الخميس، ٢٩ شعبان ١٤٣٠ هـ

!! أكاديمية سوووو للهسس

كل ما اركب أي وسيلة مواصلات .. سواءا كانت أتوبيس عادي أو مكيّف من أبو من غير تكييف .. ألاقي إعلان عن سنتر لغات وكومبيوتر
!!!!!
أمشي في الشارع الاقي مكتوب إعلان عالعمارات .. عن مركز لتأهيل طلبة ثانوي لدخول الكليات العسكرية .. تحت إشراف الكابتن روبي , وما اعرفش ايه علاقة روبي بالكليات العسكرية .. ولما يكون مستقبل الكليات العسكرية في ايد روبي .. هيبقى مستقبل الداخلية في ايد مين !!؟
!!!!!
اقعد في محطة المترو الاقي شاشات العرض بدل ما كانت بتعرض اغاني هابطه - من اللي مابتتعرضش في أي حته - بتعرض إعلانات لمعاهد وجامعات خاصة
!!!!!
اهرب من المترو وافتح اي صفحة في اي جرنان - مُؤيد أو مُعارض - ألاقي الدنيا معاهد بمصروفات .. وكلها معتمدة من وزارة التعليم .. ومن النقابات .. ومن رئيس الجمهورية
!!!!!!
لدرجة اني سألت روحي وانا مستغرب .. هو الريس عمل زي نابليون لما ساب الحرب والمماليك وقعد يمضي على اطباق .. قام هو كمان ساب البلد واللي فيها وقعد يوافق على معاهد !!؟؟

اللي استفزني بقى مش كُتر المعاهد .. ماهو العلم نورون برضك .. واحنا في العصر النووي ومن مصلحتنا الناس كللها تنوّر من كتر العلام , اللي استفزني اني كنت ماشي في الشارع ولقيت كام عيّل عندهم بتاع عشر ولا حداشر سنه .. بيفرّقو ورق إعلانات , في الأول افتكرته إعلان عن شركة (تطهير حشرات) من اللي بيرشو جاز ويقولو الحشرات كده بَحّ .. وبمجرد ما يمشو تلاقي الحشرات طلعت مبسوطه وعامله دماغ وبتقول كمان .. وكأن بتوع التطهير دول كانو بيطاهرو الحشرات مش أكتر , لكن لما مسكت الورقة لقيتها إعلان عن معهد خاص بمصروفات
!!!!!!!
!!! يالهوي .. ده ناقص افتح حنفيه الشطاف الاقي واحد طالعلي من تحت بيكلمني عن معهد خاص

وبعدين ايه كمية المعاهد التجاري دي .. كللو بيدي بكالوريوس محاسبة وإدارة أعمال .. هو خريجين تجارة بتوع الجامعات الحكومية شغالين أصلا ؟؟؟؟

!! هنا بقى قررت اعمل اكاديمية خاصة تحمل اسمي .. ماهو انا مش اقل وطنيه من روبي لا مؤاخذه
!! قررت اني ما ابخلش على أي حد .. بأي معلومة .. من كنز المعلومات اللي عندي
.. قررت اعمل أكاديمية هدفها الاساسي هو التربح .. ماهو معلش مش هعملها لخدمة الوطن
!!! انا عايز اتجوز و اجيب موبيل ثري جي يا جرعان
!! قررت اساعد في تخدير الشباب .. على اعتبار انهم - والعياذ بالله - فايقين وبيفكرو في رفعة الوطن
!! قررت أعلّمهم الهلس والنبي يا احمد
وهي دي بداية .. أكاديمية سوووو للهسس
----------
.. أكاديمية سوووو للهسس
!! أول أكاديمية في مصر .. تستخدم مبدأ الصياعه هسس .. مش رمي إفيه
.. أكاديمية سوووو للهسس
!! أول أكاديمية في الشرق الأوسط .. والأيسر والأيمن .. والأعلى والأسفل
.. أكاديمية سوووو للهسس
!! أول أكاديمية في العالم .. تمنح درجة البكالوريوس والليسانس مع بعض .. دويتو
.. أكاديمية سوووو للهسس
!! المناهج في مستوى الطالب البلالا .. ونقبل التحويلات من كي جي تو .. وانت طالع
.. أكاديمية سوووو للهسس
!!!! متخصصون في الهسس والخيال العلمي .. والتصريحات الحكومية
.. أكاديمية سوووو للهسس
!! تدريب خاص للخريجين في قناة موجا كوميدي .. و تهييس دولسيكا
.. أكاديمية سوووو للهسس
!! المصاريف في المعقول .. على قد ماتدفع .. هتهيّس .. وكل ماتدفع أكتر .. هتهيّس أكتر وأكتر
.. أكاديمية سوووو للهسس
!! إعفاء تام من التجنيد .. لأننا هنعلمهم العبط .. وهياخدو شهادة معاملة أطفال
.. أكاديمية سوووو للهسس
!!! الشهادة معتمدة من مجلس الوزراء ومن الريس شخصيا .. الريس بيره طبعا
.. أكاديمية سوووو للهسس
!!! شعارنا .. هسهس هسهس في كل مكان .. صحرا ان كان أو بستان
.. أكاديمية سوووو للهسس
!!! كللو .. لازم ياخد فيها


