الأربعاء، 21 رمضان، 1428 هـ

!! قضية رأي خاص

قال مسلسل قضية رأي عام قال .. ده عام فعلا .. بس عام على وش الميه
البتاع ده المفروض يبقى اسمه قضية رأي خاص وكتاب الله .. هو مؤلف البتاع ده ولا المخرج ولا الممثلين .. مصدقين نفسهم فعلا ؟؟؟
المفروض اني كشخص بينقد عمل فني ما اتكلمش عن العمل الفني غير لما يخلص .. وده فعلا .. المفروض اني مانتقدش البتاع ده غير لما يخلص .. بس ده لو هو اساسا احداثه منطقية بجد
يعني هل احنا كشعب فعلا بقينا سذج للدرجة دي ؟؟
هل يعقل في جمهورية زي جمهوريتنا ان يتحبس ابن وزير وأبوه لسه في الوزاره ويتعمل عليها قضية وتبقى رأي عام والناس كلها تعرفها ؟؟؟
اللي يغيظ ان الناس فعلا مصدقه ومقتنعه .. لكن ده بقى مش مشكله خاااااالص .. الناس تصدق اللي هي عايزاه انشالله حتى لو قالولهم ان العدرا بتطلع كل يوم اربع في صفط اللبن
المشكله ان في مشهدين تلاته اربعه عشره .. فيهم شوية هطل على استخفاف بعقلية المشاهد الغلبان اللي مابيعرفش انجليزي .. والا لو عرف كان اتفرج على الدراما الاجنبيه واللي بتفوق .. بتفوق ايه .. دي بتضرب الدراما بتاعتنا بالجزمه القديمه
اول مشهد خلاني وقعت على روحي من الضحك مثلا .. لما راحت قوة البوليس تقبض على ابن الوزير في النادي وهو بيلعب خيل .. مش هقول انه مابيعرفش يركب خيل ولا كان هيقع ولا انه ولا بان عليه اي ملامح فروسيه ولا هقول ان مافيش حد بيتفرج عليه في النادي وفي بطوله غير شوية بنات بس
(لكن هل يعقل ان البنات اللي بتتفرج عليه وبتشجعه تقوللو(الله عليك .. الله عليك
!!!!!!
الله عليك ايه ولا مؤاخذه ؟؟؟
هو لا مؤاخذه بيلعب بوكس في مركز شباب المنيل ؟؟؟
هو المؤلف مايعرفش نوعية الناس دي بتشجع ازاي وبتهتف ازاي ؟؟؟
المشهد التاني اللي وراه وش بقى .. اللي بيطب فيه البوليس ويقفشه ويقولو اتفضل معانا والواد بيفرفص منهم بيقوللهم انتو مش عارفين انا مين وابن مين .. انتو اتجننتو .. وعمال يتنطط يا ولداه ويتشقلط وحالته مرار ..
هو ده بيحصل مع ولاد الذوات يا اخ يا مؤلف ولا انت يا اخ يا مخرج ؟؟؟؟؟
انتو فاكريننا عايشين في جزر الانتيل على رأي الاستاذ حسن المستكاوي؟؟؟
ده ولاد الذوات بيبقى ليهم معامله تانيه وانا شفتها وغيري شافها بنفسه .. ده انا لي واحد صاحبي دكتور .. طبيب بشري .. يعني لو استخدم سلطته فعلا ممكن يموت الناس اللي بيعالجها .. اتخانق مع وكيل نيابه .. مش هقول ظابط .. وكيل نيابه .. وياريته وكيل كمان .. ده ماحصلش معاون ... وهو اللي غلطان مش صاحبي بشهادة الناس في الشارع .. لكن مجاملة لوكيل النيابه .. قسم الدقي كللو نزل شتيمه وتهزيء وبهدله في صاحبي .. والواد كان هاين عليه ينتحر عشان احنا في بلد ماينفعش تاخد حقك غير لما تكون قريب حد مسئول ..
تقومو انتو يا بتوع البتاع ده تجيبولنا ابن وزير .. وزييييييييييييير .. ابن وزير يتمسك كده في النادي والناس تشوفه؟؟؟؟
المشهد التالت .. مساعد الوزير او مدير مكتبه بيتصل بمكتب وزير الداخليه .. بيتصل بيه منين .. من الموبيل الشخصي بتاع الوزير .. وكأنه مثلا مامعهوش موبيل ولا الحراره مقطوعه من مكتب الوزير مثلا .. لأ وايه .. قام جه الوزير قال لمدير مكتبه لما في مكتب وزير الداخله قالوله ان الوزير في اجتماع مهم .. قاللو اتصللي بوزير الداخليه عالموبيل الخاص بتاعه ..
.. اضحك يعني ولا اشخر ولا اعمل ايه
