الجمعة، 22 محرم، 1431 هـ

!! لعل وعسى

.. لفت انتباهي ان في ناس من أمريكا بيدخلوا المدونة
.. وافتكرت ان في واحد صاحبي من ايام اعدادي سافر امريكا .. قلت لروحي طب والله فكرة
!!! ابعتلو جواب .. و لعل وعسى
-
بسم الله الرحمن الرحيم

صديقي العزيز .. عادل يوسف تادرس .. كل سنه وانت طيب

!! عادل .. واحشني قوي ياض .. و واحشني الهلس اللي كنا بنعمله ايام اعدادي
!! واحشني و واحشاني المغامرات بتاعتنا

فاكر لما هربنا مالمدرسة واحنا في تانيه اعدادي .. و رُحنا جنينة الحيوانات !؟؟
!! قلتلك ساعتها ان دي أول مرّه اروح جنينة الحيوانات .. وأول مرّه اهرب مالمدرسة

فاكر لما اتفقنا اننا لو توهنا من بعض واحنا في الجنينه .. نتقابل عند سيد قشطه !؟؟
!! ساعتها قلتلك (سيد بيه قشطه) .. وقعدنا نضحك

فاكر البنتين اللي اتعرّفنا عليهم هناك .. اللي انت اتعرفت عليهم بصراحه !؟؟
.. مانت عارفني يا عادل ياخويا .. كنت راجع من السعودية طفل خام ولا افهم في أي حاجه
!! لكن انت جريء من يومك .. اتعرفت انت على عاليا وعرّفتني على اختها عائشة
!!! واستغربت قوي ساعتها ان في طفلة اسمها عائشة .. على اسم ميدان السيدة عائشة
!!! وتخيلّنا واحنا مروحين .. اننا في المرّه الجايه هنتعرف على التحرير و رمسيس

.. اقولك على سر .. الحمدلله اننا ماتوهناش من بعض ساعتها .. اصل بصراحه يا عادل ياخويا
ماكنتش اعرف ساعتها ايه هو (السيد قشطه) ده ولا شكله ايه !!؟
!!! وكنت - والله العظيم - فاكره الراجل بتاع الايس كريم .. ايس كريم يعني لبن .. يعني قشطه

.. فاكر لما العيال (اسامه عبد الفتاح) و (ابراهيم) و (عبده) اتخانقوا معانا واستنونا برّه المدرسة
!! خدنا يومها علقة محترمه .. والنضارات بتاعتنا اتفشفشت
فاكر الخناقه دي اصلا كانت ليه !!؟
.. كانت عشان جابوا (إإح) من حمّام المدرسة .. وحطوه عالكرسي بتاع المُدرّس
!!! عشان لما يقعد المُدرّس .. يروح متلغمط (إإح) كأنه عاملها على روحه
!!!! عيال مجرمين قوي بجد
لكن احنا لحقنا مِس (نعيمة) وحذّرناها مالكرسي قبل ما تقعد .. وقولنالها ساعتها ان العيال دول هم اللي عملوا كده .. قامت هزأتهم وطردتهم .. وقالتلهم يستنوها عند الناظر
!!!!! واستنوها فعلا عند الناظر .. واستنونا احنا بعد المدرسة

فاكر اول يوم لي في المدرسة .. لما جيت عالحصة التانيه .. كانت حصة عربي !؟؟
.. وعشان انت كنت بنضاره وقاعد تاني صف .. قمت قعدت معاك
!! والوادين التانين اللي كانوا جنبك قعدوا ورانا .. عشان ما كانوش بنضارات

فاكر ساعتها انت كنت فرحان عشان قعدنا احنا الاتنين بس على دِكه واحده !؟؟
.. اكمني تخين وماينفعش يقعد معانا تالت زي باقي دكك الفصل
!!! تلاقيك كنت فرحان وبتقول يارب مايخِس ولا يبقى رفيّع

