الأربعاء، 18 ذو القعدة، 1428 هـ

!!! خطروف .. بمليار دولار

.. وبينما اجلس منتظرا مبلط الرخام في الغرزة التي اتفقنا عليها في السيدة نفيسه وفي قلب الترب ..
حلوه قوي الدخله دي .. (وبينما) .. محسساني اني كنت خلاص على وشك يعني
ام هند .. وبينما اجلس منتظرا مبلط الرخام في الغرزة التي اتفقنا عليها في السيده نفيسه وفي قلب الترب .. جاتني خاطر او خطروف - من الخطرفه - بإني قال ايه .. لي عم في البرازيل ومات .. وسايبلي ثروة تقدر بمليارات الدولارات الاسترليني .. بشرط اني اصرف كل يوم ولمدة شهر .. مبلغ وقدره مائة الف جنيه مصري .. من غير ما اشتري بيهم اي عقار او حاجه تبقى باسمي
!!!!
خطروف خطروف يعني .. وقعدت اقدح زناد فكري .. وزناد شكري .. وزناد فخري
وقدحت كل الزنانيد اللي اعرفهم في حياتي
!!! مية الف جنيه مصري كل يوم ولمدة تلاتين يوم
!!! ومن غير ما اشتري شقه او عربيه او اي حاجه باسمي خالص
هممممم
طب فل .. انا معايا بتاع 30 الف جنيه في البنك .. اجيب بيهم عربية 128 لونها احمر .. واقضيها كل يوم حادثه واصرف عليها من المية الف جنية دول
وبمجرد ما اصلحها اروح خابط بيها في شجره .. تتصلح اخبط بيها في عامود .. تتصلح اخبط بيها في عربية كارو .. ومش هاخبط في ميكروبازات لانهم بيخبطو فيها من غير اي حاجه اصلا
واقضيها لبس وفسح بقى .. يوم في كريزي ووتر .. يوم في دريم لاند .. يوم في ساقية الصاوي .. واتفرج على اي حفله وكل حفله واي حاجه ادفع فيها اي مليم
وبعدين قلت ايه الهطل ده ؟؟
.. عربية 128 ايه وساقية الصاوي ايه
انا اقضيها ايجار عربيات من اللي هي .. أأجرلي عربية لامبرجيني ديابلو .. وعربية بنتلي .. وعربية جاجوار كوبيه .. وعلى فكره .. العربيات دي اغلى من الـ 128 بمراحل يعني .. وسعرها قريب من سعر الدوجان شاهين لو متظبطه ومتركبلها جنوط وسبويلر وقزاز فيميه .. حاجه فيخمه فيخمه يعني
وبدل ما اتفسح في ساقية الصاوي ولا اكل هارديز ولا بتاع .. اشد الرحال على فرنسا كل يوم بطياره خصوصي
اروح اتمشى في الشانزلزيه .. واكل ترمس فرنساوي عالكورنيش بتاع نهر النيل بتاع فرنسا .. واتعشى كباب وكفته فرنساوي في (ابو رامي) اللي في فم الخليج في فرنسا .. اللي عند مستشفى ام الفرنساوين .. اللي زي ام المصريين عندنا .. ماهو كل دولة فيها (ابو رامي) وقدامه مستشفى ام الدولة دي
.. وبعدين قلت لروحي ايه الهطل والهرتله دي .. اتعشى ايه واتفسح ايه
!! ده بدل ما اعمل اللي نفسي حد يعمله
.. اخد حتة ارض وابني عليها مجمع سكني يكون شكله كويس
.. ومش شرط اني اخد الارض شرا لو المفروض اني ما امتلكش عقار
.. أأجرها من صاحبها
وابني عليها مجموعة عمارات دورين بس .. واجيب صحابي واللي بيفهمو واقولهم احنا عايزين نعمل مجتمع سكني لنفسنا
نعمل دار ايتام نضيفه ونعامل الاطفال زي مايكونو ولادنا واخواتنا ... ونختار موظفين كويسين .. ونريحهم في مرتباتهم .. مش زي موظفين الحكومه اللي بيطفشو الايتام من دور الرعاية
نعمل مدرسة كويسه تعلم الاطفال باسلوب بسيط .. من غير كلكعة المناهج التعليمية اللي كلها حشو مالوش لازمه .. وبتعتمد على نظام تحفيظ الطالب كلمتين يخش يقولهم في الامتحان ويطلع ناسي اسمه
نعمل مستشفى كويسه ودكاتره كويسين واجهزة طبية كويسه .. نعالج حالات الناس اللي مش قادره تصرف على العلاج
نعمل مسجد وكنيسه .. ونجيب مشايخ ورهبان يوضحو للناس ان الدين احترام الاخر مهما كانت ديانته ايه
.. نعمل مجتمع نضيف خالي من اي احقاد مبنيه على حب السلطة والفلوس وبيحكمها الطمع والجشع
الحساب يا استاذ عشان انا هسلم وردية
؟؟؟؟؟؟؟
نعم؟؟
القهوجي : الحساب عشان انا هسلم وردية
سوووو : حساب ايه ولا مؤاخذه؟؟
القهوجي : حساب شاي منو فيه وقهوة مانو .. اتنين جنيه ونص يابيه
.. افتكرت اني كنت باحلم او باخطرف
.. وافتكرت اني على غرزة في السيده نفيسه
.. افتكرت اني قاعد في الترب
وسط الميتين


سوووو

هناك 72 تعليقًا:

Salwa يقول...

