الثلاثاء، 25 شوال، 1428 هـ

مراتك .. ولا الوطن ؟؟

قاعد عالقهوة وباتفرج على ماتش اشبيليه وريال مدريد ولا بي ولا علي .. والاقي واحد صاحبي جه وراح قاعد جنبي وبيقوللي .. مراتك .. ولا الوطن؟؟
لقيت نفسي من غير ما افهم اي حاجه بقوللو .. الماتش ده حلو قوي على فكره
لقيته اتدور ناحيتي وبص في عيني نظره جاده وبيقوللي : بقولك .. مراتك ولا الوطن؟؟
قلتله ايه ياعم في ايه مالك ماتروق كده .. ايه الحوار اصلا
حكالي انه كان بيتفرج على برنامج الحقيقه بتاع وائل الابراشي .. وان الحلقه كانت بتتكلم عن دكتور مصري متجوز واحده فلسطينيه بقاله قد خمستاشر سنه .. وانه طلب من الحكومه انها تاخد الجنسيه المصريه باعتبارها ام لأولاد مصريين وبقالها في مصر اكتر من عشرين سنه .. لكن طلبه اترفض .. ونتيجة لده تم ترحيل مراته لاسرائيل او فلسطين المحتله .. ولما اشتاقلها وبعد ماغلب حماره هنا في مصر انه على الاقل يجددلها الاقامه بتاعتها .. قام سافر اسرائيل وقدم طلب على الجنسيه الاسرائيليه عشان يقدر يبقى معاها .. والطلب اتوافق عليه واتعين في مستشفى ووفروله سكن خاص محترم ومرتب محترم والحياه بقت فل معاه .. وحكالي صاحبي انهم في البرنامج كانو عاملين معاه اتصال تليفوني .. وكان الابراشي مستضيف اتنين نازلين فيه شتيمه وتهزيئ عشان خد الجنسيه الاسرائيليه .. وان امه زعلانه منه
وفي الاخر قالوله .. مراتك ولا الوطن ؟؟
.. بصراحه .. لقيت نفسي مش عارف اقول ايه
بس قلت بدل ما اغلب روحي اسأل اللي حوالي
كان معايا عالقهوة تلات شخصيات اعرفهم
عم فتحي .. القهوجي .. وده انا قلت اسأله اخر واحد
وحسن صاحبي وعشرة عمري .. وده متجوز بس على وش طلاق
وهشام .. وده خريج تجاره وشغال دلوقتي في نسخ السيديهات وبيعها بدل مايقعد عاطل
سألت حسن .. مراتك ولا الوطن .. قاللي هي فين مراتي ياعم .. دي خلاص عايزه تتطلق وانا غلبت معاها ومع اهلها .. لكن منها لله امها .. هي اللي خربت بيتي .. دي حتى منعاني اشوف عيالي ياعم .. وشكلي كده هاسيبلها البلد واهج على اي حته عشان ترتاح
!! سألت هشام .. مراتك ولا الوطن .. قاللي بعد لحظة تفكير وصمت .. بس انا مش متجوز
سألت عم فتحي القهوجي وهو بينزل الشيشه لصاحبي اللي حكالي الموضوع .. مراتك ولا الوطن ياعم فتحي ؟؟
بصلي كده وهو مبتسم على مستغرب .. وقاللي حكمه رهيبه
قاللي مراتي طبعا .. على الاقل استحملتني بقالها خمسه وعشرين سنه وواخده بالها منني ومن ولادي
وكفايه ان مراتي بتنام معايا كل يوم .. مش زي الوطن .. بينام معاه غيرنا
-------
جوووووووووووون
.. اشبيليه جابت جون في ريال مدريد
الكوره دي غير الكوره اللي عندنا .. في الوطن
سوووو

هناك 46 تعليقًا:

Rehab Mostafa يقول...

أول تعليق :) ليه الشرف
أنا اتفرجت على الحلقه دي على فكره .... أنا ماليش في السياسه ولا التاريخ ومش بحب أسمع برامج بتتكلم عن الحاجتين دول بس الحلقه دي والكلام استفذني أويي
وبصراحه احتارت جداً برضه... مراتك ولا الوطن .... أنا لاقيت الدكتور ده حارب في 73 وراح اسرائيل فتح مطعم وعايش حياته المشكله انهم لما سألوه السؤال ده قال انا اديت الوطن حقه والمشكله الاكبر انه بيتكلم زي السياسه الصهيونيه بالظبط وبيقول خلاص الحرب خلصت وبقى فيه سلام وزي ماهما قتلوا وأسروا مننا احنا كمان عملنا كده والدنيا عادي أوي عنده .....ا
بصراحه أنا مش عارفه انا لو مكانه كنت هعمل ايه .... ممكن كنت عملت زيك وقلت جوووووووون :D:D
كل اللي انا عارفاه ان اسرائيل فعلاً أعداء لينا لحد دلوقتي وزي ماقالوا ضيوف البرنامج أي استعدادات للحرب بتكون علشانا احنا عارف لما تكون حاطط قدامك عدو وكل شويه تفتكروا وتقول أه أنا هعمل كذا وكذا علشان اخلص عليه أهم هما كده بالظبط

أنا كلامي ملغبط شويه بس علشان عايزه أختصر علشان ماطولش عليك :)

في مثل بس عايزه أقوله ... سألو جحا بلدك فين قلهم اللي فيها مراتي .... جحا ده مش تمام خالص على فكره :D

shahy يقول...

مراتك والا الوطن

دة سؤال ماينفعش معايا اللي ينفع هو
زوجك والا الوطن

بصراحة
اللي اعرفة اني انا مع زوجي في اي بلد وحبي لوطني دة جوايا بس برضة مش لدرجة اسرائيل

انا صحيح هاتعزب شوية في البعد عن بلدي واهلي بس لو مفيش طريقة غير كدة يبقى هاصبر واستحمل


انت عارف فكرتني بفيلم وش اجرام لما ام هنيدي قالتلة:امك والا رحاب ياطة

تحياتي

نورسين يقول...

