الأحد، 13 جمادى الأولى، 1429 هـ

دكتور عطيه

.. دايما لما بـ أُصاب بحالة خنقه او اكتئاب باهرب لعالم السينما عشان اعيش جو افضل من اللي عايش فيه
ولو لمجرد لحظات
لكن كنت بانسى في كل مره باهرب فيها .. حكاية سمعتها من واحد ماعرفوش ولا يعرفني .. الحكايه دي حصلت بالظبط بعد تلات أسابيع من أحداث حداشر سبتمبر وتفجير برجي التجارة في نيويورك
الحكايه دي هي حكاية .. الدكتور عطيه
----
كنت قاعد عالقهوة باتكلم مع واحد صاحبي وانا مخنوق من الدنيا والعيشه واللي عايشينها .. كان قاعد قدامي واحد بيشيش وشكلو محترم قوي وماشفتوش قبل كده عالقهوة .. صاحبي بعد ما فضفض معايا شويه وانا فضفضت معاه شويتين .. قام ماشي وسابني لوحدي وانا عمال اشرب في سجاير وباين علي خنقتي
ومره واحده لقيت الراجل اللي قدامي بيقولي .. ارمي حمولك على الله
سوووو : - باستغراب - أفندم؟؟
الشخص : - مؤكدا على كلمته السابقه ومبتسما - ارمي حمولك على الله
سوووو : - مقتنعا بكلمته ولكن مستغربا منه - ونعم بالله
الشخص : - مستدركا ومستطردا - عارف .. انا لو حكيتلك حكايتي هتقول من جواك وبقلب صادق .. الحمدلله
سوووو : الحمدلله على كل شيء
الشخص : - بعد أن قام من مكانه وجلس مكان صاحبي اللي مشي وبيشاور للقهوجي يجيبلو الشيشه - دكتور عطيه - وبيمد ايده للسلام
سوووو : - وانا باسلم عليه - احمد .. كلية فنون تطبيقيه .. بكالريوس السنه دي ان شاء الله
دكتور عطيه : فرصه سعيده
سوووو : أنا اسعد يافندم
دكتور عطيه : انا متأسف اذا كنت أقحمت نفسي عليك .. بس الحقيقه انا سمعتك بالصدفه بتتكلم مع صاحبك عن البلد وعن الحياه وكده .. وحسيت انك مخنوق .. قلت اقولك حكايتي وانا متأكد انك بعدها هتقول الحمدلله على اللي انت فيه
سوووو : اتفضل
-----
طول عمري باحب اسمع الحكايات .. خصوصا حكايات الناس الغريبه عني .. باعيش جواها .. باحس اني سافرت في عالم تاني غير اللي انا فيه .. ممكن يكون هروب من الواقع اللي باعيش فيه .. ممكن يكون تمرد عالوضع القائم .. ممكن وممكن وممكن .. لكن الحكايه دي .. بعد ماعيشتها مع الدكتور عطيه وهو بيحكيهالي .. ما اتمنتش اني اعيشها زي ماهو عاشها
-----
دكتور عطيه : انا اصلا من المنيا .. وحيد امي وابويا الله يرحمهم .. في اول يوم لي في امتحانات ثانويه عامه .. والدي توفاه ربنا .. رحت الامتحان ورجعت حضرت الدفنه والعزا .. الحمدلله نجحت وجبت مجموع محترم ودخلت كلية طب القصر العيني
سوووو : الحمدلله
دكتور عطيه : سافرت القاهرة وقعدت في شقه انا واتنين تانين .. في السيده زينب .. بعد ماخلصت امتحانات التيرم الاولاني وصحابي اللي كانو معايا في الشقه سافرو كل واحد بلده .. قلت اجيب امي القاهره تغير جو شويه .. وهي جايه في الطريق حصلت حادثه والعربيه اتقلبت ماتت هي وخالي وابن خالي اللي كانو جايين معاها
سوووو : لا حول ولا قوة الا بالله .. ربنا يرحمهم يارب
دكتور عطيه : قضيت أجازة نص السنه في البلد باخد عزا امي الله يرحمها وعزا خالي وابنه .. بقيت مقطوع من شجره رسمي .. بعت البيت اللي حيلتنا في البلد على حتة الارض اللي كان خالي وابنه بيزرعوهالنا .. وخدت الفلوس واشتريت الاوضة اللي كنا قاعدين فيها انا وصحابي وفضلت اخد منهم الايجار عادي زي ماكانو بيدفعو .. واهي حاجه تساعدني في مصاريف الكليه .. خلصت الكليه وكنت اول الدفعه والمفروض اتعين معيد .. بس مانفعش
سوووو : ليه؟؟؟
دكتور عطيه : في نفس السنه اللي خلصت فيها التكليف بتاعي حصل اغتيال الرئيس انور السادات .. ومسك الرئيس حسني مبارك .. وغير مجلس الوزرا .. واتغير نظام التعيين وحصلت حاجات غريبه وما اتعينتش
سوووو : لا حول ولاقوة الا بالله
دكتور عطيه : جهزت ورقي وسافرت العراق .. وبعد ما ابتديت اتعرف شويه والحياه ابتسمتلي .. حصلت حرب العراق وايران وحصلت معايا مشاكل كتير
سوووو : زي ايه؟
دكتور عطيه : الدول اللي بتدخل حروب من غير استعداد نفسي او تجهيز معنوي .. بيحصل فيها انهيار اخلاقي قبل ما يكون الانهيار في اقتصاد وسياسة البلد
سوووو : - وانا مش فاهم أي حاجه وفي البلاله خالص .. مانا ساعتها كنت شاب عايق ومش بافكر في اي حاجه غير اني اقضي اليوم وخلاص - هممم .. ممكن برضه - قال يعني فهمت حاجه من كلامه
دكتور عطيه : خدت بعضي وطلعت عالسعوديه .. اتجوزت دكتورده مصريه في المستشفى اللي كنت شغال فيه وابتدينا مع بعض من أول وجديد
سوووو : طب الحمدلله
دكتور عطيه : حوشنا مبلغ حلو وقلنا بدل ما نحطو في بنك ولا حاجه .. نوظفو في شركة من شركات توظيف الأموال
سوووو : اوباااا
دكتور عطيه : - وهو بيبتسم - بالظبط كده .. اوبااا .. راحت تحويشة العمر .. وياريتها راحت لوحدها
سوووو : مش فاهم
دكتور عطيه : مراتي بعد اللي حصل جاتلها جلطه وربنا توفاها
سوووو : لا حول ولا قوة الا بالله
دكتور عطيه : خدت بعضي وطلعت على الكويت وقلت ابدأ من أول وجديد
سوووو : انت مقضيها خليج ليه .. ماتروح بلاد بره يا دكتور
دكتور عطيه : الحكايه مش الخليج وبلاد بره .. ده مقدر ومكتوب
سوووو : ونعم بالله
