الجمعة، 10 ذو الحجة، 1430 هـ

!!! النشأة السوووويّة

.. بعد ما رحت اسكندرية في الحوار ده .. اتفاجأت بصورة للسوووويون القدماء موجوده في بحري
وبالتحديد .. في منطقة القلعة
.. وهنا لقيت انه من واجبي كإنسان سووووي - نسبة إلى جدي سوووو الكبير - أن أشرح للعالم أجمع
!!! النشأة السووووية

يقول الفلاسفة والمؤرخون .. أن الإنسان الـسووووي القديم ظهر في منطقة صعيد مصر .. وبعد أن استقر به الحال وتزوج من بنت سوووويه كده و نِغشه .. أنجب منها مجموعة من الصبيان والبنات .. وأطلق عليهم كللهم اسم سوووو .. ويعقبه رقم يبيّن ترتيب إنجابه .. مثل سوووو واحد , سوووو اتنين .. وهلّم جرجر

قام سوووو الكبير ببناء بيت كبير من الطين .. لكي يستظل بِظله كل آل سوووو , ولكن القدر كان يخبئ له وللـسوووويون .. حدثَا ليس سعيدا
وذلك لأنه عقب بناء البيت المفتخر .. حدث فيضان لنهر النيل .. مما جعل البيت الـسووووي عبارة عن عجينة طين .. وكانت ليله مطينه بطين , وما أن شاهد سوووو ما حاق ببيته الذي طلع ترابانتينه في بنائه .. هاج وماج
.. وعندما علم الناس بهياجه .. أطلقوا على المنطقة التي كان يقيم بها الـسوووويون .. سوووو-هاج
!!!! والتي تحوّرت بفعل الزمن إلى .. سوهاج

عقب هذا الحدث المرير .. تشتت الـسوووويون الصغار .. في مختلف بقاع الأرض , وسوف نتحدث عن أكثر الـسوووويون تأثيرا في البشرية
-----
سوووو خمسه : وهو الابن الخامس لـسوووو الأكبر .. وقد كان سوووو خمسه مهتما باللغات .. وظهر وضوحة في اللغة الاجنبية .. وتحديدا .. في اللغة الانجليزية .. لدرجة أنه قام بتغيير اسمه من سوووو خمسه .. إلى سوووو فايف

انتقل سوووو فايف شمالا بعد حادثة فيضان النيل .. وكان ينتقل شمالا وهو يحمل على كتفه أخاه الأصغر .. سوووو عشرطاشر .. وذلك لأن سوووو عشرطاشر كان وقتها طفلا صغيرا يكره أن يلبس أي حاجه في قدمه لتحميه من أشواك و وعورة الطريق
!!! بعد أن أنهك التعب سوووو فايف .. رمي اخوه سوووو عشرطاشر وقال له : يا اخي غور بقى قرفتني
وغار سوووو عشرطاشر من أمام أخيه سوووو فايف

استقر المقام بـ سوووو فايف على ضفاف نهر النيل أيضا .. وكان قد تعرّف على بنت من على تويتر – اتضح ان تويتر ده من زمان قوي – وضرب معاها صحوبية وقصة عشق فاقت قصص العشاق القدماء أمثال .. عنتر وعبله .. قيس وليلى .. روميو وجولييت .. أي أنها كانت قصة عشق .. قوية كقصة طرزان وشيتا
ولكن الاختلاف في قصة حب سوووو فايف ومحبوبته - والتي أغفل التاريخ ذكر اسمها - كان في أنهم قد تزوجوا سرًا بعد أن رفضة ابو البت .. وضربوا ورقة عرفي عند محامي صاحبهم .. فاتح شقة دعارة .. بيقلبها مكتب تأجير سيارات
!!! وكانت دي أول حالة للزواج العرفي المُتعة المسيار .. في التاريخ

بعد أن تزوجوا واستقروا والحياة بقيت منجهه .. عرف ابو البت .. قام جايب رجالة العيلة وناطط بيهم في ميكروباظ .. وطلعوا على المُكنة اللي كان واخدها سوووو فايف ومراته إيجار جديد .. ومسكوا سوووو فايف عدموه العافية .. بل إنهم غفلقوه ضرب .. ومات في أيديهم وهو يلفظ آخر أنفاس حجر الشيشة اللي كان بيشربها قبيل الاعتداء الغاشم عليه

