الثلاثاء، 20 رمضان، 1428 هـ

انت مين ياعم ؟؟

انا مين ؟؟
الحقيقة السؤال ده باسأله لنفسي في اليوم الواحد قد بتاع عشرميت مره .. وكل مره اتنح قدام نفسي .. اه والله بجد .. اقف كده قدام نفسي متنح
من يجي حوالي بتاع قد مثلا تلاتين سنه اتولدت في الصعيد .. تحديدا في سوهاج .. وتحديدا اكتر بقى في مركز طما .. ابويا وامي قرايب .. ودلوقتي الطب الحديث بيقول ان جواز القرايب بيجيب عيال فيها نسبة تخلف .. يبقى انا متخلف
ادي اول خيط في تشريحي لنفسي .. نخش في الخيط اللي بعده .. لما اتولدت وانا صغير دراعي اليمين اتكسر .. وده فال وحش .. يبقى انا عيل وشه فقر .. وده الخيط التاني في اثبات انا مين
لما كبرت شويه وبقيت في مرحلة المراهقه كنت على طول باهزر واحب الضحك وكده .. ولاد االحلال من صحابي قالولي ماتمثل او تجرب حظك في التمثيل .. لما جيت امثل كنت مش فاهم يعني ايه تمثيل .. لكن شويه شويه لقيت ان التمثيل ده في دمنا كلنا .. وده يبقى الخيط رقم تلاته .. أنا بمثل
نسيت اقول اني وانا صغير في مرحلة الطفوله كنت بموت في الرسم .. مع اني مابعرفش ارسم بدليل اني دخلت كلية فنون تطبيقيه وكنت افشل طالب في الكليه .. يبقى كده الخيط الرابع واني باحب ارسم .. بس رسمي وحش
كل اللي فات كوم .. واللي جه في دماغي لما تميت التلاتين خريفا كوم تاني .. انا مواليد واحد اغطسطس الف وتسعميه سبعه وسبعين .. يعني عندي بالظبط بالظبط .. تلاتين سنه وشهرين ويومين على اعتبار اننا في تلاته اكتوبر الفين وسبعه
لما تميت التلاتين صيفا بقى .. فضلت مكتئب فتره طويله .. بتاع سبع دقايق وربع مثلا .. لأ فترة طويله طويله يعني .. اصل انا اعز النكد موووت .. كنت مكتئب لأني حسيت اني ولا حاجه .. ماعملتش حاجه اقدر اثبت بيها وجودي ولا انا باعمل ايه وليه .. تايه زي الاف او ملايين غيري تايهين .. وبالرغم من توهتي دي بس اكتشفت اني عملت حاجات واكتشفت حاجات واثرت في ناس واتأثرت من ناس .. يعني اكتشفت انه مش مهم 30 سنه ولا حتى سبعين سنه .. المهم اني عندي الرغبة في اني اعمل حاجه .. هي ايه بقى ولا هتيجي ازاي مش دي القضيه .. المهم .. اني موجود والحمدلله
-----
بس لسه جوايا سؤال .. انا مين ؟؟
لما جمعت الخيوط اللي قلتها لقيتها كده
أنا متخلف
أنا عيل وشه فقر +
أنا بمثل +
أنا بحب الرسم +
أنا ولا حاجه +
أنا عندي الرغبه في الحياه +
أنا موجود +
=
أنا زي مانا
سوووو

هناك 13 تعليقًا:

مشمش يقول...