دكتور عطيه : بعد ما الحاله الماديه معايا ارتاحت شويه .. نزلت مصر وخدت شقه في مصر الجديده وقلت عشان لما ارجع مصر يبقى في شقه محترمه اقدر لو عرفت اتجوز واعيش فيها .. او حتى أنزل اقعد فيها في الاجازات
سوووو : جميل
دكتور عطيه : وانا في مصر وباوضب الشقه بتاعتي .. حصل العدوان العراقي على الكويت
سوووو : - مفنجل عيني بطريقه غبيه قوي .. لدرجة انه ابتسم من رد فعلي
دكتور عطيه : - وهو بيبتسم - مش بقولك مقدر ومكتوب
سوووو : طب وعملت ايه
دكتور عطيه : طبعا كل مستحقاتي ومستحقات ناس كتير راحت لما البنوك الكويتيه اتسرقت .. ومابقاش حيلتي غير الشقه اللي لسه مشتريها .. وشوية فلوس معايا كاش .. كنت مهيأ نفسي افرش بيها الشقه
سوووو : طب ودول لو كفوك هيكفوك لحد امتى يعني؟؟
دكتور عطيه : ده نفس التفكير اللي فكرته .. ورحت قاسم شقتي جزئين .. جزء خليته سكن وفرشته بسرير ودولاب وانتريه مستعملين .. والجزء التاني عملته عياده
سوووو : تفكير منطقي
دكتور عطيه : وبعد ما ابتديت اتعرف والناس ابتدت تيجيلي والحمدلله ظروفي اتحسنت .. اشتريت شقه تانيه في عماره لسه بتتبني .. وقلت أخلي الشقه بتاعة مصر الجديده دي مجرد عياده وبس
سوووو : الحمدلله
دكتور عطيه : حصل زلزال اكتوبر
سوووو : يالهوووووي
دكتور عطيه : تسمع عن عمارة مصر الجديده اللي وقعت واللي لقو فيها واحد تحت الانقاض بفتره .. كان اسمه أكثم
سوووو : ماتقوليش انها نفس العماره اللي انت كنت فاتح عيادتك وشقتك فيها
دكتور عطيه : هو كده بالظبط
----
الحقيقه ابتديت أقلق منه لأن كل حياته مصايب .. لدرجة اني كنت خايف لا يحصل بركان في القهوة ولا حاجه
لكن ابتسامتته الصافيه اللي مرسومه على وشو .. وعلامة الرضا اللي باينه عليه .. طمنوني شويه
----
دكتور عطيه : دي إرادة ربنا ولا راد لقضاء الله
سوووو : ونعم بالله .. ده انت تعبت كتير قوي يا دكتور
دكتور عطيه : قدمت ورقي للهجره على امريكا .. اتقبلت وسافرت وابتديت ادرس ادارة اعمال وبقيت بابعد تدريجيا عن مجال شغلي كطبيب .. خدت الجنسيه وعملت مشروع انا واتنين معايا .. واحد أمريكي والتاني لبناني ومعاه جنسيه أمريكيه زيي
سوووو : مشروع ايه ؟
دكتور عطيه : تصدير أجهزة ومعدات طبيه ومستلزمات لتجهيز العيادات
سوووو : يعني مابعدتش عن مجالك قوي
دكتور عطيه : ولا بعدت عن مصر .. كنت باصدر الحاجات دي لمصر .. وكنت باتعامل مع كام شركة ممكن لو بتروح قدام مستشفى القصر العيني تلاقيهم وتسألهم عني
سوووو : طب الحمدلله .. الحياه راقت شويه اهو
دكتور عطيه : بس ماراقتش قوي
سوووو : اشمعنا؟؟
دكتور عطيه : عارف مقر الشركة اللي كنا عاملينها في أمريكا .. كان فين ؟
سوووو : فين؟؟
دكتور عطيه : في الوورلد تريد سنتر .. برج التجاره العالمي في نيويورك .. اللي اتفجر من كام يوم
-----
لحاد هنا وقلت شكراااااان .. انا قاعد جنب واحد فقر فقر فقر .. واحد متعايش مع نشرة أخبار تسعه وكل اللي بيحصل معاه حوادث عالميه اتكلمت عنها كل مصادر الخبر في العالم .. اغتيال سادات على حرب العراق وايران على شركات توظيف أموال على حرب الكويت على زلزال اكتوبر على برج التجاره العالمي .. يعني مش بعيد وانا قاعد معاه تحصل مصيبه وحادثه لأول مره وندخل انا وهو التاريخ .. ونتخرج من الدنيا
-----
دكتور عطيه : - وهو بيبتسم نفس الابتسامه الصافيه بتاعته - الحمدلله على كل شيء .. ماتقلقش علي انا مش بقولك الكلام ده عشان اصعب عليك وتحاسبلي عالمشاريب ولا حاجه .. الحمدلله بوليصة التأمين بتاعة الشركه اتصرفت وانا قررت استقر هنا واتعايش هنا ورب هنا رب هناك .. وحاليا ساكن في نفس الاوضه اللي في السيده زينب اللي اشتريتها زمان .. عايش وسط الناس .. أهل البلد .. راضي وقانع باللي ربنا كتبهولي .. مش شايل هم بكره لأنه في علم الغيب .. بس لما لقيتك شايل الهم وانت صغير كده صعبت علي وقلت اقولك على حكايتي عشان تعرف ان اللي ربنا كاتبهولك هتشوفه
سوووو : ونعم بالله
دكتور عطيه : - وهو يهم بالانصراف وقايم - ولما تلاقي نفسك متضايق ولا شايل الهمّ .. قول يارب
سوووو : - بعد ماوقفت عشان اسلم عليه - ونعم بالله .. بس في حاجه مستغرب منها
دكتور عطيه : حاجة ايه ؟
سوووو : الشقه اللي حضرتك كنت اشتريتها لما قلت هتخلي الشقه بتاعة مصر الجديده عياده وبس .. مش قاعد فيها ليه؟؟
دكتور عطيه : - وهو بيبتسم - مش لما استلمها الأول
----
لحاد هنا وخلصت حكايتي مع دكتور عطيه .. مع انسان بجد أبسط من البساطه .. انسان حارب كتير وعافر كتير وفي الاخر اقتنع بان كل شيء بإرادة ربنا .. ماقالش اشمعنا انا اللي بيحصل معاه كل ده .. ماقالش المفروض لو في عدل في الكون .. اكون احسن من كده
ماقالش حاجه من كل ده
كل اللي عملو .. انه ابتسم ابتسامه صافيه وخارجه من القلب وقال .. الحمدلله
.. وافتكرت حكايته دي بعد ماشفت مدونين كتير اختفو زي غاليه وزمرده و وحدانيه
ومدونين بيختفو زي فرنسا و شيرين و ناني
.. حبيت اقولهم بطريقه غير مباشره ان كلنا موجوع
.. كلنا مجروح
.. كلنا مهموم
.. كلنا مكبوت وبيفضفض
وأسلم حاجه نعملها للناس دي مش اننا نقفل المدونه ونعمل اضراب عن التدوين
لأ
.. الصح من وجهة نظري .. اننا ندعيلهم من كل قلبنا
.. ان ربنا يزيح عنهم الغمه
ويسعدهم ويوفقهم ويباركلهم دنيا وآخره