فاكر لما سألتك هو احنا مابنقعدش على أول دكه ليه واحنا بنضارات !؟؟
!!! في حين ان أول دكة العيال اللي قاعدين عليها من غير نضارات
.. ساعتها قلتلي أصل اللي قاعدين عليها .. (محمد مغاوري) ابن مس (منى) بتاعة الانجليزي
.. و(سامي بخيت) اللي أبوه أستاذ في مدرسة الثانوي اللي جنبنا .. و أساتذة المدرسه عارفينه
!! و(عزازي) أراجوز الفصل .. والأساتذة بيبعتوه يجبلهم أكل مالمحل اللي على ناصية المدرسه

فاكر لما جات حصة مس (نعيمة) بعد حصة العربي .. اللي كانت أول حصة لي في المدرسة !؟؟
أول ما دخلت مس (نعيمة) والفصل كلو وقف على رجليه الا انا .. وساعتها راحت هي باصه عليّ
و زعقت وقالتلي قوم اقف يا حيوان .. وانت رحت ساحبني موقفني من ايدي .. وقلتلها معلش اصلو
!!!! تخين وكان مزنوق في التخته
ماهو انا معذور برضه يا عادل .. اصل في السعودية في المدرسة .. ماكناش بنقف لما المُدرّس
.. يدخل الفصل .. كنا بنقف – احتراما - لما نيجي نقرا القرآن عشان ده كلام ربنا
!!! انما هنا في مصر اللي بيحصل العكس .. نقف لما يدخل المُدرّس .. ونقعد لما نقرأ القرآن

فاكر لما جبت امي - الله يرحمها - عشان تاخد بـِ تاري من ميس (نعيمة) على كلمة حيوان !؟؟
!!! امي ساعتها ضربت معاها صحوبيه .. وعيّنتها جاسوسه عليّ عشان تنقلّها أخباري في المدرسة
فاكر لما سألتك على البتاعه الغريبه اللي حاطاها مس (نعيمة) في رقبتها !؟؟
!!!!! وساعتها انت قلتلي ده صليب

فاكر لما جات الفسحه وانت وقفت في الطابور بتاع الكانتين عشان تجيب لروحك أكل !؟؟
!!! وقلتلك هاتلي معاك أكل .. عشان ماكنتش فاهم الزحمة والطابور والزيطه دي

فاكر أول حصة الدين حضرتها .. لقيتك رحت للمدرس قلتله حاجه .. وبعدها طلعت برّه الفصل !؟؟
.. وبعدين لقيت واحد جاي يقعد مكانك .. ساعتها قلتله في واحد قاعد هنا .. قاللي ماهو مسيحي
!!! هايحضر حصة الدين المسيحي تحت
.. ساعتها استغربت قوي يا عادل .. احنا بناكل من كانتين واحد .. وقاعدين على دكة واحده
ليه قمت من جنبي في حصة الدين .. ليه سبتني لوحدي !!!!؟؟؟؟

فاكر لما قابلنا شيخ الجامع اللي ابويا بيصلي فيه .. وسلمنا عليه وسألك اسمك ايه !؟؟
!!! قمت انت قلتله عادل .. قام قالك ياريت تكون عادل زي الفاروق عمر رضي الله عنه
.. ساعتها كتمنا الضحكه , بس اعذرني ماقدرتش اكتم الضحكه لما قالك واسم ابوك ايه
!!! لما قلتله يوسف .. وقالك كن صادقا كما الصدّيق يوسف .. ولا تكذب
ولما ضحكت ساعتها .. الشيخ استغرب وسألني بتضحك على ايه !!؟
!!!!! قلتله اصل اسمه .. عادل يوسف تادرس
.. قام رجع الشيخ وابتسم تاني .. وقالنا طب شدوا حيلكم وذاكروا كويس يا ولاد
فاكر الشيخ ده .. مات يا عادل .. مات و زعلت عليه قوي