ملحوظه

.. بعتذر لكل الناس اللي قالولي كل سنه وانت طيب بمناسبة عيد مولدي
واقوللهم ربنا يكرمكم ويسعدكم دنيا وآخره يارب
.. بس الحكاية اني سافرت الساحل الشمالي كام يوم اغيّر جو
.. وكنت في قمة سعادتي وانا قاعد - بكرشي - عالبحر او عالبيسين .. ومعايا كانز بيريل
.. وكل اللي كان يبص علي وعلى كرشي .. كنت اظغرلو بعيني وانا باخد بؤ بيريل .. وكأني بقول
!!! عُمر الكرش ما يعيب الراجل

سوووو

هناك ٣٠ تعليقًا:

adel يقول...

والله جامد يابو السواسيو (ده جمع تكسير)
انا عاوز اشترك في الاكاديمية كمدرس او محاضر
ينفع ؟
وممكن ادي للطلبة دروس عملي كمان
وهنستعين بافضل انواع الاصطبحات مع الادوات المساعدة من شيش و كوبايات و سجاير و ورق بفرة
ده غير اننا ممكن نعمل كورس بعد الضهر للمية و انواعها و الفرق بين المستورد و المصري

--------
كل سنة و انت طيب يازعيم

مهندس مصري بيحب مصر يقول...

هههههههههههههههههههه
الله يحظك يا بني
إعلان أكاديميتك خرافة
إعمل إنت بانر بس و ملكش دعوة
حنوزعوه في كل حتة على النت
و نجيبوا لك حق الـ 3 جي يا جدع
:))
كل سنة و انت طيب و رمضان كريم

مهندس مصري بيحب مصر يقول...

إتفضل يا عم
آخر رسالة جاية لي على الفيس بوك بعد ما علقت عندك علطول
Damanhour‏ أرسلت رسالة لأعضاء Ghadir Ahmed‏

--------------------
الموضوع: CMA كورس لغة انجليزية مجانا لكل من يسارع بالحجز في

كورس لغة انجليزية مجانا .. لكل من يسارع بالحجز قبل 17 سبتمبر

سارع بحجز مكانك بدورة الاعداد لشهادة المحاسب الاداري المعتمد قبل 17 سبتمبر 2009 و احصل علي كورس لغة انجليزية مجانا
________________________________________________________

ماهي شهادة المحاسب الاداري المعتمد
Certified Managerial Accountant ?
هي شهادة محاسبية تم تصميمها من قبل معهد المحاسبين الإداريين بالولايات المتحدة الأمريكية
IMA
وهو الجهة الرائدة في العالم لتمكين المهنيين في المحاسبة الإدارية والتمويل من التميز في الأداء

و هي عبارة عن اربعة اجزاء
الجزء الأول : تحليل الأعمال
IBusiness Analysis

الجزءالثاني : المحاسبة الإدارية وإعداد التقارير
II Management Accounting & Reporting

الجزء الثالث :الإدارة الاستراتيجية
III Strategic Management

الجزء الرابع : تطبيقات الأعمال
IV Business Applications

مدة الجزء الاول : 6 أشهر

مرتان في الاسبوع - من 6:00 الي 10:00 مساء
___________________________________________________________

و سوف يتم تحديد ميعاد بدء الجزء الاول بعد رمضان ، لذا سارع بالحجز و الخضوع لامتحان تحديد المستوي لحجز مكانك ايضا في كورس اللغة الانجليزية المجاني

للحجز و مزيد من المعلومات ، يسعدنا استقبال مكالماتكم:
3307827 - 0118968877

http://www.facebook.com/event.php?eid=106118839419
--------------------

فاتيما يقول...

