الاثنين، ١٧ شوال ١٤٢٨ هـ

حته نيولوك

بينما كنت احتسي قدحا من الـ .. قدحا ايه بس .. ماجاً .. احتسي ماجاً من النيسكافيه البلاك
وادخن لفافة تبغ كولوباطرا بوكس .. واشاهد المدونات المختلفه على الشبكه العنكبوتيه
.. فوجئت بصوت نواعمي .. يقول لي
خبر ايه يا سوووو .. ماتحس على دمك بقى يا اخي
استغربت للغاية .. وبلغت درجة الاستغراب بي ان ظننت ان لفافة التبغ التي ادخنها لفافة من نوع تبغ آخر .. غير الكولوباطرا البوكس
.. ثم سمعت الصوت مرة أخرى
ياعم سوووو .. انا المدوَنة بتاعتك ياعم
بسم الله الرحمن الرحيم .. سلام قولا من رب رحيم .. هذا ماقلته لنفسي
فأجابتني مدونتي وقالت
ياعم حرام عليك بهدلتني معاك .. يعني كل المدونين مظبطين مدوناتهم وعاملين فيها شغل ومدلعينها .. وانت ولا معبرني يا اخي
منهم لله جدي جووجل وابويا بلوج سبوت اللي رخصوني ورخصو اخواتي وخلونا مع كل من هب ودب
حاولت ان اتهرب من كلامها .. فقلت لها
.. انا عارف اني مبهدلك معايا .. بس هنعمل ايه .. وبعدين يامدونتي يا حياتي ياروحي .. الشكل مش كل حاجه
كفاية المواضيع اللي باتكلم فيها واللي الحمدلله ابتدت تعجب الناس
.. فأجابتني ودموعها تهمر من الشاشة عالكيبورد
وهو انا طلبت منك تعمللي عملية تجميل زي نانسي عجرم ولا هيفاء وهبل .. انا كل اللي عايزاه منك انك تهتم بي شويه .. تدلعيني بحتة مزيكا تشتغل توماتيكي توماتيكي لما حد يتفرج علي .. تظبطني بعداد زيارات كده عشان اتنطط على اخواتي واقولهم ده انا جالي قد كده بني آدمين .. انشالله حتى تحط صورة كده في جنبي الشمال اداري بيها شكلي وتسترني في الشتا واتغطى بيها واهو الشتا داخل علينا .. اي حاجه يا سوووو بس حسسني اني منك وانت منني .. استر علي يستر عليك ربنا ياشيخ
والحق اقول .. واقول الحق .. لقد تأثرت بكلماتها الرقيقه
فقررت ان ادلع مدونتي .. ولكن كيف السبيل وانا طور الله في برسيمه فيما يتعلق بحوارات النت
وهنا .. قرر سوووو أن يقتحم مجالا جديدا .. يضاف الى باقي المجالات التي اقتحمها
وابتدى سوووو في الدعبسه .. وكما هو معلوم عند الجميع .. الدعبسه بداية كل طريق للنجاح
كانت البداية بسؤالي للأخ الشنكوتي الكبير .. وكان نعم العون
.. كان خيرا من الكثير والكثير من المدونين الذين استنجدت بهم ولكنهم حلقولي بمكنه تلمه
ولقد حلقو لي عالزيرو
.. ولم يكتف الشنكوتي بتوجيهاته لي فيما يتعلق باضافة عداد زوار او صور عالجنب ولينكات وحوارات
بل اعطاني ما وجدته كنز ثمين
كنز ذو قيمة لا يعلمها الا من هور طور زي حالاتي
اعطاني لينكاية لموضوع عاملاه الاخت الكبيره بنت مصريه .. وهو الموضوع ده
.. واستكشفت اسرار التدليع والتظبيط .. وبعد ان دلعت مدونتي
.. قالت لي بصوت فيه حنان ورجاء
سوووو .. وحياتي عندك ياروح قلبي .. ممكن تغير صورة نجيب سرور وتحط حاجه تانيه يكون دمها خفيف ؟؟؟؟
لااااااااااااااا .. مش انا يا اختي .. مش شوية حنيه ودلع اللي هيخلوني اريل على روحي وانسى مبادئي
مش نجيب سرور اللي اتخلى عنه مهما كان
.. فقطاعتني مدونتي قائلة
يا روح قلبي انا ماقلتش ترمي صورته ولا تتخلى عن رمزيته .. بالعكس .. انا اذا كان علي عايزاك تعمللو مواضيع عندي هنا مش مجرد صورة .. بس ياسوووو انا لاحظت ان في ناس بيدخلو وبيشوفوها مابيبقوش عارفين ده مين .. وفاكرينك شبه الصورة .. وانت ولا مؤاخذه يعني من غير احراج .. اقرع وبنضاره وبكرش ووشك مكلبظ .. يعني مش شبهه خالص .. وكمان حاجه تانيه بصراحه انا ماكنتش ناويه اقولها يعني
قاطعتها متنرفزا ومتشقلطا ومستغربا
حاجة ايه .. انطقي .. في حاجه مابينك وبين نجيب سرور يا فاجره؟؟؟؟
ايه .. تهون عليك العشره وتتهمني في اعز ما املك .. مش انا اللي تبيعك عشان شاعر عظيم زيه .. انا قصدي انت فين .. انت حاطط صورته وناسي نفسك وناسي فكرك .. لازم يبقى ليك شخصيه مستقله
هممم .. كلام معقول بصراحه .. بس لا مؤاخذه يعني .. احط صورة رمزيه ازاي .. ولمين .. وليه
قالت المدونه .. فكر وشوف انت مواضيعك عامله ازاي .. وبتتكلم ازاي .. بتحب ايه .. اربط كل ده بشخصيتك وشوف ايه اللي يتحط
استرجع سوووو كل ما يختزنه من معلومات عن نفسه وعن احب الشخصيات الى قلبه في شتى المجالات
وفي وسط كل ده .. تذكرت افيه او قفشه كوميديه .. اعتبرها بحق .. اعلى قفشه كوميديه على مر العصور
كانت في فيلم تلاتين يوم في السجن .. عندما كان محمد رضا وثلاثي اضواء المسرح في السجن .. وبعد ان قام جورج سيدهم بوضع الشبّه في طعام المساجين .. فأكلو وبوقهم لزق .. وبعد ان فك التلزيق قال محمد رضا وهو ممسكا بالضيف احمد
انت منطهدني!!؟؟
فأجابه الضيف احمد .. لأ .. انا من طنطا
فوجدت في شخص الضيف احمد كوميديانا قريب الى قلبي والى عقلي ايضا
بل وجدته اكثر قربا مما كنت اتصور .. نظرا لما قرأته عن سيرته الذاتيه والتي تكاد تكون قريبه من حياتي في عالم التمثيل الجامعي .. قبل ان اترك هذا المجال .. واتجه الى عالم الرقص الايقاعي والباليه لما اتميز به من رشاقه تفوق الوصف .. متمثلة في كرشي اللاوذعي
.. وعندها ... قررت ان اضع صورة رمزيه له
على امل ان ابقى كويس سيكا في الفوتوشوب واعمل صورة لنفسي تكون معبره عنني بجد
وسألت مدونتي .. ايه النظام؟؟؟
فنظرت لي بدلال تجيب بالايجاب .. ثم قالت وهي تلبس حلتها الجديده
الليله ياعمده
!!!
سوووو

