(14)مذكرات طفل .. طخين

!! المحطة الاربعتاشر .. أكله خفيفه
------------------------------

بعد ما قعدنا انا والامين خالد صالح في اوضته واتكلمنا شويه وقاللي انه عايزني اساعده في القضاء على الحراميه الكبار .. وساعتها استغربت من المنطق اللي هو بيتكلم بيه
رحنا انا وهو مشوار صغير .. اتمشينا بالبوكس وعدينا على كام فرن عيش بلدي .. وكنت باشوف الطوابير وابقى مستغرب الناس دي كلها واقفه ليه .. ده حتى العيش نفسه بيبقى ملدن وماينفعش يتعمل شندوشتات .. لكن مش مهم استغرابي ولا اندهاشي من ان العيش ملدن ومايتاكلش .. المهم الناس دي كلها بقت بتقف طوابير ازاي على غفله .. انا فاكر اننا من سنه ولا سنتين ماكانش في الطوابير دي خالص .. كان في طوابير اه .. بس مش كتير كده ومش بالشكل ده .. ومش طول اليوم .. كان الطابور بيبقى وقت الغدا ولا وقت الفطار الصبح .. مش طول اليوم زي دلوقتي .. وكمان العيش كان بيطلع احسن من الشكل الغريب اللي بيطلع بيه دلوقتي .. شكلا وطعما .. وفي وسط مانا بافكر مع نفسي وباتكلم معاها .. لقيت خالد صالح بيقولي
خالد صالح : آخر تحرياتنا بتقول ان اكتر من الف وخمسمية فرنه بتبيع الدقيق المدعم اللي بيجيلها في السوق السوده
سوووو : طب ومابتقبضوش عليهم ليه مادامت تحرياتكم بتقول كده
خالد صالح : في القضايا اللي زي دي مش مهم اننا نقبض على صاحب فرنه ولا اتنين .. المهم اننا نعرف مين ورا السرقه دي كلها
سوووو : والله يابو خللود انا مش فاهمكم .. منين مش مهم تقبضو على صاحب الفرن .. ومنين هتعرفو اللي ورا السرقه دي كلها
خالد صالح : - وهو ينظر لي بابتسامه - هنا يجي دورك يا سوووو .. هنا بيظهر معدن ولادك يا مصر
---------
دخل الحارس على ابويا وامي عشان يحطلهم الاكل .. وفك الكمامه اللي على بؤ ابويا واللي على بؤ امي .. وحط الاكل قدامهم في صينيه متغطيه بورق جرايد .. ولسه هيقعد يأكلهم بنفسه قام ابويا قاللو
ابويا : بقولك ايه .. ماتفك ايدنا واحنا هناكل بنفسنا
الحارس : لا والنبي .. عشان الاقيكم بعد كده تروحو هربانين والبس انا اسود
امي : - باندهاش - يابني من آمنك لم تخونو ولو كنت خاين
الحارس : - بعد لحظة تفكير - يعني لو فكيت ايديكم مش هتعملو حاجه كده ولا كده ؟؟
ابويا : يابني احنا ناس محترمين .. مش بتوع خناقات ولا مشاكل
بعد ان اقتنع الحارس بمنطق امي وابويا قام بفك وثاق ايديهم .. على ان يعود لربطهم بعد ان ينتهو من الاكل .. واكتفى بربط رجليهم في رجل الكراسي اللي قاعدين عليها .. وبعد ان قام بذلك .. قرب صينية الأكل لهم ووضعها على ترابيزه صغيره .. ولكن ما ان رفع ابويا ورق الجرايد اللي مغطيين بيه الاكل حتى اندهش ونظر للحارس وقال
ابويا : يابني انتو بقالكم يومين بتجيبولنا أي اكل والسلام
الحارس : احمدو ربنا اننا بنعبركم وبنجيبلكم اكل اصلا
امي : يابني ده اللي بيسقي كلب بيدخل الجنه .. مابالك باللي بيأكل اتنين مخطوفين عند شوية كلاب
الحارس : - بعد لحظة تفكير تانيه - طب وانتو بقى عايزين تاكلو ايه ؟؟
ابويا : يعني .. أي أكله خفيفه
الحارس : زي ايه مثلا ؟
امي : فتة موزه
أبويا : طاجن باميه باللحمه الضاني
امي : برام رز معمر باللحمه البتلو
ابويا : رقاق باللحمه المفرومه ومتسقي في شوربة بط
الحارس : - منزعجا - حيلكم حيلكم .. انتو فاكرين (بلبع) بتاع اسكندريه هو اللي خاطفكم ؟؟
امي : ومش هنوصيك عالسلاطات
-------
بعد ان حكى توفيق عبد الحميد لمصطفى شعبان ومنى زكي ماقد حدث معي وما قاله الامين خالد صالح لي .. استغرب مصطفى شعبان كما استغربت انا من قبل من التغير المفاجيء في سلوك خالد صالح ورغبته في مساعدتي له في القبض على المجرمين الكبار .. لكن توفيق عبدالحميد قال
توفيق عبد الحميد : ومين قالكم انه عايز سوووو يساعده فعلا؟؟
مصطفى شعبان : مش ده الكلام اللي هو قالو ؟
منى زكي : وحضرتك يا توفيق بيه اللي قلت انه قال لسوووو انه عايزه يعمل حاجه لمصر
توفيق عبد الحميد : الامين خالد صالح من اكتر امناء الشرطه الاذكياء .. بيعرف عن طريق علاقاته امتى معاد الظبطيه اللي بتعملها الادارة على المجرم .. وبيبعت مجرمين يعرفهم عشان يخلصو عالمجرمين قبل ما يتقبض عليهم
مصطفى شعبان : طب وهو ايه مصلحته في كده ؟
توفيق عبد الحميد : مصلحته انه ياخد جزء كبير من الممنوعات اللي بيتاجر فيها المجرمين دول ويصرفها بمعرفته .. ويسيب جزء عشان يبقى فعلا المجرمين دول في نظر القانون بيتاجرو في الممنوعات
منى زكي : وياترى هو شايف ان سوووو ممكن يساعده في الموضوع ده ازاي ؟؟
مصطفى شعبان : بالظبط .. سوووو مالوش في أي حاجه اصلا .. ده حتى ماعرفش يجيبلنا طبق البليله اللي طلبناه منه
توفيق عبد الحميد : ماهو عشان كده .. يبقى لازم نبقى قريبين من سوووو عشان الامين خالد صالح مايئذيهوش
منى زكي : مظبوط .. بس ازاي؟؟
يقف مصطفى شعبان كمن وجد طريقه لتنفيذ ما قاله رئيس الجهاز
مصطفى شعبان : - وهو مبتسم - انا هقولكم ازاي
--------
بعد ما شفنا منظر افران العيش واستغربت من كلام الامين خالد صالح ورغبته في اني اساعدهم في القبض على اصحاب الافران اللي بيبعو الدقيق المدعم والناس اللي وراهم واللي بيشترو منهم الدقيق .. جه موبيل لخالد صالح وزي مايكون حد بيبلغه ان في حاجه مهمة حصلت .. قام متحرك بالبوكس ورحنا على مكان غريب قوي .. مخزن في منطقة مش عارف هي فين .. الجو كان هادي .. دخلنا جوه لقيت في كراتين مترميه يمين وشمال .. زي مايكون المكان موقع لمعركة حربيه .. بابص يميني لقيت ناس زي مايكونو مقتولين .. استغربت وخفت قوي لكن مسكت نفسي وعملت نفسي مولود في اقاصي الصعيد ومتعود على رؤية الجثث وباقتل كل يوم عالصبح سبعه تسعه ستاشر واحد .. لما الامين خالد صالح بصلي ولمح في الارتباك قاللي بصوت هادي
خالد صالح : دول شوية عيال مجرمين .. وخلصو على بعض
سوووو : طب وجايبيني ليه مادام خلصو على بعض ؟؟
خالد صالح : - مبتسم بمكر وعينيه بتلمع - عشان تبقى عارف ان ممكن يحصلك كده لو مانفذتش كل اللي هقولك عليه بالحرف الواحد
-------
يتبع

