الأربعاء، 16 ذو الحجة، 1428 هـ

!!! (3) المهمة .. الصعيديه

اليوم التالت أو .. الحلقه التالته
.. العروسه للعريس .. والجري لل

الساعه 2 الضهر .. ابتدت تبان علي ظواهر ضعف الابصاربعد يومين من النوم مع مركز السلاح الكيميائي (علي) .. وكمان لقيت نفسي مش حاسس بايدي ولا بجسمي بعد التحطيب اللي انا - للأسف - لعبته مع (مصطفى) .. لقيت (مصطفى) هو و(علي) بيصحوني عشان اتغدى .. وكمان عشان نروح نسلم على العريس والعروسه .. وفعلا الغدا كان حاجه بسيطه جدا النهارده .. عشان هنروح انا وباقي اولاد عمي الغيط بتاع العيله نركب خيل .. ونقضي اليوم هناك .. هانشوي وكده .. يعني هانقعد صباحي
الغدا البسيط اللي انا بقولكم عليه ده كان عباره عن صينية رقاق باللحمه المفروم .. والرقاق نفسه كان متسقي في شوربة بط .. وطبعا كان في بطتين تلاته عشره .. وحوالي 20 جوزحمام

- فعلا .. غدا بسييييييييييط جداااا -
كلنا بسرعه انا وولاد عمي (علي) و (أيمن) ومعانا طبعا الدبابه البشريه (مصطفى) وقلنا هانشرب الشاي على السطوح .. انا صاحب الاقتراح ده عشان اشربلي سيجاره بعد الأكله دي .. لانه ما ينفعش اشرب سجاير في البيت عشان ابوي كان بيتغدى معانا

- واد متربيييييييييييي -

الساعه 4 العصر .. لقيت بيت خالي وباقي افراد العصابه جم عند بيت عمي عشان يباركو للعرسان .. خصوصا وان العريس وعروسته هايسافرو النهارده .. تخيلو هايروحو فين ؟؟؟؟؟

!!! رايحين يقضو اسبوع في تركيا
- ايشي خيال يا نااااااااااس -
بعد الشاي وسوق الفاكهه اللي اتاكل من الموجودين .. وبعد ما اتصلو بالعريس عشان يقولوله انهم جايين يباركو وكده .. راحو طالعين وفعلا لقينا العريس هو اللي بيفتح الباب .. وابتدينا بقى في الاحضان والمباركه
أحدهم : الف مبروك يا ابو محمد
العريس : الله يبارك فيكم .. وعبجالكم - يعني عقبالكم

أبو احدهم : الف مبروك يا ولد اخوي

العريس : الله يبارك فيك يا عم وعبجال عوضك - يعني عقبال ماربنا يباركلك في خلفتك وفي عوضك
ودخلنا نقعد شويه .. وطبعا الحريم راحو داخلين على العروسه في الاوضه - طبعا عارفين لييييه - وبعد المباركه والكلام ده كله لقيت العروسه جايه عشان تسلم على عمي - حماها بقى - وتسلم كمان على ابوها وعلى باقي الرجاله الكبيره .. ودخلت اوضتها تاني

عارفين العروسه جات تسلم ليه ؟؟؟

عشان تشكرهم على النقطه اللي الحريم ادوهالها لما دخلو عليها في الاوضه .. فهمتو بقى الحريم دخلو ليه

مش عشان اللي جه في بالكم يعني

طبعا الشباب اللي زي حالاتي بعد ما قعدو بتاع ساعه كده خلاص بقى مالهاش لازمه القعده هنا .. وقررنا اننا نمشي عشان نلحق نروح الغيط والدنيا نور .. بس قبل ما نمشي سألنا العريس هو مين اللي هايوصله مصر عشان يسافر من هناك على تركيا .. عشان لو مافيش حد .. نشوف حد يوصله مننا .. قاللنا ان (أحمد) ابن عمي (عبد الراضي) هو اللي هايوصله مصر .. قلنا خلاص .. ومشينا بعد ما باركناله وسلمنا على العروسه مره تانيه واتجهنا على الغيط

اليوم هايبدأ ....... يا خوفييييييييييييييييييييي

الساعه 6 المغرب .. وصلنا الغيط وكنا حوالي 8 شباب طبعا غير اللي اتفق معانه انه هاييجي بعد ما يبارك للعرسان .. لقيت عم (سليمان الجمال) بيرحب بينا وبيفتح لنا الاستراحه بتاعة جدي الله يرحمه

زمااااان قوي (جديّ) كان بينام فيها لما كان الوقت بيتأخر عليه وما ينفعش يرجع البيت .. قبل العربيات والتليفونات والكلام ده كله .. وأول ما دخلت حسيت بجسمي بيقشعر .. وشفت شيشة (جديّ) واللي ماحدش حط عليها حجر من ساعة ما مات الله يرحمه

.. الاستراحه دي عباره عن اوضتين مبنين بالطوب النيي - بالطين يعني - وفيها تلاجه وفيها بوتاجاز وفيها راديو
بس يا خساره .. ما بيجبش نجوم إف إم
لقينا هناك (سامي) ابن عم (سليمان الجمال) .. شاب من سننا برضه وبيدرس في كلية صيدله جامعة اسيوط .. بس واد مسسخره ... جابلنا الشاي وشربنا كلنا مع عم (سليمان)
ملحوظه : عم (سليمان) ده يعتبر من العيله على الرغم انه مايقربلناش ولا حاجه .. اصل ابوه وامه ماتو وهو صغير .. وجدي هي اللي رباه وكان بيعتبره واحد من عياله لدرجة اننا افتكرنا انه فعلا عمنا
اطمّن (علي) و (أيمن) على ان اللحمه اللي في التلاجه متبلّه وجاهزه للشوي اللي كانو مرتبين للموضوع ده من امبارح وعملينهالي مفاجأه - ربنا مايوريكم مفاجآت الصعايده - بعد كده رحنا عشان نشوف الخيل ونشوف كل واحد مننا هايركب انهي خيل .. وعلى فكره انا ماركبتش خيل قبل كده .. قلت ل(سامي) يشوفلي خيل مؤدبه وبنت حلال عشان انا ما اعرفش اركب خيل اصلا
سامي : يبجى انت مالكش غير (رشا) .... - ده اسم الفرسه اللي هاركبها
سوووو : (رشا) ‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍؟؟؟!!!‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍ - طبعا من اسمها يتهيألكم انها هاديه ومؤدبه
سامي : دي فرسه لسه دايبينها - جايبنها - ومعتدريش بسرعه - مابتجريش بسرعه
سوووو : عالبركه