أول تعليق هييييييييييه
يعني يا سووووووو
لما هي خطروفه
طيب خطرفها صح بقى
يعني لازم تطلع شروط .. ومش تشتري حاجه باسمك ..

طيب خليها مفتوحه
واصرف واشترى براحتك ... دا أنت كنت هتحل مشاكل كتير ... وهتعمل أعمال جميله ... طيب كنت سهل لنفسك الأمور في الحلم
يعني حتى لما بنحلم .. بنطلع لنفسنا حاجات تبوظ الحلم

بس تصدق إنت طيب وأفكارك طيبه
ربنا يحققها لك

خالص تحيااااااتي

Salwa يقول...
أزال المؤلف هذا التعليق.
موجة يقول...

خطروفة جامدة قوي ..
بس معقولة مش لاقي حاجة تصرف فيها المية الف دول في اليوم ..
هو المية الف ده رقم ..
استمر

موجة يقول...

خطروفة جامدة قوي ..
بس معقولة مش لاقي حاجة تصرف فيها المية الف دول في اليوم ..
هو المية الف ده رقم ..
استمر

khaled adel يقول...

مش عارف بس متهيئلي شوفت الخطروف ده قبل كده في فيلم ومش بعيد فيلمين تلاتة
كالعادة بوست جامدة بس متعبة
يعنى لو قعدت افكر ازاي اصرفهم هتعب
بس اللي انت عملته ده تحايل على القانون وبرضه اشتريت املاك
ان شاء الله ربنا يرزقك المليار دول من غير ما عمك يجراله حاجة ربنا يخليهولك ويخليلك البرازيل كلها

إنـســـانـة يقول...

ههههههههههههه

يا خطاريفاك يا سوووو

بس عايزة اقولك حاجة ان دى احلامك واحلام حلوة اوى بجد .. عايزة اقولك كلمة بقا قالها عم منير

قبل ماتحلم فوق .. احلم وانت فايق

قبل ماتطلع فوق .. انزل للحقايق

وقال كمان عمك منير بردو ... اصل مافيش غيره بيقول اليومين دول هههههه

حلمك لسة فى ايديك .. حاول مايومتش فيك

حاول

حاول

ااااااااه

ايوة هو بيقولها كدة .. حنألف يعنى

ألا هو يعنى ايه خطروف صحيح؟؟؟
:D

shahy يقول...

الكلام دة كبير ومش حكاية خطروفة ولا حاجة
اية ياابني مالك؟ مين زعلك؟
قول لمامتك وماتخافش وانا هاروح اجيبهولك من شعرة

لية قاعد وسط الميتين؟ الجملة دي اثرت فيا قوي

على فكرة بقى القهوجي دة رخم يعني لما بدأت تفكر في حاجات حلوة قالك فين الحساب

وعلى فكرة كمان مبلط الرخام هو السبب في الخطروفة دي لو كان جية في ميعادة ماكانش دة كلة حصل

هون عليك يا سووووووو
الكلمتين الجايين دول من عند يوميات عيل مصري وعجبوني قوي وفيهم الشفا بصحيح

السلم والتعبان زي الحياة
مرة سلم يطلعك فوق
ومرة تعبان ينزلك تحت
مش مهم امتى السلم طالعك فوق او امتى التعبان نزلك تحت
المهم انك ما تسيبش اللعبة وتنسحب عشان التعبان نزلك، وانك تفضل مستمر في الحياة،


كلام جميل وكلام معقول مقدرش اقول حاجة عنة

شكرا لأحلى عيل مصري

وتحياتي للولد سوووووووو

لماضة يقول...

عيب عليك
مش عارف تعمل ايه بالفلوس
اول حاجه تروح تشترى خطروف العيد
كل سنه وانت طيب
ومتنساش اختك فى حته ريش من الخطروف

إيمان يقول...

الطيب سووووووووو

عارف انا كنت سمعت حديث فيما معناه
أن اللى كان نفسه يبقى معاه مقدرة مادية أو أى قدرة ما مش متاحة لعمل خير...بيكتب له اجر كبير أو أجر كأنما
كما بها....وربنا يجزيك كل خير على نواياك الطيبة يا سووو ويكتر من أمثالك...مش لازم يا سيدى يبقى معانا ونعمل خير بس الأهم إننا نضمر الخير لبعض

ولو حصل يا سووو ...ولاقيت لك عم فى البرازيل...متنسانيش ممكن متشتريش عربية وتصلحها أنا عندى عربية محتاجة توضيبات كتير ...حطها فى البند

تحياتى وتقديرى

rody80 يقول...

