الأحد، ٢٧ ذو القعدة ١٤٣٠ هـ

!!! حرامي العِدّة

سمعت عن مهرجان تبادل الكتب اللي معمول في مكتبة الإسكندرية .. وعرفت إن في ندوات هتتعمل هناك .. من ضمنهم ندوة لعمي "جلال عامر" .. قلت لأ .. لازم اروح , اتفقت مع الصباغ و يوسف المصري و مروة و أسماء رمضان .. واتقابلنا في ميدان رمسيس الساعة تمانية الصبح .. ونطينا في ميكروباظ طالع إسكندرية .. وطلعنا
عدّينا بوابات إسكندرية والسواق قاللنا حمدلله عالسلامه وخد الأجرة , وعند الكمين بتاع الشرطة
.. اللي بعد البوابات .. لقينا أمين شرطة - اسم الله عليه - لابس نضارة شمس كبيره قوي
!!!!!! نضارة ايه .. ده لابس موتوسيكل في وشه
سيادة الأمين - اسم الله عليه - عمّال يحوم حوالين العربية على أمل انه يطلع بأي حاجه في رغيف .. وراح فاتح باب الميكروباظ وشاور على واحد ملتحي و واحد صعيدي لابس جلابيه .. وشاور عليّ .. وقاللنا بطايقكم .. إدّينالو البطايق بحسن نيه وعن طيب خاطر .. وراح يكشف عليها على الكومبيوتر اللي موجود في الكشك بتاع الشرطة

.. الجو اتكهرب شوية .. قمت قلت بهزار كده للواد يوسف المصري
!!! ياخوفي يكتشفوا القضية اللي اتعملتلي من تسع سنين لما شربت سجاير في الاتوبيس :
.. وضحكنا .. وبعد ما ضحكنا لقيت اللي قاعد جمبي بيقوللي
ماتستبعدش حاجه .. من كام يوم لقيت مُحضر جايلي البيت ومعاه جواب إعلام بقضية مرفوعة عليّ :
.. واتحددلها جلسة نُطق حكم .. رحت لقيتني كنت مُستعير كتاب من مكتبة المدرسة وانا في ابتدائي
!!!!! ونسيت أرجع الكتاب واتعملتلي قضية , يعني مش بعيد يكون عليك قضية وانت مش واخد بالك
لا ياعم .. الحوار بتاع السجاير ده خلص محبة مع المفتش .. غمزته بخمسه جنيه ومات الحوار :

رجع أمين الشرطه .. بص للراجل المُلتحي وقاللو انت بتتابع في أمن الدولة !!؟؟
المُلتحي استغرب وقاللو لأ , قام الامين إدّالو البطاقة , و بص عالجدع الصعيدي وعليّ وقاللنا انزلو
نزل الصعيدي ونزلت وراه .. ومش عارف الراجل الصعيدي بصراحه راح فين .. لأني مشيت مع أمين الشرطة لوحدنا
أمين الشرطة : - مختفيا وراء نضارته الشمسية - عِدّة إيه بقى اللي خدتها ؟؟
سوووو : - مندهشا - عِدّة .. عِدّة إيه ؟؟؟؟؟
أمين الشرطة : - بنبرة صوت الخبير اللي فاهم الكوفت - هنشوف

!!!!! استغربت قوي .. يكونش قصده عِدّة موبيل .. طب ليه .. ده انا معايا عِدّتين موبيل
ولا يكونش قصدة عِدّة المطلقة .. اللي هي الفترة بتاعة الست لما تطلق .. بس دي هاخدها ازاي !؟؟
ده زمن .. هاسرق زمن ازاي !!!؟؟؟؟
أو يمكن أمين الشرطة ده ألدغ .. وكان يقصد عِتّه مش عِدّة .. بس برضه هاخد عِتّه ازاي !!؟؟؟
هاحطها عندي في الدولاب تاكل الهدوم مثلا .. واصلا اصلا شكل العِتّه دي ايه !!!!!!؟؟؟؟؟؟
!!!!!!!! ياخوفي يكون شافني لابس البيرية وافتكرني خواجة .. وسارق عِدّة بني آدم

