الاثنين، ٩ ذو القعدة ١٤٢٨ هـ

!! قرض بضمان الـ .. البتاع

زي اي انسان دخلت الحمام عشان ألبي نداء الطبيعه
.. وبمجرد ماقعدت على القعدة بتاعة الحمام وولعتلي سجاره
حاكم انا ماعرفش استمتع بالحمام غير وانا باشربلي سجاره
وبمجرد ماولعت السيجاره ولسه بقول يا ملين .. لقيت الموبيل بيرن
تررررررررررن
.. اكتشفت اني سايب الموبيل عالغساله في الحمام لحسن الحظ
.. وبين الغساله والقعدة بتاعة الحمام حوالي اتنين متر مثلا
,,,, قمت قايم وماشي كالبطريق عشان اشوف مين بيتصل بي
وياللهول
UNKNOWN NOMBER
؟؟؟؟؟؟؟؟
دارت في دماغي تساؤلات كتير
تررررررررررررررررررن
تكونش مباحث امن الدولة عرفت اني عملت مدونه وعايزه تلبسلي قضيه قلب نظام الحكم
تررررررررررررررررررن
ولا تكون مباحث مكافحة المخدرات قرت الموضوع بتاع
كدب الابل وعايزة تعرف احنا كنا بنجيب مخضروات منين
تررررررررررررررررررن
ولا يكون الواد الشنكوتي الكبير وهو بيكلمني عالماسنجر بلغ عني بعد ما قلتله اني ضد النساء .. والنساء هم اللي بيتصلو
تررررررررررررررررررن
هي مافيش غيرها قطة الصحراء لما عرفت اني بافكر اجيب برنتر الوان راحت مبلغه عنني مباحث المصنفات
تررررررررررررررررررن
اسئلة كثيرة لم يوقفها غير اني قررت ان ارد عالموبيل .. وقل لن صيبنا الا ماكتب الله لنا
سوووو : الو ؟!؟
الآخر : (صوت حريمي) الو
سوووو : الوو .. الووووووو قوي كمان
الآخر : مع حضرتك سماح أنور من بنك الهس البس الدبليو سي
: ملحوظه
هي قالت اسم بنك من اربع حروف بس انا ماركزتش فيه الحقيقه .. كل اللي كان هاممني صوتها بصراحه
سوووو : اهلا بيكي يافندم
الآخر : ممكن اعطل حضرتك خمس دقايق ؟
سوووو : ياسلام .. قوي قوي وانا في ديك الساعه لما فنانه عظيمه زيك تكلمني
وجريت اجري كما البطريق على قعدة الحمام عشان اكمل نداء الطبيعه ولا كنت هطين الطبيعه طينه مطينه بطين
الآخر: لأ يافندم انا مش سماح أنور الممثله .. انا بس حابه اكلم حضرتك عن الاوفر اللي البنك بيعمله للكلاينتس .. المودعين حسابهم هنا واللي من خلاله بيقدرو ياخدو خمس اضعاف القيمه المودعه كقرض
سوووو :(مقاطعا) الاول بس عايز اعرف حضرتك جبتي رقمي منين؟
الآخر : الحقيقه يافندم أحد الكلاينتس عندنا هو اللي ادانا رقم حضرتك وقال انك ممكن تكون مهتم بالعرض بتاعنا
سوووو : يعني في حد يعرفني من الزباين بتوعكم واداكم رقمي على اساس اني زبون ؟
الآخر : ايوة يافندم احد العملاء عندنا يعرفك ورشحك لينا عشان تستفيد بالعرض ده
: ملحوظه
.. نفسي اعرف مين من صحابي معاه فلوس وحاططها في بنك الهس البس الدبليو سي
.. وكمان بيرشحني اني ابقى زبون زيه
هي دي الدنيا .. غداره طول عمرها .. والطعنه ماتجيش غير من الضهر