ههههههههههههههههههههههههههههههه

يا علي خطاريفك يا سوووو تجنن

والله انا كمان ساعات بحلم احلام واعيش فيها واصحي علي الكابوس هههههههه


بص انت اتكل علي الله بس ويموت وانا هصرفهملك متقلقش انا اكسر اي ميزانية ههههههههههههههه

بجد اسلوبك جميل وظريف موووت

رودي

mony يقول...

sooo cool..t3la a5leek tsref 200000 fel sa3al0o0o0l nshtry 7agat kteeeeeeeeeeeeeeeeeeeeeer oe enta 3arfny mtosash...l0o0o0o0o0l..

rainbow يقول...

عزيزى احمدالشهير بسوووو من غير مناسبة

جميلة هى احلامك والاجمل خروجها من نطاق الانا لتمتد نحو كل من تحب وتعرف من اهلك واصدقائك ووطنك البائس

احاول ان اكتب اشيائنا الساخرة التى تعرفها لكن لااستطيع ولا اخرج منذ فترة من حالة الحزن تلك حتى بالكتابة وعندما رأيت سؤالك عن شخصى المتواضع سعدت ايما سعادة وهذا وحده بمليون دولار
لهذا انا متأكدة ان من يملك اسعاد الآخرين بكلمة او سؤال سيستطيع باذن الله اسعادهم باشراكهم معه فى احلامه النبيلة
فلا تقلق اورث انت بس وسيب الباقى علينا يمكن نعمل حج جماعى وعدة عمر
يمكن نسافر بلدنا المجروح شمالا وجنوبا نطبب هؤلاء البؤساء روحا وجسدا
يمكن نعمل حاجات كتير جميلة ...بس بعد طبعا ما نضرب بيتزا ابو رامى من روما ونتمشى كتير على احلى كوبرى فى الدنيا : كوبرى قصر النيل .. لا دا يمكن نشترى الاسود الاربعة اساسا لو اتخصخصوا

عميق دعائى ومودتى

هدى

لا تقلق

Doba يقول...

فى الترب ومع الميتين وعاوز كل الفلوس دى وكمان قاعد تبعزقلى يمين وشمال

مش تشوف اختك هبة بكام باكو كده ولا كده

ان شالله باكو لبان ولا باكو شاى احسن شالوه مالتموييييين اوديهم لامى

سوفاج ايه الكلام البيئة ده

أثرت أحلام كل الشباب واللى نفسهم يتحقق ولكنى سأرد عليك بنفس ردك نحن فى عالم الواقع ولسنا فى المدينة الفاضلة ومينفعشى نخطرف لنتمسك وان اتمسكنا هنتفنفخ وان اتفخنا هنتكم يبقى نجيبها من قاصرها ونتكتم احسن

لا يكلف الله نفساً إلا وسعها
ثم الاحلام وبطلنهالك - احلام اليقظة دى نبطلهالك ازاى بقى

انا بخير وشكرا لسؤالك ولكننى مطحونة شوية - ربنا كريم

تحياتى
هبة

مشمش يقول...

جميل اوي البوست ياسوووو
بس زي مابتقول دي اوهام

أيامنا الحلوة يقول...

ياخطروفاتك .... ربنا يوعدني بخطروف كده ولو حتى لمدة خمس ثواني اصلي بخاف اخطرف لحسن يطبقوا عليا قانون الطوارئ انت متعرفش ان اللي بيخطرف دلوقتي بيعتقلوه على اساس انو بيهدد الامن القومي

تحياتي ياسوووووووووووووووووووو

ابن حـجـر الـعـسـقـلانـى يقول...

طب ممكن تساهم سيادتك فى إنك تدفع المرتب الشهرى لمدرب محترم و متمكن نجيبه لنادى الزمالك .. و لو سيادتك أهلاوى (و هو الاحتمال الأرجح) فأنا أفكرك بالروح الرياضية اللى يجب إنك تتحلى بيها كأهلاوى مصرى .. مما سيؤدى إلى رفع مستوى الكرة المصرية برفع مستوى نادى الزمالك مما سيؤدى بالضرورة لاحتدام المنافسة بينه و بين النادى الأهلى مما يمنع وجود حالة الاستقطاب و الانفراد بالقمة من نادى الأهلى و هى الحالة الضاربة فى البيئة الكروية المصرية مما يدفع بالنادى الأهلى إنه يجاهد عشان يهزم الزمالك و يسففه التراب كالمعتاد مما يعيد حالة الاستقطاب مرة أخرى و بالتالى يكون فلوس سعادتك كأنك رميتها فى التراب

و هو المطلوب إثباته

سؤال معلش .. ألاقيش عندك كتاب "خطاريف الغضب" بتاع لا مؤاخذة الباشمهندس محمد حسنين أبو هيكل ؟؟

kikotalaat يقول...

