السبت، ٢٤ رمضان ١٤٢٨ هـ

قد قامت الصلاة

قد قامت الصلاة قد قامت الصلاة
الله اكبر الله اكبر
لا اله الا الله

إستووا.. إعتدلوا.. إستقيموا يرحمكم الله
الله أكبر
الله اكبر .. بص يا سوووو .. انت لازم تركز الجمعة دي .. دي احتمال تكون الجمعه الاخيره في رمضان .. وكمام ماهو مش كل صلاة جمعة ماتركزش وتسرح وبتاع .. النهارده لازم تركز وانت بتصلي .. اتفقنا يابرنس .. اتفقنا .. هو الواد اللي قدامي جاب التي شيرت بتاعه منين .. ده شكله ستايل قوي .. وعلى فكره بقى مش لايق عليه .. ده عايز واحد كتافه عريضه زي كتافي .. يووووه .. ركز يا اخي وخليك في الصلاة .. تي شيرتات ايه وكتاف ايه بس .. ركز ياعم .. خلاص خلاص اديني هركز اهه .. بسم الله الرحمن الرحيم
الله أكبر
الله اكبر.. معلش مالحقتش تقرى الفاتحه .. ركز بقى في الركوع .. حاكم الركوع هو اساس أي ركعه .. يعني اعتبر نفسك مالحقتش التكبيرة الأولانيه وجيت يادوبك عالركوع .. صح برضه .. سبحان ربي الـ ...
سمع الله لمن حمده
ربنا ولك الحمد
.. يا اخي حرام عليك بجد .. ركز بقى وسيبك من أي حوارات .. حاضر ياعم ماتزقش
الله اكبر
الله اكبر.. الحصير بتاع المسجد ده قدم قوي .. بقى بيشوك وش الواحد .. هو ليه الناس بدل ماهي عماله تعمل موائد رحمن .. مايجيبوش حصير جديد .. واهو كللو لله .. يا اخي ركز حرام عليك
الله اكبر
الله اكبر.. الشمس حاميه قوي .. طب كانو يكبرو المظلة شويه .. ولا هو يعني الفلوس عجزت معاهم الكام متر دول .. سوووو .. وكتاب الله لو ماركزت في الصلاه هتندم .. خلاص والله اهه .. هركز اهه خلاص
الله اكبر
الله اكبر .. على فكره .. انت المفروض تنزل بدري للصلاه بدل مانت بتنزل عالاقامه .. عشان ابسط حاجه انك تلحلقلك مكان جوه في المسجد في التكييف والموكيت المعتبر .. ياعم انا في عرضك ركز .. انت بتصلي مش بتكتب مذكراتك
الله اكبر
الله اكبر .. لا بجد بجد التي شيرت بتاع الواد اللي قدامي ده لو عليه هيبقى حكايه .. هبقى شاب موز على رأي البت موني .. الا هي فين صحيح مختفيه ومش بتسأل خالص .. تخلص الصلاه ان شاء الله وهبقى اتصل بيها واقولها اننا لازم نتقابل في رمضان ونفطر في يوم مع بعض .. بس ايه الاماكن الحلوة اللي الواحد ممكن يفطر فيها دلوقتي .. سوووو .. ركز يابني في الصلاه .. الفطار والكلام ده خليه بعدين .. وبعدين هو انت ضامن تعيش خمس دقايق اصلا
الله اكبر
الله اكبر .. ايه الصوابع الغريبه دي .. الراجل اللي على يميني صوابعه مسخره .. تقريبا اخر مره قص ضوافره كانت ساعة هوجة عرابي .. بلا عرابي بلا بتاع .. ركز في الصلاه واخشع في الركوع يا سوووو
سمع الله لمن حمده
ربنا ولك الحمد
.. يارب .. خليني اركز في الصلاه بقى عشان تعبت
الله اكبر
الله اكبر
.. ايوه كده .. ادعي ربنا وركز وصلي بقلب خاشع عشان ربنا يوفقك .. ويوفق الاهلي في ماتش بعد بكره .. حاكم لو الاهلي ان شاء الله كسب .. يبقى فل قوي
الله اكبر
الله اكبر
.. ويبقى الاهلي كده فاضللو ماتش النهائي .. وان شاء الله يكسبه .. ويروح اليابان ياريس .. لاااا .. انا بجد تعبت معاك .. سوووو انت متخيل انك بتصلي ؟؟
الله اكبر
الله اكبر
.. ايوه والله عارف اني باصلي .. طب تحب اقوللك احنا في الركعه الكام دلوقتي .. لا ياعم ماتقولليش .. ركز انت بس
الله اكبر
الله اكبر
.. ياترى العيال صحابي هيعملو ايه في العيد .. انا عارف انهم هيقولو نروح الساحل الشمالي .. بس انا بصراحه عايز اروح شرم .. ده الحياه هناك فل مووووز .. وبالمره الواحد يظبطلو واحده طليانيه كده ولا يونانيه ويعيش معاها قصة الحب .. ولو كده يبقى تاخده من الجو الكئيب اللي احنا عايشين فيه .. ونعيش بقى العيشه على اصولها
السلام عليكم ورحمة الله .. السلام عليكم ورحمة الله
ايه ده .. هي الصلاه خلصت .. !!!
السلام عليكم ورحمة الله .. السلام عليكم ورحمة الله
-
امال انا مش فاهم .. الناس بتقول الصلاه تقيله على قلبهم ليه ؟؟
ده احنا في ايام مفترجه ومباركه ..
لو ماعرفناش ربنا دلوقتي ..
هنعرفه امتى
استغفر الله العظيم يارب
!!!!!!
-
-
سوووو .. انت بتتكلم بجد ولا بتهفلط ..؟؟
هي دي صلاه بجد ولا صلاة النبي احسن ؟؟
.. اللهم انك سلطت علينا عدوا يرانا هو وقبيله من حيث لا نراه
اللهم آيسه منّا كما آيسته من رحمتك
سوووو