سوووو : طب ايه بقى العرض بتاعكم ؟
الآخر : حضرتك ممكن تاخد قرض بخمس اضعاف قيمة المبلغ اللي حضرتك مودعه عندنا في البنك بضمان الشغل بتاع حضرتك .. او اي ضمان عقاري او مادي
سوووو : طب ولو انا مش مودع عندكم حاجه او مش حاطط فلوس في البنك عندكم ايه الحل؟
الآخر : حضرتك ممكن تجيبلنا مفردات مرتب من الشغل الخاص بيك وتاخد القرض
سوووو : طب انا مش شغال اصلا .. ايه الحل؟
الآخر : ممكن لو في اي ضمان عقاري باسمك تاخد بيه القرض
!! سوووو : يعني واحد مش شغال اصلا .. هيكون معاه عقار خاص بيه .. وباسمه كمان
الآخر : طب مافيش اي حاجه باسمك خالص يافندم؟
سوووو :(بعد هنيهة تفكير) لا تصدقي في وانا كنت ناسي
الآخر : طب كويس .. ايه يافندم؟
سوووو :انا كنت اشتريت الموبيل بتاعي من سنتين ومعايا الفاتورة لسه .. اي نعم سعره نزل .. بس بيتباع في شارع عبعزيز دلوقتي ببتاع ربعميه وخمسين .. قولي ربعمية جنيه
الآخر : لا الحقيقة يافندم الموبيل ماينفعش
سوووو : طب بصي .. انا جبت هارد يو اس بي .. ميه وعشرين جيجا .. سعره حاليا في السخاوي بتاع خمسمية جنيه .. يعني هو والموبيل ببتاع تسعمية جنيه .. لو على كلامك يبقى اخد خمس اضعاف قيمتهم يعني بتاع اربع تلاف وخمسمية جنيه
الآخر : لا يافندم ماينفعش
سوووو : طب نخليهم سبعميه واتنين واربعين جنيه وعلى بركة الله .. ومرضيه بعون الله
الآخر : يافندم ماينفعش اصلا الكلام ده .. لازم تكون حاجه ليها قيمة فعليا
سوووو : همممم .. تصدقي اني حمار وكنت ناسي حاجه مهمه مووووت
الآخر : ياريت يافندم قول
سوووو : هو ينفع اخد قرض بضمان البتاع بتاعي ده؟؟
الآخر : افندم!!!!!!!!!؟؟؟؟؟؟؟؟
سوووو : (مستدركا) لأ انتي فهمتي البتاع ده غلط .. انا قصدي البلوج بتاعي .. او المدونه .. حاجه كده عالنت باتكلم وانزل مواضيع واقول رأيي فيها بصراحه وباتعرف على ناس .. وليه قيمه فعليا يعني
....: الآخر
.. سوووو : الو ... الو
.......: الآخر
سوووو : سماح .. ردي علي يا سماح .. سماح يا انور
end call
---------
.. الحقيقه تصرف غير حضاري منها انها تقفل السكه في وشي
بس مش ده اللي شغلني وخلاني مستغرب
: السؤال اللي بيختلج خلجات صدري هو
ليه سماح انور .. قفلت السكه في وشي ؟؟
اولا .. هل لانها خافت اتريق على اعمالها الفنيه زي ماحصل في موضوع قضية رأي خاص
ثانيا .. هل لأن الموبيل والهارد اليو اس بي .. الميه وعشرين جيجا مالهمش قيمه ماديه
ثالثا .. هل لأنها اكتشفت اني شخص عاطل وتافه وهايف .. وعندي بلوج أو مدونه وبقول فيها اي هسس
رابعا .. كل ماسبق قوله في التلات اربع سطور اللي فاتو دول
سوووو

هناك ٥٠ تعليقًا:

shahy يقول...

ههههههههههه
ههههههههههه
هههههههههههه
مش ممكن سماح انور دي معندهاش قلب
ازاي تقفل السكة في وش حضرتك
معلش جاهلة ماتعرفش حاجة سامحها يااستاذ سووووووو

انا عارفة الناس دي بيبقى صوتها حلو قوي هههههههههههه
بس انت عدو المراءة ولا همك حاجة صح هههههههه

ياعيني وفضلت تتكلم معاها وانت بتلبي نداء الطبيعة دة انت اكيد جالك برد

شوف ياسووووووو بجد بقى
ماتبقاش تاخد الموبايل معاك في الحمام تاني واللي هايبقى عاوزك اكيد هايتصل تاني زخلي بالك الشتا داخل

تحياتي يافقري بية

Dr. Diaa Elnaggar يقول...