وطلعلي (رشا) من الاسطبل .. بصرااااااحه .. فرسه جميله جدا ولونها بني على ابيض .. شكلها (رشا) .. (رشا) يعني

(سامي) طلع فرس اسمه (رعد) و(أيمن) خد فرس اسمه (الملك) و(علي) خد فرسه اسمها (زنوبه) .. والباقي خد حاجات تانيه مش فاكر اساميها .. اما الدبابه البشريه (مصطفى) - ابن بنت عمي - خد بعضه وراح هو وعم (سليمان) يجهزو عدة الشوي وكده
الصراااااااع : اتفقت مع ولاد عمي اننا نمشي بالراحه ومانروحش بعيد عشان انا مش فارس يعني ولا عمري ركبت خيل .. وقالو ماشي مافيش مشاكل
- اوعى تصدق كلمه من واحد صعيدي عايز يعملك مفاجأه -
طلعنا كلنا بالراحه على اننا هانروح عند آخر الغيط بحري عند الترعه ونتمشى شويه هناك وبعدين نرجع تاني .. وطلعنا - ياريتي كنت فضلت مع امي - الخيل كلها ماشيه وهاديه والحياة دلع وفرح وسروووووور .. لحاد ما (ايمن) غمز الحصان بتاعه واللي اسمه (الملك) وطلع يجري .. بعدها بشويه الناس كلها سخنت وابتدت تجري
- قلت يا واد طننش خااااااااالص -

ومشيت انا و(سامي) اللي قعد يتكلم معاي واحنا بنمشي بالراحه
سامي : على كده انت يا باشمهندس ما ركبتش خيل جبل كده ؟؟؟
!!! سوووو : لو والله يا سامي .. يعني لو ركبت كنت هاخاف مثلا

سامي : طب انا هاجولك حاجه .. الفرسه عامله زي الست .. لما تحكمها كويس ماتجدرش ترفع راسها في وشك .. يعني ماتحسسش الفرسه اللي انت راكبها انك هايبها ولا خايف منها .. وحسسها انها ملك ايديك انت
سوووو : والله يا ابو سامي انا بيتهيأ ....

وقبل ما اكمل الكلمه لقيته راح ضارب الفرسه بتاعتي بالكرباج وطلع يجري .. ومن هنا ابتدت اللحظات المرعبه
التفسير المنطقي : الفرسه (رشا) اللي انا راكبها اتضح انها بتحب الفرس (رعد) اللي راكبه (سامي) .. بس (رعد) كان ماشي مع (زنوبه) عشان عفيّه وقويه عن (رشا) .. (زنوبه) بقى كانت ماشيه مع (الملك) اللي راكبه (ايمن) وطلع يجري بيه في اول الفيلم

هتقوليلي ايه فيلم الكارتون ده ؟؟؟ هاقولكم لأ .. ده مش فيلم كارتون .. ده فيلم رعببببببب

لما ضربها (سامي) وطلع يجري بالفرس (رعد) .. (رشا) هانم حبت تثبت ل(رعد) افندي انها قويه وعفيّه اكتر من الليدي (زنوبه)

وربنا مايوريكم .. طلعت تجري بقوة سُبعميييت فرسخخخ في الثانيه .. وانا أدادي فيها .. وهي مافيش
سوووو : يا بت هاجيبلك حصان احسن منه من مصر
رشا : ماليش دعوه انا عايزه من ده

سوووو : يابت اهدي وانا هصورلك كليب وانزله في عالم الحيوان وهتلاقي الحصنه كلها متيمه بيكي

رشا : هو اللي انا قلبي اختاره .. وانكوى قلبي بناره
ولقيت تاريخ حياتي كله عدّى علي في شريط سينمائي .. (رشا) من كتر ماهي ماشي بسرعه .. عدت كل الحصنه اللي قدامنا .. وولاد عمي فرحانيييييين
أحدهم : ايوه يا هندسه
أحدهم آخر : عفاااااااااارم علييييييييييك
أحدهم آخر تاني : فارس ولد فرسااااااااااااان
سوووو : (وهو يصوت كما النسوان) هآآآآآآآآآآآآآع .. هآآآآآآآآآآآآآآآآآآآع .. هآآآآآآآآآآآ

لسه ما كملتش الكلمه لقيتها بسلامتها - رشا هانم كعب الغزال - راحت ناطه من فوق الترعه .. وانا دييييييييييييب .. في الترعه
- كانت هذه هي مفاجآآآآآآآآآآآآآآآآآآآآآت الصعايده - طبعا انتو مبسوطيييييييييين


