الأحد، ٧ ربيع الآخر ١٤٢٩ هـ

سينماتك .. وجوه جديدة

لأن السينما هي ايقاع الشباب .. او اغلب الاعمال بتعبر عن شباب كل جيل .. بالاضافه طبعا لوجوب تطعيم هذا النوع من الافلام بأفلام يقوم ببطولتها كبار النجوم لخلق نوع من أنواع التواصل الفكري بين الجيلين
----
المقدمة دي لازم تتقال طول مانا عايز اتكلم عن تجربتين سينيمائيتين قام ببطولتهم مجموعة من الشباب
اول تجربة هي فيلم كامب
والفيلم ده خنقني وقفلني زياده مانا كنت مخنوق ورايح عشان افك عن نفسي شويه
لا تمثيل ولا قصه ولا سيناريو ولا موسيقى تصويريه ولا تصوير ولا مونتاج ولا اخراج ولا اي حاجه في رغيف
وكل الناس اللي كانو داخلين معايا الفيلم وماعرفهمش رأيهم نفس رأيي وكانو عايزين يعملو ثورة على السينما مش عشان يرجعولنا فلوسنا .. لأ .. عشان يخلونا نطلع من السينما وفي داهية الفيلم
----
وخرجت للشارع تاني بعد ماخلص الفيلم وانا في قمة خنقتي والي زادت بطريقه بشعه .. لفت انتباهي بوستر فيلم ورقة شفره واللي كتب القصه والسيناريو بتاعه احمد فهمي اللي كتب فيلم كده رضا .. بس فيلم ورقة شفره ساعده في كتابة السيناريو هشام ماجد
وفي ناس ممكن تفتكر احمد فهمي و شيكو وهشام ماجد .. من فيلم قديم كانو عملوه وصوروه بكاميرا هاند كام .. كان اسم الفيلم رجال لاتعرف المستحيل
والفيلم ده بالنسبه للجيل بتاعنا احنا من مهتمين السينما ثورة صريحه واعلان مننا على التمرد على كل ماهو قديم وبالي في عالم السينما .. واللي اخرج فيلم رجال لاتعرف المستحيل شاب اسمه احمد عمرو
--------
افتكرت وانا على باب السينما وباقطع التزكرة ان في واحد قاللي ان الفيلم ده بيتريقو فيه على الافلام العربي زي ماهو باين من الاعلان بتاع الفيلم من افية احمد الفيشاوي لما بيقول
!!!! من النهارده مافيش لجنه .. انا اللجنه .. انا اللجنه
------
ولاني كاتب فيلم باتريق فيه على بعض الاكلاشيهات في السينما المصريه زي فيلم مافيا واللي مقتبس بعض الحاجات من الفيلم اللي كتبته وحاططها في المذكرات اللي بانزلها على المدونه حاليا .. وكنت في الفيلم بتاعي باتريق على افلام تانيه زي شمس الزناتي وناصر سته وخمسين وايام السادات وأبي فوق الشجره والخطايا ودعاء الكروان وشيء من الخوف وافلام تانيه كتير .. واللي قالي على فيلم ورقة شفره وقاللي اروح اشوفه هو احد المقربين لي واللي قرى السيناريو بتاع الفيلم اللي انا كتبته .. قلت يبقى خلاص بقى .. أمري لله .. ادخل اشوف الفيلم وعلى الله يرفع من روحي المعنويه شوية بعد الانتكاسه اللي انتكستها من الشيء اللي اسمه كامب .. وقطعت التذكره .. ودخلت فيلم ورقة شفرة





