الجمعة، 30 رمضان، 1428 هـ

!!! سعد نبيهه

كل سنه والامه الاسلاميه بخير
.. وان شاء الله في زي الايام المباركه دي
.. نكون عايشين في امان وسلام
وكل واحد يكون حقق اللي بيحلم بيه في الخير
ان شاء الله
-
.. النهارده كان اول يوم عيد
.. وبعد ماخلصت الصلاه وخلصت الخطبه
.. قلت اروح اشوف الناس صحابي عالقهوة واشرب معاهم كوبا من التي سكر بره
لقيت القهوة مشغله التلفزيون وبيذيعو اغاني العيد
.. العيد فرحه
.. وأجمل فرحه
.. سعدنا بيها
.. بيخليها
----
.. وهنا افتكر سوووو ايام الطفوله المشرده
.. ايام ماكنت باسمع الاغنيه دي وابقى فاكر الابله صفاء بتقول
.. العيد فرحه
.. وأجمل فرحه
سعد نبيهه
!!!!
وابقى مستغرب قوي .. مين سعد نبيهه ده يا جدعان؟؟؟
وازاي واحد يبقى اسمه سعد وابوه اسمه .. نبيهه ؟؟؟
يكونش ابن المنتج مثلا ؟؟
مش الاغنية دي بس .. اغاني كتيييير قوي
.. على سبيل المثال
معظم اغاني ام كلثوم كنت بافسرها تفسير مخالف لأي قوانين سمعيه وبصريه وميتافيزيقيه
زي مثلا مثلا اغنية .. هل رأى الحب سكارى
كنت باسمعها هل رأى الحب سوكارو
!!!
سوكارو ؟؟
مين ده ؟؟
وازاي بتسأل الحب عن سوكارو ؟؟؟
يكونش سوكارو ده هو نفسه سوكارلوس ؟؟
ومين سوكارلوس ده اصلا ؟؟؟
-
برضه ام كلثوم بتغني اغنيه تانيه بتقول ايه
.. بعيد عنك حياتي عذاب
دي بقى انا كنت باسمعها وانا تقريبا مغيب عن الوعي
كنت فاكرها بتقول فيما معناه يعني
بعيد عنك وعن السامعين ياخويا .. حياتي عذاب
أي والله عذاب
!!!!
وابقى هشد في شعري
.. واسأل نفسي هو ينفع انها تدخل جمله اعتراضيه
في وسط الاغنيه ؟؟؟
تقريبا كان باسمع الاغاني دي وانا نايم على ودني اللي باسمع بيها
او تقريبا وقعت على ودني اصنجيت مثلا
-
لكن لما كبرت شويه فهمت طبعا ايه الكلام وكده
وفهمت كمان نقطه مهمة جدا
فهمت اقرا مابين السطور
.. فهمت ان لكل شيء في الدنيا حاله نفسيه
حاله مرتبطه باللي بيعمل هذا الشيء
-
يعني في حالة الاغاني مثلا
المؤلف بيبقى في حاله نفسيه معينه وهو بيألف
الملحن بيبقى في حاله نفسيه معينه وهو بيلحن
المغني بيبقى في حالة نفسيه معينه وهو بيسمع اللحن
وبيغنيه وهو في حاله نفسيه معينه عالمسرح او في الاستوديو
.. يعني لكل شيء حالات نفسيه
.. ولو الحالات النفسيه دي كلها كانت متقاربه
.. بتخللي العمل الفني او اي عمل في الحياه عموما
بيبقى تحفه
-
نفس الحوار هنا معايا
.. لما بافكر في فكره عشان اتكلم عنها
بابقى في حالة نفسيه معينه
لما باكتبها بابقى في حاله نفسيه تانيه
.. لما حد بيدخل عشان يقرالي حاجه
.. بيبقى حاطط في دماغه انطباع معين عن نوعية المواضيع اللي باتكلم عنها
وبيبقى حاطط انطباع عن شكل البلوج بتاعي
وبعد مايقراها بتمتزج بقى كل الحالات النفسيه دي
.. يا اما تمتزج وتبقى حاجه تحفه
يا اما تبقى ليلتنا مطينه بطين
-
وفي وسط الليله دي بنهمل حاجه مهمه
ايه اللي مابين السطور؟؟
ايه اللي اقصده انا او غيري من اللي بيكتبو سواءا في مدونات او في اي مجال تاني
؟؟؟
المعنى الحقيقى للحدوته ايه ؟؟؟
-
لكن احنا معذورين برضه
احنا ماتعلمناش ده في المدارس ولا الجامعات
كانو بيخلونا نحفظ وبس
نحفظ مانفهمش
مانقراش اللي مابين السطور
انا مش باتكلم عن حاجه مكتوبه بحبر سري
انا باتكلم عن روح الكتابه نفسها
عن الغرض من ان اي حد يكتب
انه يوصل افكاره للناس
-
-
الحقيقه من اول مابتديت اكتب وفيه ديشيليار واحد وواحده مش قاريين اللي مابين السطور
..
.. عايزين المعلومه سهله وخلاص
ديشيليار واحد شايفين ان سوووو شخص تافه وهايف
وبيهرتل في اي هسس وخلاص
عايزين يقرو واحد زائد واحد يساوي اتنين
وده ماينفعش
ينفع لو في حالة اننا داخلين امتحان رياضيات او حساب او فيزيا
.. والمصحح قدامه اجابه نموذجيه
هيشوفها ويدي درجة بناءا على المكتوب في ورقة الامتحان
لكن هنا .. او مش هنا
في اي مدونه تانيه .. وفي اي جرنان وفي اي مجله
انشالله حتى تبقى ميكي او فلاش
لازم نقرا اللي مابين السطور
-
انا متأكد مليون في الميه ان في ناس هتقول اني باعيش في دور الفيلسوف
وهيقولو انت عايز تقول ايه .. انت بتتهمنا اننا مابنفهمش؟؟
كلا وكلا .. انا باعترض
.. اعترض ياعم او اعترضي ياستي
والله الاعتراض حلو
بس لما يكون منطقي
لما يكون في عضم الموضوع مش في شوية قشور زي مثلا اني لساني طويل وباشتم وباقبح وبقول على فضايحي
.. افهم ايه اللي اقصده وبعد كده قول براحتك
وانا برضه اقول
-
.. والا وكتاب الله
هاجيب سعد نبيهه ونقفل عالم البلوجرز ده ونشمع الليله كلها بشمع ازرق ممحمح
-
-
وكل سنه وانتو طيبين
سوووو

هناك 95 تعليقًا:

رئيس جمهوريه نفسى يقول...

ااقولك على حاجه انت صح سيبك من الى بين السطور دى قدرات بيقسمها ربك على عباده
حكايه فضايحك انت صح فى دى انت بتعبر عن نفسك بصحك وغلط عارف غلطك فين وبتقول عليه مش لازم تكون ملائك لانى مفيش ملائكه بتعيش على الارض
عيدك سعيد يا مان

زُمُرده يقول...

يا روش وآخر روشنه
يا طبيعي من غير تنشنه
عايز تشكرني أناه؟؟

ربنا يتقبل منك رمضان
ويعوده عليك بالخير
ويباركلك ويرضيك
ويوسعلك كل ضيق
والجنه منتهاك

عيد سعيد عليك وعلى كل المسلمين

بس اوعى تسمع كلام شوشو وتضيع رمضان من اول يوم في العيد

__________________
توضيح صغير

سعد نبيها وليس نبيه

طبعا فاهم سعد=فرحه
نبيها=مين؟؟ نبي الأمه الإسلاميه
ايوه سيدنا محمد
ما انت تمام وبتقرا اللي بين السطور
اوع تزعل من هزاري

وبعدين ميهمكش اكتب وقول بين السطور وتحتها وفوقها
واللي عايز يفهم يفهم واللي مش عايز يدورله على حد يفهمه

وياريت تبطل المشروب اللي بتشربه قبل الكتابه ... مش مهم لونه...ركز على النوعيه

سلام يا جميل

SaSo يقول...

على فكره من الواضح ان مفيش حد كان بيسمع الاغنيه دى صح اصلا
والحكمه والقصد من ورا هذا انهم يشغلو الجيل كله بمعناها اطول فتره ممكنه لحد مايكبرو وتتكشف لهم الحقيقه الغائبه
كل سنه وانت طيب

ghalia يقول...