هيه
اتفضل بقى
لسه يا دوب جاية اعلق و اقولك متعلقش الشباب بالحلم العزيييييم دا الاقى الواد عادل إبنى جه و عنده امل يشتغل معاك فى السبوبة دى
بس مقولتش الصاريف كام يا أستاذ
و عودا حميدا من الاجازة
و رمضان كريم عليك
و كل سنة إنتى طيب عشام عيد ميدانك
و مبروك فتح إنطلاقة الاكاديمية يا عم
خالص دى و إتوصى بعادل إحياة ابوك
و هوه جدع قوى و هيبقى دراعك اليمين
و منكن أجى امسكلوكو مكتبة الاكاديمية دى
بس شوفونى برضو انت و عادل
و أنا اختك
و لا هبقى ام و اخت اونطة انا ؟!!!

خالد المصري يقول...

ملحوظتين على الماشي :

اولا: لم يتم ذكر رقم طابع التنسيق ارجو التوضيح لعدم الخلط

ثانية : هل لديكم نظام للتعليم عن بعد ( اوملايم يعني )

ولكم جزيل الشكر

همس الاحباب يقول...

هيس بكرة تبقى كويس
بس فين العنوان والمصاريف كمان يامان
ولا اكيد الاكاديمية اشهر من النارعلى العلم
ههههههههه
كل سنة وانت طيب ورمضان كريم

الـسـيـدة نـون يقول...

ما تقلقش على الداخلية

الداخلية هتكون فى ايد أمينة

الـسـيـدة نـون يقول...

يا مجرم
يا مجرم
يا مجرم
يا مجرم
يا مجرم
يا مجرم
يا مجرم


كله لازم ياخد فيها

يا مجرم يا مجرم يا مجرم
انا كنت بشرب سيفن وعند الجملة دى السفن خرج من مناخيرى يا مجرم


يا مجرم
انا عمالة اضحك بهستيريا يا مجرم

خواطر شابة يقول...

وأخيرا تدوينة جديدة
يا صبر أيوب صحيح صدق المثل اللي يصبر ينول

كــركــبــة دمـــاغ ㋡ يقول...

هههههههههههههههههههههههههههههههه
ههههههههههههههههههههههههههههههه
ههههههههههههههههههههههههههههههه

انتي زي السكر بجد

كل سنه وانت طيب

ورمضان كريم

وربنا يعود عليك الايام بكل خير ياااااااااااارب

كراكيب يقول...

شقاوة بتقولك كل سنة وانتي طيبة
خخخخخخخخخخخخ
آدي اول واحدة لازم تدخل جامعه الهسهس
ايه يا شقاااااوة ده عمك سوووو وبعدين عمال يقولك كرش وبيرل وحركااات

سوووو ده حتة تحفة متحفنة مليانة تحف كدة.. سكر مسكر.. اه واللــه
وعموما انا خلاص عايزة اقدم ولما اخلص دراسة فيها واطلع من الأوائل هعمل دراسات عليا كمان واحقق امل مامتي وبابتي فيا
وعايزاك كدة تبقى تدخل تكلمنا على النظام التعليمي والمواد الدراسية
ماشي يا عمو المدير.. عايزاك تشجعنا كدة وتحمسنا

وكل سنة وانت طيب بقى

MIRO EL NIRO KWANIRO

كــركــبــة دمـــاغ ㋡ يقول...

