الأربعاء، ٢١ رمضان ١٤٢٨ هـ

اديها سياسه .. موضه

لازم اتكلم في السياسه واشتم واتنرفز وابقى مش عارف ايه عشان البلوج او المدونه تاخد حقها والناس تقراها
!!!!
منطق غريب قوي ؟؟
وبعدين اصلا اصلا يعني ايه سياسه ؟؟
يعني اشتم الحكومه ؟؟
مش عارف بصراحه .. بس اللي اعرفه اني عايز اتكلم براحتي .. اشتم ماشتمش .. اعمل اللي في مزاجي وماحدش ليه عندي حاجه من الاخر
بس يبقى وجدتها .. انا هقول اللي انا عايز اقولو وبراحتي .. سياسه .. فن .. أدب .. انشالله حتى قلة أدب .. بس هقول اللي في مزاجي وبطريقتي
بمناسبة المزاج والقريفه .. انا سجايري خلصت .. هنزل اجيبلي علبة كوكو الضعيف بوكس .. وبالمره اجبلي كارت شحن ام نبيل عشان عايز اتصل بكام واحد .. بس المشكله ان كروت ام نبيل حتى بعد الاعلان الهابط اللي عملوه على رأي القرد بتاعهم .. لسه برضه بتتباع بسعر اكتر من سعرها .. ولما باسأل اي حد ليه يعني هم مش رخصوها .. يقوللي
معلش يابيه مانا بجبهم بسعر غالي
!!!!
يعني ايه انت بتجبهم بسعر غالي ؟؟
يعني ايه رخصوها وهي لسه غاليه ؟؟
يعني هي السرقه والاستغلال بقت عيني عينك كده ؟؟
يعني احنا فعلا بقينا شعب بينضحك عليه بمعنى الكلمه ؟؟
شكلها كده مش هتعرف تفلفص يا سوووو
.. لازم تديها سياسه
.. ولازم تشتم
----
نداء الى شركة ام نبيل
سوووو امتنع عن شراء كروت الشحن بتاعتكم
وبعد ماتشوفولكم حل .. ابقو اعملو اعلان كويس
.. مش الاعلان الهابط بتاعكم
سوووو

هناك ٩ تعليقات:

غير معرف يقول...

هو فعلا لازم نقل ادبنا ونشتم ويقولو علينا جيل قليل الادب بيشتم بس بصراحة هما الي يستاهلو الشتيمة بقة السرقة فعلا في كل حاجة عيني عينك ومحدش بيتكلم ارجع واقول العيب علينا كشعب سلبي بيدي فرصة لحد انة يضحك علية مفيش بلد دلوقتي مفيهاش ناس بتعمل اضراب الا احنا كل حاجة تغلي واحنا نشتري يقولو حاجة ويعملو عكسها واحنا ننفذ بجد احنا شعب متخلف وبمناسبة الاضراب انا غيرت ام نبيل دي وجبت اتصالات بس اية الفايدة مدام محدش بيتحرك معايا
طول عمرنا هنفضل كدة شعب سلبي ومتخلف وحتي لو شتمنا مش هتفرق احنا اتعودنا نشتم في السر ومنعملش حاجة ليها قيمة غير الشتيمة والحكومة اتعودت تتشتم ومتفرقش معاها المهم كلامها بيمشي يعني مصر كلها مبقاش عندها دم
سوري لطولة اللسان بس كويس اني مقولتش اكتر من كدة

غير معرف يقول...

سووووووو يا سوووووووووو

الشتيمة والكلام فى السياسةوبالذاااات عل النت ليهم علاقة جامدة ببعض جدااااا

زى الفسيخ فى شم النسيم كدا

-على رأى شريف منير فى الاعلان بتاع جهينة الرايب يا مربرب-

وزى البيض الملون فى شم النسيم كمان

بس البيض ده كان زمان ايام لما كنا عيال

وشكلنا لسة بنلون على البيض لحد دلوقت


وبعدين انت لسة مع الولية ام نبيل دى

سيبها

وانطلق

على رأى اتصالاااااااااات اللى هاتظبط الشعب كله

كارت العشرة بعشرة وخمس دقايق كل اول شهر تعمل فيه دقيقة وغير العروض اللى مش بتخلص غير النت اللى فيه مجانى

يعنى نصيحة من اخوك انا مش بعمل اعلان ولا حاجة لاتصالات

انا نفسى الشبكات كلها ترخص الاسعار


وانا مع الارخص


دا شعارى الجديد

سلام يا سوووووووو

واديها سياسية تديك على ....

