السبت، ٢٢ شوال ١٤٢٨ هـ

!! سوووو .. والتِسَع قطط

كانت امي - رحمة الله عليها إن شاء الله - تُطلق عليّ اسم أبو هريره , وذلك لأنني كنت كل يومين تلاته وانا راجع البيت .. أجيب معايا قطة من الشارع , وقد وصل بي الحال أنني في فترة من الفترات كنت أُربّي تِسَع قطط في البيت , وكان لهم معي ذكريات غريبة .. غريبة للغاية

هيام .. كانت أكبرهم سنا وأرجحهم عقلا , حيث كانت تشعر بقدومي كلما ركبت الاسانسير بتاع العماره وانا راجع .. بينما نسكن في الدور التاسع ! , وكانت تنتظرني على باب الشقه وتستقبلني
!! بالأحضان يابلادنا ياحلوة بالأحضان
كانت هيام أكثر القطط التي شاهدتها في حياتي .. اتزانا عاطفيا , حيث أنها لم تهرب من المنزل في فترة تزاوج القطط .. وفضّلت أن ترعى القطط الأصغر منها سنا
وكانت نهايتها مأساوية جدا .. حيث نَزلت هيام لأول - و آخر - مرّه للشارع .. وما أن وطأت الشارع بأقدامها .. حتى ظهرت عربية رُبع نقل طائشه .. فدهستها , وأمسكت بسائق العربيه
.. فوجدته ابن قُرني البواب الذي يحرس عمارة في أول شارعنا , ودببت معه خناقة لرب السما
!! وكدت أن أبطحه بطوبة قرن .. ولكن الناس حاشتني عن الفتك به

نيوتن .. وكان أغبى قط شفته على الإطلاق .. وكنت أراقب تصرفاته وأضحك ملء شدقي , واتذكر أن وصل به الغباء .. أن تسلل تحت البطانيه وانا نائم في أحد أيام الشتاء - أيام ما كان في شتاء فعلا - ونام على ذراعي اليمين .. وما أن نام وأنتخ .. حتى شعرت بماء دافئ ذو رائحة
! كريهة على يدي .. واتضح لي انه عملها على روحه .. وعلى إيدي
وكانت نهاية نيوتن تنُم عن غباء فطري .. حيث انه كان يمشي على سور البلكونه ونحن كما سبق وقلت آنفا .. نقطن في الدور التاسع , وكان - بسلامته - يمشي مختالا فخورا بظل قامته الذي يبدو له على الأرض , وفي أثناء مشيه مختالا فخورا .. ظهرت له ذبابه .. فأراد أن يصطادها .. قام ضارب برجليه القُداميّن والورانيّن - في توقيت واحد ! - وراح هوووووب .. وقع من الدور
!! التاسع

صافيناز .. وكانت أكثر القطط تناكةً وأنافةً وألاطةً ! , ولم تأكل في حياتها أو تمتد يدها - أو رجلها - مرّة واحدة إلى أرجُل الدجاج التي كانت أمي - الله يرحمها - تسلقها للقطط , بل كانت صافيناز
! بنت ذوات .. حيث كانت لا تأكل سوى لانشون حلواني .. وبالزيتون كمان
والحقيقة أن نهاية صافي كانت نهاية غريبة لا تتماشى مع ألاطتها .. حيث أنها تعرفت على قط من قطط الشوارع .. ويبدو انه عشّمها بالحلق فخرّمت آذانها .. وانساقت وراء رغبتها المحمومة ! , ويبدو أنه - القط ابن الحرام - أجّر لها صفيحة زبالة إيجار مفروش .. وبعد أن أخذ غرضه منها
!! تركها ؛ فاتجهت للانحراف بعد أن تعرفت على كام قطه من قطط شارع الهرم

وحيد .. كان وحيدا وفريدا من نوعه .. حيث كان أكثر قط مشاغب في عالم القطط , والدليل على مشاغبته .. انه لم يسمح لأي قط أن يجلس بجانبه على الكنبه أو على الكرسي - تقريبا كان بيتنحس
.. لمّا حد يقعد جنبه ! -
وكانت تنتابه نوبات شجاعة مفرطة .. وينزل تلطيشا في كل القطط
! ماعدا هيام التي كانت تموء وهي تظغر له .. فيعرف ان الله حق
وبانتقال هيام الى الرفيق الأعلى .. فَلت عيار وحيد وانحرف بضمير .. وانضم لقطط الشوارع
! التي تضرب بقايا السلمون من الزباله .. وأصبح مسجل خطر سرقة عضم من قُدام الشقق
!! وهناك إشاعة تؤكد انه هو نفسه .. سفاح المعادي


رشا .. أكثر قطة صادفتها دلالا وميوعةً وإغراءًا , وكانت تغرر بكل القطط الذكور اللي عندنا
.. وتستدرج أحدهم لأي حته ضلمة في البيت , وتتركه - ياعين امه ! - بعد أن تأخذ غرضها منه
!! ثم تدور على غيره .. وكأنها تقول .. اللي بعده
والغريب أنها اختفت في ظروف غامضه .. وفي اعتقادي الشخصي انها اتجهت لعالم الفيديو كليب لما كانت تتمتع به من قوام رشيق .. جعلها تستحق عن جداره لقب هيفاء وهبي القطط , إضافة على قدرتها على التغرير بالقطط من مُجرد نظرة واحدة .. تفوق قدرة إليسا على الفتك بمشاعر
!! أجدعها شنب فينا .. نحن البشر
!! وهناك إشاعة تقول أن رشا انضمت لشبكة الدعارة التي أنشأتها القطه الهاربه .. صافيناز

المُكّعي .. وكان بحق .. مُكّعيا في حركته .. لكعاً في تصرفاته .. بطيئا في ردود أفعاله , وكانت له لحظات تأمل غريبة .. فقد كان يجلس على كرسي البلكونه وينظر للشمس وهو مُسَنتحا ومغمض
! العينين .. فاغرًا فاه للذباب يدخل ويخرج كما يشاء
واتذكر انه لم يكن يستطيع ان يأكل مع باقي القطط .. وذلك لأنهم كانوا يخطفون الاكل بسرعة .. وكان هو يقف مُذبهلا وكأنه يقول .. هو في ايه !؟
وكانت نهاية المُكّعي مُكّعية بشده .. وذلك لأنني في أحد أيام الصيف .. كنت قد ملأت البانيو لكي اهرب من قيظ الجو .. وخرجت من الحمّام لسبب لا أذكره .. وعندما عدت وجدته غارقًا في مياه البانيو ! ؛ فقلت لنفسي يبدو ان المُكّعي قد انزلقت رجله ووقع في الماء .. وترك نفسه للغرق
!! وهو يقول .. ماحنا كده كده هانموت ياعم الحاج

