الخميس، 22 رمضان، 1428 هـ

!! الشاكرمون طاخ في .. الترولولي

لغة عجيبه بس فريده من نوعها
.. الشاكرمون طاااخ في الترالولي
كنت باسمع الكلمه دي في فيلم الكيف واقول لنفسي هو السيناريست محمود ابو زيد جاب الكلام ده منين ؟؟
وهل يقصد من وراه حاجه ولا جايبه كده تهييس
.. وكان هذا هو السؤال
سؤال ألّح علي طيلة عشر سنوات
.. وياللهول
.. ففي لحظة لا ادري كيف اصفها
وجدت ان الشاكرمون قد طاخ فعلا في الترالولي
.. ليس هذا فحسب
بل وجدت ان الحياه قد فيّشت لي الهوامش
.. كل هذا قد حدث في غمضة عين
.. في لحظة نسيت فيها كوني انسان
.. عندما قابلت احد اصدقائي وقال لي بمنتهى العنجهيه
انت موبيلك .. ثري جي ؟؟؟؟
فهمت بس ساعتها ان الشاكرمون طاخ في الترلولي بجد
بقينا مغيبين عن الوعي ومستهلكين جدا
بقى مقياس الحياه عندنا الموبيل والعربية وطقم المزز اللي الشاب من دول عارفهم ومسيف ارقامهم في الموبيل
الله .. ماهو لازم يعمل كده عشان يبقى شاب كوووول يا مان
اللي يغيظ ان ده فعلا بقى مقياس ناس كتير قوي
ناس بابقى مستجدعهم وفاكر دماغهم حلوة قوي وبتاع
وفي لحظه واحده .. تكتشفهم .. ناس قشره
بتبص على شوية مناظر
بتبص عالشكل اكتر من مابتبص عالجوهر
ولما يبصو فعلا عالجوهر اللي جوا الواحد .. تسمع كلمة حلوة قوي
انت جميل قوي .. جميل قوي من جوه
.. ولسان حالهم عايز يقولك
بس انت زباله فحت .. وبيئة طحن من بره
.. وللناس دي سوووو بيقولهم
.. ياحلو بانت لبتك
.. أول ما دابت قشرتك
.. تحرم علي محبتك
وراح اتوه .. عن سكتك
فعلا .. الشاكرمون طاخ في الترلولي
.. عشان كده .. سوووو قرر انه يجيب موبيل ثري جي
وبحبك يا ساتاموني .. مهما الناس لاموني
سوووو

هناك 15 تعليقًا:

غير معرف يقول...

enta tgnn ya sooooooooooooooooooo
rbna y7meek

Mokhtar يقول...

ماهو لازم الشاكرامون يطاخ فى الترالولى .. عشان يحنكش ويبرعش ويبقى آخر طعطعة

Emmmooo يقول...

Wade7 gedan an nefsak fe mobile 3G:))

A7eb adeef ana mesh de bas ally el nas bet2es beha ba3d, sa3at bey2eso bel mazora we sa3at bey2eso belmetr:)))

Note: ana mobily 3G :p

Emmmooooooo

Soooo يقول...

واضح انك يا اخ Mokhtar جاي تروش الحناكش وتهيس القضيه وترعش وسطك خمسه بلدي
روح يابني اعمللك بوستر ليوم القطن ولا ليوم الفلاح المصري .. المنقرض

Soooo يقول...

يا إمو انت عارفني كويس .. مابيفرقش معايا موبيلات .. بس اصلك مش واخد بالك .. المزز اللي انا اعرفهم عايزنني اكلمهم فيديوكول اربعه وسبعين ساعه في اليوم

اوديكي فين ياصحه

الشنكوتي الكبير يقول...

يخرب عقلك طيب مش كنت تقولي علشان اخلى الواد بهظ يحضرلي العده نطهر الجو ونعقم المنطقه اصل انت عارف الكيف مناوله مش مقاوله يا صاحبي
وعموما كويس انك فكرتني الحق اعمل جمعيه اشتري بيها موبايل ثري جي بدل ما كنت هاوضب الشقه اتجوز فيها حتى الجواز كانت هتبقى واحده بس انما كده 72 ساعه
مع المزز يا وعدي
تحياتي يا منجهه
انت مبتعرفش لغه ولا ايه
سلاااااااااااااااااام

Soooo يقول...

الشنكوتي الكبير
الحمدلله اتعلمت اللغه وكنت باخد كورسات في المركز التعليمي الباطناوي اللي في اول الباطنيه بعد دولاب ابو شاكر ربنا يفك حبسته يارب
وبعدين جواز ايه ياعمنا .. انت لاقي فلوسك في الشارع لما تروح تجيب واحده وتأكلها وتشربها وتبقى مسئول عن كل حاجه عنها .. ده حتى مش حلوة في حق المجتمع
ولا ايه؟؟

غير معرف يقول...

جميلة جدااا وفي الصميم.
في ناس قشرة وفشرة .. من برا هبا هبااااااا. ومن جوه يعااااااا يعااااااااا

فلازم ولابد تنقي وتختار؟؟ هو انا في سوق خضار ؟؟؟
ماعلينا

عايز اختيارك يبقى تمام حط اللي يجيلك في الجمجمة .. لو ملاها يبقى فل وعال العال ؟؟؟ غير كده يبقى على زبالة الأمم

تحياتي شهد

مشمش يقول...