هناك ٩٩ تعليقًا:

هناء يقول...

و الله عندها حق، عجبني البوست
ما تنساش توصل سلام حار مني لهيفا اهبل

سلاموووز

Doba يقول...

انت بجد بجد فطستنى من الضحك عليك انت والمدونة حسستنى انك بتوضب شقتك انت وعروستك وهيه عمالة تدلع عليك

بس تصدق انها معاها حق - يكفى انك حطيت فنجان قهوة فيها وده معناه الدماغ العالية وكمان صورة الضيف احمد وده معناه انها كوميدية ودمها خفيف وكمان معانا سوووو بالكرش الفظيع ودى معناها الاكتئاب والعقل

هههههههههههههههههههههه

مبروك المطرح الجديد وعقبال متفرشه كمان وكمان وتكمله الاجهزة الكهربائية وانا عليا المروحة

سلالالالالالالالالالالالالالاموز
هوبا

ghalia يقول...

مبروك النيو لوك الجديد يا سووووو
على فكرة موضوع بنت مصرية انا كمان استفدت منو جدا جدا فى مدونتى
عشان كدة حطيتلو رابط عندى من اول ما عملت المدونة علشان الناس كلها تستفيد

بس فى حاجة ناقصة
عايزين مربع شات صغنون عشان نبقى نرغى فيه ونسلم على بعض وكدة يعنى

truelove يقول...

والله فقري يابني وكويس انك رحت للبرنس ايهاب باشا الله اكبر عليه ربنا يحرسه يارب ومبروك ياعم سو دخولك عالم المدونات واظن كده المدونة بقت عروسة ليلة زفافها يالا سلامي ليك يافندم ويجعلها مبسوطة وراضية

غير معرف يقول...

بقوا خمسة اهو
بجد جامدة اخر حاجة و فعلا انا مستانية صورتك انا عايزة اعرف انت شايف نفسك ازى ؟
ربنا يوفقك و مستانية الجديد و خصوصا الموضوع عن الضيف احمد زي موعدتني:)

محمود على يقول...


مبرووووك علي المدونة
عقبال الساعة

غير معرف يقول...

هممممممم بص يا سووو
انت يا مجنون يا مجنون لأن مفيش مدونه بتتكلم اصلا ههههههههههً
بس عموماً و بعيد عن الهجس حلو النيولوك و ابقي سلملي علي المدونه و بوسهالي من هنا و من هنا و متسألش من هنا و من هنا ده يبقي فين للأنك مش شايف هنا ده أصلاً ،
و لوسمحت حاول تشرب اجنبي و بلاش كوكو الضعيف علشان الاجنبي بيجلي الصدر و العقل
و مبروك يا عبقري علي انيولوك مره تانيه ^_^

rainbow يقول...

مبروك يا سوووووووو
مدونة سووووو فى ثوبها الجديد

سخريتك اللازعة اللوذعية جميلة جدا جدا
اما صورة العزيز المرهف الضيف احمد .. مش عارفة اقولك ايه بجد الانسان ده جميل جدا .. وبما انك اخترته يكون واجهة ليك يبقى انت كمان اكيد ( ما تخافشى مش هقول فى مصر ) انسان جميل

تحياتى وامنياتى بانتاج غزير بعد ما صالحت مدونتك وخليتها توماتيكى توماتيكى عقبالى يا رب
اصلك ما تعرفشى العبده لله ام جهل فى الحواديت دى التوماتيكى والديجيتال .. عجوزة اوى اصلى ههههههههه من الجيل الماضى

تحياتى مرة تانية
زيادة توكيد وكده
هدى

رحــــيـل يقول...

هقول ايه بس مجنووووووون
حلو النيو لوك ده قوى انا اول ماخلت قولت ايه غلط فى العنوان ولا حاجه
والبوست كمان
دمه خفيف جدا
برضه مجنووون
تحياتى

MarwaAshraf يقول...

هو فعلا حتة نيولوك.. التغيير سنة الحياة زي ما بيقولوا

بس هو في ملحوظة صغيرة إسم المدونة ذكوري برغم من إن اللي كنت بتتكلم معاها مش ذكوري خالص

هههههههه

معلش أصل أنا دماغي ملغبطة شويتين أو هي عادة مش مركزة.. الشغل والدنيا بقى إنت عارف

بص يا سوووووو مبروك النيولوك.. بس خلاص

سلامات

الأميره أوسه يقول...

أنا حذرتك من النسكافيه والكليوباترا
وقولتلك أشرب بوسطن أو فلوريدا
مفيش فايده
المدونه بيتاعتك دى أنا شاكه فى أخلاقها
بتتكلم بميوعه خالص
وكمان بتقولك الليله يا عمده
أرجو أنك تكون شرفت مصر
ومش بعيد تخلفلك مدونه بيبي صغيره
بس أنا كنت فى معهد الباليه أول أمبارح مشفتكش كنت غايب
والأستاذ المستر بتاع بحيرة البجع بيسأل عليك ومدام عايده كمان
ياريت ترجع لعالم الباليه
بجد الأوبرا مفتقداك

تخاريف خاصه! يقول...