و ال.....

متروك للخيال



هع

Soooo يقول...

لأ معلش اسمحلي يا مشمش يا صاحبي .. في ناس بتتحرك اهه .. بس طبعا دي مجرد بدايات
وبالنسبه للإضرابات وكده فده حصل من عمال الغزل والنسيج وفعلا تعهد المسئولين بتنفيذ طلباتهم .. سيبك بقى من انهم هينفذوها ولا لأ .. بس فعلا فعلا الحكومه بقت بتبص لينا بنظره تانيه
صحيح لسه فينا سلبيات طبعا .. بس خطوه خطوه صدقني يا مشمش هنعمل حاجه .. وكفاية ان الجيل اللي مابين 22 سنه و35 سنه ده هو اللي بجد شايف ان في سلبيات في المجتمع .. وربنا يستر بقى ونقدر كلنا نعمل حاجه تصلح من حال البلد وحالنا احنا كمان ان شاء الله .. بس على الله مايكونش تخيلي وتفاؤلي ده في المشمش .. ياسي مشمش

Soooo يقول...

والله انا مش عارف يا اخ غير معرف .. مش عارف ليه لسه شركة ام نبيل دي متخلفه كده .. يعني ساويرس قال انا مش هعمل ثري جي بس هخلي الشعب كللو يجيب خطوط ام نبيل .. بس المشكله الفعليه اننا احنا اللي بنسرق بعض .. يعني الراجل صاحب الكشك لما انا قلتله انا مش هشتري كروت من عندك والمفروض انت كمان ماتاخدش كروت من حد بيبيعهالك غاليه عشان الناس مش هتشتريه .. قاللي بمنتهى البساطه .. خليها .. مسيرها تشح في السوق وتغلى
يعني ده بقى الشعار دلوقتي .. كنف الحاجه لغاية ما السوق يطلبها
والله هي شكلها فعلا طالبه انطلاق مع اتصالات .. مش عشان ارخص ولا بتاع .. بس عشان انا بجد زهقت من شغل الفرانكو اراب اللي في اسماء الشركات بتاعة المحمول .. نفسي يبقى في اسم عربي كده الواحد يتفشخر بيه ويقول اه .. انا عربي .. وعربي انا .. اخشيني ..

Ehab يقول...

متظلمش ام نبيل يا سووو
ام نبيل بريئه وانا هاقولك مين الندل اللي عمل الجريمه بس لازم توعدني يا ابني انك متضيعش نفسك
وان الكلام اللي هاقوله دلوقتي هيفضل سر بينا لحد ما اموت او احداث الفيلم تجبرك انك تتكلم ايهم يعني المهم يا سيدي اخوك اللي هو انا برده سأل العيال صحابي اللي بيتاجروا في الكروت حلفولي انهم بتجيلهم بسعر غالي فعلا طبعا هم اكيد نصابين الفكره ان الشركه حضرتك في كل فروعها فعلا بتبيع الكارت بسره بالظبط يعني انا بشتريه من فرعهم اللي في كارفور جنبي العشره بعشره والخمسين بخمسين لكن لما تروح اي سنترال يحلفلك انهم كدابين انا طبعا فهمت اللعبه ام نبيل الواطيه مقدرتش تشيل الليله كلها وتتحمل التخفيض لوحدها قامت بتبيع الكروت للمحلات بأقل من السعر الرسمي لكن نسبة الرب اللي كانت بتطلع للبياع بقت اقل بكتير فالعيال مش عارفه تعمل ايه بيضطروا يبيعوه بأكتر من الأعلان الأهبل اللي اصلا انا مشفتهوش انا بشوف اليافطه في الشاررع
اذن الحل انك تشتري من الفروع بتاعة موبينيل والعيال هتزهق وهتتبيع بالسعر الجديد
واكيد هيلاقوا تصريفه مع الشركه تخفضلهم شويه
هي شركه نصابه باين والععيال طماعين والبلد خالها زفت
ايه رأيك اديني اتكلمت في السياسه علشان الكومنت بتاعي يتشهر
سلااااااااااااااااااااااااااااام

Soooo يقول...