روتن .. أو تشيكوفسكي .. ونظرا لطول الاسم الثاني .. كنا نناديه بـ روتن , واتذكر انه كان ذو
! عين تختلف عن الاخرى لونا واتساعا .. واشك انه كان أعور .. وعامل عين عموله
و من مواقفه مع أمي - الله يرحمها - أنها كانت تقوم بخياطة أحد بنطلونات والدي بعد ان تفتق في منطقة حساسة , ويبدو أن روتن اعتقد أن أمي تلعب معه .. فأخذ يلعب بِبَكرة الخيط إلى أن تكعبلت حوله ولم نستطع أن نفكها .. فقمنا بقطعها , وبعد أن تحرر من قيود الخيط .. أمسك بالعلبة التي تحتوي على باقي بَكر الخيط .. وأخذ يضرب فيها بقدميه - أو يديه - وكأنه ينتقم منها ويقول
.. شفتوا قطّعت أختكم ازاي !؟
.. واختفى روتن بعد هذه الحادثه بأسبوع .. وأعتقد أن بَكر الخيط قد استفرد به في أحد الأيام
!! وقام بخنقه .. وتاوى جتته

لملوم .. كان لونه اسود فطيس , وكانت عنده قدره عجيبه على لملمة نفسه ودفن رأسه بداخل
! تجويف بطنه .. بما لا يدع مجالا للشك بأنه أي حاجه مكعبره وليس كائنًا حيًا على الإطلاق
وكنت دائما اتخض منه عندما أعود للبيت متأخرا .. فقد كنت أشاهد حاجه سوداء اللون .. مُكعبرة
! الشكل .. وبتقول (مياو) .. فاعتقدها فار بيشتغلني
هذا ولقد اختفى لملوم على حين غره , وفي اعتقادي الشخصي انه كان يلعب الاستغمايه مع باقي القطط .. ولملم نفسه داخل أكياس الزباله السوداء وهو يقول لنفسه .. ابقوا قابلوني لو عرفتوا تعتروا عليّ !!؟

وأخيرًا .. سوشي , وكان قطا شيرازيا أخذته من صديقي الذي رفض أهله الاحتفاظ به , وفهمت بعد ذلك سبب رفض أهله ؛ لأن سوشي باشا .. كان في الأصل حمار ! , حيث أنه ياما خربشني
.. وهو يلعب معي مُعتقدًا أنه بذلك دمه خفيف , بل وصل به الغباء والحُموريّه
! أن خربش كل بنات أخويا

وكانت هذه نهايتي مع عالم القطط .. حيث أن أمي - الله يرحمها - كانت تحب بنات اخويا أكتر
.. منّي , وكان أمامي اختيار من اثنين .. أن أترك البيت مع سوشي ونشوفلنا أي خرابه تحتوينا
.. أو أن أقوم بتسريبه , ولأني صاحب مبدأ طوال عمري .. سرّبت القط في ثانيه
!!! تطبيقا لأغنية نانسي عجرم .. أحبك آه .. اسيبك .. آه .. برضك
---
والآن .. أُصرّح انني افتقد مواء القطط .. وافتقد أيضا .. أن ألعب معهم
-
سوووو

هناك ٦٩ تعليقًا:

Dr. Diaa Elnaggar يقول...

العزيز سوووو

بوست "مقطقط" فعلا!0

خالص تحيتي وعميق مودتي

ضياء

Abeer يقول...

والله بوست تحفة .. ولذيذ

يا بختك بجد بحضانة القطط ديه

دا انا زاله ورا الوالدة علشان اجيب قطة .. بس هي بتقوللي يا انا يا هي في البيت

خيرالدين يقول...

فاتنى الكتير بالتاخر على زيارة مدونتك
اسلوبك جميل جدا
ـــــ
بس بصراحه يا سووو
انت لو شفت غلاسة قطط الارايف هتغير النظره الحالمه دى عن القطط

بوست جميل وطريقتك أجمل

غير معرف يقول...

تعيشى وتربى يا باشا بس مش لدرجه تسع قطط

Unknown يقول...

وكانت نهايتها مأساوية جدا للغاية فحت

وإنحراف صافيناز فى شارع الهرم

انضم وحيد الى شلة قطط من الشارع .. واتجة لشم الكوللا .. واصبح مسجل خطر .. سرقة عضم من قدام الشقق .. ويقال مؤخرا .. انه هو نفسه .. سفاح المعادي


وهناك اشاعة تقول انها تزعمت شبكة دعارة القطط التي ساهمت في تكوينها القطه الهاربه .. صافيناز

هههههههههههههههههههههههههههههههههههههه

فطستنى من الضحك حرام عليك

سبحان الله انا اصلا ماليش تعامل مع القطط خااااااااالص وبخاف منهم جدااااااااا .. روحت زورت خالتى امبارح وبيتهم ملياااااااان قطط يجى بتاع عشر قطط مثلا .. مانص استقصدنى بقا وكل شوية ينط على دراع الأنتريه ويبصلى بإعجاب وانا اصووووووووت .. شوية ابن خالتى يقولى معلش اصله بيحب السمر صاوتت وقلتله ححط ماسك ولا انه يحبنى ده ايه ده بس

بعد نوبة الصويت دى ابن خالتى خده ومشاه شوية الاقيه ناططلى تانى وانا اصوووووووووووت وجوز خالتى يقولى معلش اصله بيحب الطيبين ولاقيت ابن خالتى بيقولى معلش دى روح حتاخدى فيه ثواب .. بصراحة صعب عليا وقعدت اطبطب واحسس على ضهره وهو مبسوط لحد ما لاقيته راح ناطط واقف فوق رجلى .. لاااااااااااا الحب ده كتييييييير اوى ، امسك فى ماما واصوت ومتثبتة خايفة منه مش عارفة اعمل ايه وكلهم فطسانين من الضحك ويقوليلى متخافيش مش حيعملك حاجة

اتارى الإستاذ كان عايز ياكل العقد اللى كنت لابسه ولما لميته تحت الطرحة ولقى مافيش أمل راح ماشى

ياسااااتر ايه ده
:D

كومنت طويل معلش واكيد صدعت

يلا سلااااام

rainbow يقول...