هناك ٢٣ تعليقًا:

غير معرف يقول...

بجد هو دة الي بيحصلنا كلنا واحنا بنصلي مع اختلاف الاهتمامات بتاعت كل واحد فينا وانا عن نفسي اوقات بسرح وافتكر حاجة تضحك واضحك وبقول دي صلاتي متنفعش خالص كدة وبضايق من نفسي اوي اوي بس يارب نبطل السرحان دة وندي كل حاجة حقها الدنيا بتاخد حقها مننا كامل لية الدقايق بتاعت حق ربنا بنضيعها يارب يهدينا كلنا
اللهم انك عفو غفور تحب العفو فاعفو عنا

غير معرف يقول...

أسلوب متميز وموضوع قيم .. وأكثر من رائع وده شيء مفروغ منه

أنهيته بسؤال في الصميم يا سوووووو ... هي دي صلاه بجد؟؟؟


فعلا هل كل واحد منا سأل نفسه هو صلى كما ينبغي و لالأ؟؟
ساعات بتصلي بسررررررررعه وكأن في حاجة مهمة ولا تقبل التأجيل مستنياك؟؟

مع ان كله يتأجل الا دي ؟؟ وبعدين معقوووووووولة هو في حاجة اهم من صلاتك؟؟ وربنا اللي بيسمع كل كلمة وكل حرف

من الفاتحه لأخر ركعه

ياسلاااااااام.. وحسنة ورا حسنة .. وثواب وراه ثواب اللــــــــــــــــه


وهنياااااااااالك يا للي بتركز في صلاتك وبتحاول على قد ما تقدر تأديها زي ماعلمهالك حبيب الله صلوات الله وسلامه عليه


بجد ياسوووووووو بارك الله فيك على الموضوع ده الله ينور عليك


شــــــــــهد

Soooo يقول...

مشمش
المشكله مش في السرحان في الصلاه .. المشكله اننا بنعتقد اننا صلينا صح وبنقلل من الناس اللي مابتصليش وبنبقى فاكرين اننا احسن منهم
يعني ليه دايما الواحد بيبقى طمعان انه يجيب مثلا عربيه احسن من العربيه اللي معاه
موبيل احسن من اللي معاه
شقه احسن من الشقه اللي هو فيها
لكن لما نيجي لعلاقتنا بربنا .. بنقول لاااااااااا .. ده احنا حلوين قوي قوي وعارفين ربنا قوي
وياخدنا الكبر وننسى ان الطمع مطبول في حاجه واحده بس .. في الاخره

Soooo يقول...

