الأحد، ٩ شوال ١٤٢٨ هـ

المحكمه

.. ساعات باحلم مع نفسي
اني في محكمه
واني محامي بادافع عنّي
.. واحلم اني في قفص الاتهام
باعيط وباقول إنّي بريئ
.. والاقيني وكيل النيابه
وبيتهمني بابشع التهم
.. ولما بيجي الدور علي اني أكون قاضي
.. الاقيني صحيت مـ الحلم
.. واقول لروحي بعد لحظة صمت
خير .. ان شاء الله خير
سوووو

هناك ٨٨ تعليقًا:

سلوى يقول...

الحمد لله إنك صحيت

أصلك لو كنت فضلت نايم

مين عارف القاضي
كان هيحكم بإيه

الحمد لله إنها جت على قد كده
جميل البوست
سلام
قصدي سلاااااموز

3ala asm masr يقول...

البوست جامد جدا
انا كمان ساعات بحقق مع نفسى كتير وبحاول ادافع عنها
متهيالى انى بحمل نفسى اكتر من طاقتها
بس انا مش بصحى من الحلم ده
ويارب خير

غير معرف يقول...

تشتغل انت محامى يا رئيس وانا ان شاء الله اعمل ايه ااقفل المكتب
يا باشا الشتاء دخل اتغطى كويس :D

memoz_nemoz يقول...

بجد حلوه اووووووووووي انا اتهزيت لما قريتها موجزه بس فيها معاني كتيييييييييييييييييييييييييييييييييييييييييييير اوووووووي انت بجد هايل ربنا يوفقك

غير معرف يقول...

تخيل لو كان المتهم بريء،، بس المحامي مش شاطر ولا وكيل النيابة هجومي متحامل أو القاضي مش عادل..
تحب تكون مين في دول..
كويس إنك قمت بدري بدري
وخير إن شاء الله
;)

رحــــيـل يقول...

طب لوكنت قاضى كنت هتحكم بإيه؟
تفتكر فعلا احنا ممكن نكون قضاه على انفسنا؟
المهم
انت بجد مدونتك مجنونه جدا وده طبعا شئ راجع لصاحبها
ملحوظه الجنان ده مدح جدا مش ذم
اصل فى ناس بتزعل
وعجبنى قوى كلامك على مابين السطور
وكمان اسم مدونتك
شوف من الاخر انا بقيت ضيفة مستديمه
استحملنى بقى
تحياتى

ghalia يقول...

صباح الخير بالليل

اهم حاجة انك بتعرف تحلم
ومش مهم بقى الحلم ايه
أنا بقالى فترة طويلة مبحلمش
:(

هناء يقول...

الحمد لله انك صحيت

Doba يقول...

من محكمة دوبا العالية احب ان انوه بالآتى

حكمت المحكمة على سوووو افندى بانه يقفل شبابيك الاوضة كويس ويتغطى بالبطانية احسن الدنيا بقت برد وهتقلب معاه بتخاريف ومش عارفين يمكن يصحى فى يوم نلاقيه متشعلق من رقبته فى النجفة

وعليه قررنا انه يقوم يلبس هدومه كويس ويخرج خروجه ملوكى مع اصحابه

ولكن

تمتمتمتمتاااااااااااا
نتكلم جد شوية بقى

لو ده بجد بجد حلم حضرتك لازم تعمل مع نفسك وقفة قوية لانك شكلك بتعمل حاجة غلط وانت عارف انها غلط بس مش عارف تبطلها - خد يابنى قرارك واستعين بالله وربنا هيقدرك

تقبل مرورى بدل ماحبسك اربعة ايام على ذمة القضية

رفعت الجلسة
هبة

Soooo يقول...

Salwa


والله ياسلوى انا لو منني كنت بهدلتني في المحكمه
مش كده وبس
لا ده انا كنت كقاضي ممكن احبسني كمحامي عشان اهنتيني كوكيل نيابه
بس وجودي في الزنزانه عمللي خاطر عندي برضه

منوراني بتشريفك والله

والسلاموووز ختامووووز

Soooo يقول...

3ala asm masr

لازم تصحي من الحلم قبل ماتسمعي حكمك على نفسك ..
عشان تقدري تعيشي وانتي عندك امل انك تتغيري وتبقي احسن واحسن

والحمدلله ان البوست عجبك ..
وارجو انك تعتبري البلوج ده بتاعك وتشرفيني هنا كتير .. مش مره تخطيفه كده وتجري


وسلامووووز

Soooo يقول...

رئيس جمهوريه نفسى


منورني ياريس
بس بقولك ايه ..

انت مش عشان كسبتلك قضيه مهمه وخدت اتعاب اتنين جنيه بحالهم .. هتيجي وتنافسني

علمك علمك علمك ...
انا لو دافعت عنني بأمانه .. انا كقاضي هاديني اعدام رميا بالقلل

منورني يارياسه
سلامووووز

Soooo يقول...

dead_girl


الحمدلله ياستي انها عجبتك
وياريت تعتبري مدونتي هي مدونتك وتنوريني هنا دايما




سلاموووووووووز

Soooo يقول...

