الجمعة، ٢ محرم ١٤٢٩ هـ

!! حدث في اتنين وسبعين .. بِـ شرطه

على غرار المشكلة اللي اتنشرت في بريد الجمعه واللي كانت باسم حدث في المترو .. وكان صاحب المشكله بيحكي عن موقف حصل قدامه في المترو لواحد مسلم متدين بيقرا من المصحف وهو في المترو .. وواحد تاني مسيحي او انا بافضل اقول عليه قبطي والجمع اقباط لان هي دي التمسيه الصحيحه لمسيحي مصر .. المهم اخينا المسيحي ده راح مطلع الموبيل ومشغل من عليه ترانيم كنائسيه .. والمسلم شاف كده راح معلّى صوته في القرايه .. قام القبطي علّى صوت الموبيل هو كمان .. وفضلو يعلو صوتهم قصاد بعض وكأنهم بيتخانقو .. وتطور الموضوع لخناقه فعليه بالبوكسات .. الى اخر المشكله
المهم .. كنت متجها الى الشغلانه اللي بعملها واللي هي عمل ديكورات فاخره في احد الترب او المقابر في السيده نفيسه
ولاني من سكان المعادي الجديده .. ومش معايا عربيه خاصه بي .. فالمشوار مقرف قوي خصوصا اني لو فضلت رايح جاي من هناك بالتاكسيات فهخلص السبوبه كلها ومش هيطلعلي اي مليم
ولاني من ساعة حوار (وهي امبابه مافيهاش بطيخ ؟!!؟) بطلت اركب المترو عشان مش ناقصه حوارات تفقع الواحد ولا ترفع الضغط وانا صاحب مرض خلقه والحمدلله
ولاني برضه طخين - بالطاء وليست تخين بالتاء كتفعيل اكثر قوه للفعل تخن - ومش باعرف اجري ورا اتوبيسات ولا اتمتع برشاقة موظفين الحكومه المصريه وقدراتهم الرهيبه على الجري المتواصل وراء اي اتوبيس او ميكروباص لمده خمس ست محطات متتاليه ثم القفز برشاقة الغزلان لركوب هذه المواصله .. وللاسف مابيستمتعش بالجلوس او الوقوف لمده كافيه لانه تقريبا قضى نص الطريق لبيتهم جري ورا الاتوبيس
فرحت متجه على موقف الاتوبيسات اللي في صقر قريش واللي مش بعيد عن منطقة سكني.. وركبت اتوبيس رقم 72 بشرطه والمتجه لمكان الشغلانه اللي باعملها
ولله الحمد والمنه اني لقيت كرسي فاضي او بمعنى ادق كنبه من اللي بتشيل نفرين فاضيه .. قمت قاعد ناحية الشباك واللي مارضيتش افتحه وقلت الدنيا برد والحياه مش طالبه تكتكه
وقبل ان يتحرك الاتوبيس لقيت شخص عملاق يرتدي جلبابا بنيا وعليه جاكته بني غامق ودقنه حاجه كده هيبه .. بتاع نص متر مثلا
وراح قايلي بصوت اجش .. السلام عليكم ورحمة الله وبركاته
ومع اول حرف من كلامه لقيت رائحه منفره ورائحة جثث محنطه بل ومتحلله من قبل جثث جدودنا الفراعين
رديت عليه السلام كاملا ورحت مدور وشي بعيد عنه عشان مش طالبه روايح عالصبح وخصوصا اني كنت فاطر فول بالبيض وطعميه وقرنبيط .. واي نسمه هوا ملوثه او غير سليمه هتخلي الاكل اللي كلته كللو يضيع علي ويطلع من بقي بس على هيئة عجينه ممتزجه ببعض العصاره الهضميه .. باختصار مش طالبه اني استنطق على رأي اخوانا الفلاحين
وبعد ان تحرك الاتوبيس وهو كومبليت وكل الناس قعدت عالكراسي خلاص راح اخينا اللي جنبي مطلع مصحف وقعد يقرا بصوت خافت .. وطبعا بقه مفتوح والروائح عماله تنتشر بزياده .. حاولت باستماته اني افتح الشباك اللي جنبي ماعرفتش لانه تقريبا متشمع بالشمع الاحمر عشان سكان الاتوبيس .. قصدي ركاب الاتوبيس .. مايتلجوش من البرد
طب وبعدين .. ده السكه طويله من صقر قريش للسيده نفيسه .. ولو فضلت الحياه بالريحه دي انا بجد هيطلع ترابنتيني
قلت يا واد خليك شاب شيك كده واعمل حركة ذوق من غير ماتحرج الراجل وتقوللو اقفل بقك اللي عامل زي مقابر الامام الشافعي .. ورحت مطلع من جيبي باكو اللبان الكلورتس الازرق واللي مش باعرف امشي من غيره .. وفاتح العلبه وخدت لبانه منها وعزمت عليه .. لقيته بصلي نظره جاده قوي وقاللي .. ماينفعش اتلّبن وانا باقرى كلام ربنا
ونظرلي نظرة صارمه .. كمن ينظر ليهود بني قينقاع
