الاثنين، ١١ محرم ١٤٣١ هـ

!! شوية نـُقط

في تحديث في آخر الموضوع .. ياريت لو في حد بيدخل هنا لسه ..
يقرا ويقوللي رأيه !!
-
جالي تعليق محترم جدا على آخر موضوع كتبته .. تعليق فعلا يعتبر نقد ايجابي ..
واحتراما لكاتب التعليق .. قلت لازم انشر تعليقه واجاوبه على اسئلته ..
وبالمره احط شوية نقط .. على كام حرف متنطورين حواليّه
--
السلام عليكم ورحمة الله وبركاته

حقيقة تعجبني مواضيعك التي تتميز بخفة دم فطرية استطعت وبجدارة أن تصوغها في مجموعة كلمات ترسم الابتسامة على وجوه من يقرأ لك

وعليكم السلام ورحمة الله وبركاته
وألف شكر على كلامك الحلو ده .. وربنا يسعدك دنيا وآخره يارب
--
ولكنني اتعجب ياصديقي , أين مواضيعك الساخرة الجادة مثل موضوع كلبش العربية والحمار ؟؟

والله ياغير مُعرف ياخويا المواضيع الساخرة الجادة موجودة .. بتاع عشرين موضوع مثلا ..
بس محتفظ بيها لحوار الكتاب اللي عايز اعمله
ومش معنى كلامي اني بابخل على اللي بيقرالي لا سمح الله .. لا والله ..
بس زي ماتقول كده اتخنقت من السرقة اللي بتحصل لمواضيعي ..
ياراجل ده موضوع الحمار جالي عالميل مرتين .. وموضوع الهسس جالي مرّه !!!
مُتخيل !!؟؟
--
وايضا اين مواضيعك مع أطفال اخوك؟؟

اسكت .. لاهو انا ماقلتلكش .. سافروا مع اخويا ومراته .. اه والله ..
وبعيد عنك سايبين حالة فراغ بشعه .. مش لاقي حد اعضه يا جدع !!!
--
كما أتعجب ايضا , لماذا اصبحت مواضيعك دائما يتم بها ذكر اسمك سوو
أرجو ألا تكون بارانويا يا عزيزي !

اعوذ بالله .. بارانويا ايه بس ياعم الحاج .. لا والله .. الحوار بيتلخص في سببين فقط ..
أول سبب .. هو كُرهي الشديد لكلمة "انا" دي ..
شايفها نوع من التباهي والأنانية والغرور .. وبالتالي لما باتكلم عن موقف حصل معايا ..
باستعيض عن كلمة "أنا" واقول سوووو .. باعتباري شخص يعيش ويتعايش !!!!

وكمان سمعت ان الرسول عليه الصلاة والسلام .. نَهىَ أحد الصحابة لما كان بيخبط عليه في البيت .. والرسول صلى الله عليه وسلم سأل من بالباب ؟ .. قام الصحابي قال أنا .. فسيدنا محمد عليه الصلاة والسلام استغرب وقال أنا أنا !!؟؟
في إشارة يعني لوجوب أن يقوم الشخص بتعريف نفسه بإسمه

وسمعت حكايه بس مش فاكر تفاصيلها الحقيقة .. وآسف لو غلطت فيها ..
إن سيدنا محمد عليه الصلاة والسلام لما كان في رحلة الإسراء والمعراج .. سُئل من أنت ؟؟
قام سيدنا محمد عليه الصلاة والسلام قال محمد بن عبدالله .. وما قالش أنا .. أو أنا محمد بن عبدالله
والله أعلى وأعلم طبعا

تاني سبب بقى .. هو اعتقادي - الخاطئ - إن الحركة بتاعة "سوووو" .. هاتردع أي حرامي
تسوّل له نفسه أن يسرق موضوع من مواضيعي .. لكن اكتشفت إنهم عالم متسوّلين خلقة !!!
وبيسرقوا الموضوع ويروحوا مغيرين الاسم .. وعادي خالص فُل في الجنينه !!!!!

