السبت، ٢٤ جمادى الآخرة ١٤٢٩ هـ

اعتذار وشكر .. وكام تعليق


اعتذار

لكل المدونين اللي انا والله العظيم باحبهم وباحترمهم مهما اختلفو معايا في الرأي واللي بيشجعوني بكلامهم وبتعليقاتهم .. باعتذرلكم عن عدم مقدرتي على التواصل معاكم من خلال مواضيعكم في مدوناتكم والتعليق عليها .. وده لاني نتيجة لعدم استقرار شغلي كمهندس ديكور نتيجة عدم استقرار اسعار مواد البناء من اسمنت وحديد تسليح .. اتجهت للكتابه وزنقت نفسي بنفسي في تلات حاجات

اول حاجه .. هو كتاب عباره عن مجموعة مقالات ساخره وفيها حاجات نزلتها هنا في المدونه وحاجات تانيه باكتبها وباعدل فيها مع المستشار الفني لأحد دور النشر .. خصوصا ان دي اول تجربه لي واني الى حد ما ماليش اسم او اسمي مش معروف غير في نطاق ضيق

تاني حاجه .. هو كتابة سيناريو لفيلم روائي قصير .. والقصه للمدونة الجميله هدى عبد القادر صاحبة مدونة فبدال مانطق يا ولا لأ نضحك .. والقصه بعنوان (من تحت لتحت) .. ولو قريتوها بنفسكم هتحسو بمدى المعاناه اللي باعانيها في كتابة السيناريو وتحويلها من مجرد قصه لمشاهد يتم تصويرها

تالت حاجه .. باعمل حاليا جلسات عمل مع احد المخرجين لمحاولة تنفيذ فيلم روائي طويل من الكام سيناريو اللي عندي .. والموضوع ماقدرش اتكلم عنه ولا اقول غير انه حاجه ان شاء الله هتكون كوميدي وهتكون بتتكلم عن التعليم الخاص واحلام الشباب

-----

شُكر

شكر لكل مدونين الاسكندريه اللي رحبو بينا لما التقينا بيهم في لقاء المدونين يوم الجمعة الموافق امبارح .. واللي بجد كان نفسي اتعرف عليهم واتكلم معاهم من زمان
.. واخص بالشكر كل من
مصطفى مغربي صاحب مدونة غني يابهيه .. واللي كنت باتعرف عليه لأول مره في حياتي ولقيته شاب جميل جدا وجدع جدا
د. منوسي صاحبة مدونة ست البيت .. واللي بجد لقيتها انسانه جميله قوي ومحترمه جدا وكان نفسي انى اتكلم معاها اكتر .. لكن ان شاء الله ملحوقه
والمدونه العزيزة أميرة صاحبة مدونة سهر الليالي .. واللي بجد كان نفسي اتعرف عليها من زمان .. واتضح انها فعلا أميرة اسما وصفة .. ومش عارف اوصفلكم مدى ترحيبها بينا وسعادتها بوجودنا
وطبعا ماقدرش انسى قطقوطة المدونين كلهم .. دكتورة لماضة اختي الصغنونه اللي باحب اتلامض معاها وتتلامض معايا .. واللي بجد بجد بجد اتأكدت انها جدعة بطريقه يالهوووووووووووووي

والناس دي احب اقولهم .. والله العظيم لما تنزلو مصر لو طلبتو مني أي حاجه هعملها .. حتى لو كانت اني اقلعلكم عيني الاتنين .. بس هبقى متضايق عشان نظري ضعيف وانتو تستاهلو احسن حاجه .. لكن ومالو .. ممكن تاخدو النضاره وتمشو نفسكم بيها

-----
كام تعليق

طلبت معايا انزل اغنية المطرب الشيعبي الشهير .. عبد الباسط حموده .. واغنيته الرائعة .. انا مش عارفني .. واللي ممكن تلاقوها هنا

ودي صورة الكفر او غلاف الالبوم بتاعه


وفي اثناء ما الاغنية بتنزل .. قلت اقلب في صفحة التعليقات .. قريت التعليقات واخترت منهم كام تعليق ..
اتمنى انكم تفهمو ايه قصدي من نشرهم

.. محمد الديب يقول
دائما مانشتاق إلى ذكريات مضت وطواها الزمان وعندما نسمع هذا الصوت صوت عبد الباسط فلابد ان تبكى من داخلك على المعانى وعلى الالحان فعلا الزمن بيعيد نفسه وعدويه لسه موجود ياجامد يعبد الباسط


.. الباشا عمر يقول
قيثار الاغنية الشعبية وملك الموال


.. رؤوف طلبة عبد الرؤوف يقول
امبابة عاصمة جهنم وشارع المطار بيضرب نار


.. هتلر يقول
برنس اللياالي ومكدبش اللي قال حكمدار الاغنيه الشعبيه ونجم الموال


.. جون سينا يقول
انا بحبــــــــــك يا عبد الباــــــــــــط حمودة يا ابو شعر جامد جدا اولى انت بتعمل شعرك عند مين
لؤى شـــــــــــــومان


.. عمرو عبدالله بردانة يقول
انا نفسى امشى مع بسمة ونسمة بس مش عارف على فكرة اى كلام هنا متعلق بايمن انا اللى كتبه علشان يكرهوه بس ايمن ماكتابشى حاجة والامارة انا شطلاوى


.. محمد عبد العظيم يقول
من اكتر المطربين الشعبيين اللى بيعجبنى ادائهم عبد الباسط بمعنى احساس بانه شامل بالفن الشعبى بيخاطب جميع طبقات المجتمع ممكن يسمعه الارستقراطى والشعبى مع الاحساس بانة بيقدم فنه بشىء من الاتقان


.. عماد البرنس
عبد الباسط حموده مطرب شعبى من نوع نادر الان فهو من نوع احمد عدويه ومجدى طلعت وهذا النوع غير موجود الان وانا بكتب اغنى شعبى كويسه ونفسى اديهالك ياعم عبد الباسط وده تليفونى
018*******
اخوك عماد البرنس


.. فارس الرومنسيه يقول
احلى البوم برنس والله يا عب البا سط بمناسبه الشريط ممكن اتعرف على بنت من القاهره 17 سنه وايميلى اهو
-------------@yahoo.com


.. نادر يقول
اللى مسمعش عبد الباسط حموده يبقى مسمعش سعبى كان معكم( نادر أحمد الدادوى يوسف) من المنزله شكرا


وتعليقات بالانجليزي كمان

Mohammad Reza Noushzad
Dear Abdolbaset Hamoudeh
I wish you very cool and best.
Thanks for your voice and music.
I search for your album but didnt find more music from you because I live in Boushehr( In IRAN(


سيد عيسوي من افريكانا نت يقول
sank you


اما جايزه التعليق الدهبي .. واللي قلبتني على ضهري زي الصرصار من كتر الضحك .. كان التعليق ده

كاني ميلانو يقول
عفاريت ميلانو بالمرج تشكر الفنان عبد الباسط وبتقولك خسارتك فى الفن يا عبد الباسط انتا بصحيح مش واخد حقك لازم تشترك فى الافلام وتشارك بصوتك الجميل ده انتا مش اقل من احمد عدويه لازم تفكر فى الحفلات التليفزيونيه لان بجد صوتك معشش فى نفوخى
--------------------

.. ملحوظة
نظرا لان في ناس كتير طلبت اني اتكلم عن فيلم كباريه .. مع اني قلت اني مش ناقد ولا محلل سينيمائي وباتكلم عن الحاجه اللي باحبها بس .. لكن انا ماقدرش ماعملش حاجه بتطلب مني .. خصوصا لو كان الطلب جاي من ناس باعزهم وباحترمهم .. زي التعليق بتاع (النمس لتوظيف العمالة المصرية بالخارج) .. واللي جالي في موضوع (سينيماتك .. واقعية مصرية) وعلق هناك
نظرا لكل الحاجات دي .. ان شاء الله هتكلم عن فيلم كباريه في اقرب فرصه
بس على فكره .. الفيلم ماعجبنيش .. وربنا يكفينا شر السُبكيه

