الخميس، 12 ذو القعدة، 1428 هـ

ساعات

ساعات بنحس احلامنا بتتحقق
ونعيش في الوهم ونصدق
.. نفوق في لحظه على الواقع
نفنجل عينينا ,, ونبرق
-----
ساعات اشوف الحب قدامي
في أوهامي وأحلامي
.. نفسي اعيشه كحقيقة
ويبقى الحب .. أيامي
-----
ساعات بانام وانا صاحي
والاقيني بانطعن ,, وبسلاحي
.. واقوم مفزوع القاني فل الفل
بس بلاقي دم .. على جراحي
-----
ساعات باضحك واضحك واكركر
وفي عز ضحكي الاقيني بافكر
.. بس بانسى الدنيا من فرحتي
ولهمومي تلاقوني .. باتنكر
-----
ساعات باقعد اكتب واشخبط
اكتب قصيده أو عصيده أو بالخبط
.. مش مهم لمين وليه
المهم اني افرح .. وازقطط
-----
ساعات بازهق من الأشعار
دمي خلاص منّي .. فار
.. لا حد فاهمني ولا شعري ليه لازمه
طب ليه ما اكونش انا الحمار
-----
ساعات باجري .. وباجري .. وما اقفش
كل اللي يشوفني يقول ده كليتش
.. بس الحكايه ومافيها اني مش خايف
و واخد حياتي كلها ... قفش فـ قفش
-----
ساعات بتاخدني الشهامه
واقف قصاد الاسد لنصرة يمامه
واحس اني (جاهين) أيامَه
وفي الآخر...بتركبني الملامه
-----
ساعات احس اني فنان
او بياع كلام بتاع زمان
.. سمسار أوهام وأحلام
وساعات باحس اني .. انسان
سوووو

هناك 90 تعليقًا:

shreen يقول...

هىىىى
انا اول تعليق

انت اتعديت من المود بتاعى يا سووو
انا كنت بوست مش كئيب
رحت انت كاتب البوست اللى مليان شجن ده

كلمات فكرتنى فعلا
برباعيات جاهين
وكلمات احمد فؤاد نجم


ده اكتر بيت عجبنى

ساعات بتاخدني الشهامه
واقف قصاد الاسد لنصرة يمامه

انت فعلا فى فى قلبك فنان
وعارف نصيحتك اللى كتبتهالى
لما تحس انك فى المود ده
حاول بس تضحك من قلبك

لماضة يقول...

ايه يا راجل يا عجوز
انت كبرت باين عليك وشيلت هم الدنيا بدرى بدرى
اشربلك فنجان قهوه اللى انت حاطه فى المدونه ده وتبقى عال قوى
ولا اقولك
تعلالى العياده ههههههه
بس والله كلام حلو
تحياتى لك

rainbow يقول...

ساعات احس اني فنان
او بياع كلام بتاع زمان
.. سمسار أوهام وأحلام
وساعات باحس اني .. انسان

كلامك جميل جدا يا احمد
بس انت فعلا فنان وانسان اوعى تشك فى كده .. بين السطور شجن كده مدارى ورا خفة دمك الجميلة .. ما تسمحلوش ينتشر ويملا سطورك افضل اضحك وضحكنا معاك ( فبدال ما نطق يا ولا لأ نضحك ) والا ايه ؟

تحياتى للانسان
واحترامى للفنان
ودعائى لعحمد ربنا يهديه
ههههههههههههه

هدى

مشمش يقول...

بص ياابني هي الدنيا كدة وهتفضل كدة عمرها ماهتكون مكان للراحة ولا الامان ولا السعادة عشان كدة متفكرلهاش كتير وتشغل دماغك بحاجات ملهاش لازمة زي انا اية انا مين انا عايش بعمل اية لان دي حكمة ربنا والي يعرف ربنا بيرتاح عشان كدة برضة لازم متفكرش عشان متكتئبش لازم تضحك وخلاص مش مهم علي اية تلاقيك بتقول اضحك زي الاهبل وعندي هموم هقولك واية يعني ما احنا والهموم موجودة بنقف عاجزين لحد مايحلها ربنا من عنده يعني كدة كدة ملناش ارادة اكبر من نفسنا
متفكرش كتير عشان متتعبش اكتر سبها علي الله نصيحة يعني

مشمش يقول...

انا نسيت دي مدوتني الجديدة زوروني يارب تعجبكم سوري يااستاذ سوو لو برخمhttp://www.mshmshana.blogspost.com

كاميليا يقول...

وساعات نشوف الدنيا بعيون غيرنا
آلوانها آلوانهم مهما كانت مش ابدا آلوانا
نحلم آحلامهم ونعيشها وهى مش احلامنا
ويختفوا ونفضل احنا نغوص في آلامنا
وساعات نضحك .. والكل بيلومنا
نتظاهر بشفاء واختفاء آلامنا
والواقع هو هو ابداً لايرحمنا

بوست يشجع على مزيد من الفضفضة
برافوووووو

تحياتى لآجمل سوووو

كاميليا

الشنكوتي الكبير يقول...

