علشان جايبة سيرتك
وتعالى بكرة كمان علشان بكرة هانزل بوست مهم جدا وعايزاك تكون موجود

ثامنا
سلام اختك خيخة رغاية واى كلام

rainbow يقول...

عحمد افندى الناقد الهايل

انا بطلت ادخهل سينيما من زمان من ايام تيتانك بدل ما بتكون خروجة للمتعة بتتحول لنوع من تعذيب الواحد لنفسه بالمناظر والاصوات والروايح كمان
السينما كلها اطفال غير المناظر اللى انت اتلمت عنها ربنا يلطف بينا

نقدك هايل بجد وواضح انك متمكن استمر يا ابنى !! لا بجد كلامك موضوعى جدا ورغم عدم مشاهدتى للافلام الا ان كلامك ادانى انطباع مبدئى لازم اعمله حساب لما آجى اشوفهم يوم من الايام لو ربنا اراد

تعالى هنا بأه
انا لما جيت المرة دى لاحظت انك وضعت لينك مدونتى الغلبانة عندك .. ده شرف ليا والله ويسعدنى جدا يا عحمد بس انا من الكتاب الساخرين ؟؟!!0

ده انا النكد طالعله ايدين ورجلين يا راجل ههههههههههه

عموما انا والله بشكرك على الاضافة دى واتمنى اكون عند حسن ظنك دايما

عميق تحياتى وخالص دعائى

هدى

موجة يقول...

كده تحرقلي فيلمين بحالهم
حرام عليك
كنت لسه ناوي ادخل فيلم كريم
ربنا يسامحك
هههههههههه
تحليل جامد
انتا شكلك حتطلع ناقد سينمائي و متخفي في دور عجوز
هههههههههههههههه
بس عندك 30 سنة
خالص تحياتي

koko يقول...

عسل يا سووو .. فيلمين ورا بعض يا جبار .. لا و الاتنين نفس التيمه .. يا دماغك يا معلم

انا معاك فعلا فى ان الموضه بقت يععع اوى .. اعتقد ان فيه ناس كتبير معفنه اصلا و الموضه دى جت لهم على الطبطاب

3ala asm masr يقول...

انا اتفرجت على فيلم الجزيره من فتره
وحسيت ان الفيلم عجبنى ومعجبنيش
بس معرفتش احدد ايه اللى فى الفيلم غلط
وبعدين اكتر حاجه بقت مخليانى اكره ادخل سينما
هى انى بحس ان احنا عندنا تلات او اربع حواديت هما اللى عمالين نعيد ونزيد فيهم من زمان اوى
يعنى مش حاسه ان فى موضوع جديد
هى نفس المواضيع وكل واحد بيتكلم عنها من وجهة نظره
اكتر فيلم عجبنى اوى السنه دى كان هى فوضى
لانى حسيت انه اه هو ده اللى احنا فيه
احنا هنقعد نخبى وندارى ليه اه هو احنا كده
فده اللى عجبنى فى هى فوضى ياريتك كنت اتفرجت عليه

زُمُرده يقول...

جمييييييييييييل جدا يا سووووووووووو
نقدك تمام اوي واسلوبك عجبني
مع ان البوست طويل بس محسيتش بيه يمكن لانك منطقي اوي فيه ونقدك واع اوي

متفرجتش ع الفلمين ...كنت مستنياك تعزمني ...مش قولت هتصالحني بحاجه ساقعه
اهو فيلمين يروحي عني

معااااااااك في الملاحيييييييييظ
بيبقى نفسي في ..فرفر..واطخهم عيارين

بس قولي ...فيلمين مره واحده..وعشا جاااااامد
هي النفسيه عامله ايه؟؟؟

Doba يقول...

صباح الخيرات على سووو افندى
انا ليا استفسار بسيط

يعنى ايه انت عندك سيناريو عاوز تكتبه
مش فاهمة

انت بتكتب لحد معين حاجة ولا ايه نظامك
===========
حلو النقد اللى انت عامله بس انا مشوفتش اى الأفلام

بس انا بحترم

خالد سمره
خالد الصاوى

اختياراتهم هايلة وكويسة لادوارهم

اما بالنسبة لكريم والسقا
فالموضوع بقى انى اكون نجم شباك وخلاص والاعادة والاطالة مبقتش تفرق

تحياتى
هبة

ابن حـجـر الـعـسـقـلانـى يقول...

