الاثنين، 26 محرم، 1429 هـ

(1)مذكرات طفل .. طخين

مقدمة .. طالبه معايا اقولها
-------
جوه كل واحد مننا محطه ولا كام محطه هم اللي اتحكمو فيه وفي شخصيته
وجوه كل واحد مننا طفل .. طفل شقي عايز يلعب ويتنطط
وجوايا طفل طخين .. عايز يضحك ويضحك الناس .. يضحكهم لنفسهم ومن نفسهم
مش يضحكهم عليه .. وعلى طخنته
بس قبل ما ابدأ في حكاية محطاتي أو مذكراتي .. عايزكم تنسو كل حاجه
.. انسو ان في حاجه اسمها مستحيل
.. انسو انا مين وعندي قد ايه
.. انسو كمان انتو عايشين فين وليه
خليكم اطفال زيي .. وسيبو الطفل اللي جواكم هو اللي يعيش الحدوته
وعيشو معايا محطاتي .. أومذكراتي


مذكرات طفل .. طخين



المحطة الاولى .. طفولة مشرده
--------------------------
اعرفكم بنفسي .. انا واحد تخين .. بس كل صحابي بيقولو علي طخيــــن .. وفي منهم ناس منهم بتناديني باسم مش باطيقة .. كعبول .. وفي اسم تاني كمان .. حبظلم بظاظا .. باحس انه اسم منفر وبيخليني اتنرفز وانا لما باتنرفز .. ما باعتقش .. باكل أي حاجه قدامي
انا مش هاقعد ارغي ولا اتكلم كتير .. انا هاحاول افتكر اهم المحطات في حياتي .. حاكم كل واحد فينا عامل زي الميكروباز .. فيه محطات في حياته .. وربنا يكفينا شر امناء الشرطه قادر يا كريم

نخش على اول محطة في حياتي .. واللي هي الطفولة المشرده
أن أن آآآآآآآآآآآآآآآآآآآآآآآآن .. تشششششششششش

طفولتي كانت مختلفة عن طفولة أي طفل طفولي متطفل .. كنت باعاني الأمرّين لما بامشي في الشارع
مجرد المشي كان بيسببلي معاناة .. الناس كلها بتمشي طبيعي .. إلا انا .. كنت بابذل مجهود مضاعف بأضعاف مضاعفة في الضعيف .. كنت باضطر اني اتخذ القرار أولا .. وبعدين ابدأ في تنفيذ القرار الي انا اتخذته
وبما ان الواحد مننا لازم يكون راجل وقد قراراته .. كنت بابقى عايز اقول لكل الناس انا عيل .. لكن طبعا كرامتي كانت ومازالت تمنعني .. من الاعتراف بالحقيقة التاريخية دي

ومن المعروف في الحضارة الاغريقية القديمة المعاصرة .. ان المشي هو اسهل وسيلة لتنشيط الدورة الدموية .. وانا كنت ومازلت .. باحاول اني انشط الدورة برضه .. بس معايا كانت بتبقى الدورة الأوليمبية .. وليست الدموية
واهو كوللو دورات .. ان شالله حتى لو كانت دورة ميه

بعد ما اتخذت قراري بالمشي .. كان لازم علي اني اترجم الاشارات المنبعثه من عقلي الباطن والتي تصر على انها تسيطر على باقي مفردات جسمي
.. وهنا كانت الحرب
أن أن آآآآآآآآآآآن .. تشششششششششش

القرارات متضاربه .. قرار نابع من مخي بيحثني على التقدم بقدمي اليمني لبداية المشوار .. وقرار تاني بيقول اني المفروض مع حركة قدمي اليمنى لازم احرك يدي اليسرى في نفس اتجاة المشوار
.. وهنا الصراع
يعني اركز مع حركة ايدي ولا رجلي !!!؟؟؟
طبعا ابو بالين كداب .. وابو تلاته منافق .. وابو اربعه ده بيستعبط اساسا
ولكن الله ميزنا نحن البشر عن باقي الكائنات .. بميزة العقل
ونتيجة لذكائي الفطري والذي تكلمت عنه كل الصحف العالمية .. عرفت اطلع من المأزق اللي حطيت نفسي فيه باتخاذي قرار المشي كوسيلة لوصول الى منطقة معينه
.. وكان قرارا صائبا بكل المقاييس
كنت لما باتحرك او امشي .. باحرك رجلي وبس .. او ايدي وبس
ذكاوة فطرية

في مرحلة طفولتي .. ايام ما كنت طفل .. كنت باتبهدل لما بنروح الملاهي او المراجيح .. كنت باتزنق جوه المرجيحه واللي هم عاملينها بشكل وتصميم بدائي جدا .. عن طريق انه مثبتين حزام في المرجيحه نفسها .. وعشان ادخل جوه المرجيحه كان ابوي بيضطر انه يأجر مجموعة صعايدة عشان يشيلوني هيلا بيلا .. وينزلوني بداخل المرجيحه من غير ما تحصل أي اضرار للمرجيحه او ان الحزام يتقطع .. وساعتها فيها غرامه على ابويا انه مركب ابنه المرجيحه من غير حزام الأمان
وطبعا شيلتي للمرجيحه ما كانتش بالساهل زي ما انتو فاكرين
لأ .. خاااالص
كان كل الاطفال بيشوفوني ويضحكو
.. هما يضحكو من هنا
.. والصعايده يشدو بكل عزمهم من هنا
وانا اعيط من هنا .. لكن كنت باسكت واتلهي باكل الساندوتش اللي في ايدي

فيييييين وفيييين لما ركبت جوه المرجيحه .. وابويا فرح اخيرا ان ابنه ركب وهايتمرجح .. بس قبل ما ابويا يبدأ في زقي عشان اتمرجح .. سمعت كلمة من واحد صعيدي من اللي شالوني .. كان بيقول لابويا على اقتراح اني يبقى معايا صابونه دايما عشان يزفلطوني وادخل بسرعه جوه المرجيحه
وفعلا .. من يومها وانا واخد الصابونه

عندما بدأت المرجيحه في الأرجحه

.. وهذه لحظه تاريخية لا يمكن لبشر ان ينساها
.. لحظة امتزجت فيها دموع الأب مع ضحكات ابنه وهو مستمتع
.. لحظة تحدثت عنها أجيال المستقبل .. للأجيال التي ستورث من بعدهم
اللحظه دي انا مش فاكرها اساسا .. عشان ابويا من كتر فرحته زقني جامد والمرجيحه اتقطعت سلسلتها الحديد .. وطرت في السما وانا مش فاهم ايه اللي خللى العصافير تتمرجح جنبي