جميله قوي الكلمات
علشان كلمات من جواك انت
سيبك من اي حاجه وخليك كده على طول قول اللي يجي على بالك
قول اللي تحس انك عايز تفجره بره قلبك
فضفض احكي اشتم حتى وزعق

ومحدش هيقولك حاسب
عارف ليه
علشان هنا جوه مدونتك
هي دي ارضك
ملكك وحدك
تلعب تضحك
تشتم تضرب
او تزرعها فسيخ وزبرجد
كله براحتك
يعني بقولك ملكك ملكك
ملكك وحدك

تحياتي يا باشا ده انت باينك شاعر جامد قوي واحنا مش عارفين
سلاااااااااااااااااام
اخوك ايهاب

Salwa يقول...

ساعات بتاخدني الشهامه
واقف قصاد الاسد لنصرة يمامه
واحس اني (جاهين) أيامَه
وفي الآخر...بتركبني الملامه
-----
ساعات احس اني فنان
او بياع كلام بتاع زمان
.. سمسار أوهام وأحلام
وساعات باحس اني .. انسان

أنا اقتبست السطور دي
بس كل ما كتبت جميل
لأنه إحساسك
أحسنت

تحيااااااتي

غير معرف يقول...

سووووووو.. تنساب كلماتك الى الأعماق بهدوء وجاذبية..اسلوب متميز واحساس مرهف ..لا املك الا ارفع القبعه لك يا صاحب القلم الراقي


شــــهد

بنت الاسلام يقول...

انت المفروض الي يعبرك مليووون

بسم الله ماشاء الله

موهبة حقيقية

كلمات بسيطة موزونة لكنها معبرة اشد التعبير

حقيقي ربنا يوفقك

___________________________________

اخواني واخواتي المدونين ندعوكم معنا لمشاركتنا في حملة ضد تصريحات نجيب ساويرس الاخيرة...ولو بوقف اتصالك بالموبايل خط موبنيل لساعة واحدة بس..ولك جزيل الشكر

إيمان يقول...

تصـــــــــــفيق حاد وجامد يا سووو

مازال تقليب صفحاتك يكشف لنا عن الجديد معك كل يوم ...مبدع ومعبر جداااااا

تحياتى

Doba يقول...

جميل وتصفيق حاد ل سووووو شاهين
كلماتك جميلة بس بتعبر عن نوع من الاحباط اللى بتمر بيه

بما انك برج الاسد فطول ما مودك كويس بتبقى بتهرج وتلعلع وتكون اشجع اسد فى عرينك وتراعى كل الرعية اللى هما الاصدقاء والاهل

ولما مودك بيقفل وتحس نفسك ضعيف بتستخبى من قدام الكل وممن تجرح اللى يقرب من عرينك علشان انت اسد مينفعشى يشوفوك وانت بتنزف

واضح انك بتمر بفترة سيئة وبمرارة بس عموما بسيطة

وارجع واقول ما ضاقت الا اما فرجت
صلى انت بس كتير

ولو طلعت انى برغى فى الهبلولى يبقى كلامك حلو قوى ويسلم ايديك يا كعبول على حبتين الشجن دول

تحياتى يا ابو كرش
هبة

shahy يقول...

سووو يا سوووو
اية الكلام الكبير الجميل دة

هو كلة جميل بصراحة بس اللي حستهم قوي هما

ساعات اشوف الحب قدامي
في أوهامي وأحلامي
.. نفسي اعيشه كحقيقة
ويبقى الحب .. أيامي

..............

ساعات بانام وانا صاحي
والاقيني بانطعن ,, وبسلاحي
.. واقوم مفزوع القاني فل الفل
بس بلاقي دم .. على جراحي


تسلم ايدك ودماغك يابني

حبة حاجات (ايمان) يقول...

ايه بس الكلام الجامد دا

اهنيك

Rehab Mostafa يقول...

وعجبي :D:D
ايه الكلام الجامد ده يا باشا
هقوللك أكتر اللي عجبني
ساعات بنحس احلامنا بتتحقق
ونعيش في الوهم ونصدق
.. نفوق في لحظه على الواقع
نفنجل عينينا ,, ونبرق
-----
ساعات اشوف الحب قداميفي أوهامي وأحلامي.. نفسي اعيشه كحقيقةويبقى الحب .. أيامي-----
ساعات باضحك واضحك واكركر
وفي عز ضحكي الاقيني بافكر
.. بس بانسى الدنيا من فرحتي
ولهمومي تلاقوني .. باتنكر

فرنسا هانم يقول...

ايه يابنى نازل شتيمه فى نفسك ليه
مره سماح انور تقفل السماعه فى وشك
ودلوقتى بتقول لمؤاخذه حمار وكليتش
هو انت لقيت نفسك زمان على باب جامع
وخدت نفسك وربيتها وكبرتها علشان كده مش همك ونازل شتيمه
بس على فكره
زجل جميل جدا
تحياتى لك

Rosa يقول...

يمكن عشان انت انسان بتحس بكل دا

Rosa يقول...

