الأحد، ٢٥ رمضان ١٤٢٨ هـ

!!! كداب كدب الإبل

!!!!!
يعني ايه ؟؟
.. ومين قال ان الابل بتكدب اصلا
.. ولو كدبت فعلا
مين عرف كدبت قالت ايه
.. على فكره المصطلح ده من زمان
مش من ايام فيلم بوحه لما قالها محمد سعد
-
.. انا في اعتقادي الشخصي المتواضع
.. ان المقصود بكدب الابل
هو الكدب المبالغ فيه كمقارنه بين حجم الابل وحجم الفراخ البيضا مثلا .. كما ان الابل بيتبهدل كتير ومتمرس على البهدله .. وده معناه ان الكداب كدب الابل بيبقى بيكدب كتير ومتمرس على الكدب
هذا والله اعلم
-
.. اما بقى الكدابين في حياة سوووو فهم كتير
وده تقريبا لاني بطبعي باحب اضرب صحوبيه مع كل الناس بمختلف فئات الشعب الكادح المتنيل بنيله
لكن في حياتي كلها ماشفتش كدب زي كدب واحد صاحبي كان معايا في ايام ثانوي
كان اسمه علاء .. علاء اسرائيلي
سوري يابو علاء .. بس انا استحملت نعرك وكدب الابل بتاعك اربع سنين ثانوي فأرجووووووك .. سيبني اخرج الشحنه اللي جوايا
.. علاء اسرائيلي ده كان حكايه
.. كان دايما بيقول ان ابوه ظابط مخابرات في اسرائيل
مش كده وبس .. لأ
.. ده كان في مسلسل بيتعرض زمان كان اسمه الثعلب
بتاع نور الشريف تقريبا .. كان بيتعرض في رمضان
.. صاحبنا علاء ده كان بيفهمنا ان ابوه هو نفسه الشخصيه اللي في المسلسل .. وان المسلسل معمول كقصة حياته
.. وان نور الشريف راحلو البيت بتاع عشرتاشر مره .. عشان يسأله عن شوية تفاصيل في الشخصية
وبالرغم من ان المسلسل بيتكلم تقريبا عن هوجة عرابي وحرب اليمن وحرب سبعه وستين والفتره اللي ماقبل نصر اكتوبر المجيد
وكان باين ان البطل عنده بتاع 40 سنه يعني لو كان فضل عايش لوقتنا الحالي ساعة عرض المسلسل .. كان هيبقى في التمانينات مثلا
لكن ابو علاء كان بالكتير قوي عنده بتاع حاجه وخمسين سنه
.. صاحبنا علاء اسرائيلي ده كان دايما بقى يحكيلنا عن مغامراته لما بيروح مع ابوه اسرائيل
وانه ياما قاد انتفاضات وياما قاد ثورات وانضرب بالنار بتاع سبعتلاف مره
..وكان كل مره بيعمل ريستارت
ويجيب الجيم من الأول
-
وفي مره غاب عن المدرسه قد اسبوع مثلا .. واحنا قلقنا .. قلنا احسن يكون راح اسرائيل ومات في احدى هجماته العنتريه..
او مثلا فجر نفسه بمطوه قرن غزال ولا حاجه
.. لقيناه راجع بعد الاسبوع ده وداخل علينا القهوة
..مش قهوة المهويه اللي بقعد عليها حاليا .. لأ
دي قهوة تانيه اسمها قهوة كلش .. ودي كنا بنكُت من المدرسه ونروح نقعد عليها في الايام اللي مش بيبقى معانا فلوس..
وفي الايام اللي بيقى معانا فلوس .. كنا بنروح نلعب بلياردو في صاله معفنه جمبنا بيخلينا نلعب الساعه بخمسه جنيه عشان ده وقت ميت بالنسبه ليه..
وكانت ساعة البياردو وقتها بعشره جنيه
المهم .. لقينا علاء اسرائيلي داخل علينا القهوة وايده متجبسه .. قلناله مالك والف سلامه والحاجات دي .. قالنا معلش بقى .. ابويا اتزنق في عملية في اليونان فكنت رايح معاه
!!!!!!!!!!!!!!!!!
.. خساره ان الفجر بيأذن علي اول ما ابدأ اكتب البوست
.. والا كنت قلتلكم على اللي نفسي اقولهوله من زمان
.. بس دي تعتبر شتيمه قبيحه
.. وساعتها ممكن افطر واحنا في اواخر ايام رمضان
والواحد لازم يبرشط عالحسنات على قد مايقدر
المهم .. احنا سمعنا كلمته دي قمنا تنحنا .. واللي كانو بيلعبو دومينو عالمشاريب رمو الدومينو .. واللي كان بيشيش رمي لَيّ الشيشه .. وكللو حب يسمع ويعرف ايه التيته
.. قالنا وهو بيحط السيجاره في بقه
نفس اللقطه بتاعة احمد زكي لما كان في فيلم الهروب وهو بيحط السيجاره في بقه بعد ماقتل الوليه مرات عمته او جوز خاله مش فاكر بالظبط
.. عمنا علاء اسرائيلي حط السيجاره في بقه وقالها بمنتهى هدوء الاعصاب
مافيش .. عمليه زي غيرها من العمليات اللي ساعدت ابويا فيها
.. بجد حسسني اني بكلم علاء ادهم صبري مثلا
.. او علاء رجل المستحيل .. او علاء الخُط
او حتى كأني بكلم ابن كهربائي سيلسيون بيروح مع ابوه الشغل في الاجازات
طب ايه الحوار يا عم علاء .. وايه اللي كسر ايدك كده ؟؟
.. لأ .. ده مش كسر
دي طلقة مسدس عيار تسعه ملي رشاش نصف آلي بازوكا
واحنا طبعا بهايم ولا فاهمين ايه السلاح اللي بيتكلم عنه واخرنا في الاسلحه ساعتها الأسلحه البيضاء زي المطاوي والسنج والامواس..
ولما اتقدمنا عرفنا الاليكتريك شوك .. وكنا فاكرينه مكنة حلاقه ليزر
.. المهم .. طبعا كلنا تنحنا وقلناله لأ ياحلو .. احكيلنا الموضوع من اوله
.. قالنا ماقدرش
.. دي اسرار دوله
.. ولو اتكلمت هيصفوني جسديا
