سينماتك .. وجوه جديدة

لأن السينما هي ايقاع الشباب .. او اغلب الاعمال بتعبر عن شباب كل جيل .. بالاضافه طبعا لوجوب تطعيم هذا النوع من الافلام بأفلام يقوم ببطولتها كبار النجوم لخلق نوع من أنواع التواصل الفكري بين الجيلين

----

المقدمة دي لازم تتقال طول مانا عايز اتكلم عن تجربتين سينيمائيتين قام ببطولتهم مجموعة من الشباب

اول تجربة هي فيلم كامب

والفيلم ده خنقني وقفلني زياده مانا كنت مخنوق ورايح عشان افك عن نفسي شويه

لا تمثيل ولا قصه ولا سيناريو ولا موسيقى تصويريه ولا تصوير ولا مونتاج ولا اخراج ولا اي حاجه في رغيف

وكل الناس اللي كانو داخلين معايا الفيلم وماعرفهمش رأيهم نفس رأيي وكانو عايزين يعملو ثورة على السينما مش عشان يرجعولنا فلوسنا .. لأ .. عشان يخلونا نطلع من السينما وفي داهية الفيلم

----

وخرجت للشارع تاني بعد ماخلص الفيلم وانا في قمة خنقتي والي زادت بطريقه بشعه .. لفت انتباهي بوستر فيلم ورقة شفره واللي كتب القصه والسيناريو بتاعه احمد فهمي اللي كتب فيلم كده رضا .. بس فيلم ورقة شفره ساعده في كتابة السيناريو هشام ماجد

وفي ناس ممكن تفتكر احمد فهمي و شيكو وهشام ماجد .. من فيلم قديم كانو عملوه وصوروه بكاميرا هاند كام .. كان اسم الفيلم رجال لاتعرف المستحيل

والفيلم ده بالنسبه للجيل بتاعنا احنا من مهتمين السينما ثورة صريحه واعلان مننا على التمرد على كل ماهو قديم وبالي في عالم السينما .. واللي اخرج فيلم رجال لاتعرف المستحيل شاب اسمه احمد عمرو

--------

افتكرت وانا على باب السينما وباقطع التزكرة ان في واحد قاللي ان الفيلم ده بيتريقو فيه على الافلام العربي زي ماهو باين من الاعلان بتاع الفيلم من افية احمد الفيشاوي لما بيقول

!!!! من النهارده مافيش لجنه .. انا اللجنه .. انا اللجنه

------

ولاني كاتب فيلم باتريق فيه على بعض الاكلاشيهات في السينما المصريه زي فيلم مافيا واللي مقتبس بعض الحاجات من الفيلم اللي كتبته وحاططها في المذكرات اللي بانزلها على المدونه حاليا .. وكنت في الفيلم بتاعي باتريق على افلام تانيه زي شمس الزناتي وناصر سته وخمسين وايام السادات وأبي فوق الشجره والخطايا ودعاء الكروان وشيء من الخوف وافلام تانيه كتير .. واللي قالي على فيلم ورقة شفره وقاللي اروح اشوفه هو احد المقربين لي واللي قرى السيناريو بتاع الفيلم اللي انا كتبته .. قلت يبقى خلاص بقى .. أمري لله .. ادخل اشوف الفيلم وعلى الله يرفع من روحي المعنويه شوية بعد الانتكاسه اللي انتكستها من الشيء اللي اسمه كامب .. وقطعت التذكره .. ودخلت فيلم ورقة شفرة

اعز انا الفيلم اللي يخطفني في اول مشهد .. والفيلم ده خطفني في اول مشهد خطفه عدالة قوي .. وبالرغم من قلة الامكانيات المتاحه قدام فريق العمل لكن تم تنفيذ المشهد بحرفيه شديده .. تقطيع كادرات هايل .. حركة كاميرا هايله .. موسيقا تصويره قوية .. ويبدأ الفيلم

-----

القصه والسيناريو بيلعبو في منطقه بدايتها عاديه جدا وتم تناولها في افلام كتير .. لكن عالجوها بطريقه جديده جدا وقوية جدا وكوميديه جدا جدا جدا

القصه والسيناريو والحوار .. لـ أحمد فهمي وهشام ماجد واللي بيمثلو في الفيلم ومعاهم شيكو .. والحقيقه هم فاهمين بعض حلو قوي .. من أيام فيلمهم بتاع زمان .. فيلم رجال لا تعرف المستحيل .. وده ادى الفيلم مصداقيه حلوة قوي في انهم اصحاب في الحقيقه قبل مايكونو اصحاب في الفيلم

تقييمي للفيلم من ناحية القصه والسيناريو والحوار .. عشره من عشره ولأول مره الاقي فيلم مصري بيتكلم في قضيه قويه جدا جدا ومن غير شعارات وهتافات واكلاشيهات مالهاش لازمه .. ومش هحرق الحبكة دي وهسيبكم تشوفو الفيلم بنفسكم وتحكمو براحتكم

