الثلاثاء، 25 شعبان، 1429 هـ

(24)مذكرات طفل .. طخين

!!! المحطة الابّعه وعششين .. الدفع قبل الرفع
----------------------------------

دخلت سونيا على الاوضه اللي فيها العيل الطخين واللي سامبا وعيد بيوصلوله الاكل لغاية عنده .. واللي من كتر الاكل بقى حاجه كده ولا الدرفيل .. وبمجرد مادخلت عنده ولقته نايم .. قربت منه بالراحه قوي .. وقعدت جنبه على طرف السرير .. وراحت بايساه في شعره وعينيها بتنزل دمعتين .. وقربت من ودنه وبصوت واطي همست وقالت
سونيا : كلها بكره وترجعلك ضحكتك .. هانت .. هانت يا تامر يا حبيبي
-----
اول ماقعد التوربيني وحط رجل على رجل .. رحت قاعد انا كمان على كنبة بتاعة ميكروباص كانت محطوطه كأنها أنتريه .. لمحت نظرة استغراب منه .. وعنده حق .. انا نفسي مش عارف جبت الجرأه دي منين اني اقعد من غير ما استأذنه ولا حتى احط في دماغي اني قاعد مع مجرم وقتال قتله .. بس يمكن اللي باعملو نوع من أنواع غريزة البقاء .. بما اننا في غابه يبقى لازم اعيش بنفس اسلوب الحيوانات المفترسه .. قبل مايهجمو على بعض .. بيقعدو يبصو على بعض الاول .. بيشوفو ايه هي النقطة الضعف المناسبه اللي ممكن يهجمو عليها .. وبمجرد مالمحت في عينين التوربيني نظرة الاستغراب دي رحت قايل
سوووو : الحكايه بمنتهى البساطه مصلحه .. ونفعني واستنفع
التوربيني : - وهو بيبصلي من فوق لتحت ومستغرب - مصلحة ايه؟
سوووو : - بصوت هادي - طبعا انت عارف ان تجار السوق السودا بيهربو دقيق التموين دلوقتي وبيبيعوه لصحاب الافران الافرنجي .. يتعمل جاتوه وعيش فينو وبسكويت وكده
التوربيني : - وهو بيؤكد على كلامي - تمام
سوووو : انا بقى عارف طريق مخزن فيه بتاع عشره طن دقيق من بتوع التموين
التوربيني : - ابتدى يهتم بكلامي - مخزن من مخازن التومين يعني؟؟
سوووو : لأ .. مخزن بتاع ناس سارقينه من بتوع التموين
التوربيني : وانت جايلي عشان اسرقه؟
سوووو : لأ .. عشان تنقلو لمخزن تاني
رمى السيجاره اللي كان بيشربها بعد ماخِلصت .. وراح دايس عليها برجله .. وقام من عالكرسي اللي كان قاعد عليه .. راح ناحية زير ميه موجود جنب باب العشه من جوا الاوضه .. وراح شايل الكوز البلاستيك بايده الشمال .. وشال الغطا اللي عالزير بايده اليمين .. غطـّس الكوز في الزير وملاه ميه وطلعه من الزير .. حط الغطا عالزير تاني بايده التانيه .. شرب بؤ ميه وبعدها راح دالق شوية من الكوز على ايده وراح غاسل وشه .. ومدّلي ايدو بالكوز .. قمت من عالكنبه وخدت الكوز من ايده وشربت بؤ انا كمان .. الميه طعمها غريب .. مالحه وريحتها وحشه .. لما لمح في عيني نظرة القرف من الميه .. مد ايدو عشان ياخد مني الكوز .. لكن لمحت في عينيه نظرة ابتسامه وسخريه مني لما قرفت من طعم الميه .. قمت رافع الكوز على بؤي تاني وشارب كل الميه اللي فيه .. وبعدها رحت ماددلو ايدي بالكوز .. وبكم القميص في ايدي التانيه بامسح بؤي .. شافني كده .. استغرب واتمسحت الابتسامه من على وشه .. وبان عليه الاهتمام بي
التوربيني : طب انت ايه مصلحتك في ان الدقيق يتسرق من المخزن اللي هو فيه ويطلع على مخزن تاني !!؟
سوووو : مصلحتي ان اللي هياخد منك الدقيق من ناحيتي
التوربيني : هممم .. بس الدفع قبل الرفع
سوووو : دفع ايه ورفع ايه ؟؟
!!! التوربيني : دفع حقي في النقل .. ورفع البضاعه وتوصيلها للمخزن التاني
سوووو : لا من الناحيه دي ماتقلقش .. انت مش هتاخد ولا مليم
التوربيني : - وهو مفنجل عينيه وبيطق شرار - نعم يا اخويا .. شايفني مؤسسة خيريه ولا تبع هيئة النقل العام .. ولا تكونش فاكرني هنقلهملك بـ توك توك !!؟؟
سوووو : لو سمعتني لغاية الاخر هتفهمني
التوربيني : قول ياسيدي وسمّعني
سوووو : هتاخد اللي أهمّ من الفلوس
التوربيني : مافيش أهمّ من الفلوس
سوووو : لأ في
التوربيني : ايه بقى ان شاء الله ؟؟؟
سوووو : الخوف مش هيعرف طريقه ليك .. تعمل كل اللي انت عايزه كأنك ماضي عقد مع ابليس
هرش التوربيني في قفاه وبان عليه انه بيفكر .. طلع سجاره تانيه ملفوفه من علبة السجاير اللي في جيبه وولعها بعود كبريت .. ونفخ في عود الكبريت وهو بيقولي
التوربيني : ومين قالك اني مش ابليس نفسه !؟
سوووو : ابليس مايقعدش في عشه وهو محاوط نفسه بناس يحموه .. ابليس مايخافش من أي حد مهما كان هو مين .. لكن انت خايف مني وانا حتة عيل طخين
ضحك التوربيني قوي وهو بينفخ الدخان .. قعد عالكرسي اللي كان قاعد عليه في اول مابتدينا كلام وبَصّـلي وهو بيبتسم
التوربيني : وايه اللي يخليك متأكد اني مش هسرق الدقيق وانصب عليك .. ولا حتى اقتلك واتاوي جتتك !!؟
سوووو : - وانا بابتسم - عشان حاجتين
التوربيني : اول حاجه
سوووو : مش هتعرف تبيع الدقيق ولا هتعرف تحطه في مكان متداري .. ولو جبته هنا ممكن الناس اللي معاك يلعب الشيطان بيهم ويفكرو يبيعوه لحسابهم .. وحتى لو الناس بتوعك ماعملوهاش .. الناس اللي حواليك لو شمّو خبر وعرفو ان في دقيق هنا .. هتلاقيهم اتلمو عليكم عشان ياخدو الدقيق .. خصوصا انهم جعانين .. والجعان مش بيخاف على عمره
التوربيني : - وهو بياخد نفس من السيجاره بالراحه قوي - وتاني حاجه
سوووو : انك هتعرف تبرطع براحتك .. وانت متطمن ان عين الحكومه مش هتعمللك حاجه
التوربيني : - باين عليه الاستغراب - ازاي؟؟؟؟
سوووو : اللي هياخد الدقيق منك .. ناس كبيره قوي في البلد .. ناس مسنودين وبيحبو يخدمو رجالتهم .. واللي انت هتعملو ده عربون محبه .. جـِميل هايشيلوهولك .. وواحده بواحده .. وانت مافيش أكتر من واحداتك
سند التوربيني ضهره عالكرسي وعينيه بتلمع بالشر .. خد نفس من السيجاره وهو بيسمع كلامي لكن عقله ماكانش معايا .. قربت منه ووقفت في ضهر الكرسي اللي هو قاعد عليه .. وابتديت اتكلم بصوت هادي وواطي
سوووو : متخيل يعني ايه انك تقدر تبيع مخدرات من غير خوف وقلق .. اللي مايعجبكش تتاوي جتته وانت متطمن ان القضيه هتتقيد ضد مجهول .. تبلطج عالناس وانت مرتاح .. تسرق ده وتنهب ده .. شغلانه ورا شغلانه هتلاقي نفسك قـَبّيت لفوق .. فوق في العلالي
التوربيني : - وكأنه بيكلم نفسه - ساعتها هبقى الملك على كل الناس .. وماحدش يقدر يقولي تلت التلاته كام