على فكرة موتتنى من الضحك والله العظيم
سعد نبيهة؟
هههههههههههههههههههههههههههه
انا كمان كنت زيك كدة بفهم الأغانى على قد ما ربنا يقدرنى
أنا فاكرة ان أكتر أغنية كانت عاملالى مشكلة أغنية أم كلثوم أراك عصى الدمع
كنت اسمعها واقعد احاول افهم
وفيت وفى بعض الوفاء مذلة لفاتنة فى الحى شيمتها الغدر
ايه الكلام ده
وأحاول افهم انى افهم.. أبدا
دمك زى العسل على فكرة
:) وكل سنة وانت طيب

محمود علي يقول...


ايه ياعم الكلام الكبير ده
تصدق وتؤمن بالله
انا كنت فاكر الاغنيه ديه كده برضه

بس بالنسبه لام كلثوم اكمني سمعتها علي كبر
مخدتش بالي من الموضوع ده
كل سنه وانت طيب
انت وسعد

fanan fa2eer يقول...

لا مافهمتش يعني ايه اللون الأزرق ماله في الآخر

عموما انت عندك حق جدا

بس انت ماتزعلش اللي بحصل في المدونات بيحصل في الحقيقة
يعني ممكن تكون بتهزر مثلا وميت من الضحك

لكن من جواك عندك هموم الدنيا و بتبقي بتسخر من حزنك ومن الحالة اللي أنت فيها

حاجة كدة بيسموها الكوميديا السوداء

هاتلي بقا حد يفهم كلامك مظبوط ويقولك انك في الأصل حزين وأن كل ده من بره وبس؟؟؟؟؟

لأ طبعا
بيبقوا فاكرينك فرحان جدا

الناس مالهاش الا الظاهر ومابتفهمش الا اللي هي عايزة تفهمه

بس انت لازم تروح تكشف علي ودانك ياراجل ماينفعش كدة

وايه الأخبار؟ لسة مالقيتش سعد نبيهة؟

طيب سوكارلوس لقيته؟

أنا اللي أفتكره عن الأغنية دي المقطع بتاع هيييه هييه هيييه هييييييييييييييه العيد فرحة

ماكنتش باكمل لآخر الأغنية الحقيقة
احنا فاضيين نسمع؟
:))

كان فيه مراجيح مستنيانا

أغنية أم كلثوم بقي كنت دايما اسأل هل رأي الحب سكاري يعني ايه ماكانش في حد بيجاوبني فاستنتجت ان سكاري دول زي الناس اللي بتشرب حاجت مش كويسة وتسكر

:))


كل سنة وأنت طيب

mesh2dra يقول...

السلام عليكم

حلوة اوى حتة ان الواحد يفهم بين السطور
ان اللبيب بالاشارة يفهم

وصعب كمان ان اللي قدامك مايفهمش انت تقصد ايه ويقعد يماطل معاك
ويجادل فيك

**
بمناسبة انك وقعت على ودنك
الظاهر مش انت لوحدك
حقولك سر خطير
فيه اغنية بتقول يوم ورا يوم حبيبي ماجانى نوم ... أو ما شابه - مش بقولك مش لوحدك- انا بقى بكل فقاقة سمعتها يوم ورا يوم حبيبي " مجانينو" ازااااااى معرفش
ماجاني نوم = مجانينو :D
ماتاخدش ف بالك :))

كل سنة وحضرتك طيب
عيد سعيد ان شاء الله

سلاماتي

Bacteria يقول...

kol sana wenta tayb el awl :P
we 3eed sa3eed 3ala kol el moslmeen a7ya2 we amwat
we be monasbt sa3dnabeha da she2 tabe3y mat2l2sh el tabla el 2ozonia 3andak mafehash ay 3eeb
ana le7ad now basma3 el songs we a5odha zay ma hia keda < da law sm3tha aslan > 3ala ra2y el masl teegi teegi matgesh matgesh fehmt eshta mafhmtsh we da el tabe3y eshta bardo ma3ndesh mashakl mn na7yt el mawdo3 da zay ma been el seetor keda (A)
bas wade7 keda 3ala ad fehmy mn been el setor en 7abba mn el kalam da lia (A)
we en enta shayl fe nafsak awy mn el nakd < law hansmeh nakd ya3ni >
ana wala mo3trda wala bate5 3awz teshtm eshtm enta 7or :P
bas el deen mab3rfsh ashoof 7ad bytklm 3alih be ay so5ria < 7ata law mn weght nazro da by5atb 3e2ool we msh 3arfa eh :P > we askot batnrfzzz gedan
we ba3den ana lama 2olt 3ala mawdo3 faday7ak ana msh ba2ool ra2y sha5sy sa3tak wala batklm 3an keshor ana ba2ool ra2y el deen fel mawdo3 maho akeed mafesh 7ad malak 3ala ra2y el ra2es el fo2 da :P
akeed ay ensan fena fe kewis we fe we7sh fe eltezam we feh dya3 bas be nesab mo5tlfa
ela nas 2olyla awy rabna yg3lna mnhom ya rab
we el so5ria fe el mawade3 el denia de msh 7aga style we wow we te5ateb el nas el we7shen :P
el deen howa el deen sa3tak ma bytgz2sh we ma bytghyrsh mahman 7asl hanfdal 3alatol nsly el dohr wel 3asr arba3 rak3at msh haneegi yom nela2ehom rak3teen 3alashan e7na msh fadyeen
we el sonna hia el sonna ma bttghyrsh
ya3ni lama el naby < 3alih el salah wal salam y2ool kol 2omaty mo3afa ela el mogaheron > ya3ni ely begahr bel ma3sia da msh kalam shekh ba2a da kalam as3ad 5alk Allah
msh haygi wa2t te2ool la2 ana atklm 3an el ba3mlo zaman aw el ba3mlo 7ata delwa2ty wel zaman gher el zamn yb2a sa3tak keda 5argt 3an sonet el hayshf3lak yom el deen
ka mesal e7san 3abd el kedos mo3zam rewayato feha kalam akal ma yokal 3ano eno baze2 , ah sa7e7 el wa7ed we howa soghyr lama kan by2ra el byktbo kan byd7ak 3alih bas lama kebr 3erf en la2 maynf3sh el byt2al da
we yossif el seba3y kan be2ool kalam estghfor Allah kofr walahy el wa7ed kan by7s bel zanb bas lemogard eno by2ra el byktbo we kan lesano taweel bardo
and btw ana aslan makontsh ha3la2 3ala mawdo3 el shataym
el 3al2t 3alih mawdo3 el deen 3alashan keda ana kont katba feeh we ba3den 2olt bel-mara a2olak :P

Re-hab

بهلول يقول...

دى برضه اول زياره لى فى مدونتك
واحب اقول لك
من حقك ان تعبر عن وجهه نظرك باى اسلوب تحبه
وكل واحد له حريه قرأه ما بين السطور
تحياتى وكل سنه وانت طيب

wa7dania يقول...

كل سنة وإنت طيب
عجبني جدا البوست ده والله
أصلا إنت قريت أفكاري
عشان أنا كنت ناوية أعمل بوست عن الكلمات اللي بنسمعها غلط
في الأغاني
تسلم
منى المحمودي

semsem يقول...

ايه دا كله

ياراجل سيبك
كل سنه وانت طيب

Queen eraser يقول...

كل سنة وانت طيب.

انت نسيت حاجة مهمة يا سووو..
موضوع قراية بين السطور دة مش كل واحد يعرف يعمل كده.كل واحد و قدراته بقى.
بص مفيش أحسن من انك تكتب اللى جواك بالطريقة اللى تريحك و كل أسلوب و طريقة وليها معجبينها ومتابعينها.
متحطش ف دماغك..زى ما فى ناس بتعترض فى ناس بتؤيد بس المهم و بكرر المهم انك تكون صح.
كل سنة وانت طيب كمان مرة يا سو.

Marvel يقول...

ههههه...كل سنة وانت طيب وعقبال ديشليون عيد كمان

الا هو الدشليون ده يطلعله كام كده!!؟؟

:D

Mohamed يقول...

بصراحة ماخدش بالي قبل كدة من معاني كلمات اغاني العيد شكرا هيهي معلش انت عارف انا ماليش في الاغاني العربي
بس برضه انا عاوز اعرف مين سعد !!!

كل سنه وانت طيب
m.nabil

هناء يقول...

ولايهمك، اكتب ما تريد و الذي يريد الفهم يجتهد على رأي " أنا لست مروحة للكسالى النائمين"

و سلام حار مني لسعد نبيهة

Nadosha يقول...