حلو النيولوك...
:D

اسمع كلام المدونه باستمرار...

son's egypt يقول...

السلام عليكم
البوست جميل جدا
حسستني بالزوجة اللي محتاجة شويه اهتمام من زوجها
بس فكرة كويسة الحوار اللي دار بينك وبين المدونه كان ظريف فعلا

Rehab Mostafa يقول...

لأ جامد :D
اجمل حاجه فيه انك عملتلوه نيو لوك بسيط مش الناس اللي بتملى البلوج بتعملوه فرح وبهرجه اجمل حاجه البساطه
والحوار بينك وبين المدونه حلو أوي :D
اسمحلى اني اسرق منك شوية حاجات بقى من اللي في المدونه :$:$:$

shreen يقول...

sooo
فكره جميله جدا
حوار مع مدونتك
وبساطة وتلقائية الحوار فرضت على ان اتابعه للنهايه
ثم وجدت انى خلال فتره القراءه باكملها ابتسم
ابتسم من الفكره
ابتسم من الاسلوب
ابتسم من خفة الدم الواضحه لك ولمدونتك

وعلى العموم
انا حابارك لها شخصيا
الف مبروك على النيو لوك
والمهم كله طبيعى
من غير عمليات تجميل
عيشى حياتك بقى يا ست مدونه
وادلعى على باقى صحباتك من المدونات

واخيرا
شكرا على تعليقك الرقيق والبسيط فى المدونه عندى
ولا تعتذر ابدا على بساطه الكلمات او التعبير
كفايه بس انها عجبتك وحركت حاجه فيك
وبس
الف شكر

shreen يقول...

سوووو
البرنامج اللى استخدمته فى مدونه الصور اسمةbryce 5
ونزل بعده كمانbryce5.5
و
bryce6
وهو مش محتاج تعليم ومش معقد زى ال3دى ماكس

shreen يقول...

اللينك اهو يا سوووو
http://www.download.com/3120-20_4-0.html?tg=dl-20&qt=bryce%205.5

shreen يقول...

بص اللينك مش راضى يتحط كامل مش عافه لية
فادخل على اللينك دة
http://www.download.com
واعمل search
على
bryce 5,5
وهتلاقية ان شاء الله

كراكيب عادل يقول...

مبرووووك يا بلدياتي

MKSARAT - SAYED SAAD يقول...

اول مرة ازور مدونتك وكنت متوقع شئ اخر غير الذي وصلت الية
بجد تحفة ودمها خفيف انا ضفتك عندي
تحياتي

Desert cat يقول...

لولولولىىىىى
الف مبروك على اللوك الجديد
ويجعله وش السعد عليك انت والمدونة حبيبتنا .. عقبال ما تجيبوا عيال صغنيين
ايه التهييس ده عيال ايه
مبروك النيو لوك
وجميلة اوى صورة الضيف احمد ولا البؤين اللى تحتها ضحكونى جدا
تحياتى ياباشا

غير معرف يقول...

صباح مدحرج متنور بالورد والفل يا باشا لو حاولت تترجم ومعرفتش متسالنيش على الرتجمه هى طلعت كده
مبروك النيولوك للمدام بلوج حرم سيادتك المصون وعقبال متلو لينا الدنيا بوستات قمامير كده ينور الدنيا علينا يا غالى
تحياتى

Salma Amer يقول...

لأسف متعرفتش على مدونتك قبل كدة
بس على العموم النيولك حلو جدا وإن شاء الله يكون وشه سعد عليها وعليك طبعا

سلوى يقول...

لأ .. بجد مالكش حل

إيه يا بني ده

جامد جدا البوست

وتمثيل ورقص باليه
ولا حوارك مع الست المدونه هانم

ولا أروع

طولت أنا
سلااااااااااموز بقى

shahy يقول...

الف مبروك على التجديدات الحلوة وعقبالي اصلي خيبة زي حضرتك ولامؤاخذة

بس انا مدونتي ماتقدرش تتكلم معايا بدلع كدة دةانا كنت قطعتها

لما شفت العنوان قلت نيولوك اية هو سوووو هايعمل زي العيال بتوع الكانيش والبنطلون الواقع
بس كويس ان النيولوك طلع في المدونة
اوعى تكون انت من العيال دول اصلا

عموما خفة دمك لا يختلف عليها اتنين ماشاء الله عليك
في انتظارك لتمتعنا

تحياتي

3ala asm masr يقول...

والله من أول يوم ليا فى مدونتك وأنا رأيى أنك جامد يابنى
أستمررررررررررر
والنيو لوخ ده فظيع
نيو لوخ جامد حقيقه
تحياتى

منى يقول...

السلام عليكم
جميل قوى يا سووووووو الحوار ده
والاجمل انك طلعت ديموقراطى وسمعت كلامها انا معرفش شكل المدونه كان ايه قبل كده بس برضه اكيد الهانم كان عندها حق
تحياتى لك ولها

only spot يقول...

هههههههههه
بجد اسلوبك حلو ومضحك
عارف فكرتنى بفيلم نورماندى تو هتنزل المره دى
عموما مبروك عل النيولوك
ومستنيه البوست الجاى ويبقى احلى واجمل ان شاء الله
تحياتى

Unknown يقول...

اشكرك على زيارتك مدونتى الى اتاحتلى فرصة اكتشاف مدونتك العجيبة
لازم الواحد يصادف فى حياته العجيب و الغير مالوف عشان الحياة يبقى ليها روح شوية

جميل الحوار الظريف ده مع مدونتك و خيالك خفيف الظل يطرح علينا الابتسامة

إيمان يقول...

أهنئك على النيولوك الجديد
بس ياريت تضع شىء مهم فى النيولوك
وهى لينكات المدونات التى تزورها
اسهل فى المتابعة والتعليق

واشكرك على تعليقاتك فى مدونتى

تحياتى

غير معرف يقول...