وعلى فكره صحيح لم يصلني الكود
وروق كدا يا انسان
واطلع من علبة الشكمان عشان بتكون ملاينه دخان يتعبلك صدرك وقلبك كمان
(من وحي اشعار الفنان العظيم سوووو)
:D

osama يقول...

جميلة المقاطع ..يحمل كل مقطع لغزا وحلاً... يحمل نقدا للذات وزهوا ...
لذلك ختم بانسان كنهاية تجمع الأجزاء
فالكل اكبر من مجموع اجزاءه ...
دمت بكل ود..
خالص تحياتي

لماضة يقول...

يا راجل يا عجوز
بقولك ايه فى شوية اكسير تفاؤل فاضوا منى وقلت لازمن حتمن ادى شويه للناس الغاليه
تعالى الحقلك شويه قبل ما يخلص
يلا مستنياك فى العياده قصدى فى المدونه بتاعتى
يلا بسررررررررعه
انت لسه هنا

3ala asm masr يقول...

انسان والله يا سووو وحساس أوى
لما بتفرح بضحكنا وضحكتنا بتطلع من القلب بجد
ولما بتكتب بتحسسنا أنك بتكتب لينا وعننا
ربنا يوفقك يا سووووو

ra7eel يقول...

سووووو احلى عجوز
بتهرب من حزنك وبتدارى ورا خفة دمك
سوو انت فعلا اخف دم انا شوفته فى التدوين
حتى وانت بتكتب بحزن
بتكتبه بروح حلوه قوى
انت من جواك جميل قوى ياسووووووو
سلاموووووز ياحلى مجنوووووون

كاميليا يقول...

soooo
على فكره .. عاوزه اقولك علي حاجه
انا كل ما افتح مدونتك اموت من الضحك علي الصورة رمز المدونة .. صورة مش ممكنة.

سلام

كاميليا

Esmat يقول...

والله جميل ممكن نقول إنسان فى دايرة الحياة
ولكنه مازال إنسان
يا رب تعيش الحب ويبقى ايامك ولياليك
-----
عجبنى اوى
ساعات بانام وانا صاحي
والاقيني بانطعن وبسلاحي
واقوم مفزوع القاني فل الفل
بس بلاقي دم على جراحي

ساعات بتاخدني الشهامه
واقف قصاد الاسد لنصرة يمامه
واحس اني (جاهين) أيامَه
وفي الآخر...بتركبني الملامه
ده اكبر دليل على انك
دايما انسان
تحياتى يا سو

ابن حـجـر الـعـسـقـلانـى يقول...

مين دة يا جدعان ؟؟ مش دة صلاح ابو جاهين برضه ؟؟

ايه يا عم الحاجات الحلوة دى

شعرك (بكسر الشين) جميل يا سووووو

غير معرف يقول...

ساعات بنحس احلامنا بتتحقق
ونعيش في الوهم ونصدق
.. نفوق في لحظه على الواقع
نفنجل عينينا ,, ونبرق
ساعات اشوف الحب قدامي
في أوهامي وأحلامي
.. نفسي اعيشه كحقيقة
ويبقى الحب .. أيامي

عارف وحش أوي إنك تتمنى الحب ومش تطوله بعد ما تكون حاسس إنه خلاص أخيرا بقى موجود

و بجد صعب أوي إنك تلاقي أكتر حد بيجرحك هو أكتر حد انت بتحبه

كلامك بكاني ومش عارفة ليه لما قريته افتكرت أغنية شيرين

كتير بنعشق ولا بنقول
وكتير بنعشق ولا بنطول
ومفيش حكاية بتستمر
زي ما بدأت ليه على طول

بجد تحياتي

منى يقول...

جميل والله يا سوووو
حتى شعرك الجد الرقيق دمه خفيف
انت طبعا مش مستنينى اقولك انك موهوب لكن لازم اقولها
عشان كده بزعل قوى لما...
ولا بلاش عارفك بتزعل يا خوى

Hannoda يقول...

اييييه ده؟؟

أهي المواهب بدإت تظهر أهي و بدأ المستخبي يبان

حلوة قوي يا سوووو
ما كنتش أتوقع انك بتعرف تكتب
عارف امتى الناس تقول على الكلام كتابة..

لما تكون الكلمات بسيطة و عفوية و تقراها تلاقيها مترتبة و تلمسك من جوة جوة

عجبتني بالذات مقاطع كتيرة
ساعات بانام وانا صاحي
والاقيني بانطعن ,, وبسلاحي
--------

او بياع كلام بتاع زمان
.. سمسار أوهام وأحلام
وساعات باحس اني .. انسان

-------

بجد عاوزة أصفق جاااامد

تحياتي

سهر الليالى يقول...

