الجمعة، 14 رمضان، 1430 هـ

!! صديقي .. حسني مبارك

.. الولا خالد بتاع مدونة الباحث عن المتاعب .. اقترح عليّ من كام يوم اضيف حد عالفيس بؤ
واشكمني عِشَري وباحب اللمه .. قلت ومالو .. اشوف هو عايزني اضيف مين , ولما رحت اشوف هو عايزني اضيف مين .. لقيته عايزني اضيف حسني مبارك
!!!!!!!!! يالهوي

.. حسني مبارك حسني مبارك .. اللي لما بيمشي في الشارع بيبقى وراه زيطه وموتسيكلات وعااااع
!!!!! وبيقفلو الشوارع .. ولو حد هايموت ويروح المستشفى .. يموت ويروح التُرب أسرع
!!!!!!!!! يانصيبتي
حسني مبارك اللي من كام يوم راح افتتح كوبري مش عارف ايه .. اللي قعدو فيه عشرطاشر سنه وكلّفهم عشرميت مليار دولار .. والبلد فيها كساد والعواطليه مش لاقين شغل .. ولا لاقيين حق مشاريبهم عالقهوة حتى
!!!!
ساعتها افتكرت الموضوع ده .. وقلت أكيد أكيد حسني مبارك قرر انه يواكب التكنولوجيا.. ويعمل زي أوباما , ولا ده حسني مبارك تاني متشابه مع حسني مبارك الأولاني .. في الأيام المباركه دي !!؟؟

.. طبعا ماكدبتش خبر وأضفته وش , مش كده وبس .. ده انا حطيته في التوب فريندز كمان
!!! ولو بإيدي كنت حطيته فوق راس التوب فريندز كللهم

وبعدين هو انا في ديك الساعه لما حسني مبارك يبقى صديقي الصدوق .. ونعمل لبعض تاجات على النوتس اللي بنكتبها .. ونعزم بعض على الإفنتات اللي هنروحها
بس نوتات ايه اللي هعمللو تاج عليها .. انا علاقتي بالسياسه زي علاقتي باللغه الصيني .. آخري آقول
أندي هاجات هيلوه .. فيني الماما !!؟؟؟

.. وإيفنتات ايه اللي هعزمو عليها .. اقوللو تعالى معانا بؤجة الخير مثلا .. دي تبقى عيبه في حقه
!!! بؤجة ايه بس .. وهو مقامو بؤجة برضك .. ده مقامو كونتينر من القنطره شرق وش
ولا اقوللو احنا رايحين البورصه عشان نضربلنا اتنين فيسكافيه بلاك ونشتم في البلد شويه !؟؟؟
!!! وطبعا ساعتها هنبقى بنشتم البلد .. متمثلة في الشعب الرعاع اللي مش عارف مصلحته
ولو فرضنا جدلا عبثا هطلا .. حبيت اعمللو تاج على صوره مشتركه بيني وبينه .. هيكون وضعي ايه في الصورة !!!؟؟
يعني هل هكون واحد من اللي واقفين في الشوارع وبألوّح بإيدي مشيرا ليه بالتحيه !!!؟؟
- حلوه قوي (بألوّح) دي -
ولا هل هيكون في ماتش لمصر وانا باشجع وباهتف .. وصورته باينه من خلال الشاشه بتاعة الاستاد اللي هتكون ورا ضهري .. بما إني هبقى قاعد في الدرجة التالته مع عامة الشعب .. مش في المقصورة ولا حتى الدرجة التانية !!!؟؟
ولا ممكن مثلا مثلا .. اكون باسلم عليه في عيد العمال وهو بيديني مفتاح شقة إسكان متوسط .. وطبعا ساعتها هاكون متنكر ولابس جلابيه وعِمّه وباعمل شاي على سبرتايه .. وهو - قال ايه - يفاجئني ويجي يشرب معايا الشاي !!!؟؟