اعز انا الفيلم اللي يخطفني في اول مشهد .. والفيلم ده خطفني في اول مشهد خطفه عدالة قوي .. وبالرغم من قلة الامكانيات المتاحه قدام فريق العمل لكن تم تنفيذ المشهد بحرفيه شديده .. تقطيع كادرات هايل .. حركة كاميرا هايله .. موسيقا تصويره قوية .. ويبدأ الفيلم
-----
القصه والسيناريو بيلعبو في منطقه بدايتها عاديه جدا وتم تناولها في افلام كتير .. لكن عالجوها بطريقه جديده جدا وقوية جدا وكوميديه جدا جدا جدا
القصه والسيناريو والحوار .. لـ أحمد فهمي وهشام ماجد واللي بيمثلو في الفيلم ومعاهم شيكو .. والحقيقه هم فاهمين بعض حلو قوي .. من أيام فيلمهم بتاع زمان .. فيلم رجال لا تعرف المستحيل .. وده ادى الفيلم مصداقيه حلوة قوي في انهم اصحاب في الحقيقه قبل مايكونو اصحاب في الفيلم
تقييمي للفيلم من ناحية القصه والسيناريو والحوار .. عشره من عشره ولأول مره الاقي فيلم مصري بيتكلم في قضيه قويه جدا جدا ومن غير شعارات وهتافات واكلاشيهات مالهاش لازمه .. ومش هحرق الحبكة دي وهسيبكم تشوفو الفيلم بنفسكم وتحكمو براحتكم
------
من ناحية التمثيل .. اداء قوي ومبشر بمجموعة ممثلين هيكون ليهم دور في المستقبل .. ولكم ان تتخيلو ان اقل ممثل كان احمد الفيشاوي بالرغم من حالة الكوميديا اللي عملها .. تخيلو بقى ابطال الفيلم الاساسيين عاملين ايه .. العيال دي بجد بتمثل سينما بأداء بسيط وبعيد عن التكلف والمبالغه .. واللي كان بطلها في الفيلم .. للاسف الفنان الكبير محمد متولي اللي كان بيستظرف جدا وتقريبا حاول يجاري الممثلين من ناحية الكوميديا .. لكن هو بيمثل من مدرسه .. وهمّ بيمثلو من مدرسه .. وطبيعي ان مدرستهم تكون اقرب لقلوبنا باعتبار ان مشاهدين الفيلم معظمهم من الشباب ان ما كانوش كلهم .. تقييمي للفيلم من ناحية التمثيل .. تسعه من عشره
------
الموسيقا التصويريه .. خطرفت في الاول لما تقريبا مؤلف شريط المزيكا حط موسيقا قديمه او كلاسيكيه الى حد ما في اول احداث الفيلم في مابعد اول مشهد .. واللي ساعتها كانت مشاهد عاديه في الجامعه وكده .. لكن لحق نفسه وظبط الليله ومشي مع ايقاع الفيلم بعد كده .. تمانيه من عشره
------
التصوير .. اكتر حاجه مقرفه في الفيلم لما يكون كوميدي هي التصوير .. لأنه لازم يكون مكمل للإفيه او القفشه اللي بيقولها الممثل او اللي بتطلع من خلال مجموعة الممثلين .. لكن هنا المصور كان احساسه حلو قوي وفهم ازاي يظبط الافيه ويديلو حلاوة اكتر .. واهتم برضه بخلق زوايا تصوير جديده .. زي مشهد الخناقه في الاتوبيس بين الاتنين الصحاب والبوليس بيطاردهم .. وزي برضه مشهد البداية اللي زي ماقلت في الأول خطفني خطفه حلوة قوي .. وادي التصوير تسعه من عشره .. والواحد الناقص ده عشان ما اهتمش بجو الاقصر وأسوان واللي صورو فيه تقريبا نص الفيلم
------
الديكور .. حلو قوي قوي .. وكنت ملاحظ ان مهندس الديكور بينه وبين نفسه بيقول ايه يا جدعان كل دي لوكيشنز مطلوب منني اجهزهم .. لكن جهزهم وطلعو حلوين قوي ومعبرين قوي .. وتمت الاستفاده من بعض التأثيرات في الديكور زي جو العشه البوص اللي تم توظيفها في خلق تأثيرات بالضوء وتصويرها .. واديله عشره من عشره
------
المونتاج .. في الافلام الشبابيه عموما بيكون الايقاع سريع .. وفي فيلم كوميدي شبابي لازم يكون الايقاع اسرع .. وانا طول الفيلم ماحستش بلحظة ملل واحده بل بالعكس بعد ماخلص الفيلم كنت عايزه يطول شويه من كتر مانا مستمتع .. وادي المونتير عشره من عشره
------
الاخراج .. لـ امير رمسيس .. وهو نضج بطريقه حلوة قوي بعد اخر تجربتين ليه في السينما .. واللي هم فيلم آخر الدنيا وفيلم كشف حساب .. لكن في الفيلم ده بيقول انا بتاع كللو .. بس انتو ادوني خامة وورق حلو اقدر العب بيه وادوني ممثلين مجتهدين زي الممثلين اللي عملو الفيلم .. برافو يا أمير .. وبجد اتوقع ليك ولكل فريق العمل انكم لو استمريتو على المنوال ده في خلال اقل من خمس سنين هتخلقو حالة امتاع حلوة قوي
عشره من عشره يا امير .. ولو كنت معايا وشايف ابتسامة الناس وفرحتهم بالفيلم والجملة اللي سمعتها من اكتر من شخص وانهم اول مره يدخلو فيلم عربي ويستمتعو بالقدر ده .. انا متأكد .. انك وباقي فريق العمل من سيناريست وممثلين ومصور ومونتير ومؤلف موسيقا تصويريه ومهندس ديكور .. هتفرحو ثانيه واحده بس .. وهتخافو ايام وشهور .. عشان هتبقو عايزين تحترمو رأي الناس اللي استمتعو بالعمل ده
-------------------
كام ملحوظه بقى في التيك آواي
هي الشباب مالها .. بجد يعني في ايه .. كل مايشوفو بنت ماشيه في الشارع ولو حتى معاها اهلها بيعاكسوها .. وبيعاكسوها بطريقه بايخه ومستفزة لدرجة اني كنت هتخانق مع شلة شباب واقولهم هي دي مش زي اختك ولو ماعندكش اخت ياخي اعتبرها بنتك لما تتنيل على عينك وتتجوز .. لكن لما لقيت عددهم كبير واشكالهم اشكال ضاله .. قلت يا واد ماتدخلش غير لو حصل مد ايد .. والحمدلله ماحصلش والا كنتو هتلاقوني دلوقتي في مشرحة زينهم
---
حد من صحابي المدونين استغرب قوي اني لما باعمل رحلات مكوكيه للسينما باروح فيلمين ورا بعض .. لكن المشكله اني بابقى عايز اشوف فيلم واحد وافضل اتحايل على صحابي وحبايبي يجو معايا واعزمهم لكن بيتحججو بأي حجج .. فبروح رايح السينما لوحدي واتفرج على فيلمين .. لوحدي
سوووو