يخرب عقلك يا سووو
تحفه بجد
بجد حلو اوى الكلام وجامد موووت وعجبنى جدا لدرجة انى مقدرش اقولك ان فى حاجة معينه فيه هى اللى عجبتنى اكتر كله حلو أكتر

وحردلك نصيحتك اللى نصحتهالى
اضحك واضحك بجد من قلبك
وارمى الدنيا ورا ظهرك
ولا يهمك
دى الدنيا لو كانت يوم تهمك
تغلبك تهدمك وتمص دمك

يلا هات بقى السبعه والسبعين جنيه اللى اخدتهم
:)

تحياتى على ما كتبت يا فنان

Soooo يقول...

shreen

ده لي الشرف انك اول واحده قريتي كلامي ورديتي علي ياشيرين

وبعدين انا ماتعدتش من المود بتاعك ولا حاجه .. بس هي لحظات بتيجي عالواحد بيبقى فيها كده

والحمدلله ان الكلام عجبك .. بس انا فين من جايهن ونجم والناس


سلامووووووز

Soooo يقول...

لماضة


الدكتوره الساخره اللي حاسس انها دخلت كلية التمريض والصرف الصحي غلط والمفروض كنتي تدخلي صحافه قسم سرسخة ضحك
وبعدين مين قاللك يابنتي اني صغير .. انا عجوز ياضينايا بس دي حلاة الروح مش اكتر
وبعينك .. عايزاني اجي العياده عشان تقوليلي بطل سجاير وتديني اكسير التفاؤل بتاعك وابقى مدمن اكسير تفاؤل بدل ما ابقى مدمن كولوباطرا بوكس؟؟


سلامووووووز

Soooo يقول...

rainbow

الشجن مهما داريناه لازم يطلع برضه
والضحك مطلوب والشجن والحزن والتأمل مطلوبين
العاقل اللي يقدر يظبط حياته مابين الحاجات دي
وانا شكلي هتجنن يا هدى والله
وربنا يهدينا جميعا ياررب


سلامووووووز

Soooo يقول...

مشمش


شوفي ياصاحبي
انا مش معترض على حكمة ربنا ولا حاجه
والساعات اللي انا اتكلمت عنها دي نوع من انواع الفضفضه ليكم ولحالي
وبعدين انتي اكتر واحده عارفه ضحكي عامل ازاي
ده انتي بنفسك قولتيلي ضحكتك حلوة وعاكستيني وكنتي بتبصبصيلي من تحت لتحت
ولا ايييييييييه؟؟

ومبروك عالبلوج مره تانيه


سلامووووووز

Soooo يقول...

كاميليا


الله عليكي وعلى ساعاتك يا كاميليا
بجد فيها شوية احاسيس شجن جميله وهايله جدا جدا
والكام سطر بتوعك انا شايفهم بالبوست بتاعي ده .. مضروب في عشره
ومتشكر جدا على فضفضتك معايا .. وسماعك لفضفضتي

سلامووووووز

Soooo يقول...

الشنكوتي الكبير


منورني والله يابو الشناكيت
وحلوين شوية الزبرجد دول
حسسوني اني فعلا في وسط اهلي وتشجيعهم ده اداني دفعه للكلام والفضفضه
ربنا مايحرمني منك ومن طلتك الحلوة وتعليقاتك عندي يا ابو الشناكيت يا كوباااااره


سلاموووووووز

Soooo يقول...

Salwa


الجميل ان كلامي عجبك لدرجة انك اقتبستي حاجه منه
ودي في حد ذاتها شهادة تقدير من انسانه حساسه زيك



سلامووووووز

Soooo يقول...

شهوووووووده


اختي العسوله اللي لما باشوف تعليق منها عندي باحس فعلا بقيمة الاخوات وباتمنى انك تكوني فعلا اختي من لحمي ودمي وتكوني جنبي في الظروف اللي بامر بيها دي
ربنا مايحرمني منك ومن كلامك ومن تعليقاتك يا اختي العزيزة


سلامووووووز

Soooo يقول...

بنت الاسلام


الله يكرمك دنيا واخره يارب
وشكرا على زيارتك لمدونتي المتواضعه ولتعليقك على موضوع من مواضيعي
والحمدلله انه عجبك

ملحوظه
انا فعلا رميت الشريحة الموبينيل وجبت شريحه اتصالات .. بس على الله اللي عملته ده انا وغيري يجي بفايده واللي زي ساويرس يقدرو انهم اغنيا بفلوسنا احنا


سلاموووووز

Soooo يقول...

إيمان


ربنا يعمر بيتك ويكرمك ياستي عالكلام الهايل ده
بس انا ماستحقوش بصراحه
كفاية ان الموضوع عجبك وكفايه تشريفك انتي والاخوة المدونين لي في المدونة وتعليقكم وتشجيعكم وتعاطفكم
والله ده عندي ليه تقدير كبير جدا جدا


سلاموووووووز

Soooo يقول...

Doba

يابنت الايه
انتي شرحتيني صح
ده انتي ولا اللي تعرفني بقالها عشرتاشر سنه بجد
شكلك كده هتفضحيني وهتفرحي انك فهمتيني
عشان كده هكدب وانكر كل اللي قلتيه واقوللك لا خاااالص

ملحوظه .. على فكره انا باتدايق بجد من كلمة كعبول
خدي بالك يا ام يوسف


سلامووووووووووز

Soooo يقول...

shahy

وتسلمي يا ست الستات وربنا مايحرمني من تعليقاتك اللي زي الفل دي واللي بجد بتشجعني وبتخليني اقول الحمدلله ان مواضيعي بتعجب الناس .. وانتي مش اي ناس
انتي ماما شاهي


سلامووووووووز

Soooo يقول...