بعد أن ضرب ابو البت والرجاله اللي معاه سوووو فايف .. وبعد أن ضربوا حجر الشيشه بالمرّه .. خدوا بنتهم ورجعوا على نفس الميكروباظ , ولكن ابنتهم كانت حامل .. فهربت بمعاونة سائق الميكروباظ .. وانجبت ابنًا قررت أن يحمل نفس اسم أبيه .. سوووو فايف
وبعد أن أنجبت الطفل .. منعها تعب الولادة من أن تذهب بنفسها للسجل المدني كي تستخرج له شهادة ميلاد .. فطلبت من سائق الميكروباظ أن يذهب إلى السجل المدني .. وكتبت له الاسم في قطعة من ورق البَردي
وعندما عاد اليها واعطاها شهادة الميلاد .. نظرت مليّا في اسم ابنها .. فوجدت اسمه ليس سوووو فايف , و سألت عن السبب .. فقال لها عم الاسطى بتاع الميكروباظ .. أنه جاع في السكه .. قام فايت على عربية كبدة وضرب خمس ترغفه عالسريع .. وبعد ما ضرب الكبده لقى شَغَته عالقة بين أسنانه .. فقام ببرم ورقة البردي وسلّك بيها أسنانه .. وعندما ذهب لمكتب السجل المدني .. فتح الموظف الورقة فوجد أن بعض الحروف قد مُسحت من تأثير تسليك الأسنان .. فقام بكتابة الاسم كيفما رآه مناسبا له من وجهة نظر اللي خلفوه
.. وكان هذا الاسم هو .. سويف
!!!! وتزوج سويف .. وأنجب مجموعة من الأبناء .. وأطلقوا على المنطقة .. بني سويف
-----
سوووو عشرطاشر : وهو آخر من أنجب سوووو الكبير قبل فيضان النيل على بيتهم .. يعني عيّل بوزو فقر , ويبدو أن سوووو عشرطاشر .. وقع في غرام الماء والزروطة منذ نعومة حوافره عندما فاض النيل على دماغه ودماغ أهله .. وجعله هذا الحب يرغب دوما في المشي في الماء والبلبطه .. ولذلك كان دوما حافي القدمين ولا يحب لبس الأحذية

بعد أن أنزل سوووو فايف .. سوووو عشرطاشر من على كتفيه وقال له ما سبق ذكره في قصة سوووو فايف , آخذ سوووو عشرطاشر على خاطره واتكدّر .. وهامَ على وجهه وهو مش داري بحاله يا ولداه .. إلى أن استقر به المقام على البحر المتوسطل .. وقد أعجبه منظر المياه الزرقاء - أيام ماكانت لسه زرقاء - التي لا تنتهي , وقرر أن يتخذ هذا المكان مقراً له ولحياته الجديدة

في أحد الأيام .. وبينما كان سوووو عشرطاشر يُبلبط في البحر وهو في قمة استمتاعه .. ظهرت سفينة تجارية تتبع أهل الشام .. وعندما نزل رُكّاب السفينة ونظروا الى سوووو عشرطاشر .. استغربوا كونه حافي القدمين وبدون حذاء .. فأطلقوا عليه اسم .. سوووو كُندَري .. وذلك لأن الكُـندره تعني الحذاء بلغة أهل الشام
.. وبعدها بفترة .. عُرفت المنطقة التي يعيش بها سوووو عشرطاشر بإسم .. سوووو-كُندُريّه
!!!!! والتي تحوّلت بعدها إلى .. الإسكندرية

: وهنا يتحدث الفيلسوف عبده حشيشه ويقول وهو يشرب بوب الحشيش
يُخطئ من يعتقد أن الإسكندرية سُمّيت بهذا الاسم نسبة إلى الاسكندر المقدونس .. وذلك لأن اسكندر اصلا كان اسمه وائل البهبيشي .. وهو أصغر أبناء الحاج سِعده البهبيشي .. حاكم دولة بهبيشيا العُليا , والتي قد أُغرقت في الديون نتيجة الفشخرة الكدابه للحاج سِعده , الذي عندما أدرك انه يا الحبس يا الحبس برضك .. قام ببيع كل ممتلكاته وباع الدولة كلها .. بل انه قد باع ابنه الأكبر "هيثم" قطع غيار - كلاوي و قلب وكبده وكده يعني - وعندها خاف وائل على روحه .. وهبأ على اسكندريه