انا اول ما دخلت المدونة قولت انا دخلت غلط ولا ايه اتاريك عملت صيانة وركبت نجف ودهنت لون جديد الف مبروك وربنا يجعلها قادم السعد عليك ياسووووووووووووووووووو

البوست اسلوبو جميل وجديد

تحياتي ياسووووووووووو ياسوووووووووووو ياسووووووووووو

Yahia يقول...

انا كمان عايز اعمل كده بس مليش نفس حتى أسأل ازاي ؟؟
عندك حل ؟؟

تحياتي

Layla يقول...

ايوة كدة يا راجل...دلع نفسك عشان نفسك تدلعك

:DDD

مبروك النيولوك

نورسين يقول...

سوووو :
اولا: الف مبروك على النيو لوك بتاع المدونة الجميله الخفيفة بتاعتك واللي أصبحت قمورة قوي
ثانيا: شكرا لسؤالك الودو عني في مدونتي واضم صوتي الى صوت شخابيط في اضافة لينكات للمدونات اللي بتدخل عليها لسهولة التواصل

تحياتي لخفة ظلك
وقلمك الرائع

Soooo يقول...

هناء

منوراني ياستي والحمدلله ان البوست وشكل
البلوج عجبك

وبعدين اسمها هيقااااااء وهبل .. وعاملين فيها مثقفين وبتقرو ميكي جيب


سلاموووووز

Soooo يقول...

doba

انتي مش فاهمه الحكايه ياهبه .. اصل انا لقيت اني كبرت على الجواز ولقيت مافيش حد بيدلع علي .. قلت خلاص بقى
ادلع نفسي بنفسي

ملحوظه هامه:
مالو الكرش بقى؟؟؟؟؟؟
ده حتى دليل على وجودي كفرد في المجتمع

سلاموووووز

Soooo يقول...

ghalia

الله يبارك فيكي ياستي .. وعقبال الانجال يارب

بنت مصريه دي لو انا اقدر اعمللها حاجه كشكر وعرفان .. اعمللها تمثال رخام بالحجم الطبيعي والله
بس تعتقدي انسب مكان ليه يبقى فين؟؟؟؟


ملحوظه:
ياستي لو عالشات امره سهل .. بس بيتقل التحميل في الصفحه
نقضيها موبيلات


سلاموووووز

Soooo يقول...

truelove

منورني ياباشا .. وطبعا هوبا الشنكوتي ده راجل زي السكر وكتاب الله

يلا ياعم ربنا يباركله بقى ويتممها عليها بالخير في خطوبته ويتجوز على خير وبركه من ربنا

منورني مره تانيه يابرنس


سلاموووووز

Soooo يقول...

Nadosha

هههههههههه
حسستيني انك خمستيهم عشان المدونه ماتتحسدش

الله يبارك فيكي ياستي
وان شاء الله قريب هعمل موضوع موثق عن المرحوم الضيف احمد عشان اقدر اوصل للناس انه ماكانش مجرد سنيد كوميدي لسمير غانم وجورج سيدهم في ثلاثي اضواء المسرح

منوراني والله


سلاموووووووووز

Soooo يقول...

محمود علي

الله يبارك فيك ياحوده
بس تصدق اني فعلا نسيت حوار الساعه ده خالص وسقطتو من نافوخي
يمكن لان الساعه بتاعة الكومبيوتر بايظه عندي ..


نورتني ياباشا


سلاموووووز

Soooo يقول...

غير معرف


حااااضر .. هبوسهالك من هنا ومن هنا
ومنورني ياريس
وبعدين انت مش ناوي تعمللك مدونه كده ونيجي نزورك فيها ياعم

ملحوظه:
لو على شرب السجاير الاجنبيه اللي بتجلي الصدر والعقل .. فأنا عقلي مجلي وممسوح اصلا من زمان .. وانت عارفني
ولو على الصدر .. فالحمدلله صدري فل الفل
كوح كوح كوحححححح


سلامووووز عشان اخد دوا الربو

Soooo يقول...

rainbow

اجدع تحيه لجرنان الدستور
يعني القلم الحر
يعني هدى اول وتاني وتالت
يعني ابراهيم عيسى اول وتاني وتالت
يعني هتحبس اول وتاني وتالت



منوراني يافندم
وياريت تعتبري مدونتي هي مدونتك تماااام


سلاموووووز

Soooo يقول...

ra7eel

علمك علمك علمك
كان في اتنين اجن منني في العالم بس قتلتهم عشان ابقى لوحدي

وش واحد لابس عفريتة مستشفى المجانين وبيقول
عنتر .. عنتر .. اوعى يجيلك عنتر


سلامووووووز

Soooo يقول...

RAMA

منوراني يامروى
بس انتي مش واخده بالك من نقطه .. لما اقترنت بمدونتي واتجوزتها على النت .. بقت بتحمل اسمي
يعني بقت
Mrs Soooo
عشان كده تلاقي اسمها ناشف حبتيني .. على اسمي ..اصلي صعيدي بقى ومافهمش في الدلع


منوراني ياستي


سلاموووووووووووز

Soooo يقول...

الأميره أوسه

بس بس بس .. وعماله تقوليلي اسأل عني في جبل ناعسه .. وفاتحه دولاب مخدرات .. وبترتادي الحانات والمراقص
ومش عارفه تنطقي اسم السجاير صح .. اسمها كولوباطططططرا .. بالنوووووون

وبعدين عايزاني اشرب بوزطن .. بوزطن .. لااا ده انتي بوزطن خالص
وايه فلوريدا دي .. دي غير علب الفول المستورد من امريكا من حدائق فلوريدا ؟؟؟

وبعدين علمك علمك علمك .. انا الحمدلله اصولي صعيديه .. يعني اشرف مصر في اي تجمع سياحي واي محفل ثقافي

بمناسبة الاوبرا .. انتي عارفه اني زمان والله كنت زبون دائم في الاوبرا .. بس ده ايام الكليه .. بس مش باروح الاوبرا بتاعة دو ري ما فوصليا وكده .. لا كنت مقيم في الهناجر
لو تسمعي عنها


سلاموووووز

Soooo يقول...