لألألأ .. انا لازم استغل الفرصه واضرب مع حسني مبارك صحوبيه .. وساعتها هقوللو زي ما أحمد عز بيقوللو .. هقوللو ازيك يا أونكل !!!!!؟
.. آه أونكل .. انا اقل من أحمد عز في ايه ولا مؤاخذه .. هو اسمه أحمد وانا اسمي أحمد
.. هو عز وانا سوووو .. و سوووو تعتبر مرادف للعز في الأيام الضنك اللي احنا فيها دي
.. وبعدين معلش يعني .. لو عز محتكر الحديد .. انا متخرج من فنون تطبيقيه قسم حديد
!!!!! وحديد على حديد .. يفعل الله مايريد

وكمان لازم بعد كده ادقق في تصرفاتي وتعاملاتي مع الناس .. اه طبعا .. يعني مش أي حد هقوللو حليب هارتي - زي ما هنقولها انا وحسني لبعض - لازم يكون في حدود في تعاملاتي مع الناس العاديه

يعني مثلا مثلا .. من النهارده مافيش تجمعات خير مع المدونين - زي التجمع اللي جاي ده - مانا هعمل خير تاني بقى .. مش هبقى مع حليب هارتي حسني مبارك .. وهنقعد نتجاذب طراطيف الحوار .. وهنتكلم في القضية المصيريه للشرق الأوسط .. وتأثير ده على ارتفاع سعر الخيار في تاهيتي البلد
!!!!!!!

وكمان من النهرده مش هقول الفاظ في سكة شقلطه وفلقطه .. مانا خلاص بقى صاحبت حسني مبارك وبقينا انتيخ مع بعض .. ومش هاشوف لا شقلطة ولا فلقطة خلاص بقى !!!؟؟

!!! يااااه .. والله هتزهزه أيامك يا سوووو .. ومش بعيد تشرب سجاير ماللبورو بدل الكولوباطرا الفرط
!!!!! واحتمال كمان - إوعدنا يارب - أركب السي تي إيه .. وابقى من الشباب الكول

.. ولو البليه لعبت معايا سيكا .. هعمل كتاب كده يكون فاتحة خير بعون الله .. ويبقى اسمه
!!!! حسني مبارك .. البوي فريند بتاعي
.. وأكيد من الاسم بتاع الكتاب .. باين إني بعت القضيه خلاص .. وأساسا مافيش بين الحبايب قواضي
!!! وربنا مايجيب الا المعروف .. والملايين والفيلل في مارينا .. والعربيات الآخر حاجه
ياااااه
... أنا في قمة التفاؤل والسعادة والانشكاح

!!!!!!! صديقي حسني مبارك .. ماتجيب بوسة فرنسية الإيحاء
.. واعتقد اني اطلب البوسه بنفسي .. أكرملي من أن يتم إجباري على بوسها غصم واقتدار
.. وده تطبيقا للحكمة اللي بتقول
!!! إن لم تستطع منع اغتصابك .. فاستمتع به


ملحوظة

!!!! لو حد استعبط وسأل مين حسني مبارك .. هقوللو يا جاااااهل .. ده أبو شريكي في المدونة

آآه صحيح .. لو ماظهرتش عالشاشه في خلال الكام يوم الجايين .. وصيتكم المدونة
وأشهد ألا إله إلا الله
و أن محمد رسول الله
!! استرها علينا وعلى ولايانا يارب
سوووو

هناك 37 تعليقًا:

adel يقول...

اولا واحشني يازعيم

ثاني سوووووووووو حبيب هارتي و اخويا و صاحبي و كفاة يعني
انا صحيح لسه ماشوفتكش بس هاشوفك و هنتناسب كمان خلاص

بس قصدك في طلب كده
لو كارت صغير من سعادتك لو من بابا حسني عشان عاوز اخد اعفي من الانترنت المحجدود و كمان توصية من سعادته يدخلوني معهد السينما :)

وبمناسبة الشهر الكريم ... تقوله اهل المقطم بيسلموا عليك و بيبعوك لافترة تانية
وليه مايحكمشي

زقطـوطـة يقول...

هتوحشنا أوي يا أحمد !!!!!!!!!!!!

خالد فوده - Khaled fouda يقول...