الله ينور عليك يا سوووو

انا شوفت فيلم الجزيرة .. و بصراحة عجبنى جدا .. بس اللى خنقنى هى نفس النقطة اللى انت قلتها بتاعة "من خمسين سنة" و "بعد تلاتين سنة" .. و لا الهتشة اللى فى الآخر بتاعة اختفاء منصور و مين راح فين

الموسيقى بصراحة ما شديتنيش قوى على الرغم إنى من عشاق موسيقى عمر خيرت

باسم السمرة فنان رائع .. تعبيرات وشه مش ممكنة .. و لا لما اجتمع مع خالد الصاوى .. بصراحة لقاء العمالقة .. واحد صاحبى علق على المقابلة دى و قال لى:"فاكر آخر مرة الاتنين دول كانوا بيمثلوا مع بعض كانوا بيعملوا ايه ؟؟" يقصد عمارة يعقوبيان طبعا

و كل سنة و انت طيب يا سوووو .. و لما تبقى تعمل الفيلم بتاعك ابقى قول لنا .. عشان نروح نتفرج عليه .. مجانا طبعا .. أمال الكرم الصعيدى دة هاتوديه فين يا راجل

مروة الزارع يقول...

اية التحليل الدقيق دة

موهبة جديدة عرفتها فيك

..........

انا بصراحة مشفتش ولا فيلم من دول

هشوف وهقولك

انا بعرف افصص برضة كل كبيرة وصغيرة

هعهعهعهعهع

ايوية يقول...

الحقيقة انا مش شفت الافلام بس ليا تعليق واحد هو لية كل شوية تطلع موضة فى الافلام شوية كانت افالم الكومديا ودلوقتى افلام الاكشن
اما بقى موضوع لبس الالولاد فدة منرفزنى جدا لدرجة انى فى يوم شفت ولد لابش تى شيرت مطرز اعتقد انة ملقاش لبس مكوى وهو خارج اخد بلوزة اختة
تحياتى

ghalia يقول...

فيلمين ورا بعض يا سووو؟
يا قلبك
صراحة أنا لسه مشفتش لا ده ولا ده
بس عجبنى أوى تحليلك للأفلام
تناولت كل مقومات الفلم بطريقة ادهشتنى بجد
تنفع ناقد سينمائى بامتياز

بقللك ايه
ابقى تعالى عازماك على فنجان قهوة سادة

زُمُرده يقول...

ماااااااااااش ياسوووووووووو
******************
يا مغلب وياك الناس
زُمُرده بشر حساس
تعاتب إلي أغلى من الماس
وقلبها أصفى من كل الناس
اوع ياخدك الوسواس
وتقول "متمرده"وتجرح الاحساس
وافتكرني يا ابن الناس

Eman Eltaher يقول...

والله و لا شغل النقاد
:))))
بجد شئ كويس جدا منك انك نقلتلنا أفكار الأفلام و انا لسه مشوفتش حاجة منهم
ربنا يسهل واشوفهم

على فكرة البوست الجديد بتاعى مفيهوش اى تحيز و لا اى حاجة !!! :))))) شكلك نسيت المدونة أصلا

د/اجدع بنوته يقول...

بصراحة حسيت اني قريت مقال لناقد فني يعني مش مشاهد

فعلا فعلا فعلا .. هو انت درست نقد فنى قبل كده

نايس بوست وشكرا لانك حرقتلى الفيلمين كده

وانا كده كده مكنتش هشوفهم اصلا

فتحياتى وفرتلى ال 40 جنيه

ra7eel يقول...

يه ياعم سووووو

النقد ده كله اتارى الواحد لما يتفرج على فيلم مش بيفكر فى كل ده اهو بيتفرج وخلاص ويقول حلو او لاء

يعنى انت قاعد تحلل الفيلمين من جميع الجوانب
هههههههههههههه
انا بصراحه مشفتش اى فيلم فيهم لسه

تحياتى لك

سهر الليالى يقول...