هناك ٥٤ تعليقًا:

فرنسا هانم يقول...

انا لسه سهرانه
وخدت اول تعليق

فرنسا هانم يقول...

المشكله ياسوووووووووو
انا خايفه تتهور فى يوم وتعزم كل صحابك والعمال اللى شغالين معاك على السينما
وكلهم يعتذروا
فى الحاله دى هتصيف فى السينما

اهو ده عيبه يقول...

واضح كده من تحليلك للفيلم انه يستاهل الواحد يتفرج عليه

اما حكاية المعاكسة دى فالظاهر بقت طقس يومى فى حياة كل شاب ميقدرش يتاخر عنه

ربنا يهدي

Doba يقول...

بيعجبنى تحليلك وتفصيصك للفيلم كده
بتاخد كل حاجة على حدى

مليش دعوة انا عاوزة تفصيصة السيناريو بتاعك يقما نعمل الفيلم تمثيل وأداء المدونيين

امنياتى بكل التوفيق
هبة

Soooo يقول...

فرنسا هانم

ده المدونه نورت بأول تعليق لفرنسا هانم
وبعدين ماتقلقيش .. انا اخري يوم ما افكر اعزم الصنايعيه اعزمهم على طقم كشري ولا كام رغيف كفته عالسريع .. ولو اتجننت وفكرت اعزمهم على السينما فعلا يبقى ساعتها مش هصيف في السينما .. ده انا هاصيف في العباسيه
وعلى فكره الحوار ده شكله اقرب مما كنت اتصور



سلاموووووووووووز

رئيس جمهوريه نفسى يقول...

بصى يا سو بما انى الفن السابع او السينماء عموما بعيده بعد الصين عندنا فنا بحاول لما اكون فى القاهره بتفرج على الافلام
بس دلوقتى فى ناقد بيشرح الفيلم على نار هاديه
تحياتى يا مان
كده ضمنت عزومه سينماء وانا فى القاهره (A) وش ملاك
سلاموز يا غالى

Soooo يقول...

اهو ده عيبه

اتفرجي على الفيلم على ضمانتي
فيلم نضيف وراقي وفيه كل مقومات السينما الجديده اللي كنا بنتمناها من ايام ظهور نجم هنيدي في فيلم صعيدي في الجامعه الامريكيه قبل ما يخرفن ويعمل اي هسس بعد كده

وبالنوسبه لنقطه المعاكسه انا شايف ان حلها ان الشباب يتجوزو من سن تلاتاشر سنه .. بس ساعتها هيموتو بدري بدري من كتر الهم والغم وتحمل المسئوليه



سلامووووووووووز

Soooo يقول...

Doba

عن قريب ان شاء الله هيظهر اول اعمالي السينيمائيه للناس بس انتي قولي ربنا يستر عشان انا خايف يكون اول وآخر حاجه
وساعتها بقى ولا هيبقى في سوووو ولا عباس

ربنا يستر


سلامي لشرفنطح



سلاموووووووووووز

Soooo يقول...

رئيس جمهوريه نفسى

ياعمنا انت تعالى بس ونورني هنا وانا اعزمك على ديشيليار فيلم مش على عزومة واحده
ولا تكونش ياد فاكر عشان انت صعيدي يبقى مش هقدر اجاريكم في كرمكم .. خلي بالك انا صعيدي برضك ولازم نعمل معاك الهووم وورك




سلامووووووووووووز

Che Ahmad يقول...

ٍسوووو
بجد بتبهرني بكلامك فى السينما
كنت عايز اروح بكره اتفرج على جنينة الاسماك ومش عارف اروحه ولا اروح ورقة شفرة

بس بجد بتجيب الفيلم م الاخر ومن غير ما تحرق فيه اى حاجة

بقولك كمان ابقي شوف السيناريو اللى معاك وظبطه ولو عايزني ممكن ابقي امثل معاك

سلاماتي يا جميل
تشي

فاتيما يقول...