لما حسيت انه استوى وصدق كلامي رحت مطلع الموبيل واتصلت بـ خالد صالح
سوووو : خالد باشا معايا ؟؟؟
خالد صالح : - وهو مرتبك - هو في حد جنبك ولا ايه يا سوووو !!؟
سوووو : ايوه ياباشا .. انا معايا اللي هينقل الدقيق من المخزن اللي هو فيه ويوديه للمخزن اللي قلتلك عليه .. وعايز يسلم عليك
-----
ندى : هو شمهورش وسوووو اتأخرو ولا انا بيستهيألي؟
بشله : لا ياختي بيستهيألك .. وبعدين انتي خايفه على مين فيهم .. سوووو ولا شمهورش !!؟
ميمون : - وهو باصص لـ بشله وبيغمزله - شمهورش مين اللي هتخاف عليه .. ماهو متلطّم معانا في الشوارع بقاله كام سنه وهي مش طايقاه اصلا .. اكيد طبعا خايفه على سوووو
بشله : - وهو بيغمزلها - سيدي ياسيدي
ندى : - وهي وشها محمر من الكسوف - لا بقولكو ايه .. الحكايه ومافيها اني صعبان علي سوووو وقلقانه عليه مش اكتر من كده
ميمون : لا والنبي - وراح مقلد صوت ندى وحركاتها - خد بالك من نفسك يا سوووو
بشله : - وهو بيقلدني وعامل نفسه طخين - انا مش عشاني .. انا عشان طلخا
وقعدو يضحكو ميمون وبشله .. وندى وشها مكسوف وعماله تضربهم وتجري وراهم .. وفجأة .. طلع دراكولا وهو قالع ويادوب لابس عباية دراكولا اللي بيلبسها عادي .. بس لابسها على اللحم .. وحاطط فرده كاوتش على بطنه كأنها عوامه
دراكولا : - وهو مبتسم - هااا .. ايه رأيكم ياعيال؟؟
ميمون وبشله وندى : ههههههههههههههههههههههههههههه
دراكولا : - وهو متنح - بتضحكو على ايه يا عيال !!؟
ميمون : ايه اللي انت عامله في نفسك ده؟؟
دراكولا : انتو مش بتقولو سوووو هياخدني ونروح نصيّف !!!؟
بشله : تقوم تعمل في نفسك كده !!؟
دراكولا : لا اصل انا مابعرفش اعوم .. وقلت بدال ما اغرق منه ولا حاجه ومايعرفش ينقذني .. البس العوامه دي
ندى : مابتعرفش تعوم .. يالهوي يالهوي .. مش عيب عليك تبقى دراكولا كده ملو هدومك ومابتعرفش تعوم
بشله : - وهو بيقاطعها - قصدك ملو عوّامته
الكل ماعدا دراكولا : هههههههههههههههههه
دراكولا : بتتريقو علي عشان مابعرفش اعوم .. طب وانا ذنبي ايه .. ماهو على ايامنا ماكنش فيه بحر ولا بلاجات .. وكنا مركزين في شغلنا ومابنروحش نتفسح زيكم دلوقتي
ميمون : يا دراكولا ياحبيبي .. مانت عايش بقالك كتير بعد مابقيت دراكولا .. ماتعلمتش ليه العوم طول المده دي؟؟
دراكولا : ماكنتش لاقي اللي يفسحني ولا اللي يبقى صاحبي .. ماحدش فكّر في مره انه ياخدني معاه ونطلع نتفسح ونضحك ونلعب .. الكل كان بيخاف مني .. وعشان كده بعدت عن الناس كلها وجيت اعيش في المخزن ده .. عشان ابقى لوحدي .. ولما اتعرفت عليكم وبقيتو صحابي .. لقيتكم مافكرتوش تفسحوني ولا حتى تقولولي تعالى نخرج نلعب استغمايه .. عارفين لما قولتولي ان سوووو عازمني نروح نصيف ونبلبط في الميه .. فرحت قوي .. فرحت اني بقالي صحاب عايزين يلعبو معايا .. لكن اديكم اهو بتضحكو علي وبتتريقو علي عشان مش باعرف اعوم
ندى : خلاص ياعم .. خلاص بقى
ميمون : حقك علينا يا دراكولا .. ماتزعلش مننا
دراكولا : - وهو بيمسح دمعه نزلت من عينه - انا ماقدرش ازعل منكم - وهو بيبصلهم وبيبتسم - انا باحبكم قوي
وفي اللحظه دي دخلو اتنين - اللي كانو بيسرقو الدقيق وبيحطوه في المخزن - عليهم .. وفي جزء من الثانيه راح دراكولا حاضن العيال وطاير بيهم في سقف المخزن وبقى مشعلق رجليه في كمره حديد وحاضن العيال بايديه عشان ماحدش من بتوع المخزن يشوف ان في حد كان موجود .. دخلو الاتنين الحراس جوا وبصو عالدقيق
الأولاني : كويس ان الشِـوله ماحصلهاش حاجه
التاني : يحصلها حاجه ازاي .. هو في حد في البلد كلها يقدر يهوب ناحية هنا .. انت باين عليك مش عايش في مصر
الاولاني : اه والله عندك حق .. ده المكان ده آخر حاجه ممكن حد يفكر فيه ولا يشك ان صحابه ممكن يعملو حاجه غلط
التاني : معلوم .. طب ده حتى صحابات المخزن ده ناس ولاد عز من يومهم
الاولاني : لأ وايه .. وكبيرهم نضيف نضيف يعني
التاني : والاكبر منه .. ربنا مبارك في فلوسه .. نياهاهاهاهاع هاع هاع
وخرجو من المخزن وهم بيضحكو .. وبمجرد ماخرجو راح نازل دراكولا بالعيال عالارض بالراحه قوي
ميمون : طب والله اللي بيحصل فينا ده حرام
بشله : دي زي ماتكون عزبة ابوهم وبيقسموها على روحهم
ندى : طب واحنا ايه اللي نقدر نعملو ؟
دراكولا : انتو السبب
ميمون : السبب في ايه بقى ان شاء الله !!؟
دراكولا : ايوه انتو السبب .. لو كنتو وقفتو للي سرقوكم وخدتو حقكم بايديكم من أول مره .. ماكانوش يعملو اللي بيعملوه فيكم
بشله : نقفلهم ازاي بس .. دي البلد كلها معاهم
دراكولا : هم صحيح البلد كلها معاهم دلوقتي .. لكن بكره .. انتو اللي هتبقو البلد
-----
امي : بالك ياحاج
ابويا : مالو؟
امي : هو مين اللي مالو؟
ابويا : بالي
امي : لا مش قصدي بالك اللي هو بالك .. قصدي اني اقولك بالك يا حاج .. تقوم انت تقولي خير يا حاجه
ابويا : ياسلام .. ده في عُرف مين بقى الكلام ده؟؟؟
امي : في عُرف العوايد والتقاليد .. احنا اتربينا لما حد يقول لحاد .. بالك يا حاج .. يقوم الحد ده يقولو .. خير يا حاجه
ابويا : ماشي ياستي .. خير يا حاجه ؟؟
امي : بالك انا نفسي في ايه ؟؟؟
ابويا : في ايه !!!؟
امي : نفسي لما نرجع البيت .. نكلم سميحه اخت محروس ونيجي نزور سونيا .. واهو بالمره يشوفو بعض هي ومحروس
ابويا : انتي لسه حاطه الموضوع ده في دماغك؟
امي : اصلها اميره قوي يا حاج
وفي اللحظه دي بتدخل سونيا هي وسامبا وعيد .. وبمجرد مايدخلو يتجه سامبا عشان يربط ايدين ابويا ويكممه ويربط حتة قماش على عينيه
امي : - باندهاش واستغراب - خبر ايه يا سونيا .. مالك داخله علينا بالحنجل والمنجل ليه !!!؟؟؟
سونيا : بلا حنجل بلا منجل .. خلاص .. وقتكم خلص معانا
وتشير سونيا لـ عيد ان يقوم بربط ايدين امي ويكمم بؤها ويربط حتة قماش على عينيها
سونيا : - وهي بتبتسم ابتسامه شريره - غمي عينيهم .. خلي مستقبلهم غامض .. نياهاهاهاها .. نياهاهاهاها .. نياهاهاهاها .. نياهاهاهاها
سامبا : - وهو متنح وبيميّل على عيد - هي مالها قلبت كارتون ليه؟؟؟؟
-----