كل سنة و انت طيب يا سووو
اغنية طنطك صفاء و هى فاعدة قى الجونينية و لما حوليها العيال و ماسكة كوم بلونات
و بتقول سعد نبيها انا اصلا مكنتش فاهمة يعني ايه سعد نبيها دى بس الحمد لله انت جيت فهمتني
انا كان عند نفس المشكلة مع رمضان في اغني بتقول رمضان جانا و فرحنابه
ايه بقى فرحنابه يعني رمضان جيه و نابه فرحان وعندك اجابة قولى

اما بالنسبة لموضوع بين السطور مش اى حد ممكن يفهمه او يحدد المقصود من بين السطور قدرات مش اكتر و ممكن حد يفهم حاجة غير التاني و دى تبقى فروق فردية

Soooo يقول...

رئيس جمهورية نفسي

المشكله يابرنس مش في قراءة مابين السطور وبس .. لأ ده في التحليل الخاظيئ لشخصي وللي بقوله

وعيد سعيد ياريس
عايزين المنحه بقى ياعم

Soooo يقول...

زمرده

متشكر أخر شكرنه
من دلوقتي لميت سنه
بس شعرك ده .. لي أنا ؟؟

وكل سنه وانتي طيبه

-------

ادي تفسير جديد ماكنتش اعرفه خاااالص
شكرا بجد .. طب وباقي الحاجات اللي كنت باسمعها صح على كده ولا ايه ؟؟

وبالنسبه للمشروب .. انا حاليا بحاول ابطل السحلب وربنا يسهل
وكل سنه وانتي طيبه يا احلى زمرده في الزماريد المتزمرده

Salwa يقول...

هو أولا أنا كنت فاكراها برده سعد نبيها
بس بالبحث وجدت إنها سعدنا بيها
وكمان أغنيه أم كلثوم
كنت بقول إيه ده
هو في الأغاني برده بعيد عنك ومتشفهاش
وحاجات من دي
بس بالبحث أيضا وجدت أناإنها بعيد عنك العادية دي

وطبعا إنت عندك حق
ممكن واحد يعرض وجهة نظرة وهي مغطاة بالسخريه
فالناس ترى السخريه وتبعد عن وجهة النظر أو الفكرة الأساسية
وبجد أنت عندك فكرة وأسلوب مميز
وفقكم الله

Soooo يقول...

SaSo

ده انا اكتشفت انها مشكلة جيل بحاله مش مشكلة فرد بس على كده
!!!!

عموما تشرفت بالزياره دي وارجو انك تعتبري مدونتي هي مدونتك


ملحوظه .. ايه نظام موبيلك الجديد .. اشتري اخوه ولا اشوف الان 80 ؟؟؟

وكل سنه وانتي طيبه

Hannoda يقول...

ههههههههههههههه

أنا مت على نفسي من الضحك وعملت سياح في السيبر حرام عليك

مين سعد نبيهة ده؟؟؟

ههههههههه

أنا لسة ما كملتش البوست على فكرة و حاجي تاني أكمله

كل سنة و انت طيب

Soooo يقول...

ghalia

كل سنه وانتي طيبه واضحكي براحتك ياستي حد واخد منها حاجه

هي دايما ام كلثوم كلامها كبير اصلا .. دانا مش فاهم لغاية دلوقتي الكلام اللي انتي قلتيه ده ياشيخه


وكل سنه وانتي طيبه
سلامووووز

Soooo يقول...

محمود علي

منورني يابو حنفي والله
وتقريبا احنا كلنا اضربنا على وداننا واحنا صغيرين قمنا اصنجينا

أما ام كلثوم فدي حالة متفرده لغاية دلوقتي زي ماقلت لغاليه


وكل سنه وانت طيب يا باشا

البرديــــــة المصرية يقول...

كل سنة وانت طيب الاول

و عندك حق فى كل اللى قلته


مين بأه سعد ؟

Soooo يقول...

fanan fa2eer

كل سنه وانتي طيبه الاول
اللون الأزرق الممحمح
زي الاخضر المسنتح
او البمبى المأيح

دي مسميات لشوية الاوان هلاميه مالهاش اي نظير في الطبيعه

وعلى فكره انتي الوحيده تقريبا اللي فهمت اني بجد من جوايا مش حزين وبس .. لأ .. دانا ميت اصلا بس باعافر

وبالنسبه للمراجيح .. دي كانت زمان ايام ماكان في مراجيح .. وكمان انا اصلا اصلا ماكنتش باعرف العب مراجيح عشان تخين فماكنتش باحب اروح المراجيح عشان كانو بيتريقو علي وبتاع

ونورتيني بزيارتك .. وياريت تكرريها وبتاع
وكل سنه وانتي طيبه

Soooo يقول...

mesh2dra

كل سنه وانتي طيبه
ومتشكر تشكرات على زيارتك لمدونتي المتواضعه دي

وفعلا انا تأكدت ان قراية مابين السطور دي بجد موهبه من عند ربنا
واتأكدت برضه اننا فعليا مش فاهمين اي حاجه عن الاغاني دي

بس حلوة مجانينو دي بجد
:DDDD


وكل سنه وانتي طيبه
وسلامووووووز

Soooo يقول...

Bacteria

كل سنه وانتي طيبه
ومبروك عالبلوج






وسلاموووووز

Soooo يقول...

بهلول

نورت المدونه ياباشا وياريت تعتبرها مدونتك وتنورني في اي وقت

وكل سنه وانت طيب

Soooo يقول...

wa7dania

ياسلام ياستي .. اعملي مليون موضوع .. دي ماده خصبه قوي للكلام
خصوصا اني اكتشفت اننا كلنا كنا طرش اصلا وبغبغانات بنردد اي حاجه وخلاص



وكل سنه وانتي طيبه

وسلامووووووز

Soooo يقول...

semsem


على رايك والله

سيبك انتي .. نورتيني والبلوج بتاعك فكرته حلوة



وكل سنه وانتي طيبه
وسلاموووووز

Soooo يقول...

Queen eraser

وكل سنه وانتي طيبه يا كوين

وفعلا عندك حق .. مش مهم رأي الاخرين طالما انا شايف اني صح

بس قوليلي ابوس ايدك .. يعني ايه جومه ؟؟؟؟


وكل سنه وانتي طيبه
وسلاموووووز

Soooo يقول...

Marvel

وانت طيب ياباشا

وبالنسبه للديشيليون فهو واحد
وقدامه ديشيليون صفر



وكل سنه وانت طيب
وسلاموووووز

Soooo يقول...

Mohamed


منورني والله يابرو

وهبقى اقولك مين سعد ده بعدين عالقهوة
ونحن نحتسي كوبا من التي سكر أوت سايد
هع هع هع هع


وكل سنه وانت طيب
وسلاموووووز

Soooo يقول...

هناء

شاكرين مهللين على تعاطفك معايا في الموضوع
وفعلا ..
مش لازم الواحد يبقى مروحة توشيبا العربي


وكل سنه وانتي طيبه
وسلاموووووز

Soooo يقول...

Nadosha


يا بنتي انتي مش واخده بالك من اغنية رمضان جانا وفرحنابو

قصدهم .. ان رمضان جه ..
ومعاه الاستاذ فرحنابو شخصيا


وانا اللي كنت فاكرك بتفهميها وهي طاير

كل سنه وانتي طيبه
وسلاموووووز

Soooo يقول...

Salwa

شفتي بقى .. اتضح انها مش سعدنا بيها واتضح انها سعد نبيها
يعني فرحة نبينا محمد صلى الله عليه وسلم على راي زمرده


ده احنا كلنا طرش بقى ياجدعان

---

وبالنسبه للاسلوب فدي حاجه فعلا مختلفه من شخص لآخر ..
وممكن يكون اسلوبي ساخر مثلا بحاول اهرب من جدية بعض المواضيع

سيبك انتي .. كل سنه وانتي طيبه
وسلاموووووز

Soooo يقول...

Hannoda

كل سنه وانتي طيبه ياستي
ولو انكم معيدين قبلنا وبتاع

وبعدين فيها ايه لما تضحكي في سايبر
الضحك مالوش مكان ولا زمان .. اضحكي براحتك
ولا هم بيقفشو اللي بيضحكو اليومين دول يا جدعااااان ؟؟؟؟



وكل سنه وانتي طيبه .. ومستني تشرفيني تاني وتقري الموضوع كللو .. وتقولي رأيك

سلاموووووووووز

Soooo يقول...