شوف يا سوووووووووو

متخليش الأفكار تاخدك بعيد عن احتمالات غير صحيحة على الإطلاق، والموضوع ما لوش دعوة بأي من الثلاثة أسباب اللي انت قولتها، لأ، كل الموضوع ان وانت في حماسك قاعد على القاعدة، تتطور بك الحماس رغما عنك، ووصلها هذا الأمر عن طريق التليفون الحديث بتاعها الذي لديه القدرة على التقاط الروائح فاضُطرت لأن تقفل السكة عشان تسيبك تكمل مهمتك النبيلة.

حرام عليك يا سوووو، طب والله صعبت عليا الفنانة سماح انور دي.

عميق تحياتي

ضياء

الـسـيـدة نـون يقول...

يخرب مطنك
ضحكتنى موووووووووووووووووت
انا لسه ماقريتش باقى المدونة
بس قريت البوست ده
ده انت واقعى جدا
خصوصا فى حكاية ماشية البطريق دى
لاننا كلنا تقريبا بنمشى كدة لو جالنا اى ظرف طارق واحنا بنلبى النداء
والا حكاية البتاع دى كمام
عايز الحق بما انى نيتى وحشة دايما فانا كمان افتكرتك تقصد البتاع
مافيهمتش غير لما كملت قراية البوست

يلا هامشى بقى علشان اعرف انت كاتب ايه تانى

اختك خيخة

الـسـيـدة نـون يقول...

ها ها ها ها ها ها
ده انا بنهج لانى خلاص لسه مخلصة حالا كل البوستات اللى انت كتبتها

اسلوبك عاجبنى جدا
ضحكتنى اوى فى بوست سعد نبيهه
لان انا كمان كنت بفتكر زيك كدة واقعد اسال مين سعد ده وليه ابوه اسمه على اسم واحدة ست

وبعدين لما قريت البوستات كلها عرفت انك مهندس ديكور
وانا ليا شوية فى الديكور مش مهندسة تقدر تقول منسقة ديكور يعنى واخدة الموضوع هواية
عايزين نتعاون فى الموضوع ده علشان اختك اشفورة خالص

فى البوست بتاع انت مين يا عم
عايزة اقوللك ان انا كمان زى ما انا

مراتك ولا الوطن سؤال صعب جدا بس عم فتحى القهوجى الوحيد اللى جاوب صح

بوستاتك اكتر من رائعة يا سووووو

وندمانة انى مخدتش بالى من مدونتك قبل كدة

بجد هايل

يلا سلام
اختك خيخة

اه على فكرة انا سبتلك تعليق فى البوست بتاع الشكرمون طاخ فى التراللى
سلام

emz يقول...

هههههههههههههههههه
الهس بس .. شكل كل مصر بتقول عليه كده D:

هناء يقول...

كنت رهنت القطط الي ماليين بيتك كانو على الاقل ساعدوك في مصروف البيت

غير معرف يقول...

على فكرة انت تحفة جدا جدا اخر حاجة بس اهتم بمواضيع تانية والله يوفقك

نورسين يقول...

اسلوبك في الفكاهة عالي موووووت

تحياتي

غير معرف يقول...

نصيحة متخدش التليفون في الحمام تاني لحسن المرة اللي جايه تلاقي يسرا هيه اللي بتكلمك

تحياتي ياسوووووووو

ابن حـجـر الـعـسـقـلانـى يقول...

بصراحة الباشمهندسة سماح أنور متصلة بيك فى وقت مظبوط

و مش بعيد بعد كدة تلاقى توفيق الدقن بيكلمك عشان يقول لك على عرض "اشترى ماوس يو إس بى تاخد فانلة مجانا" .. و يا آه يا آه .. أحلى من الشرف مافييييييش

MKSARAT - SAYED SAAD يقول...

يخربيت مخك
تحفة بجد وجميلة
قولت حاجات كتير يا سوووو موجودة على المتغطي
ههههههههههههههههههههههههههه
تحياتي يا جميل بتاع البتاع

MKSARAT - SAYED SAAD يقول...

اه صحيح نسيت اقولك
يا ابنى حرام عليك طيب سماح انور ذنبها اية بس

زُمُرده يقول...
أزال المؤلف هذا التعليق.
زُمُرده يقول...
أزال المؤلف هذا التعليق.
زُمُرده يقول...