خرجت انا والتوربيني من العشه الصفيح ولقيت شمهورش واقف مع الناس اللي بيحطو ورق الشجر في قراطيس ورق وكأنه بيساعدهم .. مع انه عمال يسهيهم وياخد كل شويه كبشه من الورق الاخضر ويحطها في جيبه .. وبمجرد ما شافني انا والتوربيني خارجين قام مفزوع ومستغرب عشان كان متخيل اني مش هاخرج سليم .. التوربيني بص عاللي واقف على باب العشه وعلى اللي بيأمن العشه من ناحية الحاره وراح مشاورلهم .. قامو جايين وقاللهم
التوربيني : عايزكم تتصرفو وتشوفولنا عربية نقل .. وتشوفولنا قد اتنين تانين من رجالتنا .. عندنا مصلحه النهارده بالليل
سوووو : - وانا بقاطعه - لا النهارده مش هينفع .. خليها بكره الجمعه عالساعه خمسه ولا سته المغرب
التوربيني : ليه بس ؟؟
سوووو : عشان المخزن اللي هننقل فيه الحاجات يكون فضي من الحاجات اللي فيه
التوربيني : - وهو بيبص على رجالته - خلاص .. اتصرفو في اللي قلتلكم عليه النهارده .. وجهزو نفسكم لبكره
سوووو : وشمهورش هايجي بكره ياخدكم عالمخزن وتعملو الحوار
التوربيني : لا ياحلو .. لازم تبقى معانا
سوووو : ماتقلقش .. عندي مصلحه في مكان تاني .. هخلصها واجي اخلص عليكم
التوربيني : تيجي ايه ؟؟؟
سوووو : قصدي اخلص معاكم
-----
!! مصطفى شعبان : - وهو بيقلب في شوية ورق في ايده - غريبه قوي
منى زكي : - وهي بتنزل نسخة ويندوز اكس بي على جهاز توفيق بيه - هو ايه الغريب !!؟
مصطفى شعبان : انتي عارفه ان الدكتور رفعت اسماعيل كان ليه واحد صاحبه ساكن في فيلا قدام مدرسة سوووو في المعادي !!؟
منى زكي : طب وايه الغريب في كده ؟؟
مصطفى شعبان : الغريب ان الفيلا دي قبل مايسكن صاحب الدكتور رفعت فيها .. كانت طالعه اشاعات انها بيت مسكون بالاشباح وحاجات في السكه دي
منى زكي : وهو الدكتور رفعت اسماعيل مالو ومال الاشباح والبيوت المسكونه ؟؟
مصطفى شعبان : يا بنتي اصلا اصلا .. الدكتور رفعت اسماعيل عايش عالهسس ده
منى زكي : طب برضه ايه الغريب في كل اللي بتقوله !!؟؟
مصطفى شعبان : الغريب ان رفعت اسماعيل .. راح الفيلا دي واستضافو صاحبه بعد الحوار بتاع سوووو لما حصلت المشكله وجات قوات الامن وافتكرو انه ارهابي
منى زكي : - وهي بتعمل ريستارت للجهاز عشان نسخة الويندوز نزلت خلاص - عادي يا مصطفى .. ممكن يكون مجرد صدفه
مصطفى شعبان : طب وهو من الصدفه برضه .. ان بنت صاحب الفيلا .. تختفي في ظروف غامضه في نفس التوقيت ده .. وماتظهرش غير بعد ما الحوار بتاع سوووو في المدرسه خلص .. والناس بقو معتبرين سوووو شخص عادي
منى زكي : - وهي بتبص على توفيق عبد الحميد - هو الجهاز مش متعرّف ليه ؟؟؟
توفيق عبد الحميد : مش متعرّف على ايه ؟؟؟؟
منى زكي : ماهو كل جهاز لازم يبقى عارف ايه الحاجات اللي بتشغلّو
توفيق عبد الحميد : ايه ده .. هو الجهاز مش عارف اني انا اللي باشغلو .. طب ده انا حتى رئيس الجهاز !!؟؟
-----
شمهورش : وكتاب الله انا مافاهم حاجه
قال شمهورش الجمله دي واحنا مروحين من عند التوربيني وراجعين عالمخزن اللي فيه دراكولا والعيال .. وانا كنت مركز في حاجه تانيه خالص وماكانش عندي وقت ولا طولة بال اني اشرحلو الحوار كللو .. وقلت
سوووو : استنى بس لما نروح المخزن وانا افهمكم الليله كلها
شمهورش : انا خايف عليك يا صاحبي
سوووو : لو كل حاجه مشيت زي مانا حاطط في دماغي .. يبقى الحياه هتبقى فل
طلّع شمهورش شوية ورق شجر اخضر من جيبه .. وابتدى يلف سيجاره .. وبعد ماخلص لف راح مولعها
سوووو : هو ايه ده صحيح ؟؟؟؟
شمهورش : ده سانجو بلابل
سوووو : مين ياخويا ؟؟؟؟
شمهورش : سانجو بلابل .. يعني بانجو
سوووو : طب ماتقول بانجو ياعم .. قال سانجو بلابل قال
شمهورش : سانجو بلابل دي بالسُغه لمون
سوووو : لا ابوس ايدك بالراحه علي .. ايه السُغه لمون دي كمان؟؟
شمهورش : يعني بلغة السيم .. طريقة جديده في الكلام بنقول بيها كلام لبعضينا لما نبقى مش عايزين اللي حوالينا يفهمونا
سوووو : طب ودي ازاي بقى؟؟
شمهورش : بسيطه .. بنشيل اول حرف من الكلمه ونحط مكانه حرف السين .. والكلمه اللي بعد الكلمه دي .. بيبقى اول حرف فيها هو نفس الحرف اللي شيلناه
سوووو : لا ياراجل .. يعني لو عايز اقول (بوليس كبسه) .. هقول (سوليس بربر سبسه كركر) مثلا ؟؟
شمهورش : بالسبط ظاظا سده كركر
سوووو : يعني بالظبط كده !!!!؟
شمهورش : عفارم عليك
سوووو : قصدك سفارم عبده سليك عرعر
-----
انا باكره اسرائيل
انا باكره اسرائيل
وهييييييييييييييه
سونيا : الو
دكتور رفعت : ايوه يا سونيا .. ايه الاخبار عندكم ؟؟
سونيا : خلاص يابوص .. جهزنا كل حاجه
دكتور رفعت : ابوس ايدك ماتقوليش بوص دي تاني .. يابنتي خلاص الناس اللي بيقرو المذكرات عرفو انا مين خلاص .. قوليلي يا دكتور وقصري في الحوار
سونيا : حاضر يا دكتره
دكتور رفعت : لأ مش معنى اني اقولك بلاش بوص تقومي تاخدي علي وتقولي دكتره .. احترمي نفسك احسن اعمللك عمل على رجل تنين اسطوري واولع فيه بتلاته لتر بنزين خمسه وتسعين
سونيا : لا وعلى ايه تغرم نفسك وتجيب بنزين خمسه وتسعين .. خليها بنزين تمانين وخلاص
دكتور رفعت : هو حد لاقي البنزين التمانين دلوقتي .. تقوليش بقى مخدرات !!؟
سونيا : اه والله عندك حق .. ده انا جوز بنت خالتي شغال على تاكس وبيموّن ببنزين تسعين .. وشرط عليه انه قبل مايسلم التاكسي للي شغال بعديه .. لازم يفوّل العربيه
دكتور رفعت : ياااه .. ده خراب بيوت
سونيا : لأ ماهو ساعات بيجيب شوية ميه ولا زيت تموين .. ويروح دالقها في التانك
دكتور رفعت : طب والعربيه ماتبوظش على كده ياسونيا ؟؟
سونيا : احنا مالنا .. هي كانت عربية ابونا .. واصلا صاحب التاكس ده عنده تاكسيين تانين واربع تكاتك وميكروباظ مكيف .. يعني مقتدر ومش هيفرق معاه لما تاكس يحتاج يتصلح
دكتور رفعت : هممم .. حلو الواد جوز بنت خالتك ده .. ابقي هاتيه معانا في الشغلانه الجايه
سونيا : حاضر .. هقوللو يجيب السي في بتاعه .. ونعمللو انتر فيو
دكتور رفعت : المهم .. بكره انا وانتي هناخد بتارنا من سوووو ومن اللي عمله فينا
سونيا : وانا مش قادره استنى لبكره
!! دكتور رفعت : بسيطه .. اضربيلك قزازتين بيره على شريط صراصير .. هتلاقي نفسك بكره
-----
يتبع