سوووو

الأربعاء، ٢١ جمادى الآخرة ١٤٢٩ هـ

(21)مذكرات طفل .. طخين

المحطه الواحد وعششين .. هانت يا جرعان
------------------------------------

دكتور رفعت : ساعة الصفر بعد بكره .. وكل واحد فينا خلاص عرف ايه دوره
سونيا : عرفنا طبعا يابوص .. بس اللي انا مش فاهماه .. ازاي الليله هتلبس في سوووو ؟؟
دكتور رفعت : كنت عارف انك هتسألي السؤال ده .. اللي احنا هنعملو ده هيلبس في سوووو لما الناس تفتكر اللي حصل منه في اول يوم ليه في المدرسه - راجع المحطه التانيه والمحطه التالته - وطبعا الاعلام مش هيتوصى في النقطه دي
سونيا : طب وانت مش شايف انها مش مبرره اننا نطلب منه يروح في مكان التنفيذ على انه هيستلم اهلو .. على الاقل لما العمليه هتتنفذ ويلاقو جثته .. هيقولو ايه اللي خلاه يروح هناك لوحده؟؟
دكتور رفعت : يالك من غبية حمقاء شنعاء بلهاء فسيفساء .. هو بعد بكره يوم ايه؟؟
سونيا : بعد بكره الجمعه
دكتور رفعت : ومدرسة سوووو عامله رحلة للقناطر يوم الجمعه
سونيا : اه مانا عارفه .. ماهي الرحله دي هي سبب الموضوع كللو
دكتور رفعت : طب مادمتي عارفه كده .. يبقى اكيد عارفه ان سوووو حاجز في الرحله دي
سامبا : وبكده هيبقى وجود سوووو في المكان ده مبرر فعلا
دكتور رفعت : - وهو ينظر لسامبا مبتسما - تصدقي الواد ده بيفهم
سامبا : عيب عليك يا دكتره .. محسوبك مجرم قديم بس مالوش حظ
دكتور رفعت : لا .. ان شاء الله بعد المهمة دي ماتخلص .. هتلاقي عقود الاحتراف نازله عليك من كل حته .. بس اهم حاجه في اللي هيحصل .. ان كل واحد فيكم يبقى عارف ايه هو دوره
سامبا : من الناحيه دي ماتقلقش .. انا والواد عيد هنصحى من الصبح بدري نجهز نفسنا
سونيا : وانا هتصل بسوووو عشان نخليه يبقى موجود زي ماتفقنا
سامبا : بس عدم اللامؤاخذه يادكتره .. انت ايه مصلحتك من اللي هيحصل لسوووو .. يعني سونيا وانا عارف سوووو عمل ايه خلاها عايزه تنتقم منه .. انما انت ايه مصلحتك من الحوار ده كللو ؟؟
دكتور رفعت : يااااه .. دي حكاية طويله قوي .. وانا مش فاضي عشان احكيهالكم دلوقتي .. اصل عندي حوار عفاريتي كده .. وانتو عارفين العفاريت مواعيدها دقيقه .. ولو اتأخرت ولا حاجه ممكن يلبسوني او يلبسو أي حد من اللي عطلوني .. ولا انت مش خايف من العفاريت ؟؟
!!! سامبا : - وهو خايف موووت - تروح وتيجي بألف سلامه يا دكتره
دكتور رفعت : - وهو ينظر لسونيا - يلا بينا يا سونيا عشان توصليني .. اصل التوك توك بتاعي خدوه مني عشان ماكنتش رابط حزام الامان عالخوذه
-----
بعد ما الاغنية اللي غنوها العيال خلصت .. سمعنا صوت حد بيحاول يفتح باب المخزن اللي احنا فيه .. لقيت ندى راحت ساحباني من ايدي وجرينا كلنا ناحية الحته اللي هم دخلو منها .. وخرجنا بره المخزن .. وبمجرد ماخرجنا لقيت شمهورش بيقولي
شمهورش : المخزن ده بتاع ناس كبيره قوي في البلد .. بيخزنو فيه الدقيق وبعدين يبيعوه في السوق السودا
سوووو : اه مانا عارف
ندى : عارف ازاي؟؟
وابتديت احكيلهم الحكايه من اولها لغاية ما اتعرفت عليهم واحنا ماشيين .. ولو اني مش عارف احنا ماشيين رايحين فين .. بس أي مكان احسن من المكان اللي احنا فيه ده .. خصوصا انه كللو مخازن قديمه وخرابات .. وبعد ما عرفو ايه هي حكايتي من أولها لآخرها .. لقيت ندى بتقولي
ندى : ياااه .. ده انت اللي شوفته في اليومين دول ماشفتوش في حياتك كلها ياجرع
شمهورش : وانا اللي فاكرك من العيال الفرافير بتوع المعادي
بشله : - وهو ينظر امامه ويبدو عليه الاندهاش - يادين النبي .. شايفين العربيه الحمرا اللي هناك دي يا رجاله؟؟
بصيت ناحية المكان اللي شاورلنا عليه بشله .. مش ممكن .. دي نفس العربيه بتاعة سونيا .. ايوه هي نفسها .. لسه هقولهم كده لقيت سونيا ومعاها واحد اول مره اشوفه خارجين من مخزن من المخازن القديمه .. وراحو راكبين العربيه وماخدوش بالهم مننا ومشيو .. معقول يكونو خاطفين اهلي هنا .. انا لازم اتأكد بنفسي .. قلت للعيال ان دي هي نفسها سونيا اللي خطفت اهلي .. واني شاكك ان اهلي يكونو في المخزن ده .. لقيتهم استغربو قوي .. ولقيت ميمون بيقولي ماقلقش .. رحنا المخزن من ورا .. لقينا ماسورة كبيره قوي .. وفي شباكين في الدور التاني .. ميمون طلع عالماسورة وبص على اول شباك من ناحية اليمين .. تقريبا ملقاش حاجه .. بص عالشباك اللي من الناحيه الشمال .. وزي مايكون اتخض .. لدرجة انه كان هيقع لكن مسك نفسه .. وبعدين راح راجع للشباك اللي من الناحيه اليمين .. ودخل منه عالمخزن .. فضلت واقف انا ووالعيال وكنت قلقان قوي .. لقيت شمهورش بيطبطب على كتفي وبيقولي
شمهورش : ماتقلقش .. لو اهلك موجودين هنا هننقذهم احنا بنفسنا
سوووو : يارب يكونو هنا .. يارب .. امي وحشتني قوي .. ووحشني طبيخها
-----
دخل بتاع البليله على توفيق عبد الحميد و مصطفى شعبان و منى زكي وهو باين عليه الخضه وبيقولهم
بتاع البليله : إلحقو .. سوووو تقريبا عرف فين اهلو
مصطفى شعبان : - وقف بسرعه وحماس من عالكرسي - وانت عرفت ازاي؟؟؟؟
بتاع البليله : الخاتم لقط حوار مابين سوووو وبين الكام عيل اللي اتعرف عليهم .. وباين انه شاف سونيا وهي خارجه من مخزن وكان معاها واحد تاني وركبو العربيه ومشيو
مصطفى شعبان : هاتلنا العنوان بتاع المخزن بسرعه عشان انا ومنى هنروح نشوف ايه الموضوع
منى زكي : - وهي مندهشه - نعم ياخويا .. انا مش هتتعتع من هنا قبل ما الكولدير يتصلح واشرب بؤ ميه ساقعه
مصطفى شعبان : ياستي تعالي ننزل وانا هجبلك قزازة ميه معدنيه
منى زكي : ميه معدنيه ايه .. دي ميه متعبيه من حنفيات ياعم وبيشتغلونا
مصطفى شعبان : خلاص .. هجبلك ميه من الكولدير اللي قدام الزاويه اللي في آخر الشارع
منى زكي : زاوية ايه دي ؟؟
مصطفى شعبان : الزاويه اللي قدام الجامع الكبير
منى زكي : هم عاملين زاويه قدام جامع .. وجامع كبير كمان .. ليه بقى ان شاء الله ؟؟
توفيق عبد الحميد : استغفر الله العظيم .. انتي هتعترضي على بيوت ربنا .. انشالله حتى يتعمل مسجد لكل واحد .. انتي مالك .. اللهم لا تحاسبنا بما فعل السفهاء مننا يارب العالمين
-----
ميمون طوّل قوي .. او يمكن بيتهيألي انه طوّل .. ابتديت اتوّتر بزياده .. خفت احسن يكون في حد من العصابه جوا شافوه ومسكوه ومش بعيد يكونو قتلوه .. لسه هقول لشمهورش على اللي بفكر فيه .. لقيت ميمون طلع من الشباك ونزل ومرسوم على وششو علامات كتير .. خوف على ارتباك على قلق .. لقيتني من غير ما احس باهزه من كتافه بعصبيه وبقولو
سوووو : انطق .. ابويا وامي جوا ولا فين .. عايشين ولا قتلوهم .. صحتهم عامله ازاي ؟؟؟؟
ميمون : بالراحه ياعم .. اخد نفسي الاول واحكيلك اللي شفته واللي سمعته
شمهورش : طب يلا بينا من هنا عشان مش ناقصه حد منهم يشوفنا
سوووو : انا مش هامشي من هنا قبل ما اتطمن على ابويا وامي
لسه جايين نتحرك لقينا عربية شيروكي جايه علينا .. اول ماشوفتها عرفت انهم مصطفى ومنى .. لكن العيال خافو يكونو حد تبع العصابه وكانو هايجرو .. بس وقفو لما لقوني بشاورلهم يقربو .. وبمجرد ماقربو لقيت مصطفى بيقولي
مصطفى شعبان : اركبو بسرعه
سوووو : ابويا وامي هنا وانا مش هتحرك غير وهم معايا
منى زكي : اركبو يا سوووو واحنا هنظبط كل حاجه في الجهاز
ندى : - وهي بتميل على بشله - جهاز ايه ؟؟
بشله : تقريبا جهاز نوكيا ميت فـُل وعشره الجديد .. ابو كمرا
شمهورش : - وهو باين عليه القلق - انا مش هاركب ولا اروح في أي حته
سوووو : - وانا باسحب شمهورش وباقي العيال يركبو - معلش اصلك متعود على ميكروباظات الحمله والعربيات البوكس .. اركب بس
----
بعد مانزل دكتور رفعت هو وسونيا وخرجو من المخزن .. دخل عيد على ابويا وامي وفك الحبال اللي متربطين بيها وجابلهم براد شاي وسابهم وخرج .. امي وهي بتصب لابويا كباية قالتله
امي : تفتكر يا حاج هيعملو فينا ايه؟
ابويا : - وهو بياخد منها الكبايه - ولا حاجه .. انتي تلاقيكي بس مخضوضه على ابنك وفاكره انه عمل مصيبه
امي : مش انت اللي عمال تقول ابنك ابنك ابنك لغاية ماحسستني انك جوزي انتساب
ابويا : يا وليه مش قصدي .. انا عارف ان ابنك ده عبيط اصلا
امي : لا بقى .. ابني احسن من كل الناس بس انت اللي قارش ملحته
ابويا : طب انا اهو وانتي اهو .. ابنك ده ولا هيعرف يتصرف ولا هيعرف يعمل حاجه
امي : - وهي بتصب لنفسها كوباية شاي - هنشوف يا حاج - وبعد ما شربت بؤ من الكوبايه - ايه البخل اللي الناس دي فيه .. دول حتى مش جايبينلنا حتتين جاتوه ولا باكو بسكويت .. عصابه متكحرته ومأشفره صحيح
----
يتبع