ياراجل يا مؤمن دول سرقوا مذكرات طفل طخين مع انها ماخلصتش !!!!
ومش هتخلص عشان يبقوا عارفين لو حد بيقرا دلوقتي ..
واحتمال - ان شاء الله - تتعمل قصة مصوّرة على غرار الكوميك الأمريكاني
استنوا شوية واسرقوها "بي دي إف" بقى !!!

وفي بعض الحراميه إفيه لوحدهم .. بيسرقوا الموضوع زي ماهو كده ..
زي الموضوع ده مثلا !!!!
--
اعلم انك لن ترد على هذا التعليق , ولكنها مجرد استفسارات اتمنى ان تجيبيني عليها أو على الأقل تضعها في اعتبارك , واعذرني على الإسهاب في التعليق

ياخبر .. اهو انت كده هتخليني ازعل والله .. لا بجد هازعل ..
ازاي ياعم تخيلت اني مش هارد على تعليقك ده .. والله ابدا ..
الحكايه ومافيها ظروف متلخبطه بس في الشغل وفي الحياه .. يعني متابعتي للمدونة مش زي الاول .. انما باتابع التعليقات اللي بتيجيلي والله .. وبابقى عايز اتكلم مع كل الناس بس الظروف متلخبطه .. معلش .. حقك علي انت وكل الناس اللي بينوروني بتعليقاتهم .. واسف لو كنتوا فهمتوا كده

وبعدين ايه اعذرني على الاسهاب دي .. انت هتخليني ازعل بجد بقى !!
يا باشا انت تسهب براحتك ..
اه والله ..
وانا كمان هاسهب معاك ..
ونشوفلنا كام مدون تانيين يسهبوا معانا ويبقى اسهاب جماعي !!!
احنا في ديك الساعه لما نسهب مع بعض يا غير مُعرف باشا
--
ملاحظة

كنت افضل أن تتحدث عن ورقة _باركن الهاكستب_ أكثر من نص الفرخة
وأعلم انك قادر على انتزاع الضحكات من مجرد ورقة ,,,بها كلمتين !!

شخص يحبك في الله


قاريني انت وفاهمني .. اه والله .. خبيث انت ياغير مُعرف
سوري في اللفظ .. بس انت خبيث بجد
ماشي ياسيدي .. ماشي
هو فعلا الموضوع بتاع باركن الهاكستب يطلع فيه حاجات كتير .. خصوصا ان دي مش غلطة في يافطة محل ولا حاجه عبيطه .. لأ .. دي غلطه يتحاسب عليها أعلى حاجه في البلد واللي هي .. القوات المسلحه و وزارة الدفاع
اللي رايحلهم كل ميزانية البلد والمِنح اللي بتيجي من أمريكا والدول الكريمة المعطائه دي
!!!!!!!
وفعلا عامل زي مانت بتقول .. كاتب موضوع مشحور فيه الدنيا .. بس محتفظ بيه للكتاب ..
استنى بقى لغاية ما الكتاب ينزل واشتري قد ألف نسخه كده ..
نفعّني يا شقيق !!!

وصدقني والله .. تعليقك ده بيؤكدلي ان في أمل في الحوار الايجابي بين الناس
خصوصا ان تعليقك جه في فترة منيّله بنيله .. فترة اتوجهلي فيها كمية شتايم واتهامات بالعمالة
والخيانه .. ومؤخرا .. تم اتهامي بالحشاشه - نسبة للحشيش يعني - وحاجه مرار !!!