السلام عليكم
عارف لوشفتك هأطّعك
بطل توعدوتخلف وتنسى كمان

جديده حكايت الميل دي
وحياتك ضحكنا بس مش كده يعني

اصل النتيجه هتيجي عكسيه ويمكن الريحه تطفشنا
اول مره اشوف واحد شحات بادب كده
هبقى اعملك صفحه للتبرعات
واسميها اتبرع بجنيه من اجل سووووو

Desert cat يقول...

بقا كدا يا سوووووووو
تسمح لسماح انور تكلمك وكمان فى الدبليو سى
هو انت مش وعدتنى تصحى عمتك من التربة وتشترى البرنتر الاولوان من اولها بتخونى مع سماح انور
طب اسمع بقا
انا مش موافقه
ومش حبلغ عنك مباحث المصنفات بس
ده انا هبلغ عنك كل الجهات المختصة والمعنية بهذا الشأن
وابقى خلى سماح انور تنفعك


انا من رائيى بقا انها قفلت السكة فى وشك
لانها عرفت ان م عندك لا عقار ولا ارض ولا رصيد فى البنك
ولا ملك غير الموبايل الـ 5110 او تلاقيه اريكسون 688 ولا عندك برنتر الوان ولا اى حاجه خالص
شوفت بئه ان سماح كانت داخله على طمع

غير معرف يقول...

لا يا سو لا لاملكش حق
بقا يتقفل فى وشك السكه وبتسال ليه انت بتهرب من الموقف الحقيقى انى انسان بقيمتك يتقفل فى وشه السك من غير دستور ولا احم
هو تقريبا لكل الاسباب التى سبق ذكرها يا باشا
وبعدين الناس دى عرفت انى سيادتك مش حتاخد القرض وتهرب يبقا تديك قرض ليه
فخمتو يا خبيبى

Unknown يقول...

هى قفلت السكة فى وشك عشان هى تبع الهس بس متوقع منها أيه يعنى

3ala asm masr يقول...

جاااااااااااااااااااامد جدا بجد أحنا بالليل وصوتى من الضحك لعلع وصحيت الجيران يا راجل


هما الناس بتوع الهس بس دول كده مبيقدروش قيمة الناس
هو محدش عرفها أنت مين ولا أيه ؟

فرنسا هانم يقول...

سوووووووو
مبروك اخيرا عملت فى الشقه حمام وبقعده افرنجى كمان ؟

غير معرف يقول...

والله يا سووو
انت دمك زى السكر
والموضوع من اول سطر خلانى ابتسم
وعلى ما وصلت للنهايه
كنت باضحك واروق
زى ما انت قلت

وبعدين اديك ما طلعتش ضد المرأة ولا حاجه
ما انت توهت فى صوت سماح انور اهو

وبعدين ما جاش فى بالك
ان سماح عندها القدره
على التقاط الروائح من بعد
علشان كده قفلت

شكرا جدا يا سووو
على الابتسامه
انت غيرت المود
وهتخلينى انزل بوست حلو

Unknown يقول...

ههههههه
يخرب بيت شيطانك
بقى مش عارف البت قفلت ليه
عشان السبب الرابع اللى انت مقلتوش
البت اغمن عليها من الروائح العطريه
موتنى من الضحك يا راجل يا عجوز
اللهم اعوذ بك من الخبث والخبائث
قصدى اللهم اجعله خير

Doba يقول...

انا مش قادرة اكتب التعليق والله من كتر مانا عمالة اضحك يا نصيبة انت

انا هقولك انا تخيلت البطريق - اللى هو كعبول وهو ماشى بيتدألج وبيتدحرج علشان يجيب الموبايل

ثم مش عيب كده تلعب باحاسيس البنية وتحرجها - على فكرة هيه شكلها هتطلع من المدونيين وعرفت انك المجرم اللى فيهم سوووووووووو

أهم حاجة ان الدنيا مطينتش بس الله يعينا ونخرج من المدونة على خير لاحسن الروائح خنقتنى جدا

كح كح كح كح
افففففففففف

سلاموووز
هبة

للتسجيل بس
سلاموز بتاعتى ثم انا فى المدونات قبليك
استخبى بقى

هااااااااااا
مين هناك

غير معرف يقول...

انت ضحكتني اوي وكل مرة بقولك فيها انك لازم تكتب سيناريو افلام او تكون ممثل بجد انت بتوصلنا بالخيال كاننا كنا معاك في الحمام وشايفين كل الي حصل خلي بالك باة وابقي اطفي النور وانت في الحمام

سهر الليالى يقول...