الساعه 8 بالليل .. بعد ما طلعت من الترعه واستحميت عشان البلهارسيا وعشان الطين اللي في الترعه .. ولبست جلابيه من جلاليب عم (سليمان) .. طلعت بره الاستراحه لقيت ولاد عمي مولعين شويه نار وبيعملو عليهم شاي .. أول ما شافوني هات يا ضحك
سوووو : بتضحكو وانا كنت هاموووووت فيها ؟؟؟
الكل : - ضحكككككككككككك بالعبيييييييط -
سوووو : ماشي .. ماشي يا سامي .. هي دي الفرسه المؤدبه ؟؟؟؟
سامي : وانا اعرف منيييين انها كانت غاويه رعد للدرجه دي
سوووو : لا يا شيييييييييييخ
ايمن : وبعدين احنا شايفينك وانت فرحان بيها وعاتجول - بتقول - هااااااع .. هاااااع
سوووو : يا بقر بقولكم هآآآآآآآآآآع .. يعني هاقع .. انا هقع
ضحك بزيااااااااااده .. وبيني بينكم كان موقف مسسسخره .. انا نفسي لما افتكرته دلوقتي باضحك
قعدنا طول الليله على كده .. كل ما حد منهم يبص في خلقتي يقعد يضحك .. وشربنا احلى كباية شاي شربتها في حياتي كانت معموله على الفحم .. وابتدو (مصطفى) و(ايمن) في الشوي وقعدت انا و(سامي) وعم (سليمان) وباقي الشباب نتكلم في احوال البلد وحاجات من كده .. وبعد ما اتكلمنا لقيت (ايمن) بيقول الاكل جهز خلاص .. قمنا ورحنا داخلين جوه في الاستراحه عشان الناموس ابتدى يشتغل .. ورصينا ورق جرايد قديمه على الأرض وابتدينا ننزّل الاكل .. وصدقوني والله ده اول يوم آكل فيه بنفس مفتوحه .. والاكل كان كتييير جدا وكلّنا قعدنا ناكل واحنا بنفتكر الموقف اياه واحنا بنضحك ونتريق على بعض

الساعه 1 بالليل .. بعد ما كلنا الكباب أواللحمه المشويه .. كلنا بتاع ست بطيخات وبتاع 10 كيلو عنب .. طبعا غير المانجه اللي كانت في اقفاص وكانو لسه هايبيعوها واحنا طبعا قعدنا نفتح في كل قفص وناخد منه شويه ونقفل القفص تاني عشان ماحدش من التجار اللي هايشتروها ياخد باله - ناس بتسرق في مالها .. غباااااوه
باختصار اليوم كان من احلى الايام تقريبا في حياتي
بعد حالة مفاجيع الصومال اللي كنا فيها دي قعدنا نشرب شاي واحنا بنلعب وبنتسامر .. (ايمن) بيلعب طاوله مع عم (سليمان) .. و(مصطفى) و(علي) بيلعبو شطرنج وهما الاتنين مش عارفين ايه اللعبه دي اصلا .. وانا ومعايه (سامي) و(محمد) ابن عمي (عبدالراضي) و(فتحي) ابن عمتي بنلعب استيميشن - تخيلو حريييفه فيها موت لدرجة اني كنت الكوز - وباقي الناس كانومقضينها كلام وبتاع .. ومره واحده جه تليفون ل (أيمن)

الساعه 3 الفجر .. اول ما الموبيل بتاع (ايمن) رن .. كلنا استغربنا .. مين هايكلمه دلوقتي وخصوصا ان الناس كلها عارفين اننا هنبات هنا النهارده .. (ايمن) رد عالموبيل وهو بيضحك عادي .. ومره واحده لقيناه سكت وبطل ضحك ‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍‍..‍‍ وقفل السكه وهو شكله متضايق .. وراح ناده (محمد) ابن عمي (عبدالراضي) .. وخده عشان يكلمه على جنب .. واول ما ابتدى (ايمن) يتكلم مع (محمد) بصوت واطي واحنا مش سامعينه .. لقيت (محمد) وشه قلب هو كمان .. وابتدا يعيط .. قمنا كلنا واحنا مستغربين
سامي : في ايه يا (ايمن) ؟؟؟؟
علي : التليفون ده كان من ميين ؟؟؟
ايمن : (بصوت هادي جدا) البجيه في حياتكم - البقيه في حياتكم
كلنا : ميييييييييين ؟؟؟؟؟؟؟؟؟؟
أيمن : عمكم (عبدالراضي)


ملحوظه :
عمي (عبدالراضي) هو اكبر واحد في اعمامي .. وهو مش عمي اخو ابويا على طول .. هو يقرب لابويا من ناحية الجد التالت تقريبا .. بس يعتبر عمي برضه .. عمي (عبدالراضي) - الله يرحمه - مخلف اربع ولاد وبنتين .. اكبر ولاد عمي (خالد) اللي كنت قلتلكم انه اتخانق مع واحد تاني في ليلة الحنا .. وبعدين (احمد) الي راح يوصل العرسان مصر عشان يسافرو .. و(مصطفى) مهندس بترول في السويس .. واصغرهم (محمد) اللي كان معانا

عمي (عبدالراضي) مات وهو بيصلي قيام الليل وكان عنده 87 سنه .. ربنا يرحمه ويرحمنا جميعا

الساعه 4 الفجر .. نزلنا كلنا البلد عشان نشوف ايه اللي هايحصل دلوقتي .. ورحنا داخلين على بيت عمي (عبد الراضي) .. لقيت (خالد) قاعد في الصاله ومعاه عمامي وخيلاني وابويا وناس تانيه .. واول ما (محمد) شاف اخوه (خالد) راح ناحيته وعينيه فيها دموع محبوسه عايزه تنزل
خالد : اجمد .. ابوك مخلف رجاله مش حريم
محمد : - وصوته مخنوق - آبوي مات يا خالد
خالد : كلنا هنموت .. ابوك مش احسن من سيدنا محمد عليه الصلاه والسلام .. كلنا هنموت
محمد : - بعد ما مسك نفسه شويه - اتصلت ب(مصطفى) و(أحمد) ؟؟؟
خالد : (مصطفى) هايجي في النهار و(احمد) الموبيل بتاعه مقفول
خالي (كمال) - ابو (اميره) او العروسه - طلع شويه بره البيت .. شويه وجه واحد عشان يغسّل المرحوم .. رجع خالي تاني بعد ما الراجل ده دخل على الاوضه اللي فيها المرحوم .. تقريبا اتصل ببنت خالي عالموبيل بتاعها