غير معرف


تخيل او تخيلي بقى اني كل دول
يعني مجرم بريئ ومذنب
محامي شاطر وخايب
وكيل نيابه باتحمق للحق وبانساه في احيان تانيه
انما القاضي ايه .. عادل ولا ظالم
ماعرفش .. عشان قمت من النوم


سلاموووووووووووز

Soooo يقول...

ra7eel

هو ده السؤال
احنا فعلا لو هنحكم على نفسنا هنقول ايه

والحمدلله انك لقيتيني مجنون والمدونه عجبتك
ويبقالي الشرف طبعا انك تنوريني هنا دايما


وسلاموووووز

Soooo يقول...

ghalia


ساعات الاحلام بتبقى كوابيس
وبنتمنى اننا ماننامش عشان خايفين تيجيلنا نفس الكوابيس

وبعدين يعني انتي شايفاه حلم حلو قوي عشان تقري علي اني باحلم

انا بهزر على فكره .. عشان في ناس بتاخد الحياه قفش في قفش

سلامووووووز

Soooo يقول...

هناء


الحمدلله انك جيتي
والف مبروك على النيولوك بتاع البلوج بتاعك

وبعدين انا عايز اتعلم الجريجي اللي كنتي بتتكلميه ده


سلاموووووز

Soooo يقول...

Doba


الحمدلله اني ماعنديش نجفه في الاوضه
بس في في الحمام شوية امواس حلاقه انما اييييييه

لا نتكلم بجد
بصي ياهبه
مش شرط اني اكون بعمل حاجه غلط وانا عارف انها غلط عشان احاكم نفسي
المهم اني اصارح نفسي بالتهم الموجهه لي
وادافع عن نفسي

بس الحكم ايه ..
خير ان شاء الله


سلامووووز

Unknown يقول...

Gamed moot ya wad ya Soooo, howa 2osana awi bas fel gooooon bgd.
Keep up the good work :))

Rehab Mostafa يقول...

أولاً: أنا مدونتي مافيهاش مواضيع جامده ولا حاجه :D
ثانياً: بالنسبه لموضوعك
أنا مش عارفه هي حاجه كويسه ولا ايه انك تحس انك في صراع دايماً مع نفسك بين انك تدافع عنها وانك تلومها وانك تحس انك برئ وتبقى عايز تحكم عليها.. بس على فكره عمرك ماهتكمل الحلم ومش هتحلم خالص انك حكمت على نفسك وبقيت في دور القاضي لأن لو حكمت على نفسك انك برئ يبقى هتحس انك كويس اوي وممكن تتغر في نفسك في الحقيقه ولو حكمت على نفسك حكم صعب هتتعذب في الحقيقه لكن كده انت بتدي لنفسك فرصه تانيه .... بس أعتقد لو ده بقى اسلوب حياه ان الواحد يحاسب نفسه دايماً هيكون انسان كويس أوي
معلش انا رغيت كتير :$:$:$

MarwaAshraf يقول...

على فكرة أنا مش دايما بعرف أقرا ما بين السطور.. انا مثلا معرفتش أقرا ما بين السطور هنا.. بس الحلم ده حلم وحش صحيح؟

بقولك ايه أنا مش عارفة أجمع أساسا أصل أنا مصابة بوباء اسمه انفلونزا منتشر في الكوكب بتاعي حاجة كده زي البرد اللي بيجي عندكو في مصر.. أنا بس جاية أثبت حضور وأنور المدونة

:P

تحياتي

Noony يقول...

أنا قريت قبل كدة كداب كدب الإبل بس ملحقتش أعلق عليها

بص، انا مش بحلم خالص ومش بفهم في الأحلام
بس لما قريت الحلم دة...حسيت إن فيه حاجة غلط وعايزة بس أقولك خد بالك مش اكتر

وإن شاء الله خير
:)
نوني

Hannoda يقول...

شفت بقى؟؟ .. أهو إنت دلوقت بتتكلم عن دوامة بشعة جدا

مش عارفة لما إحنا دايما بنهرب في آخرها .. طيب بندخلها ليه؟؟

بعملها كتير بس مش فمحكمة

بعملها مع دكتور نفسي
أنا أهاجم و هو يدافع
و أنا أقفل عليه بالمنطق
وهو يرد بالمنطق

لحد ما و أنا بهاجم بكون عمالة أكشف الغطا عن حاجات كتييير إبرازها بيخليني أتخض قوي
وأحس ان الدكتور ده عبيط ولا فاهم حاجة
:)


المعنى اللي في التدوينة واصل قوي

وبجد عجبتني

تحياتي

كاميليا بهاء الدين يقول...

عنوان مدونتك وجع قلبى بجد
بس بوستاتك كلها حلوة ولها مغزى ومعنى بيدل على شخصيتك الجميلة
بس شوية تفائل!! علشان نقدر نكمل ونعيش

تحياتى واحترامى لفكرك الجميل

shahy يقول...

اية الدماغ العالية دي
دة احنا بنتعامل مع اذكى جهاز مخدرات في العالم

كل دة شايلة في نفسك
ياعم خلاص رفعت الجلسة ولا تزعل نفسك

سلام

غير معرف يقول...

صح النوم .. كويس انك قومت بدري بدري قبل ما القاضي يحكم عليك ومحدش عالم مصيرك هيكون ايه يلا الحمد لله ربنا ستر

تحياتي

غير معرف يقول...

الحلم ده دليل على حاجة واحدة انت من الناس اللي بتحاسب نفسها كتير بس انك تقوم قبل الحكم ده ممكن يكون دليل على الخوف من مواجة الاخطاء
على فكرة انا مش طبيبة نفسية و حاجة ده مجرد راي و فى الاخر اقولك اتغطى كويس قبل ماتنام :)

(green eyes) يقول...