سوووو

وحشتيني

الله يرحمك يا أمي .. وحشتيني .. وحشتيني قوي

(13)مذكرات طفل .. طخين

المحطة التلتاشر .. انت مين ؟؟؟
-------------------------

الحقيقه الاخوه العساكر قامو معايا بالواجب وزياده .. جابولي باقي الاكل اللي كلوه الظباط وكان بواقي كباب وكفته وطرب من ابو شقره .. وبعد ماكلنا انا وهم في اوضة الخدمات بتاعة المديريه علقو على براد الشاي وشربنا شاي مع بعض وكانو ناويين يشربوني سجاير لكن انا قلتلهم اني لسه طفل ومايصحش اشرب سجاير والا اللي بيقرو القصه هيفقدو المصداقيه في ويحسو اني عيل متشرد .. لكن الصول الكبير بتاعهم اداني علبة سجاير كولوباطرا بوكس من ام تلاته جنيه اللي مش عليها صورة الفشه البايظه من كتر شرب المعسل .. وقاللي ابقى اشربها في السكرته بعدين من غير ماحد يشوفني من اللي بيقرو المذكرات .. وبمجرد ما كلنا وشربنا الشاي راحو واخدينني فوق على اوضة الامين خالد صالح اللي كان قاعد على مكتب وبيقرا في شوية ورق .. ولما شافني شاورلي اقعد عالكرسي اللي قدامه .. والعسكري اللي كان معايا خد بعضه وخرج من الاوضه وقفل الباب وراه
خالد صالح : - وهو بيقرا في الورق - ازيك دلوقتي يا سوووو
سوووو : - وانا مستغرب - هو انت عرفت اسمي منين ؟؟
خالد صالح : - وقد رفع رأسه وانتبه لي - مافيش حاجه هنا ماعرفهاش
سوووو : - وقد اعتراني الخوف قليلا - وياترى تعرف عني ايه كمان ؟
خالد صالح : - وهو يقوم من على كرسي المكتب ويتجه للكرسي المقابل لي ويجلس امامي - اعرف انك بتحب بلدك .. وعايزلها الخير
سوووو : - وانا اتحاشى النظر في عينيه مباشرة - عايزلها الخير ازاي؟
خالد صالح : انت مش قلت ان العساكر اتشطرو على واحد غلبان .. وسابو الحراميه الكبار ؟
سوووو : - بتردد - اه .. حصل
خالد صالح : - وهو يميل بجسمه ويقترب مني - وانا زيك كده تمام .. مش باحب الحراميه الكبار .. وعايزك تحط ايدي في ايدك عشان نمسكهم كلهم
اندهشت من نبرة كلامه .. فلقد شعرت انني امام شخص آخر .. أكثر نبلا من مجرد امين شرطه يمارس سلطته للثراء السريع عن طريق بيع سيديهات الويندوز المضروبه .. واندهشت اكثر عندما وجدته مادا يده لمصافحتي .. فقلت له بدهشة كبيره
سوووو : انت مين ؟؟؟
خالد صالح : - وهو يبتسم - انا بابا يله
-------
مصطفى شعبان : يعني الخاتم اللي لابسه سوووو .. فيه جهاز تتبع؟؟
أخبر توفيق عبد الحميد كل من مصطفى شعبان ومنى زكي انه يعرف موقعي بل ويسمع كل الاحاديث اللي قلتها والتي قيلت امامي عن طريق وجود مايكرفون لاسلكي وجهاز تتبع في فص الخاتم الذي البسوني اياه في مركز التدريب
توفيق عبد الحميد : مش الخاتم بتاع سوووو لوحده .. كل خواتم الجهاز فيها الحوار ده
منى زكي : - بقلق وخوف - يعني انتو بتسمعو كل حاجه كل حاجه ؟؟
توفيق عبد الحميد : لا ماتقلقيش .. مش بنسمع حواراتك انتي وحلمي من الخاتم
منى زكي : - بارتياح - طب كويس
توفيق عبد الحميد : - مستدركا - حلمي بيسجللك بمعرفته وبيجبلنا الشريط صوت وصورة تاني يوم
مصطفى شعبان : - وهو ينظر لمنى شذرا - احنا في ايه وانتي في ايه يا منى .. المهم دلوقتي عايزين نلحق سوووو
توفيق عبد الحميد : ماتقلقش .. هنلحقه في الوقت المناسب .. لما يساعدنا في المهمة الجديده
-------
أنا باكره اسرائيل
واقولها لو أتسأل
انا بكره اسرائيل
لو اخش المعتقل
سونيا : - وهي ترد عالموبيل - الو يا بوص
الصوت : - مندهشا - الو يا بوص .. وش كده أول حاجه تقوليها الو يا بوص ؟؟؟؟؟؟؟؟
سونيا : - باستغراب - مش البوص معايا برضه؟؟؟؟
الصوت : طب فرضنا ان الموبيل بتاعي كان ضايع وحد لقاه وراح ضارب آخر نمرة انا متصل بيها عشان يعرف مين صاحب الموبيل ويرجعلو الموبيل لو لقى انه فقير وغلبان وجايب العدة قسط .. وبعدين راح سمعك وانتي بتقولي الو يا بوص .. تفتكري هيعبرني بعدها ولا هيرجعلي الموبيل .. ده اقل واجب هيبيع الموبيل مبلول في شارع عبعزيز
سونيا : - وهي متنحه - طب وانا اعمل ايه دلوقتي يعني ؟؟
الصوت : ماتعمليش ياسونيا .. ماتعمليش .. مانا هموت منكم ناقص عمر في الشغلانه الغبره دي .. المهم .. انتي مش كنتي قولتيلي ليكي حد قريبك شغال في الجمرك ؟؟
سونيا : آه .. ابن عمة ابويا .. يعني في مقام عمتي بالظبط .. اشمعنا يعني يابوص ؟؟
الصوت : لا مافيش .. بس الواد ابن اختي راجع من دبي بعد بكره وجايبلي معاه لاب توب .. قلت نوصي عليه برضه عشان مايخنقوش عليه في الجمارك
سونيا : لا ماهو اللاب توب مسموح بيه من غير جمارك ولا حاجه يا بوص
الصوت : لا ياشخيه .. طب فل قوي .. هخليه يجبلي معاه كام لاب توب تانيين وهو جاي
سونيا : يا بوص ماينفعش .. هو مسموح ليه بلاب توب واحد بس .. ويعدي بيه عادي من غير أي تفتيش حتى
الصوت : ايه الهطل ده .. لاب توب واحد بس .. ومن غير تفتيش .. طب ماهو ممكن يكون مهرب جواه هيروين .. ويبيعهم هنا ويخدر الشعب ويجيب بدل اللاب توب عشره
سونيا : - وهي ترفع حاجبيها من الدهشة - والله هو ده النظام يابوص
الصوت : أنا فهمت دلوقتي بس البلد دي هتفضل متخدره طول عمرها ليه
--------
يتبع