أحم أحم
والله الواحد خايف يدخل يعلق لا يقطع عليك خلوتك فى بيت الراحه
هههههههههه
قلت اخبط بس متهيألى أن دة المكان الوحيد اللى مش ممكن حد يرد فيه على خبط بابه بأتفضل
هههههههههه

يخرب عقلك يا سوووو هلكتنى من الضحك وخصوصا انى بقيت اقرا البوست وأخبى الضحكه لأحسن اللى حواليا يقولو ايه العبيطة اللى بتضحك من غير سبب دى (والضحك من غير سبب ...) ماهما ميعرفوش دمك اللى زى السكر

بس والله عيب عليها سماح دى دة كفايه انك اهتميت ورديت عليهاوانت مزنوق

بس هى لو كانت عرفت انت بترد عليها منين كان ممكن يكون رد فعلهاايييييييه يا ترىىىىى؟؟ هو دة السؤال
هههههههه
جامد يا سووو الله ينور

Ahmed Mubarak يقول...

ليه سماح انور .. قفلت السكه في وشي ؟؟

انا والله مش عارف اقولك ايه!!

خيرالدين يقول...

حاجه ليها قيمه فعلا


تصدق كان ليك حق تتحير يا سوووووووووو


أسلوبك رائع

زُمُرده يقول...

بتتكلم عن قيمة الأنسان في الزمن ده اللي بقت تعادل شويه اوراق فلوس
ولو مفيش فلوس ملكش قيمه
دي الحقيقه ياسووووووووووووو

Esmat يقول...

مش ممكن على خفة دمك
فعلا ده المكان المناسب
لمكالمة من النوع ده
بنوك يوحلوا الناس فى قروض وفوايد
ال يعنى الناس ناقصة ده شغل نصب
و لما حست انك مفتح جرت منك
فكرونى ببتوع التايم شير
كنت كل ماتروح فى حتة تلاقيهم وراك
بوست جميل بجد

دكتور كسلان يقول...

بوست جامد جدا

بس انت اكيد تعبت وانت ماشى زى البطريق

كويس ان التليفون كان فى الحمام

انا حصل معايا الموقف ده

بس التلبيفون كان بعيد

قولى بقى اعمل ايه ساعتها

سلاااااااااااااااااااااااااااااااااااام

SaSo يقول...

ليها حق منت خدشت حيائها
واحد بيكلمها ولا مؤخذه نصه التحتانى عريان وبيقولها ادينى قرض بضمان البتاع بتاعى
ترد عليك تقول ايه
والله دى طلعت محترمة

Rosa يقول...

هههههههههههههههه
مش ممكن يا سو بجد
هوا في احتمال و اعتقد ان هوا الاكيد يا سو
عشان كنت في التويلت و بتنط نطةالبطريق
عارف لو كنت نطيت نطة الفقمة كانت قبلت بصفقة الموبايل على طول
هههههههههههه
------------------
مرسي لسؤالك عليااااا يا سو بجد
it meant alot to me
انا فعلا كنت في علبة الشكمان بس مش قادر العب كونكان عشان انا كنت كتير كتير عياان
ههههههههههه
عجبتني قوي القصيده دي
هههههههه
----------
وبعد كدا بلاش ترد في التويلت تاني عشان لو كان جايلك فرصه احسن ممكن تفيدك

Rosa يقول...

سو صحيح ابعتلي HTML\javascript بتاعت الموسيقى بتاعتك وانا اظبتهلك عشان تفتح اوتوماتيك لما تفتح المدونه , عشان مش هعرف اقلك اكتب ايه وكدا, دا لو عاوزها تفتح توماتيكي

kikooooooooo يقول...

