الأحد، 3 محرم، 1431 هـ

!! نُص فرخة مشويّة

.. ماشي من قُدّام القهوة لقيت واحد صاحبي مش باشوفه غير كل فين وفين
.. وبعد ازيك و ايه الاخبار والحبشتكانات دي .. لقيته بيقولّي
صاحبي : شفتك انا لما طلعت في التلفزيون
سوووو : امتى ده ؟؟؟
!!! صاحبي : لما طلعت انت وكام مدوّن تانيين و بتتكلموا عن حاجه فيها لسعان
سوووو : ااااه .. قصدك حارة لسعان
- اضغط هنا لمشاهدة البتاع - طب وايه رأيك ؟؟؟
صاحبي : مش عارف .. بس كنت حاسك بتتكلم على طبيعتك قوي
سوووو : هو انت كنت عايزني اتكلم على طبيعتك انت ولا ايه !!؟
صاحبي : لأ مش قصدي .. بس يعني المفروض كنت تتكلم زي ما الناس بيتكلموا في التلفزيون
سوووو : ده على اعتبار اني كنت باتكلم في السخّان مثلا !!!؟؟
صاحبي : مانا عارف مش هاسلك معاك , بس قولّي .. اشمعنا الكتابة الساخرة المهتمين بيها ؟؟
سوووو : هممم .. طب بما اننا هنتكلم وبتاع .. اعزمني على نيسكافيه بلاك
صاحبي : ماشي
!!!! سوووو : و نُص فرخة مشويّة
صاحبي : خلاص مش عايز اعرف حاجه
سوووو : ده انت غريب والله .. اعزمني ياض على نُص فرخة مشويّة دلوقتي .. عشان لو طلعت
.. تاني فالتلفزيون
- لا قدّر الله يعني - تتفشخر وتقول للناس انك ياما عزمتني , بص قدام يابني
!!!!!! خليك ذات نظرة مبعديه
!!! صاحبي : مش عايز اعرف حاجه خلاص .. انا غلطان اني جيت القهوة اساسا
سوووو : - محاولا إنقاذ العزومة - خلاص خلاص .. نيسكافيه بس شغال
صاحبي : - مستسلما - ماشي
!!! سوووو : - الطمع حلو برضك - وعلبة سجاير بوكس
صاحبي : - متنرفزا - يووووو
سوووو : ياجرع باداعبك .. ها .. كنت بتقول ايه بقى ؟؟
!!! صاحبي : طب والله نسيت كنت باقول ايه
سوووو : اقولك وتعزمني على نُص فرخة مشوّية !!؟؟
!!! صاحبي : يادي النيله على نُص الفرخة المشويّة
.. سوووو : يابني ماهو نُص الفرخة المشويّة ده .. غير النُص الأولاني بتاع الشرح
!!!! صاحبي : - وهو يَعضُّ على نواجِذه - ياسلااااام
!!!!! سوووو : - بنظرة المتآمر الأهبل - آه طبعا .. النُص ده عشان تفتكر كنت بتقول ايه
!!!!! صاحبي : ..... - صمت واكتفاء بنظرة اللي هو يالهوي
سوووو : - في محاولة للكلام بجد بقى - كنت بتقول اشمعنا الكتابة الساخرة ؟
صاحبي : ايواااا - كمن وجد ابنه الغائب عنه منذ زمن !!! - اشمعنا بقى ؟؟؟؟؟؟؟
.. سوووو : بص يا قط .. خلينا نتفق الأول إن الكتابة ماهي إلا عملية تأريخ
- صاحبي : - مندهشًا في صمت
سوووو : مالك ؟؟؟
صاحبي : خايف اقولك مش فاهم يعني ايه الكتابة تأريخ .. تقولّي اعزمني على نُص فرخة !!!؟؟
!!!!! سوووو : ده هيبقى تالت نُص فرخه مشويّة .. انت مبذر قوي على فكرة
صاحبي : انا بقول امشي عشان امي عايزاني اجبلها شوية طلبات
سوووو : اوعى تقول هتجبلها نُص فرخة مشويّة !؟؟
!!! صاحبي : انا حاسس اني هيطلعلي ريش من كتر الكلام عن الفراخ المشوية
سوووو : انتوا بتاكلو الفراخ المشوية بالريش دلوقتي !!؟؟
صاحبي : - وقد استبد به الغيظ - انا قايم .. اشوف وشك بخير
سوووو : خلاص خلاص .. هاقولك وأمري لله
!!!! صاحبي : من غير نُص فرخة مشويّة ولا مقليّة
سوووو : هنشوف الحوار ده بعدين , بص يا قط .. فاكر أفلام ومسرحيات زمان .. مش الحاجات
الابيض واسود .. لأ .. أفلام أواخر السبعينات مثلا , مش كنت بتشوفهم بيقولوا في المشاهد بتاعة
المصالح الحكومية .. إن الفراخ جات في الجمعية .. وهوب تلاقي كل الموظفين خرجوا رايحين
!!!!!! يجيبوا الفراخ
صاحبي : آه فعلا
سوووو : يبقى بالقياس .. الكتابة بتأرخ الفترة اللي بيحصل فيها الحدث نفسه .. وبتقول حاجات يقدر الأجيال اللي جايين بعدهم يفهموها , زي ماحنا فهمنا لما شفنا الأفلام بتاعة فراخ الجمعية .. إنه كانت في أزمة في توزيع السلع والاحتياجات الأساسية للناس .. ومن ضمنها الفراخ
صاحبي : اه
!!!!! سوووو : بينما دلوقتي في فراخ .. وانت مش عايز تعزمني على نُص فرخة مشويّة يتيمة
!!!!!! صاحبي : - قام من عالكرسي واتخنق مني خالص - يووووووو
!!!! سوووو : - في محاولة لإثنائه عن رغبته عشان يدفع حق النيسكافيه - ياجرع باداعبك
صاحبي : - وهو يجلس - طب ماشي .. ليه مهتمين بالكتابة الساخرة بس في حوار اللسعان ؟
سوووو : - مغتاظًا - أولا .. اسمها حارة لسعان بدل ما الطشك على بوزك وانت بخيل ومش راضي
!!!!!! تعزمني على نُص فرخة مشويّة