يعني الوزير مش هو اللي بيتصل بوزير الداخليه بنفسه عالرقم الخاص بتاعه ومكلف مدير المكتب بتاعه هو اللي يتصل بوزير الداخليه شخصيا .. طب فرضنا ان وزير الداخليه رد عالموبيل .. مدير المكتب بتاع الوزير بتاعنا كان هيقوللو ثانيه خليك معايا .. وينادي على الوزير يقوللو اللي طالب شبين الكوم .. اللي طالب شبين الكوم ياخد المكالمة من كابينه اربعه مثلا ؟؟؟؟؟
بلاااااش ده كللو .. بلاها ناديه خلينا في سوسو .. مشهد تاني بيؤكدلي اننا فعلا هنفضل متخلفين درامايا وفكريا وتنفيذيا .. التخشيبه .. التخشيييييييبه .. اللي لا تزيد في اي مكان في الدنيا عن اتنين متر في اتنين متر وبيتحشر فيها عٌشرميت نفر .. يبقى فيها 8 بس في البتاع ده .. التلاته اللي اغتصبو ومن ضمنهم ابن الوزير .. وخمسه تانين .. وتبقى عشرة متر في تمانية متر ؟؟؟؟
ده انا دخلت التخشيبه تحري اقسم بالله العظيم كان فيها مش اقل من خمسين نفر .. في تخشيبه مفتخره .. تخشيبه قسم المعادي .. كانت اقل من مترين في متر ونص مثلا .. ولما اخويا جه ينادي علي من عالشباك بتاع الباب عمال انط وازعق وهمووووت من الشحتفه عشان اخويا يشوفني ولا يسمعني حتى .. ومافيش حد من الاخوه المساجين فكر انه يساعدني ولا يخليني اقرب من الباب عشان اخد من اخويا علبة سجاير
مشهد تاني بقى ده اللي حرق دمي وخلاني اقول انه قضية رأي خاص .. وخاص قوي .. ومن كتر ماهو خاص حسيت ان اللي كاتبه ظابط في امن الدوله .. المشهد اللي فيه ابن الظابط اللي ماسك القضيه - واللي طبعا بطبيعة الحال لازم يكون ظابط او طالب في كلية شرطه هو كمان- المشهد قمة في المسخره وكتاب الله .. الواد طلع اجازة يوم الخميس وطالع متضايق قوي ان زمايله في كلية الشرطه بيقولوله انت باباك وحش وبيعذب المجرمين اللي عنده !!!!!! والاغرب بقى ان ابوه واللي كان بيتكلم بمنتهى العقل والمنطق بيقوللو : يا حماده يابني لازم تفهم ان ابوك اشرف من انه يعمل كده .. ولازم تفهم ان دي فرقعة عاملينها الناس الوحشين عشان يضعفو موقفنا في القضيه .. واننا عمرنا في وزارة الداخليه مابنعمل حاجه في حد .. لاننا بشر ومن لحم ودم .. وعارفين ربنا
يقوم الواد يحضن ابوه ويقوللو معلش يابابا .. سامحني .. المفروض كنت ابقى عارف ان ابويا احسن اب في الدنيا
نعم؟؟؟
لأ بجد نعم ؟؟؟
خساره الفجر أدن والا والله العظيم كنت قلت كلمة قبيحه بجد
مشهد كمان .. وده لسه شايفه حالا بقى .. ومش ضحكني انا لوحدي .. لأ ده ضحك مصر كلها .. البنت التانيه اللي اغتصبوها بتتفرج على طابور العرض واللي فيه اتنين من اللي عملو الجريمه دي وفيهم ابن الوزير .. وجايبين ابن الوزير حاطط على شعره جيل وهدومه نضيفه ومكويه والاستايلست ناتفاله حواجبه وشغل ايييييييييه .. هو لا مؤاخذه كان في تخشيبه فعلا ولا كان في كوستا كافيه ؟؟؟؟؟
آخر حاجه بقى واللي خلتني اقع ضحك .. واحد صاحبي .. هو مش صاحبي قوي يعني .. بس اهو بنقول عليه مجازا انه صاحبي مع انه مالوش لازمه في الحياه .. المهم بقى .. ابو السلاطين اللي هو صاحبي ده قاللي ايه .. قاللي يا سوووو انت بتصدق .. هو في ابن وزير في الدنيا .. بيغتصب حد ؟؟؟؟
عنده حق فعلا .. ابن الوزير يغتصب ليه ولا مؤاخذه .. ماهو عنده مليون مكان يقدر يجيب منه اللي يظبطلو طموحاته
.. وفعلا فعلا .. ابن الوزير مايغتصبش
.. انما الوزير والكبير .. هم اللي يغتصبو
وبيغتصبو شعب بحاله
سوووو