واد يا سوووو
انت إيه حكايتك بقى
سيناريست و لا كاتب ساخر و لا ناقد سينمائى و لا غيه فيهم ...
بص انت مشاهد محترف
عشان كدا انت أكتر واحد فاهم كل حاجة فى السينما من أول كادر لغاية الآخر
بص بقى انت شوقتنى ادخلالفيلم دا
هعقد اتحايل على ماجد بقى و ان كنت عارفة هيقولى إيه مقدما ...عاوزة تشوفلى الفيلم هجيبهولك على سى دى
بس انااستمتعت بنقدك ...أنا دايما قبل ما اشوف أى فيلم من زمان أحب أقرى عنه الأول ....كأنى بحضر درس بكرة
و استمتعت أكتر بدقة الجدعنة بتاعتك اللى بعد الفيلم
و حلو قوى تعبير ضالة دا
تعيش و تنقد
و تتجدعن
يا واد

The Queen يقول...

تصدق انا كنت مستبوخاه من الاعلانات
بس كده ممكن اغير رأيي واروح اشوفه بس على ضمانتك

المعاكسات بقت بايخه اوي وموضه قديمه كمان معرفش الولد اللي بيعاكس بيحس بايه او ايه هدفه ؟ وفعلا ليه مبيفكرش ان ده ممكن يكون بيحصل لأخته او حبيبته او مراته او بنته او اي واحده تخصه في نفس التوقيت اللي هو بيضايق فيه بنت بكلماته الوقحة
تعرف حل الموضوع ده ايه ؟ انهم يرجعوا يعملوا زي زمان .. بوليش آداب منتشر في كل الشوارع ولابس مدني واللي يتظبط بيعاكس بنت يتحلق له على الزيرو " بس دي هيعتبروها موضه "" هههههههه مفيش فايده .. يبقى يدفع غرامة محترمة هي دي اللي هتأدبه

ka2en Makboot يقول...

السلام عليكم

طلة سريعة بعد غياب
والله انا احيي فيك انك متابع للافلام العربى انا بصراحة ماليش فيها خالص

لاننا بصراحة مقلدين ومش مبدعين ومش باين لنا اننا هنبدع في يوم من الايام

انا ماشوفتش كامب ولا ورقة شفرة

بس احساسي ان ورقة شفرة ده النسخة المصرى من دافنشى كود و الاروع منهم الرواية نفسها لدان براون , التقليد واضافة الطابع المحلى مهما كان مش هيبقى زي الاصل و الفكرة اتحرقت خلاص.

سلامات كتيرررر

و تحيـــاتى

مهندس مصري بيحب مصر يقول...

الله عليك يا سوو
ناقد كده :)

غير معرف يقول...

وانا بسمع كلامك ده يا سوووو
حاسه انى بتفرج على نشره اخبار روتانا سينما هايييل احييك
انا كاتبه موضوع حلو ف مدونتى شبيه بالاخبار برضه يا ريت تقراه وهتدعيلى

بنت مصريه يقول...

انا صاحبه التعليق اللى فات ياسووو نسيت وكتبت غير معرف معلش

Desert cat يقول...

انا شوفت زمان فيلك رجال لا تعرف المستحيل
علشان كدا انا مش متغربة من اعجابك بالفيلم ...
بالنسبة للمحوظتين انا كمان ملاحظهم ودلوقتى الحجة معروفة لما تقول لولد عيب او اعتبرها امك حتى مش اختك يوقلك وانا اعمل ايه ما انا مش عارف اتجوز على اساس انه كدا بيبر نفسه يعنى
نيجى للملحوظة التانية صحابك بيتحججوا علشان مش يروحوا سينما ليه يا سوووو ده انا ساعات بنزل مخصوص القاهره علشان ادخل السينما واروح وحياتك عملتها كذا مرة اخر مرة كان فيلم طباخ الريس ... مش تعزم صحابك تانى ابقى اعزمنى انا
ههههههههههههه

Soooo يقول...

Che The Hermit

منورني يا تشي والحمدلله ان كلامي وخطرفتي عجبتك
بالنسبه لفيلم جنينة الاسماك .. انا ماشفتوش بس مود افلام يسري نصر الله غير مود الفيلم ده تماما
يعني لو انت عايز تخرج من السينما مسنتح وهيمان يبقى عليك وعلى جنينة الاسماك
اما لو انت عايز تخرج من السينما وانت مزقطط وهايبر ومعاك صحابك .. يبقى عليك وعلى ورقة شفره

ونورتني يا تشي وماتبقيش تختفي كده تاني



سلامووووووووووووز

Soooo يقول...