البرديــــــة المصرية

كل سنه وانت طيب ياباشا ومنورني واتمنى اشوفك على طول هنا

بالنسبه لسعد فأنا الى يومنا هذا مش عارف هل هو ابن المنتج ولا ابن المخرج ولا ابن المؤلف .. شكله هيطلع ابن ستين ........

وكل سنه وانت طيب ..
وسلاموز

الباحث عن الحقيقة يقول...

على فكره
الاول كل سنة وانت طيب
على فكره
اه ..ومدونة حلوه
على فكره
تتصور ان انا عمرى 27 سنه واول مره اعرف معناها دلوقتى
وعلى فكره برضه
لا انا ولا انت ولا حد من اللى سمعها كان غلطان ولا يلوم نفسه ابدا
الغلطان هو الاستاذ الشاطر الفالح ابن الناس الشاعر اوى اوى اللى اتزنق زنقة البليد فى جدول الضرب "سيبونى محدش يمسكنى ده انا مخنوق منه " يعنى ضاقت فى وشه ازاى عامل فيها شاعر ومش عارف يلاقى كلمه ..كلمة يا جماعة كلمة تؤدى الغرض من غير ما تكسر الوزن
ما كان اتنيل قال : فرحنا بيها
على الاقل مفيش واحد اسمه فرح بتسكين الراء لكن فيه فرح بفتح الراء
انما بالراء الساكنه مفيش
وبعدين مفيهاش لخبطه : فرحنا بيها
انما فيه حد يقول : سعدنا بيها
ماهو من غباوته بيستخدم كلمه غير مشهوره فى اللغة العامية ويحطها فى اغنية عاميه ..الناس كلها بتقول سعادتنا بيها ..محدش بيقول سعدنا بيها
يعنى هو والملحن والمطربه ما شاء الله عقول كده ..كده
اخص ..الواد كره الاغنية دى يا شيخ
انا طول عمرى اقول مين سعد نبيهه ده
كنت فاكره سواق الحنطور اللى فى الاغنية
كفاية كده انا اتخانقت
ماعندكش بلكونه الواحد يقف فيها يشم هوا شويه

esraa يقول...

انا كان في حاجات بسمعها كده وانا صغيلاه
(:
بس للأسف مش فاكره هي كانت ايه

المهم كل سنة وانت طيب
وعيدك سعيد

Doba يقول...

واضح ان كل اطفال مصر كانعندهم العته بتاع سعد نبيهه ده

كلنا كده والله
حاجة غريبة

مدونتك جميلة ودمها خفيف وتستحق المتابعة

تحياتى وامنايتى بكل التوفيق
هبة

زُمُرده يقول...

احلى حاجه في مدونتك
لأ....اقصد من احلى الحاجات
انك بتطلعني من المووود

نفسي اعرف المصريين بيجيبوا خفة الدم دي منين؟؟؟
هو انت بتاكل ايه؟؟
اصلك غيرت المشروب ولسه ...الحاله مستمره
ربنا يفرحك يا سوووو
سو يا سو .. سو يا سو
وحبيبي حبسوووه

الأميره أوسه يقول...

أنا كنت بقرأ البوست بتاعك فى أمانة الله وتقريبآ مركزه معاك
فجأه لقيتك دخلت يمــين على موضوع
القرأه للجميع بين السطور
رجعت قريت من الأول أحتمال
فى شوية سطور وقعوا منى
لقيتك بتتكلم عن الأستاذ الشاعر سعد نبيهه وبعدين بدأت تزعق وتقول محدش فاهم حاجه و الناس بتكرهنى وبتقول عليا أنى فيلسوف
الناس بس مهيسه شويه
أنت بقا دورك أنك توضح أكتر عشان أحتمال نفهم
متنساش أننا تعليم حكومى
يعنى كبيرنا سيجارتين بانجو ونسطح
على سقف المدونه بتاعتك تايهين

د. ضياء النجار يقول...

سؤال صغير بعيد عن موضوع البوست،
هي مش دي صورة العظيم نجيب سرور؟ أديني بحاول أقرأ ما خلف الصور!0

تحياتي

ضياء

brokenheart يقول...

ترى يا هل ترى هل انت سوووو بتاع مصر اليوم ام انت سووووو آخر ليس له به اى علاقة من العلاقات الاجتماعية اللمفاوية الفنية المعتبرة ... اذا كنت انت هذا الذى اقصده اذن ف لاحييك على هذا البلوج الجامد واذا كنت لست هذا الذى اقصده اذن حصل خير ولاحييك مرة اخرى على هذا البلوج الجامد المتين ... ربنا يكرمك يا جدع وتطلع اللى اقصده ... اللى انا قصدى عليه يعنى ... يعنى اللى انا شوفته قبل كدة .... يووووووه بقى انت حاتلخبطنى ليه ... اللى فى النية والسلام ...


سيبك من الهبل اللى فات .. لو انت احمد سو يبقى مية مية .. ولو مش انت .. يبقى فرصة سعيدة .. ... احنا اسعد

الشنكوتي الكبير يقول...

انت يا عم الحاج انا فاكر حطيت كومنت هنا قبل الناس دي كلها هو راح فين
الله يخرب بيت النت العادي تلاقيه متحفظشي ما علينا
كل سنه وانت طيب
بس على فكره سعد نبيهه ده كان شغال في مركز حساس قوي في الدوله علشان كده محدش يقدر يعرف عنه حاجه خالص
مع تحيات ادارة العمليات الخاصه والجزره

اه على فكره الموبايل الثري جي هيجي قريب هابيع العروسه والشبكه واشتريه وهنعيش يا معلم
سلااااااااااااااااااااام

غير معرف يقول...

طب العيد فرحة .. هيهيهييييه
واجمل فرحة .. هيهيهييييه
العيد فرحة واجمل فرحة بتجمع شمل قريب وبعيد
سعدنبيهة .. هيهيهييييه
ويخليها .. (الضمير عائد على نبيهة طبعا)

بينى وبينك بقى ياعم سوو..

الانسة صفاء مالهاش غير اغنية واحدة بس متينة ..
عارفها بتاعة الليفة والصابونة ..

اصلهم كانوا بيسمعوهالى كتير وانا زغننة عشان ماكنتش بحب استحمى..

سيبك انتا من الهرتلة دى كلها
انا داخلة اقول كل سنة وانتا اكثر هسهسة وتمردا وتكركرا ( دى حاجة كده زى الازرق الممحمح)

___

واحب ارحب بالحاج بروكن هارت اللى اول ماشفت اسمه قلت هو ده بروكن هارت بتاع مصر اليوم ولا غلطة مطبعية..

واحب اسالكم انتوا الاتنين .. اتنيلتوا اتجوزتوا ولا لسه

سلاموووووزات

Soooo يقول...

الباحث عن الحقيقه

يا مرحب بيك يا باشا ومنورني بتشريفك هنا والله

وبالنسبه للغنوة بتاعة ابله صافي في رأي تاني قالته الزميله المدونه زمرده
اللي هو ان تفسيرها كالتالي
سعد نبيها
سعد = فرحه
نبيها = نبينا محمد عليه الصلاه والسلام

وبيني وبينك .. تحس انها راكبه برضه .. بس برضه فيها لخبطه

انا بقى ان الشاعر مش عارف ايه وكان ممكن يقول بدل سعدنا بيها فرحنا بينها .. فصدقني انا لغاية فتره قريبه كنت مستغرب من اغنية رمضانا جانا وفرحنابو .. وكنت فاكر (فرحنابو) ده هو اللي جايب رمضان معاه .. يعني ممكن يكون هو اللي شاف الهلال بتاع شهر رمضان
بس سيبك منني انا اصلا اطرش واحول اساسا وباسمع الاغاني من مراخيري


سيبك انت .. منورني والله هنا وارجوك تعتبر مدونتي هي مدونتك ياريس

وسلاموووووز

Soooo يقول...

esraa

كل سنه وانتي طيبه
والظاهر والله اعلم يا اسراء اننا من كتر ماكنا بنسمع حاجات كتير وداننا باظت بجد

منوراني وياريت تعتبري المدونه دي بتاعتك

وسلاموووز

Soooo يقول...

Doba

الف شكر على تشريفك البلوج وعلى تنويرك في البوست ده

والظاهر اننا فعلا جيل مايعلم بيه الا ربنا


وياريت تبقي تشرفيني تاني تاني تاني
راجعين للبوست تاني


وكل سنه وانتي طيبه
سلاموووووز

Soooo يقول...

