الأحد، ٢٢ ذو القعدة ١٤٢٨ هـ

!!! كلبشني كلبش

يابني العربيه كده هتتكلبش!!؟؟
مش مشكله .. بس نخلص الحوار ده وبعدين نبقى نشوف حوار الكلبشه
وانا اللي هدفعلك الغرامه ياعم بس نخلص
-----
كان ده الحوار اللي حصل مابيني وبين واحد صاحبي موصلني بعربيته لمشوار في وسط البلد .. وانا اللي قلت الكلام اللي باللون الازرق .. ومش عنطزه ولا فلوس كتير ولا بتاع قد مانا قلت تلاقي الكلبش والغرامه ببتاع عشرين تلاتين جنيه .. كأني رحت المشوار بتاكسي بس اخلص وارتاح
وفعلا .. رحنا انا وصاحبي المشوار وركننا العربيه في شارع الجمهوريه في وسط البلد صف تاني .. وجه معايا خلصنا المشوار ورجعنا لقينا العربيه متكلبشه فعلا
قلتله ماتقلقش .. هروح كشك المرور وادفع الغرامه واجيب عسكري يفك الكلبش
سوووو : سلامو عليكو
سيادة الأمين : وعليكم السلام
سوووو : معلش بس في عربية متكلبشه وعايز ادفع الغرامه وحد يجي يفك الكلبش
سيادة الأمين : الغرامه خمسين جنيه
سوووو : كام ؟؟
سيادة الأمين : خمسين جنيه غرامه ركن صف تاني
سوووو : (على مضض) حاضر .. أمري لله
دفعت الفلوس وجه معايا الامين بعد ما اداني ايصال بالمبلغ ده .. ولقيته رايح معايا عشان نفك الكلبش ومعاه دفتر الايصالات
قلت عادي يمكن خايف حد يسرقه من كشك المرور
بعد ما فك الكلبش لقيته راح واخد رقم موجود على الكلبش وراح فاتح دفتر الايصالات وكتب حاجه وراح قاطع الورقه وبيقوللي
سيادة الأمين : خمستاشر جنيه ايجار كلبش يا استاذ
سوووو : ايجار ايه .. مش فاهم!!؟؟
سيادة الأمين : مش الكلبش كان مكلبش عربيتك يابيه .. يبقى لازم تدفع ايجار الكلبش
سوووو : يعني ايه ادفع ايجار الكلبش ؟؟ انت مش خدت منني الغرامه خلاص .. يبقى ايجار كلبش ايه؟؟
سيادة الأمين : هو ده النظام .. هتدفع ولا ارجع اكلبش العربيه تاني؟؟
سوووو : طب والغرامه اللي دفعتهالك هاخدها لما تكلبش العربيه تاني ولا ايه النظام
سيادة الامين : لأ طبعا دي خلاص اتوردت لخزينة الدولة
!!!!!!
منطق غريب قوي
يعني كأني مثلا جيت وضربت واحد بمطواه وعورته .. وبعد ما ضربته وعورته قلتله معلش تمن المطواه عشان المطواه اتنت وانا باضربك
!!!
او كأني مثلا اتحبست ودخلت السجن .. وبعد ماقضيت مدة العقوبه لقيتهم بيقولولي وانا خارج .. معلش ايجار الزنزانه والسرير اللي كنت نايم عليه
!!!!
وبعدين ايه الحكمه من انهم مايجمعوش الغرامه مع ايجار الكلبش من غير مايقولو للشعب .. وبعدين لما الفلوس تتورد لخزينة الدوله يروحو عاملين التقسيمه دي
!!!!!
وبعدين يعني ايه ايجار كلبش .. أصلا
!!!!!!
هو انا كنت واخده وباسرح بيه وباسترزق من وراه .. ولما ارجعه يبقى اديهم نسبة مثلا ولا ايه
!!!!!!!
ولا هم مش عاجبهم ان حال الكلبشات يبقى واقف فبيشغلوها في السوق .. على اعتبار انها تجيب قرشين
!!!!!!!!
وهل ينفع اني اجيب ببتاع الف جنيه كلبشات .. واوزعهم على بتوع المرور كل يوم الصبح .. واعدي عليهم اخر النهار اشوف ايه الكلبشات اللي اتأجرت وايه اللي ما اتأجرتش
!!!!!!!!!
ولو في كلبش كان بيلعب بديله كده ولا كده .. هاخصملو يوميته ازاي؟؟
!!!!!!!!!!
افتكرت ساعتها النكته بتاعة الريس لما قال لحبيب العادلي عايزك تعمل كمين على كوبري سته اكتوبر وكل عربيه معديه تاخد منها عشره جنيه .. وتاني يوم بعد ماعملو الحوار ده قام حسني قايل لحبيب .. عايزك تخلي الغرامه تبقي مية جنيه .. وفعلا حصل الحوار ده وحبيب العادلي قاللو تمام ياريس .. قام الريس قاللو بكره بقى عايزكم تاخدو مية جنيه غرامه .. وتدو كل مواطن عشر تقلام على قفاه بلطجه .. وانا اللي هقف في الكمين ده بنفسي .. ولما نصبو الكمين والريس نازل ضرب على قفيان كل واحد معدي قام واحد في اخر الكوبري قعد يزعق ويقول كده ظلم .. كده حرام .. قام الريس قاللو في حاجه ياحبيبي .. قاللو ياريس كده ايدك توجعك .. حطو اتنين عساكر يضربونا ويخلصونا عشان نمشي بدري بدري
------
الغريب ان الظباط كلهم عندهم احساس رهيب بان الشعب بيكرههم .. واننا متحاملين عليهم
وانا من موقعي هذا بقول .. الناس كترت عالكوبري
وبقول ايضا .. نحن فداك ياريس .. وفداك يا .. سيادة الأمين