دخلنا على الأوضة بتاعة الكمين .. الأوضة عبارة عن مكتب كبير شكله بتاع الظابط النبطشي .. ومكتب تاني صغير عليه كومبيوتر .. وقاعد عليه واحد ماسك البطاقة بتاعتي , أمين الشرطة بَص ناحيتي وقال وكأنه فعلا فعلا يعني
أمين الشرطة : - مختفيا وراء نضارته .. مع إن مافيش شمس في الأوضة - انت شغال ايه؟؟
سوووو : مهندس ديكور
أمين الشرطة : - وهو لابس النضاره برضك وباصص عالكومبيوتر - همممم

قلت في عقل بالي .. ما داهية يكون شاف البيريه اللي انا لابسه وقال ده فنان تشكيلي وليه
!!!!!!! ميول يساريه يمينية أوسطية توسعية سلفيه شرقية غربية دقهلية رمسيس رمسيس رمسيس
!!! ولا يمكن حد من أسيادنا قرأ الموضوع ده .. و شاف الصورة دي وقال نقرصه قرصة خفيفه

أمين الشرطة : انت ليك حاجه في شارع كيلاني ؟؟
سوووو : - مندهشا بجد قوي بقى - حاجة ايه .. وفين شارع كيلاني ده اصلا !!!؟؟؟؟؟؟
سابني سيادة الأمين و بَص تاني عالشاشة بتاعة الكومبيوتر

!!!!! شارع كيلاني .. مين كيلاني ده .. يكونش يقرب لتوفيق الكيلاني
وأساسا مين توفيق الكيلاني اللي جه في دماغي ده !!!؟؟؟
!!!!!! ثم اني ماعرفش حد اسمه كيلاني
.. لأ ياربي .. كنت اعرف واحد أيام الصياعة الثانوية كان اسمه أشرف الكيلاني .. كان تاجر بانجو
.. بس الحمدلله ربنا تاب عليه بعدها بفتره .. واشتغل في الدولارات المضروبة
!!!! وبعدين ربنا تاب عليه وهداه .. واشتغل في تسفير الشباب للخارج .. عن طريق البحر والآخره
.. وبعدين اختفى خالص
!!!!!! يكونوش عملوله شارع بعد ما اختفى
.. بس يعملوله شارع ليه .. ده ماعملش حاجه واحده كويسه في حياته
!!!!!!! ده البانجو كان بيخلطه بملوخية ناشفه

.. أمين الشرطة إدّاني البطاقة وقال
أمين الشرطة : - تقريبا النضارة دي هي الديفولت بتاعه .. أو مولود بيها - اتفضل
!!!!!!! سوووو : - إندهاشه مابعدها اندهاشه - نعم
أمين الشرطة : اتفضل .. خلاص
سوووو : - بصوت النرفزة المكتومة - خلاص ايه .. هو ايه الموضوع اصلا ؟؟؟؟
أمين الشرطة : - بيزعق - مافيش حاجه .. اتفضل امشي
!!! سوووو : - متنرفز- بتزعق ليه .. من حقي افهم الموضوع .. انت بتكلم مهندس ديكور محترم
!! اللي قاعد عالكومبيوتر : - محاولا تهدئة الأجواء - خلاص يا باشمهندس .. تشابه أسماء
سوووو : تشابك أسماك .. ازاي تشابك أسماك !!!!!؟؟؟
ابتسم اللي قاعد عالكومبيوتر .. وامين الشرطه هو كمان ابتسم .. بس ابتسامة أمينية شرطية
أمين الشرطة : - وهو بيقلع النضارة .. واتضح ان عنده عينين زيّ البني آدمين - انا لو مش محترمك كنت دخّلّتك مع ابو جلابيه اللي نزل معاك مالعربيه