: يأخد الفيلسوف سبروس العِرسه بوب الحشيش من الفيلسوف عبده حشيشه ويستطرد في الحوار قائلا
لما وائل اتعرّف على سوووو عشرطاشر أو سوووو كُندَري كما قال عليه أهل الشام .. كان معجبا به أشدما إعجاب .. خاصة فيما يتعلق بأن سوووو كان دوما حافي القدمين .. وقرر وائل عندها أن يتخذ لنفسه اسما آخرا غير وائل البهبيشي .. لعدة أسباب .. أول سبب .. خوفه أن يعرف أحد بأنه ابن سعده البهبيشي .. وساعتها ممكن يتباع قطع غيار زي اخوه هيثم , وتاني سبب

: يقاطعه عبده حشيشه ويأخذ منه بوب الحشيش ويقول
تاني سبب .. انه كان خايف لما يكبر ويروح الحج .. يرجع والناس تقولّو حمدلله عالسلامة يا حاج وائل .. وتضحك في سِرّها على الحاج وائل دي , وعندها صرّح وائل لـ سوووو أنه معجب به .. ويريد أن يغيّر اسمه ويجعله اسكندر البهبيشي .. فقال له سوووو : انت غبي ياض .. يعني يوم ماتغيّر اسمك لإسم تاني .. تختار اسم ابوك اللي عامل كل المشاكل !!!!!؟؟؟؟

.. الحقيقة .. العائلة الـسووووية عائلة عريقه - بدليل إنّي باعرق كتير - وكان نفسي احكي اكتر عنها
.. بس الخرفان بتمأمأ والجزّار جه .. وخايف يطلع اهبل ويدبح ابني
!!!! وساعتها النسل السووووي .. ممكن يتقطع


ملحوظة

.. معنى كلمة سوووو موجود هنا , بس لقيت الجو متكهرب والناس متضايقه
.. قلت اهزر واحاول ارسم بسمة على وشوش اللي بيقرالي
ولو عجبكم الموضوع .. اعتبروه العيدية بتاعتكم
ولو ماعجبكمش .. حقكم عليّ .. و آديني حاولت على الاقل

وكل سنه ومصر .. واللي بيحب مصر .. بخير وسعادة يارب

سوووو

هناك 54 تعليقًا:

Bee يقول...

موّتني من الضحك.

غير معرف يقول...

ههههههههههه

عسل والله يااحلى سوووى فعيله سووو وفالدنيا بحالها

فاتيما يقول...

و الله يا سوووو يا غالى
انت اتممت المهمة على اكمل وجه
و رسمت البسمة فعلا
على الأقل على وش أختك فاتيما
اللى قاعدة حاليا زى المتعلق بين السماء و الأرض
و مش عارف يرسى على حتة
لما لقيتك كاتب بوست جديد قولت أروح ازيح الهم شوية من على قلبى
و قد كان
انت اخلصت النية
و ربنا أستجاب
بقى أسكنكرية يا مفترى طلعت
تنتسب للسوووو المصرى القديم ؟!!!
كل عيد و انت بألف خير يا عزيزى
و لن امل منها
و لا من كتابتها ليك
أضحك
الله
سنك

adel يقول...

جامدة قوي ياسووووووو
اهي حاجة بدل الغم اللي احنا فيه

عاشقه الرومانسيه يقول...

انا مين ؟انا فين؟

انا ايه اللى جابنى هنا
(:
توهتنى
وانا برضه طوول عمرى باشك فى المعلومه بتاعه الاسكندر البقدونس ده
ادينى اتاكدت ان شكى كان فى محله
(:
ربنا يخليك لينا ياباشا وتثقفنا كمان وكمان
وعلى حسب كلامك فانا اصولى تمتد لعائله سوووو
ولى الشرف طبعا
جدى كان من سووووهاج
وانا وبابا من سوووو-كُندُريّه
ههههههههههههههه
شفت؟
طلعنا قرايب اهو

يوميات شاب منوفى يقول...

هههههههههههههههههههة دانت مسخرة بوطت معلمتنا التاريخية خالص ومن هنا نطالب وزير التعليم بتدريس تارخ السوسيين فى المدارس

Z_Diva يقول...

looooooooooooooooooooooooooool
wenta tayb ya man :)

مي يقول...