سوووو

!! سوووو اتشتم .. بالانجليزي

داخل ولا بي ولا علي اتابع التعليقات بتاعة الناس اللي بتقول رأيها في اللي باكتبه .. اقوم الاقي تعليق جايلي بالانجليزي بيقول التاتي

------

غير معرف يقول...
i ve visited ur blog more than once just to figure out what it is about then at last i figured out that i wasted my time, the country is experiencing a turning point man and u r writing this shit? what is the purpose of these posts, u r no artist, no good writer, u have no style and talking about silly things and i dont mind being silly if u have an artistic style or at least a nice sense of humor but u dont plus: damak te2eeeeeeeel

why dont u find urself something useful to do

------

قريته مره تانيه لقيته نفس الكلام

!!!

قلت بس .. انا هقراه مره تالته كمان يمكن ما اكونش فاهم حاجه كده ولا كده

وسبحان الله .. قريته للمره التالته لقيته نفس الكلام برضه

سبحان الله يعني

ولكاتب هذا التعليق اسمحلي اني افند كلامك وتعليقك نقطه نقطه وجزء جزء

-----

غير معرف يقول...

اول كلامك هروب .. لانك لو ماكنتش خايف من كلامك كنت على الاقل كتبت اسمك بدل مانت بتتستر ورا كيان بنقول عليه بالبلدي .. اللي مايتسماش

-----

i ve visited ur blog more than once just to figure out what it is about then at last i figured out that i wasted my time,

الترجمه : لقد زرت مدونتك أكثر من مره لمجرد فهم ما تتحدث عنه وأخيرا اكتشفت قد أضعت وقتي

لا ياشييييييخ .. لاهو انت شغال في مجلس الوزرا واتخاذ القرار ووقتك ثمين للغاية كده .. طب لو انت وقتك مهم جدا زي مابتقول .. ضيعت وقتك ليه في كتابة التلعيق وهتضيع وقتك عشان تشوف ردي عليك

وانا متأكد انك هاتيجي تاني لانه في مثل قبيح بيقول .. العلـ. بتجيبه طيـ.ه

-----

the country is experiencing a turning point man and u r writing this shit?

الترجمة : البلد تختبر نقطة تغير يا رجل .. وانت تكتب هذا الخرا

ويالها من كارثه .. ياللهول .. نعم يا فتى انا اكتب هذا الخرا .. وهذا الخرا افضل من من أفضل ماتكتبه انت يا رجل .. عليك اللعنه

!!! ايه الفيلم الانجليزي اللي مترجم حرفيا اللي وقعت فيه ده

ولو البلد فعلا بتمر باختبار وتجربه جديده .. يبقى سيب الافكار الجديده تعبر عن ثورتها وعن رأيها .. ولا هو كل المدونات لازم تتكلم عن حزب الغد والاخوان المسلمين وكفاية والحزب وطني .. طب ده في مدونات بتتكلم عن الموضه وعن الديكور وعن الاكل .. وعن السكس كمان

-----

what is the purpose of these posts,

الترجمة : ماهو الغرض من الموضوع الذي طرحته ؟

والله مش ذنبي انك حمار ومش عارف تقرى مابين السطور ولا شايف اني بانتقد الحياه اللي احنا فيها من خلال طفل طخين بيتعرض للحوارات دي .. ولا تكونش انت اصلا مسلوع وبتحقد على الطخان الكلابيظ اللي زي حالاتي ؟؟؟

-----

u r no artist,

الترجمة : انت لست بفنان

والله يا حيلتها انا لما درست الفن في الكليه وانا اصلا خريج كلية فنيه وخريج كلية فنون تطبيقيه وخدت دراسات حره في السيناريو وفي الاخراج المسرحي والسينيمائي وفي مجالي كمهندس ديكور .. قالولنا ان الفن ككلمة لا تعريف له