سوووو

السبت، ١٧ جمادى الآخرة ١٤٢٩ هـ

!! .. وصيّتي

إن مُت ماتزعلوش وتبّسّمو
وعلى روحي عايزكم تِتّرَحَّمو
.. واقرولي الدعا ده
واياكم من كلامي .. تتألمو
-
ملحوظه
.. انا الحمدلله زي الفل ومش متضايق ولا زعلان ولا اي حاجه والله
.. بس هي شخبطه جات في دماغي ورحت كاتبها
وبالمره تذكره ان الموت قريب

سوووو

الثلاثاء، ١٣ جمادى الآخرة ١٤٢٩ هـ

(20)مذكرات طفل .. طخين

المحطة العششين .. بالصلاتو عالنبي
-------------------------------

توفيق عبد الحميد : ودلوقتي بقى بما ان الحوار بتاع سوووو والمحافظات خلص على خير .. نرجع للشغل بقى
منى زكي : أؤمرنا واحنا ننفذ بالصلاتو عالنبي
توفيق عبد الحميد : أول هام .. هنجيب التسجيلات بتاعة الحاجات اللي حصلت لسوووو واللي لقطها الخاتم ابو فص .. ونشوف ايه اللي إستجد في الليله
مصطفى شعبان : ماشي كلامك يا كبير
بتاع البليله : - مستغربا - هو ايه الجو الشعبي اللي حصل للجهاز؟؟؟؟
------
بعد ان دخل البيج بوص او الدكتور رفعت اسماعيل على ابويا وامي وهم محبوسين في الاوضة وشافهم متربطين والدم نازل من بؤهم .. بص لسونيا وهو مبتسم على خفيف .. وبعد كده راح متجه على ابويا وامي وقرب منهم وهرش في صلعته الملساء .. وشاور لسامبا بعينيه انه يشيل الحاجات اللي على بؤ ابوي وامي .. وبعد ما اتشالت الحاجات راح قايل لابويا وامي
دكتور رفعت : ازي الحال ؟
ابويا : الحمدلله
امي : كويسين ياخويا
دكتور رفعت : يعني رجالتي عاملين الواجب معاكم وبيعذبوكم كويس ولا بيدلعو؟؟
ابويا : لا هو من ناحية التعذيب فهم فاهمين شغلهم
امي : وبسم الله ماشاء الله عليهم بيعذبونا بضمير وبذمة
دكتور رفعت : - وهو مبتسم - اهم حاجه الضمير في شغلنا
ابويا : لا عداهم العيب الحقيقه
امي : واضح انك موصيهم علينا
دكتور رفعت : لازم طبعا .. احنا ماعندناش اغلى من سوووو
ابويا : عشت الله يحفظك .. بس هو ابني عمللكم ايه بس؟
امي : وانت لامؤاخذه في دي السؤال .. تبقى مين يعني ؟
دكتور رفعت : - وقد بدت عليه علامات الغضب - مش عارفين انا مين .. انا دكتور رفعت اسماعيل .. اشهر شخصية في عالم ما وراء الطبيعه وما قدام الطبيعه وما خلال الطبيعه .. ومن النهارده مافيش طبيعه .. انا الطبيعه .. انا الطبييييييييعه
امي : - وهي تسأل ابويا بصوت واطي - هو مالو محموء للطبيعه ؟؟
ابويا : شكلو عايز يلبي نداء الطبيعه
دكتور رفعت : - مستطردا - انا دكتور رفعت اسماعيل آخر الذئاب المتوحدة .. دكتور رفعت اسماعيل اللي لو كان في عصور الجاهلية كان عاش في وادي مليان غيلان وجان .. ولكانت رأتني القوافل من بعيد أمشي حاملا هراوة ثقيلة وانا ارتدي فروة الاسد
ابويا : - مذبهلا - دكتور بفروة أسد ؟؟
!! امي : لازم دكتور امراض جلد بهايم
-----
دراكولا : الصراحه الصراحه .. انا كنت بامص دم شوية ناس مجرمين كده .. وكنت بقتلهم بعدها عشان مايتحولوش .. واتاوي جتتهم
!! سوووو : - مستغربا - دم ناس مجرمين .. وتتاوي جتتهم .. انا مش فاهم حاجه
دراكولا : الحكايه ان في مره لقيت شوية عيال متشردين جم هنا المخزن يباتو .. ولما ظهرت وخوفتهم زي مانا خوفتك .. ويعلم ربنا اني وكتاب الله ماكنت قاصد امص دمك ولا حاجه .. انا بس كنت بخوفك مش اكتر
سوووو : طب ولما خافو عملت ايه ؟؟
دراكولا : لما لقيتهم خافو وابتدو يعيطو رحت مهديهم وطمنتهم .. اصل انا باحب الاطفال قوي .. وبعد ما العيال خدو علي شوية .. لقيت واد منهم بيقول انت لو بجد بتحبنا .. يبقى تريحنا من التوربيني
سوووو : ايه التوربيني ده ؟؟
دراكولا : ده واحد كده عامل نفسه كبير عالعيال دول .. بيضربهم وبيعذبهم وبيخليهم يشحتو ويسرقو .. وبعدها ياخد الفلوس منهم بلطجه
سوووو : ومصيت دمه؟؟
دراكولا : لا .. بس مصيت دم كام مجرم تانين غيرو وتاويت جتتهم
سوووو : مش عارف الحكايه دي مش داخله نافوخي ليه .. وبعدين فين العيال دول وماجوش ليه مادامو متعودين يباتو هنا ؟
دراكولا : زمانهم جايين .. تلاقيهم بيضربو كوللا ولا بيعملو دماغ نمل وصراصير وجايين على طول
سوووو : والله شاكك انك كنت بتعضهم وتمص دمهم وتحولو بعد كده لدراكولات صغننين
دراكولا : - وهو ينظر خلفي ويبتسم - أهم .. وصلو
------
بعد ما اتطمن الدكتور رفعت اسماعيل على سير العمليه الاجراميه اللي بينفذوها .. واتطمن ان ابويا وامي في المخزن ومش هيقدر يهربو .. طلع عالدور اللي فوق .. ووقف قدام باب الاوضه اللي كل مره تقف قدامها سونيا .. وبص على الاوضه وهو بيحك في صلعته الملساء .. وقال لسونيا
دكتور رفعت : هو لسه الحال زي ماهو؟
سونيا : زي ماهو - وابتدت في الشحتفه - ربنا عالظالم والمفتري .. يمهل ولا يهمل
دكتور رفعت : - ممتعضا - انتي تعرفي نجيب السمادوني؟؟
سامبا : - بتناحه - مين نجيب السيفوني ؟؟؟؟
دكتور رفعت : - ممتعضا برضه - سيفوني .. اهو انت بينطبق عليك المثل القائل .. سكت دهرا ونطق جزرا .. نجيب السمادوني يا جاهل .. واحد صاحبي على طول بيهريني بالكلام اللي في السكه بتاعة ربنا عالظالم .. والحياة كفاح .. والطمع يقل ماجمع .. وياحلو بانت لِبّـتـَك
سونيا : - وهي بتهدّي شحتفتها - طب ومالو نجيب السمادوني ومال العملية بتاعتنا ؟؟
دكتور رفعت : - وهو مازال ممتعضا - مالهوش بس انا بارغي عادي يعني .. انا دكتور رفعت اسماعيل ياسونيا .. اقول اللي انا عايزه وقت مانا عايز - وهو بيزعق لسونيا وسامبا - دكتور رفعت .. اللي ياما حارب اشباح وارواح وزومبي
سامبا : - وهو يستخبى ورا سونيا - طب وانا زومبي ايه ؟؟؟
سونيا : - وهي تحاول تهدئة الجو - طب انا بقول ندخل جوا المكتب ونشوف هنعمل ايه دلوقتي