ومش بعيد يرفدو ابويا ويشردو اخواتي ويقتلو الكلب اللي مربية أيمن جارنا عشان انا بحب العب معاه قوي
-
.. حكاية تانيه من حكاوي علاء اسرائيلي
.. دارت بي الايام وبقيت باخد معاه درس خصوصي في بيتهم
واللي كان بيدنا الدرس هو نفسه ناظر المدرسه -اسمه فتحي سأسأ او فتحي سليمان - عشان حب يرفدنا من المدرسه بعد ما عدينا مرحلة الغياب..
واحنا اصلا اترفدنا مرتين قبل المره دي وكنا بنعمل مع نفسنا اعادة قيد ونأجرلنا اي حد شكله كبير في السن يعمل انه ولي امرنا وكده..
واهالينا كانو خايفين احسن نترفد ونعيد السنه من منازلهم .. قال ايه .. عشان بيبقى فيها ناس كبيره في السن كطلبه وبيجيبو ظباط امن دوله يراقبو علينا عشان ماحدش يغش..
.. مع اني عدت ثانوي من منازلهم وكانت عادي خالص
.. بس تقول ايه بقى لخوف الاهالي على ولادهم
وعدم رغبتهم في خوض اي تجارب علميه جديده
.. المهم .. ناظر المدرسه بتاعتنا كان أحول
.. من نوعية الناس اللي تلاقيها باصه ناحيتك .. لكن عينيه باصه على ما وراء الطبيعه
باصه على حاجه مالهاش وجود في زاويه غريبه ماينفعش ان حد يبص فيها اصلا
فأنا باعتبار اني كنت اكتر شاب جرئ وعبيط وباحب الهزار في الوقت ده .. رحت انتهزت فرصة انه مش باصص ناحيتي ورحت محوِّل بعيني .. العيال اللي بياخدو معانا الدرس شافوني وراحو ضاحكين بس كاتمين الضحكه .. بس برضه الناظر حس اني باتريق عليه..
.. راح باصصلي
.. او باصص في اي اتجاه عموما وقاللي
في حاجه يا سوووو ؟؟
قلتله لأ مافيش حاجه يابيه .. وعدت الحكايه
وفي وسط مانا باهزر والعيال عايزه تضحك وكده .. كنت باشوف علاء بيبص ناحيتي ويزغرلي بعينه ويشاورلي عالنجفه اللي فوقنا..
.. كل ما اهزر يعمل نفس الحوار
يبصلي ويزغرلي ويشاور بصباعه اشارة بسيطه عالنجفه
خلصنا اول حصه في الدرس .. ونازلين مع المدرس بقى وبتاع .. لقيت علاء نازل معانا .. قلت عادي يمكن خرمان وعايز يشرب سجاره
لكن اول مانزلنا وبعد ما المدرس مشي وكده .. لقيت علاء ده بيزعقلي في وسط الشارع ويقوللي انت مجنون .. انت فاهم انت عملت ايه؟؟؟
.. قلتله في ايه يا علاء .. ماهو الناظر او المدرس ماخدش باله من اني بهزر
.. قاللي - وهو متنرفز بطريقه رهيبه - مابتكلمش عن الناظر
.. انا عايز اقولك ماتهزرش ولا تتريق عليه
عشان في كاميرا في النجفه اللي فوقنا بتصور كل حركه وبتسجل كل همسه وكل اللي انت عملته راح لجهاز المخابرات المركزيه
!!! موسيقا تصويريه حزايني قوي قوي جدا !!!
.. ساعتها بجد .. حسيت ان الارض بتلف بي
.. ولقيت تاريخ حياتي بيمر قدامي في شريط سينما
.. ولقيت نفسي بافتكر ايام طفولتي وايام المراهقه
.. افتكرت اول سيجاره شربتها
.. اول بوب بانجو رليتو وشربته انا والواد بيسو
.. اول قزازة زبيبة ضربتها على بق واحد .. وحسيت ساعتها إن زوري اتخرم
.. واول شريط ابو صليبه طحنته .. واسنفيته او شميته بربع جنيه ورق جديد
.. قلت بس
جالك الموت ياتارك الصلاه
وبطلت اروح لعلاء البيت واعتذرت للناظر وقلتله انا هاخد الدرس في بيتنا وعملت مجموعة تانيه وخدت الدرس في البيت
ودي كانت اخر علاقتي بعلاء اسرائيلي كصديق انتيم
-
وطبعا بعدها اكتشفنا ان ولا كان في كاميرا ولا نيله والواد كان بيشتغلنا .. واكتشفنا انه لما غاب اسبوع وقالنا انه كان في مهمة سرية .. كان عشان ابوه شم بقه لقاه شارب سجاير قام ضربه .. وهو بيجري من ابوه قام متشنكل في سلك التليفون وقع على ايده .. ايده اتشرخت واتجبست
.. والغريب اننا لما لقيناه فك الجبس بسرعه ومالقيناش اي اثار لضرب نار ولا حاجه استغربنا
.. بس هو قالنا انه عمل عملية تجميل في المانيا الشرقيه
مع انه قبلها بيوم كان قاعد معايا عالقهوة .. وشرب سحلب بالفواكه .. وانا اللي حاسبتله عشان كنت ناصب على اهلي ومكمر فلوس درس مش باخده .. وباخد ورق الحصص من شوية عيال بياخدو الدرس .. واروح مصورة وباضرب على فلوس الدرس
-
.. خلاصة الحوار
.. ان فعلا في حاجه اسمها كدب الابل
السؤال دلوقتي
مين ابن اللذينه اللي اطلق هذا المسمى؟؟
.. والجايزه هي
رحلة لألمانيا الشرقيه لمدة قرن شامله النفقات والسفر واقامة فول بورد في فندق سفن ستارز..
-
-
ملحوظ هامه:
فيما بعد .. اكتشفنا ان ابو علاء اسرائيلي كان شغال منسق حفلات في نادي القوات المسلحه
.. علاء اسرائيلي حاليا يعمل في شركة شحن خرفان في الصومال
هذا والله اعلم
سوووو

هناك ٦٠ تعليقًا:

غير معرف يقول...

nice story ya sooo, i really enjoyed it.

el blog beta3ak da gamed ta7n, el blog dah b2a kol 7ayaty:))

Emmoooo

غير معرف يقول...