فاكر لما كنا بنتقابل قدام الكنيسة اللي قدام المسجد الكبير .. كل يوم جمعة !؟؟
.. لما كنت با روح ومش بالاقي مكان في الجامع في الضِلّه عشان الزحمة
.. وكنا نقف تحت التنده بتاعة الكنيسة نسمع الخطبة مع بعض
!!!! ولما الصلاة تقام أروح اصلي .. واجيلك بعدها عالكنيسة عشان نرسم سوا

فاكر لما طلعت معاكم رحلة تبع الكنيسة .. كانت رايحه مش فاكر (دير) مين !؟؟
.. لمّا زوّغنا من الرحلة وكان معانا بنتين طالعين معاكم من الكنيسه
.. كنا عايشين دور العيال الصايعه .. وطلعنا على الكورنيش ركبنا المعدّيه رايح جاي رايح جاي
!!! لغاية ما معاد الرحلة خلص .. ورجعنا مع بعض

فاكر (ماريان) صاحبة اختك .. البت اللي انت كنت بتحبها وعايش جو الأفلام العربي !؟؟
.. اقولك على سر .. بس ده سر تاني غير السر بتاع سيد قشطه
!!!! انا كمان كنت معجب بيها .. وتقريبا كده كنت بحبها .. بس مافيناش من ضرب

فاكر لما اتخانقنا وقعدنا مخاصمين بعض فترة طويله !؟؟
.. وما اتصالحناش غير لما الاستاذ بتاع التربية البدنية قالنا عايزكم تجروا حوالين الملعب
!!!! عشان نسينا نجيب الشراب الرياضي يومها
.. ساعتها انت هدّيت جريتك عشان تجري معايا
!!! مانت عارفني تخين وباكره حصة الألعاب دي كُره العمى
.. ساعتها اتكلمنا مع بعض عادي .. ماعتذرناش لبعض حتى
!!!!! ونسيت والله ايه سبب الخناقه يا عادل يا خويا

.. عادل .. اوعى تصدق الكلام اللي بيتقال ان مصر فيها مشاكل بين مسلمين و مسيحين
.. لأ
.. اهلك في رقبتي يا عادل ليوم الدين
زي مانا عارف ومتأكد ان الموضوع لو كان بالعكس .. هاتشيل أهلي في عينيك

!!!!! عادل .. وحشتني قوي يابن الايه
كل سنه وانت .. و مصر كلها بخير يارب

ملحوظه

.. ياريت لو حد يعرف عادل في أمريكا .. يبلغه بالموضوع ده
!!!! ويبلغه كمان اني عايز جزمة نايك .. لونها احمر

سوووو

هناك 65 تعليقًا:

غير معرف يقول...

لعل وعسى الناس يبقى عندها دم وتفهم الكلام ده
لعل وعسى الناس تصفى من جواها وتحب بعضها
لعل وعسى اللى ليه مصلحة ان الكلام ده يتقال علينا واحنا طول عمرنا اخوات يتكتم
لعل وعسى حبنا لبعض يفضل فى قلوبنا زى ما هو
لعل وعسى عادل يقرا الكلام ده ويبعتلك الجزمه الحمرا وقوله يجيبلى الزرقا
أخوك محمد زهير

لماضة يقول...

تصدق شفت جزمه نايك امبارح لونها احمر بخطوط بيضا
افتكرتك ساعتها :)
كل سنه وعادل طيب
وكل سنه ومينا وجرجس وجون طيبين

adel يقول...

انا اسمي عادل ياسوووو
ورفضت اسيب مصر

عارف ليه ؟؟؟
عشان فيها واحد زيك

مريم يقول...

الله عليك يا سو جميل جدا

بطوط حبوب يقول...

مجرم :D

محمود الدوح يقول...