سلامووووووووووووو عليكوووووووووو
خطروفة زي العسل يخرب بيت
بس تصدق أنا ساعات برضه بتجالي خطاريف تجنن
يعني مثلا جاتلي خطروفة لو لاقيت خاتم سليمان ومطلوب مني تلات طلبات أطلبهم ؟
قعدت أفكر كتيييييير لاقيت نفسي إني ممكن أتشل من الصدمة قبل ما أطلب حاجة

بس والله خطروفتك ديه جننتني تصدق لما فكرت اكتشفت إني مش هعرف اصرف مية ألف جنيه في يوم واحد ؟؟؟

كان معكم..,
كيكووووووووووووووو

هناء يقول...

فوق يا سوووو لا يفوقك الميتين الي تحت

s يقول...

مش شايف انها وسعت منك المره دي يا سووو 100 الف في الشهر ايه يعني هو عمك كان حرامي ولا مؤاخذه ولو حرامي ***** تيييييت
بس لو فيها فلوس ابقي افتكرنا معاك الخطروووف القادم

مع اخلص التحيات
ساسووو

MKSARAT SAYED SAAD يقول...

حكمة قالها الحكيم محمد سعد
وانت عامل اية دلوقتى
ابسلوتلي خاريفك حلوة
ومتنساش خطروف العيد
ههههههههههههههههههههه
متعملشي كدة نفسك هي مجتش على كدة وبس انتعارف لو غيرت الخطروف دة بدلتة في الكشك اللي في اخر الشارع هيجيب اكتر
مهو احنا بقينا زمن العجايب
سلام يا صاحبى

Rehab Mostafa يقول...

أنا حاسه اني شوفت الخطروف ده في فيلم قبل كده
بس البوست جامد جداً... وخصوصاً الحاجات اللي حلمت تعملها دي بس ماهو كده برضه اشتريت املام وانت مش واخد بالك
بس ماتبقاش تحلم كتير علشان ماتصحاش على الحقيقه المره دي:D
وان شاء الله ربنا يرزقك بمليون واحد حتى كفايه بلاش الطمع ده

3ala asm masr يقول...

بوست جامد أخر حاجه والله العظيم
وطول عمرى رايى فيك انك حد حلو أوى يا سووووووووو
ياريت بجد كل واحد لو جه يحلم يفكر فى غيره شويه
وياريته كان حقيقه كنت هتساعد ناس كتير اوى
احنا لو عندنا اتنين سو فى البلد كانت الدنيا بقت غير
تحياتى يا احلى سو

بت خيخة وأى كلام يقول...

انا الخطاريف دى بتجيلى كتير
بس بصراحة بكون مبحبحاها شوية
يعنى ممكن اشترى حاجات باسمى
وبرضه تلاقينى بفوق من خطروفى يا اما على صوت شريف عايز يعمل بي بي
او على صوت ابو شريف عايز ياكل مم

بس بوست جميل يا سوووو
على فكرة قريت البوست اللى قبل ده وعاجبنى جدا رغم حسيت فيه انك موجوع
سلام
اختك خيخة

Nani يقول...

السلام عليكم
مالك يا ضنايا مش قلتلك تتغطى وانت نايم؟
ايه خطروف العيد ده
ايه مجتمع اليوتوبيا ده
اوعى ليخدوك حبايبنا
بامر الطوارئ ده
بس ليا عندك طلب صغننن ااااد كده
والنبي تتجوزني وتديني الفلوس انا برضك عجوزة وعندي 30 سنة

Nani يقول...

السلام عليكم
بعد اذن سعادة حضرتك
انا ضيتك عندي في المدونة
:)

كاميليا يقول...

ههههههه

معلش ،، معلش

البن بس كان محروق والقهوة مش كانت مانو
دى كانت من عذاب زمانو

والشاى نسبة الخشب كانت فيه عالية
فرفعت درجة الخطرفة القصوى للمخ

بس خطروفة حلوة اوى

كاميليا

ra7eel يقول...

سوووووووووو
ياااه هتعمل كل ده ب 100 الف
دار ايتام ومدرسه ومجمع سكنى
المهم لما تورث ده ان حصل مثلا وطلعلك حد من العيله منسى وانت مش عارفه
متنسناش احنا برضه اخواتك وحبايبك
هنصرف معاك مش تقلق
ههههههههههههههههههههههه
خالص تحياااتى سوووو

Soooo يقول...

Salwa

تصدقي ان منطقك صح قوي
يعني هو احنا حتى في الحلم بقينا بنعقرب الحاجات على روحنا؟؟

فكره بوست جديد والله

الف شكر


سلامووووووز

Soooo يقول...

موجة

الله يكرمك يا موجه ياخويا
وبيني وبينك الحوار مش في صرف مية الف جنيه قد ماهو مفاجأة الخبر
تخيلها كده وانت هتفهم قصدي


سلامووووووز

Soooo يقول...

khaled adel


منورني يا ابو خلود
وفعلا الخطروف ده مقتبس من فيلم عربي .. بس الاختلاف هنا اني اقتبسته في عقلي الباطن
الفيلم بقى .. كان مقتبس من فيلم عربي .. تاني

منورني يابرنس

سلامووووز

Soooo يقول...