حلو اوي الحلم دا ... نصيحة ليك افضل احلم كدا على طول اصلي بحب الاحلام اوي سواء كانت هتتنفذ او لا
سعدت بمروري على البلوج بتاعك

Rosa يقول...

اكيد خير ان شاء الله
:) :) :)
يمكن الحلم دا من النفس اللاوامه الي جوانا و الي من غيرها اعتقد كنا نضيع
و الحمد لله انك بتصحى قبل ماتكون القاضي عشان كدا اكيد خير ان شاء الله :)

bastokka طهقانة يقول...

قاضى و محامي و سجان و وكيل نيابة

فكرتيني بسعيد صالح في مسرحية العيال كبرت لما رفد نفسه


روقي يا جميلة
اوروفوار

Ehab يقول...

بما اني فصيح في كل حاجه ومينفعشي اعدي حاجه كده من غير ما اعطيك جزء من حكمتي
فقررت اقولك انك لازم مكنتش متغطي كويس

عزيز سوو كتير في احلامنا بنعمل اللي نفسنا نعمله في الواقع
يعني انت نفسك تقف مع نفسك شويه وتحاكمها بس مش عارف ويمكن مش عارف ايه الحكم اللي المفروض تحكمه علشان كده بتصحى قبل ما تحكم

عزيزي جميل ان تحاكم نفسك فذلك يهذبها ولكن لا تقسو عليها فهناك في حياتنا ما يكفيها من القسوه
سلاااااااااااااام

Soooo يقول...

s


الف شكر عالكلام الحلو ده
وبعدين انا بصراحه كده ماخدتش بالي هي صغننه ولا طويله .. انا قلت اللي عايز اقولو وخلاص

وان شاء الله هنكيب أب ..
وسفن أب كمان


سلاموووووز

Soooo يقول...

Rehab Mostafa

اهلا بيكي ياباشمهندزه

وعلى فكره .. اي مدون في المدونين بيبقى شايف ان مدونته مالهاش لازمه وشايف ان مدونات التانيين احلى منه
يعني انا لما ابقى حاسس اني بقول اي كلام وشايفك بتقولي مواضيع من وجهة نظري حلوة .. يبقى انتي اشطر منني

بالنسبه للحظة محاكمة كل واحد مننا لنفسه فدي بتحصل بس مش كتير
وفعلا انا معاكي لو كل شويه وقفنا وحاكمنا نفسنا .. مش شرط ان العقاب يكون قاسي قد ما المحامي اللي جوانا يدافع ووكيل النيابة يتهم واحنا نبقى مدركين للمحكه اللي منصوبه لينا كمتهمين ..
يبقى ساعتها خير ان شاء الله


نورتيني وسلامووووووز

Soooo يقول...

RAMA

منوراني طبعا .. وانا اقدر اقول غير كده

وبالنسبه للوباء المنتشر عندكم في كوكبكم فـ الحمدلله اني خدت الدور يوم المطره اللي فاتت ..لما قلتلك

اما بالنسبه للحلم وقراية مابين السطور وتفسيرك للحلم على انه وحش فده في حد ذاته تفسير جدير بالاحترام
لأنك شايفه ان العقاب اللي ممكن نفرضه على نفسنا لازم يكون عقاب قاسي


منوراني والله .. وسلاموووووز

Soooo يقول...

Noony

ياسلام ياسلااااااام يا نوني
يعني رحتي قريتي كدب الابل وماقولتيليش ايه رأيك ؟؟؟؟

لا ان كده هخاصمك ومش هدخل البلوج بتاعك
وبعدين انتي مش منزله مواضيع جديده من بعد التاج ما جالك ليه؟؟؟؟

عموما ياستي .. الف شكر على مرورك وياريت تعتبري المدونه كأنها مدونتك تماااااام

وعلى فكره .. ده مش حلم حلم .. يعني ماكنتش نايم وحلمت وبتاع
لأ .. دي لحظة صراحه مع النفس
حلم يقظه
بيجيلي ساعات زي مابيجيلي ساعات في اليقظه اني لعيب كوره والناس كلها بتهتف باسمي
بس للاسف .. ماينفعش ابقى لعيب كوره بكرشي ده


منوراني ياستي .. وعايزين نشوف مواضيعك الجديده
وسلامووووووووز

Soooo يقول...

Hannoda

ايه ياهنوده .. ايه ياهنوده
داخله حامي كده .. (شفت بقى) ؟؟؟
فكرتيني بـ انت جيت يارمضان ؟؟؟؟

قولي سلامو عليكو .. العواف يا سوووو .. تعزميني على بيبس زيرو اقولك هاتيلي كوكاكولا ماكس .. كده يعني
على فكره .. انا باهزر مش اكتر

المهم بقى
عارفه لو انا رحت لدكتور نفساني .. هعقده
والله بجد
لاني اكيد في جوايا كلاكيع .. بس المشكله اني عارف ايه حلولها
بس باعمل عكس ده
هتقوليلي ليه .. اقولك ماعرفش


نورتيني ياستي
وسلامووووووووز

Soooo يقول...