شهد

الله ينور عليكي .. احنا الدنيا بقت واخدانا بطريقه غريبه قوي
بقينا مابنعملش حساب الاخره وفاكرين ان ربنا غفور رحيم .. ونسينا انه شديد العقاب
نسينا المتعه الانهائيه وجرينا ورا متعه مزوره .. قشره .. وما الحياة الدنيا الا متاع الغرور

ربنا يسترها علينا يارب

Jivara يقول...

تقبل الله منا ومنكم وحرمًا ان شاء الله

اللهم أعنا على شكرك وذكرك وحسن عبادتك

Ehab يقول...

ايوه صحيح يا سووو الواحد طول الصلاه يهيس في ميت قصه وفكره وحكايه تيجي على باله ويقعد يخطط لمستقبله تقولش هيبقى رئيس جمهوريه ويا سلام لو في دماغه حسبه عايز يحسبها المرتب الديون المصاريف الجمعيه وعايز كارت للتليفون قال يعني ارشميدس بيحسب وتلاقي نفسك مش فاكر حتى انت في الركعه الكام وهوب تلاقي الراجل بيسلم وانت مش عارف انت قلت ولا مقولتش سبحت ولا لأ ربنا يهدينا المصيبه ان الشيطان بيلهينا طول السنه وفي رمضان نفسنا هي اللي بتقوم بالواجب
تسلم ايدك
سلاااااااااااااااااااااام
شكرا على كل التعليقات بتاعتك عندي

Soooo يقول...

Jivara
تقبل الله منا ومنك ان شاء الله
وعايزك بقى يا ابو هيما تتشقلط كده في المدونه كلها تملاهالي تعليقات
ولا انت زي مابيقولو عليك كده .. ممثل كوبايه
؟؟؟؟

Soooo يقول...

الشنكوتي الكبير

اهلا بيك في مدونتك ياريس
مشكلتنا في الصلاه اننا بنبقى مش مستحضرين عظمة ربنا متجليه قدامنا
يعني تخيل نفسك مثلا في وجود اكتر شخص انت بتخاف مننو وبتعمللو حساب في الدنيا .. شوف نفسك هتتكلم معاه ازاي
ما بالك بقى وانت في حضرة خالق الكون كللو
-
ملحوظه:
ردودي على مواضيعك وتعليفاتي عليها .. دي اقل حاجه اقدر اقولها لشخص اعتز بصداقتي زيك يا باشا

غير معرف يقول...

soooooo enta 3asola bgd
rbna y7mek we ykrmk
kda t2ol 3la r2y bt mony
we moka 7bebk la
ana kda az3l mnk
allah ysam7k
lazm mara gay tktb 3n moka
ok
bye

غير معرف يقول...

lel asf el shded da ely elnas btfkr feh we ana w7da mn elnas we 7sl m3ya nfs elmwkef t2rebn eny abos 3la tr7a aw blza bta3et bent we en el7sera mt3gbnesh..bnensa en e7na w2fen odam ely a7sn mn elkol rbna..

Hannoda يقول...

اللي بتتكلم عنه ده مشكلة كبيرة جدا يا سووو

و تقريبا كلنا بنعاني منها طبعا بدرجات متفاوتة

ساعات بفسرها لنفسي ان أكتر وقت بسرح فيه بالأسلوب ده لما تعدي فترة أكون فيها كل علاقتي بربنا هي الصلاة وبس
فاتتحول الصلاه لحركات عضلية فقط و يكون عقلي فيها في فترة راحة.. فراغ أو انتظار يقدر شغل نفسه بيه بأكتر من حاجة.. لإن مش بكون في حالة من التواصل مع ربنا بالدعاء و الذكر و القرآن

ده غير ان ساعات كتير بيكون الرحان هروب من الصلاه نفسها لما بتكون تقيلة ع الواحد

و بتكون كده لما تكون في حياتك بتعمل حاجة عارف كويس ان ربنا مش راضي عنها

ووقوفك قدامه بتركيز حايخليك يا اما حاتسيب الصلاه أو تسيب الحاجة ده و انت مش قادر ع الاتنين

موضوع متشعب جدا يا سوو
وحلو جدا انك تسمك خيوطه و تطرحه

تحياتي

Soooo يقول...