فاتيما

الله يكرمك يارب
بس انا ياستي ولا حاجه من دول .. ولو جاز تعبير اني سيناريست فابقى سيناريست فاشل بدليل اني اهو ولا حد يعرفني ولا في فيلم واحد من اللي كتبتهم اتوافق عليه موافقه نهائيه وابتدو الشغل فيه

واياكي تشوفي الفيلم ده على سي دي .. هتفقدي كتير قوي من متعة جو السينما
اقولك .. قولي لماجد انك هتعزمي مزتين معاكي في السينما وهو هتلاقيه سخن قوي وقاللك يالا قوام .. وانتي قدام السينما اعملي كأنك بتتصلي بالمزتين بتستعجليهم وانهم اعتذرو .. ويلا بقى يا ماجد بدل مانقنخ على روحنا ونتفرج عالفيلم
ايه رأيك في اقتراحاتي؟؟؟؟

وعلى فكره .. انا ولا عملت حركة جدعنه ولا بتاع .. انا قلت اعمل حركة الجدعنه لو حصل مد ايد على اي بنت واتعدى الموضوع المعاكسه بالكلام .. لكن الحمدلله ربنا ستر وماحصلش

نورتيني ويارب تنوريني دايما




سلاموووووووووووز

Soooo يقول...

The Queen

ياقهلا ياقهلا
انتي رحتي فين يابنتي
علقتي مره ولا مرتين واختفيتي كده ليه
لعل المانع خير يارب

وعلى فكره
اقل حاجه في الفيلم هي الاعلان
تقريبا اتعمل كروته ومالحقوش يظبطوه كويس
بس كده احسن .. عشان تروحي الفيلم وتستمتعي بيه اكتر وماتحسيش انه محروق ولا حاجه

واوعدك اول ما امسك البلد هارجع بوليس الاداب والبوليس السياسي .. واي حد هنمسكه بيعاكس اي بنت هنلبسه قضية ازدراء اديان وقلب نظام الحكم
اي خدمه



سلاموووووووووووز

Soooo يقول...

كائن مائي

اقولك على حاجه
روحي الفيلم
ولو لقيتي اي حاجه عن شفرة دافنشي ليكي اللي انتي عايزاه
اقولك على حاجه تانيه
اقسملك بالله العظيم ان الفيلم ده احسن فيلم عربي اتعمل من زمان قوي قوي قوي
روحي واتفرجي عليه واحكمي بنفسك

وماتختفيش كده تاني .. ولا هم الطلبه اللي بتدرسيلهم احسن مننا ؟؟؟؟



سلامووووووووووووز

Soooo يقول...

مهندس مصري

الله يكرمك يا هندزه يارب
والله انا ولا ناقد ولا بتاع
انا بس باهييس شويه

انت فين ياعمنا؟؟
هنا ولا هناك؟؟؟




سلاموووووووووووووز

Soooo يقول...

بنت مصريه

قريت موضوعك يا مصيبه انتي
سوري لو لفظ مصيبه ده ضايقك بس انتي فقر بجد ومواضيعك كلها دمها خفيف

والحمدلله ان شوية الخطاريف اللي باخطرفها بتعجبك ويارب تفضل عاجباكي على طول



سلامووووووووووووووووز

Soooo يقول...

Desert cat

عارفه بقى ياقطه
شيكو وهشام وفهمي في الفيلم ده باين عليهم انهم نضجو بطريقه حلوة
وبقو بيسمعو كلام المخرج ومدير التصوير وبينفذو كلامهم بطريقه خلت منظرهم طلع احلى من الفيلم بتاع رجال لا تعرف المستحيل

وانا ياستي مستعد اعزمك على الفيلم الجاي اللي هاروحه
شوفي انتي امتى وفيلم ايه وانا هعزمك
بس انتي اللي هتجيبي البوب كورن على حسابك .. انا بقولك اهو




سلاموووووووووووووووز

غير معرف يقول...

رغم أنى مقاطع السينما العربية من سنين طويلة لندرة الرومانسية ..إلا أن نقدك و تعليقك أستاذ أحمد لهذا الفيلم جعلنى أقرر مشاهدتة عند عرضة فى بورسعيد .. و نقدك يؤكد أنك تملك موهبة عبقرية شكرا لتعاملك مع الفيلم بهذا النقد الموضوعى بعد أن أصبح النقد فقط لاظهار العيوب ..
أنت إنسان جميل يا سوووو ..
و أرجو أن القاك قريبا بأذن الله تعالى .
أبو خالد

wanna b a physician يقول...

انا ياعم مستعد اجى معاك بس انت اعزمنى
هههههههههههههههههههههه
تحياتى

aya يقول...

سووووووووووووو العزيز

على فكرة انا بجد بحب جدا بوستات سينماتك بتاعتك

على فكرة انت ناقد سنيمائى هايل
وان شاء الله هتخلينى فى اقرب فرصة هاروح اتفرج على الفيلم ده
بجد برافو عليك
وانا من وجهة نظرى تققيم عشرة على عشرة

بالنسبة بقى للملحوظات

عارف
انا بجد بقيت اكره امشى فى الشارع المصرى
والله المصريين اتجننوا
لسعوا
والمصيبة ان اغلبهم كمان رجالة كبار

بجد حاجة تكسف وتقرف

ربنا يعفو عنا وعن الجميع

سلام يا سوووووووووووووو

فاتيما يقول...