دكتور رفعت : - وهو ممتعض طبيعي - وهو كذلك هكذا
-----
منى زكي : يانهار ازرق .. كل ده بيحصل لسوووو واحنا مش واخدين بالنا
توفيق عبد الحميد : - وهو يشرب كوباية ميه من الكولدير- انا هكلم المسئولين .. ده مش ممكن .. ده تهريج
مصطفى شعبان : احنا نروح ننقذ سوووو بنفسنا .. مش هنستنى مسئولين
توفيق عبد الحميد : لأ انا مش هكلم المسئولين عشان سوووو .. انا هكلم المسئولين عن شركة الصيانه يجو يشوفلهم حل في الكولدير اللي مش بيسقّع ميه ده
!! مصطفى شعبان : - وهو بينظر لتوفيق بقرف - مية ايه وتسقّع ايه .. ده احنا اللي مسقعين لسوووو عالآخر
منى زكي : صبرك بالله يا درش .. سوووو مش هيروح بعيد .. واحنا عارفين هو فين
!! مصطفى شعبان : مش فاهم
منى زكي : يعني نشوف حد يصلح الكولدير وبعدين ربنا يسهلها .. احنا داخلين على صيف والدنيا بتبقى ولعا زي مانت عارف .. ده حتى التكييف عايز يتشحن فريون
مصطفى شعبان : آه والله عندك حق .. نصلح الكولدير ونشربلنا بؤ ميه ونتحرك
!! توفيق عبد الحميد : - وهو يبتسم بسخريه - وبيقولو علينا اننا في الطراوه قال
-----
بمجرد مادخلو أطفال الشوارع اللي قاللي عليهم دراكولا .. اكتشفت ان دراكولا مامصش دم حد فيهم .. لاني لقيتهم ممصوين خلقه .. لقيتهم كلهم على بعض كده مايجوش قدي وقد طخنتي .. كانو في الاول خايفين مني ومقلقين .. لكن دراكولا طمنهم .. كانو اربعه .. في سني تقريبا .. اكبرهم او الزعيم بتاعهم اسمه شمهورش .. يمكن عشان شعره منكوش وتحسو انه عفريت , وفي بنت اسمها ندى .. هي كانت في يوم من الايام عسوله .. بس دلوقتي بقت مسقفه موس في بؤها .. وكنت مستغرب ومش فاهم يعني ايه كلمة مسقفه موس .. لكن اتضح ان معناها انها حاطه في سقف حلق بؤها موس .. تقريبا بتحلق دقنها بيه , وكان في واد شكلو كده اتعور في خناقه ولا حاجه .. اسمه بشله , اصغرهم حجما واكثرهم نشاطا كان واد اسمه ميمون .. وتقريبا سموه ميمون عشان زي القرود .. بيقدر يعمل مليون حاجه في نفس الوقت
بعد ماهديت الحياه شويه والتوتر اللي مابيننا اتشال نتيجة انهم خافو اكون مخبر ولا حاجه .. وكمان بعد ما دراكولا قام ينام عشان الصبح طلع وتقريبا في حزازات بينه وبين نور الشمس .. ابتدينا انا والعيال نتكلم مع بعض
ميمون : - وهو يتفحصني من فوق لتحت - وانت بقى نزلت الشارع ليه؟
سوووو : اهلي اتخطفو فقررت انقذهم
بشله : - باستهزاء - انت فاكر نفسك زوبرمان !!؟
شمهورش : - وهو ينظر لـبشله بقرف - يخرب بيت الكوللا اللي لحست لسانك .. ياهبل اسمه دوبرمان
سوووو : دوبر مان .. ده على اعتبار انك شايفني من غير ديل مثلا - وبصيت لـبشله - اسمه سوبرمان .. سوبر مان
ندى : انا نفسي في سجاره سوبر قوي .. حاسسه ان دماغي هتتفرتك
في اللحظه دي افتكرت اني معايا علبة سجاير كنت خدتها من العساكر لما كنت محجوز
(راجع المحطه التلتاشر) ورحت مطلع علبة السجاير
ميمون : يابن اللذينا .. انت ليك في اللون؟؟
بشله : ومش أي لون .. دي علبة كامله يامعلم ماتفتحتش
شمهورش : - بعد ماخطفها من ايدي - تلاقوه كان نازل يجيب سجاير لابوه ولا حاجه
الصراحه .. قالها بطريقه ضايقتني .. حسسني اني عيل .. وكمان خطفها وهايفتحها كأنها بتاعته .. رحت واقف قدامه وقلتلو
سوووو : لا ابويا ايه .. انا اصلا اصلا باشرب سجاير من زمان .. من بتاع تمان سنين
ندى : هو انت عندك كام سنه ؟؟
!! سوووو : سته ونص
ميمون : بقولكم ايه .. احنا مش هنقضيها كلام .. عايزين نشرب سجاير
شمهورش فتح العلبه واداني اول سيجاره .. وراح مطلع مشط كبريت وبص للعيال وهو بيبتسم .. وراح مولع عود كبريت عشان اولع بيه السيجاره .. كان قدامي حل من اتنين .. يا اما اني مارضاش اشرب السيجاره واطلع عيل في نظرهم .. يا اما ابقى راجل وقد كلامي .. وفعلا .. رحت ساحب نفس من السيجاره .. خدت النفس من هنا وحسيتني هموت من هنا .. حسيتني باتخنق .. هفطس .. ابتديت اكح .. انا اكح وهم يضحكو .. اكح وهم يضحكو .. وشي احمر وروحي كانت هتطلع مني .. هموت خلاص مش قادر .. ابتدى ضحكهم يقل .. ندى قربت مني وابتدت تضربني ضرب خفيف وتطبطب على ضهري عشان ابطل اكح .. ميمون قلق .. بشله هو كمان بطل يضحك وبقى خايف علي .. الوحيد اللي كان لسه بيضحك هو شمهورش .. لكن لما العيال بصولو جامد راح بطل ضحك وقال
!! شمهورش : مش هو اللي عامل فيها مولود في باكو معسل
ندى : - وهي بتبصلي وخايفه علي - انت ليه كدبت وقلت انك بتشرب سجاير ؟؟؟
سوووو : انا ماكدبتش .. كوح كاح .. انا كنت باشرب بس بطلت .. كوح كاح كيح
ميمون : بطلت بقالك قد ايه؟
سوووو : تسع سنين .. كوح
ندى : هو انت عندك كام سنه ؟؟؟؟؟
!! سوووو : سته وربع
-----
دكتور رفعت : الفتره الجايه اصعب فتره .. لازم تركزو عشان نبدأ في تنفيذ المخطط صح
سونيا : ماشي يا بوص
دكتور رفعت : يادي النيله .. يابنتي ماتحسسينيش اني تاجر مخدرات وعندي دولاب في الباطنيه .. انا دكتور رفعت .. دكتور رفعت اللي صارع كائنات اسطوريه .. دكتور رفعت اللي حارب الاشباح والافاعي و راس ميدوسا
سامبا : - مستغربا - هي امك اسمها ميدوسا ؟؟؟
دكتور رفعت : لأ .. ليه؟؟
!! سامبا : اصلك قلت في آخر كلامك (و راس ميدوسا) .. زي ماتكون بتحلف براس امك
-----
بعد ماخدو مني العيال علبة السجاير وكل واحد ولع لنفسه سيجاره .. حسيتني عيل عشان ماشربتش انا كمان .. ولما رحت لشمهورش عشان اخد منه سجاره وخدت السجاره فعلا .. ندى وقفت قدامي وراحت واخداها وهي بتشاورلي بصباعها بتمنعني .. وابتدت تغني على لحن اغنية (وينك ياعصفوره وين .. أو فولا فولا) وبتقول