بس المشكله الي واجهت رجال الأمن كانت في تحديد النقطة اللي انا هاقع عليها وانا طاير .. يعني ممكن اقع على عمارة تكون آهلة بالسكان وبالتالي كان لازم يتدخل رجال الدفاع ويخلو المنطقة السكنية اللي حوالين المراجيح كلها

وفعلا .. ربنا ستر ووقعت على مجمع عماير كان السكان كلهم نزلو بناءا على التحذير اللي نزلته وزارة الاعلام في التلفيزيون

وطبعا كانت في مشكلة بسيطه في اخراجي من تحت الأرض بعد ما وقعت من السما .. عشان وقعتي تقريبا خلتني انزل رشق في الأرض .. او بمعنى ادق .. تحت الأرض .. وعشان كده وقفو المترو لمدة غير معلومه لغاية ما يلاقو انا وقعت في انهي محطه بالظبط
مش باقوللكم حياتنا عبارة عن محطات

اسيبكم بقى دلوقتي وابقى اكمللكم مذكراتي بعدين .. عشان الجوع كافر .. وانا على لحم بطني من الصبح .. يادوبك مافطرتش غير خمس ترغفة من ابو ربع جنيه .. وحوالي تسع بيضات اومليت .. معاهم كيلو جبنه رومي .. وكنت بابلّع بقزازة رتل بيبس
والغدا تقريبا نفس السكه .. نص فرخه على طاجن رز معمر على شوربة على طبق محشي كان في التلاجه قلت اسخنه واكله .. واهو اكسب فيه ثواب .. ووجع بطني ولا دلق الطبيخ .. وبكده واضح اني يعني تقريبا .. ما كلتش

سوووو

هناك 88 تعليقًا:

ToOoKa يقول...

السلام عليكم ورجمة الله وبركاتة
اخييييييييييييرا مبروك يا سوووو

بس للاسف الكلام داخل فى بعضو مش عارفة اقرأ حاجة

يلا عدلها علشان انا مشتاقة اقراها ولا اقولك انا ححاول تانى اقراها مع انى شكلى حتحول

أختك توكا

A.SAMIR يقول...

كل دة ولسة ماقلتلناش
كل التخن دة على كام كيلو
خسستني ان اللي بيتكلم ديناصور صغنن
جميلة جدا
اعتبرني متابع دائم
تحياتي واحتراماتي

لماضة يقول...

ده اكلام تخين هو كمان
استنى لما اصلح الخط واقر واجى تانى

ToOoKa يقول...

السلام عليكم ورحمة الله وبركاتة

معرفش عيب الكلام دا من عندك ولا من عندى بس الحمد لله فعصت عينى وعرفت اقرا

انت بتبالغ يا راجل ايه دا كلو على فكرة اعتقد انو كل واحد وهو صغير فى حاجة بدايقو
يعنى مثلا انا وانا صغيرة كنت طويلة وكان دايما بيقعدونى ورا ويوقفونى فى الطابور ورا وكان العيال يقولولى يا طويلة يا هبله(هههههههه هبلة اه) وكنت برجع البيت اعيط بس لما كبرنا ما طلعتش طويلة للدرجادى

بس حلوة حكاية الصبونة دى فكرة

وماتقلقش انا جوايا ... جوايا قال جوايا قال انا طفلة اكتر منك

بس الصراحة انا حسيتك مدايق وعلى فكره دا باين عليك

والله والله انا دعيت لوالدك فى صلاتى وان شاء الله كلو حيكون تمام

يلا خلى بالك من سوووو والطفل التخين علشان هو غالى علينا كلنا

أختك توكا

ابن حـجـر الـعـسـقـلانـى يقول...

بص يا سوووو .. بصراحة انت كلامك جميل... و الحكاية بتاعة المرة دى مؤثرة جدا

و بجد .. مستنى المزيد

لماضة يقول...

هههههههههههههههه
جامده جدا
كله كوم وابوي دى كوم
صراحه زى العسل
احدف لاختك الغلبانه سندوتش طيب
وكمان عجبنى اوى انك حطيت الريجيم اليوميى عشان اعمل زيك يمكن تحصل معجزه الهيه

سهر الليالى يقول...

ههههههههه

ألف مبروك أول حلقه وفى أنتظار باقى الحلقات
بس لكنى لفظ الزفلطة دة أوى يا أحمد
ههههههههههه
طول عمرك واخد صابونة يا عينى

فعلا كل واحد فى حياته محطات ومواقف نفسو يصرخ فيها اوى
بس بحيك وبداية موفقة إن شاء الله

تحياتى وياريت يا سوووو تطمنى عليك

غير معرف يقول...

انا اول مرة ادخل علي المدونة
بصراحة انت دمك زي العسل
ودي بداية جميلة قوي
ربنا يوقفك

د/اجدع بنوته يقول...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

مش ممكن .. مشكله

طخين طخين بجد يعنى ..

بالمناسبه

انت مدعوو .. لتاجين هديه عندى

يستاهلو بؤكك

يلا متتأخرش ليبردوا

تحياتى

وويينج بقية المزكرات

Rain man يقول...

ان تصحو على مذكرات طفل طخين فإن هذا امرا غير اعتيادي بالمرة ..
خاصة لو كان هذا الطفل الطخين مشكلة تمشى على قدمين ..
الاخطر ان تصير كارثة تحلق فى الهواء ..
بدأت اشعر ان هناك صلة وثيقة بين تلك الحادثة و بين السحابة السوداء التى غطت ارجاء المقهورة منذ عدة سنين
قلتلى الكلام ده كان امتى بالظبط ؟

..

اعتقدت انك هتأجز الاتنين ده بس كويس
بداية كارثية مبشرة
لابد ان القادم اكثر كورثة(ن)
..
منتظر

خالد المصري يقول...

بص انا مش هطول عليك
بس هفكرك بحاجتين

طعميه دوبل
وموزه ابو خالد

واني فاهم وانت فاهم واحنا الاتنين فاهمين

مع السلاموا عليكم

مشمش يقول...

ياسووو مش عارفة اعلق بجد مش عارفة اقول حاجة غير اني عايزة اتنطط واتشقلب من الضحك واجري واخطف السندوتش من النونو الطخين دة والعب معاه ويضحكني واضحكو دة تسمية اية والنبي هوة دة احساسي لما قريت كلامك دلوقت وجميل اوييي

Marvel يقول...

هههه...ماتجيب حتة يا سووو..ولا اقولك هات بق من البيبسي

:))

Doba يقول...