صاحبي : - محاولا تغيير النقاش فيما يخص نُص الفرخة المشويّة - وثانيا !!؟
سوووو : ثانيا .. الكتابة الساخرة بتعيش أطول , يعني مثلا ممكن تقرأ موضوع مكتوب جد ومافيهوش سخريه أو حاجه تضَحّك .. تقراه من هنا وهوب تنساه من هنا , بينما ممكن تقرأ موضوع فيه سخريه وتلاقي نفسك بتحكيه لاصحابك او لمعارفك عشان يضحكوا .. وبكده الكتابة الساخرة بتنتشر اكتر .. فخمتو !!؟؟
صاحبي : فخمتو .. وايه بقى حوار باركن الهاكستب ده ؟؟؟
سوووو : ده يا سيدي حوار اتكلمت عنه باختصار في البرنامج .. وان شاء الله هاكتب عنه موضوع في الكتاب اللي ناوي اكتبه
صاحبي : بس انا ماشفتش الورقة .. الصورة ما كانتش باينه
سوووو : غالي والطلب رخيص .. هاورّيك ياسيدي الورقة .. وهعملّك موضوع مخصوص في
!!!!!!!!! المدونة واتكلم فيه عنك كمان .. بس اعزمني انت على نُص فرخة مشويّة

!!!!!!!!!!!!!! صاحبي : - وقد جاب جازًا - كوكوكوكوووووو
---
.. دي صورة الورقة بتاعة باركن الهاكستب
وللي مش عارفين .. الهاكستب ده منطقة سكنيه عاديه جدا في القاهرة .. فيها وحدة التجمع المركزية للي بيقدموا في الجيش .. ومعمول جراج هناك عشان لو حدّ معاه عربية و عايز يركنها .. وجنب الجراج ده في اتوبيسات بتنقل الضحايا - المجندين - لغاية المركز الرئيسي لإدارة التجنيد
والجراج ده - أو الباركن - عاملاه وزارة الدفاع .. وهي اللي طابعه التيكت في مطابع خاصة بيها
.. وتحت اشرافها , وبالتالي لما تغلط وزارة الدفاع في كتابة تيكت لركنة العربية
.. ويتكتب فيها "باركن" بدل "باركينج" او "جراج" حتى
!!!!!!!! يبقى بجد بجد .. ربنا يستر
--
.. السؤال اللي بيشغل بالي و عقلي و كل جارحه من جوارحي
هل صاحبي هيعزمني على نُص فرخة مشويّة دلوقتي !!!!!؟؟؟؟؟

ملحوظة

.. ياريت ياللي عايزين تشتموني .. تشتموني لشخصي أو للكلام اللي باكتبه
.. وبلاش الله يكرمكم - ياللي بتشتموني - تشتموني بأمي الله يرحمها
لأنها عند ربنا .. وربنا هو اللي هيحاسب اللي بيشتم

اه .. لما اتفرجت على الحلقة بتاعة الثقافية كافيه تاني .. افتكرت ان في الجزء اللي كنت لسه
.. هتكلم فيه عن موضوع هيفاء وهبي .. جات مكالمة للمذيع على الموبيل الخاص بتاعه
!! وافتكرت ان فريق الاعداد قالولنا اقفلوا موبيلاتكم
الإفية بقى .. ان المذيع هو اللي ساب موبيله مفتوح مش احنا .. واقسم بالله العظيم أول ما طلّع
.. الموبيل من جيبه ولقيته هايشوف مين بيتصل بيه .. كنت خلاص هاقولّو
!!!!!!! لو حد عايزني .. انا مش موجود
سوووو

هناك 27 تعليقًا:

adel يقول...