ندى : كولوباطرا سجاره فاضيه
تشربها ونفسك مش راضيه
كولوباطرا سجاره خشبه
تشربها ونفسك مكتئبه
كولوباطرا
الباقي عامليون كورال : كولوباطرا
ندى : كولوباطرا
كورال : كولوباطرا
ندى : كولوباطراااااا .. سيجاره خشبه

ندى : فينك ياسيجاره فين
مانشوفك غير سبروسه
ماعندي غير الرئتين
عطينا انتي نفوسه
وان سألونا على سيجاره
كورال : طرارارام
ندى : التدخين ماهو شطاره
كولوباطرا
كورال : كولوباطرا
ندى : كولوباطرا
كورال : كولوباطرا
ندى : كولوباطرااااااا .. سجاره خشبه

كورال : - وهم بيلفو حوالينا - كولوباطرا سجاره فاضيه
تشربها ونفسك مش راضيه
كولوباطرا سجاره خشبه
تشربها ونفسك مكتئبه
ندى : كولوباطرا
كورال : كولوباطرا
ندى : كولوباطرا
كورال : كولوباطرا
ندى : كولوباطراااااااا .. سجاره خشبه

ندى : مليانه بالصراصير
مليانه بالزباله
تشربها وعقلك هيطير
فجأه تبقى برياله
وان سألونا على سجاره
كورال : طرارارام
ندى : التدخين ماهو شطاره
كولوباطرا
كورال : كولوباطرا
ندى : كولوباطرا
كورال : كولوباطرا
ندى : كولوباطرااااااا
الجميع : سجاره خشبه
-----
يتبع

سوووو

الأحد، ١١ جمادى الآخرة ١٤٢٩ هـ

!! .. ياريت

.. ياريت يا أي حد بيقرا اي كلمه من كلامي
الله يكرمكم
الله يكرمكم
الله يكرمكم
.. ياريت ماتمسكوش عالكلمه وعالحرف
.. لاني انا او غيري لو تعاملنا بالموقف ده وبحالة التحفز دي
يبقى يستحسن ان ماحدش يكتب .. ولا حد يقرا
-
سوووو