كاميليا

يالهوي .. سلامة قلبك ياستي من الوجع

وبعدين التفاؤل والتشاؤم دول صحاب بالرغمن من انهم شكلهم اعداء
لأن في وسط التشاؤم .. بيظهرلك طيف التفاؤل
وفي وسط التفاؤل .. بيظهرلك شبح التشاؤم
ده احنا حتى لما بنضحك كتير ونضحك من قلبنا بنقول .. يارب اجعله خير

ماتقلقيش علي ياستي .. انا صحيح عجوز
لكن صعيدي ومعافر ودماغي ناشفه
وعارف ان ربنا هينصرني ان شاء الله

نورتيني الحبه دول والله
وسلاموووووووز

Soooo يقول...

shahy

لا بقى يا شاهي .. من ناحية الذكاء فأنا اذكى وواحد في الدنيا والذكاوة بتبظ من عيني بظيظ


وبعدين المشكله ان الجلسه مارفعتش .. الحلم اتقطع
منهم لله بتوع الكهربا بقى .. قطعو الماتش في الحته الحلوة


نورتيني ياستي
وسلامووووووز

Soooo يقول...

أيامنا الحلوة


على رأيك والله
كويس اني قمت قبل مانا كقاضي احكم علي كمجرم
عشان انا عارفني .. عندي عقده نقص وهبهدلني وهزلني قوي قوي قوي

نورتيني ياستي وياريت تعتبري مدونتي هي مدونتك تمااااااام


سلامووووووووووووووز

Soooo يقول...

nadosha


منوراني والله
بس هو اولا ماكانش حلم حلم يعني .. بس تقدري تقولي لحظة صراحه

انا فعلا بحاسب نفسي كتير
مش خايف من الحكم
بس بأجله .. مش يمكن اقدر اصلح نفسي او اخطائي


سلامووووووز

Soooo يقول...

(green eyes)


منوراني والله وانا اللي سعدت بمرورك الحقيقه ونفسي تعتبري مدونتي هي مدونتك تماااااااااااام

وياريت ياستي نعرف نحلم
ويارت اكتر .. لو عرفنا نحقق احلامنا


وسلاموووووز

Soooo يقول...

rosa

الحوار من النفس اللوامه اللي جوانا
واللي من غيرها اكيد هنضيع

تصدقي جمله حلوة ممكن الواحد يطلع منها بحاجه

نورتيني ياروزا والله
ويمكن فعلا يكون كده

عموما ..
خير ان شاء الله


سلامووووووووز

Soooo يقول...

bastokka طهقانة

فاكره ياطهقانه النكته بتاعة الراجل اللي راح للدكتور بيشتكيله يقولو مش باعرف انام ولما بنام باحلم بماتش كوره مابين الفيران والقطط .. قام الدكتور قاللو لا ماتقلقش .. واداله دوا وقاللو تاخد حبايتين من الدوا قبل ماتنام وانتي مش هتحلم بحاجه قام الراجل قاللو لا يادكتور ده النهارده النهائي

اهو اللي حصل قريب من ده .. قاعد انا كمتهم في قفص المانجا .. قصدي قفص الاتهام .. ومستنيني كقاضي اشوف هاحكم علي بايه .. ومره واحده الاقي رساله طالعالي بتقولي عفوا .. لقد نفذ حلمكم

نورتيني والله ياطهقانه ..
وياريت ماتبقاش زياره تخطيفي كده و
وياريت تعتبري المدونه كأنها مدونتك
وخفي السلخ شويه على طوطو ..
ده احنا غلابه والله


والسلاموووز ختامووووز

Soooo يقول...

الشنكوتي الكبير


نورتني يابرنس والله بزيارتك
بالنسبه للغطا وقت النوم .. انا والحمدلله .. عندي كوبرتا محترمه .. كوبرتا لا يعلو عليها اي كوبرتا من الكوبرتات المتكبرته

اما بقى جزئية اني باقسو على نفسي .. وان الحياه مش مستحمله قسوة
انا ولا قسيت على نفسي ولا بتاع
بالعكس .. ده كنت كمحامي شاطر باستغل ثغرات القانون .. بس المشكله اني مالحقتش اسمع الحكم
تفتكر هيعيدوه على روتانا؟؟؟


سلاموووووز

زُمُرده يقول...

جف الكلام مني
بس فاهمه وحسا
وهرد حين ميسره

غير معرف يقول...

تفتكر لو انت قاضي نفسك.. تحكم على نفسك بإيه.. تفتكر لو حطينا نفسينا أدام نفسينا هنسامحنا ولا هنصهين ونغفر ونسامح، ولا هنعاقب ونعدم ونشنق؟
Soooooooo
أول دخول ليا في مدونتك.. وعجبني كلامك.. مخبي وراه شخص ذو نظرة فلسفية للدنيا اللي عايشينها
دام القلم وسلمت اليد ودايما مغرقنا كتابات

hamasat يقول...

بوست دمه خفيف بس الحقيقة لو هانطبقه كويس هيبقي ولا حساب الملكين والدنيا كان حالها يتغير كتيييييييييير
تحياتي

نورسين يقول...

متى نحاكم انفسنا في اليقظة ؟ متى ننصب انفسنا قضاة عادلين عليها، نقتص منها حين يكون القصاص ولا بد ان يكون
؟ اشك ان فينا من يمكنه ذلك
ايها العجوز ذو الحلم الذي لم يكتمل في ساحة محكمتك التي احتوتك وحدك ،، رائع حلمك وأكيدة انه ربما يدعوك لأن تحاكم نفسك بعد أن تفيق من ذلك الحلم وتقول خير ان شاء الله
سعدت بمدونتك
تحياتي لك

Dr. Diaa Elnaggar يقول...