ما شاء الله عليك يا سوووو بجد
تحليل نقدى للفيلمين هايل بجد

أنا صحيح مشفتش ولا فيلم فيهم عشان اقدر اعلق معاك علسهم بس عجبنى اوى نقدك فى الفيلم من حيث الجوانب الفنيه والحاجات دى حسيت انى بستمتع
صحيح برضو انا بحب اعلق على افلام معينه بتوصلنى بس مش من النواحى دى خالص .... الله ينور

أما عن العادات الجديدة فهنقول ايه ايه بس قال ايه موضه ... عجبى

عاوزة رأيك فى بوست عندى ... وكل الناس كمان

تحياتى يا سكر

shayma يقول...

انا بصراحه لسه مشوفتش الفيلمين بس انت هتشجعنى اشوفهم

ووقعتنى من الضحك على ملحوظاتك الجبارة
سلامى يا عم سوو

Rain man يقول...

ياريت توجهلي شكر خاص لصاحبك اللى حرقلك قصة فيلم هى فوضى ..
لانى اعرف واحد لسه يا دوبك حارقلى فلمين مش فيلم واحد ..
بس تعرف .. ؟
و الله حسيت بمتعة و انا بتابع نقدك
انت موهوب .. عجوز اه بس موهوب
..
بالنسبة للملاحيظ
انا فعلا عندى تشيرت اسود و تحسه فى حاجات بتلمع فعلا ..
بس مش بسقط البنطلون .. و لا انت فاهم ايه ؟
لا ارجوك ما تفهمش غلط
بس الظاهر ان الاسود مود اكتر منه موضة

و الله و الله والله سعيد انى جيت هنا
و لازم اجى تانى

رجل المطر

L.G. يقول...

سلامو عليكم
أهم حاجة ان الناس تعمل زيك لما تقرى مقال أو تشوف فيلم أو مسلسل أو تشتري حاجة تقيم وتفكر ليه حلو وليه وحش وايه الفرق بينه وبين مثيله.
عن الفيلمين مشوفتهموش ماليش بصراحة في السينما خالص وبالذات الأفلام العربي لأنها اما قصة بدون حرفية أو حرفة بدون رؤية يعني دايماً فاقدين حاجة مهمة
مهم قوي عملية العصف الذهني بمعنى لما تشوف أفكار الناس أو تسمع أفكار بيجي في دماغك فكرة
عدم الاهتمام بالتفاصيل زي البوستر مثلا
التقليد فين الابتكار
الممثل الصغير فادي خفاجة جيد جدا خاصة كان في مسلسل حدائق الشيطان
معرفتش مين الممثل محمود عبد الغني / الترتر في لبس الولاد دلالة على ... / موضة البنطلون الساقط مأخوذة عن المساجين في أمريكا لأنهم كانوا يمنعوا عنهم الأحزمة / أحمد السقا تحديدا مع ان أغلب البنات والناس بيشوفوه كويس لا أرى بداخله تجربة ولا احساس مهما زعق أو عيط أو حاول يحبك الدور مفيش تجربة جواه
أول مرة ألاقي حد عمال يفصص فيلم كنت فاكراني مجنونة بس الحمد لله عارف فيلم الخروج من أفريقيا بتاع روبرت ردفورد وميريل ستريب لقيت نفسي عملاله تحليل سينمائي اخراج وصورة واضاءة وصوت وتمثيل كل العناصر وكتباة من زمان خالص من المدرسة لأني مكنتش بلاقي حد يسمعني ويفهم اللي بقوله ياه جيت متأخر قوي يا سو لما بطلت أشوف اعلام خالص تحياتي
وأتمنى انك تكون كده في كل حاجة مش في الفن بس

Soooo يقول...

fanan fa2eer

منوراني بوجودك الدائم عندي وبتعليقاتك الجميله دي والله

ويارب تكون محاولتي في اني اقول ايه اللي عجبني واللي ماعجبنيش دي عجبتك


ملحوظه
اول وتاني تعليق منك .. ده شرف كبير قوي يا فنان .. ياللي مش فقير


سلاموووووز

Soooo يقول...