سوووو

هناك ٧٠ تعليقًا:

بنوته مصرية يقول...

هئ هئ هئ انا اول تعليق

هههههههههههههههههه

والله ضحكت يا سوووو بص انا معاك في كل اللي قولته
بس والله مش كل بتوع الشرطة
يعني الله يرحمة بابا ظابط شرطة وعمي ظابط شرطة والهي والهي كل اللي بيتعاملو معاهم بيقولو انهم طيبين اووي

دلوقتي اللي بيحصل ده مش عارفة اسميه ايه بس انا نفسي مضايقة منه ومش راضية عنه زمان كنت بفتخر اني بابا ظابط دلوقتي لما بشوف ظابط شرطة والله بستحقرهم من اللي بسمعه من اللي بيحصل في الاقسام واللي بشوفه علي الموبيل من تعذيب وخلافة

بس عارف اللي بيعمل كدا معنهمش ضمير ولا انسانية ولااللي وقفين في لجنات كل شويا يوقفو عربيات ملاكي و سواقين غلابه يخدوه منهم اتاوات كل ده هيدخل بيتهم اكنه نار لانه تعب وشقي ناس غلبانه

بنسبه لي ايجار الكلبش مش عارفة حاسة انها اتاوه خدها منك امين الشرطة

بس علي فكرة لوكانت وحده ست كانت فاصلت في ال50 جنيه كانو نزلو لي10 جنيةومش بعيد يخلص الموضوع وهي واقفة

الموضوع ده حصل معايا مدفعتش ولا مليم هههههههههههههههههه

Rehab Mostafa يقول...

:D:D:D:D:D:D:D:D
جامده جداً بجد
مانتو برضه غلطانين يعني تستهلكو الكلبش وتأجروه وكمان مش عايزين تدفعوا الايجار ايه البلطجه دي :D:D:D
على فكره هو كرمك أخر كرم هو ليه ماخدش منك ايجار الرصيف وبدل تعطيل كمان مانت عطلته وقومته من مكانه والورقه اللي قطعها بتاعة الوصل دي كمان ببلاش كده وحبر القلم ........ ياااااااااه ده انتوا شعب مفتري يا أخي :D:D:D:D:D:D:D
أنا عندي اقتراح : خلي صاحبك يشتري كلبش علشان ماتاجروش تاني وحلوه فكرة الكلبشات دي هتكسب منها دهب
وأنا أقول العربيات المتكلبشه دي اصحابها سايبنها ازاييي :D:D:D:D:D:D


معلش طولت عليك بس البوست جامد بجد

كاميليا بهاء الدين يقول...

ههههههههههههه

مقدرش اتكلم ياعم احسن الانتربول يكلبشنى
والغرامة هنا باليورو


كاميليا

سهر الليالى يقول...

هههههههههههههه
معلش يا عم سوووو
والله ما عارفة اقولك ايه اعزى نفسى ولا اعزيك

حاسة ان البلد بقت عاملة زى زمان لما كنا فى المدرسة واول ما المدرس يطلع من الفصل نقوم عاملين هيصه واللى بيتكلم واللى بياكل
يعنى بقت مولد وصاحبة غااااااااايب أو مغيب أو ... ولا بلاش ياعم

جامدة يا سووو وتعيش وتاخد غيرها
تحياتى

ابن حـجـر الـعـسـقـلانـى يقول...