قلت بس على كده .. الحوار مش هيجيب اي فايده بل بالعكس النتيجه هتبقى عكسيه .. وفي نفس اللحظه اللي قررت ان التزم بالصمت واشغل تفكيري بأي حاجه وانا باكل اللبان واللي فعلا قلل من التأثير السلبي لرائحة مقبرة توت عنخ امون اللي اكتشفوها جنبي في الاتوبيس .. لقيت واحده ست شايله ابنها وملخومه بيه وجات وقفت جنبنا .. واخينا اللي بيقرا من المصحف ولا كأنه هنا خالص .. قلت ياد ابدأ بنفسك وخدلك ثواب عالصبح كده عشان ربنا يكرمك ويرزقك .. فقلتلها تعالي يا اختي اقعدي هنا .. وقمت من عالكرسي عشان اطلع لاني من الناحيه اللي جوه .. ولان اخينا اللي جنبي عملاق ومن نفس نوعية الناس اللي لو هم قاعدين في اخر كنبه في الاتوبيس وفاردين رجليهم لقدام .. ممكن صوابع رجله تخبط في ودان السواق .. فقلتله معلش بس ممكن تطلعني .. قام مزحزح رجلية للناحيه اللي بره شويه وما قامش .. وانا لاني طخين فرحت مخبط في رجليه واللي هي فعلا كانت لسه خابطه في الكنبه اللي قدامنا .. وبعد ماخرجت بعون الله وانا بازداد خنقه منه وبقول للست اتفضلي .. لقيته على نفس الوضعيه اللي هو فيها وعايزها تدخل جوه وتحكحك فيه
الست بصتله باستغراب وقالتله طب ادخل جوه بعد اذنك .. قام بصلها وهو بيقرا من المصحف وراح مشاور بايده وكأنه بيقوله خشي جوه من سكات .. ورجع يبص للمصحف عادي .. قمت انا قلتله ونبرة صوتي بقى فيها شيء من الخنقه على بعض من الغيظ على احساس بالقرف منه .. وقلتله ماتدخل جوه ياعم الشيخ عشان ماتلمسكش وهي بتدخل تقعد مكاني .. راح باصللي بنفس النظره السابقة الذكر وقافل المصحف ومخلي صباعه من جوا عشان الصفحه ماتضيعش منه .. وقاللي بصوت كللو تحدي
وهي ايه اللي مخرجها بره بيتها اصلا
!!!!!!!!!!!!!!
انا بطبعي صعيدي .. دمي حامي .. دماغي صرمه قديمه .. لساني بجح .. قليل ادب .. ومخنوق من الاشكال اللي زيه
فرحت ساحب شخره اهتزت لها اركان الاتوبيس بل وهيئة النقل العام بل والقاهرة الكبرى ككل
واعتقد اني في اثناء سحبي للشخره كدت ان اشفط العيل اللي الست شايلاه
وعقب هذه الشخره المدويه .. انفجرت في اخينا ده وقلتله بصوت عالي وكللو خنقه وغضب وقرف
ياعم اختلقلها العذر .. جوزها مسافر ولا عيان ولا لاقدر الله متوفي وماعندهاش اخوات ولاد وابوها راجل كبير في السن وابنها تعب ورايحه توديه المستشفى .. اذنبت في ايه يعني لما تنزل وتخرج من بيتها
وسبحان الله
تحول هذا الشخص من شخص عنيد دماغة مقفله معايا وكللو تحدي الى شخص اخر وديع .. لدرجة انه دخل جو جنب الشباك من سكات
وقعدت الست بابنها
بعدت عن المكان اللي انا فيه شوية ورحت سندت ضهري في القزاز اللي موجود ورا السواق واللي ملزوق عليه شوية اعلانات غريبه لمراكز تدريب تؤهل لدخول كلية شرطه على اعلان عن سماعة اذن خارقه تخلي الاطرش يسمع دبة النمله على اعلان عن شخص مفقود ويرتدي جلباب مقلم وشبشب بصباع
وفي اثناء ده بصيت ناحية الست اللي قعدت مكاني لقيتها استوعبت ان الاخ اللي جنبها مخزن حفريات في بقه وكل مابيفتح بقى عشان يقرا من المصحف .. الحفريات دي بتنادي باستماته وبتطلب المساعده من العالم الاخر
ابتسمت مابيني وبين نفسي واستغربت قوي من الشخصيه دي .. اه صحيح النهارده الخميس وممكن يكون صايم .. ورائحه فم الصائم احب الى الله من رائحة المسك .. لكن ايه اللي يمنع انه لما لقى الناس متضايقه من ريحة بقه وهو بيقرا القرآن انه يقفل بقه ويقرا بعينيه
محطة السيده نفيسه جات .. رحت للسواق وقلتله على جنب يا اسطى
نزلت .. وشقيت طريقي وسط الترب
عشان اعمل شغل الديكورات الفاخر .. لمقبرة احد أباطرة اللحوم في مصر
سوووو

هناك ٥٢ تعليقًا:

هناء يقول...

