السبت، 5 ذو الحجة، 1428 هـ

!!! (1) المهمة .. الصعيديه

رئيس جمهورية نفسي قفش علي لما اتكلمت بلسان صعيدي .. وكأني باتريق او باقلل من قيمة الصعايده
.. مع العلم اني من اكتر الناس تعصبا للصعايده .. وللنادي الاهلي
وعشان اوضح قد ايه انا متعصب لأصلي الصعيدي .. هنزل موضوع قديم قوي .. كنت نزلته في كزا منتدى زمان
موضوع من حوالي 4 سنين او اقل بحاجه بسيطه
وهنزله واكتبه زي ما كتبته ونشرته أول مره .. على هيئة حلقات
اتمنى انه يعجبكم .. وأتمنى انكم تتابعوه لأخر جزء ولآخر كلمه
وماتحكموش عليه من اول سطرين ولا اول حلقتين تلاته وبس

----------


!! سوووو في مهمة رسمية .. صعيديه

----------
ازيكم يا اخواننا .. على الله تكونو كويسين النهارده
انا ابتعدت عنكم كام يوم عشان كنت مسافر الصعيد - بلدي - عشان كان في فرح ابن عمي اللي هايتجوز بنت خالي وطبعا كان لازم ابوي وأمي يكونو موجودين .. والرحله دي كانت بجد .. غريبه وفريده في نفس ذات التوقيت المحلي
انا هاقولكم ايه اللي حصل فيها من اول ما ابتدينا نتحرك من مصر- القاهرة - واحنا مسافرين .. ولحد ما رجعنا الحمدلله بالسلامه


اليوم الأول أو .. الحلقه الأولى

السفر .. وليلة الحنا

الساعه دلوقتي 6 صباحا .. صحيت من النوم وكنت مجهز شنطتي من قبلها ورحت اصحي آبا الحاج - ابوي - و والدتي - امي العزيزه .. يارب يخليهالي
(((ربنا يرحمها دلوقتي)))
بعد ما صحيتهم ونزلت الشنط في العربيه وابتدينا نمشي وطبعا انا اللي كنت سايق عشان لو ابوي هو اللي ساق كنا هانوصل بعد يومين
ابويا بيسوق على سرعة 60 كيلو .. والطريق من مصر لحاد بلدنا حوالي 600 كيلو .. تخيلو انتو بقى المعاناه
.. وطبعا طول ما انا ماشي لازم اسمع اصوات زي
حااااااااااااااااااااااااااااااااااااااااسب !!!!! - مع العلم ان مافيش عربيات قدامي
يا ابني امشي بالراااااااااااااااااااااحه - انا سايق على سرعة 100 والاتوبيسات وعربيات النقل ماشيين على ميه وعشرين
اهو عشان كده انا ما كنتش عايزك تسوق !!!!!! - طبعا انتو عارفين مين اللي بيقولها

الساعه 1 بعد الضهر .. وصلنا بالسلامه الحمدلله .. واول ما وصلنا لقيت خبر وصولنا اتسرب في البلد كلها
بلدنا حوالي 5000 نسمه .. وكلهم قرايب في بعض
ولقيت كل عمامي و عماتي وخيلاني وخالاتي وولادهم جايين عشان يباركو وصولنا
ابوي وامي بقالهم حوالي سنتين ما راحوش الصعيد
.. وطبعا قرايبنا مش جايين بايديهم فاضيه جايبين معاهم الغدا
كمية لحمه تكفي ولاية شبرا كلها لمدة يومين مثلا
الساعه 3 الضهر .. بعد الغدا والشاي الصعيدي طبعا والفاكهه اللي بكميات مالهاش حصر .. دخلت عشان انام شويه خصوصا ان النهارده ليلة الحنا والسهره صبّاحي .. ما كملتش ربع ساعه في السرير ولقيت ولاد عمي وولاد خالي جايين يخطفوني
أحدهم : جوووووم معانا
سوووو : على فين ؟؟؟
أحدهم آخر غير الأولاني : جوووم ومالكش دعوه
سوووو : يا اخواننا انا تعبان نوم .. سيبوني شويه ابوس ايديكم
وطبعا ماتعرفش تاخد حق ولا باطل معاهم .. الخلاصه قمت معاهم .. ولكم ان تتخيلو اني في اليوم ده شربت حوالي اتنين وعشرين قزازة حاجه ساقعه
كل ما نعدي قدام بقال ولا سوبر ماركت ويعرف انا مين لازم يعمل معايه الواجب
المهم .. ربنا كرمني وعرفت اكتّ منهم ورحت بيت واحد من قرايبنا اللي ما كانوش عارفين اننا وصلنا .. يعني عشان اسلم عليهم واعزمهم على الفرح وكده .. ولقيتهم مجهزين الغدا .. وطبعا عيب قوي ما اتغداش معاهم
يالهووووووووووووووووووووووووووووي