تخاريف خاصه


الله يبارك فيكي يا دكتوره
ومدونتي بتسلم عليكي وبتقوللك .. الاقيش حاجه عندك للحموضه ؟؟؟




سلامووووز

Soooo يقول...

son's egypt

وعليكم السلام ورحمة الله وبركاته
نورتني والله
والحمدلله ان النيولوك عجبك
بالنسبه لكلامي مع المدونه .. هعمل ايه ياخويا .. الواحد خلاص اتجنن



سلاموووووووز

Soooo يقول...

Rehab Mostafa

يا ستي الداكتوره انا بتاع البساطه اساسان
والحمدلله ان اللوك عجبك
بس ايه حكاية اسمحلي اسرق دي؟؟
يابنتي السرقه مافيهاش اسمحلي .. اسرقي على طول

وانا بعد كده هسرقهم تاني .. حقي بقى

نورتيني وسلاموووووز

Soooo يقول...

shreen

الحمدلله ان اللوك عجبك والبوست كمان عجبك
والف شكر ياستي على كلامك على تعليقي في مدونتك
والف شكر برضه على لينك البرنامج .. هو انا صحيح لسه مابتدتش انزله او اشوف ايه الحياه عموما
بس ان شاء الله بمجرد ما الحياه معايا تبقى بيس شويه هشوفه وانزله .. بس تساعديني لو اتزنقت في اي حاجه


وسلامووووووووووز

Soooo يقول...

كراكيب عادل

الله يبارك فيك برنس
بس قوللي .. هو احنا بلديات من انهي اتجاه؟؟
من اتجاه الجذور الصعيدي ولا اتجاه التعليم
عشان واضح انك تقريبا خريج فنون تطبيقيه برضه .. بس تصوير

نرجو الافاده والتوضيح
اخوك في بلاد الغربه .. سوووو

سلاموووووووز

Soooo يقول...

MKSARAT SAYED SAAD


ابو المكسرات كلها
نورتني يابرنس والحمدلله ان مدونتي عجبتك
وبجد متشكر جدا ليك على اضافتي لمدونتي في المدونة بتاعتك


ملحوظه:
هو انت كنت فاكر ايه الحياه .. اصلك قلقتني يابو السيد ياخويا


سلامووووز

Soooo يقول...

Desert cat


الله يبارك فيكي يا اوختشي .. وعقبال مانشوف عيالك انتي كمان من اسم الله عليه سي البلوج بتاعك

نورتيني .. وماتقطعيش الزيارات يا شابه


سلاموووووووووز

Rosa يقول...

مبرووووووووووووووووك النيولوك الجديد
لا هيا بصراحه كان عندها حق
و الميوزك جميله جدا
حتى ماما دخلت تقلي ايه الميوزك الحلوه دي
قلتلها داالنيولوك بتاع مدونة سوووو
ايوه كدا لازم تدلعها من وقت للتاني عشان الحياة تبقى حلوهكدا بينكونا
بس واضح ان شخصيتك قويه قدمها يا سووو
:D
لا بجد مبروك :)

Rosa يقول...

اه على فكرة يا سو الميوزك مابتفتحش توماتيكي توماتيكي و لا حاجه دا احنا لازم ندوس على الزر الاول
ظبط بقى الموضوع عشان ماتزعلهاش منك و تقول التظبيطه و النيولوك ناقصهم حاجه :D

shreen يقول...

تحت امرك
يا سووو
فى الللى تحتاجه

Soooo يقول...

رئيس جمهوريه نفسى

اشكرك شكرا متشنكرا في شكاير الشكرانيه

ده ردي على كلامك واللي برضه مالوش رتجمه نوهاااائيا

نورتني ياريس
وان شاء الله هنملى الشبكه العنكبوتيه بوستات تتحاكى بيها المدونات التانيه



سلامووووووووووز

Soooo يقول...

Salma Amer

تشرفت بزيارتك دي يافندم
بس ياريت ماتبقاش دي اول واخر مره
وياريت تعتبري المدونه بتاعتي هي مدونتك تمام


نورتيني مره تانيه


سلامووووووووووز

Soooo يقول...

Salwa

يابنتي انتي مش واخده بالك من نقطه مهمه موووز
اللي هي ايه بقى .. اني فنان شامل من مجاميعه
ما اقولكيش بقى على نفسي في المطبخ .. بعمل صينية برارس في الفرن
وشششششششششششششك


يلا سلاموووز عشان باقمع دقية باميه

Soooo يقول...

shahy


اهلا باجدع واحده بتعمل حمص الشام .. وبتنسى تديه لضيوفها

منوراني والله يافندم
بس على فكره .. مدونتي بتدلع علي من عشمها .. انما انا اصلا صعيدي

وبما اني صعيدي يبقى ماينفعش انزل البنطلون تحت وابين الــ .. ولا ينفع حتى احط على شعري جل
لأني اقرع اصلا


سلامووووووز

Soooo يقول...

3ala asm masr

فعلا النيولوخ اهم حاجه
وبالرغم من اني على طول بالوخ في الاكل ..
بس برضه النيولوخ مهم


نورتيني

سلامووووووووووز

Soooo يقول...

منى

ده انتي اللي تعليقك جميل الحقيقه
ولازم ابقى ديموقراطي .. مش مدونتي ام بوستاتي .. يبقى لازم ابقى ديموقراطي

ونورتيني يافندم وياريت تعتبري مدونتي هي مدونتك تمام


سلاموووووز

Soooo يقول...

only spot

يافندم نورتيني الحقيقه والله
بس احنا نيجي ايه جنب سيد الرجاله حنفي في ابن حميدو .. كان رجلا
ولا كل الرجول الحقيقه


نورتيني .. وياريت تكرري الزيارات وكده
وهاتي معاكي حاجه حلوة

سلامووووووووز

Soooo يقول...

عاليا حليم


ده انا اللي باشكرك عشان شرفتيني هنا في مدونتي الـ .. العجيبه
!!!!
بس عجيبه من ناحية ايه ؟؟
يعني عندها تسع رجول ومناخيرين وتلاتين عين مثلا ؟؟؟


سلامووووز

Soooo يقول...