يخرب بيت عقلك انت مشكلة بجد
ههههههههههههههههههههههههه
ده أجمد بوست قريته من ساعة من بدأت حياتي التدوينية
هههههههههههههههههههههه
ده انت غلبت عادل إمام في زمانه

بس بجد أنا مستغرب هي قفلت السكة ليه أنا مش مصدق إنها ممكن تكون اتكسفت ولا حاجة
هو في حد بيتكسف اليومين دول

كان معكم ..,
كيووووووووووو

Soooo يقول...

shahy

شوفتي بقى يا ماما شاهي
وهي فعلا عليها صوت يالهوووووي .. فشر ام كلثوم في فيلم علمني العوم والنبي ياحمد
------------
د. ضياء النجار

تصدق انا واحد صاحبي كان في دولة يابانيا قاللي ان فعلا في موبيلات بتلقط الريحه بس هنا في الشرق الاوسط خايفين يتم التعامل بالتكنولوجيا دي في الادمان وشم الكوللا
-------------
بت خيخة وأى كلام

منوراني والله يا ست الستات
والحمدلله ان المدونه عاجباكي وياريتك تعتبريها مدونتك تمام وتنوريني دايما يارب
-------------
emz

بس هل بينطقوها الهس بس دبليو سي .. ولا بيتكسفو يقولو دبليو سي ومكتفين بالهس بس
منوراني والله
-------------
هناء

القطط دي كانت زمان يابنتي
ايام العز واكل لانشون حلواني .. انما دلوقتي لو عرفت اجبلي بجنيه جبنه اسطمبولي وعليها خمس ترغفه عيش يبقى رضا
-------------
غير معرف

ولو اني باكره مبدأ عدم التعريف وشكلي عن قريب هلغي الحوار ده .. لكن عموما هاحط الرأي بتاعك في الاعتبار واحاول اتكلم في مواضيع تانيه
ايه رأيك في الدعاره المقننه كفتوى المفتي في زواج المسيار؟؟؟؟
-------------
نورسين

واسلوبك في التعليق اعلى موووووت
والف شكر ليكي ولمرورك
-------------
أيامنا الحلوة

لا يابنتي يسرا زعلت منني خلاص بعد اللي قلته .. خاصمتني وبطلت تديني ميسدات
بس ناديه الجندي عشريه قوي .. هارياني رسايل
-------------
ابن حـجـر الـعـسـقـلانـى

منورني يابن حجر
وبعدين توفيق الدقن مش هيعمل اعلان ماوس .. توفيق الدقن هيعمل اعلان علبة حلاوة الرشيدي
العلبه دي فيها ايييييييه؟؟
--------------
MKSARAT

حبيب قلبي يابو سوداني ولب سوبر وفستق
والحمدلله ان الموضوع عجبك وقريت مابين سطور كلامي بدل مامعظم الناس بيعلقو على جزئية مشية البطريق
وبعدين ماله البطريق؟؟؟؟
--------------
زُمُرده

ياسلام ياسلااااام
ده انا اللي لو شفتك هقطعك
بقى كده تحلقيلي في الحوار اللي قلتلك عليه وماتجيبيليش قزازة ولا اتنين من محلول معالجة جفاف الشعر؟؟؟
--------------
Desert cat

بقى كده ياقطه .. ده انا كان حبري ابتدى يرقلك .. قصدي قلبي ابتدى يرقلك .. تقومي تستهزئي بموبيلي
علمك علمك علمك .. انا موبيلي احدث حاجه في العالم
نوكيا ميت فل وعشره .. بشاحن السياره
-------------
رئيس جمهوريه نفسى

والله ياسيادة الريس انا كنت فعلا ناوي اخد القرض وابيع الموبيل واصفي اعمالي هنا في مصر واهاجر على طلخا
لكن شكلهم كده فقسوني ولاد الذينه
-------------
عاليا حليم

تصدقي كنت فاكر انها قفلت مش عشان تبع الهس بس .. لا دي عشان هي تبع الدبليو سي .. وشكلي كده دخلت الدبليو سي من غير ما اقول يا سااااتر .. حد من الحريم خالع راسه ولا حاجه؟؟؟
-------------
3ala asm masr

الحمدلله ان ربنا وفقني وقدرت اخليكي تضحكي وتنبسطي
وتقريبا هي قفلت السكه .. بعد ما اتأكدت انا مين
-------------
فرنسا هانم

اخص عليكي يافرنسا
انا جبت سيرة اني كنت في حمام شقتي؟؟؟
انا كنت عند واحد صاحبي شغال في الكويت وسايب شقته فاضيه عشان مراته في دبي .. واحتمال اقابله في جده
-------------
shreen