وياريت كل اللي عايز ينتقد نقد ايجابي .. يفهم يعني ايه نقد ايجابي ..
ويجي يتكلم معايا باحترام .. ووالله ساعتها هاشيلو على راسي من فوق

ملحوظة

اسف يا استاذي لو كان اسلوبي في الهزار معاك تخطى الحدود ..
بس حبيت اعبرلك عن احترامي ليك من خلال الهزار والضحك معاك ..
ومقامك محفوظ والله .. انت وكل الناس المحترمين اللي بيقرولي وبيشجعوني

بالنسبة للإخوة الحرامية .. آسف .. الموضوع ده مافيهوش حاجه تتسرق عارف
بس اوعدكم هعمل موضوع فرقعة بجد ..
موضوع هايخلي العضو في أي منتدى .. يبقى مشرف ..
موضوع هايخلي المشرف .. يبقى أدمن ..
موضوع هايخلي الأدمن .. يبطل إدمان !!!
. موضوع هيكون اسمه ..
اسرقوني بس بالراحه .. إنهبوني بس بالذوق !!!!!!
-
في موضوع في سينماتك .. بيتكلم عن الفرق بين الاقتباس واللطش .. في السينما
ياريت اللي بيفتكر انه بتغيير اسمي من اي موضوع بيسرقه مني ..
يبقى كده بيقتبس مش بيسرق .. يقرا الموضوع ده
ويمكن .. يحصل في الامور أمور !!
سوووو

هناك ٣٠ تعليقًا:

ماء تشرين يقول...

سو انت بجد من اكتر الناس البحب اقرلهم بجد لانى بجد مش بعرف بتجيب الكلام والافيهات دى ازاى وانا الصراحه مسرقتش منك حاجه اشمعنا انا بقه ممكن اسرق منك اى حاجه بعدين في حاجه ياعنى سو انت اسلوبك مميز جدا والله ياعنى هيبان بين الف موضوع ده انا متاكده منه

تقبل كل الود

maryam يقول...

بجد انت اسلوبك اكثر من رائع
وربنا يوفقك

adel يقول...

هههههههههه

جامد يامعلم
ورجعنا نكتب اهون كتير فاضل تصحي مدونة سينماتيك و تشيل عنها التراب ياصديقي

مهندس مصري بيحب مصر يقول...

مبروك على الكتاب يا سوو
و عقبال ما نحضر حفلة توقيعه و ننفعك بتمن نسخة يتيمة و نآخدها سكانر و ننزلها على النت بعد كده و نوقف سوق الكتاب
:))
ههههههههههههههههههههههههههه
بأضحك معاك

لا بجد
ربنا يوفقك و يكرمك و يرحموك الحرامية شوية
بس أمانة عليك ما تغيب علينا علشان بتوحشنا جداً
و شغل مدونة سينماتيك تاني لإني بأعشق كتاباتك فيها

سلام مع بوسة على الطاير :-*

Asmaa mahaba يقول...

بمناسبه الاسهاب بطوط كان عامل موضوع عن الانتوسيد ممكن تستعيضوا بيه لو لاسهاب زاد عليكم:q
الا قولى يا سوو ايه تستعيضوا دى؟؟
بالمناسبه مهندس مصرى شكله حيقوم بالواجب وزياده معاك فى موضوع الكتاب دا :))
ابقى اكتب فى الكتاب بتاعه تنويه عن غتاتى الدائمه عليك:P
سنه جديده سعيده عليك هابى نيو يير :)) وانا بكتبها افتكرت فيلم هنيدى والراجل غرقان فى المجارى لنصه وبيقولك هابى نيو يير:))
مقرفه انا ديما العيال بيقولولى تحجى ما تحجى طوله لسانك متغيرتش
 
واحنا عارفين انك بتقرا التعليق بس مبتقدرشى ترد لانك مشغول
وعامتا حتى لو مبتقراهوش انا بعلق عندك هوايه :))))))))
مش عشان خاطر تقراه اصلا :p

P A S H A يقول...

عارف أنت الراجل بتاع طلعت حرب ؟
اللي هو انهبني مول ؟
اللي بيقف يا جدع قدام العبد وجنب فلفلة بعد عشرة حداشر بالليل ويقعد يجعر : انهبني بضميييييييير يا زبوووووووون .. ويروح محول صوته زي الكالاكس الهوا بتاع العجلة الرالي بتاعة بتاع العيش ويقول : آديداس !!