غير معرف أو موكا

الف شكر على تعليقك اللذيذ وعلى زيارتك
ومش عايز اوعدك اني المره الجايه هسرح فيكي عشان مابقاش بازود الحكايه بليله
بس اوعدك ان شاء الله .. اني ولا هاسرح فيكي ولا في موني
ماهو انتو كده يابنات حوا .. تخلونا نسرح فيكم ونفكر فيكم وبتاع .. واحنا ولا على بالكم اصلا

والسلام ختاااااام

Soooo يقول...

غير معرف

الف شكر على تعليقك الجميل
بس هو واضح انك بنت .. وبتسرحي في حاجات وكده ..
بس هل ياترى ياهل ترى .. بتسرحي في ولاد معينه زي ماحنا ساعات بنسرح فيكم يابنات حوا ؟؟؟

اه منكم انتو ااااه


والسلامووووووز

Soooo يقول...

Hannoda

متشكر على تعليقك واللي بيفتح دايرة حوار صدقيني هتكون مفيده لينا كلنا لو فعلا تفاعلنا واتكلمنا عنها من كل وجهة نظر

بصي ياهنوده .. في اعتقادي الشخصي ان اهم حاجه تقرب الواحد من ربنا هي تخيل ربنا قدامنا في كل لحظه .. وانا باكل وانا باشرب وانا نايم وانا باعمل كل حاجه
لو تخيلنا الموقف ده .. غير اننا هنبقى في قمة الرعب والخوف .. بس هنبقى في قمة السعادة لما ربنا يحاسبنا لاننا اكيد اكيد اكيد .. مش هنعمل حاجه تغضبه ان شاء الله

سعيد مره تانيه لوجودك .. وهكون اسعد اكتر لو فضلتي تعتبري مدونتي هي مدونتك


وسلاموووووز

غير معرف يقول...

umm,msh 3arfa abtdy be eh fehom
tayb nbtdy bel 7aga el kewisa zay ma 2olt abl kda eslob sa5r lazez
< my fav > malosh hadf :P < my fav bardo >
enama eh ba2a el 7aga el we7sha
homa 7agten besara7a :P
awlan never ever ta5od el deen ka eslob sa5er fel ketaba
ya3ni enta mabtrkzsh fel salah mashy ed3y rabna bas ma ttary2sh we ta5od el mawdo3 7aga tktbha
ana 3arfa kalamy ghetet
bas ana begad eday2t lama 2areto we makmltsh erayto ll2a5r raghm en el eslob 7elw zay ma 2olt abl kda marteen
el 7aga el tania ba2a ya sayd sooo
el shetema de msh 7aga ttda7ak 2abdan :D we law fee nas bett7ak 3aliha yb2a el 3eeb fehom ba2a :P
fe 7aga ba2a kaman ma3lsh abl ma teshel el comment 2eraha :P
msh 3arfa leeh 3andi e7sas keda enak mabsoot bel kont bet3mlo zaman < ma3rfsh eza kan kont wala lsa :P >
ya3ni enta rabna satrha 3alik zaman wenta betfda7 nafsak fe kol 7eta we te2ol kont ba3ml we ba3ml ....etc
kan fe shekh be2ool eh esma3 ya seedy
< en lama 7ad by3ml zanb we rabna satrha 3alih we ma7dsh 3erf
el zanb da msh 7aga 7elwa ya3ni danta el shetaan de7k 3alik
wa7ed de7k 3alik!
wa7ed edak 3ala 2afak < el shekh el be2ol lol > tefdal enta te2ool ana 5at 3ala 2afya
dana kont ba5ood 3ala 2afya el sob7 we blel wala teskot 5als we mat2olsh >
i know en kalamy te2el we ghetet bas eshta ya3ni est7mlo
t2dar delwa2ty teshel el comment 2olt el fe nfsi 5alas :P

el re5ma: Rehab ahmed

Soooo يقول...