تعرف يا سووووووووو
العبده لله مدمنة قطط بحبهم بدرجة رهيبة لكن للاسف بيعملولى حساسية وبضطر اتخلص منهم فى النهاية والسبب فى حبى ليهم والدتى الله يرحمها كانت بتحبهم وكان دايما عندنا قطة فى البيت .. بس تسعة دى كتير اوى انا اكبر عدد وصلتله اربعة وكانو هيجنونى عايزين رعاية ولعب واهتمام .. لكن بجد حلوين وآخر قطة واغلى قطة كانت عندى كان اسمها نونا الشعنونة كان ناقص تتكلم من كتر ما هى بتفهم وتستجيب سبحان الله الله يرحمها بأه

كل الحيوانات وهى صغيرة بتكون جميلة جدا بس القطط جميلة فى كل الاعمار

تحياتى لزميل مدمن قطط زى حالاتى
هدى

هناء يقول...

هي شقتكم فيها كم غرفة

Hannoda يقول...

على فكرة أنا مت على نفسي من الضحك

كنت بقرأ البوست برة في قاعة الطلاب ولما لقيت الموضوع و سع قمت دخلت غرفة المدرسين الفاضية و فتحت مدونتك عشان أضحك براحتي بد ل ما أفقد هيئتي قدام طلابي

و الحمد لله عدت على خير
:)

متخيلة كل قط و قطة وصفتهم بكل تصرفاتهم ... على فكرة تربية القطط هوايتي ظانا كمان و لو اني محرومة منها بقالي سنة وو نص بسبب مكان سكني الحالي الغريب مناسب

القطط مخلوقات روعة.. قادرة تموتك من الضحك

بوست لذيذ

bastokka طهقانة يقول...

بوست تحفة
انت ملكش حل فعلا هايل
نجحت تضحكنى


انا كان عندي قطة اسمها فايزة و سمناها بهذا الاسم علشان في
فيلم الباشا تلميذ كان بيقول
حلاوتك يا فايزة و انت عايزة

و على ما يبدو انها اشتغلت في نفس كارير صافيناز
ههههههههههههه
اوروفوار

دكتور كسلان يقول...

اولا انا اسف لانى بقالى فترة ما زرتش مدونتك

واكيد انا اللى خسران

وفاتنى كتييييييييييييييييييييييييييير


البوست تحفة

بس انا ملاحظ ان القطط اللى بتربيها

معظمها لعوب

وانحرفوا فى الاخر

ممكن دلوقتى يكونوا عملوا لهم موقع ع النت


سلام يا باشا

إيمان يقول...

ضحطتنى يا سوورأصبحت خبير يا سيدى فى سيكولوجية القطط ...دى مهارة حاول تستغلها...إن مكنش هنا فى بلدنا ..أهى القطط لها محبيها ومعجبيها فى بلاد تانية
صراحة يا صبرك أنا بحبهم بس فى الصور
لكن فى الحقيقة..بارتاب منهم

تحياتىىىىى

سلوى يقول...

بوست حلو سوووو
كانت عندي الهوايه دي وأنا صغيره
لسه فاكرة اللعب معهم بالحبل والكورة

المهم

أحييك على طريقتك

ملحوظه
في تقريبا مشكله في الشكل الجديد للمدونه
بعض الكلمات لم تظهر في البوست
مش عارفه المشكله فين
حاول تتأكد من الموضوع ده

تحيااتي
كنت هنسى
سلاااموووزززززز

Doba يقول...

ربنا يخلى والله
انا صعبان عليا مامتك - رحمة الله عليها - بس شكلها هيه اللى طلع عينيها فى تربيتهم

انت كنت بتلعب معاهم وخلاص

ممكن نبقى نجيبلك واحدة تونسك بدل العروسة

سلامى
هبة

MKSARAT - SAYED SAAD يقول...

شوفت بقى الفرق بين الــ9cats بتوعك والـــ4cats بتوع دلوقتى
تحياتي يا ابو هريرة

رحــــيـل يقول...

ههههههههههههه
انا بقى بقرف من القطط جدا جدا
بس بجد كويس ان مامتك الله يرحمها صبرت عليك
انا لو منها هبيتك فى الشارع معاهم
وتبقى القطط تنفعك
بس بجد بوست رائع فعلا
سلامووووووووووووووووووز

3ala asm masr يقول...

سوووووووووو
بوست جامد موت يا باشا زى عادتك
لكن انا مش بحب القطط خالص ولا احب اربى اى حيوان ولا طائر لانى بخاف

ولتانى مره بطلب مساعدتك فى عمل نيو لوخ لمدونتى الكحيانه ومتخافش مش هحط اخترناه اختلاناه
هحط اول طلعه جويه
هههههههه
تحياتى

shreen يقول...

وانا الاخرى يا سوووو
مثلك
لكن ضعفى انا تجاه كل الحيوانات
قطط
كلاب عصافير
حتى والله العظيم
السحالى والابراص
لما ماما كانت بتصوت منى
لما تلاقينى ما اراش اقتل النمله
واقولها
تخيلى لو كائن اكبر منك جه داس عليك لمجرد انك اصغر منه
هى النمله هتعملك ايه؟

ودائما وابدا اردد
انى اقدر اتعايش مع اى كائن حى
ما عدا الذباب والناموس

وان دل حبك للقطط على شئ
فهو روح الفنان الحساسه
التى تهب لنجده كائن ضعيف
وتمنحه مسكنا
وطعاما

وبالمره بقى بمناسبه القطط
هاجرب اضع فى مدونه الصور
صور القطط اللى اتبنيتهم

الأميره أوسه يقول...