الساعه دلوقتي 6 المغرب وانا عايز ارتاح شويه من الاكل والشرب والكلام ده .. قلت بس .. تاهت ولقيتها .. انا هاروح الغيط بتاع عمامي
المزرعة بتاعة العيله كلها
لقيت هناك واحد احنا مسمينه عم (سليمان الجمال) .. قلت اتكلم معاه شويه انا وابن بنت عمي
!!!! اللي اكبر مني بسنتين ومع ذلك بيقوللي يا خال
اكتشفت ان عم (سليمان) ده متغيّب عن العالم الخارجي .. تخيلو انه ما يعرفش مين روبي ؟؟؟؟؟؟؟؟؟
شربنا كام كباية شاي صعيدي يفووقو جمل مش بني آدم .. واتحركنا قبل الدنيا ما تضلم علينا .. وخصوصا ان الغيط بعيد عن بيت العيله .. والديابه بتسرح من بعد الساعه 8 تقريبا
الساعه 8 مساءا .. رحنا بيت العيله وانا كنت عديّت على بيتنا اجيب شنطتي عشان ولاد عمي حلفو يمين طلاق اني لازم ابات عندهم .. واول ما دخلت لقيته بياكلوا
مش عارف اكل ايه الساعه 8 .. دول متغديين الساعه 3 .. لحقو يجوعو !!؟؟
وطبعا غصب عن عيني وعين اللي خلفوني لازم اقعد اتنيل آكل معاهم والا هاتبقى مصيبه
وفعلا .. كلت للمره التالته في خلال 8 ساعات بس .. والاكل كله لحمه في لحمه .. وفي حاجه اسمها عيش شمسي ده اللي يعرفه الصعايده بس .. حاجه فظيعه فظيعه فظيعه
لسه قايم عشان أغير هدومي وآخد دش لقيتهم راحو جايبين اكبر بطيخه شفتها في حياتي .. وزنها حوال اتناشر كيلو وطبعا لازم تخلص
احنا كنا حوالي 4 افراد بس .. الواحد نصيبه 3 كيلوبطيييييييخ
الحمدلله ربنا وفقني في المعركه الحربيه دي وانتصرت على كل ولاد عمي وكلت اكبر كميه
مش فجعنه مني ولا جوع .. لأ عشان اخلص بسرعه واقوم
دخلت الحمام بعدها .. وفضلت قاعد لمدة ساعه ونص ..
طبعا عارفين كنت باعمل ايه بعد الحاجات اللي اتدفست جوه بطني
خروفين + شادر فاكهه + شركه الاهرام للمشروبات = مجاري مسدوده

الساعه 10 والناس ابتدت تهلّ على المنضره
المنضره دي كلمه جايه من المنظره والفشخره .. وكل عيله في البلد ليها المنضره بتاعتها
كل الناس لما شافوني ابتدينا في الاحضان
ربنا ما يوريكم أحضان الصعايده .. تهتك في العظام
شويه ولقيت واحد من ولاد عمي راح مديني خرطوشتين مارلبورو وقاللي
!!!! روح حيي الناس
يعني اروح واعزم عليهم يشربو سجاير وكده ولو قلتله انا ماليش في الكلام ده .. تضيع فيها رقاب