سلوكيات غريبة من ناس من المفروض انها متدينة و تعرف ان ديننا يشترط النظافة و احترام المراة
هو لا نظيف و لا يحترم الناس، عجبي

Ahmed Mubarak يقول...

سووووو يا ضنايا..
مش من حق حد يحكم على حد كدة..على الاسلوب دة مفيش بنات او سيدات تخرج من البيت خالص..
هوا بصراحة - مع اني قعدت 5 دقايق اضحك من رد فعلك - بس تمام يا معلم..انت لسه هتتناقش..انت كدة حليت الموضوع..
وممكن كمان تخليه يعيد تفكيره .. أو على الاقل ميكنش خش في التعامل كدة
تحياتي

Unknown يقول...

NO COMMENT
بجد مش عارفه اقول ايه
الناس ليه بقت تعمل مع بعضها وفي بعضها كده ليه
زمان مكنش في الكلام ده
بمكن ضغوط الحياه...حاله البلد...الحاله النفسيه
الله اعلم
بوست حلو قوي وفعلا لمس كام وتر حساس كده

سلام

Unknown يقول...

والله مشكله فعلا
اسلامنا كله ذوقيات
مش عارفه ليه الناس متجاهله الحكايه دى
بس امسك اعصابك ومتتهورش
ياما هتشوف من الاتوبيسات
امال بقى لو ركبت ميكروباص يا سوووو
هتعمل ايه

Unknown يقول...

والله الناس دي غريبة فعلا هو ماله هو نازلة من بيتها ولا مش نازلة
هو هيحكم علي الناس كمان؟

ثم هي كانت عملت ايه صحيح لما نزلت من بيتها

حظها بقا المنيل انها اتكعبلت في ناس زيه علي الصبح

ربنا يهدي

الشريف / جمال طة يقول...

مطلـــــــــوب القبــــــض
على نصاب شقق زهراء المعادى / بالمعادى / بمحافظة القاهرة
المهندس / ايهاب فراج محمد ابراهيم الزينى
وعلـى كـل من يقابله التفضل بتسليمه مشكورا لأقرب قسم شرطه أو أقرب رجل أمن
وهذا النصاب تم تأييد الحكم علية بالسجن فــى القضية رقم 9443 لسنة 2007 م جلسة 4/11 /2007 م محكمة المعادى حصر رقـــم 13182 لسنة 2007 م و صادر ضدة اكثر من ثلاثون حكما قضائيا
وعنوان سكنه وعنوان الشركة / شركة الزينى للتعمير 56 طريق مصرحلوان الزراعى / برج بدر أمام فندق المعادى
بطاقة رقم 27003211203839
و النصاب يتنقل بين مدينة 6 أكتوبر بمحافظة الجيزه و مدينة المنصورة بمحافظة الدقهلية /// ومركز بشبيش بطنطا بمحاظة الغربية
وعليه أكثر من حكم نصب واحتيال وجارى نشر اسماء وعناوين أقاربه وكل من تربط بينه وبينهم صلة نسب أو متسترا عليه
الشريف / جمال طـه
تليفون رقم 0104710778
( المواطن هو رجل ألأمن ألأول فى محاربة الجريمه والتصدى للمجرمين )

غير معرف يقول...

شربات يا سووو .. جدع انك اديته على دماغه .. ناس تخاف ما تختشيش ..

Rehab Mostafa يقول...

كويس أوي انك رديت عليه كده ... هو مال ههي نازله ليه!! ما كل بني أدم وليه ظروفه اللي يعلمها ربنا ... وبعدين المفروض مادام المصحف في ايده يعني يعرف ربنا المفروض يعني .. كان قام علشان يدخل الست جوه ولا كان هو دخل وخلاص
الست بصراحع صعبت عليه من الوصف اللي انت وصفته للراجل ده
بس أنا قرفت أوي أوي أوي في تشبيه معين كده :( بس بجد عليك وصف وتشبيهات تحفه :D

Rosa يقول...

هههههههههههههههه
ياعيني يا سوووو
بجد الريحة وصلت لحد هنا
:D
ربنا كان في عونك و في عين الست الشريرة الي خرجت من بيتها عشان تضايق عمنا الشيخ
المشكله ان امثاله بجد الي بينطبق عليهم الآية دي *أتأمرون الناس بالبر وتنسون أنفسكم وأنتم تتلون الكتاب أفلا تعقلون * مش هتكلم عن اقل قواعد الدين واننا مانأذيش غيرنا و دا بيأذي فعلا و قول و عمل و كل حاجه
و حمدالله على السلامه و الي يركب مواصلات عامه ياما يشوف :D

Nani يقول...

السلام عليكم
انا لو مكان الست كنت رح اسمعه كلمتين بسوو عمره- كناية عن اني رح ابهدله
نفسي الله يبعتلي واحد زي هيك علشان افرجيه مقامه على الصحيح
جته القرف رجل مقرف قرفني
سووو هسا الترب = مقابر بتعمل ديكور في المقبرة؟
ما فهمت

رحــــيـل يقول...