اول مرة فى حياتى احس فيك البرأة بتاع العيال الصغيرة
مكنش لازم تختمها بالجزمة النايك الحمرا
بجد فطست على نفسى موت

على فكرة بيقولوا فى امريكا فى نوع من الحلويات كدا لونه اصفر غريب كدا
بيدى على فسفورى بالليل
ينفع جو الشبورة اللى انا سايبها برة دلوقت حالا
اسمها مش عارفه
بس واحد صاحبى فى امريكا قالى دى حلوة
ياريت لو تعرف تقول لعادل ان اخوه محمود مستنى مع الجزما الحمرا الحلاوة الصفرا اللى بتقلب فسفورى بالليل وبتنفع فى جو الشبورة اللى برة البيت دلوقت

:)

مصطفى ريان يقول...

مقال حلو قوي يا سو
في براءة الاطفال والحنين اللي كلنا بنحس بيه لماضينا وذكريتنا الجميله
وكمان حبنا لبعض كمسلمين واقباط
غيركمان خفه دمك المعهوده
لك كل محبتى يا جميل

بدراوى يقول...

انت جميل اووووى يا سووو
يا اخى الدمعة كانت حتفر من عينى بجد

غير معرف يقول...

teslam edak sd2ny

P A S H A يقول...

يا سووووووووو يا جامد

كل سنة وكل إخواننا المسيحين بخير وصحة وسلامة وسعادة وعيد سعيد عليهم إن شاء الله .. كل سنة وعادل بحب السيما ومينا مش آسف ع الإزعاج طيبين .. كل سنة واحنا كلنا المصريين طيبين .

:))

NIDAAL .R يقول...

أحيييك على التدوينة دى يا سوووووز

جااااااااااااااااااامدة جداً جداً جداً

أنا عارف عادل .. وهوصيه يجيبلك اللى أنت عايزه ويبعتلك فوقيه بوسة أمريكانى

Zika يقول...

انا بحبك يالا
هات بوسه فرنسية الايحاء

صفا سارة يقول...

بجد فظيع اوى البوست ده عبقرى بجد

أحمد عاطف يقول...

تصدق بالله .... انت كتبت جواب اروع من اي كلمة ممكن تتقال عن الوحدة الوطنية والحركات الهبله اللي كلامها بيكون ممسوخ

تسلم ايدك

صبرني يارب يقول...

على وعسى الناس تفهم
على وعسى الناس تقدر

على وعسى يعرفوا اصلا بس دينهم كل واحد فيهم

حاجه تقرف وامخاخ متعبه يا عم

موضوع حلو اوي بجد يا سو وبيقطع فى قلبي افكار الناس فيه وانا اتكلمت فيه من الوجهه الشرعيه عندي على مدونة الرؤيه

ويارب يا عادل تكون حاضرنا يا اخويا وتجيب الجزمه لسو

اقصوصه يقول...

ولد يلبس جزمه حمرا؟

مش راكبه خالص!

ما احلى من ذكريات الدراسه :)

ňįĝŗő يقول...

أستااااااااااذ
بل
و معلم

البنفسج الحزين يقول...

بس معقوله انت فاكر
كل التفاصيل دي
من ايام اعدادي
ده انت من النوع
اللي بيشيل ويخزن بقا
ههههههههه

كلامك مؤثرجدا ياسووو
ربنا يبعد عنا الفتن
ما ظهر منها وما بطن
تحياتي

خواطر شابة يقول...

ان تحفظ اهله ويحفظ اهلك هذا هو الاصل وهذا هو المفروض ان يكون وغيره هو الدخيل والمستهجن
وانا اقول معك لعل وعسى يكون هناك من يفهم ويستوعب المعنى

eman ezzeldin يقول...

أول مرة أقرالك ياسو ودموعى تغلبنى ..رائعة ومؤثرة جدا وصل المقصود منها بس لاسف ده كان زمان.. والا ايه؟ربنا يستر ع اللى جاى

Manamino يقول...

تصدق بايه ياجدع
انا من زمان قوووووووووووووووي مابكيتش وانا باقرا كلام حد
قد مابكيت وانا باقرا اخر فقرة كتبتها
اقولك ايه بس
انت بجد مبدع وفنااااااااااااان
والمقال جامد جامد جاااااااااامد جدااااااااا
تسلم ايدك ياجميل
وكل سنة وانت طيب

MǿиY El-Shreef يقول...