أنا دخلت التاريخ يا شعب
وبقيت ولا النابلسى فى زمانه
وكل ده بربع قرش حشيش مضروب بلبان ضكر وحنه أسوانى
ههههههههههههههه
دى مش قطط دول حوادث
أنا بقا ذكرياتى مع القطط عاطفيه
أخر قطه كنت لقيتها من سنه كده
كان يدوب عمرها أسابيع
وجدتها مضروبه و وشها مشلفط
والقطط الكبيره عاملينها كوره شراب
صعبت عليا روحت عليها شلتها
أستجابت
وبدأت معاها رحلة علاج مابين اطباء
وبين خبرات معلوماتيه بايته فى نفوخى
المهم بقيتا صوحاب كأنها أختى كده
أختى الكبيره
وطبعآ أشترتلها أدويه ولبن
وقضينا مع بعض ليالى شتاء لاتنسى
كانت تنام فى حضنى
و مع الصيف بدأ المرض فى الرجوع
والمشكله ان البيت كله أتعدى منها
ههههههههههههه
أه والله العظيم
فيما عدا أنا
أصلى مقرى عليا عديت ياسين
خدتها لطبيبه يقال أنها بتفتح الكوتشينه
كشفت عليها وبعد كده سألتنى
وأخبار جلدك أيه واللى فى البيت
قولتلها أنا كويسه
واللى فى البيت مصابين بس مش مهم
المهم القطه
قالتلى لازم تتخلصى منها لأن علاجها مش مضمون عندها تينيا من نوع غريب
والله القطه كانت بتشب عاوزانى أحضنها وأروح بيها وكانت بتعيط
روحت حططها بجوار مكان سهل أنها تلاقى فيه أكل وأنا قلبى بيتقطع
وعمرى ما هنسى صوتها وهى بتنادى عليا
بتقولى تعالى خدينى ياماما
عذاب عذاب
ودموع
من وقتها الكل نصحنى أنى مش أربى قطط
عشان نفسيتى بتتعب لما بيحصلهم حاجه
و مره قطه واحد خطفها وجرى ورجعتلى بعد سنه عشان تموت
كل قصصى حزينه
الله يرحم والدتك أنا قريتلها الفاتحه
وأرجو أن يقوم كل من يقرأ تعليقى بقرأة الفاتحه
شكرآ على البوست ياباشا

الأميره أوسه يقول...

shreen

أنتى شبهى خالص
أنا من فتره بفكر أربى فار
أنا ربيت قطط وطيور بكل أنواعها
وعصافير و ببغانات بأشكال والوان
بس بخاف من الكلاب
من فتره شوفت حاجه أسمها ورل
فى سوق السيده عائشه
عباره عن سحليه ضخمه
وبتاكل ثعابين وفيران
بفكر اجيبها
أعمل حسابك فى واحده
أيه ده
هى مش بترد ليه
؟

الأميره أوسه يقول...

هناء
سؤالك غريب
هههههههههههه
أيه الغرض منه
هى كل قطه محتاجه غرفه
أنتى مفكره سسو كان متجوزهم عرفى وكده
عسل أنتى

shahy يقول...

تسع قطط يا مفتري

انا لو مكان مامتك الله يرحمها كنت رميتك انت والتسع قطط ياقطة

انا مبحبش القطط لانها غدارة

وبحب الكلاب لان بابا كان بيجيب لنا كلاب تتربى معانا على اساس اننا نتعلم الوفاء هههههههههههه بي مفيش فايدة طلعنا اندال

انا عندي حاليا سلحفاة اسمها كوكي ابقى تعالى خدها انا خلاص مش عاوزاها اصلها بقت تعمل بي بي كتير

تحياتي يا صديق القطط

نورسين يقول...

سوووووووووو : بوست مقطقط على قولة د.ضياء وانا سعيده بأسلوبك الرائع وبالبسمة الحلوة الرايقة اللي بتحاول ترسمها على وشوش الناس اللي بيحبوك
انا كمان بحب القطط ، بس من مده كدة بقيت بحبها من بعيد لبعيد ، يعني شكلها بس ، لكن غدرها ،، كرهني في اللعب معاها وحسسني بحقيقة حيوانيتها

بس بجد استمتعت مع قططك التسعة ، يلا ربنا يرحم اللي مات منهم ويستر على اللي عايش
ومش يحرمنا من بوستاتك الجميلة ، الجامده دي يا باشا
تحياتي

Soooo يقول...

د ضياء

نورتني يادكتوري
بس بيني وبينك كده .. ماحستش اني متأثر شويه بروايه عالم القطط بتاعة إلتوت
اصل انا قريتها وعجبتني قوي .. وبصراحه كان نفسي اعملها زمان في مسرح الجامعه .. بس المشكله ان لا ممثلين ولا جمهور كانت هتقدر تتخيل اني مش عامل مسرحية اطفال .. واني باتكلم عن عالم تاني بكل مافيه من اختلافات في المفاهيم والمعاني والطقوس

بس يلا .. اديني نزلت موضوع وجسيت نبض الناس ولقيته زي مانا متخيل .. رواية فانتازيا .. طفوليه برضه


سلامووووووووووز

Soooo يقول...

Abeer

طب تصدقي يا عبير ان دي كانت نفس الكلمه اللي امي الله يرحمها بتقولهالي لما اجبلها اي قطه
وتقولي لو جبت قطه تانيه انا هرميها في الشارع
لكن بمجرد ماتشوف القطه تروح مبتسمه ابتسامه على خفيف .. وتقولي عرفها تعمل حمام ازاي .. ورح اغسلها ونضفها
وبعد ما انضفها واعلمها وكللو تمام .. الاقي امي بتحطلها اي حاجه تاكلها

والغريب ان بعد ما والدتي توفاها الله في رحمته ان شاء الله .. وبعد مابقى البيت فاضي علي انا وابويا وبس .. ماجبتش قطط
مش عارف ليه .. يمكن خوف اني ماقدرش اهتم بيهم زي ما امي الله يرحمها كانت بتهتم بيهم .. وبينا احنا كمان



سلامووووووز

Soooo يقول...

e7na

ياباشا نورتني
ولا اتأخرت ولا حاجه
فيه مثل بيقولك .. ان تأتي متأخرا .. خير من ان لا تأتي من اساسو

نورتني ياباشا

ملحوظه
عالم القطط زينا تمام .. فيه الكويس وفيه الحبوب .. في الطيب وفيه الرخم .. فيه الشرير .. وفيه الطيب

سلاموووووووووز

Soooo يقول...