شخصيات هم بصراحه فعلا والمشكله انهم بيوصلوا انطباع معين عن الشخصيه المتدينه

كويس انك رديت فعلا ناس تخاف متختشيش
وعايزها اللى يديها فوق دماغها عشان تعرف ان الله حق
وان الدين مش انه يمسك مصحف وخلاص
لاء الموضوع فعلا موضوع سلوكيات وده للاسف شئ مفقود تماما

طبعا عرض جميل ووصف دمه خفيف
بس ابقى امسك اعصابك شويه واتعامل بهدوء صحتك بالدنيا ياراجل

سلامووووووز

زُمُرده يقول...

الدين معامله

حقيقه والله تخيل لما اللي ميعرفوش دينا واسلامنا يشوفوا انسان بسلوكيات بالشكل ده هيقولوا المسلمين دول ايه؟؟

من حسن اسلام المرأ تركه مالا يعنيه
الله جميل يحب الجمال
طيب ده راجل المفروض يكون خارج لابس كويس ومهندم ومتعطر ويكون مسلم بحق ما هو بيتمنظر باللحيه والقرآن
ويقوم للست ويحافظ ع عرضها
وبوصفكك ليها مهياش بت للبسه ع الموضه ولا ملونه وشها

ساعتها كان اقام عليها الحد
باجبارها تشم انفاسه لمده نص ساعه متواصله
اكيد هتكون ماتت قبلها بكتييييييييير

تسلملي يا غالي ياسوووووووو

غير معرف يقول...

ana low mnk kont adto belgzma 3la bo2o el-m3fen we fd7to we olt ya gma3a el ragel da bo2o r7to we7shaaa..

فرنسا هانم يقول...

ديكورات فى المقابر ؟؟؟؟
تقدم مذهل ياسووووو
بكام الكورنيشه رقبه الوزه والبانوه الفرعونى
والنجمه الاسلاميه ؟؟
على فكره
بلاش موضوع الشخر ده لانه حرام اصلا

Unknown يقول...

وليه الغلب ده بس ماتشتريلك مناديل معطرة كدة وتمسكها او تسدها عشان ينحرج وياخد باله


معلش يا سووو هى دى مصر وهى دى مواصلاتها وهو ده الشعببب

بالمناسبة .. أنا الشعب
:D

كل سنة وانت طيب
:)

موجة يقول...

اولا معلش على غيابي الفترة الطويلة دي يا راجل يا عجوز
مبروك اولا على السبوبة
طبعا ديكورات في مقبرة لتاجر لحمة
اقل حاجة فيها
خدتلك كيلو لحمة و لا حاجة .. صح
و شوية عضم للشوربة و قراقيش و ممكن حتة من الكبد و لا قنصة
أو مترين مصارين يتعملوا صينية منابير انما ايه
هههههههههههههه
حقيقي موقفه غريب الراجل ده بس حقيقي دي نماذج بنشوفها في كل مكان
خالص تحياتي

موجة يقول...

اه نسيت اقولك
الشخر حرام
ههههههههههههه
فرنسا هانم فكرتني

مروة الزارع يقول...

هعهعهعهعهع

نيااااههههااااا

بوست رائع

حسيت انى جواة بجد

لأنى ياما اتحطيت فى المواقف دى

بس انت كنت مع بق بس

انا ياما شميت جثث كاملة

الأتوبيسات ياما بتلم

أخرها امبارح والله كنت قاعدة وكان جمبى واحدة وبنتها صغيرة كدة

وريحة البت أستغفر الله العظيم بكابورت لا مؤاخدة

طولت عليك معلش

بس اخر كلمة هقولها

عمااااااار يامصر

..........

فية تدوينى جديدة مهمة ليا محتاجة فيها رأى حضرتك

رأيك يهمنى

Desert cat يقول...

انا بقى بكره الناس دى كدا لله فى لله بس مش بتلاشى احتك بيهم
لانى لما بتكلم مع حد منهم بيثبت له اكتر انه اكتر انسان جاهل فى الدين اللى هو عاملة ستار لنفسه
اولا الدين مش قراية فى المصحف قدام الناس او اعلى صوتى او اقعد اخطب فى الناس وانا مبستحماش غير فى العيد الكبير ..
الدين واضح للأعمى قبل البصير
اولا النظافة من الايمان وده ريحتة معفنة يعنى فقد ركن من اركان الايمان
احترام الغير وده مش محترم لانه ما احترمش الست
الاسلام كمان كان حريص على حقوق المرأة والرسول صلى الله عليه وسلم قال " استوصوا بالنساء خيرا"
وده مش علشان الكام شعره اللى مطولة فى وشه يبقى كدا خلاص بقى راجل
اصل فى ستات كتير جدا اجدع من الرجالة
يلا بقى ربنا يريحنا من العالم المعفنة دى
اه والله نفسى اصحى الصبح من النوم الاقيهم انقضروا من الشارع
لو انا مكان الست دى كنت ردحت له وخليته فرجة للعالم كله بس حظه موقعش فى طريقى
تحياتى ليك يا سو وعلى موقفك الجميل

Empress appy يقول...