مش عارفة ليه لما طرت من عالمرجيحة حسيت ان قنبلة نووية طارت وهتقع تفرقع فى كل حاجة وتدمرها بس حلو قووى الاسم المقلبظ اللى كانوا بينادولك بيه

بس انا بحب كعبول قوى بس طبعا مش هقولك يا كعبول لانى عارفة انك بتكره اسم كعبول ولا ايه يا كعبول

فى انتظار جديدك

ثم علشان تحرك ايدك ورجلك محتاجة صاحب بالين وكداب وكلام من ده

فى البيت لما كانوا بيودوك الحمام كانوا مأجرينلك توك توك ولا ايه

الله يكون فى عون والديك يا عينى اكيد الميزانية فرقعت خلاص
=============
أحمد

أقرا قرآن كتير قوى هيريح قلبك وطلع صدقة لله بنية مداواته

واعرف ان كل حاجة مكتوبة وليها ثوابها عند ربنا - مقدرة ان الموقف اللى انت فيه صعب ولكن انت برج الأسد يعنى بميت راجل واى حد لو مكانك مش هيكون رد فعله زيك

انت قوى وربنا مديلك قوة استغلها صح ورتب افكارك وركز انك تستغل كل النقط الحلوة اللى جواك وانك دايما تكون فى حالة معتدلة علشان خاطر تقضى وقت كويس هينعكس تباعا على نفسية والدك ومعاملتك ليه

والله بدعيلك انت وهو كتير قوى ربننا يخفف عنه ويشفيه ويطمنك عليه بس سبحان الله برده الواحد يرجع ويقول ان كل اللى هو فيه ده خير وثواب عظيم

سلامى وتحياتى ليك ولوالدك الغالى
هبة

بنوته مصرية يقول...

اخيرا يا سوووو
بس انا حسيت من كلامك اني الكلام حزين وانت بتكتب
وده مش متعوده ده منك يعني انت بتضحكني اه بتضحكنا كلنا ماشي بس محبكش تضحكنا عليك وعلي انك مليان اكن دبدوبه صغننه هي اللي بتتكلم


بتحسسني انك كنت فزيع يعني في التخن وانا متصورة انك كنت عادي مش بلصورة اللي بتتكلم عنها دي

بس عارف بقي حتي لو كنت تخين فانت كدا بتثبت ليا اني كل الناس اللي مليانين شوية شويتين دمهم شربات اصل انا بموت في علاء ولي الدين واحمد رزق والبت الحلوة اووي دي مش فاكرة اسمها بس كانت في فيلم كلم ماما برضه كل دول بحب اتفرج علي الافلام بتاعتهم


صحيح علي فكرة متحدف كدا صباع محشي ولا سنكوتش شوربة حتي ايه ده انت هتخليني مش اقول عليك طخين هقول عليك مفجوع

يلا صحتين بلخليجي
بلهنا والشفا بلغه المصرية
مطرح ما مش عارفة ايه بيقولها
كدا مش فاكرة والله هي بلغه البلدي شويا ههههههه

يلا هقوم اكل انا كمان جوعتني


(*_^)

سلاموووووووووووووووز

بت خيخة وأى كلام يقول...

اقولك على حاجة يا سوووو
انا ماقدرتش اضحك اوى زى كل مرة بضحك فيها على كتباتك
النهاردة وانت بتحكى افتكرت موقف
كنت راجعة من الكلية بتاعتى وانا كليتى كانت فى 6 اكتوبروكنت بركب ميكروباص من اكتوبر لحد الجيزة
المهم كان راكب جنبى واحد كلبوظ
الولد ده نزل عند محطة فاطمة رشدى
واول مانزل كان فيه اتوبيس بتاع الرحلات فيه عيال تقريبا فى ابتدائى سنهم مايزدش عن كدة
وواحد منهم كان مطلع راسه برة الشباك واول ماشاف الولد اللى نزل من الميكروباص
راح باعلى صوت فيه ورايح قايل بومبة
ومشاور على الولد الكلبوظ وضحك ضحكة عمرى ماهنساها والعيال كلهم ضحكوا معاه على الولد
ساعتها بصيت على الولد
لقيت فى عينه نظرة عمرى ما هنساها كان عمال يبص يمين وشمال بعينه بيشوف هو حد غيره سمع اللى سمعه ولا لأ
كانت فى عينه نظرة كسوف عايز يستخبى من عيون البشر كلهم
بس انا ماشوفتش النظرة دى وبس
انا شوفت حاجة تانية
شوفته وهو بيعيط من جواه
شوفته وهو صعبان عليه نفسه
كل ده فى لحظات صغيرة
مجرد اللحظات اللى نزل فيها والميكروباص اتحرك بعد كدة
لكن مازلت فاكرة شكله
ومازلت كل مافتكر اعيط علشانه
مازلت فاكرة شكل الواد السافل اللى اتريق عليه ومازلت بيجيلى نفس الغضب والغيظ وعايزة اروح اخده قلمين هو واللى ربوه على انه يتريق على مخاليق ربنا
معلش نكدت عليك يا سوووو
لكن انا حاولت اضحك لكن كبيرى انى ابتسمت ابتسامة صغنونة وبعد كدة افتكرت الولد وقعدت اعيط
كل اللى اقدر اقوله
لو الناس تبطل تحكم على غيرها من شكلها
لو الناس تبص على جوهر اللى قدامهم وينسوا شكلهم الخارجى
لو الناس تتعلم تبطل تريقة على خلقة ربنا
كنا هنكون احسن الناس
بس خلاص
اختك خيخة

shayma يقول...

سووووووووو
حلوة جدا القصه والسرد
ومبروك على اول حلقه
وهستنى الباقى

بس حلو البوفيه بتاعك مش تعزمنى عندك مرة على اكله حلوة كده
:)))))))))))))

سلامى
:))

صوت من مصر يقول...

ياه انت شايل كتير جدا من طفولتك انا بقى كنت زى العصايه تخيل بقى التريقه

نوراى يقول...

sooo
اية اخبارك

دة اية دة مذكرات طفل ولا عذابات طفل

بس بجد انتا مالكش حل فى خفة الدم

البوست يجنن

وياريت تكملة لان الفكرة كمان حلوة اوى

appy يقول...

يا نهار دا انا فاتنى كتير نأسف على هذا العطل النتاوى من عندى
وبطل اكل يا تخين ههههههههههه
وفى انتظار الباقى يا سووووووووو يا سمباتيك
وبعدين المشى بالرجلين مش بحركه الايدين

شيرين يقول...

ايه يابني ده تحفة ملكش حل فعلا بس تصدق صعبت عليا الاطفال احباب الله والتخن مش عيب ده بيدل على العز واكل الوز

تحياتي ياسووووووووووو

أيامنا الحلوة

عاليا حليم يقول...