الخميس، ٨ جمادى الآخرة ١٤٢٩ هـ

عبده .. زيطه

.. النهارده انا هحكي حكايه
اتعملت قصة .. وكام روايه
-
.. وكمان افلام فـ السيما
ومسلسل قيمته عظيمه
-
عن واد .. لعيب .. حريف
كان اسمه .. عبده ضعيف
-
.. عبده دا .. كان غاوي زيطه
تشوفو تقول .. دي مامته عبيطه
-
.. حكايته باديه .. من زمان
.. كان .. وكان ياما كان
-
في المدرسه ياخد شلاليت
تقولش هلفوت مـ الهلافيت
-
.. من صحابه دايما مكروف
وكل الناس بتقول ده خروف
-
يعني اتربى .. وعنده عقده
وحلف .. ليبقى عمده
-
.. من ساعتها طلعله لسان
واداها زيطه فـ كل مكان
-
شرّد .. سيّح .. قالو ومالو
واد صغير .. سيبو فـ حالو
-
.. لما كبر .. اداها حركات
ورشح نفسه فـ الانتخابات
-
.. وقف وسط الناس بيقول
صدقوه .. خلوه مسئول
-
نضف شارع .. نضف حاره
وبنالو فيلا .. على كام عماره
-
.. يسرق ينهب ياخد اتاوه
ياكل وينصب .. كللو بغباوه
-
ريحته فاحت .. كما الكلاب
فـ المجلس .. عملو استجواب
-
عيط .. زيط .. خلاها عتمه
.. وادي الكبير .. اكبر عكمه
-
.. لعبها صح ودخل الحزب
والحزب بيحمي .. كلب الكلب
-
.. من ساعتها بقى رجل الساعه
قلة أصل .. وكللو وضاعه
-
.. واستضافوه في التلفزيون
.. وهو بيشرب شوب لمون
-
.. اتكلم بسلامته وقال
انه كافح .. كما الرجال
-
.. وكمان حارب ياما كتير
!! دا كان شهيد حرب التحرير
-
عبده زيطه .. مابقاش ضعيف
عبده زيطه .. بقى دمو خفيف
-
مين عالم كمان كام يوم
.. نلاقي جاي .. فـ عز النوم
-
.. والمعنى في بطن الشاعر
.. والكل هيفضل فاكر
-
اصلك وفصلك ايه ياعبده
.. وكل واحد يقول من عنده
-
انا راح اقول .. دا بتاع بليله
وتبعك يقول : من عيله اصيله
-
.. بس وخلصت مني الحدوته
توته ملتوته .. لأ مظبوطه
-
ومش هقول تاني الحكايه
لا تيجي الضربه على قفايا
-
.. عجبتكم .. ماعجبتكمش
!! مش مهم .. انا اصلي طربش
-
سوووو