(حمّاد) ابن عمي عنده مرض السكر .. وراثه .. وبطبعه بيدخل الحمام كتير .. لما كان (احمد) بيوصلهم مصر .. كانو واقفين في استراحه .. وهو هناك كان خالي بيكلم (اميره) عالموبيل وقاللها على اللي حصل .. قالت ل(حمّاد) اللي قال ل(احمد) .. والكلام ده عرفناه بعد كده

معلش يا اخواننا .. الحكايه قلبت نكد .. بس هي دي الدنيا
ساعات بنضحك قوي من قلبنا
وساعات تانيه بنزعل .. وبرضه من قلبنا

اشوفكم بكره انشاء الله واكملكم الحكايه .. وعلى فكره
لسه في تطورات كتييييير

سوووو

هناك 55 تعليقًا:

s يقول...

هههههههههههههههههههههه اول مره اكون اول واحده تكتبلك
حلو البوست اوي يا سووو و البقاء لله مع انها متأخره شويه
الجزء بتاع الخيل ده مسخخررره, انا مت علي نفسي من الضحك
في انتظار المهمه القادمه ان شاء الله

مشمش يقول...

انا مبسوطة اني علقت بدري وانا التانية وزعلانة علي الي حصل بس هوة دة حال الدنيا والبقاء لله ومتزعلش كفاية الايام الجميلة الي عشتها مع الناس الحلوة دي وربنا يصبرهم

awdhal- يقول...

I am arabic like u.. but I wrote the comment in french because it's
difficult for me to handle in Arabic on the keyboard.
that made a few months I found your blog , through I wanna Be a bride blog - I like this girl -
sincerly I love ur way of drafting .. it is amusing especialy constructif about the egyptian traditions.
fazeeeeee3 zay mabete2olo f masser
Good luck

awdhal- يقول...

ça sera quand la 3éme partie de l'émission se3idi?
c'étaient tellement amusantes les deux premières!! t'es super cool soooooo

<---- so sorry...that was me

Desert cat يقول...

يعنى يا سو تندب فى الترعة وعمك عبدالراضى يموت
بس عجبنى اوى كلام خالد اللى قاله لمحمد وقت الوفاة فعلا الصعايده دول جدعان
الله يرحم عمو عبدالراضى
بس ياترى اميرة وحماد رجعوا من الطريق ولا ايه اللى حصل

بنوته مصرية يقول...

ضحكت عليك جدا لما وقعت في الترعه اكيد منظرك كان يضحك موت تعيش وتاخد غيرها

بس انت نكت علينا في الاخر عموما ده فعلا حال الدنيا وكلنا هنموت لا مفر

متغبش علينا زي كل مرا يا سوووو

صحيح العرسان رجعو ولا استعبطو فيها وسافرو ههههههههههههه بيني وبينك لو مين ده شهر عسل هههههههههه


منتظرينك في باقي المهمات


ملحوظة بطل اكل بقي الله انت بوظت ميزانية مصر هههههههههههه

طبعا بهزر صحتين

اختك رودي

عاليا حليم يقول...

على فكرة الحلقات دى و الله لو اتنشرت فى جريدة حتسمع اوى

انت لو تشبه الضيف احمد فعلا يبقى نصيحة بلاش موضوع التحطيب ده تانى

هههههههههههههههه

هزار يعنى بهزر

wa7dania يقول...

أولا : البقاء لله
ثانيا : والله والله مستمتعة جداااااااااااااا
بقراية البوستات بتاعتك
بجد يا سوووو إنت هايل في رواية القصة
سيبك من الهندسة دي والله مش بتجيب همها اسألني أنا
اشتغل مؤلف وإنت تكسب ملالين
D :
أي والله
منى

لماضة يقول...

والله ما اناعارفه اقولك ايه
سطر واحد بعد ما كنت ميته من الضحك
عنيا جابت دموع وانا دمعتى قريبه
يعنى ممكن ابهدلك الدنيا هنا
الله يرحمه يارب ويبارك فى اولاده
سيبك انت
جملتين موتونى من الضحك
اول واحده
ربنا مايوريكم مفاجآت الصعايده
ههههههههه اتخيلت جايبينلك جنبله قصدى قنبله
ولما قالك اجمد على الفرسه وانها زى الست شدها تطاطى يا نهارى عجبتنى جدااااا
بالنسبه لوقوعك فى الترعه بقى
انت متاكد انك كويس عندى اقراص بلهاريسيا عينات مستورده انما ايه
تعالى خدلك حبيتين على راى عمك رضا
واحلى كلمه بقى عجبتنى
كلمة ابوي
حلوه حلوه

فرنسا هانم يقول...

رشا بتحب رعد
ورعد ماشى مع زنوبه
وانت فى الترعه؟؟؟؟؟
صحيح يعملوها الحيوانات ويقع فيها البنى ادمين

زُمُرده يقول...

ايه ده
ده العيد جاب نتيجه والساحل إياااه
غمزه
ماشي لازم اشوف الحلقات اللي فاتت وارد براحتي

shayma يقول...

انا اول مرة اجى .. بس قريت كل اليوميات على كام بوست كمان
بجد تحفه يومياتك فى الصعيد جبارة
:)))))))))
بس حلو جو العيله ده اوى ربنا يديمه
واكيد هاجى اقرا الباقى
سلامى

Rehab Mostafa يقول...