إيمان


منوراني الحقيقه
وبالنسبه لجزئية اني احط لينكات للمدونات اللي باتابعها وكده .. فأنا الحقيقه باحاول اتابع كل المدونات
لغاية ما اشوف ايه اكتر مدونات تعجبني وتمشي مع دماغي .. وفي نفس الوقت انا لسه جديد في عالم التدوين مابقاليش بتاع شهر مثلا
بس اوعدك ان شاء الله هكون عامل ده قريب


سلامووووز

زُمُرده يقول...

هكذا تكون المدونه في منزل الزوجيه
اما بره عسكري بشنبات
ونعم التربيه ياسووو
وحياتك هبعتلك مدونتي تضبطها
طلما بقيت خبير وتدلعها وتروشنها
بس اييييييييييييييه اوع تبصلها كده ولا كده
لحسن مدونتك عنها ميول صعيديه
ومتحبش راجلها يلعب بديله

برافوووووووو عليك
كده المدونه حلوه وتليق باللي دلعها
ربنا يباركلك فيها
وعقبال ما اشوف عيالكوا

Soooo يقول...

أيامنا الحلوة

تصدقي اني برضه بعد ماعملت النيولوك انا نفسي افتكرتني دخلت غلط

بس لما لقيت مدونتي بتصفرلي افتكرت اللي حصل منني ساعة ماشربتني حاجه اصفرا .. وغرغرت بي


وش واحد مكسوف وبيعيط وفي نفس الوقت في وراه واحده مطلعه لسانها ليه


سلاموووووز

Soooo يقول...

Yahia

منورني يابرنس
ولو فعلا عايز تعمل شوية شغل في البلوج بتاعك قولي عايز تعمل ايه بالظبط وانا اقولك والله ايه الحياه

نورتني ياريس وياريت تعتبر مدونتي هي مدونتك تمااااااام

سلاموووووووووز

Soooo يقول...

Marvel


عندك حق والله ياباشا
طب تصدق ان نفسيتي انشرحت للكتابه بعد شوية التحويرات دي

نورتني يابرنس

يلا سلاموووووز

غير معرف يقول...

انت فقر اوى على فكرة بس حلو اوى الكلام ده . كمل كمل

Abeer يقول...

مبروك العتبة الجديدة
ربنا يهديهالك كدا
ومتتنرمدش عليك وتطلب المزيد

تحيات
:)

SaSo يقول...

احم...لا واضح انى قلبتنى ف حاجات كتير بردو
برحتك يافندم مفيش اى مشكله
بس لما تعوزوا حاجه ابقوا اسالو بعد كده
مبروك

سلوى يقول...

أتاريك حاطط فنجان في أعلى المدونه
أهي حاجه من ريحة المطبخ

بس إيه هي صينيه برارس دي

المقادير الله يخليك
خليني أعمل لهم مفاجأه في البيت

سلاااااااااامووووووووزززززز

واحده من الناس يقول...

مبروك التجديدات
والضيف أحمد ايه بس يا عم دانتا اللي طلعت كوميديان عظيم...
مبطلتش ضحك طول مانا بقرأ البوست
ياللا استمر في الدعبسه عشان تروق المدونه وتظبطها كويس...
سلاااام

nany يقول...

شوف يا سووووو
لو علي المضمون في ناس كتير مضامينها العجب العجاب اللي تقف قدامهم وتستعجب الناس دي هي التاريخ هي اللي بكلامهم هايعيشوا امبارح وبكره وبعدوا طب ليه مستخبين ليه التراب مغطيهم علشان كده لما يتنضفوا ونشيل التراب بيبرقوا ومابيحتجوش اننا نتكلم عنهم لان شكلهم مع مضمونهم بيتكلم عنهم
فلازم الشكل يدعم المضمون فنكون اعلي
قشطات يا جميل وموضوع فل

Soooo يقول...

نورسين

نورسين رجعت .. يامينززززززز

حمدلله عالسلامه يا نورسين ويارب تكون السحابه السوده راحت مع اللي راحو في حرب اليمن
وبعدين ان ماكناش احنا يا مدونين ياغلابه نسأل على بعض .. مين اللي هيعبرنا

نورتيني ياستي وربنا مايحرمني من طلتك دي



سلامووووووووووز

Soooo يقول...

روزا

يا ويلكوم ياويلكوم ياويلكوم
والحمدلله ان المزيكا عجبت والدتك وعجبتك ياستي
وعلى فكره انا كتبت الكود اللي كاتباه بنت مصريه في الموضوع بتاع كيف تدلع مدونتك بس مش عارف بقى ماشتغلتش توماتيكي ليه

لو تقدري تبقي تبعتيلي الكود بتاعها ابقى عاجز عن الشكر

وسلامي لوالدتك وقوليلها اني كنت عايز احط حاجه للاستاذ عبد الباسط حموده بس المدونه بتاعتي قالت اني بيئه
؟؟؟
اللا انا لو كنت عملت كده كنت فعلا هابقى بيئه؟؟؟


سلاموووووووز

Soooo يقول...

shreen


الاهي مايؤمر عليكي حد ياستي
وربنا يخليكي للغلابه اللي زيي وعايزين يتعلمو البرنامج ده يارب



سلاموووووووووووز

Soooo يقول...

زُمُرده

الله يبارك فيكي ياستي
بس سوري مش هاقدر اظبطلك مدونتك عشان انا حسيت بسخونيه في الكيبورد .. تقريبا المدونه بتاعتي لما عرفت قامت سلطت الكيبوورد والمرحه بتاعة البروسيسر والماوس .. انهم مايسمعوش كلامي

لا ياعم .. انا باحب مدونتي ومدونتي بتحبني

بس بقولك ايه .. احتمال مدونتي تسافر كمان كام يوم لاهلها في شبين الكوم .. لو كده انا مستعد


وش واحد طالعله قرنين ولونه احمر وديله عامل زي الشوكه .. وبيضحك ضحكة شريره شريره يعني


سلاموووووووووز

3ala asm masr يقول...

سوووووووو
اختك الصغيره طالبه المساعده
انا نفسى اعمل نيولوخ لمدونتى انا كمان
اهم حاجه بقى فى الوخ بتاع المدونه بتاعتى عايزه احط اغنيه اللى يسمعها يطلع من المدونه تانى
وقريت الموضوع اللى انت قلت عليه وبردو معرفتش اعمل حاجه
ساعدنى يساعدك ربنا
وحسنه قليله تمنع بلاوى كتيره وهنيالك يا فاعل الخير والثواب

قطوف يقول...