إيه يا سووو الاقتراحات دى ؟
دانت متفائل قووى و قلبك طيب
بقى ماجد يوم ما يقرر يعرفنى بينيل إيه فى حياته العاتيفية هيعمل كدا قصادى و بمعرفتى ؟؟!!
دانت على نياتك قوى يا جرع
أنا متهيألى انو بيتكسف يمشى معايا فى الشارع إكمنى ببقى شبه والدته كدا و منظرنا موش راكب على بعضه كأن الناس بتقول علينا من همه خد أد أمه ...
اصلنا موش سبه بعض خالص و الواد أمور قوى و فيه شبه من رامى عياش بس على خفة دم موش شبهه بغلاسته و تقل دمه ( سورى لو كان معجباته و معجبينه قروا دا يعنى )
الخلاصة انى هشوفه على سى دى و آمرى الى الله
و ليك كل التحية يا صديقى

Asmaa mahaba يقول...

هههههه يا ابنى كل من هب وهب اقصد من هب ودب بقى يمثل.ومش باقى كمان غير ورقه بفره دا..اما الشباب فمفيش نخوه اصلا ونصيحه لكل بنت دبوس فى ايدها الللى يدايقها تغزه
ههههههه
انا عن نفسى معايا كاتر عشان انجز
ما تيجى ناخد خالتو فرنسا ورئيس ومهندس ونايم والمدونين ونعمل فيلم اسمه شله مدونين
ههههههه
تحياتى ليك وفكر فى الاقتراح
سومه_87

دكتور حر يقول...

ايه ده يا جدع
ده انت داهية في التحليلات

ربنا يكون في عون الأفلام من اللي زيك كده
:))

تحياتي

هناء يقول...

ضمنا عزومة على السينما لما نجي زيارة لمصر

تحياتي

مواطن مصرى نايم يقول...

انت عارف
اللى ميشجعش ان الواحد يدخل الفيلم
البوستر تحس انه بيقولك
انهم رايحيين الغزو
و نأخذ من كل رجل قبيله و الحورات دى
بس انت شكلك واثق انه حلو
اوك ندوقة لو طلع طعمه حلو
نطلب واحد كمان كمالة
سلامى ليك يا باشا

Soooo يقول...

ابو خالد

يوم عن يوم بازداد احترام لشخصيتك الجميله ولتعليقاتك الهاديه واللي بجد بتحسسني اني باتكلم مع واحد اعرفه من سنين وسنين
وبجد بجد انا نفسي تعمل مدونه عشان اتعرف عليك اكتر من كده
ونفسي اني اكتب اسمك جنب صحابي المدونين لانك بالفعل بقيت من اكتر الشخصيات اللي باعزهم وباحترمهم ونفسي اني اكسب شرف صداقتهم

وياريت تنور القاهرة قريب ويكون لي عظيم الشرف اني اتعرف بحضرتك واقعد اتكلم معاك

اللي زيك يا استاذي من الناس المحترمين .. بقو عملة نادره .. والواحد مننا لازم يمسك فيه بايده وسنانه

سعيد بكلامك وبتعليقك
وسعيد اكتر بان حضرتك بقيت بتنورني في مدونتي بشكل دائم وربنا يكرمك يارب وتفضل منورني ومنور مدونتي ومدونات كل المدونين .. بكلامك وبتعليقاتك



سلامووووووووووووز

Soooo يقول...

wanna b a physician

ياسيدي تآنس وتنور والله
والف شكر على مرورك وتعليقك




سلامووووووووووووووز

Soooo يقول...

aya

الله يكرمك يارب
بس انا ياستي ولا ناقد ولا حاجه
انا باكتب اللي باحس بيه
ولو ان في ناس كتير قوي شايفين اني عديم الاحساس بس ده رأيهم وهم احرار

وفعلا انا معاكي ان المعاكسات زادت قوي وده تقريبا من كتر الهبل اللي بقى الناس بتتفرج عليه في قنوات الكليبات .. بقينا للاسف متخيلين كل البنات في السكه دي
ربنا يسترها علينا وعلى ولايانا




سلاموووووووووووووز

Soooo يقول...

