الأربعاء، 16 ذو القعدة، 1430 هـ

!!! سوووو .. البَطّيخي

نِمت نومة غلط وضهري شادد عليّ .. قلت آخدلي أجازة كام يوم لغاية ما ارتاح , وابويا سافر البلد لظروف عوائلية معينة .. يعني بقيت في البيت لوحدي .. ومش طالبه أي حوارات فاكسانه بصراحه .. بس هعمل ايه يعني !!؟؟
بس .. لقيتها .. اتفرج عالتلفزيون .. طب والله وحشني وقرّبت انساه .. خصوصا ان ابويا على طول بيتفرج على إيه آر تي الحكايات .. كأنه بيعاقبني مثلا , وكل شويه يقوللي دلوقتي هيحصل كزا كزا .. ويحصل فعلا الكزا كزا اللي ابويا قال عليه .. طب لزومها ايه الفرجه !!!؟؟؟

قلت لـ اسماعين البواب يجبلي شوية حبشتكانات لزوم القعدة .. ماهو انا مريض ولازم أتغذى كويس , وفعلا جابلي شوية رفايع وحاجات خفيفة .. رُبع كيلو لانشون .. رُبع رومي .. رُبع بسطرمه .. طبق بيض .. بأربعه جنيه عيش فينو .. قزازة بيبس اتنين رتل .. علبة ايس كريم واحد رتل .. تٌمن كيلو لب اسمر سوبر .. تُمن فول سوداني و كيس شيبسيكو الحجم العائلي
!!!! حاجات خفيفه اهي اكمني مريض


اتفرشحت عالكنبه بتاعة الليفنج وحطيت الترابيزه جمبي على طول عشان مش طالبه أي مجهود .. ولولا الملامه كنت فرشت القعدة دي كلها في الحمام
!!!! عشان الواحد يبقى فعلا فعلا .. في بيت الراحه

مسكت الريموت .. طب اجيب ايه اجيب ايه اجيب ايه !!!؟؟؟
.. اه .. اشوف إيه آر تي سينما بتعرض ايه .. لقيتهم جايبين فيلم نمس بوند .. شكرا .. اللي بعده
.. قناة سيما .. عارضين فيلم اريد خلعا .. هممم .. هو شغال بس ناخد لفة تانيه .. اللي بعده
.. نيل سينما .. فيلم ملك وكتابه .. مش عارف .. ناخد لفة .. اللي بعده
.. إم بي سي تو .. فيلم قديم عن الغرب الأمريكي وشغل كاوبويز .. اللي بعده
إم بي سي أكشن .. مسلسل بتاع سي إس آي .. لا مش طالبه تشغيل مخ .. انا عايز أأنتخ
!!!!!!!!
!!! طب بما انها ليلة أنتخه .. ما أأنتخ بضمير واجيب أي قناة من بتوع الاغاني .. ليه لأ

جبت قناة من بتوع المسابقات .. اللي بيجيبو بنت موزه على انها مذيعه .. وفي سؤال في جنب الشاشه .. والشاشة كلها بتبقى مليانه ارقام اتصالات
وطول ما المذيعة واقفه .. بتترقص على أنغام الاغاني اللي بتشتغل وهي بتقول : اتصل .. شارك .. هتربح .. معانا .. الف .. دولار .. يلا .. منتظره .. اتصالاتكو .. هوبا .. معايا .. يلا .. هوبا
شوية شوية حسيت انها هتقول : يلا .. هوبا .. معايا .. فين .. السقفه .. يلا .. سقفولووووو
!!!! القناة اسمها قناة الإمارة .. والمفروض يبقى اسمها أمّاره .. اختصارا لـ أمّارة بالسوء
السؤال عبيط قوي .. بلد أولها حرف الألف واللام .. وآخرها حرف الألف واللام .. ووسطها ركن من أركان الاسلام
الصومال
ايه العبط ده؟؟؟؟