.. اكتشفت ان ابو جلابية فعلا مش ظاهر في الكادر
.. يكونوش عايزينه يعترف ان جاموسة قطر العياط دي بتاعته
!!!!!!!! وكان بيدربها في مزارع تبع تنظيم القاعدة

.. لأ .. انا بقول أمشي بدال مايدعبسوا ويعرفوا حوار السجاير اللي شربتها في الاتوبيس
!!!!!! أو ألبس قضية الكتاب اللي استعاره اللي قاعد جمبي .. لما كان طفل بيتفرج عالصور

.. مشيت واتجهت عالميكروباظ .. وبمجرد ما الناس شافتني زي مايكون قريبهم طلع من تأبيدة
!!!!!!!! فرحانين وعلى وشوشهم ابتسامة حلوة .. ده حتى السواق كان مبسوط

!!!! ظهر أخينا أبو جلابية .. وركب هو كمان في العربية .. بس المُلتحي مش باين في اللقطة
سوووو : - باسأل يوسف المصري - هو المُلتحي اللي كان معانا .. راح فين ؟؟
!!!! يوسف : نزل يشرب سيجارة .. قاموا خدوه عالاوضة
إيه ده .. يعني لمّا كان مُلتحي قالوا أمن دولة وسابوه .. ولما شرب سجاير قالوا شيوعي وقفشوه !!؟؟؟
!!!! وأساسا بيشرب سجاير ليه وهو ملتحي .. يشيل اللحيه ويشرب سجاير .. وبعدين يحطها تاني

رجع أخونا المُلتحي - لأ أخونا إيه .. أخوهم هُمََّ .. انا وحيد ماليش اخوات !!!! - واتحرك الميكروباظ

في أثناء ما العربية ماشيه .. سرحت بخيالي وتخيلت لو ما كانوش سابوني .. ايه اللي هيحصل ؟؟
أول تخيل جه في دماغي .. ان العالم اللي كانوا مسافرين معايا .. الصباغ و يوسف و مروة و أسماء .. هينزلوا من العربية ويعملوا اعتصام ومظاهرات وحبشتكانات .. ويبلّغوا اللي يعرفوهم في حوار مهرجان تبادل الكتب ويصعّدوا الموضوع , وبعد ما الحوار يبقى قضية قومية .. يتقال لهم ان صاحبكم اللي قالبين عشانه الدنيا .. حرامي
!!!!!! وهايبقى منظرهم وحش انهم محموقين لحرامي .. وحرامي عِدّه كمان
.. وبعدها على طول .. هيظهر مجموعة أشخاص سيس يلقّحوا عليّ بالكلام

!!! شخص سيس 1 : أنا كنت عارف ان سوووو سيس - جُملة صعبة قوي- بس مارضتش اقول
!!!!!! شخص سيس 2 : يا جماعة اقروا الموضوع ده .. هتعرفوا انه مُنحرف من وهو صغير
!!!!!!!!!!! شخص سيس 3 : عندك حق .. ده النصب في الصِغر .. كالشُرب في الحجر
!!!!!!! شخص سيس 4 : انا اتسرق مني سَبَع موبيلات .. وشايفه وهو بياخدهم
!!!!!! شخص سيس 5 : أنا مش قلتلكم ابعدوا عنه وانتوا ماكنتش مصدقين

.. ممكن يبقى في ناس محموقين ليّ .. بس هايخافوا أحسن يتقال انهم شُركائي في تنظيم العِدد
ما داهيه يكون في تنظيم إسمه تنظيم العِدد .. ويكون مسئول عن سرقة العِدد الصيني اللي في مصر
!!!!!!!!!!!!!!!
يوسف : ايه ياعم مالك .. أوعى تكون متضايق مالحوار اللي حصل ؟؟؟
!!!!!! سوووو : لأ .. بس كنت خايف الميكروباظ يسيبني ويمشي .. بعد ما خد الأُجرة