بعد إذنك ادفع لى عشرة جنية نظير إيجار عينيا الاتنين اللى قرأت بيهم تدوينتك

غير معرف يقول...

Oi, achei seu blog pelo google está bem interessante gostei desse post. Gostaria de falar sobre o CresceNet. O CresceNet é um provedor de internet discada que remunera seus usuários pelo tempo conectado. Exatamente isso que você leu, estão pagando para você conectar. O provedor paga 20 centavos por hora de conexão discada com ligação local para mais de 2100 cidades do Brasil. O CresceNet tem um acelerador de conexão, que deixa sua conexão até 10 vezes mais rápida. Quem utiliza banda larga pode lucrar também, basta se cadastrar no CresceNet e quando for dormir conectar por discada, é possível pagar a ADSL só com o dinheiro da discada. Nos horários de minuto único o gasto com telefone é mínimo e a remuneração do CresceNet generosa. Se você quiser linkar o Cresce.Net(www.provedorcrescenet.com) no seu blog eu ficaria agradecido, até mais e sucesso. If is possible add the CresceNet(www.provedorcrescenet.com) in your blogroll, I thank. Good bye friend.

موجة يقول...

بس مش انتا قلت ان انتا اللي حتدفع غرامة الكلبشة .. واضح جدا ان صاحبك هو اللي دفعها هههههههههه
موضوع رائع و جميل و باشوفه كل يوم ايام الدراسة لما كنا في الجامعة كانت دي مشكلة يومية للناس اللي راكنين عرابيتهم على شارع ثروت بين الجامعة و بين السرايا أو و بين بين السرايات .. لا قصدي و بين ( بين السرايات ) ههههههه
عرضك القصصي هايل و عندك حق المفروض انهم يجمعوا الغرامة و يقيموها براحتكم بس دا الغرضمنه انه يفرس الشعب فيقولك ايجار كلبش و مش بعيد .. مش بعيد ايه .. دا واضح ان الكلابش دي بتاع واحد محترم .. كلبش كبير قوي هههههههههه و بيلم ايراد عليها .. ما تاستغربش ..
كده .. يبقى انتا اكيد اكيد في مصر

Unknown يقول...

ههههههههههههههههههههه

يا نهار ازرز يا جدعان

طيب والله دى شغلانه ميه ميه
ايه رايك نشترلنا كام كلبش وناجره للعيال بالساعه اهو بدل العجل

بس اوعى يمسكوك تحرى وتروح فى الكلبش
هههههههه
الحمد لله ان الواحد معندوش عربيه

emz يقول...

تعليقى ملوش علاقة بالبوست ..
بس عذرا يعنى ..
ممكن تسلملى عالمعادى ؟

Doba يقول...

مش كنت تركب المترو أضمن بدل متشحططنا وراك رايح جاى كده

ثم ايه يعنى لما تأجر الكلبش وتدفع خماشر جنيه مش بدل متاخد القفايين اللى عالكوبرى

اتلم بقى مش عاوزين نجيلك بعيش وحلاوة وكمان ندفعلك حق الزنزانة والعلقة اللى هتاخدها

اسكت خالص

وبعدييييييييييين

بلد بتاعت شهادات عالقهاوى بصحيح
سلامونز
هبة

غير معرف يقول...

أيامنا الحلوة

والله ياسووو حاجة تخنق فعلا ...

اسلوبك رائع كالعادة

تحياتي

رحــــيـل يقول...

كان مالو التاكسى ياسوووو؟؟؟؟
بس اهو اديك عرفت موضوع الكلابشات دى
عشان بعد كده مش تستغرب لحاجة
هو انت مش من هنا ولا ايه؟
انا شخصيا مش بقيت استغرب لحاجة

كويس اناه جت على قد كده
انا لو من صاحبك اقطع بقى علاقتى بيك الله اعلم المره لجايه ايه هيحصل؟
ههههههههههههههههههههههههههههههههه
احلاى سلامووووووووووووووز لاحلى عجوووز

3ala asm masr يقول...