ولكن الفلاسفه اجمعو على ان الفن هو الشيء الذي يعمله الانسان بالفطره وبالموهبه ويلاقي استحسان الناس .. وعندها يقال لهذا الانسان انه فنان من وجهة نظر من استحسن أفعاله وأعماله

يعني تخيل بقى يا حيلتها ان واحد زي عبد الباسط حموده المطرب الشعبي الشهير ولا احمد بليه ولا محمود الليثي المطربين الشعبيين العشوائين طول مافي ناس بتحب تسمعلهم يبقو دول فنانين من وجهة نظرهم .. واللي بيقدموه بالنسبه ليهم فن .. والحمدلله اللي باكتبه بيلاقي استحسان بعض الناس وبيشجعوني عليه

-----

no good writer,

الترجمة : ولست بكاتب جيد

والله يا غير معرف يا اخويا .. ولا بلاش اخويا دي عشان انت محروق منني وممكن تقتلني بالليل لو احنا اخوات ونايمين في بيت واحد .. والله يا غير معرف ياللي انت مش اخويا والحمدلله على كده .. مفهوم الكتابه نفسه كمفهوم اختلف على مر العصور .. اقرى حاجات البحتري والمتنبي وابن القيم و قارنها بحاجات عباس العقاد وتوفيق الحكيم ونجيب سرور وصلاح جاهين وقارنها بحاجات يوسف عوف ويوسف معاطي وقارنها بحاجات نبيل فاروق واحمد خالد توفيق وقارنها بحاجات بلال فضل وعمر طاهر - وانا لا بقارن نفسي بدول ولا بدول وما اجيش حاجه جنب كتاباتهم ولا فكرهم - وانت هتلاقي ان كل وقت وليه ادان .. مش ذنبي بقى انك متخلف وعايش في العصر الحجري ومش راضي تقتنع بوجوب التغيير في المفاهيم الكتابيه .. ولا اه صحيح نسيت .. انت تلاقيك مستني اللي يغيرلك

-----

u have no style and talking about silly things

الترجمة : بل انك ليس لك اسلوب في الكتابه عن الاشياء التافهة

لو تغاضينا عن ان اللي باكتبه من وجهة نظرك تافه ولا يرقى لمستواك الفكري والفلسفي .. وتغاضينا برضه عن انك شخصيه يالهوي يالهوي يالهوي وياما هنا ياما هناك ووسع ياعم انت وهو سعادة غير معرف وصل وبيقول رأيه المهم .. هنتغاضى عن كل ده وهنمسك في الاسلوب

مش يمكن عدم وجود الاسلوب هو نفسه اسلوب .. مش ساعات بتشوف واحد ماشي في الشارع ولابس قميص عادي وبنطلون عادي وجزمه عاديه وماشي عادي .. مش يمكن ده احسن من انه يمشي عريان ولا انت عايزه مايمشيش من الاصل بما انه عادي

بقولك ايه .. ماتوريني انت اسلوبك يابو الاساليب يا محنك

-----

and i dont mind being silly if u have an artistic style or at least a nice sense of humor

الترجمة : وأنا لا اعارض السخافه اذا كان لك اسلوب لاذع او على الاقل حس كوميدي جميل

بص يا حيلتها .. زمان لما عِلي نجم عادل امام وعِلي قوي .. طلع محمد صبحي وقالوله محمد صبحي هيمسحك .. ولما طلع احمد آدم قالو لمحمد صبحي احمد آدم هيمسحك .. ولما طلع نجم هنيدي قالو لآدم هنيدي هيمسحك .. ولما طلع محمد سعد قالو لهنيدي سعد هيمسحك .. الواقع بقى ان ده شغال وليه جمهوره وده شغال وليه جمهوره وده شغال وليه جمهوره .. مش ذنبي بقى انك مش من جمهوري وانك شايفني ماليش لازمه

ياعمنا ورينا انت اعمالك اللي واخده جايزة نوبل في الاداب وجايزة اوسكار احسن مؤثرات صوتيه

بس ماتكون مؤثرات صوتيه بريحه عشان انا باقرف

-----

but u dont plus: damak te2eeeeeeel

الترجمة : ولكنك لست كذلك اضافة على ان دمك تقييييييييييييل

حتة اني (لست كذلك) .. راجع الجزئيه السابقه وانت هتفهم .. اما بقى حتة ان دمي تقيل .. فدي مش شتيمه على فكره .. دي صفه .. وكل انسان ليه قبول .. والقبول هو اللي بيحدد اذا كان شخص دمه تقيل بالنسبه لشخص بينما ممكن يكون دمه خفيف بالنسبه لشخص تاني .. والقبول ده بتاع ربنا وانا ماليش فيه زي مانت مالكش فيه ان في ناس بتقرى كلامي وبيعجبها وشايفه ان دمي ممكن يكون خفيف من وجهة نظرهم

ولا انت معترض على ارادة ربنا وانه حط قبول لكلامي من وجهة نظر .. اعترض بقى على ارادة ربنا

-----

why dont u find urself something useful to do

الترجمة : لماذا لا تبحث عن شيئ مفيد لتفعله ؟

وانت مال اللي يعرفوك ياعم .. انت مالك ادور على حاجه مفيده ولا ما ادورش .. انت جايلي في مدونتي ومش عاجبك كلامي وبتتكلم وبتشتم .. ماتغور في اي مدونه تانيه يابهيم .. سوري اني باشبهك بالبهايم لان البهايم احسن منك والله .. انت غريب قوي .. داخل بيتي وقاعد فيه من غير ماتعرفّني انت مين وبعد ما دخلت وقعدت وكلت وشربت جاي تقولي اكلكم وشربكم وحش ده غير ان بيتك مش شيك وذوقك وحش .. طب وانت اصلا مين وجهلك دعوة تدخل بيتي ولا مدونتي اصلا .. اما انك سافل وقليل ادب صحيح .. لو لقيتني باضيع وقتك الثمين من اول سطرين لقيت اني باكتب حاجات هبله غور على اي مدونه تانيه ولا قوم اشتغل في حاجه مفيده وعمّر الوطن وغيّر نظام الحكم واقلب الدنيا بدل مانت جاي تتكلم وتعلق وضيعت وقتك

وعلى فكره

انا عارف انك هاتيجي تاني .. وعارف انك مستني تشوف رد فعلي .. لكن احب احذرك .. انا لساني اطول من اي لسان فيكي يابلد