.. لا ياعم .. لو عبط بعبط بقى .. يبقى اجيب قناة سترايك .. حتى دي أول قناة ابتدعت الفكرة دي
.. جبت قناة سترايك .. ولاجل الحق .. المذيعة بتاعة استرايك أكثر مزازة من موزة الإمارة
.. لابسه منطلون جينز محزّق و زَيّ الفل .. وفوقيه توب اسود وعليه كتابه بالدهبي
Kenzo
!!!! الله .. ده البيرفيوم بتاعي .. لا الحوار شكلو خير خير خير
.. بس ايه ده .. دول كاتبين مكان السؤال
رانه واحده على رقم بلدك وهنتصل بيك
تقريبا قصدهم "رنه" مش "رانه" .. هي العالم دي ساقطة ابتدائي ولا ايه !!؟؟؟؟
!!!! بس رنه ازاي .. ده المفروض انه يبقى اتصال
.. السؤال بقى أكثر عبطا من سؤال قناة الإمارة
ايه المدينة اللي لونها أحمر وأسوارها خضراء وسُكّانها لونهم اسود ومفتاحها حديد !!؟؟
البطيخة
بس ايه الهطل ده .. ايه "مفتاحها حديد" دي .. هو في مفاتيح بلاستيك اليومين دول؟؟؟
!!! يعني يا ربي حتى اللي عامل السؤال اهبل
بس ازاي اديهم رنه وهم هيتصلو ؟؟؟؟
معقول يعني ؟؟؟؟
.. مسكت الموبيل .. اتصلت بالرقم المختصر اللي كاتبينه بتاع مصر .. قلت اديهم رنه زي مابيقولو
.. وهوووب .. لقيتهم فتحو عليّ
!!!!!!!!!!! يا ولاد الكلللللب
.. طب والحل .. انا كده كده اتغرّمت حق المكالمه .. خلاص بقى .. اكمل معاهم واشوف ايه الحوار
!!! عفوا .. نظرا لكثافة الاتصال .. نرجو منك الانتظار
ده صوت بنت موزه تبعهم .. بتثبتني عشان ما اقفلش
!!! عفوا .. نرجو منك الانتظار .. نظرا لكثافة الاتصال
.. خلاص ياستي عرفنا .. شويه شويه هتقوليلي
!!!!!! عفوا .. لكثافة الاتصال منك .. نظرا نرجو الانتظار
!!!!!!!
.. اربع دقايق .. اربع دقايق معاهم في الهسس لغاية ما قلتلهم كل بياناتي
.. اسمي .. رقم الموبيل .. ساكن فين
لدرجة اني كنت خايف يسألوني عن مقاس البوكسر بالمرّه !!؟؟؟؟

.. بس يلا .. مش مشكله .. كللو يهون قصاد الجايزة
100000 $
.. مية ألف دورار امريكاوي
!!! يالهوي لو المبلغ ده جه
!!!!! يادين النبي
.. طب والنعمة هاعمل بلاوي
اول حاجه .. هاوضب البدروم بتاع العمارة و اعمله استوديو .. خصوصا ان سقفه عالي وينفع اعلّق عليه شبكة اضاءه حلوة
.. وبما اني مهندس ديكور .. يبقى هاقدر اعمل الديكورات باقل تكلفه
.. وهعمل برنامج من اعدادي وتقديمي
.. برنامج توك شوو بجد بقى
.. هيبقى اسمه سوووو شوو
!!!! طب والله اسم فني
.. وهاضرب كل برامج التوك شوو
.. دارك ده مافيش حد هيسمع عنه تاني
.. ساعة مع سمير غانم برضه نفس الحكايه
!!!!!! هتقعدو في بيوتكم يا اشرف يا عبدالباقي ويا سمير يا غانم

المذيعه : ومعانا اتصال .. الو
المتصل : هلا والله .. معاكم مبارك من الكويت
!!!!! سوووو : - مع نفسي - هي الكويت فيها مبارك برضه .. سبحان الله .. منتشر منتشر يعني
المذيعة : ياترى ايه الاجابه يا مبارك ؟
مبارك : الصومال
سوووو : انت اهبل يا مبارك - قصدي مبارك اللي بيتصل بيهم والله يا تامر باشا - الصومال اجابة السؤال اللي على قناة الإمارة .. انما هنا بطيخه
المذيعة : غلط يا مبارك .. معلش .. جرب معانا تاني
- سوووو : جريئة قوي البت دي .. قالت غلط يا مبارك عادي
- شكلها ماتعرفكش يا تامر باشا