رئيس جمهوريه نفسى

سيادة الرئيس .. حضرات المدونين
القطط دي اجمل حاجه في الدنيا والله
ولو جربت انك تربي قطه واحده .. هتقول وليه ماجيبش قطه تانيه .. وتالته
ويمكن توصل معاك لتاسعه
نورتني ياريس



سلامووووووووووز

Soooo يقول...

إنـســـانـة

منوراني والله .. ولعلمك انا بحب حكاوي القطط دي جدااااااااااااان

يعني ماصدعتينيش ولا بتاع

ولعلمك .. القطط دي بيبقى عندها قدره رهيبه على استشفاف الحاله اللي قدامها
يعني لما تحس انك خايفه منها بس من جواكي طيبه ومش عايزه تؤذيها ولا حاجه .. تروح مقربه منك عشان توصلك لنقطة انها هي كمان غلبانه ومش عايزه تؤذيكي
ولعلمك برضه .. القطط بطبعها برضه بتحب اللي يدلعها .. زيكم برضه يا ستات
تمووووتو في الدلع .. بس يمكن انتو غدارين اكتر من القطط سيكا



نورتيني ياستي .. وسلامووووووز

Soooo يقول...

rainbow


اهلا بيكي ياستي في عالم مدمنين ومحبين القطط

فعلا والله .. القطط حلوين في اي سن وفي اي عمر بغض النظر عن سنهم وكده

يمكن لانهم بطبهم مقطقطين كده
مش عارف


بس امانه عليكي .. لو جبتي قطط تاني احجزيلي قطه معاكي


سلاموووووووز

Soooo يقول...

هناء


هنوووونه
منوراني والله
بس فعلا زي ماقالت اوسه .. انتي فاكراني متجوز القطط عرفي ومقعد كل واحده منهم في اوضه

لا ياستي .. انا الحمدلله مش ناوي اتجوز .. ولا عرفي ولا رسمي

واجابة على سؤالك برضه هقولك اننا قاعدين في عماره الدور مقسوم على شقتين .. واحنا ساكنين في دور كامل الشقتين مفتوحين على بعض .. يعني ست اوض نوم واربع حمامات ومطبخين واربع صالات واوضتين سفره
بيتهيألي المكان يساع من القطط الف .. خصوصا انه بينامو على اي كنبه تقابلهم في سكتهم



نورتيني ياستي
سلاموووووز

Soooo يقول...

Hannoda

انتي عارفه .. والله العظيم والله العظيم مجرد اني حسيت اني رسمت ابتسامه بسيطه على وش اي حد بيقرا اي موضوع هنا .. دي كبيره عندي قوي والله

والحمدلله ان هيبتك ماضاعتش ولا حاجه قدام الطلبه والا كنتي دعيتي علي وانا بيني وبينك عندي من المصائب ماينوح بكتفه امم

بس قوليلي .. سكنك غير مناسب ازاي .. دي القطه كل اللي عايزاه حتة خمسين سنتي في خمسين سنتي تنام فيها .. وطبق بلاستيك جوين تحطيلها فيه ميه او لبن .. ارميلها اي اكل عالارض وخلاص
ولو على الحمام .. اطلقيها واعطيها حريتها .. وبس خلاص


سلامووووووووووز

Soooo يقول...

bastokka طهقانة


هييييييييييييه
طهقانه ضحكت وعجبها موضوع من مواضيعي ياجرعان

على فكره بقى .. انتي يا طهقانه وجوزك طهقان وبرايد اللي عامله مدونة عايزة اتجوز .. اكتر ناس بجد بتضحكوني لدرجة الثماله في عالم المدونين
وده مش تقليل للمدونين التانين
بس معنى اني انجح في اضحاكك فده اني والحمدلله نجحت التفت انتباه كاتبه ومدونه ساخره ليها معزة خاصه في قلبي وكتاب الله

أما بالنسبه لقطتكم فايزه .. فهي كانت بدايتها الحقيقه فعلا في شبكة قطط شارع الهرم .. ولكنها انشقت عنهم وعملت لنفسها شبكة تانيه
شبكه بتغطي منطقة الخليج العربي .. وبيروحو بالطيارات .. وبالطلب

ونعلمكم انها غيرت اسمها لـ باكينام السيد محروس .. واعتقد انها هتكتب مزكراتها قريب
وهتكون مزكراتها باسم
باكينام .. من بيت طهقانه وطهقان .. لبلد البترول والعربان

سلاموووووووز

Soooo يقول...

دكتور كسلان

انا ياسيدي مقدر ظروفك ومقدر كسلك
الحمدلله انك جيت اخيرا
وان شاء الله مايكونش فاتك كتير ولا بتاع


بالنسبه لان قططي معظمهم لعبو .. فده يا دكتور نتيجة التغلغل الاعلامي اللي للاسف بقى مسيطر علينا
افتح بنفسك اي تلفزيون قطط وشوف قناة ميلودي القططية الغنائيه
هتلاقي قطط عريانه
اي والله قطط عريانه

لنا الله


سلامووووووووووز

Bahz.Baih يقول...

عارف يا استاذ سوسو
انا اكتر حاجه عجبتنى فى لبوست غير انه خلانى افطس على روحى من الضحك هو اختيارك لأيامى القطط ... فعلا مغبلاه عن صفاتهم خاصه صافيناز و نيوتن
تحياتى

Soooo يقول...

إيمان

منوراني يا ستي والله
وهحاول اعمل بنصيحتك دي
وممكن اقلب اوضتي لوكاندة قطط .. واقسمها صناديق وكل قط يجي ياخد مفتاح صندوقه

بس ربنا يستر ويبعد عننا مباحث اداب القطط



سلامووووز

Soooo يقول...