الاثنين، ٥ جمادى الآخرة ١٤٢٩ هـ

الحمدلله

تحديث
-------
بما انها ليلة تعليقات .. جاني تعليق على موضوع سينيماتك .. واقعية مصرية .. والتعليق بصراحه جميل جدا
من المخرج الاجمل .. استاذ أحمد عاطف .. مخرج فيلم الغابه
مش كده وبس .. لأ ده نشر الموضوع اللي كتبته عن الفيلم .. في مدونته الخاصه
.. وده كان تعليقه
-----
شكرا يا سو على النقد الجميل و الواعى اللى اعمق من كل اللى كتبوه كل نقاد مصر عن الفيلم - انت بجد موهوب و لازم تحترف النقد فى الجرائد
-----
الشكر لله ان اللي باكتبه عجبك وعجب الناس اللي قروه
وصدقني انا مش ناقد ولا حاجه .. الحكايه ومافيها اني استمتعت بالفيلم وقلت اللي حسيته ..ونفسي الناس تستمتع بيه زي مانا استمتعت بيه بجد
اما حوار الجرايد والمجلات .. فأنا بحاول فيه وربنا يعمل اللي فيه الخير ان شاء الله
-----
ارجو ان اكون دائما عند حسن الظن واقدم افلام تعبر عن قضايا بلدنا و همومك و همومى و كمان افراحنا بدون ابتزال او اسفاف او فجاجة
احمد عاطف
-----
ان شاء الله هتكون عند حسن ظن الناس بيك طول مانت مؤمن بفنك وبقضيتك .. واللي هي في نفس الوقت قضية اي شخص بيهتم بالانسان .. ومش مجامله ليك ولا حاجه .. انت انسان محترم جدا وبتقدم فن محترم بجد
وربنا يوفقك ويسعدك ويكرمك يارب
------------
معلش ياخواننا اعذروني اني مش بـاتكلم على تعليقاتكم ولا بتفاعل معاكم .. بس يعني بمر بمرحلة دوشة ودربكه ومش عارف هتنتهي على خير امتى ان شاء الله
-------------
وبينما باشوف التعليقات اللي جاتلي - أعز انا قوي الدخلات اللي تحسس اللي بيقرالي انه كان في حوار ناشيء مابينا .. واني باعطف الكلام بحرف عطف دليل على العواطف والحنان اللي مابيني وبينه - لفت انتباهي تعليق جالي من شخص غير معرف .. وانتو عارفين طبعا موقفي من آخر تعليق جالي من غير معرف .. واللي بناءا عليه رحت قافل التعلقات لغير المعرفين .. لكن فتحت الحوار والتعليق للكل عشان اشوف واقيس اللي بيحصل
التعليق اللي جالي بقى كان عباره عن كلام كتير قوي .. وكان الكلام ده بيقـ .. بقول ايه .. ماتيجو نشوف احسن
-----
.. غير معرف يقول
-----
اهو انا قريت حتة غير معرف دي .. ولقيتني باخبط في بعضي خايف احسن يكون حد دخل يشتمني تاني
وانا ماعملتش حاجه اصلا وبريء يابيه
-----
السلام عليكم ورحمة الله وبركاته
-----
؟؟؟؟
هنا بقى اطمنت وقلت ماحدش هيشتمني ويدخل يرمي السلام يعني
وعليكم السلام ورحمة الله وبركاته يافندم
-----
الاستاذ الفاضل احمد سوووو
الحقيقه انا اول مره اعلق عندك وماعرفش حبيت اعلق اقول ايه
بس انا بجد بابقى مستمتعه جدا وانا باقرى كتاباتك وشايفه انك بتقول حاجات حلوة جدا وباضحك وانا بقراها من كل قلبي
-----
لا ده كده مش شتومه خالص الحمدلله
والحمدلله بجد ان ربنا قدرني وقدرت بفضل منه اني اساعد في رسم ابتسامه على وشك
-----
لدرجة ان جوزي في الاول شك انا باضحك ليه ولما وريته كلامك ومدونتك بقى مدمن على قرايتها وقال لاخته وهي قالت لخطيبها وكل العيله بقت بتقراها وبتستنى لما حضرتك بتكتب حاجه جديده عشان نبلغ بعض ونقراها
-----
الحمدلله ان زوجك تفهم الموضوع .. والا كنت هبقى عم المرحوم
والحمدلله انه قال لكل اللي يعرفهم .. وربنا يقدرني اني ابسطهم عشان ماحدش يقولو حاجه كده ولا كده
!!! ويجي جوزك بعد كده يقولك حاجه كده ولا كده .. مش كده
-----
بس انا لاحظت حاجه ومش عارفه اقولها ازاي بس هقولها وانا عارفه انك مش هتزعل منني لانك فنان والفنان مش بيزعل لما بيتقال ليه نقد من معجبينه
-----
يابركة دعاكي يا امه .. والله وابنك بقى ليه معجبين وحوارات وكلام كبير قوي
ومش كده وبس .. لأ .. ده بيتوجهله نقد منهم كمان .. ياما انت كريم يارب .. الحمدلله
-----
انا ملاحظه ان المدونه بقت واخده طابع مذكرات بس او كلام عن السينما وبس
فين المواضيع التانيه اللي في قوة اول مواضيع ليك واللي بجد كل ما اقراها حتى لو قريتها خمسين مره باضحك فيها برضه
ياريت تنوع في مواضيعك عشان الناس كلها تقرالك لان في ناس انا بقولهم على مدونتك ولما بيقرو ويلاقو انك بتكتب مذكرات وفي الحلقه العشرين بيستكترو انهم يقرو عشرين حلقه بحالهم
انا شايفه انك لو كتبت مواضيع مستقله بنفسها مع المذكرات وكلام السينما هتخلي القراء يتابعوك اكتر والناس بعد كده هتقرى المذكرات من نفسهم لما يلاقو اسلوبك ساخر ومضحك وفي الصميم
-----
همممم
طب .. بصي بقى ياستي .. الحقيقه انا باكتب المذكرات دي وباجرب فيها حاجه معينه .. المعالجه نفسها ماحدش عملها قبل كده .. يعني ماينفعش ان ابطال اي قصه يكونو ابطال في قصة تانيه او في فيلم من افلام السينما .. وبالتالي انا باجرب وباشوف رد الفعل للتجربه دي
وبالنسبه لكلامي عن السينما .. فده لاني باحب السينما .. زي لما تلاقي مدون او مدونه بيكتبو في السياسه بمنتهى الصراحه .. وبيجيبو مواضيع من الجرايد او من عالنت ويقولوها ويعلقو عليها
وكل واحد بيتكلم باللي بيفهم فيه او بيحب يتكلم عنه
وبخصوص اول مواضيع كتبتها .. فأنا كنت زي ماحضرتك قلتي كاتب مواضيع متفرقه باسلوب ساخر الى حد ما .. لكن لقيت ان في مواضيع منهم اتسرقت زي موضوع تفسير اغنية سوووو يا سوووو اللي لقيته محطوط في احد المنتديات .. وزي موضوع قد قامت الصلاه واللي جالي في ايميل .. وماتقالش حتى انهم منقولين ولا اتجابت سيرتي خالص
وانا متعود على ان حاجات من اللي باكتبها تتسرق من ساعة ماكنت باكتب في منتديات ومواقع مختلفه .. والموضوع ده بصراحه بيضايق
لكن انا مابطلتش كتابة مقالات ساخره وماقدرش ابطل .. وكاتب حوالي عشر مواقف ساخره او يمكن اكتر كمان .. بس الحكاية ومافيها .. ان في محاولات لنشرها في كتاب عباره عن مواقف وحاجات ساخره .. ولسه باجمع في المواقف دي وبعد كده هسجلها في الشهر العقاري
وان شاء الله في اقرب فرصه هتلاقي حضرتك كتاب نازل باسمي
وربنا يعمل اللي فيه الخير ان شاء الله
لكن انا برضه مايرضينيش ان الناس اللي من طرف حضرتك ييجو مدونتي ومايقروليش حاجه .. وان شاء الله هبدأ في اني انزل المواضيع اللي كانت اتسرقت منني واعمل لها إعادة نشر .. ومش هازعل عليها قوي لو اتسرقت لانها اتسرقت قبل كده
.. واهو بالمره الناس تعرفها لو ماكانتش تعرفها .. ولو عارفاها وقرتها قبل كده
يبقى تعرف انها من تأليفي انا وكتاب الله
-----
طولت عليك عارفه لكن انا حبيت انتهز فرصة انك فاتح التعليق لغير المعرفين وقلت اقولك وجهة نظري وربنا يستر
وتقبل تحياتي
ام أيمن وساره
-----
يافندم ولا طولتي ولا حاجه .. وانا سعيد جدا ان في ناس زي حضرتك كده بيقولو وجهة نظرهم باحترام وتفهم ورقي في الحوار والله .. وان شاء الله مدونتي هتفضل لكل اللي يعلق ويقول رأيه باتفهم واحترام
.. وسلامي لزوجك العزيز وبلغيه اني سعيد بحركة التشريد والسياح اللي عملهالي في العائله
.. وان شاء الله اكون عند حسن ظنكم بي ان شاء الله
وسلامي لأيمن ولساره .. وربنا يخليهملكم ويباركلكم فيهم ويباركلهم فيكم
-
!! لكن لحظه .. الموضوع ماخلصش على كده
انا سبق وقلت قبل كده ان المدونه دي زي ماتكون بيتي .. وانا صعيدي واعرف الاصول
.. وما ارضاش ان حد يجيلي بيتي من غير ما اعمل معاه الواجب
وعشان كده مايرضينيش انكم تمشو من غير ما احاول ارسم ابتسامه على وشوشكم
.. وخدو عندكم الكام نكته دول
------
عيل صغير روح بيتهم بعد المدرسه وهو متأخر قامت امه ماسكاه ولسه هتضربه عشان اتأخر قام قاللها : اصل انا بعد ماخلصت المدرسه وانا مروح شفت عربية بابا وفيها بابا وأبلة فوزيه .. والعربيه مستخبيه ورا شجره كبيره .. ولقيت بابا راح بايس أبله فوزيه في بؤها .. وبعدين راح مقلعها هدومها
راحت امه موقفاه وقالتله : لا بقى .. انت تغير هدومك وتبقى تحكي الحكايه دي بعدين
الغدا اتحط والاب والام والابن قاعدين بيتغدو .. قامت الام حبت تزنق جوزها وقالت لابنها : ها ياحبيبي .. مش هتحكيلي الحكايه اللي حكتهالي بعد ماجيت من المدرسه ؟؟؟
قام الواد قايل : انا النهارده وانا مروح شفت عربية بابا وفيها بابا وأبلة فوزيه .. والعربيه مستخبيه ورا شجره كبيره .. ولقيت بابا راح بايس أبله فوزيه في بؤها .. وبعدين راح مقلعها هدومها .. وعمل معاها نفس اللي أونكل حسين كان بيعملو معاكي لما بابا كان مسافر
------
عيل صغير برضه .. امه وقفت تاكسي ماشي في الشارع وقالت للسواق بقولك ايه ياسطى .. وصل الواد ابني النادي .. بس خلي بالك الواد ده رخم ولسانه طويل .. سواق التاكس قال ماشي .. واتحرك التاكس .. سواق التاكس ماطاقش يقعد طول الفتره دي ساكت .. قام باصص للواد وقاللو : وانت ياحبيبي لما تكبر ناوي تبقى ايه ؟؟
الواد بصللو وابتسم ابتسامه رخمه قوي وسكت
قام سواق التاكس قاللو : يعني لو بابا دكتور وماما دكتوره .. لما تكبر تشتغل ايه ؟؟
الواد بصلو وقالو وهو مبتسم نفس الابتسامه الرخمه : دكتور
سواق التاكس قاللو : طب لو بابا مهندس وماما مهندسه .. هتشتغل ايه ؟؟
قاللو : مهندس
سواق التاكس قال لنفسه .. طب ماهو حلو اهو .. انا هشتغلو كده شويه واشوف هيعمل ايه .. وراح قايللو : طب لو بابا طبال وماما رقاصه .. تشتغل ايه ؟؟؟
الواد قاللو : سواق تاكس
------
واحد ست اكتشفت ان بنتها اللي عندها واحد وعشرين سنه حامل .. قامت ماسكها من شعرها وقالتلها انتي تجيبي اللي عمل كده يصلح غلطته والا هنقتلك انا وابوكي .. بعدها بيومين البت جات البيت ومعاها واحد ملو هدومه .. وشكله غني قوي قوي قوي .. قاللهم : الحقيقه انا مش هقدر اتجوز بنتكم .. بس اوعدكم لو خلفت بنت اديها نص مليون جنيه .. ولو خلفت ولد اديلو مليون جنيه .. ولو خلفت توأم اديهم اتنين مليون جنيه .. بس لو بنتكم حملها حمل كاذب ومافيش حمل اصلا .. هتدوني ايه ؟؟؟
!!! قام ابوها قاللو : هنديك فرصه تانيه يابني