الساعه 12 بالليل والناس ابتدت تمل ّ من القعده والكلام وكده .. شويه ولقيت فرقه مزمار صعيدي راحت جايه وابتدت تعزف وتغني في الصوان اللي في الشارع بره البيت والمنضره .. وطبعا ده كله كان على انغام الضرب بالبندقيه الآلي
تقولش الحرب العالميه التالته ابتدت .. وانا هبقى شهيد فيها
الساعه 3 الفجر .. لقيت اكبر واحد من ولاد عمي قام .. وبعدها بشويه لقيت حوالي تلات عربيات نص نقل راحو داخلين وكلهم مليانين صناديق بيره وحاجات كده
ابتدينا في الكلام الكبيييييييييييييييييييييير
وطبعا كانت السجاير اللي بتلف على الناس نوعها غير الانواع العاديه يعني سجاير ملفوفه
حوالي 5 طرب حشيش اتفرتكو .. طبعا غير الهدايا للناس الكبيره اللي ماينفعش تشرب قدام الناس

الساعه 5 الفجر حصلت خناقه بين (خالد) أكبر واحد من ولاد عمي (عبد الراضي) و(حسن) أكبرواحد من عيله كبيره برضه اسمها (الجيلاني) قرايب برضه .. بس الحمدلله .. ولاد الحلال تدخلو في الوقت المناسب قبل ما حد يروح فيها
ومع ذلك لسه نفوسهم مش صافيه مع بعضيهم .. يا خوفي .. ايه اللي ممكن يحصل ؟؟؟

الساعه 7 الصبح الناس ابتدت تمشي بعد ما ووصلو لمرحلة الهوهوه
المرحله اللي بعد السكر البيّن
من الحاجات اللي شربوها والحشيش اللي اتضرب .. لدرجة اني كنت باسمع صوت الناموس طاير حوالينا وهو بيغني .. لما بدا يتسنّى .. أن أأن أأن أن أن أن
ابتدينا انا وولاد عمي وولاد خالي نشيل الدكك اللي كانت موجوده وندخلها المنضره وننضف المكان عشان الناس اللي هاتيجي بكره الفرح


!!!!! ياااااااااااااااااااااااااااه .. آخيرا هانام

الساعه 8 الصبح .. دخلت عشان انام في اوضة (علي) ابن عمي (محمد) .. والظاهر انه ما كانش قلع الجزمه بقاله حوالي 200 سنه ق:م .. لدرجة اني من كتر الروائح المنبعثه من رجليه الخرافيه .. تقريبا فقدت نعمة البصر
.. بس اكتشفت ان الريحه دي بتبعد عننا الناموس والابراص والكائنات دي
فحمدت ربنا انها جات على قد كده

الساعه 9 الصبح .. نممممممممممممممممممت



الى اللقاء بكره عشان اكملكم الحكايه .. يارب تكون عجبتكم الحلقه الاولى
سوووو

هناك 45 تعليقًا:

3ala asm masr يقول...

الحمد لله انها عدت على الخير
مستنين بقيت الحلقات

(green eyes) يقول...

اسلوبك حلو اوي في سرد القصةورغم ان البوست طويل محسدتش بأي ملل
الى تقدم مستمر
تحياتي

totaaaa يقول...

هاى سوووووو
انا اول مرة اكتبلك تعليق بس بجد ماقدرتش امنع نفسى انى اعبر عن اعجابى بكتاباتك فعلا جامدة اوى
وانا فرحانة اوى انك برده التزمت بالنهايات السعيدة ونمت فى الاخر بعد كل العذاب اللى انت شفته ده
وحمد لله على السلامة
تحياتى

إنـســـانـة يقول...

هههههههههههههههههههههههههههه

حشيش وخمرة هههههههههههههه ومرحلة الهوهوة والنموس إتصطل هههههههههههههههههههههههههههههههههههه

بجد انا قعدت اضحك لدرجة انى خوفت بابا يصحى من النوم على صوتى هههههههههههه

على فكرة انا صعيدية صميمة بردو وانا ورئيس جمهورية نفسي بلاديات كمان

بس الحلقة تحفةةةةةةةةةةة ومنتظرة باقى الحلقات يا سووووو

cinderella يقول...

الحمد لله انها جات على اد كده
لو كنت استنيت شويه كان هيبئى الفطار رقم واحد داخل بخيرات الله
بجد بجد اسلوب راااااااااااائع في السرد
وواضح انها قصه جميله من دلوقتي
بس ما تتأخرش في باقي الحلقات
في الإنتظار

Rehab Mostafa يقول...

