الثلاثاء، ٢٠ رمضان ١٤٢٨ هـ

هركب الحنتور .. درجن

مش عارف ليه اول حاجه جات في بالي هي الاغنية دي
هركب الحنطور
درجن درجن
واتحنطر
درجن درجن
يمكن عشان حسيت اني بقيت شخص ليه مكان في عالم النت وبقى لي كيان موجود .. بدل ما كان كياني الوحيد ومكاني المحفوظ عالقهوة .. قهوة المهوية .. احنا سميناها المهوية انا وصحابي عشان دي القهوة الوحيده في المعادي .. معادي ايه .. القهوة الوحيده في العالم اللي مابيجيش فيها نسمة هوا .. ولا صيف ولا شتا .. في الشتا بتمطر على طول .. مافيش هوا خالص .. مش عارف ازاي وليه
المهم .. انا دلوقتي ركبت حنتور التكنولوجيا والنت .. وهتحنتر .. بس هتحنتر اقول ايه؟؟
هو انا المفروض اني عجزت وبقيت جدو خلاص وبقى عندي تلاتين سنه .. وفي جوايا حاجات كتير وكلام كتير عايز اقولو .. بس هقول ايه وليه؟؟
شكلها كده يا سوووو الحكاية جايه عليك بوجع دماغ ووجع قلب وتغيير كيبوردات اول بأول .. وانت اصلا اصلا الماوس بتاع الجهاز بايظ هو ومروحة البروسيسر وليلتك طين بصراحه
يلا مش مشكله .. كللو فداءا الحريه والوجود التكونولوجي والعالمي وخريطة النت الكونية
بمناسبة الكون والكواكب .. هو المريخ مثلا عندهم نت زي مابيقولو عندهم اكسجين ؟؟
وهل ياترى النت عندهم برضه بسرعات ونزلو فيه حوار النت المحدود برضه؟؟
وبعدين اساسا اساسا .. مين عايش في المريخ ؟؟؟
واشمعنا المريخ يعني ؟؟
ليه مش عطارد او الزهرة او زحل
.. حقه زحل ده يبقى لو في ناس بجد يبقى كوكب مسخره
يعني لو واحد في زحل عمل حاجه فريده من نوعها يتقال عليه
(أول انسان في زحل عمل كذا وكذا)
(او يتقال (الآن ولأول مره في زحل
شكلي كده باخطرف بجد
.. عموما
.. الحمدلله اني ركبت الحنطور خلاص
وربنا يستر واقدر اكمل مشوار الحنطره
درجن درجن
سوووو

هناك ١٩ تعليقًا:

غير معرف يقول...

bravo ya hamada ya soooooooooooo ya gamd
enta habeby awy we b3zk awy ya sooooooooo ya gamd

Unknown يقول...

gamed mooooooot ya sooo, kan nefsy 2kon 2wel wa7da 2kteb comment, keep it up we tal3 ely gowak kamn we kamn :))

غير معرف يقول...

سووووو ياسووو.. فكرة جميلة وبداية اجمل.. ولا اشك ابدا انها حكتون مدونة رائعه .. مبرووووك ويارب يوفقك لكل ما هو رائع لأنك تستاهل كل الخير

تقبل ارقى تحياتي شهد

غير معرف يقول...

Soooo, Awel 7aga lazem te3rafha an el ahwa 2esmha mahawia 3lashan mkansh 7ad bey3od 3liaha 3'erna:))

Thanyan; fekret el blog gamda gedan, 2ensha2llah tela2y 7aga temelha abl el 40, el mohem 2enak bet7awel:))

Soooo يقول...

جالي تعليق من الاخ المناضل في حياة الصياعه والقهونة - قعدة القهوة يعني- بيقوللي اسم القهوة مهويه بيرمز لانها فاضيه ومافيش حد بيقعد فيها غيرنا .. طب ولا مؤاخذه يعني يا ابو امو .. احنا قعدنا عليها ليه اصلا من الاول وفيه ديشليار سنتليون قهوة تانيه احسن منها ؟؟؟؟

غير معرف يقول...

مدونة جميلة اوي ومسلية اوي بس اكتر حاجة شغلت بالي فيها هي قهوة مهوية دي بيقعد علها بنات ولا لا عشان بفكر ازورها

Jivara يقول...

alf mabrok ya soooo 3ala el 7antor
we 3o2bal ma terkeb el saro5
bas besara7a ana metwa2a3 en el blog dah hayb2a gamed moooooot bas enta testamer 3aleh we mate26a3sh
waitting your updat
Jivara
;)

Soooo يقول...

ميييين .. مشمش صاحبي هنا في بلوجي .. يا مرحبا يا مرحبا ... البلوج منور والله بزيارتك دي
بقى قهوة المهوية دي بيتواجد عليها جميع فئات الشعب الكادح .. من الرجال فقط
بس لو تحب يا مشمش تيجي عالقهوة مافيش مشاكل .. الناس كلها عارفاني وبيعملولي حساب الحمدلله .. ولا تكونيش عايزه تيجي لو في بنات عشان تعاكسيهم ؟؟؟؟؟؟

Ehab يقول...