ميرووو

انتي يابت دماغك فيييين

ههههههههههههههههه

انا قلت انتي زي السكر بدل

انت زي السكر

انما كل سنه وانت طيب مضبوووووطه اهي والله


ياسووووووووووووسه .. خلتيني في نص هدومي قدام الجدع ههههههههههه

سووووري يا سوووو والله غلطة مش مقصودة

ده انت سيد الرجااااااااااله

انـت زي العسل بجد

ربنا يفرح قلبك يارب

واحجزلي مكاني بقى انا من تلامذتك

وماتركزيش يابت يا ميرو تاني ههههههههه

أبو العريف يقول...

سووووووووووو

ازيك يا عمونا

واخيرا لقيت اكاديمة تقبلني

حكم انا قدمت في اكاديميات امة لا اله الا الله وما نفعتش

بنطرد من اول اسبوع


لذلك فانا اول واحد هيقدم بالاكاديميه

ومعلش بقي انا مش هدفع

انا هعتبرها منحه سوويه

اللي مدايقني بقي موضوع الكرش ده

كل زملائنا اللي محشورين هنا في السعوديه

عملو كرش وعملو فلوووووووووووس

انا الوحيد اللي لا عملت ده ولا دوكهه

مهي الركنه هنا بتعمل كرش

لكن انا الركنه عندي قلبت بصدأ بره عنك

الصدأ تراكم علي نافوخي

وخلاص بقي هسهس عالاخر


بوست جامد طحن

وارجو ان تقبلني صديق للبورنامج

الحرامي سابقا

مي يقول...

هههههههههههههههههههههههههههه
فينك يا ابنى والله قلقت عليك من البوست اللى فات
خفت مستر ندا يكون عرف الحكاية هههههههههه بس الحمد لله
يابختك كنت بتصيف عااااااااا اكيد بتشرب بير يل!!!!!!!!
ممكن امسك الكانتين بتاع الاكاديمية
كل سنة وانت طيب ياقمر ومتغيبش تانى
تحياتى

يونيك اوى .... يقول...

حمد لله على السلامة .... وكل سنة وانت طيب
انت بجد مش ممكون .. مش ممكون
ايه الاعلان الجامد دة . خلتنى اقول يا ريتنى ما دخلت كلية ولا اتبهدلت .. يا سيدى مش مشكلة حبقى اجى اخد دراسات عليا عندك .... حلوة اوى اوى موضوع البكالريوس والليسانس معا دى
هههههههههههههههههههههههاها

Rannon يقول...

هههههههههههههههههههههههههه

لو مكنتش بس زهقت من التعليم D:

حمد الله على سلامتك
وكل سنة وانت طيب يا سوووووووووو

غير معرف يقول...

سوووو النوووو كوانوووو

كل سنةوانت كويس وربنا يتقبل منك الاعمال
رمضان كريم علينا كلنا مش انت لوحدك بأه

رمضان جاي اهوه.. لأ جه من نص ساعة.. الساعة ونص دلوقتي

ياللا اسيبك تتسحر بأه ونتقابل هنا ف نفس المكان بعد العيد بأه هه

مها ميهوووو

شوكولاتة يقول...

المهم قبل ما أقدم في الجامعة لازمن وحتمن ولا بود نعمل نقابة للمهيسين السوهيين هوه إحنا هانبقى أقل من الدكاترة يعني

Mahmoud البطراوى يقول...

واحشنى هسسك والله يا مان :D

Bravo_fox يقول...

اللي مجموعه عالي ابعته يكمل دراساته العليا وينقي تخصصه عندنا. شهاداتنا معترف بها دوليا، حوّل.

Unknown يقول...
أزال المؤلف هذا التعليق.
شهووووده يقول...

وكنت في قمة سعادتي وانا قاعد - بكرشي - عالبحر او عالبيسين .. ومعايا كانز بيريل
.. وكل اللي كان يبص علي وعلى كرشي .. كنت اظغرلو بعيني وانا باخد بؤ بيريل .. وكأني بقول
!!! عُمر الكرش ما يعيب الراجل

سوووو



ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

الله يسعد قلبك

mostafa rayan يقول...

باشا بقولك انا عايز اشتغل معاك فى الاكاديميه دي ممكن نائب رئيس مجلس الاداره ورئيس قسم الحسابات ومدير امن الخزنه يعنى هوانا اخدت ايه من الكتابه والادب .. ضيعت فلوسي ووقتى من حقي اعوض بقى
-------

بجد بجد موضوع جامد وفكره مطرقعه
كل رمضان وانت بخير

نعكشة يقول...