------

من ناحية التمثيل .. اداء قوي ومبشر بمجموعة ممثلين هيكون ليهم دور في المستقبل .. ولكم ان تتخيلو ان اقل ممثل كان احمد الفيشاوي بالرغم من حالة الكوميديا اللي عملها .. تخيلو بقى ابطال الفيلم الاساسيين عاملين ايه .. العيال دي بجد بتمثل سينما بأداء بسيط وبعيد عن التكلف والمبالغه .. واللي كان بطلها في الفيلم .. للاسف الفنان الكبير محمد متولي اللي كان بيستظرف جدا وتقريبا حاول يجاري الممثلين من ناحية الكوميديا .. لكن هو بيمثل من مدرسه .. وهمّ بيمثلو من مدرسه .. وطبيعي ان مدرستهم تكون اقرب لقلوبنا باعتبار ان مشاهدين الفيلم معظمهم من الشباب ان ما كانوش كلهم .. تقييمي للفيلم من ناحية التمثيل .. تسعه من عشره

------

الموسيقا التصويريه .. خطرفت في الاول لما تقريبا مؤلف شريط المزيكا حط موسيقا قديمه او كلاسيكيه الى حد ما في اول احداث الفيلم في مابعد اول مشهد .. واللي ساعتها كانت مشاهد عاديه في الجامعه وكده .. لكن لحق نفسه وظبط الليله ومشي مع ايقاع الفيلم بعد كده .. تمانيه من عشره

------

التصوير .. اكتر حاجه مقرفه في الفيلم لما يكون كوميدي هي التصوير .. لأنه لازم يكون مكمل للإفيه او القفشه اللي بيقولها الممثل او اللي بتطلع من خلال مجموعة الممثلين .. لكن هنا المصور كان احساسه حلو قوي وفهم ازاي يظبط الافيه ويديلو حلاوة اكتر .. واهتم برضه بخلق زوايا تصوير جديده .. زي مشهد الخناقه في الاتوبيس بين الاتنين الصحاب والبوليس بيطاردهم .. وزي برضه مشهد البداية اللي زي ماقلت في الأول خطفني خطفه حلوة قوي .. وادي التصوير تسعه من عشره .. والواحد الناقص ده عشان ما اهتمش بجو الاقصر وأسوان واللي صورو فيه تقريبا نص الفيلم

------

الديكور .. حلو قوي قوي .. وكنت ملاحظ ان مهندس الديكور بينه وبين نفسه بيقول ايه يا جدعان كل دي لوكيشنز مطلوب منني اجهزهم .. لكن جهزهم وطلعو حلوين قوي ومعبرين قوي .. وتمت الاستفاده من بعض التأثيرات في الديكور زي جو العشه البوص اللي تم توظيفها في خلق تأثيرات بالضوء وتصويرها .. واديله عشره من عشره

------

المونتاج .. في الافلام الشبابيه عموما بيكون الايقاع سريع .. وفي فيلم كوميدي شبابي لازم يكون الايقاع اسرع .. وانا طول الفيلم ماحستش بلحظة ملل واحده بل بالعكس بعد ماخلص الفيلم كنت عايزه يطول شويه من كتر مانا مستمتع .. وادي المونتير عشره من عشره

------

الاخراج .. لـ امير رمسيس .. وهو نضج بطريقه حلوة قوي بعد اخر تجربتين ليه في السينما .. واللي هم فيلم آخر الدنيا وفيلم كشف حساب .. لكن في الفيلم ده بيقول انا بتاع كللو .. بس انتو ادوني خامة وورق حلو اقدر العب بيه وادوني ممثلين مجتهدين زي الممثلين اللي عملو الفيلم .. برافو يا أمير .. وبجد اتوقع ليك ولكل فريق العمل انكم لو استمريتو على المنوال ده في خلال اقل من خمس سنين هتخلقو حالة امتاع حلوة قوي

عشره من عشره يا امير .. ولو كنت معايا وشايف ابتسامة الناس وفرحتهم بالفيلم والجملة اللي سمعتها من اكتر من شخص وانهم اول مره يدخلو فيلم عربي ويستمتعو بالقدر ده .. انا متأكد .. انك وباقي فريق العمل من سيناريست وممثلين ومصور ومونتير ومؤلف موسيقا تصويريه ومهندس ديكور .. هتفرحو ثانيه واحده بس .. وهتخافو ايام وشهور .. عشان هتبقو عايزين تحترمو رأي الناس اللي استمتعو بالعمل ده

-------------------

كام ملحوظه بقى في التيك آواي

هي الشباب مالها .. بجد يعني في ايه .. كل مايشوفو بنت ماشيه في الشارع ولو حتى معاها اهلها بيعاكسوها .. وبيعاكسوها بطريقه بايخه ومستفزة لدرجة اني كنت هتخانق مع شلة شباب واقولهم هي دي مش زي اختك ولو ماعندكش اخت ياخي اعتبرها بنتك لما تتنيل على عينك وتتجوز .. لكن لما لقيت عددهم كبير واشكالهم اشكال ضاله .. قلت يا واد ماتدخلش غير لو حصل مد ايد .. والحمدلله ماحصلش والا كنتو هتلاقوني دلوقتي في مشرحة زينهم

---

حد من صحابي المدونين استغرب قوي اني لما باعمل رحلات مكوكيه للسينما باروح فيلمين ورا بعض .. لكن المشكله اني بابقى عايز اشوف فيلم واحد وافضل اتحايل على صحابي وحبايبي يجو معايا واعزمهم لكن بيتحججو بأي حجج .. فبروح رايح السينما لوحدي واتفرج على فيلمين .. لوحدي

سوووو