يااااه
طب والله العظيم والله العظيم والله العظيم .. مجرد انك قلتي انك انبسطتي ونويتي تنزلي بوست حلو .. دي خلتني نسيت هموم كتير باعيشها دلوقتي
-------------
لماضة

اااه .. لماضه جايه تتلامض عندي
لا ياختي مش عشان شمت الريحه .. هتقوليلي عرفت ازاي هقولك كان عندها برد وقدامها عالمكتب كيس مناديل فلورا من ابو خمسين قرش .. شكل فلوسها كتيييييير وبتجين مناديل معلبه
-------------
Doba

يلا يادوبه من هنا
يالا مش ناقصه تريقه
كعبول وبطريق وسلاموز دي بتاعتك وانتي قبلي في عالم التدوين وعالم البحار
علمك علمك علمك .. وكتاب الله انا كان عندي جهاز كومبوتر صخر وأتاري بتاع اللعب زمان
يعني اقدم منك في الهلس
--------------
مشمش

والله يا مشمش يا صاحبي انا بافرح لما الاقي اسمك منور عندي في البتاع .. قصدي في المدونه
وبعدين هو انا فعلا كتبت كام سيناريو كوميدي ووريتهم لنجوم كوميديا بس للأسف .. أمروني اخللي كل الافيهات على لسانهم هم بس مارضتش
واديني باندم
ومبروك عالبلوج
------------
سهر الليالى

الحمدلله اني قدرت اضحكك
وبعدين المثل بتاع الضحك من غير سبب ده قالو واحد معقد اصلا
اضحكي يابنتي زي مانتي عايزه في الوقت اللي تحبيه
اضحكي قبل مانعيط بكره وقبل الضحك مايغلى
اضحكي وانبسطي .. وربنا يسعدك يارب
------------
Ahmed Mubarak

قول اللي يرضي ذمتك قدام ربنا
------------
e7na

سعيد بمرورك وتواجدك وارجو انك تعتبر مدونتي هي مدونتك تمام
ويارب اكون عند حسن ظنك دايما



سلامووووووووووز

Soooo يقول...

Esmat

اهلااااااان
انتي كنتي زبون برضه ؟؟
ده انا مره قابلتني بنت موزه كده وقالتلي لو لقيت من واحد لغاية تسعه في ورقه بعشرين جنيه معاك تبقى كسبت .. قلتلها مش معايا عشرينات بصراحه .. قالتلي طب عشره .. قلتلها ولا عشره .. قالتلي طب خمسه .. قلتلها ينفع بريزة ورق
سابتني وشافت واحد تاني
شكلها تقرب لسماح انور
-----------
دكتور كسلان

فينك يادكتره وفين اراضيك
طب والله ليك وحشه ياشيخ
وبعدين انا قررت اجيب سماعه ساند فريز عشان المواقف دي .. اعمل حسابك في واحده زياده؟؟؟
-----------
SaSo

هو انتي كده دايما يابنتي
تعليقاتك دبش وزلط
مافيش مره واحده بس تقولي كلمة حلوة في حقي
ياساااااااااااتر
-----------
Rosa

داكتورة روزااااا
طب والله واحشاني واحشاني واحشاني
وجيتي على بالي من يومين وقلت هي اتخطفت من الراجل بتاع البتاتيع ولا ايه
وبعدين ان ماكناش احنا يا طبقة يا مفحوته نسأل ونطمن على بعض .. مين هيسأل علينا
وجاري ارسال ايميل ليكي يا ستي عشان تبعتيلي الكود يشتغل توماتيكي توماتيكي
------------
kikotalaat

عودا احمد يا سيادة المهندس المطحون
انت فين يارااااجل

والف شكر يا هندزه عالمجامله المبالغ فيها دي
اصل في مواضيع كتير عالنت اقوى واكثر خفة دم من الموضوع المتواضع بتاعي ده

بس في العموم الف شكر ليك يا هندز .. وربنا يجعلها معرفة خير ان شاء الله




سلامووووووووووووووز

غير معرف يقول...

خفة دم مالهاش حل..تسلم افكارك..يا سوووووو

mohamed يقول...