:D:D:D:D
لأ بجد جامده .... بس انت كده بتبلغ عن ولاد عمك :D
حشيش وخمره دي تجارة مخدرات دي :D:D
الصعايده دول بجد آخر كرم بعيداً يعني عن جو المخدرات ده :) بس هما فعلاً فيهم كرم زياده أوي في موضوع الأكل و صندوق الحاجه الساقعه اللي انت شربته ده

أنا هستنى باقي الحلقات

بنوته مصرية يقول...

هههههههههههههههههههه

خمرة يا سووو بتشرب منكر ههههههههه وحشيش كمان وسجاير مارلبورو طبعا انت واخد علي كوكو الضعيف ههههههههه بجد فطستني من الضحك علي البطيخه اتخيلت منظرك وانت بتفترسها ههههههههههه

بص انا مش من الصعيد بس من 3 سنوات سافرت مع مامتي واخواتي سوهاج لي اهل اخواتي اللي هو اهل جوز مامتي بس بجد مقابلتهم كانت مقابلة ناس ولاد اصول انا كانو مرحبين بيا اكتر من اخواتي اللي هما لحمهم ودمهم وعاوزة اقولك اني ولاد عمهم بيكلموني بستمرار ويتصلو بيا انا تقريبا اللي بقول لي اخواتي اني ولاد عمهم بيسلمو عليهم بس بيني وبينك المشوار صعب صعب احنا كنا ماجرين عربية لان ماما مش هتعرف تسوق في الطريق ده وانا اول مرا امشي عليه فعلشان نرجع بلسلامه اجرنا سيارة بس كل ريست اخلي السواق ينزلني واشرب حاجه ساقعه لان ساعتها في عز حر شهر 6 متخيل الجو كنت هموت من الحر وهعيط وارجع ههههههههه بس بجد كانت اجازة حلوة وخصوصا عمري ما سافرت الصعيدانبسطت جداا والناس دول في منتهي الطيبة والشهامه ياعم دانا لو مكنتش ساعتها مخطوبة ومكتوب كتابي كنت هتجوز هناك هههههههههههه شوفت الكرم بقي اللي علي اصولة

بجد بوست يجنن وانا لو مكنتش سافرت وشوفت الكرم مكنتش هصدقك في اللي قولته بس مش غريبة عليهم لانهم اهل لذالك

معلشي طويلت عليك بس بد فكرتني بالايام دي ونفسي اسافر تاني :$

لماضة يقول...

هههههههههههههههههههههههههههه
ههههههههههههههههههههههه
هههههههههههههههه
يا خبر ابييييييييض
بس والله الصعايده دول انا بحبهم جدا يكفى جدعنتهم وكرمهم الى انت اكلته بنفسك
انا بحب اكلهم جدا خصوصا الفايش والكشك لوعندك شويه ابعتلى
سيبك انت
احمد ربنا انهم مجابولكش تحلية تشربلك زلعتين مش ولا حاجه مسح زور
تحياتى ليك يا سوو فى انتظار القادم

هناء يقول...

يلا بسرعة الحلقة الثانية

Doba يقول...

لما بدااااااا يتسنى

بالذمة ده اسسمه كلام
انت طفس وعاوز تاكل قول - مش تقعد تلف على بيوت البلد علشان يأكلوك

فضحتنا
ثم اطلع احسنلك بعلبتين المارلبورو اللى ضربتهم فى جيبك

ودكك وبتاع والله انا لو منك كنت أنتخت بالكرش ده على اى دكة فى الطل بس كنت اعمل شبكات علشان الديابة

فى انتظار البقية يا استاذ متتأخرشى
حاااااااااسب
سوق على مهلك سووووووووق

تحياتشى يا باهظ بيه
ممكن اتنين بهججة هنا لو سمحت

سلامنتوز
هبة

كاميليا يقول...

هههههههه

ربنا معاك

((المنضره دي كلمه جايه من المنظره والفشخره .. وكل عيله في البلد ليها المنضره ))

لا ياسووو ده مش صح.. انا كمان من سوهاج.. واعرف ان المنضرة جاية من الانتظار يعنى غرفة الانتظار ياابن عمى.