هههههههههههههههههههههههههههههههههههههههههههههههههههههههههههههههههههههههههههههههههههههههههههه يخرب بيتك يا سووو تحفة بجد ايه ده ههههههههههههههههههه

Hannoda يقول...

سعات بيبقى الكدب للكدب فقط

و ساعات بيكون متنفس للخيال ا لواسع

أعتقد ان صاحبك ده كان حاينجح قوي لو حاول يألف قصص أو يكتب سيناريوهات

بس عندي كلمة صغير جدا لو تسمحلي بيها

السردعجبني جدا و إسلوبك جميل لكن ما كنتش موفق لما بدأت تتكلم تذكرك لتاريخ حياتك لما قالك عن الكاميرا

أعتقد ابك كده اتكلمت عن ذنوب كبيرة سترها عنك ربنا و انت فضحتها بنفسك

بعتذر جدا لو أنا كده تعديت حدود معينة عندك و اتمنى تتقبل رأيي في جزء صغير من اللي قريته

و ده ما يمنعش اني بجد عجبتني الحكاية و إني أول مرة أسمع عن مقولة كذب الإبل

سعيده للتعارف و أتوقع الصداقة الدائمة

تحياتي

الأميره أوسه يقول...

ههههههههههههه
لو مكناش فى رمضان كنت قولت
أحــــ
هههههههههههههههههههه
أنت كاتب البوست ده
وأنت شامم كوله من بتاعت التوربينى
ناظر مدرسة أولاد الشوارع
كنت بتجيب أبو صليبه منين
من جبل ناعسه
ههههههههههههههههه
ومين بيسو ده ميكونش الواد بيسو المدون
اللى كان أسمه أحمد وبيعدى يشتم فى المدونات من غير سبب
والله ضحكتنى لدرجة أن نسيت أنا هنا ليه
كان المفروض تسمى المدونه دى
ورق بفره
هنادو بتقولك أنت كده أتعديت حدود معينه يا وحش
ههههههههههههه
مش عارف أن كلمة صليبه من الخبائث
و زبيبه كلمه بتنقض الوضوء
عارف لما تموت حاتسحب
وأرسم على قبرك زجاجة كودافين
وأكتب هنا يرقد السيد سووو
بعد تناوله جرعه زائده
من قمر الدين

غير معرف يقول...

الكذب احيانا بيكون طبع في البني ادم
خصوصا لو مالقاش حد يقومه ويوقفه عند حده.. اولو هو استحلى الحكايه وشاف الناس مصدقة روياته العجيبة الغريبة .. ويكذب الكذبه ويصدقها هو نفسه .. واول ما يتورط يلاقي نفسه بيكذب كذبه ثانيه عشان تصلح اللي قبلها .. وهلمجراااا. بس حلوة كذاب كذب الأبل دي ياسوووووو
موضوع عسللللللل.. اضحك الله سنك


شهــــــــــد

غير معرف يقول...

بص هو مفيش حد دلوقتي مش بيكدب بس الكدب لية حدود مش زي صاحبك دة وبعدين ماهو انتو الي غلطانين كنتو شوية عيال عبط صغيرين مش فاهمني حاجة لو كنتو فاهمين مكانش سرح بيكو كدة عيب عليكو يعني مش علية والكداب بيكدب عشان بيلاقي الي يصدقة بس علي فكرة انا مش بنقض الكدابين اوي لاني الاول كنت بضطر اكدب كتير بس ليا اسبابي الخاصة لان ماما دايما شكاكة ودايما بتوعق وصوتها عالي وانا مبحبش كدة بسبب ومن غير سبب وكنت بكدب في حجات تافه عشان اخلص من زعيقها المستمر بس الحمد لله بطلت اكدب وسبتها تزعق بس وداني وجعتني اوي ياريتني ما بطلت

غير معرف يقول...

da ya retoo kdb ebel da kedb tnen aw dynasor ya3m sooooooo da wad fshar lma tshofo olo monmon bt2ol ya fshar yabn elfsharen

Ehab يقول...

يخرب عقلك انت مصيبه اعذرني يا صديقي بس انا كنت هاموت منك وبعدين يا مفتري عمال تعاكس الناظر مش خايف يهفك قلم على خد اللي جنبك
طيب ما علينا صاحبك ده اعمل فيه ايه
والله فكرتني بصديق مكنش بعتقد ان فيه حد هجاص زيه بس ده كان بيحكي على مركز ابوه العالي وانه عنده اسلحه بتاعته هو مش بتاعة ابوه وانه راح لواحد صاحبه ففتحله صندوق مليان اسلحه وقاله اختار يا حسام اللي يعجبك راح مختار مدفع آلي وراح يضرب في الشارع بتاعهم اللي هو اصلا عرضه 3 متر
كنت هاموت منه ومن فشره
بس فرحت قوي لما العيال قفشوه علشان يضربوه مره على موقف عمله كده وهو عمل فرخه وزاغ منهم
بجد تسلم ايدك على البوست ده خليت الناس في المكتب تستغرب هو بيضحك زي العبيط كده ليه
سلاااااااااااااااااااااام

Soooo يقول...