سوووو

هناك 86 تعليقًا:

بنوته مصرية يقول...

يااااااااااه من زمان وحشني اول كومينت عندك

يلا هقراوهرجع لك
سلامووووز

(*_^)

بنوته مصرية يقول...

فعلاااااااااا الراجل ده ربنا مديلة نعمة الصبر والرضي في نفس الوقت

انا لو كان بعد الشر حصلي حاجه من دول كنت جتلي جلطه وكساح وشلل رباعي كمان

في الاخر بعد ما ضحكت علي تعليقك لي دكتور عطية

عيطت علي الناس اللي خلونا نحبهم وفي الاخر سابونا من غير سابق انذار او يمهدو لنا انهم هياخدو اجازة وبرضه يرجعلونا تاني

لاننا اتعودنا عليهم وهنفضل نفتكرهم

وخلاني كمان اخاف من بكرا واني ممكن برضه مقدرش اشوفكم تاني وانكم تبعدو عنا ومش اشوفكم

او انا اللي يحصلي اي شئ ومش اعرف اشوفكم

الدنيا وحشة اووي
انانية
غداره
ملهاش امان

كنت نسيت كل ده معاكم وانتم رجعته الاحساس ده ليا تاني ببعدكم عنا
طبعا الكلام ده للناس اللي سابتنا ندور عليهم ومش عارفين طريقهم ولا عارفين نكلمهم ونقولهم تعالي تاني

يارب يرجعلنا بلسلامه

ويوفقهم في حياتهم

الجدة فصيحة يقول...

السلام عليكم ورحمة الله وبركاته

الدكتور عطية مثال للإنسان المؤمن الراضي بقضاء الله وقدره مهما كان في ظاهره يبان فيه قسوة لكن دائما يخلق من المحنة نعمة سبحانه وتعالى .
جميل أنك تذكر مثال قابلك في حياتك في وضع كهذا
وكلنا عندنا مشاكل في حياتنا كبيرة وصغيرة لكن الحياة بتستمر
لا نكدنا على نفسنا وحزنا في وش الدنيا هاتستمر
ولو ضحكنا هاتستمر
يبقى نضحك مش طول الوقت أكيد لكن بعض الوقت حتى نستطيع ان نقاوم ونستمر مع الحياة ولا نسبح ضد التيار .


تحياتي

خمسة فضفضة يقول...

السلام عليكم ورحمة الله وبركاته

انت مافيش فايده فيك ابدا يا سووو

اكيد ناوي في مره تموتني من الضحك واموت شهيده لمدونة سووووو

ايه يابني الراجل الفقر اللي انت جايبه ده
بصراحه يعني الله يكون في عونه ويصبره علي مابالاه دا لو حد تاني مكاني مش مؤمن كده كان ممكن يجراله حاجه ، اكيد الراجل ده درجة ايمانه عاليه اوي اوي واكيد برضو ربنا هايعوضه خير ان ماكانش في الدنيا يبقي في الجنه ان شاء الله

وبعد ما موتني من الضحك رجعت ختمتها بالزعل ، فراق خالتو فرنسا ده ماثر فيا اوي خصوصا انه غير معروف الاسباب وكمان لان كل حاجه كان عال لحد آخر بوست وبعدين هوووب الدنيا ضلمت فاجاه ربنا يرجعهلنا بالسلامه
انا عارفه ومتاكده انها لو كانت بتدخل وتشوف كم الناس اللي بتطالبها بالرجوع كانت رجعت علي طول

ومعاك في ان موضوع الاضرابعن التدوين ده مش هايعمل اي حاجه احنا لازم نكتب ونعرفها انها وحشانا وان قرارها ده مش صح

ويارب ترجع بقي اصلها من الناس المحترمه جدا الا ما ينفعش التدوين من غيرهم

سلام يا سووووووووووووووووو

فاتيما يقول...

سوووووو
أنا حاسة إن البوست دا موجه ليا أنا كمان
عشان كتير مبقدرش النعمة اللى أنا فيه و ببص بس على الخساير ...
القصة دى لو بجد بجد يبقى الراجل دا بيجسد المعنى الحقيقى لكلمة الرضا
النعمة دى اللى مبتبقاش الا عند عدد قليل من الناس
و فرنسا كانت تعبانة و مقالتشى عشان شكلها من النوع اللى ميحبش يشيل حد همه ...
و الحمدلله على رجوعها بالسلامة
تحياتى

بنوته مصرية يقول...

فرنساااااااااااااااااارجعت

http://faransahanm.blogspot.com/

كاميليا يقول...

يا الله

كل مرة كان ربنا سبحانه وتعالى بيحطه فى امتحان اصعب

وقدر يكمل الطريق بإيمانه وصبره

جزاه الله كل الخير

الحمد لله على كل حال

الحمد لله

رئيس جمهوريه نفسى يقول...

كل الى حقدر اقوله كلام ربنا
بسم الله الرحمن الرحيم
وَبَشِّرِ الصَّابِرِينَ الَّذِينَ إِذَا أَصَابَتْهُم مُّصِيبَةٌ قَالُواْ إِنَّا لِلّهِ وَإِنَّـا إِلَيْهِ رَاجِعونَ
صدق الله العظيم

كيكى يقول...

لا حول ولاقوه الا بالله....بجد بجد القصة دى حقيقة...مش ممكن بجد..قال وانا شايلة هم الدنيا علشان امتحاناتى..صعبة ومش عارفة اركز...بجد بعد القصة دى...حاسة انى هايفة اووووووووووووى.....كويس انك محصلكش حاجة...اخر حاجة...هايل هايل هايل

PrInCeSS BeRy يقول...

حلوة اوى وسرد رائع ومحادثة حلوة بس بصراحة جالى احباط من الشخص دة حرااااااااااام كفاية الى فينا بجد حلوة تسلم

ra7eel يقول...

سوووو

تعرف بلف على المدونات ومليش مزاج اعلق نهائى وحتى مش ليا مزاج ارد على التعليقات عندى

بس بجد البوست ده جامد قوى اولراجل ده حكايته غريبه جدا وسبحان الله اللى مصبره على كل اللى حصله

فعلا كلنا مجروحين وموجعين بس لما بنفضفض ولما نقرا فضفضه غيرنا بنرتاح كتير

احلى سلام

رندا يقول...

مااجمل قصتك ياسوو
ومااجمل رضى الدكتور عطية
فعلا فى ناس بنشوفهم فى حياتنا وسبحان الله الابتسامة على وجههم ولما نسمع حكايتهم نزهل من صبرهم على الابتلاء
ومن توكــل على الله فهـــو حسبــه

( إِنَّمَا يُوَفَّى الصَّابِرُونَ
أَجْرَهُم بِغَيْرِ حِسَابٍ )

صدق الله العظيم


دمت بكل صبر

رندا

shayma يقول...

يااااااااااااااه

صحيح... هم يبكى وهم يا جمل وهم بورجر

ايه يا عم انت الراجل ده

انت الى مألفها دى يا سووووو
اعترف
:)))


لا خلاص جد بقى
بجد بجد ربنا يباركله الراجل ده
فى كده فعلا ... الدرجه دى من الرضا والايمان
يحصله كل ده وهو مبتسم وراضى وقانع
بجد بسمالله ماشاءالله

حلوة منك يا سووووووووو

سلاخوووووووووووووخ
:))

hesham يقول...

يااااااااااااااااه

فعلا اللى يشوف بلوة غيره

بس عارف احلى حاجة فى الحكاية دى ايه

فعلا فعلا

التسليم بقضاء ربنا و الرضى بيه

مش اى حد يقدر يستحمل زى الدكتور عطية

و الحمد لله على كل شىء

تحياتى
هش

لماضة يقول...