ملحوظة

.. الموضوع ده - إن شاء الله - هيكون أحد الموضوعات اللي هتنزل في الكتاب اللي باكتبه حاليا
خصوصا ان في فصل في الكتاب اسمه "حاجات في المواصلات" .. والموضوع ده - بعد ماهشيل منه الجُمَل اللي عاملها لينكات - أحد مواضيع الفصل ده .. هو والموضوع ده والموضوع ده , و فصل تاني بعنوان "حاجات عالقهوة" .. و ده هيكون عن الحوارات اللي بتدور بين الشباب عالقهاوي .. زي الموضوع ده والموضوع ده والموضوع ده
.. بس قلت اشوف رد فعل الناس و رأيهم في فكرة الكتاب ككل
وهل لو في كتاب بيتكلم عن المواقف دي .. ممكن حد يفكر يشتريه ولا لأ ؟؟؟

آه .. احتمال - إن شاء الله - أسافر اسكندريه يوم الاتنين الموافق ستاشر حداشر .. هاقعد حوالي اربع خمس تيام .. منها شغل ومنها تغيير جو .. وبافكر اتفرج على ماتش مصر والجزاير هناك
ياترى حد هيعزمني من جرعان اسكندريه على القهوة وعلى غدوة في بلبع ؟؟
ولا ناويين تبلغوا عن إني جاي اسرق عِدد الاسكندرانية !!!!؟؟؟؟
سوووو

هناك ٢٧ تعليقًا:

صبرني يارب يقول...

يخرب عقلك هاموت من الضحك

ايه ده اعمل الكتاب فورا وابعتلي نسخه وهابعتلك الحساب بلاش كده


وما جيتش ليه التجمع بتاعنا فى المنصوره

كان نفسي اشوفك بجد

على الله تعملها تاااااااني ومش تيجى

عدد يا سو
عدد

حصلللللللت

وبريه كمان

هاتبرى منك يا سو هاتبرى منك

فاتيما يقول...

يا عم انت لو عملت الكتاب
ورق أبيض
وعليه إسمك من برا
و حياة يوسف لإشتريه برضو
و فى سرى هقول سوووو بيلم تمن العدة عشان يخرج من القضية
و هعملها بجميلة و أهو أحسن من العيش و الحلاوة اللى بالشكولاتة ...
شد حيلك انتا
و إطبع و اعمل حفل التوقيع
و ملكشى دعوة
وانت أى حاجة كتبتها يا سوووو
كانت مصدر اعجابنا
و تشجيعنا من البداية للنهاية
يلا دوس بنزين و احنا معاك
بس إبعد عن الامين ابو نضارة دا
لحسن سماوى قوى .. و بيخض
انا اتخضيت أهو
إسم الله عليا

عاشقه الرومانسيه يقول...

احجز لى نسخه من الكتاب ده ياسووو
والله باتكلم جد
لازم يكون عندى نسخه
حاجات فى مواصلات
حاجات فى القهوه
اى حاجات فى اى حاجات
هاشتريه يعنى هاشتريه

حنين القلب يقول...

سووووووووووووو
انا عن نفسى هبلغ عنك
هههههههههههههههههههههههههههههه

تنور اسكندريه يا باشا
وربنا يوفقك فى الكتاب يااااااا رب

ملحوظه
لو لقيت حد يعزمك على كباب وكفته افتكر اختك ولو بصباع كفته وقولى وانا هاجى اتغدى معاكم
مااااااااااااااشى

يا مراكبي يقول...

هههههه

كفارة .. وألف مبروك الكتاب

:-)

غير معرف يقول...

فكرة الكتاب حلوة
بس اختار title كويس
ومش تنسي اول نسخة اكتب فيها اهداء لي
وكدعم للكتاب وللسيد سووووووووووو
هاشتري مجموعة
بس برده مش هاوصلك للرقم
100000
اكتب في الأهداء
اهداء الي صديق عزيز واكتب الأسم وتاريخ الأهداء
ومش تكتبه علي اول صفحة
هات ورقة درافت صغيرة واكتب وبعدين دبسها علي اول ورقة
وخلي الورقة بنفسجي
وخليك جدع وعطرها بعطر فرنسي الأيحاء


تامر

غير معرف يقول...