MKSARAT SAYED SAAD

ابو السيد يابرنس
الله يسترك ياشيخ قول معاك في فيلم خارج عن القانون .. مش معايا في خارج عن القانون احسن الناس تفتكرنا مجرمين وبنجمع بعض ولا حاجه

وبعدين يا ابو السيد .. لولا اختلاف الاذواق .. لبارت السلع

وانت كمان ياريس ليك وحشه



سلاموووووووز

Soooo يقول...

Desert cat

قطة الصحاري والبراري .. ازيك ياستي

والحمدلله ان الموضوع عجبك .. والحمدلله اني مش انا لوحدي اللي بيتخنق من الهدوم ام ترتر


سلامووووووز

Soooo يقول...

Rehab Mostafa

الحمدلله انك مش بتزهقي من الكلام بتاعي
والحمدلله ان الموضوع عجبك

والحمدلله انك معايا في ملاحظاتي
والحمدلله على وجود المكواة اللي باكوي بيها هدومي .. والا كنت هبقى شاب كده زي العالم دول .. وهدومي مكرمشه
والحمدلله اني مش بالبس عالموضوه .. وبالبس اللي بيليق علي وبيعجبني


سلاموووووووز

Soooo يقول...

من القلب

منوراني يافندم في مدونتي المتواضعه
وكويس ان الموضوع عجبك

اما بالنسبه للتعليقات في السينما فانا باعتقد انه على حسب مكان وموقع السينما دي
يعني سينيمات وسط البلد خصوصا في العيد .. باحس اني رايح اسمع تعليقات الناس .. مش اشوف الفيلم
وبطلت ادخل سينما في العيد حتى لو ببلاش


سلامووووووز

Soooo يقول...

لماضة

يا ستي الداكتورة انا ولا ناقد ولا بتاع .. انا مجرد واحد قال اللي حسه واتكلم من وجهة نظره عن اللي شافه

اما بالنسبه لكاس الامم فانا بالرغم من اني باحب كرة القدم واهلاوي متعصب .. لكن ماليش في تحليل الكرة بصراحه

وبالنسبه للعيال اللي شفتهم في السينما .. فهم موجودين في كل حته اصلا
انا خايف افتح الكاتل ازوده ميه عشان اعمل نيسكافيه .. الاقيهم قاعدين جوه


سلاموووووووووز

Soooo يقول...

appy

الحقيقه يا ابي انا مش دارس سينما ولو اني باكتب سيناريوهات ومسرحيات على صغير .. بس جربت ادخل معهد سينما ولقيتني محتاج لواسطه وكوسه وانا ولا ابويا مخرج ولا امي الله يرحمها كانت رقاصه
فبالتالي اكتشفت انه مش هينفع
وفضلت اخليني كده مهندس ديكور .. وهاوي سينما وتمثيل وكتابه

وعلى فكره .. اي انسان مهما كان جواه شر .. فيها حته طيبه
بس مش بتبان غير مع اللي هم بيبقو عايزين يبينوله ده
وبعدين حتة لما الجندي رمى سلاحه دي بجد كانت اصدق لحظه في الفيلم .. هتقوليلي ليه؟؟
هقولك عشان انتي لو خدتي بالك من تعابير وشه وتقطيع اللقطات على وشه وعلى نظراته لعائلته وعلى نظرات ابنه ليه هتلاقي انه اكتشف انه خلاص هيموت هيموت .. وراعي كمان انه في الدراما بتاعة الفيلم كان عايز يتوب
فدي بالتالي حافز اكتر ليه انه يفضل يسلم نفسه عن انه يلقي بعائلته للتهلكه

ملحوظه
طب انا راضي ذمتك .. ادخل على محل هدوم وانا راجل ملو هدومي وتخين وبنضاره قعر كباية واقرع .. واقوللو هاتلي بنلطون كراش ولا شرانكي
دي يقتلوني في البلد يا بنتي


سلاموووووووووز

Soooo يقول...