هناك 23 تعليقًا:

غير معرف يقول...

bos enta 3ndk 7a2 5sosn fe mwdo3 el jell da..bas mnenkersh en mt`3az mn eb elwzer 3shan el mozaz kano by2lolo allah 3leek allah 3leek..we eno kan rakeb 7osan we kan fares m`3war..e5s 3lek e5s.
l0o0o0o0ol....

Soooo يقول...

اولا انا ولا متغاظ عشان كل اللي كانو بيشجعوه مزز ولا بتاع .. انا متغاظ عشان هم ماكانوش بيشجعو صح .. ولو مش مصدقني روح نادي زي نادي الصيد او الجزيره او اي نادي فايف ستارز وشوف بيشجعو ازاي؟؟؟
ده اللي انا اقصده .. انما من ناحية ان اللي بيشجعوه مزز فأنا مش ضد .. بس اشارك

drZimo يقول...

ya 3m soo eih ely enta btetkalem feih da,yabny enta ensan fady w raye2 a5er 7aga walahy.
enta 3ndak 30 sana meladeya w lesa la etgawezet wala zara3t sha3r wala eshtareit mobile gedeid wala 7ta es7abak bey7ebok.
wa ana men haza el makan onashed es7ab el blog dah enohom ye2felo el blog bta3ak 3shan keda ba2a bey2aaaaaa w lam bashar malhomsh lazma,matez3alsh ya soo bs enta 3arefny saree7.

LOL

Soooo يقول...

دكتور زيمو .. الشاب اللقيط والمطرود من خماشر مايو بل ومن حلوان كلها .. مشرفني في البلوج بتاعي بعد ماخلص البيبس في الفطار
لأ
لأ
انا مش مصدق .. ومن هاذوها المكان .. ومن هاذوها الموقف .. انا باطالب كل اهل خماشر مايو .. وكل اهل حلوان .. واقوللهم حوشو الرايش اللي بيقع منكم .. وبيجي يتنطط عندنا في المعادي بالموبيل الثري جي .. والعربيه الاوتوماتيك .. وقزازة البيبس بتاعتي

Emmmooo يقول...

ana shayef an abl manonkod 3amal fanny lazem ne3raf el awel ya3ni aah nakkd!!!

El a7' el 3azeez soo wade7 gedan 3laih an tagrobtoh fe 2esm el maadi lesa me2sara fe nafsyetto ledarget ano shaeyf kol 7aga sooda bema feha el moslsal el lazeez dah.

Tab3an ra2y 3am, 2ololy laah, 2a2oloko laah, m7desh 7'ad balo men el maghood el gabbar beta3 samy el 3adl 3lashan yesbo3' sha3ro, m7adesh 7'ad balo yousra se3'ret ad aah, m7desh 7'ad balo rga2 el gedawy b2alha kam sana betmasel, m7desh 7'ad balo ad aah el momseleen moserra an el wad 2esmoh sayed shookman mesh sayed shaakman, aahhh ya 3allam ya moftria 2ete2o rabena showia:))))))

Emmmoo
Naked senema2y we reyady

Soooo يقول...