شنكوتي الكبير

-
والله معاك حق .. البلد بقى حالها زفت وكللو عايز ينصب على كللو
اللهم خرجنا من دار البلا بلا بلا

غير معرف يقول...

والله يابنى ماعارفة اقولك ايه
انت معاك حق البلد دى لازم تشتم عشان تتسمع والحكومة اتعودت على كده
اتعودت انها تتشتم تقريبا بقوا يحبوا كده صحتهم بتيجى على الشتيمة
اما بالنسبة لموضوع ام نبيل ده
فانا نفسى اعمل مقاطعه زيك لكن عندى مشكلة انه اتصالات شبكتها ضعيفة عندى مش عارفة ليه بس اكيد هغير عشان انا تعبت
الاعلان المتخلف اللى باعتراف شركة ام نبيل نفسها انه اعلان هابط بيقول انها رخصت كروت الشحن
وفى الحقيقة هى غليت
انا كنت بجيب كارت ابو 10 حضرتك عشان ظروفى على ادى شوية كنت بجيبه ب 12 جنيه حلو؟
دلوقتى بجيبه بعد مارخصت ب 12ونص
من نفس ذات الراجل يبقى انا اعمل ايه
تبقى شركة حرامية ولا لا؟
حرامية طبعا
وقررت اعمل مقاطعه معاك وامرى لله
بس عندى ملحوظة رفيعة:
لما الشركة المتخلفة دى بنفسها بتقول على اعلانها انه هابط طب عاملينه ليه؟
رخامه على الناس مثلا؟
ولا استفزاز؟
ولا هو خلاص الهابط بقى موضة اليومين دول كل حاجة فى بلدنا هابطة
الفيديو كليب والاغانى وافلام
لو موضة يقلولنا بس بس ياريت الصراحة احسن انا تعبت ونفسى فى حد يكون صريح
هو مش كفاية ان الاعلان كدب ونصب والحاجة زى ماهى واغلى ومش رخصت ولا نيلة كمان اعلان مستفز
صبرنا يارب

Soooo يقول...

داليا

رفيقة كفاح كليه واحده .. منوراني والله
ومعلش لو كنت اتأخرت في الرد على تعليقك ده بس والله لظروف خارجه عن ارادتي منها محاولاتي المستميته لتغير شكل المدونه وانتي زي ماعارفه اخوكي بلالا في النت

نيجي بقى لاول نقطه في ردك واللي بتقولي فيها ان شركة اتصالات مش متغطيه كويس
الحقيقه بعد ملاحظات كتير اكتشفت انها شركة بدايتها هايله في المجمل وانا مش بقول كده اعلان ولا حاجه
مشكلتها الوحيده هي انها لسه ماغطتش منطقة المترو ماتحت الارض
لكن كصوت احلى وانقى فعلا من اي شركه تانيه

تاني جزئيه في كلامك عن الاعلان فانتي بصفتك مصممة اعلانات اكيد طبعا محروقه من الهيافه في الخطاب الاعلاني والاعلانات بتاعتنا في مصر .. مقارنه باي منطقه تانيه في العالم

وان شاء الله هعمل موضوع عن الاعلانات في مصر من ايام زمان لغاية دلوقتي .. واكيد طبعا هحتاج مساعدتك فيه باعتبار انك دارسه الكلام ده ودماغك فعلا كويسه

مره تانيه باعتذر عن التأخير في ردي وبقولك ياريت تعتبري مدونتي هي مدونتك تمام

والسلاموووووووز ختاموووووووووز

adel يقول...

هههههههه
تعرف اني بقرا المدونة كلها بس لقيتكك معرف المدونة هنا تعريف شبة بتاعي في اول بوست اكتبه

هاكتب في الادب او ققة الادب
هههههههههههه

توارد خواطر او يمكن توارد قلة ادب
هههههههههه