Salwa


منوراني والله .. بس ليه وانتي صغيره بس كنتي بتحبي القطط
ليه مش لغاية دلوقتي بتحبيهم وتربيهم .. كفاية ياستي انك هتكسبي كام حسنه عالماشي


بالنسبه للخبطه اللي بتقولي عليها .. انا مش فاهم قصدك ايه
اكتر من شخص شافو البلوج عموما والموضوع خصوصا ومافيش حد قال حاجه
يكونش الغلط من الماوس بتاعك؟؟
خصوصا ان الموضوع عن القطط




سلاموووووووووووووز

Soooo يقول...

Doba


منوراني والله ياهبه
وربنا يجعل اللي امي كانت بتعمله في القطط في ميزان حسناتها ويرحمها برحمته

وبيني وبينك .. اني اربي قطه او عشرين قطه حتى .. احسن مليون مره من اني اربي واحده ست او احب او اتجوز

ياشيخه .. ده القطط احباب الله


سلاموووووووووووووز

Soooo يقول...

MKSARAT SAYED SAAD

منورني يابو السيد والله
بس ايه ده ياجدع .. جاي فاضي ممعكش كيلو كاجو حتى
طب بلاش كاجو .. هات اتنين كيلو فسدق على بندق على سندق

ده مش عشاني .. دول عشان القطط يابرنس

نورتني وسلامووووز

سلوى يقول...

تصدق عندك حق

يظهر أنها من ألاعيب الماوس

بجد الأول كان في بعض الكلمات طايره

بس الوقت الأمن مستتب
والحمد لله
حصل خير

تحيااااتي

Soooo يقول...

ra7eel


اقولك معلومه بخصوص انك بتقرفي من القطط
القطط بتقضي تلت عمرها اكل وشرب ولعب ودخول الحمام .. وتلت عمرها نوم .. وتلت عمرها الاخير في النضافه

يعني ممكن تكون فعلاي .. انضف من بني ادمين كتيييييييييير



سلامووووووووز

Soooo يقول...

3ala asm masr


اقولك حاجه ياهند
لو بصيتي على موضوع انك تربي حيوان من ناحيه انسانيه هتلاقي انك بتعملي حاجه صح
ومش هتخافي منها
انما لو بصيتي على تربية الحيوانات من ناحيه الخوف لانه روح ودي مسئوليه
يبقى لازم تخافي


بخصوص انك عايزه تعملي نيولوخ انا بعتتلك ايميل باسألك فيه ايه اللي انتي عايزاه بالظبط .. انا تحت امرك ياستي



سلاموووووووووووز

Soooo يقول...

shreen


والله ياشيرين انا عن نفسي ماجرتش حوار السحالي والابراص
وبصراحه ماعرفش اتعايش مع كل الكائنات الحيه والحيوانات زي
يعني ماينفعش مثلا تجيبيلي اسد وتقوليلي هشتكه
!!!؟؟؟@@@#$%%##@@&&***!!!!!!
ده نفس اللي هيحصل في لما اقرب منه

وعلى فكره .. انا برضه مش مرهف قوي ولا فنان ولا بتاع
ده انا بابلطج بلطجه عالصراصير والنمل الفارسي

شرير شرييييييييييير

وياريت فعلا تحطي صور القطط اللي اتبينيتيهم
وياريت تتبنيني انا كمان وتكسبي في ثواب



سلاموووووووز

Soooo يقول...

أووووووووووووسه
حبيبتشي حبيبتشي حبيبتشي
هو الحشيش اللي كنتي جايباهولي حشيش مضرووووب؟؟
ومين ده اللي ضربه بس
اتاريني بقول ليه كل ما اخد نفس الاقي مناخيري بتحمر .. تقريبا ده تأثير الحنه
يلا مش مهم .. مردودالك في طلقة بانجو يا اوختشي


اقولك حاجه بس ماتستغربيش .. بجد بجد انا بافرح لما الاقي تعليق ليكي عندي
باحس انك بنت بلد وجدعه كده .. حاجه كده من الزمن المنصرم .. اي والله منصرم
يعني انتي منصرمه .. وانا من طنطا


وبعدين استني هنا مش هنكروت .. زي مانا عملت موضوع عن القطط انتي كمان لازم تعملي سلسلة مواضيع قططيه فاخره
بدل شغل اليوتيوب اللي بتستكردينا بيه وتقولي عليهم مواضيع


يلا سلامووووز يا احلى اوسه في الأساإيس
أساإيس العشاق .. فيلم حلو قوي

Soooo يقول...

shahy


شفتي بقى يا شاهي
يعني الواحد بيتعلم عكس الحيوان اللي عنده
بدليل ان باباكي كان بيجيبلكم كلاب تتعلمو منها الوفاء والامل .. اتعلمتو النداله
اهو انا كنت باعمل كده
اجيب قطط غداره .. نقوم نبقى اوفياء
تفكير على كبير قوي يعني


ملحوظه
لو تحبي اعرف القطه صافيناز على الزوحلفه اللي عندك .. ياعالم يمكن تلاقي زبونها في عالم الدعاره وتجارة الرقيق


سلامووووووووز

Soooo يقول...

نورسين


عارفه يانورسين
كلامك ده والله هو اللي بيهون علي ثقالة بعض الناس اللي بيدخلو يتريقو وبتاع
بجد احساس اني ساهمت في رسم ابتسامه على وش انسان دي كبيره قوي .. وبجد تستحق ان الواحد يتعب ويستحمل عشانها اي حاجه

بس على فكره .. ساعات باحس ان غدر الحيوان وغدر القطط .. احسن بكتير من غدر بعض البشر

نزرتيني ياستي


سلاموووووووووز

Soooo يقول...

Bahz Baih

ايه يابهججه
من اولها كده داخل بتقولي يا سوسو
لا يا بهظ صحصح شويه وماتشربش الحشيش اللي بتعمله
محسوبك سوووو
ودي هبقى اعملها توبك زي التوبك اللي عملته عشان تفسر ليه اسمك بهظ

بس سيبك من كل اللي قلته
نورتني ياريس
وياريت تعتبر المدونه بتاعتي زي مدونتك تمام


سلامووووز

Soooo يقول...