سوووو

هناك 83 تعليقًا:

the ghost يقول...

هييييييييييييية انا اول واحد.اولا كل سنة وانت طيب وتفضل تدوينلنا-مش هى بتكتب كدة برضة-على فكرة دى تانى مرة اخش مدونتك وقريت كل بوستاتكبس مش عارف لية كنت بتجاهل بوستات طفل تخين دى على اى حال انا هارجع اقرى كل مذكرات طفل تخين علشان انا متلخبط

Sourah يقول...

رائع يا سوووووو كالعادة ..
و لو ان الموضوع جاب معايا "هونكلايسن" - تعبير جديد سمعته للدلالة على المواضيع دخلت في بعضها - عشان يعني اول مرة اقرأ فيها المذكرات دي ، بس بيعجبني اسلوبك الكوميدي جدا .
هرجع و ادور على المذكرات الـ 23 اللي فاتوا ، عشان ابقى عالموجة .

وزي ما بقوللك دايما راسي و كلامك حكم ..


و اخر الكلام سلااام ..!!!

ňįĝŗő يقول...

يا لهوي يا أحمد
انت إيه يا بني؟
إيه الجمودية دي يا عم؟
و عهد الله أنا حاسس كأني قاعد في السينما
إيه يا عم كم المتعة المتكلفة دي
خليط مشاعر و احساسات و مشاهد و حوارات رهييييييييييب
يعني اللي عاوز اي حاجة ماخلّتش في نفسه حاجة
جاااااااااااااااااامد يا سوووو

عاجباني قوي اللغة الجديدة دي
ماتعرفش آخد فيها كورس فين يا أحمد؟
أسلها صبانخ سخلت دروجبا سي فنتش سماغي دليل و سعشعت شديدة
يعني "أصلها دخلت في دماغي و شعشعت"
آه صحيح بخصوص الحوار ده
"الاولاني : لأ وايه .. وكبيرهم نضيف نضيف يعني
التاني : والاكبر منه .. ربنا مبارك في فلوسه .. نياهاهاهاهاع هاع هاع"
أنا هستأذن بقى يا أحمد
مش عاوز حاجة من زائير الكونغو سابقاً
مش عاوز؟!!!!!!!!!
طيب


يلا سلام

Two in One يقول...

ايه ده انا رابع تعليق .. مش ممكن !!
هههههه
طول عمري متأخرة في عالم التدوين
هو انا لسه ما قرتش بس بمضى حضور وارجع اعلق بس قريت تعليقك علي ان عندك فكرة لشهرزاد وشهريار
فكرة ايه ؟! هتعملوا مسلسل ههههههه

هو بص انا الفكرة مكتملة في دماغي بس مشكلتي الوقت وبعدين جه التمهيدي والبروبزوال والتويفل والسمينار كل الحاجات ديه خرجتني من المود وانا لما باجي اكتب بتقمص شخصية البطل واكتب بروحه وعلي لسانه وجيت دخلتت في قصة ادمان الشات وديه كانت بتجبلي اكتئاب وانا بكتب اصلا فاني ارجع اكتب ساخر محتاجة تهيئة نفسية شوية


ها فكرة ايه بقي ؟ :)
واستناني راجعة تاني اعلق ع البوست ان شاء الله


كل سنه وانت طيب

ســـــلام

SKOBL- Little Lazy Me يقول...

أحجز و أرجعلك

wa7ed 2ensan wnsan يقول...

صباح الفل يا عم سوووو ايه الدماغ دي يا عم ..

عجبني حوار النضافه والبركه دا اوي

لا وانت طلعت خِطِر اوي وانت صغير دانت ثبتت التوربيني تثبيته جامده

ودراكيولا دا طلع غلبان اوي مفيش دار ايتام تقبله ولا ايه

الشنكوتي الكبير يقول...

واد انت
رضان كريم

كل سنه واحنا اخوات دايما
ربنا يكرمك
سلاااااااااااااااااااااااااااام

اخوك ايهاب

SKOBL- Little Lazy Me يقول...

هههه .. يخرب عقلك ياد .. بص انت بجد بتعجبني أنا كنت قربت أنسى المذكرات دي من الأساس بس انت لحقتني بحلقة سقع مزيكا ..
بس ليه يا حبيبي تخبط في حلل الحكومة
التاني : معلوم .. طب ده حتى صحابات المخزن ده ناس ولاد عز من يومهم
الاولاني : لأ وايه .. وكبيرهم نضيف نضيف يعني
التاني : والاكبر منه .. ربنا مبارك في فلوسه .. نياهاهاهاهاع هاع هاع

ايه يا سوووو .. ده انت حتى اليومين دول متراقب يا بني .. بالراحة لأحسن انت عارف كلهم رحمة ..عادي زي ما السادات قال كلنا عبد الناصر يعني..

و ليه المألسة على مشاعر البت الصغنونة القطقوطة .. هه .. ليه بس ، تكونش متغاظ من سوووو الصغنن
يلا يا باشا .. بجد كان وحشني الواد سوووو بس ده شاكله ناوي على بلاوي ..

و لك كل التحيات

قوس قزح يقول...

ايه يا ابنى ده
انا حاسة انى بقرا لشيخ منصر
ايه الخطط و التكتيكات دى ده انت كارثة

و بعدين انت مش قلت دى هتكون اخر حلقة ؟؟


بس بجد انت وصفك هايل بتخلى الواحد شايف الاحداث
لا عبقرى فن بجد :)

مهندس مصري يقول...

مش عارف اقولك ايه يا سوو غير الله ينور عليك
كل سنة و انت طيب :)

سومه...مجنونه فى بلد عاقل يقول...