Emmooo

الحمدلله ان الموضوع عجبك والحمدلله ان البلوج او المدونه كلها عاجباك
بس بلاش تخليه يبقى كل حياتك .. انت لسه صغير يابني وبتلعب في العشرينات
نصيحه .. روح اتجوز .. او هاتلك موبيل ثري جي بس يكون حلو ويكون جاي بطقم المزز بتاعته

سلاموز

Soooo يقول...

mis monmon
ضحكتك دي لوحدها كفايه
وياريت ماتحرمينيش من ضحكك في البلوج بتاعي

يلا اسيبك تضحكي بروقان بقى

سلاموووز

Soooo يقول...

hannoda

الحقيقه انا كنت كل ما اجي ارد على الناس اللي علقت على الموضوع واشوف ردك اقراه واقول لأ مش هرد دلوقتي
مش عارف ليه بصراحه .. بس يمكن بحاول اجيب كلام يكون في البسيط عشان اوصل معاكي لنقطه معينه وهي الغرض الاساسي من اني اعمل البلوج ده

بصي ياستي
انا مش هتكلم غير على النقطه الصغيره اللي اتكلمتي فيها واللي هي شريط السينما والفلاش باكات اللي كنت باشوفها
اولا انا كنت بقول الموضوع كللو من اوله لاخره بهزار
ثانيا .. الجزئيه دي بالتحديد اللي هي الفلاش باك لو خدتي بالك هتلاقي انها تعتبر مكمله للحدوته ككل في ان ده سلوك الشباب اللي زيي في المرحله دي .. مش هنقول كلهم .. بس نسبه كبيره منهم
ثالثا .. انا ماكنتش بقول ده من باب التباهي باللي كنت باعمله او اني افضح نفسي قد مانا بقولو باسخر من حياتي في الفتره دي .. خصوصا انك لو خدتي بالك هتلاقي كل الفلاشات باك دي مافيهاش حاجه واحده محترمه بالعكس كلها زكرايات منيله بنيله
رابعا .. انا معاكي انه ممكن يكون التعبير خانني في السرد بالتفصيل وكده .. ودي على فكره مش مضايقاكي انتي لوحدك لأ دي مضايقه ناس كتير غيرك .. بس بصراحه بقى .. كويس اني قلتها عشان لو ماكنتش قلتها ماكنتش هحفزك انك تردي علي وكنتي هتقري الموضوع وتمشي زي مافي مليون مدون او صاحب بلوج باروح اتفاعل معاهم في مدوناتهم وللأسف بيجو هنا بيكتفو بانهم يلقو نظرة ويمشو وكأن مافيش حد بيكتب ولا بيدون غيرهم والأنا عندهم عاليه قوي لدرجة الغرور بصراحه .. لكن انتي تفاعلتي معايا عشان النقطه دي .. تخيلي لو ماكانتش النقطه اللي ضايقتك دي موجوده .. ياترى كنتي هتتفاعلي معايا ولا هتتكلمي معايا ؟؟؟؟


اعتقد انك فاهمه وجهة نظري
والف شكر على مرورك وتشريفك هنا عندي في البلوج المتواضع بتاعي .. وياريت تعتبري انك صاحبة بلوج .. وان بلوجي او مدونتي هي مدونتك
وسلامووووز

Soooo يقول...

الأميره أوسه

اكتر اميره وصاحبة مدونه بادخل عندها في المدونه بتاعتها بافرط ضحك بصراحه وباعجز اني اتكلم او اعلق على موضوعاتك الهايله
الف الف الف شكر على تشريفك لي في مدونتي المتواضعه
والف الف الف شكر على كلامك المسخره اللي قلتيه واللي الحمدلله قريته بعد الفطار والا كنت هكتم ضحكي .. اصل انا باضحك برقاعه اضافة الي شخير .. وكأني باضحك وانا نايم مثلا

الحقيقه كنت بافكر فعلا اسمي المدونه حاجه في سكة التهييس لكن خفت احسن اختي الكبيره واللي باحبها وباحب مواضيعها الاخت نواره نجم تفتكر اني باقلدها ولا حاجه .. عشان كده قلت اسمي باسم يكون معبر عنني
خصوصا ان مش كل مواضيعي في التهييس او مش كلها في سكة الدخان الازرق والاخضر والميتالك .. ومش كل المواضيع برضه بتتكلم عن الدواليب بمختلف فئاتها من مخدرات وكيميا وميه .. ولو ان الميه مالهاش دواليب وليها تلاجات

سعيد جدا بتشريفك هنا عندي وارجو اني اشوفك كتير كتير كتير .. وتقدري تعتبري البلوج ده بتاعك ياستي

والسلام ختاااااام

Soooo يقول...

شهوده العسوله

الحقيقه ياشهوده الكدب في ناس كتير بتعتبره عادي .. مش هنتكلم في سكة الحلال والحرام والناحيه الدينيه .. لأ خالص
بس بجد بجد بجد الكدب ده يعتبر مرض
انا جات علي فتره كنت كداب قوي .. لكن لقيت ان كدبي ده خسرني ناس مهمين جدا في حياتي .. وقبلهم خسرت نفسي

ومن هنا المكان ومن هذا البلوج وهذه المدونه .. باناشد كل كداب واقوللو..
ده انت هتطلع عينك في حياتك وفي اخرتك على كدبك ده


والسلام ختام

Soooo يقول...