:D:D:D:D:D
بجد أنا كنت خايفه ماما تصحى تتصل بمستشفى المجانين علشان بضحك لوحدي كده الساعه 4.30 الفجر
الجزء بتاع رشا ده موتني من الضحك

وكنت عارفه لما تليفون أيمن رن ان في مشكله حصلت بس ماكنتش متوقعه انها تبقى وفاة عمك
البقاء لله في جدك الله يرحمه وعمك الله يرحمه ويرحم أمواتنا جميعاً يارب

Nani يقول...

السلام عليكم
اسمع يا سووو فلم الجرينش فلم عائلي من الدرجة الاولى
يعني مفيهوش ولا لقطة غلط او اي لفظ مشين او حتى ايحاء
اذا بدك افلام اطفال تراك وصلت عندي كمشة ببعتلك اسماؤهم
سلاممممم

Nani يقول...

السلام عليكم
اللهم ارحم كل موتانا
انا مش فاهم موضوع انه الرجل مابيبكي لما حد يموت علشان هو مش ست
يعني الست صفت شغلة عيب او شتيمه
بعرف كل الوطن العربي عنده هاي النظرة بس رح تتغير ان شاء الله
والمرة الجاي اعمل زي روح مشي اهو رياضة مفيدة وامنة
ماحدش اخدلك صورة بالموبايل وانت طالع من الترعة؟
ههههه هههههه ههههه

ابن حـجـر الـعـسـقـلانـى يقول...

بصراحة أكتر المواقف اللى بتضحكنى هو مواقفك مع "على الكيماوى" .. باموت من الضحك

ثم أنا ماعرفش انت ايه حكايتك مع مديرى ...يبدو كدة انك طمعان فى الشغلانة اللى انا فيها و عايز ترفدنى .. بس انا شغال مهندس اتصالات و الشغلانة مش هاتنفعك.. المرة دى و انا فى نص القراية و باضحك لقيته جاى يسألنى عن الشغل .. وديت وشى الناحية التانية قال يعنى بادور على الحاجة اللى سأل عليها لغاية ما تماسكت و روحت رايح له بعد كدة


لكن بجد

على الرغم من مظاهر المبالغة و الإسراف و البيرة و الحشيش و الذى منه .. إلا إن الناس تمكن من قلبها الإيمان .. و بتبان معادنهم أوقات الشدائد

اللهم ارحم عم "عبد الراضى" .. آآمين

Doba يقول...

على الرغم من ان النهاية نكد والبقاء لله طبعا بس انا موت من الضحك على هآآآآآآآآع

ومكنتش فاهمة انت تقصد ايه ولما لقيتك بتقول هقع وقعت على روحى من الضحك

والله فعلا أيام متتعوضشى وذكراها بيفضل العمر كله

فى انتظار المزيد من المهمات
بس تعالى هنا قولى

كنت بتعمل ايه فى دهب يا بيه ومع مين وليه وازاى

ولا بلاش ان الله ستار حليم

يلا سلامنتوز
هبة

كاميليا يقول...

فى البداية ضحكت كتير اوى
وكالعادة لما اجى عندك
باضحك من قلبى
وعينيا بتتملى دموع ضحك
بس فى آخر البوست ..
زى انت ماقولت هى دى الدنيا
اتحولت الدموع لدموع تانية

إنت إنسان جميل اوى
Happy New Year
ya kabeer

لك تحياتى وتقديرى لقلمك الجميل

كاميليا

MKSARAT SAYED SAAD يقول...

سووووووووو صديقي اللي عاملي مشكلة وقالو عليا مجنون انهاردة في الشغل
شايفنى قاعد شغال ومرة وحدة ببصلهم وبضحك لوحدي مالك يا ابنى في اية الاقي نفسي عمال اضحك واقل والله فقري يقولولي مين دة طيب اللي فقري افتكر واضحك تاني فقلولي لا انت انهاردة وصلت وعليت قوى ... عاجبك كدة
واوعى تمشي جنب الترعة تاني علشان البلهارسيا
اشكرك بجد يا سو انك ضحكتنى الواحد بيبقي جي على اخر الاسبوع استوى من كتر الشغل وخلاص بيحلم بالاجازة
تحياتي الدائمة لأجمل سووووووووو
صاحب المكسرات

shahy يقول...

الاول يا استاذ اية اللي وداك دهب ؟
وبعدين ازاي تروح من غير ماتستأذن مني هو انا ام كدة بالأسم بس
يالا حصل خير بس ماتبقاش تعمل كدة تاني



البقاء لله وعقبالي لما اموت نفس الموتة الحلوة دي




اما بقى موضوع الخيل فكلام ابن عمك صح بس مالهوش علاقة بالستات خالص اللي اعرفة ان فعلا مش لازم الفرس يحس انك خايف منة ولازم تخلي بالك انك ماتكونش ضاغظ على بطنة جامد
هذا والله تعالى اعلى واعلم



وتعيش وتاخد غيرها هههههههههههه
هههههههههههه

هههههههههه
ههههههههه

ههههههههههه

انا هاكمل باقي التعليق ضحك
عندك مانع

هههههههههه

ههههههههه

كفاية كدة

سلامين وحتة

مروة الزارع يقول...

عارف

انا كنت بقرأ وانا فرحانة .. لية قلبتها غم عليا

مجهودك رائع جداااا

تحيااااااااااتى

fanan fa2eer يقول...

بقي رشا تعمل فيك كدة ياراجل؟؟؟

فطستني من الضحك في الأول زي ما أبكتني في الآخر

عندك حق جدا هي دي الدنيا

ايوية يقول...

دنيا غريبة فى وسط الفرح ياتى الحزن وفى عز الحزن تجد ما يفرحك
سبحان الله

Soooo يقول...