سوووو العزيز : تعرف انك جيت في وقتك ، لسه امبارح كنت مخنوقة جدا من الزحمة والماصلات والشوارع والمترو اللي زي الزفت واتخنقت لحد ماوصلت الشغل الساعة 7:38 يعني بدري تقريبا ،، بس عشان اوصل في المعاد ده نزلت من البيت 6:10 ومش مشكله المهم اني اتبهدلت ووقفت واتخنقت ،، فعادي مثلا اني اسخط على الوضع شوية
وفي حوار بسيط مع احدى زميلات العمل بتشتكي هي كمان من نفس الموضوع فقولت "بلد زبالة و..... وحاجات كتير كدة زبالة " المهم قاطعتني زميله تانية " انتي اللي زباله " عايشة فيها ليه طيب واتحرقت قوي
في الحقيقة انا مش عارفة قوي ايه علاقة القصى بسؤالك اللي حضرتك مش جاوبت عليه خالص لسة ولا عرفنا رأي سياتك فيه ،، بس أناا كنت عايزة أقول
شوفت الوطن بيخليك تعمل ايه وبعدين يقولك انت ليه عملت كدة ؟؟ او يطلق عليك شويه كلاب ؟؟ من اللي مليين الشوارع عشان بأدبوك أو يعرفوك غلطك

عموما انا مع عم فتحي ،، والموضوع بقى عادي جدا وكفاية هتافات من ناس هم اصل التهافات اللي فيها
أنا بقول بلاش اسخن اكتر من كدة الله يسامحك ،، انا برضه بحب الوطن ،، الوطن اللي واحد سمع عنه قبل مايفهم معناه ككلمة بس يا ريت لو هو يحب ناسه شويه ،،

وبرغم ان الموضوع اللي طرحته المرة دي مش فكاهي خالص إلا اني برضه مسكت نفسي أعلي صوتي وانا بضحك في آخر البوست الرائع جدا ده


إلا قولي بقى صحيح يا عم سوووووو :
مراتك .. ولا الوطن؟؟

تحياتي واحترامي

هناء يقول...

نحن البشر نحب من يعطي و عندما يعجز الوطن عن اعطاءنا ما نريد نبحث عن وطن اخر
العيب في الوطن ولا فينا؟

Doba يقول...

سؤال غريب بصراحة بس على راى عم القهوجى - انا اتجوزت ست مستحملانى 20 سنة وحاولت اجددلها الاقامة او اجيبلها الجنسية وانتو رفضو - هل ادمر اسرة بحالها فى حين ان بلد تانية اه احنا بنكرهها وبنكره طرق تعاملاتهم مديانى فرصة وفتحالى دراعتها وبتقولى احلامك اوامر

ليه بقى متضايقين الناس عليه وبيقولو ازاى يعمل كده - مش هما اللى طردوه هو واهله لو مش هيغار على اهله ويدور على مستقبلهم فى حته تانية ويحافظ عليهم يبقى غير جدير بانه يكون راع جيد

كل الارض ارض الله حتى لو مش عاجباكو مدام بتطردوه هو واهله

انا عاوزة اعرف رايك بصراحة
يهمنى اعرفه

منتظره ردك
تحياتى
هبة

إيمان يقول...

والله يا سوو موضوعك جامد جدااا
من خلال اراء أصدقائنا المدونين لاحظت أن الكل لا يشعر بعطاء الوطن الذى لم يعد يعنى سوى قلة القيمة والمرمطة بصراحة والشعور بالمهانة الانسانية
سواء كان لنا نصيب مما نستشعر فيه

بس تعالى نقلب الوضع بالعكس يعنى لو حد من
أى بلد أخرى بالخارج وطن من اللى بجد
متزوج مصرية وحصل العكس

تفتكر هيقول الوطن ولا زوجتى ويجى بلدنا مصر

وياترى اصلا بلده هتعمل كده مع زوجته
قوانين واجراءات غبية كأنها
تتعامل مع مفردات كيانات غير انسانية

حرام عليك يل سوووووووو قلبت عليا المواجع

وبالحق صحيح زى ما قلت نورسين الوطن ولا مراتك

تحياتى وعميق شكرىىىىىىىىى

MKSARAT SAYED SAAD يقول...

والله حاولت اعلق كتير على البوست
لكن الكلام من اللي هقولوا على قد ما لقيتة بيخنق
فمبقاش قدامي غير حسبي الله ونعم الوكيل

khaled adel يقول...

هو ف الظروف الطبيعية المفروض يبقى الوطن اولى من مراتي او من عيلتي نفسها
بس لما الاقي ان الوطن نفسه مش عايزني ولا عايز مراتي ولا عايز المواطنين كلهم يبقى اكيد مراتي
وسلملي على عم فتحي سلام امانة

منى يقول...

كنت زمان لما اسمع اغنيه وطنيه حتى ولو فرايحى مش عارفه ليه بدمع واحس بشجن غريب
دلوقتى لما بسمع اى حاجه من دى بتنكد واحس بهم وغم وحزن والدمع بيبقى بكى واجرى ادور على حطه اعيط فيها من غير محد يشوفنى

كفايه كده لا ايه؟

dead_girl يقول...

فل عليك بجد الموضوع قشطه الموز وسخريه جامده اوووووووي وفي الجووووون والحلقه دي انا اختي حكتلي عليها فعلا وقالتلي ان الراجل ياعين امه كان بيتبهدل في التليفون بس هو كان لااجل وبيعرف يرد كويس وانه مرتاح لان الناس هناك مقدراه00بس انت عارف اي حد بيتعامل مع الامريكان او الاسرائيلين حتي لو من ورا الازاز يبقي خاين وعميل رغم ان ليا موقف بس اعتقد انهم لو كانوا قالولي جوزك ولا الوطن كنت هاختار نفسي لاده ولاده 0000

اما بقي عن صاحبك المتزوج واللي علي وش طلاق والله اقوله ربنا يجعلها اخر الاحزان واتفرج علي فيلم حماتي قنبله ذريه 000وصاحبك اللي بيشتغل علشان مايبقاش عاطل قوله يتفرج علي اعلان طارق نور لحمله الالف مصنع وهو هايعرف انه كسيييييييييب اصل لامؤخذه البلد بتتحرك هههههه
والقهوجي بجد طلع مصحصح وفل عليه
وانتهي الماتش 4_1
لصالح الحكم 0

drZimo يقول...

mesh 3aref ya soo,law elso2al "meratak wala elwatan (elwatan elseyasy Egypt)" akeid tab3an hatkon meraty a7san men elwatan,w ay wa7ed men es7aby 3ndy a7san men Egypt 7ta enta ya soo ;)

ana bgd bakrah masr 3shan de mesh masr ely e7na darasnaha fel kotob,e7na shofna men elbalad de kteeeeeeeeer awy ledaraget enena kerehna torabha w neilha w 7kometha.mein feina mesh 3awez yeseib masr w yesafer bara madam hay7afez 3la deino?

ama law elso2al "meratak wala elwatan (el2oma el2slameya)" akeid hatkon el2gaba mesh meraty.