اييووووووووووووه
انت كمان نازل اسكندرية
لو شفتك هنا هابلغ عنك المحافظ شخصيا
بصراحة
انا مش فاضي خالص الفترة اللي جاية


بالتوفيق يا سوووووووووووووووووووووو


تامر

غير معرف يقول...

والله لو ظروفي كانت تسمح كنت اتوليت العزومة دي
بس كنت هاكلك جمبري وكابوريا واستاكوزا دول اللي باكلهم في السمك
بس
بأمانة والله ان شاء الله ملحوقة
عاوز اسألك عن حاجة
جدع جدع
ج د ع
جرع جرع
دي verb ايه


تامر

Unknown يقول...

الحمد لله اني هطير على مارينا قبل ما توصل يا سوو
ولو حصل بعد عمر طويل وقبضت وجيت وانت في اسكندريه
فانا للاسف مضطره
على مضض اني اعزمك
على سانكوشتين حمص من محمد احمد

yasser esmail يقول...

بجد مدونه جامده جدا وفيها موضوعات حلوه

تمنياتى بالتوفيق دائما

خواطر شابة يقول...

بداية الحمد لله على سلامتك من الحادثة التي عرفنا انها حصلت لك يوم لقاء المنصورة الحمد لله انك بخير
تانيا فكرة الكتاب جميلة بالتوفيق ان شاء الله
تحياتي لك

L.G. يقول...

عارف المشكلة فين
أننا لا نثق في الدولة ولا نرجو منها العدالة ولا الحكمة
خلتني اراجع الكتب اللي عندي لحسن يطلع عليا قضية في كتاب الشياطين ال13 ولا حاجة على فكرة أنا كانت راحت مني عدة ابقى دور كده عليها :)

مروة الزارع يقول...

ههههههههههههه

تكونش عدة قوطة

اصل فى الاسواق اقفاص الطماطم بيسموها عدة

الحمد لله جات سليمة مع انى كان نفسى اقولك كفارة يا عم

همس الاحباب يقول...

هههههههههه
كفارة يا معلم
انا كنت اجى معاك اسكندرية واجيبلك بلبع معانا كمان ههههههه
لا شد حيلك فى الكتاب واعمل حسابى فى 3 نسخ علشان همس وشابى وباباهم طبعا
انا قولتلك البيريه ده هيعملك مشاكل بالهبل
سلاموز يا باشا

البنفسج الحزين يقول...

أمين الشرطه قالك أنا محترمك أهوة لو مكنتش محترمك كنت دخلتك مع أبو جلابيه أمال هو وداأبو جلابيه فين؟؟؟
هي الناس دلوقتي بتحترم من ملابسها؟؟؟

أما بخصوص الكتاب فبجد أنا متأكدة انه هيكون تحفه ده انت يابني بتموتنا من الضحك من بوست أمال بقا لما يبقي كتاااااب؟؟
تمنياتي لك بالتوفيق

Remas يقول...

بجد ماشاء الله عليك

انت رائع

في الاسلوب وفي الدم الخفيف وفي الطريقة الشيقة

وانت بس اكتب اى حاجة وتأكد انها هاتعجبنا موت

واناهاشترى ليا ولاخواتى ولاصحابي كمان

وعادى جدا هانعمل نفسنا مش واخدين بالنا خالص من موضوع العدة دا والحمد لله عدت على خير

تحياتى ليك

هشام علاء يقول...