مشمش يا صاحبي

احنا ماكناش مجرد عيال مش فاهمه وبس .. لأ .. ده احنا كنا فاكرين نفسنا عارفين كل حاجه وفاهمين كل حاجه
وهي دي المشكله الحقيقيه ..
واسمحيلي اني احيكي على شجاعتك واعترافك باننا كلنا بنكدب واعترافك بانك بتكدبي او كنتي بتكدبي
لأن الحقيقه فعلا اننا ساعات بيتهيألنا ان الكدب مفتاح للنجاه
وكمان الظروف اللي حوالينا بتجبرنا اننا نكدب من مبدأ ياعم كبر دماغك
لكن بعدها ومن غير ما الواحد يحس .. بيتحول التكبير ده لمصيبه .. ومصيبه تجر مصيبه لغاية مانلاقي نفسنا في داهيه
يلا بقى .. ربنا يسترها علينا دنيا وآخره .. ويكرهنا في الكدب والكدابين .. ويبعدنا عنهم ويبعدهم عننا يارب

منوراني والله يا مشمش
سلاموووز

Soooo يقول...

monmon .. or .. mony

حلوه قوي كدب التنين وكدب الديناصور
شكلها كده في انواع كدب تانيه ظهرت والواحد مش واخد باله يا جدعان

وعلى فكره يا موني .. علاء انا ماشفتوش يجي من تمان سنين مثلا .. ولا عايز اشوفه بصراحه

سلاموووووز

Soooo يقول...

الشنكوتي الكبير

ياخوفي يابو الشناكيت زمايلك في الشغل ياخدوك عالسرايه الصفرا من كتر ضحكك واتحمل انا ذنبك
ولا اقولك .. ضاحك براحتك ياعم .. مافيش حد عارف الدنيا مخبيالنا ايه
مش يمكن يخصخصو الضحك هو كمان

ملحوظه:
شكل صاحبك ده برضه في المخابرات .. وكان بيضحك عليكم ويقوللكم انه جايب السلاح من حته تانيه عشان خايف انهم يصفوه جسديا
عموما هسأللك علاء في الحته دي .. يمكن يكونو طلعو مع بعض مهمة في بلاد العجائب


اسعدني مرورك ياباشا .. وسلاموووز

هناء يقول...

أنت تحفة

Unknown يقول...

هههههههههههه

انا اول مرة اجى هنا وبجد اسلوبك حلو اوى ومسلى جدا ..احترت اعلق فى ايه ولا فى ايه لأن كل المواضيع جميلة بجد

وبعدين لما حضرتك عجوز وعندك 30 سنة واومال انا اللى عندى 21 ابقى نونة مثلا؟؟؟!!! ... كلنا عواجيز ياسيدي الفاضل ومش بإدينا

:(

يلا سلام عليكم وكل سنة وانت طيب وألف مبروك ع المدونة الجميلة دى ولوانها متأخرة شوية معلش

Ehab يقول...

انت يا فنان مش عارف اقولك ايه عايزك تكتب جديد علشان اقرأ بوستاتك الحلوه وبرده عايزك تسيبالبوست لحد ما ناس كتير تشوفه وياخد حقه اقوللك اكتب الجديد والناس اللي هتيجي اكيد هتقرأ المدونه كلها
تحياتي يا باشا
ورمضان كريم رايح
عيد سعيد جاي
سلااااااااااااااااااااااام

غير معرف يقول...

تعليقا على كداب الابل انا بقى كان ليا جار شبه صحبك دة بس كان ايه واد جامد كان بيروح المتنزة و ينزل البحر و يفضل يعوم يعوم يعوم لحد ميوصل للبراميل و ميكنش في طول و فى مرة و هو بيعوم لقي جانبه سمكة قرش بتلف حوله و هو طبعا شجاع جدا مخفش منها مسكها من دليلها و لفها و طوحها بعييييييييييييييييييييييييد عنه و البنات اتلمت حوله و قاعدة يسقفوله
اووووووو برافوووووووووووووا فوزى جود بوى
والنبي هو في سمك قرش و البحر و كمان فى المنتزة
ولا فى حد يكون شجاع كدة و اسمه فوزي
من ساعت الموضوع دة و احنا بطلنا نقول لاى حد انت كداب بقينا بنقول للبيكدب يا فوزي
و اعتقد من فوزي لياسر مفرقتش
ولا انت ايه رايك

دكتور كسلان يقول...

اولا
الف مبروك ع المدونة
وان شاء الله تكون مميزة

بالنسبة للبوست

تحفة

اسلوبك جميل ودمك خفيف اوى

انا برده كان ليا واحد صاحبى كده

بس للاسف

لسه بيفشر وانا بستحمله

لحد ما هيجيلى سكتة قلبية

سلاااااااااااااااااااااااااااااااااااااااااااااااااااااااام

زُمُرده يقول...

كلاآآآآآآآم جميل.....مقدرش أقول حاجه عنه
لأ لأ استنى انا عندي كلمه ...لآ هو احتمال...ويمكن خيال...ويمكن تأثيرك رما عليا

ممكن علاء يكون اسمه...سوووو
وممكن اصلا ميكنش في علاء ولا سوووووو
وتكون شربت حاجه أصفره ....يعني مش بتعاتك ولا تعرف بتتجاب منين ولا حاجه...ناس ضحكوا عليك وقالولك قمرالدين وانت بريء صدقتهم

ويمكن اصلا متكنش عشت فتره الشباب البايظه دي اصلا
ولا تعرف الناس دول وشوية افلام وحبتين خيال وفلاش باك وموهبه أكييييييييد موجوده عملت البوست ده
والله اعلم يمكن متكنش عجوز ولا عندك 30 سنه ولا حاجه!!!! لخبطلي دماغي

عموما الموضوع لذيذ وإن كان في حاجات هعلق عليها وقت تاني

لأني عرفت ليك في الهزار ...صح ...بس الجد ايه؟؟ اتكلم واتشهد على روحي
ولا ايه النظام؟؟

Soooo يقول...

هناء
شكرا على زيارتك لمدونتي المتواضعه


بس انا ولا تحفه ولا حاجه .. هتتحفيني بالعافيه يعني؟؟

غير معرف يقول...

البوست ده هائيل بجد انا قريتو ومتخيل منظرك فى الحوار ده
انما نصيحه لوجه الله سيبك من البانجو والزبيب وخلافه اخرتهم زفت

Soooo يقول...