وسهل جدا اني اجيب سلسفيل اهلك من اول ما اتولدو لاخر واحد فيهم .. لكن انا مش هعمل كده .. مش عشان انا محترم ولا عشان خايف منك .. لا .. عشان لو قلت كلمة تانيه هاديك بشبشب الحمام على بؤك وعلى بؤ كل اللي يتشددلك مهما كان هو مين .. فاهمني يا حيلتها

------

--------

شوية ملاحيظ في السوكومونس

اكتر حاجه بسطتني في حوار الاهبل اللي علق ده اني حسيت اني نجم بجد .. اه والله فرحت لما لقيت ان في ناس بتتكلم وبتضيع وقتها عشان تقوللي رأيها ده لو عندها رأي اصلا .. حسيتني حاجه كبيره والغرور ركبني .. شكلي بعد كده هعمل دخول مدونتي بفلوس .. الواحد عايز قرشين يشتري بيهم شاليه في مارينا واحنا داخلين على صيف

-----

شكرا لكل واحد اتحمق ودافع عني .. وشكرا لكل واحد ما اتحمقش ولا قال ربع كلمة

والمثل بيقول .. اعرف صاحبك وعلّم عليه

وانا دلوقتي بس عرفت مين هم صحابي

سوووو

(12)مذكرات طفل .. طخين

المحطه الاتناشر .. هي سايبه !؟؟
-----------------------

خالد صالح : اوعو تكونو فاكرين ان البلد سايبه .. البلد فيها حكومه .. والحكومه دي هي انا
قال الامين خالد صالح هذه الجمله وهو يتمشى بيننا في التخشيبه وكأنه اسد في عرينه .. كان بحق امبراطورا على مجموعة من المجرمين الأبرياء الذين ساقهم حظهم العاثر في وجهه .. وكانت كل جريمتهم انهم فاتحين انترنت كافيه .. من غير سيديهات اصلي

خالد صالح : انا عايزكم تفهمو كويس اني ماحبش حد يسرقني ويستعماني .. عايزين تاكلو عيش ماقلناش حاجه .. عايزين تتجوزو خير وبركه حلال مش هقدر احرمه .. انما ماتدونيش حقي اقفلكم واقول ستوووووب .. ده اللي مالوش خير في خالد .. مالوش خير في مصر

شدتني عبارته الاخيره للغاية .. خصوصا بعد ان عرفت من احد رفقاء الزنزانه ان خالد صالح واخد كورسات اوفيس واكسيل وكمان خريج حقوق وكان نفسه يترقى لظابط .. ولما ماعرفش يترقى نتيجة رفض وزارة الداخليه لقبول كل امناء الشرطه واللي معاهم ليسانس حقوق واللي بقو اكتر من الظباط الحاليين .. اشترى جهاز كومبيوتر ورايتر وبقى بينسخ سيديهات ويبيعها للناس .. لكن للأسف الناس اللي اتمسكو النهارده وانا معاهم ماكانوش مشترين سيديهات من عنده عشان بيبيعها غالي .. بيبيعها بسعر السيديهات الاصليه .. وبيتحجج بانه بيحميهم ومش هيخلي بتوع المصنفات يتلككولهم ولا يهوبو ناحيتهم
خالد صالح : - ناظرا لي - وانت ياد يا طخين
-------
خرجت سونيا من الغرفة اللي قاعدين فيها هي وسامبا بعد ماعرفت تشحن الكارت ابو عشره جنيه .. وفي أثناء ماهم خارجين وماشيين جنب الغرفه الملاصقه لغرفتهم - واللي كل مره تعدي قدام بابها تبقى عايزه تفتح الباب لكن في حاجه بتمنعها خصوصا بعد ماتبص لسامبا تلاقيه بيؤكد لها انه يستحسن ماتفتحش الباب - ووقفت قدام الباب وحطت ايدها على الأُكره وهي مصممة انها تفتح باب الاوضه المره دي .. لكن سرعان ما شالت ايدها وانتابتها حالة بكاء بحزن .. وكادت ان تنهار وتقع على الارض لولا ان سامبها سندها من كتفها .. واستمرو في طريقهم خارج المصنع المهجور وهي بتتمتم بصوت واطي وكللو حزن وبتقول
سونيا : منك لله يا سوووو .. منك لله
---------
اترعبت لما سمعت صوت خالد صالح وهو بينادي علي في وسط التخشيبه .. لكن قلت في عقل بالي .. العمر واحد والرب واحد .. واستحمل يا سوووو مادمت عملت فيها السبع رجاله .. ورحت رادد عليه بصوت كللو قوه
سوووو : بس ماتقولش ياد .. طخين آه .. انما انا مش ياد
خالد صالح : - وهو يقترب مني - لا باين عليك واد جدع
انتشيت فخرا من كلامه .. ولو اني مش عارف يعني ايه انتشيت .. لكن انا حسيتني انتشيت
خالد صالح : - وهو يقترب مني الى ان اصبح مواجها لي - تقدر تقولي ايه اللي انت عملته ده في رجالتي؟؟
اقتربت منه برضه ومافيش حد احسن من حد .. ورحت رافع عيني في عينه وقلتله
سوووو : علمتهم الأدب .. ماهو مايصحش يستغلو سلطتهم ويتشطرو على حتة عيل غلبان .. وسايبين الحراميه الكبار
كانت كلمتي هذه بمثابة صدمه للأمين خالد صالح .. فلقد شعرت به وقد دخل في قلبه بعض الشكوك من أن اكون أحد العيال اللي بيقعدو على البورصه وبيطالبو بحقوق الانسان وبيعملو مظاهرات واضرابات وعايشين في الدور .. لكنه نزل براسه لغاية مابقى في مستوى راسي .. وقال بصوت واطي وهادي
خالد صالح : عارف لو كان كلامك صح .. يبقى انت فعلا عيل جدع
ورفع رأسه بسرعه واتجه خارج باب التخشيبه ولكن قبل خروجه نظر لأحد العساكر وقال له وهو ينظر الي
خالد صالح : شوفوله لقمه ياكلها .. وبعد كده خلوه يطلعلي فوق
--------
في مبنى الجهاز الامني رفيع المستوى .. دخل مصطفى شعبان ومنى زكي على رئيس الجهاز وكان يبدو عليهما التوتر والاضطراب
توفيق عبد الحميد : - وهو يلعب سوليتير عالكومبيوتر - خير يا ولاد .. في حاجه ؟
مصطفى شعبان : - يتكلم متلعثما - الحقيقه يافندم في مشكله
توفيق عبد الحميد : - وهو مستمر في اللعب على الكومبيوتر - اكيد مش زي المشكله اللي انا فيها
منى زكي : - وهي تتقدم خطوة في اتجاه توفيق بيه - الحقيقه يا توفيق بيه .. هي مشكله كبيره
توفيق عبد الحميد : - وهو ينظر اليهم بقلق ويقف من على كرسي المكتب - اوعي تقوليلي ان المرتبات نزلت وماحسبوليش الاضافي؟؟
مصطفى شعبان : لا يافندم لسه المرتبات مانزلتش
توفيق عبد الحميد : - وهو يتنفس الصعداء - يبقى أي مشكله تانيه تهون
منى زكي تشاور لمصطفى انه لازم هو اللي يقوللو ومصطفى بيزقها من كتفها عشان هي اللي تقول وهي بتشيل ايده من على كتفها وهو مستمر في زقها
توفيق عبد الحميد : - مقاطعا - في ايه يا جرعان ماتخلصونا في الليله دي
مصطفى شعبان ومنى زكي : - في نفس واحد وهم مخضوضين - سوووو اتخطف
توفيق عبد الحميد : - وهو يبتسم ويجلس مرة اخرى على الكرسي - ياسلام .. طب مانا عارف
--------
يتبع