هههههههههههههههههههه

صديقك ده راجل كووووووول وديموقراطي وبيحب التغيير اوي
واول كلمه كتبها ع الوووول
ان التغيير يبدأ من الشعب مش من الحكومه
يعني الشعب لازم يتغيير .. يسيب مصر ويروح اي داهيه
يصحو بقي بتةع الحكومه ميلاقوش حد يحكموه .. يجيبوا عقد عمل ويروووحوا السعوديه
زي ما قال عادل امام

علي فكره انااول مواطن فيسبوكي يضيفني الريس عنده ....
طبعا هو عمل علشان
كل اللي عنده شكاوي من الحكومه والخدمات ده الميل الشخصي للريس egy_hosny@yahoo.com منتظركم كل ليله بعد صلاه الفجر .. لمده ساعه علشان بيقوم يلعب رياضه

فتاه من الصعيد يقول...

عايز الحلاوه ساده ولا بالبندق ؟

والعيش بلدي ولا فينو ولا كيزر ؟؟؟:D

يا مراكبي يقول...

طيب والله العظيم ولا ليك عليا حلفان انت كنت راجل طيب وكويس وزي الفل ومجدع .. هنفضل فاكرينك على فكرة ومش هننساك .. تروح وتيجي (معرفش هتيجي بقى والا ايه) بالسلامة

بت خيخة وأي كلام يقول...

مممممممممممممممممم
مش هاينفع تعزمه على البورصة وتضربوا فسكافيه بلاك
ومش هاينفع تجيبه معاك بؤجة الخير
ومش هاينفع تيجوا التجمع الخيري بتاع بكرة


مممممممممممممممممممم

طب هتيجوا التبرع بالدم ؟

شغبوط فى زمن مش مظبوط يقول...

اولا اهلا بيك يامان كان نفسى نبقى صحاب بس يظهر انى اتاخرت شويه بس على فكرة انتا ابتكرة طريقة جديده وكول اوى للانتحار وشكلك كده قلت تكون اول واحد تجربها ربنا معاك بس ممكن الديموقراتية تلعب دورها معاك بحق جاه النبى يارب استرها معاه كان ابن حلال وعلا فكره انا معرفووووووش انا علقت صدفه هههههههههههههههه وهذه ضحكة الوداع

عاشقه الرومانسيه يقول...

الله يرحمك ياسوووووو
كنت طيب وابن حلال
اهئ اهئ اهئ

صبرني يارب يقول...

سوووووووو يا سووووووووو

خلاص هايحبسووووووووو

ايه ياعم فى ايه ايه الاشتغاله دي

والنبى صحيح يا سو ده ابيه حسني

والنبى عايزه اكلمه في موضوع مهم اوي

لا لا ميت موضوع

لو ردك عليك يا سو ابقى سلملي عليه وقوله فرجه قريب

هع هع عندي علبة حلاوه بختمها جوه مش هاعزها عليك

MeDoOoOoOo يقول...

bos ya soooo ya 5oya e7na kona 7abayb bas ena btl3b bel nar wana masd2t ang7 fe ola deh b3d 3 snen 3azab fa7snlk w a7snly kefaya keda , keda reda yaba da7na yama da5lna cinema m3 b3d w nasbt 3alya fe aflam yamaaa bas delw2ty enta el htb2a el batal :D:D azon fahmny shed 7elk ya wa7sh :D:D

شوكولاتة يقول...

والنبي لما تشوف صاحبك قوله ليا واحدة تعز عليا نفسها تتعرف على المدام

اشمعنى بليتك انت تلعب وبليتي انا ماتلعبش مربعة يعني

بوست جااااااامد يودي الملاهي على طوول

Zika يقول...

جامد اخر تلت اربع شوارع

عبدالرحمن فارس يقول...

على فكره انا زعلان منك

يعني ازاي تكتب بوست زي دا من غير ما تديني أي اشاره
او تعرفني

ميرام يقول...

ههههههههههههههههههههه
خير اللهم اجعله خير
(:
كل سنة وانت طيب
(:
تحيــــاتي

سومه...مجنونه فى بلد عاقل يقول...