زُمُرده

ياستي مهما غيرت المشروب ومهما عملت هفضل زي مانا
تقريبا والله اعلم يا زمرده .. من كتر الهرتله اللي كنا بنعملها زمان بقى فينا طبع الهسس عادي .. او مشيت الهرتله في الدي ان ايه في الجينات خلاص

سيبك انتي .. منوراني والله
وماتقطعيش البوستات

وسلامووووز

Soooo يقول...

الأميره أوسه

منوراني والله يا اوسة
ياللي النسوان منك مفروسه

بس انا عايز اوضحلك اني للأسف .. تعليم حكومي انا كمان
ولو اني كان نفسي ابقى خريج المير دي ديوه عشان اتنطط شويه
لكن ربنا رايدلي اني اهيس زي باقي المدونين اللي بيجولي المدونه بتاعتي ونشرب بوب بانجو معتبر ونديها باك فايرز لغاية ماعينينا تشبر

عالعموم .. كل سنه وانتي طيبه .. وابقي اقري مابين السطور بتاعتي كويس يا اوسه
اقري مابين السطور يا اوسه
طب عارفه ..
اديها بوب بانجو واقري مابين السطور ..
هتشوفي احلى كلام يتشاف


وكل عامون وانتوم طيبون .. سلامات

Soooo يقول...

د. ضياء النجار

اسعدني تشريفك لمدونتي بصراحه
اه دي فعلا صورة نجيب سرور
يمكن حاططها لاني حاسس ان اخرتي هتكون قريبه منه ..
وادخل السرايه الصفرا ولا حاجه


منورني يا دكتور وارجو انك تعتبر مدونتي المتواضعه دي زي مدونتك

والسلام ختام

د. ضياء النجار يقول...

سوووو،

وليه باصص ليها من الزاوية دي، ما يمكن توصل لما وصل إليه من تأثير على أدباء كثيرين، والايام بيننا، وخصوصا أنك تتميز بنفس خفة الدم المعجونة بالمرارة، ونفس النقد اللاذع ونفس "الطقة" الإيجابية!0

تحياتي

ضياء

Soooo يقول...

يااااااااااه
brokenheart
هاني باشا رزق بنفسه منورني هنا في البلوج البسيط المتواضع المضمحل بتاعي ؟؟؟؟
منور والله يابو هاني
ايوه ياعم انا سوووو بتاع زمان
شفت بقى ان الارض كرويتون تلفو حولا نافسها

منورني والله
والبلوج بتاعك شكله اجمد ياعم من الهسس اللي بقوله ده

بس بقولك .. في حد كاتب تعليق بعديك واسمه (غير معرف) .. شكله كده من امن الدوله وبيراقبنا ياعم من ايام ماكنا في مصر اليوم
؟؟؟؟
بص .. انت بعد كده تنزل تعليقاتك بالشفره .. وانا هارد عليك بشفرة تانيه
ونبقى نجيب الغير معرف ده يفكلنا الشفره دي عشان انا بقيت بانسى بسرعه والله يابني


منورني يابو هاني .. وكل سنه وانت طيب

وسلامووووووز

Soooo يقول...

الشنكوتي الكبير

ابو الشناكيت يا مسيطني في الوسط البلوجي والمدوناتيه كلهم
وكتاب الله يابو الشناكيت انا ماشلت اي كومنت ولا حاجه احسن تفتكر اني شيلت التعليق بتاعك
بدليل انك هتلاقي واحده اسمها بيكتيريا عامله تعليق يالهوي عليه .. وكتاب الله عيني زغللت من مجرد محاولتي لفك طلاسمه
خصوصا انها كاتبه بالفرانكو آراب وانا مش باحب البتاع ده

وبالنسبه لسعد نبيهه انا جالي خبر من مصدر مسئول بيؤكد انه كان ساعتها شغال في مكتب الرقابه عالمصنفات الفنيه واجبر فريق العمل انهم يقولو اسمه عشان يصيتوه عشان هو داخل في انتخابات المجلس المحلي عن دايره طلخا العسل .. والاغنيه دي كانت هي سبب نجاحه الباهر في الانتخابات حيث فاز باغلبيه كاسحه تسعه وتسعين في الميه .. مع انه خدها تزكيه

كل سنه وانت طيب ياباشا .. وسلاموووووز

Soooo يقول...

غير معرف
واللي شكله كده عارفني قوي قوي وبيراقبني وهيبلغ عنني اول دوريه راكبه في اي حته يشوفني فيها

منوراني والله
وبعدين انتي اكيد تقصدي اغنية
يا صحابي وصاحباتي هنا ومحلك سر
بصو وشوفو حاجاتي انما ايه في السرررررر
عندي فرشه قروبه
شقيه ولعوبه
بتفرش اسناني
وارجع اضحك تاني
الصف الفوقاني
من فوقو لتحتيه
والصف التحتاني
من تحتيه لفوقيه
وبكده لا بتتلوث
اسناني ولا تسوس
ولا اداري ابتساماتي
واضحك كركركررررررر


كانت بتاعة اعياد الطفوله لما مامتها سوزان كانت بتحضر ليله الحفلات دي .. ايام الطفوله المشرده يعني

------
وبعدين خدي هنا بقى
عايزاني انا وهاني نتجوز ؟؟؟
نتجوز؟؟؟؟
ازاي يعني؟؟؟؟
ده احنا راجلين ..
نتجوز بعض ازاي بقى ؟؟؟؟؟؟؟

ولا يكونش قصدك نتجوز عموما يعني
يعني هو يتجوز .. وانا اتجوز برضه
!!!
لو كان قصدك ده .. يبقى احب اوضحلك حاجه
انا قررت لا جواز اصلا
لاسباب احب احتفظ بيها لنفسي


وكل سنه وانتي طيبه
وسلاموووووز
مش سلاموووزات ..
عشان انا راجل اقول سلاموووز ..
انتي بنت تقولي سلامووووزات

Soooo يقول...

د. ضياء النجار

ايه الكلام الكبير ده يادكتور
ايه الجمال ده
بس لا يادكتور .. انا ابقى ايه جنب عمنا نجيب سرور يادكتور
انا ممكن صحيح يكون دمي خفيف شويه
طاقق ولاسع حبتين
انما اوصل للمرحلة العبقريه اللي وصلها عمنا نجيب سرور
؟؟؟؟؟؟؟؟؟؟؟؟؟؟؟؟



شرفتني يادكتور والله .. ولي استفسار بسيط
دلوقتي انا زمان كنت باحب الالماني قوي .. بس حاليا مش باعرف اقول غير (ايش ليبي ديش) وعايز ارجع افتكر الالماني تاني ..
تنصحني اروح جوته ولا في مكان تاني احسن منه
؟؟؟؟


وكل سنه وانت طيب .. والسلام ختااام

د. ضياء النجار يقول...

العزيز سوووو،

في مرة شبهت ما تكتبه نهى كراكيب بالعملاق أيضا احمد مطر، وبرضه وقتها قالت لي نفس الكلمتين بتوعك، أنا حاجي ايه جنب... 0 فكان ردي ببساطة: لو كان سئل احمد مطر من 20 سنة عن أن كتاباته تشبه بدر شاكر السياب، لكان رد: انا فين من بدر شاكر السياب؟؟؟ الألمان عندهم مثل جميل جدا: لا يؤكل أي شيء ساخنا كما طُبخ، أي بالبلدي السنس بتاعنا: اصبر على الرز لما يبرد!0خصوصا لما يكون الرز ده لسه موهوج زي كتاباتك دي!!!0

ودي هدية صغيرة من نجيب سرور تحية معرفة الخير إن شاء الله. اسمعها وادعيلي، ودي غير الأميات المشهورة بتاعته، ويبقى قوللي رأيك.0

http://www.4shared.com/file/26856689/c45faced/nagib_surur_masr_hitta_min_ouroppa.html

بالنسبة لسؤال الألماني: انت عارف اهم جملة ممكن يعرفها أي بني آدم في هذه الدنيا، أحبك، وهي جملة تفتح لك باب الزواج، وتقديم طلب الحصول على الإقامة، وباب الحصول على الإقامة المفتوحة غير المقيدة بزمن، وبعدها بخمس أو سبع سنين الحصول على الجنسية، شفت الجملة دي هامة جدا ازاي!!!0، وهي هامة أيضا لانها قبل كل ذلك تكسبك حب الناس، وده اغلى من أي حاجة.0

لكن لو عايز تنشّط الألماني عندك، فمعهد جوته الأفضل لكنه في نفس الوقت الأغلى، وهناك معاهد بديلة اخرى بسعر مهاود وكفاءة لغوية ممتازة. لما تنوي بجد يبقى بس خبط عليا وقوللي ساكن فين وأنا أدورلك على مكان كويس يكون قريب منك.