حبة حاجات (ايمان)

ربنا يكرمك يارب والحمدلله ان الكلام عجبك
وماتحرمينيش من زيارتك الحلوة دي وتعليقك عندي



سلامووووووز

Soooo يقول...

Rehab Mostafa


يااااه
وعجبي
انتي اكيدي بتهزري
انا اجي ايه جنب انسان وفنان عظيم كل مصر بتتعلم من كلامه اللي قاله
لا اسمحيلي
طبعا انا فرحان ان كلامي عجبك الحمدلله
بس عجبي دي ماركة مسجله صلاح جاهين
ولا يمكن اي شخص مهما كان هو مين يقرب منها

والف شكر على تعليقك وتشريفك لمدونتي المتواضعه


سلامووووووووز

Soooo يقول...

فرنسا هانم


خبر ايه يافرنسا
ده بدل ماتتعاطفي معاي وتتطبطبي علي وتجيبيلي علبة سجاير ولا باكو معسل
تقومي تنزلي في بستفه

بجد يافرنسا انتي بنت بلد وجدعه قوي
وبجد والله .. انا سعيد بتعليقك وبتشريفك لمدونتي المتواضعه
وبجد بقى .. انا باعزك وباعز اناكف معاكي


سلاموووووووووز

Soooo يقول...

Rosa

داكتوره روزا
والله منوراني
وانتي اللي بكلامك ده بتؤكدي حقيقه دامغه مالهاش موقع من الشك
انك انسانه جميله جدا جدا
وعلى فكره .. انا فعلا اتلخمت ونسيت ابعتلك الكود .. بس اوعدك اني بمجرد ما افوق شويه كده هبعتلك الكود بس عايزك ايه .. تخليلي المزيكا تشتغل لايف كل ماحد يدخل
لايف لايف .. يعني تشوفيلي فرقة من شارع محمد علي بالعوالم وتظبطيهم انهم يشتغلو بمجرد ماحد يخش المدونه
.... كده والا


سلامووووووووز

Soooo يقول...

osama


الله يكرمك دنيا واخره يارب
ايه ياعم الكلام الجميل ده كللو
انت كده هتخليني اتغر
وافكر ارشح نفسي في عضوية المجلس المحلي
عن دايرة طوخ .. طاخ .. طيخ


سلاموووووووز

Soooo يقول...

3ala asm masr


ربنا يعمر بيتك يارب
طب والله العظيم واقسم بالله العظيم انا جسمي قشعر لما قريت كلامك
ربنا يقدرني اني افضل اكتب كل اللي يعجبكم ويخلي كل اللي يقرولي ينبسطو ويفرحو ويحسو اني منهم وانهم منني
واوعدكم جميعا .. اني هابني مستشفى وجامع ومدرسه صنايع على اول الطريق الزراعي الجديد
بس انتو ادفعو تمن المنشآت والاجهزة وانا على الغفير .. واد جدع قوي قوي قوي


سلاموووووووز

Soooo يقول...

ra7eel


الله يعمر بيتك يارب
بس على فكره
في ناس دمهم اخف منني بكتيييييييييييير في عالم التدوين
ولو المكان يسمح هعددهملك واحد واحد وواحده واحده
الحكايه ومافيها ان الحمدلله في قبول في مواضيعي مع طريقة تفكيرك
وربنا يديم المعروف يارب


سلاموووووووز

Soooo يقول...

Esmat

والله ياعصمت او يا قسمت اللي يعيش الحب مره وينكوي منه
بيقول جاااااااي اني افكر فيه تاني
وربنا يبعده عنني ويبعدني عنه
خليني كده لوحدي احسن
اعيش لوحدي واضحك لوحدي واموت لوحدي
كده اريح


سلامووووووووز

Soooo يقول...

ابن حـجـر الـعـسـقـلانـى


لا لا لاااا
كده انت هتخليني اخد في نفسي قلم باركر جامد قوي ياعمنا
انا فين وصلاح ابو جاهين فين

وبالمناسبه .. انا فهمت (شعرك بكسر الشين ) كويس .. اصل محسوبك اقرع

وش واحد اقرع وبكرش وبيتخن وفاتح بقو وهوووب .. سنانه كلها بتقع


سلاموووووووز

Soooo يقول...

غير معرف

الحب بيموت بمجرد مايدخل الغرور نفسنا ونبقى عايزين نتحكم في اللي بنحبه ونمشيه على كيفنا
او يمكن ده رأيي الشخصي


سلاموووووووز

Soooo يقول...

منى


ياخبر
ده مجرد انك تفكري انك تكتبيلي تعليق يبقى لازم اتشرف بده واتشرف برأيك
واوعدك ياستي اني مش هزعل

بس لو ايه بقى؟؟؟


سلاموووووووز

Soooo يقول...

Hannoda

عارفه ياهنوده .. كنت هرد عليكي واقوللك اني مش باكتب .. بس بابصم حلو قوي

لكن لما قريت باقي تعليقك اكتشفت معنى جديد لكلمة كتابه ماكنتش اعرفه

والحمدلله ان الموضوع عجبك .. والحمدلله اني استفدت من فصول نحو الأنية


سلاموووووووز

Soooo يقول...