ههههههههههههههههههههه
هى الحاله وصلت عندك يا سوو انا مسكت الحكم واتنازلت عنه لسونه وانت هنا عاوز تصاحب سونه
عموما ممكن تقولى فى ايميل صغنتت طلباتك كمواطن وانا بحكم علاقاتى المنوفيه الملوخيه المجنونه السوميه حتوسطلك عنده لا ولا يهمك دا حبيبى حبيبى حبيبى من ايام المنصه :)
طبعا سياتك مجيتش التجمع والصباغ سيحلك وزمانك قاعد فى البورصه بتضرب اللى بتضربه بقى وزمانك شرقان وانا بجيب فى سيرتك
كفايه عليك كدا انا حمشى بقى
عشان عندى معاد مع اوباما وسحس بومب

أحمد عاطف يقول...

والله شكلك مستبيع

دا انت شلفطت الراجل

ممكن طلب يابو حميد

تكلم انكل حسني يكلم احمد عز يديني 2 طن حديد في السكرته كده بنص التمن

اخوك مزنوق فيهم عشان اكمل الدور التالت

ربنا يسترها عليك

آيوشة يقول...

هههههههه يعنى انت صاحب فكرة اضافة حسنى مبارح دى ماشاء الله اخدت ثواب اللى بعدك اللى هيضيفوه ان شاء الله انا لقيت النهاردة بردو اقتراح اضافة صديق واول ما شفة الاسم تنحت وبصراحة اوجست خيفة اضيفه ولا لا ولانى لسانى متبر منى وممكن اقول كلمة مش حلوة فى حق الحكومة وبعدين بس ضفتها وفى انتظار قبول الاضافة اللى تقريبا هيعملوا فيش وتشبيه لكل اللى هيضيفه امال مش الريس :))

زهرة الكاميليا يقول...

لأ مش ح أسأل مين مبارك حسنى
بس ح أسأل يعنى إيه "حليب هارتي"

وبعدين خلاص يعنى ؟
علشان حسنى بقى زميل فيس بووك تبيع الشعب كدة فى قعدة؟

صحيح .. بلد مناصب وأنصبة وبلاش التالتة
ههههههههههههههه

كل سنة وأنت طيب ..
كل سنة وأنت جميل كـ أنت كدة دوما


أختك
ومش عندى فيس بووك
مش بحبه أصلا
وش كدة
(F)

البنفسج الحزين يقول...

اهي دي الصداقه والصحوبيه اللي تنفع بجد يا بني مش بيقولك من جاور السعيد يسعد وده مش سعيد وبس ده سعيد مسعد ابو السعد.وكده هتقب علي وش الدنيا وهتبطل تركب ميكروباصات ولا مترو لانك هتطير بعد كده.

الرحاله يقول...

دمك خفيف جدا
ويا بختك يا عم
حد يطول يبقى فريند لجسني مبارك, حتى ولو كان ابو زيملك في المدونة, وده خلاني اضع سؤال لولبي, هو زميلك في المدوة ده يبقى جمال مبارك؟؟؟؟

يا خوف فؤادي من غدي يقول...

جاه في بالي اغنيلك اغنية عمرو دياب "كان طيب كان حنين"

غير معرف يقول...

فعلا انت دماغك سووووووو علي الأخر يا عم الشباب
هو فيه حد بيقعد في البرصة يشرب نسكافيه ولا حد يدخل اصلا انت فاهم انها ايه
تعرف
لو عمل استفتاء في المدونات سنة 2009 انت بجدارة تاخد اظرف شخصية
يخرب عقلك

إنسانة يقول...

الا ياسوووووووووو هى الكهربا بتفطر

بس بجد هتوحشنا فعلا

عايز الحق يااحمد انت كلامك جامد فحت

:))

sameh ezzat يقول...
أزال المؤلف هذا التعليق.
sameh ezzat يقول...