جامد ياصديقي اللدود :):)

بس اشد حتة

وقد استبد به الغيظ

ههههههههههههههههه
عاجبتني قوي بجد

Desert cat يقول...

سووو يا سوو ممكن اسالك عن موضوع حارة لسعان ده ؟ بس اوعى تقولى اعزمينى على نص فرخة مشوية .. انا ممكن اعزمك بطاطس محمرة

مهندس مصري يقول...

ههههههههههههههههههههههه

طلعت عين الراجل بنص الفرخة ده

معاك حق الكتابة الساخرة أكثر فهماً من العامة و اكثر انتشاراً و أطول عمراً

غير معرف يقول...

طبعا البوست يجنن زى باقى البوستات اللى انت بتكتبها بس فى سؤال< يعنى ايه كلمه ميياس >
ملحوظه
لو قولتلى ممكن اعزمك على نص فرخه مشويه
ههههههههههههه
roka

محمد عيسى يقول...

مدونتك جامدة أوي يا سووو


وفعلا الكتابة الساخرة من أصعب الكتابات وأجملها.

Desert Rose يقول...

بجد بجد انا بعشق كتاباتك وبستمتع بيها لحدآخر حرف

صبرني يارب يقول...

الاول ممكن اشكرك عشان انا ضحكت اوي اينعم مش من اعماق قلبي اوي عشان قلبي مش فاضي

انما ضحكت وانا شكلي ما كانش يجيب على ضحك خااااااااالص

ثانيا انت زعلان على التكت

وحياتك عندي جوابات رسميه ونشرات رسميه برضه ويفط بنت عمهم وبلااااااوي بتطلع مكتوبه غلط

هو فى ايه صح يا سوووووو

ما شوفتش الحلقه بتاعتك ومش تقولي عشان اشوفها ياعم

وان شاء الله هاشوفها عندك متسجله

وبالنسبه للفراخ المشويه تمشي مسلوقه ومحمره ؟؟
ولعلمك ديك مش فرخه جوه فى المطبخ اهو

تحياتي لك

أميرة علي كوكب مهجور يقول...

وعندك نص فرخه مشويه وصلحه
بسلطاته باباغنوجه :)

هههههههههه انا بجد ضحكت جدا ربنا يسعدك

Wanda يقول...

:-)))))) ضحكتنى و كنت لا اريد ان اضحك

يخرب بيت الفراخ بكل انواعه و انفلونزاتاه

حرام عليك صحبك الى جاب جاز :-))
الحمد لله لا اعرفك و لا متصاحبه عليك اصلى بخيلة و لا حسالك ثانى مين تامر بية؟

المهم ياترى (سوال تعجبى مش ليك :-)) ايه موضوع الكاب الى انت لبسه ده فكرتنى بتوفيق الحكيم :-)))

eman ezzeldin يقول...

كل كتاباتك جميلة وبتعجبنى وبتخلينى أضحك من قلبى ....ربنا مايحرمنا من كتاباتك وبوستاتك واستيتواتك

Bee يقول...

سيبك انت من الفراخ المشوية الاولد فاشن. انا بعرف مطعم بيقدم بيفتيك طعمته احسن ب كتير من الفراخ وطري زي الهليون. حا ابقى اعطيك عنوانه حتى تعمل كمين لاصحابك عنده.

غير معرف يقول...

صباح الفل يا معلم و شكرا جدا على الحبه الحلوين الى فكو الواحد على الصبح براجاء لو عايز نص فرخه انا مش عايز اعرفك اسسا
محمد فتوح

Bee يقول...

واول عزومة على حسابي طبعا.

فتافيت يقول...

سووووووو يا جامد يا جامد
طيب اعزمك على ربع فرخة.. بالرز بتاعها
عشان انت صعبت عليا.. وكمان مقدرش اعزمك
على نص فرخة كامل.. لاننا اخر الشهر
بس انا هاشيل ربع فرخة.. (غدى النهاردة).. وهاعزمك عليه :)))
الحلقة لذيذة.. ديوووو فنان موهوب
وانت بجد اسلوبك بحبه جدا
على فكرة موضوع الفرخة مش لله ولا للوطن
ده عشان لما تطلع في التلافزيووووون
تبقى تقول اني بعزمك :)) عااااااااا

Ahmed يقول...