Eman Eltaher يقول...

ههههههههههههههههههه
و الله انت تحفة بجد
الموضوع فعلا جامد

هو المصريين بيتعاملوا حلو الا ف بلدهم !!!!!! حاجة غريبة
طبعا مراته .. القهوجى ده و الله جدع
حلوة اوى حكاية الكورة دى مش زى الكورة اللى ف الوطن

فعلا انا لما بتفرج على اى كورة مختلفة تماما عن الفريق المصرى مع احترامى الشديد ليه

ياللا ده مش موضوعنا
.
.
طب أنا هسألك سؤال ؟؟؟

مراتك و لا الوطن ؟؟؟؟؟؟؟؟؟؟!!!!!!!!!

الباحث عن الحقيقة يقول...

ايه يا عم الدماغ دى
والله هوبمنطق عم القهوجى ده هقولك
الوطن رفض ينام معاه .. وطن تانى وافق وقبل
يبقى نقوله مبروك لقى حته تلمه هو وعياله ومراته
رغم صحيح انه مكنش هيغلب فى رسوم تجديد اقامتها لانه دكتور
انما المبدأ الانسانى نفسه هنا هو محل الاعتبار
عشرين سنه متجوزه مصرى وعايشه فى مصر واولادها مصريين وهى اصلا فلسطينية محتله يعنى مش يهوديه وكونها تحمل الجنسية الاسرائيلية فهذا غصب عنها لان مفيش فلسطينى محتل هيقبل هذه المهانة إلا علشان يقدر يعيش
الرجل ده فعلا ادى الوطن حقه
وبدل ما نشتمه المفروض نحزن على وضعه وحالته

Nadosha يقول...

الموضوع يحير بس انا شايف الرجال له وجه نظر هو راح للوطن عشان ياخد حقه و الوطن معبرهوش منلومش عليه بقى لما عدونا يعبروا يديلوا حقه تالت و متلت اصل مش حنديلوه مخدرات و بعدين نسال هو ليه بقى مدمن
الناس حتقول مش لدرجة اسرائيل بس هو دا اسلوبهم يدوك كل حاجة فى الوقت اللي انت مش عارف تاخد ابسط حقوق في بلدك و على رايك
جووووووووووووووووووووون
اشبيليه جابت جون في ريال مدريد
الكوره دي غير الكوره اللي عندنا في الوطن

Hannoda يقول...

عارف

لو كانت البلد أي حتة تانية غير اسرائيل

ولو كان البيت والشغل بدافع اني انسان مش بدافع سرق الهوية

كان زماني قلتلك زوجي قبل وطني

أصل أولويات اي انسان هي اسرته
الزوج و الأولاد

لكن لما تبقى اسرائيل.. صعبة قوي
لما حاحس في كل يوم بطم يشبه الخيانة
و لما ولادي حايحسوا انهم اترموا في حضن عدوهم

ساعتها أقولك لأ
مش يبيع مراته
لكن يوكل أمره لله و يعافر انه يرجعها أو حتى يدوروا على أي غربة تانية غير اسرائيل يعيشوا فيها من غير مرارة الفراق
ولا مرارة الخيانة

وأنا حد على البر.. بفكر من بعيد
الله أعلم اللي جوة الدايرة حايعمل ايه

بس حازعل من نفسي أوي لو كنت جوة الدايرة و مافكرتش كده زي ما بقول دلوقت

غير معرف يقول...

lma ykon elwtn mtl3 3enk..we mratk mtl3a 3en ahlk..yb2a la mratk wla elwtn ysthlo....wla eh ya sooo cooool?!!!

غير معرف يقول...

we brdo momken ykon elragel da 3ml zay go7a lma a2olo bldk eh ya go7a alhom blde bld mraty wla eeeeeeeeeeeh?????!!!!!!!!!

Abeer يقول...

متقولش ايه ادتنا مصر .. قول ادينا ايه لمصر

بصصراحة السؤال صعب
خاصة في الظروف المنيلة اللي احنا عايشين فيها

بس بردو ..
هو الراجل مالوش اي عذر بصراحة في اللي عمله
بيشتغل طبيب .. يعني اكيد كان بياخد مقابل ايا كان
ايه يعني مراته ماخدتش الجنسية
عايز يسافر معاها .. ما يروح معاها غزة ولا الضفة
ايه اللي يوديه اسرائيل يقدم على طلب الجنسية
تحديدا اسرائيل
لان الموضوع مش موضوع ما الحكومات بتطبع وخلاص عايشين في سلام وميت فل و 14

بصراحة انا متحاملة عليه جدا جداااا
لما الطبيب بيعمل كدا
امال الشباب العاطل اللي مش لاقيين ياكلو يعملو ايه

حبة حاجات (ايمان) يقول...

هههههههههه
حلو اوى البوست دا بجد

وفعلا حاجه تحير
بس من راىى انا ان لكل حاله قاعده

يعنى ماينفعش نخلى حاجه خاصه نخليها عامه
وبجد انا احترمت اوى القهوجى
بلغه تحياتى

وكمان اكيد تحياتى ليك لانك انت اللى سالته

Ahmed Mubarak يقول...

سوؤال بس..كنت عايز أعرف رد القهوجي لو مراتوة مطلعه عينوة؟؟
:D

3ala asm masr يقول...

سووووووو
بوست جامد جدا
طيب لو الراجل قال ابعد عن مراتى هيقدر يبعد عن ولاده؟
مهو اصل مكانهم الطبيعى هيبقى مع امهم مش معاه
انا بصراحه معاه
الراجل بيقول انا حاربت فى 73
يعنى حتى لو مش هيدوا الجنسيه لواحد عادى
يعملوا واجب مع الراجل اللى شال سلاح ده
وياريت بقى تحافظوا على ولادكم بدل ما يترموا فى حضن اعداكم وساعتها هنسال انتمائك لمين للوطن واللى للبلد اللى عملك كل حاجه وفتحلك درعاته
تحياتى

3ala asm masr يقول...

اه نسيت اقولك حاجه
طول ما البلد دى بتعامل ولادها كده
الناس التانيه هتفضل طول عمرها تجيب اجوان
وياترى الجون اللى جى ايه

RAMA يقول...