انت في فين يا عم ؟ أنت مقاطعنى و لا أيه ؟ عندى حدث مهم و عاوزة حبايبى كلهم يشاركونى فيه

مذكرات جميلة اوى و الله زى عادتك الحكمة فى البساطة
فكرتنى بابا لما يغصب عليا اكل كتير عشان انا رفيعة و انا ابقى مش قادرة اكل حلاص يقولى كملى الكبق ده عشان تكسبى فيه ثواب

الثواب بيتعرف ساعة الأكل بس
ههههههههههههه

فى انتظار الباقية

عاليا حليم يقول...

اه صحيح بعد أذنك انا ضيفتك فى قصر امحبة بتاع عبد الحليم ( أهل عندليبيات ) جناح ( أى دمعة حزن لا ) أبقى اختار هناك باه الوجبت على كيفك اصل عبد الحليم هو الى بيشرف عليها بنفسه فنان و فلاح كريم باه حيهيصك و يغنيلك كمان و انت بتاكل

سلاموووووووووووووز

A long distance يقول...

تعيش وتاكل ياغالي
بس خلي بالك لتقف حاجه في زورك
mrgkiller2020

Rehab Mostafa يقول...

الحضارة الاغريقية القديمة المعاصرة
ايه الحضاره دي :) دي امتى وفين وازاي وليه

على فكره بجد اسلوبك رائع ... انت عارف رأيي ف اسلوبك طبعاً
وكفايه أكل بقى... وزعلان أوي من اللي كلته في الصعيد اومال ايه ده كله !!!!

shreen يقول...

سووو
تخين او رفيع
طويل او قصير

بدخلوك المرجيه بونش او بصابونه

انت من اعز الاصدقاء
ومن اخف الناس دما

صديقتك شرين

كاميليا يقول...

هههههههه

بس مش قولت لنا
الطفل ده كان عايش فى اى
كوكب؟

بس الحكاية حلو اوى
ممتعة
خفيفة اظل
اظن عجبتك خفيفة دى
ههههههه

تحياتى دوما

كاميليا

Nani يقول...

السلام عليكم
سلام للوالد ودعاء بالشفاء ان شاء الله

مش عارف تمشي؟
يا ابني انت اوطيسطك مش طخين
صابونة علشان يزفلطوك ولا يزفلتوك؟
وبعدين شو هاللحظات المعبرة على المرجيحة
تنفع دعاية نيدو
سو يا حبيبي
احنا يمكن هسا بنضحك على الكلمات الي انت كتبتها
لكنها اثناء الحدث كانت محرجة
ومؤلمة
يا ريت الناس تبطل تتطلع على المظاهر
ان الله لا ينظر الى اشكالنا ولكن الى افعالنا
وما نعلم اطفالنا الاشياء غير المنطقية
يمكن احنا اخر جيل كان فيه براءة الطفولة

ra7eel يقول...

سووووووووووو

مستمتعين بمذكرات طفولتك

بس انا عايزاك تاخد بالك من صحتك وتاكل كويس
حاسه كده انك عامل رجيم اليومين دول

فى انتظار باقى الحلقات

3ala asm masr يقول...

هههههههه
والله نهنىء انفسنا بصدور مذكرات سعتك
بس انا قلبى بيقولى يا سووو انك مش تخين اوى كده

3ala asm masr يقول...

ياريت تشركونا وتبقوا معانا احنا شباب هيروق مصر http://hnro2masr.blogspot.com/

مروة الزارع يقول...

يعنى أدعى عليك وأقول أيةةةةةةة

عاااااااااااااااا
عاااااااااااااااااا
عاااااااااااااااااااااااااااااا

روح يا سووو يابن ام سووو ... ولا بلاااااش


زعلانةةةةةةةةةةةةة

فكرتنى بطفولتى المكلبظة المشردة

الظاهر بعيد عن السامعين طلعنا قرايب

لا بس انا غيرك

انا مقضية حياتى يويو

اخسسسسسسسسسس واتخخخخخخخخخخخخخخخن

بعد ما اخس واوصل لوزن جامد هما شهرين بس برجع لضعف الوزن بعد اصابتى بحالة من الفجعععععععععععععع

بس بقولك اية أبوس أيدك يا شيخ

بلاااااااااااااااش تجيب سيرة الاكل ادامى تااااااااااااااانى

انا عاملة رجيم قاسى يمممممممممكن الاقى عريس امة كرهاة وكاشفة شعرها وداعية علية


انما خد هنا

اخص عليك

فكرتنى بأيام الجبنة الرومى والشكولاتة والمحشى والهوهوز والتورتة والجاتوة وبسكوت راسكو والرز بلبن والايس كريم والشاورما والمايونيز والفراخ المحمرة والكنتاكى والكراميل والبسبوسة والزبدةة والمربى والشيبسى و.....

ايةةةةةةةة دةةةةةةةةةةة

سامحنى

اعانى من حالة فجججججججع


عاااااااااااااااااااااااا
عاااااااااااااااا

tarek momen يقول...

السلام عليكم
والله يا اخ sooo انا كنت باعلق في مدونة نوارة وقرات لك تعليق وقلت اجي ازورك في مدونتك وارد علي تعليقك بدل ما ندوش نوارة خصوصا ان فيه اتنين تلاتة ماسكين في خناق بعض عندها
المهم بالنسبة للكلام اللي انت قراته في الجرايد نصيحة مني ماتصدقش كل اللي بتكتبه الجرايد واعمل زيي بلاش تقرا الجرايد دي خالص وان كان ولابد ابقي اكتفي بصفحة الرياضةده لو كنت اهلاوي اما غير كده فبلاها صفحة الرياضة كمان

totaaaa يقول...

ياسووووو ياجامد
الحمد لله ان كريبا جت واولى محطات العمل الابداعى العظيم ظهرت على صفحات مدونتك الغالية
كالعادة كل مرة مابالاقيش حاجة أاقولها غيرانى اقولك انك دمك زى العسل بطريقة رهيبة وشنيعة وبشعة
على فكرة انا طويييييييلة جداااااا وياما خدت تريقة على الموضوع ده من وانا صغيرة حتى وقتنا الحالى والموضوع ده كان بيضايقنى قوى لكن ايه دلوقتى ولا بيهمنى أطخن طخين فى البلد دى (مااقصدكش طبعا ياسووووو )
على فكرةانا كمان جالى احساس انك مدايق يارب يكون احساسى غلط ومافيش حاجة تضايقك خالص ياسوووووياغالى عليناويشفى والدك يارب
انا طولت اوى سورى بئا ومنتظرة المزيد
سلام

maii bahaa يقول...

هههههههههه

أول دخول هنا ليا..ألاقي المسخرة دي

أنا ابني الصغير مش تخين لكن عنده كرش محترم...ومش هاحكيلك بئه

لو نام على بطنه بيبقى عامل زي السحلفه اللي اتقلبت على ضهرها

تحياتي يا طخين بث عثل
:)

3abdo me7tas يقول...