فاتيما

يا فاتيما اسمعي كلامي انتي بس
انتي مش فاهمه دماغ الشباب شغاله ازاي
اعملي بس اللي قلتلك عليه وقوليله انك خارجه مع شلة بنات من اللي اتعرفتي عليهم عن طريق النت ورايحين سينما .. بس قوليهالو من باب عايز تيجي اهلا وسهلا مش عايز براحتك عادي يعني
وشوفي هيكون رد فعلو ايه


منتظرين الرد بعد تطبيق الخطه




سلامووووووووووووووز

Soooo يقول...

somaa mahaba

اقولك حاجه
الفيلم ده مش داخل في جيبي ولا مليم من دخولك ليه ولا حاجه
بس لو شوفتيه هتقولي نفس كلامي وهيعجبك قوي
جربي كده


ملحوظه
كنت بافكر في الحوار بتاع شلة المدونين ده زمان لما حاولت اتعرف على المدونين وكنت ناوي اني اعمل الموضوع ده بالناس اللي هاييجو يقابلوني لما طلبت مقابلتهم .. لكن للأسف اللي قابلوني ساعتها من صحابي المدونين حوالي اتنين تلاته .. والباقي تحجج واعتذر .. فقلت بلاها الواحد يرخص نفسه اكتر من كده ويكمل المذكرات اللي ابتدى يكتبها وبعد كده ينسحب بهدوء




سلاموووووووووووووز

Soooo يقول...

دكتور حر

وانا اقول المدونه نورت ليه
اتاري الدكتره هنا

منورني والله يا دكتور
وانا ياسيدي ولا ناقد ولا حاجه
انا واحد بيخطرف وبيكتب اي كلام والسلام

وربنا يكون في عون الافلام مني؟؟؟
ماااااشي يا دكتره
لن اتنازل عن هذوها الكلمه وهذوها الاتهام غير بعزومه على طبق كشري
نورتني يادكتور الحقيقه




سلاموووووووووووز

Soooo يقول...

هناء

انا مش مصدق والله العظيم
انتي هناء بجد ولا انا بيستهيألي؟؟؟؟
يعني انتي انتي فعلا ولا الزهايمر لحس نافوخي؟؟؟

ايه يابنتي اختفيتي عن مدونتي كده ليه
ده انا كنت باجيلك واعلق عندك وبتابع مواضيعك لغاية مالقيتك مش معبراني وقعدت اسأل نفسي هو انا زعلتك في ايه ؟؟

لكن على اي حال
لو كنت زعلتك في حاجه وانا مش قاصد انا متأسف جدا جدا
وماتغيبيش كده تاني
وياستي انتي نوري مصر بزيارتك وانا اعزمك على كل الافلام اللي هتبقى نازله




سلاموووووووووووووز

Soooo يقول...

مواطن مصرى نايم

طب اقولك انا الانقح من حوار البوستر
انا لما وقفت قدام بوستر فيلم كامب عجبني مووووت وقررت ادخل الفيلم عشان شكل البوستر بس
ولما دخلته لقيته بعيد عن البوستر بطريقه رهيبه
وكنت عايز اضرب نفسي مليون صرمه عشان دخلت الفيلم

ومن هنا اتعلمت اني ما احكمش على اي فيلم من مجرد البوستر

ودوقه ياسيدي
ولو ماطلعش حلو انا هبقى اعزمك على طبق ام علي بالقشطه والعسل والمكسرات




سلاموووووووووووووز

هناء يقول...

لا و الله مش زعلانة منك و بزور المدونة بس مقصرة في التعليق لضغط الشغل و كمان مش بدخل من البيت على النت كثير

انا عارفة اني لو جيت مصر عندي اخ جميل اسمه سوووو

سلام

خايف من الحقيقة يقول...

شوف ياقمر

انا قريت امبارح

حاولت بعد كده اعلق

بس قلت لا يواد
حاول تجيب الفيلم وتشوفه
اصل اخوك برضه غاوي سينما
بس العربي يعني بظروفها
المشكله انا بره مصر وعرفتش اجيبة نت
طبعا مقدرش اعلق على الفيلم والا اكون مش موضوعي
بس بجد انت شوقتني اشوفه

سلاموووووز


اه سوري
سلاموووووز دي بتاعتك
خليها
الى ان نلتقي

Desert cat يقول...

هتعزمنى يا سوووووو بجد
ط استنى اشوف لك يوم فاضى
بص يا سيدى
بس يارب مواعيدى تتوافق مع مواعيدك
انا فاضية الجمعه والسبت والاحد والاتنين والثلاثاء والاربعاء والخميس والجمعه برضه
شوف اليوم اللى يناسبك وانا موجودة
دى سينما يا ناس

كاميليا بهاء الدين يقول...

كعادتك .. سخى فى اعطاء الدرجات

لك اسلوب مميز فى النقد
قد لا اكون قد صادفت الى الآن مثله
اسلوب ببنى لا يهدم

فى انتظار السيناريو الخاص بك
مش عارفه هاشوفه ازاى
بس اكيد حد من اصحابى هايقولى


تمنياتى بالتوفيق دوما
وتحياتى لاخى العزيز

كاميليا

walaa يقول...