سهر الليالى


الله يكرمك يارب ياسهر
وعارفه .. هي دي الفايده من التدوين
ان الواحد يتعرف على ناس يخافو عليه وعلى مشاعره
وبجد والله العظيم انا بافرح قوي لما الاقي حد من المدونين بيسأل علي او بيتطمن علي او بينصحني اعمل حاجه معينه
بجد والله انا فرحان جدا ان ربنا عوضني عن صحابي اللي اختفو في زحمة الدنيا .. باخوات ماعرفهمش غير من كتاباتهم وتعليقاتهم عندي


سلاموووووز

Desert cat يقول...

اممممممممممم
انا عارفه مين السبب فى الكلام
هى سماح انور مفيش غيرها
انا حبقا اكلم مادلين طبر تتصل بيك المرة اللى جاية
علشان نشوف الروائع دى
تحياتى

3ala asm masr يقول...

ربنا ما يقشعرلك بدن ابدا يا سووو يا ابنى
بس لما احنا نبنى المدرسه والجامع والصنايع دى حضرتك هتعمل ايه
انا من رايى ان البرنامج الانتخابى بتاعك مش ولابد
بس انت بردو مننا وعلينا ونلازم ننتخبك
واحنا وراك وراك لحد ما تزهق
قصدى لحد ما تنجح وربنا يوفقك والسلام عليكم ورحمة الله

Nani يقول...

السلام عليكم
مش معقول يا سووووو
صوتي لعلع في الحارة كلها
انا قرات كل المدونة
احييك على الخيال الخصب
بس مقلتليش مين من صحابك الي طلع خاين وعنده حستب في الهس بس؟
:))))

سهر الليالى يقول...

تصدق يا سووو
انت بتقول كل اللى جوايا اوى وانا حاسه بيك اوى والله اعلم يمكن عشان احنا ولاد برج واحد مش عارفة
زى ما انت حسيت بيا ولما قلتلى النصيحه عندى فى المدونة بجد لمستنى اوى وأثرت فيا
وبجد فعلا انا كمان واحدة من الناس اللى مدونتى عوضتنى عن حاجات كتير اوى وجبرت كسر فيا كتير وخدتنى من وحدتى

انت يا سووو بجد بدخل بسمه فى قلوب ناس كتير ربنا يجازيك الخير ويسعدك دايما

بس دة ميمنعش انى لسه عايزة السبعه والسبعين جنيه بتوعى
:)

L.G. يقول...

لو انت اللي قلته تبقى انسان

هناء يقول...

و اخيرا ظهر سوووو الحقيقي الذي يخفي اشجانه وراء خفة دمه

سعيدة لاكتشافك من جديد
سلاموز

hana يقول...

وبين الساعات والساعاات
بتتغير حاجاات

انت شاعـر حساس
وجميل أووى
كل اللى بتحس بيه كثير
اوقات بيمر علينا كلنا
بجد جذاب اسلوبك
وخفيف ولذيذ

تحياتى وتقديرى
هنا

مجموعة حياة يقول...

دائما كلماتك تنال الإعجاب ودائما أنت انسان لديك الكثير لتقدمه

دمت بخير :)

أم المييس

رئيس جمهوريه نفسى يقول...

روعه بجد يا عم العجوز
ساعات بنحس احلامنا بتتحقق
ونعيش في الوهم ونصدق
.. نفوق في لحظه على الواقع
نفنجل عينينا ,, ونبرق
فى دى اوجزت فا انجزت

لماضة يقول...

ابوس ايدك تيجى تاخد شوية الاكسير
عاوزه الحق اخلص منه قبل ما الحكومه تيجى تطب خلينا ناكل عيش وحياة الغالى عندك
دى اول سبوبه لينا
يلا
صباحوووووووز

Soooo يقول...

Desert cat

بجد ياقطه هتخلي مادلين مطر ولا مادلين طبر تكلمني؟؟

روحي ياشيخه ربنا يعمر بيتك
الاقيش معاكي موبيل شادية لطفي؟؟؟

سلاموووووووز

Soooo يقول...

3ala asm masr



اهو ده اللي جايبلنا الكافيه والمصيبه
لما كل مرشح يقول بورنامج انتخابي لو صدقناه يبقى نديله صوتنا .. ولو ماصدقنهوش .. نديلو صوتنا بحجة انه مننا وعلينا وبتاع

وبعدين انتي مستشوية الغفير اللي انا هجيبه يمسك المستشفى والجامع ومدرسة الصنايع .. ده غفير مستورد يابنتي
اي نعم
غفير صيني
ومعاه شهادة ضمان
هو انا هغشكم مثلا
!!!!


سلامووووووز

Soooo يقول...