شكلك وحش قوى يا سووو بقة سماح انور تقفل فى وشك السكة امال لو كان رشدى اباظه كان عمل ايه
اه صحيح انا سمعت عن الموضوع ده وطلع واحد نصاب اللى عاملة بيكسب اول كام واحد لغاية مالموضوع ينتشر وبعد كده يلم الفلوس ويطير
وبالنسبه لحالتك فانا سمعت ان واحد راح للنصاب ده بعد ما انتشر صيته وادالة عشرين الف هى كل تحويشة عمرة وقالوا خد شغلهالى والنصاب كان صعبان عليه الراجل الغلبان ومكنش راضى ياخد منة لكن الراجل الغلبان زعل وقالة انت مبتاخدش الا من الاغنيا هتروح فين من ربنا فاضطر النصاب انه ينصب عليه

معلش ياسووو طولت كتير
سلام

زُمُرده يقول...

يا سلالالالالالالالالالالالالالالام
هيصه وهايصه
مرديتش ع التعليق التاني لييييييييه؟؟

وبعدين هو انت لسه فاضل عندك
علشان اجيبلك

Unknown يقول...

ههههههههههههههههههههههههه

يخرب عقلك كنت حتقلب من ع الكرسى من كتر الضحك ههههههههههههههههههههههههه

Soooo يقول...

غير معرف


الف شكر على مرورك وعلى تعليقك
والحمدلله ان الموضوع عجبك



سلاموووووووز

Soooo يقول...

mohamed

سيدي الفاضل لو رشدي اباظه هو اللي اتصل بي .. كنت انا اللي قفلت السكه في وشه
عشان خد منني ساميه جمال ... وأخريات

وبعدين معلش يعني .. نصاب مين؟؟
وحالتي ايه ؟؟؟

انت قريت الموضوع كويس؟؟
انا باتكلم على نظام خدمة العملا بتاعة البنوك المعترف بيها .. مش شركات توظيف الاموال
!!!


سلاموووووز

Soooo يقول...

زُمُرده


آآآآه
حدث ماكنت اخشاه
زمردة شكلها قفشت منني ومش هتجبلي لبشة الأدويه اللي قالتلي هتجبهالي مجانا

لا ياستي .. هو انا اقدر انفض ولا اهيص ولا اي حاجه
ده انتي امل بكره في علاج جذور شعري


سلاموووووووز

Soooo يقول...

إنـســـانـة

هتصدقيني لما اقوللك اني جالي حالة تفاؤل وانفتاح في شحاليل صدري لما لقيت تعليقك واللي هو عباره عن ضحكه جميله .. ودي اول حاجه اشوفها عالصبح
ربنا يقدرني واضحكك واضحكك الناس من القلب .. مش يمكن ساعتها اقدر اضحك انا كمان


سلاموووووووووز

بنوته مصرية يقول...

هههههههههههههههههههههه


والله انت مشكلة يا سوووو بندم اني متبعتكش من زمان

بس بجد بوست تجنن

تسلم يا سووووو

اعذرني علي التاخير

رودينا

بنوته مصرية يقول...

ههههههههههههههههههههه

ايه ده انا فطست من الضحك

بجد اسلوبك حلو اووي

حلوة اوي مشية البطريق دي

ههههههههههههههههه

تحياتي
رودي

Soooo يقول...

rody80


يااااااااااااه
طب تصدقي وتؤمني بالله
انا كان عندي امل انك هتيجي المدونه بتاعتي والله العظيم
خصوصا اني متابع مدونتك من زمان قوي وكنت هاريكي تعليقات لكن انتي تقريبا كان عندك ظروف او حاجه

الحمدلله انك دخلتي مدونتي اخيرا والحمدلله ان الموضوع عجبك
وياريت تعتبري مدونتي هي مدونتك تمام وتشرفيني بتعليقاتك وضحكتك دي دايما


سلامووووووووز

د/اجدع بنوته يقول...

افندمممممممممممممممممممممممممممم

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه


مش ممكن مش قادره اكتب م الضحك اصلا

ههههههههههههههههههههههههههههههههه

ههههههههههههههههههههههههههههههه

ياربى ع كدددددددده .. انت بجد فجررررررى ع راى اميره بنت خالك

غير معرف يقول...

ههههههههههههههه[size="5"][b]

انت مش ممكن علي فكرة .

انا مقدرتش احوش نفسي من اني ارد عليك.

مدونتك في قايمة المفضاة عندي دلوقتي..

كل يوم هجيلك هنا ..

بس انت متزهقش مني بس.

[/b][/size]

Unknown يقول...

حلو البوست