قصة جميلة اوى خالص
بس مش تتأخر علينا كتير

تحياتى
كاميليا

Nadosha يقول...

الى الاستاذ رئيس جمهورية نفسه انت لو شوفت البواب بتاعنا بيتكلم زي حتاكد ان صعيدى اصيل و لما سووو اتكلم زي الصعيدة كان بيتكلم زيه.
نوم العافية يا سووو :) الحمد لله انك نمت و مش حصلك تلعبك معوي وقتها
بجد الحلقة الاولي تجنن و انا مستانية الباقي

بت خيخة وأى كلام يقول...

ههههههههههههههههههههههههههههه
فطستنى على روحى من الضحك

والا حكاية النموس اللى بيغنى لفرقة الموسيقى العربية دى كمان

انا شاكة انك منمتش ولا حاجة
علشان كدة انا مستنية تكمل باقى اليالى فى الصعيد

اختك خيخة

Nani يقول...

السلام عليكم
كله شبه اللي عندي لحد البيرة والحشيش نختلف
بس عجبتني الناموسة المهسهسة
يخرب شيطانك يا سوووو انفضحت في الحارة كلها
شوف لو اهلي ودوني المستشفى حالة هبل رح افسد عنك على طول
ناموسة مهسهسة هههه ههههههه ههه هههه

مشمش يقول...

اجمل حاجة كتبتها بجد موتني من الضحك وكلامك حلو اوي والاحلي اني بحب الصعايدة اوي بكل تفاصيلهم معرفش لية ونفسي اتجوز صعيدي صميم يعني حمش وكدة وياخدني معاه الصعيد والبس جلابية وكدة يعني بس الي متاكدة منة اني هموت منة مع اول نموسة تقربلي
ربنا معاك وانا مستنية باقي الحلقات علي احر من الجمر
سلام ياااااا سكر

3abdo me7tas يقول...

ههههههههههه
ههههههههههه
ههههههههههه
ههههههههههه
ههههههههههه
ههههههههههه
ههههههههههه
ههههههههههه
ههههههههههه
ههههههههههه
ههههههههههه

مش قادر بجد أمسك نفسي
ربنا يسامحك يا عم سووووو
يعنى أول مرة أدخل عندك يحصلى كده
يا خرابى
ههههههههههه
ههههههههههه
ههههههههههه
ههههههههههه
ههههههههههه
ههههههههههه
طبعا انت مش عارف انا بضحك عليى إيه
هقولك أهو
ههههههههههه
ههههههههههه
ههههههههههه
ههههههههههه
ههههههههههه

على دى يا عم
والظاهر انه ما كانش قلع الجزمه بقاله حوالي 200 سنه ق:م .. لدرجة اني من كتر الروائح المنبعثه من رجليه الخرافيه .. تقريبا فقدت نعمة البصر .. بس اكتشفت ان الريحه دي بتبعد عننا الناموس والابراص والكائنات دي

سهر الليالى يقول...

ما شاء الله يا سوووو
أهل كرم بصحيح
هما دول ولاد البلد بجد
روح العيلة والكرم والترحاب اهو كدة الصعايدة ولا بلاش

معاك يا سووو لأخر حلقه وممكن لحد التتر كمان

تحياتى

ابن حـجـر الـعـسـقـلانـى يقول...

حرام عليك يا راجل .. انت كنت هاتعمل لى مشكلة مع مديرى فى الشغل

أنا قلت افتح مدونتك و انا فى الشغل اقرا الموضوع فى الخباثة .. لقيتنى ميت من الضحك بس ربنا ستر إن المدير ماكانش قاعد .. لكن أنا خلص التدوينة من هنا .. و هو طب عليا من هنا .. لقانى باضحك ملئ شدقيا .. و كان شكلى بطيخ قدامه بصراحة

shreen يقول...