أموت انا في الرسايل الضمنية... بس على فكرة عمي متزوج من فلسطينية وأخدت الجنسية عادي أول لما تزوجت وإحنا من أسر مصر المتوسطة علشان مش تقول الموضوع في واسطة

على فكرة أنا قبل لما أقرأ الموضوع قولت أكيد حيقول الوطن اصل معظم الرجالة في مصر مبهدلين زوجاتهم ومقطعين فروتهم بنكت تودي في داهية والله الراجل طلع عنده شوية من الأحمر

ههههههههههههه

يلا سلامات يا سو

RAMA يقول...

معلش نسيت أقولك حاجة لو مراتة متجوزها بقالة عشرين سنة ... فوطنة عاش في طول عمره

انا بكلمك عن مصر يا رأفت .. مصر

brokenheart يقول...

سو يا سو حبيبي حبسوه
افتكرت الاغنية دى لما قريت البلوجاية بتاعة مراتك وللا الوطن ... ابعد يابنى عن الكلام فى السياسة احسن يتعمل فيك زى ما الاغنية ما بتقول ... بقولك ايه يا سو المسالة مش مسالة ايه اديتنا مصر ولا ايه حاندى مصر ... المسالة مسالة انتماء ودين مابقوش موجودين اصلا ... لو الاتنين دول موجودين بالاضافة الى الديمقراطية الاسلامية اللى بنقراها فى كتب التاريخ حاتلاقى البلد دى محدش بيخرج منها بل على العكس حاندور على ناس برة البلد تيجي تعمر فى البلد زى ما اهل بلدنا بيخرجوا برة البلد للبلاد التانية علشان يقلبوا عيشهم
انا باحلم بيوم يبقى النسل فيه فى مصر زى ما هو فى دول اوروبا نقص فى الانتاج البشرى وبنعمل اعلانات فى الدول الاخرى علشان عاوزين بنى ادمين يشتغلوا ... بس تقول ايه بقى احلام العصافير .... وحافضل طول عمرى عصفور محلق فى سماء الحلم وزى ما قال سعيد صالح فى مدرسة المشاغبين لما قطع البلوزة لابلة عفت .... قلة ادب

إنـســـانـة يقول...

هههههههههههههههههه

هو صحيح فين الوطن ده؟؟؟

osama يقول...

يعني اسرائيل وفرت ليه كل شيء والوطن كرهه في حياته ...
البوست مكتوب بلغة سلسلة ومرنة ... ،،، والحوار فيه ممتع
لكن بغض النظر عن ما قاله الدكتور ... السبب في الاستبداد والكبت المباركي اللي يخلي انسان يهج من بلده عشان قمل الدولة مش عايز يوافق على جوازه من مراته عفوا اعطاءها جواز مصري الجنسية

لكن مراته اهم مليون مرة من وطن كذاب افاق مكبوت ... حيث النظام هو الدولة مصر مبارك يا سيدي ... وليس مصر الوطن


دمتم بكل ود..
خالص تحياتي

Soooo يقول...

Rehab Mostafa

المشكله يارحاب مش في ان اسرائيل عدو ولا حبيب
المشكله في ان كل الاعمال السياسيه والتجاريه بتقول ان الحياه مابيننا وبينهم فل .. ولما اي حد بيستجيب لده وبيروح حتى لاسرائيل في زياره او شغلانه تيك اواي .. بيرجع ويتحط تحت المجهر من امن الدوله ومن المخابرات بطريقه رهيبه
والمشكله التانيه بجد بقى .. هو ليه بيحصل فينا كل ده من ارتفاع في الاسعار وعدم تقديم اي خدمات كويسه على المستويات كلها من تعليمي الى خدمات طبيه وليه بيتم التفرقه في التعاملات مابيننا بناءا على المبدأ الرهيب .. انت عارف بتكلم مين .. ليه كل ده .. هو احنا اسرائيلين والعالم المسنوده هم اللي مصريين مثلا ؟؟؟
---------------
shahy

منوراني والله
وبعدين انا عايزك تسألي ابو الدراويش كده مابينك وبينه وقوليله انا ولا مصر .. شوفي رده هيكون ايه
فهمتي حاجه؟؟
---------------
نورسين

عارفه يا نورسين .. انا والله العظيم ماضد الزحمه ولا البطاله ولا ارتفاع الاسعار ولا السرقه ولا اي حاجه سلبيه بتحصل في البلد
بس اللي يغيظك بجد بجد بجد .. ويخليكي تلعني سلسفيل البلد باللي فيها بمافيهم نلعن نفسنا .. انك تيجي في يوم وتفتحي جرنان من جرايد الحزب الحاكم تلاقي اول حاجه مكتوبه وبالفونط العريض
توفير ميه وخمسين مليون وظيفه
ارتفاع مستوى معيشة الفرد بناءا على النجاح الباهر في اقتصاديات البلد
توفير خمسمية مليار شقه باسعار رمزيه
!!!!!!!
نفس الحوار في التلفزيون
يستضيفو مش عارف مين في القناة الاولى ولا التانيه في اي برنامج عبيط تلاقي المذيع بيكلم الضيف والضيف فاشخ ضبه ومبسوط بسنانه وبيقوللك احنا لا نستطيع ان ننكر ان مصر في ازهى عصور الرخاء والنماء الاقتصادي والديموقراطيه
!!!!!!!
هو احنا عايشين في دوله تانيه ياجدعان؟؟؟؟
إجابتي على سؤالك ..
هي .. بما اني مش متجوز وشكلي مش هتجوز .. يبقى ادورلي على اي وطن .. يساعدني اكون نفسي عشان اتجوز
فهمتي حاجه؟؟؟؟
---------------
هناء

طبيعي اننا فينا اخطاء .. وطبيعي اننا بنطالب القائمين في الحكومه اننا نعيش احسن من المستوى اللي عايشين فيه
ده مش جحود في حق الوطن ولا تقليل منه
بس لما نلاقي ان طلباتنا في ارتفاع مستوى معيشة الفرد بما يكفل ليه الحياه في مجتمع نضيف .. لما نلاقي اننا بننفخ في قربه مقطوعه
يبقى اكيد هنتذمر وهنتمرد .. وهنشتكي
وللا ايه؟؟؟؟
----------------
Doba