عزيزي الدوق إمو .. مبدأيا ده رأيك وانت حر فيه .. بس ده البلوج بتاعي وانا حر برضه اشيل اي تعليق بمزاجي .. بس انا عشان لقيت ان فيك بذره ناقد فني ورياضي محترف هاوي متمرس ممارس عام .. هسيب كلامك .. عشان يبقى عبره لمن لا يعتبر ..
بقولك ايه .. قول لخالد ولا عم فتحي يعملولي فنجان قهوة مظبوط على ما اغير واجيلك

غير معرف يقول...

lool wad7 en so7abak be7bok fe3lan yabny :P
we lama enta 2arfan awy kda mn el mosalsl ya ragl ya 3agooz bettfarg 3aleh leeh we 3aysh fe dor el nakd el fany :P
ana el mosalsl da matfrgtsh mno ta2reban gher 3ala 5 min wana bakol 7etet konafa soghyra kda we ba3den lama 5alst akl 2omt 7ata msh fakra eh el 7asl haza howa 7al kol ma howa masry ttfarg 3aleh bas wenta betbla3 el lo2ma we ba3den tenzl ba2a teshof shoghlak we 7alak msh to3od tenkodo wet2ool shoof ebn el wazer we msh 3arfa meen
bas el 7a2 yt2al ba2a eslobak lazez fel ketaba befkrny bel nas el 2adema ayam ma kano byktbo el journal we ywaz3ohh 3ala ba3d 3alashan y2rooh <2abl entshar el teba3a> :P
krkrkr
Rehab ahmed

Abdullah يقول...

Walahy ya Sooo ana mesh 3aref 2a2olak ehh kol mara betmata3na be 3amaml gdeed 7ata wenta 7azen betda7akna we betda7akny ana bel7'osos 2enta 2ensan 3azem 2abl matkon fanan 3azem ya rab 3ala tool temata3na be 2a3malak hena we fe el masra7 :)

Soooo يقول...

Rehab ahmed

الحقيقه في الأول كنت عايز استخدم سلطاتي في اني اشطب ردك .. وابقى ديكتاتوري وافرح لأول مره في حياتي اني تجنيت على حد .. وافضي عقدة النقص اللي عندي .. وكده

بس جيت قلت ايه الهطل ده يا سوووو .. البونيه ماغلطتش فيك ولا بتاع .. واخده بالك من البونيه دي .. مش البوكس يعني
وبعدين مانت كمان غلطان يا سوووو .. حد قالك تشوف الكام مشهد اللي شفتهم بالصدفه عالقهوة .. مانت كنت ممكن ترغي انت وأي حد من صحابك في اي حوار في الهلس ..
عموما انا تشرفت بزيارتك للبلوج المتواضع بتاعي وارجو منك التفاعل الدائم .. وأوعدك ياستي اني خلاص مش هتكلم عن مسلسلات عربي .. انا هديها مسلسلات صيني وياباني .. عالم محترمه ومقضينها انحناءات لبعض طول العُشرميت حلقه
-
ملحوظه :
صحابي دول عالو ولود وولود وولود .. وانا باعرف اشكمهم على القهوة بمزاج بعدين .. وبالنسبه لحوار الطباعه والكتابه .. العلم الحديث اثبت ان الطباعه كانت قبل ما حد يتعلم يقرا اصلا .. بدليل اننا لما كنا في المدارس وبنتعلم نقرا .. كنا بنقراها من كتب مطبوعه اصلا

Soooo يقول...

Abdullah

الف شكر ليك يباشا .. والله منورني ومنور البلوج
ويارب تفضل تضحك كده على طول يارب .. ومش مهم احنا ياعم نحزن نتنكد المهم اننا نرضي الناس اللي بتقرا الكلام اللي بنقوله .. وبيني وبينك .. كفايه ان في حد بيقرا اليومين دول

ملحوظه صغنونه:
عبد الله مين ؟؟؟؟
وشفتني في مسرح ايه ؟؟؟؟
وبضحكك امتى وازاي وليه ؟؟؟؟

الشنكوتي الكبير يقول...

يخرب عقلك هاموت من الضحك انا اصلي في رمضان بقاطع التلفزيون نهائي وده بتشجيع من اخواتي وامي قالوا حرام نشوف البلاوي دي في رمضان لقيتعندهم حق لت وانا كمان علشان كده اترحمت من كل البلاوي دي بس مكنتش اعرفان الدهوله وصلت للدرجه دي يا سلام يا ولاد عمار يا مصر
ولا اقولك خراب يا دنيا عمار يا دماغي مش فاكر سمعت الكلمه دي فين بس تناسب الوقف
تحياتي على البوست الجامد ده
بجد بجد اتمنى نكون اصدقاء
سلاااااااااااااااااااام

Soooo يقول...