العزيز سوووو،

نص أدبي عميق متعدد الطبقات في تفسيره، بيفكرني بعمنا كافكا، أنت يعني سيادتك حاجز كل عباقرة الأدب لاستعمالك الشخصي، سيب حاجة للغلابة التانيين، مش كده.

عميق تحياتي

ضياء

غير معرف يقول...

دة اسمة صراع نفسي بينك وبين نفسك يعني انت مش راضي عن نفسك وعايز تحاكمها بس في نفس الوقت هي نفسك الي بتخاف عليها ومش هتحكم عليها بحكم جامد وبتخاف تعلن غلطها للناس عشان برضة هي نفسك عشان كدة بتحلم بكل دة لوحدك بليل ولوحدك وجراة منك انك تعلن احساسك دة لينا كاصحابك يعني ودي وجهه نظري من الناحية النفسية لكن من الناحية التانية الي مش عارفالها اسم دة معناة انك مكنتش متغطي وانت نايم

مدونة كل العرب يقول...

جميل ان يحاسب الانسان نفسة على ما فعل واجمل شى فى الحياة حين خلود الانسان للنوم وهو مستريح لانة لم يظلم احد ولم يسى الى احد

والعجوز هيا من تعدت سنة التسعين لا الثلاثين
ههههههههه
تحياتى

واحده من الناس يقول...

الانسان ساعات ببقى قاسي مع نفسه
وفي ساعات تانيه بيكون واثق من نفسه ومن كل أفعاله
وساعات تالته ببقى تايه ومش عارف مدى صدقه مع نفسه وصدق نفسه معه
هل هو على حق ولا على خطا

سهل ان احنا نكون متهم أو محامي أو وكيل نيابه
لكن صعب قوي ويكاد يكون مستحيل ان احنا نكون قضاه ونعطي حكم قاطع وعادل على أنفسنا يمكن عشان كده صحيت ساعتها

ععلش طولت عليك
مدونتم ممتعه
والموضوع ده بالذات جميل قوي
مختصر ومفيد

Soooo يقول...

زُمُرده


نورتيني ياستي
وبعد الشر ان الكلام يجف منك
والحمدلله انك فاهمه وحاسه ..
بس برضه مستني تعليقك



سلاموووووز

Soooo يقول...

maha miho


نورتيني يافندم بزيارتك الاولى دي واتمنى ماتكونش الاخيره

الحقيقه الحكم عالنفس ده من اقسى الحاجات .. خصوصا لو كنا بطبعنا بنحب جلد الذات
بس في الاخر .. خير ان شاء الله


ملحوظه:
الحقيقه انا جربت اني ادخل من خلال البروفيل بتاعك عالبلوج او المدونه بتاعتك بس بيقوللي انه للقراءه فقط
وعجبتني قوي حتة الكلام عن شخصيتك .. وعن مصر .. وفعلا
احسن .. نستاهل


سلامووووز

Soooo يقول...

hamasat


نورتيني يافندم في اول زياره ليكي في مدونتي المتواضعه واتمنى انك تعتبريها مدونتك تمام وتشرفيني على قد ماتقدري وتقولي رأيك بمنتهى الصراحه

وانا معاكي فعلا اننا لو حاسبنا نفسنا حساب عسير يبقى حال الدنيا هيتغير .. بس لو حكمنا بالعدل


والسلامووووز ختامووووز

Soooo يقول...

نورسين


بل الرائع هو تعليقك وزيارتك لمدونتي المتواضعه البسيطه
وارجو ان تستمري في المتابعه .. وفي التعليق ايضا



والسلاموووووز ختامووووز

Soooo يقول...

د. ضياء النجار

دكتوري العزيز الفاضل
منورني والله
بس يادكتور الحقيقه انا ولا حاجز حد ولا حاجه
الحكايه ومافيها اني الى حد ما ممكن قريت كام كتاب كده واتأثرت بيهم وبعدين عقلي الباطن قرر انه يقول اللي هو عجبه من اللي قراه

بس ملاحظه صغنطوطه
محاكمة سوووو غير محاكمة كافكا
يعني محاكمة كافكا انتهت باعدام المتهم في محكمة سقفها واطي
انما محاكمة سوووو .. انتهت بـ خير ان شاء الله


نورتني يادكتوري
والسلامووووز ختامووووز

Soooo يقول...

مشمش

موراني والله يا مشمش يا صاحبي
بس اقولك حاجه
كداب اللي يقول انه راضي عن نفسه مليون في الميه
وكداب برضه اللي يحكم على نفسه حكم قاسي .. يايبقى كداب يا يبقى مجنون

وبعدين الصراحه في اني اصرح عن الصراع اللي جوايا للناس دي شيء عادي
ولو كلنا فعلا صرحنا عن نفسنا بافكارنا وكلامنا
هنعرف نتعامل مع بعض من منطلق اننا هنبقى الى حد ما .. تعرينا فكريا قدام بعض

ملحوظه:
انا فعلا كنت نايم من غير ماتغطى .. اصل الكوبرتا بتاعتي غسلتها ونشرتها عالحبل .. وهدها الغراب وطار
ماتعرفيش الاقي فين الغراب ده؟؟؟؟؟


والسلامووووز ختامووووز

Soooo يقول...