منوراني والله ياهبه .. وبافرح بجد لما الاقي حد منكم انتو الاتنين انتي او مدام شاهي .. منورني في موضوع وبيتكلم معايا وبيقول رأيه
بصي بقى ياستي
انا ضد الهجره لاسرائيل اولا واخيرا
مش عشان دول اعداء ولا محتلين دوله عربيه ولا حاجه .. بس لأن اسرائيل دوله قائمه على الدين ومن تعاليم اليهوديه ان اي فرد بيحمل اي ديانه غير اليهوديه يبقى في نظرهم ااقل من الكلب .. حتى ولو حاولو وقالو غير كده .. وبعدين اصلا اصلا لا يجوز قيام الدول على الدين وبفرضه غصبا .. بدليل ان الدوله الاسلاميه لما توسعت زمان وامتدت من الصين للاندلس .. ماكانتش قائمه على سيادة الدين قد ما كانت قائمه على سيادة العدل في الحكم دون تفريق بين اي شخص وبين اي دين .. وده في حد ذاته اعجاز اسلامي يحسب لنا كمسلمين
اما مراتي .. فأنا زي مارديت على نورسين .. مش متجوز ولو فضلت هنا في مصر يبقى مش هتجوز .. يبقى الاحسنلي اهاجر لأي وطن اكون نفسي والاقي اللي يقدرني كمواطن عايز يعيش في مستوى معقول متوازن مع احتياجاتي الاساسيه .. وبعدها ابقى افكر في الجواز


سلامووووووووووووز

Soooo يقول...

ايمان

لا طبعا مش هيحصل الموقف بالعكس لسبب بسيط جدا
ان المصري في اي مكان بيتعامل احسن من هنا في مصر .. بشرط ان المكان اللي هو فيه .. مايكونش دوله خليجيه
يعني ماينفعش واحد سعودي ولا كويتي يتجوز واحده مصريه ويحاول يديلها الجنسيه يقوم ماينفعش يروح جاي هنا على مصر ومقدم انه عايز الجنسيه
بس هيعمل حاجه واحده .. هيطلق مراته ويرميها رمية الكلاب وياخد عياله بقوة القانون في بلده وتيجي الغلبانه هنا في مصر تعيط .. وطبعا ولا حد من المسئولين هيعبرها
انما لو كانت متجوزه واحد اوروبي انشالله حتى لو كان ايه .. عمر ماحاجه من ده هتحصل
فهمتي حاجه ؟؟؟
------------
MKSARAT SAYED SAAD

عندك حق والله يابو السيد
حسبنا الله ونعم الوكيل
حسبنا الله ونعم الوكيل
حسبنا الله ونعم الوكيل
------------
khaled adel

عم فتحي بيبلغك اشد السلاااام وبيقولك لااازم تيجي تشرب حاجه عالقهوة يا امتن هيزعل ويطلق مراته
------------
منى

وتعيطي ليه ياستي
غني ياستي لمصر زي مانتي عايزه
بس غني لمصر .. مصر النيل والناس البسيطه واللمه والأهل والصحاب وقت الشده ووقت الفرح
غني براحتك واضحكي .. بس لمصر
مش للمصرين الحاكمين
فاهمه حاجه؟؟؟
-------------
dead_girl

ده انتي دماغ دماااغ
بس تصدقي ان منطقك في تفضيل الذات عن الآخرين ده صح في الظروف اللي احنا فيها
بس اعتقد انه وعلى كلام الناس المتجوزه واللي بيحبو بعض وبتاع .. بيقولو ان الحب تضحيه
يبقى حبيني واتجوزيني .. وانتحري

:P

سلامووووووووووز

Soooo يقول...

drZimo

حتى انا يا زيمو ؟؟؟
تصدق شكلك طلعت جدع وابن بلد وبتحب صحابك .. وانا اللي فاكرك جاسوس من خماشر مايو

منورني يازيمو .. والف لا بأس عليك من التسمم ووجع البطن
ملحوظه
تقريبا التلج اللي بتعملوه .. طلع مغشوش .. وانت شربت عناب من عم فتحي .. وحطلك من التلج بتاعكم
------------
Eman Eltaher

منوراني يابنت المعادي والناس الجدعان المعداويه الأحرار
فعلا .. كل حاجه عندنا مختلفه عن اللي زيها في اي دوله تانيه
ماعدا انها زيها في الاسم
نفس المقارنه بين الدنيا والجنه .. التشابه في الاسم فقط

واجابتي على سؤالك ياستي .. قلتها في ردي على نورسين وهبه .. وهقولهالك عشان ماتقوليش اني بكروت
انا مش متجوز .. وشكلي مش هتجوز
يبقى الاحسنلي ادور على اي وطن يكفلني بحياه كريمه تناسب انسانيتي .. وبعدين افكر في الجواز والخلفه والحوارات دي
-----------
الباحث عن الحقيقه

منورني .. ده اولا
ثانيا .. هو مش مقدرش يتصرف ويدفعلها مصاريف تجديد الاقامه .. اللي اتقال انها اترحلت اصلا بطريقه غير انسانيه .. وهو ده اللي ضايقه
انها ماتمش التعامل معاها بطريقه انسانيه
ثالثا .. ماتبقاش تغيب كده ياراجل وخلينا نشوفك وتنورني هنا دايما
-----------
Nadosha

الله ينور عليكي
فعلا مانديلوش مخدرات وبعدين نقول هو ليه بقى مدمن
مانديلوش سلاح ونقول هو ليه داير يقتل في الناس
مانخليهوش يحس انه متهان في بلده وبعدين نقول عليه ساخط على المجتمع

قريتي مابين سطور كلامي يا ندى
منوراني
-----------
Hannoda

انا معاكي مليون في الميه في كل كلمة قولتيها والله
وانا عن نفسي لو اتحطيت في ظرف زي ده .. مش هروح اسرائيل خالص
هاخدها ونطلع على اي دوله اوروبيه او نروح كندا او استراليا او جنوب افريقيا
في النقطه دي .. فعلا معاكي حق
بس على رأي المثل .. اللي ايده في الميه .. مش زي اللي ايده في شوربة العدس



سلاموووووووز

Soooo يقول...