مبروك على النيو لوك
وشى حلو عليك
أسلوبك مسخره
والله العظيم
انت حكايه
ايه ياعم دا
والله اسلوبك عشره على عشره فى الكتابه
انا ندمان انى مجيتش من زمان
المدونه بتعتك بتكلم كلام زى الفل
وبتفهم ودمغها عاليه
بس بجد انت حكايه
وهنيالك ياعم الليله ليلتك

Soooo يقول...

غير معرف

نورتني يا غير معرف
بس هو انت انهى غير معرف؟؟
اللي ماعرفوش .. ولا اللي لسه ماعرفتوش؟؟

عموما الف شكر على انك فقرتني .. بس الحمدلله
الحاله فقر من زمان .. روح ياشيخ .. ربنا يفقرك .. قصدي ربنا يكرمك


سلامووووووووووز

Soooo يقول...

Abeer

الله يبارك فيكي يارب
بس حكاية انها ماتطلبش المزيد دي مش مضمونه
عشان انتي عارفه المدونات اليومين دول
تاكل .. وتنكر


نورتيني
سلاموووووووووز

Soooo يقول...

SaSo

ميــــــــــــــن؟؟!!؟؟

انا مش مصدق نفسي وكتاب الله
انتي يابنتي جبتي الموبيل واختفيتي؟؟
ايه كل ده بتنزلي رنات من عالنت

عموما ياستي عندك حق فعلا .. انا في الحقيقه خدت معظم الحوارات اللي روشت بيها المدونه بتاعتي من المدونه بتاعتك

اصلك مش واخده باااالك .. مدونتي عجبتها مدونتك قوي
بس تقريبا صاحبة مدونتك .. اللي هي انتي .. ماعجبهاش صاحب مدونتي .. اللي هو انا
بدليل ان حضرتك ولا عبرتيني لما سألتك على ايه نظام الموبيل حلو ولا لأ .. اجيبه ولا اجيب الإن تمانين

ده انتي حتى بتخشي يابنتي مابتقوليش رأيك في اي موضوع من اللي بقولهم
؟؟؟؟

وعموما يافندم لو تحبي اشيل كل الشغل اللي خدته من عند حضرتك انا مستعد .. حضرتك بس قولي


سلاموووووز

Soooo يقول...

Salwa

نورتيني ياستي
بس مش عارفه يعني ايه (برارس) ازاي؟؟
ماكلتيش برارس متحمره؟؟
برارس بانيه؟؟
برارس شيبسي؟؟
برارس في الفرن .. بالفراخ او اللحمه؟؟


لاااا
انتي كده هتخليني اقرر اني اعمل مدونه تانيه اسميها .. الشيف سوووو
وهتضرب برامج كل المشايف بتوع مشيفة المطبخ


سلاموووووز

Soooo يقول...

أوشــــــه


اوشه النعنوشه
طب تصدقي بالله
انا بافرح لما بالاقيكي معبراني في اي موضوع والله
مع اني ماعرفكيش وملاحظ انك مقله في مواضيعك الى حد ما .. بس بجد مش عارف ليه

بالنسبه لانك شايفه اني ممكن اكون دمي خفيف شوية .. الف شكر ياستي على مجاملتك وعلى كلامك .. بس احسن من الضيف احمد
استحاااااااااااااااااااااااااااااااااله
ماينفعش اصلا
لعلمك لو الضيف احمد كان فضل عايش .. كان ضرب كل بتوع الكوميديا دول بالجز ... ولا بلاش

عموما الحمدلله ان البوست عجبك وان النيولوك هو كمان عجبك


سلامووووووووووز

Soooo يقول...

nany


الله ينور عليكي
فعلا ساعات الشكل بيخلي المتلقي يحط في دماغه ان الشخص ده بيقول حاجه

يعني لما كنت عامل الشكل القديم وكنت حاطط صورة نجيب سرور .. ناس كتير ربطت بيني وبين الذهنيات في الكتابه
انا صحيح لي فلسفه خاصه في الحياه ولي فلسفه خاصه في الكتابه والتدوين .. بس باميل للقالب الكوميدي اكتر
عشان كده فعلا قررت اني الفت انتباه الناس للشكل الجديد .. وبعد مايعرفو انا باتكلم في ايه وباقول ايه .. يبدأو يفكرو في المعنى اللي اقصده


فهمتي حاجه؟؟


بس بجد برافو عليكي انك قدرتي تقري اللي مابين سطور كلامي في الموضوع ده

نورتيني والله


سلامووووووووز

Soooo يقول...

3ala asm masr

اول مايسمعو الاغنيه يسيبو المدونه؟؟؟
اوعي تكوني ناويه تشغلي اغنية اخترناه اخترناه

لو هي دي اللي هتحطيها يادودو اسمحيلي
.. انا اعتزلت الفن
وهاتجه للتدريب وكتابة مزكراتي

ولو هتحطي حاجه للفنان العظيم رمضان البرنس .. انا معاكي قلبا وقااااالبا



سلاموووووز

Soooo يقول...

سى السيد


ميييين .. مثال الرجوله والقسوة والافتراس والشراسه واللعب بالديل هنا عندي في المدونه بتاعتي
يا مرحبا يامرحبا
منورني يا سي السيد

الحمدلله ان المدونه عجبتك وان اللوك كمان عجبك .. لعلمك ده كللو طبيعي والله .. ولا سيليكون ولا بتاع
اصليييييييي

ملحوظه:
ليلة الخميس كانت فعلا ليلتي .. انما باقي الاسبوع .. ليل وقضبان


سلاموووز

سلوى يقول...

الله
هو أنت تقصد البرارس دي

يا سلام
أهي دي فايدة إن الواحد يدرس لغات

شكرا سووووووووووو

سلااموووووززززز

غير معرف يقول...

نيولوك اكثر من رائع..جميل جداااااا الف مبروك اخي الغالي

اما عن الأسلوب فبالتأكيد
جميل وجذاب ....ارفع القبعه لكاتب خفيف الظل.. مبدع .. متمكن من ادواته
سوووووووو لك مني ارقى واجمل تحيه خالص احتراماتي واضحك الله سنك


شـــهد

الأميره أوسه يقول...