عميق تحياتي

ضياء

أجزاخانجيه يقول...

مستر سوووو
انت طلع ملكش فى الفرانكو اراب دى
وانا اقول انا بتكلم فى حاجه وهوا بيتكلم فى حاجه تانيه هى هى
ما علينا
طب يا عم كنت قول بدل ما تمقق عينك فى القرايه
انا بكتريا -ديه- على فكره
بس دا النيو لوك
علشان واضح ان الناس هنا كلها
ملهاش ولا فى الفرانكو اراب ولا فى الفرانكو

دكتور كسلان يقول...

كل سنة وانت طيب

ولو انها جت متاخرة

دمك زى العسل

نا فعلا كنت بفهم اغانى كتير غلط


خصوصا اغنيةالعيد

اقول لنفسى مين سعد ده

يكونش بتاع مراجيح

سلااااااااااااااااااااااااااااااااااااااااااااام

غير معرف يقول...

اولا .. انا غير معرف لظروف انترنتية بحتة مش بقصد الغموض او ترويع الامنين او ماشابه ..

ثانيا.. انا لامباحث ولا نيابة ومعرفتى بيك كانت من خلال كتاباتك اللى كانت مبشرة جدا ومعرفتنا الشخصية اعتقد انها كانت محدودة .. لكنك مدين ليا بجميل عظيم..

ماتتخضش اوى كده.. دى كانت مجرد قرصة نحلة فى صبيحة يوم شتوى مشمس وجميل من حوالى 3 سنين .. هاااا
لحسن حظى ان ذاكرتى اقوى من حديد
التسليح (مش المضروب طبعا)

ثالثا وده الاهم ..الاغنية مش دى .. الاغنية فعلا كانت لليفة والصابونة بس انا ماكنتش حافظاها للاسف..

رابعا واخيرا ..
سلاموزااااااتى

الحلم العربي يقول...

هههههههههه
طيب هتصدقنى انى انا كمان كنت فاكرة الاغاني دي بنفس الطريقة

و بالذات اغنية سعد نبيهة دي
و كنا انا و اخواتى نقعد نقول هو مين سعد نبيهة ده احنا عايزين نروحله ده اكيد صاحب المراجيح اللى بتتمرح فيها في الاغنية
ههههههههههههه

طبعا موضوع الحالة النفسية ده مهم جدا لأن ساعات حد يفسر كلامك على حسب حالته النفسية و يكلمك على أساسها و مش بيبقى عارف انك تقصد حاجة تانية خالص

تحياتي لك و فرصة سعيدة

Soooo يقول...

د. ضياء النجار

دكتووووووري وعميييي والله
اصلا انا بموت في طريقة القاء نجيب سرور للشعر
نبرة صوت جهوريه ببحه تحس انها من تأثير جرح الزمن فيه
يااااااااه يا دكتور
نجيب سرور ده فعلا استحالة حد يجي زيه تاني
ابسط حاجه .. الاميات اللي اتكلم فيها وشرّح المجتمع المصري وبهدل كل المسيطرين عن الاعلام والاعلام الحكومي وبعتر بكرامتهم الارض باسلوب اقل مايقال عنه انه اقرب اسلوب لمخاطبة الشعب المصري لانه معظمنا مش بيفكر فعلا غير في بتاعه
وهنا كان المدخل اللي دخللنا منه نجيب سرور عشان يفهمنا الليله
بقى في عبقريه كده يا ناس

-----

انا ساكن في المعادي يا دكتور .. لو في اي سنتر تعليم الماني قريب ياريت تقولي وتكسب في ثواب .. وكمان بيني وبينك يادكتور .. في حتة موزه الماني بس ايه .. موزززززه بجد
نفسي اضرب معاها صحوبيه واقدر اتكلم معاها في الحياه زي مابنتكلم مع بعض كده
وعلى الله تنتشلنا من التشرد الاطفالي اللي احنا فيه هنا

منورني والله يادكتور

Soooo يقول...

أجزاخانه

بصي يابنتي
نصيحه هقولهالك .. لو عايزه تكسبي صداقات الاخرين حتى على الاقل عشان يتفاعلو معاكي في موضوعاتك
اياكي
اياكي
اياكي
تقللي من قيمة اي شخص زي مانتي بتعملي هنا
انا مافيش اسهل من اني اشطب كل تعليقاتك .. بس بقول يمكن تقدر تستوعب ايه الحوار وازاي يبقى في حوار عاقل مابين الاخرين
وعلى فكره
انا ماقللتش منك ومن شأنك لما قلت ان في حد او شخص اسمه بيكتيريا بيكتب فرانكو اراب وانا مش باحب الفرانكو اراب .. انتي عايزه تقولي حاجه هنا يبقى تتكلمي بنفس اللغه واللهجه اللي انا باتكلم بيها
ولو كنت كاتب بالفرانكو اراب او انجليش او الماني او فرنساوي اهلا بيكي بنفس اللغة اللي باتكلم بيها
انما انا مش مطالب اني اتعامل مع تعليقاتك لو كانت باسلوب تحاور فيه تقليل من شأني او من شأن اي حد بيقول اي تعليق ليه هنا
وياريت ياريت تبقي تتكلمي بعد كده باسلوب حضاري عشان انا بجد باحس وكل اللي بيجو هنا ويقرو كلامك بيحسو ان فيه تعالي علي وعليهم


ارجو ان كلامي يكون اتفهم

Soooo يقول...

دكتور كسلان

وانت طيب وبالف خير ان شاء الله يادكتور
بس الله يكرمك تبطل كسل شويه
عايزين نشوفك بقى ونشوف مواضيعك .. وقريب كده نشوف عيادتك وتعالجنا بالمجان

احنا فقرا يادكتره مايغركش البلوج .. ده انا مش لاقي فلوس اروشه وازركشه وافرفشه

والسلاموووز خامووووز

Soooo يقول...

غير معرف

اولا .. كونك تحبي تعرفي بنفسك او ماتحبيش دي حاجه ترجعلك تماما وماليش اني اتدخل فيها ابدا .. بس لما يبقى التعامل معاكي وانتي بتقولي انك عارفاني يبقى اكيد عارفه اني شخص باحب الوضوح والصراحه في التعامل .. وزي مانتي بتتعاملي معايا وانتي عارفه انا مين يبقى على الاقل اعرف انتي مين

ثانيا .. لو انتي فعلا تعرفي مين هو سوووو يبقى اكيد عارفه اني مش باحب العل عروستي ولا الفوازير ولا بافهمها .. وفي نفس الوقت انا اي نعم مدين لأشخاص كتير باني اتكلم بالاسلوب اللي باتكلم بيه في المدونه هنا .. لكن الحقيقه انا مش فاكرك ولا فاكر ايه قرصة النحله دي ولا فاكر كلت ايه من اسبوع .. ولو انتي فعلا تعرفيني يبقى اكيد عارفه ايه الظروف اللي مريت بيها في اخر ست شهور ومقدره ان لو اي حد مر بيها مش هيقدر يقف على بعضه نص ساعه بس

ثالثا .. لأ هي دي نفس الاغنيه بس انا مش فاكر الكوبليه اللي بتتكلم فيه عن الليفه والكوز والصابونه ام ريحه



ملحوظه :
لو فعلا انتي تعرفيني وفي اسباب تمنعك انك تقولي انتي مين هنا .. ياريت تبعتيلي ايميل تقوليلي فيه انتي مين ..
ولو مش عايزه يبقى ياريت تكون تعليقاتك في حدود الموضوع اللي باتكلم عنه ومش براه وتتطرقي لشؤون حياتي الشخصيه من جواز ومنتدى مصر اليوم والناس اللي اتعرفت عليهم هناك وتعمليلي سياح وتشريد

ومن غير سلاموز

Soooo يقول...

الحلم العربي

منوراني ياحلم والله
وياريت ماتبقيش دي الزياره الاولى والاخيره هنا

اما بالنسبه للحالة النفسيه فدي حاجه مافيهاش كلام
يعني انا دلوقتي حالتي النفسيه مش ولا بد من تعليق بعض الاشخاص واللي لقيتهم بيخرجو خارج نطاق الموضوع اللي باتكلم عنه .. وده طبعا هيأثر علي في اني ارد على الناس اللي قالو تعليقاتهم وفي نفس الوقت هيأثر على اي تعليق عايز اقوله في اي مدونه تانيه

وعشان كده انا هروح اخدلي دش معتبر .. واديها نوووووووم


والسلاموووز ختامووووز

د. ضياء النجار يقول...