انا لو منك كنت سبته العربيه متكلبشه
حاجه تجنن والله
يعنى ايه فعلا ايجار كلبش؟
هو انت اصلا كنت قلتله كلبش العربيه والنبى لحسن تتسرق
حاجه تعلى الضغط
سلام يا سووووو

منى يقول...

متدفع يا عم
انت قاعد فى بلد الحكومه
وماشى فى شارع الحكومه
ومستغل كلبش الحكومه

طب متنفع الحكومه
دى حتى مديونه وتستحق الصدقه


تحياتى يا سوووووووو

cinderella يقول...

هي دي مصر يا عبله .. قصدي يا سووو
ولا يهمك .. تدفع تعيش
هو ده المنطق دلوقتي
إيجار بئى ولا كلبشه ولا حتى سرقه
المهم تدفع
وكويس اوي انه مش قالك تعالي اكلبشك معاها لو ما دفعتش

غير معرف يقول...

هو الشعب حيفضل لحد امتى ياخد على قفاه و يفضل ساكت ؟؟؟؟!!!!!!!

اسامة يس يقول...

هوه انت مصدق ان الخمسة عشر جنهيا او الخمسون للدولة تبه انت واهم هكذا مش تبقى انت واهم ههههههههههه

وبعدين في الدول اللي بتفهم بلاش المتقدمه لحسن بتجيب انتيكاريا لسادة الحكام.. بيكتب المخالفه ومبيكلبش السيارة الا اذا كانت قافله الطريق فعلا لدرجة يستحيل معها المرور...
انما هيه شغل سبوبه الناهدرة هنكلبش كام يا امين الدفتر والباقي لينا يا فندم ...

خالص تحياتي ...

زُمُرده يقول...

السلام عليكم
إنك في مصر!!!!
واااعجبي

Esmat يقول...

يكرمك ربى سووو
ويخلى أيامك هنية طيب ودى تيجى إزاى يا بت؟
مش عارفة
يا إبنى البوست يجن بلدنا فيها حاجات غريبة تجنن هوه الأفكار الجهنمية دى بيجبوها منيين
هو عفوا إبليس أفندى قاعد فى قصر القبة
كلبشات عليها إيجار بلس الغرامة؟
لولاش الشمس والهواءوالقمر بتوع العالم كله كانوا خدوا عليهم فلوس كمان
زى ضريبة المبيعات بابا الله يرحمه مات فى المغرب ماما ضحكتنى وقالت لى فاتورة شحنه
جثمانه عند دخوله مصر أخدوا عليها
ضريبة مبيعات على توتل المبلغ
مصر لها نظم خاصة بيهالا فى زيها عربيا ولا غربيا وده ... تحدى.!
و نموت نموت وتحيا إيه ... يووووه نسيت
سلامووووووز

shahy يقول...

بعد كدة ياسووو ابقى هات الكلبش بتاعك معاك ووفر فلوس الايجار

ماتزعلش نفسك كدة خلاص هابقى ازودلك المصروف الخمستاشر جنية دول لكن فلوس الغرامة ماليش دعوة بيها مش انت اللي قلتلة يركن ومايهمهوش
يالا فداك المهم تكون خلصت اللي كنت رايح علشانة

سلام

مشمش يقول...

ايوة المفروض كل واحد يمشي بالكلش بتاعة هوة احنا هنفضل يضحك علينا لحد امتي والي معهوش عربية يبقي يسلفة لاي حد معاه عربية اضراب ضد الحكومة وتضامن مع بعضنا يعني اشمعني هما مع بعضهم وجميل اويي البوست ياصحبي

MKSARAT - SAYED SAAD يقول...

انت عارف يا سو
الموضوع بتاعك دة كنت لسة بتكلم في من اسبوع مع واحد صاحبي كنا فسيتي ستارز وشوفنا الغ=عربية النص نقل اللي الشرطة عملاها ونش
بقله العملية سهكلة نأجرلنا عربيا لونها ابيض ونسرقلنا كام كلابش ونلف على عربيات الشرطة كلها نكلبشها زي ما بيعملوا في الناس بس احنا مش هناخد منهم فلوس هنسبهم كدة ونتفرج عليهم وصدقنى مش هياخدوا بالهم
مهو خلاص بقة
كله بقى جنان فجنان
بس الكلام بيني وبينك اوعى تقول لحد
تحياتي

Nani يقول...