حـريــة الــفـكــر والابــداع


نورتني بزيارتك وبكلامك ياباشا
وفعلا مافيش احلى من النوم والواحد مرتاح البال
بس هل تعتقد ان في حد بقى باله مرتاح اليومين دول؟


ملحوظه:
اولا انت قلت العجوز هي من تعدت .. والحقيقه انك بما انك بتخاطبني يبقى تخاطبني بصيغة المذكر لاني والحمدلله رجل
ثانيا .. العجوز او العجز عموما غير مرتبط بسن .. ولكن الصحيح في جملتك ان الشيخ هو من تعدى الستين .. وليس العجوز .. وليس التسعين

نورتني ياباشا

والسلاموووووز ختامووووز

Soooo يقول...

أوشــــــه


نورتيني والله يا اوشه يا نعنوشه ويارب ماتحرميني من تنويرك لمدونتي البسيطه المتواضعه دي ابدا

وانا معاكي فعلا في انه صعب اننا نحكم على نفسنا
بدليل اني قمت من حلمي في الوقت ده بالذات

ونورتيني تاني ..
وماتغيبيش عننا تاني بقى

سلاموووووز

Dr. Diaa Elnaggar يقول...

العزيز سوووو

كنت أقصد أسلوب كتابة هذه التدوينة مش المضمون يا سوووو

مع كامل الاحتفاظ بحقك المادي والمعنوي في صيغة الختام أقول لك:0

والسلامات ختامااااات

ضياء

زُمُرده يقول...

السلام عليكم

بين اليقظه....والغفله
بين الحلم ...والواقع
بين الأمل ...واليأس
بين القدره ...والعجز

دايما في منطقه كبيره من الصراعات
جوا الأنسان والطموحات والأحلام والآمال
طول ما بينهم توازن...الحياه تبقى مستقره

لما تزيد كفه على كفه تحصل اللخبطه
تبدأ في البحث في عالم الخيال
تحقق كل الحلام
لأنه العالم الوحيد اللي مفهوش محال

سلام

إيمان يقول...

سووو ...اول مرة أدخل المدونة
وإن شاء الله متكونش أخر مرة
بس نسيت فى الحلم تكون الحضور كمان
ولا الجلسة كانت سرية
تحياتى على هذا البوست العميق

وشكرا لزيارتك لشخابيطى

shreen يقول...

soooo
شكرا على تعليقك الرقيق بمدونتى
وخاصة انها اول مرة اتشرف بها بهذة الزيارة
فشكرا على رقة التعليق
وشكرا على الاهتمام باضافة تعليق

بالنسبة لبوست المحكمة
انا نفسى استطيع ان اتوحد مع هذا الحلم
لانى اجد نفسى فى مواقف الاتهام كثيرا والكل يبغى محاكمتى
لانى فقط لا اتبع الناموس العام لتصرفات البشر
فقط لانى اختلف وادافع عن حقى فى ابداء رأى
ان اكون متميزة
والا اكون مجرد احد افراد القطيع المتشابهة اشكالة والوانة

فى عالمنا هذا فى حد ذاتة يستوجب المحاكمة
فكففت عن الدفاع متمسكه بمبدئ من لا يستطيع ان يفهم اعماقى
فهذة مشكلتة
لانى مللت من التبرير ولعب دور المدافعة عن نفسها طوال الوقت

واضرب لك مثلا بهذا
النمور البيضاء التى تولد بالبريه
يكون مصيرها شيئا من اثنتين
ان تلقى مصرعها جوعا لانها فقد لونها الطبيعى ففقدت قدرتها على التخفى وسط البريه وبالتالى تعجز عن الصيد لان الفريسة تلمحها على الفور

او ان يتم جمعها لتهرب من الموت جوعا
الى جحيم الاسر

فلا تشعر ابدا بحاجتك للدفاع عن نفسك امام اى كان
فقط تمسك بتميزك

تــــ(حـنة)ــــر يقول...

بعد السلام

بحد ..خير .. ان شاء الله خير

بس هو كدة اى بنى ادام فى يومه الواحد ممكن يلاقى نفسه محامى و قاضى و كمان متهم

عادى يعنى

تحياتى
تمر حنة

Soooo يقول...

د. ضياء النجار

دكتوري
لقد اسأت انا الفهم .. فأسأت التعبير
ولكن لي العذر .. فاسمح لي ان اشرح لك

اولا يا دكتوري انا كنت في فترة من حياتي شكسبيري جدا .. خاصة كما كان شكسبير في كوميديا الاخطاء وفي حلم ليلة صيف .. ولكن اذ بي فجأة اقرأ لكافكا روايته المسخ اتبعها المحاكمه .. فأتحول للطريقه الكافكاويه .. بما فيها من سلبيات وسواد وكوابيس وليله مليانه كآابه ومنيله بنيله .. وبعدها فوجئت برد الفعل في من حولي من اصدقاء باني تحولت لشخص يكاد يكون كئيبا ومتشائما وبيني وبينك فعلا بقيت كده

تاني سبب يادكتوري العزيز .. اني فوجئت بمن هم سلفيين الدين ومتشددين يتهمونني بانني مع التطبيع بدليل قرائتي وتأثري لشخص صهيوني الفكر .. ووجدت انني سوف اتحول لشخص مثل علي سالم والتجاهل والتقليل من شأنه كمؤلف كوميدي راااائع والاهانات اللي وجهت اليه وكل اللي حاصل معاه لمجرد انه ابدى اعجابه ببعض المؤلفين اليهود من اسرائيل ..
مع ان اليهود الاصوليون كانو شايفين كافكا علمانيا وبعيد عن اليهوديه

وبكده لقيت نفسي اتزنقت في خانة اليك .. كئيب .. وصهيوني

اديني عقلك انت بقى لما تسمع حد بيفكرك بكافكا هتقول ايه ؟؟؟

ارجو انه لو كان فيه لبس في كلامي تكون متفهمه ..
واعتذر اذا كنت اسأت التعبير مرة اخرى يا دكتوري



وسلاموووووز

Soooo يقول...