انا قاعد جنب واحد فقر فقر فقر
ههههههههههههههههههههههه
موتتني من الضحك
قولي يا سووو
القهوة بعد ما سيبتها فضلت سليمه
ايه ياعم الراجل ده
بس سبحان الله بجد انسان ببعتله تحيه كبيره جدا
ربنا يصبره على الابتلاء
فكرني بفيلم محمد هنيدي سور الصين العظيم والراجل اللى تنبأ ان الطياره هتقع

محمود الدوح يقول...

اللى يشوف مصايب الناس تهون عليه مصيبتة

بجد الراجل دا حسسنى انه اقوى من الهرم
بجد وقع كتير وبرضة مش بييأس خالص

بجد ياسووو تعبتنى

Rosa يقول...

يااااااااااااه على التدوينه دي بجد يااااااااااه
مش عارفه اقلك بجد ايه غير مرسي جدا جدا جدا عليها
--------
في نقطه كمان مش بعيده ابدا عن البوست ده معظمنا بيغفل عنها دايما بننسى كلام ربنا سبحانه و تعالي في الآية دي
وعسى ان تكرهوا شيئا و يجعل الله فيه خيرا كثيرا
انا عارفه ان المعظم هيقول فين الخير الكثير في حاجه زي الي حصلت لدكتور عطيه بس اقل حاجه هوخير كتير ليه في الجنه و ربناهيعوضه ان ماكنش عوضه دلوقت ان شاء الله
بجد ربنا في كل مصيبه لينا بيحط فيها رحمه خفيه احنا مانعرفهاش
مؤخرا عرفت بجد بجد رحمات ربنا الخفيه الكتيـــــــر عليا , وانا الي كنت غافله عنها , بسكنت متأكده انها خير بس مش قادره اشوفه في وقتها
بس اكتشفت انه كل الخير
رغيت كتيـــــــــــر
بس بجد مرسي على البوست ده
و انت بجد يا سوووو ثق تماما ان لو اي حاجه فاتتك زمان , عشان هيجيلك الأفضل في المستقبل
مرسي لى التدوينه الجميله دي

واحدة مفروسة يقول...

سووو انت فظيه
حتى اسلوبك مع النكد...يضحك
انصحك تبقى مذيع اخبار ...اه اخبار
يا نشرة 9 يا على الجزيرة يا العربيه
و لا اقولك فى cnn
و الbbc
سوووو القصه بتاعة الدكتورعطيه
مش هوه ده الرضا.....راضى بقسمته و نصيبه...و قضاء الله و قدره

ياااارب تخلينا كلنا رااضيين بقضاءك

اهو ده عيبه يقول...

ازيك يا سووو

ايه يابنى الفقر ده فى حد فى الدنيا كده
الراجل ده بجد ولا الموقف طلع من جواك تزامنا مع اللى بيحصل

ولو ان يا سووو لو حكيتلك حاجات فى حياتى هتعرف انى نحس برضه وفقر فقر يعنى

المهم الانسان يرضى بقضاء ربنا ويعرف انه اختبار وابتلاء والمهم انه يصبر علشان ربنا ييسرها عليه ويبسطها

اللهى متبسطهاش اكتر من كده :)

سلام مربع كاروهات

appy يقول...

طبعا بما انى اتحكى ليه الحكايه لانك كنت بتهون عليا وعلى حد تانى اللى بيحصله فخلتنى اضحك مووووووووت
وقولت لك ربنا بيستر فعلا
والايمان بالقضاء والقدر الحمد لله
بس بطل تقعد جنب الناس دى علشان العدوى

صحفية روشة يقول...

متميز كالعادة
الصبر نعمه

بت خيخة وأى كلام يقول...

الحمدلله
الحمدلله
الحمدلله
الحمدلله
الحمدلله

ياااااااااه يا سوووو
هو فيه حد كدة
ده الواحد فى نعيم ومش حاسس
احمدك واشكرك يارب
على كل النعم اللى انت ادتهالى وانا مش واخدة بالى منها

يااااااااااااه يا سوووو
بجد البوست ده يخلى الكل يحمد ربناانا حاسة انك بعتلنا هدية بالبوست ده
الف شكر ليك يا سوووو

بس انا كنت عايزة افهم حاجة بجد
هو ازاى يعنى لما بتحصل حروب بيحصل انهيار اخلاقى قبل الانهيار السياسى والاقتصادى

ياريت تفهمنى الحتة دى

سلام
اختك خيخة

ست البيت يقول...

بجد مش قادرة افهم انت كاتب ساخر ولاحكايتك ايه
انا استغربت جدا بس كتاباتك ممتعة
وغريبة وجديدة
ينفع كل اللي قلته دا اديك خلتني اكلم كلام كبير
عندي تاج مستنيك
http://drmanosy.blogspot.com/
برجاء الرد أو الأعتذار والاعتذارات غير مقبولة

maha miho يقول...

ابتسامه صافيه وخارجه من القلب
تصدق بالله!! هي دي الخاتمة الصح للموضوع ده.. برغم كل ده وهو عامل كده،، بجد جاااااامد،، عطية مش انت هههههههههههه،، لا بجد بوست حلو وعجبني
ٍSoooo
تسلم الايادي والمخ والكي بورد والماوس

Z_Diva يقول...

da eh elragl da bgd, y3ny masha2allah m3 kl da, we rady we kane3 -ma3 ino f2r rasmy y3ny-, bas 3dy y2om weynfad nfso kda weymshy peace, rbna ykrmo wallah
wana elly ba3ml ma7zana we mndaba 3la shwayt 7gat hablaaaaaaaaaa, allh yksfny :S
we rbna ysabr kl mn fe krba 72e2ya we yze7 3anno isa :)
welmdalla3een ythdo weshofo elblawy elly bgd blash tfaha b2a :S

tamer.sala7 يقول...

علي فكرة اسلوبك تحفة بتحكي مأساة ومصايب وحروب وهم وبرده خلتنا نضحك

عبدالرحمن فارس يقول...

امممممممممم
دلوقتي مدوتك بالنسبالي حكايات قبل النوم
اخد البوست من هنا وانام واحيانا نص بوست عشان الجرعه متبقاش كتيره

بس بد اسلوبك جميل

وربنا يصبرنا زي الدكتور عطيه


تحياتي
و
محبتي

عبدالرحمن فارس
لساني هو القلم

http://chabfares.arwp.net

خواطر رئيس شاب يقول...

طيب سالت على المنطقة اللى فيها الاوضة الصغيرة لسة موجودة ولا حصل فيها حاجة هى كمان


بس اجمل حاجة الابتسامة الصافية اللى خارجة من القلب

خواطر رئيس شاب يقول...

طيب سالت على المنطقة اللى فيها الاوضة الصغيرة لسة موجودة ولا حصل فيها حاجة هى كمان


بس اجمل حاجة الابتسامة الصافية اللى خارجة من القلب

أبو خالد يقول...

أبنى و حبيبى أحمد (سوووو)
أنت إنسان رجوله و أصيل يا بنى
و بمناسبة الدكتور عطية الراضى الصابر
ده رصيده مؤجل عند الله و لا أزكيه على
الله و لكن سيوفى أجره عند الله
دائما يا سوووو يظهر نبل أخلاقك
و رقة قلبك و أنفعالك و تأثرك
لأصدقائك أنا أشبهك ياسوووو
قلبى كان يتمزق من أجل فرنسا و شيرين
و أدعوا الله العلى القدير أن ينعم عليهن بالشفاء التام و أنشراح الصدر
و أن يذهب عنهن الغم و الحزن
دمت كما توقعت ..و أرجوا الله أن أراك
قريبا.. أحبك فى الله يا بنى

حماتــــــــــــي ملاااااااااااك يقول...