حقه لو الحوار بتاع المية الف دورار ده حصل .. هعمل ستوديو للمسلسل الست كوم اللي كاتبه .. هعمله لرمضان الجاي .. يعني هي جات عليّ .. مافي عشرطاشر ست كوم اتعملوا السنه اللي فاتت .. أي نعم مافيش حد شاف أي حاجه .. بس كللو باع اعلانات .. انا كمان هابيع

المتصل : معاكي زياد من تونس
!!!!!! سوووو : غريبه .. ده هو هو صوت مبارك مصر .. قصدي الكويت .. ده منتشر بجد بقى
المذيعة : ها يا زياد .. عارف الاجابه
زياد أو مبارك : الخرطوم
!!!! سوووو : خرطوم ايه يابن الخرطومة .. البطيخه ياد .. البطييييييخه يابني البطيخه
-----
المذيعه : يلا .. شاركو .. معانا .. هوبا .. بسرعه .. اتصلو .. هتكلموني .. من غير كونترول .. من غير مراقبه .. هتقولولي .. كل .. اللي .. عايزينه .. انا .. لوحدي .. هابقى .. معاكو
!!!!!!!!!!!!!
.. يادين النبي .. طب ماهو طبيعي الناس تسخن وتتصل و هُمَّ مش باصيين على السؤال اصلا
!!!! وهيتصلوا عشان يعاكسوا البت ويشتموها .. ويقولوا ألفاظ قبيحة ممكن تخدش حياؤها وتحرجها
.. لألألأ .. انا لوكسبت .. هاجيب البت دي واسترها .. اه والله .. اخليها تشتغل شغلانه محترمه بجد
هاخليها تبقى سكرتيره .. سكرتيرتي الصبح .. وعشيقتي بعد الضهر .. محترمه ولا مش محترمه !!؟؟

!!!!!!!!!!!! موبيلي بيرن .. ورقم غريب .. يافرج الله .. الحمدلله .. الحمدلله
.. سوووو : - في قمة الانشكاح المرئي – الو .. البطيخه
!!!! المتصل : بطيخه .. بطيخة ايه يا باشمهندس .. انا حمدان النجار
سوووو : حمدان النجار !!!! - تحوّل الانشكاح المرئي .. للفظ اعتراضي يصاحبه صوت .. مُصاحب للنوم
حمدان : انت نايم ولا ايه ياباشمهندس ؟؟
!!!! سوووو : آه نايم .. عايز ايه .. قول بسرعه عشان مستني مكالمه ضروري
حمدان : مكالمة وانت نايم .. ازاي !!!؟؟؟
سوووو : - مغتاظا - باتكلم مع الملايكه .. مقضينها ميسدات مع بعض .. انت مالك !!!!؟؟؟
حمدان : ماشي ماشي .. دلوقتي انا مش عارف اعمل التعديل اللي قلت عليه .. ماينفعش تيجي النهارده !!؟
!!!!!! سوووو : يا حمدان انا ضهري بايظ .. وكمان مستني مكالمه .. مكالمه مهمة قوي والله
حمدان : معلش والنبي يا باشمهندس .. عشان لو الحوار ده اتعطل .. يبقى هنتأجل اسبوع ولا حاجه
!!!!!! سوووو : أمري إلى الله .. وحسبي الله ونعم الوكيل فيك .. وفي كل بطيخ البلد

ملحوظة

!!!! لو كسبت المبلغ ده .. هعمل قناة زي سترايك , قناة سوووو تي في .. طب والله اسم حلو
!!!! وهاجيب نفس البت تعمل الشويتين بتوعها .. وهتبقى سكرتيرتي .. وعشيقتي برضك
!!!!!! وهعمل برنامج هيفجر الدنيا .. هيبقى اسمه .. الفضائيات .. مابترميش بطيخ

سوووو

هناك 25 تعليقًا:

غير معرف يقول...

بجد بجد بجد مش قادرة ابطل ضحك وخصوصا الحتة بتاعة:الو....البطيخة

ههههههههههههههه
جامدة مووووز موز موز

بدراوى يقول...