سوووو

سينماتك .. وجوه جديدة

لأن السينما هي ايقاع الشباب .. او اغلب الاعمال بتعبر عن شباب كل جيل .. بالاضافه طبعا لوجوب تطعيم هذا النوع من الافلام بأفلام يقوم ببطولتها كبار النجوم لخلق نوع من أنواع التواصل الفكري بين الجيلين

----

المقدمة دي لازم تتقال طول مانا عايز اتكلم عن تجربتين سينيمائيتين قام ببطولتهم مجموعة من الشباب

اول تجربة هي فيلم كامب

والفيلم ده خنقني وقفلني زياده مانا كنت مخنوق ورايح عشان افك عن نفسي شويه

لا تمثيل ولا قصه ولا سيناريو ولا موسيقى تصويريه ولا تصوير ولا مونتاج ولا اخراج ولا اي حاجه في رغيف

وكل الناس اللي كانو داخلين معايا الفيلم وماعرفهمش رأيهم نفس رأيي وكانو عايزين يعملو ثورة على السينما مش عشان يرجعولنا فلوسنا .. لأ .. عشان يخلونا نطلع من السينما وفي داهية الفيلم

----

وخرجت للشارع تاني بعد ماخلص الفيلم وانا في قمة خنقتي والي زادت بطريقه بشعه .. لفت انتباهي بوستر فيلم ورقة شفره واللي كتب القصه والسيناريو بتاعه احمد فهمي اللي كتب فيلم كده رضا .. بس فيلم ورقة شفره ساعده في كتابة السيناريو هشام ماجد

وفي ناس ممكن تفتكر احمد فهمي و شيكو وهشام ماجد .. من فيلم قديم كانو عملوه وصوروه بكاميرا هاند كام .. كان اسم الفيلم رجال لاتعرف المستحيل

والفيلم ده بالنسبه للجيل بتاعنا احنا من مهتمين السينما ثورة صريحه واعلان مننا على التمرد على كل ماهو قديم وبالي في عالم السينما .. واللي اخرج فيلم رجال لاتعرف المستحيل شاب اسمه احمد عمرو

--------

افتكرت وانا على باب السينما وباقطع التزكرة ان في واحد قاللي ان الفيلم ده بيتريقو فيه على الافلام العربي زي ماهو باين من الاعلان بتاع الفيلم من افية احمد الفيشاوي لما بيقول

!!!! من النهارده مافيش لجنه .. انا اللجنه .. انا اللجنه

------

ولاني كاتب فيلم باتريق فيه على بعض الاكلاشيهات في السينما المصريه زي فيلم مافيا واللي مقتبس بعض الحاجات من الفيلم اللي كتبته وحاططها في المذكرات اللي بانزلها على المدونه حاليا .. وكنت في الفيلم بتاعي باتريق على افلام تانيه زي شمس الزناتي وناصر سته وخمسين وايام السادات وأبي فوق الشجره والخطايا ودعاء الكروان وشيء من الخوف وافلام تانيه كتير .. واللي قالي على فيلم ورقة شفره وقاللي اروح اشوفه هو احد المقربين لي واللي قرى السيناريو بتاع الفيلم اللي انا كتبته .. قلت يبقى خلاص بقى .. أمري لله .. ادخل اشوف الفيلم وعلى الله يرفع من روحي المعنويه شوية بعد الانتكاسه اللي انتكستها من الشيء اللي اسمه كامب .. وقطعت التذكره .. ودخلت فيلم ورقة شفرة

اعز انا الفيلم اللي يخطفني في اول مشهد .. والفيلم ده خطفني في اول مشهد خطفه عدالة قوي .. وبالرغم من قلة الامكانيات المتاحه قدام فريق العمل لكن تم تنفيذ المشهد بحرفيه شديده .. تقطيع كادرات هايل .. حركة كاميرا هايله .. موسيقا تصويره قوية .. ويبدأ الفيلم

-----

القصه والسيناريو بيلعبو في منطقه بدايتها عاديه جدا وتم تناولها في افلام كتير .. لكن عالجوها بطريقه جديده جدا وقوية جدا وكوميديه جدا جدا جدا

القصه والسيناريو والحوار .. لـ أحمد فهمي وهشام ماجد واللي بيمثلو في الفيلم ومعاهم شيكو .. والحقيقه هم فاهمين بعض حلو قوي .. من أيام فيلمهم بتاع زمان .. فيلم رجال لا تعرف المستحيل .. وده ادى الفيلم مصداقيه حلوة قوي في انهم اصحاب في الحقيقه قبل مايكونو اصحاب في الفيلم

تقييمي للفيلم من ناحية القصه والسيناريو والحوار .. عشره من عشره ولأول مره الاقي فيلم مصري بيتكلم في قضيه قويه جدا جدا ومن غير شعارات وهتافات واكلاشيهات مالهاش لازمه .. ومش هحرق الحبكة دي وهسيبكم تشوفو الفيلم بنفسكم وتحكمو براحتكم

