!!! سعد نبيهه

كل سنه والامه الاسلاميه بخير

.. وان شاء الله في زي الايام المباركه دي

.. نكون عايشين في امان وسلام

وكل واحد يكون حقق اللي بيحلم بيه في الخير

ان شاء الله

-

.. النهارده كان اول يوم عيد

.. وبعد ماخلصت الصلاه وخلصت الخطبه

.. قلت اروح اشوف الناس صحابي عالقهوة واشرب معاهم كوبا من التي سكر بره

لقيت القهوة مشغله التلفزيون وبيذيعو اغاني العيد

.. العيد فرحه

.. وأجمل فرحه

.. سعدنا بيها

.. بيخليها

----

.. وهنا افتكر سوووو ايام الطفوله المشرده

.. ايام ماكنت باسمع الاغنيه دي وابقى فاكر الابله صفاء بتقول

.. العيد فرحه

.. وأجمل فرحه

سعد نبيهه

!!!!

وابقى مستغرب قوي .. مين سعد نبيهه ده يا جدعان؟؟؟

وازاي واحد يبقى اسمه سعد وابوه اسمه .. نبيهه ؟؟؟

يكونش ابن المنتج مثلا ؟؟

مش الاغنية دي بس .. اغاني كتيييير قوي

.. على سبيل المثال

معظم اغاني ام كلثوم كنت بافسرها تفسير مخالف لأي قوانين سمعيه وبصريه وميتافيزيقيه

زي مثلا مثلا اغنية .. هل رأى الحب سكارى

كنت باسمعها هل رأى الحب سوكارو

!!!

سوكارو ؟؟

مين ده ؟؟

وازاي بتسأل الحب عن سوكارو ؟؟؟

يكونش سوكارو ده هو نفسه سوكارلوس ؟؟

ومين سوكارلوس ده اصلا ؟؟؟

-

برضه ام كلثوم بتغني اغنيه تانيه بتقول ايه

.. بعيد عنك حياتي عذاب

دي بقى انا كنت باسمعها وانا تقريبا مغيب عن الوعي

كنت فاكرها بتقول فيما معناه يعني

بعيد عنك وعن السامعين ياخويا .. حياتي عذاب

أي والله عذاب

!!!!

وابقى هشد في شعري

.. واسأل نفسي هو ينفع انها تدخل جمله اعتراضيه

في وسط الاغنيه ؟؟؟

تقريبا كان باسمع الاغاني دي وانا نايم على ودني اللي باسمع بيها

او تقريبا وقعت على ودني اصنجيت مثلا

-

لكن لما كبرت شويه فهمت طبعا ايه الكلام وكده

وفهمت كمان نقطه مهمة جدا

فهمت اقرا مابين السطور

.. فهمت ان لكل شيء في الدنيا حاله نفسيه

حاله مرتبطه باللي بيعمل هذا الشيء

-

يعني في حالة الاغاني مثلا

المؤلف بيبقى في حاله نفسيه معينه وهو بيألف

الملحن بيبقى في حاله نفسيه معينه وهو بيلحن

المغني بيبقى في حالة نفسيه معينه وهو بيسمع اللحن

وبيغنيه وهو في حاله نفسيه معينه عالمسرح او في الاستوديو

.. يعني لكل شيء حالات نفسيه

.. ولو الحالات النفسيه دي كلها كانت متقاربه

.. بتخللي العمل الفني او اي عمل في الحياه عموما

بيبقى تحفه

-

نفس الحوار هنا معايا

.. لما بافكر في فكره عشان اتكلم عنها

بابقى في حالة نفسيه معينه

لما باكتبها بابقى في حاله نفسيه تانيه

.. لما حد بيدخل عشان يقرالي حاجه

.. بيبقى حاطط في دماغه انطباع معين عن نوعية المواضيع اللي باتكلم عنها

وبيبقى حاطط انطباع عن شكل البلوج بتاعي

وبعد مايقراها بتمتزج بقى كل الحالات النفسيه دي

.. يا اما تمتزج وتبقى حاجه تحفه

يا اما تبقى ليلتنا مطينه بطين

-

وفي وسط الليله دي بنهمل حاجه مهمه

ايه اللي مابين السطور؟؟

ايه اللي اقصده انا او غيري من اللي بيكتبو سواءا في مدونات او في اي مجال تاني

؟؟؟

المعنى الحقيقى للحدوته ايه ؟؟؟

-

لكن احنا معذورين برضه

احنا ماتعلمناش ده في المدارس ولا الجامعات

كانو بيخلونا نحفظ وبس

نحفظ مانفهمش

مانقراش اللي مابين السطور

انا مش باتكلم عن حاجه مكتوبه بحبر سري

انا باتكلم عن روح الكتابه نفسها

عن الغرض من ان اي حد يكتب

انه يوصل افكاره للناس

-

-

الحقيقه من اول مابتديت اكتب وفيه ديشيليار واحد وواحده مش قاريين اللي مابين السطور

..

.. عايزين المعلومه سهله وخلاص

ديشيليار واحد شايفين ان سوووو شخص تافه وهايف

وبيهرتل في اي هسس وخلاص

عايزين يقرو واحد زائد واحد يساوي اتنين

وده ماينفعش

ينفع لو في حالة اننا داخلين امتحان رياضيات او حساب او فيزيا

.. والمصحح قدامه اجابه نموذجيه

هيشوفها ويدي درجة بناءا على المكتوب في ورقة الامتحان

لكن هنا .. او مش هنا

في اي مدونه تانيه .. وفي اي جرنان وفي اي مجله

انشالله حتى تبقى ميكي او فلاش

لازم نقرا اللي مابين السطور

-

انا متأكد مليون في الميه ان في ناس هتقول اني باعيش في دور الفيلسوف

وهيقولو انت عايز تقول ايه .. انت بتتهمنا اننا مابنفهمش؟؟

كلا وكلا .. انا باعترض

.. اعترض ياعم او اعترضي ياستي

والله الاعتراض حلو

بس لما يكون منطقي

لما يكون في عضم الموضوع مش في شوية قشور زي مثلا اني لساني طويل وباشتم وباقبح وبقول على فضايحي

.. افهم ايه اللي اقصده وبعد كده قول براحتك

وانا برضه اقول

-

.. والا وكتاب الله

هاجيب سعد نبيهه ونقفل عالم البلوجرز ده ونشمع الليله كلها بشمع ازرق ممحمح

-

-

وكل سنه وانتو طيبين

سوووو