حلوة اوووووى
يا سوووو
بجد
جميلة جداً

غير معرف يقول...

يعني انت عاوز تعمل قناة تكلفتها 100000 $
طيب سعر صرف الدولار الرسمي النهاردة
5 بوينت 466
دول هيعملوا قناة
انت تعرف سترايك تمويلها اد ايه وملكيتها ازاي و ادارتها ازاي وعدد اللي بيشتغلوا فيها اد ايه
اقولك حاجة
المحافظ الأستثمارية اللي under
عشرة مليون بيتقال عليهم
( صغار المستثمرين )


تامر

خواطر شابة يقول...

دائما ما كنت اتسائل ماهده الاسئلة الواضحة والجوائز القيمة ومع دلك كل المتصلين يجيبون اجابة خاطئة وتجد نفس السؤال التافه مستمر معهم لاسبوع وأكثر لكن الان فهمت صدق اللي قال رزق الهبل على المجانين
الله يعوض عليك فلوس المكالمة وبالنسبة لجائزة المائة الف دولار ابقى اتغطى كويس وانت نايم لان ده بيجي فقط في الاحلام
تحياتي

غير معرف يقول...

وبعدين شوف
مجالك كمهندس ديكور
افتكر دايما
الديكور بنود تكلفة غير مستردة
معادلتها
البساطة مع ذوق عالي



تامر

eman ezz يقول...

حلوة ياسو دمك شربات بس هوة انت عامل ريجيم والا أيه؟....على فكرة القنوات دى خسارة فيهم حق المكالمةدول نصابين بس أهو رزق الهبل على ....

فاتيما يقول...

و الله يا سوووو
انت بطل
اللى بتقدر تقعد و تتابع الكلام دا للآخر انا نفسى بتغم عليا و بيجيلى حساسية و اقعد اكح ...
فبغير القناة أحسن ....
بعت لسيادتك إيميل يا ريت تقراه
و تطمنى على عادل يا سوووو
انا بحملك الامانة دى أهو على مرأى و مسمع من عموم البلوجرية فى مصر
تتصل بعادل و تطمنى عليه الله يكرمك
يا عم البس تقيل الدنيا بقت برد
و متتعافش على نفسك
الضهر تعبه صعب قوى
الف سلامة عليك

بت خيخة وأي كلام يقول...

كله كوووووووم

ويا بن الخرطومة دى كوم لوحده
ههههههههههههههههههههههههههههه
ههههههههههههههههههههههههههههه

عاجبانى جدااااااااا
ههههههههههههههههههههههه

انا بس عايزة اعرف حاجة
ياترى ابن الخرطومة دى تندرج تحت الشتومة الابيحة
ولا الشتومة اللى مش ابيحة؟

ياريت يا معلمي تفيدنى وترد على استفسارى
وياريت تدينى موافقة على استعمال لفظة ابن الخرطومة
لانى هاحتاجها كتير اوى فى المرحلة الجاية


سلام
اختك خيخة

بت خيخة وأي كلام يقول...

الا صحيح يا سوووو
انت جاى بكرة فى حوار المنصورة
ولا ايه نظامك؟

سومه...مجنونه فى بلد عاقل يقول...

ههههههههههههههههههههه انت لسه زى ما انت هههههههههههه ازيك يا سوو
ليه بتغلط فى البطيخ يا سووو انت مش عارف ان الا بطيخ عندى وان بطيخ دا انسان مقدس عندى اخص عليك يا سوو زعلتنى منك
.........................

غير معرف يقول...

الفاظ أبيحه يا عم سوووووووووو
مش
الفاظ قبيحة
جايه من الإباحية
عاملة ايه البطيخة؟ بتحب الليمون ؟؟

مهندس مصري يقول...

ههههههههههههههههههههههههههههه
مش عارف اقول ايه يابني
بس اخوك غاوي أجنبي
فتلاقيني ما بين فوكس سيرز و موفيز و بين إم بي سي 2 و ماكس و أكشن
و دبي 1
و شوية أخبار من الجزيرة و دمتم على كده
لكن معنديش مرارة و لا دم لسترايك و أمثالها

دودو يقول...