تشرفنا يا رجل المعادي يا اللي مش عجوز ولا حاجه لكن زي بعضه عجوز عجوز بس رياضي
واهو الواد يتعرف على حد من قاطني المعادي غير الواد السويفي اللي الجواز هيلحس دماغه ربنا يسعده بقى
عجبتني المدونه كلها والموضوعات لدرجة اني كنت هاتجنن هو انا جيت هنا ازاي وبعدين افتكرت انك كنت كاتب كومنت عندي بجد بجد انا سعيد بتعليقك اللي جابني هنا وعرفني عليك اصل في عالم التدوين هتلاقي بنات دماغها حلوه قوي كتيييييييييير انما الرجاله مش عارف جرالهم ايه ما علينا بس فيه برده رجاله جدعان قوي في المدونات يجي عشرميت واحد بس اصل البنات مكتسحين قوي يا اخويا هم سكر طبعا ومحليين الجو بس برده شكلهم كده هيحتلوا المنطقه مرحبا بك معنا في ارض الكفاح المسلح
هو ممكن اركب جنب حضرتك في الحنطور لحسن اخر مره انا ركبته كانت في اسكندريه من حوالي 15 سنه كده
سلااااااااااااااااااااااام

Soooo يقول...

الشنكوتي الكبير
ولا اقول .. صديقي الجديد احسن ؟؟
اولا اشكرك على كلامك الجميل اللي مالي مدونتي وعلى كل المواضيع وعلى كل لون يا باطصطه .. وهتصدقني لو قلتلك اني ملاحظ نفس الحكايه بتاعة ان عدد المدونين من البنات كتير قوي لدرجة اني لما بلاقي مدون راجل باكلبش بايدي وسناني في مواضيعه .. مش تقليلا لمواضيع مدونات البنات ولا حاجه اطلاقا .. بس زي ماتقول كده .. الدم بيحن
اما بخصوص اني رديت في مدونتك فده شيء طبيعي عشان لمست فيها فكر كويس وتفاعل جميل مع الناس ومع الاحداث المحيطه .. لكن للأسف ماردتش غير على موضوع واحد بس اللي هو ان اختك ان شاء الله هتنزل كتاب فيه قصه انا باعتبرها قصه شبابيه بمعنى الكلمه وصدقني انا كنت متابعها لفتره طويله انت مش متخيلها .. وحقيقي حقيقي نفسي اجيب القصه لما تنزل ان شاء الله عشان انا من هواة الاحتفاظ بالحاجات الجديده وشايف انها قصه جديده على مستوى الفكره والتناول كمان
مره تانيه بارحب بيك وتقدر تعتبر مدونتي هي مدونتك وتقول كل اللي يجي في بالك .. وماتخافش .. مش همارس سلطتي ولا همارس عقد النقص اللي عندي ومش هشطب حاجه

وسلام يا صديقي الجديد

Soooo يقول...

جيفارا حبيب قلبي ورفيق رحلة الكفاح المسلح في الكليه وفي المسرح
ايه اخبارك يا باشا واخبار ابنك هيما .. لسه ماكبرش كده وبقى يعرف يتكلم عشان يقوللي عمو سوووو؟؟؟
وان شاء الله اوعدك ان البلوج ده يستمر طول مانا عايش ان شاء الله وأوعدك انك كل ماتخش هتلاقي جديد ويارب الحاجات اللي باكتبها تكون بتعجبك

والسلام امانه لابنك براهييييييييين

khaled adel يقول...

ما شاء الله كل الحاجات دي ف شهر واحد
انا قلت هتلاقي البلوج من سنة ولا حاجة
برغم اني اختلف معاك كتير ف بعض الالفاظ اللي مكن تقولها وسط كلامك عادي كده ولا كأنك قلت حاجة
بس ف النهاية البلوج جامدة جداً واكيد هقرا اي حاجة تنزلها

Soooo يقول...

خالد عادل باشا

انت مش واخد بالك .. المواضيع دي اه صحيح في شهر
بس في دماغي من زمان .. لدرجة اني تقريبا افلست فكريا

اما بالنسبه لتحفظاتك على بعض الالفاظ اللي بقولها في وسط الكلام ده .. فده رأيك
ولكل واحد رأيه ولكل واحد اسلوبه

هو معقول يعني يبقى كل المدونين نفس السكه ونفس الشخص ونفس الاسلوب .. اكيد ماينفعش

وعموما هوعدك اني احاول اشوف صرفه في النقطه دي .. بس واحده واحده .. ده انا ماكملتش شهر هنا


وكل سنه وانت طيب .. والسلام ختام

Ahmed Maree يقول...