إنـســـانـة


نسيتي اهم جمله في الاغنية بتاعة منير يا انسانه
لو بطلنا نحلم نموت

ولا ايه رأيك؟؟
والحمدلله ان الخطروف عجبك
قصدي ان البوست عجبك

ملحوظه
بالنسبه لكلمة خطروف انا مستغرب الحقيقه
يعني انتي ماسمعتيش عن حد جاله انزلاق في الخطروف؟؟؟


سلاموووووز

Soooo يقول...

shahy

والله ابدا ياشاهي
هي بس ازمة نفسيه نتيجة بعض الاخطاء في المجتمع واللي لازم اواجهها بنفسي بدل مانا كنت باتناساها او باهرب منها
وانتي عارفه بقى الصعوبات اللي بتقابل الواحد لما يصطدم بجدار الواقع
وفعلا .. الدنيا دي زي لعبة السلم والتعبان


سلاموووووووز

Soooo يقول...

لماضة

خطروف عيد ايه بنتي
ده بدل ماتعالجيني من انزلاق الخطروف اللي جالي نتيجة اني لعبت ماتش سكواش في ملعب تنس طاوله

امال طب وبتاع .. ومش عارفه تعالجيني من حاجه بسيطه زي دي؟؟


سلاموووووووز

Soooo يقول...

ايمان


الله يكرمك ياستي دنيا واخره
وفعلا لو تعاملنا مع بعض بنوايا طيبه حاجات كتير هتتغير للاحسن

عقلي الباطن بيقوللي انك بتثبتيني عشان لما اورث اصلحلك عربيتك .. طب ماتديهاني دلوقتي .. واوعدك لما اورث .. هبقى اجبلك توك توك


سلاموووووز

Soooo يقول...

rody80

منوراني والله بتعليقك
وايوه كده عايز اشوف ضحكتك بتلعلع وتجلجل في المدونه
اضحكي ياشيخه والله ماحد واخد منها حاجه
واوعدك اول ما اورث .. هعينك عندي وزيرة ماليه


سلاموووووووز

Soooo يقول...

mony


انتي هتقوليلي .. مانا عارفك
يابنتي انتي لوحدك عايزالك مجموعة اعمام وعمات وخيلان وخالات عشان تورثيهم
وبعدها هتضيعي الفلوس عالمراجيح .. والجزم البوت
منوراني والله يا موني ومبسوط انك ظهرتي على الساحه الفنيه مره تانيه


سلامووووووز

Soooo يقول...

rainbow

طب والله انا فرحت لما لقيت تعليقك
ايوه كده اظهري وباني عليكي الاماني .. اماني واغاني
وايه اللي مزعلك ياستي
بصي .. قومي خدي دش سخن كده في اللذيذ .. وبعدها اشربيلك شوب فيسكافيه اصلي .. واقعدي اتفرجي على اعادة مسابقة الرقص الشرقي اللي جابوها في الـ إل بي سي امبارح
وانا متأكد انك هتفرفشي وتطلعي بمليون فكره ومليون موضوع ساخر من موضوعاتك
بس الحقي اتفرجي عالاعاده قوام


سلامووووووز

Soooo يقول...

Doba

ام يوسف يا قمر
منوراني والله
وبعدين فيها ايه لما نخرج شوية من زنقة الحياه ونحلم ونخطرف حبه
بس مانعيشش جوا الحلم او الخطروف
حاكم انا سمعت ان اللي يعيش جوا خطروف .. اللهم احفظنا اللهم احفظنا .. بيلبسوه قضية اختلاس امال الغير
وممكن ياخدلو فيها قد بتاع حوالي تقريبا

اللهم احفظنا بقى
وسلامي ليوسف
قوليله عمك سوووو بيقولك
سلاموووووووووز

Soooo يقول...

مشمش

خبر ايه يا صاحبي
ايه النزعة التشاؤميه في كلامك دي يابنتي
مش دي مشمش اللي متعوده تهزر وتعلق عندي بالصفحتين فولوسكاب خااااالص
نرجو ان نطمئن عليكي وعلى صحتكم في اسرع وقت

سلامووووووووز

Soooo يقول...

أيامنا الحلوة

خطرفي يابنتي زي ماتحبي
خطرفي واضحكي .. وخلي ايامنا حلوة
ولو على اننا نتقفش لو خطرفنا .. احنا في كلتا الحالتين هنتقفش
يقى نعمل حاجه .. ونخطرف


سلامووووووووز

Soooo يقول...

ابن حـجـر الـعـسـقـلانـى

استغفر الله العظيم من كل ذنب عظيم
عايز الفلوس اللي ماتعبتش فيها وجاتني من الهوا .. اصرفها على الزمالك والفسق والفجور
ليه .. فلوس وارثها مثلا؟؟؟

وبعدين نصيحه اوجههالك ولكل زملكاوي
باب التوبه مفتوح .. والاهلي فوق الجميع

سلاموووووووووز

Soooo يقول...

kikotalaat

منورني يا كيكو باشا

فعلا ساعات حاجات بيبقى متهيألنا انها بسيطه نلاقيها اصعب من الصعوبه نفسها
بس سيبك .. هاتلي خاتم سليمان انت وملكش دعوة .. هظبطك


سلامووووووز

Soooo يقول...