فعلا يااخ سووو كل الي قلتلة صح صعب انك تلاقي بني ادم بجد دلوقتي طب انا في سؤال واجع قلبي ونفسي اعمل علية احصائية لو الحرب قامت النهاردة كام شاب هيروحو يحاربو بارداتهم وكام شاب ابوة هيعمل المستحيل ويدفع رشاوي عشان يقعدو وكام شاب هيقف في الحرب ورجلو بتخبط في بعض وكام شاب هيموت وهو بيقول الشهادة وعلي وشة ابتسامة بجد واجع قلبي مبقاش في رجالة كتير تستحق لقب رجالة معرفش بالظبط باة اية السبب بس الرجالة كلها دلوقت بقت ورق بجد الي في دماغها بقة زي الي في دماغ البنات مع اختلاف الاهتمام الموبيل واللبس والعربية والشعر وطقم الموزز ولا اية رايكو في كلامي يارب اطلع غلط

Soooo يقول...

شهوووووده اختي الحبوبه
انا قعدت اضحك قوي على
فلازم ولابد تنقي وتختار؟؟ هو انا في سوق خضار ؟؟؟

بجد بجد هتفضلي شاعره طول عمرك وتعرفي تجيبي شوية مصطلحات بنت لذينه حلوه قوي زيك كده يا اختي العسوله

والله ياشهد المشكله اننا لازم نتعامل مع الناس دي
ماينفعش نعتزل الحياه ونبعد ونقول مادمت انا صح يبقى على الدنيا السلام .. بس المشكله الاكبر بقى .. ان الناس كلها تتحول لكده
تبقى ناس فالصو
وربنا يستر يارب
سلامووووووز

Soooo يقول...

مشمش يا صاحبي بصراحه شديده انا اول واحد لو حصلت حرب لاقدر الله .. اول واحد هخلع
لسببين .. اولهم اني لما كنت مقدم في التجنيد مارضيوش ياخدوني وقالولي انت عندك ليونه ولو اني مش عارف قصدهم ايه بس تقريبا عشان ركبي بترجع لورا ودي حاجه تعتبر عيب خلقي .. مع اني باكل وباشرب وباجري ورا الاتوبيسات عادي خالص
وتاني سبب .. هحارب لصف مين ؟؟ لو قلتي لصف مصر هقولك مصر البلد ولا مصر المحطه؟؟
ارجو انك تكوني فهمتي قصدي

Salwa يقول...

فعلا في ناس سطحيه وغاويه مظاهر
وفي ناس مش بتفرق معها الحاجات دي
واللي بيهمه في الإنسان جوهره
في ده ... وفي ده
والعقول بتتفاوت

أما عن لو قامت حرب لا قدر الله
أعتقد
أننا خير جند الأرض
ساعة الشده
عرق الكرامه والرجوله والنخوة هيظهر
حتى الواد سوسو ولولو وتوتو
هيتجند
على رأي صلاح جاهين

على اسم مصر التاريخ يقدر يقول ما شاء أنا مصر عندي أحب وأجمل الأشياءباحبها وهي مالكه الأرض شرق وغرب وباحبها وهي مرميه جريحة حرب باحبها بعنف وبرقة وعلى استحياء واكرهها وألعن أبوها بعشق زي الداء واسيبها واطفش في درب وتبقى هي ف درب وتلتفت تلقيني جنبها في الكرب والنبض ينفض عروقي بألف نغمة وضرب على اسم مصر

وعجبي

على فكرة أنت بتتكلم عن أشياء جاده جدا
بسخريه جامده جدا

Soooo يقول...

Salwa

الحقيقه انا قريت ردك كزا مره وفي كل مره ابقى عايز اتكلم بس مش عارف اقول ايه بعد اللي قلتيه ..
خصوصا انك قفلتي تعليقك بكلام عمنا صلاح جاهين

بس في نقطتين ممكن اتكلم فيهم

اول نقطه .. ميمي وسوسو ولولو والعالم دي صدقيني مش هتحارب .. مش عشان هم فرافير ولا اخرهم خناقة باللبان وأستيك الايس كريم .. لأ .. بس باباهاتهم وماماهاتهم هيسفروهم بره عشان يخافو عليهم لا يتعورو .. وممكن يبقو يتبروعو بقرشين تلاته للمقاومة الشعبيه اللي ساعتها هتكون من المصريين فعلا

تاني نقطه .. اللي اني باتكلم في حاجات جد باسلوب ساخر .. والله ياسلوى احنا زهقنا من المواعظ والاسلوب الخطابي الحماسي .. او عن نفسي زهقت منه .. يبقى بالتالي الاحسن اننا نتكلم بالبسيط وبالبلدي وبالمصري .. ولما نيجي للمصري .. يبقى داوني بالتي كانت هي الداء
من كتر مانضحك علينا .. يبقى ماينفعش غير اننا نضحك ونتكلم ..
وعلى الله حد يفهم


والسلامووووز ختامووووز

بت خيخة وأى كلام يقول...

بص بقى يا عم سوووووووووو
انا فى موضوع المظاهر ده بالذات ماشية على حكمة قالها غاندى
الحكمة بتقول ايه
لا تجعل ما ترتديه اغلى ما عندك حتى لا تجد نفسك يوما ارخص مما ترتدى

يعنى من الاخر كدة بلاش نقعد نهتم بالمظاهر وننسى جوهرنا علشان ميجيش علينا يوم نلاقى فيه نفسنا زبالة من جوة ونبقى من برة هلا هلا ومن جوة يعلم الله

بس موضوعاتك كلها دخلت دماغى
انا لسه هاروح اكمل اهه باقى المدونة
سلام
اختك خيخة

MoodyLicious يقول...

الزمن ده عايز المظاهر حتى لو انت مش مقتنع بيها يبقى لازم تستغفل كل ال..... اللى حواليك و زييط بقى 3g و بورتو مارينا و حبشتكانات كده