لو كنتو وقفتو للي سرقوكم وخدتو حقكم بايديكم من أول مره .. ماكانوش يعملو اللي بيعملوه فيكم
متهيالى دا سبب ضياع الحقوق تقريبا فى الدول العربيه كلها
ناخد على قفانا ونقول كماااااااااان
شوف العالم اللى بتشوف كل الكلام وتسيب حته منه المره اللى فاتت وافقت على اتحاد الشبكتين لكن نوسيت عزومه الكونتاكى
ياااه على الدماغ
انا قولتك عاوزه حقى ناشف
سومه_87

ـ-ـ- أحمد عبد العدل-ـ-ـ يقول...

ههههههه ... ايه ده ياسو؟
واضح انها سلسلة بس بصراحة ممتعة جداً وان كنت مش مجمع الخيوط أوى وحاسس انها زى الأحلام .. بس مكتوبة باتقان وحرفية عالية أوى
تسلم ايدك .. (مبارك) عليك الشهر الكريم .. تحياتى

سمر الشافعى يقول...

سمر؛ وعهد الله ماانا فاهمه حاجه هههههه

انا قبل مااعرف مدونتك كنت اسمع عن يوميات طفل تخين بس مكونتش اعرف ايه الحوار

هقرا اليوميات اللى قبل كدا وابقى اقولك

زى الهوا يقول...

انا داخلة مخصوص علشان اقول لشوية مدونات كدة بعزها , كل سنة وانتوا طيبين , وطبعا مدونتك مش هتخرج منهم


كل سنة وحضرتك طيب علشان رمضان , وربنا يبلغنا اياه , واكثر من الدعاء والصلوا , والتراويح ما تتفوتش إن شاء الله

اسكندراني اوي يقول...

سو يا سو
هو فيه ايه ولامؤاخذه
السلوك عندي دخلت كلها في بعضها
اسف على عدم التواصل من بعد اللقاء ولكن سوء حاله النت في اسكندريه كان مجنني
كل سنه وانت طيب
تحياتي

كيكى يقول...

سووووووووووووووووووووووو
يا
سوووووووووووووووووووووووووو
ياسووووووووووووووووووووووووووو
ازيك
ازيك
ازيك
اييييييييييييييييييييية
اخبارتك
كل سنة وانت طيب
كل سنةوانت مبدع
كل سنة وانت متطور
كل سنة وانت فنان
كل سنة وانت بخيرررررررر
يانهااااااااااااااااااااااار
تصدق كنت هنسى اقولك
كل سنة وانت طيب بمناسبة رمضااااااان
سورى بقى اكل الكشرى اثر علية
ههههههههههههههههههه
يارب دايما تكون بخير
وبصحة وسعادة الهم ما امين
عوووووووووووووووووووووووووو

TAFATEFO يقول...

بصراحه

أنا بحب أوي تدويناتك

من ساعة ما بدأت مذكرات طفل دي وهي مش عاجباني .. وكل شويه أقول هتخلص امتى .. بس بينك اتعديت من نبيل فاروق وعمرها ما هتخلص

يا ريت رأيي ميزعلكش .. بس وحشه بصراحه

بطوط حبوب يقول...

والله يا عم سووووووو كنت هقولك كده
عمرك اقصر من عمرى :D
كنت هقولك اشرحلى خط المدونه لانى غايب عنها من فتره

:D
ومش فاهم حاجه

جمعاوي يقول...

السلام عليكم يا سوووووووووووووو

ومتشكر جدا على السينما اللى لسه خارج منها دي فعلا (تقرأوكأنك ترى الأحداث بعينيك)تن ترا را ترر رن

وربنا يخليك لينا ويخلى لينا تدويناتك الجامدة

ومش عار انت حكيت هنا عن مغامرات القسم اللى حكيت عنها يوم دار مزيد واللا لسه بس أكيد هذا المعين لا ينبض

مع تحيات الشاب الى كن قاعد ساكت يوم دار مزيد ومعملش حاجة غير انه كان بيرد على التليفونات اللى كان بتجيله
ولم تسمع صوته الا بعد التليفون وهوه بيقولك :0-ايه ايه اللى حصل ما سمعتش اخر لقطة

عارف لنك اتخنقت منى وقتها جااااامد بس معلش لو كنت تعرف اللى فيها كنت عذرتنى

أصل الموضوع بقى انه .........


ايه الرغي بتاعي ده ....

المهم احب اقولك اني اتشرفت بيك والله والحاجة الوحيدة اللى نفسى تبطلها لألألأ مش دي اللى فى دماغك ......أيوه نفسى فعلا انك تفصل مع دكتورة عواطف خالص علشان نفضل نحبك انا وبطوط
هههههههههههههههههههههههههه

بطل ضحك بقى ويلا سلام

Soooo يقول...

the ghost

اهلا بيك لتاني مره وياريت تعتبر مدونتي هي بيتك ومطرحك وتنورني بزيارتك دايما

وياسيدي انا لي الشرف ان شخابيطي عجبتك وباتمنى انك تقرا المذكرات وباتمنى من ربنا انها تعجبك

وكل سنه وانت طيب ورمضان كريم




سلاموووووووووووز

Soooo يقول...

Sourah

الله يكرمك يارب
وياستي كلنا في الهولكلايسن طبيعي يعني

وباتمنى انك تقري المحطات اللي فاتتك وباتمنى من ربنا انها تعجبك يارب

وكل سنه وانتي طيبه ورمضان كريم




سلاموووووووووز

Soooo يقول...

ňįĝŗő

سليب حرنكش سارتي هاو هاو
يعني حليب هارتي

والله ليك وحشه يابو النجاجير
ايه ياعم مش هنشوفك عشان تديني المنديل المحلاوي اللي وعدتني بيه ولا ايه

كل سنه وانت طيب وربنا يعيد عليك وعلينا الايام المتباركه دي على خير ان شاء الله
ورمضان كريم




سلاموووووووووووز

Soooo يقول...

Two in One

ابسطي ياستي
ولو اني ولا بتفرق معايا رابع تعليق من عاشر تعليق .. وكفايه انك تعبتي نفسك وعلقتي

وياستي الحوار اللي اقصده ان الف ليله وليله تبقى حاجه في الايام بتاع دلوقتي زي مانتي عاملاها .. بس مع ربط الحوار بمشاكل دلوقتي
واعتقد انك كنتي عامله كده .. بس المشكله اني نسيتها وماكنتش لحقت حفظتها عالجهاز

وكل سنه وانتي طيبه ورمضان كريم



سلاموووووووووووز

Soooo يقول...

SKOBL- Little Lazy Me

خبر ايه ياسكوبل
هنا مافيش حجز ياعمنا
هنا تخش وتنورني بضحكتك وبتعليقك على طول

وياسيدي انا ولا خبطت في حلل الحكومه ولا حاجه
واللي شايفني غلطت في حد يقول

وتابع باقي المذكرات وانت هتشوف سوووو هل فعلا هيعمل بلاوي .. ولا اي هبل في الجبل

وكل سنه وانت طيب ورمضان كريم




سلاموووووووووووز

Soooo يقول...

wa7ed 2ensan wnsan

يا عبده ياخويا .. احنا لينا الا البركه والنضافه
طب ده حتى دول الاصل

وعلمك علمك علمك .. سوووو ده كان مجرم زمان وهو صغير
بس لما كبر وعجّز .. اتهد حيله يا ولداه

ولو تعرف اي ملجأ ممكن يتكفل بدراكولا ويوفرلو اربعه رتل دم فريش كل يوم .. انا مستعد اكلم دراكولا واوديه بنفسي هناك

وكل سنه وانت طيب ورمضان كريم




سلاموووووووووووز

Soooo يقول...

الشنكوتي الكبير

وكل سنه وانت طيب وان شاء الله في زي الايام دي تكون في عش الزوجيه ويكون بالك مرتاح يارب
ويكون معاك الموبيل الثري جي




سلاموووووووووز

Soooo يقول...