هناء

خبر ايه يا هنونه
لا بقولك ايه انا احلم براحتي
يعيشك برشه برشه هلأ هون وين ماكنتي ينطيكي العافيه

فهمتي حاجه؟؟

سلامووووووووز

Soooo يقول...

ساسسو


مااااشي
بقى بتغلطي في عمي اللي ماعرفهوش في البرازيل وعايزاني افتكرك باي حاجه في رغيف
لا يافندم
لست انا هذا الرجل
انا عندي كرامه
واللي يغلط في عمي .. اقوللو ياعمي

منوراني ياساسسو ياعسل


سلامووووز

Soooo يقول...

MKSARAT SAYED SAAD

اي والله
وعلى رأي نفس الحكيم اللي هو محمد سعد
الجنيه .. غلب الكارنيه .. وغلب الزمالك

منورني يابو السيد يا مجدع


سلامووووووووووز

Soooo يقول...

Rehab Mostafa

لا يافندم .. ده مجرد توراد خطارف مش اكتر
انا خطروفي اصلي اصلي
صنع في دماغ سووووو
وبعدين هو الخطرفه ولا الاحلام بفلوس
خطرفي ياشيخه واحلمي
ويا عالم .. يمكن يكون ساعتها وقت استجابه وتلاقي ربنا كرمك ببتاع ديشيليار جنيه استرليني
وماتنسينيش في فرق العمله


سلاموووووووز

Soooo يقول...

3ala asm masr


الله يكرمك دنيا واخره يااااارب
والف شكر على كلامك الجميل ده ولو اني شايف انك بتبالغي حبتين تلاته اربعه عشره
انا واحد عادي .. بيخطرف


ملحوظه
لما بادوس على اسمك عشان ادخل عالبلوج بتاعك بيطلعلي
Profile Not Available
خدي بالك عشان ممكن تكوني عامله ده من الاوبشنز بتاعة البلوج نفسه ان ماحدش يشوف البروفيل بتاعك وبالتالي مايعرفش يدخل من خلاله على المدونه بتاعتك



سلامووووووز

Soooo يقول...

بت خيخة وأى كلام

ربنا يباركلك في شريف وفي والده وتخاووه بأحمد عن قريب .. قولي يارب

والف شكر على متابعتك للمدونه واحب اطمنك اني الحمدلله كويس
هي بس ساعات كده بتبقى خانقه عالواحد مش اكتر .. انما في المطلق
فل والحمدلله


سلاموووووووووز

Soooo يقول...

Nani


اهلا اهلا اهلا
بمجرد ماخطرفت اني ورثت عايزه تتجوزيني عشان فلوسي
لا ياهااانم
انا اللي تتجوزني تتجوزني عشان ذاتي وعشان شقتي التلات اوض والحمامين والمطبخ واللي في المعادي

ملحوظه
انا لي الشرف ان مدونتي تتحط عندك في مدونتك واننا اصدقاء .. وربنا يديم المعروف يافندم


سلامووووووووووووز

Soooo يقول...

كاميليا


كاميليا يابنتي .. انا كنت قاعد في غرزة
يعني من الطبيعي ان خطرفتي دي تكون من تأثير حجر مطعم بالحشيش عابر امام انفي المتضخمه والتي عندها القدره على شم اي روائح
خصوصا هناك .. روائح ما اقولكيش بقى

منوراني


سلامووووووووووووز

Soooo يقول...

ra7eel


ايه يارحيل .. ماتصحصحي معايا كده
بقولك شرط في الوصيه اني اصرف مية الف جنيه كل يوم لمدة تلاتين يوم
يعني لو ضربتي مية الف في تلاتين يوم .. يعملو بتاع سبعتاشر جنيه وكسور
واعتقد ان ده مبلغ كويس قوي للخطرفه اللي خطرفتها
وبعدين بلاش طمع يعني
نبدأ صغيرين شويه .. ولما نكبر .. هنتقفش وش بعدها ولا هنعرف نكمل لا مجتمع ولا مدرسه صنايع حتى


منوراني



سلاموووووووووز

Desert cat يقول...

انا الخطروف ده كان علشان تهرب من دفع الحساب
المهم يعنى فى النهاية
دفعت الحساب ولا اشتغلت بيه فى المخل
تحياتشى

fanan fa2eer يقول...

ايه ياعم أفلاطون ده؟

المدينة المثالية دي مش موجودة غير في أحلام الحالمين والفلاسفة والبشر أصحاب القلوب الخالية من تلك النقطة السوداء

بس هي غالبا الأحلام الأفلاطونية دي بتهتز أول مالفلوس دي بتتحط في ايد الواحد

:))

لكن برده زي مابيقول محمود درويش علي الحلم أن يرشد الحالمين وأنا بقول علي الحلم أن يرشد الحالمين لا أن يتحقق
:)

cinderella يقول...