السلام عليكم
الله يبسطك يا سووو
فعلا شر البلية ما يضحك
العمارة صحيت على صوت ضحكي
ولو كلبش لعب بديله كده ولا كده ههه هههههه هههههه هههههه
هههه هههه هههههههه ههههههه
ههههه هههههه ههههه ههههه
اه يما الحقيني يما مت من الضحك
هههه هههه هههههه هههههههه
بس عن جد قلبي معك يا بني
انا لو كنت مكانك
مش اروح اقل من تابيدة في اللي ما يتسمى
الكلبش طبعا
هههههه ههههههه

Nani يقول...

ممكن اقترح اقتراح
متشتيري واحد وخليه في العربية ولما تبقى تركن كلبشها واما تبقى ترجع فكها كده تون حليت مشكلتين في وقت واحد
ركنت زي مانت عايز
ومدفعتش غرامة
باجروه واسرح بيه
هههههه ههههههههه

ahmed mefrh يقول...

هههههه
و الله انا مش قادر امسك نفسى من الضحك
يا ناس خليكوا مفتحين
الراجل عايز الخمستاشر جنيه علشان ايجار الكلبش ، اصل الكلابش ده مش تبع الدوله دول برده مأجرينه و بيدفعوا ايجاره لعم عطيه بتاع الكلبشات


تحياتى اليك
ابو مفراح

Soooo يقول...

RodY80
او بنوته مصريه

ده انا اللي تشرفت بتعليقك اول تعليق عندي
وانا معاكي في ان مش كل ظباط الشرطه او كل القائمين في مهام امنيه كده
بس المشكله مش في الظباط ولا في الجهاز الامني قد ماهي في التفاهم والتفهم مع المواطن المصري والشعب المصري

فهمتي قصدي


سلامووووووووز

Soooo يقول...

Rehab Mostafa

يافندم ولا طولتي ولا حاجه
وسعيد بكلامك وتعليقك اشدما سعاده
والحمدلله ان البوست عجبك كده

واوعدك .. اجيب كلبشين .. واحد لي والتاني هأجرهولك بالشهر بالف وخمسمية جنيه .. وانتي وشطارتك بقى لو عرفتي تشغليه كويس في منطقه زحمه وبنت حلال



سلامووووووووووووز

Soooo يقول...

كاميليا

لا تقلقي
الانتربول هيعتبر ضحكتك دي هي كلمة السر اللي هننفذ بيها العمليه بتاعتنا

واللي هتاخد كود باسم
ضحكني يا سوووو بالراحه



سلامووووووووووز

Soooo يقول...

سهر الليالى

الحمدلله اني قدرت ارسم ابتسامه وضحكه ويارب تكون ضحكه من القلب

وصدقيني الليل مهما طال .. هيطلع النهار


وان شاء الله نعيش .. وماناخدش غيرها


سلامووووووووووز

Soooo يقول...

ابن حجر العسقلاني


طب فين الوصل وسيادة الامين؟؟؟؟



سلامووووووووووووز

Soooo يقول...

موجة

لا والله يا موجه ياخويا انا اللي دفعت الغرامه وايجار الكلبش .. واحتسبتهم عند ربنا هاخدهم من الحكومه يوم ما نقابل رب كريم

وفعلا انا زمان لما كنت طالب كانت الدنيا زحمه بهبل .. بس على ايامي ما كانش اختراع الكلبش ده ظهر

عجوز بقى


سلامووووووووووووز

Soooo يقول...

لماضة

اهلا بألمض والذ دكتوره في عالم التدوين
الحمدلله اني قدرت ارسم ابتسامه وضحكه تبسطك .. بس يارب تكون من القلب

وفعلا انا من رأيي اننا نجيب كام كلبش ونأجرهم .. مشروع يساعدنا اننا نجيب عربيات خاصه بينا
وبعدين نروح مكلبشينها بنفسنا




سلامووووووووووووز

Soooo يقول...

emz


بس كده .. هسلملك على المعادي شارع شارع وحارة حاره وميدان ميدان

منوراني



سلاموووووووووووز

rainbow يقول...

العزيز سووووووووووو

شكرا لانك ضحكتنى وعيطتنى جدا

الحقيقة الواحد خايف يأجروا الرصيف للمشاة

يأجروا اى شىء مش ممكن يتأجر زى بياعين الكورنيش ناقص يأجرو للناس الهوا اللى بيتنفسوه عليه

شىء محزن واحوال اصبح الضحك فيها كالبكاء وسلملى عالكلبوش

تحياتى ودعائى لك بكل الخير

هدى

Hannoda يقول...