قوس قزح

كارثه ليه بس
وشيخ منصر مين
طب ده حتى سوووو ده اغلب من الغلب والله

وهانت ياستي .. فاضل حلقه ونص ونلم العده

وكل سنه وانتي طيبه ورمضان كريم
وسلامي لبنتك اللي بتحكيلك حكايات بالهندي



سلامووووووووووووز

Soooo يقول...

مهندس مصري

وينور عليك ياهندزه
احنا الحمدلله شغلنا نضيف وبنريح الزبون

وكل سنه وانت طيب ورمضان كريم ياهندزه




سلاموووووووووووز

Soooo يقول...

سومه...مجنونه فى بلد عاقل

لألألألأ
راجعي ردي على تعليقك هتلاقيني بقولك اني موافق اننا نعمل تنظيم الصرف والماس وبس
ولا قلتلك عزومة كنتاكي ولا كشري
وبعدين مانا قعدت اتحايل عليكم حد يجي ياكل معايا بدل مانا داخل عالحاج كنتاكي لوحدي وقومته من عالمكتب وخليته يعمللي طاجن (دينر بوكس) لي لوحدي

اقولك .. ليكي عزومه عندي ياستي
هو احنا عندنا كام سومه مجنونه يعني

وكل سنه وانتي طيبه ورمضان كريم




سلاموووووووووووز

Soooo يقول...

ـ-ـ- أحمد عبد العدل-ـ-ـ

طب ليه كده بس
مانت بادي كلامك حلو
ليه تقفله بـ (مبارك) عليكم شهر رمضان
خليها .. يا (جمال) شهر رمضان

ياسيدي انا لي الشرف ان شخابيطي عجبتك وباتمنى انك تقراها من الاول ويارب تعجبك

وكل سنه وانت طيب ورمضان كريم




سلامووووووووووووز

Soooo يقول...

سمر الشافعى

ياستي اقري اللي فاتك على اقل من مهلك
ويارب تعجبك وتتابعي الحلقه اللي فاضله

وكل سنه وانتي طيبه ورمضان كريم




سلامووووووووووووز

Soooo يقول...

زى الهوا

وكل سنه وانتي طيبه يا ميس موحه
ولو اني متضايق عشان هترجعي للشغل تاني وهتقطعي الزيارات

وان شاء الله هنواظب عالتراويح وربنا يتقبل صالح الاعمال يارب



سلامووووووووووووز

Soooo يقول...

اسكندراني اوي

باشااااااااااا

وانا اقول المدونه نورت ليه .. اتاري ده نورك

بص يا استاذي .. دي عباره عن حدوته في قالب فانتازي غريب باجربه لأول مره
ياتنجح .. يا ماتنجحش

انما في مواضيع تانيه مستقله هتلاقيها عالمدونه
ياريت حضرتك تقراها بروقان وتقولي رأيك

وبجد بجد انا سعيد اني اتعرفت على شخصيه محترمه زي حضرتك .. وهابقى سعيد اكتر لو قدرنا نتقابل تاني ان شاء الله

وكل سنه وانت طيب ورمضان كريم




سلاموووووووووووز

Soooo يقول...

كيكى

سامع زيطتك من وانا على باب البيت

وحشتيني بطريقه انتي مش متخيلاها والله يابنت يا كيكي

كل سنه وانتي طيبه وان شاء الله ربنا يتقبل منكم ومننا صالح الاعمال يارب

رمضان كريم





سلامووووووووووووز

Soooo يقول...

TAFATEFO

ده انت اغرب من الغرابه
!!!!
يعني في المواضيع اللي باكتبها غير المذكرات .. ماشفتش وشك ولا علقت ولا قلت وجهة نظرك في اي حاجه ؟؟
وجاي دلوقتي تقول مش عارف ايه مش عاجبك !!!!؟

لو مش عاجباك ياسيدي ماتعلقش ولا تقراها

طب مانت مدونتك مش عاجباني
رحت عندك وقلتلك كلامك وحش ومش عاجبني !!؟؟
لأ
رحت لقيت كلامك مش ماشي مع كلامي ودماغي قمت سايبها ومشيت

اتعلمو اسلوب التواصل الصح بقى

غريب قويي بجد

Soooo يقول...

بطوط حبوب

عمرك اقصر من عمري؟؟؟
اه صحيح
مانت منوفي

بص يابطبوط .. المذنكرات دي حاجه باكتبها جنب باقي الشخابيط اللي باشخبطها
باتكلم فيها باسلوب جديد ومش عارف ايه صداه لغاية دلوقتي
لكن على اي حال .. مدونتي تحت أمرك ودعبس فيها وشوف ايه النظام

اعمللك معايا شندوشت بلوبيف؟؟؟؟؟




سلاموووووووووووز

Soooo يقول...

جمعاوي

وعليكم السلام ورحمة الله وبركاته

وبجد ماتتصورش قد ايه انا سعيد انك نورتني في مدونتي المتواضعه وياريت تعتبرها زي مدونتك تمام وتشرفني دايما بزيارتك وبتعليقك

ومين قال اني اتضايقت منك ولا حاجه ياعم .. خالص والله
واكيد طبعا في سبب انك كنت ترد عالموبيل .. وربنا يجعله خير يارب

اما بخصوص دكتوره عواطف .. فدي يا استاذي الفاضل والدة أعز اصدقائي .. وبجد باعتبرها والدتي .. بعد وفاة والدتي الله يرحمها
وصدقني هي طيبه وعسوله جدا جدا .. هو بطوط اللي تلاقيه بيتبللى عليها
ده عيل عينه خضرا وشايف نفسه ياعم

وبجد اتشرفت بمعرفتك .. وباتمنى اننا نتقابل على كل خير يارب

وكل سنه وانت طيب ورمضان كريم




سلاموووووووووووز

(احمد سكر ) يقول...

يخربيت عقلك

واااد يا سوووو

انا هطبع البتاع دا ف البرنتر

وهاخدهم معايا الشغل

وانا مسافر اى سفريه اتسلى

بجد روووعه

يابتاع دراكولا انت


تحياتى

احمد سكر

Z_Diva يقول...

eh elshoyaka de bas :D

72e2y dma33; 3alya 3alya, wedarba bta3 a5dar melly m3 shamhouresh kman :D

hat elba2y b2a yalla, btal tb3t fen ya kabtin

دعاء مواجهات يقول...

ازيك ياعمنا

اية اخباراتك


كل سنة وانت طيب ياعم

تصدق ان اكتر حاجة صح اتقالت هنا ف المدونة دى

منك شخصيا

انك رغااى اوى

ربنا يعينك عليك ياعم

ديما منورنى

بيس

عروسة ننوسة يقول...

سوو كل سنة وانت طيب
على فكرة انت كتاباتك ممتازة بجد وبحب اتابعك اوى

TAFATEFO يقول...

أنا والله مش قصدي أزعلك .. وبالعكس بقى .. ده أنا علقت كتير .. ولو معملتليش بلوك مش هبطل أدخل وأقراها

ده فيه تدوينات ليك أنا حافظها .. ومن الناس اللي لما قرت نقدك للأفلام .. بقيت أستنى أعرف رأيك في الفيلم قبل ما أدخله

أنا زي ما بدأت تعليقي اللي آسف انه زعلك .. أنا بحب أوي (جداً جداً جداً بقى) .. تدويناتك
ومش بقول كده علشان انت زعلت والله .. أنا فعلا بحب أسلوبك جداً .. وآسف إذا كان رأيي ده زعلك .. بس أنا أصلي مينفعش أزعل وأتقمص :D علشان كده كده هدخل وأقراها

أرجو انك تقبل اعتذاري ومتكونش زعلان .. وليك علي أعلق كل يوم يا سيدي .. أنا مقدرش ان واحد بيضحكني ويبسطني كل ما أقراله حاجه .. يوم ما أقوله حاجه تزعله

أنا آسف .. ومستني منك تقول انك قبلت اعتذاري .. المسامح كريم .. وسيادتك أصل الكرم

TAFATEFO يقول...