:)

والله اتأثرت اوي انا بالبوست ده

نفسي كل الناس تبقى زيك ياسوو وربنا

ويارب ياخويا عادل يرجعلك بجزمه نايك حمرا وكل حاجه انت عايزها :))

حرروف يقول...

ياااة فكرتني بصحبتي كريستين في اعدادي بردوا واخوها كارلوس لما كنت اقف تحت البيت وانادي كارلوس

والكنيسة اللي بعدينا بشارع ونيفين صحبتي اللي كانت بتاخد درس فيه ولما باباها بيجي يروحنا يوم وماما تروحنا يوم عشان منعديش السكة لوحدينااا

ولما كرستينا صحبتي تعبت في امتحان الدين وبقيت اسئل صحبتنا التالتة عشان اغششها

وسامح ابن ميس فوزية اللي كان بيحفظ معانااا القران في الحصص العربي ويسمعها معانااا

كل سنه ومصر طيبة

حسبى ربى يقول...

يارب حد يفهم حاجة ......... بجد كفاية كدة فتن مش ممكن دول بقوا بيتفننوا فيها ..... ربنا يكرمك يا سوو يا رب

فاتيما يقول...

لعل و عسى يا سوووو

البوست دا تحفة
فكرنى انا كمان بأيام
و ناس حلوة


يسلم قلبك
قبل كلامك

Kontiki يقول...

جميل
:)

Soooo يقول...

زهير - لماضه - عادل - مريم - بطوط - الدوح - ريان - بدراوي - غير مُعرّف - باشا - نضال - زيكا - صفا سارة - احمد عاطف - صبرني يارب - اقصوصة - نيجرو - البنفسج الحزين - خواطر شابه - ايمان عز الدين - منامينو - موني الشريف - حروف - حسبي ربي - فاتيما - كونتيكي

كل سنه وانتو طيبين .. مصريين مسلمين ومسيحين

ويارب يارب يارب مصر تبقى بخير يارب
عشان خاطر حبيبك النبي يارب
احفظ مصر يارب من كل شر ياااارب

مهندس مصري يقول...

جميل يا سوو
صحيح أنا ما عمريش كان ليا اصحاب مسيحين بس عمري ما كرهتهم
الفكرة بس ان اسمي محمد صلاح
فدايماً في إعدادي و ثانوي و حتى في سكاشن الكلية كان الفصل كله بيكون محمد
فما جاتش فرصة اصاحب حد منهم
لكن أخويا الصغير معتز كان له واحد صاحبه حبيبه مسيحي إسمه نادر و كانوا أكتر من الإخوات

التطرف شئ مش أصيل في مجتمعنا بل هو مرض محتاج علاج

ماء تشرين يقول...

انت جميل اوى ياسووووو

رحــــيـل يقول...

سوووو
من زمااااااان معلقتش هنا بس بجد ابتسمت قوى من قلبى وحسيت ان فعلا احنا لسه بخير مهما يحصل
احنا ولاد بلد بجد مهما حصل
:))
تحياتى واحترامى جدا جدا

سومه...مجنونه فى بلد عاقل يقول...

يا ربنا على دخلاتك يا سوو
لعل وعسى عادى يسمع اسمحلى انزل تنويه صغير عن الموضوع دا فى مدونتى وحنزل تعليقى عليه

عاشقه الرومانسيه يقول...

والله ماسكه دموعى بالعافيه
كلامك قريته باحساس زى ماانت كتبته باحساس
واحساس رائع كمان
بجد ياسووووو
تسلم ايدك

MyEgypt يقول...

سووووووو ناااايس

أجمل مقاله قرأتها فى أى مدونة.

Sahran يقول...

حملة من اجل إدانة الاحتقان الطائفي والديني في مصر والتضامن مع الأقليات الدينية

ahmed eldesoky يقول...