Nani

ربنا يكرمك يارب
وبجد فعلا كلامك ده ورد فعلك على ان مدونتي ومواضيعي عجبتك .. هي دي احسن حاجه الواحد ممكن ياخدها
وكفاية اني بحاول ارسم بسمه على وشوش اللي بيقرو مواضيعي

وجاري البحث عن الصديق الخائن اللي معاه فلوس وحاططهم في بنك الهس بس .. وسنواليكم بالتفاصيل اولا بأول

سلاموووووووووووز

Soooo يقول...

سهر الليالى

الحمدلله اني بقول اللي جواكي وحاسسه بيه
بس مش عيب عليكي واحنا ولاد برج واحد انك تطالبيني بتمن النصيحه
طب انا منوفي وعايز اي فلوس عشان اشحن الموبيل
خليكي انتي اكثر كرما منني واديني فلوس على هيئة منحه وقرد حسن لا يرد
ولا ايه؟؟؟


سلامووووووووووز

Soooo يقول...

L.G.

وكتاب الله انا اللي قايله
تحبي تشوفي البطاقه؟؟؟
وبعدين خدي هنا
انتي بطلتي تكتبي ليييييييييه
؟؟؟
ومنزله لينك لموضوع تاني فيه واحد بينصحك وبيقوللك شوية نصايح عجب بالعنجليزي
لا لا لا
انا عايز اشوف مواضيعك انتي
مش لينكات ومواضيع ناس تانيه
فخمتو؟؟؟


سلامووووووز

Soooo يقول...

هناء

انتي لسه شوفتي حاجه ياهناء
ده انا متعدد المواهب
تحبي ارقصلك باليه مغربي او جزايري؟؟؟

منوراني ومنورني تعليقك الحقيقه

سلامووووووز

Soooo يقول...

hana

الاهي يعمر بيتك ويكرمك دنيا واخره ياهنونه .. قولي امين

والحمدلله ان اسلوبي عاجبك وكلامي سهل ولذيذ
منوراني بتعليقك


سلامووووووز

Soooo يقول...

مجموعة حياة

ام المييس

دائما بتحرجيني بتعليقاتك دي والله
ودائما باشوفك عندي على فترات متفرقه
ياريت تنوريني دايما بتعليقاتك دي وبتشجيعك لي

وربنا مايحرم عالم التدوين من انسانه هايله وجميله زيك


سلاموووووووز

Soooo يقول...

رئيس جمهوريه نفسى

سيادة الرئيس
الحمدلله ان الموضوع عجبك وحسيته
وبعدين كفاية انك شرفت هنا وقريت الموضوع

نورتني ياريس ونورتني بكلامك الجميل ده


سلاموووووز

Soooo يقول...

لماضة

اهلا اهلا بست الداكتوره
انتي يابنتي مش لاقيه حد يشتري الاكسير بتاعك قمتي ادورتي علي وقلتي ده شاب صعيدي وبيصدق
وبعدين عشان تبقي عارفه
السبب الاساسي اني مش عايز اعلق في الموضوع بتاع الاكسير اني مش عايز اخد التاج اللي انتي بتقولي اللي يعلق عندك ياخده
اصل انا يابنتي اقرع
ولو لبست تيجان هداري صلعتي البهيه
واحتمال اصلا اصلا التاج يتزحلق عشان مش هيلاقي شعر يثبته

فهمتي حاجه؟؟


سلامووووووز

نورسين يقول...

يااااااااااااة
واضح اني اتأخرت قوي لكن المهم اني لحقت البوست الرائع ده
ـــــــ

ساعات باضحك واضحك واكركر
وفي عز ضحكي الاقيني بافكر
.. بس بانسى الدنيا من فرحتي
ولهمومي تلاقوني .. باتنكر


ـــــــ
كان دائما ما يراودني شعور ان خلف كل تلك المزحات والضحكات الرنانه تكمن شخصية يخيم عليها الشجن .. كلماتك هنا عميقة جدا ورائعة .. فلا يملك قارئها اماما سوى الذهول فعلا والنطق بكلمة كانت تلحق دائما برباعيات جاهين الشهيرة - وعجبي - أراك ابدعت في ساعاتك فاستوت كفتي الميزان ما بين الضحك والبكاء واستقر الحال للذهول السابق


سوووووووو العزيز اضم صوتي لصوت شرين صاحبة اللحظات القاتلة والتي سعدت انا بنصيحتها لك واندهشت ربما ولكن هي النفوس الطيبة والارواح الناعمة تتساند رغم ضعفها وهونها ... تحياتي للجميع

تحياتي لك
ولقلمك الضاحك الباكي

kikotalaat يقول...

إيه يا عم الإحباط ده أنا كنت فاكرك ضارب الدنيا صارمة ومش فارقة معاك
بس بجد جامد موووووووووووت

وفعلا والله انت موهوب بجد مش مجاملة وكلامك مس أوتار كل واحد بس كل واحد والبطحة بتاعته

كان معكم ..,
كيكوووووووووووو

Tamr7na يقول...

بعد السلام
براحة كلام جميل بجد
بس فى نهايه الحيرة اللى انت وصلتنا ليها
اكيد انت انسان هو دا المهم فى الأخر
سلام

cinderella يقول...