زُمُرده


طب لما تزيد كفه عن كفه .. هل بيبقى الجنون اللا عقلي
ولا العقل اللا جنوني

شرفتيني بكلامك الحقيقه .. بس رجعتيني لنفس النقطه بتاعة زمان
هل منتهى الحكمه هو منتهى العقل
ولا منتهى الجنون؟؟؟؟؟


سلامووووووز

Soooo يقول...

إيمان


شرفتيني افندم بزيارتك دي وياريت ماتكونش الاخيره وتعتبري المدونه بتاعتي كأنها بتاعتك تمام

وعلى فكره .. لو الجلسه كانت سريه .. بعد مانا نزلت البوست ده اكيد مابقتش سريه
وبقت على كل لون ياباطصطا واللي مايشتري يتفرج ..
واتفضحت يا سوووو واللي كان كان



سلامووووووووووز

Dr. Diaa Elnaggar يقول...

العزيز جدا سوووو

والله أنا اللي لازم اعتذر عن الجراح التي نكأتها أنا بمقولتي ولو كنت أعرف بعضا من هذا لشبهتك أيضا بكافكا!!!!0 لأن لك نفس اللغة البسيطة المركبة المسحطة العميقة والتي يمكن أن تصنع منها الفرضية وعكسها. طب النص كان فعلا كده مركب وبسيط، عميق وسطحي ظاهريا في نفس الوقت.

أيا كان الأمر أحييك على النص ومعك حق يكفي أن أقول أن النص يحمل ختم "صنع في معمل سوووو الأدبي"0

والسلامات ختاماااات

ضياء

Soooo يقول...

shreen


كان في كارتون زمان قوي كان اسمه الليث الابيض
كنت باحبه قوي
وفي نفس الوقت كلامك دلوقتي عن النمور البيضا فكرني بيه
وفكرني بخوف الليث الابيض ان الصيادين يصطادوه

بس قوليلي
انتي كمحامي قلتي هتدافعي عن نفسك في كونك عايزه تبقي كده ..
طب لما تبقي وكيل النيابه
هيكون ايه اتهامك لنفسك ؟؟؟


ملحوظه:
انا لما علقت على موضوع من موضوعاتك في مدونتك ماكنتش باعمل اكتر من اني اعبر عن حاجه جوايا لقيتها في الموضوع بتاعك ..
ولو هتشكريني على كده ..
يبقى ده كرم اخلاق منك انتي

سلاموووووز

Soooo يقول...

تمر حنة


منوراني والله
هو ممكن مايكونش طبيعي فعلا ان واحد يلاقي نفسه متهم ومحامي ووكيل نيابه وقاضي
وممكن يكون طبيعي

فهمتي حاجه؟؟؟؟؟



سلاموووووووووز

مدحت محمد يقول...

عندى حل جميل
اقرى سورة ياسين
واية الكرسى واتغطى كويس
وانا هبقى اكلملك
الشيخ سيد فى قناة المحور
مش عايزك تقلق خالص مالص

Eman Eltaher يقول...

الأحلام ساعات بتكون صعبة

ربنا يعينك
و الحمد لله انه مفيش حكم ف الحلم

تحياتى ليك

shreen يقول...

لو كنت وكيل النيابة
كان الاتهام الذى اوجهة لنفسى
الافراط فى الاستماع لصوت قلبى عن عقلى او اى شئ اخر

نفسى يكون عندى شوية قسوة

الأميره أوسه يقول...

مليون مره أقولك متضربش برشام وتنام
وكمان بلاش بانجو قبل النوم
أنت تاخد حمام دافى وتحط فوق صدرك ورقة جرنان عشان الكــحــه اللى مبهدله صدرك دى
وتشرب زجاجة برونكفين
وتنام على جنبك اليمين
أوعدك أنك تبطل تحلم
ولو فضلت تعبان
فيه دكتوره فى جبل نعسه
تاخد ورق بفره وتروح تزورها
وهى هاتقوم بالازم
اللى بعده يدخل على الشيزلونج

الأميره أوسه يقول...

67 comments
ايه يابنى ده أنت كاتب سطرين
كل دى تعليقات
طيب أنت معــزم على المدونه دى

فبركة يقول...

السلام عليكم
أولا شكرا لمجهودك الكبير فى البوست الجميل ده

أنا كاتب بوست عبرت فيه عن مشكلة البلد بحالها وبالذات الشباب وحطيت فيه حل الأزمة اللى كلنا عايشينها ومش عارفين نطلع منها أزاى
يمكن يكون حلى مناسب وممكن يكون غلط
بجد أتمنى أعرف رأيك فيه ضرورى جدا
عشان أتعلم من تعليقك عليه أيه مميزاته وسلبياته
بجد أتمنى قرائته والتعليق عليه
تحياتى

Ehab يقول...