------

من ناحية التمثيل .. اداء قوي ومبشر بمجموعة ممثلين هيكون ليهم دور في المستقبل .. ولكم ان تتخيلو ان اقل ممثل كان احمد الفيشاوي بالرغم من حالة الكوميديا اللي عملها .. تخيلو بقى ابطال الفيلم الاساسيين عاملين ايه .. العيال دي بجد بتمثل سينما بأداء بسيط وبعيد عن التكلف والمبالغه .. واللي كان بطلها في الفيلم .. للاسف الفنان الكبير محمد متولي اللي كان بيستظرف جدا وتقريبا حاول يجاري الممثلين من ناحية الكوميديا .. لكن هو بيمثل من مدرسه .. وهمّ بيمثلو من مدرسه .. وطبيعي ان مدرستهم تكون اقرب لقلوبنا باعتبار ان مشاهدين الفيلم معظمهم من الشباب ان ما كانوش كلهم .. تقييمي للفيلم من ناحية التمثيل .. تسعه من عشره

------

الموسيقا التصويريه .. خطرفت في الاول لما تقريبا مؤلف شريط المزيكا حط موسيقا قديمه او كلاسيكيه الى حد ما في اول احداث الفيلم في مابعد اول مشهد .. واللي ساعتها كانت مشاهد عاديه في الجامعه وكده .. لكن لحق نفسه وظبط الليله ومشي مع ايقاع الفيلم بعد كده .. تمانيه من عشره

------

التصوير .. اكتر حاجه مقرفه في الفيلم لما يكون كوميدي هي التصوير .. لأنه لازم يكون مكمل للإفيه او القفشه اللي بيقولها الممثل او اللي بتطلع من خلال مجموعة الممثلين .. لكن هنا المصور كان احساسه حلو قوي وفهم ازاي يظبط الافيه ويديلو حلاوة اكتر .. واهتم برضه بخلق زوايا تصوير جديده .. زي مشهد الخناقه في الاتوبيس بين الاتنين الصحاب والبوليس بيطاردهم .. وزي برضه مشهد البداية اللي زي ماقلت في الأول خطفني خطفه حلوة قوي .. وادي التصوير تسعه من عشره .. والواحد الناقص ده عشان ما اهتمش بجو الاقصر وأسوان واللي صورو فيه تقريبا نص الفيلم

------

الديكور .. حلو قوي قوي .. وكنت ملاحظ ان مهندس الديكور بينه وبين نفسه بيقول ايه يا جدعان كل دي لوكيشنز مطلوب منني اجهزهم .. لكن جهزهم وطلعو حلوين قوي ومعبرين قوي .. وتمت الاستفاده من بعض التأثيرات في الديكور زي جو العشه البوص اللي تم توظيفها في خلق تأثيرات بالضوء وتصويرها .. واديله عشره من عشره

------

المونتاج .. في الافلام الشبابيه عموما بيكون الايقاع سريع .. وفي فيلم كوميدي شبابي لازم يكون الايقاع اسرع .. وانا طول الفيلم ماحستش بلحظة ملل واحده بل بالعكس بعد ماخلص الفيلم كنت عايزه يطول شويه من كتر مانا مستمتع .. وادي المونتير عشره من عشره

------

الاخراج .. لـ امير رمسيس .. وهو نضج بطريقه حلوة قوي بعد اخر تجربتين ليه في السينما .. واللي هم فيلم آخر الدنيا وفيلم كشف حساب .. لكن في الفيلم ده بيقول انا بتاع كللو .. بس انتو ادوني خامة وورق حلو اقدر العب بيه وادوني ممثلين مجتهدين زي الممثلين اللي عملو الفيلم .. برافو يا أمير .. وبجد اتوقع ليك ولكل فريق العمل انكم لو استمريتو على المنوال ده في خلال اقل من خمس سنين هتخلقو حالة امتاع حلوة قوي

عشره من عشره يا امير .. ولو كنت معايا وشايف ابتسامة الناس وفرحتهم بالفيلم والجملة اللي سمعتها من اكتر من شخص وانهم اول مره يدخلو فيلم عربي ويستمتعو بالقدر ده .. انا متأكد .. انك وباقي فريق العمل من سيناريست وممثلين ومصور ومونتير ومؤلف موسيقا تصويريه ومهندس ديكور .. هتفرحو ثانيه واحده بس .. وهتخافو ايام وشهور .. عشان هتبقو عايزين تحترمو رأي الناس اللي استمتعو بالعمل ده

-------------------

كام ملحوظه بقى في التيك آواي

هي الشباب مالها .. بجد يعني في ايه .. كل مايشوفو بنت ماشيه في الشارع ولو حتى معاها اهلها بيعاكسوها .. وبيعاكسوها بطريقه بايخه ومستفزة لدرجة اني كنت هتخانق مع شلة شباب واقولهم هي دي مش زي اختك ولو ماعندكش اخت ياخي اعتبرها بنتك لما تتنيل على عينك وتتجوز .. لكن لما لقيت عددهم كبير واشكالهم اشكال ضاله .. قلت يا واد ماتدخلش غير لو حصل مد ايد .. والحمدلله ماحصلش والا كنتو هتلاقوني دلوقتي في مشرحة زينهم

---

حد من صحابي المدونين استغرب قوي اني لما باعمل رحلات مكوكيه للسينما باروح فيلمين ورا بعض .. لكن المشكله اني بابقى عايز اشوف فيلم واحد وافضل اتحايل على صحابي وحبايبي يجو معايا واعزمهم لكن بيتحججو بأي حجج .. فبروح رايح السينما لوحدي واتفرج على فيلمين .. لوحدي