سووو
مش باقولك
انت ما فيش زيك
موقف عادى بيحصل لناس كتير
انت بتخليه موقف غاية فى خفة الدم
بجد ان موهوب

اما بقى لموضوع الوالد اللى بيسوق على 60
فده ارحم من ماما بتسوق على 40
لدرجة انى بقولها العجل اللى جنبنا بيعدى ويسبقنا

ويالهووووى لو سقت انا
تلاقيها ماسكه فى العليقه اللى جنب الباب
وعماله تقرا قرآن
كأننا طالعين القرافه
او رايحيين نستشهد

ولا لما اجى الف بالعربيه
تلاقيها عماله تقوللى خدى بالك
ملف
ملف
ملللللفففففف

والله بابقى هتشل
يعنى هى بتشوف وانا لا

ما علينا
حرمت اسوق وهى جنبى اصلا

الواحد مش مستغنى عن شرايين مخه اللى ممكن تضرب

مستنيه الحلقه التانيه

بس يا ريت خف اكل المره دى
الساعه ونص اللى قضيتهم فى حمام بلدكم
تباعتهم وصلت القاهره

ارحم يا جدع
سلامووووززززززززززز

عاليا حليم يقول...

انت فيك ميزة بتخلى الواحد ما يزهأش مهما كان البوست طويل

سلامووووووووووووز
كل سنة و انت طيب

Soooo يقول...

3ala asm masr

عارفه لولاش اننا داخلين على عيد واجازات وكده
كنت خنقت عليكي وقلتلك قومي زاكري
لكن يلا .. كل سنه وانتي طيبه .. وهنزل الحلقه التانيه دلوقتي ان شاء الله


سلاموووووووووووز

Soooo يقول...

(green eyes)

الله يخليكي يارب
وانا معاكي فعلا ان الحلقات طويله .. يمكن لاني زمان لما كنت باكتبها ماكنتش كويس قوي في الكتابه .. ولغاية دلوقتي برضه انا مش كويس

وان شاء الله هنزل باقي الحلقات تباعا

وكل سنه وانتي طيبه


سلاموووووووووز

Soooo يقول...

totaaaa

انا سعيد اكتر بتشريفك لمدونتي المتواضعه وباشكرك على المجامله الرقيقه اللي قلتيها في حقي وفي حق كتاباتي البسيطه

بس خلي بالك .. القصه لسه ماخلصتش .. ويمكن ماتنتهيش نهايه سعيده

تابعيها وانتي هتفهمي قصدي
كل سنه وانتي طيبه


سلامووووووووووز

Soooo يقول...

إنـســـانـة

ربنا يبسطك دنيا وآخره يارب
واضحكي ياستي ولا يهمك .. ولو باباكي صحي خليه يقرا الموضوع هو كمان
مش يمكن يضحك ويصحي المنطقه كلها .. ونضحك جماعه

وانا لي الشرف ان اول حلقه عجبتك وانتي صعيديه .. عقبال رئيس جمهورية نفسي لما يقراها ويقول رأيه بصراحه

كل سنه وانتي طيبه

سلامووووووووووووز

Soooo يقول...

cinderella

الحمدلله ان بداية القصه عجبتك
وارجو انك تتابعيها للاخر .. وانك ماتغيريش رأيك

وان شاء الله هنزل الحلقه التانيه حالا
وكل سنه وانتي طيبه


سلاموووووووووز

Soooo يقول...

Rehab Mostafa

لا ماتقلقيش
لو بلغت عنهم مش هيتقبض عليهم لسبب بسيط جدا
ان المأمور وصف ظباط المركز كلهم كانو حاضرين الفرح .. وشربو بيره وخمره هم كمان
بس الحشيش .. خدوه على هيئة هبات لا ترد

وكل سنه وانتي طيبه


سلامووووووووز

Soooo يقول...

بنوته مصرية

بريئ يابيه
انا ماقلتش اني شربت حاجه .. انتي هتودينا في داهيه
ده انا لغاية دلوقتي باعاني من صراحتي في موضوع كدب الابل لما اتكلمت عن الماضي المؤلم بتاعي ايام المراهقه

وعلى فكره .. كرم الصعايده وترحيبهم بالغريب قبل القريب ده طبيعي جدا
لانهم من جواهم فيهم طبع الايثار على النفس والاقارب بطريقه رهيبه

وربنا يوفقك في حياتك مع جوزك .. ويا عالم
مش يمكن يكون ليه اصل صعيدي في الجد السابع .. ويكون كريم اكتر مننا

كل سنه وانتي طيبه

سلامووووووووز

Soooo يقول...