مش يمكن الخطروفه دى تتحقق
كل شيء جاااااااااااااايز
بس لما تبئى حقيقه وقريبك المجهول اللي يسيب العيله كلها ويكتب ثروته بإسمك يتكل على الله إبئى أعمل دار أيتام - بس اوعى تعمل لهم إجتماع لأولياء الأمور - هههههههههه
تبئى تشغلني معاك علشان انا بموووووت فيهم وماتخافش بما إنك هتبدد الثروه دى في حاجات تافهه فو شهر انا ناويه أخد 10.000 جنيه كده مرتب
تبديد بتبديد بئى
وانا أولى من الغريب .. ولا إيه
بجد بجد بوست هايل وربنا يرزقك بالملايين من غير أموات

Doba يقول...

انا جيت اهوا بشكل جديد ومعايا فيتامين كله حديد

اشكرك كثيرا للسؤال عنى وانا من موقعى هذا انوه على انى حية أرزق ولككنى مطحونة من العمل وما الى ذلك

اشكرك

Rosa يقول...

لا دي حتة خطروفه خطروفه يعني
كان في فيلم زمان كدا بتهيقلي ممكن تستعين بيه لو الخطروفه رجعت تاني
:D
بس عجبني اوي المشروع الاخير دا
طب يا رب عمك الي في البرازيل يـ ..... لا كدا انا ابقى شريرة :D
بس يعني مافيش مكان تتقابلوا فيه غير الغرزه دي يعني؟؟
افرض الابره شكت حد ولا الغرزه طلعت ضيقه هتتصرفوا ازاي
:D
يلا كل خطروفه وانت طيب
:)

منى يقول...

يا ترى يا سوووووووو الاحلام دى هيبقى شكلها ايه لو جاتلك فلوس بجد؟
انا مش بشكشك فيك ولا حاجه لا سمح الله بس يا رب يجيلك فلوس كتير حلال دلوقتى حالا بشرط تقولنا هتعمل بيها ايه؟
تحياتى

shreen يقول...

حتى فى خطاريفك
واحلامك
انسان يا سوووو
كان نفسك
تشارك اللى فى ايدك مع غيرك

فكرتنى بفيلم اسماعيل يس لما كان المفروض برضه يصرف مبلغ كبير كده

المهم
انت دمك زى العسل
وحتى خطاريفك
لذيذه
وبرضه فيها انسانيه

سهر الليالى يقول...

هههههههههههههه
عسل يا سووووو الخطروف عبقال كل خطروف وانت طيب

فكرتنى بفيلم اجنبى بس انت ارحم انت كان مفروض تصرف ميت الف فى اليوم التانى كان مفروض يتجوز قبل لحظة معينه عشان يورث
اللى يشوف بلوة غيرة تهون عليه بلوتة
ههههههههههه

بس مش قلتلك قلبك طيب اكيد
بجد كلامك واحلامك كانت زى السكر وتنم عن قلب طيب

تحياتى يا صاحب الكلام السكر والقلب الطيب

سهر الليالى يقول...

اااااااة
نسيت اقولك
على فكرة لو فى يوم احترت تصرف الفلوس فين مع انها استحالة فى بلدنا
ابقى قولى وانا اظبطك اصرفهملك فى مينت مش يوم
هههههههههههههههههههه

Esmat يقول...

الله يا سوووو
إحساسك بالغير رائع
أنا على الكلمتين الاخرانيين دول
مستعدة لو لو يعنى ترشح نفسك...
أقف معاك انا وكل البلوجرية
بس تعمل كده مش تضحك علينا
حنثق فيك ونديك اصواتنا
ها قولت ايه؟
حتترشح؟
ربن يكرمك دوما بخطروفات حلوة
ما هى الل معيشة الواحد
واجمل تحية لك يا فندم

Soooo يقول...

Desert cat

مخل؟؟؟
مخل ايه يا قطه .. بقوللك غرزة بتاعة شبطه تاخر المخدرات مش مخل بتاع كوستا الجريجي

الحمدلله الصنايعي جه ولحقني وحاسبلي
معتقد ان الشغلانه هترسى علينا وحب يعمل دور واجب

يلا بقى .. ربنا يرزقنا ويرزقه بشغلانه تانيه

وانتي عامله ايه؟؟؟


سلاموووووووووووز

Soooo يقول...

fanan fa2eer

ايوه كده اظهري وباني وسيبك من الجراحه والنسا والكليه اللي هتخليكي تشدي في شعرك قبل ما تتخرجي

بصي يابنتي .. ممكن فعلا لما الفلوس تجري في ايدي اتغير وابقى غير مما اتخيل .. وده طبيعي لاني بشر مش معصوم من الخطأ
انما الخطروفه دي مبنيه على تخيل اني بقى معايا فلوس كتير كتير كتير ومش هقدر اخلصها وبتاع .. يبقى الاحسن بدل مانا اصرف منها في الهسس
احاول اعمل بيها حاجه
ممكن تنجح وممكن لأ
فهمتي؟؟


سلاموووووووووز

Soooo يقول...

cinderella

وكتاب الله انا بعزك ياسندريلا
بجد والله مش هزار .. وما اعرفش ليه

وياستي ماتقلقيش .. مرتبك هيوصللك لحاد عندك .. بس بعد ما اشيل منه ضريبه منبع وتمغه وقتاوة وبلطجه
يعني مرتبك هيوصل لـ تمانية وتسعين جنيه بحالهم
اللهم لا حسد


سلاموووووووووز

Soooo يقول...