هههههههههههههههههههههههههههههههههههههههههههههههههههههههه
روووووووووووووووعة انت بجد رائع مفيش منك استحالة
يالهوىىى ده انا كده خدت عيديتى لعشرين سنة ده انت فصلت التاريخ عليك بالظبط
سوووو عشرطاشر كان عندنا ههههههههه سكوندرية
وحكاية ابنك دى كميلة جداااااااا فعلت انت بهجة العيد
متتاخرش علينا محتاجينك والنعمة

صوت من مصر يقول...

سو
اظن ان واحد كان اسمو كيمو
هو برضه كان بتاع جيلاتى وهو اللى حدث الاسم وسماه " ايس كريم " عشان سمى ابنه كريم صح
ياعم الحاج تسلم الايادى على بوست هايل

nor يقول...

متابعه مدونتك دايما
بس المره دي موتني من الضحك
ربنا يكرمك علي قد ما بتفرح قلوبنا
بقي سووووهاج اصلها سوو
واسكندريه كمان
و بني سويف
طيب وشمال سيناء ؟؟
ههههههههه
كل سنه وانت طيب

اخر يوم فالجنه يقول...

اول مره شفتك فيها يا سو كنت فبرنامج فالتليفزيون كنت انت وكزا حد وكانو بيتكلمو عن المدونات وكده
وبدات بعدها ادور فالمدونات عنك لحد ما لقيتك
شهاده حق انت جامد فالكتابه الساخره
ودى نعمه ربنا بيديها لناس معينين
ومش اى حد يعرف يكتب فالنوع ده من الكتابه
يارب تفضل تمتعنا كده بالحجات الجميله دى
وكل سنه وانت طيب
اخوك محمود

غير معرف يقول...

هههههههههههههههههه
جامدة مووت يا سووو

Wanda يقول...

لا الموضوع ده تثقيفى تعليمى خطير
ايه ده كله :-)))

و الله نورتنى دلوقتى فهمت معنى سوووهاج
اتارى كل الى جاين منها بيهيجوا :-)
(قبل ما حد يرمى طوب انا اصولى منها)

و كلنا كده طلعنا من سووووو

الا اية بوب الحشيش الى بيلف على الخلق ده؟ هما شحاتين و لا ايه ؟

غير معرف يقول...

سوو يا حبيب قلبى
أمنع تعليق الغير معرف و ربنا يسعدك و يحقق لك كل أحلامك

Sonnet يقول...

عيد سعيد عليك و على زوارك

Memo يقول...

عدية زي الفل ومقبولة.

Dolita يقول...

هههههههههههه

تحفه يا احمد بجد

تسلم ايدك يا سوووووو

غير معرف يقول...

انت مصيبة بجد

انا دخلت مدونات كتير بس ما ضحكتش زي ما ضحكت في مدونتك
برافو

ابن حـجـر الـعـسـقـلانـى يقول...

كفاءة كفاءة كفاااااااءة يا سوووو


روعة بجد ... أنا فعلا كنت باندهش (دى غير الاندهاشة الكبرى) كل ما أقرا مقطع من المقاطع

فعلا .. مية مية .. و فكرة روعة

حسبى ربى يقول...

كل سنة وانت طيب ... ايه ياعم التاريخ الجامد ده .. ما فيش فايدة فى البلد دى حيفضلوا لحد امتى يعلمونا تاريخ غلط

فاتيما يقول...

آه صحيح يا عسقول
غيه التعليق الغريب دا
واد يا سووووووووو
إنت كنت بتهبب إيه ف سووووكندرية؟!!!
معقول يا عسقول يكون تعليق دخل غلط ؟؟
هوه الامين أبو نضارة بتاع الكمين اللى ف البوست اللى فات ..
قولنالك مش هيسيبك و هتروح مع الراجل أبو جلابية مسمعتش الكلام ....
يكونش دا له عولاقة ؟!!
مش عارفة
بس دا البوست الحالى ملوش أى علاقة باللى إنكتب ف التعليق خالص
يسوقك يا سووو
عشان تمسحه بقى
و لا تشوف إيه النظام ...
صباح نور و تعلقات غلط يا فندم

غير معرف يقول...