ههههههههههه

الموضوع يدعو للضحك فعلا من غرابته
بس الألذ تعليقاتك اللي جت ورى بعضا ده

بص.. طالما بتحاول تفكر بالمنطق في بلدنا ده يبقى انت كده مستغني عن غقلك

ما فيش منطق
هي كده
بلطجة
خمستاشر ايجار كلبش
بس خلاص
:)

عشان بس ماتركنش صف تاني بقلب

ربنا يعينا
:)

أ،ا بقالي زمان ماجيتش هنا .. بس و الله غصب عني
وأنا اللي متضررة اساسا لما أتأخر..

تحياتي
:)

صاحب المضيفة يقول...

هو ده الطبيعي هنا في البلد من زمن


ليه كل التخلف ده

ربنا يكون في عون مصر


كان الله لنا جميعا

دمت بخير

Dr. Diaa Elnaggar يقول...

والله انت وامثالك من المتكلبشين هما اللي بيسؤوا سمعة البلد في الخارج. تخيل لما البوست بتاعك يترجم لكل اللغات الحية ويقراه كل الناس، فيبطلوا ييجوا سياحة في بلدك. عارف يا سوووو انت بقى حيحصلك ايه؟ حتدفع ايجار البرش، والسرير اللي حتنام عليه في السجن والبطانية اللي حتتغطى بيها، والمستشفى اللي حتروحها عشان تتعالج من الأمراض الجلدية اللي جات ليك من البطانية، وكل ده بتهمة انك روجت إشاعات أضرت بتهمة البلد. فخليها يا سوووو كلابشات مرور أحسن، لأن كلابشات الإيدين وانت لابس القضية الحلوة دي، برضه لعملك حتدفع عليها ايجار.

كلبش كلبشة
نعنش نعنشة
ادفع الايجار
وكلك فرفشة

تحياتي
ضياء

Soooo يقول...

Doba


ام يوسف
هو انا ضد ايجار الكلبش .. اطلاقا
انا بس ضد اني ادخل ايدي في جيبي مرتين واطلع المحفظة مرتين واسحب فلوس منها مرتين
فامماني ولا اقول كمان .. مرتين


سلامووووووز

Soooo يقول...

أيامنا الحلوة

والاروع هو تعليقك الدائم عندي
وربنا يسترها علينا دنيا واخره يارب


سلامووووووووز

Soooo يقول...

ra7eel

الحكايه مش انا من البلد دي ولا بتاع
الحكايه هي التنظيم في النصب
انصبو علينا زي مانتو عايزين .. لكن ماتدوناش على قفانا

ملحوظه :
صاحبي ده بعدها باسبوع سافر على قطر
وشكله مش ناوي يرجع تاني


سلامووووووووز

Soooo يقول...

3ala asm masr

ولا تعلي الضغط ولا بتاع
خليكي فرش .. احنا في مصر
بلد المليون .. كلبش


سلاموووووووووز

Soooo يقول...

منى

تصدقي فعلا الحكومه محتاجه للصدقه

انا بعد كده .. هدفع الفلوس للامين .. واجري
عشات تبقى صدقة .. جاريه


سلاموووووووز

Soooo يقول...

cinderella

على رأيك والله عنتر .. قصدي يا سندريلا
وانا مش باتكلم على الفلوس
الحمدلله انتي عارفاني بابعزق فلوسي في الرايحه والجايه
واللي في جيبي مش بتاعي .. ولا بتاع حد تاني اصلا



سلامووووووز

Soooo يقول...

Nadosha

اهدى بس يا بنتي
واللي اتكسر يتصلح
واللي اتكلبش .. يندفعلو ايجار الكلبش



سلاموووووووز

Soooo يقول...

osama

عارف يا اوس .. انا لي واحد كان في هولندا بيقوللي انهم هناك لما حد بيعمل مخالفه بيخرمو الرخصه بتاعته
ولما الرخصه بتاعته بيبقى فيها خمس خروم يبقى لازم يعمل واحده تانيه ويتحمل مصاريف استخراج الرخصه
يعني لو عمل اربع مخالفات من نوعية مخالفات معينه واحترم نفسه .. يقدر يمشي بالرخصه بتاعته عادي خالص

فعلا .. دول متقدمه
قصدي .. دول متكلبشه


سلامووووووووووووز

Soooo يقول...

زمرده

فعلا
وااااعجبك؟


سلاموووووووووز

Soooo يقول...