كل سنه وانتي طيبه يارحاب احمد
انا مش هشيل الكومنت بتاعك بالعكس .. لو قدرت اخليه يبقى هو الاساس كنت خليته
بس في نقطيتين قبل ما اشرح واتكلم باستفاضه احب اوضحهملك
اول نقطه .. ياريت الله يكرمك تبقي تحطي الكومنت بتاعك في المكان الصحيح بتاعه .. يعني انتي معلقه في موضوع قد قامت الصلاه على موضوع قد قامت الصلاه وعلى موضوع كدب الابل
تاني نقطه .. الغرض الاساسي من اني اعمل البلوج او المدونه دي هي التواصل مع الاخر بكل اهتمامته واقتراحاته ومعتقداته وتوضيح وجهة نظري ليه زي مانتي وضحتي وجهة نظرك

نبدا بقى في الكلام الكبير
بالنسبه لموضوع قد قامت الصلاه واني باسرح ومش بركز في الصلاه وفي علاقتي بربنا ..
في نوعين يا اخت رحاب من الخطاب الديني .. خطاب صريح بيقول حرام وحلال .. وخطاب غير صريح ..
الناس - سوري يعني - زهقت من الخطاب الصريح لأنهم عارفين الحلال من الحرام
والدليل على كده انك لو خدتي بالك هتلاقي ان نسبة مشاهدين قنوات زي الفجر والمجد قليله جدا بالمقارنه بنسبة قنوات ميلودي والقنوات اللي بتقدم الهسس الاعلامي واللي مش هادف
في حين ان الناس اللي بتتفرج على القنوات الهسس دي هي اولى بمخاطبتهم دينيا .. لكن لاننا بنخاف من التجديد في كل حاجه متعلقه بالدين بقينا بنخاف ونقول لا ياعم انا كده هتهاجم والناس هتزعل
اللي انا عملته في البوست ده اني اتكلمت بصراحه عن اللي بيجي في دماغ كل واحد فينا ومن غير ما اذوق الكلام .. وسبت اللي يقرا بعد ما يخلص قراية يشوف .. هو اللي انا بعمله من اني اسرح ده صح ولا غلط؟؟؟؟؟؟

نخش في تاني نقطه واللي هي باتكلم فيها بقباحه وبابقى عايز اشتم وبتاع .. لا مؤاخذه بقى .. الشتيمه موجوده جوانا قبل ماتبقى على لساننا قبل ماتطلع بره بقنا .. مش جديده علينا يعني .. تفسير الشتيمه والتوغل في معناها وفي مسماها والاستمرار على الشتيمه هو اللي غلط
الشتيمه دي تنفيس عن شحنة غضب
في اوروبا والدول المتقدمه على رأي الراجل السوداني .. بيبقى في مراكز توجيهيه وتأهيليه للناس اللي مش بتعرف تشتم او بتتكسف انها تشتم بتروح هناك عشان تشتم وتخرج شحنة الغضب اللي جواها
انا معاكي ان المسلم ليس بلعان ولا بذيء .. لكن في فرق بين اني انفس عن غضبي بطريقة اني اقول يارب واقعد ساكت ماعملش حاجه .. واني اشتم واستمر في حياتي واحاول اني اصلح من نفسي
بالنسبه للجزئيه اللي بتقولي فيها اني باتباهى بالمعصيه .. في اخت لينا هنا في عالم البلوجرز والمدونين اسمها هنوده اتكلمت عن النقطه دي .. وانا وضحتلها الهدف .. وهوضحهولك تاني
انا ياسيدتي الفاضله مش باتباهى بالمرحلة دي بسلبياتها .. بدليل ان لو حصللك موقف وهتفتكري حاجه من حياتك هتفتكري سلبي وايجابي .. طلعيلي حاجه واحده ايجابيه من الفلاشات باك اللي اتكلمت عنها .. مافيش
زيرو
نون
لسبب بسيط جدا .. اني ساعتها كنت زي اي شاب .. او معظم الشباب مش هنقول كلهم .. زي اي شاب بيتم تخديره عن انه يفهم حاجات كتير
لما كبرنا ابتدينا نفهمها وابتدينا نربط الاحداث ببعض
ابتدينا نفهم ان مباحث المخدرات بتسمح بكمية مخدرات معينه للتداول عشان تقدر تسيطر على الشباب وتهبطهم بدل ما يعملو حاجه مفيده
فهمنا الحكاية بمافيها من سلبيات .. وانا كنت باتكلم عن السلبيات دي

رحاب انا مش شايفك رخمه .. انا شايفك مش قادره تقري اللي مابين السطور في كلامي
لو قريتي اللي مابين السطور هتعرفي مين هو سوووو
لو فهمتي اللي مابين السطور في مواضيعي هتلاقي اني مش هايف ولا بقول كلام مش هادف وهتفهمي ايه هو فكري ووجهة نظري


ممكن تختلفي معايا في الرأي .. ولكنني على استعداد ان اموت لكي توضحي وجهة نظرك

سعيد بتشريفك ..
وماينفعش اني اشيل الكومنت بتاعك

سلام

سلوى يقول...