سوووووووو عارف وانا بشوف البوست ده بالصدفه لقيت شغاله اغنيه ياااااااااى بتاعت البنت اللى جابت ليه هلاوس دى بس جت فى وقتها على فكرة فيه ناس كتير ظاهرها غير باطنها ودول ربنا يهديهم انما كان لزمتها ايه ال.........جيوبك الانفيه يا اخى عيب عليك وبعدين رايح تعمل ديكورات فى مقابر وعاوزنى اخد رايك فى شقتى ماشى يا بشمهندس شقتى اللى فى الاخرة بقى ههههههه على فكرة مش كل واحد بيقرأ قرأن ومربى دقنه كويس وبرضه مش كلهم وحشين فيه ناس ملتزمة جدا قولا وفعلا بس واض انك زى بعانى من الروائح وعندى مناخير عامله زى بتاعت الكلب البوليسى علشان كده رحمت نفسى واتدبست فى عربيه تقسيط عقبالك

بنوته مصرية يقول...

ههههههههههههههههههه

موتني من الضحك كالعاده

هحجز اول صف علشان بس اضمن اني الاقي مكان هنا واقعد وامخمخ


(*_^)

سهر الليالى يقول...

أقولك ايه بس
ماهى الناس اللى زى دول اللى بياخدو من الدين حته ويسيبو حته بعيدا بقى عن الرحمه والواقع والمعامله والحاجات دى كلها هما اللى بيشوهو صورة الإسلام فى نظر الناس

حتى انا فاكرة جملة قالها واحد بعد ما أسلم " قال كويس انى اسلمت قبل ما اشوف حال المسلمين "

بس بصراحه جملتك اللى رديت بيها كانت جامدة موت ومفحمه بغض النظر عن النرفزة وما صدر منها
هههههههه

انا فعلا قريت القصه بتاعت بريد الجمعه وكان عجبنى جدا رد الفعل من المسلم

ربنا يرحمنا
تحياتى

ToOoKa يقول...

السلام عليكم ورحمة الله
ئؤئؤئؤ كده يا سوووو زعلتنى منك

تصرفك كان حيكون كويس اوى بس من غير ال ....
المشكله انو فى ناس بتدى انطباع وحش عن الناس الملتزمه يعنى الالتزام مش بس لبس وقران اكيد من الفروض بس بردو الاخلاق من اساسيات الاسلام اتمنى انو الناس تتحلى بها
طبعا انا مش قصدى انو الراجل دا وحش ربنا اعلم بيه

بس لو بصينا للرسول
كان بيحب يتعطر ودايما كان بيحب يهندم نفسو ودا من السنه
وكان بردو بيساعد زوجاتو فى البيت دا مش عيب ابدا
ياريتنا نقتضى بالرسول فعلا مش ناخد حاجه ونسيب حاجه


ياريت يا سووو تدعى انو ربنا يفك همى ويارب يوفقك يا سووو
ToOoka

غير معرف يقول...

حتى موقف مستفز زى ده يا سووو
موقف يحرق الدم
ويخلى الواحد عايز يعلى صوته ويجيب اهل الراجل ده من ايام سيدنا ادم

الا انك برده
بطريقتك الوحيده والمتميزه
خلتنى ابتسم رغم
النرفزة اللى صابتنى من الراجل بتاع اهل الكهف ده

وعاملى فيها بتاع ربنا
وضارب الدقن

وهو حتى ما هانش عليه يعمل راجل
ويقعد الست دى مكانه

وغير ردوده الفجه
ده انسان قمئ

وانت جدع يا سوووو
وشهم

برافو عليك بجد
انك احرجته ودافعت عن الست

وخليته يلم الدور
انت عارف
يمكن لو ما كنتش اتكلمت
بعد ما قاللك وهى ايه اللى خرجها من بيتها اصلا

كان اداكم
خطبه مطوله
عن نزول المرأه الشارع
ومضار نزول المرأة الشارع

شهم يا سووو
وجدع

عرفته قيمته

Doba يقول...

اولا صباح الفل
ثانيا ايه الدرر اللى بتطلع من بقك دى مؤدب صحيح ولسانك بنقط عسل - العكس طبعا

ما علينا

شوف يا سوووو يا بنى انا من يومين تلاتة كده وانا رايحة الشغل الصبح ولان بيبقى فيه امم مستنية الميكروباص علشان تهجم عليه لقيت الميكروباص من قدام راكب راجل واحد وفيه مكان جنبه ولو المكان بحس ان محدش هيضايقنى او يلمسنى فيه فبركب ولقيت الميكروباص من النوع الواسع اللى يشيل اتنين مرتاح قدام

قلتله فيه مكان السواق قالى اه
فتحت الباب قام الراجل اللى كان جوه نزل فقلت يمكن نازل قريب مش مهم فركبت وبتدير علشان اشوفه بيكرب لقيته مشى فبسأل السواق قالى الآتى

انا بقوله هتاخد الكرسى يا استاذ النفريين قاله لا قاله طيب افتح للمدام تركب قاله انا مبركبش جنب حريم قاله طيب ادفع اجرة نفريين وخد الكرسى قاله لا مش هدفع - انت هات راجل يقعد جنبى فقاله يقما تاخد الكرسيين يقما انزل وركب المدام انا مش هركب رجاله على مزاجك