لماضة

داكتورة المستقبل الغااااامض
تصدقي وبعيدا عن اي حاجه انا والله بافرح لما بلاقي واحده عندها احساس كوميدي هايل زيك بتعلق عندي .. وبتضحك كده
باحس اني بجد عملت حاجه
خصوصا اني عارفه انه من الصعب اضحاك المضحكين

وان شاء الله باقي الحلقات تعجبك
وكل سنه وانتي طيبه

ملحوظه
الفايش اسمه هايش عندنا في سوهاج
ولو عايزه كشك فيه .. تحبي ابعتلك كام قرص ناشفين عن طريق البريد الدولي السريع؟؟؟


سلامووووووووووز

Soooo يقول...

هناء
اختي من الجزائر الشقيقه
منوراني والله
وانا عارف اني مقصر في حقك وفي حق متابعتي لمدونتك ولمواضيعك
بس والله مشاغل .. واوعدك اني هرجع اتابع مواضيعك واعلق عليها واقوللك رأي في اللي بتكتبيه
وبعيدن انا عايز اتعلم الجريجي اللي قلتي انك هتعلميهوني ده

كل سنه وانتي طيبه

سلاموووووووووووز

Soooo يقول...

Doba

خبر ايه يا ام يوسف
لازم يعني تحرجيني وتفضحيني بكرشي اللي جايبلي الكافيا ده

وبعدين انا ماضربتش علبتين مارلبور في جيبي ولا حاجه
انا ضربت صندوق بيره في جيب القميص بس
هو حد من الدهاشنه خد خبر؟؟؟

كل سنه وانتي طيبه


سلامووووووووووز

Soooo يقول...

كاميليا

على فكره .. انا لما كنت نزلت الموضوع ده زمان زي ماقلت في الاول .. جاني رد من احد اعضاء المنتدى اللي نشرت فيه القصه دي وقاللي المعلومه اللي انتي قولتيها دلوقتي .. واللي هي ان المنضره من الانتظار وليست من المنظرة والفشخره
بس زي ماقلت في اول الموضوع .. انا هنشر القصه زي مانشرتها زمان ومن غير اي تعديلات
اللهم الا دعائي بالرحمه على والدتي في اول القصه

وان شاء الله هنزل الحلقه التانيه حالا .. واتمنى من ربنا انها تعجبك

كل سنه وانتي طيبه


سلاموووووووووز

Soooo يقول...

Nadosha

رئيس جمهورية نفسي عنده حق وانتي عندك حق
الصعيد مش لهجه واحده
الصعيد فيه كزا لهجه وكزا طريقه
يعني ممكن يكون رئيس جمهورية نفسي من منطقه معينه في الصعيد بتتكلم بلهجه مختلفه عن اللي انتي سمعتيها من البواب بتاعكم
وبعدين فين العيديه؟؟
وفين عزومتك لي على غدوة في بلبع؟؟
ولا انتو كده .. يا شباب جيل المستقبل .. تاخدو فلوس البلد وماتعبروش اهل البلد

كل سنه وانتي طيبه


سلامووووووووز

Soooo يقول...

بت خيخة وأى كلام


ايوه كده نوريني وعلقي في المدونه كده
طب والله كنت مفتقد تعليقاتك هنا

وبعدين ماتقلقيش
انا لما بنام .. بناااااااااااااام
وان شاء الله هنزل حلقه تانيه دلوقتي

كل سنه وانتي طيبه


سلاموووووووز

Soooo يقول...

Nani

امانه عليكي ياشيخه لو رحتي مستشفى المجانين .. احجزيلي السرير اللي جنبك عشان انا خلاااااص

ملحوظه
هو انتي منين بالظبط؟؟؟؟؟؟؟


كل سنه وانتي طيبه

سلاموووووووز

Soooo يقول...

مشمش

مشمش يا صاحبي .. منوراني والله

وربنا يحققلك امنيتك وتتجوزي واحد صعيدي يمسيكي بعلقه ويصبحك بعلقه
لو انتي عايزه كده يعني

وماتقلقيش .. الناموس اللي هناك مايقدرش يقرب من البنات الحلوين اللي زيك
هيتخض ويقول لنفسه .. انه جه منطقه غلط

كل سنه وانتي طيبه

سلاموووووووز

Soooo يقول...