S

ماتتصوريش مدى سعادتي بمتابعتك للقصه وتعليقك عندي اول شخص
بجد بجد بجد متشكر جدا والحمدلله ان الموضوع عجبك لدرجة انك بقيتي بتتابعيه وبتنتظري باقي القصه

والمهمه القادمه هتنزل حالا في بوست ويارب تعجبك

كل سنه وانتي طيبه


سلامووووووز

Soooo يقول...

مشمش


مشمش يا صاحبي انتي تعلقي وقت ماتحبي
وسبحان من له الدوام
ويارب تكوني متابعه للقصه ويارب تكون عاجباكي

وكل سنه وانتي طيبه


سلامووووووووز

Soooo يقول...

awdhal-

اهلا بيك يافندم كمتابع لمدونتي المتواضعه ولمواضيعي البسيطه
واهلا باي حد جاي من طرف برايد عايزة تتجوز واللي انا زيك تمام باحب اقرالها مواضيعها اللي بتتميز بخفة دم فطريه وموهبه رائعه في الكتابه

اما بالنسبه اني باتكلم عن التقاليد والسلوكيات في الريف والصعيد المصري فأنا واعوذ بالله من كلمة انا .. شايف انه للوصول للعالميه في اي مجال في الدنيا يجب الاهتمام بالاصل والتوغل في المحليه

وربنا يقدرني اني ابسطك وابسط كل المتابعين للمدونه وللقصه دي
وكل سنه وانت طيب


سلامووووووز

Soooo يقول...

Desert cat

الموت علينا حق
وطبع الصعايده ورجولتهم بتبان في الظروف اللي زي دي
والحمدلله انك متابعه القصه ويارب تكون عاجباكي

اما بقى العرسان هيرجعو ولا هيسافرو .. دي هتعرفيها ان شاء الله في احداث الحلقة اللي جايه .. واللي ان شاء الله هنزلها حالا

وكل سنه وانتي طيبه


سلامووووووز

Soooo يقول...

بنوته مصريه

الحمدلله انك ضحكتي لما تخيلتي منظرة في الترعه
ومعلش اذا كنت نكدت عليكي .. بس بجد هي دي الدنيا

وان شاء الله هنزل حلقة جديده حالا


ملحوظه
ميزانية مصر بايظه من غير اكلي يابنتي .. وبعدين هو انا كلت حاجه .. ده انا حتى اكلتي ضعيفه

كل سنه وانتي طيبه



سلامووووووز

Soooo يقول...

عاليا حليم

كفاية انها عجبتك وعجبت كل اخواتي المدونين
دي في حد ذاتها اهم عندي من انها تتنشر في اي مكان


ملحوظه

المشكله اني مش شبه الضيف احمد خااالص .. بالعكس .. انا شاب مفتول العضلات .. قوي العزيمه .. واشارك في الاثاث


كل سنه وانتي طيبه


سلاموووووووز

Soooo يقول...

wa7dania


سبحان من له الدوام
وماتتصوريش مدى سعادتي بانك متابعه القصه ومستمتعه بيها .. وده لانك بلدياتي وصعيديه واكيد متخيله الحياه هناك وطبيعة الناس

وبعدين انا ياستي لا فالح في هندسه ولا في كتابه
انا فالح بس في ركوب الخيل .. فارس ولد فرسان يعني


كل سنه وانتي طيبه



سلاموووووووز

Soooo يقول...

لماضة

عارفه يا داكتوره .. في حاجه اتعلمتها من كتاب القصص القصيره وكتاب الروايات
لو نجحت اني اخلي اللي بيقرا موضوع من مواضيعي .. انه يعيط بعد ما كان بيضحك او العكس
ابقى انا كده ماشي في الطريق الصح
واللي بيقرا الكلام ده يبقى احساسه عالي ومرهف المشاعر بجد

والحمدلله ان القصه عاجباكي وبتتابعيها اول بأول


ملحوظه
مالها بقى كلمة ابوي .. ابوي ولا مش ابوي
يابوووي عليكي يا لماضه

كل سنه وانتي طيبه


سلاموووووز

Soooo يقول...

فرنسا هانم

شفتي بقى يا خالتي
شوية حصنه مش قادره تسيطر على مشاعرها ورغباتها المكبوته كانو هيخلوني ابقى مريض بالبلهارسيا

بس الحمدلله ان ربنا ستر

كل سنه وانتي طيبه



سلامووووووز

Soooo يقول...

shayma

يافندم انتي تشرفيني في اي وقت وتقدري تعتبري مدونتي هي مدونتك تمام وتنوريني بتعليقاتك وقت ماتحبي

والحمدلله ان القصه وان المدونه المتواضعه ككل عجبتك

وكل سنه وانتي طيبه



سلاموووووووز

Soooo يقول...

Rehab Mostafa

لا انا في عرضك .. بلاش مستشفى المجانين
ولا اقولك .. روحي انتي وابعتيلي الفيزا عشان احصلك
اصلها بيني وبينك .. مش طالبه عقل في البلد دي

وكل سنه وانتي طيبه


سلامووووووز

Soooo يقول...

Nani

اللهم ارحم موتانا واحياءنا يارب .. وارحمنا برحمتك يا ارحم الراحمين

سعيد جدا بتعليقاتك عندي بجد والله

وبخصوص نظرة المجتمع للرجل وهو بيبكي دي بصراحه مش عارف حل ليها
بس انا ساعة ما والدتي ماتت وتوفاها ربنا في رحمته ان شاء الله .. مسكت نفسي من العياط قدام الناس مش لحاجه غير اني سمعت ان البكاء على الميت في وقت وفاته او دفنته ممكن يأثر على الاخرين ويتحول الموضوع لحاجه زي اللطم عالخدود والنواح .. والكلام ده منهي عنه

لكن بمجرد ما قعدت مع نفسي عيطت وبعد كده صلت ركعتين ودعيتلها بالرحمه

وربنا يرحمنا جميعا


ملحوظه

انا هبعتلك ايميل اسألك فيه عن ايه احسن افلام الكارتون اللي ممكن بنات اخويا يتفرجو عليها عشان خدو اجازة وقارفينني كل شويه عايزين كارتون عايزين كارتون

وكل سنه وانتي طيبه


سلامووووووز

Soooo يقول...