معلش استحملني هقول حاجه كمان

أنا مشفتش رد حضرتك على تعليقي الأولاني لما قلتلي أول زياره ليك .. عندك حق تزعل .. اني قلت تعليقين وحشين عن نفس الموضوع

والله دي يمكن الزياره الألف .. والمدونه عاجباني جداً جداً .. وبقرأ مدونتك من أيام سعد نبيهه .. علشان أنا كمان مكنتش فاهمها أول مره سمعتها وأنا صغير (وكمان اسم مجلة آخر ساعه مكنتش بعرف أقراه مكتوب زي ما يكون اخها عه:D) .. وعجبتني أوي حكاياتك في البلد .. وتدوينات كتيييير عجبتني أوي.

وحتى لما دخلت فيلم حسن ومرقص .. كنت برضه مستني أعرف رأيك فيه .. وكان في جملة حوار غجبتني بتاعة نجيب الريحاني وبديع خيري .. وحبيت أكتبها .. وبعدين قلت رأيي في الفيلم انه كويس بس في حاجات مش منطقيه أكيد سووو اللي بحب أوي تدويناته ونقده للأفلام (اللي بيبقى زي ما شفناه مش زي اللي بيتكتب في الجرايد) يقول كل حاجه.

أنا بحاول أعتذر .. يمكن عمال أرغي وأقول كلام ملوش معنى .. بس أنا والله بحبك جداً (حتى لو مش شفتك قبل كده) .. وكل ما أروح مكان يكون فيه مدونين .. ببقى بدور على ناس في وشوش اللي موجودين منهم حضرتك والله .. وميخلصنيش أبدا انك تكون زعلان مني .. وهفضل أعتذر لغاية ما تقبل اعتذراي ومتبقاش زعلان.

آسف جداً .. اني زعلتك .. وأتمنى انك تقبل اعتذاري.

حنين القلب يقول...

ايييييييييييييييييييييوه يا جدعان

والله حسيت انى بتفرج على فيلم ايه يا عم سوووو الجمال ده والله تحفه بجد كل سنه وانت طيب

يوميات فنانه مفروسه جداا يقول...

اولا رمضاااااان كريم

ثانيا مبتسألش عليا ليه يا اخ سوووو

ثالثا

بقي الراجل نضيف والتاني مبارك في فلوسه وبيلفو ورق شجر في الورق
هعهعه هع هع هعهع هههههههعععععع

نياههاهاهاهاهاه

دي ملوخيه خضرا يا بابا مش ورق شجر افهموها بقي هتودونا في داهيه

بس جامده طريقة الكلام وربنا

المذكرات خطيره المره ديه وطويله
الساحل الشمالي عمل احلي شغل

الله يسهلوووووو يا عمنا
واحنا مش عارفين نروووح حتي عييين حلوان

طيب

ربنا يستر عليك بقي ومحضرالك العيش والحلاوه وكتيير عشان محدش يبصلك في اللقمه

كل سنه وانت طيب

سلام

ToOoKa يقول...

كل سنه وانت طيب يا سووو

وشد حيلك بقه فى رمضان

أختك توكا

سومه...مجنونه فى بلد عاقل يقول...

هييييييييييييه عندك واحده بس طبعا هى انا :)
مورسيييييييييييييه

Z_Diva يقول...

ramdan kariem ya m3lmyyy

رندا يقول...

سوو الجميل

رمضان كريم عليك وعلى اسرتك الكريمة
تقبل الله صيامك وقيامك وغفر الله ذنبك

اراك ان شاء الله بعد رمضان

رمضان كريم

رندا

كيمو يقول...

جامدة موت يا سووووو

د/مروة المعداوى .....قباحة سابقا يقول...

هههههههههههههه

انت ملبوس و لا ايييييييه

مين الناس اللى داخله طالعه دى

اللهم احفظنا الشر بر و بعيد

اشتاتا اشتوت

الواد سووووووووو طلع مخاوى يا جدعان

خازوق كوبسه

قصدى كابوس مفزع

تف يابنى تلت مرات على كتفك الشمال و استهدى بالله و ناه

اتغطى متفضحناش

لا بجد بجد بجد

فطستنى من الضحك و كلو كوم و دراكولا دا كوم الحته دى مقولكش

يلا كدا كفايه
انا مش ناقصه عفرته
انا ملبوسه اصل
المستشفى لبسانى
عااااااااااااااااا
عاااااااااااااا

تشاااااااااااووووووووووو

وومن يقول...

ايه ده بتنزل حلقات من غير ما اعرف

ماشي ماشي

بس بجد بجد جااااااااااااااامد موت متخيلاك وانت واقف ورا التوربيني وزي ما تكون بتوسوسلة

هههههههههههههههههههههههههه

طي اقول ايه ولا ايه بجد الحلقة دي كنت مستنياها باقلي فترة

بس تستاهل بجد

متشوقة للباقي

تحياتي

Sha2loob يقول...
أزال المؤلف هذا التعليق.
Sha2loob يقول...

سامد جوجو يا سوووو
سيه أوأو السلاوة حامد سيي دور
سس بابا سيعت ضارو سقت واوا ستير كورة سي فارو سصف واوا اللي سيعمله بوبا السوربيني تاتا
سعلش ماما سعليقي تيتو ستأخر ميمي سويه شوشو
سل كورة سنة ساسا وسنت أوأو سيب طاطا
سايزين عوعو سشوفك ناو سريب قرقر

حنين القلب يقول...

كل سنه وانت طيب يا سوووو
وكل سنه وانت اللى الله اقرب
واللهم تقبل منك صيامك وقيامك

امل يقول...

كل سنة وانت بألف خير
رمضان كريم

TAFATEFO يقول...

كل عام وانتم بخير

قوس قزح يقول...

يارب
كلما طرق هذا العبد بابك
أفتح له كنوزك
و سخر له عبيدك
و ابسط له رحمتك
اللهم اجعله من الصائمين القاثمين
الركع السجود
و بارك له فى شعبان و بلغه رمضان
فى يسر و سلامة و امان
اللهم امين

كل سنة و انت الى الله اقرب

totaaaa يقول...

سوووووووو

انا بس عايزة اقولك

كل سنة وانت طيب
وبس

سلام

Soooo يقول...

(احمد سكر )

ياسكروز انت بس تؤمر
ولو اني كان نفسي تاخدني معاك في السفريه بدل ماتطبع ولا حاجه
وانا هحكيلك واسليك احسن من اتنين كيلو لب

وكل سنه وانت طيب



سلامووووووووووووز

Soooo يقول...

Z_Diva

بتاع اخضر ايه بس
تبنا والحمدلله

وحاضر ياستي هستمر في المذنكرات ويارب تعجبك

وكل سنه وانتي طيبه ورمضان كريم




سلاموووووووووووز

Soooo يقول...

دعاء مواجهات

دعاء مواجهات عندنا
يا مرحبا يامرحبا
بس خدي هنا
مين ده اللي رغاي بقى ان شاء الله؟؟؟
افضحك قدام الرأي العام
ها
يلا .. ان الله حليم ستار

رمضان كريم وكل سنه وانتي طيبه




سلامووووووووز

Soooo يقول...

عروسة ننوسة

الله يكرمك يارب
والف شكر على كلامك الجميل وربنا يوفقك في موضوع الكتاب يارب

ورمضان كريم وكل سنه وانتي طيبه




سلامووووووووووز

Soooo يقول...