تصدق يا لاسوووو انا لما بتفرج على فيلم باخد بالى من القصه حلوه ولا لا وبس خلاص
ولا باخد بالى من اى حاجه من اللى انت قولتها دى ههههههه
بس بعد كده هاخد بالى
بجد تحليل رائع
انت تنفع كاتب ومخرج ومحلل
لانك ابدعت فى التلاته صراحه


اما بقه المعاكسه ربنا يهدى الشباب يارب
تحياتى ولاء

المـــفـــــــقــــــــوعـــــة مــرارتـهــا يقول...

أنا مقاطعة أفلامالموسم ده كلها
مافيش فيها فيلم عاجبني
أصل الفيلم عندي بيبان من عنوانه
وكلهم عناوينهم ماتسرش

Soooo يقول...

هناء

ربنا يكون في عونك ياستي ويفك ضغطة شغلك دي عشان تنوري المدونه بتعليقاتك على طول

وانتي بس تعالي مصر وكلنا اخواتك وهتلاقينا عاملينك بروجرام سوياحي انما اييييييه
موعتبر




سلامووووووووووووز

Soooo يقول...

خايف من الحقيقة

اقولك حاجه
الفيلم ده لو شفته عالنت او عالكومبيوتر هتحس انه فيلم ساعة عصاري
الفيلم خفيف قوي ولذيذ قوي .. بس الاحسن انك تشوفه سينما
وبما انك في بلاد الغربه يبقى ياسيدي اول ماتنزل مصر ان شاء الله قولي وانا هاجيبه دي في ديهايه واعرف واحد صاحبي عنده قهوة فيها بروجكتور .. ونشغل الفيلم ونطفي النور ونمنع التدخين ونستعبط وكأننا في سينما

ايه رأيك في الافتكاسه دي؟؟؟؟؟





سلامووووووووووووووز

Soooo يقول...

Desert cat

والله ياقطه انا ماعنديش اي مانع
شوفي اليوم اللي يناسبك وقوليلي ونطلع على اي فيلم تختاريه
بس برضه زي ماقلتلك .. البوب كورن عليكي انتي




سلامووووووووووووز

Soooo يقول...

كاميليا

كاميللو اختشي حبيبتشي
بقى انا سخي في الدرجات وبابني في التحليل مش باهدم .. طب اقري الموضوع تاني وشوفي انا مبهدل فيلم كامب ازاي

الحكايه اني لما باشوف حاجه عجباني باقول رأيي فيها بصراحه
وانا قلت رأي شخصي
لا انا ناقد ولا محلل وماقدرش اوصل للمرحله دي اصلا

وبعدين السيناريو الخاص بي ان شاء الله بمجرد مايقولو اوك ويتصور وينزل الفيلم هبقى احتفظلك بنسخه تصوير سينما من موبيل .. اوعدك انك مش هتشوفي منها حاجه غير روس الناس اللي قاعده في السينما
اصل انا مصور موبيلات محترف مش اي كلام




سلامووووووووووووز

Soooo يقول...

walaa

اقولك على حاجه .. انتي لما بتشوفي فستان او تايير معروض في محل .. بتقولي ده يليق عليه جزمه لونها كذا وشنطه لونها كذا .. ولما بتشوفي حد لابس حاجه بتقولي مابينك وبين نفسك لو الشخص ده لابس كذا على كذا الموضوع هيليق اكتر

انا زيك كده تمام .. بس في حوارات السينما
لو انتي ستايلست .. يبقى انا محلل
وبما اننا مش متخصصين وبنتكلم بمجرد آراء شخصيه يبقى كل ده تحت بند الخطاريف .. وادينا بنهيس

نورتيني وشرفتيني بتعليقك ده ياستي




سلاموووووووووووووز

Soooo يقول...

مفقوعة مرارتي من حماتــــــــــــي


بصي .. هو الحكم على الفيلم من مجرد عنوانه ده يعتبر غلط لكن انتي عندك حق برضه
بس فاكره فيلم شورت وفانله وكاب .. الفيلم ده كان حلو قوي .. عيبو الوحيد هو اسمه

اقولك .. روحي شوفي الفيلم .. ولو ماعجبكيش انا ملزم قدام الناس اللي بتقرى تعليقك وردي .. ملزم اني ارجعلك حق التذاكر
بس استني لغاية ما اقبض




سلاموووووووووووووز

د/اجدع بنوته يقول...

كامب وحش ليه كده بس

انا كان نفسى ادخله

وورقة بفره ده شكله فعلا زى ماانت بتقول عليه بالظبط

وبعد كده لما تطلع رحلات مكوكيه

ابقى خدنى ف جيبك

وانا مش هرفض ابدننننن

مجداوية يقول...

رغم انى مبقاش عندى أى اهتمام بالسينما وخصوصا العربية والمصرية خاصة لكن أنا بأتابع ما تكتبه لأسلوبك وطريقتك فى النقد والتحليل لأنك فاهم وعندك فكر لكن طالما الموسيقى هى الحاجة المقرفة اللى فى الفيلم تديها تسعة من عشرة ازاى !!! ايه الكرم ده

تحياتى يا سووووووووو