ايه يا عم ده
مذكرات طخين دى ولا مذكرات دزنازور من أيام الدزنازورات
انا حاسس انك بتتكلم عن كائن فضائى ضخم
وإيه الذكاوة الفطرية دى مش دى زى الذكاوة البكتيرية ولا انا متهيألى
على العموم انا مستنى الأكلة التانية
قصدى الطبخة التانية يوووووووه
قصدى المحطة التانية لما نشوف هنوصل لغاية فين
يلا سلاموز

fatima يقول...

سوووو
يا عزيزى
أنت يا بنى كأنك أخويا و بتتكلم بلسان حاله..اخويا الكبير زى سعادتك كدا ..وكل المواقف الى قولتها ولسه هتقولها هو عاشها تقريبا ..
طبعا ذكريات بايخة ومؤلمة ..بس أنا برضو عاوزة أقولك انى أنا كنت عكسه خالص ولما كنا فى الخليج كانت الدكتورة بتقول لبابا يا أستاذ دى عندها انيميا موش لازم التحويش لدرجة انك متأكلهاش ... فكان يشاورلها على أخويا ويقولها مين قالك معندناش أكل ..أهو..أخويا يقعد يبكى
كنت بزعل من بابا جدا وكنت بحس بأخويا جدا ..و لما كنا نروح ملاهى أو نشترى لبس كنت بأتضامن معاه واعمل نفسى موش عايزة ..ياريت الناس كلها تفهم ان الأمتلاء فى الجسم ده حاجة موش بمزاجنا ..و محاربته شىء صعب جدا ..بس تقول أيه بقى ؟؟
تحياتى ليك دايما ومستنيين باقى الأجزاء

غير معرف يقول...

هايلة.. هااااااااااااايلة ياسوووووووووو..بجد ضحكتني ضووووووووحك ..يلا مستنيه اللي بعده على احر من الجمر


احترماااااااااتي


شــــــــــهد

الشنكوتي الكبير يقول...

اقولك ياه تسلم ايدك ولا تسمن ايدك

فقري انت
بس هو ممكن اجي كده اخد حته من الأكل ده كله حرام عليك انا هاموت من الجوع
سلاااااااااااااااام

shahy يقول...

انت بتتريق على ولدي علشان تخين
كدة ياسووو ماكانش العشم ابدا



طبعا مش محتاجة اقولك ان اسلوبك رائع وجميل لان دي بقت حاجة معروفة

انا هاقولك منتظرين الجزء التاني يوم الاثنين زي مانت قلت بس انت ضحكت علينا وقلت هاتنزل جزئين بس احنا مقدرين ظروفك
الله يكون في عونك ويقويك ويشفي والدك

تحياتي

Desert cat يقول...

ده ايه الدسم اللى فى الموضوع ده كله
بصراحة ما شاء الله عليك تين تخين يعنى
المهم مجمع العماير ايه اللى حصله
استر يااااااااااااااااارب

زى الهوا يقول...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

الحلقة الاولى جااااااااااااامدة , وخصوصا لما قولت طول عمرى باخد صابونة حسيتك بتقولها من قلبك اوووووووووووووووووى هههههههههههههه

فى انتظار الحلقات القادمة

rainbow يقول...

عحمد الخفيف جدا

هذه اول مرة اقرأ كلمات تضحكنى حتى دمعت عيناى .. ما هذا الحزن المتخفى بين سطورك يا استاذ ؟ ليس هذا عحمد داخلك هم غريب عليك يا فتى .. اسمعك تماما ... تقول ليس غريبا عليك : صدقت فما السخرية اللازعة الا احد اختبائاتنا من همومنا الساطعة الحارقة

انا متأكدة انك لست بهذا التخن ابدا وانك تبالغ لغرض السخرية فقط

حديثك عن الجبنة الرومى جوعنى انا بعشقها ومن اسباب زيادة وزنى المؤقتة كل فترة الجبنة الرومى ثم الشيكولاتة

عحمد مذكراتك يجب ان تحاط بالسرية اكثر من ذلك فهى امانة فى عنق الاجيال الحالية تورثها للاجيال القادمة نأخذ من العبرة ونتعلم منها الحكمة

تحياتى ومودتى الصافية

هدى

Soooo يقول...

ToOoKa

وعليكم السلام ورحمة الله وبركاته
معلش كانت غلطه انترنتيه وتم تداركها
وعلى فكره
انا مش حزين ولا بتاع .. بس ده اسلوب معين في الكتابه الغرض منه اكتساب تعاطف الناس مع بطل القصه

وبعدين ده احنا لسه في اول محطه .. ده فاضل بتاع عشرتاشر محطه تانيه يابنتي


سلاموووووز

Soooo يقول...

a.samir

منورني والله ياباشا
ويارب تعجبك بجد اول محطه
وبعدين الطخنه مش بالكيلو .. بالطن


سلاموووووز

دمعاتي يقول...

اول مره اجي هنا
ومش اخر مره ان شاء الله
دمك خفيف جدا ومرح
ربنا يكرمك

عديت برضه على سنماتك وعجبني تحليلك
اشوفك على خير يامان

Soooo يقول...

لماضة

مش فاهم انتي معترضه على كلمة ابوي دي ليه؟؟
مش هو ابوي برضه ولا مش ابوي
يابوي منك

ملحوظه
لو مشيتي على الرجيم بتاعي انا متأكد انك هتبقي ميه وعشره كيلو .. كيلو متر


سلاموووووز

Soooo يقول...

ابن حجر العسقلاني

ابو العساقيل يا معسقل

ازيك يابرنس
يارب تكون اول محطه عجبتك

ويارب تفضل متابع معايا لغاية اخر الخط


سلامووووووووووز

Soooo يقول...

سهر الليالي

الله يبارك فيكي
ويارب باقي المحطات او المذكرات تعجبك

ملحوظه
لفظ زفلطه ده معروف جدا
زفلط يزفلط فهو متزفلط
واسم المصدر .. زفلطه

اي خدعه



سلامووووووووووووز

Soooo يقول...

غير معرف

الله يكرمك يارب
وياريت تنورني بتعليقاتك دايما وتتابع مواضيعي ويارب تحوز على اعجابك يارب


سلامووووووووز

Soooo يقول...