ابن حـجـر الـعـسـقـلانـى

حبيبي يابو العساعيس
منورني يا ريس والله
وبعدين شغل ايه اللي انت جاي تقول عليه
لعلمك
اكتر حاجه باكرها في حياتي اني اشتغل ويبقى في ريس علي
مش غرور ولا كبر ولا بتاع .. بس صدقني مافيش احسن من انك تبقى صاحب شغلك ودماغك مع نفسك .. مش مع حد تاني

ولو مواقفي مع علي عاجباك قوي انا ممكن ابعتلك فيزا لبلدنا تروح تقضيلك يومين تلاته استجمام .. واستحمال للي هيحصللك

كل سنه وانت طيب



سلامووووووووووووز

Soooo يقول...

Doba

ام يوسف افندي
الحمدلله انك ضحكتي وانبسطتي وعيشتي معايا القصه

وبعدين علمك علمك علمك .. انا رحت دهب في مهمة وطنيه هامه للغاية
كنت عايز اشوف الشعاب المرجانيه لاني لقيت بنات اخويا الصغيرين بيتكلمو وبيتحاكو عنها .. ودي تبقى عيبه بجد ان عمهم ومثلهم الاعلى في الصياعه والتنطيط مايكونش راح هناك
بس تصدقي
مصر دي جميله قوي واحنا اللي حابسين نفسنا بنفسنا والله

كل سنه وانتي طيبه


سلاموووووووز

Soooo يقول...

كاميليا

والله العظيم احرجتيني بتعليقك ده وفضلت متنح قدامه فتره مش عارف اشكرك اقوللك ايه

بجد بجد بجد انا عاجز عن الشكر وباتمنى من ربنا انه يقدرني ارسم الضحكه الصادقه لكل اللي بيدخلو مدونتي ويقرو مواضيعي
واسف اذا كنت نكدت عليكي في اخر البوست بوفاة عمي
بس بجد والله .. هي دي الدنيا


وكل سنه وانتي طيبه


سلاموووووووز

Soooo يقول...

MKSARAT SAYED

ابو السيد يابتاع المكسرات والسهره

الف شكر على تعليقك ده واللي بجد ماتتصورش فرحني قد ايه اني قدرت بفضل ربنا اخليك تضحك وتعيش معايا القصه ولو لدقايق او لثواني .. في وقت بقى صعب جدا علينا اننا نضحك فيه من قلبنا

وبعدين ياباشا اضحك براحتك ومالكش دعوة بحد
انك تضحك والناس تقول عليك مجنون .. احسن من انك تبقى مخنوق ومكبوت من جواك والناس شايفينك منتهى العقل

وكل سنه وانت طيب



سلامووووووز

Soooo يقول...

shahy

يا ماما انا قعدت ادور عليكي قبل ما اسافر واقول هي فين ورحتلك البلوج بتاعك عملت نداء انساني
لكن انتي تقريبا كنتي مشغوله في العيد والخروف واللحمه والعيديات
واللي ماخدتش منك لغاية دلوقتي شلم واحد كعيديه

وربنا يارب يديكي طولة العمر وبعد الشر عليكي يارب
وربنا يجعل افضل اعمالنا واقربها لله .. هي خواتمنا ويجمعنا بسيدنا محمد صلى الله عليه وسلم في جنة الفردوس الاعلى احنا ومن نحب

واضحكي براحتك يا ماما شاهي .. ولا يهمك

كل سنه وانتي طيبه


سلاموووووووز

Soooo يقول...

مروة الزارع

على فكره .. في عائلة عندنا في البلد اسمها الزارع .. وانا اول ما دخلت المدونه بتاعتك افتكرتك منها وكده
لكن مالقتش اي حاجه في السكه دي
بس مين عالم .. مش يمكن في اخر الفيلم نطلع اخوات مثلا

وباعتذر اذا كنت نكدت عليكي في اخر البوست .. بس ده حال الدنيا بجد

وياريت ماتحرمينيش من طلتك عندي في المدونه وتعتبري مدونتي هي مدونتك تمام وتنوريني بتعليقاتك دايما

كل سنه وانتي طيبه


سلاموووووووز

Soooo يقول...

fanan fa2eer

تخيلي بقى .. رشا بهدلتني
امال زنوبه كانت هتعمل في ايه

والحمدلله اني ضحكتك
بس انك تبكي دي ماليش دعوة ياعم
انا قلت على اللي حصل
وهي دي الدنيا

وكل سنه وانتي طيبه


سلامووووووووز

Soooo يقول...

أيوية

معلش يا ايوية .. نكدت عليكي وانا عارفك داخله عشان تضحكي
بس هي دي الدنيا
نضحك ساعات ونبكي ساعات
ولا ايه؟؟؟
وربنا يجعل ايامك وايامنا كلها فرح وضحك يارب
روقي بقى الله يكرمك ده احنا في ايام مفترجه

كل سنه وانتي طيبه


سلامووووووز

aya يقول...

انا اتاخرت
واضح انى هافضل متاخرة كده دايما فى حياتى
المهم البقاء لله

المهم يعنى بجد حتى لو كانت بتقلب بضيق وزعل واخبار وحشة
فيه دايام جواه الواحد حاجة تخليه يبتسم لما يلاقى اللى يعرفه واللى ميعرفوش واقف معاه

ولو عوزت حاجة من واحد تلاقى مية عاملوهالك
يعنى انا متاكده ان البلد بتاعتكم كلها كانت معاكم
صغيرها وكبيرها
رجالتها وستاتها

قد ايه المهمة جميلة
وانا هتابعها بكل شوق

متتاخرش علينا

wa7dania يقول...

looooooooooooollllllllll
فارس على حق طبعا أمال إيه
; )

appy يقول...