الشنكوتي الكبير
ربنا يكرمك يا سيدي والف شكر على تعليقك الظريف والشيك ده .. وبصراحه فعلا فعلا .. خراب يا دماغي .. عمار يا اي حاجه تاني
دي انا اللي لسه قايلها دلوقتي على فكره

ملحوظه:
انا يكون لي عظيم الشرف اننا نبقى اصدقاء يا باشا

Ayman Abdullah يقول...

keda 3reft ana meen ? :) ana begad we ba2lha 2odam el nas ana mabsot 2eny 3ereftak we ya gama3a ana maba2olsh keda we 7'alas 3shan hoa sa7by bas fe3lan ahmed 2ensan 3azeem 2abl ma ykoon fanan 3azem zay ma 2olt 2abl keda

Soooo يقول...

Ayman Abdullah
باشاااااااااااا
والله يابني مافتكرتكش خاااااالص
بس العيب علي برضه .. نسيت ابن منطقتي اللي ياما نزللي ويندوز وياما لحق الكومبيوتر بتاعي قبل مايتحول لمستنقع فايروسات من كتر الهطل اللي انا بعمله
والف الف الف تشكرات ياباشا على كلامك ده ولو اني شايف انه مبالغ فيه مووووت يعني
ايه ياعم .. انت كده هتخليني اتغر واتنطط وافتري عالخلق ؟؟
وبجد باعتذرلك للمره التانيه اني نسيت اسم والدك .. بس سيبك انت .. ماتش الاهلي النهارده كان حرقة دم قوي ياشيخ

غير معرف يقول...

والله ياعم سو انتا راجل تمام وهتخلينى افضفض شوية من اللى شايلاه من المسلسل الفزييييع ده..

ال قضية راى عام ال .. دى تنفع تكون قضية راى المؤلف.. قضية راى المخرج .. قضية راى الست يسرا .. لكن قضية راى عام ..عام ايه والنبى سيبوا الشعب فى حاله هو فايق يدى راى عام ولا خاص ولا نيلة..

المهم اكتر حاجة بتضحكنى فعلا فى المسلسل هى الجملة اللى بتجرى على لسان الجميع (( القانون لازم ياخد مجراه )) ههههههههه مجرى ايه يااخينا انتا وهو

والحقيقة ان البول هو الحاجة الوحيدة اللى بتاخد مجراها الصح لللاخر فى بلدنا دى والبكابورتات الطافحة فى كل شوارع البلد تشهد ..

والله من اول الليلة دى انا حسيت ان الداخلية هى اللى عاملة المسلسل ده والله اعلم..

بس تعرف يا حج سووو.. احلى حاجة فى المسلسل ده هى سيد شكمان.. بجد زى السكر بكلمته المعهودة على راسى ياباشا من فوق .. وبقفاه الاسود المنحس.. وراسه المزيتة..

والله زمان ياحج سووو .. الابداع ده كان لازم يظهر من زمان.. يلا عرفنا انك لسه عايش ياعم الصعيدى

Soooo يقول...

غير معرف

ليه بقى غير معرف؟؟؟؟
واضح انك شخص فاهم وفاهم كويس .. وانا بصراحه باعتز بمعرفة الناس اللي بتفهم زيك كده
ليه بقى غير معرف ؟؟؟؟؟؟

عموما اشكر تفاعلك معايا وتعليقك في الموضوع .. وارجو انك تفضل او تفضلي على اطلاع بمدونتي البسيطه وماتحرمنيش من تعليقاتك
وفعلا فعلا (( القانون لازم ياخد مجراه )).. ولا انت او انتي ليكي رأي تاني؟؟؟؟؟



سلامووووز

غير معرف يقول...

الغير معرف بيبقى معرف لما بيتكلم ياعم سوووو ولا انتا ايه رايك؟

واكيد طبعا لازم تعتز بمعرفتى.. اكيد بهزر واعرف انك بتعز الهزار من زمان

بس حقيقى يعنى..البلوج حلو .. بس محتاج مواضيع اقوى وانا عارفة انك ادها..