انا مش قادرة استوعب معقولة فيه حد قابل كل ده في حياته ولسة واقف علي رجليه
والأهم انت متأكد انك كويس ؟
والحتة اللي كانت فيها القهوة لسة سليمة ؟؟

soso يقول...

أول مرة أزورك
بجد مدونتك حلوة أوى ومن أول وهله شوفت فيها العنوان قولت بس
هوة ده
أنا كتييييييييييير بحس أنى عجوزة أوى أوى
وأنا عمرى 24
بس والله مش من فراغ من الحاجات اللى بشوفها
من أن الدنيا ملطشه معايا خااااالص
أنا بجد مجروحه أوىأوى والله
السنه اللى أحنا فيها ديه كانت والله نكد كونتينيوس
مستمررررررررر
من رمضان اللى فات
وأنا المصائب تتوالى على
بس الحمد لله
أنا أكيد أحسن من غيرى
بكتييييييييييير
وفى كلمه الدكتور قالهالك
وكتير بقولها لنفسى عشان هيه بتريح جدا بجد
اللى ربنا عايزوه حنشوفوه
ولذلك يجب علينا كبشر يعنى
أننا منشيلش هم لحاجه
بس الموضوع مش سهل
مش حندوس على زورار نقوم نفرح ومنشيلش هم
على فكرة
الصبر على البلاء صعب أوى
أسألنى أناااااا
أناااااااا
مدوباهم 3 مصايب متواله متوازيه
والا مكانش ربنا سبحانه وتعالى عظم أجره


بس عندى سؤال
وبالله عليك تجااااوب
أنت قبل كده قولتلى فى مدونتى باحثه عن السعاده
تعليقا على أحدى البوستس
أنى منتظرة حدث كده فى أغسطس
قولتلى بلاش أغسطس أسمعى كلامى
ليه يا سووووو
؟؟؟
أرجوا الرد بليييييييييييييز
مبسوطه بجد أنى زورتك النهارده
سلاااااااااااام

Soooo يقول...

بنوته مصرية

حماتي عندنا .. يا مرحبا يامرحبا
منوراني يارودي

والحمدلله ان الحكايه عجبتك .. وياريت نتعلم منه الصبر بجد

وياستي ان شاء الله الكل راجع
صعب ان اللي يعاشر ناس بيحبوه كده .. يبعد عنهم
اديكي شفتي شيرين وفرنسا
ربنا يعفو عنهم ويرجعهم لينا بالسلامه وينورونا دايما

وربنا يكرمك ويسعدك ويبسطك دنيا وآخره يارب


سلامي لنونو



سلامووووووووووووز

Soooo يقول...

الجدة فصيحة

وعليكم السلام ورحمة الله وبركاته ياجدتي

وربنا يلهمنا الصبر عالمصائب وفي الشدائد يارب

ربنا يكرمك ويسعدك ويبسطك دنيا وآخره ياجدتي




سلامووووووووووز

Soooo يقول...

خمسة فضفضة

وعليكم السلام ورحمة الله وبركاته

بعد الشر عليكي من اي حاجه يافندم

وفعلا الشخص ده درجة ايمانه عاليه قوي
ربنا يكرمه يارب ويعوضه عن اللي حصل معاه دنيا وآخره يارب

وياستي ولا تنكدي نفسك ولا حاجه
فرنسا رجعت تاني لينا
واوروبا اليوم في عيد

ربنا يسعدك ويكرمك ويبسطك دنيا وآخره يارب



سلاموووووووووز

Soooo يقول...

فاتيما

يا فاتيما ياختي الموضوع ده عني وعنك وعن كل الناس
احنا بقينا بنتجرع الحزن وبنجريلو بالاميال
مع ان الفرح والرضا قدامنا لكن بنغمض عينينا عنه
بنحب نعذب نفسنا قوي
دمعتنا قريبه مننا مع ان الفرحه موجوده في قلوبنا .. عايزالها بس نفخه خفيفه
ونبتسم ونقول .. الحمدلله على كل شيء


سلامي لماما العزيزه




سلاموووووووووز

Soooo يقول...

كاميليا

شوفتي بقى يا كاميللو
اللي يشوف موبيلات الناس .. يصعب عليه موبيله
أي والله

ربنا يارب يسعدك ويبسطك ويكرمك دنيا وآخره يارب



سلامووووووووووز

Soooo يقول...

رئيس جمهوريه نفسى

ونعم بالله يابو حنفي
وتصدق يابو خالو .. احنا بالرغم من اننا عارفين ان ربنا بيبشرنا عشان نصبر عالشدائد .. لكن برضه بنستعجل
خلق الانسان عجولا


ربنا يكرمك ويبسط ويسعدك دنيا وآخره يارب




سلاموووووووووز

Soooo يقول...

كيكى

تخيلي بقى ياكيكي ان القصه دي بجد حقيقيه
ولو فيها حاجه يبقى من دكتور عطيه ذات نفسه
ولو اني اشك في كده
لان ابتسامته كنت حاسسها فعلا طالعه من قلبه

وبمناسبة امتحاناتك
ماهو انتي لو كنتي بتذاكري ومش بتتفرجي على المصارعه .. كنتي لقيتي المذاكره سهله
انما هنقول ايه
جيل آخر زمن
مصارعه؟؟
طب قولي بوجي وطمطم ولا احداث اربعه وعشرين ساعه

ملحوظه
مين قالك ماحصلليش حاجه يابنتي .. هو الجنان اللي انا فيه ده من فراغ؟؟؟


ربنا يكرمك ويوفقك ويسعدك دنيا وآخره يارب



سلاموووووووووز

Soooo يقول...

PrInCeSS BeRy

اهلا بيكي ياستي في اول زياره ليكي لمدونتي ويارب تكون عجبتك وياريت تعتبري مدونتي زي مدونتك تمام وتشرفيني بزيارتك وتعليقاتك دايما يارب

وياستي ولا يجيلك احباط ولا حاجه
اذا كان هو نفسه صاحب المصايب دي ماجالوش احباط وبيقول الحمدلله
تقومي تزعلي وتضايقي انتي

ربنا يسعدك ويكرمك ويبسطك ويوفقك دنيا وآخره يارب




سلاموووووووووووز

Soooo يقول...

ra7eel

كنت هزعل قوي والله يارحيل لو ماكنتيش علقتي
ده انا بقيت باتفائل لما باشوف تعليقك منورني دايما والله في المدونه
وبافكر اجبلك شقه جنب المدونه عشان تبقي تخطفي رجلك كل ماتحبي وتيجي تقضي الاصطباحه هنا

وربنا يارب يسعدك ويكرمك ويبسطك دنيا وآخره يارب
روقي يابنتي وقولي الحمدلله



سلامووووووووز

Soooo يقول...