اوت دى يا سووو
البوست كلة حشيش واسفاف وفلاسفة والاسكندر الاكبر متريق علية !
معلش يا سوو ساعات بتكتب حاجات كوميدية بس المرة دى بجد اوت ! انقذ نفسك قبل ما تقع فى دوامة الاسفاف
على فكرة مشكلتنا ان كل واحد يقرا كلمتين على بلوج فيهم شوية خفة دم يعملوة ستار ! وبعدين نلاقى اسفاف
مش كفاية الزبالة مالية الشوراع والفساد خانقنا والغلا مطلع روحنا كمان لما نحب بلوج ونيجى نقرا كلمتين فيه لا مؤاخذة يعنى نقرف من بعض الكلمات

سوو انا كاتبة النهاردة انونيماس مش عشان انا خايفة اقولك الـ ID انما لانى فى الوقت الحالة ماسحة البلوج وبعمل فلتر لعقلى
ما علينا
تقبل النقد يا صديقى
تقبل النقد وان اسات اختيار الالفاظ عفوا وانما لانى احب هذا المكان واحب ان ابتسم فيه وخشيت عندما وجدت مكان ابتسامتى نظرة استياء
تحياتى

غير معرف يقول...

تحيه كبيره لصاحبة النقد البناء على صراحتها وياريت تسمع بكلامها لأن الكلام الحلو هتسمعه كتير من أصحابك لكن الكلام الصريح الي زي ده قليل لما هتسمعه أنا قارئ جديد ليك بس مش شايف جديد أقراه غير الألفاظ الي سامحني ماتطلعش غير من بيئه معينه وهتضرك أكتر ما تنفعك

ابن حـجـر الـعـسـقـلانـى يقول...

بص يا سوووو .. عايز أقول كلمتين

بص يا سوووو .. أنا كنت باخدعك طول الفترة اللى فاتت دى من ساعة ما عرفنا بعض .. أنا كنت بانافقك و باشكر فى مواضيعك و أهلل و أهيص عشان كنت طمعان فى مصلحة منك ألا و هى إنك تدينى ربع جنيه .. بس خلاص .. انت ما إديتنيش الربع جنيه اللى أنا كنت طمعان فيه .. فعشان كدة هاكلمك بصراحة و هاعلن عن رأيى فى مواضيعك

مواضيعك مافيهاش جديد و مافيهاش معالجة فريدة من نوعها و مافيهاش أسلوب خاص و مافيهاش حكمة و لا منفعة و لا الحاجات دى .. و لما كنت باقول لك إن صوتى كان بيجيب آخر المكتب أو آخر البيت من الضحك على مواضيعك و إن أمى كانت بتضحك على ضحكى أنا كنت باضحك عليك .. و بقالى بتاع تلات سنين أهو متابعك و مش بافوت لك تدوينة عشان خايف إنك تستنانى برة المدونة و تضربنى لو مالقيتنيش باشجعك و أهلل لك


متهيألى الكلام دة هايعجب المجاهيل اللي علقوا .. أنا مش عارف هم بقوا كتير ليه كدة فى التدوينة دى .. ربنا يزيد و يبارك

غير معرف يقول...

اولا بيتهيالى الكومنت بتاع انت مسلم وهتتحاسب والكلام دا جه هنا بالغلط لان احمد ابعد مايكون انه يتوجهله كلام زى دا وكل واحد عرفه وقرب منه اكيد متاكد من كدا وهوا ان شاء الله لما هيرجع بالسلامه ابسط حاجه هيعملها انه هيمسحه ومش هيكلف نفسه يرد عاللى باعته اساسا

ثانياالاستاذه المحترمه اللى بتقول ان كلامه بيقرفها وانها ياحرام هربانه من زباله الشوارع وبتفلتر دماغها احب اقولها انك فعلا يابنتى عملتى عين العقل انتى فعلا محتاجه فرمته وغسيل ومكوى ولو الكلام بيقرفك ومش عاجبك انتى ممكن بكل بساطه تريحى نفسك وتريحينا ومتتفضليش بالزياره مره تانيه

انا وغيرى كتير شايفين ان البوست تحفه ومفيهوش الفاظ خارجه ولا حاجه بالعكس اللى يقعد يفكر ويربط بين اسمه واسامى اماكن ويألف حكايات عالموضوع بالشكل دا وبالطريقه الساخره دى هوا راجل فعلا بيحب الكتابه وبارع فيها وان شاء الله مستنيه مستقبل كويس رغم حقد الحاقدين

Kontiki يقول...