ومين سمعك ياعم سووو كلنا تايهين واكتر منك كمان ومش مهم السن حتي لو عندة 20سنة لسة برضة مفيش امل ماهو هيكمل التلاتين وهو زي ماهو مهما حقق من حاجات برضة مش هتبقي حقة ومش حق حد دي مش نظرة تشاؤم بضمها لصوتك بالعكس مفيش حد بيفقد الامل يبقي كداب الي يقولك انا تعبت وهبطل افكر في الامل وهقعد في بيتنا انام واصحي واكل واتفرج علي الدش مدام لسة فينا الروح بيتجدد الامل مع كل نفس وكفاية انك بعد ماتكمل تلاتين وتلاق الدنيا عمالة تبهدل فيك من يوم ماتولد انك لسة عندك امل في بكرة بالرغم انك عيل وشك فقر ومتخلف وكدة يعني مع احترامي طبعا بس اكيد فية امل ولو مكانش في البلد والحكومة والناس يبقي اكيد الامل في ربنا كبير وعمرنا ما نقدر نفقد الثقة في ربنا حتي لو محققناش حاجة يبقي العيب فينا وربنا معاك ياابني وينولك الي في بالك

غير معرف يقول...

bos ya sede low enta mt3rfsh enta meen ana a2olk..
enta sooo atyb sh5s abelto fe 7yty de 7keka mntkya we esthlal labod mno..we kman enta ragel bm3na el klema..bas taeh shwya hya de kol el moshkla;)

Soooo يقول...

كان في واحد برضه زي حالتنا تايه كده يا مشمش وعمال يقول ياترى انا عملت ايه في حياتي .. ولما استرجع تاريخ حياته لقه ان هي دي الحياه .. نكسات وانتفاضات .. فوز وهزيمه .. افراح واحزان .. مافيش حد مهما كان هو مين عايش حياته كلها نكد في نكد .. حتى لو كان ايه .. هي دي الحياه ..
باختصار .. يانعيش بنحلم بالنهار .. يانفض ليل الانتظار ..
ونولع في روحنا .. حد معاه كبريت بقى ؟؟؟

الشنكوتي الكبير يقول...

يا سلام كل ده فيك يا مسكين وساكت على نفسك لسه بس عموما انا هاقولك على الدكتور اللي انا بتعالج عنده هو برده قالي اني هابقى كويس خلال تسع ست سنين كده بس مش مهم المهم النتيجه
عموما يا سيدي اذا كان على الرسم انا برده بموت فيه لكن رسمي زفت عامل زي العيال الصغيره مفيش ابداع خالص ولا اي منطق
وبحب اخترع حروف جديده واكتب كلام بلغات محدش فاهمها ولا انا نفسي
ما علينا هاسيبك واروح افكر انا بقى مين
سلاااااااااااااااااااام

miss monmon يقول...

enta mawgoud fe3lan ya ahmed wallahy mawgoud bedalel ketabatak elhelwa de welly btersem ebtesama 3la wesh ay 7ad bydkhol el blog beta3k enta bas yemkin 7azak wehsh shwaya allah a3lam bas da 3adi 3and nas keteer yalla see u 3and zohal:D:D

Soooo يقول...

الشنكوتي الكبير
والله يا شنكوتي احنا مشكلتنا اننا تايهين جوه نفسنا .. وكمان بيني وبينك اللي بيحصل حوالينا بيخلينا نتوه اكتر
ربنا يستر ونلاقينا

Soooo يقول...

miss monmon
اشكرك جزيل الشكر على كلامك الشيك الحلو اللي قلتيه ياستي ودي شهادة انا بافتخر بيها بصراحه
وصدقيني انا لما باحس ان الحياه معانداني كل شويه ولا حاجه بقول لنفسي ياد انت احسن من غيرك .. كفايه ان ربنا مديك ايدين ومخ وبتقدر تتكلم وتشوف .. وغيري ربنا ما ادالوش ده وابتلاه بحاجات تانيه
ووالله .. والله كمان مره .. باحس اني في امتحان كل شويه .. وبحاول اعدي منه .. لغاية ماربنا يكتبلنا الفرج في الدنيا .. ويارب في الاخره كمان
وشكرا ياستي على تواجدك معايا

غير معرف يقول...