سوووو

الأربعاء، ٣٠ جمادى الأولى ١٤٢٩ هـ

(19)مذكرات طفل .. طخين

(المحطة التسعتاشر .. سيس – هاع (2
--------------------------------

عيد : مصيبه .. هنروح كلنا في مصيبه
ابويا : ياساتر يارب .. مصيبة ايه يا ابني؟؟
عيد : البيج بوص .. الراجل الكبير
امي : مالو .. عيان ولا حاجه ؟؟
عيد : عيان ايه بس .. البيج بوص جاي في السكه
------
مصطفى شعبان : خلاااص .. كللو ألسطه وميت فل وعشره
منى زكي : ضربت بطاقه لسوووو ؟؟؟
مصطفى شعبان : لأ طبعا
توفيق عبد الحميد : طب ضربت سوووو ؟؟
مصطفى شعبان : لأ برضه
منى زكي : امال انت عملت ايه؟؟؟
مصطفى شعبان : مافيش .. ضربنا بطاقة ابو سوووو .. وبقو تابعين لمحافظة القاهرة رسميا
يدخل عليهم اللي كان عامل بتاع البليله واتضح انه معاهم في الجهاز .. وهو يبتسم ومنشكح قوي ويقول
بتاع البليله : بس يا جدعان .. المشكله بتاعة سوووو وحوار محافظة حلوان ده اتحل
يتجه اليه مصطفى شعبان وهو مندهش .. حيث انه لم يكن متفقا مع منى زكي وتوفيق عبد الحميد في إخبار أي شخص من الجهاز .. خشية أن يصحو ضمير هذا الشخص وهي مش ناقصه صحوة الضمير العربي خالص في الليله دي .. وقال له درش
مصطفى شعبان : حوار سوووو اتحل .. ازاي ؟؟؟
بتاع البليله : محافظ حلوان قال لمحافظ القاهره مش هينفع تديني عزبة الوالده في حلوان بالعشوائيات اللي فيها .. وتديني معاها كمان ترب اليهود والمجزر الآلي في البساتين .. خدو البساتين وخلوها تبع القاهرة .. عشان هي مش ناقصه تدوني الرايش بتاعكم واتبلي بيه لوحدي
منى زكي : وبكده بقيت البساتين اول مركز في محافظة القاهرة
توفيق عبد الحميد : وبكده بقى سوووو تحت سلطة الجهاز زي ماكنا
مصطفى شعبان : وبكده يبقى ضاع علي فلوس ضرب بطاقة ابو سوووو
------
دراكولا : سمعت طراطيش كلام ان في غزو هيحصل علينا
سوووو : غزو ؟؟
دراكولا : ايوه غزو .. مصر طول عمرها فيها خير كتير قوي .. وطول عمر الدول والحضارات اللي حواليها نفسها انها تاخد خيرها ده
سوووو : طب والغزو ده كان من مين؟
دراكولا : من ناس اسمهم الهكسوس
سوووو : آآه .. سمعت عنهم
دراكولا : الفرعون أحمس سمع استشارة واحد من الوزرا بتوعه .. عملو حرس جديد اسمه الحرس الوطني .. وكل اللي في السجون خرجوهم عشان ينضمو للحرس ده .. كان الهدف من الحرس ده انه يبقى اول خط دفاع في الحرب .. وعشان هم مجرمين وكده كده محكوم عليهم يا اما بالحبس طول العمر او بالاعدام .. المساجين وافقو
سوووو : ايه الاستعباط ده .. السجن طول العمر او الاعدام .. هو مافيش جنح على ايامكم ولا حبس خمس ست شهور؟؟؟
دراكولا : كان في طبعا .. بس هم ماخدوش غير المساجين اللي كده كده رايحين في الكاظوظه
سوووو : كاظوظه .. ده انت شكلك دراكولا من امبابه .. كمل
دراكولا : بعد ماتم تظبيط اول مجموعه من المجرمين وادوهم سلاح ورحلّوهم على حدود مصر عشان ياخدو مواقعهم الدفاعيه .. حصلت حاجه اغرب من الخيال
سوووو : والله يا دراكولا ياخويا .. من ساعة ما ابتديت في الحكايه دي وانا مش مستغرب حاجه خالص
دراكولا : واحد من المساجين دول كان في الاصل ساحر .. عمل تعويذه ورماها على اول مجموعة من الجيوش بعد ماراحو مواقعهم الدفاعيه
سوووو : تعويذه .. تعويذة ايه .. وازاي عمل التعويذه بعد ماطلع من السجن ولما كان في السجن ماعملهاش ؟؟
دراكولا : يابني افهم .. هي التعويذه دي مش بتبقى محتاجه حبشتكانات .. دم وطواط يتيم على دكر نمل اثيوبي على شنب قنفد عازب .. الحاجات بتاعة السحره وكده
سوووو : يعني هو انتهز فرصة انه طلع من السجن وجاب الحبشتكانات دي وراح عامل التعويذه
دراكولا : بالظبط كده .. وبعد ماعملها راح مِقَّرّي على الجنود بتوع الحرس الوطني .. ومن ساعتها الجنود دول بقو مابيموتوش .. وبيتغذو على الدم .. يعضو أي حد ويشربو دمه ويمصّوه .. وبعدها اللي اتعض بيتقلب ويبقى زيهم
سوووو : وقامو عضوك انت
دراكولا : انا اللي رحتلهم بنفسي عشان يعضوني
سوووو : ليه يعني؟؟
دراكولا : عبيط .. كنت فاكر انهم لما هيعملو كده هقدر انتقم من الظابط بتاع القسم
سوووو : وعضيته على كده ؟؟
دراكولا : وبعد ماعضيتو بقى دراكولا وبيمص دم الناس .. مش كده وبس .. ده بقى اكبر مصاص دم في الحرس الوطني كللو .. وبقى هو الرئيس كمان
سوووو : يا حلاوتك .. يعني الرئيس ده لسه عايش على كده ولا راح في الوبا ؟؟
دراكولا : لسه عايش .. وبياخد اشكال كتير على مر العصور .. وفي كل مره يعمل انه مات ويرجع من اول وجديد بشكل تاني
سوووو : طب وعلى كده في حد معاه وبيساعده ولا هو لوحده ؟؟؟
دراكولا : كل رئيس حواليه مصاصين الدم اللي بيساعدوه ويمصو دم الناس الغلابه .. والمساعدين دول بيعملو نفس اللي بيعملو الرئيس في كل فتره لما يلاقي الناس الغلابه هتنفجر من اللي بيحصل فيهم .. يغيرو اشكالهم .. والرئيس يقول انه بيعمل تغيير مساعدين
سوووو : كويس انه مابيقولش تغيير كبالن
دراكولا : ميييين؟؟؟
سوووو : لا ماتحطش في بالك .. طب وانت دلوقتي ناوي تعمل ايه .. ومستخبي هنا ليه ؟؟
دراكولا : انا مستخبي هنا بالذات عشان ده ابعد مكان ممكن يجي في بال رئيس الحرس الوطني .. وباتكتك واخطط للحظه المناسبه عشان اموته بجد .. وبعدها ابقى اموت نفسي
سوووو : طب وتموت نفسك ليه .. ماتقتله وبعدين تبقى انت الرئيس
دراكولا : المنصب بيغير حاجات كتير في الواحد مننا .. وانا بصراحه زهقت من العيشه وعايز اموت وارتاح .. انا عايش بقالي كتير وشفت ناس كتير اتمص دمهم وانا ساكت .. لكن هايجي اليوم اللي انتقم فيه من اللي كان السبب
سوووو : الله معاك .. بس في حاجه انا مش فاهمها .. انت كنت عايش ازاي طول الفتره دي من غير ماتمص دم حد .. ولا كنت بتمص برضه ؟؟؟
دراكولا : - متلعثما - ايه ؟؟؟؟
------
بعد ما سونيا جراهام وسامبا عرفو ان البيج بوص جاي في السكه .. قامو اتفقو مع ابويا وامي انهم هيربطوهم وعملولهم شوية مكياج كأنهم ضربوهم وبهدلوهم .. عشان البيج بوص لما ييجي ويشوفهم عاملين كده يفرح ويصرفلهم اوفر تايم .. وفعلا ابويا وامي كانو متعاونين جدا .. يعني مايرضيهمش ان الناس الغلابه دول يتئذو بسببهم .. وبعد ماربطوهم وكممو بؤهم وكللو بقى فل الفل .. دخل البيج بوص المخزن المهجور
.. وبخطوات كلها ثقه وحزم .. دخل الاوضه اللي فيها ابويا وامي
وكان البيج بوص ده .. هو نفسه ..
الدكتور.. رفعت اسماعيل
------
يتبع

سوووو