Salwa

شفتي بقى .. اديكي كنتي ظالمه مدونتي حبيبتي

يلا صالحيها بقى وهاتيلها اتنين كيلو شيكولاطه

وصلحو ماوستاكم بدل ماتتهمو مدونتنا بنت الحسب والنسب والاصل والفصل

وصدق من قال .. عالاصل دور



سلامووووووز

محمود على يقول...


تسعة يا مفتري
حرام عليك

انا مبحبش القطط
بخاف منها لانها غدارة
وبخاف عليها عشان رقيقة

Soooo يقول...

محمود علي


عارف يابو حنفي
القطط مش غداره زي جنس الستات
اي والله العظيم
اقولك ليه
القطه بطبعها زي مانت قلت كائن رقيق .. وفيها برضه نسبة غدر ماقلناش حاجه
بس لما تطبطب عليها .. وتأكلها بايدك .. وتلعب معاها .. وتاخدها في حضنك لو انت نفسك حلوة ومش بتقرف وكده
صدقني بتبقى فاكره اللحظه دي .. صحيح ممكن لو حد غيرك حطلها اكل هتاكل وكده .. لكن من جواها مش هتنسى ابدا انك اتعاملت معاها برقه في يوم من الايام .. وبمجرد ماتيجي تعاملها برقه تاني زي مانت عملت معاها قبل كده .. هتلاقيها افتكرت
بينما الستات .. لغاية ماتموت ماينسوش الاساءه ويفضلو فاكرين ولو لحظه واحده قلت كلمه ضايقتهم .. او اتنرفزت عليهم وانت مش قاصد
فهمت حاجه؟؟


سلاموووووووز

Soooo يقول...

غير معرف

انظر التعليق والرد على التعليق .. السابقين وانت هتفهم اني بقيت ماثقش في جنس بنات حوا ده ابدا





سلامووووووووووز

غير معرف يقول...

لا البنات بيفتكروا كل لحظة حلوة
بس بييجوا بالحنية
وبينسوا برضو الزعل والحاجات الوحشة لو بس إنت راضيتهم وصالحتهم
مش تعمل زي القط البلدي يخربش ويمشي وعايزنا نجري كمان وراه نصالحه
ليه مش تخليك زي القط السيامي
لما بيعمل حاجة غلط أو يخربشك ييجي يتمسح فيك وعينيه بتقولك آسف مش تزعلوا مني
واضح ان الولاد وبما فيهم انت (رغم انك كنت مربي 9 قطط) إلا انهم مش فاهميين ولا هيفهموا القطط
نيااااااااااااااااااااااااووو

Soooo يقول...

غير معرف


اولا .. لو انت عايز تتكلم عن الموضوع اللي انا حاططه اهلا وسهلا
ثانيا انا بكره اني اتكلم مع حد من غير مايقول هو مين
ثالثا .. عن تجربه وعن خبرات .. القط اكثر وفاءا من تسعه وتسعين في الميه من جنس بنات حوا
رابعا بقى واخيرا

سلاموووووووووووووووووووووووووووووووو
وووووووووووووووووووووووووووووووووووو
وووووووووووووووووووووووووووووووووووو
وووووووووووووووووووووووووووووووووووو
ووووووووووووووووووووووووووووووووووووز

shreen يقول...

لعلمك بقى يا سووو
والله ما بهزر
انا فعلا شلت اسد على رجلى وهشكته
وما حصليش زى ما انت قلت

!!!؟؟؟@@@#$%%##@@&&***!!!!!!

واتكررت اكتر من مره
اسود كبيره
واسود صغيره


حتى تعبان
الاصله العاصره شلته ولف نفسه حوليا
رغم انه كان اتقل منى

انا عن نفسى
عمرى ما اخاف من غدر حيوان
الحيوان لما بيغدر بيكون علشان سببين

يا اما
خايف
يا اما جعان

انا اخاف جدا من غدر البنى ادمين اللى بيكون من غير سبب
بيغدورا لمجرد الغدر
الحيوان لا


انا فاكره موقف حصل
وانا فى جنينة الحيوان
كان فى راجل عايز يتصور مع الفيل
بس خايف
كل شويه يجرب يدخل عند الفيل وبعدين يبعد

وفضل موقفنى بتاع نص ساعه لما اتشليت رحت انا قلتله ممكن ورحت داخله عند الفيل على طول
وواقفه جنبه وما سكه زلومته
وقايله للمصور صور يا عم
انا لو حقعد استنى الاخ مش هاتصور مع الفيل السنه دى

قام الراجل اللى كان خايف استغرب جدا

وقاللى انت مش خايفه؟

قلتله لا اخاف ليه

انا اخاف من البنى ادمين اللى بره دول اكتر الف مره من ما اخاف من الفيل

بما انى ما اذتهوش يبقى انا عارفه انه مش هيعملى حاجه

بس الراجل تنح واتكسف
ودخل اتصور مع الفيل اخيرا

shreen يقول...

سووو
حطيت صور القطط

memoz_nemoz يقول...

شوف هو هيام عجباني اووووي
ونيوتن هههههههه ضحكت اوووووووي لما قولت انه اغبي قط
بس الموضوع عجبني وانا حاسه كده والله اعلم ان في منهم ناس حقيقين مش قطط يعني اه ممكن فعلا تكون ربت قطط بس في ناس انت بترمزلها بالقطط
بس بجد الموضوع تحفه ولا القطه اللي بتشاكس القطط وبتعاكسهم دي هههههههه مسخره بجد جميل اووووووي ربنا يوفقك

سهر الليالى يقول...

بوست دمه زى العسل ضحكت جدا
وطريقتك فى سرد الكلام زى العسل
رحمه الله على والدتك اللى عذبتها كتير بقططك دى
تحياتى

غير معرف يقول...

تسع بس يا سوووووووو.. طب ايه رأيك ان القطط اللي عندي كانوا حوالي 56 قطه.. بوزع منهم على الأهل والأقارب .. ودلوقتي حموووووووت على قطة واحدة بس مش لأقيه. طول ما انا ماشية في الشارع تلاقيني اقول الله قطه يا ختشي كميلة ...لو حد سمعني حيقول البنيه اتهبلت..

هييييييييييييييييييه دنيااااااااا وحشتوني يا قططي يا حلويييييييييين

غير معرف يقول...