وركبت الحمد لله الميكروباص وواحدة ركبت جنبى ورحت الشغل فى ميعادى

وش مبتسم وفرحان قوى

فيه ناس متشددين زى مفيه ناس تافهيين وكل واحد ربنا بيديله على مقدار فهمه وذوقه وأخلاقه واحترامه لدينه وتفهمه الصحيح ليه

بس انت ازيك كده
ومدرتشى ليه عالتعليقات
عليك اونيك ذنب وتأخير وتعملى مج نيسكافيه مضربوب يا تخين

سلامنتوز يا سووووو
هبة

Soooo يقول...

هناء

في حكمه او مقوله انا بقولها في المواقف اللي زي دي
فاقد الشيء لا يعطيه

وهو فاقد الاحترام والنضافه .. يبقى مهما حصل معاه مش هيعرف يتعامل بيهم


سلامووووووووو

Soooo يقول...

Ahmed Mubarak

يابو حميد المشكله مش في الحكم على حد
المشكله في طريقة تصريحه بالحكم
يعني في ثانيه واحده اخينا ده حكم عليها واتهمها وبينفذ الحكم .. من غير حتى ما يسمع دفاعها

وبعدين في اشكال ماينفعش معاها .. لازملها الاسلوب اللي عملته


سلامووووووووووز

Soooo يقول...

s

الموضوع مالوش دعوه بالضغوط النفسيه والعصبيه
ماحنا كلنا في الهوا سوا
الموضوع عن المتأسلمين شكلا فقط .. وليس موضوعا

سيبك انتي .. ليكي وحشه والله



سلامووووووووووز

Soooo يقول...

لماضة

لماضه يابنتي .. انتي مش بنتي
وش عماد حمدي وهو بيضرب شاديه لطفي

الناس يا لماضه مش متجاهله ان الاسلام دين وسلوك .. الناس بتعتقد خطأ انه مادمت انا مسلم مثلا مثلا .. يبقى اي حد غيري اقل مني
ولا ده في الاسلام ولا في اي حاجه
ده عند ام ترتر

وعلى فكره .. انا حريف ركوب ميكروبازات .. بس في الميكروبازات الحياه بتبقى في الملموم .. مش زي الاتوبيس مبهوقه وناس كتير


سلامووووووووووز

Soooo يقول...

fanan fa2eer

انا عارفه ياختي
دي ناس غريبه قوي يا ام فوزيه بجد يا اختشي

الاقيش عندك كام بصلايه عشان المدهول جوزي عايزني اعمللو مكرونه فاشانيلا



سلاموووووووووووز

Soooo يقول...

الشريف / جمال طة

يعني انا بجد مش فاهم يا استاذ جمال
طب ربنا كرمك ودخلت على البلوج وقريت الموضوع
قول اي حاجه
قول وحش
قول كويس
انما الاقيك منزل اعلان وتحذير
يعني ده مش من الشياكه ولا اللباقه ولا الذوق في اي شيء

وبعدين هو انا عشان من المعادي يبقى لازم مثلا اعرف كل سكان المعادي؟؟
ولعلمك .. مافيش واحد بيعمل جريمه وبيهرب .. بيقعد في بيته
ولو قعد في بيته .. بيبقى مظبطها مع المخبرين اللي بيجو يقبضو عليه .. ويغمزهم بعشرين جنيه ويكتبو لم يستدل عليه

بلدنا بزرميطه ياعم
ولا شعب هيساعد .. ولا حكومه داريه بينا



سلاموووووووووووووز

Soooo يقول...

koko

والله انت اللي شربات
ولازم كان حد يديله على دماغه عشان يفكر مية مره قبل مايقول كلمه تانيه بعدين

ولا ايه؟؟


سلامووووووووووز

Soooo يقول...

Rehab Mostafa

على فكره .. انا قاصد بجد اني اقول التشبيه اللي انتي قرفتي منه بجد
عشان تتخيلي الحاله اللي كنت فيها
تخيلي لو كنت قلت اني من ريحة بقه كنت هارجع اللي في بطني .. ماكانش هيوصللك نفس الاحساس اللي وصلك بالتشبيه اللي قلته

كده ولا ايه؟؟؟



سلاموووووووووز

Soooo يقول...

Rosa

داكتورة روزا
انتي فين يابنتي
مختفيه ليه كده

وفعلا الست شريره شريره
تخيلي يا دكتورة .. انها كانت والعياذ بالله والعياذ بالله .. ملبسه ابنها تي شيرت ولا بلوفر عليه صورة فيل
اعوذ بالله
فيل
اصنااااام في الفصل



سلامووووووووووووز

Soooo يقول...