هناجر مين
واحد وتسعين تعليق يا مفترى
ده غير اللى جى
فكرتنى بشبابى
هو أسامه منير متجوز مين
ومين أسامه منير ده
جاوب تنجح

Hannoda يقول...

مبروك يا سووو

كده المدونة تمام
وعجبتني اللينكات اللي انت حاططها
مش أنا غيرت منك و غيرت عندي برضه
بس ما عرفتش أحط التوماتيكي
:)

مبروك
:)

Hannoda يقول...

آآه نسيت

عاوزة أسأل في حاجة حشرية كده

اسم مدونتك **عجوز و عندي 30 سنة***

قصدك بيها ان 30 سنة بالنسبالك انك بقيت عجوز

ولا قصدك ان بالرغم ان عندك30 سنة لكنك عجوز

ربنا يستر و مايبقاش الرأي التاني

وده مش تلميح بالاجابة أبدا
جاوب من دمااااغك
:)

Ahmed Maree يقول...

alf alf alf mabrouk ya sooo 3alla el blog el gameed dah we 3alla fekraa 7etetet mozaaa ehee ;) 3amaleyt el tagmeel deeh khaletaha a7laa men nancy we hayfaa alf mabrouk ya basha

Soooo يقول...

Salwa

شفتي بقى اني باعرف في شغل المطبخ وباعرف لغات وباعرف اغني اوبرا كمان

شفتي بقى المواهب

----------
شهد

اختي العسوله الحبوبه
انتي عارفه اني بابقى فرحان قوي لما باسمع منك كلمة حلوة والله
مش اختي بقى

وبعدين خدي هنا .. انتي فين مدونتك اللي قلتي هتعمليها .. ولا عايزاني اعملهالك واجبهالك هديه؟؟

----------
الاميره اوسه

خبر ايه يا اوسه
خبر ايه بجد
نازله قر ونق وحسد
يالهوي .. مانتي في شوية مواضيع عندك التعليقات وصلت لرقم سبعتلاف .. كلمتك انا بقى؟؟

على فكره .. اسامه منير ده يبقى ابن خالة محمد منير بس من ناحية عمته
انتي مش واخده بالك من الاسماء ولا ايه؟؟؟

--------
Hannoda

الحمدلله ان البلوج عجبك وانا متأكد ان البلوج بتاعك احلى طبعا

وياستي انا قصدي بعجوز وعندي 30 سنه اني لما تميت التلاتين سنه .. حسيت اني عجزت

--------
Ahmed Maree

حمدلله عالسلامه يابن بطوطه
فينك ياعم وفين مواضيعك ورحلاتك
بقولك
ماتشوفلي عقد عمل في طلخا ؟؟


سلاموووووووووز

سهر الليالى يقول...

بصراحه مرة تانية وتالتة وعاشرة بسجل اعجابى بمدونتك الرائعه وكلامك اللى زى العسل والشخصية طبعا لانى بجد بحب الاسلوب دة فى التعبير والكتابة
ولو محتاج حاجة لزوم النيو لوك انا تحت امرك بما املك من المعلومات القليلة

ارجو انك تمر على مدونتى المتواضعه
وتقبلنى صديقة لمدونتك الجميلة
تحياتى

Soooo يقول...

سهر الليالي

الف شكر على كلامك الجميل ده ياستي والحمدلله ان المدونه والمواضيع اللي فيها عاجباكي

واكيد طبعا لو احتجت اي مساعده هابقى اقولك وان شاء الله تكون معرفة خير ياستي

نورتيني مره تانيه وتالته ويارب تفضلي منوره المدونه بتعليقاتك دي على طول


سلامووووووز

nada يقول...

2h ya soo 7war el new look dah bgd tb2a mosyba lo dah ra2y el blog beta3ak bos to be honest ana ma da5altsh 3ala blobbers tanyn kteer we ma 2bltaksh 5yer kaza mara bas i think 2n el blog by3abar walo btary2a indirect 3an el character beta3t 2ly katebha we el first impression 2ly 2nta sybto 3andy 2nak 7ad special , different,mesh taklydy,we mabthtamsh bel manazer fa i think 2n el blog beta3tak 7elwa keda l2naha different we special zay ma heya we i dont 2n 2ly bytab3ok byhtamo bmanzar el blog 3ala 2d ma byhtamo bel 2nta katbo.
da ra2y we fy 27tmal kbeer 2noh ykon 5alat bas ana 7abit 2ny 2a2olak 2n el blog beta3ak gameed 2wi l2noh criticizing kol 7agab in a funny smooth way.
bgd sorry 2ny tawelt 3alyk at the end i wish u all the best and hope to see u soon

Soooo يقول...

nada

لو قريتي ردي على تعليقك دلوقتي .. يبقى لازم تعرفي اني كنت سايبه عشن اعرف ارد عليكي بروقان

بصي ياستي
انا مش باهتم فعلا بالشكل ولا المنظر الخارجي بس .. ولا باحب اللي بيحكمو عالناس من مجرد الشكل

لكن فحوى الموضوع ده مش زي مانتي وصللك ولا من منطق اهتمامي بالشكل الخارجي

بس زي ماتقولي كده .. ايه اللي يمنع ان الانسان يهتم بمظهره ويهتم بجوهره .. بشرط ان اهتمامه بالمظهر مايغطيش على اهتمامه بالجوهر

يعني اه انتي ماشفتيش شكل المدونه قبل كده .. لكن بذمتك .. هل انتي شايفه اي مبالغه او أفوره في شكلها دلوقتي؟؟

زي بالظبط اللي بيلبس شيك وفي نفس الوقت هو متحدش لبق

زي الكاتب اللي بيهتم بشكل غلاف كتابه عشان بيبقى مهتم الناس تقراله وتتابعه

ارجو اني اكون وصلتلك اللي في الموضوع ده

وكل سنه وانتي طيبه ورمضان كريم
هتعزميني عالفطار امتى بالصلاتو عالنبي؟؟؟؟؟





سلاموووووووووووز