سوووو

حاشوفلك وأرد عليك. حاضر
وعلى الله التوفيق في كل شيء!!!!0

تحياتي

ضياء

Rosa يقول...

اولا سوري سوري يا سووووو انت عارف ليه
ثانيا كل سنه وانت طيب و فرحان دايما يا رب
ثالثا 30 سنه مش عجوز ولا حاجه
رابعا :(آخر ترقيم خلاص ) انا مش لسه ماقرتش بقيت البلوج بس الي يفاه ان الي يكتب البوست دا عمره مايكون تافه او بيكتب كلام ملوش معنى ابدا بالعكس
اسجل اعجابي الشديد بطريقتك في الكتابه و مش فلسفه خالص , عندك حق في كل كلمه قلتها
و متنساش تسلملي على نبيهه بليز
( دي سادسا) :P :P

david santos يقول...

The regime of Mubarak and his minions is every day to transgress human rights. More than 10,000 Sudanese refugees are arrested and more than 100 have been killed.
Illustrative of the world arrogance and the atrocities committed against the Sudanese refugees by this criminal regime of Bubarak.

RAMA يقول...

أنا جييييييييييت .. الحمد لله الموصلات كانت سهلة والطريق كان فل

مدونتك لذيذة على فكرة هو انا ماشوفتش غير الاخ سعد والاخت نبيهة ولسة حتجول وأزور بقيت المدن بس الجواب باين من عنوانه

على فكرة أنا كان عندي نفس أزمتك وأقول الزاي الواد سعد باباه أسمه نبيهه هي الأسامي خلصت يعني لحد ما عرفت في العيد ده الترجمه وهي

سعدنا بيها

سعدنا: يعني فرحتنا

بيها : فرحة العيد يعني

علشان كده ماما صفاء بتقول سعدنا بيها بيخليها ذكرى جميلة لبعد العيد

هذا والله اعلم
______________

تحياتي يا سوووووووو.. سلامات

مشمش يقول...

المشكلة انك عندك حق ياريتك كنت غلطان بس بجد مشكلة احنا اتعودنا نحفظ وخلاص زي الهبل ومنفهمش المعني بغبغانات بتردد وبترقص علي اغنية حلوة او فيلم او كتاب حلو وخلاص دة ولو اهتميت بالي بين السطور تلاقي واحد طالع يقولك اية الهيافة بتاعتك دي ماتسمع وانت ساكت دي اغنية بس لو مكناش هنشغل دماغنا في حاجة بسيطة زي دي هنشغلها في اية احنا اتعودنا علي الكسل نخلي دماغنا قاعدة في حالها بتستقبل علي الجاهز وخلاص وبجد ياسوو مواضيعك حلوة ومش تافهه ابداا بالعكس دي بتشدنا لمناطق مروحنهاش قبل كدة وانا بحب مواضيعك عشان كدة بتعرف تلفت انتباهي بجد وتشغلني بيها ورايي فيك انك تنفع ممثل جدا نصيحة يعني

Hannoda يقول...

أنا لما جيت و قريت بسرعة بسرعة لظرف ما و ما كملتش كنت فاكراه بوست هزار و بس

و كالعاده أخدتني خفة دمك للمود ده

لكن بالفعل كلامك مهم

اللي بين السطور ده ياما نبحت صوتي مع أختي اللي في الثانوية العامة عليه
وياما قلتلها الدراسة مش صم للكتب
ويجي المستر في الدرس يقولهم العكس بالضبط
يقولهم الثانوية العامة مش عاوزة ضمير ده عاوزة احتراف

وكل ما تكون انسان قادر على الاحساس بالحياه و بعمقها و عينك قادرة تتعامل مع كل اللي واء السطح

كل ما تكون قادر على فهم اللي بين السطور

بس

اللي لسة ما فهمتهوش لحد دلوقت هو قدرتك على لف الجدية و التعمق بغلاف مرح و خفيف كده

فعلا

تعرف فلان؟؟
آه

ماقريتلوش؟؟

يبقى ما تعرفوش

:)

Rehab Mostafa يقول...

السلام عليكم
أنا بالصدفه لقيت نفسي هنا أول زياره ليه
المهم بجد بعد كل سنه وانت طيب الموضوع حلو أوي وعلى فكره في ناس كتيره أوييييييي كانت فاكره ان الاغنيه سعد نبيهه برضه وانا كنت بسال نفسي مين سعد نبيهه ده :D
غير كمان الاغاني اللي كنت بفسرها بمذاجي

أما بالنسبه للجزء التاني من البوست أنا كنت بفكر في كده برضه وكنت ناويه اكتب موضوع بنفس المعني ان ماحدش بيفهم الانسان غير نفسه والناس القريبين منه أوي واللي فاهمينه إلا حد ما يعني
وبرضه حكايه الموود دي صح جداً
بجد الموضوه كله جميل واسلوبك كويس اوي :)

shahy يقول...

اقولك على حاجة بس خليها في سرك

سرك اية بقى ماانا هافضح نفسي اهو

شوف انا كنت مرة بتفرج على التليفزيون زمان برضة وانا صغيرة وكانت اغنية لأم كلثوم فقلت يع انا مش بحب الست دي
رد عليا واحد قريبنا كان قاعد وقالي : لما تكبري غصب عنك هاتحبيها

انت عارف انا فهمت اية بس مش عاوزة ضحك
فهمت ان في قانون بيلزم الناس انها تحب ام كلثوم
ايوة والله

بعد كدة بسنين كتييييييييييير اكتشفت الراجل كان يقصد اية

تحياتي

shahy يقول...

فظيعة المدونة
موتتني من الضحك

ربنا يكرمك ويسعدك

تحياتي

shahy يقول...

انا جيت تالت
اصلي خلصت قراية المدونة كلها

وكان نفسي اعلق على موضوع موضوع بس بصراحة مقدرتش برضة من كتر الضحك

كفاية كدة بقى علشان انا لسة بضحك

سلاااااااااااااام

مجموعة حياة يقول...

كلام كتير حلو
والرسالة واضحة "اقرأ ما بين السطور "و مش تخلي "سعد نبيهة" يديك الصورة اللي هو عاوزها
مش نبقى زي ما حكو علينا مش نفهم لأنو ما بنقرأش وازا قرأنا ما بنفهمش
لو عندك هواية قراءة ما بين السطور بجد فبيشرفني زيارتك لمدونتي "حياة تستحق الإنقاذ" وتقولي على اللي حتشوفو بين السطور
كل التحية لك ول"سعد نبيهة" عشان هو غيرلنا جو السياسة وتعب القلوب

أم المييس :)

dead_girl يقول...

بجد فعلا اللي بن السطور مش سهل يتفهم ومش اي حد يفهم وصعب تلاقي حاليا حد بيقري اصلا علشان يفهم اللي بين السطور لانه اصلا مش عارف السطور فين ياااااااااااااااااه قلبت عليا المواجع والله بس بجد انا كمان كنت زيك في حكايه سعد نبيهه وكنت بسأل نفس السؤال ربنا يوفقك

Soooo يقول...

د. ضياء النجار


ياريت يا دكتور ماتنسانيش
عشان غير البنت الموزه دي في شوية روايات عايز اقراها بس الماني




وسلاموووووز

Soooo يقول...

Rosa


اولا وثانيا وثالثا ومليونا
سوري على ايه .. مافيش حاجه حصلت اصلا عشان تقولي سوري وبتاع

مليونا وواحدا ومليونا واثنينا ومليونا ومليونا
العجز مش بالسن قد ماهو شعور جوايا .. وانا ماقدرش احكم على نفسي اني تافه او مش تافه .. بس ماحبش حد يقوللي اني تافهم او هايف وش

سبعه مليونا وواحدا واتنينا وتسعمية وتلاته وتلاتينا بقى
نبيهه بتدور على سعد .. اصله تاه منها بعد صلاة العيد لما راح يتمرجح



ملحوظه
باعتذر بشده عن تأخري في الرد
وارجو انك تعتبري المدونه كأنها مدونتك وتشرفيني بالزياره على قد ماتقدري .. بس ابقي هاتي معاكي اي حاجه مايصحش تخشي البلوج بايد فاضيه

والسلاموووووز ختاموووووز

Soooo يقول...