د\أجدع بنوته

منوراني والله ومنوره البلوج كللو ضحكتك الجميله دي

ويارب تتابعي باقي المحطات والمذكرات
ويارب تعجبك

ملحوظه
انا طول عمري كنت باكره الامتحانات عشان مبدأ الاسئلة والاجابه .. وعشان نفس المنطق انا مش هقدر اقبل التاج .. وبعدين انا اصلا مفضوح قدامكم اهه



سلامووووووووووز

Soooo يقول...

rain man

ازيك ياريس
بخصوص السحابه السوداء .. اعلن قدامك وقدام كل المسئولين اني بري براءة الذئب من دم يعقوب شخصيا .. من هذه السحابه .. وذلك لانني قد ولدت قبيل زراعة الارز المصري طويل التيله .. بل وقبل اختراع الكوبريط اللي ولعو بيه القش نفسه


سلاموووووووووز

خالد المصري

خبر ايه ياعم
خبر ايه
لازم تشردلي يعني
وبعدين انا عمري ماكلت طعميه دوبل ولا اعرف مين المهندس بتاع الشندوشتات اصلا
ولا حتى كلت موزة ابوك .. على اعتبار انك خالد

وبعدين انا حاليا بافطر كورن فيليكس
بس مش باللبن .. لأ .. بشوربة اللحمه البتلو


سلامووووووووووووز

Soooo يقول...

مشمش

اوبااااا
احنا فينا من الحركات دي
تجري وتخطفي الشندوشت مني وتسيبيني جعان وباعيط

لا ياعم .. مش لاعب


سلامووووووووووز

marvel

منورني يا باشا
وبعدين حته بس .. ادي ياعم شندوشت بيبس
عشان ماتقولش اني حارمك من حاجه



سلاموووووووووز

Soooo يقول...

doba

شفتي بقى .. عشان تعرفي اني فريد من نوعي
مافيش غيري انا واتنين تانين بس اللي اكتشفنا حقيقة ان ابو بالين كداب والحوار ده
ولعلمك .. انا قتلت الاتنين التانيين عشان ابقى انا لوحدي

----
ربنا يارب يكرمك دنيا واخره يارب
ويباركلك في حالك وكل مالك
ويباركلك في يوسف افندي ووالده يارب



سلامووووووووووز

Soooo يقول...

بنوته مصريه

بصي .. هو انا قاصد الحزن في الكتابه ده على فكره
وقاصد اني اكسب تعاطف الناس مع الشخصيه دي
وده لغرض ما في نفس يعقوب


سلاموووووووووز

Soooo يقول...

بت خيخه واي كلام

تصدقي انك الوحيده اللي قريتي مابين سطور اول محطه
فعلا انا مش قاصد الناس تضحك ولا تسخر منني في المحطه دي
وعاملها مجرد استفتاح مش اكتر
انما تابعي باقي المحطات والمذكرات .. وان شاء الله بعد ماتخلص نبقى نتكلم


ملحوظه
انتي جدعه فحت يابنت انتي والله
ربنا يكرمك دنيا وآخره يارب


سلاموووووووووووز

Soooo يقول...

shayma

الله يبارك فيكي دنيا وآخره يارب
ويارب تكون اول محطه او اول مذكره عجبتك .. ويتريت تتابعيها ويارب تعجبك ان شاء الله


ملحوظه
ده مش بوفيه .. ده كان مجرد شندوشتات مش اكتر .. حاجه لمسح الزور
تابعي المذكرات .. وهتعرفي شكل البوفيه الحقيقي


سلامووووووووووز

Soooo يقول...

صوت من مصر

اهلا بيك ياباشا في عنبر المعذبون في الارض
بس قسم العصاعيص في اخر الطرقه .. قدام قاعة طوال القامه .. وبجانب غرفة اللتغ في حرفي السين والراء


نشكركم على حسن تعاونكم معنا


سلامووووووووووز

Soooo يقول...

نوراي

ايه الاخبارات يابنتي
عامله ايه في الغربه يا ضنايا
ربنا يرجعك بالسلامه يارب
ويارب تكون اول محطه عجبتك
وماتستعجليش في الحكم على المذكرات على انها عذابات .. اول محطه دي كانت مجرد استفتاح
التقيل جاي ورا

بس يارب تعجبك يارب


سلاموووووووووز

Soooo يقول...

appy

ياستي ولا فاتك حاجه ولا محتاجه
انتي بس اعزميني على صينية بسبوسه بالبندق والفسدق واللندق .. وانا احكيلك كل اللي فاتك


ملحوظه
هاتي معاكي حاجه حرشه جنب البسبوسه .. صينية رقاق باللحمه الضاني .. طاجن باميه بالعكاوي .. اي حاجه خفيفه انشالله حتى لو كان دندي صغير



سلامووووووووووز

Soooo يقول...

شيرين

والله انتي بتفهمي
انا فعلا طول عمري ابن عز
عز
انتي بتقولي عز؟؟
يبقى انتي اللي خدتي شاندوشتي



ملحوظه
ماتختفيش كده مره واحده يابنتي
اظهر وبان عليك عزومة جوزين حمام



سلامووووووووووز

Soooo يقول...

عاليا حليم

انا اقدر برضه اقاطعك
طب ده انتي من ريحة حليم .. وانا اتربيت عليه وعلى اغانيه .. هو وعدويه يعني

يارب تكوني بصحه كويسه وفي اتم حال
ونعلمكم بان فوزيه طلقها سعفان
وان تفيده التحقت بقسم الدراسات الحره .. المصارعه الحره يعني
اما مخيمر .. فقد لقي حتفه عندما لقي مصرعه ساعة ان توفاه الله .. وهو كويس دلوقتي وفاتح كشك سجاير



ملحوظه

الحركة بتاعة اي دمعة حزن لأ .. حركه جميله جدا جدا جدا منك
بس انا ماجيش حاجه جنب الناس الحلوة اللي انتي مجمعاني بيهم
انا اقل منهم بكتير والله



سلامووووووووووز

Soooo يقول...

A long distance

منورني يابرنس وربنا يخليك لي
وياريت تعتبر مدونتي زي مدونتك تمام وتنورني دايما بتعليقاتك الجميله دي


ملحوظه
البيبس اتعمل مخصوص عشان الجزءيه بتاعة حاجه تقف في الزور
ياخي اليابانين دول عالم ولاد جنيه بجد
تقولش صينين مثلا



سلامووووووووووووز

Soooo يقول...

Rehab Mostafa

ياخبر ياروبي
معقول ماسمعتيش عن الحضاره الاغريقيه القديمه المعاصره؟؟
لا بتهزري
يابنتي دي المجلات العلميه كلها اتكلمت عنها
اه بجد
ميكي وسمير وتان تان
حتى بالاماره اول واحد اكتشف الحضاره الاغريقيه القديمه المعاصره دي هو الحاج احمد اغريق

راجعي معلوماتك العامه يابنتي قبل ما تقولي كلام ناس يقولو عليكي مش عارف ايه


ملحوظه
انا بهزر وكتاب الله ولو قفشتي ولا حاجه هروح اجيب الحاج احمد اغريق .. ونيجي نغرقلكم المنطقه التعليميه


سلاموووووووووووز

Soooo يقول...