يابن اللذينة

ده انت طلع لك ميول سياسية و مخبى علينا

البوست جامد و فكرة الكتاب هايلة و ان شاء الله الكتاب ينجح و تبيع منه بالهبل و تاستك الاساتك و تبطل تركب ميكروباصات
هههههه

بالنسبة لاسكندرية احب افكرك ان انت كنت قاعد معايا على التجارية بالليل و لم تذكر لى بتاتا او لاى من الحضور عن حادثة الميكروباص المشهودة مخاطرا بمصير هؤلاء الشباب اللى ميعرفوش يعنى ايه كلمة سياسة اساسا

و رغم كل ده فنحن نرحب بك فى الاسكندرية مرة اخرى على وعد منك انك تنسى السياسة و تنسى كيلانى و تحاول تبتدى من جديد

اخوك هش

ماء تشرين يقول...

انت بتجيب الكلام ده منين بجد مش ممكن

Asmaa mahaba يقول...

ههههههههههههههه معرفوش مشوفتوش مليش اى علاقه بيه ولا يوم علقت عنده ومكنتش اعرف ان هو اللى ع الفيس بوك ولا اعرف اصلا حد اسمه سوووو
اصيييييييييييييييله ي سومه طول عمرك منوفيه جدعه يا بت:))
متهيالى حيبقى فكرته شبه تاكسى شويه ولا انا غلطانه مع الفارق طبعا ان سووو هو اللى كاتبه وان سوو مش اى حد
امال انت مين يا جدع انت
لا تقلق اكتب الكتاب وانا عليا الشربات والزغاريد:q
وملكشى دعوه بالعده
بس خليك جدع ومتنزلوش قبل 6 اتناشر
والا حبلغ عنك واقولك انك صاحب اكبر تنظيم عداوى سوواوى فى المنتقه:))

Asmaa mahaba يقول...

بقولك يا سوو لما تنشهر ان شاء الله ابقى افتكرنا عليك ليا وجبه كنتاكى انا قلبى اسود زى الطين :))))))))))))

سواحة يقول...

اعتقد انك انتصرت لما الامين اضطر فى اخر الامر يقلعلك النظارة :-)

حتنزل كتاب و مش خايف المرة الجاية يمسكوا فيك و ماسيبوكش :-) و لا ساعتها اعتقد ربنا يكرمك و تجيب عربية علشان السواقين المكروباص ميقفوش يستنوا :-)

ياالله ربنا معاك
بس عذرا انا مش حشترى الكتاب الا لما ترجمه انجليزى علشان يوصلنى

غير معرف يقول...

و عهد الله تامر بيحبك

فاتيما يقول...

سوووووو
رجعت و لا لسه الامين مستنصدك ؟؟
أصل خلاص انت هتقلقنا من مشواير اسكنكرية كداو هتعملنا عقدة طريقصحراوية
إن شاء الله تكون رجعت بألف سلامة
و انبسطت بالسفرية
خالص ودى ليك يا عزيزى

جلال كمال الجربانى يقول...

السلام عليكم

حقيقى حيبقى كتاب لذيذ
بس متتعشمش أنى أشتريه
لأنى بكمل عشايا نت
بس لو لقيته على النت ممكن علشان خاطرك أبقى أحمله وأقراه
للتخلص من الغم والهم والكرب العظيم
وكل عام وأنتم بخير

وكل عام وأنت بخير حال

خواطر شابة يقول...

انا حبيت اهنئك بالعيد ربنا يعيده عليك باليمن والبركات وبالصحة والعافية ان شاء الله
تحياتي لك

كيكى عوووووو يقول...

ايه ياعم الشباب والرياضة انت اتمسكت تحرى ولا ايه؟؟
(`'·.¸ (`'·.¸*¤* ¸.·'´) ¸.·'´)
♥*** happy feast ***♥
(¸.·'´ (¸.·'´*¤* `'·.¸) `'·.¸)
*************************

Soooo يقول...

الف شكر للي علّق وشجعني على الموضوع بتاع الكتاب

وان شاء الله يعني اقدر اعمله بشكل يكون جديد ويارب يعجبكم

وان شاء الله برضه هحاول انه يكون بسعر مناسب عشان الناس تشتريه

وكل سنه وانتو طيبين



سلامووووووز