TAFATEFO

بص يا احمد
قبل اي حاجه انا مش زعلان من شخصك قد مانا زعلان من التناقض اللي انت فيه

يعني اولا .. انت ماعلقتش عندي غير مرتين بس
اول مره كانت في موضوع البرص وقلت في تعليقك الحمدلله ان المذكرات خلصت .. وده دليل على انك ماقريتهاش ولا تابعتها
انت بس كنت بتلاقي كلام كتير تقوم واخد بعضك وماشي
مع انك في مدونتك بتعمل مواضيع عايزالها صفحات كتابه مش صغيره

وتاني تناقض انك في تاني تعليق ليك قلت انها وحشه .. وش كده .. مع انك عند احمد عاطف المخرج قلت ان اللي بيميز سوووو في كلامه عن السينما انه بيفصص الفيلم وبيقول كل حاجه فيه .. مش زي نقاد اليومين دول بيقولو الفيلم منيل بنيله وخلاص
وانت بنفسك قلت انها وحشه وش زي النقاد المنيلين بنيله

وبعدين ياسيدي في التدوين .. كل واحد يتكلم براحته
يعني انت بتتكلم في مواضيع مش باهتم بيها .. غيري ممكن يهتم ويعلق عندك ويتفاعل معاك
انما انت مش بتعلق عندي من مبدأ التفاعل .. ولا تفاعل ايجابي ولا سلبي
انت جيت اول مره قلت البؤ اللي قلته
وتاني مره قلت نفس البؤ بس باسلوب اكثر سلبيه

نصيحتي ليك
لما تيجي تنتقد اي حاجه في الدنيا .. ابقى اقراها وحكّم عقلك كويس قبل ماتقول اي كلام وخلاص
كلامنا هو اللي هيفضل مننا

كل سنه وانت طيب ورمضان كريم




سلامووووووووووز

Soooo يقول...

حنين القلب

ايووووووووووه
طب والله ليكي وحشه

ياستي الله يكرمك على كلامك الحلو ده

وكل سنه وانتي طيبه ورمضان كريم

ملحوظه
هتعزمينا عالفطار ولا نيجي ونجيب فطارنا معانا؟؟؟؟؟؟




سلامووووووووووز

Soooo يقول...

يوميات فنانه مفروسه جداا

والله العظيم ليكي وحشه وليكي حق تزعلي مني
حقك علي والمسامح كريم يا ستي

وربنا يسعدك ويكرمك ويبسطك ويرضيكي دنيا وآخره يارب

وكل سنه وانتي طيبه ورمضان كريم

ملحوظه
المذكرات خلصانه من قبل ما اسافر الساحل اصلا .. ولاو هو قر وخلاص يعني




سلاموووووووووووز

Soooo يقول...

ToOoKa

ياااااااااااااه
طب والله العظيم فرحت لما لقيت اسمك منور المدونه
ايه يابنتي اختفيتي فين
لعل المانع يكون خير ان شاء الله

كل سنه وانتي طيبه ورمضان كريم





سلاموووووووووووز

Soooo يقول...

سومه...مجنونه فى بلد عاقل

لأ بقولك ايه ياسومه
انتي هتيجي تتجننيلي هنا
حاسبي
انا مجنون من زمان بس كنت مخبي

وكل سنه وانتي طيبه ياستي ورمضان كريم




سلامووووووووووز

Soooo يقول...

رندا

الله يكرمك يارندا
وكل سنه وانتي طيبه ورمضان كريم


ملحوظه
هي فين اسرتي دي اصلا؟؟؟؟؟؟




سلاموووووووووووز

Soooo يقول...

كيمو

حليب هارتي
الله يخليكي ياصاحبي
وكل سنه وانت طيب ورمضان كريم

اتجدعن بقى عايزين نفرح فيك على العيد




سلاموووووووووز

Soooo يقول...

د/مروة المعداوى .....قباحة سابقا

والله ياقباحه يا بنتي
انتي من ناحية اللبس فانتي اكيد نلبوسه بعفريت واحد اتداس بنفس الاتوبيس الفاخر اللي داس على اللي عندك في الموشتشفى

لكن انا مستعد اكلملك دراكولا يجبلك واحد صاحبه مخاوي يطردلك العفريت واي حشرات تانيه في الاوضه

وكل سنه وانتي طيبه ورمضان كريم




سلاموووووووووووز

Soooo يقول...

وومن

مش هارد على كلامك ولا تعليقك غير لما ترجعي تدوني زي زمان

وكل سنه وانتي طيبه ورمضان كريم





سلاموووووووووز

Soooo يقول...

Sha2loob

يخرب بيتك
انت ليك في اللون ياد ولا ايه؟؟؟
انا من الاول قلت عليك ابن حِنت ماحدش صدقني

كل سنه وانت طيب ورمضان كريم يابو الشقاليب

ملحوظه
بافرح بيك لما بتعلق عندي .. ماعرفش ليه



سلاموووووووووووز

Soooo يقول...

امل

وكل سنه وانتي طيبه يا امل ورمضان كريم




سلاموووووووووووز

Soooo يقول...

قوس قزح

يعلم ربنا انا باعزك قد ايه
وكل يوم بتزداد معزتك جوا قلبي قوي

ربنا يسعدك ويكرمك ويبسطك ويرضيكي دنيا وآخره

وكل سنه وانتي طيبه ورمضان كريم




سلامووووووووووووز

Soooo يقول...

totaaaa

الاصيل طول عمره اصيل والله

كل سنه وانتي طيبه ورمضان كريم
ربنا يسعدك ويكرمك ويبسطك ويرضيكي دنيا وآخره يارب




سلامووووووووووووز

قلب مصرى يقول...

كل رمضان وحضرتك بخير
اللهم بلغنا ليلة القدر واجعلنا من عتقاء هذا الشهر

جنّي يقول...

السلام عليكم ورحمة الله وبركاته

كل عام وأنتم بخير
كل عام وأنتم صائمون
كل عام وأنتم مصلون
كل عام وأنتم قائمون
كل عام وأنتم قانتون
كل عام وأنتم متصدقون
كل عام وأنتم مغفور لكم
كل عام وأنتم معتمرون
كل عام وأنتم قائمون ليلة القدر
كل عام وأمتكم الإسلامية منتصرة

اللهم بلغنا رمضان وأهلّه علينا بالسلامة والإسلام واليمن والبركات والنصر والتمكين

أخوكم
سعيد

همس الاحباب يقول...

رمضان كريم
كل سنة وانت طيب يا راجل يا طيب

maxbeta3zaman يقول...

خيال جميل وخفة ظل احببتها كثيرا كثيرا يسعدنى أن أكون من قارئي بوستاتك التى تبعث على الابتسام والقهقهة فى كثير من عباراتها تشرفنى زيارتك لبلوجى "دكانى" الجديد بدل الفاقد وهو بجوار محل العصير مباشرة

NilE_QueeN يقول...

عمو عمو عمو

الواضح انى مفهمتش حاجه

ممكن توضح

________
المشكله انى جيت متاخر فا مش واخده بالى فى ايه

غير معرف يقول...

ايه دهههههههههههههه انت توهتني مش فاهمة حاجة هههههههههههه

DR.roro

sooosaia يقول...

اولا ازيك يا سوووو

ثانيا انا قريت الحلقة من اول ما نزلتها بس ماكنتش ها اقولك رأيي لانى كنت قررت انى اقراها من غير تعليق ولسبب تانى اتمنى انك تتقبله انها تعتبر من اقل الحلقات اللى انت كتبتها ده مجرد رأيي مش هيقلل من شأنك بالعكس انت عارف انا بقولك رأيى بكل صراحه واسفة لو كنت اتعديت حدودى بس انا بقولك ان شاء الله في تقدم ومنتظرة منك الحلقة الجاية واكيد هتكون جميله زى كل كتابتك واسفة لسلبيتى انى مش ها اقولك رأيي مرة تانيه

وربنا يكرمك ويبسطك ويوفقك لكل اللي تحبة وتتمناه