اسمحني انهب منك شوية ضحك ... ع الكلام المستكوفي بتاعك .

يا جامد يا سووووووو

Unknown يقول...
أزال المؤلف هذا التعليق.
Unknown يقول...

أنا لسة ما كملتش قراية بس استنفزنى قوى موضوع السرقة ده وخصوصا لما قريت تهييس كليب المسروقة وخصوصا خصوصا لما قريت التعليقات اللى عليها فقررت اعلق عندهم واقول :ياجماعة المقال ده مسروق من كاتب اسمه كذا واللينك بتاع المقال الأصلى كذا. لما جيت اعلق قالك لازم تشترك فى المنتدى بينى وبينك فكرت شوية لقيت الحكاية هتاخد وقت بس استفزازية الموضوع حمستنى وقولت هاشترك وابتديت امشى فى الاجراءات واللى ابتدت -وكأنك بتسطب ويندوز- بقبول الشروط ولسة هقبل حاجة وقفتنى وهى إنى افتكرت جملة قريتها على صورة على نفس الصفحة فى وسط التعليقات كدة بتقول:يارب مصر تخسر والجزاير تكسب يا رب يارب. الفار لعب فى عبى قولت اقرى الشروط قبل ماقبلها ودى حاجة عمرى ماعملتها حتى ولو باسطب برنامج "كيف تصنع برنامج" مثلاً، ولقيت الجملة دى بالنص:إن مالكي منتديات جامعة طنطا لديهم حق حذف،أو مسح،أو تعديل،أو إغلاق أي موضوع لأي سبب يرونه، وليسوا ملزمين بإعلانه. وكلمة تعديل دى اللى قلقتنى قولت ممكن الاقى التعليق بدل ماهو زى ماقولتلك فى الاول الاقيه:
ياجماعة فيه كاتب اسمه كذا سارق المقال ده واللينك بتاع المقال المسروق كذا.
ملحوظة
طبعا كذا ده اللى هو اسمك واللينك بتاع مقالك
المهم اكمل المقال بقة عشان اعلقلك عليه

akeedba7ebha يقول...

ايه كل ده هههههه انت مفيش منك يا سو تانى باين كدة

طبعا مش عارفنى انا محمد ابوعجيله

خش عليا وانت تعرفنى دا اول موضوع اكتبه

وكل سنه وانت طيب

Unknown يقول...

أنا خلصتها
إيه الدماغ دى -ليس نسبة للحشاشة- حوار بينك وبين معلق ، لأ بجد أحيى فيك الأسلوب ده أسلوب انك تلقط موضوع من حتة فى الهوا بس عارف بتقول من خلالها إيه مش مجرد فكرة
بجد ربنا يوفقك ويجعلنا من بركاتك
وكلام فى سرك "يكفينا شرك"
ملحوظة:
آسف على عجرفتى فى تعليقى على المدونة اللى انت عارفها ماخدتش بالى انى ماقولتلكش رأيى فى الموضوع ولكن هل شيؤن يقال بعد كل ما قيل؟ ماذا أقول
مانت متأكد انها عجبتنى انا بس ماكنتش باعرف اعلقلك على حاجة الاول عشان ماكنتش عامل اشتراك فى حاجة
يلا كفاية بقة انت رغاى أوى يووووووووووه

صبرني يارب يقول...

طب بالذوق كده طلع الى فى جيبك

ايه ده ومفلس كمان وعمال تقول اسرقوني

والله يا سو انا ما عارفه الناس بتعيش ازاي مع نفسها بجد

ده الواحد لما بيتلقى بؤين حلوين من اي حد على الى هو كاتبه بيبقى محرج ومش عارف يروح فين

قوم هما عادي كده يلطشوا الموضوع ويقعدوا يتقبلوا التهاني

انا روحت الوصلات الى انت حاطتها بجد ناس غريبه

وعارف يا سو لو بعد كده ما تردش على تعليقى ببوست كامل زي ده

الله اشمعن هو يا جدع نت

يلا زي بعضه عشان هو ضيف وكده

ونسخة الكتاب تجينى بقى انا ما باروحش لحد
ههههههههههههههه

Mona يقول...