حقد حاقدين اية يا سيد
انا لانى بحترم المكان دة جيت اقرا فية ولانى بحب ابتسامة وكتابة سوو دايما بشوف البلوج
بلاش شغل المصريين دة انك تتبرع بالرد لصديقك لاثبات صداقتك
البوست فى المجمل معقول انما انا ضد التريقة على الفلاسفة والاسكندر والاسفاف فى ذكر البانجو و الحشيش
اذا كان دة من تراث الشعب المصرى اللى بيحشش فى اللافراح و اعياد الميلاد والشوارع الضلمة فمن الطبيعى انى اتوسم فى مدون بعض الثقافة
يا سيد يا محترم يالى على طول رديت اننا حاقدين
فى مؤلفين عظماء كومديانات غربيين
قدروا يكتبوا مواقف كوميدية بلا حشيش وبلا اسفاف
انا مطلبتش المستحيل يا سيد لما قلت بلاش اسفاف ولا ذكر لسلوكيات متدنية عشان نعمل بوست كوميدى
ردى الاول على البوست
وردى الاخير على المحترم اللى اتبرع ورد عليا كلة بيصب فى مجال واحد ان المكان دة كويس
وعاوزاة يفضل كويس
وبقول رايى بصراحة
ولا لازم عشان يكون المكان كويس اطبل مع الطبالين والا اكون حاقدة من الحاقدين !!!!!
وفلترة عقلى و وقفتى مع نفسى مش مجال لتريقتك يا محترم حساب النفس مش من الذنوب بس ومدعى التدين حساب النفس ومراجعه افكارك واعادة هيكلة ذاتك مهم برضة
ومش معنى انى قلت ملاحظة يبقى لو مش عاجبك امشى ومتجيش تقرى هنا تانى ممكن اجى وصاحب المكان يستمع بصدر رحب و يفهم وجه نظرى و يحسن لمزيد من الابداع .
مفهوم يا مثقف

غير معرف يقول...

والله ما كنتش عارفه انه فيه حشاشين في مصر وزواج متعة ومسيار الا لما قريت البلوج ده. كأنه ده حاجات سرية يعني وان كل الناس مش عارفاها قام جه سووو فضحها فجأة.

بطوط حبوب يقول...

يخرب بيت مخك يا سوووووو بجد انت دماغك عاليه يخرب بيت كده


والله يا بنى انت خساره االبداع دا يقف عند المدونه بس


وراس جدى الباشا لو اشتريت شركه نتاج لانتجلك فليمين ولو خسروا هدخلك السجن وربنا يوفقنا
:D

غير معرف يقول...

يمكن حضرتك بس خانتك الالفاظ ودخلتى فى زباله شوارع واسفاف وكلام كبير مكانش ليه لازمه ولايصح انك تقوليه لانه واضح انك حد مثقف وليه رأى ويقدر يوصله بهدوء واسلوب مقبول

محدش يقدر ينكر عليكى حريتك فالنقد والاختلاف فى الرأى مع الاخرين لكن بما اننا المفروض ناس مثقفه ومن بيئه محترمه المفروض النقد بتاعنا يكون باسلوب كويس ميحسسش اللى بيقراه ان صاحب التعليق داخل يتخانق ويرمى كلمتين يستفز اللى بيقراه ويجرى ماهو طبيعى يكون ردى انا وغيرى على نفس المستوى من الانفعال وهنرد عليكى بطريقه متعجبكيش زى ماكلامك معجبناش

عالعموم انا وحضرتك وكل اصحاب التعليقات اكيد بنشترك فى حاجه واحده هيا حبنا للبلوج دا وحرصنا عليه وان اختلف اسلوب التعبير عن الحب دا

حسبى ربى يقول...

لا لا لا والله بجد هوا فى ايه .. مين الناس المجاهيل الكتير اللى كفرت البلوج و كفرتك يا سوووووو وكفرت القراء دول .... لا والله لازم ترد ..!!!!!!!!!!!!!!!!!!!!!!!

سومه...مجنونه فى بلد عاقل يقول...