رندا

رفيقة درب الكفاح رندا عندنا .. يا مرحبا يامرحبا

وما أجمل تعليقك
وربنا يجعلنا من الصابرين يارب
وربنا يسعدك ويكرمك ويبسطك دنيا وآخره يارب



سلاموووووووووز

Soooo يقول...

shayma

همبرجر؟؟
انتي جايه تجوعيني في مدونتي ولا ايه ياشيمو
لاااا
علمك علمك علمك .. سهل جدا اسحبلي اي شندوشت من مذكراتي واقعد اكله على ناصية مدونتي واغيظ فيكم
لكن انا نفسي مصضوضه .. شكلي اتحسدت


ربنا يبسطك ويكرمك ويسعدك دنيا وآخره يارب



سلامووووووووووز

Soooo يقول...

hesham

عندك حق والله ياهش
مش اي حد يقدر يستحمل زي الراجل ده

ربنا يصبرنا ويقوينا على البلاء والشدائد يارب

سيبك انت .. منورني والله ياهش



سلاموووووووووز

Soooo يقول...

لماضة

تصدقي يالماضه انا فعلا كنت ناسي ان البلديه جات ولمت كراسي القهوة بعد الحوار ببتاع يومين ولا حاجه
؟؟؟
تفتكري ده ليه دعوه بالموضوع؟؟


ملحوظه
اياكي تبعدي عن المدونه وتحرميني من تعليقاتك دي
ولا احنا مش اخوات؟؟؟

ربنا يسعدك ويكرمك ويبسطك دنيا وآخره يارب


سلامووووووووووز

Soooo يقول...

محمود الدوح

لا وانت يابو الدوح مصيبتك في النيسكافيه مش سهله يعني
اي والله
تكفير ذنوب وقتي وقتي

وفين ياعم حلاوة الاعفا من الجيش؟؟
انت منوفي ياد؟؟؟؟؟؟



سلاموووووووووووز

Soooo يقول...

Rosa

فعلا والله ياروزا
احنا لما بتحصلنا حاجه وحشه .. بنبقى مش شايفين اي خير فيها
تقريبا ده من كتر ماحنا اتمسكنا بالدنيا وبالمتع الزائله ونسينا اهم حاجه
نسينا ان ربنا خلقنا عشان نعبده واحنا بنعمر الارض
يعني دي مهمتنا

ربنا يسعدك ويكرمك ويبسطك ويوفقك دنيا وآخره يارب




سلامووووووووووز

Soooo يقول...

واحدة مفروسة

ابوس ايديكي بلاش الاخبار
وخصوصا بتاعة تسعه دي
مش يمكن الاقي خبر باذيعه بيقول ان دكتور عطيه كان بيصيف في تسونامي ساعة الاعصار اللي حصل هناك
؟؟؟
تصدقي فعلا ممكن يكون هو السبب

ربنا يستر بقى

وربنا يسعدك ويكرمك ويبسطك دنيا وآخره يارب



سلاموووووووووز

Soooo يقول...

اهو ده عيبه

طب تصدقي يا داليا
ان شاء الله يوم القيامه ربنا هيعوضك وهيكرمك عن كل اللي حصل معاكي في الدنيا
وهتيجي تقوليلي شفت ربنا كريم قد ايه ياسوووو

بس عشان ده يحصل بجد بجد بجد
قولي الحمدلله

والله العظيم مافي أحن علينا من ربنا

ربنا يسعدك ويكرمك ويوفقك ويبسطك دنيا وآخره يارب




سلاموووووووووز

Soooo يقول...

appy

تصدقي يا اابي ممكن فعلا يكون اللي بيحصللي من فلقطه وخلافه عدوى
؟؟
ياستي .. عدوى ولا مش عدوى .. الحمدلله على كل شيء

تاكلي قرص بعدوى معايا؟؟؟



سلامووووووووز

Soooo يقول...

صحفية روشة

ياستي ربنا يكرمك يارب

وشدي حيلك في المذاكره وان شاء الله هتجيبي اعلى درجات واعلى تقدير باذن الله




سلامووووووووز

Soooo يقول...

بت خيخة وأى كلام

شفتي بقى ياست ام شرفنطح اننا فعلا في نعمه ومش واخدين بالنا

وان تعدو نعم الله لاتحصوها

اللهم ديم علينا نعمة الاسلام يارب

-----
هو ازاى يعنى لما بتحصل حروب بيحصل انهيار اخلاقى قبل الانهيار

الحقيقه انا قابلت الدكتور عطيه بعدها مره او مرتين وحكالي على كام موقف حصلو معاه في العراق .. هو ياستي طبيب نساء وتوليد .. ونتيجة لسفر معظم الرجاله في العراق للحرب في ايران وكده .. الستات غلطو مع شباب او مع رجاله تانين غير ازواجهم اللي بيحاربو .. الرجاله اللي مش من اصل عراقي يعني وماراحوش يحاربو .. وحمل السفاح بين العراقيات كتر .. وكل يومين والتاني واحده تيجيلو وتقولو انها عايزه تسقط الواد خصوصا ان أزواجهم سافرو من قبل فترة الحمل بكتير .. وهو كان بيرفض ده لخوفه من ربنا

شويه بشويه قرر انه يسيب البلد

واللي حصل ده من انهيار اخلاقي نتيجة لعدم وجود تخطيط سليم للحرب .. لانهم اعلنو التعبئه العامه على كل الرجاله العراقين من غير مايكون في تنسيق صح في الخطوط الحربيه وتنسيق في أجازات للي بيحاربو وكده

فهمتي ياست ام شرفنطح

وسلميلي على ابن اختي شرفنطح بيك كعب الغزال



سلامووووووووووز

Soooo يقول...

ست البيت

اهلا بيكي يافندم في أول زياره ليكي ويارب تعتبري مدونتي زي مدونتك تمام وتشرفيني بتعليقاتك وزياراتك على قد ماتقدري

بس ايه ده؟؟؟
انتي داخله في حامي كده وأول مادخلتي هوبا تاج على طول

لكن انا ياستي ماقدرش اكسفك في اول طلب تطلبيه ولو اني والله مش باحب حوار التاج ده
لكن هجاوبه عشان سؤال واحد بس

بس مش هقدر أجاوبه دلوقتي لاني الحقيقه مزنوق شويه

وربنا يكرمك ويسعدك ويبسطك دنيا وآخره يارب



سلاموووووووووز

Soooo يقول...

maha miho

ربنا يكرمك ويسعدك ويوفقك يارب
وبعدين ايه ده؟؟
انتي مش نايمه ليه يابنتي؟؟
ده معاد نومك اصلا


ملحوظه
انتي مش بتنامي في الاربعه وعشرين ساعه بتوع اليوم .. عشرين ساعه بس برضه ولا اكتر من كده؟؟؟؟



سلاموووووووووز

Soooo يقول...

Z_Diva

تعرفي يا ام زعبولا
انا والله العظيم بمجرد ما اشوف اسمك في التعليقات باروح مبتسم كده واقرى تعليقك وانا مبتسم

ربنا يسعدك يارب ويكرمك ويوفقك ويعطيكي مايحرمك



سلاموووووووووز

Soooo يقول...

tamer.sala7

الله يخليك ياتيمو باشا
دي شهاده والله اعتز بيها
وربنا يكرمك ويبسطك ويسعدك ويوفقك دنيا وآخره يارب



سلامووووووووز

Soooo يقول...

عبدالرحمن فارس

بيدو باشا منورني
يادي النور يادي النور

وكلامك ده ياسيدي وسام على صدري من أحد المدونين اللي بدأ التدوين في الوقت اللي انا كنت لسه باضرب بايجون مع الواد بيسو والواد سوجر

وربنا يسعدك ويكرمك ويبسطك ويوفقك دنيا وآخره يارب



سلامووووووووز

Soooo يقول...