انا مين؟؟

هو اللي ابوه وامه قرايب يبقى متخلف ياحلاوة ياولاد...
يبقى المتخلفين زادو 2

يامرحبا يامرحبا



جميل انك تسأل نفسك انا مين؟؟
بس احيانا كم التشاؤم اللي احنا فيه بيخلينا نشوف الجانب السيئ فقط

شوف اانك كاتب متمكن.. انسان خلوق.. روح الدعابة فيك حاجة جميلة

شوف قلبك حتلاقيه ابيض... واللي قلبه ابيض اكيد عمل كثير بس هو مش حاسس لأنه ده العادي عنده


والأهم من كده انك اخ رائع .


وزي ما قلت مش مهم 30 ولا حتى سبعين المهم انك عايز تعمل وانا واثقة انك حتعمل .. كل اللي تتمناه وبجداره

خالص احترامي


شهـــــــــــــــد

Soooo يقول...

شهوده اختي التي لم تلدها امي او ابي
بجد انا بانبسط كل مابخش البلوج والاقيكي كاتبه تعليق .. وبقول لروحي هي دي الاخوات فعلا

والحقيقه يا شهد ان جزئية اننا نلاقي نفسنا ونعرف احنا مين دي مش مشكلتي ولا مشكلتك وبس .. كلنا مش لاقين نفسنا
وهي دي الحياه .. نفضل تايهين لغاية مانلاقي محطه نريح فيها شويه .. وبعد كده نتوه .. ونلاقي محطه .. ونتوه .. وهلم جرجر

سيبك انتي .. علي الطلاق من مراتي اللي لسه ماعرفهاش .. انتي بنت جدعه واجدع اخت في العالم كللو .. وابقي هاتيلي شاكاليطه مستورده من اللي عندك

سلامووووووووووز

فيروز الشطآن يقول...

ياترى.....

الهويه تمثلمنا....ام نحن نمثلها؟؟؟؟؟؟؟

اجابتك بين حروف السؤال يا سوووو

Soooo يقول...

فيروز الشطآن

اهلا بيك او بيكي يا فيروز الشطآن
ولما بقول بيك او بيكي فانا عندي حق في الحالتين
لان فيروز الشطآن ممكن يبقى اسم مؤنث لوجود فيروز .. وممكن يبقى مذكر لوجود كلمة فيروز مضاف اليها الشطآن

في اي الحالتين اهلا وسهلا يافندم

الحقيقه انا باعتذر عن عدم ردي سريعا على التعليق الي بيدعو للتفكير منك .. وذلك لاسباب خارجه عن ارادتي منها تجديدي لشكل المدونه ومنها ايضا انشغالي ببعض الاعمال الخاصه

الحقيقه انا حاولت اشوف المدونه الخاصه بالاسم ده لكن لقيت انه مجرد بروفيل ومافيش مدونه خاصه بيه

بس اللي انا اعتقده انك لو اتجهت او لو اتجهتي للتدوين هيبقى جميل جدا

وعلى رأي المدونه العزيزة (سبمتيك بس كلبوظه) .. قل لي ماذا تقرأ اقول لك من انت .. وقل ماذا تأكل اقول لك .. هات حته


منورني او منوراني وارجو المعذره في التأخير على الرد .. كما ارجو التواصل والتفاعل معي من خلال تعليقاتكم التي بدون شك سيكون فيها استفاده لكلينا


والسلامووووووز ختاموووووووز

MoodyLicious يقول...

يعنى انا لما اوصل تلاتين حتووه مننى اكتر من كده

ساعه الغروب يقول...

حلو اوى بجد انه الواحد يكون مقتنع انه حلو اوى زى ما هو كدا


ومهما كان فيه حتى لو كان ايه برضو هو كدا حلو اوى

حلو اوى انك تبقى مقتنع بيك كدا زى ما انت مهما حصل

بجد انا بوافقك فى راى انه مش مهم احنا عندنا كام المهم عملنا ايه

:)

ربنا يوفقك وتقدر تحقق كل حاجه بتحلم انك تحققها

ربنا معاك

تحياتى