كدا ي سوو اروح احج انا الاقيك خنتنى ونزلت الموضوع من ورايا وانا اللى قاعده مستنياه
ماشى ماشى اما صحيح انسان سووويى

سومه...مجنونه فى بلد عاقل يقول...

بالمناسبه يا سووو فاكر المثل اللى كنت قولتهولك كرره على نفسك تانى بقى عشان خنتنى ونزلت الموضوع من ورايا وكل سنه وانت طيب يا بشسوووى :)

سومه...مجنونه فى بلد عاقل يقول...

ههههههههههههههه ايه دا يا سوو انت جالك التعليق اللى جالى ولا ايه بس انا جالى من غير معرف كاتبه موضوع رايحه احج قالى انتى ملحده هههههههههههههه هو اللى بيحج بيلحد اليومين دول ولا ايه
ولا الناس دى بتحج فى كعبه غير بتاعه ربنا:))

اقصوصه يقول...

كل سنه وانته طيب :)

غير معرف يقول...

يا أستاذ سووو يا محترم ايه الالفاظ البذيئه اللى انت كاتبها دى نزلت من نفسك ومن مستوى المدونه بتاعتك

غير معرف يقول...

مش ممكن تطلع الفاظ كده من سووو لأنه اصلا مسافر ومن اسبوع ما فتح انترنت. ولو كان هو فعلا كان طلع اسمه باللون الازرق.

همس الاحباب يقول...

كل سنة وانت طيب
البوست جامد جدا
بقى سوهاج اصلها سوووو.. هاج
ماشى يا عم سووو

همس الاحباب يقول...

ايه يا عمنا ده
البوست بقى كله غير معرف
وطلعت مش مسلم كماان وبتقعد معانا وبتصلى معانا فى المسجد كماان
خسئت ورب الكعبة
ههههههههه
ههههههه
بجد انا ضحكت من التعليقات اكتر من البوست
ربنا يكون فى عونك يا سوووووو
تحياتى

Soooo يقول...

الف شكر للي عجبهم الموضوع وعلقوا عليه
وألف شكر لكل من دافع عني ورد غيبتي وانا مسافر ومش عارف في ايه بيحصل هنا

والف شكر للي بينتقدني - ولو ان اسلوب النقد كان ابعد ما يكون عن النقد .. بس شكرا برضه - وان شاء الله هحاول اكون احسن في المواضيع الجايه

وعلى فكرة .. التعليق الشتيمه .. مش انا اللي كاتبه
اي نعم انا لساني زالف وممكن اتريأ واشتم .. لكن مش باشتم بالام ولا الاب
لأني ما احبش حد يرد شتيمتي ويشتمني بأمي الله يرحمها
واعتقد انه باين ان اللش بيشتم مش انا من خلال كتابته لأسمه من غير مايكون للبروفيل بتاعي
--
وبالنسبة للتعليقات الغريبه اللي بيتهمني فيها شخص ما اني كافر وكلام في السكة دي
مش هاقول غير جملة واحده

أشهد ألا اله الا الله .. وأشهد ان محمدا رسول الله


سلاموووووز

زقطـوطـة يقول...

ربنا يكرمك زي ما بتضحكني كده يا أحمد يارب

غير معرف يقول...

ههههههههههههههههههههههههههههههههههه
علي النعمة انت جامد اخر تلات اربع خمس حاجات
وعهد الله ما بادحك في اي موقع عالنت زي ما بادحك عندك
واللي بيقولك يا كافر ولا الي بتقولك اسفاف وزباله هم الكفره وزباله ومابيفهموش وماتسمعلهمش ولا لهبلهم
انت جاااااامد بجد مش تهجيص ولا تهيص

Zika يقول...

انا داخل اعلق ع البوست - زي الناس - لقيت تعليقات عجيبه كده
العالم الفكسانه بتاعة ادحرج واجري دول اللي بيلطعوا اي كومنت في اي بوست وخلاص بعيدا عن موضوع البوست احب اقولهم زي ما الاغنيه الشعبيه العظيمه بتقول

وادحرج واجري
يا رمان
وتعالى على حجري
يا رمان
ده انا حجري حنين
يا رمان
ياخدك وينيم يا رمان

نعلق بقا ع البوست

البوست ده عالمي ياد يا عم سوو
واحشني وليك عندي بوسة فرنسية الايحاء بس لما ابقا اشوفك :D

غير معرف يقول...