انسانه

الف شكر يافندم على زيارتك لمدونتي البسيطه .. وعلى فكره .. اسمك عاجبني جدا بصراحه

وبيني وبينك .. فعلا مش انا لوحدي اللي عجوز
كلنا عجزنا بدري بدري

والسلامووووز

Soooo يقول...

الشنكوتي الكبير

انا احترت معاك والله يا ابو الشناكيت .. يعني اكتب بوست جديد ولا اسيب البوست ياخد حقه
؟؟؟

عموما .. منورني والله
وان شاء الله هكتب حاجه جديده ..
امتى وفين وعن ايه
الله اعلم


سلامووووز

Soooo يقول...

nadosha

منوراني والله ..
بس صاحبكم ده بقى عدى مرحلة كدب الابل واخترع نوع كدب جديد .. كدب سمك القرش

وبعدين فعلا في حد يبقى شجاع ويبقى اسمه فوزي ؟؟
هو في حد اصلا في الحياه دلوقتي اسمه فوزي؟؟

وعلى فكره .. بطل البوست ده ماسموش ياسر .. اسمه علااااء
علاء الاسرائيلي
ده انا بفكر اعمللو مسلسل تاريخي خيال علمي اجتماعي اكشن كوميك

وسلامووووز

Soooo يقول...

زمرده

هممم .. بصي .. انا باعتبار اني صعيدي ودمي حامي كنت ناوي ادخل على مدونتك واقول واقول واقول وبتاع
ومش كده وبس .. لأ .. ده انا كنت هكلم الحاج جوجل وابن اخته الباشمهندس بلوجر عشان يلغو البلوج بتاعك باعتبارك بتشككي في مصداقيتي وفي شخصيتي وفي بلوجي عموما
لكن لما دخلت البلوج بتاعك لقيتك حاطه اسم البلوج بتاعي على اعتبار اني أمل بكره ومن ضمن الناس اللي انتي بترشحيهم للي بيدخلو البلوج بتاعك
ساعتها هديت قوي وفرحت بصراحه .. لأنك اول واحده تعبرني في الاخوة المدونين والاخوات المدونات وتعمل معايا بونط الجدعنه ده

وعشان كده .. اوعدك ان البوستات الجديده ان شاء الله تحمل فكر جد وجديد .. والف الف الف شكر ياسيدتي الفاضله على الفته الجميله دي منك

وسلامووووز

Soooo يقول...

دكتور كسلان

الف شكر على زيارتك لمدونتي المتواضعه يا دكتور
والف شكر برضه على تعليقك الظريف للبوست

ونصيحه منني بالنسبه للشخص اللي بيكدب وبتقول انه هيموتك ناقص عمر .. اتصرف بأي طريقه وهاتله عقد عمل في الصومال ..
يرقم الخرفان اللي علاء اسرائيلي بيشحنهم

ولو ماعرفتش .. انا هقول لعلاء يكلم حد من المسئولين اللي يعرفهم .. سواءا مخابرات او جواسيس ..
وربنا يعمل اللي فيه الخير


والسلام ختاااام

Soooo يقول...

رئيس جمهورية نفسي

احلى رئيس لأحلى جمهورية .. انت فاجأتني بتعليقك وانا باكتب تعليقاتي على التعليقات المتعلقه
والف شكر على تعليقك عالبوست ياباشا

بس ملحوظه هامه
الحوارات دي كانت ايام زمان ياباشا .. ايام سن الآشر .. يعني ستاشر وسبعتاشر وتمنتاشر
انما خلاص ياعم الحمدلله بعدت عنها من زمان قوي
بقيت باشرب سجاير ونيسكافيه .. بس الحق يقال الحق يقال
ساعات باضرب تمر هندي
وربنا يتوب علينا جميعا يارب

نورتني يا سيادة الريس .. بس قوللي .. انت جيت لوحدك من غير الموتسكلات والعاااااااا
؟؟؟؟

nour el 3ozamaa يقول...

كل عام وانتم طيبين بمناسبة عيد الفطر المبارك وانشاء الله نصلي صلاة العيد الجاى في المسجد الاقصي وتكون القدس متحرره

تحياتى لكل عظيم وعظيمه

محمود على يقول...


كل سنه وانت طيب

Eman Eltaher يقول...

ههههههههههههههههه
ربنا يرحمك من شرور الكدب

و يخليلك علاء اسرائيلى :)

ههههههه
تحياتى

محمد حمدي يقول...

قصه جميله جدا .. واسلوبك فيها اكتر من رائع .. احييك وأحيى علاء إسرائيلى على دماغه المليانه حواديت

سلوى يقول...

أول مرة أدخل مدونتك
وأول مدونه تمتاز بهذه الصراحه الشديده منك
والكذب من أبو علاء

أعتقد أن ده مش كذب بالمعنى
هو بس خياله واسع حبتين

أسلوبك مميز
أحييك

أما عن المرحلة اللي كان فيها البانجو والذي منه ...

فهذه المرحلة بيكون فيها كل شئ
مراهقه بقى

المشكله لو فضلت متعايش مع تلك الأعمال للوقت الحالى

موضوع كدب الإبل أول مرة أسمع عنه
وأيضا سلامووز

عموما
كل سنه وإنت طيب
وعيد سعيد إن شاء الله
والآن
سلاااااااااااااااموز

غير معرف يقول...

سوووووووو

سووو باشا حضرتك المدونة حلوة أوى و التدوينة دى زى العسل و خفيفة و لطيفة و ظريفة و كل حاجة.

بس فى نقطتين ف الانجاز يعنى.

1-دلوقتى انت تقصد كدب الإبل ده اللى كدبته على والدك و والدتك لما كنت بتنفض للدرس و تضرب ع الفلوس ولا كدب علاء؟؟معتقدش ان علاء كداب الكدب اللى ف بالك. هوه بيعمل الحاجة اللى بيسموها النخع اللى هوه السرحان يعنى مش أكتر بس تلاقيه من جواه شخصية طيبة أو بالأصح غلبان يعنى.بس ده ميبررش تصرفاته اللى اخترعها من خياله.