خواطر رئيس شاب

اهلا بيك في اول زياره ليك ويارب تعتبر مدونتي زي مدونتك وتنورني بزياراتك وتعليقاتك دايما يارب

وبالنسبه للمنطقه اللي هو ساكن فيها فلا تقلق
المنطقه كلها البلديه شالتها عشان حوار مصر الفاطميه اللي بيعملوه في المدبح
عادي خالص
مالوش ذنب في الحوار ده اكيد يعني




سلاموووووووووز

Soooo يقول...

أبو خالد

والدي واستاذي العزيز .. ابو خالد

بجد بجد مش عارف اقول ايه
انا فعلا قريت كلام حضرتك وتعليقك اكتر من تلات مرات عشان احاول اجيب كلام ارد بيه على تعليقك لكن لساني عجز بجد
وما اقدرش اقول غير
ربنا يارب يارب يارب يسعد قلبك ويكرمك ويبسطك ويوفقك ويعطيك مايحرمك ويحبب فيك خلقه اكتر واكتر ياااااارب

وبجد بجد بجد .. انا اللي نفسي اشوف حضرتك



سلاموووووووووز

Soooo يقول...

حماتــــــــــــي ملاااااااااااك

ياسوسو في ناس كده
اه والله
ناس بيبقو عايشين برضا نفسي غريب
يخليكي تستعجبي هم جايبين الصبر ده منين

وبعدين ماتقلقيش على اي حاجه
ماحنا البلد اهي زي الفل
ولا في ازمة ضماير ولا فساد ولا غلاء فاحش في الاسعار ولا اي حاجه
هتظلمو الراجل معاكم ليه بس




سلاموووووووووووز

Soooo يقول...

soso

طب انا اقول ايه بعد كل اللي قلتيه
بجد مش عارف

بصي يا سوسو
لو هنقيس العمر بالمصايب .. يبقى كل شباب مصر مش عجزو .. لأ .. دول اندفنو من بعد ما اتولدو بمافيش ست سبع سنين
صدقيني كلنا مجروح
كلنا مصاب
كلنا عنده بلاوي لو حكيناها لبعض هنقعد نعيط عليها لغاية مانموت
لكن مش هو ده الحل
الحل اننا نرضى
ماهو كده كده بكانا وزعلنا مش هيعمل حاجه
خلاص
يبقى الاحسن اننا نحتسب الاجر عند الله
ونبتسم ونقول بصدق .. الحمد لله على كل شيء

وياستي حوار اغطسطس انا كنت بقوله بهزار مش اكتر
شوفي الموضوع ده وانتي هتفهمي قصدي
http://soooo-30.blogspot.com/2007/11/blog-post_15.html
لكن ان شاء الله مش هيحصل حاجه وحشه وربنا هيوفقك
وهاتيجي تقولي سوووو قاللي ان ان شاء الله مش هتحصل حاجه وحشه والحمدلله ماحصلتش

وربنا يسعدك ويكرمك ويوفقك ويباركلك ويعطيكي مايحرمك يارب

وياريت تعتبري مدونتي زي مدونتك تمام وتنوريني بتعليقاتك وبزياراتك دايما يارب



سلاموووووووووز

مشمش يقول...

علي فكرة دة احلي بوست قريتة منك هوة كلهم حلوين بس دة خلاني بجد ابتسم واقول الحمد لله من قلبي مع اني كنت بلعن اليوم الي اتولدت فية بس الي يشوف بلاوي غيرة باة
ربنا يكرمك ياسووو ويجزيك علي انك اسعدتني وخلتني اخد بالي اني ارضي بقضاء ربنا واقول الحمد لله

ayman badr يقول...

ياه على الرضا والصبر على القضاء والقدر بجد قصة مؤثرة جدا يا سوو وبجد مدونة جميلة أول زيارة ومش الاخيرة ان شاء الله
تحياتى

رئـــــيسـة حزب الأحلام يقول...

لا بجد اللى يشوف بلاوى الناس تهون علية بلوته بس الراجل دة صابر اوى ربنا يعينة
وربنا يرزق كل مصاب الصبر ةالسلوان يارب امين
لفتة حلوة منك اوى للاخوة المدونين التى اصابتهم الظروف واللى يشوف لاوى غيرة تهون بلوتة
وجميل اوى رد العصفور رد وافى ومقنع تحياتى

Soooo يقول...

مشمش

الحمدلله انك ابتسمتي وقلتي الحمدلله

وربا يارب سكرمك ويسعدك ويوفقك ويبسطك دنيا وآخره يارب


ملحوظه
انت فين يا مشمش يا صاحبي؟؟؟



سلامووووووووز

Soooo يقول...

ayman badr

الصبر مفتاح الفرج
بس الصبر تقيل قوي
يبقى ان شاء الله الفرج هيكون كبيييير قوي

سعيد جدا بزيارتك وبتعليقك وياريت تعتبر مدونتي زي مدونتك وتنورني دايما بزياراتك وتعليقاتك

وربنا يسعدك ويكرمك ويبسطك دنيا وآخره يارب




سلامووووووووز

Soooo يقول...

رئـــــيسـة حزب الأحلام

ربنا يصبره ويقويه ويصبرنا احنا كمان

والحمدلله ان رد العصفور عجبك


وربنا يسعدك ويبسطك دنيا وآخره يارب




سلاموووووووووز

كاميليا يقول...

شوفتي بقى يا كاميللو
اللي يشوف موبيلات الناس .. يصعب عليه موبيله
أي والله
.........

موبيلات إيه؟؟؟؟

لهو الموبايل إنفجر وهو قاعد معاك؟؟؟

أنا قولتها وانا باقرأ البوست
مش هايسيبك سليم

معلش

انزل شارع عبد العزيز عطية

هتلاقى موبيلات إنفجركسون حلوه قوى

وفيه ديناميتولا برضو تمشى
D:

تحياتى

مدحت محمد يقول...

من خلال مدونتك الصراحة بناشد السلطات المصرية
اخراج دكتور عطية خارج مصر
راح العراق حصل حرب وجه مصر حصل زلزال

لااااااا
ده كتير والله

هههههههههههه
تعرف
فى مثل بيقلك
من سمع مصيبة الناس هانت عليه مصيبته
ده تقريبا اللى حب يوصلهولك
بس تقريبا ده عقدك

ياللا افضل حاجة فيه انه لسة بيقول الحمد لله وده المطلوب
الحمد لله على كل شىء

Desert cat يقول...

الدكتور عطية ده اتعذب كتير اوى
كل لما يتعب تحويشة العمر تروح فى بلاش
بس اجمل حاجه انه عايش بالامل
" وبشر الصابرين اللذين اذا اصابتهم مصيبة قالوا انا لله وانا اليه راجعون "
ان شاء الله ربنا يرزقه باللى بيتمناه
والمدونات الجميلات يرجعوا ينوروا من تانى بلوج سبوت
لفتى كريمة منك يا سوووو
تحياتى

DayDreaming يقول...

هو صحيح انا مليش نفس اعلق في اي مدونه ولا حتى اكتب في مدونتي معرفش ليه بس البوست ده حسيته بيشد الكلام من جوايا
مش عارفه ليه حسيت ان الرضا بالنسبه لنا كلمه مش عارفين نحس معناها

الحمد لله على كل شيء
تقبل مروري

ojg يقول...