انا هموووووووووووووووووووووت من الضحك اصل انا حصلى كده مع الحصان بس فى نزله السمان

د/اجدع بنوته يقول...

تركيااااااااااااا ... االله يسهلللله

..........

مش عشان اللى جه ف بالكم هههههههههههههههههههههههههههههههههههههه

............

مصطفى خد بعضه ورااح والله عمل خير .. بدل مكان سحقك انت ورشا

............

ههههههههههههه رشا ماشيه مع رعد هههههههههه وهو منفضلها وماشى مع زنوبه

والله مبيفهمش يسيب رشا وياخد زنوبه اخيييييه

...........

مش ممكن هموتتتتتتتتتتتتت م الضحك .. حدتك ف الترعه هههههه

............

هقععععععععععععععععع ههههههههههههههههههه

.............

يالهوى عندهم استميشن كماااااان

.........
ربنا يرحمه يااااااارب ... بجد الصعايده رجاله اوى اوى اوى

ربنا يبارك فيهم ويكتر م امثالهم

زُمُرده يقول...

ايييييييييه ده
لابسه طاقيه الاخفاء
بتعدي عليا ولا كاني هنا
عموما شكرا
اديني اتضايقت مرتين مره لغدر الدنيا في عز الفرح
و2 الاخفاء

هي الدنيا كده لقا وفراق
حزن مصاحب فرح
اسلوبك رائع ومهما قلت الناس كلهم قالوا
وانت عارف رأيي

ربنا يرحم جميع موتانا
ويختم لنا بالصالحات

shreen يقول...

تخيل يا سوووو
اول ما انت ابتديت تقول ان ده يوم جميل
وانكم قعدتم تضحكوا
قلت يبقى هيبقى اخره غم
انا اصلى خدت على كده
كنت لما بفرح بفرح من قلبى اوى
وفى لحظه الاقى اليوم بقى غم منقوع فى حبر اسود
قلت يبقى اسهل الواحد يبطل يفرح

احلى حاجه فى البوست الاحصنه
انا باعشق ركوب الاحصنه
بركب احصنه من وانا عندى 7 سنين
يعنى فارسه ممتازه
لا حصان يوقعنى فى ترعه
ولا حاجه

اه على فكره الدرس بتاع الفروسيه عندى
نص ساعه ب 100 جنيه
تاخد درس ايه رأيك ؟
هاعملك تخفيض
يعنى يا سيدى حاخليلك الساعه ب
جنيه99.99
شوفت الكرم يا عم

اماااال ايه فايدة الصداقه؟

Soooo يقول...

aya


بجد بجد سعيد بتعليقك واعتذر عن تأخري في الرد
والحمدلله ان القصه عجبتك
وفعلا في الصعيد وفي الفلاحين تلاقيهم بجد بيتناسو اي خلافات بتحصل مابينهم وبيقفو مع بعض وقت الشده
هو ده اصل الانسان المصري البسيط


كل سنه وانتي طيبه



سلاموووووووووز

Soooo يقول...

wa7dania

بنت عمي
علمك علمك علمك
انا راكن الحصان بتاعي صف تاني وخايف احسن يتكلبش
بس عادي
لو كلبشوه عندي تسعه غيره في الاسطبل
فارس بقى وكل شويه احب اركب حصان شكل
اشي ابيض يليق على هدوم بيضا
واشي اسمر يليق وقت السهرات
وايشي اصفر لزوم الصيف
وكللو كوم والفوشيا كوم تاني
مش لاقيله لبس البسه عشان يبقى ماشي مع بعضه

كل سنه وانتي طيبه



سلامووووووووز

Soooo يقول...

appy

نزلة سمان ايه بس ياشيخه
دي حصنة نزلة السمان زي نزلة البرد جنب الحصنه اللي انا شفتها يابنتي
ده كفاية نفرة الحصان رعد لوحده
حسيت انه هينترني لورا بتاع تمانتاشر كيلو جرام

لا حصان حصان يعني


سلامووووووز

Soooo يقول...

د/اجدع بنوته

اقتباسك لمواقف بعينها وسردها والتعليق عليها بيؤكدلي بما لايدع مجالا للشك
انك هتكوني ان شاء الله دكتورة شاطره
اضافة الى انك جدعه

كل سنه وانتي طيبه


سلاموووووز

Soooo يقول...

زُمُرده


طب والله ماخدت بالي وفاكر اني فعلا رديت على تعليقك
وعموما حقك علي ياستي
انا بجد اسف جدا جدا جدا
ويلا ياستي .. هبقى اعزمك على قزازة سينالكو او سباتس
حاكم انا بطلت اشرب بيبس


هاا .. شغال وافتح قزازتين ولا بلاش وعامله رجيم
اعوذ بالله من الشيطان الرجيم

كل سنه وانتي طيبه
واسف مره تانيه


سلامووووووووووز

Soooo يقول...

shreen

هو ليه بجد احنا بقينا لما بنضحك قوي ومن قلبنا بنخاف
انا في اعتقادي وتفكيري المضمحل .. حاسس ان ده لعدم تقبلنا لقضاء الله وقدره
والمفروض اننا نبقى عارفين ومتأكدين اننا مكتوبلنا اننا نضحك ونفرح ونعيش ونعيط ونحزن
هي دي الحياه الدنيا

وربنا يوعدنا بالاخره .. حيث الضحك والفرح للا نهايه

وبمناسبة الاحصنه
انا حاليا بطلت خااااااالص
لو عندك توكتوك انا مستعد


كل سنه وانتي طيبه



سلامووووووووووووز