التوبك جامد و مبروك عليك أول مقابلة
و عقبال ما نشوفك كتير ... بس هتكدب من أولها !!
بتشد في شعرك أزاااي.. امال لو مكنتش قاري المدونه بتاعتك.
بس مبروك تاني و عقبال متطلع مع مذيع أحسن من ده

غير معرف يقول...

السلام عليكم ورحمة الله وبركاته

حقيقة تعجبني مواضيعك التي تتميز بخفة دم فطرية استطعت وبجدارة أن تصوغها في مجموعة كلمات ترسم الابتسامة على وجوه من يقرأ لك

ولكنني اتعجب ياصديقي , أين مواضيعك الساخرة الجادة مثل موضوع كلبش العربية والحمار ؟؟ وايضا اين مواضيعك مع أطفال اخوك؟؟
كما أتعجب ايضا ,لماذا اصبحت مواضيعك دائما يتم بها ذكر اسمك _سوو_ ؟
أرجو ألا تكون بارانويا يا عزيزي!

اعلم انك لن ترد على هذا التعليق , ولكنها مجرد استفسارات اتمنى ان تجيبيني عليها أو على الأقل تضعها في اعتبارك , واعذرني على الإسهاب في التعليق

ملاحظة

كنت افضل أن تتحدث عن ورقة _باركن الهاكستب_ أكثر من نص الفرخة ,وأعلم انك قادر على انتزاع الضحكات من مجرد ورقة,,,بها كلمتين!!

شخص يحبك في الله

زهرة الكاميليا يقول...

الله ..

جميل أوى اليوتيوب ..

الكتابة الساخرة من أقوى الكتابات المؤثرة فهى تحمل الهدف على جناح ابتسامة ..

كل سنة وأنت طيب يا أحمد ..
سنة جديدة سعيدة ..
جعلها الله أسعد أعوامك يارب.

سومه...مجنونه فى بلد عاقل يقول...

هههههههههههههههه انت مشكله
حاضر لو حد عاوزك حقوله انك بتقوله انك مش موجود
شوفت ربنا بيرد كان ليا عندك فرخه كنتاكى وانت صاحبك مرضاش يعزمك على نص فرخه مشويه لو كنت جيبتلى الكينتاكى كان ربنا رزقك بصاحب مش بخيل
منور لتفلزيون يا سوو

سارة يقول...

سلام عليكم
محتاجه رايك كاخ اكبر ياريت تساعدنى
http://3aady.blogspot.com/

همس الاحباب يقول...

هههههههههه
دى مش نص فرخة مشوية
دى خنقة يا جدع
الراجل اتخنق منك
ههههههههه
المهم دفع حساب الفسكافيه ولا خلع
تحياتى

رامى ظاظا يقول...

يا أخى عبرنى انت بقة واقرى المدونة بتاعتى اللى عمال ارميهالك على الفيس بوك وانت مش معبرها
ا- عايز اعرف رأيك
2- علمنى ازاى انشرها لو فيه وسيلة تانية غير الفيس بوك
المدونة أهبه
http://ramyzaza.blogspot.com/

nor يقول...

بص انت سكر واكتر من السكر بشويه
واحلي حاجه انك طلعت فنون يعني زمايل ربنا يسعدك زي ما بتعرف تضحكني و ده مش سهل خالص
تحياتي يا جرع هههه

ست البيت يقول...

أولا كل عام وانت بخير السنة الهجرية هلت
ثانيا: بعتذر على عدم التعليق ولو اني بدخل وبتابع

ثالثا: الله يرحم والدتك وياريت ياريت
مدش يشتم أم سوووو ولآ أ/ أي حد تاني لو سمحتم لأ، دا من أكبر الكبائر
ثالثا
او مقلتليش معاد نزول الكتاب حسلط عليه لولو وولادها إلا بالحق يا سوووو مش عاوز قطة أسود في أبيض
ببلاش والله سيامي أو رومي الله أعلم وباباها شيرازي

اقصوصه يقول...

انا ما رطزت

الا ع موضوع النص فرخه

لاني بدون غدى :(

Soooo يقول...

الف شكر لكل اللي علقوا ويارب الموضوع يكون يعني عجبكم

وبالنسبة لكلمة مياس .. دي كلمة بالعامية الدارجه معناها كداب او هجاص او نخاع

وبالنسبة للكتاب .. فهو تم التأجيل لما بعد معرض الكتاب
وان شاء الله قبل ما يحصل في الامور امور .. هاكون قايل عالمدونة

اما بالنسبة لتعليق الاستاذ الغير معرف .. هارد عليك حالا

وربنا يسعدكم ويكرمكم دنيا وآخره يارب

Kontiki يقول...

سووو
كل سنة وانت طيب :)

entrümpelung wien يقول...

شكرا على الموضوع
entrümpelung
entrümpelung
entrümpelung wien