هم يبكي وهم يبكي برضو

يالهوي يا سوووو وإستحملت ياخويا تقعد معاه ويحكيلك البلاوي دي؟

فعلا؟ الحمد لله
دانا كنت فاهمه نفسي منحوسة
بس الحمد لله طلع الراجل ده سابقني بخطوتين تلاته

وبعدين اختفاء المدونين ،، أنا ماقدرش اتكلم عنه مع اني من اشد الرافضين له،، لسبب بسيط إني بقالي كتير برضو مختفية :))
ربنا يرد الغايب
قول آمين

3ala asm masr يقول...

بس مش كلنا عندنا امتحانات
بجد اللى يشوف بلاوى الناس تهون عليه بلوته وانا اللى عيله وفاكره انى فقر ومليش حظ
الحمد لله بجد احنا احسن من غيرنا كتير اوى

3ala asm masr يقول...

بس مش كلنا عندنا امتحانات
بجد اللى يشوف بلاوى الناس تهون عليه بلوته وانا اللى عيله وفاكره انى فقر ومليش حظ
الحمد لله بجد احنا احسن من غيرنا كتير اوى

Soooo يقول...

كاميليا

انزل شارع عبد العزيز عطية

هتلاقى موبيلات إنفجركسون حلوه قوى

وفيه ديناميتولا برضو تمشى
------
اوبا اوبا اوبا
ده انتي اتاريكي ساخره اهو
وانا اللي كنت فاكرك شاعره بس


ومتشكرين قوي عالنصيحه دي يا استاذ سرحان
وسنوافيكم بنوع عدة النوبين بمجرد ما نعرف نصطادلنا حاجه الاجه

فل يامعلم



سلاموووووووووز

Soooo يقول...

مدحت محمد

وهو انت فاكر ان الزلزال بس اللي من تأثيره؟؟
ابسلوتلي
حادثة العباره وقطر الصعيد واللي غرقو وهم بيهاجرو واللي ماتو في البوكس وهم مترحلين فطسانين وارتفاع سعر السولار والرز وأزمة العيش و.. و.. و
كل الحاجات دي من بركاته ياعمنا

تيجي نسفرو اسرائيل يمكن حاجه تحصل للاسرائيلين؟؟؟؟


نورتني يادوحه وماتقطعش كده ياعمنا
انا عارف اني مقصر في حقك بس والله ظروف

ربنا يسعدك ويكرمك ويوفقك دنيا وآخره يارب



سلاموووووووز

Soooo يقول...

Desert cat

الحمدلله على كل شيء
وياستي انا عملت اللي نفسي ان المدونين يعملهولي لو حصللي حاجه .. يدعولي بس من غير مايبطلو تدوين

الله يكرمك يارب ويسعدك دنيا وآخره يارب



سلاموووووووووز

Soooo يقول...

DayDreaming

تصدقي فعلا في حالة ملل تدويني ماشيه في البلد
طب ماتيجو نطلع رحلة ونغير جو شويه
واهو بالمره نرجع من هناك وكل واحد يعمل بوست عن الرحله واحسن بوست ياخد جايزه
يطلع الرحله اللي بعدها ببلاش


وياستي ربنا يكرمك ويسعدك ويوفقك دنيا وآخره يارب



سلاموووووووووز

Soooo يقول...

ojg

شفتي بقى اننا عايشين في نعمة بس مغمضين عنينا عنها بنفسنا
وإن تعدوا نعم الله لا تحصوها

والف شكر ياستي على زيارتك ونردهالك في الافراح ان شاء الله


ملحوظه
وانتي بقى كنتي مختفيه ليه .. زنقة مواصلات برضه؟؟؟



سلاموووووووووز

Soooo يقول...

3ala asm masr

ياستي ربنا يوفق كل المدونين
سواءا في امتحانات او في حاجه تانيه
ويرجعو للتدوين ويدو للنت حس بدل ماهو هس هس كده

وربنا يسعدك ويكرمك ويبسطك ويوفقك دنيا وآخره يارب



سلاموووووووووز

dodda يقول...

البوست ده بجد بجد حلو اوى
واحلى ما فيه انه لفت نظر ناس كتير لنعمه رائعه..ربنا اداها للبشر منغير حساب
يعنى كل واحد يقدر ياخد نصيبه من الرضا على قد ما يقدر يطوع نفسه

ويا رب يفضل معلق فى دماغ الناس ارضى بقضاء الله واحتسب ينصلح حالك فى الدنيا وجزاء الاخره تجده فى الميزان باذن الله

اعزك الله وارضاك

Nani يقول...

السلام عليكم
اديني رجعتلك يا سووووووووووو
ضحكتني مكنش ناقصة الا كبسية من الاداب تبقى كملت
ههاهاهاهاه
:)

m_zouhier يقول...

أنا أول مرة أعلق عندك على أي موضوع يا أحمد ...
بس لما قريت القصة دي كان لازم أعلق
الحكاية دي انت حكتهالى مرة واحنا قاعدين على القهوة من ييجي أربع سنين لما كنت واقع في مصيبة من المصايب الكتير اللى وقعت فيها ولحد النهاردة كل ما يحصلى أي حاجة لازم لازم أفتكر الراجل ده بجد
وحكيت الحكاية دي لناس كتير
لأنها بجد فيها معانى كتيييييير أوي
الحمد لله رب العالمين ....
محمد زهير

زُمُرده يقول...

اسمي مكتووووووووووب لولولولولو

عزيزي سوووو

اولا بوستك جميل وبحب اسلوبك لما تكتب كده بحس ان الحكاوي ممكن تبقى مسليه للي عايز تسليه بس
واللي عايز يقهم ويضيف لنفسه بيفتش بين السطور ولأني عارفاك فبحب افتش


ثانا بشكرك على اهتمامك وانك لسه فاكر زمرده حتى لو بلوجي بقى بعيد

ثالثا مش كل اللي اختفوا اختفوا بمزاجهم ساعات الدنيا بتفرض عليك شيء
وانت عارف زمرده متمرده بتحاول بس مش دايما هتنجح

شوفت بقى مش اضراب عن التدوين ولا تمرد على الناس والمدونه
بالرغم ان العلاقات لزم تكون تبادليه
هات وخد زي ما بيقولوا

ليس كل ما يتمناه المرأ يدركه

سلام يا صديقي
وابقى نورني دايما


بقايا زمرده

brokenheart يقول...

بص يا معلم
كل اللى اقدر اقوله
اللى يشوف بلاوى الناس تهون عليه بلوته

ربنا يصبرنا ويصبرك ويصبر الدكتور عطية

mennatallah يقول...

السلام عليكم ورحمة الله وبركاتة بجد البوست دى حلو اوووى دى اول مرة اكتب كومنت بس دى تانى مرة ادخل المدونة امبارح كانت اول مرة ادخل وقريت لحد ما قدر لحد الساعة 7 الصبح :)
بس بصراحة البوست دة فعلا انا مقرتش قبلة زى كدة فى اى مدونة رغم ان انا بتابع مدونات كتيييير ( لكن انا مش مدونة ولا حاجة ) فعلا بجد جزيت خيرا
ودة اكدلى ايمانتى ان مفهوم السعادة هو الرضا ... الرضا بالى ربنا كتبة اى كان
جزاك الله خيرا