Nani

ايوه كده يا ناني
اتكلمتي بلهجتكم اللي زي السكر دي
طب والله انا بانشرح لما الاقي تعليقك


ملحوظه
حضرتك انا باعمل شغل لواحد جزار جاهل .. عايز يعمل شوية توضيبات في الحوش او في المقبره بتاعته
تقريبا فاكر نفسه الخديوي ولا محمد علي الكبير
وبالرغم من ان ده حرام .. لكن رزق ناس بقى انها تشتغل وتاخد فلوس وربنا يكرمها



سلامووووووووووز

Soooo يقول...

ra7eel

تخيلي نفسك مكاني وفي نفس شخصيتي .. هل كنتي هتقدري تمسكي نفسك ولا هتبهدليه؟؟

انا عارف اني سلكت سلوك خاطئ لما عملت اللي عملته
بس هو ده الغرض من الموضوع .. ان في بعض الاحيان بيبقى لازم اننا نبقى قلالات ادب عشان الناس تتعامل معانا محترم .. حتى لو هم نفسهم مش محترمين
فهمتي قصدي


سلاموووووووووز

Soooo يقول...

زُمُرده المتمرده
واللي زعلانه منني

في ناس بتاخد الشكل وتقلده .. وهي فاكره نفسها كده صح
مع ان الاسلام الصحيح من جوه القلب
مش بالشكل وطول الدقن

وبعدين لعلمك .. الست استغفر الله العظيم يعني
استغفر الله العظيم
كانت لابسه عباية سوده وليعوذ بالله
ومبينه مناخيرها
والمناخير عورة

لكن ربنا عاقبها عشان بتظهر مناخيرها وبتفتن بيها الشباب .. وشمت بيها ريحة بق ابو الهول اللي كان قاعد



سلاموووووووووووز

Soooo يقول...

mony

ده انتي يا موني قمة في الشر
اديله بالجزمه على بقه حته واحده؟؟

طب انا كنت لابس جزمه ريد وينجز سيفتي
يعني لو كنت عملت زي مابتقولي كان زمان بقه لازق في نعل الجزمه
واكيد بقى بما ان بقه هيلزق في الجزمه يبقى ريحتي هتبقى ريحة بقه


يرضيكي كده يعني؟؟؟



سلاموووووووووووز

Soooo يقول...

فرنسا هانم

انتي فاكراني باهزر لما بقول باعمل ديكور في المقابر؟؟
طب والله بتكلم بجد
الراجل الجزار صاحب المقبره عايز يعمل شغل حجر هاشمي على ارضيات رخام على سقف ساقط على شغل عالي قوي
لدرجة ان كل اللي يشوف شكل المقبره واحنا شغالين فيها يفتكرها مسجد ولا حاجه

وعلى فكره .. انا عارف ان الشخر حرام
زي ماهو التباهي في المقابر حرام
زي ماهو الحكم على الناس زي ماعمل اخينا من غير مايختلق العذر حرام

وربنا يغفر لنا جميعا يارب


وبعدين فين العجله بتاعتك ترحمني من بهدلة المواصلات؟؟؟؟



سلاموووووووووووز

Soooo يقول...

إنـســـانـة

يا انسانه ياختي .. ان رائحة بق الراجل لا كان ينفع معاها مناديل ولا نيله
دي كانت حاجه اشبه برائحة مراحيض العباسيه العموميه يوم التلات
وماتسألنيش اشمعنا يوم التلات



سلاموووووووووووز

Soooo يقول...

موجة

انت فين ياعم
مختفي ليه كده مع ان اسكندريه دلوقتي كلها موجات والجو كله موجات وشبكات موبيل

وبيني وبينك يا موجة .. انا خايف من السبوبه دي وكتاب الله
ده راجل جزار ياعم
يعني لو دايقته في حاجه هيشفيني ويبيع الكيلو منني بتمن اللحمه البتلو
وتخيل انت بقى وانا شاب ملظلظ كده طعم لحمي هيبقى مدهنن قد ايه

منورني ياريس .. وماتطولش الغيبه علينا



سلاموووووووووووز

Soooo يقول...

مروة الزارع

والله انتي يابنتي ليكي الجنه ان شاء الله
يعني في وسط المصايب اللي بتحصلك وبتركبي اتوبيسات وبتعيشي مأساة
روحي يا شيخه
ربنا يوعدك باتوبيس هيئة نقل يكون فاضي وتروحي بيه مشاويرك

ملحوظه
تدوينتك هايله هايله هايله اخر حاجه بجد
وبجد عاجبني دماغك والله وياريت دماغ كل البنات تكون زيك كده
والله ساعتها كنا فعلا اقتدمنا مليون سنه ضوئيه وولادنا طلعو احسن ولاد في الكون



سلامووووووووووز

Soooo يقول...