Nani

منوراني يا ناني وبينورني تعليقك عندي وبافرح بيكي جدا كصديقه عزيزة علي بجد

بصي ياستي .. الدراما الانسانيه في منها حاجه وتلاتين تيمه او حبكه دراميه
للأسف هنا في مصر بيستغل المنتجين نجاح فكره او فكرتين منهم وبيقعدو يزيدو ويعصرو ويعيدو فيها لغاية ما الناس تزهق
زي ماحصل في هوجة هنيدي .. او هوجة الكوميديانات الجدد .. ولما لقو لقو فيلم سهر الليالي وفيلم اوقات فراغ نجحو راحو مدينها افلام لشباب كتير .. ولما لقو موضة ظباط الشرطه راحو مدينها ظباط وفساد ومخدرات
يعني المتحكم في السينما عندنا للأسف هم المنتجين .. مش المؤلف ولا المخرج ولا الممثل .. واكيد اكيد اكيد
مش الجمهور


سلامووووووووووز

Soooo يقول...

Hannoda

الحمدلله ان البوست عجبك واسف اذا كنت طولت فيه
بس مش عارف لقيتني باكتب وباكتب وماخدتش بالي من طول الموضوع غير لما خلصت

وفعلا لما الواحد بيكون حابب مجال معين بيقدر انه يعبر عنه صح او بطريقه تعجب الناس
بس للأسف .. معظمنا دلوقتي بقى في حالة تخبط رهيب .. ومش قادر يحب حاجه ولا يحب حد


سلامووووووووز

Soooo يقول...

ToOoKa

منوراني يا توكا والله
والحمدلله ان البوست عجبك وشدك بالرغم من طوله ورغيي الكتير فيه

اما بالنسبه لان البنت تروح السينما فللأسف احنا دلوقتي مافيش غير دارين او تلاته للعروض السينيمائيه اللي ممكن البنت تروح تشوف فيلم فيهم .. سواءا مع صحابها او صاحباتها او مع اهلها

والباقي مش هينفع نظرا للتعليقات السخيفه اللي بجد باتخنق منها لما باشوف بنت مع خطيبها او حبيبها في السينما

ملحوظه
اكيد تصنفي نفسك من ضمن البنات .. لان الشباب اللي باتكلم عنهم دول .. بيقلدوكم .. وماشفتش ولا هشوف بنت بتلبس لبس رجالي مثلا

ملحوظه تانيه بقى
انا لما كنت في الكليه ماكنتش بادخل سينما غير كل فين وفين يابنتي .. مش عشان المذاكره لا سمح الله .. بس عشان ضيق ذات اليد مش اكتر
وياناس بطلو قر .. وقومي ذاكرو


سلامووووووووز

Soooo يقول...

بت خيخة وأى كلام

ربنا مايجيب زعل ياستي وصدقيني انا مقدر ظروفك ومشاغلك وارجو انك كمان تعذريني على تقصير في حق متابعتي لمدونتك ولمواضيعك والتعليق عليها

وانا يافندم ماكانش عيد ميلادي قريب ولا حاجه بس هي مؤامره بتحاك علي من بلوج سبوت وعائلة جوجل عشان يكبروني سنه كمان

والحمدلله ان رد فعلي في موقف الاتوبيس عجبك بس بجد ماكانش ينفع اني اعمل حاجه غير كده

وبجد وبدون مجاملات والله .. انا باعزك وباحترمك وباحترم مدونتك ومواضيعك جدا جدا جدا


سلامووووووووز

Soooo يقول...

rainbow

الحمدلله ان الموضوع عجبك وانك علقتي عليه بالكلام الجميل ده

وفعلا دخول السينما دلوقتي بقى شيء مخنق ومقرف جدا .. بس هنعمل ايه .. ماينفعش ان الواحد يتفرج على بعض الافلام غير في السينما عشان حالة الابهار اللي بيبقى فيها الواحد مستمتع

ملحوظه
انتي فعلا كاتبه ساخره جدا .. والدليل على كده موضوعك عن المعاكسه واللي انا شايف انه من اقوى المواضيع اللي قريتها بجد .. انتي بس بتمري بحالة اضطراب فكري وخنقه عاديه .. وكلنا بنعدي على اللحظه دي
يلا بقى اتجدعني واتحفينا بموضوعين حلوين وساخرين .. وفي الجون


سلامووووووووووز

Soooo يقول...