3abdo me7tas

منورني يا عبده باشا والله
والحمدلله ان اول زياره ليك عندي وتضحك كده
وربنا يقدرني اني اخليك واخلي كل اللي بيدخلو على مدونتي يبتسمو حتى ولو مجرد ابتسامه .. بس تكون طالعه من القلب
وياريتك تعتبر مدونتي هي مدونتك تمام وتشرفني بتعليقاتك عندي
وكل سنه وانت طيب


سلامووووووووز

Soooo يقول...

سهر الليالى

الحمدلله ان اول حلقه عجبتك
وباتمنى من ربنا انها تعجبك لغاية التتر كمان

كل سنه وانتي طيبه

سلامووووز

Soooo يقول...

ابن حـجـر الـعـسـقـلانـى

ياعم اضحك براحتك
ولو كلمك خليه يقراها .. مش يمكن يضحك هو كمان
وياعالم بقى ساعتها ايه اللي ممكن يحصل
مش يمكن يديك حوافز .. ولا حتى يقلشك ويجيبني انا مكانك

وش واحد بيضحك ضحكه شريره .. وماسك بطيخه بيلعب بيها باسكت بول

كل سنه وانت طيب

سلامووووووووز

Soooo يقول...

shreen

دايما ياشيرين بتخلي وشي يحمر من الكسوف وانا باقرى تعليقاتك ومجاملتك لمواضيعي
ومع كل ده بتحفزيني اني انزل مواضيع تاني عشان على الاقل اخلي اللي يقرا الموضوع يبتسم شويه من قلبه في وقت بقى الضحك والابتسام صعب فيه

وماتخافيش ياستي .. باقي الحلقات فيها اكل صحيح .. بس الحمدلله جسمي اتعود عليها وطلعلي كرش احوش فيه الاكل

كل سنه وانتي طيبه

سلاموووووووووز

Soooo يقول...

عاليا حليم

الحمدلله انك مازهقتيش من طول الموضوع
واتمنى انك تتابعي باقي القصه .. وماتزهقيش منها يارب

كل سنه وانتي طيبه


سلاموووووووووووووز

monmon يقول...

3la fekra gmda moooooooooooooooooooooooooooooooooooooooooooooot a5er 7aga bagad..we allah ykon fe 3onk mn re7t rglen
3ali..l0o0o0o0o0o0l

زُمُرده يقول...

يااااااااااااااه قلبي هيوقف
مفيش كرسي أأعقده
تُحفه انت والله
موهبه جنان

بس ايه انت متعصب جدا
انا عندي حل لذيذ كده
تسمع ولا ايه رأيك؟؟؟؟؟

هتقرا بالإجبار
أكيد مش اجباري ليك....لأ اجبار ضميرك وقلبك
ههههههه

مصريين غير مصريين
اهلاويه زملكاويه اتحاد اسماعيليه
عرب اجانب
كلنا لسيدنا آدم
يعني اصلنا واحد
فمتتعبوش قلبي بقى
يلا علشان اشوف الباقي
سلام يا غالي ياسوووووو

د/اجدع بنوته يقول...

ربنا يرحم الوالده يارب .. واموات المسلمين جميعا

.............

اهو علشان كده مكنتش عايزك تسوقى .. زى مابيقولى ابويا بالظبططط

هى كل الابهات كده ولا ايه

..................

انا كمان عندى ابن وبنت بنت خالتى اكبر منى بتلات سنين .. وبيقلولى ياخالتى

...............

ميعرفش مين روبى ... يانهار ارزققق ده الراجل فعلا متغيب متغيب يعنى

...........

بيره وحشيش ههههههههههههههههههههههههههه

...........

اليوميه تحفه وهكمل الباقى حالا باذن الله

والله الصعايده زى العسل

محمود الدوح يقول...

ههههههههههههههه

احضان وحاجات ساقعة وخروف وفاكهة
دا انت ميت يابنى دلوقت

هكمل الحلقات دى
عجبتنى بجد

مش العيش الشمسى دا اللى شبة المرحرح

طيب

غير معرف يقول...

الحمد لله للي عدت على كدة ونعرف بكرة في اية تاني وشكرا على المهمة الصعيدية اخوكم ابو مصطفى