سوووو

(11)مذكرات طفل .. طخين

المحطه الحداشر .. ويندوز مضروبه
-----------------------

قبل ان انهي اللعب عالجهاز في السيبر اللي كنت فيه انا ومنى زكي .. فوجئت بدخول اتنين مخبرين وامين شرطه وتلات عساكر .. وراحو محاوطين المنطقه وقلبو السيبر كللو .. وعندما توجه اليهم صاحب السيبر مستفهما عن العباره وضحو له انهم مصنفات وطلبو منه أي فلوس ولكن يبدو انه لم يكن معه مايكفي فضربوه على قفاه ضربة اوجعتني وآلمت قلبي .. لم ادر بنفسي واتجهت للمخبر ورحت ضاربه شالوط في قصبة رجلة قام واقع زي الطربش .. ثم اتلم العساكر ونزلو في ضرب واقتادوني الى المديريه
-------
بعد ان قامت سونيا بتوبيخ سامبا والحارس على فعلتهم وخصمتلهم كل واحد يومين من المرتب .. اتجهت الى الغرفه العلويه وامسكت كارت الشحن ابو عشره جنيه .. وخدشته وقامت بادخال الرقم في الموبيل لكي تجري مكالمة وتتصل بالبيج بوص .. ولكن الكارت لم يتم ادخاله او حسابه في الموبيل .. فحاولت مرة اخرى ونفس النتيجه .. فقامت بالاتصال برقم تُلتميه المجاني
صوت : عفوا .. لا يمكن اتمام مكالمتك الآن .. حاول الاتصال في وقت لاحق
--------
عسكري : انتباه يا مجرم منك ليه .. سيادة البيه امين اول شرطه وصل
كانت هذه هي الكلمة التي قالها لنا العسكري في التخشيبه .. والتي كان فيها مجموعة كبيره من اصحاب الانترنت كافيه والذين كلهم شغالين بنسخ ويندوز مضروبه .. وكنت انا معهم بدوري بعد ان ضربت المخبر وعملت فيها شملول .. واستغربت من عدم وجود منى زكي ولا مصطفى شعبان ولا أي حد من الجهاز .. وقبل ان افيق من دهشتي دخل علينا سيادة الامين .. وكان هو نفسه .. خالد صالح
--------
كادت سونيا ان تشد في شعرها من الغيظ وهي تحاول مرارا وتكرارا الاتصال برقم الخدمه المجاني الخاص بشركة ام نبيل بعد ان فشلت في شحن كارت العشره جنيه .. وعندما دخل عليها سامبا ووجد الحيره تبدو على وجهها سألها بدوره
سامبا : في ايه يا سونيا .. شايله طاجن ستك ليه ؟؟
سونيا : انت شكلك ما كنتش مسامح في العشره جنيه اللي اديتهملي اجيب بيهم الكارت
سامبا : - مندهشا - ليه بس ايه اللي حصل ؟؟
سونيا : مش قابل يتشحن وكل ما اتصل بيهم في رقم الخدمه بتاعهم تطلعلي الوليه بتقول لايمكن اجراء مكالمتك دلوقتي .. حاول بعدين لو عرفت
ساميا : عادي يابنتي .. تهيسة شبكه .. بتحصل معايا في حودافون عادي خالص
سونيا : طب والحل .. انا لازم اتصل بالبيج بوص اقوللو علي اللي حصل
سامبا : - وهو يعطيها الموبيل - اتصلي من عندي وما تدوشيناش
امسكت سونيا موبيل سامبا وطلبت رقم البيج بوص .. ولكنه لم يرد عليها .. فاتصلت مرة اخرى ولم يرد ايضا .. فاتصلت مرة اخرى فرد عليها وهو مغير صوته
صوت : - مغيرا صوته - الو ؟؟
سونيا : - يبدو عليها الدهشه من الصوت المختلف - ايوه
صوت : مين معايا؟؟
سونيا : انا سونيا .. مش ده موبيل البيج بوص برضك ؟؟
صوت : لا النمره غلط
واغلق الخط .. استغربت سونيا من الموقف .. ولكنها أرجعت ذلك لانه ممكن تكون الشبكه مهيسه فلم تندهش للدرجة الكبيره .. وفي هذه الاثناء رن موبيلها بنغمة .. انا باكره اسرائيل .. وهي نغمة البيج بوص .. فامسكت الموبيل وفتحت المكالمه
سونيا : انا لسه مكلماك رد علي واحد غريب
صوت : انتي يابنتي عبيطه ولا شكلك كده ؟؟
سونيا : ليه بس يا بوص؟؟
صوت : يعني عايزاني ارد عليكي من نمرة ماعرفش هي بتاعة مين .. مش يمكن موبيله يكون متراقب .. المهم .. عملتو ايه ؟؟
سونيا : تمام يا بوص .. اتصلت بسوووو وقلتله اننا خاطفين ابوه وامه ولازم نتفاهم
صوت : اتصلتي بيه منين ؟؟
سونيا : من نفس النمره اللي اتصلت عليك منها
صوت : بت انتي .. انتي مالكيش في شغل العصابات .. بقى بتتصلي بيه من نمرة ممكن تكون متراقبه .. وحتى لو مش متراقبه .. نمره معاكي على طول .. كنتي اشتريتي خط من أي محل واتصلتي بيه وترمي الخط بعدها
سونيا : ماهو يابوص الحاله الماديه مأشفره خالص معانا .. واحنا نازلين صرف في العمليه دي من أولها يجي بتاع ميه وعشيين جنيه .. كتير يعني
صوت : كل فلوس الدنيا تغور قصاد الحلم النبيل بتاعنا
سونيا : يا بوص ده كلام حلو قوي بس احنا بنكح تراب بصراحه
صوت : تصدقي كده عوق .. قال يعني انا اللي بكح اسمنت من ابو الطن بستمية جنيه
سونيا : وياريت لاقينه .. طب ده بنت عمة ابن خالة سلفتي .. عايزه تبلط حته في الحمام بتاعها .. المبلط قالها هاتو انتو الاسمنت وانا اجي اشتغل .. عشان مش هعرف اجيبه .. ولما دورو عند اي موّان ومالقوش .. فكرو يجيبو مخدرات لقوها اسهل
صوت : - مقاطعا بنرفزه - انتي هتحكيلي فيلم الخطايا بتاع عبحليم وشادية لطفي .. آخر شغلانه هشتغلها معاكي .. عماله تتلككي وكل شوية فلوس فلوس .. دي أزمة عالميه ياناس مش عندنا وبس .. هو احنا بنسرق لا سمح الله .. هو مال حرام يعني .. يا ناس اتقو الله
-------
يتبع

سوووو

توووت

ساعات الاقي القطر بيقول تووت
والاقيني ساكت وهو قدامي يفوت
.. واقف لوحدي في محطة الدنيا

ولازمً وحتما التزم بيك .. يا سكوت