موجة

منورني والله يا باشا

ويا باشا انا ماحرقتش افلام ولا حاجه .. انا قلت حاجه حسيتها .. ممكن انت لما تشوف الفيلم تحس حاجه تانيه
هو ده الفن .. كل واحد بيشوفه من وجهة نظر خاصه بيه


سلامووووووووز

Soooo يقول...

koko

بتنورني بتعليقاتك الجميله دي وانا بجد بافرح لما باشوف تعليقك بالرغم من اني ماعرفكش

وفيها ايه فيلمين ورا بعض .. مش احسن ما اقعد عالقهوة اخنق نفسي في كلام وخناق وحوارات

وفعلا الموضوه اللي شغاله اليومين دول جات عالطبطاب للعالم الممعفنه دي
تخيل .. بنطلون مقطع ومكرمش .. وتي شيرت محزق وملزق .. وبترتر
انا البس ترتر
ليه
رقاصة في الهرم



سلاموووووووووز

Soooo يقول...

3ala asm masr

الحقيقه مشكلة فن السينما عندنا انه بقى قائم على قوة المنتج وقدرته على الدفع للمثلين
وكمان معظم المنتجين عندنا بقو جزارين ومش فاهمين في الفن
وعشان كده تلاقي السينما متخلفه بتاع عشر سنين عن السينما النضيفه القوية بتاعة زمان

وهحاول اشوف فيلم هي فوضى في اقرب فرصه ان شاء الله


سلاموووووووز

Soooo يقول...

زُمُرده

اهلا بيكي يا ستي واهلا بكلامك الجميل جدا واللي بجد خلى وشي احمر واخضر واصفر من كتر الكسوف

ويافندم انا يشرفني ان الموضوع عجبك ولو تحبي اعزمك على فيلم انا مستعد وقد كلمتي
حددي انتي الزمان والمكان
وكلمة السر كتكوت .. بس اوعي حد يعرفها


ملحوظه
يوم عن يوم بجد والله بافرح اني اتعرفت على ناس محترمه زيك كده باحس اني اعرفهم من زمان واحس انهم بجد اصدقاء مقربين لي وفي مقام اخواتي


سلاموووووووووووز

Soooo يقول...

Doba

اختي العزيزة ام يوسف
الحمدلله ان الموضوع عجبك وانا معاكي فعلا ان باسم السمره وخالد الصاوي فنانين فعلا وانا باحترم اداؤهم حتى في فيلم عمارة يعقوبيان بالرغم من نقد البعض ليهم انا احترمتهم لجرأتهم في قبول الادوار دي

ويافندم انا باكتب سيناريو لحاجه كده بمساعدة احد الاشخاص لمسلسل من نوعية الست كوميك وربنا يسهل ونعمل حاجه تكون كويسه وربنا يعمل اللي فيه الخير



سلامي ليوسف افندي

سلامووووووووووز

Soooo يقول...

ابن حـجـر الـعـسـقـلانـى

ابو العساعيس ياسكره
منورني والله يابرنس ومنورني تعليقك

والحمدلله اني مش لوحدي اللي بيتخنق من حتة من خمسين سنه وبعد سبعين سنه والحوارات دي

وفعلا اللقطه اللي جمعت خالد الصاوي مع باسم سمره دي اثرت في قوي بالرغم من انهم ما اتجمعوش غير في لقطتين بس واللقطتين ما كانوش بالقوة دي

بس اللقطيتين برضه وباسم سمره عامل صعيدي .. وخالد الصاوي بيقنعه بمنطقه برضه

ولا ايه؟؟؟؟



سلاموووووووووز

Soooo يقول...