انا متابع المدونة من فترة وفبها حاجات كتير عجبتنى اوى بس فعلا دا جامد جدااا لدرجة اتى برد عليه اهه
ههههههههههههههههههه

ـ-ـ- أحمد عبد العدل-ـ-ـ يقول...

يااه ياسوو
أصعب حاجة إن إنسان يفقد الأمان و تحس إنه خايف منك و تبقى عاوز تطمنه و هو مش سامع لأنه خايف ،،، ساعات بسال سؤال عارف إجابته ليه مش كل الناس طيبين ،،، ربنا يستر ياسوو ونفوق بقى لمصر و الناس الخايبين ميضعوناش معاهم ،،، مصر بتبان غالية أوى لما نحس بالخطر
احنا مشاكلنا بقت غريبة أوى ،،، سنة و شيعة و مسلمين و مسيحيين و شمال و جنوب و ،،، مش ملاحظين ان فى حد بيفرقنا؟ تحت أى مسمى ،، بس العيب علينا بجد اننا بنرضى و ناس مننا بيقوموا بالمهمة بالنيابة عنه
ربنا يستر بجد

Wanda يقول...

سوووو
فكرتنى بموقف حصلى مع صديقتى خلال الثانوى و الجامعة
اصلها مسيحية و انا مسلمة
و كنا متصاحبين و العيال خاوين يوقعوا ما بينا و احنا مكبرنلهم
هى طلعت الاولى و انا الثانية و بصراحة هى تستهلها

ايه الموقف
كنا فى حصة الدين و الاستاذة المبجلة :-)) داخلة تدينا الحصة و بعدين معرفش الكلام اتحول ازى بدات تشتم فى المسيحين
كنت فى اولى ثانوى و قمت و استأذنتها اخرج سالتنى ليه انا رايحة فين
راديت اقف بره ، محبش اقعد فى جلسة نميمة و غيبة و خصوصا اننا كنا بسمع الاية بتاعت " أذا اتاكم فاسق بنبأ.." من حصتين
لقيت المددرسة وشها احمر و قالتلى ازى تقولى كده
قولتلها اعز صحباتى فى الفصل مسيحية و محبش انها تعرف انى قعدت اسمع كلام بالشكل ده و سكت فاحسن اخرج، لانى واثقة انها حتعمل زى فى حصة الدين بتاعتها

طبعا قالتلى اقعدى و ياجمماعة بطلوا كلام خارج الدرس و سمعى يا شاطرة (الى هى انا :-)) الحمد لله كنت حافظة ساعتها علشان متهزقش بس المدرسة فضلت مش طياقنى)

الغريب انى منطقتش بالموضوع ده لصحبتى ، بصراحة اتكسفت مننا احنا المسلمين
بس لقيتها ثانى يوم بتقولى انا متشكرة على الى قولتيه فى حقى
سالتها عرفت منين ؟؟ مرديتش عليا
بس قولتلها الى وصلك الكلام اكيد قصده وقيعة بينا او اكبر مننا احسن نسكت و نلم المواضيع و بالفعل سكتنا و متكلمناش عن الموضوع ده ثانى

تعرف انها لما كنا فى الكلية كانت عايزة تزور دير قريب من الكلية بس فى دهليز شعبية و قصدتنى اروح معها
وروحت و دخلت علشان مفضلش فى الشارع لوحدى
و ساعتها القسيس بتاع الدير عمل فيا الى عمله الشيخ فى صاحبك بس انا الى كنت بابتسم و هى الى كانت مكسوفة خايفة انى ازعل
بس الامور مشيت عادى و مفيش حساسة و لا زعل و لا كسوف
و الصحبية لسه موجودة و يارب تدوم و متتطعقش
و متهاجرليش بره مصر :-( زى الباقين

صباح الصباح يقول...