Doba


ام يوسف متأثره بريري وشكلها بتبلطج على يوسف وبتضرب الريري والسريلاك بتاعه
عارفه .. انا كنت بابلطج برضه على بنات اخويا واكل السريلاك بتاعهم

منوراني والله .. وربنا يوفقك ياستي في شغلك وفي بيتك يارب

سلاموووووووز

Soooo يقول...

Rosa

والله هو مبدأ اننا نتقابل في غرزة فده عشان عدة اسباب اولهم اننا نبقى جنب الشغلانه اللي رايحين نشوفها
واخرهم .. اني اكيد اكيد اكيد .. مش هقعد مع الصنايعي في كوستا ولا سيلينترو
ده حتى يبقى فجر وفسوووووق

سلامووووووووز

Soooo يقول...

منى

والله العظيم لو جاتلي فلوس حلال ومبلغ محترم محترم يعني
هدور على بنت الحلال واتجوزها واعصم نفسي واستر عليها وتستر عليا
ولو فضلت فلوس برضه .. هاخدها ونعمل عمره او حج لبيت ربنا
ولو فضلت فلوس .. عفتح بيها مكتب ديكور واسعى طلبا للرزق
ولو فضلت فلوس هعمل ورشه رخام وورشة حديدي فيرفوروجيه واشغل اي صنايعي محترم بدل ما يقضوها قعده على القهاوي
ولو فضلت فلوس .. هتبرع بيهم لبناء مسجد او اساهم في كفالة يتيم او اسره محتاجه

بس هل (لو) اللي بقولها دلوقتي .. هي نفسها (لو) بتاعة الشيطان والعياذ بالله
؟؟؟

سلاموووووووز

Soooo يقول...

shreen

الله يكرمك ياستي
والله انا ماستحقش الكلام الجميل ده كللو
وبعدين دي خطرفه مش اكتر

مش يمكن لما فعلا ابقى غني وبتاع .. ولا اعمل اي حاجه من اللي خطرفتهم
!!!!

اهي خطاريف وبنخطرفها وخلاص
ومتشكر جدا على كلامك الجميل ده


سلامووووووووووز

Soooo يقول...

سهر الليالى

الحقيقه اخجلتم تواضعنا والله
وانا فعلا شفت الفيلم اللي بتقولي عليه وفعلا كان فيلم مسخره
وفي اخر لقطه في الفيلم في بتاع عشتاشر الف بنت لابسين فساتين فرح وبيجرو وراه في الشارع وكانت زيطه


وان شاء الله بمجرد ما ابقى مليونير هبقى اعينك وزيرة ماليه عشان تفلسي الدوله
ونرجع نستلف ونتداين من الدول العظمي


سلاموووووووووووز

Soooo يقول...

Esmat

؟؟؟؟؟
؟؟؟؟؟؟
؟؟؟؟؟؟؟
هو انا ضايقتك في حاجه؟؟؟
عايزاني اترشح وابقى زي ايمن نور وزي نعمان جمعه ؟؟

لا ياعم مش لاعب
انا هاخد الفلوس واسافر على لاس فيجاس واضيعهم في القمار اريح

العمر مش بعزقه
انما الفلوس دي .. بعزقه

سلاموووووووووووووز

Mohamed يقول...

gaaamda gedan ya soooooooooooooooo
you so funny !!!

غير معرف يقول...

topic47, [url=http://www.chop.edu/forum/user/profile/8207.page]order klonopin no prescription[/url], :-( yzp, http://www.chop.edu/forum/user/profile/8207.page klonopin no prescription :-(, [url=http://www.chop.edu/forum/user/profile/8208.page]cheap xanax 2mg[/url], ;-( num, http://www.chop.edu/forum/user/profile/8208.page cheap xanax 2mg ;-(, [url=http://forum.cprs.ca/default.aspx?g=posts&m=6]order adipex online[/url], ;-( fxx, http://forum.cprs.ca/default.aspx?g=posts&m=6 order adipex online :-(, [url=http://forum.cprs.ca/default.aspx?g=posts&m=7]alprazolam no prescription[/url], :-( hcs, http://forum.cprs.ca/default.aspx?g=posts&m=7 buy alprazolam no prescription ;-(, [url=http://forum.cprs.ca/default.aspx?g=posts&m=8]ambien without prescription[/url], ;-( mww, http://forum.cprs.ca/default.aspx?g=posts&m=8 order ambien no prescription :-(