RAMA

اسكتييييييييييي يا اختشي
مش اتضح اننا اصلا مش فاهمينها صح لا انا ولا انتي واتضح انها ولا سعد نبيهه ولا سعدنا بيها كمان

راجعي تعليق زمرده واللي هو تاني تعليق في البوست ده ..
هتتكشفلك الحقيقه

وبعدين فين باقي التعليقات بتاعتك ؟؟؟
والسلاموووز ختامووووز

Soooo يقول...

مشمش

يااااه يا مشمش يا صاحبي
تصدقي بالله .. انا قلت دي نسيتني خلاص

والحمدلله ان رأيك في ماتغيرش بعد ما واظبتي على قراية المواضيع في المدونه

اما بالنسبه لجزئية اني انفع ممثل
فأنا وبلا فخر كنت ممثل اول جامعة حلوان تلات مرات ورا بعض منهم مرتين كنت ممثل اول جامعات مصر
بس دلوقتي خلاص كبرنا يابنتي وعجزنا

والسلاموووووز ختامووووز
وماتقطعيش الزياره كده مره واحده

Soooo يقول...

Hannoda


الحمدلله انك قريتي الموضوع كللو المره دي

اما بالنسبه لاختك اللي في ثانوي والمدرس اللي حسستيني انه بيدرب فرقة كفر الزيات للكره الشراب .. فهميها انها لو عايزه تنجح في امتحان وخلاص يبقى تحفظ براحتها
انما لو عايزه تفهم لما بعد المرحله دي .. يبقى تقرى اللي مابين السطور

وعلى فكره .. انا ولا بالف المواضيع الجاده بقالب ساخر ولا بتاع قد مانا بحاول افضفض واتكلم مع نفسي بصوت عالي شويه
ويمكن حد يسمع صوتي


والسلاموووووز ختاموووووز

Soooo يقول...

Rehab Mostafa

ياستي نحن نشكر الظروف اللي خلتك تنوريني هنا في مدونتي المتواضعه واللي ماتجيش جنب مدونتك ومواضيعك حاجه بصراحه

وياريت تبقي تشرفيني دايما بزيارتك واراءك وتعليقاتك

والسلامووووز ختامووووز

Soooo يقول...

shahy


ياسلام يافندم
ده البلوج بتاعي نور والله بتشريفك ليه
وبعدين انا اجي ايه جنب مدونتك ومواضيعك الهايله ياستي

واتمنى انك تعتبري المدونه كأنها مدونتك وتقولي فيها كل اللي تحبي تقوليه


والسلامووووز ختامووووز

Soooo يقول...

أم المييس


منوراني والله
وانا بالفعل رحت مدونتك ولقيت انها مدونه جديره بالهتمام والمتابعه وانصح كل اللي اعرفهم انهم يروحوها ويتابعو فكرك وموضوعاتك الجميله

وبعدين ماحنا مابعدناش عن السياسه قوي .. ماهي قراية مابين السطور تعتبر سياسه برسه
سياسة الاستيعاب والفهم والتعامل مع الاخر


والسلاموووز ختامووووز

Soooo يقول...

dead_girl

اهلا بيكي ياستي ولو اني نفسي تغيري الاسم ده
بس بما انك حاباه يبقى براحتك واحنا في بلد ديموقراطي

الحمدلله ان المدونه عجبتك وان البوست عجبك
وارجو انك تعتبري البلوج كللو تحت امرك وكأنه مدونتك الخاصه
وانا في انتظار تعليقاتك واتمنى اننا كلنا نستفيد من بعض


والسلاموووز ختامووووز

غير معرف يقول...

شوف يابنى انا لرابع مرة بحاول ابعتلك رد ويارب يوصل المرة دى
فضلت تقولى مفيش ردود والكل بيشوف البلوج بتاعك ومش بيرد وادينى دخلت لقيت بسم الله ماشاء الله ردود حلوة اهو
المهم مبروك البلوج الحلو ده
واياك
ثم
اياك
ثم اياك تانى
3 اياك خلى بالك
انك تقفل البلوج ده
ده كفاية انه جننى ياراجل وكتبتلك رد تقوم تفكر تقفله
الناس بترد
والكلام حلو
ومواضيعك دايما ليها معنى
اما بالنسبة للناس اللى بتقول الكلام تافه او تحس بكده فمش المفروض انك تدى لكلامهم اهتمام انت عارف كويس انت بتكتب ايه وبتعبر عن اللى جواك وطريقتك فى التعبير موهبه من عند ربنا لانك بتقدر تتكلم فى مشاكل كبيرة بطريقة كوميدى ماتخليش اللى بيقرا يحس بتقل الكلام لكن المعنى واضح للى بيفهم
اكتب وعبر براحتك
فوق السطر او تحت السطر
اكتب بين السطور
ومش اى حد بيقدر يفهم السطور
ولا اى حد يقدر يكتب سطور
انت فاهم حاجة؟
شكلى انا تهب فى السطور
طب نطلع على فوق السطر واقولك كلمتين
موضوع جامد جدا وعلى فكرة انا كمان كنت بسمع الاغنية زيك كده ولما كبرت ادركت المعنى الصح بس مازلت بغنيها زى زمان سعد نبيهه
على فكرة انابحب طريقتك جدا فى التعبير واستمر على كده اوعى تتاثر بكلام اى حد مش قادر يفهم
والمثل بيقولك : لولا اختلاف الازواق لبارت السلع
فى ناس مش عاجبها الكلام لكن فى ناس اكتر فاهمة وعارفة كويس معنى الكلام
ياريتنا كلنا نقدر نقول ونعبر عن اللى جوانا بطريقتك الخفيفة دى
استمر

كاريزما يقول...

مش مصدق..

انا كنت بحسب انا الوحيد اللي بيسمعها سعد نبيهه

كنت بحسب دي اسامي اطفال من اللي بيجروا مع ابلة صفاء..


اعجابي بقلمك و شفافيتك..

ســـ أتابعك

بعد اذنك..

فرصة سعيدة..

Soooo يقول...

غير معرف


اخجلتم تواضعنا جدا يا بنتي والله
تعرفي يا دودو .. انا لما قريت تعليقك ده مش تنحت وبس .. انا تقريبا خفت اتكلم في اي موضوع تاني
مش خفت وبس .. ده انا اترعبت من جوايا والله
وقعدت اقول لروحي يالهوي .. طب اتكلم في ايه تاني
ولا اقول ايه يعني عشان ارد على التعليق ده
ويمكن لسبب ما او لآخر .. ابتعدت شويه عن اني ارد عالتعليقات وعن البلوج عموما .. كرغبه منني اني اشغل نفسي بحاجه تخليني اقول اللي جوايا

على اي حال .. شاكرين مهللين للتعليق الجميل ده
وان شاء الله اكتب مواضيع تعجبك وتعجب كل اللي بيشرفوني بزيارتهم هنا في مدونتي البسيطه دي


يلا سلامووووووووووز

Soooo يقول...

كاريزما


ارجو المعذره اخي الفاضل في تأخري على الرد على تعليقكم وذلك لاسباب خاصه منها التجديد الشامل للمدونه
وارجو ان تعتبر مدونتي كمدونتك وارجو ان تتواصل معي فكريا
ومنورني ياباشا
وان شاء الله خير



سلامووووووز

maiosha يقول...

سلام عليكم
معلشى أنا أول مقريت البوست ده مقدرتش أمسك نفسى من الضحك
المشكلة إنى بيحصلى نفس الموضوع وبعمل نفس الحركة دى؟؟

يعنى مثلا أغنية أنا عايش ومش عايش بتاعة عمرو دياب بتقول

(ولو حتى ببعد ببقى معاك ومنتش معايا)

أنا بقى بذكائى الخارق كنت اقعد اقول مين منتش ده؟؟ مين منتش اللى معاه وبيهددها بيه ده

وخالد سليم كمان كان بيقول ( إزاى يا دينا مشفتكيش.. أنا كنت مين وفين وليه وإزاى زمانى محسكيش)
أنا بقى بودنى الموسيقية كنت بسمعها الزيزمانى .. مين الزيزمانى اللى مش بيحب الدنيا ده

متخفش إنت مش لوحدك

Soooo يقول...

maiosha

انا عايز اقولك اني جاتلي هيستيريا ضحك رهيبه لدرجة اني باضحك حتى وانا باكتبلك التعليق ده

ربنا يارب يارب يارب يبسطك ويسعدك ويكرمك ويوفقك ويهيئلك الخير من عنده ويرضيكي دنيا وآخره على الضحك اللي ضحكتيهوني عالصبح كده

وسلميلي على الزيزماني واستاذ منتش




سلاموووووووووووز