غير معرف

هو لو فعلا وطنه مطلع عينه ومراته مطلعه عين اهله
يبقى هو يطلع باسبور .. وتأشيرة للآخره .. وينتحر احسن
---------
Abeer

يا عبير الموضوع مش زي مانتي فاهمه
دي اترحلت على اسرائيل عشان اقامتها خلصت
يعني ماخدهاش من ايدها وقالها نروح اسرائيل احسن
وبعدين هي من يهود تمانيه واربعين .. يعني فلسطينه ومعاها الجنسيه الاسرائيليه .. ولعلمك مافيش حد فلسطيني اصلا معاه جنسيه فلسطينيه .. على ما اعتقد يعني

انا معاكي انه غلط والاحسنلو انه كان ياخدها ويهاجرو على اي دوله تانيه أأمن وأفضل
بس هو كل واحد وليه ظروفه
----------
ايمان وحاجاتها

منوراني ياستي
وياريتك تعتبري مدونتي زي مدونتك تمام وتشرفيني بتعليقاتك وردودك على كل موضوع اكتبه
----------
Ahmed Mubarak

لعلمك يا ابو حميد
لو الراجل بجد مريح بيته وعياله وملبيلهم طلباتهم في حدود امكانياته
مراته هتشيله من عالارض شيل
بس بيني وبينك .. مش بنات اليومين دول
بنات اليومين دول عايزين كل حاجه
كل حاجه
ولو ماحصلش
يبقى خد على قفاك ياريس

منورني ياباشا
----------
3ala asm masr

يابنتي اصلا انتي مش فاهمه حاجه
خااااالص
علمك علمك علمك
حرب تلاته وسبعين ماحدش حارب فيها غير سلاح الطيران بقيادة الرئيس محمد حسني مبارك
يعني مافيش حد حاااااارب غيره اصلا
وكل اللي بيقولو احنا حاربنا كدابين
ماهو ياهم اللي كدابين .. يانا وانتي هنروح في داهيه
---------
RAMA

والله يامروى انا ماعرفش تفاصيل الموضوع بصراحه
كل اللي الراجل قالو انه كان بيقدملها عشان تاخد الجنسيه وكان طلبه بيترفض
وبعدين خلصت اقامتها وتم ترحيلها بطريقه غير ادميه
حاول يعمل المستحيل مانفعش انها ترجع
قام واخد بعضه وراحلها
وملحوظه اخيره
يعني ايه كلمة وطن من وجهة نظرك .. هل هو المكان اللي الواحد بينهان فيه وبينسرق فيه وبينضرب فيه وبيتنصب عليه فيه وبينشتم فيه
لو هو ده الوطن
يبقى جااااااااي منك ياوطن
ويا ويلكوم بيكي يا ماي مراتي
---------
brokenheart

هاني رزق .. انت فين ياعم اختفيت كده مره واحده
قلت تلاقيك اتجوزت ولا حاجه
وبعدين انا ياعم ولا جبت سيرة سياسه ولا بتاع
حد قال اني اتكلمت في السياسه
انا اتكلمت في الكوره .. ماتش اشبيليه وريال مدريد
مش قلت في الاخر جووووووون

كفاية اللي حصللي من السياسه ..
انا كبرت دلوقتي ومابقتش استحمل ياعم
---------
إنـســـانـة

الوطن ده ياستي .. تاني شارع بعد عم سيد البقال وانتي ماشيه رايحه لعم اسماعيل الخضري
بعد قهوة المهويه
ده بيتنا على فكره
هههههههههههه
---------
osama

منورني ياباشا وياريت تعتبر مدونتي هي مدونتك تمام وتقول كل اللي عايزه
بس الله يكرمك
احنا داخلين على شتا والبلاط ساقع في الزنازين ياعم
واخوك عنده روماتيزم واستبحس في الجنب اليمين
يعني كبرنا يا اوس
نورتني ياريس




سلامووووووووووووووز

rainbow يقول...

ازيك يا سوووووووووووو
متأخرة اوى معلشى الاكتئاب المصراوى بياكل فى دماغى مع الزهايمر لما خلاص بفكر اعمل باسبور واروح اســ... احم احم .. ما فيش داعى افسر فى وشك

يا عمنا وجعتلى قلبى بالبوست ده وفضلت ادور على اغنية منير ( قلب الوطن مجروح ) ولما سمعتها قلت اهديهالك من برنامج على ناصية الوطن بس مش تانى حارة يمين لأ اول تالت تانى زقاق شمال هتلاقينى مستنياك ونغنى سوا ( ينسانى دراعى اليمين ينسانى دراعى الشمال ينسانى ضى العين لو نسيت القدس ) ... وصلت .. يا رب تكون وصلت المفروض اننا على خط واحد .. خط مش كارت .. خط منير

علمك علمك علمك
احنا جدعان اوى حتى لو اتسحلنا برضه هنفضل قاعدين ضد الابادة الجماعية دى

عمق اعماق تحياتى
هدى

Ahmed Al-Sabbagh يقول...

عادي يا بنى اسألك براحتك

مراتك ولا الوطن
مزتك ولا الوطن
مصلحتك ولا الوطن
راحتك ولا الوطن
....

كل الحاجات دى لما تسألها هنقعد نفكر شوية قبل ما نجاوب

مش لأننا مش وطنين لا سمح الله

لأ

لأن يعنى ايه كلمة وطن؟

اممم

اقولك ادخل هنا واستنى شوية :يمكن تعرف الاجابة

http://qawemwlayehmek.blogspot.com/


أحمد الصباغ

ra7eel يقول...

فرق كبير بين موقف الحكومة المصرية وموقف حكومة اسرائيل
طيب هى الحكومه المصريه كانت هتخسر ايه لو ادت لمراته الجنسية المصريه ؟
الحكومة هى اللى وصلتوا انه يعمل كده
مراته وولاده يسبهم ازاى؟
مراته طبعا
هى الناس زعلانه ليه
اللى ايده فى الميه مش زى اللى ايده فى النار
تحياتى سووووووووووووو

Salwa يقول...

آدي آخرة اللي يتجوز من غير المصريه
مالها المصريه
أهو كان زمانه آعد في بلد وميه ميه

نتكلم جد
إن جيت للحق إسرائيل هي إسرائيل

مافي راحه نفسيه حتى في إسمها
والأمر بسيط
أي حد عايز يعمل أي حاجه
ممكن يخلق لنفسه 1000 مبرر
يعني ممكن نبرر بنفس الطريقه للشباب اللي بيتزوجوا إسرائيليات وبيسافروا يعيشوا في إسرائيل
ماهو هناك الشغل والفلوس
وكله تمام
ده دكتور وكان ممكن بكل بساطه
يسافر لزوجته ويأخذها ويذهب لأي بلد آخر
ويعيشوا هناك على ما تفرج
بس أقول إيه
مصريتنا وطنيتنا حماها الله

تحيااااتي
قصدي سلاااااااااااامووووووووووووز

rainbow يقول...