Desert cat

يا قطه .. الاسلام من السلم
والمسلم من سلم الناس من لسانه ويده
وده لو مسلم فعلا كان عمل بالمبدأ ده

انما هتقولي ايه
ماسكات لابسينها عشان اغراض تانيه
وبعدين عيب عليكي يعني .. اخوكي اللي هو انا عملت الواجب وزياده
واعتقد انه هيفكر مية مره قبل مايعمل حاجه زي دي تاني



سلامووووووووووز

Soooo يقول...

appy

ازيك يابنتي
طب والله بجد ومن غير ايتها حوارات انا كنت باتكلم بقصد خير في توضيب شقتك
شقتك في الدنيا يعني

وبعدين يعني عايزاني اعمل ايه لشغلانه جايبهالي واحد جاهل وبتاع منظره
اقوللو لأ؟
ولعلمك انا قلتله حرام التباهي في الموت .. لكن هو قالي انه بيعمل الشغل ده علشان يشغل الناس الغلابه
قمت اشغلت لاني غلابه بجد والله

وبعدين انا بطبعي مش باحب اعمل ال.. بس ساعات باحب امرن مناخيري وجيوبي الانفيه علشان يقدرو يستوعبو الروايح اللي في الجو
تقدري تقولي اني بامرن جيوبي الانفيه بما ان جيوبي العاديه فاضيه ومش محتاجه تمارين



سلامووووووووووووز

Soooo يقول...

بنوته مصرية

ازيك يارودي
انتي فين يابنتي انا كنت قلقت عليكي والله

لكن الحمدلله انك بخير
وياستي لو عايزه تحجزي المدونه كلها اتفضلي
بس ماتقطعيش كده وتختفي مره واحده



سلاموووووز

Soooo يقول...

سهر الليالى

قمة التخلف بجد ان الواحد ياخد المنظر ويسيب الجوهر في اي حاجه
مابالك بالاسلام اللي هو المفروض يكون كل حياتنا مش منظر وبس

وفعلا والله زي ماقال الشخص اللي اسلم ده
لنه لو كان شاف حال معظم المسلمين شكلا وليس طبعا .. كان ساعتها فكر مليون مره
وماكانش هيسلم


سلاموووووووووز

Soooo يقول...

ToOoKa

تؤتؤتؤ ايه بس
انا لو كنت اتصرفت اي تصرف تاني غير اللي عملته ده ماكانش هيعدل عن موقفه وكان الموضوع هيبقى خناقه رسمي

لكن في بعض الاحيان الغلط ماينفعش يتصلح غير بالتهزيئ وقلة الادب


وربنا يصلحلنا الحال
ويفك ازمتك وكربك يااااااااارب


سلامووووووووووووز

Soooo يقول...

shreen

الله يعمر بيتك يارب
بس بجد انا اتصرفت بالشكل ده لاني فعلا كنت مخنوق قوي
ولاني تخيلت اختي او مراتي مكان الست دي .. ولو اني لا عندي اخوات بنات ولا متجوز من اصله

والحمدلله ان سرد الموقف نفسه عجبك وقدرت بفضل من ربنا اني ارسم ابتسامه على وشك


سلامووووووووووز

Soooo يقول...

Doba

مشكرين قوي على الكلمتين اللي زي العسل دول عالصبح
العكس طبعا

بصي يا دوبا يابنتي .. الناس دول من عينة الاخ اللي نزل من الميكروباص وخاف منك كأنك فايرس هيقتله والاخ اللي ماغسلش بقه من ايام ثورة ايلول
عاملين نفسهم صح بمنطق واحد بس .. واللي هو ان الراجل احسن من الست

منطق غبي قوي
انا ساعات بافكر كده برضه عشان مابقاش كداب .. لكن بارجع واحاسب نفسي اقول ايه الهطل ده
مش من مبدأ مساواه ولا الكلام بتاع العالم المطبلاتيه .. من مبدأ بسيط جدا
الست دي زي امي الله يرحمها
وزي اختي ولو اني ماعنديش اخوات
وزي مراتي واللي في علم الغيب
يعني ايه لازمة الخنقه بقى


ملحوظه
انا رديت على تعليقك وانا بانزل ردودي على التعليقات في الموضوع ده نفسه
لكن في الموضوع اللي فات لقيت انه بعد مانا كتبت التحديث مالوش لازمه اني ارد على تعليقات الناس لانهم علقو وانا غلط او اتكلمت في موضوع من غير ما اتأكد منه ميه الميه

وانتي ازيك وازي يوسف افندي؟؟


سلامووووووووووووز

Hany Rizk يقول...

مساء الشخير يا معلم
بقولك ايه
مفيش حتة فاضية فى التربة دى ؟
اصل الترب فيها ازمة اليومين دول ومش لاقى حتة ادفن فيها ...
بالمناسبة اخر الاخبار
تم بحمد الله فسخ خطوبة الاستاذ بروكن على الانسة س والعاقبة عندكم فى المسرات

Ehab يقول...

انا كنت عايز اعلق على البوست الفظيع
بس حاسس ان الشخره هتشفطني انا كمان مع الواد
عليك شوية افيهات الله يخرب عقلك مصيبه

بس طبعا جيت اعلق لقيت واحد عامل اعلان من بتوع ابحث مع الشرطه
كنت هافطس من الضحك
ايه ده يا عم هي المدونات وصلت للشهره دي
بيعملوا فيها اعلانات المجرمين
ابسط يا عم بقيت احسن من القناة التالته


طيب انا عندي عيل تايه ممكن احط اوصافه علشان تدورولي عليه

سلاااااااااااااااااااااااام

Unknown يقول...

جدع والله