alsalamo alekom we rahmat allah we barakato
SoOoOoO bashaa ana begad 3agebnaa gedan el blog beta3aak 3ashan enta bet3abaar besara7aa we tel2aeeyaa 3an ele gowa ay wa7ed masry bas ba3teb 3aleek 3ashan el donia mesh dalmaa awy kedah ya sa7by el donia kowesa bas men el zaweya ele benboss 3aleha menaha ana ya sa7by 3andy delwa2ty 27 sana we bashta3ghal wana men 3andy 18 sana safert ya sa7by el donia kolaha we 3adet 3alayaa balaweyee soda we la7azat sa3ba
7abib 2alby ana atmana tekony sa3ed we atmanalak elnaga7 we sada2ny el 3omr mesh belseen el 3omr belkhebraa we bel la7azat el 7elwa ele ben2adehaa 3ashan kedah lazem te7awel teshof nafsaak el donia mesh bas so7af we cafe we jokes we banat la2 fee 7agat taneya ketter we sada2ny ya sa7by law 7atet reglaak 3alla awel el tare2 3omraak ma7terga3 tany lel2e7sas enaak daye3 yalaa forsa sa3eda geadan ya soooo we insha allah asma3 3anaak kol kher we atmana nekon so7ab 3ashan begad ana 3agebny gedan sara7taak we kalamak el wa2e3ee ele men gowa el 2alb rabena yewafa2ak ya sa7by

Soooo يقول...

Ahmed Maree

لا مؤاخذه يابن بطوطه ياصاحبي التأخير الفحيت في الرد على كلامك الجميل ده

بس بيني وبينك الموضوع مش تشاؤم ولا نظره سوده قد ماهو اني بافضي شحنة الكبت اللي جوايا عن طريق اني احاول اضحك واضحك اللي معايا واللي بيقرا كلامي وحواراتي وتخاريفي

اتمنى انك تشرفني دايما واتمنى اننا نكون اصدقاء في الحياه مش لمجرد اننا عاملين مدونتين وبنر على بعض مجاملات وبس

مره تانيه باعتذر عن التأخير عن الرد على تعليقك بس لظروف خارجه عن ارادتي والله ياباشا

نورتني وياريت تعتبر مدونتي هي مدونتك تمام

سلاموووووووووز

L.G. يقول...

فنجان الشاي ده شكله جميل / لأنه لو قهوة من غير وش يبقى أي كلام شايفة ان شكل المدونة جميل ومريح للنظر وبالعربي الحمد لله عشان نقرأ بدون توقف حبيت أزور المدونة لأن دايما تعليقاتك عند الجيران جيدة مع اني عذرا كنت فاكراك مش ولد المهم لقيت سلوى حطاك كمان في المدونات المفضلة قلت أزور المكان
كنت كل ما أأقرأ كلمة سو أفتكر أغنية محمد منير ربنا يحفظ على العموم
النت نور والحنكور أحسن تتهادى وتشوف الدنيا براحتك وتسمع صوت وقع خطواتك فيها وتشم هوا بدل القهوة المهوية وبعدين ربنا يعافى الموس وكمان الفلوبي دريف عندي كلنا ذاك الرجل
ودمتم

Soooo يقول...

L.G.

الحقيقه انا شايف تعليقك ده من اول يوم حطيتيه عندي
بس جيت دخلت مدونتك لقيتك اعتزلتي الحياه والتدوين
واسمحيلي اقوللك لأ
انا صحيح ماعرفش ايه هي الاسباب اللي خلتك تزهدي في عالم التدوين والكتابه .. بس اعرف يعني ايه ان الواحد يقول رأيه
حتى ولو كان في مليون واحد مخالفينني في الرأي
اللي بتعمليه بابتعادك عن البلوج وعن التدوين ده هروب .. واللي انا حسيته من مواضيعك وكتاباتك انك مش جبانه عشان تهربي

راجعي نفسك تاني وشوفي
ولو حسيتي انك محتاجه رأي حد .. قبل ما تسألي اي حد .. حكمي عقلك انتي
وخدي رأي نفسك

سلاموووووووز

سمية يقول...

دلوقتى بس عرفت ايه اللى خلاك تدخل مدونتى..
اصل انا كنت ابتديت خلاص اقتنع ان محدش هيعبرنى و انى هفضل اكلم نفسى كده علطول..فاعتبرت الموضوع كانى بتكلم مع نفسى...

واضح انك عانيت نفس المعاناه عشان كدة بتدور عالناس الجديدة و تجبر بخاطرها..

بس واضح من البداية انها مدونة دمها خفيف..ربنا معاك.
الى الامام دائما ان شاء الله..

سمية لطفى

Stella De Mare يقول...

اكتر حاجة عاجبانى حكاية زحل دى بس اللا هو صحيح ممكن يكونوا فيه ناس عايشين هناك و لو فيه ياترى شكلهم ايه
انت شكلك عديتنى بالخطرفة