Esmat


لا حول ولا قوة الا بالله

اهو ده فعلا اللي اسمه موت وخراب ديار .. وضريبه مبيعات

ضريبة مبيعات ايه على جثة يا عالم يا ولود ويا ولود ويا ولود ....


سلامووووووووووز

Soooo يقول...

Shahy


والله فيكي الخير
انتي الوحيده اللي اهتمت انها تطمن على المصلحه اللي كنت رايحلها
ربنا يخليكي لينا يارب


سلامووووووز

Soooo يقول...

مشمش


صاحبك ايه وبتاع ايه
انا ماعرفكيش اصلا
اضراب ضد الحكومه؟؟
نتضامن مع بعضنا ؟؟؟

انا ماعرفهاش يا سيادة الحكمدار


سلاموووووووووووووز

Soooo يقول...

MKSARAT SAYED SAAD

وانا معاك والله
وعندي العربية النص نقل ولونها ابيض
واعرف واد حداد حكايه .. هاتله كلبش انت بس وهو يعمللك ابوه

يلا بقى اتجدعن واسرقلنا واحد


سلامووووووووووز

Soooo يقول...

Nani


والله العظيم ضحكتك دي كبيره قوي
والحمدلله ان ربنا وفقني وقدرت اخلي واحده تضحك من قلبها
و والله العظيم .. والله العظيم
بمجرد ما قريت تعليقك وضحكتك دي تقريبا نسيت الموقف وفرحت اني قدرت بفضل ربنا اخليكي تضحكي

واقتراحك جدير بالدراسه .. بمجرد ما اجيب العربيه ان شاء الله


سلامووووووووووز

Soooo يقول...

ابو مفراح

وتمسك نفسك من الضحك ليه يا عمنا
اضحك ياعم بدل ما يأجرو الضحك بعد كده

وبمناسبة عم عطية بتاع الكلابشات
الاقيش معاك كارت منه عشان نفسي بنت اخويا تدخل معهد امناء شرطة وتظبطنا؟؟؟


سلاموووووووووووز

Soooo يقول...

rainbow

هدى صحفية المستقبل المشرق

طب والله العظيم واحشاني وكنت مفتقد تعليقاتك

وبعدين في ايه يا ستي
روقي كده بقى
وبعدين فين البوست الساخر اللي وعدتيني بيه؟؟؟؟


سلامووووووووووز

Soooo يقول...

Hannoda

هي فعلا بلطجه
وعلى المتضرضر .. اللجوء الى التدوين

ملحوظه
تشريفك لي وزيارتك لمدونتي ومتابعتك ليها ده شرف بالنسبه ليه .. وربنا يعينك ويقويكي يارب


سلاموووووووووز

Soooo يقول...

صاحب المضيفة

ربنا يكون في عوننا جميعا يارب
وربنا يبعد عننا التخلف .. والظلم
منورني وارجو انك تعتبر مدونتي هي مدونتك تمام


سلاموووووووووووز

Soooo يقول...

Dr. Diaa Elnaggar


يالهوي
يالهوي
يالهوي
تلاته يالهوي

انا عملت كل ده؟؟؟
انا اتترجم البوست بتاعي لكل اللغات الحيه والميته؟؟
انا ضربت السياحه؟؟


انا مصري .. واتكلبشت في بلدي .. ودفعت ايجار الكلبش .. ودفعت الغرامه .. واتكلمت وقولت الحق

وقل لن يصيبنا الا ماكتب الله لنا


سلامووووووووووز

Dr. Diaa Elnaggar يقول...

ما هو عشان كده يا سوووووووو


ضياء

غير معرف يقول...

تحفة البوست يا سوووو
بجد مت من الضحك على مشروع الكلبشات بتاعك ولولا حقوق الملكية الفكرية كنت نفذته من بكره
بس سبقتني ياعم
حلال عليك .... الكلبشات ؛)

arabicseo يقول...

:)
hehe, you should pay for eveything he asks for !!!!
otherwise u will get screwed, this is Egypt my friend

Desert cat يقول...

فكرتنى بالمخبر اللى كان يحصل منى غرامة الاموال العامة وكانت 100 جنيه
اديت له الـ100 جنيه بعد ما كتب الايصال لاقيته بيقولى 105
قولت له الخمسة ليه
قالى مصاريف
ببص ف الايصال لاقيتهم مية واربعين قرش
رحت مدياله جنيه
يعنى 101
قالى ايه ده
قولت له كدا كويس اوى
فى الايصال مية واربعين قرش كدا هيفضل معاك ستين قرش خد بيهم حاجه للولاد وانت مروح
لاقيته واقف بيقولى حسبى الله ونعم الوكيل
وخد بعضه ومشى

Soooo يقول...