مروة الزارع

ازيك يا بنتي وعامله ايه
يابنتي انا كلي مواهب اصلا
علمك علمك علمك .. انا اجدع واحد يمشي عالحبل وهو مغمض عينيه .. بس حطيلي الحبل عالارض وخدي بايدي امشي على الحبل

يعني احنا برضه عالم مش سهله
نياهاهههههههه




سلاموووووووووز

Soooo يقول...

ايوية

يابنتي المشكله ان المتحكمين في العمليه الفنيه السينيمائيه هم منتجين ابعد مايكون عن الفن .. وبيلعبو بناءا على نجاح بعض الشخصيات زي سعد الصغير وتامر حسني والاشكال دي

وممكن فعلا تكون بداية ظهور موضة الترتر والمكرمش نتيجة ان مصمص الازياء لبس اللبس بتاع اخته وكام واحد شافو اللبس ده قامو قالوله حلو واتريقو عليه واشتغلوه
قام مصمص الازياء حلف مية يمين لازمان ولابد يخليها موضه
وكان اللي كان

تصدقي فعلا قصه حلوة



سلامووووووووووز

Soooo يقول...

ghalia

الله يكرمك ياستي ويكتر خيرك على تعليقك الجميل ده

وانا اسف جدا اني مقصر في حق متابعتي وتعليقي على مواضيعك بس زنقة الشغل والحياه والله هي اللي مانعاني

وكل سنه وانتي طيبه وعقبال مليون سنه يافندم
بس هو مناسبة زي عيد ميلادك بيشربولها قهوة ساده؟؟؟

انا عايز سحلب



سلامووووووووووز

Soooo يقول...

زُمُرده

الى زمرده المتمرده
اللي في الشعر متفرده
وفي الشقاوة متنمرده
تعليقك عندي مرتين
بيخليني اقول كده رضا


مش عارف ماشيه ولا مش لايقه
بس اهو على قدي


سلاموووووووووز

Soooo يقول...

Eman Eltaher

ياااااااااااااااااااه
طب والله ليكي وحشة يا ايمي
بجد والله مفتقد تعليقك عندي ومتابعتك لي ولمدونتي
واعتذر يافندم عن تقصيري واوعدك اني ان شاء الله اتابع مواضيعك واعلق عندك زي مانتي بتنوريني بتعليقك هنا



سلامووووووووووز

Soooo يقول...

د/اجدع بنوته

الله يكرمك دنيا واخره يارب
انا ياستي ولا ناقد ولا حاجه
الحكايه ومافيها اني قلت اللي حسيته مش اكتر
وبعدين انا ماحرقتش حاجه ماتتهمينيش ظلم
ولو عايزه تروحي تشوفيهم روحي .. مش يمكن تلاقي ان كلامي بعيد عن الواقع ومش منطقي ولا من نفس وجهة نظرك


سلاموووووووووز

Soooo يقول...

ra7eel

يا قهلا ياقهلا
بصي بقى ياستي
كل واحد بيشوف حاجه معينه في اي حاجه في الحياه
يعني انتي مثلا ممكن تكوني بتهتمي بالطبيخ والاكل فتعرفي من اول معلقه اذا كان الرز ده شايط ولا مظبوط ولا ناقص سوا
هي كده تمام
انا باحب السينما وعشان كده باهتم بكل تفصيله في الفيلم اللي باتفرج عليه
مش عشان اطلع القطط الفطسانه ولا حاجه
بس عشان انا حابب ده
فهمتي ياستي؟؟


سلاموووووز

Soooo يقول...

سهر الليالى

منوراني يا سهر ومنورني تعليقك الحقيقه
والحمدلله ان الموضوع عجبك

وحاضر يافندم جاري متابعة الموضوع اللي نزلتيه وسأرد عليه ان شاء الله حالا


سلاموووووووووز

Soooo يقول...

shayma


الحمدلله ان الموضوع عجبك واني شجعتك انك تشوفي الفيلمين
ومنتظر رأيك عليهم بعد ماتشوفيهم ياستي

وبالنسبه انك ضحكتي على ملاحظاتي .. اضحكي ياستي براحتك
الضحك ده نعمة من ربنا .. وربنا يديمها نعمه يارب


سلاموووووووووز

Soooo يقول...