كلمات من أروع ما قرأت
حفرت على قلبي معاني كثيره
سلمت اناملك التي نقشت فأبدعت
ونظمت لنا من الشجن منظومه متناغمه
تأخذنا إلى عالم بعيد
لنبحث في أحرفك الرِقراقه
عن معاني نُقشت من أجمل الكلمات
دمت بكل الخير

3ala asm masr يقول...

يا سوووووو والله انا مش قصدى اجبلكم الكافيه ولا حاجه
بس مننا وحاسس بحرقة دمنا
وبعدين ادى اول خدمه هتقدمهلنا ممايدل بالدليل القاطع والبرهان الساطع
انك عايز تخدم البلد والشعب
وانا معاك قلبا وقالبا

fanan fa2eer يقول...

كنت هاقولك جميلة وبسيطة قوي جدا خالص

بس قولت أشوف رده علي تعليقي اللي فات

كده برده ياسو؟ بقا كنت قربت تنساني؟

ماكانش العشم ياسوووو

هي الامتحانات ربنا يجازيها اللي عملت فيا كدة


عموما ياسيدي متشكرة علي سؤالك عن جديدي ورديت رد عملي ببوست جديد

:)

تحياتي

MKSARAT SAYED SAAD يقول...

ساعات احس اني فنان
او بياع كلام بتاع زمان
.. سمسار أوهام وأحلام
وساعات باحس اني .. انسان
عم صلاح يا جاهين
جميل قوي الاسلوب دة الواحد مش بيقراء كتير بجد جميلة
وابقى خلينا نشوفك
سلام

Soooo يقول...

نورسين

على رأي الفيلسوف الروسي .. شجاع بلاخوف .. أن تأتي متأخر سيكا .. خير من عشره عالشجره

كلنا جوانا ضحك وشجن
فرح وبكاء
المجانين بس هم اللي تلاقيهم بيضحكو على طول
وبالرغم من اني في سنة جنان .. لكن ساعات بابكي وكتاب الله زي باقي البشر

نورتيني .. والحمدلله ان البوست عجبك


سلاموووووووز

Soooo يقول...

kikotalaat

كيكوووووووو
منورني وكتاب الله
وبعدين مانا برضه ضارب الدنيا صرمه ياعم ومش فارق معايا حاجه
هي بس ساعات النفسنه بتشتغل على فولت عالي تقوم لادعه الأبلتين بتاع المارش بتاع دواسة الضحك

انا شكلي بقيت ميكانيكي؟؟

سلاموووووووووز

Soooo يقول...

Tamr7na

منوراني يا تمر حنه
والحمدلله ان الموضوع عجبك
وتشكرات افانزيم على التعليق الجميل ده
واتمنى انك تتابعي مدونتي المتواضعه وتعتبريها زي مدونتك تمام

سلاموووووووز

Soooo يقول...

cinderella


يالهووووووووي
ايه الكلام الجميل ده كللو
انا كده هاخد في نفسي قلم
والله انا مش عارف ارد اقول ايه
بجد بجد بجد .. اخجلتم تواضعنا بتعليقك الرااااائع ده
واللي بيدل على انك انسانه جميله جدا وجواكي مشاعر اجمل واجمل

واتمنى انك تتابعي مدونتي المتواضعه وتعتبريها زي مدونتك تمام

وربنا يقدرني واكون عند حسن ظنك في


سلاموووووووز

Soooo يقول...

3ala asm masr

ده مما لاشكل فيه طبعا
انا فعلا منكم وعليكم
وركزي في كلمة عليكم دي الله يكرمك
عشان انا ناوي بمجرد ما امسك الحكم .. اهرب ميدان العتبه على بنوك سويسرا
تحبي تاخديلك شارع ولا حاجه؟؟؟


سلاموووووووز

Soooo يقول...

fanan fa2eer

لا طبعا مانسيتكيش
هو انا اقدر انسى فنانه زيك عامله اسم مدونتها على راااائعة من روائع فؤاد حداد
دي حتى تبقى عيبه في حقي

وربنا يارب يوفقك وتنجحي وتاخدي اعلى الشهادات وترتقي في اعلى المناصب واسمى الدرجات

سلاموووووووووز

Soooo يقول...

MKSARAT SAYED SAAD

ابو السيد يا بتاع المكسرات والحبشتكانات
الف شكر يا برنس على الكلام الجميل ده .. بس انا ماجيش ضفر الصباع الخنصر لواحد عظيم زي صلاح جاهين

وصدقني والله .. انا متابعك وباشوفك اول بأول
بس هي لخفنة الشغل اللي بتشغلني اني اعلق بشكل مستمر مش اكتر

سلامووووووز

rody80 يقول...

هاي سوو ازيك ان شاء الله بخير

ايه يا عم امال ايه اضحكي للدنيا تضحك ليكي باب النجار مخلع ولا ايه


تحياتي

زُمُرده يقول...

السلام عليكم
ياااااااااه اخيرا قررت اقول كلمتين
كل مره اجيلك اقرأ الكلام الجميل ده
واخرج ....ليه؟؟
ليا اسبابي
وكمان كل الناس قالت
بس انا حسيته
ومقلتش
علقوا...ومعلقتش
وليا اسبابي
سلام