Rehab Mostafa

ياخبر ياروبي
معقول ماسمعتيش عن الحضاره الاغريقيه القديمه المعاصره؟؟
لا بتهزري
يابنتي دي المجلات العلميه كلها اتكلمت عنها
اه بجد
ميكي وسمير وتان تان
حتى بالاماره اول واحد اكتشف الحضاره الاغريقيه القديمه المعاصره دي هو الحاج احمد اغريق

راجعي معلوماتك العامه يابنتي قبل ما تقولي كلام ناس يقولو عليكي مش عارف ايه


ملحوظه
انا بهزر وكتاب الله ولو قفشتي ولا حاجه هروح اجيب الحاج احمد اغريق .. ونيجي نغرقلكم المنطقه التعليميه


سلاموووووووووووز

Soooo يقول...

shreen

ربنا يخليكي يارب ويكرمك دنيا وآخره قادر يا كريم

وبجد والله انا بعتز بصداقتك ومعرفتك دي والله العظيم


وربنا يجعله عامر


سلامووووووووووز

Soooo يقول...

كاميليا

ربنا يكرمك ياستي
والحكايه دي كانت بتدور احداثها في كوكب في خيال طفل طخين



ملحوظه
هي كلمة خفيف الظل دي معناها انه قصير وظله قصير ولا رفيع وظله خفيف لدرجة انه مش باين؟؟؟

نرجو الافاده

سلامووووووووووز

Soooo يقول...

nani

والله انتي عسل
وبجد بحب تعليقاتك عندي موووووووز

بس الاول قوليلي ايه معنى دي
يا ابني انت اوطيسطك مش طخين
؟؟
ايه الاوطيسطك ده يابنتي ؟؟
اوعى تكون تهمة بالتخابر مع دولة اجنبيه شقيقه .. عشان هي مش ناقصه طخن الله يكرمك

ووبعدين يزفلتوني ايه بس يابنتي .. يزفلطوني .. الزفلته دي احنا بنقولها على الاسفلت في الشوارع .. انما تختلف شكلا ومضمونا عن الزفلطه
الزفلطه هي انهم يرغو بالصابونه على جسمي اقوم تزفلط داخل جوه المرجيحه من غير اي اضرار نفسيه او ماديه
فخمتو؟؟

وبعدين دي مذكرات يابنتي .. وانا قاصد اني اتكلم عنها باسلوب ساخر عشان الحمدلله انا مش طخين قوي زي ماكنت ساعتها .. وكمان ده كللو تمهيد لباقي المحطات .. او المذكرات

منوراني دايما وربنا يارب مايحرمني من تعليقاتك عندي

ملحوظه
انتي لازم تنزلي مصر بجد .. عايز اتعرف عليكي موووووووووووز



سلامووووووووووووووز

Soooo يقول...

ra7eel

الحمدلله انك مستمتعه بالمذكرات وبالمحطات
ويارب باقي المحطات تعجبك يارب


ملحوظه
انا فعلا حاسس اكلتي ضعفت .. ماتعرفيش عنوان دكتور تتخين كويس؟؟؟؟


سلامووووووووووز

Soooo يقول...

3ala asm masr

منوراني يا بنتي اشدما تنوير
شفتي اشدما دي
وانا فعلا حاليا مش ظخين قوي زي مافي المذكرات .. بس ده مايمنعش اني ابالغ شويه لزوم التشويق والاثارة والمتعه


ملحوظه
لو قريتي ردي على تعليقك يبقى قريتي اخر موضوع نزلته واللي هو صحابي المدونين .. شوفي وجهة نظري يمكن اقدر افيدكم في حاجه


سلامووووووووز

Soooo يقول...

مروة الزارع

استغفر الله العظيم
رجيم ودايت
يابنتي دي عولمه
لعلمك الخسسان ده مخطط صهيوني
عايزننا نحرم نفسنا من الاكل وهو قدامنا

استغفر الله العظيم

يابنتي فوقي .. انا عارفك دماغك كبيره وتوزن عشره كيلو استفندي .. يعني فاضللك اتنين كيلو وتبقي قفص .. قصدي توزني قفص

وبعدين مادمتي بتدعي على اللي يتجوزك .. يبقى خليكي ناصحه وزي مانتي ولا تخسي ولا بتاع
وسيبيه هو يكتشف جمالك الداخلي بنفسه


ملحوظه
يعني عامله دايت وبتحنسي نفسك بالشيكولاته والشيبسي والهوهوز الخ الخ الخ .. يابنتي فوقي وكلي براحتك



سلامووووووووووز

Soooo يقول...

tarek momen

اهلا بيك ياباشا
بص ياريس .. انا اول واحد منفض للجرايد .. سواءا الحكوميه او معظم المعارضه لاني شايف انهم بيشتمو وبيزعقو وعاملين زي المره - لا مؤاخذه - اللي جوزها اتجوز عليها ومنفضلها .. وكللو بيشتم في كللو
لكن الخبر ده انا بعد ماقريته في الجرنان لقيته على كزا سايت تاني
ماشي
هنقول ان السايتات دي بتلفق ولا بتاخد اخبارها من الجرايد .. بس لما الاقي ناس في العريش بيقولولي ان ده حصل فعلا .. يبقى ازيك بقى؟؟؟؟

وبعدين يا باشا انا ولا فارق معايا حماس ولا غير حماس .. انا كل اللي يهمني زيك انت تمام .. هي حياة الناس
ذنبهم ايه المصريين اللي انضرب عليهم نار عشان قفلو الحدود تطبيقا لسياسة ناس اكبر منهم ومننا
ذنبهم ايه وهم مجندين بالغصب انهم يتهانو ومن مين .. من فلسطينين لسه كانو واكلين عيش وملح في العريش معانا وزي اخواتنا
طب بدل مايتشطرو علينا ويرفعو سلاحهم علينا .. وبدل مايهدو السور بتاع الحدود مابيننا وبينهم .. مايرفعو سلاحهم على الاسرائيلين ويهدو السور اللي فاصل بلدهم ده ومخليهم مية حته

عزيزي طارق .. لا اعرفك ولا تعرفني .. ولكننا اخاطب العقل الانساني بداخلك كما خاطبتني بالعقل والمنطق
واريد منك اجابة بسيطه
هل يوجد دخان .. بدون نار؟؟؟


ملحوظه
كان نفسي تقولي رأيك في اللي انا كاتبه .. لكن خيرها في غيرها



سلاموووووووووووز

Soooo يقول...

totaaaa

منوراني يافندم
والحمدلله ان اول محطه او اول حلقه من المذكرات عجبتك
وعلى فكره .. انا طخين وقصير .. وانتي قلتي انك طويله قوي .. يعني من تحت لتحت اشم رائحة تريقه
باهزر طبعا