Rain man

اهلا بيك يافندم في مدونتي المتواضعه واتمنى انك تعتبرها مدونتك تمام وتشرفني بتعليقاتك دي دايما

وعلى فكره .. انا ماحرقتلكش ولا فيلم منهم من ناحية القصه والحبكه الدراميه لو ده قصدك
انا اتكلمت عن نواحي تانيه في صناعة الفيلم
والنواحي التانيه دي مستحمله انها تعجبك او تعجب غيرك .. او ماتعجبكش ولا تعجب غيرك
وكل واحد وليه وجهة نظر
ولا ايه؟


سلامووووووووووز

Soooo يقول...

L.G.


بتختفي تختفي وبعدين تظهري مره واحده
انتي فينك يابنتي وفين تعليقاتك ومواضيعك
طب والله ليكي وحشه

اما بالنسبه لتعليقك فانا هرد على نقطه واحده بس واللي هي موضوع تسقيط البنطلون
انا فعلا كنت سمعت حد بيقول ان الموضوه دي نتيجة لان الزنوج لما كان بيدخلو السجن ماكانش بيبقى في بنطلونات على قد طولهم فبيجبولهم بناطيل واسعه عشان بنيتهم الجسمانية .. ونتيجة لده الحجر بيبقى واسع وبالتالي الوسط بتاع البنطلون بيبقى ساقط


وياريت تفضلي تشرفيني بتعليقك عندي دايما


ملحوظه
محمود عبد المغني هو اللي كان طلع مع علاء ولي الدين في فيلم عبود عالحدود .. اللي كان عامل دور العسكري الصعيدي اللي عنده مبادئ ورفض انه يساعدهم في حرق محصول البانجو اللي كانو بيحرسوه




سلاموووووووووووز

الشنكوتي الكبير يقول...

ايه ده انت يا جدع بتاع ديكور ولا ناقد
ما علينا
انا لسه ماشوفتش اي من الفيلمين بس انا بحب قوي اسمع النقد اللي عن الفلام قبل ما اشوفها لأن بحس اي بتفرج وانا فاهم وعارف ايه اللي عايز اركز عليه
واعرف هل انا هيكون رايي من رأي الناقد ولا انا ليه وجهة نظر تانيه
عجبني ترتيبك قوي للكلام
وانك مش بتحرق الأحداث
اما عن الملاحيظ الأخيره
انا فطست من الضحك اصلك جيت على الجرح انا هافرقع من اللبس الروش ده
خصوصا الترتر والأندر وير
حاجه تكسف والله
لما الراجل يلبس ترتر العالمه والرقاصه هتلبس ايه وهي بترقص
وبعدين ايه المتعه اننا نعمل زي السود الأمريكان في فكرة تسقيط البنطلون ونعري الحته الطريه لامؤاخذه يعني
ما علينا انا دخلت فيلم حين ميسره وبرغم اعتراض الناس كلها على ان المشاهد سافله قوي الا اني بصراحه عجبني الفيلم جدا وخرجت منه دماغي بتلف من كتر ما عجبني
ابقى شوفه وقلي رايك يهمني اسمع نقدك ليه

سلاااااااااااااااااام

wa7dania يقول...

ياااااااااااااااااه
ده أنات فاتني منك كتيييييييييير
معلش
امتحانااااااات و بعديها سفر
و.....هعيط بأى
منى

L.G. يقول...

ازيك يا سووو شفت فيلم خارج على القانون وشايفة انه بصراحة أي كلام وانت جبرت بخاطرهم جامد في التقييم والفيلم مافيهوش غير هادي خفاجة وأخوه فادي خفاجة والكبير طبعا تربية محمد صبحي في يوميات ونيس وأكيد ادي خبرته لأخوه عشان كده الولد الصغير ممتاز بعد كده الفيلم أي كلام والتصوير الكاميرا بتتدحرج في ايد المصور
لما أشوف الجزيرة سأوافيك بآخر الأنباء
سلاموووز