فعلا البرامج دى كلها بالشكل ده

كلها تجيب للواحد عبط وهبل انا برضو قلت ايه انا حتصل بس كان على ميلودى تريكس وكان السوال سهل زى بتاع البطيخه كده وفضلت على التليفون بتاع 5 دقايق برسم فيها الاحلام والامال اما اكسب فلوس كتيره فحت واما وصلت كانت الفقره خلصت
بس احيك على اسلوبك الجامد ده اوى اوى ومت من اضحك
ربنا يحلى ايامك ويحققلك كل اللى بتتمناه يا رب

singamaraja يقول...

Singamaraja reading your blog

حسبى ربى يقول...

سلامة ضهرك ... خد بالك من صحتك وبلاش الدايت الجامد دة ... وبعدين لازم تتعب ماهو من الفرجة على القنوات المستفزة دى
دا فى قناة تانية عبارة عن بنت قاعدة هى المزيعة والكنترول والمتصلين والمشاهدين .... يا ساتر يارب من القنوات دى ..... قدرت دلوقتى ليه باباك بيشوف ارت الحكايات ؟؟!!

البنفسج الحزين يقول...

ههههههههههههه
عسل والله يا سوووو
بس ايه انت عامل ريجيم ولا ايه؟؟؟

وبالنسبه للقنوات الهبله بتاعه المزز والاسئله الهبله اللي محدش بيعرف يجاوب عليها دي أنا باقلب التلفزيون مباشرة علشان مرارتي اتفقعت من زماااااااااااااان ومش ناقصه كل يوم أغير مرارة جديدة...

رنونة حكومة ميخو يقول...

هههههههههههههههههههه هههههههههههههههههههههههه
هههههههههههههههه
انا هموت م الضحك خلاص حلوة قوي الو البطيخة ده انا انفجرت فى الضحك

ووكل شويه يقوللي دلوقتي هيحصل كزا كزا .. ويحصل فعلا الكزا كزا اللي ابويا قال عليه .. طب لزومها ايه الفرجه !!!؟؟؟
فظيع بجد البوست ده
اول مرة ادخل المدونة ...بس شكلها مش اخر مرة لانى بجد مت م الضحك...
انا فعلا بتفرس من القنوات الهبلة دي يجيبوا واحدة هبلة اصلا تقعد تتنطط و صوتها بيبقى مستفز جدا بتخليك تغير على طول ما تبقاش عايز تقرى السؤال حتى وكل اسالتهم تافهة اصلا...ومرة عملت زيك كده اتصلت وسبت بيناتى بعد ما خلونى استنى وقت طويل كان زمانى قيلت فيه اصلا
وبعدين لا اتصلوا ولا نيلوا
بيستغلوا سذاجتنا وغلبنا برده


جوووووووو اون

حنان سعيد يقول...

مدونتك بجد دمها خفيف اووووووي
حاسه انها بتغير مودي خاااالص
وماعرفش تاهت مني وسط المدونات الفتره دي ازاي
بس خلاص هضيفها عندي حالا
بس بجد اهنيك على قوه تحملك فانك تتفرج على القنوات دي
تحياتي لك

م/ الحسيني لزومي يقول...

هذه مدونتك وانت لك مطلق الحريه في اي تعليق تحذفه او تبقيه بدون اعتذار

bos bos يقول...

هههههههههههههههههههههههههه

لا جامدة بجد

ولا الأكل الخفيف اللى أنت جبته فعلا خفيف قووووووى

ههههههههههههههههههههههههه

Soooo يقول...

الف شكر لكل اللي علقوا عالبوست

وربنا يارب يسعدكم دنيا وآخره يارب





سلاموووووووز

بنت مصريه يقول...

هههههههههههههههههههههه
والله ضحكتنى يا سووو
فكرتنى بنفسى وانا بتفرج عالبرامج دى
ببقى شبهك بالظبط ههههههه
بوست عسل يا سووو

Wanda يقول...

:-))))))))))))))))

سوال واحدة جاهلة
مين تامر بية ده؟ نعرف برضة جايز نحتاجة:-)

بقلم: رامى ظاظا يقول...

يا دماغك الأناتيخى

entrümpelung wien يقول...

شكرا على الموضوع
entrümpelung
entrümpelung
entrümpelung wien