اولا ازيك ياسوو وكلامك عن القطط دة فكرني بحاجات كتير انا بحب القطط بس من بعيد ومبحبش المسهم لان عندي عقدة غريبة منهم وقديمة كمان والمشكلة اني مبخافش من الكلاب الكبيرة كمان علي قد ما بخاف المس القطط والعقدة باة ان اخويا الكبير كان شرس شوية وهو صغير وكان لية بنت جارتنا كانت زية بالظبط وعشان كدة كانو اصحاب المهم اني مرة وانا كان عندي 6سنين سمعت صوته هوة وصحبتة بيضحكو اوي خرجت وانا فرحانة قلت اشوف بيلعبو باية عشان العب معاهم لقتهم حاطين قطة في علبة وقاطعين ديلها وبيقفلو العلبة عليها وفضلت اصوت واعيط وانهارت تماما كاني شفت عفريت وفضلت طول اليوم اترعش ومبرقة وكل ما افتكر افضل اعيط ومن ساعتها وانا جسمي بيتنفض لما بلمس قطة

Soooo يقول...

shreen

لا ياستي انا اخاف من الاسد طبعا وماقدرش اشيله
ده انا بخاف من الكلب
اقوم اربي اسد

شفت الصور بتاعة القطط بتاعتك وعايز قطه منهم لو ينفع
اتصرفي ماليش دعوة عايز قطه منهم
---------
dead_girl

والله يابنتي كل اللي كنت اقصده هو فعلا عن القطط مش بارمز بيهم لشخصيات تانيه وكده
وبعدين ماهو عالم القطط والحيوان عموما برضه زينا احنا البشر

والحمدلله انك علقتي وان الموضوع عجبك
---------
سهر الليالى

الحمدلله ان الموضوع عجبك
ومين عالم .. مش يمكن تكون القطط دي سبب لرحمة ربنا لامي على اللي كانت بتتحمله منهم من تجهيز لأكل واستحمالها ليهم
ربنا يرحمنا جميعا
نورتيني
---------
غير معرف

يااااه
ده انا على كده ابقى لسه تلمووووذ في تربية القطط
بس امانه عليكي يا شهد .. لو لقيتي اي قطط تاني ابقي هاتيلي قطاية تكون بيضا على بني
يكون لونها مشمشي كده
---------
مشمش


يالهوي .. اخوكي ده معقد اصلا هو والبت العبيطه جارتكم عشان يعذبو قطه كده
وصدقيني ربنا مش هيكرمهم
وكفاية البهدله اللي اخوكي فيها زي ماقولتيلي



سلاموووووز

shreen يقول...

سوووو
مش هينفع تاخد حد من العيال
اولا الصور دى بقالها سنتين
يعنى كبروا جدا

ثانيا
هما اصلا مش موجودين فى البيت
انحرفوا ومشيوا زى القطط بتاعتك

وعلى فكره الاب والام
مش فى الصوره
دى مامتهم وخالهم
ابوهم مجهول الهويه

Stella De Mare يقول...

انا بقرأ الموضوع ده و برد و انا نايمة و قططتين نامين على جنبى توتى و شوتا و قطة تحت البطانية سولى و قطه على المخده جنبى ستللا و من غيرهم الحياة ملهاش طعم كانوا 6 بس واحده اتسرقت و واحده اديتها هدية و هى نونو عشان ماما مشعايزة اكتر من 4 و تقريبا القطط اللى نايمين فوقى مركزين اوى مع اللى بكتبة بجد زى مايكونوا فاهمين انى بتكلم عليهم

ست البيت يقول...

يا ابن الذين ءامنوا يا سووو
أنا لو حد دخل عليا وشافني بضحك كجه في الشغل حيولوا منوسي اتجنن
فيه كده ؟ أن تقربلي ولا حاجة ...
أنا كدة راخرة مجنونة قطط ..ممكن تقرا بوست هل عادت بسبوسة
على د.منوسي عموما أنا كنت متخيلة كل قطة بجد أكتر واحدة كرهتها القط الشيرازي بجد ساعات بيبقوى شكله غبي بيحبووه على ايه؟
بقولك ايه يا سو ...ما تيجي نشترك في جمعية حماية حقوق القطط
يا بني دا أنا بنونو بالليل وحقيقي خايفين الا يطلعلي ديل...
بوست رائع وجميل ومقطقط
دمتم بحفظ الله

غير معرف يقول...

عشاق الگوگل القاء نظرة على هذا الموقع والتمتع

joo0joo0 يقول...

خلاص حيث كده اسلفك جوجو يومين

joo0joo0 يقول...

خلاص هابقى اسلفك جوجو يومين بس بما انه اسود اوعى تنساه ف كيس الزباله

غير معرف يقول...

و يا ترى اسم القطةاللى فى حياتك الفترة ديه ايه؟و ايه اللى حببك فيها؟؟ و لا انت بتحب تتسلى وتضيع وقت بس مع القطط و مبتحبهاش؟

غير معرف يقول...

بجد زعلتنى جدا على هيام لانها تشبه القطه بتعتى ومب بعد ما قطتى ماتت وانا معنتش بحب القطط بس يا ريت لو لقيت قطه زى هيام سميها بوسى منى

غير معرف يقول...

انا بحب القطط جداااااااا ونفسى يكون عندى 100 قطه مش تسعه بس

basma bahaa يقول...

هههههههههههههههههههههههههههههههه ياعم حرام عليك والله اللى بتعمله فينا دا!
واللى يشوف لغتك السردية داهيه يقول بتتكلم فى السياسة مثلا!!!!!!
انا كمان اللى خلانى اسرب ال 12 قطة اللى كنت مربياهم ان بابا قال يانا يا هم
وطبعا خدت موقف
زى موقفك دا بالظبط:]

rania يقول...

ههههههههههههههه
البوست رهييب
والقطط فظيعه
وفي عندك كذا شخصيه شبيه جدا لشخصيات قطط كانو عندي
زي رشا- عندي نهي
وزي هيام-عندي غاده وسيده
وسوشي- زي مهند
والبطيء ده البليد الي القطط بياكه اكله -كان عندي قط اسمه هيثم نفس المواصفات
لدرجه انك ممكن تضربه بالشلوت وميتحركش من مكانه
ههههههههههههههه