عجوز وعندى 30 سنة على كده ده أنا لازم أروح أنتحر فورا - السن ليس بالعمر ولكن بما نحسه بداخلنا وماقرأته فى هذا البوست لا يدل على أنك عجوز على الاطلاق - بس أنا ملاحظة أنها موضة فى الشباب والشبات اليومين دول - العجز ده داخلى ولا يجب الاستسلام له :) وأسرقونى بس بالراحة مش متخيلة أن حد يدخل ويسرق افكار مدون زميل أو زميلة عموما كل المشاهير أتسرقت أفكارهم تفتكر ده فأل حلو - :)

travelertrades يقول...

و ايه يعنى لما ينسبوك للحشاشين هو مين دلؤتى مش بيحشش مصر كلها بتحشش ان شاء الله ها ارفع فديو لواحد انا معرفهوش بس كلامه كلام راجل محترم لو دخلت على المدونه بتعتى هتلقيه بكره ان شاء الله و على العموم يا سووووووووو ان سرقت اسرق جمل يعنى من الاخر الى هيفكر هيسرق الكتاب

Zika يقول...

مش اي حد يكتب ساخر
ومش اي حد في الساخرين الجدد
زي الناس اللي ممكن الواحد يقرالهم ومايتخنقش

مش اي حد بارضه بيضحكنا زيك يا سووو

وزي مانت قلتلي قبل كده
سرقة اعمالك دي دليل على انك ناجح
واحشني يا شقيق

غير معرف يقول...

انا بجد بعد ما رديت على المعلق ده زادت معزتك عندى واحترمتك جدا زياده على احترامى السابق ليك وبقولك انك والله العظيم مقامك مترفع واعلى من انك تعير اهتمام للى تجرأ ووجهلك شتيمه
وشكرا على الافاده والمعلومه
roka

هناء محمود يقول...

اسلوب جميل جداااااا ربنا يزيدك

شيرين يقول...

اسلوبك لايت وحلو اوي
بالتوفيق

Bravo_fox يقول...

احلى تعليق اتقال من كان يوم من ميريل ستريب (2 اوسكار) في حفلة تكريم روبرت دي نيرو في البيت الابيض (كمان 2 اوسكار) انه كان مدرسة وملهم وكل الممثلين سرقوا منه وانه هي شخصيا كمان سرقت منه!!!وزعلان يا سووووو؟؟؟؟

فتــافيت (رحاب الخضري) يقول...

يااااا سوووو يا جامد
قولت لك موضوع السرقة امسح بيهم الارض
لان كلمت منقول مش صعبة ولا هي اختراع
وكمان ديه حقوق فكرية
وانا عملت كده كتير.. بدخل المنتدى واهزق اللي كتب الموضوع.. وكمان بيغير فتافيت لاسمه
شيء مستفز.. لدرجة ان مرة واحدة اخدت بوست كان فيه كلام تهريج بس خارج شوية.. ايام ليفيني المحروس الانجليزي اللي عنده 11 سنة وخلف سفاح طبعا
فالناس ردت عليها في المنتدى وقالت فيه الفاظ صعبة.. قامت معتذرة وقالت المرة الجاية هاخد بالي
قسما بالله انا مش هزقتها.. انا خلتها عبرة لمن يعتبر

وانت كنت رديت في الفيسبوك وقولت انهم قالوا لك عيب وايه يعني الناس تنقل

ماشي يا جماعة انقلوا بس باداب النقل.. وقولوا ان المواضيع بتاعتنا
لاهو عيب ولا حرام

حسبى ربى يقول...

عثل والله يا سووووووو .... ويا سيدى انت مسروق اذن انت موجود...!!