ولما يحصل انشاء الله ويتم والمراد انشاء الله هتفتكرنا ولا هتعمل زي صاحبك او صاحب حضرتك منا بعد كده لازم اخد بالي لما اجي اتكلم مع معاليك ..وياتري اسمك هيفضل سووو ولا هيبقعا عووو منتا هتبقا مخيف بقااااا هههههههههه
انا تحت لوئك مقدما يا باشا اه اامال ايه انا بحب النظام والنظام بيحبني

بنت مصريه يقول...

حبييييب هارتى ههههههههههههههههههههههههههههههههه
يخرب بيت عقلك يا سوو مصر تودى نافسك ف داهيه
بس ما تقلقش مدونتك ف عيوننا اتكل انت على الله ههههههههههههه
يللاالبقاء لله اقروله الفاتحه يا جماعه

كيكى عوووووو يقول...

ولا ممكن مثلا مثلا .. اكون باسلم عليه في عيد العمال وهو بيديني مفتاح شقة إسكان متوسط .. وطبعا ساعتها هاكون متنكر ولابس جلابيه وعِمّه وباعمل شاي على سبرتايه .. وهو - قال ايه - يفاجئني ويجي يشرب معايا الشاي !!!؟؟
******************************
الحتة دى جاامدة اوى ياجرى
خلااااااااااااااص عديت الكبارى ياسوووووووو افندى!!

مرجانة يقول...

يارب خلقتني وانا في عهد مبارك ولهوت ولعبت وانا في عهد مبارك وراهقت في عهد مبارك وشبت في عهد مبارك
اللهم لا تزهق روحي وانا في عهد مبارك
تحياتي يا سوووو

Eyzinhyem يقول...

انا عاوز ايميل حسنى لو سمحت هههههه

اسماء جمعه بنت الشمس يقول...
أزال المؤلف هذا التعليق.
اسماء جمعه بنت الشمس يقول...
أزال المؤلف هذا التعليق.
اسماء جمعه بنت الشمس يقول...

ههههههههههههههههههههه
هههههههههههههههههههههههههههه
هههههههههههههههههههههههههههههاااى
لا بجد حلو اوى البوست ده
وعلى رأى فوده ديموقراطى وكووووول
هههههههههههههههههههههه

أمانه تسلملى على اونكل
وقوله بنت الشمس عاملالك offer الضهريه الجايه يعنى عالساعه اتنين هتبقى الحرارة نصها عاملاله اوكازيون
هههههههههههههههههههههههه
هههههههههههههههههههههههههههههه

wella يقول...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه


بجد فطست على نفسى من الضحك وانا قاعدة بقرى كلامك

كدة مرة واحدنا هتبعنا هتبيع الشعب الغلبان وتبقى صاحب مبارك

نهون عليك

يهون عليك الفقر
يهون عليك الذل
تهون عليك البطاله
تهون عليك الشحاتة
تهون عليك المستشفيات الحكومية المعفنة
تهون عليك المواصلات اللى تخرج الواحد من هدومة
يهون عليك التلوث
يهون عليك رغيف العيش اللى مش بنعرف ناكله


يااااااااااه قد كدة الفيلا اللى فى مارينا حلوة وتخليك تبعنا


بس تعاله هنا تفتكر الريس بجد عنده ايميل ومشترك فى الفيس بوك

يمكن لية لا

بس دة عجوز اوى اعتقد لا اية اللى يخلية لسة هيعد يتعلم يعد على النت


مع تحياتى ويلا

أبو أمل يقول...

مش قادر أعبر عن مدونتك غير

بكلمة واحدة

م ج ر م

تحياتي

muhammd fattouh يقول...

والله يا استاز سو انا محتار اهنيك ولا انعيك بس يلا ادى اخرت الى يلعب مع الاسد كنت طيب والله و دمك خفيف و من ساعت ما ابتديت اتابع المدونه بتعتك قلت انك مش مطول الى جنه الخلد يا سوووووووووو

رامى ظاظا يقول...

أعلق اقولك إيه بس
مش كفاية عليك انت هتتعلق من صباع رجلك الصغير؟
روح يابنى ربنا يسرها معاك

entrümpelung wien يقول...

شكرا على الموضوع
entrümpelung
entrümpelung
entrümpelung wien