عموما يارب تتابعي باقي المحطات
وتعجبك المذكرات يارب


ملحوظه
انا مش حزين .. بس الطفل اللي كتب المذكرات دي .. كان من جواه حزين .. ولو عايزه تعرفي هو في اخر المذكرات هيبقى حزين ولا ايه .. تابعيها بنفسك واحكمي بعد كده



سلامووووووووووز

Soooo يقول...

maii bahaa

ربنا يكرمك دنيا واخره يارب
ويخليلك ابنك الصغنن ابو كرش محترم ده وتفرحي بيه لما يكبر وتفرحي بولاده وولاد ولاده

وارجوكي تعتبري مدونتي زي مدونتك تمام وتنوريني دايما بتعليقاتك الجميله وبضحكتك اللي بجد بافرح من جوايا ان ربنا قدرني وقدرت اني ارسمها على وشوش الناس

ويارب تكون اول محطه من مذكراتي عجبتك
ويارب تتابعيها دايما وتقوليلي تعليقك عليها في الاخر



سلاموووووووووز

Soooo يقول...

3abdo me7tas

ازيك يابو الحوووس .. طب والله ليك وحشه بجد
وبعدين انت مستشويني ولا ايه
دزنانورات ايه دي اللي هتيجي جمبي حاجه
انا اصلا اصلا كنت بافطر عالريق زمان باربع دزنانورات .. هم انقرضو من شويه يعني

منورني والله ويارب تكون اول طبخه او اول سرفيس فتح نفسك للاكل
يووووه
قصدي للقرايه


سلامووووووووووز

Soooo يقول...

fatima

الله عليكي
بجد الله عليكي
لخصتي حاجات كتير في كام سطر
وبجد حستهم وعيشتهم فعلا زي مانتي قلتي
بس المشكله ان اخواتي الاكبر منني كانو بيتريقو علي هم كمان
يعني من الاخر ما كانش في حد بيتضامن معايا زي مانتي تضامنتي مع اخوكي


وبعدين احنا هنقلبها نكد ليه
تابعي المذكرات وانتي تعرفي الطفل الطخين اللي جوايا عمل ايه
وبعدها احكمي بنفسك
انهي الاحسن .. الواحد يبقى طخين .. ولا رفيع



سلامووووووووز

Soooo يقول...

شــــــــــهد

اختي الحبوبه
ازيك يابنتي وازي الحال عندكم في اليمن السعيد
يارب تكوني زي الفل
والحمدلله ان المحطه الاولى في مذكراتي عجبتك
ويارب تتابعيها بنفسك عشان تشوفي ايه الحياه .. وتقوليلي رأيك ساعتها


سلاموووووووووووز

Soooo يقول...

الشنكوتي الكبير

حليب قلبي
ياباشا انت تقول اللي عايز تقوله
وبعدين من غير استئذان .. خش المطبخ هاتلك طبق وتعالى اغرف معايا
واهو الاقي حد يفتح نفسي بدل ماهي مصضوضه


سلاموووووووووووز

Soooo يقول...

shahy

انا ولا اتريقت ولا بتاع يا ماما شاهي
ده هو الطفل الطخين اللي كان بيكتب وانا كل اللي عملته اني نشرت اللي كتبه
بريء يابيه

وبعدين انتي ومشمش بتقولو اني قلت هنزل محطتين ورا بعض فين؟؟
امتى؟؟
ازاي؟؟
انا زقدت الفاكره



سلامووووووووووووز

Soooo يقول...

Desert cat

شامه ريحة الزفر الحمدلله
عشان ماتقوليش اني بخيل ولا حاجه
اهو نازل اكل في الموضوع لغاية ما اتسطلت من كتر الاكل
وتابعي المحطه الجايه وانتي تعرفي ايه اللي حصل


سيبك انتي
شوفتيني وانا باتمرجح؟؟


سلامووووووووز

Soooo يقول...

زي الهوا

يا مراحب يا مراحب بالتعليم كللو
ازيك يا ميس موحه
منوره المدونه والله

والحمدلله انك ضحكتي وعجبتك اول محطه من مذكراتي .. ويارب تتابعيني على طول وتنوريني بتعليقاتك دايما


ملحوظه
يابنتي .. كلنا واخدين الصابونه



سلامووووووووووز

Soooo يقول...

rainbow

هدىىىىىىىى

يا هدى مش انا اللي كاتب الكلام ده اصلا
ده الطفل اللي جوايا هو اللي كتبه لما كان طخين
انما انا دلوقتي الحمدلله جسمي مظبوط وبالعب باليه وسكواش وسباحه
واقدس الحياه الزوجيه واشارك في الاثاث


ملحوظه
المذكرات دي فانتازيا .. تابعيها وانتي هتفهمي قصدي .. وبعدين اخليها سر ليه .. هو انا تشرشل مثلا



سلامووووووووووز

Soooo يقول...

دمعاتي

ياباشا انت تنورني في اي وقت
وتقدر تعتبر مدونتي زي مدونتك تمام وتشرفني بتعليقاتك في الوقت اللي تحبه

ويارب تتابع معايا محطاتي ومذكراتي
ويارب تعجبك



سلاموووووووووووووز

fatima يقول...
أزال المؤلف هذا التعليق.
Rosa يقول...

سوووو
مش عارفه
مقدرتش اضحك المره دي
كل الي في دماغي و انا بقراها اني بقول كتير يا سوووو كتير
مش عارفه بس كتير
ماتقولش على نفسك كدا
يمكن ممكن اقدر على اي حاجه في الدنيا غير اني اضحك على حاجه مالهاش صله بإرددتنا أو اختيارنا
و الطفل التخين الكلبوظ دا ماكنش بإيده و لا كان نفسه يبقى تخين
آسفه يا سو لو كان رد فعلي مش المتوقع او احبطك , بس مش عارفه بقى

سمية يقول...

بجد بجد اسلوبك اكتر من رائع...
طخين طخين بس مدونتك دمها خفيف موت
دايما ربنا بيقطع من هنا و يوصل من هنا..

Dr-hema يقول...

وليه طفولة مشردة كده على الصبح متقول عذاب الطفولة لازم مشردة يعنى
بس أسلوبك تمام تمزج فيه معلومات حقيقية بخيالية فى محاكاة درامية رائعة لذيذة تجذب وتشد الإنتباه وتخلى غصبن عننا نقرأ المحطة الجاية
وياترى مين وراك أوعى ليكون الكاوتش بوكليت قصدى البيض الأومليت
^_^
د/هيما

غير معرف يقول...

سرد جميل وشيق للمذكرات ،، احسنت.