سلامين وحتة يا استاذ سووو العزيز

اية اخباراتك

فكرتنى بالبوست دة بفيلم الرهينة لما سافر عند صاحبة المسيحى

وعموما اذا كان ع الجزم هوة لازم يكون لونها احمر... انا شفت واحدة صفرا انما فى الجون

رامى ظاظا يقول...

أقرب مايقال عليك
إنك "صبحى" الكتابة
عشان بتقول اللى انت عايزه من خلال حاجة تانية خالص
حقيقى موهوب يا سووو

عن نفسى كمسلم مقتنع تماما ان الاسلام بيوصى بالمعاملة الحسنة والطيبة مع المسيحيين واليهود فهم أهل كتاب منزل من عند الله
مع ملاحظة أن هذا لا ينطبق فى اعتقادى على الصهاينة

زهرة الكاميليا يقول...

صباحك سكر ..

طبعا صباح لأن الفارق بينا ست ساعات ..

طب خليك عادل وأنشر صورة لعادل عشان نعادل بينها وبين الوجوه :)


ربنا يحفظكم لبعض يارب

!!! عارفة ... مش عارف ليه يقول...

كان لي مدة ممكن تكون طويلة شوية مجيتش هنا

ومفيش عندي تعليق على موضوعك ده غير إني أقولك

أنا جيت هنا عن طريق واحد صاحبي مسيحي اداني لينك "لعل وعسى" وقالي اقرا البوست ده


وليد أحمد الزهيري

سهر الليالى يقول...

أنت جميل وجامد جدا يا سوووو

غير معرف يقول...

جامد يا سووو
كل سنه وانت طيب
بجد بجد مؤثرة جدا

أم .. بوبه يقول...

جميل جداااا

أول زيارة وإن شاء الله مش هتكون آخر زيارة

ABO JOSEF يقول...

أخي سووووو
بجد احييك علي كلماتك وذكريات طفولتك
لأنها كمان زي طفولتي وذكرياتي مع إخواني وأصدقائي سواء مسلمين أو مسيحيين لأننا ماكانش فيه فرق أو تفرقة لأننا أصحاب وجيران طول عمرنا ..... وأنا لما بأنزل زيارة لمصر والله العظيم أول ناس أسأل منهم مها الست أم مكرم وصديقي عيسي واروح أزورهم أو هما يزورونا
الإحتقان والعنف الديني لم يكن معروف عندنا وأدعو الله أن يصون مصر ويجنبهامثل هذا الخراب

تحياتي لك ولكل أهل مصر مسلمين ومسيحيين
وسلامي إلي عادل بتاع أمريكا

sookra يقول...

اول زياره
بجد بكابر من فتره انى ادخل هنا
مدونتك بتقابلنى كتير وكنت بخاف ادخل
دلوقتى عرفت ليه كنت بخاف عشان كم المشاعر الرقيقه والصادقه دى هتتعبنى جدا
تحياتى

غير معرف يقول...

slam alikm
i got engaged sooo
from my long life love
lolololliiiiesh
wish you same soooo
Nani : )

أُكتب بالرصاص يقول...

أستااااذ يا عجوز

بغض النظر عن المغزى من الموضوع ، إنما فكرتني بأيام المدرسة ، واصحابنا المسيحين ، والرحلات والمقالب ،


ومن مغزى الموضوع احب اقول
معلهش يا بلدي
والله سحابة وتعدى

غير معرف يقول...

السلام عليم موهوب جداو حساس جدا واتمنالك تكون مشهور جدا حتى ولو على مستوى النت طريقتك فيها كتييير من طريقة الكاتب الصحفى بلال فضل

maioya يقول...

لعل وعسي كلمه تاثر
انت هايل اوي :)

غير معرف يقول...

مبصدقش المواضيع ديه خالص
مع كل احترامي للاخوه المسيحين

غير معرف يقول...

بيقولو ان الكلام اللى بطلع من القلب بيوصل للقلب وانت كلامك لمس حاجه حلوه اوى جوايا ربنا يكرمك على الموضوع الجميل ده ويارب الناس تفتكر المشاعر الكويسه وتنسى التفرقه
roka

z!zOoOo يقول...