Dr. Diaa Elnaggar


والله تصدق ممكن يكون فعلا عشان كده يا دكتوري

ربنا يستر بقى



سلاموووووووووز

Soooo يقول...

öjg


الحمدلله انك ضحكتي
بس احب اوضحلك اننا في مصر
يعني مافيش حاجه اسمها حقوق فكريه
اعملي الشروع وانتي متطمنه
لنا الله



سلاموووووووووز

Soooo يقول...

Mohamed


لا والنبي يا اخويا
هو انت يابني عشان مقضيها شويه كنكا وشويه بلجيكا وشوية المنصورة .. افتكرت نفسك خواجه خلاص
؟؟
لا يا حبيبي .. ماتنساش امين الراعي وقهوة كلش وقهوة المهويه



سلاموووووووووووز

Soooo يقول...

Desert cat


طب والله المخبر ده ابن حلال مصفي
وشكله مش من الحزب الوطني
شكله مش مخبر اصلا
شكله مش من مصر



سلامووووووووووز

shreen يقول...

سوووو
مش بقولك
ما فيش زيك
كام واحد عربيته بتتكلبش كل يوم
قولى بقى كام واحد من الخلق اللى عرابيتهم بتتكلبش
ممكن يكتبوا كلام زى كلامك ده عن الموقف ده

صحيح هى مش عربيتك ولا حاجه
بس الموقف كله يحرق الدم
وبالذات حكايه ايجار الكلبش ده

انت خليت الواحد بالرغم من ان دمه اتحرق
يبتسم
والنكته الفظيعه بتاعت دى
بصراحه يعنى
انت عارف هى خلتنا شعب ايه ولا مؤاخذه
انت عسل
ما فيش زيك

L.G. يقول...

أكيد الناس دي كتبت كل حاجة أنا بأه معدتش عايزة أضحك أنا نفسي أزعق وأثور وأشيل كل فاسد وأرميه في النيل والله حرام حسبي الله ونعم الوكيل

L.G. يقول...

بلاش نرميه في النيل النيل حيتلوث حندفينيها

الـسـيـدة نـون يقول...

ايجار كلابش
بتتكلم جد ولا بتخطرف يا سووووو
طب والله فكرة هايلة
ده ينفع مشروع الواحد يستفيد منه
ده انا اجيبلى اد تلاتين اربعين كلابش واروح وسط البلد اكلبش العربيات ومش هاخد غرامة انا بس هالم الايجار
ده انا كدة اجيب الشقة ام بلكونة فى خلال شهرين بالكتير
عمار يا مصر
اختك خيخة

د/اجدع بنوته يقول...

ايجار كلبش ههههههههههههههههههه

جامده دى .. انا مره العربيه اتونشت منى .. (( اتسحبت بالونش يعنى ))

خرجت لقيت مكانها علامة تعجب الحمرا دى بتاعة المرور

سالت عرفت ان معناها ان العربيه ااتنتشت المرور .. مع انها وربنا مكانتش لا تانى ولا تالت حتى ..

روحت اخد تاكسى ومروحه وبعت بابا اتصرف بقى

كانت فعلا 50 جنيه بس الحمدلله محسبوناش ع تمن البنزين اللى استهلكوه ف سحب العربيه

فاتورة تونيش ههههههههههه

وهى بس ع قد كده

متشوف مخالفات المرور ..

والله بنلاقى علينا مخالفات ف حتت احنا مروحنهاش عمرنااا اصلا

وف اوقات غريبه

اشى مخالفه طريق الفيوم معرفش الكيلو كام الساعه 3 فجرا ههههههههههههههههه

زى مايكون العربيه بتمشى لوحدها

وغصب عنك تدفع يااما مش هتجدد ويوقفلك حالك

يعنى صباح الفللللللل

خالد المصري يقول...

بص يا ريس
اجمل حل اشتريلك كلبش خصوصي ومكان ما تروح كلبش نفسك بنفسك
تصدق حلوة تيجي نعملها حمله

حمله ( كلبش نفسك بنفسك )

وبكده نبقى قضينا على قضيه ايجار الكلبشات وان كنت اشك ان علاء الدين والمصباح السحري هو صاحب الشركه اللي بتورد كلبشات للحكومه

تحياتي
( استر علينا يا رب )