سوووووووووووو
الا هو الواحد لما يعوز يبعتلك حاجة يلاقى ايميلك فين ؟
والا خايف من اللهم احفظنا
والا مش عايز حد يزعجك
والا ايه بالظبط نحب نفهم !! ممكن ؟

متشكرين على الشوية الصغيرين دول من وقتك

سلام
هدى

سهر الليالى يقول...

بوست رائع جدا
وحكمه الراجل دة فعلا جامدة جدا
بصراحه هى حيرة
انا صحيح مليش فى السياسه والكلام دة خالص عشان مش ناقصة حرقة دم كفايا العيشه الحمد لله
بس هقولك حاجة واحدة صحيح فكرة انو يروح هناك ويعيش حياته تمام مش مقبولة اوى لانهم فى الاخر يهود
بس بجد احنا اللى عاملنا فيه كدة قصدى بلدنا العزيزة
انا مش فاهمه يعنى ايه المشكلة لما يدى الجنسية لأم الاولاد يعنى هى هتعملهم ايه ولا حتخس عليهم فى ايه
دى حاجة تحرق الدم

تحياتى ليك ولاسلوبك الرائع

سى السيد يقول...

عمى وعم عيالى
بص ياصاحبى
انت لو جيت لحق لادى ولا دى
والوطن وزى مقال القهوجى مع غيرنا وزياده على كده مطلع روحنا
ومراتى اللى لسه مجتش
عشان انول رضاها
هيطلع روح اهلى
بس مرحش اسرائيل
يعنى البلاد كتير
لبنان اروبا
وكده يبقى مش مجوز لانه خلاص
بوست حكايه ياصاحبى
انت نهايه
انت والقهوجى
وحسن
وسلملى على هشام

ana ga3an يقول...

مراتي بلا ادني تردد
بل لو ذهبت الي جهنم الحمرا لذهبت خلفها

يكفي انها المخلوق الوحيد بعد امي اللي مستحمل قرفي و قرف اللي جابوني

حقيقي اسلوبك في السرد جميل
ان شاء الله اكون زائر دائم عندك

رئيس جمهوريه نفسى يقول...

عارف يا سو اقسم بالله العظيم قاعد قدام البلوج بتاعى عايز اكتب حاجه ومش عارف
والى مكمل عليه هزيمه الاهلى بسبب العرجون ربنا يسامحه
بصى يا باشا زمان اتسال جحا سوال وقالوا فين بلدك يا جحا قال الى فيه مراتى
بص يا صحبى الراجل عمل الى عليه تالت ومتل حارب علشان البلد وادها كل حاجه قانونا مراته ليها الحق فى الجنسيه ومستوفيه الشروط وعشره على عشره يا عم بس هو مشكلته انه متجوز وحده محترمه لو راقصه كانت خدت الجنسيه من زمان
ليه هو ده بس الى مستغربين عليه ما اخر احصائيه بتقول انى فى 20000 الف مصرى فى اسرائيل وواخدين الجنسيه كمان ومتجوزين وبيشتغلو والحياه بئيس يا مان
نسال بعض سؤال يا باشا لو اختار البلد حتديلو ايه مش هى دى البلد الى رحلت مراته هو راح جنب مراته واشتغل وعاش وبيكسب
سوال تانى هو مراته عربيه و اختارت مصر تعال يا سو شوف فى الغردقه ولا الاقصر الشباب بيدور على وحده قد امه علشان يتجوزها ويسافر معاها تضبطهفى بلدها جنسيه وشغل وعيشه
يا سو البلد باعتنا من زمان حنشتريها احنا ليها
معلش والنبى هو اشبليه وريال مدريد خلص كام كام علشان مش بتفرج على ماتشات ولا بقرى جرائد فى الانعزال بتاعى غير للاهلى

Soooo يقول...

rainbow

علمك علمك علمك .. انا باعزك قوي وكتاب الله

وبعدين خدي هنا .. ايه هو اللي عايزه تعملي بازابورت وتسافري .. اوعي تكوني رايحه أسـ .. أسيـوط يعني
مش انتي بتقصي الكلا .. كلام يعني

وعلى فكره .. انا اكتشفت ان خمسه وتسعين في الميه من اللي بيسمعو منير دماااااغ قوي
في الجد تلاقيهم جد .. وساعة العهزار تلاقيهم قالبينها

ملحوظه:
لقد بعثت لكي بايميل في الايميل الذي تضعينه في البروفيل الخاص بكي
هذا وستكون كلمة السر هي كتكوت غريق في المحيط الاطلسي

ايه المعاصر بتاع العربي اللي انا وقعت فيه ده؟؟؟
----------
Ahmed Al-Sabbagh

نورتني يابو حميد والله
وشرفنني تعليقك وكلامك
وياريتك تعتبر مدونتي هي مدونتك تماااام
وجاري تفحص اللينك .. وجاري ايضا التفحيص والتمحيص لمدونتك .. واللي شكلها حلوة يا باشا
----------
ra7eel

اي والله ياساره
اللي ايده في الميه .. خير من عشره عالشجره
نورتيني وشرفتيني بتعليقك
----------
Salwa

ياسلوى جواز مصريات ايه بس
البنت المصريه دلوقتي بقت هي واهلها عايزين يسلخو الشاب اللي متقدم
مهر مش عارف كام
وشبكه زي بتاعة بنت خالتها اللي متجوزه مهندس بترول في دبي بقاله عشرين سنه
وفرح مش عارف فين
وشقة سبع اوض
وتكون الشقه قريبه من بيت اهلها عشان اهلها يطبو عليها البيت كل يومين تلاته وامها تتدخل في ادق تفاصيل الحياه
وبعد كل ده .. يكتب القايمه باسمها
؟؟؟؟؟؟
الحق بقى .. اتجوز اسرائيليه ولا ماتجوزش خالص احسنلي واكرملي كبني آدم
هتقوليلي وطن واهل ومصريين وبتاع .. هقولك مافيش حد فينا طايق نفسه عشان يطيق غيره اصلا
----------
سهر الليالى

سعيد بتشريفك لمدونتي ويارب تعجبك وتعجبك مواضيعي وياريت تعتبري مدونتي هي مدونتك تمام وتشرفيني بتعليقاتك دايما
بس على فكره .. انا لما اتكلمت ماكنتش اقصد اتكلم عن السياسه وبتاع .. انا عن نقسي زهقت كلام في السياسه ووصلت لمرحلة اني دلوقتي مابقتش طايق اي حرف من حروفها
بس انا اتكلمت في منطق استغربته وشدني