من كام يوم سألت ابن أخي
إنت مش بتصلي ليه؟
قالي أصلي أول مادخل في الصلاة
أبتدي أفكر
وهجيب بنطلون العيد شكله إيه
وحاجات من دي
قلت له كلنا بنسرح
قالي أنا سألت شيخ
وقالي إن مش نافع لي صلاة
قلت لأ
أنت صلي
وأقفش نفسك أول لما تيجي تسرح
وركز في الصلاة
كده هتأخذ أجرين

والحقيقه
أن كلنا بنسرح
بس الشطارة أن الواحد يجاهد نفسه ويقول لأ أنا هركز في الصلاة
وربنا كريم
بس حاول تفتكر أنك واقف أمام ربنا
ربنا يغفر لنا جميعا

Soooo يقول...

Salwa

شفتي بقى ياستي
الشيخ قاللو
اثبتي دي عندك في محضر الجلسه
الشيخ قاللو
هي دي مشكلة الخطاب الديني عندنا .. بقينا بنتسحب تدريجيا للتشدد في الخطاب الديني
معتقدين انه ماينفعش يبقى غير كده والا بلاش احسن
وهو ده الزخنوق اللي بيخشلنا منه الشيطان

ده اللي اقصده من التوبك اصلا
وقلت دعاء في اخر التوبك .. الدعاء ده بيقال والله اعلم ان الشيطان بيخاف قوي من اللي بيقولو ويكاد يكون بيتقطع من جواه .. لكن للأسف معظنم الناس اللي جات واتكلمت قالت اني غلط وانه ماينفعش اتريق في الدين

نفس منطق الشيخ
ماينفعش تصلي
ماينفعش نضحك
ماينفعش وماينفعش وماينفعش
لغاية ما بصراحه قفلت اني اتكلم في اي حاجه خااااااااالص

كل سنه وانتي طيبه
وسلام

أجزاخانجيه يقول...

ana shakly haz3al nas ktera mny
salwa bet2ol le a5oha saly we keda hata5od agreen lol
walahy da7kteny eza kan howa aslan salato msh ma2bola yb2a haya5od agreen ezay hehe
zay bel-zabt lama wa7ed maby3rfsh y2ra kor2an bas howa mot3alm msh gahel we by3raf y2ra engeleze we faransawy ehh mos! badal ma t2olo ro7 et3lm ezay te2ra kor2an te2olo la2 3ok we hata5od agreen
maho e7na ben7arf el a7ades 3ala mazagna
meen el damn en salato ma2bola
walahy wala fard mn el basleeh bakon damnah 7ata law msliah fel gam3
enama e7na el deen 3andna ashal 7aga
fel donia e7na bytla3 3enena we na5od coursat be 2alafat we nt3ab we nnzl kol yom we computer we engleze we faransawy we italy we nero7 we nt3lm we momkn nero7 a5r el donia 3alshan el makan da andaf we shehadto madmona
bas lama tt3al2 el mas2la bel deen!
ya 3am da rabna ghafor ra7eem
ya 3am 2e3ml bas enta ay7aga we hata5od agreen talata
ya 3am fokaha enta motashdd leeh
shof el shekh be2ool eh we by3ml eh
ya3ni ana msh 3arfa ento moktan3een bel bet2oloh dah!
ya3ni el wa7ed mekasl ynzl ysaly rak3teen le rabna fel gam3 bas ma3ndosh man3 ynzl mn beeto we yrkab el 3arbia aw mewslat we yro7 a5r el donia 3alashan yro7 cinema we yfdal wa2f fel taboor nos sa3a 3alashan y2ta3 tazkra we y5osh ytfarg 3al film we tede3 3alih salat el maghrb wel 3esha te2dn we howa bytfarg 3al film we y2ool ma3lsh 2ab2a aslehom fel beet ha3ml eh mana kont batfarg 3al film
we metamn awy we ma3ndosh ay mashakl mn el kalam el be2olo da!
Allah akbar!
wenta bettfarg 3ala meen by7b meen we meen bytgwz meen we meen mat we men 3ash
Allah akbar
wenta naym msh 3awz ts7a!
ALLah akbar
wenta betrghy fel phone!
Allah akbar
wenta betakol!
Allah akbar
wenta te2ool la2 el shoghl akbar!
Allah akbar
te2ool la2 el tv akbar
la2 we el anyl en el wa7ed metamn awy
we 7atet fe batno bate5a seefi we kol el by3mlo eno be mas-mas shafyfo we y2ool el wa7ed msh medi el salah 7a2ha bas keda!