فين الجديد انشاء الله
سلاااااااااااااام

Unknown يقول...

كل حلبسة قبل ماتنام عدل وانت تبقى زى الفل
:D

غير معرف يقول...

سو باشا ايه الحكايه حرمنا من تعليقاتك فى المدونه عندى ومحرومين من ابدعاتك يا رب يكون المانع خير فينك يا باشا

Soooo يقول...

doha


تم تنفيذ النصيحه
وشكرا على زيارتكم

شكرا .. خالص مالص



سلامووووووووووووووز

Soooo يقول...

د. ضياء النجار


ياه يادكتور
معمل سوووو الادبي
انا كده هتغر والله وافتكر اني حاجه بجد

منورني يادكتوري
والحمدلله ان سوء التفاهم ده راح لحال سبيله

سلاموووووووووووز

Soooo يقول...

Eman Eltaher

الاصعب من ان الواحد يحلم
انه يفسر الحلم
او يحوله لواقع ملموس


منوراني .. وربنا يوقينا كلنا يارب
سلامووووووووووز

Soooo يقول...

shreen


يالهوي؟؟؟
!!! نفسك يكون عندك شوية قسوة
ليه يعني .. الحياه ممكن تخلي الواحد مننا يعمل حاجه هو مش عايزها .. بس الظروف اجبرته على كده .. وممكن برضه نسامح نفسنا
عمر القسوة ماكانت هي الحل
احنا لما بنقسى على طفل صغير وبنضربه بعصايه عشان عمل غلط .. الحركه دي بتبقى معلقه معاه .. ولغاية مايكبر بيفتكرها

الاهم من اننا نقسى على نفسنا او على غيرنا .. اننا نتعلم نسامح
ونسامح نفسنا
ونقومها
بس مش بالقسوة


سلاموووووز

Soooo يقول...

الدكتوره أوسه

حصل يافندم .. ضربت قزازة البرونكوفين وحطيت ورق جرنان على صدري وخدت دش دافي ونمت على جنبي اليمين
بس حلمت حلم غريب قوي .. حلم آن كات

تعتقدي السبب اني كنت حاطط ورق جرنان المسا
!!!!!
حيث المساء والسهره

وبعدين ده ايه كمية القر دي .. بتقري علي عشان كام تعليق ونصهم اصلا انا اللي كاتبهم كردود على التعليقات اللي بتجيلي
يالهوي عالقررررر
قل اعوذ برب الفلق



سلامووووز

Soooo يقول...

فبركة


منورني يا باشا في زيارتك دي
وياريت ماتكونش الزياره الاولى والاخيره يارب
بالنسبه لحل مشكلة البلد
فدي مالهاش حل يابرنس
لانت ولا انا ولا مليون ولا الشعب المصري هيقدرو يحلوها
ربنا يحلها من عنده يابرنس


سلاموووووووووز

Dr. Diaa Elnaggar يقول...

العزيز سوووو

ما كانش في من أساسه أي سوء فهم وربنا يديم الأحلام بخير


آه ومبروك على الشكل الجديد بس صورة نجيب سرور أحلى بكتير ولايقة عليك وعلى كتاباتك أكتر، والسيدة في ضهرك ترجعها تاني عشان معمل سووو الأدبي يشتغل بكامل طاقته.0

وبالنسبة لحل مشكلة البلد دي أوعى اليأس يا سووو، وأزاي تفتكر ممكن ربنا يحلها من عنده لو احنا ما آمناش في إننا نقدر نغير الوضع المهبب ده وحاولنا والباقي بعد ما نحاول هو اللي على الله.

عميق تحياتي

ضياء

Soooo يقول...

دكتوري العزيز

الحقيقه انا قررت اني اعمنل لنفسي صورة خاصه تكون معبره عنني شوية .. اما بالنسبه لرمزية نجيب سرور فدي حاجه مفروغ منها لانها جوايا اصلا
انا بس حاطط صورة الضيف احمد دلوقتي كمرحلة انتقاليه عشان اوضح لبعض المدونين اللي بيشرفوني زي حضرتك كده .. اني باميل للون الكوميدي شويه
انا معاك طبعا انه لايجوز مقارنة نجيب سرور بالضيف احمد بس ده مش للتقليل من ده او لده .. الاتنين كانو في مجالين مختلفين تماما عن بعض
وصدقني يادكتور الاتنين اتهضم حقهم برضه بايد متعمده

عموما انا اوعد حضرتك باني ان شاء الله هعمل لنفسي صورة خاصه بي عشان ماتحطش في مقارنه مع حد .. وده مش تقليل لاي شخص من عظام رواد الادب وعلى رأسهم نجيب سرور .. بس لاني -زي ماوضحت لحضرتك في موضوع المحكمه لما حضرتك قلت ان اسلوبي بسيط وعميق زي كافكا- حبيت احط لنفسي تصور خاصه بي وشكل خاص بموضوعاتي وبفكري

بالنسبه لجزئية اني شايف ان حال البلد مش هينصلح واننا علينا دور في ده في التصليح .. فأنا معاك كليةً في كلامك .. بس ايد لوحدها ماتسقفش .. ولو حضرتك بصيت على عدد الناس اللي بيفكرو في تصليح البلد ومش بيفكرو في مصلحتهم .. هتلاقيهم قليلين
وبيني وبينك يادكتور .. انا كبرت خلاص عالكلام الكبير ده

منورني يادكتور



سلامووووووووز