مش اكتر
-----------
سى السيد

نورتني يا مثال الرجوله في كل عصر واوان والله
وفعلا كلامك صح
المفروض انه كان ياخد مراته ويروح على اي حته تانيه غير اسرائيل
بس ماتعرفش ايه ظروفه يا صاحبي
واللي ايده في الميه .. احسن من عشره باليد ولا حوجه لحد يعني
----------
ana ga3an

نورتني ياباشا والله وشرفني تعليقك على الموضوع وارجو انك تعتبر مدونتي هي مدونتك تمااااام

وعلى فكره ياباشا .. مش انت لوحدك اللي جعان وكتاب الله
هات حته بقى وخليك جرع
----------
رئيس جمهوريه نفسى

ياعم ولا تنكد روحك ولا بتاع
الاهلي كبير ياعم من قبل البطوله ومن قبل الماتش
ومش ماتش ياعم ولا حكم اللي يخلينا نخنق على روحنا
وبعدين اساسا اساسا كنا هنكسب ازاي والمقصورة كانت منوره باللي فيها .. النحس ورانا ياباشا طول ماعهم مشرفين

اما بالنسبه لماتش اشبيليه وريال مدريد فمش عارف خلص كام .. بس انا قمت واشبيليه كانت جايبه جونين .. وقمت روحت البيت بافكر في اجابه للسؤال اللي قلته في الموضوع
مراتك وامها وقرف اهلها .. ولا البلد بناسها وحكومتها وريسها .. والاهلي



سلامووووووز

Salwa يقول...

إيه يا عم سووووو قلبتها جد كده ليه
كل ده بيحصل من جواز المصريه
بلاش يا سيدي
إتجوز من النوبه ولا السويس ولا تزعل
وبعدين المسأله
مش وطن وأهل ومصريين
أنا قلت لك إن الإنسان ممكن يعمل اللي هو عايزه ويخلق لنفسه 1000 مبرر
علشان يقنع نفسه إنه صح
المسأله
إنك تعمل اللي يرضي ضميرك وربك
فهل هتكون مرتاح في إسرائيل
صحيح في فلوس وكله تمام
بس هتكون مرتاح ؟؟
هتكون مرتاح وإنت بتأكل أحلى أكل وعايش أحلى عيشه .. بفلوس ناس بتدبح في خلق الله
خلاص يعني .. خلصت البلاد ولم يبقى سوى إسرائيل
ملجأ وملاذ

وبعدين إنت بتوزن كل المتزوجين في كفه واحده ليه
في يا سووووو ناس محترمه
مش كل الناس زي بعض
واللي متأكده منه إن كل واحد بيأخذ حسب نيته
عندي بوست في تأملات قلب لو مكنتش مريت عليه إبقى شرفني بالمرور
هو طويل حبتين
زي ما أنا طولت الوقتي
بس عايزه أقولك سيبها على الله
هتقولي ما انا سايبها على الله أمال سايبها على مين
هقولك
طيب لزمه جملتك دي إيه
مافيش حد فينا طايق نفسه عشان يطيق غيره اصلا
وحد الله كده .. عارفه أنا ان روح السخريه اللي في مواضيعك دي جواها شئ تاني
عفوا والله على كلامي ده
بس عايزه أقولك إنك
وأنا وكل الناس
لو سابوها على الله بجد بس يعملوا اللي عليهم
ستجد الحلول تأتي من حيث لا تدري
سلام أخي الكريم
وعفوا مرة أخرى ع الإطاله

Salwa يقول...

نسيت أقولك إسم البوست لو حبيت تمر
اسمه
نصفك الآخر

Desert cat يقول...

هى دى الدول اللى بتقدر الناس بجد وتعرف تستفيد من خبراتها
مش احنا طفشنا علمائنا وبنسجن شبابنا
لنا الله

مشمش يقول...

المشكلة الي بتتكلمو فيها بقت عند ناس كتير موضوع تافة مينفعش نتكلم فية وهو الوطن والي حسسني كدة اني شفت برنامج مرة في مارينا مش فاكرة اسمة وكان سؤال عابر كدة هو الوطن بيمثلك اية والمزيعة لفت علي كل مصري في مارينا وسالتة وما ادراك ما مارينا والي دهشني ردود الشباب منهم الي قال مش عارف اصلي مبقعدش فيها كتير والي قال دة كان زمان اية السؤال القديم دة والي قال عادي يعني مش عارف والي قالت بلدي الي فيها حريتي والي قال لا مبحبهاش والي ضحك اوي هوة واصحابة وقال دة وقتة السؤال دة والله العظيم انا مش ببالغ هوة دة فعلا الي حصل واكتر من كدة كل الشباب والبنات العريانين هناك قالو كدة وكانو بيموتو من الضحك لما يسمعو السؤال ومنهم كان بيتنح ومنهم كان بكل بجاحة او صراحة مش عارفة قال لا معنديش وطنية ونادر اوي الي قال اة عندي ومنهم قال يعني اية اصلا وطنية ولما تبقي عندي وطنية هعمل اية يعني
بعدها خرجت بنتيجة واحدة كبيرة اننا شباب صريح اوي مش عارف يخبي تفاهتة اكتر من كدة ولا عزاء لابائنا الي استشهدوا في 73 الله يرحمهم ويرحمنا احنا كمان
وبحب يامصر وبحب ترابك بجد من قلبي وبحب كل حاجة فيكي اذا كانو ولادك نسيوكي في منهم لحد دلوقتي انتي هدفة في الدنيا ومستعد يموت عشانك صدقيني ياحبيبتي

Ahmed Essawy يقول...

اولا انا مش عارف اذا كتبت عندك كومنت قبل كدا ولا لا ...
بس انا متابع مدونتك من فترة ...بصراحه ... بتاعه واحد عامل دماغ عليا قوي .... ما شاء الله ... ولا البوست بتاع البتاع ... و انت ماشي زي البطريق ... فطستني من الضحك ... اضحكك الله ...
==
مراتي ولا الوطن !!!
طبعا ... مع الي يحترمني ...
لو زي صاحبك الي علي وش طلاق دا يبقي الوطن...
لو مع واحد زي بتاع صاحب القهوه طبعا يبقي مراتي ...
لما الوطن ميسمحش حتي بتجديد اقامه ...للظروف الخاصه ...يبقي هو الي باع ...
و مش طبيعي اني ابيع الي يشتريني و اشتري الي يبيعني...