2al haya5od agreen lol
maho absat 7aga y3mlha ygeeb shreet aw y2ra ketab 3an el salah
hayfham eh hia arkan el salah we yfham 7agat kteer hat5leeh howa le wa7do tarkezo yzed maho kter el wa7ed bynsa howa sala arba3 rak3at wala talata wala 7ata etnen!
bas msh ma3na keda eno hay2ool eno haybtal sala 3alashan keda keda hia msh ma2bola
ya3ni maslan fe rokn fel salah mohm gedan law ma3mlnhosh yb2a ttamn keda en salatak batla we da akeed mo3zmna by2oa3 feeh
eh howa ba2a el etm2nan fel salah
ya3ni manslesh besor3a lama terka3 we te2om testana shewia lama tesgod testana wa hakaza msh ttdarb el salah fe de2e2a we te2ool el 7amdollah ana basly 3awzen eh tany
i know en de 7aga mabtgesh mn awl mara msh ha2ool ana bokra harkz we habat2 salaty ha3ml keda de 7agat betegy beltadreb
we hat2olo ba2a ento keda hat5lo el nas matslesh
ya3ni lama el she5 y2olo la2 salatak msh ma2bola y2ool 5alas ba2a ana msh mesaly
howa besaly le meen!
meen el hatnf3o el salah deh!
da mogard tark fard
fard wa7ed
de kabera
we malhom el shio5 el bttry2o 3alihom a7san mnna million mara
ya reet nb2a nosohom 7ata
we msh 3awza atklm fe mawde3 denia aktar mn keda 3alashan ana msh 2ahl le keda
we ya reet nefo2 ba2a we nebatal teb2a ashal 7aga 3andna hia el deen
we awl 7aga to2a3 mnna hia el deen we a5r 7aga nfakr feha hia el deen
ya rab salm
we matz3lesh ya salwa we matz3lsh ya sooo
N.B: ana 3arfa eny sa2ela awy we ana wala she5a wala beta3 < ya reet >
bas mab3rfsh askot lama a2ra aw asma3 7aga mabt3gbnesh fel deen
etklmo fe ay 7aga tania mashy msh hafta7 bo2y :P


Re-hab

Soooo يقول...

Bacteria

مش انتي ولا عشره زيك اللي هيقولولي اتكلم عن ايه وماتكلمش عن ايه في البلوج بتاعي

ولو مش عاجبك كلامي بالسلامه في مليون مدون تقدري تتكلمي معاهم براحتك

فيروز الشطآن يقول...

احيييييييييك.......

توبيك رائع....وسخريته ذكيه....جدا

Soooo يقول...

فيروز الشطآن

مره تانيه باشكرك على تعليقك وباطلب منك المعذره على تأخري في الرد

وياريت اشوفك دايما هنا وياريت اقرى تعليقاتك على كل المواضيع

باعتذر مره تانيه عن التأخير في الرد


والسلاموووووز ختاموووووز

ست البيت يقول...

لأ وشيخ كمان؟ لاااااااااااا دي هاصت
بص انا حقولك على دعاء انا لسه بسمع سورة المؤمنون وانا بكتب
(قل اعوذ بك ربي من همزات الشياطين وأعوذ بك ربي أن يحضرون )
وبعدين دا حال ناس كتيرة ادعولي وانا استطيف لكم شيخ على المدونة يكلمنا على الصلاة بجد ولسه شاب معندووووووش كرش
عشان يكون اقريب لينا
ربنا يتم نعمة عليك
بس ايك اياك يا سوووو والسرحان كفاية منوسي اللي من كتر النسيان بقى the lost manosy
دمتم بحفظ الرحمن