بداية مش فاكرة انا علقت هنا قبل كدة ولا لأ
بس انا فاكرة انى كنت باجى من زمان

ايام اليوميات مش زمان قوى يعنى

من شهور يعنى و كنت بَلَقَّط كل شوية

عامة
ماشاء الله مواضييع حضرتك معظمها لظيظ

طب بتعلقى ليه يا شاطرة انهاردة لما انتِ كل مرة بتيجى و تمشى من غير لا احم ولا داستور؟؟؟! ( وش رافع حواجبه . واحد او الاتنين مش فارقة كتير)

اصل اسم البوست هذه المرة فكرنى بمدونة تحمل نفس الاسم

http://alhasas.blogspot.com/

.

اما بالنسبة للأخوى طلبة كلية التجارة ..
فاما الذكور فهينضموا لأخوانهم من طلبة الهندسة و الطب و الاقتصاد و العلوم السياسية ليكونوا فريق دومينوا ف القهوة او ف اى بلاي ستيشن

واما البنات فهينضموا لزميلاتهم من تلك الكليات المذكورة اعلاه فى تعلم الكوروشية و التريكوة و التدبير المنزلى


و بكدة وفرت الدولة أسر بكون الاب فيها و الام متواجدين دايماً فى البيت عشان يتفرغوا لترربية الاولاد

عشان لُوحظ إن الاسر دلوفتى الاب و الام عنها غايبين

السؤال هياكلوا منين؟؟؟؟؟؟؟؟

دة اللى هيعرفوه لما يدخلوا معهد الهسس بعد التخرج من كلياتهم

و ربنا يخليلنا التعليم

سلامٌ عليك

hasona يقول...

السلام عليكم

كل سنة وانت بخير
وكل سنة وجميع أحبابك بخير وصحة وسعادة
وكل سنة وكل المسلمين علي شريعة الله وسنة الحبيب المصطفي رضي الله عنه وأرضاه

وان شاء الله نستفيد من رمضان بكل السبل
ونخرج منه أفضل مما ولجنا به
يا رب أعنا علي القيام والصيام والصلاة
ووفقنا لما فيه الخير للجميع يا رحيم يا كريم

وارزقنا العفاف والرضا - والمحبة واهدينا يا عظيم

وأعنا علي القيام والصيام والصلاة والارتقاءالي جنة الفردوس

واجعلها لنا ميراث خير وسعادة

واجعلنا من عتقاءك في هذا الشهر يا معطي يا وهاب

وارزقنا حلاوة القرآن و حسن تلاوته
وتدبر معانيه وفهمها علي النحو الصحيح
ورطب ألسنتنا بذكرك يا الله

عايز أقول اننا في أيام مباركة ويجب استثمارها في الخير والتقرب من الله

M.M.Abdullah يقول...

جااااااااااااااامد

زقطـوطـة يقول...

من الآخر كده
إنت جااااااااااااامد

حبات التوت يقول...

هههههههههههههههههههههههههه

طب ماقولتش المصروفات قد اية

اية كام الفلوس ؟؟؟




اه والله معاك حق الكورسات والمعاهد والكليات الخاصة كترت بالهبل تقول ماسورة والنفجرت

يلا رزق الهبل على المجانين واهو كله ماشى



بخصوص موضوع بريل انا ناوية ارفع قضية على الشركة دى
دلوقتى اى ست تقول لجوزها خس شوية ياراجل كرشك كبر يقولها بكل ثقة عمر الكرش مايعيب الراجل

عشنا وشفنا


يلا سلام
مع تحياتى ويلا

ranooo يقول...

هههههههه
اكاديميه جامده والله هو اينعم كل اللى انت هاتديه فى الاكاديميه موجود من اكاديميات بس حلوة الاكاديميه انها هاتدى كل حاجه باسلوب علمى محنك
وكل سنه وانت طيب مع انها متاخرة
ودلوقتى انا اطمنت ان الاكاديميه فيها ناس ضهر بما انك بتشرب بريل
وعلى راى اللى قالو
استرجل واشرب بريل

Unknown يقول...

هيهيهيهيهيهيهييييييييييييييييييه