2-التدوينة فيها كمية ألفاظ رهييييييييييبه.. أغلب الألفاظ دى ان مكانش كلها مفهمتش معناه بس قدرت أجمع من السياق العام للتدوينة.

أسلوبك حلو و موهوب ده رأيى المتواضع يعنى لو سمحتلى انى أقوله.أول زيارة ليا ف مدونتك بس حاجى تانى كتير ان شاء الله.كل سنة وانت طيب يا سووو

arabicseo يقول...

wow ..
i had fun reading your blog , man u rock big time!!!
well i also used to know alaa as went to school together.
hehe im glad u started writing about this shit!

waiting to read your next post :)

m.nabil

Soooo يقول...

nourhetler

وكل سنه وانت طيب والامه الاسلاميه والعربيه كلها بخير
ويارب في زي الايام دي نكون كلنا بنصلي العيد في المسجد الاقصى ان شاء الله

شاكر تفاعلك وتعليقك في مدونتي المتواضعه .. واتمنى انك تكرر الزياره دايما

والسلام

Soooo يقول...

محمود علي

وانت بالصحه والسلامه ياباشا
واسف اذا كان حصل منني خطأ في حقك او في حق اي حد من الاخوة المدونين في الموضوع اياه

وشاكر ليك زيارتك في مدونتي المتواضعه
وارجو انك تعتبرها زي مدونتك تمام
والسلام ختام

khaled adel يقول...

اسلوب جامد جداً
خلاني رغم اني مبحبش المقلات الطويلة
لازم اكمله للآخر
بس كان عندي نفس التعليق بتاه hannoda
بجد انا لما قريت الكلام ده اتصدمت شوية كده
مش عارف اذا كان ده هزار ولاجد مفهمتش الصراحة
اكترحاجة استغربتها انك قبلها بشوية كنت بتتكلم على صلاة الفجر والحسنات اللي عايزين نبرشط عليها
وبعدين لاقي بانجو وحشيش والبلوج اتقلبت غرزة
طبعاً مكنتش لسة ساعيتها لاحظت الفارق العمري بين اللي بتحطيه وبين اللي انت فيه دلوقتي
اتمنى ان دلوقتي يكون الوضع احسن شوية
وربنا يهدينا جميعاً

Soooo يقول...

Eman Eltaher

اللهم امين يارب
وكل سنه وانتي طيبه
وعلاقتي باسرائيل انقطعت من زمان .. والحمدلله انها انقطعت



والسلامووووز ختامووووز

Soooo يقول...

Mohamed Hamdy

الف شكر ليك ياباشا ونورتني بزيارتك بصراحه
والحقيقه ان علاء دماغه مش مليانه حواديت .. لأ .. مليانه صراصير


وكل سنه وانت طيب
سلامووووز

Soooo يقول...

Salwa

الف شكر على تعليقك على الموضوع وتشرفت بزيارتك لمدونتي المتواضعه

بس احب اوضحلك نقطه
الحوارات دي كانت زمان .. انما دلوقتي الحمدلله اتعالجت وبقيت كويس
هو يادوبك كوباية سحلب .. كل فين وفين يعني

وكل سنه وانتي طيبه
وسلاموووووز .. برضه

Soooo يقول...

Queen eraser

تشرفت بزيارتك العزيزة دي الحقيقه
اما بالنمسبه لنقطة اني كنت باكدب فده اه بصراحه .. اكدب عليكي اقوللك ماكدبتش وتقولي علي كداب
لا طبعا .. كدبت .. بس للأسف ماكنتش لوحدي اللي باكدب
كان معظم الجيل بيكدب .. يعني كانت مشكله عامه .. ايه اسبابها بقى .. دي عايزالها بلوجات كتير

بالنسبه لجزئية ان الكلام مافهمتيهوش .. دي انتي معاكي حق فيها
بس اعتبري نفسك بتاخدي كورس لغه جديده .. وصدقيني هتستفيدي منها بعدين

وكل سنه وانتي طيبه ياستي .. وياريت تعتبري المدونه مدونتك وتشرفيني في اي وقت

سلاموووووز

Soooo يقول...

Mohamed Nabiil Pashaa

الله يستر اصلك يا زوق يابن الاصول يابن منطقتي
قللهم يا محمد ان في اختراع فعلا اسمه علاء وانه مش من بنات افكاري
بنات افكاري ايه بس
قصدي مش من خناشير افكاري
عشان كلهم هنا بيقولو اني باكدب كدب الابل

كل سنه وانت طيب ياباشا .. ونورتني والله
وابقى حاسبلي عالقهوة بشوية الضحك اللي انت ضحكتهم دول

سلامووووز

Soooo يقول...

khaled adel

نورتني ياباشا والف شكر على تعليقك الجميل
بس على فكره .. انا ماقلتش حشيش خالص .. قلت بانجو اه .. وده لان الحشيش ساعتها كان غالي واحنا كنا غلابه

بس معلش يعني .. انت ماخدتش بالك اني جايب الحدوته كلها اننا كنت جيل منيل بنيله ؟؟
اللي اتكلمت عنه ده كان زمان
انما دلوقتي بادعي ربنا انه يصلحلي الحال

كل سنه وانت طيب ياباشا
وسلامووووز

mesh2dra يقول...

السلام عليكم

أسلوبك حلللللللللو اوى
صاحبك ده خياله واسع أوي


كل سنة وحضرتك طيب


سلاماتي

Soooo يقول...

mesh2dra

شرفتيني بزيارت وتعليقك الجميل ده والف الف الف لا بأس عليكي

وكل سنه وانتي طيبه


وسلامووووز

Hannoda يقول...