الله ينكد عليهم الله ينكد عليهم الله ينكد عليهم
و ينتقم منهم قاددر يا كريم
كل من أدعى التدين و كل المتشددين و المتعصبين تحت ستار التدين
حسبنا الله و نعم الوكيل فيهم
كرهونا فى الدين،و الله كرهونا فى الدين
حسبنا الله و نعم الوكيل يا قساة القلب يا حيوانات

Ahmed Al-Sabbagh يقول...

يا عم الحاج ده واحد عامل مدونة وبيلف على المدونات ويلزق جزء من بوستاته اللى هو أصلاً ناقلها من منتديات يعنى مش شتيمة ولا حاجة ما تضايقش نفسك

ايوشة يقول...

انت قافل ليه التعليقات فى البوست الاخير بس جميلة جدا ومعلش انا دلوقتى فهمت السبب هى موضة الناس الغريبة دى تتدخل المدونات وتعمل تعليقات غريبة مريبة ملهاش اى علاقة بالكلام اللى مكتوب
البوست بقى بتاع النشأة السوووية تحفة بجد ماشاء الله عليك بتخرج اى انسان من اكتئابه بخفة دمك

hatem يقول...

جميلة جداً يا سوووووو
أنا من عشاق الأدب الساخر ولهذا عجبني جداً قصتك النشأة السووووية .
ننتظر جديدك

صبرني يارب يقول...

سووووووو

بجد يخرب عقلك

انت بتضحكنى جامد يا جدع انت وانا مش متعوده على كده

بص صعبت عليا وقطعت قلبي لما قريت البوست بتاع حكاية السنين الى ضاعت منك والضحك قلب عليا بصعابين كتير

ايوه البوست الى دخلته من بوست معنى كلمة سووووو

يعنى انا قريتلك اربع بوستات النهارده

لو حسبنا كمان البوست بتاع ساعات الحب

الى قريته وقلت ايه ددددددده هو ايه حنفية الحنان الي ضربت عنده يا ولاد

تحياتي لك

صبرني يارب يقول...

ايه ده

ايه الى بيحصل هنا ده

انا مش فاهمه منهم حاجه على فكره

انا قريت البوست ما شوفتش حاجه

نفض يا سو مش تحط فى دماغك

ما خدتش بالي خالص من الهبل ده الا بعد ما قريت وعلقت

بجد حتى لو كانوا بينقدوا مافيش حد قال ابدا ان النقد يكون كده

وخصوصا الاسلام الى بيتمسحوا فيه
هم ابعد ما يكون النبى عليه الصلاة والسلام واصحابه وال بيته فى اخلاقهم الزفت دي

احتسسسسسسسسب يا ابنى

ما تحطشهم فى دماغك خالص



ومن موقعي هذا

باقول للي داخل بغير معرف خليك راجل وقول انت مين

او على الاقل خليك اد كلامك واكتب باسمك

مسخررررررررررره


لا مهزززززله على راي يوسف وهبي

mesh2dra يقول...

السلام عليكم

دخلت مدونتك بمحض الصدفة
وكنت داخلة اقولك بجد.... اقل ما يقال عنها انها.. تحفة
اسلوبك حلو:))

وفكك من الخناقة اللي فوق
اكتر من كده وربك بيزيح :s

يوميات فنانه مفروسه جداا يقول...

سووووووو
ايه الموضوع الجامد ده
والله ضحكت ماشاء الله عليك
شوفتكو في التلفزييووووون انت والصباغ وسحر
ماشاء الله عليككككوووو والله

فيونكات يقول...

معلومات حلوة اوى اول مره اسمع عنها

z!zOoOo يقول...

السلام عليكم

شوفتك قبل كده وكان نفسي اجي مدونتك

ومكنتش اعرف اسمها

لحد ما عرفتها

مدونه جميله

وسو يا سو و اهو سو هيحبسوه

D:

تحياتي

ahmed يقول...

ههههههههههه جامدة والله يابوحميد ..... كده فعلا احنا السوهاجية اصل مصر.
بصراحة موضوع مرح وجميل

entrümpelung wien يقول...

شكرا على الموضوع
entrümpelung
entrümpelung
entrümpelung wien