سلاموووووزات

Soooo يقول...

غير معرف

لأ بقى .. ده كلام بيقول انك سيد المعرفين كمان
واه باحب الهزار مش هقول لأ

وكل سنه وانتي طيبه
منوراني


وسلاموووز

غير معرف يقول...

سمعت عن المقال من الشنكوتى الكبيروشكرلى قوى فى كل كتاباتك
بس أنا لما قريت عرقت بجد انت ليه حاطط صورة نجيب سرور فى البلوج
بس يابنى لازم تعرف أن ده كان مسلسل خيال علمى (لأن هو ده التفسير الوحيد لكل الهجص ده) وعلى العموم هتصدقنى لما يعرضوا الجزء الثانى وأحداثه بتدور فى غواصة تحت ترعة الزمر وبيتكلم عن الديمقراطية الشعبية الملوخية فى بلدنا وسلام

wa7dania يقول...

سوووو
أنا مش بنكر أبدااااااا
عيوب المسلسل ده
من ضمنها طبعا إن ال 3 شباب كانوا في التخشيبة و شعرهم متسرح و وشوشهم نضيفة
ووووو

إلخ إلخ إلخ
لكن برده مش هنكر
إن كان في مشاهد من لقاء الخميسي بكتني فعلا
ومشهد ليسرا أثر فيا فعلا
يمكن الكاتب حلمه إن ابن الوزير يتحاكم
و إن دي تبقى بلدنا..بعد 5212 سنة إن شاء الله
الله أعلى وأعلم
تحياتي
منى

Soooo يقول...

غير معرف

اهلا بيك واهلا بكل واحد جايلي من طرف اخويا وحبيبي الشنكوتي الكبير
وتقدر تقول ان مدونتي هي مدونته هي مدونتك هي مدونة الشعب
ياخوفي لا الحكومه تخصخصها

بالنسبة لصورة نجيب سرور .. يااااه
الراجل ده فعلا افظع واحد اتبهدل واتغرب جوا وبره بلده .. وياخوفي والله تكون اخرتي زي اخرته

سيبك انت .. منورني والله
كل سنه وانت طيب

سلامووووز

ملحوظه:
البتاع ده او اللي بيسموه اعتباطا مسلسل واقعي .. اتضحلي انه مسلسل كوميدي فانتازيا بآخر حلقة لما اعدمو التلاته
وسمعت ان الجزء التاني هيبقى رعب .. عندما يعودو لينتقمو من سامي العدل عشان صبغ شعره

Soooo يقول...

wa7dania

اولا انا لسه شايف الرد ده دلوقتي بعد ماكنت تقريبا نسيت اني كتبت الموضوع ده .. بس هتقولي ايه بقى
السن ليه حكمه يابنتي

بالمناسبه .. انا ما علقتش عالمسلسل من ناحية اداء الممثلين .. يمكن لاني كنت زمان بامثل وعرفت ان لكل شخص طابع معين في التمثيل واللي بيقدر يوجه الشخصيات دي كلها هو المخرج
وبالتالي اهتميت باني اتكلم عن المسلس من ناحية التأليف والاخراج
لانهم هم دول عماد اي مسلسل

ارجو انك تكوني فهمتي قصدي
والسلاموووووز ختاموووووز

ست البيت يقول...

دا انت تحفة ومصيبة مع سبق الإصراروالترصد.طبعا لازم تتمسك تحري تلاقيك كنت واقف بتعمل دماغ جبنة تركي والظابط فهمك غلط...

بس جامدة ...أنا أساسا المسلسل استفزني .. ربنا يعيذنا ...
وحاسة انه معمول عشان ست يسرا تطلع شهيدة وخلاص وتطلع الست الداكتورة او المربية الفاضلة اللي جوزها وحش افتكر معايا كده مش دا من أيام حياة الجوهري ؟؟
عموما القديم جميل يا سووو
وقريب قصة هدي لما تعمل السيناريو عاوزة وعد بدعوة لرؤية الفيلم دا
عوزين فيلم يكسر الدنيا من غير ميسرة ..سوري مسخرة
عاوزين افلام وجامدة قوي بالعند فيهم ومحترمة برضه
بس عاوزة اشوف حتكتب السيناريو ازاي
تحياتي ودمتم بحفظ الرحمن