على فكرة كان واصل قوي في البلوج فكرة سخريتك من الفترة ده و عدم التباهي بيها و أنا لاحظنه بالفعل
و حاجة كمان بقى
أنا كده كده كنت حارد ع البوست سواء الجزء ده كان فيها أو لأ
:)

ثالثا: سعيده بتقبلك كلامي لإنه فعلا كان من باب الأمانة و بس مش أي حاجة تانية وأكيد زي ما إنت قلت .. لازم نتفاعل مع بعض بشكل مفيد مش نقرا و بس أو نعلق بمدح و كلمتين واجب و بس.. لإن المفروض المدونة تكون مرايا لينا نشوف فيها نفسنا و نتعلم منها الجديد
وأعتقد هو ده الغرض الأساسي للبلوج اللي انت أشرت له في بداية ردك على تعليقي و ما قلتش ايه هو
توقعت صح؟
:))

بالفعل بدأت أحسها مدونتي و معتزة جدا بالتواصل

سلامووووز

غير معرف يقول...

لكن في حياتي كلها ماشفتش كدب زي كدب واحد صاحبي كان معايا في ايام ثانوي
كان اسمه علاء .. علاء اسرائيلي
LoooooooL la la begad ya gama3a law 7ad feko shaf 3ala2 el 2esra2ely dah wad3 tany law 3aneto el mo3anah ely 3anaha kol man hom shafo 3ala2 el 2esra2ely hatefhamo ana 2a3raf el sha7'sya ely by2ol 3aleha Sooo deeh,
Faker ya so adham sabry el sodan el wad 2emam el Sodany 2adham sabry el sodan we el motahad el syasy we 2a7'oh 2ely 3amel feha dongoan LooooL la begad 2emam dah kan to7fa ana mara kont 2a3ed ana we so 3ala 2ahoeet 2afandena deeh zamaaaaaaan kona beno3od feha we la2eto by2ool ana mara sare3t 2asad we 2a3ad y7lef zay maby7lef 3ala el kora we el syasa we 7ata fe el 7orob el 3azema ely kadha fe el sodan we el nedal el ma fesh 7ad nadlo 2ado el sha7'sya deeh ma3a 2enena benes7'ar menha be3'ad el nazar 2eza kanet 2emam 2aw 3ala2 el 2esra2ely 2aw 2ay wa7ed hagas 2abelnah el sha7';sya deeh mogoda we kol 7eta fe 2abo lam3a dah horob men el wake3 wala dah ehh leeh,
ya2s ? wala nerga3 we n2oool 3agoz we 3andy 30 sana
Sooo faker ramadan bata3 el ta3mya ely kol 2ameen el ra3y kanet betakol men 3ando 2abl matro7 3ala kalash ? lol neseto 2enta dah ma3a 2eno kan gamed yala 2ahy 2ayam we rabena ystor men ely gai Kool sana wento taybeeen game3an

غير معرف يقول...

مش ممكن البوست ده
هاااااايل والله
جميل موووووووت
تسلم الأيادي والله
منى

سلوى يقول...

وتوضح ليه أخي
أنا فاهمه أصلا
إن دي كانت مرحله وانتهت وده كان باين من كلامك
ويا أخي كلنا له أخطاؤه المختلفه

غير معرف يقول...

salamu alikum,
first it is nice to know akhrek now karkade wa tamrhendy:-), or kobayet shay ma3a cigarteen.
secondly i wantes to comment that inspite of the tremendous lies ur friends said, wa lrboma naltmes leih el3ozr, ma7desh 3aref meen kan dayes 3la nafsytog belgamed keda, bas all over the stopry u were lying too, it is weird that in the middle of ur commenting on others, mostly we usually were doing the same, and always our scales are different then, may be it is kedb elabl bec althpugh it is so big as his senm , i dont think the person sees it the same size.bas still it is the first time to hear the comment.
thirdly, when u write i guess u have the right to write things no matter it is that true or not, if we entered it into the categroy of 3amel adaby, so actually if what is inside is true or false, it should be u only who knows, and so u would have escaped from the point of elgahr belma3sya bec it is a mjor thing after all, i enjoyed more before u admit that u really did so, bec it is like wow is that for true or his imagination is that true.
and after all and as others i really enjoyed it and i laughed alot, on how naiive his lies were, and how naiive u were to believe them and this is fe3lan elshabab elgamed beta3y sen alasher

Soooo يقول...

Hannoda

سوري والله بس ماكنتش واخد بالي من التعليق بتاعك هنا

والحمدلله انك اعتبرتي مدونتي هي مدونتك



ماتختفيش بقى
والسلاموووووز ختاموووووز

Soooo يقول...

Ayman Abdullah

ابو ايمن .. الله يكرمك ماتقلبهاش عياط ودراما





والسلاموووز ختامووووز

Soooo يقول...

wa7dania


الله يسلمك ويكرمك ياستي

معلش لسه واخد بالي ان في تعليقات في مواضيع قديمه وقلت لازم ارد عليها عشان ماحدش يزعل منني ولا حاجه


والسلامووووز ختاموووووز

Soooo يقول...

Salwa


مش مهم ان الواحد يكون عنده اخطاء قد ماهو مهم انه يعترف بيها ويحاول يصلح من نفسه




وسلاموووووز

Soooo يقول...

Noha


الحقيقه يا نهى اللي قصدته من الحدوته دي كلها غير ماكل الناس شافت
واللي هو ان دايما المراهقين بيبقو فاكرن نفسهم ناصحين وعارفين كل حاجه لكن الحقيقه انهم لسه مافهموش الحياه


وسلامووووووز

mohamed يقول...

بجد بوست اكتر من رائع ومع انى مش بحب المقالات الكبيرة قوى لكن انا قريت كل اللى بين السطور وبجد اسلوبك رائع
واتمنى انك تتحفنا بالمزيد

Soooo يقول...

mohamed


منورني ياباشا
وباعتذر ليك عن تأخري في الرد على تعليقك لكن لظروف خارجه عن ارادتي والله

وارجو انك تعتبر مدونتي هي مدونتك تمام وتشرفني بزياراتك وتعليقاتك كل ماتقدر
مره تانيه باعتذر

والسلاموووووز ختاموووووز