السلام عليكم

يارب تكون بخير

بوست طفولي فيه دفء

ياريت عادل يسمع

وياريت الي زي عادل يسمعوا

والي زي سوا يسمعوا

في كل العالم

إن دول مش واحد ولا إتنين

دول كتير قوي

وحتي لو مش بيربطهم ببعض الحب

بيربطهم الاحترام والجيره والعشره والموده

كوكتيل جميل إسمه مصري بيتباع في مصر

يارب كل الناس تفهم بقي

ويبطلوا فعلا خلافات علي مفيش

كل سنه وكل المسلمين والمسيحيين والمصريين بخير

ويبعد عنهم كل مخرب عايز يضرب نسيج مصر

كل سنه وانت طيب يا سو

بوست حلو بجد

أتمني تنورني

تحياتي

سيكا مزيكا يقول...

يسلم قلمك يا سعودي
تسلم يا ولدي

سيكا مزيكا يقول...

اسمح لي يا صديقي العزيز أحط لينك مدونتي المتواضعة عندك

لو مكانش يضايقك

ولو هتضايق
امسح اللينك قوام

http://se3da.maktoobblog.com/wp-admin/promote_index.php

رامى ظاظا يقول...

على فكرة يا جماعة تقريبا كده سوو عامل لنفسه نظام فى الرد على التعليقات وهو انه مايبدأش يرد إلا بعد ماعدد المعلقين يعدى رقم معين

قوس قزح يقول...

طول عمرك يا سوو اسلوبك فى الكتابة يجنن و يدخل القلب

بوست جميل اوى
الغريب فى الصحوبية بين المسلم و المسيحى تحسها زى اتنين قاعدين فى مكان عالى و بيتفرجوا على الناس و بيضحكوا عليهم و على فكرهم الضيق

و الله احنا لو اتعاملنا بقلوبنا مع اللى حوالينا و بعقلنا فى شغلنا هنكون احسن ناس

غير معرف يقول...

أخويا سوووووو

بصراحه أول مره أقرالك وكان السبب أختى بت خيخه علشان حاطه عندها الموضوع ده

موضوع جميييييييييييييييل جداااااااااا وأسلوبك أكتر من رائع

انا مش هاقول غير خلى اللى بيثيروا الناس ويقلبوها على بعضهم يتلموا ويقروا ويشوفوا اننا عمرنا ماكنا بنشوف مسلم ولا مسيحى بس كنا بنشوف اننا أصحاب

تحياتى وبجد تسلم إيدك

أخوك

آسر الشاملى

أمل حمدي يقول...

بجد أنت رائع

ولعل وعسى الناس تفهم وتحس


تقديري

wella يقول...

بجد بجد من احلى المواضيع اللى قريتها

بجد انتة جامد اوى

ربنا يحميك يارب

wella يقول...

بجد حلو اوى ياسووووووو


ياخرابى

انا قريت الموضوع دة بعد المتش

لولوولولوولولولوولول

شمعى أسعد يقول...

مقال رائع
اهم ما فيه انه بيكشف عن دور المعلم ورجل الدين
فى تفكيك العلاقة البريئة بين الطرفين

هم هايخسروا ايه لو سابوها بريئة؟؟؟

Esmat يقول...

رائع يا سووو،ومنتهى البراءة والصفاء جميلة جداَ،ربنا يجمعنا دايماً ولا يفرقنا أبداً،وتتكتم كل كلمة فيها إيحاءات أو إساءة تضر بينا جوا صاحبها،وكل سنة وإحنا سوا مسيحيين ومسلمين مصريين

تايهة بين الناس يقول...

لا من يومك مجرم ياكلبظ
واحشنا ياسوووووووو
الفيستوك من غيرك مضلم

entrümpelung wien يقول...

شكرا على الموضوع
entrümpelung
entrümpelung
entrümpelung wien