فتــافيت (رحاب الخضري) يقول...

سوووووووووووووو
شوفت مش كل الناس حرامية.. وبتسرق كلامنا
http://fatafetroraz.blogspot.com/2009/12/2009.html

ادخل اقراه .. وانت تعرف

P A S H A يقول...

كل سنة وأنت طيب.

بنت الغربة يقول...

ههههههههههههههههههههه
بجد انت عسل ..والله دمك خفيف قوى...
خصوصا بالنسبه للأسهاب وايامه...
انا احب اسهب وااقولك كل سنه وانت طيب ياسوووو...

Kontiki يقول...

يمكن فى البوست القديم بتاع النشاة صدمنى استخدام كلمات الفيلسوف عبدة حشيش والاسكندر البيهشى والشيشة ومش عارف اية
ويمكن النقد اللى حضرتك سميتة نقد هدام و بعيد تماما عن النقد المقبول وغيرة انا شفتة عرض لوجهه نظر بس
لا نقد ولا غيرة لانه باختصار المدونات هى تعبير خاص جدا عن صاحبها فكل واحد حر يقول اللى هو عاوزة بطريقتة ( بس المشكلة ان لك معجبين وانى بحب اقرا هنا فصدمتنى بعض الكلمات ورد فعلى كان تحت تأثير الصدمة :)
ولا كان المقصود بيه تجريح فى شخصك
وألمنى جدا انى اشعر ان كلمة قد تسببت فى ايلام انسان بدون قصد . فعذرا.

Tears يقول...

شكرا على زيارتكم لمدونتى و التى قادتنى للتعرف على مدونتك المختلفة و المميزة فى الاستايل ...قرأت تدوينه "وصيه" على جانب الصفحة و اثر فيه جدا كلامها و بالذات بهلول و بهلولة حيث زورتهم باللينك الذى قمت بوضعه...اعتقد ان الزوج ايضا غائب فمدونته لم يتم تحديثها...رحم الله الجميع

غير معرف يقول...

تصدق انا احترمت الراجل ده
آه وربنا

الا انت ازيك كده يا سوووو

مها ميهوو

z!zOoOo يقول...

السلام عليكم

ازيك يا عم سو يا بتاع البارنويا

D:

يارب تكون بخير

وكل سنه وانت طيب

علي فكره

مش إنت بس الي إتسرقت

انا قبل ما اعمل المدونه كنت بكتب موضوعات واشعار في منتدي

كان ليا صديقه عزيزه برضه زيي كده

فيه بقي واحد كان مستنيلنا

كل ما ننزل حاجه يروح مقشطنا أول بأول

ده فيه قصيده ليا كل ما اعمل عنها سيرش

الاقيها مغرقه محركات البحث

بحس بقهره بشعه وعجز

:(
بس مين يصدق انها بتاعتي

ده غير الباقي

وحاجات من المدونه مايضرش

بقيت برضه بخاف انشر والله

ربنا يعينا علي العالم ولاد التيت دول

المهم بقي

سيادتك ياحضره السو غايب ليه

البوست ده نازل من فتره

وأنت مش ظاهر

(محسسك إني اعرفك يطلع من بتاع عشر سنين انا مش كده)

لا عادي جدا يا إكسلانس

انا بتابع ناس كتير بس من بعيد

عايزين نشوف موضوعات جديده

وأتمني تنورني

تحياتي السووويه إلي سو الاكبر

D:

شهووووده يقول...
أزال المؤلف هذا التعليق.
شهووووده يقول...

اسلوب رائع متميز بلا جدال..
سلاسة وبساطة .. عمق وتأثير .. خفة دم ....

لكن ما يعجبني اكثر هو تقبلك لنقد الاخر بكل رقي واحترام...
هكذا انت دائما

بارك الله فيك ودمت متألقا

احترماتي

Eng.Ahmed Fouad يقول...

بجد انت مشكله ايه الابداع دا سلمت يديك ويحرمناش من كتباتك الجميله